المنتدى :
من عيون الشعر العربي والعالمي
شاعر الشعب(صلاح جاهين ) وعجبى
انا اللى عمرى اشتياق فى اشتياق
وقطر داخل فى محطات فراق
قصدت نبع السم شربت سم
من كتر شوقى وعشمى فى الترياق
عجبى ...............
انا اللى بالامر المحال اغتوى
شفت القمر نطيت لفوق فى الهوا
طلته او مطلتوش ايه يهمنى
مدام بالنشوى قلبى ارتوى
عجبى ...............
انا اللى قلبى كوكب ساير فى مدار
عايش فى دنيا نور ونار
يلف مهما يلف مبيهداش
وتملى نصه ليل ونصه نهار
عجبى ......................
انا قلبى كورة دايرة فى متش وهم
ياما اتنطح وانشاط من غير الم
واقوله كله هينتهى بميعاد
يقولى بساعتك ولا ساعة الحكم
عجبى .......................
انا شاب لكن عمرى ولا الف عام
وحيد ولكن بين ضلوعى زحام
خايف ولكن خوفى منى
اخرس وقلبى مليان كلام
عجبى ......................
لو فيه سلام فى الارض وضمان للأمن
لو كان مفيش لا فقر ولا خوف ولا جبن
لو يملك الانسان مصير حياته
انا كنت اجيب للدنيا ميت الف ابن
عجبى .........................
وانا فى الظلام من غير شعاع يهتكه
اقف مكانى بخوف ولا اتركه
ولما يظهر نور واشوف الدروب
احتار زيادة ايهم اسلكه
عجبى ......................
حبيت لكن حب من غير حنان
وصاحبت لكن صحبة ملهاش امان
رحت لحكيم واكتر لقيت بلوتى
ان اللى جوه قلوب الناس مش عاللسان
عجبى ...................
ياما صادفت اصحاب ومصاحبتهمش
وكاسات خمور وشراب ومشربتهومش
اندم على الفرص اللى انا سبتهم
ولا على الفرص اللى مسبتهومش
عجبى ...................
ولو انضنيت وفنيت وعمرى اتفرط
مش عاوز الجأ للحلول الوسط
مش عاوز اتوه واضيع وسط الشوارع
يامين يقولى الصح فين من الغلط
عجبى....................
ولدى نصحتك لحد ما صوتى اتنبح
ما تخافش من جنى ولا من شبح
وان هب فيك عفريت قتيل اسأله
ما دافعش ليه عن نفسه يوم ما اندبح
عجبى ......................
يأسك وصبرك بين ايديك وانت حر
تيأس او تصبر الحياه رح تمر
انا دقت من دا ومن دا وعجبى لقيت
اليأس مر و الصبر طعمه أمر
عجبى ......................
مع ان كل الخلق من اصل طين
وكلهم بيتولدوا مغمضين
بعد دقايق وشهور وسنين
تلاقى ناس اشرار وناس طيبين
عجبى ...................
عجبى عليك يا زمن يا ابو البدع يا مبكى عينى دم
ازاى اختار لروحى طريق
وانا اللى عايش فى الحياه مرغم
مرغم عليك يا صبح مغصوب عليك يا ليل
لا دخلتها برجليا ولا كانلى ميل
شايلنى شيل دخلت انا الحياه
وبكره هخرج منها شايلنى شيل
عجبى ....................
خرج ابن ادم من العدم قلت ياه
رجع ابن ادم للعدم قلت ياه
تراب بيحيا وحى بيصير تراب
الاصل هو الموت ولا الحياه
عجبى .....................
يا باب يا مقفول امتى الدخول
صبرت ياما واللى يصبر ينول
دقيت سنين والرد يرجعلى مين ؟
ما لو كنت عارف مين انا ...كنت اقول
عجبى ..........................
قالوا الشقيق بيمص دم الشقيق
والناس مبقتش ناس بحق وحقيق
قلبى رميته وجبت غيره حجر
داب الحجر ورجعت قلبى رقيق
عجبى ...............
دخل الربيع عليه لقانى حزين
نده الربيع باسمى لم قلت مين
حط الربيع ازهاره جنبى وراح
واش تعمل الازهار للميتين
عجبى .................
مهبوش بخربوش الالم والضياع
قلبى ومنزوع من ضلوعى انتزاع
يا مرايتى ياللى بترسمى ضحكتى
يا هل ترى ده الوش ولا القناع ؟
عجبى ...................
ليه يا حبيبتى ما بينا دايما سفر
ده البعد ذنب كبير لا يغتفر
ليه يا حبيبتى ما بينا دايما بحور
اعدى بحر الاقى غيره اتحفر
عجبى .................
نوح راح لحاله والطوفان استمر
مراكبنا تايهة لسة مش لاقية بر
اه من الطوفان واهين من بر الامان
ازاى تبان والدنيا غرقانة شر
عجبى ...................
يا قرص شمس ملهوش قبة سما
يا ورد من غير ارض شب ونما
يا اى معنى جميل سمعنا عليه
الخلق ليه عايشين حياه مؤلمة
عجبى ................
شاف الطبيب جرحى وصف له الامل
وعطانى منه دوا يادوب ما اندمل
جرح جديد يا طبيب وجرحى لهيب
ودواك خلص منى ايه العمل ؟
عجبى .....................
الدنيا دى اودة كبيرة للانتظار
فيها ابن ادم زيه زى الحمار
الهم واحد والحمل مشترك
ومفيش حمار بيحاول الانتحار
عجبى ..................
|
01-08-07, 09:32 PM
جديد مواضيع قسم من عيون الشعر العربي والعالمي
العرض العادي
