كاتب الموضوع :
ندى الزهر
المنتدى :
الارشيف
البارت وصل وقراءة ممتعه
وصلوا البيت ولقوا فهد عند الباب
فهد : تو الناس ؟,.
عادل : السلام عليكم
فهد وعليكم السلام .. وين كنتوا لين الحزة هاذي
عادل : اظن انها زوجتي واخذها متى ما بغيت
بعدين مو حلوة واقفين بالشارع عاليه دشي البيت
فهد خزها بنظرة مسكت يد عادل وظغطت عليها
عادل : فهد انت اشفيك تراها زوجتي وعمي عنده خبر
فهد : انا اخوها وما لها حق تطلع بدون لا تقولي
عادل : خير ما سمعت تقولك وليه انا طرطنقي هني
فهد اقصر الشر احسن لك
فهد خز عاليه : دشي غرفتك وشغلج عندي
عاليه بطريقه عفويه وقفت ورا عادل كانها تقول انت ما تقدر تكلمني وعادل موجود
فهد بصرخه قويه : عاليه ادخلي غرفتج احسن لج
عاليه : مالك كلمه علي بعد اذن زوجي وابوي
فهد : والله وطلع لج لسان
عادل : فهد تراانا ساكت لك احترام لعمي وعمتي
فهد : ومن انت اصلا عشان تتكلم
وبالحظه هاذي دش ابو بدر : فهد
اشفيك انهبلت
فهد : يبه شوف الساعه جم وهي توها داخله البيت
بو بدر : وانت شكو انا لا قلت كلمه ما اعيدها مرة ثانيه بناتي مالك عليهم كلمه فاهم او لا
فهد : نزل راسه ان شاء الله يبه
عادل : انا اسف ياعمي
ابو بدر : على شنو ياعادل انت ما سويت شي غلط هي حرمتك وانا راخص لها وين الغلط وفهد ما كان يدري اني راخص لها
عادل : فهد اخوي ياعمي وادري انه ماكان يدري
والله لايخليني بالعكس فعله كبره بعيني زياده يومه خايف على اخته بس انا زوجها ولي كلمه عليها بعد كلمتك ياعمي
بو بدر : عادل انت زوجها وكلمتك تسبق كلمتي وانا ابوك
عادل : ما اطول عليك ياعمي انا استاذن الحين ونشوفكم على خير ان شاء الله
بو بدر : الله يحفظك يالنسيب
عاليه بعد مافك عادل يدها راحت لابوها تحتمي فيه
من فهد
فهد : عاليه ليه تطولين لسانج قبل شوي
بو بدر : فهد للمرة الاخيرة يا فهد اقولك مالك كلمه على بناتي انت ما تفهم
فهد : يبه مايصير انا اخوهم
بو بدر : لا مت انا تعال تكلم
فهد : بعد عمر طويل يبه انا ما قصدي بس لازم يحترموني
بو بدر : ومن االي ما احترمك
فهد : يبه انا اتكلم على اني اخوهم ولازم تحط لي اعتبار
بو بدر : عاليه روحي غرفتج
وعاليه قبل لا تطلع باست راس وايد ابوها مثل كل يوم قبل النوم
وقبل لا تطلع مرت من عند فهد وهي خايفه من اللي بتسويه
اول ما وصلت عنده وقفت جدامه وقالت : فهد انت اخوي وتاج راسي
وحبت راسه وايده مثل ما تسوي مع ابوها
فهد مستغرب تصرفها لكن ما تكلم وقف وقبل لا تمشي : علويه
لفت علويه عليه : لبيه
فهد ضمها قبل لا يتكلم وهو اول مرة في حياته يضم وحده من خواته : عاليه انا احبج وخايف عليج
عاليه : انت تاج راسي واخوي الكبير اللي مالي غناتن عنه
فهد : ترا ماكان قصدي
عاليه : فهد
لا تتكلم بهذا الموضوع انا
اختك الدلوعه وابتسمت
فهد لاول مرة يكون مع اخته جذي
ابتسم وباس جبينها
وابوهم جالس على الكنب ونزلت دموعه فهد لمح
ابوه يبكي ترك عاليه وراح لابوه
وجلس عند ركبة ابوه : يجلعني اروح فدوة لك يبه ولا تنزل جوهرة من هالجواهر
ابوهم : كنت متاكد انه راح يجي يوم وتضم اختك لكن توقعة بعد ما اموت
فهد : يبه ياجعلك ذخر لنا وش هالكلام الله يدومك فوق روسنا
يبه
ابوهم : فهد انا مب دايم لخواتك وانت ذخرهم بالدنيا بعد عيني انا مابي احد يظلم بناتي وانت لهم ابيك تفكر مليون مرة وتعد للعشرة قبل لا تقرر أي قرار او تتكلم أي كلمه
