كاتب الموضوع :
بريق الماس
المنتدى :
القصص المكتمله
"""الجزء الرابع عشر""" أحبك كلمه بقلبي تحبك..غرام ما قوا صدري يشيله..و انا اللي لا سجدت اسأل ربك..حبيبن صد عن قلبي يجيله
الجحيم اللي عشته فالاربع ساعات الاخيره..أصعب لحظات حياتي و أقساها..تجلبت يمين و يسار على الشبريه..حاسه بعظامي اتعورني..راسي بينفجر..و جسمي كله متألم..شوه هاذا حلم ولا علم..متا بيخلص هالكابوس..متا بيقولولي انه كل اللي سمعته جذب مب صح..انهرت و انا اصيح و اصيح على اللي صار الين ما ياني الرقاد و غفيت..و رديت و صحيت عشان اواجه اسوأ يوم في حياتي..حسيت بشي ثقيل على صدري..يوم التفتت شفت حمد ولد خويه سعيد راقد عليه..بلبس المدرسه..لهدرجه دش حمد الغرفه و رقد عدالي و انا ما حسيت..ليت افقد الاحساس دوم..ليت افقد الذاكره و افتك من هالعنا..استرجعت ذاكرتيه اخر اربع ساعات من يومي..اخر اربع جمرات اللي انحطت في ايدي..اخر اربع طعنات اللي انغرست في قلبي..شوه الحل؟؟ كيف بواجه اهليه برفضي لعلي!!؟؟ هل بقولهم رفضته لذاته مستحيل علي ما شي فيه ينعاب..كيف بقولهم عشان توأم روحي؟؟!!! رجعت شريط اللحظات اللي كانت اتكلمني فيهن عايشه عن الموضوع..و اكتشفت شي غامض..شي مؤلم..اللي هو..انه رغبتيه في انه ايكون احمد هو اللي خاطبني..مش عشان اتجنب الغدر في فاطمه..و مش عشان اللي يفيض به قلبي صوبه..ولا لاي اعتبارات ثانيه..رغبتيه كانت انتقام و بس..بغيته يخطبني عشان ارفضه مثل ما رفضني..اذله مثل ما ذلني..و ادوس على كرامته مثل ما اهاني..و بعدين بشوف شوه ردت فعله؟؟ هل بيصر انه ياخذني..مستعده اني اقول لاااا و باعلى صوتي ..اذا كان اللي خاطبني احمد..عشان اجتل ذله لي اللي عاش في قلبي سنين طويله!!!!
خشيت راسي تحت المخده و ضغطت عليها بقو عشان امسح هالافكار السودا من راسي..آآآه آآآه شوه بسوي؟؟ ياربي شوه الحل؟؟ رن الموبايل..و حسيته جنه بينفجر في راسي..طنشته بس اللي متصل مصرّ انه يغلس..صك..فكه..ماريد اكلم حد..ماريد اجابل حد..بس رد و رن..اوهووو و بعدين يعني..مديت ايدي و سحبته شفت اسم على الشاشه..زلزل كياني.."توأم روحي طمطم"..اه شكلها حست..او عرفت؟؟ لا لا مادري مادري..لا اراديا مسكت غرشه الماي و فجيتها و جبيتها على الموبايل الين ما سكت..او مات..التفتت على حمد و لويت عليه بقو و دموعي سيول قهر و الم ..صياح خافت من دون صوت..صياح عذاب ولوعه..و غفيت مره ثانيه..
عايشه و هي تمسح على راسي: لطفين...لطفين قومي المغرب بيأذن..و انتي ما صليتي العصر..
لطيفه: عووويش..طلعي و سكري الليت والباب..لا حد يوعيني الين باجر
عايشه: انزين شوه بتستفيدين انتي يوم بتعذبين عمرج؟؟ لطيفه لا تكبرين الموضوع..قولي لا..شوه بيصير يعني..خليهم يجتلونج..خليهم ايسون اللي ايسونه..شعليج منهم..
لطيفه و هيه خانقتنها العبره: ماروم..مم..ماروم اجابل ابويه و اقول لا..في حياتي كلها ما كد قلت لابويه لا
عايشه: تبيني انا اقولهم؟؟
لطيفه: آآآآآآآه...عويش ابغي امووت
عايشه: عوذ بالله من هالرمسه..نشي أأأأ,,فطيم سوت تيلفون عندي و تبا اترمسج
لطيفه: مينونه انتي؟؟!!!! كيف تبيني ارمسها في حالتيه هاذي...
عايشه: حلفتني..شوه اسوي يعني..هاذيه سوت...
لطيفه: ما برمسها..
عايشه: بالعكس..كلميها..شرحيلها موقفج..قومي قومي..
لطيفه: عويش..عويش..اطلعي برا و شلي تيلفونج وياج
عايشه و هي اترمس فاطمه: الو..مرحبا..هيه هاذيه..رمسيها..
لطيفه: مابا
عايشه: اتقولج ما تبا؟؟..اها..لحظه..( حطت عويش التيلفون على السبيكر)
فاطمه بالسبيكر: لطططططططططططططططططططططططفين....لولو..وين اللي بيي اليوم؟؟ شوه هاذا من العصر و انا اسويلج اكلات و كيك..يالله عاد رمسيني..طاعو بولباس..لطفين..و الله و الله و راسي السيافي اذا ما شليتي السماعه و رمستيني اني لا اعرفج ولا تعرفيني..
++ شوه اسوي؟؟ شوه اقولها..شليت السماعه ادريبها فطيم اللي تحطه في بالها اتسويه..
لطيفه: أأ..أألوه
فاطمه:حشا ما بغيتي الليدي ديانا اتردين عليه...شوه هاذا وين اللي بيينا اليوم؟؟
لطيفه: فطيم...راسي ايعورني..ماروم
فاطمه: بتيين و انتي حماره..يالله يالله . .نشي خستي من هالرقاد..و بعدين يالسباله..مبروووووك
لطيفه و بصدمه: شووووو
فاطمه: على الخطوووووبه...و اخيرا و اخيرا..اهون عليج ما تخبريني؟؟
لطيفه: أأ..مادري
فاطمه: بسم الله انزين قولي الله يبارك فيج..
لطيفه: بس عاااد...شوه تتطنزين انتي..؟؟؟ ما عندج احساس انتي؟؟!!!
فاطمه: و سكنهم في مساكنهم..عندي احساس,,ولا اقول ما عندي احساس لاني بطير من الفرحه..بمووووت..فديت رووووحج يا لطووووووف..ماصدق ماصدق
لطيفه: يوم بتشبعين من الطنازه بينا رمسه ثانيه بنت سيف...باي
فاطمه: حووووووووو...فديتج و فديت ريحانه فواديه و فديت هالعالم كله
لطيفه: جب جب يالسباله جب...
فاطمه: عنلااااااااتج...ما عليه ما عليه ما بنسير بيت واحد نحن..ان ما طفرتبج..و ظهرتلج قرووون
لطيفه: فاطمه,,, انتي عن شوه تتكلمين؟؟
فاطمه: ماشي..اليوم احمد ياني الحجره..و قالي عرب خطبوج..تعرفين تيبست..عقب يوم قالي علي بن حارب..خفت لا انش ازغرط من الفرحه..و الله و الله انه عيني خرت دمعتها..لططط...( فاطمه و هيه خانقتنها العبره) لطووف..اتت...اتخيلته ابويه..الله يرحمه..
لطيفه: لحظه لحظه...علي خطبج..علي ما غيره ريحانه فوادج؟؟
فاطمه: هيه...
لطيفه: و انا منوه خطبني؟؟
فاطمه: اخوه الصغير سالم...وو..
لطيفه و هيه اتحط ايدها على قلبها بارتياح: ريحتيني الله يريحج دنيا و اخره..و انفجرت لطيفه بالصياح و لوت على عويش...و فرت التيلفون
عايشه: هاه ...بشري بشري..
