كاتب الموضوع :
ندى الزهر
المنتدى :
الارشيف
قراءة ممتعه
منكم ارجو العذر على تأخيري
واليكم البارت الثامن
في بيت الجازي وتحديدا بالصاله
عنود : مس بلو تصدقين احس اني تعبانه شوي ما ادري ليش عاد كلش مو وقته باجر حفله شعوله .
الجازي : طيب امشي نروح الطبيب انا معاج
عنود : لا مايحتاج شويه تعب وان شاء الله يخف
الجازي : لاروسا شنو المفاجأة
العنود : باجر تعرفينها
مــ
وقاطعها رنة موبايلها شافت الرقم قالت : هذا نفس رقم عزوزي
الجازي : ردي طيب
العنود : الو
الطرف الثاني : ها حبيبتي شلونج
العنود : من معاي
الطرف الثاني : عزوز يعني منو بس تعالي تبين اجيب لج الجوري عند مس بلو
العنود : لو سمحت عن قلة الأدب وياويلك تدق مره ثانيه فاهم
الطرف الثاني : افا حبيبتي زعلتي علي وانا حبيبــ
طوط طوط طوط
سكرته وهي ترجف من الخوف : جوجو الحقيني المسج وصل له بالغلط
دق نفس الرقم مره ثانيه
الجازي : عطيني موبايلج دقيقه
الجازي : نعم
الطرف الثاني : هلا مس بلو وين حبيبتي وليش راده على نقالها ( جوالها )
الجازي : شوف ترا ان شفت رقمك مرة ثانيه ماراح يحصل لك طيب فاهم
الطرف الثاني : طيب عطيني حبيبتي
الجازي : انت ماتفهم صح
وسكرت الخط بوجهه بس شكله عنيد ويحب اللعب رجع يدق
الجازي : هذا مايفهم أنا بروح حق بابا فوق انطريني
وراحت فوق تركض وبطلت الباب بعد طقه وحده وما نطرت علي يرد عليها دخلت تركض علي كان يشتغل بين اوراق وكتب ولاب توب كان على المكتب ومندمج بين اوراقه ودخلت الجازي كانت تخوف فز من مكانه فجأه ووقف :اشفيج امي فيها شي
الجازي وقفت تاخذ نفس هزت راسها بــ لا
علي : اجل اشفيج خرعتيني
الجازي وهي تلهث : ابيك بموضوع مهم
علي : والي عنده موضوع يخرع الناس جذي
رجع قعد وهو يقلب اوراقه :
ارجعي بعدين مو فاضي لسوالفج انا مشغول
الجازي وهي ترفع راسه ويده عن الأوراق : والله موضوع مهم
ودق الموبايل بيدها ورفعته تشوف الرقم ولفت الموبايل توريه علي : شفت الموضوع مهم
علي وهو يرجع ورا على الكرسي ويكتف ايدينه : اسمعج تحجي
الجازي عطته الموبايل : يبه هذا موبايل لاروسا دزت مسج حق اخوها وصل بالغلط لهذا الرقم
علي : مايبي لها ذكاء خليها ترد تقول اسفين ووصل بالغلط
الجازي : ردت بس هذا يتحرش فيها
ورديت انا عليه وهاوشته بس ماينفع
علي من سمع يتحرش مايدري شنو فكر فيه بس عصب وطلب منها الموبايل
قال : اطلعي واذا خلصت اناديج
الجازي : وموبايل البنت
علي : لا خلصت اناديج اطلعي وسكري الباب معاج
وبعد ماطلعت رفع الموبايل وابتسم لأن الثيم ( الخلفيه ) كانت صوره العنود مبتسمه وهي واقفه جدام عزيز وماسكه يده اليمين وهو مسوي حركه بيده اليسار وراها ومبتسم ابتسامه كبيره ولقى مكالمتين لم يرد عليها دق على الرقم ورد الطرف الثاني على طول : هلا وغلا اخيرا حبيبتي غيرتي رايج
علي : بشنو حبيبي اغير رايي
الطرف الثاني : من انت
علي : وشدخلك من انا انت الي منو
الطرف الثاني : داق علي وتقول من انت
علي : اذا حسبالك بنات الناس لعبه غلطان فكر بخواتك اول
ولاعاد اشوف رقمك مره ثانيه
الطرف الثاني : اول رب اهلك بعدين تكلم على خواتي
علي : انت شكلك ماتفهم بالطيب
الطرف الثاني : انت اقرأ المسج الي وصلني بعدين تكلم عن بنات الحمايل
علي : اقلب ويهك لا ادفنه لك بين ريولك
وسكر الخط بوجهه
وشاف الموبايل وراح للرسايل المرسله وفتح اخر رساله :
عزوزي حبيبي انا عند مس بلو الحين لاتنسى تروح تجيب المفاجأه ومر محل الورود مشتهيه اشم ريحه الجوري ومابي اشتريه ابيه هديه منك حبيبي لأن كل شي منك غير
ملحوظه ياليت يكون الجوري احمر رد لي خبر راح تشتريه لي او لأ
احبك يا اغلى ناسي
علي رجع يشوف المرسل اليه
( دنيا بدونك خساره )
ولا اراديا راح يقرى الرسايل الموجوده بالمرسله
فتح وحده من الرسايل لأن المرسل اليه نفس
روحي انا طالعه الحين السوق
وراح يقرى الرسايل لين وصل لرساله مرسله لنفس الأسم محتواها
اذا ماتغليت عليك اتغلى على منو
يقولون انك اخوي الكبير لازم تتحمل
انت الي دلعتنا صح تحمل اخر دلعك
نزل الموبايل يعني هذا اخوها الكبير يمكن هو نفسه الي بالثيم ( الخلفيه )
معاها رفع الموبايل وراح الوارد اخر رساله من عزيز
انا طالع مع رفيجي ماراح ارد الا بالليل اركبي سيارتج وروحي او طرشي السايق ولا اقول الله ما كثر المطاعم دقي على بداله المطاعم واطلبي رقم المطعم الي مشتهيته واطلبي لج غدا الا تعالي ليش الفاست فود وفاضل موجود طباخ عالفاضي
حبيبتي لو رفيجي مو وياي كان جبت لج لكن مره ثانيه اعزمج مو اجيب لج
علي يفكر اه ظلمتج سامحيني
وفتح الأستيديو ولقى صور كثيره اكثر شي صورها دور على موبايله وفتح البلوتوث
وارسل صورتين من صورها
الأولى كانت حاطه شعرها كله جهه اليمين ومبتسمه وماكانت حاطه مكياج