فهد : ابشر يا تاج راسي
ابوهم : والصلاة الصلاة تراها وصيتي يافهد
فهد : ابشر باللي يرضيك يابو فهد
فهد
( الابن البكر لمشعل عمره 26 عصبي جدا ولا يمكن لاحد مجاراته بالكلام لانه متحدث بطلاقه ومتعصب جدا مدرس اول رياضيات )
حياة مشعل واولاده
مشعل كان متزوج زوجتين الزوجه الاولى ام فهد ونورة والزوجه الثانيه تزوجها مشعل لما تعبت زوجته ام فهد هي اللي شارت عليه انه يتزوج بنت عمها ام بدر لانها تحب عيالها وهي ماتبي عيالها يتربون عند وحده ما تعرفها وتعرف اخلاقها وفعلا تزوج ام بدر على حياة ام فهد وعاشت سنتين معاهم وبعدها توفت وكان عمر فهد ذاك الوقت 4 سنوات عشان جذي ام بدر ربت فهد لين صار عمره 6 بعدين جابت بدر وبدر كان معاق اتعبهم في التربية لكن كان هادي مو مثل فهد
بعد فترة حملت بالتوأم وربتهم كلهم ولا فرقت بيوم بينهم لانها امهم
ومو شرط الام هي اللي تولد بالعكس الام هي اللي تربي وفهد مايذكر امه لانه كان صغير لكن يذكر لمحات منها كأن حياته السابقه حلم له وهو بار في امه وابوه لكن ما يحب شي اسمه بنات يقول البنات مدلعات البنت ما تمشي الا بالعصا
**
فهد لف على عاليه لقاها تبكي وهي على الارض راح لها وتقومها : روحي ارتاحي بغرفتج
ولف على ابوه : يبه الله يحفظك لي قم ارتاح
الاب : الله يخليك لهم تراهم بناتك من بعدي يافهد ابيك تصونهم ولا ترضى لاحد يغلط عليهم لو بكلمه يابو مشعل
فهد وهو يمشي مع ابوه يوصله للغرفه : ابشر يابو فهد
وصله غرفته وراح غرفته
بدر على الاب توب حقه اللي يقابله كل يوم الفجر عشان وينسى الدنيا
ويكتب اللي في خاطره في خواطر باسم
" مالي بالدنيا مكان "
في لحظات بدر يحب ينسى حياته كلها
فتح المنتدى لقى رساله خاصه
من
" غلا دنياي "
بدر في نفسه غريبه هاذي البنت عمرها ما تكلمت بالمنتدى غير الاشعار اللي تكتبها والخواطر يعني ما ترد ولا رد بس اللي يكتبون ردود على اشعارها او خواطرها تشكرهم على تواجدهم بالصفحه وبس غربيه تدز رسايل خاصه
بطل الرساله
مالي بالدنيا مكان
قد تستغرب وجود كلماتي في وارد رسائلك الخاصه لكن لم يدفعني لكتابتها لك الا شي يتحرك بداخلي عندما اقرأ كلماتك التي تكتبها واشعارك التي تسطرها هنا اشعر أنك تقاسمني شي كنت أظن انه لا يعرف غيري بشر
(( الهـــمـ ))
(( الحـزنـ ))
(( الألـم ))
مالي بالدنيا مكان
لك في هذه الصفحة اعترافي
أني أكن لك كل المشاعر النبيلة التي لا زيف بها
حاولت أن أتراجع عن قراري بالاعتراف لكن قد فات الأوان
واعترفت لك في خواطري وأشعاري منذ ولادة شعوري هذا
الذي لا اعرف هل هو
إعجاب
أم حب
هل قلت الحب
آه ما أدراك ما شعوري الذي أكن
^
^
أني اعرف أني اقتحمت عاملك دون إذن منك لكن هذا اعترافي وقد أدليته بدلوك ولا انتظر منك رد لكن أريد أن تعرف أن هناك قلب لا يريد من الدنيا سوى شراء سعادتك بأغلى الأثمان
ودمت بسعادة وراحة
ودمت بحفظ الرحمن
المرسل
" غلا دنياي "
بدر بلم لوقت لا يعرف كم لكن يفكر تحبني بدون لا تعرف انا منو
معقوله تحبني عشان كلماتي او عشان انا حزين مثل ما تقول
وفتح قسم همسات وخواطر وكتب
موضوع باسم
إهداء إلى من تعرف من هي
اليك اكتب كلماتي
لا اعرف ماذا اقول سوى
صدمتني كلماتك لي
ما الشعور الذي يتملكني الان ؟؟
بكل تاكيد الاستغراب !!