لطيفه:وااااااااااااااااااااااااااااء......فديت وجهك يا ربي..ععع..عويش مب علي..مب علي..طلع اخوه اللي خطبني..مب علي..اللهم لك الحمد..وااااااااء
شلت عويش التيلفون: هاه فطيم....لا لا نقعت من الصياح..شدراني شكلها فرحانه..برايج ما عليه..باي
++ ما قدرت اتخيل الصدمه..و الله و الله اني بتخبل..شوه هاذا..اهم شي اهم شي انه مب علي..يعني كل شي انتها..انتها ولا بدا ؟؟ و الله ماعرف بس هانت..سالم ولا علي..اللهم لك الحمدلله..فديتك يا ربي..دشيت الحمام و اتسبحت و غسلت همومي..آآه من هم بغا يجتلني حيه..ما قول اني مب منصدمه انه سالم اخو علي الصغير هو اللي خطبني..بس مادري مادري الوضع اهون اهون بوااااااااايد!!!
عايشه: لطووووووف..خلصتي؟؟؟
لطيفه: عوووووويش..ماحب حد يكلمني و انا فالحمام
عايشه: انزين شوي...شوي بس
طلت لطيفه من باب الحمام مطلعه راسها بس و البخار متجمع على ويها بشكل طفولي..لطيفه: شووووو
عايشه: هاه...مستانسه؟؟
لطيفه: يالبايخه...شوه تبين..
عايشه و برد فعل غريبه صدمتني بس فرحتني..قامت و باستني على يبهتيه: الحمدلله الحمدلله ..اقولج نحن بنسيرمسيد الشيخه امنه محاضره بتسيرين ويانا ولا بتسيرين بيت عموه؟؟ فطيم حاشره الدنيا تباج تيين؟؟
لطيفه: منوه بيسير وياج؟
عايشه: انا و امايه و عموه بخيته؟؟ شوه قلتي؟؟
لطيفه: لا بسير بيت عمتيه..مافيني على لسان فطيم..
عايشه: خلاص عيل شلي حمد و خالد وياج..
لطيفه: تمام..
++ طلعت و تلبست و اللحظه اللي وقفت فيها جدام المنظره..حسيت بقلبي منقبض..شفت شعريه بلونه اليديد صبغته اسود فاحم و فيه لمعه بنفسجيه..مب هاذا السبب اللي خلا قلبي ينقبض..السبب هو ليش انا صبغته؟؟ من يوم انا صغيره كان احمد يتطنز على لون شعريه..مانساها جملته" شوه هالشعر الحليان"..احمد..احمد..خلاص يا احمد انته في درب و انا في درب..ابتعد عني و خلني في حالي..طلعت صورته اللي كنت خاشتنها في سدة التواليت و بغيت اطرها عشان انهي كل شي..اول ما وصلت صوره احمد ما قدرت اكمل..سكرتهاو حطيتها فالكبت..بشوفلها حل بعدين..بحرقها..]ماينجبر قلب على قلب يا احمد [طلعت لبست عيال سعيد و شليتهم معايه..اول ما دخلنا بيت عموه بالسياره انه فطيم يالسه تستقبلنا على الباب..و الابتسامه شاقه الحلج..و الخدود حمر من المستحا..
فاطمه: مرررررحبا السااااااع ملاااااييين ولا يسدن
لطيفه: يالتقردين
فاطمه: و انتي منوه رمسج؟؟ انا ارمس هالغراشيب الكتاكيت...فديت حمودي و خلودي..شحالكم باباه؟
حمد: بخير...وين سيف؟؟
فاطمه: تعال حبيبي ..سيف راح السوق مع عمي احمد..تبون تلعبون مع عمران..سيروا داخل
لطيفه و هي اتبوس فاطمه: علومج الخطيبه؟
فاطمه: و الله اتسرج حالي..شحالج انتي يالخطيبه تو؟؟
لطيفه: تماااموووووو..شفتي شفتي...سبحان الله...اخوان اخوان؟؟ ماصدق
فاطمه: أأأأأ....اقولج انسير انسير داخل...تعالي بخبرج بالساالفه من طأطأ لسلام عليكم
لطيفه: انزين اصبري..بسلم..
فاطمه: لا لا لا لا ...امايه روحت..و شموس سايره مع ريلها السوق..و البيت خلي..تعالي ما فيني صبر
لطيفه: حشا مستلغثه
فاطمه: جب يالسباله
++ بصراحه اول مره احسد فطيم على فرحتها شكلها بتطير من الفرح..هاذا اذا اصلا هيه مب طايره فووق..اول ما دشينا الغرفه سكرت الباب و لوت عليه فطيم بصوره غريبه و صاحت!!!!
لطيفه: اسميج صدق بقره...حد يصيح و هو مخطوب...طماطوووه بس عااااد..بس تراني بصيح انا بعد
فاطمه: لللطووووف..ماصدق ماصدق...علي من بد كل الناس..فديته و الله اني افداه بروحي
لطيفه: يا بنت الحلال نصيبج ...و اللي يكتبه الله مايرده الانسان..شوه شعورج انا خطبونا اخوان؟؟
فاطمه: أأأأأ...مادري مادري..امم..اكيد فرحانه...
لطيفه: و شله اتقولينها جيه؟؟!!!! يالله بنسير بيت واحد؟؟ اتصدقين لو فالحلم ما اتخيل انه هاذا ايصير
فاطمه: تراج قلتيها اللي الله كاتبنه بيصير
لطيفه: انزين يالله يا ام الخبيرات قوليلي شوه عندج امره الكلام بيظهر من خشمج
فاطمه: ههههه..اول شي..اليوم العصر عقب الصلاه..اتخيلي دق عليه عمير الباب..تعرفين عاد انا اتيبست غريبه يعني عمير تعرفين اخويه العود وياي الين الحجره..
لطيفه: و بعدين؟
فاطمه: دش عمير و عقبه دش احمد..و سكروا الباب..ايسولي فلم رعب..لا و عمير ايقول حق احمد انته رمسها..و هاذا ايقوله انته خوها العود
لطيفه: ماشالله يتعازمون عيال سيف
فاطمه: لا لا عمير ما يبا ايشاورني عشان ما اتحرا انه بيضغط عليه او انه غصب..لطووف..مادري بشوه حسيت..تمنيت انه ابويه الله يرحمه هو اللي يقولي..بس فديتهم خواني و الله ما نساها وقفتهم معايه
لطيفه: ايه ايه لا تطلعين برا النص..كملي شوه قالج الديج
فاطمه: ماشي قالي انه علي بن حارب اللي هو نسيبنا..عاد تعرفين يشرحلي يتحراني ما عرفه و هو مايدري اني متخبله عليه...يبا ايخطبنيه..و اني مب مجبوره اوافق..ونحن ما بنضغط عليج و انتي يتيمه و شورج عندج..تعرفين من هالكلام..عاد و عمير كل شوي ايقول..نحن خوانج و اللي ما تبينه ما بيصير..مايدري اني قابضه عمري عن لا طير من الفرح...
لطيفه: غربلات عدوج..لا تقوليلي قلتيلهم هيه موافقه؟؟!!!!
فاطمه: لا لا لا ..خافي ربج استحي بعد انا..قلتلهم الشور شوركم..
لطيفه: وشوه قالو؟؟
فاطمه: هزبني عمير..قالي الشور شورج انتي مب نحن..ماشي قالي اذا موافقه تراها بتييني امايه و بتاخذ الموافقه مني و اذا مب موافقه لازم اقوله بلساني..
لطيفه: تمام و الله..و سولج زفه و انتي بعدج ما عرستي..بس ياحظج يا فطيم على الاقل انتي اتعرفينه اللي بياخذج اما انا امره ما عرف شي!!!
فاطمه: دخيلج..الا قولي شوه اللي كنت ما عرفه!!! فخور من شوي مرمستني عنه و قالتلي اشيااااااء
لطيفه: شووووووو...بس قوليلي قوليلي عن سالم..خبريني كم عمره شوه ايسوي..يعني يعني اي شي؟؟
فاطمه: مادري مادري تخبري فخور تبيني ادقلها؟؟
لطيفه: ويوم انتي استجوبتي اختج شله ما سألتيلي انا بعد؟؟!!!!
فاطمه: مادري..سالم اظني جيه عمره 24 ..مخلص كليه الشرطه..حليو يعني احلا عن علي..اووووهووو و انتي شوه عايلنج بتعرفين لا تستعيلين..
