كاتب الموضوع :
اقدار
المنتدى :
القصص المكتمله من وحي قلم الاعضاء
***
الجزء الأخير
دق مهند الجرس وهو كان يدق جوالي وماكنت بحاله ولا بحال شي خلاص احسني بديت اتلاشى النزيف يزيد والألم فظيع .. فتحت له الشغاله وجا لغرفتي على طول وأول ماشافني نيمني على ظهري واعطاني ابرة في فخذي توقف النزيف بعدين جاب قميصي لبسني اياه وشالني بعد مالف عبايتي علي وطرحتي على راسي ..!
صحيت بالمستشفى وانا تعبانه فتحت عيوني شفت شكل مو غريب علي بس من زمان عنه
: خالتي .؟
كان صوت خالتي تبكي : هلا يمه الحمد لله على سلامتك
: راح ماقدرت احافظ على ولد مهند
: لا تبكين يايمه وعسى ان تكرهوا شيئاً وهو خيرٌ لكم .
: خالتي تكفون لاتقولون مات الجنين .
سكتت خالتي وقعدت تبكي وتمسح على راسي بيدها وتسمح دموعي بمنديل .
دخل علينا مهند وهو يبتسم ولا كأن شي صار .. بس لمن شافني ابكي جا عندي بسرعة قال : لا ياديمه لاتبكين ياعمري ...
قاطعته وقلت : مهند ماقدرت احافظ على ولدك .
: موبيدك ياعمري بعدين ماتدرين يمكن ربي كاتب لنا خير .. جلس بجنبي على السرير وكمل : عمري انتي تعرضتي لصدمات عصبيه في بداية حملك انا توني شايف ملفك عندك اكتئاب حاد ... وكان المفروض ماتعرضين نفسك لأي صدمة او زعل او حزن وانتي زي ماقلتي لي كنتي تبكين بشكل فظيع اكيد بيصير نتيجه عكسية على الجنين ..!ويمكن ربي فكنا منه اذا فيه شي .
مسك يدي وباسها قال : بنجيب عشرة لاتحزنين على هذا ..
: مهند هو مات اكيد .
: ايه والله مات ؟ياعمري بس لايضيق خلقك .
: آسفه حبيبي ماكنت ابغى يصير كذا بس غصباً عني ..
: ياعمري انا اللي آسف اذا فيه احد مسؤول عن اللي صار لك فهو انا .. لو دريت ان هذا بيصير لك كل هالتعب مااخذتك معاي .
تكلمت خالتي : مهند وش تقول انت .
: يمه البارحه ديمه معاي طول الليل ومارجعتها الا الصباح قبل اداوم .
: ههههههههههههه وانا اقول الرجال انقلب حاله ورجع لنا يضحك ويسولف ومستانس اثري ديمه في الموضوع
ابتسمت اجامل خالتي وانا بداخلي مكسورة ولدي مات والله مقهورة كنت مرة متحمسة يجي لي ولد ولا بنت واسميه واربيه ابي فيه من خالي ناصر كثير ومن ابوه كثير ومن عناد اخوي كثير ومن ابوي الله يرحمه اشياء كثيييرة .. وابي بنت تصير زي خالتي سمر ذكيه وعاقلة ولبقه وجميلة بربيها بطريقتي ..
انتبه لي مهند ودموعي تنزل .. جلس بجنبي ولف يده من ورى ظهري
: حبيبة مهند ليه دموعها تنزل ؟ انا ماقلت لك لااشوف الدموع هذي .
: مقهورة ان صار لولدنا كذا
: ياعمري لاتنقهرين وعسى ان تكرهوا شيئاً وهو خيرٌ لكم
: مهند كنت فرحانه فيه شو يضمن لي الحين اني راح اجيب منك عيال
: ههههههههههههههههههههه والله انك شكاكة وخوافه الحين بروح انهي الموضوع ياعمري لاتخافين.. ابيك تجين لبيتك عند امي تراعيك وانتي تعبانه ..
: .......................
تكلمت خالتي : ديمه لاتخافين انتي لمهند ومهند لك ماني كارهة ولدي ارميه لنار بنت سعود وامها .. وعلى قولة مهند انتي جنته يتركك ويروح لنار غيرك .
: خالتي اذا فيه احد بيشاركني بمهند مااقدر اعيش معه .. اذا بيصير لي لوحدي جيته الحين قبل شوي .
تحرك مهند من عندنا على طول وخرج من الغرفه قلت : خالتي
: هلا وغلا
:مهند ترى مانام راح للمستشفى مواصل
: لا ماعليك راح مالقى مرضى وماعنده الا موعدين ماجوا المرضى ورجع للبيت يرقص ويغني وجايب لنا فطور الساعه عشرة ونام لين دق عليك
: الحمد لله انه نام كنت شايلة همه انه مواصل وانا تعبته معاي
مدت علي خالتي كاسة حليب قالت : لاتقولين هالكلام يمه .. بس انا عاتبه عليك يوم خبيتي علينا حملك .
نزلت الكاسة على الطاولة اللي بجنبي قلت : صدقيني ياخالتي عشان مهند حتى اسألي خالي انا ماكنت ابغى مهند يتعذب اكثر يكفي فراقي تبغينه يشيل هم فراق ولده .
: لا يمه لو علمتيه كان صار له حجة عند ابوه وافتكينا من وجع الراس والصدمات اللي تجيك بس كل شي مقدر ومكتوب
: خلاص انا رضيت بالقدر وحكم القدر علي وفوضت امري لله بكل اموري
دخلت علينا ريم وسلمت علي وهي تبكي .
: الحمد لله على السلامه ... اجل يوم نفرح انك حامل على طول يموت
: كل شي مقدر ومكتوب ياريوم .. والله يسلم قلبك .. فين رانيا ليه ماجات
: رانيا زعلانه على البيبي وبتجي تزورك مرة ثانيه
: ياليتها جات مرة مشتاقة لها .
قالت خالتي : كلنا والله مشتاقين لك .. ويشهد الله اني بغيت ازورك كم مرة بس مهند يردني يقول ان خالك يقول ماابيها تتعب اكثر اذا شافتكم .
: صدقيني ياخالتي وانا بعيده عنكم ماكنت عايشة مع الناس .. صحيح ان خالي وهدى مدلليني ومخليني على كفوف الراحه وماينقصني شي .. بس كل مااتذكر اني بعيده عنكم وعن مهند واتذكر حال مهند وحزنه اموت من القهر .
: الله لا يقهرك يايمه .. ياديمه احنا ظلمناك ومن يوم طلعتي من بيتنا وحالنا مو حال اوادم .. مشاكل والبنات زعلانات من ابوهن مايكلمنه وهو طول الوقت معصب حاس بظلمك وقهر لولده .. ومهند عنده يسوى الدنيا ومافيها بس وش تقولين براسه اليابس .
قطع علي قبل ماارد عليها جوالي اللي دق .. كان خالي ناصر تحمد لي على السلامه بعدين قعد يلوم نفسه كيف راح وتركني بالشكل هذا وليه يخليني اروح مع مهند ,, بصراحة احرجني ماكان عندي كلام اقوله .
بس غيرت الموضوع وقلت : متى بترجعون ؟
: بشوف زوجك وارد لك خبر
: طيب خالي لاتشيل همي ترى خالتي عندي
: لا لا بنرجع ماتدخلين بيتهم ومهند هذا حاله
: خالي ماراح اخرج من المستشفى قبل اربعه ايام يعني لاتجي الحين وخالتي معاي بالمستشفى واذا خرجت بروح بيتك
: اخاف الخبل هذا يضغط عليك تروحين معاه
: ههههههههههههه خبل هاه ..؟ لا لاتخاف مااروح مع خبل انا
: ههههههههههههه ايه خبل ونص ولا فيه واحد ....
: خاليييي
: خلاص خلاص
: لاتقول الكلام هذا لاحد
: ماني قايله بس اذا جا خليه يدق علي .. ادق عليه من اليوم مايرد .
: حاضر بعدين لاتلوم نفسك .. ولا تعصب ولاتزعل على شي ربي اختاره لنا .
: يالله الله يعوضك بأفضل منه .
: خالي انا كنت امر بصدمات عصبية ممكن انها اثرت على الجنين .
: والله ..؟
: يقوله مهند ..
: حسبي الله على من كان السبب
: الله يعوضنا خير
: اللهم آمين .. واهتمي بنفسك ياديمه عشان خاطري
: ابشر يالغالي بس انت لاتشيل همي انا بخير وخالتي بجنبي حتى تأكلني بنفسها .
: جزاها الله خير .. ويالله مع السلامه .