فانا لم اعتاد ان استمع لهذه الكلمات من أي شخص كان
لا اقول سوى
لا يمكن ان اعيد الكره وانا ليس لي قلب
انا لدي بقايا قلب
تركت قلبي لها منذ سنوات
وهي من سكنت قلبي
وعندما رحلت اخذته معاها ولم تترك سوى قلب محطم
لا املك من الكلمات سوى هذه
فقد تركتني كلماتي ورحلت عني
من الصدمه
لم اكن اعرف شي عن الحب منذ ان قتلته بقلبي
لا اعرف هل قتلته ام لا لكن لا يمكنني ان اعيد الكره مرة اخرى فلا يملك قلبي سوى هي
اعتذر ان كنت حطمتك لكن لا استطيع ان اكذب
ولم اعتاذ عليه ,, فهو وسيله رخيصه الثمن ,, وان كنت اريد ان امتلك قلبا امتلكه بكامل احساسي الذي املك واريدها ان تملكني بكل احساسها الذي تملك لا اريد حبا لا يدوم الا لحظات ولو كانت هذه الللحظات سنين فإن انتهى الحب في يوم ما ما تكون سنينه التي قضيت فيه الا لحظات لا اريد هذا الحب اريد الحب الذي يتوجه الزواج وتكون ثمرته ابناء صالحون باذن الله
اعتذر عن اطالتي لكنها كلماتي ابت ان تستقر في صفحات سوى هنا
والله ولي التوفيق
التوقيع
" مالي بالدنيا مكان "
وترك الاب توب وتمدد على الكنب اللي كان جالس عليه
^^
فهد بعد ما وصل ابوه راح لغرفه عاليه
طق الباب ودخل
وعاليه كانت قاعده وقفت من الخوف
فهد : السلام عليكم
عاليه والخوف باين عليها : وعليكم السلام
فهد : اشفيج خايفه ترا انا ما اكل
عاليه : .........
فهد : بسولفه معاج اشفيج
عاليه : حياك ياخوي حياك
فهد جا وجلس يمها : علويه ممكن اعرف وين رحتو مع عادل
عاليه : اكيد ياخوي
وقالت كل شي من السوق لين عمها ماعادا اللي صار الغرفه
فهد : بحده دخلتي غرفته
عاليه بخوف : أي
فهد : وكم قعدتوا
عاليه يمكن ساعه
فهد بصرخه قويه خوفه عاليه زود : ساعه
وش سويتوا
عاليه : ماسويت شي
فهد : بصرخه اقوى من الاولى :عاليه تكلمي
عاليه : البكى قريب منها :والله ما سوينا شي بس سوالف
فهد : ساعه كامله سوالف
عاليه : أي والله واساله بعد
فهد قرب منها وهي من الخوف وقفت مسك شعرها : تكلمي بالطيب احسن لك
عاليه بكت خوف والم : والله ماصار شي
بدر وهو سرحان واهو غرفته اقرب غرفه عند عاليه وغاليه
سمع فهد يصارخ
ترك الاب توب وقام بسرعه
وخذ عكازه ومشى بسرعه
وطلع من غرفته
راح لغرفه عاليه
بطل الباب
بدر : فهد اشفيك
فهد : بدر اطلع من الغرفه احسن لك لا تشوف شي ما عمرك شفته وانتي تكلمي وكان يجرها مع شعرها بكل قسوة
بدر تقدم من فهد بسرعه ومسك يد فهد وفهد بمحاوله ابعاده عنه عطاه كف بقفا يده
عاليه : بدر الله يوفقك اطلع برا
بدر : فهد انت انهبلت
فهد : بدر للمرة الاخيره اقولك اطلع برا لا احطك فوقها
بدر يحاول يفك عاليه من فهد : تعوذ من ابليس انت اشفيك عليها
عاليه : بدر يكفي انا اطلع الله يخليك بدر اطلع
بدر : فهد تعوذ من ابليس وهد البنت راح تموت بيدك
فهد : تكلمي لا اذبحج تكلمي احسن لج يا حقيره
ابو فهد داخل غرفته يسمع كلام بس مو معقوله يسولفون لان حتى لو سولفوا ما يطلع صوتهم بعدين فهد وبدر شعندهم
