كاتب الموضوع :
Cherry
المنتدى :
الارشيف
السلام عليكم ورحمة الله وبركاته
أول شي أحب أشكر كل اللي تابعوني وشجعوني من بداية العمل إلى الآخر
ميرسي جميعاً، لولا تشجيعكم الدائم ما كنت كملت
مو تدرون أنا قايلة من الأول، أول ما تنزل ترجمة كاملة بوقف
وألحين شكلي صج بتهور وبترجم الأجزاء الأربعة الأولى عشان تكون فعلاً ترجمة كاملة خاصة لمنتدانا الحلو...
ومعلومة صغيرة،،،،
البعض عابوا كثير على الأسلوب والأخطاء الإملائية وووو....
أنا قلت من البداية إنكم فعلاً راح تلقون منها كثير، خاصة في الأجزاء الأولى
لأني من أصل ما كنت ناوية أنزلها
أول ما بدأت أترجمها كانت لأخواتي الصغار اللي تعبوا وهم ينتظرون وما في أحد راضي يترجمها
وبدأت فعلاً وما كنت أراجع فيها شي،،، أكتبها وأتركها على جنب،،،، هم راح يفهمون
بس بعدين قلت ليش ما أفيد اللي نفس حالتنا اللي يدورون ومو لاقين
على الأقل تصبيرة لحد ما تنزل الرواية كاملة مترجمة
وطبعاً أنا مخلصة لليلاس وليلاس بس
فنزلتها،،، وذاك اليوم كنت مزحومة وإن أجلت كنت بتردد وبهون>>> أعرف روحي
عشان كذا نزلت بدون مراجعة
بس بعد ما نزلت الترجمة الكاملة ومع تشجيعكم المستمر قررت إني أكمل
يعني الشكر لكم إنتو في الأول والأخير...
ثانياً،،، اللي تكلم عن الأخطاء النحوية وأخطاء الترجمة وأساليب اللغة....
أنا لا تخصصي عربي ولا انجليزي ولا ادعيت إني عالمة بالترجمة... للعلم بس، تخصصي رياضيات، يعني ما لي أي علاقة بالترجمة
كل الموضوع إني هاوية للقصص، واللي أكتبه جاي من داخلي مو من القواعد اللغوية والأدبية سواء عربية أو انجليزية، وأبداً ما ادعيت إن الترجمة perfect... بس أهم شي إني أقدر أوصل المفهوم والتشويق للي يقرا القصة,,, هذي هي النقطة الأساسية،،، أما اللي يدور الأسلوب الأدبي والدقة النحوية،،، ترجمة دار النهضة في الطريق....
والبعض اللي قالوا إن أسلوبي يشبه أسلوب دار النهضة،،، أقول ممكن، لأني كنت أحاول أتبع في الكتابة نفس أسلوب الكاتبة تماماً، وإني ما أغير شي من طريقتها قدر المستطاع،،، وأظن إن هذا نفس اللي يسوونه دار النهضة،،، وأيضاً الأسماء وبعض التعبيرات،،، حاولت أتبع نفس اللي موجود في الأجزاء الأولى المترجمة اللي قرأتها،،، مع إن بعضها كان خطأ،،، فعشان كذا صار الأسلوب متشابه،،، وهذا يمكن اللي ريح البعض أكثر مع ترجمتي،،، وهذا هو المهم...
بس تدرون
كنت أتمنى لو الترجمة ما خلصت
صار لي شهر ما لي شغل غيرها
ألحين شراح أسوي؟؟؟
الصباح فتحت الجهاز ما لقيت شي أسويه طفيته وقمت....
بس يلا ما عليه،،، جاي الدوام وبننشغل
بالنسبة للقصة....
بالعكس أنا ما أشوف إنها خالفت التوقعات كثير
يعني كنت متأكدة إنها ما راح تقتل هاري، مع إنها كانت أحياناً تلمح إلى إنها راح تقتله عشان تخلص من السلسلة وما يقنعونها تنزل جزء ثامن،،، مع إن القصة الأساسية كانت مكتملة عندها من قبل ما تنزل الجزء الأول،،، كان كل اللي عليها ترجمة أفكارها على الورق...
