كاتب الموضوع :
أميره الورد
المنتدى :
الارشيف
الفصل الثاني عشر
مااقدر اعيش العمر يوم بلياك...طيفك بعيني راسخ في خيالـــــــــي
صعب علي بالحيل يازين فرقاك..ليتك تشوف اللي بحبك جرى لـي..
مازل يوم مااهذري بطرياك..دايم على ذكراك مشغول بالــــــــــــي..
الله واكبر ياريش العين ما اقساك...صار الوصل بيني وبينك محالي..
(عبدالله الرشود)
دخل سلطان الغرفة...وانا رحت تخبيت في غرفة الملابس..عشان اعطيهم راحتهم...قد ما اقدر... حاولت اسمع الحوار اللي يصير بينهم لكن ماقدرت...فقعدت ادعي لعفرا من كل قلبي..ان سلطان مايكسر بخاطرها ويقولها شي ماهوب زين... مرت دقايق حسيتها شهور وانا قاعده انطر على جمر!!... وقاعده اتخيل كل موقف ممكن يصير بين هالاثنين...اتخيل سلطان معصب..ويهاوش عفرا..واتخيل سلطان مبسوط ويبشر عفرا...واتخل ملامحه عادية ويسالها عن اللي صار بالسوق...لكن كل هذي خيالات لا تسمن ولاتغني من جوع!!!...
حاولت اجمد قلبي...لكن قلبي رقيق ما قدرت اجمده..دمعت عيوني...ليش طولوا؟؟؟... اكيد ان جاسر قال شي لسلطان عن عفرا...لالا الله لا يقوله...جاسر رجال موب بزر...حتى لو لاقدر الله...قرر جاسر انه يترك عفرا...لا يمكن يقول لسلطان شي موب زين عن اخته!!...
بعد عشر دقايق تقريبا...افتحت عفرا الباب...وكان شكلها غير!!...كانت عيونها تلمع بقوة...وهي.. كأنها طفله صغيرة...مبسوطة ومو عارفة تعبر عن سعادتها...قالت لي وهي ترتعش :اخيرا يا ملكه...راح اتزوج يا ملكه..راح اتزوج...
وركضت لي وضمتني بقوة...ضميتها بقوة وانا مو مصدقة اللي قاعده اسمعه...قلت لها من بين دموعي: شفتي ان الله كريم؟؟... وانه رحمك من العذاب اللي كنت عايشة فيه؟؟" قالت وهي تصيح.. " انا مو مصدقة...توقعته راح يتركني... توقعته راح يهجرني...ما توقعت ابد..ان لي حق احلم لو بنسبة 1% برجعته..." قلت لها وانا ابعد عنها شوي وامسح دموعها" لا تقولين كذا...جاسر يحبك.. واللي يحب ما يستغني عن حبيبه بهالسهولة..جاسر صبر سنين وعاند ابوه علشان هالعيون يا الغبية..." وضربتها بقوة على كتفها.. قالت من بين دموعها وهي تضحك"اييييي... انت يا ملكه...وجه خير علي..والله وجه خير علي...انا مو مصدقة..والله راح اسمي بنتي عليك.." ضحكت وانا ابكي" خليها تجي اول...بعدين فكري باسمها يا الهبلة.." وكملت وانا اجيب المنديل وامسح خشمي" وبعدين..لا تنسين تركدين بتفضحينا بين البدوان اللي هناك!!!.." قالت عفرا وهي تبكي اكثر وتضمني" والله ما خليه يندم لحظه وحده على زواجه مني...والله..." وكملت وهي تعض على شفايفها من الارتعاش اللي تحس فيه" راح اخليه اسعد انسان بالكون...راح احبه... واشيله بين عيوني...راح اقرا عليه إذا طلع...وإذا نام... وإذا تكلم قدام الناس...راح اطبخ له بنفسي..واكله بنفسي..والبسه بنفسي...واخدمه بعيوني الثنتين...وحادعي كل ليلة..ان ربي يحفظه ويطول بعمره..." طالعت بعفرا وضميتها اكثر وبكيت معها بحرارة وقلتلها وانا مو مصدقة" حمااااااااااارة...راح افقدك يا الدبة...مين راح يجلس معي؟؟..ليش حائط المبكى بيروح؟؟..." قالت عفرا وهي تضحك شوي وتبكي شوي"راح اكون دوم موجوده لاجلج يا ملكه...متى ما اشتقتي لي او حسيتي انك تبين تفضفضين لي..لا يردج إلا موبايلج.." قلت وانا ابعد عنها شوي وامسح دموعي" ماراح احسدك...يله روحي بسرعه قبل لا اغير رايي...روحي قولي لعمتي نورا..يحقلها تعرف...".
الساعه1:52ص
" ملكه..ملكه...نشششي....!!" فتحت عيوني ببطء...وش السالفه؟؟..وين هالصوت؟؟..تحركت ببطء على سريري...ادور مصدر الصوت...غمضت عيوني بقوة ورجعت فتحتها...الظلام بالغرفة يخوف...وصفقت كذا مرة ولا انفتحت اللمبات...استغربت..يمكن في عطل بالكهرباء.. او يمكن ما سدد عمي الفواتير ...اتحركت بارهاق..عشان اقوم من على السرير... قلت بصوت عالي..." ميييين؟؟؟...عفرا!!!" سمعت الصوت اللي اول يتكرر" ملكه..ملكه...نشششي!!" ما ادري ليش قلبي قبضني..تحركت ببطء..ووقفت..على الارض..بس تزحلقت وطحت على الارض..وش ذا؟؟..ماء!!...مو عارفة وشو؟؟..مو باين...اووووه..جمسي يالمني...بشكل!!..افف.. فضيع متعب... افف..وش هذا؟؟...لالالا مو ماء..شي ثقيل شوي..لزج شوي...
