كاتب الموضوع :
ندى الزهر
المنتدى :
الارشيف
البارت العاشر
فهد بالسياره مستمتع يسمع عن اخبارها وعن دلعها وعن دلع اهلها لها لأنها الجعده
فهد : الله يجعلج من نصيبي مشاعل والله اييسر لي الخطبه
عالية : شفتي شلون كل البنات يسألون شعرج وصلات او طبيعي
غالية : والله خفت على عمري منهم كل وحده تسأل اقولها تركيب
فهد : ليش مالهم شعور يوم انهبلوا على شعوركم
غالية : والله يافهد اطول شعر غيرنا اخت صاحبك الكبيره وصديقتها لحد ظهرها بس والباقي كلهم قاصينه عالموضه
فهد : لاتقصونه عشان ترقصون بعرسي
عاليه : تبي تتزوج ؟؟
فهد: ليه ما اتزوج وش ناقصني ؟!
غاليه : مو ناقصك شي الا انت شيخ الشباب الله يتم لك بخير ويسعدك بس ماقلت لي منو سعيده الحظ ؟
فهد : مشاعل الفارس الي رحتوا حفلتها
غاليه لفت على عاليه
بعد ما عاليه شهقت
فهد خاف عليها : فيج شي
عاليه : لأ بس مستغربه
فهد : الله يهديج لا تشهقين مره ثانيه جذي
عاليه : بس مشاعل حضريه
فهد : وشنو يعني مو اوادم
عاليه : مو قصدي بس ابي افهم شلون راح تعيش بينا واحنا ناس مو مدلعين ومانعرف الدلع
فهد : ادعي توافق .. الله يقدم الي فيه الخير
عاليه : امين
ووصلوا البيت
عاليه بس ادخلت البيت راحت لغرفتها ركض لأن عادل دق عليها
غاليه حطت راسها على الطوفه وغمضت عيونها حست بدوخه قويه
نزلت للأرض لأنها فقدت توازنها وما عادت قادره
حست انها بدت تفقد وعيها ومافيها تتكلم اخر كلمه تذكرها : ياربي رحمتك يارحيم
@@@
عند عاليه وعادل
عادل : هلا وغلا بأحلى بنت بالديره
عاليه : هلا بك شلونك عدولي
عادل : انا بخير ومشتاق لج موت
عالية : وانا بعد
عادل : انتي شنو
عاليه : انا مثلك
عادل : انا شنو فيني
عالية : مافيك شي كنك البخت
عادل : قوليها ليش مستحيه
عاليه : عادي
عادل : ابي اسمعها منج قوليها
عاليه بحيا واضح : مشتاقه لك حبيبي
عادل : فديت الي تستحي انا
عالية : عدولي شلون عمي وعمتي
عادل : بخير الحمد لله
عالية : يا جعله يارب
@@@
عند فهد الي بالسياره لحظه نزول البنات
قال بخاطره
ليت ما اكون تسرعت
خل اروح اقول لعاليه تسوي لي عشا
نزل دخل الدوانيه
مادخل مع باب الحريم
كان قريب منها لكن ...؟
شاف محمد و سلطان
فهد : السلام عليكم
محمد وسلطان : وعليكم السلام يا هلا
فهد : شباب تبون تتعشون معاي من المطعم او البيت
محمد : اكيد المطعم من راح يسوي عشا البيت الكل نايم
فهد : البنات سهرانات
محمد : اجل طبخ البيت احسن انا ما احب المطاعم
سلطان : انا اي شي عادي
فهد : اروح اقولهم يسوون العشا وارجع
محمد : اذنك معاك
في جناح التوم واقف عند الباب طق الباب
جاه صوت عاليه : تعالي حجيه
فهد : انا فهد
عاليه : حياك يالغالي
فهد وهو يفتح الباب : الله يحيج فاضية علويه
عاليه : امرني انا اكلم عادل
فهد : تكلمين عادل
عاليه : اي
فهد : اجل اخليج
عاليه : تامرني على شي
فهد : لا سلامتج بس وين غلاوي
عاليه : الله يسلمك غلاوي ما ادري عنها ماصعدت يمكن بالمطبخ
فهد : اخليج انا
وطلع منها وراح المطبخ ما لقاها
صعد غرفة غاليه دورها مالقاها بكل مكان دور عليها
استغرب وين ممكن تكون موجوده طلع موبايله ودق عليها وهو يدور بالبيت يبي يعرف وينها
فكر يدورها بالحوش وهو عند باب صاله النساء سمع رنه موبايلها وركض لها
فهد عطاها كفوف خفيفه على خدها : غلا تسمعيني
غلا ردي علي
رفع صوته : محمد محمد
يا محمد
بأعلى صوته عاليه
بدر
من الشباك المطل على الحوش طلع مشعل : اشفيه شصاير
فهد : غلا ما ادري شنو فيها
طايحه ما ادري شنو فيها
مشعل : خلها ورح شغل سيارتك انا اجيبها
فهد : يبه لا تعب عمرك خل بدر ينزل
مشعل : انا شنو اقولك اخلص يلا رح شغل سيارتك
وابتعد عن الشباك
وفهد طلع يشغل السياره
محمد طلع بالشارع
محمد واقف عند السياره : اشفيك فهد
فهد : ولا شي بس غلا طاحت ما ادري شنو فيها
محمد : توديها الطبيب
فهد : اي
محمد : من راح يشيلها
فهد : ابوي
محمد : انزل جيبها وانا اسوق روح
فهد : قلتها
ونزل وكان ابوه توه طالع مع الباب وطفلته بين يديه وغترته على كتفه وطاقيته وعقاله على راسه وكان مسرع في مشيته ورجع فهد للسيارة وفتح الباب لابوه وغاليه
في السيارة بعد دقايق من تحريك السيارة من امام منزلهم
غاليه على فخوذ ابوها رفع نقابها عن وجهها لانه حس فيها اختنقت من صوت نسمها وقال بصوت عالي : افتح الشبابيك كلها
محمد بصمت نفذ طلب خاله
غاليه في عز اختناقها قالت : يارب يا منجي نبيك وهو في بطن الحوت نجني لا اله الا انت سبحانك اني كنت من الظالمين
قالتها بصوت خفيف لكن لقرب ابوها منها سمعها
هزها بخفه : غلا غلا تسمعيني
مشعل قال في قلبه : يارب ناجتك وهي في غايبه عن الوعي يارب تحميها يارب نجيها يارب احفظها ودمعة عينه
على بنته وهو ما يدري شنو فيها كل اللي يعرفه انه غايبه عن الوعي
حط يده على جبينها الحار وحرارته العالية
حط يده على جبينها الحار بدأ يقرى عليها المعوذات واية الكرسي وينفث قرا عليها اكثر من ثلاث مرات
مشعل : فهد قبل شوي كانت حاره كان عليها حراره
فهد : لأ بس قبل تنزل من السياره كانت دايخه
مشعل ضم غاليه لصدره حيل
ياقلب ابوج الله يحميج
واول ماوقفت السياره امام باب قسم الحوادث
نزل فهد بسرعه وقالهم يجون ياخذونها من السياره
جو الممرضتين ومعاهم كرسي ولما فتحوا الباب
