كاتب الموضوع :
brune
المنتدى :
القصص المكتمله
﴿ الجزء الثاني عشر ﴾
.
.
فالعاصمه الحبيبه ،، بالتحديد فبيت سالم ،، فوق فأحد الغرف العاامره بالألم حالياً ،، وحالة الطقس يملاها الهم ،، منسدحه على سريرها،، ولها ساعه تحاول محاولات فاشله مع النوم ،، محارب عيونها ،، ومتخاصم مع جفونها ،،
" لاإلـــــه إلا أنت سبحانك إني كنت من الظالمين " ،، قالتها صيته بعد ماخلطتها بآهه من أعماقها ،، إستقعدت على فراشها ،، ودخلت يدينها بين خصلات شعرها الطويله المنسدله بعفويه على ظهرها ،، كبته بجنون على وجهها وبدت تدلك وتدلك وتدلك بمهاره كنها متمرسه ولها باع طويل فهالحركه ،، كان عندها أمل إنه بيجيبلها النوم على زعمها " اذا حاربك النوم اهجم على راسك وضيق عليه وبيجيك مستسلم " ،، لكـن حكمتها هذي خذلتها الليله ،، مانفعت ولافيه أمل تنفع ،، طاحت على السرير بقـوه وهي تقول بحزن : يــارب أبي أنااااااام ..
خنقتها العبره على أبوها اللي مافارق تفكيرها لحظه ،، حظنت وجهها بألـم وقست على عيونها شوي ،، وراحت فدوامة دموع لاصوت لها ،، فقط التعب ينزل بصمت ،، اااااه ياشعورها ،،
رصت على عيونها أكثر وتقول بصوت يقطعه الشهقات : خلاص ،، والله مابكي ،، من عصر وانا بس دموع دموع ،، بتنفعيــني هاااااه ،، بنتفعيني !! ،، ياللااا كانك صادقه روحي عالجي أبوي ،، كانك صادقه ساعديه ،، إسأليه وش فيك ،، من متى وأنت تعاني وساكت ،، ليش ساكت على عمرك ،، ليش ماقلت ،، لـــيش ،، ليش ،، " وبصوت بالكاد يسمع" ،، ولابس تطلعين تمرضيني وتروحين ولاكن شي صار ،، ااااااه ياقسوتك ،، تعرفيني أبي القوه وتجين بكل برود تضعفيني ،، معليه إن عرفتيني بعد اليوم تراني مب صيته ..!!!!
وتقوم بسرعه من سريرها كنها تبي تلحق على قوتها الضعيفه قبل لاتتبخر ،، وتروح تصفق المويه على وجهها بقوه ،، كنها تعاقب ذيك السيول وطلعت للغرفه ومسحت وجهها ،، ووجهت يم الباب تبي تطلع تغير من الجو الكئيب اللي عيشت نفسها فيه من عصر ،، فتحت القفل بهدوء ،، ومسكت على يد الباب بتفتحه ،، إلا حركته من الجهه الثانيه يد أقوى من قوتها كلها ،، وفتحته بكل ماأوتيت من قوه وكنها تنتظر متى بينفتح هالباب !!!!!!!
دخل سعيـد بقوه خلت صيته تطيح عالأرض وقال : بوووه
صيته بخوف مع إبتسامه : بسم الله الرحمن الرحيم حرام عليك روعتني وانا بروحي مرتاعه !!
سعيد وهو يضحك : وش مصحيك لألحين !
صيته بتنهيده تقوم بمساعدة سعيد : وأنت وش اللي مطلعك لألحين ؟!
سعيد: ههههههه وحده بوحده يعني،، أبد سلامتك بكره جمعه وسهرت مع الشباب .
صيته باستعباط: اهاااا ووش جايبك عندي طيب فرضاً كنت نايمه ولامثلا كنت نايمه ولامثلا كنت راقده ..
سعيد يضحك ويقول : لاماجيت إلا يوم سمعت فتحة الباب قلت بس أكيد الخفاش قام يدور رزقه ههههههه ..
صيته: هيهيههي مـــروق ترويقه مالها داعييي !
سعيد: هيهيهي وليه طويلة العمر مالها داعي على راسها مثلا ترويقتي !!
صيته : لامب على راسها بس عجزانه تروق مثلك أنت يبيلك أحد باله طويــــل وانا مافيني جويعه ومالي خلق ..
سعيد : ههههاي طيب طيب روحي كلي من خشاش الأرض وتعالي أبيك فغرفتي وترى ماعندي مانع تسويلي عصير فرش ..
صيته : ياحــرام ياناس عندك طموح فالحياه أقول روح لغرفتك وارسم أحلامك على ورقةٍ بيضاء ..
سعيد: ههههههههههههه ليش ماعندك هوايات غير تحطيمي كسرتي قلبي يافتاة ، أقول تراني عطيتك وجه لااعتشتي تعالي أبيك ..
صيته" وهي تنزل من الدرج": بفكر وبمالي نفسي وبستشير عمري وشكلي بستخير بعد وعلى الله التوفيق ..
سعيد : يؤ حشا تقولين بتصيرين وزيره هههههههه " وهو يخاطب طيفها اللي نزل" أقولك تعالي لايكثرهرجك ومرجك ..
نزلت صيته وسوتلها توست بجبن سايل وحطته بالحماصه ثواني إلاوهو جاهز توجهت يم الثلاجه دورتلها شي تشربه وحصلت عصير داناو بالفواكه الإستوائيه مع إنها ماتحب هالنوع لكن من الجوع ماتدري وش خذت ،، جلست على طاولة الأكل بهدوء وكلت وصوت الملعقه اللي تدق بها على الطاوله يخترق عقلها ويقضي عالهدوء اللي عام المكان ،، كأنها تبيها تساعدها على محو أي خاطر ممكن يمر في بالها ،، خلصت أكلها وطلعت تغسل يدها وطلعت لغرفة سعيد ،، دخلت عليه وبعد سؤال عن الحال والأحوال وبعد سوالف دارت بينهم
قال سعيد : أبي أفتح معك موضوع
صيته : امممم وانا بعد
سعيد: طيب قولي أنتي أول
صيته: بدينا الفلم المصري اقول خلصني وقل مافي جعبتك ..
سعيد: هههه طيب ،، أنا أشتغل
صيته: لااااوالله شي عظيم !! تشتغل مره وحده صراحه انا فخوره فيك ياخوي،، أقول مسويلي سالفه وتعالي وعندي موضوع تقل بتخطبني وفالنهايه تقول أنا أشتغل طيب وش الجديد قدلك خمس سنين تشتغل وش االإختراع في ذلك ؟؟!!
سعيد : ياااالله مالت عليك كلتيني بقشوري إصبري لاتاكلين قرصك ني ،، أقصد أشتغل شغل إضافي في كوفي يعني أصلح القهوه والشاي والكبتشينو واللزي منه ..
صيته " بذهــول بان على تفاصيل وجهها": قهوجي يعني !!
سعيد بهــدوء: لااا مو قهوجي ،، تقدرين تقولين في خدمة الزباين ..
صيته : يقالك عدلتها الحين كل الطرق تؤدي إلى روما .. ليه ياسعيد وش ناقصك عشان تذل عمرك حرام عليك والله ماتسوا عليك هالشغله الخير مكبب عليك من كل ناحيه وأنت تشتغلي في كوفي..