والصوره الثانيه كانت بالسياره كانت تضحك
وقعد يفكر
والله عجيبه ليش صاير تفكيري تفكير مراهق
وبعد ما وصلت الصور الى موبايل علي
طلع من الصور ودخل مقاطع صوت ولقى
Sound clip(17)
بطله صوت وحده تغني صوتها عجيب وهادي حيل فكر ليش ما ارسل المقطع واسمعه على راحتي اخاف تطب العوبه وخلص علي وسكر موبايل عنود وقعد يطالع الثيم
ويبتسم والله انج تهبلين
وضحك على نفسه بصوت عالي والله انا المهبول الي افكر بالخرافات هاذي وطلع من الغرفه ينادي بأعلى صوته جت اخذت الموبايل وشكرته قال : اذا دق او دز مسج وماعلمتوني اذبحج انتي وهي فاهمه
الجازي : ابشر يبه
علي : وتأكدوا من الأرقام مره ثانيه مو تصيرون ملاقيف
الجازي : اسفين شكلنا ازعجناك مرة ثانيه اذا صار شي راح اخليها تقول لأخوها لأن انت ما تتحملنا احنا ومشاكلنا
علي : افا انا تقولين عني جذي
الجازي : لأ انا غلطانة لما قلتلك السالفه هي لو قالت السالفه لأخوها جان طلع الرجال من تحت الأرض وعلمه السنع ومايهاوشها لأنها ماغلطت بشي
علي : زعلتي . الجازي الحياة ماتؤخذ بالقوة والمال انا لو ابي اطلعه بنص ساعه اجيب اخباره كلها لكن
الحياة تدوم للطيب مو للقوي وانا اخاف عليكم واذا هاوشتكم مو معناه اني ما احبكم غلطانه
الجازي : انا اسفه ماقصدي اقول جذي
علي : طيب ترا لاروسا تحت بروحها وانتي تقرقين عند راسي .
الجازي : طيب شاوو خيوو
نزلت لقت عنود سرحانه الجازي : لاروسا الي ماخذ عقلج يتهنى به
العنود : اي عقل يامعوده
الجازي : افا اشفيها المينونه
العنود : مينونه شنو انتي وويهج
الجازي : انتي تقولين اي عقل والي ماعنده عقل مينون
العنود : واي انتي صج متفرغه
الجازي : اشفيج لاروسا
العنود : والله تعبانه شوي يمكن السكر مرتفع شوي
الجازي : وقاعده قومي اوديج
العنود : مابي اروح اخذت ابرتي ولين الحين احس نفس الشي يمكن بعد شوي يخف العوار
الجازي : عوار شنو ؟؟
العنود : راسي يعورني واحس بدوخه
الجازي : عشان خاطري قومي اوديج
العنود : الحين ادق على عزيز اشوفه فاضي يوديني
ودقت على عزيز الي توه وصل السوق مع فهد ومشاعل ومرافقاتها
عزيز : الو
العنود : هلا حبيبي
عزيز : هلا بج
العنود : حبيبي فاضي او لأ
عزيز : ليش
العنود : اسأل
عزيز : انا مع مشاعل بالسوق
العنود : طيب مع السلامه
عزيز : تبين شي
العنود بتعب : سلامتك باي
عزيز : باي
وسكرت ورجعت راسها على الكنب بتعب : والله مو بيدي
الجازي بخوف قعدت يمها : نونه قومي اوديج الطبيب عشان خاطري
العنود : مشكوره جي جي
بس انا مافيني شي شوي مرهقه يمكن لأن مانمت عدل
الجازي : زين انادي علي
العنود : ناويه تفضحيي انتي شنو راح يقول
الجازي : بناديه ماعلي منج ومسكت يدها بترجي : نونه انتي حاره
العنود : والله مافيني شي ومابي اخرب حفله شوشو باجر
الجازي : تضحين بصحتج عشان وناسه اختج
العنود : مو بس اضحي بصحتي الا افداها بعمري انتي ماتعرفين مشاعل شنو بالنسبه لي وفرحتي لما اشوفها تضحك من قلب ومستانسه
الجازي .. بس شنو راح تفيدج سعادتها لو طحتي بعد يومين
العنود . تفيدني اني اشوف غيري مستانس ويضحك انا تعودت عالتعب لكن شعوله شنو ذنبها اني اتعب واخرب فرحتها باجر بعد حفلتها ان شاء الله اروح الطبيب لكن الحين مستحيل كانت تتكلم بكل تعب
الجازي .طيب انادي علي يفحصج هو طبيب يعني ماتروحين الطبيب يعطيج مسكن عالأقل
العنود . اخوج لأ انتي نسيتي شنو صاير معاه قلبي يرجف لما تقولين اسمه شلون لو يفحصني
الجازي بضحك وقفت جدامها وتمثل وتحرك يدها : اه ياعلي شمسوي برفيجتي طاحت بشباك الحب وانا مش عارفه
العنود تضحك : شفتي طحت ومحدش سما عليا
الجازي نقزت يمها : تحبينه من وراي يالخايسه
العنود تضحك : مو حب حب لكن تقدرين تقولين استلطاف
الجازي تغمز لها : اي دريت استلطاف
العنود : جي جي ويهد عيب هالسوالف تونا صغار
الجازي : انتي صغيره انا لأ انا وحده ادور على معرس اخطبه
العنود : تخطبينه يعني مو هو يخطبج
الجازي : اشفيها حبيبتي الحين البنات كثروا ونسبه العنوسه زادت وانا مو ناويه ازيد نسبه العوانس وحده زياده
العنود : على كلامج هذا بتخيسين في بيت اهلج محد خاطبج
الجازي بزعل مصطنع وقفت : اشفيني جمال وادب وعلم
وشقرديه واحب الخير
العنود : كثري منها ادب
الجازي : اوريج يالخايسه انا اكثر انسانه على وجه الأرض ادبا وأخلاقا
العنود : زين السقف بيطيح علي من كبر الجذبه قال شعرفك انها جذبه قلت من كبرها
الجازي : طيب انتي شخبارج الحين
العنود : بخير
وعند علي كان يبدل ملابسه بيطلع وهو نازل سمع العنود لما كانت تكلم عن مشاعل اختها وانها ماتبي تخرب وناستها
وطلع من الباب الثاني بعد ما سمع حوارها كله لين قالت بخير وركب سيارته يفكر فيها
