المنتدى :
الارشيف
تسمـح تولّـع لي؟
كيف لا تبطل التدخين؟
أكتر حاجة بتخلي تبطيل التدخين صعب, إنه: تبطيل.. فاهمين قصدي؟
يعني فكرة إن الواحد (يبطّل) حاجة هو متعود عليها, فكرة منفرة وسيئة أصلا
دي حاجة من قوانين العقل الباطن بيسموها قانون التعلق
يعني لو خطفت من عيل صغير لعبته, هتلاقيه بيعيط.. وأنا لو خطفت منك الكمبيوتر وإنت بتقرا الموضوع ده.. هتتضايق
هي دي الفكرة.. إن الواحد مننا بيتضايق من فكرة إنه يفقد حاجة.. حتى لو كان اللي بيفقده ده, عادة زي التدخين
الحل هنا هو إنك ماتبطلش تدخين
يعني إيه؟
يعني إنت مش هتبطل تدخين, لأنك مش مدخن أصلا
يعني إيه برضه؟
يعني إنت مش هتبطل التدخين ده.. لأ.. إنت هترجع لطبيعتك
شوف يا صاحبي.. فاكر أيام ما كنت طفل صغير؟
ماكنتش مدخن.. يعني إنت غير مدخن أصلا
هل إنت اتولدت وإنت ماسك سيجارة في إيدك؟
لأ طبعا
يعني إنت جيت الدنيا دي جسمك صحي جدا جدا
تحب ترجع زي ما كنت؟
*******
كسر العادات
أول خطوة هنا هي إنك تكسر العادات
التدخين عادة
متعود تشرب بعد الأكل؟.. مع الشاي؟.. بعد الخناقات؟.. وإنت بتفكر؟
اكسر العادات دي يعني بدل ما تشربها بعد الأكل.. اشربها قبل الأكل
متعود تشتري السجاير من شخص معين؟.. لأ.. اشتريها من واحد تاني
بتشرب نوع تقيل؟.. لأ.. جيب نوع أخف
بتشرب في المكان الفلاني؟.. لأ.. اشرب في المكان العلاني
الهدف هو إنك تتخلص من فكرة إنك بتخليها عادة
غير في العادة
ودي الخطوة الأولى
*******
شيل وحط
عشان تسهل على نفسك تغيير عاداتك, خد عندك الطريقة السهلة دي
لما تبطل عادة, حط عادة تانية مكانها
بس كده
يبقى كأنك بتقول لعقلك اللاواعي: أنا ماخسرتش أي حاجة أصلا
لو حبيبتك سابتك مثلا.. ممكن تتألم من مشاعر الفقد.. لكن عشان تقلل المشاعر دي وتلغيها: اعمل أي نشاط جديد عشان تتخطى المرحلة دي عاطفيا وتسهل على نفسك الموضوع.. العب رياضة.. قابل ناس جداد.. سافر
أي حاجة تحطها مكان الحاجة اللّي اتفقدت
كده ببساطة
عايز توقف عادة التدخين؟
حط عادة تانية مكانها
*******
أقراص النعناع
عارف الباستيليا؟ أي نوع قوي من النعناع
في الأوقات اللي متعود فيها على التدخين, خد لك واحدة نعناع قوي, تشطشط بقك
واشرب بعدها كوب ماء بارد
هتلاقي لها نفس إحساس السجاير بالضبط
تخيل بقى؟
بس اوعى تدمن النعناع والباستيليا.. وأضطر أكتب لك رسالة عن تبطيلهم
اعمل أي عادة تانية بدل العادة اللي هتبطلها
زي إنك تكلم شخص معين في التليفون مثلا.. في الأوقات اللي متعود فيها تشرب السجاير
حاجة بسيطة.. لكنها فعالة جدا.. لأنها هتملأ مكان العادة اللي اتغيرت
من النهارده ابدأ في عمل هذه الخطوات البسيطة جدا
وهتلاحظ الفرق
*******
الخطوات الصغيرة
لي واحد صاحبي اسمه: تامر ميتاليكا.. مسك المصحف في يوم وأقسم بالله إنه مش هيلمس السجاير
الكلام ده بقاله ييجي خمس سنين.. وحصل فعلا ومالمسهاش
تخيل بقى؟
بعض الناس عندهم الحتة دي.. بيقدروا يقرروا ويتحملوا نتائج قراراتهم
هل إنت منهم؟
بالنسبة لي أعتقد إن مش كل الناس كده.. يبقى لازم طريقة أبسط
الطريقة الأبسط دي هي طريقة الخطوات البسيطة
خد خطوة بسيطة النهاردة.. وبعدها بكرة.. وهكذا
قلل عدد السجاير بتاعة النهاردة مثلا
بلاش سيجارة مع الشاي
وإياك تحط في دماغك إنك بتقلل أو بتبطل أساسا.. زي ما قلنا قبل كده.. خلّي صورتك الذاتية إنك مش مدخن أصلا
وخطوة صغيرة بعدها.. وخطوة.. وخطوة
هتلاقي نفسك وصلت للصورة الذاتية اللي كنت بتحلم بيها
*******
هل حاولت تبطل وفشلت؟
بعض الناس جربت تبطيل التدخين وبعضهم فشل
فبيقولوا لنفسهم: أنا فشلت يبقى عمري ما هانجح في كده.. ما أنا جربت
ويكون ده سبب في إنه يواصل التدخين.. عشان مافيش فايدة
لكن..