سعيد يحاول يثلج أعصابه: مب معناته ان ابوي فـ خير او اني عايش مبسوط اني خلاص أتكل على هالشي ! لاحبيبتي انتي عارفتني مستحيل اني اعتمد على ابوي فـ شي أعتبره أخلا مسؤليته تجاهه ،، خلاص أبوي رباني وتعب علي وماقصر يوم كنت فحاجته قبل لاأشتغل لكن الآن أنا مسؤول عن نفسي وعن زوجتي وعيالي بكره لاجاو
صيته تقاطعه: طيب أوكيــه أنا معاك ومأيدتك فهالشي بكل حواسي لكن شغل الحكومه مايكفي 6000ريال كل شهر ماتكفيك تروح تشتغل فكوفي عشان وشو !! زيادة دخل ؟؟ فيه مليون ألف طريقه ثانيه عشان تزيد دخلك غير هالشغله
سعيد" ويمد كفه لها" : ياللاا على إيدك جاني وقلت لااا ،، حفت رجولنا أنا وفيصل ست شهور ندور لنا شغله ولاحصلنا مالقوها الخريجين اللي تو عشان نلقاها إحنا ،، يابنت الحلال والله يذاالشغله بالذات ربك بيبارك فيها تدرين ليش؟ عشانا نتعب فيها ناكل رزقنا بتعب وجهد مجهودنا قدام عيونا نشوفه صدق تحسين بطعم الراتب لجاك .
صيته " تستسلم وتضرب كف على كف": مافيدي شي ،، بس والله لايدري أبوي ان تصير حرب وأبوي اللي فيه مكفيه والله اللي فيه مكفيه ..
سعيد " برعشه داخليه ": لاماعليك أبوي إزهليه أنا تكلمت معاه فالموضوع وقالي سو اللي تبي ..
صيته: قلت بتشتغل قهوجي !!
سعيد: صيته لو سمحتي حسني اللفظ شوي ترى ماحبه أبد ،، وبعدين ماقلتله عالشغله نفسها لكن قلت أحب أعتمد على نفسي ،، وبعدين خلاص سكري عالموضوع انا كنت أبيك عون وصرتيلي فرعون ،، كنت أبي لفتحت مع أمي وأبوي السالفه تساعديني وشكلك بتجين أردى منهم ..
صيته حست بأخوها تندمت وبحنان قالت: لاياعمري أنت والله مب قصدي أحبطك لكن الشغله نفسها عليها تحفظات ولا شيء أعتز فيه إن أخوي من الشباب المكافح اللي يبني نفسه بنفسه وماعليك إن شاء الله العون من رب العالمين ..
سعيد: خلاص حصل خير وياللااا ورينا عرض كتافك جاني النوم ..
صيته:سعيد لاتزعل والله ماتهون علي
سعيد:لامازعلت بس كلامك مستفز وخلاص إنتهى الموضوع ياللاا جد أبي أنام وراي صلاة جمعه بكره .
صيته:لااااه يوم قال اللي عنده طردني ،، باقي أنا !!
سعيد : يـــوه حكيك واجد وأنا رجال غالبني النعاس .. بكره إن شاء الله ،، بكره من الشهر ..
صيته " وهي تقفي بتنهيده ": الله يلهمني الصبـر ..
\
:
غرقــانه فالنوم كانت ،، جاها بعد جهد جهيد من اللي حصلها اليوم ،، نايمه والتعب مبين على وجهها ،، فاتحه فمها من العمق اللي كانت نايمه فيه ،،
دق جوالها اللي نست تحطه عـ السايلنت كعادتها كل يوم وطبعا هي غرقانه ،، سكت ورجع يدق مره ثانيه ونفس الرد ،، دق أكثر من خمس مرات وفالمره السادسه صحت مهره على الصوت المزعج حيـــــــل فهالوقت ،، تناولت الجوال وحطت عينها أول شي عالساعه وانصدمت لما حصلتها ثلاث الصبح ،، شافت الرقم وعيونها مليانه نوم " وجع إن شاءالله وش هالذوق" قالتها وهي تعطي المتصل بزي ورجعته مره ثانيه مكانه جنب مخدتها ،، دق مره ثانيه وإستقعدت بثقل وفتحت عيونها زين وردت وهي مفوره وقالت بصوت يملاه الخمول: أشهد إنك قليلة ذوق ،، تعرفين كم الساعه ألحيـن !!
نهى " بدلع": هههههههه لاماعرف قوليلي ابوي مايشتريلي ساعات ..
مهره" وهي ترفع عيونها للسماء وتعومس شفايفها": شوفي والله مالي نفس أكلمك ولالي نفس أسمع صوتك ولالي نفس أضحك معك فلو سمحتي سكري بكرامتك قبل لاأسكر فوجهك ..
نهى : اخخخ معصبه مـره ،، لاحبيبتي لاتسكرين أنا بسكر لكن بعد ماقولك الشي اللي أنا مكلمتك عشانه ..
مهره:......
نهى: طيب تبين تعرفين وشو بقول؟ ،، بكره ياطويلة العمر بزورك وش رايك فـ المفاجأه ؟؟؟؟
مهره " بشهقه": أيـــــش وش تزوريني من وين تعرفيني أصلاً عشان تزوريني خبله ولاتستخبلين .. لو سمحتي يابنت الناس لاتدخليني فمشاكل أنا في غنى عنها
نهى" بميوعه": لاااا وش مشاكله حرام عليك ماتهونين علي ،، زياره بريئه مجرد تعارف
مهره: طيب أنا مابي أعرفك والله مابي أعرفك
نهى : ماعليك لاشفتيني بتتمنين إنك عرفتيني من زمان
مهره " بعصبيه واضحه فصوتها": لو سمحتي مابي أتمنى ولاتمنين معرفتك والله غنيه عنها صوتك وأوقاتك اللي تكلمين فيها وبداية مكالاماتك ماتبشر بخير فـ الله يغنينا ويغنيك ومع السلامه ..
وتسكر الجوال على طول وتحوله على خدمة موجود ،، حطته على الكومدينه اللي جنب السرير ورجعت تكمل نومها بعد ماخذتلها شال وربطته على عيونها عشان يمنعها من أي تفكيـر..
\
:
وجاء صباح أفضل يوم طلعت فيه الشمس ،، يوم الجمعه أقبل بحلته التي تميزه هو فقط ،، الخشوع الروحانيه والإنقياد وراء الرحمن ،،
الساعه العاشره صباحاً ..
صيته.. غرقــانه فالنوم اللي حن لها بعد الكثيــر من التوسلات .
سعيد.. قمة النشاط والحيويه بالرغم من نومته المتأخره ،، قام تحمم وطلع يصلي بدون لاينتظر أحد ..
سالم .. حالـــه يرثى لها ،، تخبط بين الآه والآه ،، على سريره والجبال الرواسي تمنعه عن تلبية نداء الرحمن..
حسناء.. غرقانه فنفسها وفدنياها ،، ممن يستغلون صباح الجمعه بالمكالمات والحش وأكل لحوم خلق الله ..
حنان .. نهار الجمعه كسائــر النهارات لافرق سوا أن غداً السبت..
عبدالله.. بجانب أمه وزوجته يستغل هالصباح المميز على حد قوله" صباح الجمعه مميز بكل شيء لا هيبته ولاحظوره"
بندر.. رجع من البر عالساعه سبع وحصل الكل غاط فنومه ،، دخل تروش ووجه يم السرير يرتاح وقام ألحين يجهز للصلاة..
غاليه.. فرحت كثيـر لما صحت وحصلت زوجها جنبها ،، قامت تحممت وتعدلت وحطت المكياج ونزلت تجهزله القهوه والقدوع !! وراضيـــه كل الرضى على اللي ناويه تسويه اليـوم ..
