كاتب الموضوع :
brune
المنتدى :
القصص المكتمله
الا وام جراح اللي سمعت حسه طلعت له في الصالة..
ام جراح: ها يمة وصلت..
خالد وعيونه على سماء باستغراب وبضحك يعمر خفوقه كله: أي خالتي.. تعالي خالتي انتي موظفة فراشة هني؟
انصدمت سماء وكشرت بظروسها .. ما ايووز يعني هذا؟؟
ام جراح : عيب عليك تقول جذي.. يمه سماء لا تواخذين عليه..
سماء ظلت ساكتة لانها ما تحب تتكلم في حظوره.. مرة تكلمت ووكلها الخ ر ة اليوم ما تبي تعيد الشي مرة ثانية..
خالد وهو يقعد على الكرسي وبعينه نظرة الشماتة والضحكة اللي مو قادر يحبسها: ايه تعالي الطاولة هني مغبرة نظفيها..
ام جراح: يمه عيب..
خالد: الا بقول لج انتي جم تاخذين على الساعة لو لج اجرة محددة؟؟
خلاص اهني خلص صبرها سماء وهي تعطي المنظفه لام جراح: خالتي انا بروح البيت بعدين لي صفا الجو بييج
خالد: شكله ما بيصفى.. خالتي تدرين النشرة الجوية شتقول ان جو الكويت وبالتحديد منطقتنا ما راح تنقشع الغيوم.. البيضاء طبعا..
سماء وهي تضرب بريلها على الارض.: مع السلامة خالتي...
ام جراح: يمة سماء تعالي وين رايحة...
داعب الاسم مخيلة خالد.. سماء.. اسمها سماء... شهالاسم الغريب والعجيب... صج انه اسم حلو... اسم على مسمى..
ام جراح وهي متلومة: زين جذي هييت البنت.. والله انك سود الويه
خالد: هههههههههههههههههههههههههههههههه
ام جراح: تضحك.. صج لي قالوو مصائب قوم عند قوم فوائد...
وراحت عنه المطبخ.. وبس اختفت الخالة نقز من مكانه على طول وسرع عشان يلحق .. سماء..
الثانية كانت تمشي واهي معصبة حيل على الموقف اللي صار.. هذا وانا الي حاسبه له حساب الاوادم.. صج لي قالو جليل حيا وذيل الجل....
ما كملت الفكرة في بالها لانها تسمع احد يناديها.. التفتت.. الا اهو.. الجل....
لحق عليها خالد وهو يناديها ويوم وقفت مشى لها بسرعة في وسط الشارع.. ووقف بعيد عنها بخطوات واسعة... وظلت اهي واقفة وعاقدة ذراعينها.. ومن غير ما تتكلم
خالد: انا ما كان قصدي كنت اتغشمر..
ظلت البنت ساكتة
خالد استغرب سكوتها يعرفها ام لسانين: بس اشوف انج عقلتي وتسنعتي.. الحمد لله انا والله معتبرج مثل اختي الصغيرونة من جذي اعافرج واناحسج..
هذا اللي ناقص بعد.. يناكدني اوكية.. معيشني في قهر هم اوكية.. لكن توصل فيه المواصيل انه يخليني اخته الصغيرة.. في بالها كلمة اخته ما كانت راكبة كلش ملش.. وانهد رباط لسانها
سماء: هي.. لو سمحت انا ما عندي الا اخو واحد ومكفيني وساد عيني بعد.. جان انت تبي خوات كاهم بنات الدنيا خاوهم.. انا مالك شغل فيني لا ني اختك ولا انت اخوي.. سامع..
انصدم خالد من كلامها لكن ضحك عليها: ههههههههههههههههه اذا مو اختي شنو ان شاء الله اصلا كلنا من ابو واحد وام وحدة
سماء: يا يا يا أي نوو.. ادم وحوا صح... بس انا متبرية منك وما بيك تكون اخوي اوكية..
خالد اهني برطم..: الظاهر اني عطيتج ويه اكثر من اللازم.. يالله عن اذنج يا ... اختي.. هههههههههههههههههههههههههههههههههههههههه
راح عنها وهو يضحك عليها واهي من قهرها تضرب على الارض بريلها.. الكريه .. السبال الماصخ المايع.. اكررررهه.. ئال ايه ئال اختي.. مالت عليك .. بالخمس..
