كاتب الموضوع :
اقدار
المنتدى :
القصص المكتمله من وحي قلم الاعضاء
اقتباس :-
المشاركة الأصلية كتبت بواسطة زارا  |
.. الجزء اليوم خطـــــيـــــــر مررره... احداث جديده وشخصياات جديده وتوسع في ظهور بعض الشخصيات.. صراحه وكالعاده ماقدرة انام الا بعد ما ارد على الجزء.. واصلا وانا نازله من فوق تلاقيت انا وامي وهي طالعه على الدرج وبكل ديمقراطيه قالت لي وين رايحه ياا حبيبتي.. قلت باروح اقرأ الجزء الجديد من الملامح اكيد ان اقدار نزلته.. قالت لي طيب ياحبيبتي لاا تتاخرين واذا رديتي عليها اليوم سلمي عليهااا.. هناا انا فزيت من النووم مرعوبه خفت ان امي تكوون تعبانه؟؟؟ والا جاها شي ؟؟؟تعوذت من الشيطاان والحمد لله طلع كااابوووس..ههههههه...
ربعنا والله شكلنا غريب وحنا نقرأ عنكم الاحد.. بس يله الحمد لله ان الاتصالات عند اهل الرخا والشده تعدلت والا كان جيتهم وجبت امجد الكهربائي اللي عندنا في الدوحه يصلح الاتصالات.. عاد وش جاب الكهربائي للاتصالات مدري.. اهم شي اني بفزع وبس..ههههههههه
عمااد : انت يااعماد مااعاد القى كلام عنك ..يعجز الكلام.. كل اللي ابيه يصير في القصه تسويه.. عسى ربي يعافيك ويشفيك ياارب.. ياحلوك وانت مع شادن والعنود مطيره عيونها فيكم.. والا لما سديت افم شهد الفضحه وهي تكلم عنك انت و وشادن... المهم انت كل مواقفك جايزتن لي.. وموقف الكبتشينو ياااازينك زيناااه فيه.. والله اني اشتهيته بس من بيفزع يجيبه لي بها الوقت.. والا اخرتها ماردنا لطريقة شادن وسااره.. اثرهاا طريقة الناس كلهاا وانا شايفه نفسي على خوالي اذا طلبوا الكابتشينو ذليتهم ذل فيه وعلى بالي انه مااركه خاااصه لريما..خخخخ المهم انت ياعماد..عسى ربي يشفيك.. وعليك بحليب البل عسااه صحه وعافيه وفيه الشفااء يارب ولا تنسى كل اللي قالت لك عليه الطبيبه الشعبيه دموع يتيمه.. خخخخ...
شادن : آآآآآآآآآآآآآخ منتس ومن حركااات بنات جده.. اعجبتيني مره لما جبتي سالفة ام زميلتس وانها شفت من السرطان من موية زمزم.. والاعشاب الطبيعيه.. صح.. في زمزم البركه.. (وزمزم لما شرب له) استمري ياشادن وبثي في عماد الامل وداائماا خليتس معه ولاا تخلين وحده حاقده مثل ليلى تثنيتس عن مساعدة عماد.. انا مدري وش قالت بس حااسه ان الكلام اللي دار بين فوزيه وليلى عن عمااد ويمكن ان العله تتهمه باشياء مدري وشي؟؟؟ وبعد انتي ياشادن كل مواقفتس بالقصه حلووه..
نوف : والله اني رحمتها وهي ماتدري وش يصير حواليهاا.. بس هل فعلاا هي تنسى او تتناسى؟؟انا اتوقع حالة نوف تتطور من سيئ الى اسوأ.. واتوقع انها تدخل بصمت نهائي بسبب حالتها النفسيه السيئه.. ويااا خوفي يرجعونها لمسفر مره ثانيه..او يمكن تموت؟؟؟ لأ اقدار لاتمتين نوف.. صح اني ماحبيتها زوجه لفهد.. بس نوف مسكينه .. ما قدرت انها تسيطر على وضعها وخلت قلبها اللي يمشيها ومافكرت بعقلها ثانيه وحده... اقدار عطي نوف فرصه تعيش حياتها بعيد عن الاجواد وبعيد عن عماد وبعيد عن شادن.. وخليها تروح مع حمود وتشوف معه حياة مستحيل انها تشوفها مع عماد...