راح السوق بيشتري موبايل جديد قبل لايرجع البيت يبدل ويطلع الدوام وشترى له اغراض جديده كنوع من التغير
رجع البيت بعد ساعه ونص
دخل متوقع العنود راحت بيتهم عشان جذي دخل عالصاله على طول بدون لا ينادي وعنود كانت منسدحه عالكنبه والجازي كانت مسويه لها كمادات لأنها مارضت تروح المستشفى كانت الجازي بالمطبخ تسوي شوربه والعنود منسدحه ومغمضه عيونها وكانت لابسه جينز اسود وعليه تنوره صغيره وبدي احمر مكتوب عليه لاروسا سينوره علي اول ماشافها خاف عليها وضحك بخاطره رجع الدوانيه وحط اكياسه وحول موبايل صامت عشان مايطلع صوت للكامرا
وطفا الفلاش
ورجع الصاله العنود لين الحين على نومتها فتح الكامرا وصورها جم صوره وسوا زوم على وجهها وصورها وقال سبحان من صورك والله ملاك
ودخل المطبخ لقى الجازي تحوس بالمطبخ
على : السلام عليكم
الجازي : وعليكم السلام
جابك الله علاوي
علي : خير اللهم اجعله خير
الجازي : لاروسا تعبانه شكل السكري مرتفع معاها وحرارتها مرتفعه
علي : خذت علاجها او لأ وشنو علاج السكر الي تاخذه
الجازي : تاخذ ابر للسكر ابرتين وخذته ولين ألحين تحس بتعب وخذت من غرفتك ميزان الحراره وقست حرارتها 38.7 وحطيت لها كمادات
علي : طيب استأذني منها بدخل اشوفها
الجازي : مو راضيه
علي : ادخلي قولي لها بلا عناد والسكري مافي لعب
الجازي : الحين اروح بس اقصر عالجوله واروح
وراحت لعنود
الجازي وهي تقعد يمها : لاروسا حبيبتي
العنود ماتحركت ولافتحت عيونها : امممم
الجازي : حبيبتي علي بيكشف عليج
قامت من مكانها مخترعه : هو هني
الجازي : اي موجود قلت له عنج وقال خلي العناد عنج والسكري مافيه غشمره
العنود : ومن قال اني تعبانه انا الحمدلله مافيني شي برجع بيتنا الحين
الجازي : ليش خبله انا اخليج تسوقين وانتي تعبانه
العنود : مافيني شي وبعدين من طلب منج تقولين لأخوج اني تعبانه شايفتني طايحه اصلا مافيني شي بس ارهاق
الجازي : نونه عن الخبال انتي شايفه حرارتج خليه عالأقل يعطيج ابره تنزل حرارتج ومسكن للصداع
العنود صرخت : جي جي انا مو تعبانه متى تفهمين ليش تبين تطلعيني تعبانه غصب
الجازي : نونه انتي تحبيني
العنود : شكو
الجازي : انا سألتج تحبيني
العنود : اي احبج
الجازي : ليش تحبيني
العنود : شكل الي حرارته مرتفعه انتي مو انا
الجازي : ليش تحبيني
العنود : لأنج اختي
الجازي : لو كنت مكانج انا المريضه شنو تسوين تخليني على كيفي او توديني الطبيب
العنود نزلت راسها : لاتقولين جذي انتي غير عني
الجازي : فهميني شلون غير
العنود : انا تعودت عالتعب وصار شي عادي بالنسبه لي
الجازي : نونه انا بفهم انتي معترضه على شنو بالضبط اخوي او الطبيب بكبره
العنود : على اخوج
الجازي : طيب قومي بوديج الطبيب
العنود : طيب بروح لكن باجر مو اليوم
الجازي وقفة جدامها: عنود شوفي انا تعبت معاج اقسم بالله العلي العظيم لو ماطلعتي معاي بالطيب لأخلي علي يشيلج يوديج المستشفى
غصب عنج
العنود : زين ليش تحلفين
الجازي تصارخ تنادي الخدامه عشان تجيب ملفعها وشنطتها
وبعد ماجابت الخدامه الأغراض
الجازي : جدامي نونه
العنود : علي ماراح يرضى تطلعين معاي الحين
الجازي : ومن قال بروح معاج ماراح تسوقين الحين انا الي بوديج
العنود : ما شاء الله متى اخذتيها
الجازي بإستغراب : اخذ شنو
العنود : الليسن (اجازه السواقه)
الجازي : من قالج اني اخذتها
العنود : انتي اكيد طاقه فيوزاتج اليوم مو توج تقولين ماراح تخليني اسوق وانج بتوديني
الجازي : راح نروح مع السايق
العنود : لا الجازي مابي اتعبكم معاي الحين ادق على عزوزي او بابا
الجازي : لو دقيتي عليهم راح يكنسلون حفله مشاعل حرام عليج تخربين فرحتها
العنود : توج تحلفين اني اروح والحين تقولين لأ
الجازي : تروحين معاي تاخذين علاج وترجعين بيتكم طيب
العنود : صاجه والله فكره الله لايحرمني منج
الجازي : مطوله يلا قومي
العنود : طيب بعدل شكلي لاينحاشون الي بالشارع كلهم
الجازي : ترا ان تأخرتي ياويلج
العنود : اسبقيني انا اجي
الجازي : ليش محترقه فيوزات عقلي عشان اخليج بروحج
العنود : لاحول ولا قوة الا بالله جي جي لاتخليني اكرهج
الجازي : اذا تقدرين ليش لأ
العنود تقلدها : مطوله
وراحوا المستشفى وعلي اخذ اوراقه وراح وراهم بسرعه دق على ربعه عشان يضبطون اوراقه انه يستلم طوارئ ساعتين
ودخل الطوارئ وسأل عنها لقاها بالملاحظه ودخل الملاحظه بكرنيه المستشفى
ولقاها نايمه على السرير وجنبها الجازي على طرف السرير اخذ اوراقها وقراها السكر مرتفع شوي وحرارتها مرتفعه شافته الجازي وضحكت
علي اشر لها تسكت وقال :
العنود فارس شلون صحتج الحين ان شاء الله احسن
العنود ماتحركت بس قالت : الحمدلله وفتحت عيونها شوي
ولما شافته فزت تعدل قعدتها وكانت تطالع الجازي
