المنتدى :
الارشيف
يوميات واحد مجنون جدا بقلم مؤمن...( غير ممكتمله)
الحلقهـ الاولى
اصدقاءنافى جروب كريزى كريزى هما يعنى على راسهم ريشة وانا لا
دى اول جملة خطرت فى بالى لما قررت اكتب يومياتى
ولانها يوميات واحد مجنون
فكان لازم تبقى على نفس المستوى من الجنان المجنون جدا
احم احم ما علينا
نبتدى اليوميات بموقف من المواقف الى لا يمكن انساها فى عمرى
يوم متصل بيا الصديق سامى عبدالراضى
معد برنامج تسعين دقيقة فى قناة المحور
و قالى يالا يا جميل استعد ميعاد التصوير يوم الاربعاء
و الحلقة دى كانت لتصوير لقاء مع مؤسسى جروب كريزى كريزى
بمناسبة صعود الجروب
للمركز الثانى على العالم لجروبات الياهو بقسم اللغة العربية
طبعا مش هوصف مشاعرى فى اللحظة دى لكن بجد كان فوق الوصف
وطبعا جرى على التليفون
وهات يا اتصالات مع كل فريق عمل كريزى افرحهم بنتيجة تعبنا
قال يعنى عامل القيادة الحكيمة
وقعدنا نرغى وكيت وكيت وكات وكوت
وابتدينا نعمل خطط مع بعض اية الى عايزين نوضحة عننا
واية الى عايزين نقوله للناس
طبعا وفى حدث تاريخى
ابتديت افكر لاول مرة فى عمرى فى موضوع اللبس
وشكلى هيبقى ازاى
مهو برضة لازم ارفع عالم مصر قدام اوروبا و الدول المتقدمة
وقلت يا واد يا مؤمن مفيش غير المنقذة سلوى اسماعيل
وجرى قلتلها سلوى الحقينى
و طبعا قعدت تدينى فى نصايح انى لازم اكون مستحمى و حاطط قرفان
قصدى برفان علشان الفضايح وسمعة مصر بين الدول
وطبعا نصحتنى انى استحمى بصابون بريحة
بدل صابون الغسيل وكانت ليلة فل
اضطريت ادوس على قلبى واستحمى فعلا
ونفذت نصايحها بالحرف ورحت على المكان الى فى اوضتى
الى انا فاكر ان كان فية اختراع اسمة مراية فى يوم من الايام
لقيت ضباب فبسال ماما بقولها هو مش كان فية مراية هنا
بتقولى ايوة يا حبيبى بس انت بقالك من عصر الهكسوس مبصيتش فيها
ومشغول فى الجروب و المنتدى والنت
وطبعا خدت قصيدة فى اضرار النت وانى ملطوع علية طول اليوم
ويبنى شوف مستقبلك وحياتك
الخ الخ من النصايح الحكيمة الى استقبلتها بكل هدوء
اعمالا للمثل القائل ودن من طين وودن من عجين
وطبعا انا ساكت ومدكن على خبر انى هطلع فى التليفزيون
عملت عبيط ورحت ماسح الضباب الى من العصور الوسطى على المراية
والى اتكون نتيجة عوامل التعرية والمعسكر المغلق الى عاملة فى اوضتى
ومش مخلى اى حد يقرب منها
بينى وبينكم انا اول مرة كنت الاحظ انى فى مكان تاريخى اصيل
واقصد بيه اوضتى
ما شاء الله ليها حق ماما تصوت لما شافت المنظر
فضلة خيركم اشى ورق واشى سى ديهات واشى علب بيبس فاضية ولب
حقيقة كان منظر يشل
و فى لحظة صدق قلت بينى وبين نفسى
ربنا يعينك يا ماما على المصيبة الى بلاكى بيها وهو انا طبعا
وابتدت رحلة الكفاح ونزلت مع سلوى ورحنا شفنا بدل
وقلت اهى فرصة اجيب بدلة جوازى بالمرة
تصورو مكتشفتش انى هتجوز فى الصيف دة وانى مفروض اجيب بدلة
الا فى اليوم دة
المهم رحنا وجبنا البدلة بعد يوم طلعت فية عين سلوى اسماعيل صراحة
وسلوى تعد اختى الى فعلا مجابتهاش امى
وعلى طول يعينى مدبسها معايا فى المصايب
ربنا يجزيها جزاء الصابرين
والحمدلله عدت رحلة البدلة على خير
ورجعت للبيت وابتديت اوضب افكارى و و و
وطبعا اتصلت بالمتدبس معايا دائما فى التوصيلات بعيدة المدى
اخويا المفعوص الى بيهدى النفوس محمود دياب
ها يا ديبو اية الاخبار معايا فى الرحلة الى طالعينها فى مجاهل افريقيا ؟
قالى اوك باذن الله
ولانى اتعودت الجد فى شغلى فرحت متصل بمصطفى
صاصا اوك معانا بالاخت زوبة الاروبة ?