العنود : وربي انها فله يااليتهاا عندي وتوسع صدري بهالفتره.. العنود هذي تجنن وتموت من الضحك.. مت ضحك عليهاا وهي تزن على امها تبي تروح عند ام ناصر.. والا لما قال نايف لشادن وش المخلوق الغريب اللي وراتس... وربي كاني اشوفها بفستانها الطويل الشتوي الاورنج اللي اكيـــــــــــــد انه من سوق الخميس...ههههه... والا وهي مستحيه من عمااد.. تجنن.. مهما كانت العنود طفله وفيها براءه اتمنى انها ماتفقدها اذا كبرت وما ابيها تكون مثل نوف..
ليلى : ياا انا كرهتها من اول ماشفت خشتها وهي داخله عليهم وبعبايتها اللي كأنها فستان.. كرهتها وكرهت غرورهاا.. ومااا اشوف فيها اي طيبه ولااا تقنعوني بطيبتهاا.. انا تعاطفت مع نوف لاني اشوفها بوضع ماتقدر تسيطر فيه على نفسهاا.. وبعدين نوف لما عرفت انه صارت لحمود ماا عاد تقدر تفكر بعماد والا بوضعهاا.. فاختارت انها تدخل عاالم النسيان لانه بالنسبه لوضعهاا الحين هو اريح شي تقدر تسويه.. بس ليلى احس انها عقرب رمل ... ولئيمه.. واحس انهاا خاينه لاحمد ..عيونهاا عيون الخونه.. بتقولين شلون شفتي عيونها بقول شفت فيها شي مايطمن!! ما اقدر احدد وشو بس احساسي يقولي انهاا جايه وجايبه المصايب معهاا.. بس ودي اعرف وش اللي شافته حنان بجوالها وخلاها تقول يااحسافه انتس زوجة احمد؟؟؟ وشو الشي اللي خلاهاا ترتبك من حنان واللي شافته بجوالهااا؟؟ وبعدين وش الكلام اللي سمعته شادن ونكد عليها وخلاها تروح ركض لغرفة عماد وترفض تفتح لفوزيه.؟؟؟. تدرين اقدار توني فكرت يمكن ان الكلام مايخص عماد يمكنه يمس شاادن شخصيااا؟؟ كرهت هااليلى وحسافه انها تكون زوجة احمد.. وبعدين وش حضرتها شايفه نفسها على القريه وحياة القريه؟؟ وين متربيه حضرتها فيه؟؟ لا يكون بقصر بيكنغهام؟؟؟ وع مالت عليهاا وعلى شوفتها لنفسها مالت عليهاا.. ومالت على احمد اللي ما عرفهاا على حقيقتها للحين... يا احمد انا من اول لحظه عرفت طينتها وانت الى الحين ماتدري وشي.. ياا خي طلقها وخلها تنقلع.. شكل مابينكم عيال خلهاا تفارق وانا بزوجك نوره.. والله انك بتشوف فرق السماء عن الارض اذا خذتهاا.. والحين ايهاا الحزب الكريم .. جاااكم مهمة تطليق ليلى من احمد والمهمه الثانيه تزويج نوره من احمد... يله كل الاعضاء في الحزب يجتمعون وويثبتون تواجدهم عشان نباشر الاعمال الفوريه للحزب..ههههه
احمد : انا اشوف ان العنوان يناسب احمد وجيته والاحداث اللي صارت 90% اذا ماكان 100%
شوفي انا احمد هذا حبيته.. هاااااه لاااااا يروح فكرتس بعيد.. انا حبيته حب اخوي.. وابيتس تخلصينه من النسره ليلى.. وانا اخترت له نوره ..احس انها تناسبه مرررره.. اخلاق وطيب وبنت حشيم.. وعليه خفت دم مو طبيعيه وانا عند خفت الدم اضيـــــــــــــع ومااا عاااد اعرف راسي من كرياااسي..ياااه يااا اقدار يجنن وهو يقول لعماااد..
ياا ويلتس من الله يا اقداار خفت الدم هذي كلها وضاايعه على القرده ليلى,,, ماالي شغل يطلقها يعني يطلقهاا.. وع مالت عليهااا.. احس انها تخونه!!!!
وجود احمد اليوم مأثر بالجزء كله.. مأثر على مزاج عمااد وعلى مزاج ام ناصر .. وعلى مزاج شادن وعلى مزاجي انا بعد..خخخخخ... قلت لتس ملقووووفه.. ماا تصدقيني..هههه
نوره : ما شاء الله على نوره اليوم دور نوره يعني اطول حبتين عنه دايم.. احس نوره عاقلة مره واخلاق عاليه وتتحمل المسؤليه..والحلو فيهاا انها تحاول تخلي نوف تندمج مع وضعها الجديد بس هذيك مسكينه مهيب مع الناس.. مرات احس ان نوره تحب حمود بس ماتبين لانه معروف انه لنوف ونوف له.. ويمكن فعلا هي تحبه او كانت تحبه بس هي اعقل من نوف وماا تعلقت بحباال بالهواء وقدرت تسيطر على حبها له.. بس يا نوره ابشرتس اني لقيت لتس واحد احسن من حمود الف مره واسمه احمد بس انتي اصبري شوي لين نخليه يطلق النسره اللي عنده وابد من يوم يقول ياطلاق وحناا جاينتس نطامر نخطب.. بس انتي اصبري شوي وابشري باللي يسرتس ويسرنا معتس....خخخخ.. ادري ملاقيف..