الممرضه الأولى لزميلتها : جيبي سرير ماينفع كرسي مغمى عليها
وبعد عشر دقايق في غرفه الدكتور
الدكتور : حرارتها مرتفعه جم يوم صارلها تعبانه
فهد : قبل نص ساعه ماكان فيها شي
الدكتور : شكلها كانت في تجمع او عند احد
فهد متنرفز : اي
الدكتور : متأكد ماكان فيها شي قبل ساعه
فهد : اي
الدكتور : تبي كلمه حق
اكلمك بصراحه
فهد : ياليت
الدكتور : احس فيك متنرفز من كلامي عن زوجتك لكن ياولدي انا ماسألتك عشان شكلها لا والله انا رجل عندي بنات اكبر منها لكن انا سألتك لأن انا رجل دين اعرف مثل ما انت تعرف ان العين حق
وخصوصا ان درجه حرارتها مرتفعه جدا وبفتره قصيره جدا كما ان ضغط الدم عندها في هبوط مستمر
فهد : اولا هي اختي وما هي متزوجه ثانيا شنو نقدر نسوي
الدكتور : السواة سوات ربك احنا راح نعطيها خافض حراره لأن ارتفاع الحراره العالي له مضاعفات ويمكن يدخلها غيبوبه
فهد : سوو الي عليكم الله يعطيك العافيه
الدكتور : كمل اوراقها عشان ترقد عندنا جم يوم الى ان نتأكد من صحتها
فهد : توكل على الله
واخذ فهد الأوراق وطلع عند ابوه شافه حاط راسه بين كفوفه
فهد قعد يمه : يبه
مشعل لف عليه بعد ما رفع راسه من بين كفوفه
مشعل : شصار شنو فيها
فهد : حرارتها مرتفعه راح تنام عندهم
مشعل : ما قال لك السبب
فهد : والله الدكتور فيه خير ويقول يمكن انها عين لان انا قلت له انها قبل ساعه ماكان فيها شي
مشعل : أي والله ان كلامه عين العقل بس رح كمل اوراقها و انا اروح لها اشوفها
فهد : ابشر بروح اكمل اوراقها
عند شباك الكاتب فهد ينتظر اوراقه
وقف رجلان احدهما مصاب مجلس على كرسي شاب في مقتبل العمر
والآخر في اواخر العشرينات
عزيز : شنو تحس فيه الحين
مشعل : احس بعوار فضيع الله يسامحه
عزيز : الله يسامحه انا بعرف منو معطيه الليسن انا اخذت رقم لوحته وشغله عندي
فهد انتبه ان الصوت صوت عزيز كانوا واقفين وراه و بعد ماسمع صوته لف عليه
فهد : عزيز عسى ماشر شصاير
عزيز : فهد ياهلا والله ماشر بعد ماطلعنا من عندك رحنا المطعم ناكل وجبات وبعد ماطلعنا جا واحد طاير وصدم مشعل كان مسرع وشكله ما انتبه لمشعل
فهد : ماتشوف شر مشعل
مشعل وعزيز : الشر ما يجيك شعندك هني عسى ماشر
فهد : ماشر بس اختي تعبت شوي وجبتها ومقررين يرقدونها عندهم
عزيز يبي يعرف غاليه او عاليه : زوجها وينه
فهد : مو متزوجه
عزيز : أي انا حسبالي متزوجين خواتك
فهد : لا وحده متزوجه والثانيه مو متزوجه
عزيز : اها
الموظف : اخوي لو سمحت اوراقك خلصت
فهد : الله يعطيك العافيه
الموظف : الله يعافيك
عزيز : انا ادخل مشعل الدكتور واجيك
فهد : مو مشكله انا بروح ودق علي اذا خلصت
عزيز : مو مشكله
وراح فهد لابوه : يبه
مشعل : سم
فهد : حطوها بالعمومي بجناح 16
مشعل : عمومي لا روح شوف خل يحطونها بغرفه خصوصي
فهد : ابشر الحين اروح
وعند نفس الموظف : لاهنت يالغالي ابيك تغير الغرفه نبي لها غرفه خاصه
الموظف : لو كان موجود ابشر بس اذا مافيه ما اقدر افيدك بشي
فهد : حاول
الموظف : ابشر
رفع السماعه وكلم واحد وفهد سمع تلاطيش حجي ان الغرفه 4 بجناح 15 اذا كان يبيها او لا
وبعد ربع ساعه الموظف : اخوي
فهد : سم
الموظف : مالقيت لك يالغالي
فهد : اها اوكي مو مشكله
اخذ اوراقه ودق على عزيز : عزيز تعرف احد بالمستشفى
عزيز : أي ليش
فهد : الموظف يقول مافي غرفه وانا سامعه يكلم بالتليفون يساله اذا كان يبي الغرفه او لا
عزيز : اها طيب الحين اجيك بس يجبسون رجل مشعل واجيك على طول الحين اكلم واحد هني
عزيز : الو صباح الخير
الطرف الثاني : يا هلا يابو فارس
صباح النور امرني
عزيز : انا عندك بالمستشفى وابي غرفه خصوصي الحين لو من تحت الارض
الطرف الثاني : ابشر يابو فارس عطني وقت اتأكد من الغرف اللي عندي وارد لك خبر
عزيز : انا قلت لك نص ساعه وبعدها راح يصير شي ما يعجبكم
الطرف الثاني : ابشر ابشر الحين ارد لكم خبر الغرفه باسم منو ؟؟ منو المريض
عزيز :غاليه مشعل
الطرف الثاني : ابشر مع السلامه طال عمرك
عزيز : مع السلامه
وبعد ما خلص مشعل راحوا لعند فهد : ها ما جا لك الرجال
فهد : أي رجال
عزيز : هذا الاثول ما يفهم انا قلت له يدور غرفه الحين
دق على الرجال : انت وينك
الطرف الثاني لقيت غرفه يابو فارس لكن دورتك ما لقيتك
عزيز : انا بالحوادث قايل لك لا تطول ما تفهم
الطرف الثاني :سامحني يابو فارس
عزيز : خلصني نقعتنا
وبعد ما وثل الرجال لهم : اوراقك يابو فارس
عزيز : الاوراق مو لي الاوراق لصديقي
الرجال : كل اللي من طرفك تهمنا راحتهم
فهد : هاذي الاوراق لكن ليش قبل شوي يقول مافي غرف
الرجال : ما قلت لنا انك من طرف العم ابو فارس
فهد : ولازم الواسطه عشان احصل غرفه
عزيز قاطعهم : فهد خله عنك وطالع الرجال : رح خلص الاوراق انا انطرك هني
الرجال : ابشر طال عمرك
فهد : شلون قدرت عليهم
عزيز : هني مايمشي شغلهم الا بالواسطات واذا ما دست على راس كبيرهم الصغير ما يحترمك
فهد : هذا كبيرهم
عزيز : لا هذا واحد من الصغار لكن في لهم اوامر ان طلباتي عندهم اوامر
فهد :ايي
فهد : عزيز
عزيز : هلا
فهد:امش نروح لابوي
عزيز : الوالد هني
فهد : أي جا وياي
عزيز : ليش اتعبه
فهد : هو اصر انه يجي
عزيز : عيل يلا نروح له مايصير يبقى بروحه
ولما وصلوا لعند مشعل
فهد : يبه
مشعل : سم
فهد : هذا خويي عزيز الفارس اللي حكيت لك عنه وهذا اخوه سميّك