خالد اللي دخل البيت وهو يضحك.. وام جراح كانت في الصالة تكمل اللي بدته سما وكانت بتخلصه لوما حضور خالد...
ام جراح: شفيك تضحك؟
خالد: ههههههههههههههههاي.. على هالنكتة اللي اسمها... شنو اسمها يا ربي؟ ايه ايه .. سمااااء.. شهالاسم.. انا اول مرة اسمعه.. خوش كاتبة هذي والله اسماء ما دري من وين يايبتها..
ام جراح: استح على ويهك بنت لا تعرفها ولا تدري اهي من تتكلم معاها بهذي الطريقة.. وين السنع خلود؟؟ انا علمتكم جذي تحاجون البنات وترفعون الكلافة
خالد: خالتي هذي مينونة رقلة.. انا اعرفها من فترة.. وما فيها شي بحسبة اختي الصغيرة..
ام جراح: هم بعد.. اهي لها اخوانها اللي مابيرضون عليها اتكلم واحد غريب.. وعيب تكلم البنت مرة ثانية مابي اشوف هالتصرف منك.. سامع..
خالد وهو يقوم ويحب راس خالته: ان شاء يالله يا بعد هالناس كلهم... يالله خالتي عن اذنج..
ام جراح:وين؟
خالد: بروح لفاضل واحنا رايحين مكتب مساعدالدخيلي عشان التوظيف
ام جراح: الله يوفجكم بمشيئته ويا رب فاتحة خير عليكم انتو الاثنين..
خالد وهو ميود على قلبه: آآآآآآآآآآه من هالادعية والله قلبي انا ما يتحمل...
انا احبك واحبك من دون الناس.. يالي ملكت قلبي وخليته جميلٍ حساس..
اعشق اسرارك وافعالك يا كايدهم.. واحب اطريك انت من دون الناس..
ام جراح بابتسام: صح لسانك
خالد: صح بدنج.. يالله خالتي في امان الله
ام جراح: في حفظه ورعايته.
***********
واهم في الانتظار في المستشفى راحت مريم ويا اخوها عشان الفحوصات اللي مسرع ما انتهت تحركت مريم وراحت لوين دار فاتن.. حطوها في احد غرف العلاج وجراح مافارقها مثل الظل.. ومساعد اللي كان حاط سالفة مريم محط انتباهه عشان لا يتشتت تفكيره ويتوتر بسبب فاتن.. كونها تعبانة شي.. وكونها طايحة هني في المستشفى وهو ما يقدر يسوي شي هذا اكبر من احتماله.. يتمنى لنفسه العذاب ولا انه يشوفها معقدة الحاجب تشكي من آآه.. صعب على قلب المحب انه يشوف حبيبه يتألم ويتعب وهو ما يقدر يلبي النداء..
دخلت مريم الغرفة وشافت جراح قاعد عند السرير وهو ماسك يد فاتن ويلعب في صوابعها والثانيا نايمة على جهة اخوها والمغذي في دمها والحجاب مايل شوي عن راسها..
راحت مريم صوبها بخفة وانتبه لها جراح وهي تعدل الشيلة على راس فاتن بطريقة انها ما تصحيها ولا انها تخنقها.. والثاني عيونه على هالملاك اللي مسيطر على كل مشاعره مثل المالك..
انتبهت مريم لعيونه وبحيا ابتسمت له: شخبارها الحين؟
جراح: نايمة واحسن بعد لانها ما نامت من فترة...
مريم وهي بتطلع: بس عيل انا بنتظر بره ولين صحت نادني
جراح وهو يقوم: ما يصير انتي تمي هني وانا بروح بره
مريم: لاا ما يصير..
جراح وهو يسكتها: ما اتحمل فكرة انج بره بين الناس الرايح والراد يشوفج.. تمي هني بين هالستاير اريح لج.. واريح لقلبي...
ماتت مريم من كلامه وتخزبقت وصار ويهها بالوان اشارة المرور.. واااي قلبي بموت انا ما اليوم.. شكلي انا بترقد يمج فتون بسبب اخوج.. يدري ان كلامه يسوي فيني شغل لكن ما يستحي .. فديت عمره هالجليل حيا...