حاولت اوقف لين ماقدرت...لاحظت ان فيه نور ضعيف بالحمام....خفت...قلت بصوت عالي" عفرا...هذا انت؟؟..." مشيت بخوف وانا كل شوي اتزحلق...واطيح واحس باشياء طايحه...وصلت الحمام...لقيت فيه شمعة....مولعة..مشيت ببطء..سمعت الصوت يتكرر..." ملكه...ملكه... نشششي!!.." رجعت على ورا مو مصدقة..وين هالصوت؟؟..اكيد هذا حلم...اكيد...حسيت ان شعر رقبتي وقف...حسيت ان فيه احد يراقبني...!!..التفت ورا..ماشفت احد...طالعت بالمراية... وصررررخت بصوت عالي..." آآآآآآآآآآآآآآآآآآآآآآآآآآآآآه...لالالاااااااااااا ا..." رجعت على ورا..انا متاكده شفت شبح...والله شفت شبح..شفت عيون تطالعني....يا عالم تطالعني...صرخت بصوت ثاني..وحاولت اطلع من الحمام..لكن ماقدرت.. اتسكر الباب بقوة......انقفل باب الحمام... صرر ررخت بقوووووووة... حاولت افتحه قد ما اقدر...طقيت على الباب بقوة....حطيت ايديني على راسي..وقعدت اشاهق بصوت عالي...وانادي" عفراااااااااااااا..يممممممممممه...." ماحد يرد علي...لحظات..وانفجر صوت ضحك..صوت ضحك مجنون...واخذ يعلى ويعلى..وانا ضميت نفسي بقوووة..وقعدت اصيح.......لالالا اكيد حلم..انا مو مجنونة..هذا حلم والله...حلم والله!!!
اسوأ احساس في الدنيا هو احساس الخوف.. محبوسة بين اربع جدران..والدنيا ظلام... دامس ماعدا نور شمعه بسيطه....تظلم في المكان اكثر من انها تنوره....نور الشمعه هذا جنني...خلاني اشوف اشياء موب موجودة...ميلانها مع هبة الهوى..خلاني اصرخ من اعماق قلبي..كل حركة اسمعها هي جني ناوي يتلبسني....وكل ظل اشوفه على الجدار...هو حرامي بيغصتبني وبيقطعني وبيرميني للكلاب...قطرات الموية هي خطوات القاتل اللي بيقتلني...ودقات الساعه... هي دقايق اعدامي وموتي ونهاية حياتي....
..شديت شعري بقوة..وانا اصيح بصوت مكتوم..انا خاااايفة... خااااااااااااااااااااااااااااااااايفه اموت بالمستشفى هناااك...عند المجانين...راح ياخوني هناك..لأني مجنونة....انا مجنونة...هذا حلم..لالالا..قصدي كابوس..لكني مو قادره اميزه عن الواقع..اكيد كلها عشر دقائق واقوم من النوم..واضحك على جنوني كأنه نكتة الموسم...ايه....اكيد عفرا بتدخل تقومني علشان نشرب شاهي بالزنجبيل ونتمشى بالحوش..اكيد احد بيسمع صوت صراااااااااااخي وينقذني من اللي انا فيه...
قرصت نفسي بقوة....ضربت وجهي كف بقوة....ليش ما اقووووووووم؟؟؟...جاوبوني ليش؟؟... صخت باعلى صوت" عفرااااااااا....عمتي نوراااااا....عمي سعووووووود.." وقعدت اشاهق بيأس البيت كله عوازل وماحد راح يسمعنيييييي.....
تلمست جسمي....جسمي اللي مليان جروح...طووويلة وداميه مثل هالليلة....ضميت نفسي بقوة....ولزقت بالجدار اكثر...انحشرت بركن..وحطيت راسي على ركبي...وقعدت ارتجف..بقوة...واقرى على نفسي اواسمي...لكن....ولا شي صار...غير ان نور الشمعه بدى يلفظ انفاسه ويموووت...ينتهي... رحت لها بسرعه...وبكيت....ما ابيها تنطفي...لا تنطفين...الله يخليك .. من كثر ماني خايفه حاولت اشيلها بايدي...فطاحت على فخذي وانطفت..
" ملكه...بنتي..بسم الله عليك" هذا كان صوت عمتي نورا وهي تدخل علي...بعد مافتحت باب الحمام علي بعد ثلاث ساعات تقريبا...طالعتها...كان شعري منتفش...وعيوني حمر... ذبلانة ...وشفايفي ترتعش بقوة...ضميت نفسي بقوة..وقلت لها بصوت خافت..يمكن حتى ماسمعته" اتاخرتي يا عمتي.. اتاخرتي..." طالعتني مفجوعه..." انت وش مجلسك بالحمام؟؟..." مارديت عليها...صرخت وهي تنتبه ليديني اللي مليانه جروح...وفزعت وهي تشوف الدم اللي مالي ركبي...قلت لها بصوت منهدم" عمتي... انا...ابي انوم!!" قربت مني وكانها خايفه...، ابتسمت بسخرية وضحكت....ضحكة عالية مرتفعه....وقلت لها"ههههههههه.... خايفه مني!!..هههههه" وكملت وانا اعض على شفايفي بتريقة" انا ما اعض!!..شوفي....ههههههههه"تناثرت دموع غبيه...من عيوني....عشان تعلن الضعف اللي ماليني من شمالي ليميني..من فوق لتحتي...من داخلي لخارجي... مسحت عمتي نورا دمعه من عيوني وقالت بصوت يرتعش" انت تعبانة؟؟!!... اكيد تعبانة..." وضمتني بقوة...ما بكيت ولا تحركت..ولا تفاعلت معها...دزيتها بعيد عني ووقفت مترنحه وطلبت منها بصوت طبيعي" اتركيني بحالي...انا مو مجنونة....انا انسانه طبيعية.. مو محتاجه شفقتك يا...يا.."...واضفت بسخرية وانا اطلع من الحمام: يا عمتي العزيزة"..