مشعل : حيا الله عزيز
عزيز : الله يسلمك يا عمي
وسلموا على بعض
وبعد ما قعدوا جاء الرجال : طال عمرك الغرفه جاهزه
عزيز : اوكي البنت بالملاحظه عطهم الوراق خلهم يطلعونها الجناح
الرجال :ابشر يا طويل العمر
عزيز : بس قبل تأكدت من نظافه الغرفه شيك عليها بنفسك
الرجال : ابشر الحين اشيك عليك
بو فهد :يا وليدي عزيز
عزيز : سم يا عمي
ابو فهد : سم الله عدوك ياليت تقولهم اني انا اللي راح ارافق معاها
فهد : ليش يبه الحين انا اجيب امي
مشعل : لا تجيبها ولا شي
فهد : خلاص اجيب عاليه
مشعل : انا شنو قلت
عزيز : ياعمي ابشر انا اكلمهم بس ليش اتعب عمرك
مشعل : انا اللي برافق معاها
عزيز : الحين اكلمهم لك وما يصير خاطرك الا طيب
مشعل : الله يسلمك يا وليدي
****
عند الشباك واقف معطي ظهره الشباك ويطالع فيها مركز عليها النظر
يارب تقوم بالسلامه
قالها بصوت اشبه بالتنهيده
اقترب من سريرها ومافي بالغرفه غيرهم الفجر بعد الصلاه قرب منها
حط يده اليمنى على جبينها وتلى المعوذات ونفث عليها وقرأ اية الكرسي ونفث عليها
وقرأ بعض الأدعية
ورفع يمناه عن جبينها واقترب منها وطبع بوسه على جبينها
مشى خطوتين وجلس على الكرسي ورجع راسه للخلف وسكر عيونه
عنده بنفس الوقت
يطبع بخفه على لوحه المفاتيح
@@ لعبه الأيام @@
من ماذا انتي خلقتي لكي من الأوجه الكثير من انتي وكيف عرفتي من اكون ومن ارسلك لي
لماذا يعود لي الماضي بأحداثه ويلون حاضري باللون الرمادي
هجرت الحب وايامه
ولن اغامر
ولن اشرب كأس العشق
ولن اسبح في محيط الغيره الذي يسحبني الى قاعه ليدمرني بالشك
كما في اوراقي المطويه من سنوات
أرجو منك اجابتي بكل صراحه
مالي بالدنيا مكان
وارسلها لها على الرسائل الخاصه
وحط الاب توب على الطاوله ونزل المطبخ يسوي كوب شاي عشان يصحصح مثل كل يوم
بعد ما عبى غلايه الماي وقعد على الكرسي ينتظر الماي يسخن يسمع صوت خافت ما يدري الصوت وين ما عطاه اهتمام
بس الصوت جذبه
صوت احد يبكي ويكتم بكاه قام وحاول يركز على الصوت ويمشي بإتجاهه انتبه عليها جالسه في ممر الي يطلع على المطبخ الخارجي بخطوات سريعة جدا قال لها بعد ما ضمها : اشفيج وش جابج هني
عاليه ضمت بدر بأقوى ماعندها : ما اقدر والله حاولت بس مو بيدي وربي يابدر
بدر خايف عليها مسح راسها يهديها : اشفيج حبيبتي
عاليه : ما اقدر ادخل جناحنا بدونها اخاف وربي
بدر بقل صبر : انتي منو وشنو صاير
عاليه :انا عاليه والله يابدر اني حاولت ادش جناحنا بس ما قدرت
بدر : ليش
عاليه : بدون غاليه ما اقدر خايفه وابوي ما خلانا نروح معاه
بدر : ليش شنو صار وغاليه وين
عاليه : غاليه طاحت بالليل عند باب جناحنا واخذوها للمستشفى ورقدوها هناك وابوي ما رضا اي احد يطلع من البيت حتى فهد خلاه يرجع البيت وهو بس إلي جلس معها
بدر : ليش ما قعدتوني
عاليه: صوت عليك فهد وانا صوت عليك لكن انت ما سمعت يمكن
بدر : كنت نايم ماسمعت احد فيكم
عاليه : الله يخليك بشوفها
بدر : انزين انتي تعالي معاي
وقف وخلاها توقف معاه ومشى وهي ضامته
تقول : بدوري راح تخليني اشوفها صح
بدر : ان شاء الله بس انتي اسمعي الكلام ونامي واذا قمتي الظهر اوديج
عاليه : ان شاء الله بس مابي انام بغرفتي
بدر : من قال انتي راح تنامين عندي على سريري عشان اول ماتقومين اوديج انا شابك عالنت انظرج تقعدين
عاليه : طيب
وبعد ما نامت بفراشه غطاها
نزل المطبخ يسوي شاي لأنه نسى يسوي قبل شوي وانشغل مع عاليه وهو بالمطبخ جته عاليه تركض وهي تبكي : بدر .. بدر ..
بدر فز لها بسرعه : انا بالمطبخ
وضمته : بدر ليه تخليني
بدر : ماطولت انا بس اسوي شاي وارجع فوق
عاليه : انا شفتها تركض بعيد عني انا اناديها وهي تقول لي تعالي معاي
بدر يمسح على راسها : تعوذي من الشيطان ياعالية أنتي عاقلة
انطري معاي شوي هني بسويلي شاي هذا الماي سخن بس دقايق
اخذ كوب الشاي بيمناه وبيده اليسرى عكازه وعاله ماسكه يده اليسرى
وراح غرفته وغطاها وهي بالسرير قالت : بدر تكفى لاتروح مكان
بدر : ان شاء الله ماراح اطلع الا اذا قمتي
وراح عالكرسي واخذ الاب توب من الطاوله وحط الكوشيه ( خداديه ) على فخوذه وحط الاب فوقها
لما سوى تحديث للصفحه لقى من غلا دنياي
أتسأل من انا ؟
انا من أُرسلت لأرسم سعادتك بريشه أيامي
من بين اسطر خواطرك أجد نفسي
أجد أني اجلس بين ثنايا كتاباتك
انا من عشقتك حتى الثمالة
انا احبك منذ أن قرأت أحرف كتبت لها
أشعر بالغيرة منها انا من تراك بين الحين والآخر واروي عيني التي لا يشبعها النظر إليك
بدر زماني تالله إني أعشقك
واعشق مشيتك
واعشق نظرتك
حين تنظر الي بتساؤل
واعشق رائحة عطرك التي تضع منه بخات عديدة
وهو نفسه عطرك من سنتان لم تغيره ولن تغيره
لأنه يعجبك
واستأنس بالأبخرة الساخنة المتصاعدة من كوبك الذي طبع عليه أول حرف من اسمي و التي اعتدت على ان يكون بين يدك كل يوم في مثل هذا الوقت
بدر سماي
يفرحني اني اخذ قليل من اهتمامك
اشعر بك وانت لاتعرف ما الشعور الذي يحتويك
سأسهل عليك الطريق خلق الحب بداخلك لي وحدي ولن اسمح لك بوضع خواطر او ابيات تحمل مشاعر ليست موجهه لي
(( والله راح ازعل منك اذا لقيت موضوع لها لو كلمه
انت لي يا بدري الغالي
افهم انت لي وانا لك وحدك
و ياليت الأيام تجمعنا تحت سقف واحد
أنا قريبه منك حيل ..