طلع من عندهم وخلى وراه الشماغ والعقال والطاقية.. ومن اختفى على طول مريم قعدت مكانه وتمت تتلفت تتاكد انه اختفى تماما.. وجان ترفع الشماغ الاحمر وهي تشمه المينونة ومستخفة على الريحة.. هذا عطره مايغيره.. ريحته نفسها نفسها.. شلون اعرف؟ لاني من يوم وعيت على هالدنيا وانا اشم هالريحة منه... أأأأأأه يا قلبي..
فاتن اللي صحت من يوم دخلت مريم لكن ما فتحت عيونها ويوم حست ان الجو فظى لهم فتحت عيونها وشافت مريم المينونة تشم في الشماغ بطريقة شاعرية..
فاتن: الحمد لله والشكر..
انتفضت مريم وهي مفتحة عيونها وطاح الشماغ من يدها ويوم شافت فاتن مفتحه: سود الله... (انتبهت ان فاتن صاحية) فتووووووووون حبيبتي خطاج السوو
فاتن: خطاج اللاش .. (بتعب) الساعه جم ريم؟؟
مريم تناظر ساعتها: الحين 12 ونص..
فاتن فتحت عينها: اووووف.. صار لنا ست ساعات واحنا هني؟
مريم: بعد لازم مو الاميرة الموقرة طايحتلنا بدلعها ودلالها...
ريخت فاتن راسها واهي تعبانه : هذي انتي واللي تعرفين اكثر منهم تقولين لي جذي؟
مريم: فتون.. ايه انا احبج واعزج واموت في دباديبج بس.. اللي انتي كنتي تسوينه في نفسج غلط وانا كنت الومج من البداية عدل لو مو عدل..
فاتن: يعني انا مخططة عشان كل هذا.. اني اطيح واتعب.. بالعكس انا لو ما كنت خايفة من هالنتيجة جان ما نزلت المستشفى اليوم الصبح ويا جراح.. جان ظليت في البيت بتعبي
مريم: لكن شوفي النتيجة... طحتي في الباركات وزيغني جراح وموتي اخوي من الهم والغم وهما الاثنين مو عارفين شنو يسوون فيج
فز قلب فاتن يوم يابت مريم طاري اخوها انه مهتم ومنغم لحالتها.. هذا شيبي فيني عشان يحس كل هالاحساسات: واخوج شكوو
مريم بتفكير واهي تحوس شفايفها يمين ويسار: فتون انا اليوم صج كنت متظايقة على حالج لكن هذا عطاني فرصة اني اراقب الوضع زين.. ولاحظت ان اخوي مساعد...
ما كملت واهي تعقد صوابعها ببعض وفاتن اللي كانت تسمعها باهتمام : كملي شفيه اخوج؟؟؟ شلاحظتي عليه
مريم: فتون انتي صح ارفيجتي وحبيبتي وانا وياج امية بالامية .. بس انا اليوم لاحظت ان مساعد اخوي..... يحبج..
فاتن وهي تفتح عيونها: شقلتي؟؟؟
مريم: يحبج..
فاتن: وليش تعيدين الحجي؟؟
مريم: انتي اللي سالتيني شقلت وجاوبت عليج
فاتن: انا كنت اظن انج يمكن ينيتي زيادة.. ولا اقول لج.. يمكن عطر شماغ جراح خبلج.. اقول روحي غسلي ويهج بماي بارد احسن..
مريم: ليش عاد كل هذا لاني حسيت ان اخوي يحبج... مافيها شي فتون عادي..
فاتن بصدمة: انتي تبين تجلطيني اليوم؟
مريم:هههههههههههههه قاصرة انتي لا حبيبتي مابي اجلطج ولا شي.. بس هذا اللي انا حسيته وانتي كيفج... بس هاا انا معاج امية بالامية
فاتن وهي تحوس شفايفها بحركة مماثلة لحركة مريم: ايه باين...