: مع السلامه . بحفظ الله .
جلست مع خالتي وريم وخالتي كل شوي تعطيني شي آكله وانا احسني شبعانه آخر شي ترجيتها تستنى شوية ماعدت اقدر آكل احس معدتي مليانه .
دخل علينا مهند بعد ثلاث ساعت تقريباً على الساعه عشرة بالليل وكان مبسوط ..سلم على امه بعدين قرب مني وباس جبيني قال ابشرك فرجت وبتطلعين من المستشفى على بيتي .
: صدق مهند
: وربي صدق ياعمر مهند
: يارب
تكلمت خالتي : مهند كل هذي فرحة يمه اللي يشوفك مايقول ان ولده ميت
: يمه بيجيني ولد ثاني وثالث ورابع ن شاء الله .
تكلمت انا : صحيح مهند شو نوع الجنين
: ولد
: الحمد لله على كل حال
خالتي : يالله يارب العباد عسى مثل الايام هذي من السنه الجيه ازورك هنا وولدك في حضنك
: آمين يارب
تكلم مهند : يمه خلوني انبسط شويه والتفت لي : ديمه بهالسرعه حملتي كان استنيتي شويه
: هههههههههههههههههههههه بيدي هو
قالت خالتي : أي سرعه حرام عليك ترى لك سنه متزوجها
ضحكنا انا ومهند وهو قال : هههههههههههههههههههه سنه كأنها شهر ولا اقل .
كنت بين فترة وفترة احس بمغص في بطني بس آخذ حبتين مسكنة وبعد شوي يهدي عني .
جاب لنا مهند عشا من البيت مسويته سميرة بطلب من خالتي .. انا ماقدرت ادخل في معدتي شي لأني شبعانه بس عشان خالتي اللي تحلف علي كل شوي اكل كمان لو لقمه .. طفش مهند من كثر ماتحلف علي خالتي وانا اترجاها تكون آخر لقمه ومسك الملعقة وجلس يأكلني بنفسه .
: افتحي فمك هذي بس
: مهند والله مو قادرة ترى برجعه
: بس هذي ياعمري
اكلتها وانا احس ماعاد فيه مكان للأكل
:كمان هذي ديوم
: مهند والله مافيه مكان
: لاعمري باقي الحليب
: شو ..؟ فين احطه هذا كمان لا مهند الله يخليك مااقدر
: هههههههههههههههههههه طيب خلاص مانبي نغصبك اكثر
تدخلت خالتي بكلمة تمنيت انها ماقالتها لأني مبسوطه وماابغى مهند يروح من عندي .
: مهند يمه ماتبي تروح ولا خايف ان ديمه تخرج من المستشفى وماعاد تشوفها .. قوم يمه روح نام بكرة وراك دوام ..
التفت لخالتي ورجعت اطالع بمهند اللي ناظر في امه بلوم
قال : يمه عندي ثلاثه ايام اجازة .. وانا الحمد لله ماعندي ضغط في المواعيد .. خليني اجلس مع القمر هذا لأنه خلاص ماراح يفارقني .
قلت وانا ابتسم له : مهند شوف ريم فينها ترى من اليوم برا .
مهند وهو يبتسم : اش عليك في ريم تلاقينها تكلم ياسر .. ماتبوني اقولكم على الخبر الحلو ؟
: خبر شو ؟ قول ترى انا محتاجه افرح .
: من اليوم ورايح بتفرحين لايهمك شي
: ممممممممممممممممم قول حمستني
خالتي وهي على اعصابها : قول يمه عساه خير
: اليوم رحت لسعود ... التفت عليّ وانا احس بطني قلب علي والمغص زاد بس تماسكت عشان اعرف شو نهاية كلامه يمكن خير ..
كمل مهند .. قابلته بعد ماسلمت عليه يحسب اني جاب بحدد موعد الملكة ولا الزواج . قال : هلا بالدكتورمهند مابغيت تزورنا .طولت ماجيت تحدد معانا الملكة .
قلت له : اعذرني ياابو عادل انا جايك من دون علم الوالد وابي اقول لك اللي عندي وعساك تكون متفهم وماتاخذ على خاطرك ولايجي براسك شك انا عايفينك .. شفت لونه تغير وكشر قلت له : اصبر الله يطول بعمرك بقول لك كل اللي عندي وانت احكم في الأخير . مارد علي وكملت له : ابوي خطب منك وانا وزوجتي بينا سوء تفاهم وحن علي ابوي قال بزوجه من دون ماياخذ رأيي ولا يشاورني بالعكس كان بيفاجأني يحسبني بفرح اناو الله تكدرت من فكرة الزواج الثاني كله لأني احب زوجتي واغليها .. زوجتي رجعتها وانا والله ياابو عادل ماودي آخذ بنتك واظلمها ماارضاها على بنتك مثل ماني ماارضاها على وحده من اخواتي ولا انا مستعد ياابو عادل آخذها اليوم قبل بكرة عشان مااحرجك واحرج ابوي معاك .. لكن النفس وماتهوى وانا ماارضى الظلم على بنتك .. سكت ابو عادل مارد علي ثم تكلم وقال : الله يوفقك والوجه من الوجه ابيض لو ابوك قال لي هالكلام مازعلت والغصيبة ماارضاها عليك ولا على بنتي ..
سلمت على راسه واستأذنت وجيتكم وانا احس ان هم الدنيا كلها طاح من على قلبي ..
التفت مهند عليّ وابتسم : هاديوم حبيبتي ماعاد فيه شي يمنع ترجعين لي .. لو اني داري ان الأمور هينه كذا كان من زمان خطيت هالخطوة ولا انتظرت كل هالشهور بعيد عنك .
تكلمت خالتي قبلي : يمه روح الحين نام وبكرة من الفجر كلم ابوك لأن يمديه نام الحين .غيرت خالتي لهجتها وشددت على مهند قالت : وكلمه باسلوب حلو مهند تفاهم مع ابوك باحترام وبدون ماترفع صوتك .
وقف مهند وسلم على راس امه قال : الله يخليك لي بس .. انا من متى رفعت صوتي على ابوي ولا كلمته بدون احترام .. واذا بينت له ان كلامه مو عاجبني معناتها اسلوبي مو محترم ؟ .
: يامهند يايمه الموضوع هذا بالذات بيزعل ابوك انتبه انا بس انبهك وابيك تاخذ ابوك بالسياسة وانت شاطر تقدر تأثر عليه بكلامك ولاتنسى انه يحبك ويغليك .
: الله يخليكم لي بس . لاتشيلين هم مالك الا من يرضيه .
خرج مهند من عندي .. ونمت بعد نص ساعه تقريباً لأني تعبانه من الصباح .. .. فتحت عيني على الفجر شفت خالتي بجنبي على سرير ثاني ونايمه . .
قمت للحمام واخذت لي شور وبدلت ملابس وخرجت جلست وانا مغطية راسي بمنشفة كبيرة .. لأن خالتي منبهه عليّ مااتحمم الا اذا بحافظ على نفسي من البرودة لأنها مو كويسة للي في حالتي .
دق الباب وشفت عمي دخل .. قامت خالتي على صوته وصبحته بالخير ودخلت دورة المياه تغسل .
قال عمي : وشلونك ياديمه الله يعوضك خير يابنتي .
: الله يسلمك ياعمي ويعافيك .
: والله ياديمه ماذقت النوم مثل خلق ربي من يوم ماطلعتي من البيت .. خوفي على مهند نساني حتى نفسي . انا تورطت يابنتي بكلمتي مع الناس ولو دريت انكم بتتصالحون وترضين عليه ماسويت اللي سويته .. جيت ابي اكحلها واهني مهند وانسيه حبك ولقيتني اعميها وادخله الحزن بيدي . لكن
كان وجه عمي متغير مبين انه فعلاً ندمان وانا قاطعته خفت من منظره مااحب اشوفه منكسر ولا مستحي مني او منحرج قلت : لاتقول شي ياعمي انا مالمتك وعمري ماحملتك الذنب من حقك تخاف على ولدك وتحرص على سعادته . واللي صار امتحان من ربي لي انا ومهند اكثر شي والحمد لله على كل شي .
: الله يستر عليك يابنتي انا اشهد انك بنت اصول .
تكلمت خالتي : ابو مهند مهند كلمك .
قاطعها قال : مايحتاج يكلمني اللي كلمني سعود بنفسه وقال ان مهند جاه واعتذر منه وقال لي انه مافي خاطره علينا شي ومايحتاج ننحرج منه ...انا غلطت بحق ولدي وحق ديمه قبل .. التفت عمي علي وقال : انا ناوي اراضي ديمه ومهند على الله يرضون علي . سكت وكمل : اللي صار لك ياديمه كله باسبابي .. لكن الله يقدرني واعوضك وانا ابوك .