نايف..يغرق نفسه بالعـود ويظهر إبتسامته المعهوده اللي تظهر مالاتبطن ،، ومرتاح أكثر من أي يوم مضى على القرار الي اتخذه وبيحسم كل شي،، كان يناظر نفسه فالمرايه ويناظر سلطان اللي جنبه ويقول " سبحان من خلق الشمس والقمر"
سلطان.. إبتسامه مردوده وياخذ العود منه مع قوله" أنا أشهد سبحان من خلق وفرق"
حيـاة..في قوقعتها توها صاحيه ،، غسلت وجههـا وناظرت نفسها فالمرايه وحست بتفـاؤل كبير هاليوم ،، شعور راودها من زمان عنه ..
مهره..قامت بمزاج مختلف عن الكـل ،، راس مصدع وعيون متورمه وقولون ينذر بالهيجان،، من قامت خذتلها مسكن وطلعت من الغرفه وراحت للثلاجه اللي بالممر وخذتلها تفاحه لأنها تهديه كثيــر ..
سميـره.. جالسه مع أمها أطيب نساء العالم وقاعدين يتقهوون وجنبهم محمد اللي إستعد بعد شوي بيروح الصلاة ..
راشد..مستغل النهــار بالطاعه ،، كأي نهار يمر عليه الإيمان وقوة الإتصال يغلفه ..
سلمان وفهاد .. فجـــور وبغي وضلال ،، حياة يزينها لهم الشيطان ويزخرفها لهم بالملذات ،، لألحين غرقانين فالفسوق والحيف يلحفهم ..
خالد.. تهديد ووعيد يجيبه ويوديه ،، جالس فغرفته ليس للصلاه ولكن إلى الآن مانام يفكر هل الشي اللي بدا يسويه ممكن يكون السكينه اللي بيطعن فيها نايف ولا لا !!
\
:
مر النهـار كما كان على الكل ،، له حضوره وهيبته فبيت عبدالله ،، ولاوجـــود له فبيت سالم ،،
فالبيت العامر بالحب واللمه الجميله اللي يفتقدها الكثيــرمن الناس اليوم ،، جالسين العيال كلهم مع عمهم وجدتهم وخالتهم وغاليه بعد جالسه جنب زوجها أما حياة ومهره فوق فغرفهم بعد مادخل نايف حبوا إنه ياخذ راحته مع أهله ..
بعد القهـوه والشاهي وسوالف مالها آخر مرت بالشرق وراحت للغرب..
قال نايف وهو يحرك يده بعلامة الهدوء: لــــو سمحتوا الكل يسكت
سلطان " بلحن وهو يشر على عمره": جــاكم الحلو المسكت ..
نايف: هيـــه سلطان أرجوك هدوء تراني أحاول أكون جدي لاتخرب علي الشخصيه
أم عبدالله" والفضول بدا يشتغل": خلاص يمكم اسكتوا خلنا نشوف نايف وش عنده..
نايف: الله عليــك يمه دايم أقول أمي غاليه سيدة نساء بيتنا
بندر: يــوه يقالك مخترع الذره ، كلنا عارفين انها سيدة بيتنا خل منك دهنة السير شكل ترجي شي من وراها..
نايف: لاوالله إلا من وراك أنت
بندر" مستغرب": اهاااا طيب وش فيك مادهنت سيري هااااه
نايف: مايحتاج أصلا واثق إنك بتلبيني
بندر: أحلاااا ياواثق طيب ياللاااا قول
نايف: احم أنا يامحسوبكم نايف بن عبدالله ولد ذاالرجال الأجودي اللي قدامكم ولد ذالمره السنعه اللي تشوفونها أخو البنت الحليوه اللي جالسه جنب رجلها وولد عمكم
سلطان: ههههه سعودي الجنسيه رياضي المولد نايفي الإسم ،، ههههههه لحول قايليلك بناخذلك مخالفه ياللااا قول اخلص علينا
نايف وهو يضحك :انا يانايف قررت أتزوج
الكــل متفاجيء من قلب والصدمه رسمت الملامح لهالقرار اللي جاء من دون سابق انذار
عبدالله بذهول: وأخيرا يابوك مابغيت !!
غاليه وهي تضحك : ياالله كل هذا من تأثيري أمس أول مره أدري إني صاحبة تأثير في القلوب!!
أم نايف: اللي أخبره اني أمك واللي سمعته انهم يقولون الولد أول مايبي يعرس ولايخطب يقول لأمه وش فيني ماشفت شي من ذاالحكي!!
نايف بحرج: يمــه توني مقرر البارح بالليـل وقلت أضرب الحديد وهو حامي قبل لاأغير رايي
ام عبدالله باستعباط: اتركونا من كثر الهرج من البنت اللي تبيها عشان نتوكل نخطبها لك
غاليه: يؤ من أمي يعني إني ماعرفها ،، مشكله العجز لااستهبلوا
ام عبدالله: لا أعرفها لكن أبيه يقولها بلسانه
نايف بشوي حيا: امممم شوفوا تراني مستحي لكن لجل عين ،، يابندر ياولد عمي يانسيبي جايك طلاب ،، عاوز أطلب ايد اختك المصون
بندر بابتسامه كنه متوقع ويشر على عمه: هذا أبوها عندك مالك شي عندي
نايف: هااا يبه
عبدالله : الله يوفقك ياولدي لكن الشور الأول والأخير عند صاحبة الشان
بندر: خلاص مهره خلوها على سلطان هو بيشاورها والعلم بيوصلكم ان شاء الله
أم نايف: مايخالف عشان محد يحرجها
ام عبدالله: الله يكتب اللي فيه الخير وخيره
\
:
فنفس البيت فوق فغرفة حياة جالسه عندها مهره ومايدرون بالحياه اللي تحت ،، جالسه مهره وتقولها عالبنت اللي مزعجتها وسالفة إنها بتزورها اليوم ..
حياة مستغربه وبتفكير تقول: ياشيخه يمكن وحده من ربعك تلعب عليك وجايه اليوم تكشف عمرها
مهره: لاوالله مستحيـــل ماتوقع احد منهم مب بهالوقاحه عاد يكلمون تالي الليول،، واللي شككني أكثر أول مادق هالرقم كان على غاليه واللي كلمها ولد وبعدين كلمني بصوت بنت هذا اللي مخوفني حيــــل
حياة: لاصيته لاتكبرين الموضوع مدري ليش احسها وحده من ربعك تسوي مقلب..
وعلى نهاية الكلمه كانت غاليه دخلت وسمعت طرف الكلام وعرفت إنهم يتكلمون عن البنت اياها فقالت: يــوه والله اني شاكه فشي وخايفه منه
حياة : وشـو غاليه
غاليه تناظر مهره: شفتي السالفه اللي حصلت أمس اللي بين نايف وخالد
مهره بخوف وهي تتذكر: ايه
حياة زي الأطرش: وش سالفته
غاليه ومحاوله للتقرب : أنا أقولك السالفه ،، أمس خالد خطب مهره ورده أبوي وبعدين جا يتهاوش مع نايف ويقوله كلام ماله داعي وفور دم نايف وتخانقوا بالأيدي وقال خالد لأسوي فيها شي يحرمك منها ..
حياة بخوف: احلــفي
مهره والعبره تذكرت : والله مانمت الليـل منه أمس حسبي الله عليه ،، بس وش علاقة البنت بهذا كلـه
غاليه : أقول يمكن من طرف خالد ،، دازها لك وهذاك الرجال اللي كلمني يمكن هو وشاف مامني رجاء حرمه متزوجه ومارح يحر قلب نايف كثر مايحره عليك قال مهره سكينها أحد ..