اخيرا...ناموا..اخيرا..تركووني...طالعت بالمطهر اللي بايدي وبالقطن اللي على الارض...لهم ساعات وهم يدقون على الباب...حتى سلطان جا ودق علي الباب...ارتعشت وانا اضم رجولي لصدري..ورميت المطهر من ايدي وقلت وانا ارتعش بصوت عالي شوي" ليتكم خذيتوني معكم.." كنت اكلم صورة امي وابوي بيوم زواجهم...الله...كانوا مبسوطين حيل!!... امي بفستانها الابيض النافش...ووجهها البريء....وابوي..بثوبه والمشلح حقه..مساكين...ماعرفوا بمصيرهم ولا مصير.. عيالهم... ماعرفوا ان المستقبل خبا عليهم لعبته الغادرة...!!..اهتزت شفتي..وانا اخذ المطهر من جديد واحط منه على القطن...مسحت على جروحي النازفة...آآآه..لو الاقي احد...يمسح على جروح قلبي...وياخذني بحظنه وينسيني العالم كله!!...مسحت على ركبتي المجروحه بقوة..واحرقتني دموعي اللي كانت تناثر بقوة...دموعي مسكينة تراها!!...عمرها مالقت ايد حنون تمسحها..حتى امي الله يرحمها...صدق كانت حنونة...لكنها كانت تحب اخواني اكثر!!... وكانت تنتبه لهم اكثر..كانوا دايم يقولون ملكه العاقله اللي ما ينخاف عليها...ملكه هي عن عشر رجال....ملكه لو نتركها بصحرا..ورجعنالها بعد فترة لقيناها عايشة ومعيشة من حولها..عشان كذا عمرهم ما اهتموا لي...!!...عمرهم مافكروا يسالون عن احوالي...!!.. عمرهم ما فكروا ان هالملكه...مثلها مثل غيرها...انسان طبيعي...له قلب نابض واحاسيس متدفقه.
اخيرا..خلصت..طهرت كل جروحي..ولفيت على بعضها شاش...والبعض الثاني..حطيت عليه لزقات...بلعت ريقي وانا اتحرك على اقل من مهلي..لأن كل جزء من جسمي يالمني...كل جزء يئن ويحترق بالنار اللي جواتي...كل جزء يحكي قصة عذاب طويلة..عيت تنتهي فصولها!!!
جلست على السرير..وشلت رواية كنت اقراها امس قبل لا انوم...بس لسه ما خلصتها... اسمها قطار النسيان..محظوظة جيسكا...فقدت ذاكرتها وعاشت مع واحد وسيم وطيب..ولا... يحبها بعد...بس هي غبية...مصرة تعرف حقيقتها..مصرة تعرف اسمها وشخصيتها...!!..بنات غبيات... السعاده ما تجي غير مرة وحده..ومع هذا ما نغتم الفرصه..ونسعد..نقعد نفكر ببكرة..والتفكير ببكرة متعب...مثلي انا...قررت ما افكر ببكرة...لأن بكره.. يمكن ياخذوني لمستشفى الصحة النفسية...مستشفى المجانين...اكيد راح ياخذوني هناك..رميت الرواية على الارض بقوة.. وتلحفت...راح ارجع عنده..عند الدكتور..المجنون...غمضت عيوني بقوة..امنع الدموع المالحه انها تطلع..لأنها تالمني..لأن وجهي كله جروح...مو مصدقة...انا..ملكه...آل....، مصيري مستشفى المجانين...لالالا....انا لازم اهرب من هالبيت...لازم..اوافق على الي خاطبني...هو فرصتي الوحيده للهرب....ايه..بكره راح اكلم عمي واقوله...اقوله اني موافقه على اللي خاطبني واني ابي الزواج باسرع وقت ممكن...
دورت حبوبي المنومة...واكلت لي حبتين...وشربت كاسة ماء باردة..تبرد النيران اللي تشتعل بصدري..، غمضت عيوني...ونطقت اسمه...نطقت اسم الوحيد اللي حسيت انه مهتم فيني...مساعد!!...
الساعه 11:22ص
طالعت بوجهي في المراية...كان لوحه حزينة تحكي قصه حياتي كامله...نثرت الموية على المراية بقوة...تشوه وجهي..وتغيرت ملامحه...عضيت على شفايفي وطحت على الارض اشاهق وابكي بحرارة...انا خايفه يا ناس...خايفه...خايفه اروح هناك...خايفه اموت وحيده...خايفه يحسبوني مجنونة...انا مجنونة....بس ما لازم احد يعرف...مالازم احد يعرف اني مجنونة!!..لازم اتصرف بشكل طبيعي...لازم يكون تصرفي واقعي..وثقيل ورزه..التصرفات اللي تعودوها مني...انا صرت اخلط بين الاحلام والواقع..صرت ما افرق بينهم..اللي كان بالامس...كله كابوس..ومع هذا انا اعتقدته حقيقي...حتى ان باب الحمام ماكان مقفول..كان مفتوح!!..ومع هذا انا حسبته مقفول..وماكان فيه شي على الارض..مع هذا تعثرت على الارض كثير..وماكان فيه شي لزج...البلاط نظيف لامع...مافيه اي شي...
وقفت بعد ماسمعت طق على باب غرفتي..طلعت من الحمام وتوجهت للباب...لقيت عفرا واقفه هناك...كانت تطالعني وفي عيونها الف سؤال وسؤال...كانت لابسه روب ابيض عليه دبدوب احمر..وشعرها مسيحته حول وجهها...صديت عنها ورحت لسجادتي..قالت لي وهي ترتعش" ملكه!!...انا مو مصدقتهم فيك!!..." وكملت وهي تشهق" انت...من بد كل البشر لا يمكن تكونين مجنونة!!...انت العقل كله...انت..." وحطت ايدها على فمها وقالت وهي تبكي بحرارة فجأة" حراااام ...انا ما اسمح لهم ياخذونك للمسشتفى...ما اسمحلهم يحطمون حياتك...ما راح اسمحلهم يحكمون عليك بالاعدام وانت حية ونابضة بالحيا..."مارديت عليها..لفيت شرشف الصلاة الوردي علي..وغطيت شعري زين...كملت كلامها وهي تجلس على السرير بعد ماقفلت الباب" فهميني شو اللي صار؟؟..فهميني...ليش كنت في الحمام؟؟؟..فهمينييييييييييي...ليش سويتي بنفسج جذي؟؟؟" اهتزت شفايفي..بس ما رديت...ماحد راح يصدقني..ليش يصدقوني؟؟؟..مو انا مجنونة..خلاص مالي كلمة....فاقده الاهلية..رنت الكلمة باذني..كلمة بدرية..صدقت انا فاقده الاهلية..ما اصلح لاي شي...مسكتني عفرا ولفتني بقوة عليها" ماراح اخليج تروحين هناك.. فاهمه؟؟...فاهمتني يا الغبية...ساعديني اساعدج...ساعديييني..." وامتلت عيونها دموع وارتعشت بقوة...طالعتها ببرود وبعدتها عني وقلت قبل لا اكبر عشان ابدى الصلاة" مابي مساعدتك...." وكبرت عشان اصلي...طالعت فيني وانا اصلي وصرخت بقوة فيني وقالت" انا ماراح اخليك تضيعين نفسج بنفسج...فاهمه؟؟.." وتركت الغرفة وطلعت وقفلت الباب وراها بقوة!!..