الجازي رفعت يدها بإستسلام : مالي شغل
علي : خير فيكم شي
الجازي ميته ضحك
العنود : ابي اطلع من هني الحين
علي : مايصير انتي حالتج ماتسمح تطلعين اليوم
العنود : ما شاء الله من قرر اني ما اطلع من هني
علي : انا الطبيب المشرف على حالتج
العنود : الحين تكتب لي خروج او اني راح اطلع غصب عنكم كلكم
علي : اذا طلعتي اقدم على اهلج شكوى اهمال لأنج مريضه ومحد متابع حالتك
عنود : طيب بطلع بس اليوم وارجع باجر
علي : ما يصير تطلعين
العنود : مو بكيفك راح اطلع غصب عنك والحين تشوف
ومسكت موبايلها ودقت على ابوها : قوة يبه
ابوها فارس : هلا حبيبتي
العنود : شلونك يبه
فارس : بخير انتي وين وشنو هالإزعاج الي عندك
العنود : يبه امي يمك او في احد يمك
فارس : لأ امج راحه تجيب لي اوراق من المكتب الي تحت ليش
العنود : طيب ابيك تجي المستشفى الحين بس لحد يدري بسرعه تعال
فارس : اشفيج فيج شي
العنود : مافيني شي بس في دكتور شكله توه متوظف ويبي يطبق قوانينهم علي
فارس : ليش شنو صاير
العنود : جيتهم شوي تعبانه يبي يدخلني الاجنحه يقول ماتطلعين اليوم
فارس : انا الحين جاي مسافه الطريج
عنود : بابا لاتقول لأحد اوكي
فارس : يصير خير
وبعد 20 دقيقه فارس دق على عنود : انتي وينج
عنود : بالملاحظه
فارس : طيب شنو اسم الدكتور الي كشف عليج
عنود : علي خالد سعود الفهد
فارس : طيب مع السلامه
وراح يدور علي سأل الممرضه السوريه وبلغته انه موجود بغرفه الطوارئ غرفه رقم 4 وراح له طق الباب
وشافه علي خمن انه ابو العنود لأنها تشبهه
فارس : السلام عليكم
علي : وعليكم السلام والرحمه والإكرام حياك يابوعبدالعزيز
فارس : انا والد المريضه العنود فارس بغيت اسأل عن حالها
علي : يابو عبدالعزيز والله بنتك تعبانه شوي وماراح نقدر نطلعها قبل 12 ساعه عشان نتأكد من السكر عندها لانه مرتفع وحرارتها مرتفعه وبنتك الله يحفظها تبي تطلع غصب مايصير تطلع الحين حاولت فيها انا وأختي الجازي بس مو مقتنعه بكلامنا
فارس : انت اخو صديقه بنتي الجازي
علي : اي ياعمي انا اخوها
فارس : والنعم والله ونعم التربيه
علي : الله ينعم بحالك ياعمي
تبي تدخل تشوفها
فارس : اي والله ياليت
علي : ابشر امش معاي
وراحو الملاحظه ودخلوا عند العنود
عنود اول ماشافت ابوها خنقتها العبره : يبه
فارس : هلا ياروح ابوج ليش تخوفيني عليج وقرب منها وضمها
عنود بكت : طلعني من هني الحين مابي اقعد
فارس : ليش ماتبين تقعدين
العنود : لان اذا نمت بالمستشفى راح تلغون حفله مشاعل وانا مابي اخرب فرحتها
فارس : افا مشاعل اهم من صحتج
العنود : اي اهم من صحتي مابي اقعد هني ولا دقيقه ويبون يعطوني ابر الأنسولين كل ساعه وربع اخذها انا بالبيت بس يقولون لي جم الجرعه الي اخذها وانا اخذها بالبيت والحراره الكمادات موجوده
فارس : مايصير بعدين انا خايف عليج بعدين الدكتور قال راح تطلعين باجر
العنود : يعني راح احضر حفله شعوله
فارس : ان شاء الله تحضرينها وتكونين ملكتهم
عنود : ان شاء الله بس يبه لاتعلم احد اني هني قول لهم ان جي جي تعبانه شوي واخوها موموجود بالبيت واني راح انام عندها
فارس : ليش ما اعلمهم
العنود : اخاف عزيز اذا عرف يلغي الحفله
فارس : لا ماراح يلغيها وعلى خير ان شاء الله انتي باجر بينهم واحلاهم
العنود : اوكي على راحتك بس لا تعلم احد اني هني
فارس يضحك : طيب ياروح ابوج
علي كان يكلم الممرضه واذنه مع عنود ابتسم من خاطر
@@@@@@@@
فهد وعزيز عند باب بيتهم
فهد : عزيز
عزيز : هلا
فهد : اتمنى الموضوع الي قلته لك يبقى بينا ولو انك مو غالي علي ما قلته لك
عزيز : احنا اخوان ولو يا فهد
بس باجر لا تتأخر علي
ولا تنسى بلغ اهلك عن الحفله
تراهم معزومين خلهم يتعرفون على بعض
يصيرون ربع مثلي انا وياك
فهد : ابشر
عزيز : تصبح على خير
وحرك عزيز وبالسياره يفكر
ومسك موبايله ودق على عنود
عنود : بابا هاك رد عليه قوله اني نسيت موبايلي
فارس ابشري عطيني اياه
ورد فارس : هلا عزيز
عزيز متلخبط : هلا يبه شلونك
فارس : بخير
عزيز : يبه انا كأني داق على عنود
فارس : ايه يبه مو غلطان دقيت على عنود موبايلها معاي
عزيز : هي وينها
فارس : هاذي هي عندي بس حبت تلعب معاك
عزيز : اها وين مشاعل عنكم مازعلت عليكم
فارس : ماتدري عننا احنا مو بالبيت
عزيز : عيل وينكم
فارس : مع بعض
عزيز : ادري انكم مع بعض وين اي صوب
فارس : عندنا صاحبتها الجازي واخوها ماراح نتأخر ان شاء الله
عزيز : يبه انت تعبان او عنود فيها شي
فارس : انا طيب الحمدلله
عزيز بعدين دق علي انا مشغول الحين
وسكر وعطا العنود موبايلها
عنود : يبه ليش ماقلت الي قلت لك عليه
فارس : ليه انا معودكم عالجذب
عنود : حشا بس الحين يخاف ماتعرف عزيز
فارس : واذا عرف انتي ليش خايفه .