مهره وتحط يدها على فمها : يــــــوه وين راحت مني أنا.!!
غاليه: أنا اكتشفت هالشي من كلام نايف ،، يقولي وصيها لاترد على مكالمات غريبه لأن ماله طريق غير التلفون..
حياة تحاول تهدي : يانـاس وش فيكم أنتو مهره ماوراها رجاجيل ليه يحسب الدنيا على كيفه
مهره : اايه يحسب الدنيا على كيفه اللي مثله ماعنده فأكبر راس ماهمه غير الإنتقام وبس البلااا في البلوه اللي بتجيني اليوم
غاليه باستغراب: ميـن؟
حياة : الحيوانه اللي تكلمها
غاليه : بنت الكلــــب بتجي بعد
مهره : وش أسوي لها قلتلها مابي أشوف وجهك بس هي شكلها مب ملقيتلي بال وبتجي غصب..
غاليه بإبتسامه : لامـاعليك لاتخافين معاد له مدخل لك تراك صرتي محصنه
مهره : هيهيهي غاليه مب وقتك والله
غاليه بضحكه : والله والله إنك انخطبتي
حياة : مشاء الله اختي صايره تخطب وتعرس وانا آخر من يعلم
غاليه " بعمد": لاحياتي تو الخبر طالع من الفرن ،، تو الخطبه تامه وباقي ناخذ راي العروس وقالوا لسلطان يقولها بس عاد أنا مب صابره لين يتكرم سلطان على أخوي
مهره بذهــول كبيــر: هاااااه وش السالفه!!!
حياة بإبتسامه ملت وجهها لون الجوري: اهاااا ابئي أوليلي أخوك ،، نايف حليله مابغى يتقدم ويخلصنا..
مهره وشبه إبتسامه بين المصدق والمكذب : لحظه لحظه ،، ألحين يعني نايف خطبني!!
غاليه: أيون
مهره وبضحكه هستيريه : يــــــــــــوك لو اني داريه كان خليت خالد يخطبني من زمان عشان يتلحلح..
حياة وهي تقرص اختها ففخذها : استحي يابنت اخته جالسه عندنا
غاليه : ههههههههههه السحا شرق وهي غرب خليها حياه تعبر عن مشاعرها،، طيب ماقلتيلي وش رايك؟؟
مهره بإبتسامه علتها: امممم اتركيني ثلاث ايام أفكر
غاليه : لحــول أنا بس ودي أعرف وش سالفة ذاالثلاث أيام كل المسلسلات اللي نشوفها لنخطبت البنت تركض وتقول سيبوني ثلاث أيام أفكر ،، بس ياحيك أنتي ماركضتي ولاكان بالشبشب على ظهرك..
حياة : ههههههه صادقه غاليه وش سر ذالثلاث أيام؟؟
مهره : أقول ماعلي منكم ثلاث ايام يعني ثلاث ايام خلوني أستخير بالأول ليه خبط لزق العرس
غاليه : الله يعيــن اخوي هو تقدم هالخطوه بالعافيه بعد يصبر ثلاث ايام عز الله عاف العرس
مهره ويحز فخاطرها: احسن يعافه يقالك بنموت عليه!!
غاليه: هيهيهي ادري من ورا قلبك لكن ياللا لجل عين ،،بس ألحين خلونا فالبلوه اللي بتجي اليوم وش نسوي معها؟؟
حياة : أنا من رايي نشوف وش وراها يمكن ظالمينها وكل اللي فكرنا فيه يطلع هوا
مهره: على قولك خلك ورا الكذاب لباب الدار واللي فالقدر يطلعه الملاس
\
:
عصر اليـوم نفسه فبيت أم راشد جالسه هي وبنتها فالصاله يتسولفون ويتحاكون عن حال الدنيا وأحوالها وكم واحد لاعته وكم واحد تركته فحـاله ليـن وصلوا لحد بيت عبدالله والحب الكبيـر اللي يجمعهم على رغم بحر الأحزان اللي غرقانين فيه لكن شكثر قواهم وخلى علاقتهم أكثر متانه وصلابه ..
أم راشد:جعل الدنيا ماتجينا فيهم عز الله انهم يستاهلون كل خير
سميره: ايه والله الله يفتحلهم ابواب رزقه
ام راشد: والله اني من زمان عن ام عبدالله وحق علينا نزورها
سميره : طيب وش رايك نروحلهم ألحين قبل مايجي فهاد ويصك علي
ام راشد : خلاص مايخالف بس اخاف محمد عنده دراسه ومايقدر يدورلنا ليموزين
سميره: بشوفه يمه اذا ماقدر نكلمهم يجينا واحد من عيالهم
ام راشد: يابنيتي نروحلهم وتعالوا اخذونا وش ذاالعلم !!
سميره: ياالله يمه تراهم أجاويد ماعندهم تفكير يمين وشمال بالعكس لو الود ودهم كان جابوك على كتوفهم
ام راشد بإبتسامه : الله يسعدهم وين ماوجهوا
\
:
صيته وهي تكلم جوال: ياخوي أطرك عشان تجيني والله بموت لو ماقلتلك حرام عليك ارحمني النوم ماذقته مع الناس البارح
سعيد: لحــول يذاالحريّم ماتعرفون يجلس الكلام فبطنكم شوي
صيته : سعيد والله مب وقت مزح السالفه أكبر من كل شي تتوقعه
سعيد وكنه تخوف: انتي فغرفتك
صيته: يعني وين بكون فيه
سعيد ويطق الباب: افتحي ياحلوه
صيته تسكر الجوال بدون لاتسلم وتوجه يم الباب تفتحه بإبتسامه : يعني موجوود ياحبك لكثر الحكي !!
سعيد يدخل ويسكر الباب وياخذها من يدها ويجلس على كنبته المخصص ويجلسها على الكنبه اللي جنبه ويقول: هــااا وش عندك مدوختني
صيته بخوف: شوف أنا مو متأكده بس شاكه
سعيد بهدوء: بأيش
صيته: مابيك تعصب أنا بقولك لأني عجزت أفكر لحالي وأبيك تساعدني
سعيد توه مسيطر على هدوءه: أساعدك بويش ؟
صيته: أبوي
سعيد وهو يفز بخوف : وش فيــــه
صيته وتمسكه من يده تجلسه: لحظه لحظه اصبر خلني أقولك ،، امممم شاكه ان فيه شي..
سعيد بأعصاب مشدوده شوي وتتقطع: صيته آخذ الكلام منك بالقطاره قولي ولاترى والله لطلع وشوفي من بيساعدك
صيته بصوت مرتجف: اسمع انا بقولك السالفه من أولها عشان تكون فالصوره من بدايتها ،، أمس على أذان العصر كنت مشغله قرآن سورة البقره وكنت مسكره علي الباب أوكيه ..
سعيد : طيب
صيته وفمها يرتعش مايبي يتذكر اللي صار: شوي وأنا منسجمه مع المسجل دخل علي أبوي بقــوه غريبه ووجهه كنه الليل وعيونه غريبه عجيبه رمشه يتحرك بسرعه وصوته أول مره أسمعه يقولي برجفه سكريــــه يابنــت الكلب ولما سكرته هدا شوي وطلع بسرعه،، وأنا قبل يومين سمعته بالصدفه يقول لأمي بطلقك لما آخذ اللي أبي منك وهي تحلف يمين انه مرح ياخذه منها دامها حيه أنا عاد شكيت فشيء وفتحت النت وبحثت ونص شكي تأكد باقي النص الثاني
سعيد بهــدوء مناقض لأعصابه المشدوده من شوي وبابتسامه مستفزه يقول: ووش توصلتي له طال عمرك؟؟
صيته بتردد وبسرعه تقول قبل لاتتراجع: أمي ساحره أبوي
سعيد بضحكه هستيريه يقول وهو يقوم : أما عليكم سوالف!! ،، ساحرته مره وحده ياشيخه خافي ربك لاتظنين ظن السوء هذا الشيطان يوسوس لك" ووصل الباب" ولاتنسيـن تراهي أمك!!