خلصت صلاة...وانسدحت على سجادتي المخمل...ضميت القرآن بقوة لصدري..مابي اطلع..مابي اواجههم..مابي اشوف الشفقة اللي تلمع بعيونهم....مابي اشوف الشماته بعيونهم..عضيت على شفايفي.. وغمضت عيوني بقوة...ماعدت اقدر استحمل.. لازم اكل من حبوب الاكتئاب اللي عندي... انا ما اكلت منها نهائيا....لأني كنت اعتقد اني مانيب محتاجتها...لكن لا....هالحين راح اروح آخذلي حبتين... لازم احاول انسى او اتناسى الحقيقة..الحقيقة...اني..مجرد مجنونة...رفع عنها القلم في الشرع...يعني حتى الصلاة..لو ماصليتها ماحيلوموني.. حتى الصيام لو ما صمته بيعذروني!!.. مادريت ان شعور المجانين مثل شعور الناس العاديين..يعني انا احس بنفسي انسانة طبيعية...لكن انا بنظر الكون مجنونة!!...مجنونة!!..مجنوووووووووووووونة....فاهمين ثقل هالكلمة؟؟...تخيلوا تودعون كل احلامكم...وكل آمالكم..وتناظرونها تكبر مع غيركم..وتترعرع في بيوت ناس ثانية..قمت من مكاني بسرعه وتركت المصحف على جنب..انا لازم ارجع ازرعهم.. ورودي .. لازم ارجع ازرعهم من جديد.. لازم اخليهم يكبرون...ويكونون شاهدين على وجود انسان مجنون بالورد في يوم من الايام..انسان عاش بهالقصر..وحب هالقطعة الصغيرة..واسقاها وصبر عليها بكل امانة واخلاص!!...
وصلت لقطعتي...اللي كانت بيوم لي انا..لقيتها خاوية..مجرد تربة...بدون اي زرع...جلست على الارض..وتلمست الارض بلهفه...ابتسمت وقلت بصوت مرتفع شوي" راح ازرعك من جديد..وراح اسقيك من عرق جبيني...وراح اراقبك تكبرين وتحلوين يوم ورا يوم..." قمت من على الارض..وقررت اروح للمطبخ..لأني كنت مخبية فيه البذور حقت الورد والنعناع... والريحان والفل والياسمين... وصلت للمطبخ..لقيت فيه الطباخ سمير الهندي..قلت لسمير وانا متلثمة بشرشف الصلاة" سمير..." التفت لي وقال وهو يحرك البصل في القدر" نئم ئمتي..."
: وين البذور حقتي؟؟...
سمير: آآه هذا بزور حق ورد..؟؟
: ايوووه...وينها؟؟..طلعها لي!!..
سمير: او...سوري ئمتي..هدا...ئمة بدرية اخد..( عمتي بدرية اخذتها)
: نعم؟؟؟..بدرية؟؟..
سمير: ايوا ئمتي...هي قول..هدا بزر خربان..
طالعت فيه وتنهدت....وقلت وانا الف عنه: خلاص سمير...شكرا...
مشيت خطوتين...إلا سمعت صوت وقف الدم في عروقي
: انا اجيبلك كل البذور اللي في الدنيا...بس لا يضيق صدرك...يالغلا..
فتحت فمي مو مصدقة...هذا حلم ولا علم..يمكن فعلا انا بديت اخبط..ولا اميز بين الواقع والحلم!! ...لالا...هذا مساعد..مساعد بلحمه ودمه.. قلت بصوت متقطع" مسااا..عد!!" قال وهو يقرب مني" ايه مساعد...مساعد اللي ماغبتي عن عينه لحظة..مساعد اللي مل هالكون بلياك..مساعد.. اللي ندم على انه فكر يتركك دقيقة..." بعدت عنه خطوتين على ورا وقلت وانا احاول اتراجع بس بحذر" مساعد...وقف عندك.." طالعني وكانه استغرب كلمتي..قلت وانا اخذ نفس عميق واتوكل على رب العالمين...لحظة المصارحه قربت..وانا مليت هالغلط..انا من اليوم راح اكون لغيره فالافضل انه يعرف هالشي مني..عشان مايفكر يتمادى...لأني عمري ماحكون ملك له!!.." مساعد.. انت خطيب بنت عمي..ما اسمحلك..ابدا ابدا..تقرب مني...فاهم؟؟" وكملت بقوة اكبر رغم اني شفت بعيونه صدمه قوية" ..ولا اسمحلك ابدا..ابدا..تجرح بنت عمي!!" اتسعت عيونه مو مصدق..اللي قاعد يسمع..كانت عيونه حمرا...وشعره طويل شوي..وذقنه مبهذلة...قالي بصوت مبحوح" لا اقرب منك؟؟..لهالدرجه وع؟؟..لها الدرجة كخة؟؟...مو من مقامك يابنت آل...؟؟"" قلت وانا اتراجع اكثر" مساعد..عيب...عليك.." صرخ فيني" عييييييب؟؟..عيب احبك...عيب؟؟؟..عيب اهواك؟؟ ..عيب اجي عشان اشوفك؟؟" تلفت حولي بسرعه..بيفضحنا هالرجال..قال وهو يقطب حواجبه" تغيرتي يا ملكه..تغيرتي..كل هذا لأنك صرت مخطوبة لغيري.." استغربت انه يعرف... استغربت ..من متى درى؟؟..ومتى قالوله الموضوع ماله يومين...كيف انتشر؟؟؟قلت وانا ارتجف" ايه..لأني صرت لغيرك..مساعد..لا تضحك على نفسك..انا عمري ماكنت لك عشان اكون لغيرك.." سفهني وتقدم مني بسرعه..حط يدينه على كتوفي..وقربني منه بقوة.. ماكان يفصلني عنه شي...جمدت بمكاني..دنيتي دارت... الخوف صرعني...حاولت اصرخ..لكن فمي انطبق..ماكنت مصدقه اللي يصير...عشان كذا انت كنت فاتحه فمي ومبققه عيوني فيه..كانت عيونه تطالع عيوني تاكلني.. تخليني احس اني بدون ملابس...ان في شي غلط!!..قال بصوت متالم حزين وهو يهزني بقوة" انا احبك..فاهمه وش يعني احبك؟؟..يعني اموت بهواك...واحب طية رجلك...واحب لمعة عيونك.... ملكه.شلون تخليني وحيد...شلون تتركيني...وانا تركت بدرية علشانك....يوم دريت انك تعبانة بالمستشفى...جيت مشي بالسيارة..لأني مالقيت حجز...واول ما وصلت...