عنود : مو خايـ
سمعت صوت المسج الي توه وصل
" عنود وينكم فيه والله ياويلج لو ماقلتي وينكم انطرج "
عنود دزت
" بالمستشفى لاتخاف احنا بخير "
دق على طول
ردت : هلا عزيز
عزيز : اي مستشفى ومن التعبان
عنود : انا تعبانه شوي وبس ماله داعي تعب حالك وتجي
عزيز يصارخ : عنود انا شقول
انتو وين
عنود : انا في مستشفى (............) في الحوادث في غرفه الملاحظة
علي في نفسه : والله خوش اليوم احلى يوم التقيت ابوها واخوها والله اني عبقري
ههههههههههههههههههههههههههههه
عنود : يبه والله ماله داعي انا مافيني شي انتو اشفيكم
تكلم علي وهو يطالع ابوها : عمي بو عبد العزيز في اوراق محتاجه توقيعك
فارس : الحين يجي عزيز وهو يوقع احسن لانه هو اللي راح يمكل الاجراءات
علي : اللي تامر فيه يا عمي
عنود : دكتور متى اطلع
علي : باجر ان شاء الله
عنود : في أي حزه
علي : الصبح ان شاء الله
عنود : شكرا دكتور
علي : العفو ولو هذا واجبي
وطلع علي بعد ما استأذن
وراح في غرفه الحوادث غرفه 4لقى رفيجه جعفر عبد السلام
جعفر : ها يالعاشق كيف حال المعشوقه
علي : انت اشفيك أي معشوق انا بس حبيت اعلمها الشغل لانها قالت هي مو معترضه عالطبيب
هي معترضه علي انا
جعفر : اها صدقتك
علي : ترا انت صاير غثيث اشفيك اليوم
جعفر : مافيني الا العافيه بس انا اشوف في عيونك عشق
علي : زين اسكت احسن لك الا تعال
جعفر : هلا
علي : انت الحين راح تدخل معاي على اساس اني راح اسلم لك الاوراق لان هذا مو اختصاصي بس انا مرافق معاك
جعفر: وتقول مو عاشق الا العشق طالع مع خشمك
علي : زين اكرمنا بسكوتك
جعفر : انت معقد نفسيا
علي : والله متى محد قالي
جعفر : تستخف دمك لا صج انت معقد نفسيا اذا تحبها قول ليش تخش ترا انت مدري شلون صاير
علي : طيب حجي يلا قوم اخوها بالطريج
جعفر : شدراك ؟؟
علي : تو كلمهم وانا موجود وابوها قال ان هو اللي يبي يوقع اوراق دخولها
جعفر : اها طيب امسك ارضك
علي : شنو امسك ارضي
جعفر : انت مو تقول راح يجي وهي حالتها مو خطرة لكن انت تبي تقعد معاها اليوم وباجر
علي : أي
جعفر : انت دكتور مو خباز هو راح يجي يدورك مو انت تروح له اثقل قلنا حب بس مو تعشق مرة وحده خف يا الحبيب خف
علي : الشرهه علي اللي قلت لك
جعفر : ليش يالعاشق
علي : انت ما تعرف تسكت الحين لو دشت الممرضه تبي تقول الدكتور علي استخف
جعفر بيتكلم سمع طق الباب :تفضل
دخل مريض : السلام عليكم
علي وجعفر : وعليكم السلام
وعلي قال : انا استأذن واذا خلصت دق علي اذا بروح اشوف الدكتور خالد قبل شوي قالي في حاله يبي لها جراحه بروح اشوفها اذا وصل عبد العزيز دق علي طيب
جعفر : منو عبد العزيز
علي : اخو الحاله اللي عندك
جعفر : أها اوكي ..
طلع علي وراح للدكتور خالد
جعفر عنده مريض انطق الباب الممرضه قالت للدكتور جعفر : يادكتور دا واحد يسال عن الدكتور علي
جعفر خليه ينطر الحاله الي عندي واذا طلع خليه يدخل
الممرضه : حاضر
وبعد ما طلع المريض دخلت الممرضه عزيز
عزيز : السلام عليكم
جعفر : وعليكم السلام
عزيز : انا اخو المريضه عنود
جعفر : حياك الله معاك الدكتور جعفر
عزيز : انا كنت ابي الدكتور علي
جعفر : الدكتور علي موجود الحين يوصل انا الحين اروح والدكتور علي يلحقنا
علي عند الدكتور خالد وصله مسج من جعفر
( اخو الغاليه وصل )
علي استأذن من الدكتور خالد انه في حاله لازم يروح
وطلع وهو يضحك من مسج جعفر ويقول في نفسه : مدري ليش مصر اني احبها
لا صج تضحك على منو ؟؟ انت صج تحب ..؟؟ لا شنو ياهل انا احب ؟؟
انا عمري فوق 35 شنو احب انا ادور راحه الجازي ونصيبها بعدين اتزوج ؟؟..؟؟
وصل الملاحظه لقى عزيز وجعفر عند باب الملاحظة
علي : السلام عليكم
عزيز وجعفر : وعليكم السلام
جعفر : اخوي عبدالعزيز هذا الدكتور علي وهو المسؤل عن المريضه العنود
عزيز : شلونك دكتور علي
علي : بخير الله يسلمك
عزيز : بغيت اسالك عن حالة اختي
علي : الحمدلله ما فيها شي بس الحرارة مرتفعه والسكري مرتفع شوي يمكن كانت زعلانه او متضايقة من شي رفع لها السكري بس ما يصير جذي لازم تحاولون تحافظون على السكر لان ارتفاعه دايم مو زين وانا شفت ملفها وشفت تاريخها المرضي لقيت انه دايم يرتفع معاها واذا كان يرتفع معاها وكانت تكابر وما تعلم احد هذا شي كبير لان المفروض انها تعلم باي شي اذا ارتفع معاها لان ارتفاعه يسبب اشياء اكبر من جذي واحيانا يدخل المريض بغيبوبه نتيجه ارتفاع السكر والله اعلم
عزيز : الله يعطيك العافيه
جعفر : احنا راح نضطر نخليها عندنا لين تنزل نسبه السكر ولان الاسيتون مرتفع معاها والله اعلم انها متضايقه لان لما سالناها انها اخذت علاجها قالت أي ماخذته لما حست انها تعبانه
عزيز : سوو اللي تشوفونه احسن من وجهة نظركم انتو الدكاترة
علي : الحين محتاجين توقيعك عشان تدخل الجناح الحين
عزيز : الوالد ما وقع
عزيز : والله قلت لعمي بس قال ننطرك احسن
عزيز : توكلنا على الله شنو الاوراق
وبعد الإجراءات وتوقيع الاوراق ودخول العنود للجناح 16
عنود مع الجازي وابوها فارس
فارس : يبه العنود ..