صيته وهي تقوم بذهول من موقفه توقعت العكس تماما وتروح يمه وتمسكه بيده وتدخله مره ثانيه وتجلسه على الكنبه وتقول : اسمعني زيـن سعيد أنا داريه انها أمي لكن هذا بعد ابوي ولنفترض انها مثل ماقلت مجرد وساويس أو افتراضات معرضه للفشل لكن فكر معي أبوي وش صده هالصده كلها من جدتي ووش منعه منها ومن عيال أخوه كل هالفتره وتخيـــل مخليهم عند عمي عبدالله مع إنه هو الأقرب لهم ليش كل هالشيء مب يشير لشي واحد ،، سعيد تذكر يوم قلتلك هذيك السالفه يوم أنفجر قدامي يقولي غصب عني وادعيلي ربك يفك كربتي ،، طيب وش اللي غصب عنه ووش اللي يبيه ينفك عنه قولي وش حاده على كل ذاه باالله عليك ياسعيد الصدود من الصلاة والذكر والبعد عن الله وتلبيته لكل حاجات أمي بالرغم من المشادات العنيفه اللي تجي بينهم بالله عليك هذا كلها وش تفسيره قولي يااللاااا وش تفسيره عندك؟؟
سعيد يحاول مايقتنع لكن فداخله خوفه الكلام : طيب ولنفترض لكن كان من باب أولى تعمل عمل يخليه خاتم فاصبعها مب كل يوم والثاني طلايب وخنايق وهواش!!
صيته بحماس : لكن فالأخير تاخذ اللي تبي!!
سعيد: يمكن عيـن طيب وش معنى سحر!!
صيته: لالا ماأظن لو عيـن ماقال ابوي هذاك الكلام لكن أبوي عارف انه معمول له عمل وان امي هي للي عاملته وشكله حاول انه يفكه لكن هي متمكنه منه ..
سعيد وبدا يتغلغل الشك فصدره : لا لا صيته لاتقعدين تشكين وتشككيني فـ أمي مهما وصلت بها المواصيل ماتوصل للسحر!!
صيته : طيب وش بيردها الحمدلله رب العالمين لادين يملا قلبها ولاايمان يملا نفسها كل همها الفلوس واللذه وبس..
سعيد معصب : وكنها مب أمك أعوذ باالله!!
صيته : لاتكذب على عمرك ماقد حسينا بهالشي..
سعيد: وينك اللي كنتي تقوليلي لتكلمتنا على أبوي بِّر به حتى لو فكلامك
صيته: ابوي يستاهل عالأقل سوالنا شيء ماننساه يكفي علينا احترامه لنا وسؤاله علينا حتى لو بين فتره وفتره " وبعبره" ياسعيد أمي حتى ماتكلف نفسها تباركلي لنجحت ولاتسأل عني لمرضت ولاحتى تشوفني اكلت نمت شربت اخر سنه لي بالجامعه ووالله ماتدري انا اصلا أدرس ولاخلصت ولاحنان هياته وطلعه وجيه وتمدها بالعشر آلاف والسبعه بدون مراقبه ولامحاسبه اهم شي تفتك من لسانها باالله عليك وش ترجي من وراها لامهتمه لابعيال ولابرجل ولابرب وش بيردها عن الردى قولي ..
سعيد قرب منها حيـل ومسح على شعرها بحنان بحجم الكون وقال : حبيبتي مهما كان هذي اسمها أمنا ومهما سوت بتظل تاج على روسنا ،، مثل مارح نتخلى عن أبوي وبنحاول نعرف وش وراه هي بعد بنحاول نرجعها لصوابها يكفي ربك وصاك عليها وأظن انك حريصه على رضا ربك..
صيته وخلت لدموعها مطلق الحريه وبصوت متقطع : يــــارب ألهمنا الصواب أبوي ملدوغ من أمي يــارب افتحلنا ابواب رحمتك ولاتكلنا الى أنفسنا طرفة عيـن
سعيد وبعطف باذخ : خلاص حبيبتي لاتحاتين أرمي الموضوع ورا ظهرك وازهليه كل شي بينحل ان شاء الله ،، لاتحاتين وانا جنبك
صيته : جعله مايخليني منك والله يرزقك من حيث ماوجهت
\
:
فمكان ثاني من هالبيت فغرفتها متكيه على الأريكه قدام التلفزيون حاطه على ميلودي والصوت واصل لآخر الشارع ،، والرموت فيد واليد الثانيه قاعده ترقص بها مع حركات فرقبتها تسويها بمهاره ،، لابسه برمودا تفاحي وبدي أحمر ماسك على جسمها مبين كل تفاصيله وشعرها ملموم بفوضويه وماسكته بشباصه صيني ،، داخله جـــو لأبعد درجه معميتها الأغنيه وغرقانه فيها لفوق راسها ماقدرت تصبر وقامت تقلدهم وهي واقفه قلدتهم بمهاره غير عاديه كنها متمرسه ولها باع طويـــــل فهالرقصه ،، قطع عليها اندماجها جوالها اللي كان يهز فجيبها ولا الصوت من سابع المستحيلات تسمعه ،، طلعت الجوال وابتسمت من قلب
" احبها والله يتصل بك " ضغطت عالزر الأخضر وقالت وهي تفح : هلااا
نوره : هلابك حناني كيفك
حنان تجلس ومازالت تفح:بخير وانتي
نوره: مثلك بخير وش فيك تفحين
حنان: هههههههه كنت أرقص
نوره : واااااااااو ليتني معك
حنان : اوكيه تعالي وابشري بالخير
نوره: لامستحيل توني جايتكم مستحيه
حنان: لاحبيبي عادي والله البيت بيتك
نوره: لاالصراحه أبي أذاكر والله خايفه البنات كلهم اللي خلصوا ماده ولامادتين وأنا وياك ماندري وين ربي حاشرنا
حنان بضحكه مستهزئه: يااشيخه روحي مني هناك والله انك فاضيه عيشي يومك تعرفين وش معناتها هالكلمه يعني خلي الإمتحان ليومه وفرفشي ،، صراحه انا انسانه تحب عمرها مابي اعكر مزاجي عشان دراسه ،، والنجاح بنجيبه بنجيبه والنسبه حتى لو كانت ضعيفه بندخل الجامعه غصب عن الكل ..
نوره بنفس الموال: ايه أنتي عندك من يسنعك لكن انا الله يخلف علي
حنان : أنا قايلتلك الف مليون مره مستحيل أدخل الجامعه بدونك كلمه وحده من مامي لدادي بدخل كل اللي أبيهم يدخلون..
نوره : وااااو عندك مامي عجيبه!!