والمقصود بيها عربيتة
قالى اوك معاك
طبعا اتطمنت لان فية عربيتين مش عربية واحدة
وجة وقت الاتصال بمعد البرنامج لتحديد المكان وتفاصيل اللقاء
وعرفت كل التفاصيل وعدت الايام على خير
وجة اليوم الموعود و بتصل لتاكيد الاماكن
وكانت اول صدمة فى ذلك اليوم التاريخى
دياب بيتصل مؤمن اسف مش هقدر اجى
لية اية الى حصل ؟
الحاج مزرجن وقالى مفيش خروج دى تفاهه وتضييع وقت
ياليلة بيضة يا ولاد
اوك يا ديبو ولا يهمك سلام سلام
قلت الحمدلله لسة فية مصطفى
واتصلت بية للتاكيد ها يبنى
مؤمن معلش والله مهقدر اجى
لية يا حبيبى
اصل العربية باظت والشكمان ...
قبل ميكمل القصة قلتلة طيب شكرا يا مصطفى
ورحت جرى بفكر ناجر عربية نروح بيها
وطبعا ربنا ميوريكو الاستغلال
وطبعا كان لا مفر فى النهاية بعد ما كل الناس عملت عبيطة وطنشت
ومر الوقت طبعا فى قمة الغلاسة
وقبل مننزل من البيت بدقايق علشان نروح للتصوير
اتصلت بيا الصديقة الصحفية بالمصرى اليوم شيماء
وقالت لى مؤمن التصوير اتلغى
طب لية يا بنتى ؟
بصراحة كنت عايز اقولها نعم يا عووووومر بس اتكسفت
اصل فية حادثتين مهمين جدا حصلو وهتعرف فى البرنامج
قلت ما علينا الخيرة فيما اختارة الله
فرحت متصل بالناس واعتذرت لهم وطبعا ردود فعل مختلفة
ولكن المجمل ان اقل رد فعل كان ضيق شديد واحباط
ولانى راجل قديم فى الدعاية والاعلان خفت تكون دى زحليقة محترمة لينا
وطبعا كل الى فكرت فية ان هنفقد مصداقيتنا فعلا بين كل اعضائنا
لو محلصش اعتذار رسمى على الهوا
رحت متصل بسامى وقلتلة الفكرة دى
وان لازم احتراما لاعضائنا واننا منظهرش كدابين
ان يبقى فية اعتذار على الهوا لينا
وقالى اوك هظبط الموضوع
خير اللهم اجعلة خير قبل البرنامج بدقايق
اتصل وقالى فى اول تلت ساعة هنقول تنوية عنكم
قلت خير وفاتت نص ساعة ولا حس ولا خبر
وطبعا ربنا ميوريكو اعداء النجاح وحثالة المجتمع
الى نفسها توقعنا باى تمن
دخلو فى المنتدى وهات يا تريقة فى شريط الاهداءات
طبعا اعصابى اتحرقت فى اطول عشر دقايق فى التاريخ مرو عليا
ولسة هتصل بسامى لقيتة بيقولى مؤمن بعد الفاصل مباشرة هيتكلمو عنكم
وانت هتطلع معايا فى اتصال تليفونى على الهوا كاعتذار مؤقت مننا
طبعا قلتله يا سامى انا اصلا مفييش اعصاب اتكلم خليها اعتذار وبس
قالى اوك براحتك
اوصف لكم المنظر الى كنت واقف بية
الجو حر موت والرطوبة تخنق الى ميتخنقش لا محوق مروحة ولا تكييف
يوم ضغط عصبى فوق الوصف
و مواقف محرجة مع الكل
المنظر الى شفتة فى المنتدى فعلا خلانى اتخنقت
لان فية حقد بالمنظر دة فى الدنيا
ولكن عموما دة بيدل على التربية والبيئة الى نشأ فيها كل شخص
ولكن بصدق قعدت اضحك لاننا نجحنا للدرجة دى
وان نجاحنا بيحرق الفاشلين جدا
وواقف بشورت وفانلة حمالات وسط الاوضة
وبشد فى ما تبقى من شعرى