وقام يبي يروح للصوت وهو ماشي يقرب اكثر ييسمع كلام فهد لخوانه قال في قلبه : الله يهديك يا فهد بس لازم اربيك
الظاهر ان اللين وياك ما ينفع ولازم استخدم القوة والقسوة لو امثلها تمثيل
ابو فهد واقف على الباب صرخ صرخه خلتهم يسكتون مو خوف لا احترام له : فهد شنو هذا
وفهد سكت بس لازال ماسك شعر عاليه وهي على الارض طايحه وهو واقف عندها وبدر يحاول يفكهم
فهد بغضب : والله لو ما تكلمت لاكون ذابحها
ابو بدر : ماني عاجبك يافهد ولا انا اصغر عيالك وخر عن اختك اشوف
وفهد وهو لازال معصب : يبه الحقيره رايحه مع عادل بيتهم يبه ترضاها عليها تروح معاه بيتهم
لا وقاعده بالغرفه معاه يبه ترضاها ؟؟
ابو فهد : فهد ماراح اعيد كلامي عليك وخر عن اختك
فهد وهو يوخر عنها بس قبل لا يروح بعيد رفس عاليه في بطنها برجله باقوى ما عنده : ياحقيرة
ابو فهد لازال واقف على الباب
بدر اول ما بعد فهد عن اخته على طول وحضنها
عاليه : بدر والله ما سويت شي والله يابدر
بدر : والله مدري شالسالفه بس لا تبجين علويتي والله قطعتي قلبي بس حبيبتي لا تبكين
وهو يمسح على راسها
ابو فهد واقف على الباب
فهد وقف بعيد شوي عنهم وجا يبي يطلع مع الباب الثاني لان ابوه واقف عند الباب
ابو فهد : فهد
لف فهد على ابوه : سم
ابو فهد : تعال
راح فهد وقف جدام ابوه ابو فهد : علمني شنو سبب اللي سويته الحين
ابو فهد تكلم بكل هداوه
وفهد لانه معصب ومشتط يتكلم وهو هايج وبدون قصد انه يرفع صوته على ابوه : يبه اسالها وين راحت هي وعادل اسالها
ابو فهد في قلبه لازم يا مشعل لازم : فهد قالها بصرخه عاليه هزت ارجاء المنزل كله من قوها ومن صوته الجهوري
فهد : اسف يبه ماكان قصدي ارفع صوتي بس عادل ماخذ عاليه بيتهم وقاعده معاه بالغرفه بروحهم يرضيك يبه
ابوفهد : .....
طرااااااااااااااااااااااااااااااااااااااااااخ
وعطا فهد طراق من قو صوته عاليه خافت وخشت راسها بحضن بدر اكثر من الخوف وبدر مسك عاليه وشد على راسها
فهد نزل راسه : يبه
ابو فهد قاطعه : ولا كلمه انا غلطان ما ربيتك من اول
فهد : يبه
ابو فهد : فهد اطلع عن وجهي وان ما تعدلت والله ثم والله ان قلبي غاضب عليك ليوم الدين
فهد نزل راسه
صعب لما اكبر اخوانك يتهزأ جدامك وينطق
وطلع من يم ابوه ما تكلم
ابو فهد اول مرة يرفع يده على واحد من عياله
ماكان يحب يربيهم بالقسوة كان يحب التفاهم لكن تناسى ان احيانا يجب القسوة
ابو فهد لمعه عينه يمكن لانه خايف انه يسوي شي بنفسه لانه انطق جدام اخوانه وهو ما يحب الاهانه بس كان لازم اسوي جذي .. وين بيروح .. خله يتادب
كل هالافكار طرت بدقيقه في مخ مشعل
اه من عيالي اه
شاف بدر حاضن اخته بحب وخوف عليها
عرف ان خواته طال الزمن او قصر مالهم الا بدر بعد عيني .. فهد مدري راح ينصلح حاله باذن من الله او لا .. بدر طول عمره حنون علينا الله يخليك لهم يارب
راح لعاليه وهي بحضن بدر .. بدر شاف ابوه قرب فك ذراعه اللي محاوط اخته بها عشان ابوه يكلم عاليه
عاليه تطالع بابوها : والله ماسويت شي .. والله ..