وتمت تفكر... فاتن هذي الواحد لازم ما يقول لها شي لانها من تسمع شي خلاص تطيح في دوامة لا بداية لها ولا نهاية من التفكير عن الشي.. اخوها يحبني؟؟ هذا يعرف ايحب؟؟اصلا هذا فيه قلب عشان يحب؟؟ لو فيه قلب جان ما سوى اللي سواه بهذيج الليلة معاي ومع مشعل.. بس .. .اهي لو تذكر معاملة مساعد كانت دايما من افضل ما يكون معاها.. الا من شاف مشعل عند باب بيتهم.. والا اهو كان دايما اوكية معاها ومعاملته مافيها شي... بس اهي اللي بنت حواجز كراهية بينها وبينه من غير أي داعي او سبب.. بلى اكو سبب.. كفاية انه يوقف بينها وبين مصيرها مع مشعل واهو الريال اللي مخطط انه يكون زوجها وشريك حياتها اللي ما تبيها لو كانت معاه... بس ... اهي ليش ما تبيه يكون زوجها؟؟؟ لانه مستبد ومسيطر وانا ماحب السيطرة.. اصلا انا ماحبه عشان افكر فيه بهذي الطريقة وزواجي منه امر مستبعد تماما... اوووووووووه يا ذي الحالة...
كانت عاقدة حواجبها واهي تفكر ومريم اللي كانت مشغولة بالشماغ .. الا والدكتورة تدخل عليهم....
الدكتورة: شلونها الفاتنة الحين؟؟ ان شاء الله احسن...؟؟
فاتن بابتسامة وهي تبعد الافكار او مساعد عنها: ابخير.. احسن عن قبل..
الدكتورة خليني افصحج اول شي.. بعدين يصير خير....
وتمت الدكتورة تفحص ضغطها ونبضها وهالامور اللازمة... وكانت النتيجة الحمد لله سارة..
الدكتورة: زين.. احسن عن الصبح بوايد... فاتن شوفي حبيبتي.. انتي لو تبين انا اقدر احيلج على دكتور نفساني ممتاز هني عندنا بالمستشفى.. اهو اخصائي واستشاري ولااحسن منه.. تقعدين معاه باجي الوقت ويحاجيج وتكلمينه وتفشين عن خاطرج معاه
مريم بدهشة: اتكلم دكتور نفساني؟؟ ليش انتي ينيتي فاتن؟؟؟
الدكتورة: لا يا حبيبتي الدكتور النفساني مو بس عشان الميانين.. ناس وايد عقال يروحون له ليمن تظيق الدنيا عليهم ويبون احد يفهم في امورهم ويقدر يحلها لهم .. مع ان الحل الاساسي يكون في يدهم
مريم: عيل لا تحطين بالج وما نبي هالدكتور لاني انا احسن دختورة مو فتون؟؟
فاتن بابتسامة: أي نعم.. دكتورة انا عندي احسن من اطباء العالم كلهم باستثنائج الا وهي مريم..
مريم بفرح: فديتج يا نصي الثاني..
الدكتورة: ههههههههههههههه الله يخليكم لبعض ان شاء الله ...
فاتن: زين دكتورة متى اقدر اطلع من هني؟
الدكتورة: بس يخلص المصل روحي بس هاا فاتن ما وصيج.. نامي زين وكلي زين ومارسي رياضة لو تقدرين وريحي اعصابج قد ما تقدرين.. وخلي اتكالج على رب العالمين وبتحسين بهذاك الوقت ان ما كو شي احسن من الاتكال على رب العالمين لانه يحمل همومج وغمج وتوجهج له يثيبج عليه.. اهو منفعة من الصوبين.. ثواب.. وعافية...
فاتن بابتسامة راحة: ونعم بالله ... انا بحاول وان شاء الله اقدر
الدكتورة وهي تمسح على راسها: انا متاكدة انج راح تحاولين.. ويالله عاد.. خلي هالعيون الحلوة يرد لونها ويرد جمالها..
فاتن والعبرة في خاطرها: ان شاء الله..
ابتسمت الدكتورة وطلعت من عندهم...
مريم: باين عليها بنت حلال
فاتن بابتسامة رضا: الله يوفجها ان شاء الله...
وبعد فترة صمت بين الثنتين مريم اللي بدت الكلام وفاتن كانت مسكرة عيونها..
مريم: فتون.. شعن الدراسة؟؟؟
فاتن تنهدت .. شعنها .. ما تدري؟؟
مريم: يعني انتي بتروحين ولا لاء؟؟؟
فاتن وهي تفتح عيونهها.. وفي نفس اللحظة مساعد كان واقف عند الغرفة يتكلم مع الدكتورة...