صدقني لو وعدتني انك تستر علي انا بنفسي راح اقولك انا منو ؟
بس الي ابيك تثق فيه هو ان انا ما اقدمت على هالخطوة الجريئه الا بعد ما عرفت احساسي لك
بدري ما ابيك تزعل مني لأن الحين ما اقدر اقولك انا منو ؟.
بس اتأكد من شي واحد بعدها ربك يحلها ))
إليك اشواقي وحبي
غلا دنياي
قرا الرساله اكثر من مره
يستوعب الي يقراه من هي الي تعرف عنه كل شي وتعرف حتى كوبه الي مايشرب الا فيه لأن طابع عليه حرف B اول حرف من اسمه
طالع بالكوب وقال اول الخيوط الي عطتني اياها انها تصير لي واول حرف من اسمها
شنو اسمها
اتوقع بدور لا يمكن بدريه او يمكن بدره لا لا يمكن بسمه لا براءة لا يمكن بيبي او بشرى
يارب إذا كان في خير سهله لنا
ويا رب اذا فيه مضره لنا ابعدنا عن بعض
بموضوع جديد
عنوانه " الضياع "
بمتاهات افكاري
يتخبط شعوري
هل هو فقط اعجاب
ام هو مجرد سراب
يعود الي بأدق أحداثه الماضي
ماذا حدث بحاضري كنت راضي
هنا التقينا في هذا المكان
فقط تغير علينا الزمان
و ها هي تعود لي بحله جديدة
بعد فراق دام سنين عديدة
نفسها هي ونفس مشاعرها
ونفس مشاعري وحبي لها
يا دنيا هل هي هذه ام هي منها نسخه
صورتها في عقلي إلى الآن راسخة
فوق هام السحب أطير
ما عرفته ليس الكثير
لكن انه إليها بداية طريقي
لم اصدق ما اقرأه هل هو حقيقي
* مالي بالدنيا مكان *
على البحر بنفس الوقت عند عزيز واهله
بنص السوالف
عزيز : العنود ترا في مشوار لازم تروحونه انتي وشعوله اليوم
العنود : وين
عزيز : شفتي غاليه اخت رفيجي فهد
العنود : أي اشفيها
عزيز : بالمستشفى
العنود : لاحول ولاقوه الا بالله شلون ومتى وشنو فيها
عزيز : يقول تعبت والدكتور كاتب لها راحه عندهم بالمستشفى
العنود : أي راحه بالمستشفى اصلا هو سبب الامراض
عزيز : المهم مو تنسون
مشاعل تطلع العنود : اكيد عطوها عين
العنود : تصدقين والله يمكن
مشاعل : مو يمكن الا اكيد لان البنات امس كل شوي يسالونها شعرها وين مركبته
العنود : أي والله الناس ماتعطي خير
عزيز بفضول : عين على شنو
العنود :والله كل شي فيها حلو وخصوصا شعرها ما شفت البنات شلون اكلوها بالاسئله
عزيز : ليش شعرها اطول من شعرك
العنود :هههههه شعري ولا شي بالنسبه لشعرها
عزيز شعرها لوين
العنود توقف وتاشر على تحت ركبتها : لين هني واطول يمكن
عزيز : يلا عاد عن الجذب
العنود : أي وربي ما اجذب شعرها ما شاء الله ياخذ العقل
عزيز : ما شاء الله عليهم
مشاعل : أي والله كامله والكامل وجهه زين وادب واخلاق
عزيز راح بفكره للي بجناح 15 مرقده
عزيز في وسط افكاره
معقوله يصكونها عين عشان شعرها صج الناس ماتعطي خير
***
الصبح الساعه ٩ جالس على النت دخلت امه : صباح الخير
بدر :يا هلا بام بدر صباح النور شلونج
ام بدر : الحمدلله على كل حال
فاضي
بدر : اذا ما اكون فاضي عشانج اكون فاضي لمنو
ام بدر : قوم ودني لبنتي
بدر : اول نكلم ابوي نشوفه يرضى
ام بدر : ليش مايرضى كافي امس حرق قلبي عليها
بدر : يمه انتي تعرفين ابوي كلمته وحده
ام بدر : كلمته وحده ويحرق قلبي على ضناي
بدر : زعلانة منه
ام بدر : اي والله حزت بخاطري
بدر : طيب البسي الحين اكلمه ونطلع
واول ماطلعت امه راح عند سريره طالع بوجه عالية باس جبينها وقال : بسم الله وبصوت اعلى شوي عاليه يلا نبي نروح الطبيب
عاليه : هممممم
بدر هز كتفها بخفه : علويه نبي نروح الطبيب يلا قومي
عاليه قامت بسرعه : طيب طيب الحين البس بس لاتروح وتخليني
بدر : انا قعدتج عشان تروحين معانا
وهي تقوم من السرير
عالية : الحين البس وارجع لك
بدر : طيب انا ناطرج
وبعد ما طلعت عالية من غرفته دق على ابوه
بدر : السلام عليكم
مشعل : وعليكم السلام
بدر : شلونك يبه
مشعل : الحمدلله على كل حال
بدر : يبه امي تبي تجي عند غاليه
مشعل : اي ما يخالف خل امك تجيب لي قهوه
بدر : ابشر يبه عاليه تبي تشوف اختها عادي اجيبها
مشعل : اي عادي من قال ممنوع
بدر : لا بس امي تقول انك منعتهم يروحون بالليل
مشعل : طيب طيب اخلص جيبوا لي قهوه راسي يوجعني
بدر : ابشر يبه مسافه الطريج
وسكر ونزل تحت لقى امه وعاليه جاهزين و ناطرينه
ام بدر : كلمت ابوك
بدر : ايه يقول جيبوا قهوه
ام بدر : جاهزه القهوه وحطيت له قرص وحليب
بدر : مجهزه اغراض حبيب القلب
ام بدر بحرج : استح ياولد
بدر : زين يلا تأخرنا
لحظه وصول بدر وامه وعاليه
ام بدر تمشي بخطوات سريعه وبدر يمشي يم عاليه ولما وصلوا دقو على مشعل قالهم رقم الغرفه
ام بدر مشت بسرعه للغرفه
اما عاليه وقفت عند الباب
بدر : علوية تحسين بشي
عاليه : لا بس خايفه
بدر : من شنو ؟
عاليه : احس فيها تعبانة اشوفها جدام عيني نايمه احس بالمها يا بدر والله احس بالمها
بدر : تعوذي من الشيطان وسمي بالله وادخلي