ساره : واخيرا ياساره عرفتي من البطل اللي انقذتس يوم الحادث.. وانا اقول لاااا تستحين ولاا شي هذا بأذن الله بيصير ابو عيالتس.. ساره اعجبتيني مره وانتي تتصلين تسألين عن عيال اميره. اصيله يابنت. والله ان دموعي نزلت وانا اتخيل كيف يسألون عن امهم.. وهـ بس نكدتي علينا ياساره بأخر هالليل.. والا لما رحتي لدار الايتام وزهره وعبدالله قطعوا قلبي وهم يسألون عن فاطمه.. الله يرحمها.. الواحد مايروح من هالدنيا فعلاا الا بالعمل الصالح والذكر الطيب ابرك له... يااا حبيبي ياا عبود والله انا لما قال لي سنه ماشفت فاطمه.. اني احسب جانا مطر من دموعي اللي قامت تنزل والله انهم يرحمون هالمساكين.. الله يخلي لي والديني حتى لو انهم ديكتاتورين.. ياا حبي لهم ولتعسفهم.. الله لاا يخليني منهم.. وهـ بس... لاخلا ولا عدم منهم..
فهد: يااا فلبي على شيخ الشباب وهو يقصد بسعود قصيد(ن) يضيق الخلق..
بسم الله عليك ياشيخ .. تعوذ من ابليس يابو ناصر.. ترى هذا كله من الشيطان لاا يلعب عليك ويخليك تغضب ربك..
بس حركتك مع ابومشاري لما شققت الشيك.. يااا انت عجبتي .. وابو مشاري الله يهديه بعد يبي يشتري عمل الخير.. والله اني توقعت انه بيعطيه فلوس عشانه انقذ بنته.. بس بعدين استبعدت هالفكره.. كنت احسب ابو مشاري اعقل من كذاا؟
ابو ناصر ياا حلوك وانت تسلخ الذبيحه.. ودي اني كنت معك واساعدك بدال الثور خالد اللي مامنه فايده الا الهواش مع خواته ..صددق انه دب.. بس عاد اسمحلي مااا اقدر اشوف الدم ولو شفته تورطت فيني.. فخلني اراقب من بعيد احسن..ههههه
المهم نجي الحين للجد ... اعجبني عماااد لما قال لخواله عن ساره
اي والله يا ابو مشعل حتى انا اشوفها تناسبه من قبل ماتدري انت بعد..خخخ
لااا كن عاااد هالردود اللي بغت تجلطني
مهوب على كيفك يا حبيبي بتاخذها وانت ماتشوف الدرب.. مسوين حزب واعضااء وجناح عسكري وجناح ثقافي واخرتها تقول ماا ابيهااا.. انت تلعب على من؟؟؟تلعب على روحك والا تلعب علينا؟؟؟
بتاخذها ورجلك فوق رقبتك يااشيخ.. ومهوب بكيفك لاااا بأمر الحزب.. نلعب حناا؟؟؟ والله من شااف افكارك وانها اياام وشهور في بالك وفي عقلك وتقول ماا ابيهاا هزولت والله.. يااا فهد ياا قلبي.. انت تراك تبيهاا بس ماتدري.. انت خايف من الموضوع.. خايف من مشاعرك.. واللي مخوفك اكثر انها تذكرك بسعوود واللي صار له.. انا والله ماا الومك من هالافكار اللي في بالك... بس انت بعد تتوقع انها ماتمر باللي ات تمر فيه والحين من بيقولون لها طاريك.. بيمر الحادث بكل لحظاته عليهاا والادهى والامر انهاا ماتذكرك... ياا قهر والله...
المهم الجزء الجاي ابي اشوفك منضف مخك المسخم هذاا ومغير افكارك اللي تجلط والا كل اعضاء الحزب جوك في جده وزوجنااك غصب.. على باالك نلعب حناا؟؟ والله...