مافكرت اروح ارتاح...جيتك طيران للمستشفى...وفوق هذا كله...كنت مرابط فيه طول الوقت..كنت ادخل بالسر لغرفتك...ارشي الممرضات عشان يخلوني اشوفك.." وكمل وشفته ترتعش وماكان طبيعي بالمرة" كنت..كنت املي غرفتك بالورد!!...كنت المس شعرك الاحمر...المس وجهك الفاتن..." صرخت بذعر يوم حاول يجر اللثام عن وجهي بس ما اهتم..جره عن وجهي وأخذني لركن منعزل شوي عن شبابيك البيت...قال وهو يتنهد بحسرة" بتحرميني منك!!...بتروحين لغيري؟؟" قلت وانا ارتجف" مساعد الله يخليك اترركني...مو حلوة بحقك او بحقي...خلاص..ربي ماكتب انا نكون لبعض..ربي..كتب لك انسانه غيري..وانا كتب لي..." صرخ فيني بصوت عالي" بس انت..انتي عشمتيني فيك!!..عشمتني بحبك..بجنونك..." قلت وانا ابكي" متى؟؟..متى عشمتك فيني؟؟.." صرخ فيني وهو يهزني" بكل لحظة تلاقت عيوني بعيونك..بكل لحظة شفتك فيها...بكل ابتسامه من ابتسامتك وضحكة من ضحكاتك..." غمضت عيوني وقعدت ابكي بحرارة..بعدني عنه بقوة وابتعد عني خطوتين على ورا وقالي بصوت عالي وهو يحط يدينه على راسه" ماراح تكونين لغيري... فهمتي؟؟...حطي هالشي براسك...انت لي انا...لي انا"..
الساعه2:05م في غرفة الطعام..
" لالالا.." صرخت بصوت خافت وانا جالسه على طاولة الاكل...شفت الوجيه كلها تطالعني... رفعت وجهي لهم..قلت وانا احرك الاكل بصحني" معليش..سرحت شوي.." قالت عفرا بطريقة اندفاعية" ايه عادي...من حق كل شخص عايش في الامارت انه يسرح بافكاره..." عمي سعود قال وهو يطالع بوجهي" ملكه...ابيك بموضوع بعد الاكل.." ارتجفت بس عفرا مسكت يديني وابتسمت لي تطني...وطمأنيت شوي.. شفت عمي سعود وهو يقوم عن الطاولة... وودعته بنظراتي وانا متاكده انه بيكلمني بموضوع من اثنين يا المستشفى يا اللي خاطبني...طالعت بعمتي نورا.. كانت نحفانه..ووجهها ذبلان....وشفيك عمتي..؟؟..وش اللي يدور براسك؟؟.. قالت سماح وهي تطالعني" تبين مكرونة بالبشاميل؟؟..تراني مساعده الطباخ فيها؟؟.." ابتسمت لها واعطيتها صحني...حطت لي قطعه كبيرة...فاخذت منهاالصحن وانا شاكره..امممممم..ريحة المكرونة تجنن.. لكن...نفسي مسدودة..بس علشان سماح بحاول اكل شوي...، قالت روعه وهي تاكل شوية سلطة" جسمك يجنن ملكه..على كثر مااسوي ريجمات ما يطلع مثلك ليش؟؟.." قالت سماح وهي تضحك" قولي مشاء الله..اهي خلقه جسمها كذا..." والتفتت علي" صح ملكه؟؟.." قلت لها وانا ابتسم" يعني انا طبيعتي ما اكل كثير..عشان كذا ما اسمن..وبالنسبة لتقاسيم الجسم..وارثتها من جهة امي..." قالت روعه وهي تترك ملعقتها" يا بختك...انا تعبت من الريجيمات..ومع هذا مو عاجبني جسمي.." قلت لها وانا امسك الملعقة" ليش مو عاجبك؟؟..يجنن.." قالت وهي تفتح عيونها على الاخير"بالعكس..ماشفتيني وانا لابسه البنطلون..يخرررع..." سكت..ماعرفت وش اقولها؟..انا بيوم كنت نسخه من روعه بكل شي... قالت عفرا وهي تحط ايدها ورى ظهري" تفلي على بنت عمي...لا تحسدينها...بعدين تنتفخ وتصير مثل البعير!!.." ضحكت سماح بقوة وقالت" عفراا..فال الله ولافالك..بعير مرة وحده..لو ناقه مو اهون؟؟" قالت عفرا وهي تناظرني" والله ما ادري كلهم واحد....المهم..انها تسمي وتفل على بنية عمي الوحيده...تراها غالية عند ناس كثير.." قالت سماح وهي تطالعني بنص عين" صح..غالية عند ناس كثيييييييييييير.." وغمزت لي.. طالعتها هي وعفرا..اوكيه..عفرا تقصد سلطان...لكن سماح مين تقصد؟؟...قالت بدرية ببرود" اف.. ذبحتونا ترى..اتفلي عليها..اتفلي عليها...كأنها اول وحده بالديره جسمها نحيف!!.." قالت سماح وهي تهز كتوفها" جسم ملكه مو نحيف...جسمها جميل..." وكملت وكأنها تذكرت شي" تذكرين نيكول يا ميران؟؟...اللي يسمونها عارضة ازياء الجامعه.." قالت ميران ببرود وهي تقلب عيونها اللي ممكيجتها على الاخير..ومضللتها بالاسود والعنابي..." ايه..ذكرتها..وش فيها؟؟.." قالت روعه" وانا بعد عرفتها...قصدك تشبه ملكه مو؟؟.." صرخت ميران مفجوعه" الله يالفجر!!...هاذيك الجميلة تشبه ملكه..." وكملت وهي تطالعني" معليش ملكه..مو انتقاص لك..بس هي غير وانت غييييير!!" قالت سماح وهي تآكل المكرونة حقتها" لا والله...ان ملكه ازين منها مية مرة.." قالت روعه بصراحه" ايه..الحق ينقال.. جسم نيكول زي جسم ملكه...وشعرها نفس الشي..لكن وجه ملكه مشاء الله خيااااااال...موب مثل ذيك البرصه!!..ومشاء الله لون بشرة ملكه يجنن..انا اموت ويصير ذهبي كذا... كنا نتسدح بالشمس بالساعات ما يطلع بنفس الدرجة..." قالت بدرية وهي ترمي شوكتها بوقاحه بقوةعلى صحنها: اففففف..موضوع يسد النفس.." وتركت الطاولة...وبعد ثواني لحقتها ميران وصوت كعبها يرن على البلاط...