لطيفه: انزين انتي شوه عرفتي عن علي؟؟ جان سألتي؟؟
فاطمه: اول شي قالتلي فخوور انه واااايد فري...زياده عن اللزوم..وو..و انه لو خذني ما بعيش اهنيه
لطيفه: اكيد مب اهنيه بنسير المرموم...ياويلي على فرقا العين و ثراها
فاطمه: لا لا ..يعني بيشلني وياه...و هاذا شرطه..اني لا اشتكي بعدين..
لطيفه: اشوووووو...شوه يعني ما بشووفج؟؟؟ و شوه تشتكين ؟؟
فاطمه: شوه اسوي عاد هذا نصيبي..السنه اليايه يمكن ايحولونه لبنان ولا الجزائر..بعدين تراه تراه
لطيفه: تراه شو؟؟
فاطمه: كان معرس و طلق
لطيفه: أشوووووووووووووووووو....شوه مطلق!!!! لا تقوليلي علي مطلق..شوه تبينه و الله ما تاخذينه
فاطمه: شسوي عاد..حظي جيه
لطيفه: و الله مب ملزومه تاخذينه..مثل ما طلق غيرج بيطلقج
فاطمه: لا لا ...فخور اتقولي انه كان ماخذنها و هو ياهل بو عشرين و هي ام 15 و الحين لا تنسين هو ريال بو 28 سنه..يعني اختلف الوضع
لطيفه: لا لا..خلي مخج في راسج..انتي بنت و بعدج صغيره لا تعقين بعمرج هالعقه اصبري باييج اللي احسن عنه
فاطمه: مااااباااخذ غيره...لا لا لا ...مالي خص
لطيفه: اتشوووفينه هاليدار اللي وراج دقي راسج فيه...لا تقولين عقب ما قلتلج
فاطمه: برايني....اووهووو...لطوووف فهميني احبببببببه..
لطيفه: ياهي بلشه...كيفج الله يهنيج..اقول ما قالتلج فاخره يعني كيف يينا على بالهم؟؟
فاطمه و ويهها غادي طماطه:يونه علي رمسها..و قالها منوه من خواتج اللي تشابه احمد
لطيفه: في ذمتج؟؟؟؟ ياختي هاذا جرئ...و فاخره عادي قالتله؟؟
فاطمه: تخبرته اول شي ليش؟؟ قالها انه انه..يعني شافنيه وو ودخلت باله على قولتها..اتخبرها عني سين جيم..تراه قالتلي انه هو من زمان يبا يستقر بس مالقا اللي يرتاحلها..عشان جيه يبا ايعرف كل شي عني ..و بس..لطفين...انتي ماحد شاورج من هلج؟؟
لطيفه: لين الحين لا !! و ليش ايشاوروني بذمتج..بتوكل و بعرس ابا اشوف عيالي..مادري احسبه سالم انسان فنان مادري ليش بس جيه احساس
فاطمه: و الله مادري...
و في هاللحظه دشت عليهن ضبابه
ضبابه: مرحبااااا بالعرااااايس....شوووو بتتوكلن عنا و بنفتك منكن؟؟
لطيفه: مرحباااا الساااااع بنت العمه..عاااد ترانا نستحي خفي شوي علينا..
ضبابه: عليكن حظ يفلق الصخر اترومن تنخطبن في نفس اليوم..اسميكن ساحرات
لطيفه: هبي هبي من عينج...شفتي عاد خواااان و الله اني ما صدق
ضبابه: أشووووووه...فطيم انتي ما قلتيلها
فاطمه: أأأأ...قلتلها قلتلها..ممم...مادري انسير برا انسير برا يدتيه يالسه فالمنصه..
ضبابه: لطيفه...و بهمس...شحاله سلطان
لطيفه: بخير ايسرج حاله..باجر بيسيرون ...
ضبابه: لا و الله؟؟ بيسير و هو زعلان عليه!! شسوي؟؟ ماباه ايسير و هو حاط في خاطره عليه
لطيفه: برايه طنشيه...انتي مب غلطانه حشا و هو غادي ملبق امررره ما يتوازا(يحتمل)
ضبابه: لطيفه بس انا احبه و الله اني احبه و احب الارض اللي يمشي عليها..شوه اسوي لا هنت لي عيشه ولا رقاد ولا حياه..ليلي نهاري افكر فيه..و حاسه بخوف و روع
فاطمه: بسم الله لا تفاولين عليه
لطيفه: هاذا من كثرما تفكرين فيه...ما عليه بنشوف لج حل اليوم..
ضبابه: الله كريم...
++ طلعنا نيلس برا عند يدتيه فالمنصه..و انا حاسه بنفسيتيه احسن بوايد..الحمدلله على هالوضع..بس بعدني حاسه بعدم الاستقرار..مادري انهم ايقولولج انخطبتي و في اي لحظه ممكن اتفارقين البيت اللي تربيتي فيه و عشتي فيه آمره و ناهيه..مادري صعب..بس هاذا مصير كل بنت و ان ما كان اليوم بيكون يوم ثاني..ريحتني فطيم بكم كلمه اللي قالتلي اياهن عن سالم..24 يعني ماشالله ريال و يشتغل اكيد معتمد على نفسه..الاصعب انه فطيم بتبتعد عني..بس هاذا نصيبها و هاذا نصيبي..و انكتبت نهايه حبي لاحمد بطريقه ما خطرت على بالي ابد..انتها كل شي..وانا مرتاحه..مرتاحه؟؟!!!...ماعرف بس نقطه على السطر.
لطيفه: شمسيتي يدتيه؟
اليده ضبابه: بخير..ازقرن على هنديكن ايوري الضو اليوم امرره البرد ضاوي بعياله..
فاطمه: كريييييييييييييييم....كريم
ضبابه: يالله الحين عااد بيسمعج يوم انتي تزقرينه..ازقري بحيل..
لطيفه: انتي منوين يايبتنها هالرقه؟؟!! يابوي ما تنفع هالرقه في مجتمعنا
فاطمه: انزين بسم الله..ضبابه سيري خليه ايي..و اقولج سووي حق حمديه خليها تيي
ضبابه: ما عليه..انا بسير داخل بسوي بلاليط..
لطيفه: منوه هاي حمديه؟؟
فاطمه: ام راشد...عنبوه حرمت عبيد يارنا
لطيفه: شوه تبنها المصريه...ياختي مافينا على الصدعه
فاطمه: حرام عليج سوالفها حلوه..
لطيفه: بس انا استحي منها
فاطمه: وااابويه عليج..الحين هاي يارتنا من20 سنه و انتي تستحين منها؟؟!!!
لطيفه: على راحتج..انا بسوي حق سلطان النحس...اليوم الا اراضي بينهم حرام عليه و الله انه البنت مسود ويهها من الهم..
اليده ضبابه: عن منوه ترمسن انتن؟؟ عن سلطان
لطيفه: هيه يدتيه
اليده: متا بيسيرون السعوديه
لطيفه: يدتيه باجر بيغبشون عقب صلاه الصبح
اليده: الله يحفظهم..
لطيفه و هي اتكلم سلطان: الو...مرحبا سلطان..
سلطان: مرحبتين..
لطيفه: شحالك؟؟
سلطان: بخير و نعمه..
لطيفه: اقولك..فالسوق انته؟
سلطان: هيه شي في خاطرج
لطيفه: خطف على سينابون و هاتلنا شوي كيك..
سلطان: هب حولج سينابون..انا العب بليارد الحين..تبين فطاطري الزمالك ماعليه غير لا..
لطيفه: حكم قراقوش.
سلطان: اشووووه..ماسمعت ما سمعت
لطيفه: قلت كل اللي تيبه زين..اقولك انا في بيت عمتيه
سلطان: لا حوووول
لطيفه: انزين..بسم الله..تعال عرب اليوم فجووه التقويم و غادين امررره قمر قمر
سلطان: ايه لا تسويلي اغراءات..
لطيفه: بس عاد من النحاسه..تعال رمسها..حرام عليك البنت مستهمه و تعبانه حالتها..و دموعها سكايب
سلطان:دواها..
لطيفه: انزين هيه تخبرت عليك..
سلطان: في ذمتج..قولي قولي شوه قالت؟
لطيفه: اتحب الارض اللي تمشي عليها
سلطان: هههههههه..ما عليه جيه ربع ساعه و بكون عندكم..حطيتيلي الضو في فواديه..يالله فمان الله
لطيفه: الله يحفظك..