العنود: هلا يبه
فارس : انا برجع البيت لان امج الحين تجي ومعاها مشاعل انا مالي داعي هني وباجر انا موجود والحين ادق على بو عبدالله اخليه ينقلج غرفه خاصه غير هاذي هاذي موشي بس مؤقت لين الصبح
العنود : على راحتك يبه بس يبه مرهم يعطونك ابرتك
الجازي : عمي فارس
فارس : هلا بنتي الجازي
الجازي : عمي اخوي علي هني خله يعطيك العلاج مو احسن من انك تروح
فارس : لا يابنتي مابي اتعبه معانا زود الله يعطيه العافيه ما قصر والله
الجازي : لا انا الحين ادق عليه ولا تردني
العنود : أي يبه خله يجي احسن لان لو بيدي والله ما عطاك اياها غيري لكن شوفة عينك
فارس : على هواكم اللي تبونه سووه
الجازي دزت مسج لعلي
( يبه طالبتك لا تردني )
رد علي بمسج
( امري ياروحي )
الجازي
( انا قلت لعمي فارس انك تجي تعطيه علاجه السكري
راح تجي تعطيه ؟؟
عشان خاطري
لان اللي كان يعطيه العلاج العنود وهي الحين ما تقدر
وهو يبي ينزل الحوادث عشان يعطونه علاجه لانه ما يعرف ياخذ ابرته )
علي
( ابشري الحين انا جاي جم جازيه عندي )
الجازي
( تسلم يا احلى ابو بالدنيا )
علي يكلم نفسه اخيرا راح اروح لها
ومر الممرضه قالها تجي معاه وتجيب معاها ابرة السكري
وراح غرفتها استاذن ودش ومعاه الممرضه
: مساء الخير
الكل : مساء النور
علي : سستر دانه عطي عمي الابره
فارس : الله يعطيك العافيه ياولدي ما قصرت تعبناك معانا
علي : افا ياعمي هذا واجب انت غالي علينا
ولف لى الجازي : تبين تردين البيت الحين او تقعدين عند خويتج لين ينتهي دوامي وترجعين معاي
الجازي : بعد اذنك بقعد عندها لين يخلص دوامك انا كلمت امي قالت ان خالتي فاطمه تبي تنام عندنا اليوم
بس بدق على السايق يجيب الشوربه اللي سويتها قبل شوي
\علي : على راحتج
الجازي : شكرا يبه
في نفس اليوم لكن في الساعات الاولى من النهار
عند القلب الحنون بدر
قاعد مع غالية
غاليه : بدوري
بدر : هلا حبيبتي
غالية : ما كلمك فهد او كلمته
بدر : بخصوص شنو
غالية : اللي صار
بدر : فهد ما يحب احد يتكلم معاه بالشيء هذا لانه يعتبر اني و لا شي لان قلبي معاكم يقول ان الرجال لازم يكون شديد
غالية : الله يهديه يارب
بدر : امين ويهدينا والله انه غالي علي واني احبه حيل بس ما اقدر اغير تفكيره
وباللحظه هاذي دخل فهد : وانا احبك بعد يا بدر
لفوا عليه وابتسم بدر له وفهد رد له الابتسامه
فهد : غلاوي وين ابوي ما شفتيه
غاليه : لا ما شفته لكن هو قال لامي انه رايح مشوار قريب
فهد : طيب غلاوي ممكن طلب
: غاليه : انت تامر ياخوي
فهد : ما يامر عليج ظالم ممكن تغيرين القهوة وتسوين وحده جديده لان بيجيني رجال
غاليه : ابشر ياخوي
فهد : ابشرتي بالجنه
غاليه وبدر : اجمعين
بدر يكلم فهد : منو اللي بيجي
فهد : بو رجا
بدر : الله يحيه من معاه
فهد : توه واصل من السفر معاه سلطان اخوه بس
بدر : طيب ما تدري شصار على عبد الرحمن بن غنام
فهد : لا وش صار
بدر : صارله حادث وهو مرقد بالمستشفى الحين
فهد : لا حول ولا قوة الا بالله متى صار الحادث ومن المخطي
بدر : المخطي هو امس صار الحادث باليل انا توي داري بعد شوي راح امشي المدينه
فهد : ابوي درى
بدر : لا ما علمته
فهد : ليه ما علمته
بدر : لان عبد الرحمن بين الحياة والموت الحين
فهد : شلون صار الحادث
بدر : كان مسرع في طريق السفر وطلع بوجهه بعير وصدم فيه
فهد : لا حول ولا قوة الا بالله
بدر : الا ما قلت تمشي معاي
فهد : مدري اذا الوالد راح يسافر اكيد بمشي معاه
بدر : خلاص بلغه
فهد : وينه هو
بدر : طلع مشوار قريب يرجع هو طالع من ساعه ونص
فهد : طيب قم معاي الدوانيه الحين يجي بو رجا
طلعوا الدوانية وجابت غاليه القهوة وعطتها فهد ورجعت لجدتها
الجده : غاليه يمه تعالي ابيج
غاليه : ابشري يالغالية امريني
الجده : ما يامر عليج ظالم
الا وش ذا اللبس اللي لابسته
غاليه : اشفيه لبسي يمه انا لابسه تنورة وبدي
الجده : ليه ما تلبسن دراعة مثل امج ومثل البنات
غاليه : يمه والله لبسي ما فيه شي
الجده : شلون يهنالج بال تقعدين كذا عند اخوانج
غاليه : هم محرم لي يعني عادي
الجدة : واذا محرم لج تتملطين جدامه
غاليه \: والله لبسي ساتر
الجده : \ وش فيها لو لبستي دراعه بالبيت ولا حطيتي على نفسج جلالج
غاليه \ ان شاء الله يمه الحين اروح اغير لبسي
الجده : الله يحفظج
بعد ما طلعت غاليه
الجده تكلم ام بدر : ليه مخليتهم على راحتهم
ام بدر : والله يا عمتي مو بيدي البنات الحين ما هم مثل بنات جيلنا
لاشافوا البنات اللي بعمرهم يلبسون ويكشخون انها تحز في خاطرهم