وعن غير قصد سمعها..
فاتن: الدراسة هذي يا مريم صارت مصيري.. شي الناس حاطة كل آمالها عليه.. وانا بعد .. جزئيا او... يمكن كليا حاطة كل اآمالي على هالدراسة اللي راح ترسم مصيري ويا حياتي...
مريم بابتسامة حزينة: يعني خلاص.. انا وانتي.. راح انتفارق؟؟
فاتن وهي ترفع نفسها وتشد على يد مريم اللي كانت بيدها: ما عاش اللي يقول هالكلام.. انا واتني روح وحدة في جسدين. شلون تبينا نتفارق؟
مريم وهي تمسح دمعة سالت: لا بس... احنا عمرنا ما تفارقنا مرة.. بس مرة يوم انا كنت في العمرة قبل سنتين.. وبس..
فاتن بنبرة معارضه: هاااا؟؟ من قال... اهي بس العمرة اللي انتي رحتيها.. يوم رحتي جدة السنة اللي فاتت.. ولبنان قبل ثلاث سنوات؟؟ والسنة اللي فاتت يوم رحتي بعد البحرين؟
مريم: نعنبووووو غيرج مسويه لي مذكرات...
فاتن: هههههههههههههههههههههههههههههههه امزح معاج... ههههههههههه
مريم : فتونة...
فاتن وهي تضحك: ههههههههههههه هاا...
مريم بخبث: ومساعد؟
اهني توقفت ضحكة فاتن بشكل مضحك خلى مريم تنقع من الضحك: هههههههههههههههههههههههههههه عنبوووووووو زاد غيرك يا خوي كابوس ههههههههههههههههه
فاتن: عيب.. لا تقولين جذي على اخوج
مريم بصدمة وهي بعدها تضحك ومساعد الثاني اللي كان يتسمع كلامهم...
مريم: شعندها .. من امتى فتون؟
فاتن وهي تصد مكان ثاني: مهما كان هذا اخوج..
مريم بجدية: صج صج فاتن.. انتي مستعدة انج... تتزوجينه...
بذعر كبير واجهت فاتن هالكلمة وبانتظار وتوتر كبير انتظر مساعد منها الكلمة واخيرا... ياه الغيث...
فاتن: اللي الله كاتبه يا مريم بيصير... والله ما يبي انه يظلم احد بشي.. انا ما بقدم على شي... بخلي كل اتكالي على الله... هذا قدري واهو اللي رسمه..
مريم لا اراديا ارتاحت من كلمة فاتن لانها كانت بعض الشي .. يعني مو وايد شويه.. موافقة على الزواج من مساعد...
مساعد من بعد كلام فاتن كان مثل الواحد اللي ينصب عليه ماي بارد من بعد نار حارقة... مثل المجروح اللي ينحط المرهم على جرحه ويبريه.. وتسند على جدار الغرفة وهو مرتاح نفسيا وهو مسكر عيونه.. ما ابالغ لو اقول ان الدمعة كانت متجمعة في عينه.. وما احلى هالدمعة.. لاول مرة تدمع عيون مساعد بالفرح...
بعد نص ساعة تحركو الناس.. ومريم اللي ظلت ويا فاتن ليمن ردت البيت.. طبعا مساعد اللي ظل واهي بحكمها راكبة معاه ظلت معاهم.. مريم المسكينة فرحت وبس حاولت تخبي هالفرحة بكون فاتن زوجة اخوها.. لان كل اخت ودها لو انها تكون ارفيجتها المفضلة اللي اهي واثقة منها ومن تصرفاتها انها تكون زوجة لاخوها.. بس فاتن اللي انصدمت من نفسها ومن رضوخها لهالشي.. يمكن اكثر سبب انها خلاص ما تبي تعاني اكثر... بس اهي ما وافقت.. اهي قبلت بالواقع من بعد ما رفضته.. والحين اهي في طريج يا انها توافق على الشي.. او انها ترفض..
جراح كان مرتاح لان فاتن كانت مرتاحة نفسيا اكثر وصحيا.. وتوعد على نفسه انه ما يفكها قبل ما تسافر بيخلي عافيتها ترد لها مرة ثانية... وهذا شي تحدي بالنسبة له اهو نفسه... لان ما ظل شي وفاتن تسافر.. اسبوعين او ثلاثة بالكثير واهي باميركا.. ويبيلها تشتري لنفسها اغراض وحاجات .. وفي هالرحلات المتعددة راح يكون وياها خطوة بخطوة..