فاطمه: شوه ايقولج؟؟
لطيفه: بأيي الحين..لازم نرضي بينهم بس ابا مساعدتج
فاطمه: فالج طيب
++ عقب خمس دقايق انه حمديه ام راشد داخله عليهم..و عقب السلامات يلسنا و سولفنا وياها صدق انه سوالفها ماتنمل..
حمديه: عاد ما لقيت وقت اسويلكم شي..يبتلكم حمام بالفريك مسوينه العصريه
فاطمه: يسلمن ايديج يا ام راشد...ما تقصرين..علومهن حريم عيالج؟؟
حمديه: و الله انهن مغربلاتني( باللهجه الاماراتيه مخلوطه بالمصري)..صدق يوم قالوا مركب الضراير سارت و مركب السلايف غارت
فاطمه: ليش؟؟؟ اكيد الخوجايه ملعوزتنج
حمديه: لا لا يحليلها الامريكانيه..فنانه..الا هاي سميه ملعوزتني وياها.. دوم يتضاربن..و الله انه الامريكانيه نافعتني اتوديني السوق..و تقضيلي اشغالي كلها..اتسوق سياره تراها..
فاطمه: لا و الله عيل سميه يونها بنت اختج..و مبهدلتنج..و شقايل عبيد خلاها اتسوق سياره
حمديه: عبيد الحين خرف ما يفهم..و شورها عند ريلها راشد سامحلها
لطيفه: و امين ضواها الامريكيه؟؟
حمديه: تراه الله يسلمش..سار يدرس في مريكه..و يوم خلص يابها البيت بعيالها
لطيفه: لا اله الا الله..اسلمت عاد؟؟
حمديه: هيه مسلمه و تلبس شيله و عبايه...و الله انها طيبه..
فاطمه: اقول ام راشد عطيني شوي تيلفونج..
لطيفه: شوه تبينه؟؟.... يالفضايح
فاطمه: صبري شوي برويج صوره ولدها اخر العنقود عبدالله ايجنن..حاط صورته خلفيه في تيلفون امه..الهرم ايعرف عمره انه حليو..شوفي شوفي
لطيفه: اللهم صلي على محمد..انس هاذا ولا جن من حلاته..ماشالله طالعي طالعي شقت عينه محلاها..غربلاتج يا حمديه انتاجج حلو...يوزيني اياه؟؟
حمديه: وين بحصل احسن عنش حق ولديه..إلا بوسعيد من ايشوفني يايه اخطبش بيروغني من الدروازه
لطيفه: ليش لا لا ما عليج..ما شالله عليه..كم عمره؟
حمديه:منوه يبا ولديه ولد المصريه.. عمره الله يحفظه تلات و عشرين..تراه ايحب بنت عمه اليازيه..و حاشر الدنيا يباها..بس الله يهديها امها ما بغت قربنا منها..ما وافقت
لطيفه: ليش؟؟؟ حراااام جانه ايحب بنت عمه ...
حمديه: لاني انا امه مصريه..ما يبونا
فاطمه: انزين اللي امه مصريه ولا هنديه ولا اي جنسيه مب عيب..تراه ابوه مواطن و الريال بافعاله مب بنسب امه
حمديه: عاد انا شسوي..الحين حالته حاله..ولا اعرف شوه اسوي فيه
لطيفه: برايه الله بيرزقه باللي احسن عنها...
فاطمه: اتصدقين هاذا يووم كان صغير كان اسمه عادل
لطيفه: اشوووووو...هالمزيون اسمه عادل؟؟ تراكن اتقولن اسمه عبدالله
حمديه: لا لا تراني يوم كنت حامل به كنت مسافره مصر..المينوفيه..و هناك ياني الويع و ربيت..و سميته عادل على والدي
لطيفه: انزين و عقب؟؟
حمديه: يوم رديت البلاد...احتشر الشيبه..و غير اسمه و سماه عبدالله
فاطمه: يزاه الله خير يوم خلف اسمه...ولا جان اتعقد الحين
حمديه: هههههه..لين اليوم ايقولي الحمدلله انكم غيرتو اسمي..
لطيفه: هاذووه سلطان سوا...الو..مرحبا..
سلطان: اهلين..وين انتن؟؟
لطيفه: اهنيه نحن فالحوش..المنصه اللي على اليمين اللي عدال المطبخ من الشرق..
سلطان: لااااااا واللله؟؟؟!!!!!
لطيفه: ليش؟؟؟؟
سلطان: ابسرعه ابسرعه... سيرن داخل..بسرعه ماشي وقت
لطيفه: ليش ليش؟؟؟ سلطان شوه بلاك؟؟؟ شي مستوي؟؟
سلطان: ماشي وقت للكلام الحين..بسرعه الله يغربلكن...سيرن ايقولون العصابه اهناك
لطيفه و بخووف: اشوووه!!!! اي عصابه؟؟؟ سلطان سلطااااان قولي قلبي وقف
سلطان: طالعوا اقولج الحقي على عمرج بسرعه الحين ايقولي واحد من الربع انه عصابه الايدز امره اهناك اتحوط في....... بسرعه بسرعه
لطيفه: اشوووووو
فاطمه: شوووه ايقولج ؟؟ شوه عصابته؟؟
لطيفه: الحقي عصابه الايدز ايقولوج اهنيه فالحاره
فاطمه و هي اتمط التيلفون من لطيفه: سلطان في ذمتك انها في حارتنا؟؟؟
سلطان: هيه فطيم بسرعه بسرعه الله ياخذكن بسرعه ايقولون ايهجمون فالبيوت امره في شعبيتنا..الحين واصل البلاغ عليهم..ابسرعه...ايقولي واحد من الرياييل انه شاف السياره موقفه جدام بيت عمتيه
فاطمه: الشررررررررررررررده...بسرعه بسرعه انسير داخل...
لطيفه:شوفي شوفي هاذيه ليتات سياره عند الدروازه و الله انهم اهنيه يدتيه يدتيه بسرعه بسرعه انسير داخل
اليده : شعندكن؟
حمديه: ما عليش ما عليش هاي الا رمسه ....شعاعات
فاطمه: شوه اشاعات ولا اشعاعات الحين مبلغين عليهم نشن نشن..
لطيفه: و الله انهم هم واااااااااي دخلوا البيت....الشرررررده الشردددده
++ و تراكضن البنات داخل...و تمن اليده و حمديه بس برا
لطيفه: ياااااويلي العيايز براااااا....شوه هاذا؟؟؟ اخاااف عليهن
فاطمه: انزين سيري ييبيهن اصلا هاذيلا مقصه يا خوفي يطعزوونهن و هن ما يدرن...
لطيفه: لا و الله و ليش انتي ما تسيرين؟؟!!!! شوفي شوفي دخلت دخلت سيارتهم..الله يلعنهم..انسير انبلغ الشرطه
فاطمه: هيه و الله صدقج و انا بسير اخبر ابراهيم ايسير عندهن عن لا يقصون عليهن...
لطيفه: سلطاااااااااااااااااااااااااااانوووووه الهرم....تعالي تعالي هاي سيارته..هاي سياره سلطان
فاطمه: انسير عيل برا...دام سلطان عندنا ما علينا خوف...
سلطان و هو مطلع راسه من الدريشه: هاه....الدياي فليتن!!! خسكن الله ياللي ما فيكن فايده...جيه تربعن عن يدتيه و تخلنها...
لطيفه: شووه اتقول انته؟؟؟
سلطان: قصيت عليكن ....انتن مقصه اللي يقولكن يمين يمين يسار يسار
فاطمه: مااااااااااااااااااااااعليه...مب منك...من اللي ياخذ رمسه رياييل منك
سلطان: ايه الطماطه جااااااااااااااااااااب...ريال غصب عن خشمج يالديايه ...
فاطمه: لا و الله و جاااااااااااان اتروع...
لطيفه: يالله تعال حوّل انسير المنصه
سلطان: ما عليه برد على التيلفون و باييكن
++ سرنا و يلسنا فالمنصه..
اليده: شعندكن اترابعتن بلا ذهوون؟؟
فاطمه: يدتيه هاذا سلطان بو الخريريفات قالنا يون هاذيلا الي يعطون تطعيم وصلوا اهنيه عندنا..