الجده : وش اللي يحز في خاطرهم انهم ما تملطو
ام بدر : لا يا عمه .. لبس بناتي بالنسبه للبس بنات هالوقت ساتر
الجده : ياربي دخيلك من رداة النصيب وش لبسه ذا اللي افصخ من اللي شفته
ام بدر : عمه والله لبس يشيب الراس
الجده : خلينا من ذا الهروج شوفي لي مشعل وينه
ام بدر : يا عمتي مشعل بلغني انه طالع لشغل عنده ضروري وماراح يرجع قبل ثلاث ساعات والحين صارله ساعتين
الجده : ايه الله يوفقه
ام بدر : امين
بالدوانيه
بدر : فهد وينه ابو رجا
فهد : مدري عنه قال انه بالطريج
دخل ابو رجا : السلام عليكم
فهد وبدر : وعليكم السلام والرحمه والاكرام
فهد : حيا الله من جا
ابو رجا : الله يحيك ويبقيك
بدر : حمدلله على السلامه
ابورجا : الله يسلمك شلونك بدر
بدر : بخير الله يسلمك
ابو رجا : خالي وينه
فهد : على وصول عنده شغل يخلصه
ابو رجا : جدتي وينها ابي اسلم عليها
فهد : بدر روح خذ طريج
بدر : ان شاء الله
دخل بدر : درب ياولد
غاليه : هلا بدر
بدر : دشي عند جدتي قولي لها ابو رجا وصل يبي يسلم عليها
غاليه في خاطرها محمد وصل يا الله الحين شنو اسوي بالغثا
غاليه لبدر : ابشر
راحت لجدتها : يمه ترا محمد ولد عمتي وضحه الله يرحمها وصل
الجده تحاول تقوم : يالله حيه وينه هو
تعالي ساعديني اقوم له
غاليه : لا استريحي هذا هو جايج
الجده : يالله حيه
غاليه : انا بطلع الحين
تامريني على شي
الجده : سلامتج
غاليه راحت لعاليه لقتها تكلم عادل
غاليه : الحقي \
عااليه : لحظه عدول
هلا غلاوي
غاليه : تدرين منو وصل
عاليه : شكلج يقول ان محمد اللي وصل
غاليه : اه اي وصل الله ياخذه
عاليه : انا بعرف انتي ليش تكرهينه
غاليه : من الله ما اواطنه
عاليه: لحظه : عادل ممكن اسكر شوي .. بعد شوي اكلمك
عاليه : اوكي باي
لفت على غاليه : انا بفهم هو مو ولد عمتج مثلنا
غاليه : الا ولد عمتي مثلكم بس انا ما احبه كذا من ربي الحب ما هو غصيبه
عاليه : ولا عشان فشلج مرة جدام جدتي
غاليه : لا تذكريني يالله صج احراج تمنيت اني مت ذاك اليوم
عاليه : اف اف كل هذا عشان قال انا بتزوج غاليه
غاليه : الله يقطعها من سيرة
غيري الموضوع
عاليه : اسمعي شرايج نكلم بابا نروح السوق
غاليه : شعندج بالسوق
عاليه : بروح اشتري شي جديد مليت من اللي عندي
غاليه : لا بس محمد يهاوش تذكرين يوم هاوشنا قبل
عاليه : تخافين منه
غاليه : يخسي الا هو ليش اخاف منه بس ما احب يهاوشني وهو ما يصدق على الله
عاليه \: الا خايفه والخوف ناط من عيونج
غاليه : مو خايفه والحين اكلم بابا
عاليه : نشوف
غاليه دقت على ابوها اللي توه داش البيت ورايح لامه وهو ما يدري ان محمد داخل
رد وهو داش على الجده
مشعل : هلا يبه غاليه
:............
مشعل : ابشري يبه الحين اكلم بدر يوديكم
:..................
مشعل :وينكم انتي واختج ما شفتكم اليوم تعالي بسرعه ابيج
:,,,,,,,,,,,,,
مشعل : فمان الكريم
السلام عليكم
حيا الله الشيخ
ودخل سلم على امه راسها
محمد سلم على خاله : شلونك يا خالي
مشعل : زان حالك يا ولدي انت شلونك وشلون الوالد وعمامك واخوانك
محمد : بخير ربي يخليك لي الكل يسلم عليك
مشعل : حمدلله على سلامه الاسفار يا ولدي
محمد : الله يسلمك يا خالي
مشعل : شلونج يمه اليوم
الجده : بخير الله يسلمك
مشعل : محمد من معاك جاي من السعوديه
محمد : انا وسلطان اخوي
مشعل : وينه هو الحين
محمد : نايم في الفندق لانه ما نام من سافرنا هو مسك اخر الطريج وانا مسكت اوله و نمت باجي الطريج عشان جذي جيت على طول بس قطيته بالفندق وجيت اسلم
مشعل : افا يا ذا العلم تنام بالفندق وانا موجود ما حبيتها منك يا محمد ليه انا غريب
محمد : لا والله يا خالي بس انت تعرف سلطان يحب ياخذ راحته بالنوم وهو مزعج وقت النوم قلت اخليه يريح هناك وان شاء الله بس يرتاح يجي على طول
مشعل : اذا هي عالراحه بس مو مشكله لكن اول ما يقعد من النوم تجيب اغراضك انت وياه وتجي بيتي .. وترا عشاكم الليله عندي
محمد : لا تكلف على نفسك يا خالي محنا غرب
مشعل : حق وواجب يا محمد انت منت غريب انت من اهل البيت
محمد : الله يسلمك يا خالي
الجده : محمد
محمد : لبيه يمه
الجده : ليش ما جبت معاك خواتك
محمد : والله يمه قلت لابوي قال السفرة الجايه لانه هو بعد يبي يجي
مشعل : الله يحيهم بأي وقت
محمد : الله يسلمك ياخالي
الجده : يابو رجا ماقلت لي شلون جدتك
محمد : طيبه ياجعلج طيبه ومرسله لج اغراضن كثيره بس بالفندق
الجده : ياجعلها سالمه يارب
وقعدوا يسولفون عن اخبار الجماعه