: الله يخليك لنا ياعمي وانا اذا عرفت قلب الانسان تصرفاته مااقيس عليها شي وانت قلبك كبير وطيب ياعمي وتأكد ان قلبي مافيه لك الا كل خير .
: يالله اسمحوا لي وراي شغل ..
: خذ راحتك ياعمي وتسلم على الزيارة .
خرجت خالتي مع عمي برا بتكلمه بعد مالبست عبايتها ..
رجعت لي بعد شوي قالت : عمك ندمان اكثر من مهند ياديمه بس يقول انه متورط ومافي يده حيله واليوم احس انه ارتاح .. سامحيه ياديمه
: خالتي تكفين لاتقولين هالكلام انا مسامحته ومافي قلبي شي على احد بس لاعاد تفتحون المواضيع هذي معاي الحمد لله ان ربي ستر .
افطرت مع خالتي من الفطور اللي ارسلته علينا سميرة مع عمي وصبت لي خالتي كاسة شاهي .. وأخذت كاستها وجلست على الكرسي اللي قدام سريري .
سمعت صوت عناد اخوي برا .. وسمعت مهند يسلم عليه وهو يرحب ويهلي فيه ...وقامت خالتي لبست عبايتها وتغطت ودخل عناد عندي وسلم علي ودخلت عمتي صالحه عندي سلمت علي وكانت جايبة لي اكل بس ماقدرت آكل لأني شبعانه ... وقالت لخالتي ام مهند تروح ترتاح في بيتها لأنها بتجلس معاي في المستشفى وبعدين بتاخذني لبيتها بالطايف .
كان مهند وعناد واقفين برا يسولفون وشكلهم يسمعونا لأن مهند تنحنح ودخل .. قال : اسمحي لي ياام عناد ديمه بتطلع معانا لبيتها
تكلم عناد اللي دخل وراه : المعذرة يابو بدر ..ديمه ماتدخل بيتك بعد مااهنتها وراسي يشم الهوا .
: تمهل ياابو عبدالله ترى الأمور تصلحت
: وشلون تصلحت ؟
: الموضوع هذاك انتهينا منه واعتذرت من الرجال اللي ابوي ورطني معاه .
: اعذرني ياابو بدر اللي سويتوه باختي مو سهل ومااقدر اخليها تروح معاك لين تثبت لي انك بتصون اختي وتحافظ عليها .
: ابشر مالك الا اللي يسرك .. وديمة تسوى الدنيا ومافيها عندي
تكلمت عمتي صالحه تهدي الوضع قالت : الليلة انا بجلس مع ديمه وبكرة تعالي ياام مهند ان كان ديمه بتطلع عندكم برجع للطايف بدري .. عيالي هناك تاركتهم مع عبدالوهاب والشغالات .. والا اخذتها معاي .
ردت عليها خالتي ام مهند : الله يسلمك ياام عناد ديمه بنتي وانا امها لاتخافين عليها وبتطلع لبيتها بإذن الله .
: هذا العشم ياام مهند بس ودي اجلس معاها عاد يوم جيت من بعيد
نادى مهند امه قال : خلينا نروح ونخلي ديمه تاخذ راحتها مع عمتها .
ونادى عناد يروح معاه لأن خالي ناصر مو في بيته وماعنده مكان يروح فيه .وحلف ان غدا عناد اليوم عنده .
جلست مع عمتي صالحه وقعدت تسولف لي عن عناد اللي صاروا الناس ينادونها بامه وعادل وحبها له وسديم ودلعها لها .. وحب عبدالوهاب لاخواني عسى الله يجازيهم الجنه
نمنا انا وعمتي لأني اصلاً تعبانه مانمت زين اليوم وعمتي جاية من الطايف مشوار طويل ..!
فتحت عيني العصر ماشفت عمتي ولا خالتي ام مهند بس شفت وجه اتوه فيه اعشق كل ملامحه عيونه ، حواجبه ، خشمه ، وفمه وشنبه الخفيف والمنسق بأناقه .. وذقنه الطويل .. ويدينه القويه .. وصدره وأكتاافه يااااه ياصدره قد ايش هو كبير وعميق .. اذا ضمني احسني اضيع فيه .. احسني صغيرة عليه .،
احب شعره الطويل وطريقة لبسه لثوبه وشماغه كل شي فيه يوحي برجولة طاغية احسه قوي بكل شي باسلوبه بصوته بقراراته بتحديه لي وبسيطرته على مشاعري وأحاسيسي .. قوي بحبه لي وتعلقه فيني وكلامه لي وطريقة تعامله معاي .
تأملنا بعض لدقايق طويلة ..أخيراً باس راسي وأنفاسه فيها لهفة وحب وشوق احس فيهم .. قال بحنية واضحة في صوته وكلامه وملامحه : صح النوم ياسعادة مهند .
ابتسمت وقلت له : صح بدنك ياروح ديمه . من متى وانت هنا ؟
: لي اكثر من نص ساعه .
: لااااااا ..... ليه ماصحيتني ؟
: اصحيك واخرب علي اللحظات اللي اتأمل فيها اجمل من خلق ربي بهدوء وانسجام .
: اجل انا اخرب عليك ؟
: لا بس تقطعين علي لحظات التأمل ..
دخل علينا خالي ناصر وهو يقول : هلا والله بالشيخ مهند اجل هذي سواة ؟
ضحك مهند بصوت عالي وراح له يسلم عليه وهو يقول: هلا والله باللي يقطع لحظات التأمل صدق .
ضحكت من كلامهم لأنهم اصحاب ويمونون على بعض بكل شي .
جاني خالي وسلم على راسي قال : وش لحظاته وتأمله اجل بغيت تذبح بنتي تقول تأمل وخرابيط ..؟ الحمد لله على سلامتك ياديوم .. هذا اللي استفدناه من هالمهند يوم شافك . ليتني مخبيك عنه لين تولدين .
انحرجت من خالي قلت : هههههههههههههههههههههه الله يسلمك . خااااالي لاتعيد هالكلام خلاص اسكت بعدين كل شي مقدر ومكتوب .
: اجل ضحك عليك بهالكلمتين وقال لك مقدر ومكتوب ؟
: هههههههههههههههههههههههههههههه
مسكه مهند من يده وهو يضحك قال : هههههههههههههههههههههه وخر عن حرمتي لاتغير افكارها ماصدقت انها ترجع لي .
طالع خالي فيه وقال بجديه : من قال انها بترجع معاك ؟
: اوووه ياناصر انحلت المسأله ورحت كلمت سعود والحمد لله تفهم وضعي .. طالعني مهند وكمل : عرف حبي لديومتي .. وعرف اني مااقدر اخلي احد يدخل حياتي غيرها .
: اها اجل الله يبارك لكم بس احذر يامهند تأذي ديمه بعد كذا . ترى ماعاد بنسمح لك .
: اقول فكني منك انت ونصايحك .. بعدين وش تبي انت ومخلي العزا وقاطع كل هالمشوار .
: والله عاد هذي ديمه مو أي احد اترك الدنيا كلها واجيها .
قلت انا : الله يخليك لي ياخالي وعساني ماانحرم منك .
ضحك مهند وقال وهو عند الباب بيطلع : اجل كل هذي دعوة لناصر وانا ولا حتى نص دعوة . قطع كلامه وقال : هلا والله بعناد ادخل مافيه الا ناصر .
دخل عناد علي وسلم على خالي وجلسوا يسولفون .. بعدين قام خالي وقال لعناد يروح معاه للبيت .. عشان عمتي صالحه وخالتي ام مهند هنا ومستحي يطول عندي ويحرجهم اكثر لأنه شافهم جالسات برا قبل مايدخل .
اول ماطلع خالي دخلوا عندي عمتي وخالتي وكملوا سواليف مع بعض وانا رحت ابدل والبس وجلست آكل من الأكل اللي جابه مهند لي من البيت .
سمعنا صوت خالي ماجد عند الباب وتغطوا عمتي وخالتي ودخل علي معاه باقة ورد كبيرة وهو يضحك واقف على راسي . قال : السلام عليكم .
: هههههههههههههههه هلا والله عليكم السلام ورحمة الله وبركاته
: كيف ديمتنا الغالية ..
: الحمد لله بخير كيفك انت وكيف صحتك
: بخير اذا انتي بخير .. الحمد لله على سلامتك . واللي راح ياديوم لاتتحسفين عليه الجاي افضل وأحسن ان شاء الله .