طبعااااا كمية مهولة من الاصدقاء على الماسينجر بيتكلمو معايا
هو فية اية ولية مقالوش و و و
موبايلى بيرن
وفى نفس اللحظة ماما بتندة
وفى نفس اللحظة تليفون البيت بيرن
كنت اقرب لتليفون البيت فرفعتة بسرعة
وسمعت صوت سامى بيقولى جملة واحدة
مؤمن انت على الهوا
وقبل منطق بحرف كانت المذيعة منى بتكلمنى
وطبعا كنت فى موقف لا احسد علية بالمرة
على الهوا بفانلة حمالات وشورت مفيش كلمة واحدة مرتبها تتقال
ضغط عصبى فوق الوصف
وفوق كتافى حلم الاف الاعضاء وملايين القراء
وثقة فينا تخلى اى شخص ولوفى موقف عادى ميقدرش ينطق
وجه صوت المذيع معتز و ابتدى الحوار الى كلكم سمعتوة
بصدق انا قفلت التليفون وانا اصلا مش عارف اية الى اتقال اصلا
وليكم انكم تتخيلوا الموقف
بعد لحظات لقيت سامى بيتصل
وبيكلمنى كانه ملاك برىء معملش اى حاجة
وبيضحك ضحكة شريرة تدل على التدبيس وبيقولى كنت هايل
طبعا كان هاين عليا اكسر زمارة رقبتة وكلمة واحدة على لسانى
دة مقلب تعمله فيا يا سامى ؟
طبعا هو فطسان من الضحك ومش قادر وانا فى قمة الذهول
وبعد لحظات اتصل بيا جريدة المصرى اليوم
طالبين التعاون بين كريزى كريزى وجريدة المصرى اليوم
وقبل مفوق من المفاجات المتتالية لقيت ما شاء الله المنتدى ولع بالتعليقات
وزى المتوقع اعداء النجاح والفاشلين
الى مش عارفين يعملو اى شىء بشرف
استلمو شريط الاهداءات
وهات يا شتايم واتهامات وطبعا ربنا يخلى مشرفين المنتدى
بقو بيصطادو فيهم ولا الناموس
ومعرفش والله ربنا ادانى البرود دة منين
ورحت جايب لنك ترتيبنا على العالم فى الياهو
وحطيتة فى المنتدى لكل الى بيشكك ويقول ان كلامنا مش صح
وطبعا كل واحد بيشكك مقدرش ينطق بحرف واحد
بعد كل الناس مشافت بعينها الترتيب العالمى
الى يضحك
ان الناس دى فاكرين ان النجاح بييجى بالكلام وهدم نجاح وتفوق الغير
وميعرفوش معنى تعب وسهر الليالى لسنين علشان تعمل نجاح زى دة
ووالله لو انهم حاولو ينجحو بشرف ممكن يحققو شىء
ولكن مقولة وقفتنى كتير عندها
انما ترزقون على قدر نياتكم
و حقيقى الفاشل هيفضل فاشل
وخرجنى من السرحان الى كنت فية تليفونات تهنئة من كل دول العالم لينا
وايميلات تهنئة من كل العالم
و فى وسط دة كلة اتصل بيا سامى
وبصوت هادى جدا بيقولى تصدق يا مؤمن
والله انتو فعلا نيتكم صافية جدا بجد
بقولة اشمعنى
بيقولى يبنى انتوا اتعاملتوا معاملة vip
تنويه قبل الفاصل
خبر عنكم
اعتذار ضمنى
اتصال تليفونى
وكمان وعد قدام العالم كله بالتصوير معاكم
ومعتز ومنى معجبين جدا بيك ومصممين يصوروا معاكم
و دة متوقع يكون على الاربعاء الجاى
طبعا انا الى جالى سكوت رهيب وكلمة واحدة بترن جوايا
دة فضلك علينا يارب قدرنا نبقى قد كل الثقة دى فينا
كلمنى مشرف من اصدقائنا وقالى استقبل التسجيل بتاع الحلقة