عاليه : اعوذ بالله من الشيطان الرجيم بسم الله الرحمن الرحيم
فتح الباب بدر وعاليه كانت على يساره عاليه شافت غاليه نايمه على السرير وما تتحرك والاجهزة موصله لها التنفس .. القلب .. وعلى جبينها كماده باردة واختها ساكنه بلا حراك
وقفت عند الباب لاهي دخلت ولا هي طلعت
بدر بصوت واطي :يا تدشين يا تطلعين
عاليه : اطلع وروحي هني اطلع ونصفي الثاني هني
نزلت دمعتها بدون صوت على منظر اختها مشعل شاف بنته شلون ساكته راح لها وضمها حيل لصدره : تعوذي من الشيطان يا عاليه هي بخير لكن نايمه
عاليه : انا احس بالمها يبه احس فيها
مشعل عوره قلبه على بناته : تعوذي من الشيطان علويتي
عاليه : أعوذ بالله منك يا الشيطان أعوذ بالله منك يا الشيطان
مشعل مشى عاليه وقعدها على الكرسي اللي جنب كرسيه
مشعل : ام بدر صبي قهوه
ام بدر وهي تمد الفنجال : سم
مشعل اخذ الفنجال : سم الله عدوج
دق موبايل عاليه شافت الشاشه قالت لبدر : رد عليه ما اقدر
بدر اخذ الموبايل وطلع برا الغرفه
بدر : الو
عادل بخوف : بدر وين عاليه
بدر : موجوده
عادل : ليش موبايلها معاك
بدر : هي عند غاليه
عادل : غاليه وين وليش
شنو يمنعها انها ترد
بدر : عادل غاليه طاحت امس مريضه وعاليه الحين عندها وتعرف عاليه ما تتحمل رقيقه
عادل : انا من امس ادق عليها قلت يمكن نايمه
بدر : لا ما قدرت تدخل الغرفه لان غاليه مو موجوده فيها
عادل : انتوا بمستشفى (,,,,,)
بدر : ايه
عادل : انا جاي بالطريج
بدر :حياك الله
عادل : مع السلامه
بدر : مع السلامه
وسكر ودخل الغرفه وقالهم ان عادل جاي بالطريج
ام بدر تفتح حافظه الطعام اللي فيها القرص
تمد حافظه الطعام لبو فهد : سم
مشعل : بس ماني مشتهي
ام بدر : اكل شي .ن. يفيدك
مشعل خزها وقال بنبره حاده قلت شيليها الا اذا عيالج يبون خليه عشانهم
بدر : يبه الله يحفظك لي اكل شي انت على عشاك
مشعل : ماني جاهل تحايلوني قلت شيليه من جدامي
ام بدر : شصاير لك مشعل اكل
مشعل : انتي تبين تعانديني
بدر قم خذ امك البيت
ام بدر : مب رايحه ليش تبي تحرق قلبي على ضناي مثل امس
مشعل ساكت
ام بدر : يابو فهد ياجعلك ذخر اشفيك
مشعل ساكت
بدر : يبه انا وعاليه برا نشوف عادل شكله وصل
مشعل ساكت
ام بدر : الله معاك
اول ماتسكر الباب
ام بدر : اشفيك حبيبي
مشعل ساكت
ام بدر قامت وقعدت جنبه
ام بدر : مشعل رد علي كلمني
مشعل : اخذي اكلج وارجعي البيت
ام بدر : انا بقعد عندك لو مايزعجك وجودي
مشعل ساكت
ام بدر : يابو فهد أحيان الكلام هو العلاج
ترا حتى انا مشتاقه لها مثلك بس مانقدر نقول غير الله يرحمها
مشعل في لمعه بعينه
ولازال ساكت
أنا مقدره وضعك ولو ما أعرفك كان صار شي ثاني بس انا ادري شلون كنت تحبها
ومن حبك لها حبيتني
بس لاتحسب اني ما اغار الغيره تاكل قلبي بس ما اقدر اسوي شي كنت اتمنى اكون انا هي واخذ من حبك لها شوي وادري ان بناتي يشبهونها حيل ونسخه منها
مشعل ساكت بس نزل راسه
ام بدر : انت تونس شي
مشعل : الدعوة مو شوق لأم فهد الدعوة ضناي جدامي ما ادري شنو فيها الدكتور قالي ارتفاع حرارتها المفاجئ يمكن يدخلها غيبوبة وهم الحين مو عارفين هي بغيبوبه او هو مجرد اغماء راح ينطرون لين باجر ويقررون اذا هي بغيبوبه
او لأ
وانتي تقولين شوق وما شوق
بنتج ماعاد تروح عرس او حفله ان قامت بالسلامه
ام بدر الجمها اللي سمعته
مشعل : وتلوموني اني ساكت الجمني الي الجمج الحين والدكتور فيه خير ملتحي وفي وجهه سمات الصالحين قال ان الي عرفه انها كانت بحفله وقال يمكن انها عين لان الزمن هذا الناس ما تعطي خير وارتفاع حرارتها السريع والعالي راح يأثر عليها
ام بدر : الله يستر عليها الله يقومها بالسلامه
مشعل : ابعدي الاكل عني ولا اسمع انج علمتي احد لو منو ما كان
ام بدر هزت راسها بدون لاتتكلم
***
عزيز الساعه 10 قاعد بالصالة
دشت عليه ام مشعل : السلام عليكم
عزيز : وعليكم السلام هلا وغلا باحلى ام بالدنيا
ام مشعل : الله يحرسك يارب هلا فيك
عزيز : يمه
ام مشعل : هلا يمه
عزيز : يزعجك لو اتزوج وحده مو من اهلي
ام مشعل : الف مبروك يا يمه الله يسعدك يارب بس منو هي وما يزعجني انها مو من الاهل
عزيز : اخت صاحبي فهد
ام مشعل : اللي يات للمستشفى عند العنود هي وتومها
عزيز : عليج نور أي هي
ام مشعل : وحده منهم متزوجه والثانيه لا
ما شاء الله عليهم ادب واخلاق وزين وانا شفت صورها بالحفله عليها زين يا ما شاء الله
عزيز بقلبه وانا شنو ماخذ عقلي غير عيونها وشعرها
عزيز : يعني رايج اتوكل على الله واتقدم لها
ام مشعل : أي بس يمكن ما يزوجونك
عزيز : ليش
ام مشعل بعقلانيه : هم بدو واحنا حضر وفي اختلاف كبير بيننا و بينهم
في كل شي هم لهم اطباعهم واحنا لنا اطباعنا
بس والله شكلها محترمه ومؤدبه بس ...