قبل لا تنزل فاتن: جراح ما بيك تقول لامي شي عن اليوم؟
جراح: بس احنا وايد تاخرنا فاتن واهي اتصلت لي اكثر من مرة؟
فاتن: وانت قلت لها شي؟
جراح: لا لا شقول لها قلت لها انهم ياخذونج فحوصات وهالسوالف..
فاتن: لا زين عيل المستشفيات معروفين بطول فحوصاتهم.. يعني ماكو أي ضر.. بس مابيها تعرف اني طحت ولا غيروه!!
جراح: لا افا عليج انا قبلج في هالفكرة.. بس ها فاتن.. مابيج تسوين في روحج جذي مرة ثانية.. هالمرة انا وراج.. ان كلتي اكلت ان ما كلتي انا بعد وياج.. ان رقدتي برقد وان ما رقدتي بتلاقيني احلى سهير...
كمل هالجمله وهو يبتسم ابتسامة تينن القلب: ههههههههههههههههه ان شاء الله.. عشانك انت بس انا راح اسويه والا ااااا...
جراح: هاااااااا شقلنا...
فاتن: هههههههههههههههههههههههههههههههه
*******
مريم الللي وصلت البيت ونفس الشي وقفها مساعد عشان لا تقول أي شي لامه ووين ما كانو... ومريم طبعا اللي توافقت افكارها مع اخوها ما قالت أي شي ودخلت البيت وقعدت مع امها اللي كانت معصبة لسبب ماا.. بس ما حاولت انها تظيق عليها وانسحبت لغرفتها بهدوء وظلت هناك قاعدة تفكر في المستقبل...
ااااه يا دنيا.. كانا كبرنا انا وفتون .. وتحتم علينا القدر اننا انتفارق.. اهي تروح الغرب وانا هني بالشرق.. اشهد الشروق واهي تغرب عندها.. مادري ارسل لها حبي مع الشمس... ولا اشتياقي ويا القمر؟؟ اااه.. ما تعود على فراقج يا خويتي الحبيبة.. اله يعيني على فراقج... احبج فتون.. احبج....
وظلت تبجي الصديقة الحزينة على المستقبل اللي بدت بوادره بالحزن على قلبها.. لكن .. هذا الحزن راح يكون الوحيد والا راح تكثر؟؟؟؟ من يدري يا مريم...
الجزء الثالث عشر
الفصل الاول
------------------
مر الأسبوع الأول من قرب سفر فاتن وبدء السنة الدراسية الجديدة بسرعة بالنسبة لها ولأهلها.. لأنها كانت أيام سرقت وقتها كله.. يوم في المجمع ولا يوم في هالسوق ولا يوم في شركة المحاماة توقع على أوراق ولا إنها تقعد في جلسة مع نجاة الدلاهمي اللي ما توانت ابدا ولو للحظة انها تفوت جلسة وحدة مع فاتن.. طبعا من بعد تعليمات معينة من مساعد الي توصله أخبار زيارات فاتن اول باول واهو بمكتبه.. ما يسوي شي بس يقعد وهو ينتظر ويناظر الساعة وهي تطوف الوقت اللي يضيع عليه وهو يصمم ويفكر ويفكر ويفكر.. الخطوة الثانية من خطته لازم يتنفذ.. الا وهو انه يتقدم للخطبة ويملج عليها قبل لا تسافر.. اهو يدري ان هالشي صعب لذا راح يخليه لاخر شي.. وقت ما تفظى من التشري ومن إعداد نفسها..
جراح اللي ما فارق اخته في كل المراحل وخطوة بخطوة يمشي معاها هالدرب اللي كان ثقيل عليها لو كانت تأديه لحالها.. اهو اللي ما يخصه شي في هالموضوع ويحس بالتعب فما بالها فاتن اللي كل السالفة تتمحور عليها..