: الله يسلمك ياخالي والحمد لله على كل شي .
مسك اذني بشويش قال : تعرفين تخبين هاه .؟
: ههههههههههههه غصب ياخالي نتقي المشاكل .
دخلوا خالي سامي وخالتي فادية بعد خالي ماجد بربع ساعه كانوا جايين على سيارة لوحدهم لأن خالي ماجد بيرجع عناد وعمتي معاه مايبغاهم يرجعون مع السواق ..
اخوالي عادي ماكانوا زعلانين مني عشان سالفة الحمل اللي ماقلتها لاحد بس خالتي فادية زعلانه وكل شوي تقول طيب ياديمه اجل هدى اقرب مني وانا اللي حسبتني اقرب الناس لك ومثل امك .. اعتذرت منها ان نفسيتي كانت تعبانه وماكنت ابغى الموضوع ينتشر . وجلست اشرح لها لو كنت قلت لها وعرف احد كيف بيتصرفون الناس وبيلحون اني ارجع غصب ووووو الين اقنعتها ..
خرجت لبيت خالي ناصر مع خالتي فادية بعد ماترجيت مهند اروح لبيت خالي وراح ارجع لبيتي وانا مو تعبانه احسن .. وقعدت احمسه اني راح ارجع له وشكلي ونفسيتي احسن وكل شوي اقول له ارجع لك ونعيش شهر عسل من جديد . آخر شي وافق وقال اني ضحكت عليه بكلمتين وصدقني بس ماله الا الصبر .
جات هدى مع خالي اللي رجع لهم في المدينه بعد يومين من طلعت من المستشفى ورجعت خالتي فادية لبيتها وأخوالي وعمتي وعناد رجعوا للطايف .
مهند يزورني شبه يومي .. وانا اخذت لي غرفة تحت عشان مااقدر انزل واطلع وكمان عشان مهند اذا جا مايطلع على فوق خاصة ان هدى موجوده .
خالتي ام مهند باستمرار تزورني والبنات يجون احيانا معاها واحيانا تجي لوحدها
خالتي فادية واخوالي كل ماحصلوا فرصة يجون يسهرون معانا .. !
بصراحة قضيت ايام في بيت خالي من اجمل الأيام .. ويارب تكون الأيام الجاية احلى ..
اكثر شي يسعدني قربي من خالي ناصر وشوفة مهند وحبه لي .. عسى الله لايحرمني منهم ..
اليوم كملت اربعين يوم من بعد ولادتي .. دخل علي خالي وشنطتي جاهزة قال :زوجك برا ينتظر مايبي يدخل يقول خلها تطلع لي
: حاضر يالله خارجه
ناديت الشغالات يشيلون الشنط حقتي لأني نزلت السوق قبل ايام وعلى قولة هدى كأني مجهزة لزواجي من جديد ... من حقي اجهز مرة ثانية لأن ايامي الحلوة اللي قضيتها بالسنة اللي مرت بزواجي ماعرفت فيها طعم السعاده الا كم يوم وتنعد على الأصابع ...
كنت مغطيه وجهي وركبت مع مهند بالسيارة .. عاد هو مو مصدق اني برجع معاه للبيت . ومن فرحته اللي باينه عليه قال : نروح للبيت ولا نسافر لنا كم يوم بعيد عن الناس والازعاج ..
قلت له : استنى كم يوم بعدين نقرر برواق خاصة ان ماعندك اجازات هذي الفترة .
اول مادخلت لقيت سميرة بوجهي وريم ورانيا اللي جات على طول وحضنتني
جلست معاهم بالصالة وقمت انزل عبايتي .. امس كنت مغيرة شكلي بالمرة من زمان ماصبغت شعري .. ولا رتبته وقصيته ومهند كان يشوفني وانا ببيت خالي ايام نفاسي بالجلابية ولا قمصان عادية وبيجامات ساترة ماكنت اتزين بس امشط شعري والفه وامسكه بشباصه .. اهم شي عندي اني اكون مرتبه وشياكه لمن اقابله .
البارحه لمن عرفت من مهند انه بيجي ياخذني رحت للمشغل وصبغت شعري بني ودخلت عليه احمر بورغندي وأطرافه لونتها ببنفسجي وموف طالع جنان بصراحه ...طبعاً الوان هادية مو مخبصة وصارخه .. وقصيته قصة روعه مناسبة لشكلي .
كنت حاطه مكياج ومثقلته شوي ولابسه تنورة قصيرة لونها اسود وبلوزة حرير لونها تركواز وفيها فصوص كريستاليه وبدون اكمام وحلقها واسع ...
ولابسه عليها بوت طويل وكمان اكسسوارات اسود وتركواز
دخل مهند بعد مانزل الشنط وأعطاها الشغالات يودونها على فوق ويرتبونها . اول ماشافني حسيته تنح .. وقف يطالعني بصراحه مرة استحيت من اهله خفت البنات ينتبهون له .. بلع ريقه بعدين قال : بتجلسين هنا ؟
انا ارتبكت اكثر منه وقلبي صار يدق اكثر قلت : ها ..؟ ايوه تعال اجلس معانا ... ابتسمت له وهو متجمد .. بعدين اخذ جواله ودق على رانيا اللي طلعت فوق قال : هاتي الكميرا حقتك بسرعه وتعالي بنتصور بمناسبة رجوع ديمه للبيت .
قرب مني وجلس بجنبي قال : تعبان انا بتقهوى واطلع فوق
: ممممم بتنام
: ايوه
: مهند شو تنام احنا العصر
: ها..؟
تكلمت خالتي اللي دخلت علينا والشغالة وراها بالقهوة والحلا والمعمول وهي تضحك : يمه تقهووا بعدين خذوا راحتكم
سمعنا صوت عمي قال مهند : غطي صدرك ويدينك لااشوفك كذا قدام ابوي
: حاضر معايه شال جايبته عشان اذا عمي جا احطه علي
خرجت الشال ولفيته على اكتافي وصدري وسلم عليّ عمي وجلس يتقهوى معانا
وحلف عمي الا يسوي لي عشا ويجمع اخواته وخالات مهند .. فتحت فمي وانا اطالع بمهند
: لا يابنتي محد بمأذيك تطمني
: بتجي ..؟
: ايه لازم اعزمها مهما كان هذي اختي وتطمني ماراح يغلطون عليك وهالمرة انا اللي بوقف في وجيههم .
مارديت على عمي بس خفت من نورة وقلقت لأنها ماتستحي من احد ولا تخاف من شي .
جابت رانيا الكميرة وصورتنا على طول بعد ماقام عمي .. ناداها مهند قال : صورينا كذا .. حط يده من وراي وهو جالس بجنبي وسحبني ناحيته وانا اضحك ومنحرجه من رانيا وريم وخالتي وسميرة اللي كانت تعلق علينا وهو يسكتها .
بعد المغرب جلست انا والبنات ومهند ارسله عمي لمشوار عشان العشا .. كنت خايفه ومن جد افكر اروح لغرفتي اتخبى لحد ماتروح نورة وبنتها
اذن العشا وكانت نورة اول الحاضرين بس كانت لوحدها فاطمة مو معاها ..وجات مزون خالة مهند وعمته منيرة وكل وحده جابت لي هدية واشوا نورة ماكلمتني ووالغريب انها سلمت علي بس انا مااحتكيت فيها ابداً .. رحت عند البنات مستغربة من نورة وحالها قالت رانيا : زوجها حلف ليطلقها ان جاه عمي مهند يشتكي انها تكلمت عليك .... ودق على عمي مهند وقال له اذا نورة ولا بنتها تكلموا لزوجتك دق علي .. وعمي مهند ماصدق قعد يقوله جزاك الله خير والله يعطيك العافيه ..
خبطتني ريم على كتفي قالت : كل هذا يحبك وخايف عليك .
: هههههههههههههههه الله يخليه لي بسم الله من عينك اذكري الله
: ماشاء الله تبارك الله الله لايغير عليكم ويستر عليكم ترى طفشنا من دلعكم على بعض استقروا خلونا نستقر احنا كمان .
: هههههههههههههه لا خلاص ان شاء الله ماعاد فيه مشاكل
: يااااااااااااارب .. قالته رانيا وهي ترفع يدينها تدعي
سألت رانيا : كيف عرف زوج عمتكم عن عمايلها معاي .
: يقول سمعتها تكلم بنتها وبغيت اذبحهن فشلني فيكم .
: سبحان الله يمهل ولا يهمل .. كشفهم قدام الانسان اللي يخافون منه .