اليده: يالله طول عمر بو خليفه..جانه الشنتار وصل الين البيوت..يالله يعل خيره دايم
لطيفه: يدتيه..لااااااااااااااااااااااااااااا...هاذيلا حراميه حاطين فالابر مرض و يبون ينشرونه فالناس
اليده: و اشدراكن انتن؟؟
لطيفه: يدتيه العالم كلها اتقول ما تشووفين العرب مسكره بيبانهم...
حمديه: يا بناتي هاذي شعاعات..يبون ايخربون الامن في بلادنا..يا بويه نحن بلادنا في امن و خير
فاطمه: هيه و الله..حسبي الله عليهم..
حمديه: و لله انه ولديه مباحسي(مباحثي)..و ايقولي هاذيلا يبون ايزعزعون الامن..ولا ماشي كله كذب
فاطمه: هيه و الله صدقج...بس انا سمعت انهم وصلوا العين و اليحر
حمديه: لا لا لا كله كذب ما عليش..قالوا الجحر و الجنوب ومادري وين كله كذب
لطيفه: شوه الجحر هاذا بعد
فاطمه: اليحر اليحر شوه ما تفهمين!!!...
اليده: سويله فديت روحه خليه ايحول ياكل من هالفواله...
لطيفه: يدتيه الحين بيحول...
اليده: سويله يوم اقولج سويله!!!!!
لطيفه: الو...يالله حول يدتيه تباك
سلطان: وين مالها شوف
لطيفه: هاذي عدالي
سلطان: لالا ضبوب
لطيفه: هاذيه الحين بتيي..اشوفها شاله مله و يايه صوبنا
سلطان: تدري اني اهنيه؟؟
لطيفه: لا لا ...اتشوووفها..الحين هاذيه تنزل من الدري..
سلطان: اوكي
++ و طوّل سلطان على المسجل واااايد على حمد العامري.." لا تقول احبك و انته كذاب الله على فعلك يجازيك" و ضبابه اول ما لمحت السياره وخت براسها و مشت سيده جنها ما شافته..
ضبابه: هاذا سلطان لاه؟؟
لطيفه: هيه..ما تسمعين مطوّل على المسجل..
ضبابه و هي خانقتنها العبره: شوه يعني؟؟؟ يبا ايغايضني يحطليه هالغنيه..شوه هاذا ما يحس ما يخاف ربه؟؟!!!
لطيفه: حرااام عليج تعرفين عاد هو يتحرش فيج..يباج انتي تراضينه
اليده ضبابه: حوّوووووول عاااااد....جلبت روسنا بهالغنا
حول سلطان و تم ايول و هو قابض سماعة التيلفون بإيد و صلب الزقارا بإيده الثانيه..
لطيفه: بذمتج مب حلووو...شوفي شوفي ضبابه لا يفوتج..بسم الله عليه
ضبابه: مابا اشووووفه
لطيفه: شووفي انتي الكندوره حليبيه و السفره حمرا...حرام يانج اتشوووفينه شوفي الزين باجر بيسير عنج
ضبابه: اووهووووو...و التفتت ضبابه الصوب الثاني و هيه تمسح دمعتها
فاطمه: في ذمتج دمعت عينج؟؟!!!! و الله ما يرزا عليج...
ضبابه: مالج خص انتي
لطيفه: ياختي لا تلووومينها العشق العشق لعبها لعبه....بومييد تعال تعاااااااااااااال اهنيه...
سلطان و هو ايأشر بأيده على الزقارا و ايهز راسه بالنفي..و كأنه ايقولهن لا لا ماقدر لانه ريحتيه مب حلوه..
حمديه: ماشاالله انتو الشباب في عايلتكم احلا عن البنات...
فاطمه: الله يسامحج يا ام راشد؟؟!!! جاملينا على الاقل
حمديه: لا ماشالله هازا سلطان و اخوش احمد و امبارح شفت خليفه يوم رحت اسلم على عفرا ماشالله احلا عنكن كلهم...
اليده ضبابه: شعنده ينعش؟؟
لطيفه: ههههه يدتيه ايوووول...
اليده ضبابه: اسميه الا داقنه الهوا هالولد..صوبنا صوبنا بومييد...اشله مايي؟
لطيفه: يدتيه يوم بيخلص الزقارا بايي اهنيه..
اليده ضبابه: يعله بلاه هالبلا...بتجتله هالزقارا الله لا قال..
لطيفه: امررره ليله نهاره ايدوخ..ما تشوفين براطمه سووود
اليده: خليه ايي ان ما وسمته في ايده ...بالزقارا
عقب ما خلصت الغنيه..
سلطان: سلاااااام عليكن يا حرمات...ايه بنات وحده تيي تشل الاكل
لطيفه: يالله انسير المطبخ انييب الصحون والسجاجين
ضبابه: و منوه بإييب الاكل؟
لطيفه: سيري انتي..لاني ابا اقول حق فطيم شي خاص
ضبابه: ما بسير..وحده منكن اتسير تييب الاكل من عنده!!!!
لطيفه: انا ضيفه عندكم لا تأمرين عليه
ضبابه: و الله هاذا اخوج!!! سيري فطيم
فاطمه: و انا ضيفه بعد بتوكل و بسير عنكم عقب كمن شهر..
ضبابه: مب سايره لا تحلمن..كيف تبني ارمسه و هو ما يرمسنيه
لطيفه: كيفج اتعرفينه سلطان انتي...نحن بنسير و انتي تصرفي وياه..
++ سرنا المطبخ و يلسنا انوايج من دريشه المطبخ..شفنا يدتيه اترمس ضبابه..و بعدين نشت ضبابه و سارت عنده!!!! بس للأسف ثانيتين شلت الاكل و ردت..يالنحاااااااااسه!!! بس عقب شوي سكر سلطان السياره و سار المنصه و يلس عند يدتيه..
سلطان: هاه الدياي اتشاردتن؟؟ امره ما فيكن فايده انتن..كريم كيف حالك..ماشالله ماشالله ( سلطان و هو يمسك ايد كريم الهندي) زياده عضلاااااااات
كريم و هو ايهز راسه: هههههههه..تمام تمام عشان يجي قوي
سلطان: يوم عندكن هاذا جلندايزر جان خليتنه يحرسكن...
فاطمه: لا يغرك الطول طول نخله و العقل عقل صخله..اتشووفه هاذا يوم يذبحون الذبيحه جدامه ايتم يزاوع
سلطان: اممممف عليه...مرايل على الفاضي..
اليده: بويه سلطان اهبش من هالفواله..
سلطان: الله يهالدياي منوه مسونه؟؟ ( يحليله يبا يتحرش في ضبابه)
حمديه: هازا انا مسويتنه اليوم.. فنان كل منه بويه
سلطان و هو ايطلع الاكل من ثمه: يعله يفضل عنج من اكل...شوه هالعيشه..من الصبح حاشراتني على عيشتها!!!!
لطيفه: لا لا كل من هالمله..هاي الفضيه فيها بلاليط
سلطان: سقم
لطيفه: استغفر الله هاي نعمه( و هي تغمز حق سلطان عشر مرات)
سلطان: اها...في ذمتيه اني ما ذقت شرات هالبلاليط في حياتيه..منوه مسونه؟؟
++ هدووء..ماحد استجاب..كلنا نترينا ضبابه اتجاوب بس النحاسه متبادله!!!! اووووف
فاطمه: هاذا بلاليط كريم...احتراف لاه؟؟
ضبابه و هيه تضرب فاطمه على جتفها: يالجذب!!!!! جاني من الصبح و انا فالمطبخ و فالاخير اتقولين كريم
فاطمه: ويوم فيج لسان جان رمستي..حشا طفرتوبنا..
سلطان: شوه هاذا محطوط وراج فاطمه...
فاطمه: كيرم
سلطان: تمام هاتيه بنلاعبكن دور قبل لا اروووح..
لطيفه: ما يصير نحن ثلاثه!!!
سلطان: افتت عاد مفتي الجمهوريه..منوه ايقول مايوز
فاطمه و بحماااس: شووووه رايكم نلعب فريقين؟؟
سلطان: تمام..فطيم انا و انتي فريق و لطوف وبنت عمتها فريق..