خبروهم ان السفر راح يكون بتاريخ 1\10 .. وما اقرب هالتاريخ.. وما اسرع مرور الايام ببال فاتن.. لكن اللي ريحها ان اخوها راح يكون مسافر وياها باول اسبوع عشان تتعود على البيئة اللي هناك وكان عندها اوراق كثيرة ومتعددة عشان تؤديها.. بس المشكلة اللي كانت تواجهم في الشخص الثالث اللي راح يكون من طرف الشركة.. نجاة ما كانت تقدر تسافر لظروف حملها ولا احد فاظي منهم عشان يرافقهم في هالرحلة.. ما ظل يعني الا واحد.. هيهيهيهيووووو .. مساعد ما غيره.. بس للحين محد كلمه بهالموضوع اللي من يدري يمكن ما يكون موافق عليه..
وقبل لا يردون البيت بهذاك اليوم قعدوا مع مساعد ويا نجاه.. عشان اخر التشطيبات على الاجراءات..
مساعد: كملتو الفحوصات؟
جراح: أي وكلها عند الاخت نجاه..
مساعد: زين و الرخص والفيز والجواز وكل شي؟؟
نجاه: كله زاهب وعند فواز الرجبي وان شاء بعد يومين راح يكونون عندي في المكتب..
وهالمرة السؤال كان موجه لفاتن: كملتي كل احتياجاتج..
فاتن وعيونها مفتوحة بكل بلاهة وبراءة: أي... ما ناقصني شي؟
مساعد كان ذايب بذيج النظرة اللي تحسسه بالذنب.. اهو اللي ما يحس في سوالف الشغل كان يتحسس من نظرة فاتن.. شلون ارمي هالبنت في فكوك الاسود والشياطين في اميركا.. ما بتتحمل اسبوع واحد هناك..
مساعد: بس عيل خلاص.. ما بقى شي كل شي زاهب
نجاه: لحظة بس مساعد.. (وهي تطالع الاوراق.. ) ماكو احد من طرف الشركة بيسافر معاهم.. هذا اللي ناقص بس..
مساعد باستغراب: شنو؟؟ وانتي مو رايحة معاهم؟
نجاه بنظرة واضحة: أي مو رايحة.. انا حامل والسفر مو زين لي.. اول شهوري..
مساعد بابتسامة: مو وقتج يا نجاه... الحين ماكو احد متوافر؟؟
نجاة: ولا احد.. مشاري بيسافر وفهد مو موجود وغسان بعد ... الا اذا... (وبنظرة خبيثة)
جراح اللي عرض الموضوع: ليش ما انت الي تسافر يا مساعد..
الاثنين في نفس الوقت مساعد وفاتن: لا..
وتناظرت العيون في بعض.. الحمد لله اول تشارك بالآراء مع انها مو في محلها.. يعني هذا مو وقت إيكونون متوافقين في شي مو في صالحهم
جراح اللي استغرب هالتوافق سأل: ليش زين؟؟ (وعيونه تتناقل بين الاثنين)
مساعد: لان.. لان انا .. اسمع.. هذي فترة مزحومة علي وقضايا كثيرة انا استلمها..
نجاة: كل شي تحت السيطرة هني ولا تنسى غسان بيرد بعد يومين وبيكون حاظر لك يسوي كل اشغالك.
مساعد: لا ابو زياد بيطلع اجازة وانا لازم اكون متواجد عنده..
نجاة: انا سكرتيرة ابو زياد وكل شي تحت السيطرة عندي ولا ماكو ثقة..
احتار مساعد.. ما ظل احد.. : زين انتي ما تقدرين على كل شي..
ابتسمت نجاة: مساعد... لو سمحت اسكت.. ويالله روح زهب اغراضك بتسافر
تظايقت فاتن من خاطر على هالخبر اللي ابد ما يسر.. الا يبط الجبد بس ما قدرت تتكلم او تقول شي فنزلت عيونها في حظنها..
مساعد لاحظ ظيقها ويمكن انقهر منه شوي.. لهذي الدرجة يعني.. قهرا لج يا فاتن: اوكية.. على بركة الله.. خلاص يعني كل شي زهب وما ظلت الا الفحوصات ونتايجها نرسلها بالفاكس..
جراح: وباجر ان شاء الله تكون زاهبة
ابتسم مساعد هني ورفع حاجب يكلم فاتن: خلاص عيل ما ظل شي.. يالله الحين اخليكم..