قالت ريم : عاد زوج عمتي نورة شديد وياما ضرب عمتي ومشاها على كيفه ومايعرف يتعامل مع عياله الا بالضرب والقسوة يعني يخرررع وربي ارسله على عمتي نورة عشان يأدبها.
: ياربي لك الحمد نورة وفاطمة وافتكينا منهم والزفت الثانيه انقلعت سيرتها وارتحنا ياربي استر لاينغص علينا شي .
قالت رانيا بحمااس : آمين يارب نبغى نشوف ديمه ومهند مبسوطين ومايفرق بينهم شي .
ضحكت انا وقلت لهم خلاص فكونا من السيرة هذي ماابغى اتكدر اليوم .
تعشينا وبعد العشا على طول كان مهند يدق على جوالي : بطلع بعد عشر دقايق الاقيك فوق
: هههههههههههههههههههه حبيبي لسه بدري .
: لاوالله ؟.. ديوم عجلي بلا دلع .
مسكت ضحكتي وقلت بدلع : ممممممممم رجعنا يامهند خلاص زعلت
: لا واللي يخليك الا زعلك مااقدر عليه .. بس جد ديومتي دقايق وجاي وراك
: اوكي حبيبي
طلعت فوق لجناحنا .. شفت المكان غريب علي ..كأنه مو بيتي ولا المكان اللي تركته قبل سته شهور .. الأرض كلها شموع حمرا وريحتها تجنن من الباب الين غرفتي والسرير ..الورود الطبيعيه منثورة على الأرض وريحتها معبية المكان . وفيه بوكيه ورد حمرا كبيرة وعلبه هدية مغلفة .. كان جو جناحي رومنسي كثير .. وشاعري وخيالي .. مااقدر اوصف لكم روعته .. تمنيت اني انا اللي اسوي لمهند هذي الحركات بس هو دايماً يغلبني .. طالعت الجدران كانت كلها صورنا .. لوحة كبيرة في الواجهه وهذي وحدة من اللي رسمتهم لي انا وياه . . والباقي صورنا لمن كنا في ابها .. ومكبر صورة زواجنا وحاطها في الغرفة . ياعمري يامهند اثريه يجهز لي المكان ومتحمس لرجعتي بأكثر مما توقعت ... بسرعة لبست قميص نوم احمر قصير لنص الفخذ حرير وأطرافه دانتيل . فتحت شعري وعدلت مكياجي وحطيت روج احمر ورشيت علي من عطري اللي يحبه مهند بعد ماحطيت على جسمي بدي لوشن ينعم البشرة ويخلي العطر يمسك في الجسم اكثر .. وشغلت أغنية اليسا مليون احبك
دخل مهند علي ولمن شافني ووقف شوية وابتسم لي بعدين قرب مني وضمني لصدره ..كنت احس اني مو بالدنيا .. كنت بعالم حبيبي الخاص
الجو رومانسي بشكل رهيب ..
مليون احبك حبيبي يا روحي وعمري انا
عايشا بحبك ليالي بحبك يا كل المنى
مليون احبك حبيبي يا روحي وعمري انا
عايشا بحبك ليالي بحبك يا كل المنى
انا حبيت في عينيك الدنيا
شوفت ليالي جميله معاك
واتمنيت ما تفوت ولا سانيا
غير يا حبيبي ماكون واياك
مليون احبك حبيبي يا روحي وعمري انا
عايشا بحبك ليالي بحبك يا كل المنى
ولاقيتني بدوب من نظرة شوء
بعيونك ليه يا غالي
خليتني احب بالحب أوعد
نجوم لياليه ليالي .
من أول يوم أبلتني عينيك
شاغلوني وشغلوا عينيّه
دورت عليك في عيون الناس
ولاقيتك ساكن فيّه
مليون احبك حبيبي ..
مااعتقد فيه احد اسعد مني لمن اكون بحضنه .. شالني ونزلني على السرير واعطاني الهدية .. فتحتها واو كان عقد الماس يجنن مكتوب فيه (ديمة مهند ) وفيه علبه ثانية صغيرة اول مافتحتها لقيت ورقتين ..تذكرتين سفر لفرنسا .
حسيتني مخنوقه من تصرفات مهند معاي وحبه لي مااتحمل كل هالحب والاهتمام قالت وعيوني فيها دموع : كثير يامهند .
حط يده على خدي ورفع راسي وقرب مني قال : انتي اللي كثيرة علي . احبك ياديمه . احبك ومجنون فيك ..
ابتسمت له احس ماعندي تعبير ماعندي كلام يوصف احساسي لمهند قلت بهمس : مليون احبك حبيبي يا روحي وعمري انا عايشا بحبك ليالي بحبك يا كل المنى .
ضمني على صدره قال وهو مغمض عيونه : غنيها لي ..
رديت عليه بهمس وانا اضحك : هههههههههههههههههه عشان تشرد من صوتي .
: لا عشان اعيش واستمتع بهدية ربي علي .يالله ديوم غنيها لاتعاندين
غنيتها له وانا على صدره . مليون احبك حبيبي يا روحي وعمري انا عايشا بحبك ليالي بحبك يا كل المنى .. انا حبيت في عينيك الدنيا شوفت ليالي جميله معاك واتمنيت ما تفوت ولا سانيا
غير يا حبيبي ماكون واياك
سكت وهو ساكن وساكت وأحسه مندمج معاي بالرغم اني صوتي اذا غنيت مو حلو وأخرب الأغنية بس مهند مسلطن قال : كملي ليه وقفتي حرام عليك . صوتك يدوخ ويذوب ويجنن .
ضحكت وقلت : لو صوتي حلو كملت بس خفت ازعجك ... ممممممم حبيبي شو رايك نروح لسوريا نقضي فيها كم يوم بدل فرنسا ؟
رفع راسي وطالعني : لا لا لا لو نروح لسوريا كل شوي بتقولين بنروح لجدتي وبنسهر ونطلع معاهم انا ابيك لي لوحدي اباخذك عن الدنيا كلها لي انا وبس . بعدين التذاكر هدية ابوي علينا . مو من عندي .
:ههههههههههههههههههههههه زي ماتبغى ياروحي .. انا حلالك وعلى كيفك اللي تبغاه يصير ماراح اعارضك .
قضيت مع مهند اسبوع يشبه الحلم في بيتنا بعدين سافرنا لفرنسا .. هالمرة عكس سفرتنا هذيك .. ماندخل الفندق الا اذا نبغى ننام ومن الصباح نخرج ونرجع آخر الليل تعبانين وننام على طول .
في الشانزليزيه كنا نمشي مع الزحمة .. وانا بجد قرفانه على قد ماكان هالمكان حلم اني ازروه الا اني الحين قرفانه منه .. أي احد يروح لفرنسا لازم يزوره وزحمة وأكثر اللي هنا عرب .
مسكت مهند بيده قلت : تعال بعد عن الزحمة اخاف تجي بنت تتلزق فيك ..
سمعت ضحكة مهند بصوت عالي وانا اطالعه باستغراب وابتسم هذا اشفيه انهبل .. العالم قعدت تطالعنا .. انتبه لنفسه قال : اخيراً ياديوم شفتك تغارين علي ومعصبه من البنات ههههههههههههههههههههههههههه
قلت له وانه اغمض بعيوني وارفع حاجبي : اغار طبعاً مو زوجي وحبيبي . يالله مهند امش والله احسهم يغيضوني اللي يطالعونك .
ضحك مهند مني وضم على يدي بقوة قال : يالله نروح مكان ثاني لعيون ديوم .
اضطرينا نرجع بدري عشان زواج عمي ياسر وريم .
رحت انا وريم للسوق اكثر من عشرين مرة وأحيانا ننزل في اليوم مرتين .. الله يرحم خالتي فادية وتسوقها مع ريم .. خالتي صحيح تاخذ اشياء كثيرة وبأسعار غالية لكن ريم مع انها تاخذ اشياء كثيرة والسعر مايهمها الا انها من النوع اللي مايعجبها شي بسهولة . وديتها اكبر مراكز وأسواق في جدة . آخر شي اشتريت لي فستان من تصاميم زهير مراد ناعم مرة لونه ذهبي وموديله ناعم وهادي واشتريت له اكسسوارات وجزمة وشنطة صغيرة ورجعنا للبيت وانا كل مرة اقول لريم هذي آخر مرة انزل معاك واليوم الثاني تكسر خاطري وانزل معاها .
ليلة الزواج في القاعه وبعد مازفينا عمي وريم دقيت على مهند يجي يرجعنا قال امي ورانيا وسميرة والشغالات بيجي ياخذهم السواق وانتي اطلعي لي بترجعين معاي .