ابو فهد : والله اني عارف بس انتي هدي بالك
انا بعرف يوم سالك ليه تعلمينه هاذي اشياء خاصه بينج وين زوجج
فهد ماله شغل قولي له تمشينا وجينا
عاليه : هو قال نسولف مع بعض حسبالي عادي ما كنت ادري ان اللي سويته كان غلط
ابو فهد : عاليه اللي انتي سويتيه غلط ومو غلط
عاليه : شلون ؟؟ مافهمت ؟؟
ابو فهد : الغلط الوقت لكن المكان مو غلط لانه زوجج لكن لو شافكم احد من اخوانه وش بيقول عنكم
عاليه : انا اسفه ما دريت ان اللي اسويه غلط
ابو فهد : لا ماهو غلط بس الوقت غلط لانه الفجر لكن لو وقت ثاني عادي مثلا العصر الصبح لكن الفجر
ماعليك الحين انتي ارتاحي
وفهد طلع من البيت معصب وزعلان عشان الكلام اللي قاله ابوه له انه راح يغضب عليه ليوم الدين واصعب شي غضب الوالدي
راح للبحر المكان الخالي في نفس هالوقت
الا من بعض الناس اللي يركض واللي يتشى بس الاغلبيه يسوي تمارين ويركض
وجلس يحكي له عن اللي صار ويمكن تستغربون انه بكى ..
.. فهد يبكي .. ايه اللي يحس ان امه او ابوه زعلان عليه .. ما يذوق طعم الراحه ولو كان جبار لكن الوالدين ..
عزيز متعود في كل يوم قبل لا يروح الدوام الساعه خمس ونص الفجر يركض عشان يتنشط بعدين يروح يفطر و ويلبس وروح الدوام
وجسمه متناسق ومبين عليه انه رياضي
كان بنفس المكان والزمان اللي كان فهد يبكي ويكلم البحر فيه عزيز لاحظ انه بروحه ويتكلم بصراخ كانه يهاوش احد عزيز كان يركض مو معطيه بال متعود على الناس بالمكان هذا بس استغرب انه يقول
فهد : يبه انا يتيم واعوض نقصي لحنان امي بالصراخ مالي وسيله غيرها افهمني يبه
عزيز حسباله انه يكلم ابوه بالموبايل وشدته هالكلمه حيل مشتاق لج يمه
حس انه يشبهه في شي وهو فقدان حنان الام
عزيز في باله انه يروح يكلمه يعرف هو اشفيه لكن كان متوقع انه يستصغره انه ما يعرفه ويسال اشفيه وليه يبكي وفكرة طرت على باله سريعه طفا موبايله وراح لفهد اللي يتكلم وهو يطالع البحر وعزيز جا من وراه
عزيز : لو سمحت
فهد فجأه لف عليه مستغرب منه : لبيه
عزيز : لبية حاج يارب ياخوي موبايلي طفا مافيه شحن ورفع الموبايل يوريه انه مغلق بغيت استعمل موبايلك للضرورة الله يسلمك
فهد: لف راسه وطالع البحر وطلع موبايله من جيبه وعطاه عزيز
عزيز : ماراح اطول .. ان شاء الله ..
فهد : خذ راحتك حبيبي
عزيز : اشكرك يالغالي
واخذ الموبايل وابتعد شوي : ادق على منو ؟؟ منو قاعد الحين ؟
ماكو غيره فاضل اقوله يجهز الفطور ,,
ودق على فاضل خلص المكالمه بسرعه ,, ورجع لفهد الي لين الحين يطالع البحر وما شال عينه عنه وماتحرك من مكانه
عزيز : يا الغالي ..
فهد : هلا ..
عزيز يمد له الموبايل : اشكرك حبيبي وما قصرت
فهد : يرخص لك حبيبي
عزيز : ممكن اجلس معك او يضايقك
فهد : افا يضايقني لا حياك
عزيز : انت ناطر احد
فهد : لا والله جاي اشم هوا
عزيز : طيب حنا نسولف ما عرفت اسمك ولا انت عرفت اسمي معاك عزيز فارس الفارس
فهد : والنعم معاك فهد مشعل فهد
عزيز : والنعم
فهد : ماعليك زود
الا بغيت اسال شركات (( .. الفارس ..)) لكم
عزيز : ايه نعم
فهد : لمنو صاحبها وش يصير لك يعني
عزيز : ليه ؟؟ يهمك
فهد : لا والله بس لاحظت الاسماء قلت يمكن صاحبها من اهلك
عزيز : انا صاحبها وهو يبتسم
فهد : يبتسم : انت بس انت صغير وشكلك ما يعطي انك مؤسسها لان لهم فروع برا على ما اعتقد
عزيز : هي للوالد بس انا اللي فتحت الفروع اللي برا الكويت