تسحبت بعد الغدا لغرفتي...ابي ارتاح شوي..الاحداث قاعده تتلاحق بذهني...حطيت ايدي على قفل باب غرفتي المدور...لكني سمعت صوت عمي سعود..
: ملكه...
: هلا عمي...وشو؟؟
عمي سعود: ابيك بكلمه..
بلعت ريقي: ايه عمي...حياك..بغرفتي صح؟؟
عمي سعود: لا...المكتب حقي ازين..( وحك شعر راسه شوي) لالا..خلاص بغرفتك..
:حياك..اقلط..يابو سلطان..
ودخلنا غرفتي..
على طول اتجهنا انا وعمي للكنب اللي بالغرفة وجلسنا...
عمي سعود وهو يفكر: ملكه..انا...مو..عارف شلون...اتكلم معك..
: عادي يا عمي قول اللي عندك مثل ما تقوله..راح اتقبله وش ماكان...
عمي سعود وهو يطالع فيني مباشرة: اللي خطبك..
: ايه يا عمي؟؟
عمي سعود: رجال..ماقاصره شي..قبيلي..حالتهم المادية زينة...وهو ضابط بالحرس الوطني...
..وانا صراحه كنت اتمناك لسلطان...لكن هذا مافيه شي يعيبه..
: امممممممم....
عمي سعود: مابي اضغط عليك...فكري زين..صلي استخاره..وتراه ماينرد..
( كنت ابي اقول موافقه...لكن عيا لساني ينطقها...رغم اني يوم اذكر..اللي صار مع مساعد قبل ساعات..ارتجف)
: ان شاء الله يا عمي اني اعطيك الرد بكرة..
عمي وهو يوقف: الله يكتب اللي فيه الخير...
وصلته الباب وقبل يطلع التفت: يا سلام لو ازوجك انت وعفرا بليلة وحده..
ابتسمتله وقلت مازحه: ياسلام يا عمي...علشان تقلب غرفتي وغرفة عفرا...مكان لعروسك الجديدة...هههههههههههههههه
انكتمت ضحكتي يوم شفت عمي مابادلني الضحك..وظلم وجهه..وقال بصوت متقطع..
: عروسي الجديدة لو بتجي...بتاخذلها غرفة وحده صغيرة وتخب عليها بعد....والباقي كله لام سلطان...
وراح وتركني..وقفت متنحه اطالع فيه وهو يروح يمشي بتثاقل....مسكت صدري بقوة..يا عمي وش ناوي عليه؟؟....وعضيت على شفايفي ودخلت غرفتي....
الساعه6:43م في غرفة عفراا
عفرا وهي تدور بفستانها البنفسجي القصير اللي واصل فوق الركبة على طول...: ها....وش رايك؟؟؟...لايق علي؟؟..
قلت وانا متربعة على السرير وقاعده اظفر شعر ريما مية ظفيرة وظفيرة: حلو مرة..لكنه مبهتك..مو معطي بياضك حقه....
قالت ريما: مو حلو...الذهبي يجنن عليج....
جلست عفرا عندنا على السرير وقالت بطفش: ياربييييييييييي منكم ما تصلحون مستشارين ازياء...
قلتها وانا مشغولة بشعر ريما الناعم مرة والاسود الامع: اهم شي..انتي وش يعجبك...يعني اذا تحسينه حلو البسيه ولا همك باحد....
قالت عفرا وهي تمسك اطراف فستانها وبنبرة حالمة: ابي جاسر في يوم الشوفه يشوفني اجمل بنت بالكون...يشوفني القمر..يشوفني الحلا..يشوفني شيخة البيض....
قالت ريما وهي تبرد اظافرها: صلاااحه...مفلوض تلبسيت احمل....الاحمل عليك ملة حلو...(صراحه...مفروض تلبسين احمر...الاحمر عليك مرة حلو)
: ايه الاحمر يجنن عليك..ونسويلك مكياج نااااااااااااااااعم مرة...
عفرا وهي تمد بوزها وتقاطعني: وععععععع...مااحب المكياج الناعم...ابي اسوي زي مكياج هيفاء وهبي...اللي بآخر غلاف لزهرة الخليج وهي لابسه الفستان الاحمر....
: طيب..اجل اليوم نروح السوق..نشتري لك فستان احمر ناعم.. وندق على الغزيل عشان تسويلك مكياجك....وبالنسبة للاكسسوارات...انا عندي صندل احمر بذهبي رووووووعه..والله غالي ولا لبسته قبل...يفداك....وفيه عندي ساعه حمرا بعد مررررررررة رايقة جاتني هدية لمن تخرجت من الثانوي...البسيها والبسي حلقان ذهبي..وبالنسبة للعقد او الاسوارة اكيد هو راح يجيبها...