++ اوووف منهم...يعني الحين مايروم ينطق اسمها..ضبابه من القهر لفت الصوب الثاني
لطيفه: يالله ضبابه وزعي وزعي ...انا و انتي فريق يالله بندجهم ( بنغلبهم)
ضبابه: مارووم راسي يعورني..
سلطان: اوكي يالله عيل شي في خاطركن بسير انا..
ضبابه و هيه تلتفت بسرعه..و بصدمه..: وين؟؟
سلطان و هو يكتم الضحكه: ذليتينا..
فاطمه: ماعاااش من ذلك بووميد يلس و الله يا تيلس بنغلبهم و بغسلهن غسال يلس يلس عن خاطريه
++يلسنا و لعبنا فريقين..و اللعبه كانت اتجنن..كلها غش..سلطان ما يعلب زين الا يعدل اللعب حق ضبابه عشان هيه اتدخل اكثر عدد من حبات الكيرم رغم انها مب من فريقه!!!!!
فاطمه: حرام عليك سلطان شوه هاذا الا لطفين و ضبابه ايغلبنا!!
سلطان: حطي البودره..( سلطان و بتعمد ضرب حبة الخمسين صوب قول ضبابه يعني هيه اللي تروم اتدخلها)
فاطمه و هي محتشره: سلطااااااااااااااااااان...شوه هاذا الغش ما يصير ما يصير..ياخي انته تغش لضبوب
لطيفه: اعترفي اعترفي بالهزيمه...
فاطمه: انتي و خوج غشاشين..هاذا يداري شوقه يباها تستانس على حسابي..و فجأه ارتفعت العيون كلها صوب فاطمه..فحطت ايدها بسرعه على ثمها..لانها قالت شوقه بصوت عالي و بقهر..ما يصير...
أنيسه: فاتيما اهماااد سوي تيلفون يقول..يريد انتي سوي حق هو..
فاطمه: سلطان..عطني تيلفونك شوي مافيني اسير الين داخل..
سلطان: اخافج اتلوثينه..
فاطمه: اشوووووو...خله حقك بسم الله...
سلطان: ههههه..اندوووج..
فاطمه: مابا
سلطان: و الله يا تشلينه..
فاطمه و هي اترمس احمد: مرحبا الساع احمد..
احمد: لعلوم؟
فاطمه: طيبه..شوه في خاطرك اتقولي انيسه انك تباني؟؟
احمد: هيه..اقولج بتلقين اوراق على تواليتي عطيهن براهيم..خليه ايوديهن الحين بيت خالي حمد
فاطمه: انزين لطوف اهنيه..بعطيها اياهن
احمد: لا و الله؟؟!!! من متا عندكم؟
فاطمه: امممم من فتره..
احمد:قوليلها ما تبا بيتزا احيدها اتموت عليها..بس لا تقوليلها هيه بروحها ..
فاطمه: يا جماعه تبون بيتزا؟؟؟
لطيفه: هيه هيه دخيلج...منوه بييبها؟
فاطمه: و انتي شوه ايخصج تبين و لا لا ؟؟
لطيفه و بهمس: احمد؟؟ هزت فاطمه راسها
لطيفه: لا لا ما با... تخبريهم هاذيلا جان يبون
احمد: هههههه..اسميها النحاسه متوثقه فيها زين..بييب مارجريتا احيدها اتموت عليها..
فاطمه: تمام و انا هاتلي سيزر سلاد
احمد: اووكي..يالله فداعت الله...فاطمه: فمان الله..احمد: فاطمه فاطمه..هزرج درت؟؟ حد خبرها؟؟
فاطمه: أأأأأ...شكلها...لأ..و الله مادري
احمد: اوكي
فاطمه: برايك مع السلامه
سلطان: شوه بلاه؟؟
فاطمه: ماشي اوراق يباك تعطيهن خالي..
سلطان: يالله هاتيهن لاني بسير الحين..
فاطمه: اوكي يالله..
سلطان: يالله انا بترياج عند الباب..
++ ساروا فاطمه و سلطان عشان تعطيه الاوراق..و ضبابه نزلت راسها بحزن..يأس ..و قهر..كسرت خاطريه..لازم اتصرف لازم..
ضبابه: شوه هاذا!!! الحين بيسير وهو بعده زعلان..لطوووف شوه اسوي..دخيلج كلميه
لطيفه: سلطان نحس..و الله لو ارمسه من اليوم الين باجر ما بيفيد فيه
ضبابه: انزين انا تعذرت له..شوه اسوي اكثر عن جيه!!!!
لطيفه: شوفي..ولا اقول ماشي ماشي..
++ رحت داخل و انا مصممه اني اراضي بينهم..دشيت داخل ادور سلطان..لقيته يالس فالميلس الداخلي و ايجلب الجرايد..اوكي هاذا المطلوب..الخطوه الاولي امنت مكان معزول..الخطوه الثانيه لازم اجمعهم..
فاطمه: وينه سلطان؟؟
لطيفه: ييتي و الله يابج..تعالي تعالي..سيري ازقري اختج ولا تقوليلها اني اباها..
فاطمه: ليش؟؟
لطيفه: اوهووو سيري انتي و هاتيها..
++ طلعت فطيم و زقرت اختها..يت ضبابه..تمام الخطوه الثانيه من الخطه اني اجمعهم على انفراد بس من دون عزله..
ضبابه: شوووو؟؟
لطيفه: تعالي تعالي...و ما عطيتها فرصه دزيتها داخل الميلس..رغم انها تفاجئت ما خفت انها تشرد.. انا كنت خايفه من ردت فعل سلطان اللي رفع عينه بغيض صوبنا..طز المهم يتصافون..خفته يطلع..
لطيفه: فطيم..بليز سدي الباب عن لا يطلع واحد منهم هاذيلا النحوووس...(و التفتت صوب ضبابه و سلطان كل شوي اكلم واحد منهم)..شوفوووو عاااد مب علينا نحن خريطكم!!!! يالله الحين اتراضووووون و خلونا انقص الحيّه..و ايطيح الحطب..لا تكابرون..يابوي..احم احم..انتو انتو تراكم اتعرفون( و الله ما قدرت ااقول انتو اتحبون بعض..بس هاذا الواقع) يعني انتو اللي بينكم مب بسيط و حرام اي اي ..
فاطمه و هي محتشره و اتحرك ايديها زياده عن اللزوم: و حراااام ايضيع..صح ولا لا ؟؟ شوفو جداكم خمس دقايق بنخليكم رواحكم...بس شووووفووو..مب رواحكم بنلايم ( بنحرك) الباب..و نحن اهنيه ترانا يعني لا تاخذون راحتكم زياده عن اللزوم( و هيه تلهث جنها تقول خطبه)
سلطان: مسوادت الويه..دوم هاي بصايركن..
لطيفه: بسرعه بسرعه..
++ لايمنا الباب عليهم..و خليناهم بس مب بروحهم بعد ما فينا الخلوه حرام..ماشي ردة فعل..يالله و بعدين يعني..عقب شوي سمعنا صوت ضبابه بهمس..عاد فالبدايه بغينا نحترم الخصوصيه و حاولنا ما نسمع
ضبابه: سلطان..امممم..شوف سلطان..انا غلطانه..و اعترف بهالشي..مادري مادري بس منوه من البشر ما يخطي؟؟!!..انا اخطيت و تعذرت عن اللي سويته..و اوعدك ما سويها مره ثانيه..لو مره ماداوم مب لازم..(صمت قصير) سلطان حرام عليك ارمسك انا..و انته مره مب عاطني ويه..حتا ما حطيت عينك في عيني
سلطان: اسمعج تراني!!! شوه تبين بعد...بس عليج يوم سمعتج..
ضبابه و خانقتها العبره على الاخير: سلطان..حرام عليك..و الله انا تعبانه..عيزت من هالحاله..و الله ما تهون عليه باجر بتسير و انته زعلان..تباني اموت يعني!!! سلطاااا...و صاحت ضبابه..سلطان.و الله و الله اللي بينا شي...شي مب هين..حرام حرر...حرام انضيعه على شي مااا..ير..يرزا
++ في هاللحظه بصراحه قلبي عورني لدرجه اني ما قدرت امسك عمريه..كنت بدش عليهم..التفتت صوب فطيم..لقيتها هالبقره دموعها اتهامل..بغيتها تعيني لقيتها تبا حد يعنيها!!!