وانا مالكها الحين
فهد : والنعم كفوو
: الله ينعم عليك وكفاك الله من النار وشرها .. الا انت وش تشتغل
فهد : انا واحد على قدي مدرس اول
عزيز : ماشاء الله مدرس وشو واي صف تدرس
فهد : مدرس اول رياضيات ثانوي
عزيز : ما شاء الله الله يبارك فيك
فهد : مشكور حبيبي
عزيز : فهد ممكن سؤال
فهد : تفضل
عزيز : زاد فضلك انت جم عمرك
فهد : 26
عزيز : العمر كله يارب
فهد : الله يسلمك الا انت جم عمرك شكلك صغير مب كبير
عزيز : عمري 28
فهد : العمر كله
عزيز : اجمعين
انا عندي سؤال ممكن اسالك اياه
فهد : تفضل
عزيز : سؤال عن حياتك وخصوصي
فهد : اسال
عزيز : انت ما عندك ربع صح
فهد : شدراك ؟؟
عزيز : انا اركض قبل شوي اسمعك تتكلم مع البحر
فهد : بلا عندي اوفى صديق
عزيز : وليه ما رحت له
فهد : انا عنده الحين ولف يطالع البحر
الصبح مع طلعه النور شلون لونه خيال انعكاس الضو على البحر
عزيز : ونعم الصديق
فهد لف على عزيز بهدوء : صج ليه تسال عن ربعي
عزيز : لانك تشبهني فحبيت اتاكد من الشي هذا
فهد : اشبهك ؟؟
عزيز : ايه تشبهني انت فاقد اللي انا فاقده
فهد : فاقد
عزيز : انا يتيم الام
فهد: وش دراك اني يتيم
عزيز : سمعتك تتكلم مع نفسك
فهد : ؟؟؟؟؟؟؟؟؟؟
عزيز : بو مشعل مشينا
فهد : مشينا ؟؟؟
عزيز : ايه انا عازمك عندي لاني حبيتك اذا ما يضايقك
فهد : لا ما يضايقني بس انت مشغول الحين وانا اجازه
عزيز : أي شغل امش معاي يلا انا عازمك على ريوق
امحق عزينه بس الوقت وابتسم مو وقت غدا
فهد : انا اللي عازمك الحين
عزيز : لا اليوم انا وانت مرة ثانيه بما انك سبق قلت انك في اجازة فــ انا باخذك معاي اليوم مشاويري كلها تتفرج معاي على التعب
فهد : بس يمكن ازعجك فيها
عزيز : بالعكس انا ادور احد استانس معاه غير ربع الشغل لانهم حيل رسمي
فهد : توكلنا على الله
عزيز : توكلنا على الله
وراحوا الباركينج
عزيز شاف فهد يبي يروح سيارته : بو مشعل وين تعال معاي
فهد : وسيارتي
عزيز : خلها احنا راح نرجع هني على الغدا ولا اقولك الحقني فيها
فهد : ان شاء الله
عزيز الحين تبدأ زحمه الدوامات دير بالك لا تضيعني
فهد : ابشر
وراحوا بيت عزيز وكانت الساعه 7 ونص
في كراج بيتهم : فهد حياك اشفيك
فهد : ...........
عزيز راح داخل الدوانيه وفهد وراه
عزيز : بو مشعل انت تاكل على الارض او على الطاوله
فهد : ليه
عزيز : احنا هني على طاوله لكن اذا انتوا تاكلون على الارض ابشر
فهد : عادي مانبي نغلبك على طاوله مثلكم وابتسم
عزيز : حياك اقعد فهد ليش واقف
فهد قعد وهو عيونه تجول في البيت من فخامته ومن كبره
عزيز رفع السماعه وطلب المطبخ : الو سميرة ؟؟ عطيني فاضل
فاضل .. قبل شوي شنو قلت انا
أي انا بالدوانيه ومعاي ضيف .. شرايك يعني .. اكيد
يلا فمان الله حبيبي
ورفع السماعه مرة ثانيه وطلب البيت داخل : الو سلام ... اهلين حبوبه ياروح بابا ابوي قعد حبيبتي
زين انتي اخذتي الابره .. وابوي .. لا يتاخر قوميه قولي له في ضيف عندنا بالدوانيه
تريقتي انتي وابوي
طيب دوري احد يتريق معاج وخلي ابوي يجي الدوانيه وخلي فاضل يجيب ابرته انا اعطيه اياه اوكي ياروح بابا
اوكي حبيبتي باي
ولف على فهد : تو ما نور البيت حبيبي
فهد : منور باهله عزيز اسف على التدخل بس ابره شنو اللي تاخذها بنتك وابوك
عزيز : ههههههههههههههه بنتي لا هاذي اختي
واللي تاخذها ابره السكري
لانها مريضه سكري بعيد عنك وعن اللي تحب