رون وهرميون يمكن تقتل أحد منهم أما هاري مستحيل...
بالنسبة لسناب،،،، كنت متأكدة مليون بالمية إنه راح يطلع زين في الأخير....
حتى وأنا أقرأ الجزء السادس وحتى بعد ما قتل دمبلدور...
لأنه من الجزء الأول وهي تأكد على هالشي...
بس اللي فعلاً ما توقعته إنها تطلعه بهالطريقة،،، كانت أحلى من اللي توقعت...
لوبين وتونكس,,,,
يبيلها تكفيخ عليهم...
كنت متأكدة إنها راح تقتل لوبين من يوم ما مات سيرياس...
وورمتيل كان أكيد بيموت،،، لأن عادة إذا كان الواحد زين وانقلب،،، فأكيد إنه في الأخير يموت أو يتوب ويموت بعد...
ما يبقى غير لوبين من الشلة القديمة؟؟؟
أكيد راح تذبحه ومعاه تونكس،،، ما راح تخليها تعيش بدونه >>>> مسكين تيدي
بس اللي يقهر هو السبب اللي خلاها تموتهم...
في مقابلة لها سألوها ليش مات لوبين؟؟؟
قالت، هي كانت ناوية إن آرثر ويزلي يموت في الجزء الخامس>>> تبي تموت أبو وبس
بس بعدين كسروا خاطرها عياله وإنه طيب حيل فقامت موتت بداله لوبين وتونكس،،،، المهم يتيتم أحد>>> متعقدة
أما فريد....
الصراحة كنت متوقعة تموت أحد منهم، بس كنت متوقعة بيرسي للسبب أعلاه...
وليش فريد مات؟؟؟
كانت الأخت ناوية هاجريد يموت،،، بس على حسب كلامها، بعد نهاية الجزء السادس وقبل نشره،،، جاها طفل وقال لها: أرجوك لا يموت دمبلدور ولا هاجريد... يكفي مات أبو وأم هاري، لا تخلين بعد ذلين يموتون...
فهي انحرجت منه لإنها كانت فعلاً موتت دمبلدور،،، فعشان كذا غيرت عن هاجريد في الجزء اللي بعده.... بس لازم أحد يموت بداله،،، فريد المسكين...
مثل ما قلت قبل فصل محطة كينغز كروس ما دخل مزاجي،،،، أحس إنها ما جابت الموضوع عدل...
أما باقي القصة،،، أو بالأصح المجموعة،،، كانت رائعة،،، صعب نلقى سلسلة بهذي الروعة
بالنسبة لمصير بقية الشخصيات بعد نهاية القصة،،،
فهو متروك لخيال القراء... مع إنها وبعد إلحاح المتابعين تكلمت عن مصير بعض الشخصيات
تلقون كل شي في المقابلات المنشورة لها....
أما آل درسلي فهي من بداية الجزء قررت إنهم راح يرحلون وما لنا شغل فيهم...
وأخيراً أحب أرسل شكر كبير جداً من جديد لكل المتابعين ،،، ما راح أقول أسماء،،، أخاف أنسى أحد ويزعل،،،، وما يهون علي زعل أحد،،، كلكم روعة وميرسي....
بس بعطي شكر خاص لرياحين وكاهنة اللي تعبت معاي كثير في تنسيق الأجزاء والله يعطيها ويعطيكم جميعاً ألف عافية...
نشوفكم إن شاء الله من جديد إذا لقيت قصة مثل هاري بوتر أو علامة زورو تقنعني إني أترجمها...
بس إن شاء الله المرة الجاية،،، وإذا تهورت وترجمت،،، مستحيل أنزلها إلا إذا خلصتها كاملة مثل ما سويت مع زورو.. وأتأكد أول إن ما راح يترجمها أحد غيري،،، لا يجيني سب ولا يجي لغيري بسببي بعد...
تصبحون على خير وإلى لقاء آخر في يوم ما إذا الله كتب
سي يو
،،،،،،،،،،،،،،،،،،،
ملحوظة صغيرونة:
سكويب تعني عامي مولود لأبوين من السحرة
يعني عكس الساحر المولود من أبوين من العامة
|
18-10-07, 09:44 PM
العرض العادي