حنان بميوعه: لكن مو أكثر منك
نوره بدلع متصنع: ههههههه أحبك والله
حنان ذايبه: وربــــــي أنا أكـثـــــر
\
:
وقفت سياره لكزس كوبيه كل مافيها أسود عند آخر الشارع ونزلت منه حرمه واضحه ملامحها بتفاصيلها من العبايه اللي لابستها ،، سكرت الباب بغنج بعد ماعطت اللي داخل سياره بوسه في الهواء وقالت : لاتشيل هم خلها علي
مشت بدلع مستفز وصوت الكعب يسمعه اللي فآخر الدنيا وريحة العطر يشمه اللي وينه فيه ،،مشت ليــمن البيت المقصود ودخلت من باب السور وأشرت له يروح ودخلت داخل السور نفسه مشت للباب الرسمي تبع الرجال بحكم انها ماتدري وين باب الحريم ،، شالت الطرق عن وجههااا ودقت الجرس مرتين وتركته ..
جاها صوت رجال من داخل البيت يقول : أرحبي أرحبي ياأم راشد ،، حياك الله واللي معك تفضلوا ..
وفتح نايف الباب ورجع ورا وصد من اللي شافه
قالت نهى بميوعه مستغله الوضع : مرحباااا
نايف يشخل عينه وبصوت هادي وقور: هلا من بغيتي اختي؟؟
نهى بتخمين : اممم أنت نايف صح
نايف مستغرب من جرأتها: بغيتي أحد الشيخه
نهى : أكيـد نايف دايم مهره تقولي عن شكلك
نايف بذهول " جايه لمهره!!! وين تعرف هالأشكال "..
نهى بجرأه تنرفز: ههههههه وش فيك مبلم ،، ماقد قالتلي انك خجول
نايف ويعطيها مقفاه ورافع حاجب ومنزل حاجب : طويلة العمر تبين الأهل وجهي يمين وامشي لآخر الممر ..
ويختفي عن ناظرها ..
وبالفعل توجه لوين ماقال وتلقى قاسم كبيـر دقته وفتحتلها أم نايف اللي استغربت هي الثانيه من شكلها لكن حق الضيف غلبها وقالت : حياك الله بنتي تفضلي
نهى وهي تصافحها بطرف يدها بحقاره : أهلين مهره فيه
أم نايف والدهشه ماخذه مجراها: من يبغاها؟!!
نهى : صديقتها
أم نايف: ماظنتي أول مره اشوفك
نهى:انتي أمها
ام نايف: ايه
نهى بوقاحه: مب لازم كل شي تعرفينه .. مب معناته انك امها واجب عليها تقولك كل شي وبعدين تعالي امها أظن انها متوفيه من زمان ليش تقولين انك امها
ام نايف تقوم باحترام فنّان : مربيتها وحق علي اكون أمها ،، وحياك الله مره ثانيه ومهره ثواني وتكون عندك تفضلي اجلسي داخل وبروح اناديها لك
نهى تجلس على كنب الصاله الخارجيه وتحط رجل على رجل : لا مايخالف هنا مرتاحه
وتطلع ام نايف تسبق خطوتها مستغربه وش هالشكل اللي تعرفه مهره ماتوقعت من مهره أبد تعرف هالأشكال ،، دخلت المطبخ ودقت بالإنتركم تحويلة مهره وقالتلها فيه وحده تبيها تحت وانها أول مره تشوفها ،، صرخت مهره وحطت يدها على فمها استغربت خالتها وتحسبها من الوناسه سكرت منها بعد ماستعجلتها تنزل ،، أما عند مهره فأنواع الربكه والتوتر طلعت من غرفتها ركض لغرفة حياة وتدخل بقوه وهي تقول بصوت عالي : جات ياحياه جـــات الحيوانه جات !!
حياة تفز من مكانها بخوف : وجع خوفتيني اركدي وقوليلي وشفيك ومنهي اللي جات
مهره : بنت الكلب نهى كلمتني خالتي تقولي فيه وحده غريبه تحت
حياة : وااالله
مهره: بكذب يعني ياللاا قوليلي وش اسوي جعلها تموت فذااللحظه ويفكني منها
وتدخل غاليه بسرعه وكنها خايفه وهي تقول : وش فيكم وش ذالصوت عندكم والله اني كنت فوق السطح ونزلت من الصراخ عسى ماشر
مهره بربكه تروح وتجي وهي ماتدري : جات ياغاليه جات عظامي بردت والله مدري وش اسوي..
غاليه كنها متوقعه : نهى ؟؟؟
حياة : ايه
غاليه : سواها الكلب
مهره : غاليه تكفين لاتخوفيني بروحي اللي فيني مكفيني ألحين وش اسوي انزل ولاأطنشها
حياة : لاوش تطنشينها لازم تنزلين هذي مهما كان ضيفه وواجب اكرامها
مهره: الله يلعنها ويلعن اليوم اللي رديت عليها فيه
غاليه : يـــوه مهره لاتلعنين ترجع عليك يااللاااا روحي البسي احسن شي عندك وعدلي عمرك عدل غيظيها خليها تشوف من اللي يتحاربون عليها الرجاجيل
مهره : والله انك فاظيه صدق أنا حالتي حاله وانتي تقولين تعدلي
حياة : لاصادقه غاليه تعدلي وخليك مضبوطه خليها تنقهر كان فراسها شي
غاليه : واحنا بنجلس معكم عشان نضيق عليها وماتعرف تاخذ حريتها
حياة : وبعد بتجي سميره وأمها ونجلس كلنا معكم خلها تشوف السنع كيف
مهره تضحك بخـوف : عـــز الله بتعاف البيت وأهله يااللااا اجل انتوا بعد تزينوا وخلونا كلنا ننزل مع بعض
غاليه: بسرعه أجل مشتاقه أشوف أكشن
حياة: هههههه ياللااا كل وحده توريني عرض كتافها
أما تحت هذيك جالسه بنفس الجلسه لكن بعد ماشالت عبايتها وبان الأدهى والأمر واللبس المنتهي اللي كانت لابسته وماخلا شيء إلا وستره!!، كانت لابسه تنوره مشجره ابيض بأسود برمادي قصيــره لفوق الركبه ومعاها لابسه بودي أسود سواريه ظهره عاري تماما إلا من خيوط متداخله بشكل عشوائي ولابسه فرجلها جزمه بكعب بخيوط دقيقه متداخله بنفس ألوان التنوره الله يعزكم،، وشعرها مقصوص فراوله ومستشور إستشوار عدل ،، والمكياج كنها رايحه لعرس قاعده تطالع البيت من فوق لتحت بنظرة إشمئزاز وقرف ،، كان بعض الجدران متصدعه بفعل عوامل الزمن وبعضها متعريه من الصبغ ،، قطع عليها تأملها دق على الباب الفاصل اللي بين الرجال والحريم وفتحه بشكل خفيف وصوت نايف من وراه ينادي امه..
تأكدت أنه نايف من صوته اول مادخلت وأكدلها اكثر ان مافي احد له ام فهالبيت غيره ابتسمت بخبث وقعدت تصلح فشعرها بسرعه وتعدل فلبسها وتضبط البدي بحيث تكون أكثر اغراء !!
أما نايف بعد ماشاف من أمه رد ولاسمع أي صوت عرف ماحوله احد فتح الباب ودخل راسه عشان يصوت بصوت أعلى ،،
انصدم من اللي شافه وبلمت عيـونه وفغر فمه ،، شهـق بقوه وطلع ورجوله ترتجف ..
اما عندها ضحكت بصوت خفيف مستهزيء وتقول فخاطرها: ياحرام ماشاف خيـر!!
دق جرس الحريم ودخلت أم راشد وبنتها وشغالتهم من باب الحريم وبسرعه تلفتهم أم نايف وحافتبهم ورافتبهم وقالت لهم جميع يدخلون مجلس الحريم لأن أم عبدالله جالسه فيه تنتظرهم وهي دخلتهم وراحت تكمل شغل فالمطبخ،، فقامت نهى وسلمت عليهم كما السلام الأول وقالت تدخل معهم حب استطلاع ليس إلا تبي تشوف هالأم عبدالله منهي اللي تنتظر والكل بيدخل عشانها ..