عزيز بسرعه : شنو ؟؟
ام مشعل : مو كأنها صغيره
عزيز : البنت ما يهم عمرها المهم ادبها واحترامها لزوجها وللي اكبر منها
ام مشعل : عيل توكل على الله وسو اللي انت تبيه واشاور ابوك اول
عزيز : اكيد باذن الله بس البنت الحين بالمستشفى
ام مشعل : افا ليه
عزيز : امس بعد الحفله طاحت على اهلها يمكن عين لان العنود تقول الكل كان يسال عن شعرها
ام مشعل: أي والله شعرها اييب العافيه اهي واختها والله ما تستاهل لازم نروح لها
عزيز : ان شاء الله متى تبون اوديكم
ام مشعل : تبي نروح لها الحين
عزيز : لا البنات سهرانات ومابي اخرب نومتهم وخصوصا انهم ما ناموا الا الصبح
ام مشعل :وانت ليش ماطولت بنومتك مثلهم
عزيز :عارفتني انا ما اعرف انام الصبح
ام مشعل :بس لازم ترتاح
عزيز : برتاح القايله مو الحين
ام مشعل : على راحتك عيل نروح للناس العصر
عزيز : باذن الله
ام مشعل : عيل اخليك
عزيز : وين تو الناس خلك عندي
ام مشعل: بروح عند اهلي صارلي جم يوم ما رحت لهم
عزيز : سلمي على جدتي صار لي يمكن اسبوع ما رحت لها
ام مشعل : فيك الخير
عن اذنك
عزيز : اذنك معاك يالغاليه بحفظ الرحمن
بعد ما طلعت ام مشعل
شكل غاليه مزيونه لانها دشت مزاج امي وامي مو أي وحده تعجبها يارب يوافقون
خل ادق على فهد اشوفه وينه ابلغه ان اهلي راح اييونهم العصر
بعد ثالث رنه جاه صوت فهد النايم : هممممممممم
عزيز : صباح الخير
فهد : يــا هــلا صباح النور
عزيز :نايم يلا قوم
فهد : مانمت الا قبل شوي
عزيز : صج والله
فهد :والله رديت البيت الساعه 6 ومانمت بسرعه
عزيز : اوكي انا سهران لين الحين ما نمت وما راح انام
فهد : عزوز رح ارتاح
عزيز : ما اعرف انام الصبح نومي الظهر والليل بس
فهد : الله يعينك على عمرك طيب خلني ارتاح
عزيز : تعال عندي وجيب ابو رجا معاك وبدر اخوك معاك
فهد : ليش شعندك
عزيز : ما عندي شي ابي اريقكم
فهد : عزيز
عزيز : يب
فهد : خلني انام اجيك العصر
عزيز : ايي على طاري العصر ترا اهلي راح يزورون اختك في السمتشفى
فهد فرحان : لا يتعبون حالهم
عزيز : أي تعب هذا واجبنا
فهد :حياكم الله
عزيز : يلا قوم تعال ولا تبي انا اجيك
فهد بسرعه : انت تعال
عزيز : اخاف اجي وانت نايم
فهد :لا حياك الله تعال
عزيز : الله يحيك يلا مع السلامه
وسكر وراح غير ملابسه وطلع لبيت فهد وباله مشغول في
غاليه يتخيل شلون شكلها وشلون شعرها صاير وشلون راح يعيشون
افكار كثيرة اخذته لعالم وردي
بعد ساعه كان فهد ومحمد وعزيز وسلطان بالدوانية
ومن بين السوالف دق موبايل عزيز ورد عليه
عزيز : هلا وغلا صح النوم
مشاعل : هلا بك عزيز
عزيز : متى قعدتي حبيبتي
مشاعل : قبل شوي وسالت عن ماما قالوا لي طلعت وانت طلعت بعدها قلت يمكن رايحه معاك لان دقيت عليها موبايلها مغلق ممكن تعطيني اكلمها
عزيز : أي حبيبتي شعوله طلعت راحت بيت خوالج
وهي مو وياي انا عند رفيجي
شاعل : اها انا في بالي انها راحت معاك
عزيز : لامو وياي راحت بيت خوالج طيب شعوله عنود قعدت
مشاعل : لا نايمه تقول تعبانه وما لها خلق احد
عزيز : خلوها نايمه لحد يقعدها لين تقوم من نفسها ما ابيها تتعب اهي بروحها تعبانه من قبل الحفله شلون بعد سهرة امس
مشاعل : ما راح اقعدها بس تعال اخذني
عزيز : وين اخذج يا بنوتي الحلوة
مشاعل : ما ادري زهقانه وماكو احد قاعد
عزيز : تبين اقطج بيت خوالج
مشاعل : لا مالي خلق اروح بيت ابي اطلع مكان مفتوح
عزيز : اوكي ركبي السيارة ودقي علي ابي اكلم السايق
مشاعل : وين تبيه يوديني
عزيز :مو شغلج انتي ماعليج الا انج تركبين السيارة
مشاعل : مابي اروح مكان بروحي ابي اتكلم مع البشر مو جذي اطلع بروحي
عزيز : تبين تمرين احد تاخذينه معاج من رفيجاتج
مشاعل : كلهم مليغلات وما عندهم سالفه
عزيز : يوه منج شنو تبين خلصي ابي اسكر
مشاعل : ابيك انت
عزيز : تبيني انا
مشاعل : أي ابيك انت مابي اطلع بروحي
عزيز : انا عند ربعي
مشاعل : ربعك اهم مني
عزيز : اوكي نطريني لين الغدا ايي اغديج برا اوكي بيبي
مشاعل : شنو اسوي من الحين لين ما تيي انت
عزيز : شبكي نت ليش شاري لج ذاك اليوم لاب توب يديد
مشاعل: النت ملل وين تبي اروح ترا انتحر تعال اخذني اطلع معاي السوق
عزيز : تبين اطلع معاج السوق مالي خلق
مشاعل : أي
عزيز : اختاري مكان ثاني اوديج له الحين بس راح اييب رفيجي معاي وانتي راح تروحين السوق تشترين اللي تبينه وانا وفهد ننطرج
مشاعل : اوكي يكون طار الملل مني
عزيز : يلا لبسي ودقي علي اذا خلصتي اكون عند الباب
مشاعل: اوكي
وسكر الموبايل ولف على فهد : تروح معاي
فهد وهو طاير من الفرحه : وين
عزيز : اودي بنتي السوق تقول زهقانه
فهد : يلا مشينا
عزيز : فمان الله يا شباب
وطلع من الدوانيه مع فهد وركب فهد بسيارة عزيز وراح لبيتهم
ولما وصلوا دق عزيز على مشاعل عشان تطلع : وطلعت كانت لابسه تنورة قصيرة لونها ابيض وبدي لونه تفاحي
وامبطله شعرها وحاطه سكارف على شعرها لونه تفاحي وماكنت حاطه مكياج شكلها رايق
سلمت على عزيز وقالت لفهد : شلونك فهد
فهد : بخير الله يسلمك
شلون غلاوي يقولون طاحة امس
فهد : أي والله تعبت شوي
كان يتكلم وهو ميت من الفرحه