فهد باستغراب : اختك تقولها حبيبتي ومن هالكلام
عزيز : ليه فيها شي غلط لو الواحد دلع خواته
بالعكس انا ذخرهم واناا مو بس مدلعهم الا عمري ما رفضت لهم طلب لو شنو ماكان
فهد :البنت ما تتدلع البنات ما يمشون الا بالعصا
عزيز قاطعه : لا غلطان ومفهومك خاطيئ وابتسم وهذا انت مربي اجيال لازم تعرف ان القسوة عمرها ما جابت نتيجه زينه بالعكس القسوة دوم طريق الفشل اما الطريق الصحيح الحوار والتفاهم اسمع , حوار , استنتج , ثم قرر
فهد : كني قاعد مع ابوي وابتسم
عزيز : الشيء هذا ما يبيله ابوي وابوك هذا بالفطرة واحيانا يكون بالتعود
يعني اذا ماكانت فطرتك جذي تقدر انك تعود نفسك على هالشي
بالعكس اذا انت فتحت مجال للحوار بينك وبين اختك اذا صار شي تقدر تقولك واذا ما عرفت تقرر تستشيرك واذا مالقت الحنان من بيت اهلها من منو تلقاه
انت اللي لازم تكون حنون عليهم ورفقا بالقوارير
فهد :: والله يا بو فارس
اني مدري ويش اقول لكن بحاول افكر في كلامك عل وعسى اقتنع فيه
وسمعوا كحه صوت جهوري بالممر الفاصل بين الديوانيات
دخل فارس ( الاب ) : السلام عليكم حيا الله من جانا
كلهم وعليكم السلام والرحمه والاكرام
فهد : الله يحيك ياعمي
فارس : وشلونك يا ولدي
: بخير ياعمي انت بشرني عن صحتك
فارس : الحمدلله جعلك بخير
عزيز : يبه هذا صديقي فهد مشعل فهد
الاب : والنعم يالله انك تحيه يارب
فهد : الله يحفظك ياعمي ويحيك
فارس ( الاب ) : انت ريقت ضيفك ولا لين الحين
عزيز : لا والله ناطر فاضل يجهز الريوق
فهد : والله ما يحتاج يا بو فارس ما قصرت كافي شوفه الوجيه السمحه
عزيز : لا بومشعل لا كلافه ولا شي انت عزيز وغالي
فهد : الله يسلمك حبيبي
ونطق الباب
ودخل فاضل بلباس الطباخ المعتاد : حياكم الفطور جاهز عمي
عزيز : وابرة ابوي
فاضل : موجوده بالصندوق هناك
عزيز : الله يعطيك العافيه خلاص انت روح الحين
ولف عزيز على فهد : حياك يبه حياك بو مشعل البيت بيتك وانا اخوك
فهد وابو عزيز قاموا ويتقدمهم ابو عزيز ووراه فهد ثم عزيز
ودخلوا غرفه الطعام اللي ابهر فهد ان في ناس عايشه بالرخاء هذا هو صحيح مو قاصره شي وعنده فلوس ولله الحمد لكن اول مرة في حياته يشوف غرفه طعام طولها مثل اللي شافه في تفكير فهد معقوله يحطون المفطح ولا الذبايح هني ما اتوقع شلون لا اتوقع هاذي للشخصيات المهمه يمكن ليش لا لفت نظره عزيز يسحب من علاج ابوه بالابره ولما عطى ابوه الابره
فارس : عزيز تصدق ايدك ثقيله
عزيز : هههه الله يسامحك يبه انا ايدي ثقيله
فارس : يمكن لاني تعودت على اختك تغزها لي ايدها خفيفه الا دق على فاضل قوله ياخذ الصندق لها ترها ما خذت علاجها
وبعد ما دق عزيز على فاضل وجا اخذ الصندوق رجع فاضل ووقف عند عمه وصب له شاي وراح لعزيز وعطاه العصير اللي طلبه منه لما دق عليه الفجر وهو بالبحر
ووصل عند فهد
فضل : تفضل ايش تشرب
فهد سرح بالطاوله اللي يدزها جدامه وهو يشوف كل انواع الشراب من عصير وقهوة وشاي وحليب واشياء ما عمره شافها
فاضل : عمي لو سمحت ايش اجيب لك او تفضل انك تشرب بعد الاكل
فهد : لا صب لي شاي
وهم يتريقون دش
شاب في 16 من عمره وجميل المنظر لابس سبورت لانه بيطلع وصل لابوعزيز وباسه على راسه : صبحك الله بالخير يبه
فارس : صبحك الله بالسرور
وراح لعزيز وباس راسه : هالو برذر
وراح لفهد اللي وقف عشان يسلم عليه
مشعل : السلام عليكم ياهلا
فهد : وعليكم السلام