دخلوا عليها فالمجلس وكان كنب أرضي مرتفع بســـيط جداً لكن محلويته التحف والطاولات اللي معطته منظر ،، شافتها نهى حرمه عجوز ولعنت شكلها اللي جمعها مع هالعجز وجلست فطرف المجلس من دون لاتسلم ،، أما أم راشد وبنتها الي شاله بنيتها وجهوا يمها بشوق كبير وكانت بتقوم لهم لوما حلفت عليها أم راشد ماتقوم ووطت على راسها وجلست جنبها وهي تفح من المشي ووطت عليها سميره وخذت منها بنتها دانه وباستها ورجعتها لها ..
أم عبدالله وهي تطالع نهى بنقمه وتكلم أم راشد: ذي لكم ؟؟!!
أم راشد بعفويه تجنن: لاان شاء الله ،، الله يكفينا الشر
أم عبدالله : يادافع البلا وشهي مسويتن بعمرها ،، عز الله بتنطبق علينا السما ياالله ياربي لاتواخذنا بذنوبنا
أم راشد وهي تحط طرف إصبعها في المنطقه اللي بين شفايفها وخشمها: ياالله لاتبلانا مابقى شيء ماطلعته أعــوذ بالله تقل متعريه!!
سميره بضحكه مكتومه تغير الموضوع : حياالله خالتي وشلونك فديت عمرك بشريني عن صحتك وطمنيني عن حالك
ام عبدالله: الله يجمل حالك وأحوالك ابشرك بنعمه الله يرضى عليك ،، أنتي وش علومك ياام راشد ياكـافي قطعتينا مره معاد نشوفك
ام راشد: تعرفين ياوخيتي البير وغطاه لابغينا الطلعه شفنا الشين ليـن نطلع وولدي راشد من الشهر للشهر لين أشوفه
أم عبدالله : وهو ماانفك باسه
أم راشد : في رجاء الله ياام عبدالله ،، الله لايحرمه من رحمته
أم عبدالله : الله كريم ياوخيتك الله قادر وأنا اختك على كل شي ،، مايكتب شيء إلا فيه الخير وان كان وليدك مظلوم ترا حقه مايضيع عند رب العالمين
سميره بابتسامه : خاله وين البنات ماشوفهم
أم عبدالله : والله يابنيتي علمي علمك كود انهن يتزينن ترا يومهن سنه
سميره : هههههه الله يعين أجل بقوم اشوفهم
وتطلع سميره بعد ماخذت طرحتها وشلت بنتها اللي كانت ماخذه طول وعرض فالمجلس وطلعت من الباب وهي تناظر نهى من فوق لتحت بإحتقار ونهى ترد لها النظرات بأقوى منها
وجهت للمطبخ وحصلت فيه ام نايف واقفه عند الفرن تنتظر القهوه تفوح إبتسمت لها بحب وقربت منها سميره وباست راسها وخدها وقالت : والله ياني مشتاقتلك ياخاله
أم نايف: بايـن مره كل يوم والثاني اشوفك من كثر الشوق
سميره ببسمه: يـوه ياخاله لاتشرهين علي كنك ماتعرفين الحال والله ياحبكم فقلبي مايعرفه غير رب العالمين ،، أفضالكم مغرقتنا من أقدامنا لروسنا الله يقدرنا على رد جمايلكم علينا
أم نايف وهي تربت على كتفها: حبيبتي مابي أسمع منك هالكلام مره ثانيه ،، والله ياغلاك مثل غلا حياة ماتفرقين عنها شي
سميره : إلا صدق وينها الدبه كل ذاه تزيّان عشاني
أم نايف : هههههه والله مدري عنهم حتى البنت لها فتره جالسه ومحد نزل لها
سميره تتذكر:ايه صدق من هذي ؟
أم نايف: علمي علمك تقول صديقة مهره وأنا شاكه فهالشيء ماظنيت مهره تعرف مثلها أعوذ بالله شفتي وش لابسه
سميره : الله يهديها ويصلحها
حياة وهي مقبله من وراها : وش تســــــوين مختليه بخالتي من وراي هااااا
سميره : ههههه وش أسوي أحبها أكثر منك
حياة تسلم عليها وتضربها بخفه على كتفها: تستاهل ام نايف الحب كله
غاليه: يــوه وشوله تسلمون أبي أفهم كل يوم مع بعض فالمدرسه وبعد تسلمون مامليتوا من بعض!!
وتقرب منها وتبعد حياة عنها وتحظنها بقوه وتقول بشوق: يــــامرحبا والله ومسهلا ،، والله لك وحشه غير طبيعيه حرام عليك ست شهور ياالظالمه مانشوفك
سميره والدموع مغرقتها على الحب اللامعقول عند هالناس تقول: والله والله غصب عني مشتاقتلكم أكثر من كل شيء لكن ماباليد حيله
مهره توها تدخل تشوف دموع سميره : الله الله جات سميره بأفلامها معها ياللااا يااللااا بياع كلينكس بياع كلينكس بنص ريال بنص ريال
وتوجه يمها وتحظنها بحظن مشتـــــاق : وحشتيني مـــوت
سميره : فديت روحك ياروحي والله أنا أكثر كيفك وكيف التخرج معك
مهره : ههههههه ذكرتيني وأنا كنت بنسى ،، مالت عليهم غاليه وحياة محد نسوني اني خريجه ،،الإمتحانات قربت ولحد دلعني واهتم فيني منهم بس خالتي جعلني قبلها واصلا فديتها على الفاضي والمليان مهتمه لكن ذاالثنتين السوسات محد عطاني وجه منهم ،، أقولهم ياناس ياعالم تراني بلغتنا سن الرشد والأهم باقي كم اسبوع واتخرج لكن هم مالت عليهم مكبرين ذاالروس!!
غاليه وهي تلاعب دانه : هااه وش يعني تخرجتي!! بتنضمين إلى فئة هلمـواا إلى النوم خليك في كليتك أبركلك على الأقل ملتهيه في شي
سميره : يلعن أم التحطيــم ياشيخه
مهره وتاخذ دانه وتبوسها بقوه خلتها تصيح : ههههههه لاماعليك متعوده لاتاخذين فبالك ،، المهم شخبارك أنتي وشخبارالتدريس وياك
سميره : لحول ذبحتي بنيتي ماصارت بوسه يالمشفوووحه
حياة: ههههه عز الله ،، مسكينه أختي بس مطيحه تبويس فذالبزارين اللي فالنت لو يدرون بشكل بوستها كان حرموا مره ثانيه يشتهرون
غاليه: شوفوا أنا أدري إن هذي تلميحات مالها داعي لكن أنا مارح أعطيكم وجه لأني مابي أتنرفز هذا أولا ثانيا لأن هذي حكمة ربي ثالثا لأني متحمسه عـ الأكشنات اللي بتصير بعد شوي
أم نايف تدخل المطبخ بعد ماودت القهوه وكنها مستعجله : يابنات البنت جالسه بلحالها عيب عليكم أنتوا قاعدين تضحكون وتسولفون وهي مرتزه كنها جنيه لحالها
سميره: بنات من هذي صدق؟ شكلها مايطمن مره
حياة تمشيبها وهي ماسكه يدها: بعدين أقولك صادقه خالتي تأخرنا عليها
سميره: لاجد وش هالتكشاخ كلـه عليكم ،، ياحبيلكم كل هذا عشاني ياجعلني مابكيكم
حياة : لاتستانسين مب عشانك منتب غريبه ،، عشـانها
ودخلوا كلهم مع بعض وسلموا عليها أول بما إنها فطرف المجلس ولاعت كبودهم من شكلها واحتارت هي أي فيهم مهره ،، تقدموا لصدر المجلس عشان يسلمون على أم راشد وراحت غاليه تناديها تجلس معهم بما انها أجرأ وحده فيهم ..