سلطان: ضبابه...ضبابه ارمسج انا؟؟ ردي عليه..
ضبابه: لل...و بشهقه..لبيه..
سلطان عقب تنهيده: لا تصحين ما تهونين عليه اشوف دموعج!!!
تذكر قلتلك مره احبك..عهد من يومها شايل ثقيله..و وفيت ولا نسيت ايام حبك.. و هاذي عادت النفس الاصيله
و نش سلطان و سكر الباب اخخ يالقهر شوه بنسمع نحن!!!!!!!!!!! حرام حرام و الله حرام ابا اعرف شوه بيستوي لا
ني بصراحه ما اضمن سلطان..عقب خمس دقايق بالضبط فج سلطان الباب بقو..لدرجه انه فطيم طاحت و انا فوقها..
سلطان: رقيه و سبيجه ...دوم هاي بصايركن..
فاطمه: انزين بسم الله ماسمعنا شي..
سلطان: أحسن..و طلع سلطان..بس عند الباب..التفتت و بأحلا ابتسامه شفتها في حياتي: يالله شي في خاطركم الشيوخ؟؟
ضبابه و الويه غادي طماطه..: لا سلامتك..
سلطان: يالله فداعت الله..
فاطمه: شوه قالج شوه قالج؟؟؟
ضبابه: بسم الله يالفضول...ماشي ماشي
لطيفه: اوهووووو المهم تصافيتو ولا لا ؟؟؟
ضبابه و ويهها احمررررررر: هيه تصافينا
فاطمه: ااااااااااااااااااااايه حلفي انه ما استوا شي بينكم؟؟
ضبابه و بشهقه: خااافي ربج...شوه بيستوي يعني..نخاف ربنا نحن!! ماشي مادري مادري و ركضت ضبابه برا عشان تتهرب عرفنا انهم تراضوا و تصافوا و اكيد كل واحد اعترف للثاني بللي يحسه صوبه..الله يهنيهم..طلعنا برا عند الضو الجو اليوم بااااااارد و الكل متجمع برا لقينا شمسه اختيه و يلسنا انسولف وياها
لطيفه: ماشالله يالكرشه...شوه ماصورتي شمسه؟؟
شمسه و هي تنسدح: لا لا ما صورت..اخافه ولد..ماريد اصور
لطيفه: شوه بسيتوي عليج يعني لو كان ولد
شمسه: لا لا الله لا يقول...دخليج سيف و مكفني بدال القرنين مطلعلي ثلاثه..ابغي بنووته جيه اتشابه عمتها ضبابه
ضبابه: لا لا لا تبين بنت..ابا اكون انا اخر بنت فالعايله
شمسه: بس عاد من البزا حرمه انتي و بتعرسين...و تبين تتدلعين بعدج!!
فاطمه: مالت علينا نحن اللي ما حد يدلعنا..اقووووووول
شمسه: قولي
فاطمه: شرايكم نلعب لعبه الاشعار
شمسه: اسميج الا متفيقه انتي
فاطمه: يابوي انتي ما تنلامين ويا هالكرشه..اتقولين فالتاسع و انتي الا فالسادس
لطيفه: ايه ايه بسم لا تحسدين اختيه..بعدين في كل مره انا اللي افوز فما في داعي انا نلعب
شمسه : لا لا العبنها و انا بحطلكن خمسميه للي بتفوز
فاطمه: تمااااااااااااااااااااااام..
لطيفه: لا لا انا اتريا مسلسل الحقيقه و السراب..ما فيني
فاطمه: انزين بعده ربع ساااعه بليز بليز خلينا نلعبها..
ضبابه: خلنا نلعب عشان نفتك من حنه فطيم ...
++ لعبنا عشان انخطف الوقت..كل وحده تعطي حرف و الثانيه لازم تييب بيت شعر يبدا بهالحرف و اللي تتأخر اوت..عاد نحن مندمجات على الاخير و فاطسات من الضحك..و ما حسينا الا و سياره داشه..
اليده ضبابه: منوه هاذا اللي ياي الحين؟
فاطمه: يدتيه هاذا احمد
اليده: من وين ياي هزركم؟
فاطمه: ساير السوق وشال سيف وياه..
++بصراحه مايا على بالي اني بشوف احمد اليوم..ماعرف كثرة الاحداث اول شي الالتباس و عقب الخطوبه و بعدين سالفت ضبابه و سلطان..بس احمد..وين مكانه في كل هالاحداث؟؟!! ولا شي..احمد ولا شي في حياتي..بس المشكله اني مب قادره اشل عيني عنه..نزل سيف من السياره يركض صوب امه اما احمد نزل و عطا كيس الاكل للخدامه..شكله يتكلم في التيلفون و مندمج عالاخير..ساير وراد..شوي يضحك وشوي يميل..و شوي يميل على السياره شوي ييلس على الرصيف..ماعرف حسيت بالقهر..او بالغيره..لا لا يا لطيفه اي غيره انتي بعد؟؟!! من اليوم و رايح ما حد في بالج غير سالم...سالم و بس و هالريال اللي يمشي جدامج و اللي للاسف يمشي في دروب قلبج انسيه..حاولت اتجاهله..بس شكله و هو لابس الكندوره الشتويه السودا و السفره الشال تتراوالي كل ثانيه في كل زاويه..يالله و بعدين يعني!!!
رسمت الشوق بي نبض يحبك..على لوحة حسن طيفك جميله..غروب الشمس فيها مثل خدك..مثل عين اللذي فارق خليله
اليده ضبابه: و الله اني احسبه يمشي في فواديه هالصبي
شمسه: عنبوه يايدتيه الحين احمد صبي؟؟
اليده ضبابه و هيه اتأشر على قلبها: هاذا لفواد لو تعرفنه...غير بوشهاب غلاته في قلبي..متا بيعرس و بشوف بذره قبل لا اموت
لطيفه : عنبوه يايدتيه لاتقولين جيه ..الله يطول بعمرج..لطيفه و بهمس..ماشالله هالريال دكتوراه فالمغازل
فاطمه: حرام عليكن لاتظلمنه..يمكن ايرمس حد من ربعه
شمسه: في ريال ايرمس ربعه بهالطريقه..!!! ههههههه ماشالله عليه..
بعد السلامات...
+++ لطيفه بعدها موجوده..بس شكلها مب طبيعيه معقوله فاطمه قالتلها!!! مب هيه لطيفه الاوليه لطيفه ام لسانين لطيفه المقوي اللي يوم تلقاها مرحبانيه و شاله الدنيا بسوالفها..هاي انسانه ثانيه..غريبه..ماعرفها مب هاي لطيفه اللي دشت قلبي..مب هيه ابد..ما حطت عينها في عيني..ردت عليه من غير نفس شوه مستوي؟؟!!
فاطمه: أحمد أحمد لا تبدل نتريا الحقيقه و السراب..
احمد: لا وا لله مافينا انوازي المصاروه..الحياله على شوه ايون؟؟
ضبابه: على دبي الجديمه..خلهم خلهم هاذيلا لطوف اتابعهم من الصبح..
احمد: لاه؟؟ اتصدقين لطوف عاد انتي يوم بتكبرين و اتعيزين بتغدين شرات فيفي عبدو
+++ماشي ردة فعل من لطيفه جني مارمست ما تكلمت..لطيفه مب من النوع اللي يسكت اذا حد غايضه شوه فيها..شوه سالفتها هالبنت؟؟
ضبابه: حرااام عليك...شوه ياب اللي ياب؟؟ ايه لطفين شله انتي ساكته دافعي عن عمرج
لطيفه: ماهمنيه..
شمسه: لطفين!!!!! شوه هاذا شوه مسويه بشعرج انتي؟؟؟
لطيفه و هيه بسرعه تتحجب:أأأأأ ماشي..حسبي الله على بليسج شوي شوي لازم اتسمعين يدتيه!! صابغتنه
ضبابه الصغيره: اشوووووه..حرااام عليج؟؟!!! لووونه كان حلووو
لطيفه: حلو!!! الله يخليج متعقده منه!!!