مشاعل : الله يقومها بالسلامة احنا ان شاء الله العصر نزورها
فهد : حياج الله
مشاعل : شكرا
عزيز : يلا شعوله تبين تروحين بسيارتي او تروحين بسيارتج مع السايق
مشاعل بدلعها المعتاد : لو ابي اروح مع السايق ما قلت لك ابيك
عزيز : اوكي ركبي السيارة
مشاعل : عزوزي انت كنت مشغول لما انا دقيت عليك
عزيز : لا واذا كنت مشغول افضي نفسي عشانج
مشاعل : ثانكس يالغالي
وسكتوا وشغل عزيز عبادي اغنيه ابسألك
فهد دخل جو مع الاغنية بسرعه مشاعل سكتت شوي بعدين قالت
مشاعل : عزيز
عزيز قصر عالصوت : هلا
مشاعل : اغانيك تنوم شغل شي حلو
عزيز : شنو تبين ؟؟
مشاعل : حط عالمارينا اف ام اغانيهم حلوة
عزيز اوكي بعد الاغنية
مشاعل : اوكي
فهد كان مروق عالاخير قال فنفسه حبيبتي معاي شنو ابي من الدنيا بعد
عزيز بعد ما خلصت الاغنيه وشغل مارينا : اوكي شعولتي
مشاعل : ويع شالاغنيه هاذي
عزيز : انتي مو عاجبج شي
مشاعل : عاد مو جذي
عزيز : انتي قلتي اغانيهم حلوة
مشاعل : عزيز طف الراديو انا بشغل لكم اغنيه تسمعونها اخذتها من النت
عزيز : لاتقولين عود
مشاعل : اكيد بدون مناقشه
عزيز : انا ماقلت لج ان فهد يدق عود
مشاعل بفرح : والله
عزيز : اسئليه
مشاعل : فهد تدق عود
فهد : اي
مشاعل بفرح اكبر : عزيز ممكن تقوله يسمعني
عزيز : استأذني منه كاهو جدامج
مشاعل : فهد تعزف جدامي في اغنيه اموت عليها ابي اسجلها بالعود وانا اركب عليها الصوت بس ابي العزف منك ممكن
فهد : شنو الأغنيه
مشاعل : يعني موافق
فهد : اي موافق بس بعد شهر
مشاعل بحزن : اوف شهر والله بعيد ليش بعد شهر بالذات
فهد : بعد شهر ويمكن اقل لكن اوعدج اعزف لج الي تبينه
مشاعل : اوكي ناطرتك بعد شهر ويارب يكون اقل
عزيز : عاد شعوله مافيها صبر هذا ويهي اذا ماخلتك تسجلها قبل الشهر عاد كله كوم والعود كوم ثاني
فهد : مو مشكله انا اذا تمت الشغله قبل شهر مايكون خاطرها الا طيب
واصلا اذا تمت او لأ راح اسجلها لها لأني وعدتها
عزيز كأنه فهم تلميح فهد : الله يكتب الي فيه الخير
فهد : امين
مشاعل : عزوز خلاص مابي السوق شرايك نروح نخلي فهد يعزف لنا ابي اسمع عزفه
عزيز : ياليتني ما علمتج الحين تأذين الريال
مشاعل ببراءة : لا والله اقعد عاجله وما أذيه ولا ازعجه
فهد عارف ان كلامها عفوي : مو مشكله خلنا نروح البحر بس اول ادق على بدر يجيب لنا العود
مشاعل بكل براءة : ياي وناسه
فهد دق على بدر
وقاله يبي اغراض من البيت يجيبها له بالبحر قال بدر انه مايقدر يخلي ابوه
فهد تفهم الوضع وقال لعزيز انهم يوصلون البحر وفهد ياخذ سياره عزيز يجيب العود و يرجع لهم البحر
وفعلا قطهم في البحر و راح اخذ العود ورجع لهم
عالبحر عزيز قاعد بين فهد و مشاعل
فهد : شنو تبون تسمعون
عزيز : ها شعوله شنو تبين تسمعين
مشاعل : ابي اغنيه خالد عبد الرحمن خبروه
عزيز : بشرط
فهد ومشاعل : شنو
عزيز : تغنين انتي معاه وانا بصورج بروحج
مشاعل بعفويه : لا صورني مع فهد عشان اواري رفيجاتي ان العزف كان معاي مو تركيب مثل كل مره
عزيز : عادي اصورك معاها يا فهد
فهد : اي مو مشكله بس لا تعطيه أحد اخاف أصير مشهور بعدين شنو يفكني من المعجبات
عزيز : اخاف اصور محمد عبدو وانا ما ادري
فهد : لا عاد اذا ابو نوره بالسالفه انا اسكت
مشاعل بعجله : يلا غني لي
فهد بدأ يعزف ومشاعل تغني معاه وهو يغني معاها وعزيز يصورهم
بعد ماخلص عزف
مشاعل : مشكور فهد
فهد : العفو ماسوينا شي
مشاعل : اخيرا حققت امنيتي
فهد : ان شاء الله عن قريب تتحقق كل امانيج
عزيز فهم تلميح فهد له وقال بضحك : قولي ان شاء الله تتحقق امانيج واماني فهد معاج
مشاعل مو فاهمه شنو قصدهم : امين يارب يحقق اماني فهد وامانيي وامانيك ياعزوز
فهد عرف ان عزيز فهم عليه : امين
مشاعل : عزوزي
عزيز : هلا
مشاعل : تودوني ابي اشتري شبس وعصير
عزيز : اذا ماوديتج اودي منو
مشاعل : ثانكس سينور
عزيز : مشينا
فهد : يلا تقطني البيت
عزيز : ليش
فهد : ما ودي اضايق الشيخه مشاعل
عزيز : تضايقها ؟ لا غلطان هي مستانسه على الطلعه معاك انت طحت على الجرح اهي من زمان تبي اعلمها عالعود
فهد : لا تعلمها
عزيز : ابشر
مشاعل : ليش مايعلمني
فهد : اسئليني نفس السؤال بعد شهر اقدر اجاوبج
مشاعل بغباء : انت شسالفتك كل ما كلمتك قلت بعد شهر
فهد : هم ما اقدر اقولج الا بعد شهر بعد ماتتحقق امنتي
مشاعل : يارب تتحقق امنيتك بسرعه عشان اعرف اجوبه اسئلتي
فهد وعزيز : امين
وراحوا الجمعية اشتروا حق مشاعل إلي تبيه
وفهد لاحظ طريقه تحركاتها وذرابتها شلون تاخذ الأشياء وتقرا تاريخ الإنتهاء واذا شي ما تعرفه تقرا مكوناته
حب طريقه مشيتها وشلون تتحرك يحس انها عالفطره مو تتصنع الدلع
مشاعل في سلتها ٢ جالكسي و ٢ ليز ملح و ٢ عصير برتقال
وفي سله عزيز ٢ سنيكرز و ٢ كولا
و فهد يتفرج على طريقه مشاعل في الكلام مع عزيز
وعزيز منتبه ان فهد سرحان وتأكد ان فهد معجب بمشاعل
فهد : مشاعل ليش تاخذين ٢ من كل شي تشترينه
مشاعل : هههه اشتري حق اختي ورفيجتها ولا انا لين الحين ما اشتريت الي ابيه
فهد : اها يعني مو لج
مشاعل : انا اكل جالكسي ويع انا ما احبه
فهد : شنو تحبين ؟.