ولاول مرة اركز فى الى اتقال على الهوا
وببص لقيت المذيعة قايلة اعاجيب
منتدى اية الى فاز ومسابقة اية الى اختارونا فيها شركة ياهو
واية الى جاب ياهو للمنتدى
وطبعا اتصدمت ان الخبر اتذاع ملخبط اصلا
لان الى تقدم للمركز التانى على العالم هو الجروب
وفى قسم اللغة العربية من وسط اقسام مختلفة
وفعلا هو تفوق على اكتر من سبعة وسبعين الف جروب عربى
فى قسم اللغة العربية وحدة
ولو حسبنا على مستوى كل الاقسام
هنلاقى الجروب متفوق على ملايين الجروبات فى العالم كله
و دة بيتم وفقا لعدد الاعضاء والاقبال على الجروب والضغط علية
وان الشرف الحقيقى فى المركز دة
اننا وصلناله فى الجروب باحترام وبدون اى دعاية
او اساليب غير محترمة فى الدعاية وفى وقت قياسى باى مقياس
وكمان انه بيقدم محتوى محترم جدا فانه يوصل لكدة دة الانجاز الحقيقى
وحمدت ربنا ان لسة فية تصوير اقدر اصحح فية كل دة
والعذر للمذيعة انها غير متخصصة فى الانترنت
فبديهى مش عارفة الفرق بين الجروب والمنتدى والموقع
بعد دقايق وفى وسط يوم زى دة شركة الاستضافة اتصلت بيا
مؤمن المنتدى اتقفل
اية الى حصل ؟
الضغط على الموقع حرق البروسيسور بتاع السيرفر
واستهلك اكتر من خمسين فى المية من موارد السيرفر
والداتا سنتر بلغتنا بقفلة وانة لازم يتلغى ويتنقل على سيرفر مستقل
طبعا مش هوصف مشاعرى فى اللحظة دى
ولكن كنت واثق ان دة خير كبير جدا ربنا عملة لسبب احنا منعرفوش
واتقفل نص الحلم منتدى كريزى كريزى
واتوقف خير كبير جدا كان بيطلع منه
سواء اعمال خيرية كنا بنرتب لها فية
سواء اشياء مفيدة فية
وسواء اننا نبعد شاب عن الدخول فى مواقع مش كويسة
وانة يكون وسط اسرة فعلا نفسها يكون احسن شاب فى الدنيا
الصدمة مش قفل المنتدى
لكن الصدمة الحقيقية فى فكرة ننقل لسيرفر مستقل
لان دة مبيعملوش الا شركات ضخمة بسبب تكاليفة
وطبعا اجتمعنا وكان القرار لا لاى تبرع احتراما لنفسنا قبل اى شىء
لان دة حلمنا وباذن الله هنوقفة تانى على رجلية
وكان القرار ان لازم كل اعضائنا يعرفو الوضع بكل شفافية ودة مش عيب
واننا كلنا ندور على رعاة رسميين للموقع والمنتدى
مقابل وضع اعلاناتهم فيهم وفى الجروب
بمعنى اننا بنقدم خدمة فى المقابل مش عالة على المجتمع
وعايزين الى يصرف علينا
وان لو يوم كنا قلنا عايزين اى شىء للخير فدة للخير
يعنى حتى لو كنا شحتنا ومهما اتقال علينا دة هيزيدنا شرف ورفعة
لانة فى سبيل ربنا
اما علشان حلمنا فالتبرع مرفوض
بكل هدوء قمت وقفلت الكمبيوتر
ولاول مرة من اسبوع نمت اتناشر ساعة متواصلة
والى اللقاء فى يوم جديد من يوميات مجنون
مستنى تعليقاتكم على الحلقة الاولى
التعديل الأخير تم بواسطة بحر الندى ; 28-09-07 الساعة 06:00 AM
سبب آخر: تنسيق النص ^_^
|
14-07-07, 11:07 PM
جديد مواضيع قسم الارشيف
العرض العادي