غاليه وعاليه لبسوا عباياتهم ودخلوا على جدتهم وابوهم ومحمد
غاليه وعاليه :السلام عليكم
الكل : وعليكم السلام
غاليه وعاليه : حمد لله على سلامتك يابو رجا
محمد : الله يسلمكم يابنات خالي
كيف حالكم
عاليه : بخير الله يسلمك
انت شخبارك وشخبار البنات
محمد : بخير جعلكم بخير
راحو قعدوا بين جدتهم وابوهم
غاليه : يبه
مشعل : هلا يبه
غالية : متى نروح
مشعل : خلوها مره ثانيه
غاليه : ليش يبه
مشعل : لما كلمتج ما عرفت ان محمد هني اجليها بعدين
غاليه :ابشر يبه
مشعل : صلحي لنا قهوه وطرشيها الدوانيه
ولف على محمد : يابو رجا
محمد : سم
مشعل : مشينا الدوانيه ولا ودك تقعد عند جدتك
محمد : بعد اذنك بقعد عند امي لأن مشتاق لها بس قبل ابيك بموضوع انت وامي
غالية طلعت مع عاليه بعد هالكلمه لأنها واضحه لأن مافي غيرهم معاهم
مشعل : خير يابو رجا
محمد : الخير بوجيهكم والله ياخالي انت تدري اني محير غالية لي و انا ابي املك على غاليه بعد مايوصل ابوي الكويت
وطالب اذنك ورضاكم انت والوالده
الجده : والله يوم السعد ياولدي
مشعل : الساعه المباركه يابو رجا ولو هي ذبيحه ماعشتك
الا ماقلت ابوك متى يوصل
محمد : والله عنده شغيل يخلصه ويمشي
يعني الأسبوع الجاي على خير يكون هني
مشعل : الله يحيه ويحييك
@/@/@/@
ياربي هاذي وينها ماشبكت
غالية : منو قصدك
بدر : بسم الله خرعتيني مالج شغل منو
غالية : بدوري اشفيك سؤال عادي من الي وينها
بدر : بلا لقافة روحي لأختج
غالية : افا بدير ما تبيني
بدر : بدير بعين عدوج اكبر منج وتقولي بدير
غالية : اشفيك بدوري انت كل ماتذكر الزفته هذيك ينقلب حالك ترا انا غالية وافهمك من نظرة عينك هي ترسل لك شي او تكلمك
بدر : غلاوي حدج عاد ضحكت معاج اشوف قمتي تتخطين حدودج
غالية : بدر انا ملاحظه انك قاعد تصير نسخه مصغره حق فهد ابشر ماتبي اكلمك بمواضيعك خلاص انسى اني سألتك وهي طالعه قالت :
تبي نعاملك مثل فهد ابشر
وماعطته فرصه يتكلم لأنها بسرعه طلعت
وهي طالعه من عند بدر شافت فهد
فهد : يابنت
غالية : لبيه
فهد : عاليه
غالية : لا
فهد : حبيبتي غلاوي جيبي اختج وتعالي غرفتي بسرعه ياحلوة
غاليه تتلفت حواليها : تكلمني
فهد : اشفيج حبيبتي
غالية : ها
فهد : غاليه اشفيج روحي جيبي اختج بسرعه في لكم مفاجأة
غالية : من عيوني يا تاج راسي
فهد : تسلم عيونج لاتطولون
غالية راحت تركض حق اختها
عاليه الحقي بسرعه
عاليه : اشفيج
غالية : فهد يبينا
عالية : يبي منو !! انا ؟
غاليه : اي انا وياج بعد
عالية : بس انا خايفه
غالية : ليش تخافين والله فهد حبيب وطيب بس احنا احيانا مانسمع كلامه
فهد دخل غرفتهم : ياسلام عليج
اقولج جيبيها واقفه تقرقين
غاليه : تونا كنا نبي نطلع
فهد : ماعلينا المهم انكم مع بعض
عالية : بغيتني
فهد : حبيبتي علويه اشفيج خايفه
عاليه مرتبكه : لا مو خايفه
فهد : المهم ياحلوات البسوا بسرعه نبي نطلع بسرعه
غالية : نطلع ؟ منو الي بيطلع
فهد : انا وانتو بس واذا بدر بيجي مو مشكله
غاليه بفرح : وين نروح
فهد : نتغدا برا واوديكم السوق تتشرون اغراض في مناسبه ابيكم تروحونها
غاليه : مناسبه شنو
فهد : صديقي .. خواته مسوين حفله ابيكم تروحون تستانسون وتتعرفون على خواته
غالية : بدو
فهد : حضر
ناس محترمه ويدخلون القلب وابوهم يحب البداوة بس بناتهم فري
غالية : شلون فري يعني ؟؟
فهد : يعني مو محجبات بس محترمات لازم تشترون هديه كبيره وغاليه
غاليه : حفله زواج ولا ملكه
فهد : لا هاذي ولا هاذي
غاليه : اجل حفلة شنو
فهد : عيد ميلاد وحده منهم
غالية تطالع عالية : عيد ميلاد
فهد : اي تبون تروحون او لأ
غاليه : كيفك بس بيتهم وين
فهد : الحفله في قاعه افراح مو في بيتهم
غالية: يعني يبي لنا كشخة كامله مو بس لبس
فهد : شوفوا كم تحتاجون وانا موجود
ويلا قوموا البسوا تأخرنا
،@،@،@،
ام بدر : شلونك يابو رجا
محمد : بخير الله يسلمج
فهد دخل الغرفه : يبه عن اذنك انا باخذ البنات عندنا شغل ما نطول
مشعل : أي هم يبون السوق يبون يتشرون قبل شوي انا مكلمهم
فهد : أي يبه يمكن نطول هناك
مشعل : خير ان شاء الله بس اهم شي البنات يشترون الللي يبونه
فهد : ابشر يبه
&&&&**&&&&**&&&&**&&&&
توقعاتكم
وش ممكن يصير بالحفله
ومحمد شنو راح يسوي
واذا كان له دور او لا
والبنات
العنود وش ممكن يصير معاها
واذا كانت تقدر تروح الحفله او حالتها راح تتدهور اكثر
والجازي والمفاجأة
ومشاعل
ودمتم بحفظ الرحمن
محبتكم
ندى الزهر
|
20-03-08, 11:02 PM
جديد مواضيع قسم الارشيف
العرض العادي