مشاعل : انا اكل فيريرو روشيه واصلا انا ما احب اكل كاكاوات وايد
فهد : شنو تحبين
مشاعل : انا احب التمر
تدري انا وبابا الوحيدين الي نحب التمر عزوز ياكله بس ما يحبه مثلي
عزيز عارف فهد شنو يبي يوصل له: مشاعل شنو مواصفات فارس احلامج
عزيز سأل هذا السؤال لأنه عارف اجابتها الي دوختهم فيها
مشاعل : مواصفاته الله يسلمك لازم يكون كبرك او اكبر مابي ياهل لازم يكون ناضج فكريا ودايم ينصحني مابي ياهل انا اعلمه او يكون دلوع امه ولازم يكون طيب مثلك وانا احب يكون عازف عود عشان يغني لي اذا زعلت ولازم يكون مو متين لازم يكون رياضي ولازم وهذا اهم شرط يكون بدوي او عالأقل يحب البداوة مثل بابا ومثلي والاهم من هذا كله لازم يكون يصلي بالمسجد كل فروضه وما يترك ولافرض بالصلاة
عزيز : زين انتي ليش تحبين البداوة
مشاعل : رفيجتي وضحه تصارفاتها خلتني اتمنى اكون بدويه مع ان مو قاصرني شي وكل شي ابي انت تييبه لي بس اتمنى اجمع مصروفي مثلها عشان اشتري الي ابيه
تدري اهي لما كانت تبي تشتري هديه حق امها جمعت مصروفها عشان تشتريها من فلوسها مع انها لو تبي فلوس ابوها يعطيها
أهي عندها ناقه لها وناقتها شاريها لها ابوها هديه نجاحها بتفوق واسم ناقتها الرمانه وناقتها الحين عندها حوار
دايم تصور معاهم تذكر لما راويتك صورتي وانا يم الناقه وولدها هاذي ناقتها
لما كنت رايحه البر عندهم ياي هذاك كان احلى يوم بحياتي
اتمنى ينعاد بس حسافه كل شي حلو ما ينعاد بس تروح ايامه وماترجع
فهد : انتي تحبين النياق
مشاعل : اموت عليها واحب الصقور بعد خالي سالم عنده صقور وعنده جلاب حراسه للفيلا حقته وحق الشايله
ويحب يروح المقناص في جم مره اخذني معاه
فهد : يعني انتي تحبين الرجال البدوي
مشاعل : اي احب لما يقول رجاجيل
واستانس اذا وضوحه قالت انتي جيتي او جبت لج و اهي دايم تقول
لبيه وحيا الله هالخشه
هههه
عزيز : شعوله خلصتي اغراضج ابي احاسب
ابطلع من الجمعيه
مشاعل : انا راح احاسب لكم على حسابي
عزيز : اوكي هاذي اغراضي حسابي لي
مشاعل : اوكي وفهد شنو اشتريت
فهد : مشكوره خيرج سابق
مشاعل : اي ادري انتو شنو تحبون انت بدوي مثل وضحه
وراحت عنهم وهم وراها فهد يطالع عزيز وعزيز ابتسم له
عزيز : مفاجأه
مشاعل اشترت سانكست برتقال و ٢ كاكاو كت كات
مشاعل : تحبه صح
فهد : اي ههههه
مشاعل تطالع عزيز : شفت شلون ؟. انا اعرف شنو يحبون البدو علمتني وضوحه
فهد :مشكورة
مشاعل: العفو
وقفت جدام الكاشير وطلعت بوكها واخذت بطاقه البنك ودفعت لهم فهد طالع فيها مستغرب شلون صغيرة وعندها حساب
مشاعل حاسبت وقالت للهندي يحط اغراض كل واحد بكيس
وعطت فهد اغراضه وعطت عزيز اغراضه ومشت يم عزيز ومسكت يده
فهد مشى يم عزيز وهو يحس بسعاده غريبه دخلت قلبه ما يدري شنو مصدرها او ليش يحس جذي يحس هاذي اللي ممكن تملي عليه حياته
بدلعها و جمالها الطفولي وحتى لما تتكلم يحس ان في شي يتحرك داخله
بالسيارة الصمت كان سيد المواقف
مشاعل : عزيز وفهد ممكن اقول شغله
عزيز : تفضلي
مشاعل : مشكورين
فهد : على شنو
مشاعل : لاني طلعت معاكم غيرت جو لو قعدت بالبيت يمكن اموت
فهد بسرعه : سم الله عليج لا تقولين جذي اذا ما طلعنا معاك منو يطلع معاك
مشاعل: مشكور
فهد : العفو
عزيز : ها شعوله تروحين بيتنا او بيت خوالك
مشاعل : لا بيتنا لان بروح انزل الفيديو اللي صورتني مع فهد فيه عشان انزله بالبومي عشان ادزه لرفيجاتي بطاقه يديده اقهرهم فيها
ومشكور فهاد على العزف كان مررررررره حلو
فهد ضحك : بس بدو الكويت ما يقولون مره يقولون واجد
مشاعل : كان واجد حلو
لا مرة حلو احلى واذرب
صح فهاد
فهد : اللي يريحج
مشاعل : عزوز قول اذرب او لا
عزيز : أي عدل يالدلوعه
ودق موبايل فهد بالوقت هذا وكانت مشاعل تسولف مع عزيز
فهد : مشاعل لحظه ابي ارد على موبايلي
مشاعل :اوكي رد
عزيز :مشاعل سكتي اوكي
مشاعل :ليش
فهد تنرفز منها بس ما تكلم
عزيز : اوكي مشاعل سكتي الريال يبي يرد
مشاعل زعلت وما تكلمت
فهد : سم يبه
:.........
فهد : ابشر الحين جايك بالدرب
:..........
فهد :ابشر الحين ادق عليها
:.............
فهد : في حفظ الرحمن
وسكر ودق على رقم هو حافظه : الو
: ...........
فهد : زين انج انتي اللي رديتي على موبايلج
:..................
فهد : دقي على بدر يبيج
:............
فهد : مو صاير الا الخير بس امي تبي تكلمج
:.............
فهد : يابنت الناس دقي عليها تبي تكلمج وابوي بخير مافيه شي
:...........
فهد : انا برا الحين رايح لابوي
:.........
فهد : طيب مع السلامه
وسكر ولف على عزيز : بتعبك معاي قطني على المستشفى
عزيز : اوكي بس انزل الدلوعه
البيت
فهد : اوكي
فهد : مشاعل
مشاعل وهي زعلانه : هلا
فهد : لا تزعلين
مشاعل تبي تبكي : انا ما قلت شي هاوشتوني انت وعزوز
فهد : ما هاوشناك
مشاعل ما قدرت تمسك نفسها :لا والله ومنو اللي هاوشني مو انت وعزوز
عزوز: مشعوله ماله داعي تبكين
مشاعل : ما بكيت وانا زعلانه عليك عزوز وراح اعلم بابا يزعل عليك
فهد : طيب تبين اعزف لك عشان ترضين
مشاعل تفكر : هاه
فهد يعيد الكلام عالبطيئ : تبين اعزف لك عشان ترضين
مشاعل :ليش لا
فهد : خلاص وعد اعزف لك مرة ثانيه الاسبوع الجاي
مشاعل : اوكي
فهد : مسحي دموعك وماله داعي تزعلين
مشاعل : طيب وهي تمسح دموعها
فهد : عزيز يغمز له : عرفت لها ههههههههههههههه
مشاعل : شنو قلت
عزيز : سر لرفيجي انتي شكو
فهد :هههههههههههههههه
مشاعل : فهاد علمني شنو قالك
فهد : سر مايصير تعرفينه
مشاعل : واي منكم انتوا الاثنين ما تعلموني
فهد :تبين اعلمج
مشاعل : أي
فهد : بعد شهر باذن الله راح اقولك
مشاعل : انت لين الحين متعلق على هالشهر ان شاء الله يخلص الشهر بسرعه عشان تعلمني
فهد : ان شاء الله
عزيز : يلا نزلي البيت
شنو توقعاتكم راح يصير مع
غاليه
وفهد & مشاعل
علي & العنود
عزيز & الجازي & غاليه
بدر& مجهولة الهوية
ودمتم بحفظ الرحمن
محبتكم ندى الزهر
|
22-05-08, 03:03 AM
جديد مواضيع قسم الارشيف
العرض العادي