خرجت له بعد ماقلت لخالتي على كلام مهند لأن خالتي تقول تعبانه وبترجع بدري ومهند بيتأخر شويه .. راحوا كلهم ماباقي الا انا وبعض الناس من اهل عمي وقرايبنا اللي جايين من ابها ..
شفت نورة وبنتها وبسرعه رحت لبست عبايتي وسلمت على اهل عماني وعمتي صالحه .. جات نورة عندي قالت : ديمه تعالي ابي اكلمك .
طالعت بعمتي وانا فيني خوف الدنيا قلت : لوسمحتي مشاكل معاك ماابغى
شفتها غير هالمرة قالت : يابنت الحلال ماجيت اسوي مشاكل ابي اعتذر منك . وشفت فاطمة اللي طول الليل لوحدها وماقربت منا الا لمن سلمت على البنات وانا طنشتها . حتى ساميه طول الليل تسب فيها وانا اسكتها . قلت : خلاص ياام فهد ماصار شي وقلبي مافيه عليكم شي بس تأكدي انه لو صار منكم شي ماراح اسكت هالمرة .
قالت فاطمة : سامحينا ياديمه ربي عاقبني على عمايلي فيك وعطاني زوج عنده حرمه ماخلتني اتهنى بحياتي من يوم ماتزوجته ..
حسيت بغصة في حلقي لأن فاطمة فعلاً حزينه وندمانه قلت لها : الله يسامحكم وترى قلبي مافيه شي عليكم .. سكت ثم كملت حاولي يافاطمة تكسبين زوجك باسلوب حلو وبعدي عن زوجته لاتحتكين فيها لأن محد يلومها ماخذه زوجها انتي ..
: هزت راسها وجات سلمت علي ورجعت ودموعها على خدها . ولحقتها امها بدون ماتتكلم .
رجعت لعمتي وحاولت فيها تزورني بكرة بس مارضت قالت ان عبدالوهاب معاها وبيرجعون بكرة للطايف من بدري .
دق مهند عليّ قال اخرجي لي برا انتظرك .. وخرجت بسرعه .. رحنا اخذنا كوفي وسولف لي عن عمي كيف كان مرتبك ويطالع الساعه ووكل شوي يقول يالله باخذ زوجتي وامشي وشو له انا جالس هنا ..
طالعني وهو يضحك بخبث قال : وش رايك ازعج ياسر الحين .؟
: لا مهند حرام عليك ترى بيزعل منك .
: لا ماراح يزعل اعرفه .. بس بحرج ريم المشكله .
تخيلت ريم منحرجه من مهند وضحكت قال : دقي عليها بالله بشوف ردة فعلها واحنا نزعجهم .
: ههههههههههههههههههههههههههههههههه يالله بس اذا قفلوا في وجيهنا انت المسؤول .
دق على عمي وانا دقيت على ريم وعلى طول سمعت مهند يضحك يقول وش اخبارك وكيفك ووشلون اختي عسى مازعلتها بشي .. وضحك مهند بصوت عالي ..
أخيراً ردت علي ريم قلت لها : كيفك ريومه مرة وحشتيني
قالت بصوت مايطلع يادوب اسمعه : بخير حتى انا بس مااقدر اكلمك مرة مستحيه .
: حياتي ريومه ترى جايينكم بنسهر معاكم انا ومهندي .
: شو ؟ ديمه من جد ؟ سكتت بعدين قالت : ديمه بقفل في وجهك ولا اقولك خذي عمك كلميه .
طالعت مهند لقيته يضحك ومنزل جواله خلص المكالمه .. كلمني عمي قال : ها انتي بعد خير .؟ احد دق عليكم ليلة زواجكم ولاازعجكم
: ههههههههههههههههههههههههههههه عمي شو فيك اشتقنا لكم قلنا نزوركم .
: اقول يالله بلا هبل
قفل في وجهي وانا ميته ضحك ومهند يضحك بصوت عالي قال : عصب وتكلم علي وانا استفزيته ثم قفل في وجهي .
: هههههههههههههههههههههههههههههههه مو قلت لك بيقفلون .
طالعني قال : الله يسعدهم ويهنيهم .. عاد حرام نزعجهم احنا محد ازعجنا هذيك الليلة .
: لاتذكرني ..!
حسيت مهند هالمرة جدي ووقف ضحك قال : على قد ماقهرتك قهرتيني بس الأهم اللي وصلنا له الحين .
: اوووه مهند خلاص حبيبي فكنا من أي شي ينكد علينا .. انا اعترف كنت وحده غبيه مافهمتك وعاندتك وتحديتك زي ماتحديتني بس .. غيرت لهجتي لدلع وكملت .. لوعرفت انك تحبني هالقد كان استسلمت وحبيتك من اول مرة شفتك فيها .
: وه ياناس على اللي بتذبحني بكلامها ودلعها .
: هههههههههههههه فين رايحين الحين .؟
: راجعين للبيت بس مغير الطريق .
: اها عشان كذا مخربطه ماعرفت فين رايحين .
: خلاص دقايق ونوصل بيتنا ان شاء الله .
فعلاً وصلنا بعد دقايق وطلعنا فوق لجناحنا اول مادخلت نزلت عبايتي وصفر مهند لمن شافني .. ضحكت على حركته قلت : شو ؟ مهند هههههههههههههههههههه
: مبهووووور يانااااس .
: ههههههههههههههههههه اول مرة تشوف وحدة لابسه فستان سهرة وحاطة ميك اب ثقيل ..؟
: هههههههههههههههههههههههه لا ياعمري بس اول مرة اشوف وحده تبهرني بالشكل هذا .. ؟ ممممممممم تدرين تشبهين من ؟
رفعت نظري فوق مسوية محتارة قلت : مين لاتقول باريس هيلتون ولا نيكول كيدمن ولا جنيفر لوبز ..
: هههههههههههههههههه لا لا لا .. انتي احلى من كل هذولي ..
جيته امشي بدلع وانا اتمايل بمشيتي وفتحت ازارير ثوبه قلت : اجل اشبه مين حبيبي ؟
: تشبهين خالتك سمر نسخه منها بس انتي افتح شوية وانحف منها و ممممم شعرك اطول اما الباقي نسخه
فتحت عيوني بقوة وضربته على صدره بشويش قلت : اثريك قاعد معاها وتدقق فيها وتطلع الفروق بيني وبينها طيب يامهند اوريك اذا خليتك تجلس معاها مااكون ديمه .
: هههههههههه يابعد قلبي ياللي تغار علي .. سمر اعتبرها اختي ، خالتي .. عمتي ..ولو تبين امي ولا جدتي هههههههههههههه ... بعدين انتي المفروض ماتغارين اولاً لأنك اجمل ماخلق ربي في نظري .. ثانياً انا احبك يابنت افهمي احببببببك .. قرب مني وشالني قال : ماراح انزلك الين توعديني ماتغارين علي من احد .
: هههههههههههههههههههه لاتنزلني لأني راح اغار عليك الين اموت .
قعد يلف فيني ويضحك قال : هههههههههههههههههههههههههههه خلاص ماراح انزلك .
: ههههههههههههه انت اللي بتتعب ترى انا كذا مرتاحه ..
رماني على السرير وهو يضحك ورمى نفسه بجنبي وحضني على صدره ..
: احبك ياديمه احبك ومجنون فيك .
: وانا اعشقك ياعمر ديمه عسى الله يخليك لي بس .
بعد اربعه شهور من زواج عمي ياسر وريم .. نايمه في جناحنا وتحديداً بغرفتي صحيت على صوت مهند
: ديمه اصحي يالله مابتنزلين تفطرين معاي .. شو هالكسل .. ؟
: هممم مهند فيني نوم والله .. ماادري شو فيني من امس احسني دايخه ومالي نفس اقوم من السرير او آكل شي .
: تعبانه ..؟ فيك شي .؟
غطيت وجهي باللحاف ولفيت على الجهه الثانيه قلت : ماادري .
جلس مهند بجنبي قال : طيب قومي غسلي وانزلي افطري معاي ولاتبيني افطر لوحدي اليوم .
شلت الغطا عن وجهي وطالعته ابتسمت وقمت بروح اغسل وانزل افطر معاه عاد اش اسوي دلعته من زمان مايفطر الا انا معاه قبل مايروح للمستشفى .. بس لاااا مرة دايخه وتعبانه مسكني مهند ووداني عند الحمام وانا رجعت كل اللي بمعدتي ياربي شو صار لي ..