فاطمه: و ليش ان شالله؟؟؟
لطيفه: ماشي من يوم انا صغيره وحده من ربايعيه في المدرسه اتقولي شعرج لونه مب حلو اتقولين حليان( اول ما قلت هالجمله احمد اصطلب في يلسته و ارتسمت على ويهه ابتسامه غريبه..اكيد عرف اني اقصده)
فاطمه: حلا راسها انشالله ...اتصدقين عاد هو حلووو لونه عليج وايد خاصه انج بيضا بس مادري جيه مكبرنج..اول اتبينين بيبي!!!!
شمسه: يالله كملن كملن...وين وصلنا..ضبابه انتي اوت لانج تأخرتي يالله فاطمه هاتي البيت
فاطمه: لطيفه انتي اخترتي حرف التاااء؟؟ تصدقين عاد صعب
شمسه: يالله عيل انسحبي
فاطمه: و الله ما نسحبت تبين اتربحين اختج..امممم..تكلم يا بعد عمري تكلم كلام العين ما يطفي لهيبي..هاه منووووو قدي؟؟ يالله لطفين دورج حرف اللام...
مرت فتره و لطيفه ماشي استجابه..كيف برد عليهاو انا مخي مب قادر ايركز..تفكيري كله عند هاذا اللي يالس على طرف و سالب فكري و روحي و قلبي..ياربي ياربي ساعدني و انساه..
شمسه: هاه لطيفه تنسحبين؟؟
لطيفه: امممم...لي خطف قلبي بمخاطيفه..غر و الحيات مقرونه ..صادني الحلوه تواصيفه..بابلي السحر في عيونه..
سادت فترة صمت..جنه الكل فهم انا شوه اقصد بهالبيت..حتا احمد فز..اسميني صدق بقره..ليش سويت جيه؟
ضبابه الصغيره و عشان تكسر جو الارتباك: شت يا لطفين اسميج مافيج حيله..بابلي السحر في عيونه..يالله اختاري حرف..
لطيفه: امم م..حرف الجيم..
فاطمه: شووو..حرام عليج هالحرف صعب..غيري غيري
لطيفه: ما تبين انسحبي..
شمسه: شوه قلتي بتنسحبين
فاطمه: لا لا لا لا عطني فرصه..مرت فتره طويله و فاطمه ما حصلت بيت...
فاطمه: اوهووووو صعب هالحرف..
احمد اعتدل بيلسته..و بردت بفعل ما حد توقعها: جرح في جاشي مخبنه ..و الخوافي ضربهم خافي..لي محب مني و منه..حب مثل الجوهر الصافي
++ مادري ليش كل الانظار اتجهت صوبي انا؟؟..شوه لا يكون يتوقعون انه احمد يقصد بهالبيت انا!! انقهرت..شوه يالس يستهزء بي يعني!! هو اكيد يعرف اني انخطبت ماله لزوم كل هالفهلوه..اووووف الا اردها له..
لطيفه:عادي اتمادى فالغرور مثلك ترا يتجاهله..ما حب انا ميت شعور و الحب ما تستاهله..
++ مادري شوه سويت..بس اللي فهمته انه البيت اللي قلته سوا فوضا لانه فطيم اطالعني و هي فاجه حلجها..و ضبابه اتعض لسانها..اما احمد فنش متغيض فووول..شل اغارضه و سار داخل و هو اينافخ؟؟؟؟؟
لطيفه: امممم..أأأأأ...يالله انا بسير البيت..
شمسه: شوه هالقواه لطووووف؟؟؟ تراه مهما ايكون احمد ريال شوه هالكلام اللي قلتيه
لطيفه: ما قلت شي غلط و هاي الا لعبه ليش ياخذ الامور جد..يالله فطيم بتوصليني؟؟
شمسه: لا لا ماشي سيره مشي..الساعه وحده من الليل الحين..لطفين باتي اهنيه..
لطيفه: لا لا ما فيني باجر بيسير سلطان و انا بعدني ما رتبت له شنطته
شمسه : خلاص عيل خلن احمد يوصلكن..فطيم سيري قوليله..
لطيفه: لا لا برايه يمكن سار يرقد
شمسه: لا برايه بيحشر الدنيا اذا نش باجر و درا انكن سرتن مشي نص الليل سيري فاطمه الحقي عليه
سارت فاطمه صوب حجره احمد و دشت عليه..احمد كان منسدح و ايطالع التلفزيون
فاطمه: احمد اباك اتوصلنا بيت خالي بنوصل لطيفه
احمد: السباله بعدها اهنيه ماسارت؟؟
فاطمه: شووووو..شوه سباله هاي بعد؟؟؟
احمد: ما سمعتيها مسوده الويه شوه اتقول..يا قواتها..هاذي اذا اتحرا عمرها بخليها على راحتها تحلم!!!
فاطمه: انزين شوي شوي ليش معصب..احمد انته اللي رفعتلها الضغط..و اذا كنت حاط في بالك لطوف فأحسلك شلها
احمد: اشوووووو...انا احط الهمباه في بالي!!! ليش ان شالله..
فاطمه: من سواياك و فعايلك....غارت..
احمد: ايكون في علمج..لطوف باخذها باخذها..طيب غصب باخذها..و بسوي اللي اباه مب هيه اللي بتمنعني...و الله و الله في سماه انه اللي في بالها بخليها تحلم به مسوده الويه..و على هاللحيه اذا خذت حد غيري..بتشوووف
فاطمه و هيه فاجه ثمها مستغربه: أأأأأ...المهم الحين بتوصلنا؟؟
احمد: التعني انتي و ربيعتج...اتريني تحت عند السياره الحين بلحقكن..
++ عقب خمس دقايق نزلت فاطمه و احمد اللي كان لابس كندورته بس و العقم مفتوحه!!! بسم الله شكله امرره واصله عنده عالاخير..بسم الله انا كنت امزح و هاي لعبه ليش ياخذ الامر بجديه خلاص انا مب لطوف الاوليه..انا مخطوبه و اكيد ما كنت اقصد اي شي من تلميحي!!!
احمد: يالله اركبن
وصلنا البيت بسرعه لانه الشيخ مطيرنها السياره على الاخير...
لطيفه: اقول فطيم باتي عندي اليوم؟؟
فاطمه:أأأأأ..و الله مادري..شوه رايك احمد ابات عندها؟؟
احمد: وين تبين انتي بعد!!! البيت متروس رياييل
لطيفه: منوه ايقول!!! ابويه و سلطان باجر بيسرحون..و خليفه ماحد ساير بوظبي عند سعيد اخويه..البيت خلي شوه الراي؟؟
فاطمه و هيه تغمز حق احمد من المنظره: فديتك احمد فديتك....ابا اقولها شي..
احمد: ألتعني...باجر بخطف عليج...
فاطمه: اوكييييي...
لطيفه: احمد...مشكور على التوصيله
بس ما ظني سمعني حشا...شخط ويل في نص هالليل و ظهر و انا بعدني ما كملت كلامي..بسم الله الله يهديه
فاطمه: لا تلومينه متغيض..
لطيفه: و انا شوه يخصنيه...فطيم هاي الا لعبه..بعدين لا تنسين هو اللي رز بويهه..
فاطمه: لطيفه اللي بينكم لازم يتصلح ما يصير جيه..
لطيفه: ما يهمنيه..خلاص احمد انتها من حياتي
فاطمه: منوه ايقول؟؟!!!! لطيفه لطفين ...امممم
لطيفه: شوووه...قولي من الصبح انتي و اخوج اتغامزون
فاطمه: لطوووف بصراحه بقولج و اللي بتسوينه سويه..خالي حمد شاور احمد في خطوبتج و احمد ما وافق
لطيفه: شووووووووو...ما فهمت!!!!
فاطمه: اوهووووووو...ماشي شاوروه اذا بيرخصج لسالم ولا لا ...و احمد ما رخصج ..
لطيفه: ليش ان شالله يباني سمنديقا احرسه طول العمر!!!!
فاطمه: اف...لا..يباج عروس له فالصيف الياي...
عسا في يوم تعرف كبر قدرك..كثير الناس من دونك قليله..عيوني تحتري بالامر وصلك..و اخاف دموعها تبقى هميله
|
09-07-07, 09:34 PM
جديد مواضيع قسم القصص المكتمله
العرض العادي