هل لاحظت, إن محاولاتك اللي فاتت دي.. أعطتك خبرة؟
و إن كل مرة بتكون أقوى من اللي قبلها؟
يكفي إنك أحسن من أي واحد ماحاولش
معنى إنك جربت قبل كده, يبقى دخلت المعركة
والتدخين غلبك في الجولة السابقة
هتسكت له يا معلم؟
*******
هل بطلت سجاير فعلا؟
لو كنت لسه بتاخد خطواتك, جرب معايا اللعبة دي
طلع سيجارة دلوقتي.. واشربها فورا بعد ما تدوس الزرار اللي تحت ده
لكن مطلوب منك
اربط أحاسيسك بالصور اللي هتشوفها دي
يعني: طعم ونكهة السجاير في صدرك.. هي طعم ونكهة هذه الصور
استمتع بطعم السيجارة, واعتبره طعم الصور التي ستشاهدها
حس بطعم السجاير اللي هو طعم الصور دي
اربط اللي هتشوفه بطعم ونكهة السجاير
لو عرفت تعملها بجد.. أوعدك إنها هتكون آخر سيجارة فعلا
دوس هنــا يامعلم
هي دي الطريقة اللي ابتعدت بيها عن التدخين
اربط المتعة اللي بتحسها, بالألم والبشاعة اللي بتبعد عنها
لو عرفت تعملها صح وبإخلاص.. هتحس بالألم وإنت بتشرب سجاير
ساعتها هتدي لنكهة السجاير دي معنى تاني خالص
*******
المعنى
لا يوجد شيء في الحياة له معنى.. نحن من نعطي المعنى لكل شيء
السجائر ليست ممتعة.. لو مررت بكوم قمامة يحترق, فمن رابع المستحيلات أن تفكر في استنشاق الدخان.. لأننا أعطينا له معنى آخر
السجائر تعجبنا لأننا أعطيناها معنى المتعة والرجولة أو النضوج.. لذلك نشعر بهذه الأشياء مع كل نفس
في الاختبار السابق قمنا بتغيير المعنى الذي نعطيه لهذا الشعور.. وقتها ستتغير سعادتنا بهذا الشعور
قم بهذا بنفسك
فكر في أبشع صورة أو موقف رأيته أو سمعته في حياتك.. أكثر شيء أثار فيك الخوف والتقزز والنفور..الشيء الذي كان يطير من عينك النوم وأنت طفل صغير.. فكر في هذا الشيء.. واشرب سيجارة وأقنع نفسك بأن إحساس السجائر وهي تدخل صدرك, هو إحساس هذا الشيء.. أو سيقود إلى هذا الشيء
لا يجب أن يكون هذا صحيحا دائما
فقط أقنع نفسك بهذا لو كنت مخلصا في رغبتك
جرب هذا الموضوع
وأعدك أنك ستكره السجائر لو قمت بهذا بإخلاص
|
09-07-07, 06:56 PM
جديد مواضيع قسم الارشيف
العرض العادي