رجعت مع مهند للسرير قال : يمكن برد جايك بس جهزي بعد ساعتين برجع آخذك اوديك للمستشفى اشوف ايش صار لك ..؟
: اوكي بس الحين بنام اذا خرجت من المستشفى دق علي البس .
رجع مهند بعد ساعتين ووداني المستشفى وسويت تحاليل ورجعت اجلس بالاستراحة استنى النتيجه وهو راح مع ا لممرضة
بعد نص ساعه ناداني وخرجت له وهو يبتسم ومستانس وقرب مني وهمس لي : مبروك ياعمري
: شو ..؟ حامل ..؟
: حامل ياعمري .. وبتجيبين ولدي بس هالمرة بندلعه وبنراعيه انا وانتي مع بعض .
: ههههههههههه ان شاء الله حبيبي . الله لايفرقنا .
:آمين يارب .
رجعنا للبيت وهو اول مادخل قعد يصارخ .
: يمه يمه يمه
وقفت خالتي على الدرج فوق قالت : هلا يمه فيه شي ؟
: ههههههههههههههههه انتي تعالي وبعدين تعرفين .
جات خالتي من فوق تجري واستغربت اني بعبايتي ومهند ماسكني
: خير يمه وش فيكم تصارخون ؟ ديمه فيها شي ؟
: خير ياام مهند تعال اجلسي .. الا وين رانيا ..؟
: بسم الله عليك رانيا في المدرسة .. مهند وش فيك يمه ؟
: اوووه نسيت والله
رديت وانا اضحك : مهند هههههههههههههههههههههههههه شو فيك ؟
تكلمت خالتي : مهند ديمه وش صاير ؟
: يمه ديمه حااااااامل وفي الشهر الثاني ..
: ههههههههههههههههههههه والله ؟ عساه مبروك الله يتمم حملك على خير ويرزقكم بالضنا الصالح ؟ ويستر عليه عاد هالمرة اهتمي فيه ومالك منا الا نراعيك ونداريك .
رديت عليها : الله يخليك لي ياخالتي ولايحرمني منكم
ضحك مهند وقال : نفسي تعدي هالثمانية شهور بسرعه ابي اشيل ولدنا واشوفه يملا علينا البيت .. بس والله خايف على ديمه من الحمل وتعبه
قلت وانا ابتسم : مهند شوفيك مو اول مرة احمل .
: لاياعمري هذاك مااعترف فيه يكفي اني دريت عنه اليوم وبكره مات .
: الله يستر على هذا
: بيستر عليه ربي اذا فكنا من المشاكل .. والمشاكل والقلق خلاص انتهوا
قالت خالتي : الله يعينك على الوحم ياديمه
: يوووه ياخالتي وحامي الأول هدني والله يستر لايصير هذا مثله .
: لا ان شاء الله هذا يكون هين ترى الأول عادة يصير اصعب شي واللي بعده يكونون اهون .
وقف مهند قال : انا برجع للمستشفى عندي مرضى اليوم وانتي ياديمه اهتمي في نفسك و في ولدي ممممممممم خذي من الدوا اللي اعطتك اياه الدكتورة الحين وافطري اوكي ... التفت على امه قبل ارد عليه قال : يمه تكفين اهتمي فيها .
ردت خالتي وهي تضحك : يمه روح لدوامك لاتشيل همها ديمه بنتي وفي عيوني .
حطيت يدي على يد خالتي قلت : تسلمين ياخاله الله يخليك لنا
خرج مهند وانا طلعت فوق قلت لخالتي بنزل عبايتي وابدل ملابسي وارجع افطر ..
اول ماعرفت رانيا جات تجري بعبايتها وسلمت علي وباركت لي قلت لها : ان قال لك .
: عمي مهند قابلته عند الباب قال روحي باركي لديمه بتجيب لك ولد عم .
: هههههههههههههههه .بدلي طيب وتعالي نتغدى طالما عمك جا .
: حاضر دقايق بس واجيكم .
..
اليوم اكمل شهري السادس ومهند رافض اني اسأل عن نوع الجنين يقول نبغاه مفاجأة . عدت مرحلة الوحم ولله الحمد بعد عذاب ..والحين ثقيلة بشكل يضحك .. من كثر اهتمام مهند فيني صاير هو اللي يأكلني بنفسه .. وكل شوي يحلف علي اني آكل .. تمنيت اني عند خالي ناصر ارحم منه بكثير . صحيح خالي يزن على راسي عشان آكل بس مو زي مهند اللي يجبرني ويغصبني يقول مافيه شبعانه ولا مو مشتهيه .. واذا قلت ماابغى قال ولدي يبغى .. صرت مربعه وكل من شافني علق على جسمي بدءاً بأخوالي وهدى وخالتي فادية وانتهاءً بريم اللي لها اربعه شهور في حملها ..
ناداني مهند ارد على التلفون وجيت اخذت السماعه منه : الو
: السلام عليكم
: وعليكم السلام
: الأخت ديمه عبدالله
: ايوه معاك ديمه
: انا ابتسام اسعد من الجامعه .. تم ترشيحك معيده بقسم علم الاجتماع وكمان حبيت ابارك لك قبولك في مرحلة الدكتوراة .
: الله يبارك فيك ويبشرك وتسلمين اخت ابتسام ماقصرتي على الخبر
: اخت ديمه ياليت تجين للجامعه بأقرب وقت .
: بإذن الله يوم السبت راح اجي للجامعه .
: ياليت تمرين علي في البدايه .
: ولا يهمك راح امر عليك .
قفلت منها واخذت جوالي على طول قال مهند : خير .؟
: ها ..؟ خير ان شاء الله رشحوني للمرة الثالثة اصير معيدة بس هذا مو المهم الأهم يامهند اني انقبلت لمرحلة الدكتوراه .
: ممممم والله ..؟ مبروك ياعمري بس كيف بتروحين السبت وانتي هذا حالك ..؟
: عادي حبيبي فيه بنات يدرسون وهن حوامل ماصار لهن شي .
: خلاص اللي تشوفينه بس ترى خايف عليك . خاصة انك في مرحلة خطيرة لازم تنتبهين لنفسك اكثر .
: الله يستر مهند لاتخوفني .
دقيت على خالي وبشرته بس قال لي نفس كلام مهند وقال لي انتظر لحد مااولد والدراسه ماراح تطير ولا راح اخسر شي لو انتظرت .
وافقتهم وفوضت امري لله لعله كاتب لي الأفضل .
على نهاية شهري التاسع كنت احس بمغص وآلام بأسفل بطني بس كل مااروح للمستشفى تقول الدكتورة لسه بدري ..
اليوم ظهري بينكسر وبطني احسه بيتشقق من الألم .. اخذت جوالي ودقيت على مهند وانا ابكي : تكفى مهند الحقني ماعاد فيني اتحمل
: ياعمري باقي لك يومين على موعد ولادتك يمكن هذي آلام طبيعيه
: مهند مو طبيعيه والله الله يخليك تعال ودني للمستشفى .
مر علي ربع ساعه يادوب لبست فيهم وجا مهند كنت بنزل بس ماعاد فيني امشي وشالني مهند لحد ماوصلنا السيارة اللي دخلها داخل البيت .. ركبت معاه ووداني للمستشفى اللي يشتغل فيها ..
صدق الولادة موت وحياة .. الحمد لله انتهت المعاناة بعملية قيصرية وتكللت بالنجاح ووجه احلى مخلوق في الوجود ..
شاله مهند على يده وهو يقول : بسم الله الرحمن الرحيم .. ديمه عليه شبه منك وفيه مني .
قال خالي ناصر اللي من اول ماعرف اني بالمساشفى وهو معاي : للحين مابينت ملامحه اصبر عليه فترة ويعلمكم هو يشبه لمن .
قرب مهند مني قال : ها ديوم وش نسميه ..؟ قلت بدون تردد مهند تكفي بسميه ناصر ولا عبدالله
تدخل خالي على طول قال : ناصر لا اذا بتسمينه على اسم احد سميه عبدالله ولا بدر . ولا اختاروا له اسم حلو مو شرط على اسم فلان ولا فلان .
استحيت اتكلم لمن قال بدر يعني على اسم ابو مهند قلت : خلاص على كيف مهند الاسم اللي يعجبه يسميه ..
طالعني مهند وباس راسي قال : بيجي ناصر وبيجي بدر ان شاء الله ... سميناه عبدالله وان شاء الله انه عبداً لله صالح وبار وتقي ..
ابتسمت من قلبي بجد فرحت لمن سميت على اسم ابوي الله يرحمه .. ياليت ولدي يطلع فيه شي من ابوي برجولته ولا كرمه ولا طيبه وطيبة قلبه .. يارب ارحم ابوي رحمة واسعه واجعل مثواه جنان الخلد ..