نهى بدلع ماله داعي: لا حرام عليك والله مستحيه
غاليه تناظرها بعيون مكذبه : لااا وش مستحيه عادي كلنا فري وبتقدرين تاخذين راحتك
نهى: انتي مهره؟
غاليه : امممم مب قلتي تعرفينها ياللااا وريني شطارتك
نهى بحرج درت إنها نغزه وقالت : لااا أعرفها بالصيت لكن الشكل ماعرفه ،، أكيد أنتي صح؟؟
غاليه: لااا مب أنا ياللااا تعالي
وتقفي غاليه متعمده وحستبها تمشي وراها ،، جلست غاليه على الأرض وحطت دلة القهوه قدامها وقالتلهم كلهم يجلسون معها أريح وألّم ،، وبالفعل الكل جلسوا على الأرض إلا أم عبدالله وأم راشد بحكم إنهم مايقوون عليها بتعور ركبهم ونهى بحكم البرستيج تبعها ..
وسوالف عند هم كلهم مالها آخر مادخلوا نهى فيها بأي شكل من الأشكال ،، حاقرينها بعمد ليـــن خلوها تكره عمرها وقالت بهمس وهي توطي راسها لسميره اللي جابها الحظ الزين جنبها : لو سمحتي اختي وين مهره ؟؟
سميره بدهشه: هااا
نهى: وش فيك ماتسمعين أقول وين مهره فيهم الصراحه شاكه إنها ياهذي ياهذي " وتشر على حياة ومهره" لأنهم يتشابهون كثير
سميره بحسن نيه تشر على مهره : هذي
نهى تتسند وبإبتسامه خبيثه تقول بصوت عالي: مهره
مهره دق قلبها بقوه وطالعت غاليه على طول وبعدين ناظرتها وقالت : هلاا
نهى: ممكن تجين جنبي شوي
مهره تناظر غاليه كنها تتوسل لها تساعدها : ايه أكيد ليش لاااا
قامت مهره وقلبها يدق بقوه غير طبيعيه الخوف متمكن منها بشكل ،، ماعملت حساب أبد انها بتجلس معاها لحالها،، مشت بثقه عكس الي بداخلها وصلت عندها وناظرتها بجفاف وجلست بعيد عنها شوي وقالت بهــدوء : هلا
نهى بإبتسامة انتصار: هلابك وراك كني باكلك اقربي تراني حبوبه
مهره بجديه: لامرتاحه كذا
نهى: اممم اوكيه
مهره: وهذا انتي جيتي ممكن أعرف وش وراك؟
نهى: صدقيني ماوراي شي مجرد تعارف ليش مكبره الموضوع !!
مهره: خلاص تعرفتي
نهى : لا بعدني بسم الله من جيت وانا مع ذاالعجز
مهره بثوره: لو سمحتي احفظي لسانك
نهى بابتسامه مستفزه: واااو عصبتي
مهره تتسند : ابي اعرف الحين شتبين
نهى: صدقيني مابي شي حبيتك من سمعت عنك وقلت إلا أعرفها من قرب
مهره :حليلك انتي كل من سمعتي عنه رحتي تركضين له !!
نهى عرفت انها نغزه توقف وتغير الموضوع: ياللاااا أنا ماشيه مشكورين على الكرم ماقصرتوا .. ولاتحاتين ميمي أوعدك بزياره ثانيه
وتشر على الكل بكفها بحيث تشملهم كلهم وتقول بميوعه : بـــاااااااااي
وتاخذ عبايتها وتطلع وتقول مهره بصوت عالي : فكـــــــــه
ويطالعها الكل وتقولها خالتها أم نايف بـ استغراب: روحي ودعي ضيفتك مايصير تطلع منها واليها!!
مهره: تخسي والله ماروح وراها مثل مادخلت تعرف تطلع
ام عبدالله بغل: ايه والله تخسي مب لبس اللي عليها عزالله بيعاقبنا ربي اليوم
ام راشد: الله يصلحها ويهديها
ام نايف: دامك ماتبينها وشوله تعرفينها
مهره :والله ماعـر...
غاليه تقاطعها منقذه للموقف:لايمه هي مب ماتبيها بس ماتعجبها تصرفاتها..
اما برا فالسور واقفه بالشكل اللي دخلت فيه تنتظر السياره تجيها ،، طلعت جوالها اللي كان يرن وقالت : هلا عيوني
-- : هلابك طلعتي
نهى: ايه انا فالسور الحين
--: وهااه سبع ولاضبع
نهى: لاهذا ولاهذا تونا ماتوصلت لشي بسم الله من جيت اول شي لطعوني ساعه تحت وبعدين يوم جاو جلسوني مع عجز الحمدلله والشكر
--: ماشفتي نايف ؟
نهى: مدري شفت واحد اول مادخلت حسيت انه هو مثل ماوصفته لي،، شكله وسيم حيل ،، نحيف اسمر بسكسوكه وعيونه غايره
--: اوك نكمل فالسياره انا فالمكان اللي نزلتك فيه يااللااا اطلعي
وتطلع نهى وتشوف نور السياره من بعيد ووتمشي ليــن وصلت وركبت بنفس الغنج اللي نزلت به،،..
نهى:هـااااي خلودي
خالد: اهلين كيفك
نهى: بخير بس الصراحه الصراحه احسن شي طلعتبه من هالزياره اني شفت نايف وااو شكله يجنن حرام تنتقم منه شكله طيوب
خالد ببرود: انتي الطيوبه ماتعرفينه كثري ،، المهم وش سويتي مع مهره
نهى: نفس ماقلتلك من شوي ماصار شي عليه القيمه لكن استغربت !! معطيهم أكبر من حقهم بكثيــــر ،، حتى مهره مب بذاك الجمال اللي يذبح صح انها مملوحه وجسمها حلو وطولها احلى لكن ماتستاهل هالسالفه كلها والله انصدمت يوم شفتها ،، حتى بيتهم ووووععع متصدع ومصدي وحالته حاله
خالد: والله هذول الناس مايسوون ظفر رجلي ،، لكن انا قلتلك نايف والله ليشوف مني شي يعاف نفسه
نهى:اللي اعرفه منك انه نقيب يعني المفروض تخاف منه!!
خالد:خله يوريني شطارته استقوى علي ذاك الزمان يومه توه ملازم ودخلني السجن على باله يقدر علي لكن قلتها والله لأنتقم منه وخله يوريني وش بتسوي رتبته ..
\
:
بعد صلاة العشاء فـ الفور سيزون جالس سعيـد على احد الطاولات الفخمه ويهز رجله بتوتر بين عليه انه ينتظرله احد ،، عيونه معلقه على مدخل المطعم ينتظر بربكه الطله اللي ياما وياما ضناه الشوق لعناقها ،، شوي تهلـل وجهه وإستبشر باللي دخل لتوه وقف عشان يدله على مكانه إلادق جواله ....
.
.
يتبع
":":":":":":":":"
" حيث لم تل ّــم "
|
18-05-07, 11:12 PM
جديد مواضيع قسم القصص المكتمله
العرض العادي