نايف : شوفي ملحوظه صغيره باقولها عن نايف شفتي لما راح يجيب لفهد ملاابس انا متاكده انه شااف مناال.. وان كان مااشافهاا اصفقيني...خخخخ
الا اذا كان سمع كلام القرده لفوزيه؟؟
تحياتي لتس اقداار.. والله يوفقتس باختباراتس ويوفقنا معتس.. وتراني مو زعلانه من رفض فهد للزواج من ساره..لاني عارفه انتس تلعبين علينا.. بس اللي مااراح اسامحتس فيه انتس تتركين القرده ليلى بدون تاديب.. ادبيها واذا ما اقدرتي عليهاا علميني وانا اجيب اعضاء الحزب ونوريهاا الشغل العدل...خخخخ.. لان زي ما عرفتي صار من اهداف حزبنا ان احمد يطلق القرده..
بس ياا ليت تقولين اذا فيه جزء الاسبوع الجاي عشان نذاكر من بدري.. واذا مافيه بعد بلغيناا عشان نذااكر وماا نقعد كل شوي طاامرين على النت .. وماا يصحب النت من مشااكل ( طبعاا عائليه )خخخخ
|
ياهلا ومرحبا والف الف مسهلا
حيا الله ملكة الملامح وحبيبة قلبي والغاليه جدا ريوما ..
الله يبارك بعمرك ويسعد ايامك ويهنيك ويكتب لك الخير والتوفيق
قولي آمين
جد جد تحرجيني بكلامك وكرم اخلاقك وطيبك .. جعلني مااخلا منك .. وهـ بس ياحبي لك
خخخخخخخخخخخخخخخخخخخخخ
اجل طلع حلم في النهاية ..
والله اني فتحت عيوني قلت وش صار امس البنت تقول ان امها نسخة طبق الاصل من امي
ههههههههههههههههههههه اذا ينفع هالامجد هاتيه
والله شكلي نهايتها بشترك في ال.. يو اس بي من الجوال يقولون احلى شي هو ومايرفع الضغط ..
والله ياريما اللي يشوفك تمدحين عماد ومعجبة فيه مايقول هذي اللي متعلقه في فهد وماتغلي احد اكثر منه .. بس انا ادري انك تحبينه مصلحة عشان مواقفه مع فهد وعشان بحر تحبه
الله يوسع صدك ياريما بالعافيه والرضا
ياني ضحكت من تعليقك على العنود لين هلكت ..
كلامك عن ليلى ماراح اعلق عليه الحين
بس بقول تابعي في الجزء القادم بالذات وبتعرفينها اكثر
احمد ماراح يتزوج نورة من الحين اقول لكم يعني لاتحرجوني معاكم وتخوفوني بحزبكم
تابعي نصيب نورة بيكون مع من
اجل حبيتي احمد حب اخوي ..
ههههههههههههههههههههههه
تابعي بقية حكاية احمد عساها تعجبك وتنال رضاك واستحسانك
مجرد ذكر اليتيم ياريما يهطل الدمع
فما بالك باللي يكلمهم ويلمس اوجاعهم من قرب
هنا الألم بعينه وعلمه اسأليني مجربة ..
فهدك ..
هو اما انه عبيط ولا انه بعذره
تابعي حكايته وكلي بكِ سعادة
تدرين اني اذا شفت ردك استعد له واترك جميع الصفحات المفتوحه امامي واقراه حرف حرف
جد جد ياريما انتي رهيبه وتحمسيني لردة فعلك عن احداث فهد بالذات ..
نايف .
احم احم
وشو له الاحراج ياريما ..
تابعي نايف وش صار له في الجزء القادم ..
الله يسعدك ويخليك ويهنيك ويوفقك وتجيبين الدرجات العليا في الدنيا والآخرة
الجزء والله اني للحين محتارة في رسايل تجيني يترجوني فيها اصحابها أأجله لبعد الامتحانات وفيه العكس
يوم الجمعه في الليل راح اقول لكم اذا فيه جزء ولا لا
يعني اذا رسيت على بر وقررت زين
تسلمين لي ياقلبي ياريما
عساني ماافقدك وعساك تبشريني قريباً بتفوقك
مودتي وخالص شكري وامتناني
ملاحظة : ريما ادري اني مقصرة في ردودي عليك لأنك والله تستاهلين من يرد على كل حرف تكتبينه بس اختك مزنووووقه بقووووة اتمنى انك تعذريني .. يبرر لي مكانتك عندي اللي تزيد يوم عن يوم والشاهد ربي .. احبك في الله وكفى ياريما الغاليه ..
|
24-01-08, 04:38 PM
جديد مواضيع قسم القصص المكتمله من وحي قلم الاعضاء
العرض العادي