عفرا وهي توقف: يمكن يجيب فلوس...
: لالالا..ما اتوقع...اكيد بيجيب لك هدية..
ابتسمت لي عفرا وقالت وهي تروح لغرفة الملابس...: خلاص..بكلم جورج او علي عشان يجهز السيارة...
ريما وهي تجلس زين: بسلعه خلصي..بلوح اغيل ملابسي(بسرعه خلصي...بروح اغير ملابسي)
قلت وانا اخيرا اخلص اخر ظفيرة من شعرها: يلا روحي..تبيني اساعدك باللبس؟؟
ريما وهي تركض على الباب: يلا..تعالي بسلعه....
رحت معاها لغرفتها...واخترتلها فستان جينز فيه تطريز فراشات ذهبي من الطرف من تحت... وحزامه شريطة ساتان ذهبي.. وربطت نهاية شعرها بشريطة ساتان ذهبية..وطلعتلها جزمه( الله يكرمكم) لونها ذهبي...وطلعت لغرفتي...
طالعت بلبسي بالمراية...لبست بنطلون اسود لو ويست...برمودا مخمل... وتوب لونه احمر على عنابي......تنهدت وانا اشوف انواع الكدمات بجسمي...زين اني البس عباية ولا كان رحت فيها...لبست عبايتي الفراشة اللي فيها كلف فضية...واخذت شنطه حمرا ساتان وصندل فضي رايق...وشلت شيلتي اللي تلمع وقررت اتلثم...
دخلت علي عفرا وانا اكحل عيوني وادعجها بالقلم الاسود..وفوقها بالسايل...وبعدين امسكرها وارجع اعيد...صفقت بايدينها: ياهووووووه...والله بتموت الناس إذا شافوا اريش العين.." وكملت وهي تغمزلي: بس ترا اريش مزور...وبعلن حقيقتك إذا غرت" قلتها وانا اطقها على كتفها" اولا.. انا مو مزورة..ثانيا...انت قريبا راح تكونين متزوجه...يعني ماله داعي شغل الغيرة هذا..." قالت عفرا وهي تمسك الكحل اللي تركته" مايمنع اني اتزين...موب لجل احد لجل نفسي يا عيوني..." وحركتلي حواجبها عشان تقهرني..سويت نفسي غيرانه وطلعت من غرفة الملابس...ولقيت ريما واخذتها معي عشان ننزل ل جورج..اللي ينتظرنا بالسيارة....
ابتسمت تلقائيا وانا انزل الدرج واتذكر موقف عفرا مع عمي سعود وعمتي نورا...الله يخليك لي يا عفرا..صدق وقفت معي وقفة ولا بالعمر...تصدقون انها هي اللي تفاهمت مع عمتي نورا وعمي سعود...وخلتهم يشيلون فكرة المستشفى من بالهم وقالت لهم باعلى صوت" إذا بنتنا مجنونة...احنا راضيين فيها... ولا راح نرميها للكلاب تلاقطها هناك...نخليها تحت نظرنا وبين احظانا افضل امية مرة..و صدقوني باجر بتشكروني" اقدر لها موقفها هذا...ولا يمكن انساه لها...والحمدالله انهم مااحرجوني ولا جابوا للموضوع سيره....
في السيارة اللكزس...قعدت انا وعفرا نتهاوش ونتعافر باليدين..بس لا آله إلا الله..هي دايم اللي تغلب..اما انا حسره علي...ما اقدر لا اهش ولا انش!!...وبالاخير انهد حيلنا وقعدت كل وحده تامل الشارع من جهتها...الشوارع زحمه....والعالم كأنها ماصدقت يجي الليل عشان يطلعون ويستانسون..والجو رغم الرطوبة كان حليو وفيه شوووية براد ونسمة هوا....
ريما كانت مشغولة تحقيق مع جورج اللي متحملها بطيب خاطر...
فجأة...عفرا بصوت عالي: يووووووووه...اش اش..هالاغنية احبها....
وقامت تغني مع الراديو باعلى صوت وتمسك يديني وتحركلي عيونها وحواجبها بهيام..وانا ميتة ضحك على هبالتها...: مائدرش ائول احساسي كان لعبه بايديك..عشان احساسي هو اللي كان حيموت عليك...مائدرتش اشوف احلامي ئصادي ومالمسهاش...وئلبي كان هيديع لو سابك سبته عادي..وئبل نمشي احب ائولك مش هنساك...ولا عمري هنسى الدنيا اللي عشتها ويااااااااااك...وان كنت مائدرتش حبي مش هجرح فيك!!
قالت عفرا واحنا بالسيارة وهي متاثره بالاغنية: شلون راح تنزلين السوق من بعدي يا ملكه؟؟..." وضمتني بقوة وكملت: انت فاشلة بالتسوق...راح تفقديني...صح؟؟.." ضميتها بقوة وقلت بحرارة" اكيييييييييد...راح افقدك يا الدبة...شلون ما افقد النبض الحنون بهالدنيا..." دمعت عيونا بس ما وضحنا...قالت وهي تحبس دموعها: راح اخلي جاسر يجيبني عندك..او يزوجك من اخوه..." قلت وانا امسح دمعه خاينة فرت من عيوني: وانا موافقه اني اتزوجه..." صرخت عفرا فيني من بين دموعها وضربتني على صدري : ...الله اكبر عليك بتزوجين زوجي يالخاينة.." وكملت وهي تمسح دموعها: مير لو شافك بيعافني الرجال بالمرة..." قلت لها بغرور وانا امسح دموعي: لالالالا..راح اكون حنونة معك ...واعطيك يوم بالاسبوع...اللي هو الجمعه...وباقي الايام عندي..." صرخت عفرا: حمااااااااااارة...بتاخذينه لج طول الاسبوع..مالت عليج من بنت عم.. يالخاينة..." واخذت تضربني بكوس ببطني وظهري وانا اصارخ واحاول ابعدها عني.. وريم تطب علينا تبي تفرقنا الاخت.." اتركي اختييييييييييييي....وانت يا عفرا..دببببببه ذبحتي ملووكه..." وجورج ميت ضحك على هبالتنا وصراخنا....