خرجت من المستشفى لبيتي لأن مهند رفض اروح عند خالي وطلب مني مااجادله قال ابي ولدي عندي 24 ساعه .. وماحبيت ارده لأني اكيد بلاقي عند خالتي ومهند ورنو وعمي كل اهتمام ..
بعد اسبوعين سوينا التمايم حقت عبدالله في استراحة خالي ناصر .. تذكرت ملكتي هي آخر حفلة سويناها فيها .. سبحان الله اليوم انا اسعد الموجودين عكس هذيك الليلة كنت اتعس الموجودين .
جات لمى صديقة عمري ورفيقتي من صغري سهرنا كلنا اهلها واهلي اللي هم بيت خالي ناصر وبيت عمي بدر .. حضروا اخوالي كلهم من الطايف وعمتي صالحة واخواني عناد وعادل وسديم . قرب الفجر وراحت خالتي مع عمي وام لمى وام هدى وجلسنا انا وريم ولمى وخاتي فادية وهدى وحنان وسميرة ورنو اللي طول الوقت حاطه عبودي في حضنها .. ولا توديه عند مهند كل ماقال بيشوفه
وصلتني رساله على جوالي شفتها من مهند كان يقول : ( وشلون حبيبتي ام عبدالله عساها مبسوطة )
ضحكت منه من يوم ولدت مايقول لي الا ام عبدالله احسه يكبرني واذا قلت لاتقول ام عبدالله قول ديمه قال لا بقولك ام عبدالله وانتي لا اسمعك تقولين مهند قولي لي ابو عبدالله خلاص كبرنا طبعا هو يستفزني بكلامه ويحاول يغيضني .
رجعنا بيتنا بعد الفجر ومهند يشيل عبودي خايف عليه من رانيا اللي اصرت تاخذه منه وهو رافض يقول لا بتطيحينه اخيراً عبودي بكى وأعطاني اياه وطلعت فوق وانا اشيله .
عمي صار كل شوي عندي في جناحي عشان عبودي .. ولا يرسل له احد يجيبه له تحت .. الشي الوحيد اللي ماقدرت اطاوع عمي ومهند فيه انهم ياخذون ولدي معاهم في السيارة لوحدهم .. مااقدر ومايجي لي قلب اخليهم ياخذونه وانا في البيت خاصة انه يتعثر بمشيته ولازم احد يمسكه ..
اما خالتي اقدر اثق فيها اذا اخذته ينام معاها او يطلع للحديقه معاها . خالتي تحبه بشكل كبير ورانيا مجنونة فيه تحبه وتدلعه وتلعب معاه احياناً احسها ترجع بعمرها الين توصل سنه قد عبودي وتلعب زيه وتفهمه اكثر مني ويفهم عليها ..
خلصت لوحتي بعد جهد لأن عبودي مو راضي يثبت بمكان واحد كل شوي يجري ولا يجيب له لعبه ويعطيني اياها ولا يبغى ياخذ الفرشه من يدي والألوان .. اخيراً اعطيته علبة الوان وفرشة وورقة كبيرة قلت ارسم هنا .
جلس يخربش بالألوان وهو مبسوط وقدرت ارسم وجهه بدقة الحمد لله .
اخذت اللوحة ووديتها بعيد عن مكان لعب عبودي في الحديقة . ورجعت اخذته طلعته فوق وحممته ولبسته عشان بنروح انا ومهند لبيت خالي ناصر لأنه مشتاق لعبودي وألح علينا نجيهم اليوم ..
دقت علي ريم وانا البس : هلا والله يابنت كيفك وفينك ماعاد تتصلين ومن زمان مازرتينا
: انا بخير بس والله ياديوم مشغوله تعرفين غدي تطفش وابوها عندي مدلعها هذا غير الحمل والوحم اللي طفشني .
: الله يعينك يالله كلها كم يوم وتخلصين الرابع وينتهي الوحم وعسى الله يهون عليك وتقومين بالسلامه وتجيبين اخو لغدي وترتاحين .
: يارب .. الا انتي مافكرتي بالحمل خلاص عبودي كمل سنه .
: انا صعب مااقدر الا بعد سنتين عشان مسوية عملية مو طبيعي زيك ..غير كذا تعرفين توني بديت ادرس دكتوراه وماابغى انشغل بالحمل .. بعدين خلي عبودي ياخذ حقه من الدلال .. احنا ناس حقانيين مو زيكم ههههههههههههههههههه
: ياويلك لو ياسر سمعك كان يموت من القهر مايتحمل على غدي ولو قلتي هاضمين حقها يمكن يكره اللي في بطني .
: هههههههههههههههههههه لا مااعتقد لهالدرجه يكره ولده عشان الست غدي .
: ههههههههههههههههههه مو يكره بس بجد عمك مجنون في بنته كأن مافي حياته غيرها تدرين انهم سافطيني على جنب وهي تتدلع وهو يلبي لها رغباتها .
: الله يصلحها ويخليها لكم ..
: آمين ويخلي لكم عبودي ويرزقكم باخو ولا اخت له .. يالله ديمه سلمي على مهند وزورينا
: يوصل وان شاء الله نزورك قريب
: مع السلامه
: هلا والله مع الف سلامه .
ناداني مهند وهو يشيل عبودي قال تأخرنا ..
لبست عبايتي ولفيت طرحتي وشفت عبودي يبغى ينزل من ابوه عشان يمشي على الأرض من يوم مامشى وهو مبسوط في نفسه ومستغني عنا مايبغانا نشيله ...
خرجت مع مهند ويدي بيده وعبودي يمشي قدامنا بتعثر واجتهاد شويه يطيح وشويه يقوم يجري ..
ضم مهند يدي بيده بقوة .. وانا فيي قلبي له مشاعر من الصعب جداً اني اوصفها .. مهند اعطاني الأمان والحنان والحب والأهم عبودي اللي مالي علينا حياتنا .
الحمد لله ان ربي رزقني بأهل وعوضني عن امي وابوي وجدتي ورزقني بزوج مافيه منه . ورزقني بأجمل طفل في الدنيا .
.......................
انتهت مهلاً ياقدر اولى رواياتي ..
كتبت عن ديمه وهي شخصية حقيقه اعرفها جيداً .. كل ماحدث في الرواية كانت حقيقة رفيقة اختي ( لمى في الرواية ) وديمه كما احببت ان اطلق عليها هذا الاسم انسانه بمعنى الكلمه قد لم افيها حقها في الوصف .. جميع مآسيها التي وردت في الروايه حقيقيه من فقد الام وعذاب زوجة ابيها لها وتربية خالها وحبه لها الذي لم اكن اوصل لكم شيئاً منه لأنه مضرب مثل في العطاء . والمرض والسفر لامريكا ومواجهة الشخصية التي ستكون زوجها قريبا والتي اطلقت عليها اسم ( مهند ) وخطبة مهند لها ورفضها له .وسفرها لسوريا كل ماحست برغبة في الهروب من المشاكل او الهموم . ورسمها وابداعها في الفن التشكيلي .
اضفت على الحقائق كل الأحداث التي توالت بعد خطبتها من خيالي ... اتمنى لها السعادة .. وان تكون حياتها مع مهند سعيدة وبدون مشاكل .
امنياتي القلبية ان تكونوا استمتعتوا اثناء القراءة .. قد اكون اخطأت بطريقه السرد واكتفاءي بشخصية واحدة تتكلم او تعبر لكني اعشق طريقة السرد والبوح عن الذات والمشاعر .. ارى انني اتقنها اكثر من الوصف لشعور الغير لكنني تحديت مع نفسي وقررت ان ابدأ روايتي الثانية باسلوب مختلف ومفاجيء للجميع سواء الأحداث ام طريقة السرد .. وسيكون وصف جميع الشخصيات القدامه اكثر عمقاً ودقة ..
لكل من وقف معي وساندني في ابنتي الأولى مهلاً ياقدر .. لايفيكم الشكر ولا تفيكم كل معاني الامتنان .. انتم هبة من الله لي حيث بعثني لكم وبعثكم لي ..
قريباً ستكون ابنتي الثانية بين ايديكم .. انتظروني اكملها كي لاأرهقكم بالانتظار كثيراً ..
تذكير لمن اراد نقل مهلاً ياقدر .. رجاءي ان تنسب لي والا لقاءنا عند الحق الذي لايضيع الحق عنده .
|
04-07-07, 12:46 AM
جديد مواضيع قسم القصص المكتمله من وحي قلم الاعضاء
العرض العادي