ومشعل قعد يم فهد : شوي دخل فاضل : صباح الخير مشعل ايش تشرب
مشعل : هلا فاضل حليب بدون اضافات ولا سكر
وعطاه الحليب ولف مشعل يكلم عزيز : عزيز ما عرفتني
عزيز :فهد هذا اخوي الصغير
مشعل هذا فهد صاحبي
مشعل : تشرفت بمعرفتك
فهد : زدتني شرف ياغالي
ورجعوا ياكلون
فهد كان يلاحظ كل واحد شلون ياكل وطريقه اكلهم المعتاده
وما كثر اكل لكنه يشرب من الشاي على خفيف
عزيز : بومشعل علامك ما تاكل
فهد : الحمد لله كثر الله خيركم
ابو عزيز : وخيرك بس تراك ما كلت شي
فهد : الحمدلله
عزيز : بو مشعل تبي انقل لك على سفره بالارض نفس منت متعود
قاطعه ابو عزيز : اجل انت بدوي يافهد
فهد بتعصب لكن ابتسم : ايه ياعمي
فارس : والنعم والله
لف على عزيز وليه ما خليت الريوق بغرفه الطعام الثانيه
عزيز : أي وحده الصغيرة او الارضيه
فارس : الارضيه يابوي
فهد : وهو يوقف : كثر الله خيركم
في باله في غير غرفه الطعام هاذي مو وحده ثنتين بعد
فارس قام معاه وعزيز وقف بعد ما بقى الا مشعل قاعد
وطلعوا كلهم راحوا الدوانيه
وطلب عزيز من فاضل الشاي والقهوة والتمر
فهد حسب توقعه انه راح يدخل فاضل شايل صينه كالمعتاده فيها دله الشاي ودله القهوة والقدوع
ويسولف عزيز مع ابوه وفهد سوالفهم المعتاده
ودق موبايل فهد شاف موبايله "" تاج الراس ""
فهد : السموحه الوالده
عزيز : خذ راحتك
فهد : هلا يمه
:............
فهد : وعليكم السلام
:................
فهد : ايه بخير جعلج بخير
:..................
فهد : لا عند واحد عزيز علي
:................
فهد : ما قصرتي يا ام بدر والله يخليج لي يمه
:................
فهد : والله اني بخير
:................
فهد : من قالج ؟؟
:..............
فهد : ازعل على شنو يمه لا زعلان ولا شي
:...............
فهد : يمه الله يحفظك لي لما ارجع البيت نتكلم
:.........
فهد : ان شاء الله انتي بس ارتاحي وريحي حالج
:..........
فهد : فمان الكريم
وسكر وناظرهم يسولفون ومندمجين بالسوالف
وقف فهد: انا اترخص منكم وكثر الله خيركم
عزيز: وخيرك حبيبي
وهم طالعين للكراج عزيز : فهد
فهد : سم
عزيز : ترا ما يرضيني انك جذي ترا ما طولت بعدين انت وعدتني انك تتمشى معاي اليوم
والله يافهد اني حبيتك من قلبي واحس اني اعرفك من شنين
فهد : الله يسلمك يا عزيز بس والله انا محرج منكم من الصبح وانا هني
عزيز : افا يا فهد هذا وانت صاحبي
واخوي
فهد : والله ياعزيز بصراحه انا تعبان وعندي هموم وودي اسافر بس ناطر معاشي ينزل بقب من الديره شهر كامل
عزيز : زين تخاويني انا عندي سفره بعد اسبوع
فهد : ووين
عزيز : انت وين خاطرك
فهد : والله انا نيتي اتمسى في السعوديه تبوك الطايف جده أي مكان المهم اذا قعدت هني زياده بنفجر
عزيز : انا سفرتي على ماليزيا تسافر وياي
فهد : ماليزيا
اشوف المعاش الاسبوع الجاي الا ما عطيتني رقمك
عزيز : فهد ابي اشوفك الليله صار
فهد : ابشربس الليله عندي
عزيز : عندي او عندك ماهي مشكله لكن خلنا نشوفك
واخذوا ارقام بعض وسلموا على بعض وطلع فهد من عند عزيز
قراءة ممتعه لكم
البارت الجاي
شنو توقعاتكم
عن فهد ... وانطباعه عن عزيز والفكره اللي كونها لهم
وبدر والنت ؟؟
وعادل وعمه ؟؟
ودمتم بخير وعافيه
ودمتم بحفظ الرحمن
((( ندى الزهر)))
التعديل الأخير تم بواسطة ندى الزهر ; 19-04-08 الساعة 06:31 PM
|
31-01-08, 04:00 PM
جديد مواضيع قسم الارشيف
العرض العادي