وصلنا السوق...وجيت انزل..لكن ما ادري وين صندلي الفضي..وعفرا ما تدري وين البروش حق الشال اللي لافته على راسها...نزلت انا وعفرا من السيارة وطلبنا من جورج يجي يدورلنا الصندل والبروش..
قعدت اضبط شال عفرا الذهبي عشان ما يتحرك عن شعرها...وقلت لها بصوت هامس: لو شافك جاسر كذا...بيكسرلك راسك...." قالت عفرا بنعومة وهي ترمش بعيونها: اففف...ترى يحمد ربه هالجاسر...ان عفرا...شيخة الحسن والزين كله عليه.." وكملت بغرور: وإذا قصدك على كشف الويه...ترى لا يمكن اتغشى حتى لو رحت عند ربعه بالسعودية" قلت لها وانا احط ايدي على خصري واقلدها" يحمد ربه هالجاسر..ان عفرا..شيخة الحسن والزين.." وكملت وانا بصوتي الطبيعي" الا مفروض يروح يتشهد على روحه دامك وافقت عليه..." قالت وهي تصرخ" انا...بدل ماتوقفين مع بنت عمك يا الخاينة...يالدبه..يالحمارة..." وضربتني بقوة على كتفي...قدام الله وخلقه...قالت ريما وهي تصارخ باعلى صوت: فدحتونا...بين الله وخلقو..." فاعطيت عفرا قفاي وقلت: لو سمحت لا تكلميني.." وهي سوت نفس الشي...
اخيرا طلع جورج من السيارة وعطاني الصندل حقي..واعطى عفرا البروش حقها....قالت لي" ملوووووكه..حبيبتي..والله..." طالعتها وقلت مسوية فيها عصبية" خيييير؟؟.." قالت وهي تمد لي البروش وتقلد صوت ريما" الله يخليكي...لكبيه لي... هنا.." قلت وانا اتنهد" امري لله...عشان ما تفضحينا بهالسوق..ولا مو عشان هالعيون اللي عليها كيلو طحين اسود...وكيلو حبر اسود..." ضربتني بقوة على كتفي" آآآآآآآآآآآآآآآآآآي دبه.." وتركتها واخذت ريما ودخلنا السوق...
في السوق...جننتنا عفرا....كل شي مو عاجبها..طلعنا لها انواع الفساتين...لكن هي ما يعجبها العجب ولا الصيام برجب..سبحان الله ذوقي انا وعفرا مختلف...هي تحب كل شي غامق..ومليان اكسسوارات ودناديش واشياء تتحرك...بعكسي..احب الشي ناعم طايح ماعليه ولا شي واحب الالوان الفرايحيه...الاصفر..الوردي..السماوي..
: عفراااااا....تراني تعبت من الدورة بالمحلات...
عفرا وهي تمد بوزها: وانا بعد...بس..( وسحبت فستان احمر مكسر...وقصته من فوق مرة كبيرة على الصدر...) وش رايك بهذا؟؟؟..
: بس مو كأنه دالع بزياده؟؟...
عفرا وهي تطالعه: إلا...بس نزيد عليه قطعة ثانية...ونجيب اكسسوارات..وحزام...وكريستالات ونسويه بالبيت.....
:يمدينا نخلص قبل ثلاث ايام...؟؟؟
عفرا وهي تاخذ الفستان وتروح للمحاسب: ان شاء الله بيمدينا...او تخلين صديقتج سارا ترسلنا من فساتينها...
:من جدك انت ووجهك؟؟ صدق مغسول بمرقة؟؟
عفرا وهي تبتسم وتنتظر دورها عند المحاسب: ليش؟؟...صديقتج صديقتي..وبعيدن سارا حبوبة وانا متاكده انها ما راح ترفض..
هزيت راسي: خلاص..انا اوعدك اخلص الفستان بكره بالليل...وان شاء الله يطلع كششششخه ورايق...
عفرا وهي تبتسم لي: انا عارفة ان ملوكه حبيبي..لا يمكن تتخلى عني...
: مو عشان سواد عيونك..علشان سواد عيون زوجي حبيبتي...
عفرا فتحت فمها: حماااااااارة..والله لوريج..بس خليني ادفع الحساب..
:هههههههه..إذا قدرت....
خلصت عفرا من دفع الحساب...وطلعنا انا وياه وريما اللي كانت ميتة تعب علينا..عشان نتعشى بالمطاعم ونشرب لنا قهوة ونصفي عقولنا شوي..ونفكر بالحركات اللي راح نسويها بلبس عفرا.. عشان واحنا راجعين البيت نشتري الاشياء اللي نبغاها من محلات الكلف...
واحنا جالسين على طاولة الاكل...وقاعدين ناكل وجبات من ماك..ونسولف باعلى صوت كأن محد حولنا...ومبسوطين على الاخير....وطبعا انا كنت فاتشه عن وجهي لأننا جالسين بركن وماحولنا غير حريم ورجالهم ومو كاشفين علينا مرة...
عفرا وهي تاكل وفمها مليان: المهم...شعري بخليه مرفوع..ما احبه ساااي....ح..
: بالعكس السايح عليك رووووووعه...وترى الرجال يحبون النعومة...
عفرا وهي تاكل بطاطس: لا بالعكس...يحبون البنت الكشخة....اللي مكياجها ثقيل ولبسها بارز.. مو مثلك انت....كل شي فاتح وناعم....
( قلت وانا آكل حلقات بصل): ما ادري..احس اللي معجبين فيني...حتى لمن كنت بالثانوي.. لأني ناعمه..بكل شي...يعني لو مكياجي..ثقيل وما اعرف وشو...كان...( لاحظت ان وجه عفرا بهت فجأة وكأنها شافت شبح) عفرااااااا...وشفيك؟؟؟..
والتفت بسرعه عشان اشوف مكان ماهي تناظر......وشفت اللي ماكنت اتمنى اشوفه...
|
01-11-07, 08:58 AM
جديد مواضيع قسم الارشيف
العرض العادي