وطلع مساعد عنهم وفاتن اللي كان ودها لو تحط صبعها بعينه اللي تقهرها نظراتها.. صج انه يقهر.. اووووف..
جراح: فتون.. فتوون
واهي تنتبه من السرحان: هلا ..
جراح يبتسم: يالله فتينة خلينا نرد البيت..
فاتن : ان شاء الله..
وقبل لا يطلعون تكلمت نجاة: فاتن ابيج اتيين لي باجر بروحج. ابيج في موضوع هام بيني وبينج
فاتن: ان شاء الله
ابتسمت نجاة لهم: الله معاكم..
جراح: في حفظة وراعيته..
وهم طالعين مرو على مكتب مساعد اللي كان مفتوح وهو مو موجود فيه.. وتحركو الى المصاعد وجراح اللي كان يبين عليه التعب مفتح عيونه بالنص ويمشي.. وفاتن تمشي وراه او بالاحرى ملازقة فيه.. هذا طبعها مع اخوها او ابوها ليمن تمشي تلزق فيهم.. جنهم الا بيطيرون.. حتى ان الناس في المجمعات يوم كانت تمشي وياه يظنونهم مخطوبين او شي من هالقبيل مو اخو واخته...
ويوم وصلو عند اللفت سمعو صوت ضحكه ناعمة لبنت.. وبانت الرؤية.. كانت بنت حلوة لا بل خلابة وأنيقة واقفة مع مساعد عند المصاعد تسولف وتضحك.. والاكثر انه اهو يضحك وياها بعد.. وقفتهم كانت عادية جدا الا انها كانت من الاثر انها تخلي فاتن تبتسم ابتسامة سخرية مع حاجب مرفوع يوم انها مرت صوبهم
غزلان اللي كانت ما تدري من اللي وراها انتبهت للشاب اللي دخل المصعد انه هذاك اللي اهي تشوفه بالصدف.. رفيق رحلة المصعد على قولتها.. ويوم حست انه بيطير من يدها
غزلان: مسكو المصعد لو سمحتو (صدت لمساعد وبنبرة سريعة) يالله مساعد انا اخليك الحين..
مساعد: سلمي على الوالدة وزياد..
غزلان: يبلغ ان شاء الله..
ودخلت المصعد وتبعتها عيون مساعد الى عيون فاتن اللي كانت موجهة صوبه وكاننها تنتظر انتباهه.. وعطته ذيج الابتسامة الخبيثة والحاجب المرفوع اللي خلاه يفج عيونه من الغيض.. وما لحق الا والمصعد مسكر..
غزلان اللي اول ما دخلت كانت عيونها على جراح اللي كان موطيها وماسك زر الباب عشان لا يقفل.. ودخلت ووقفت بينه وبين فاتن.. وهذا اللي قهر فاتن اكثر... غزلان حست ان هذي الفرصة المواتية انها تكلمه.. تبي تسمع صوته .. ما يصير جذي ما تنام الليل من زود ماتفكر فيه..
غزلان بابتسامة دلوعه: الظاهر ان اكثر لقاءاتنا راح تكون في المصعد
جراح اللي استغرب من كلامها معاه.. او يمكن لانه مايتذكرها زين لكن ما عاملها بجلافة: الظاهر...
وسكت.. ما عطاها فرصة انها تطول اكثر.. لكن من على غزلان.. اللي تبيه تلاقيه ..
غزلان: انت تشتغل هني؟؟ ولا موكل؟؟
جراح اللي يطالع فاتن ويطالع البنت ونزل عيونه: لا الشيخة انا موكل هني..
غزلان: اهاااا.. ومن محاميك؟
(شهالبلوة) هذا كان في بال جراح: مساعد الدخيلي
غزلان باعجاب واضح: خووووووش محامي.. احسنهم.. المفضل عند ابوي..
جراح اللي عجبه الوضع وهو يناظر فاتن: ليش ابوج موكل هني؟؟
غزلان: هههههه.. لا.. ابوي صاحب الشركة..
فتح جراح عيونه بطريقة اندهاش حلوة.. خلت قلب غزلان يرفرف من حلاتها.: يا هلا والله
غزلان والحمرة في خدودها... : هلا فيك...
وصلت للاخر عند فاتن من مياعة هالبنت.. صج جليلة حيا.. شنو يصير لها عشان تتكلم وياه جذي.. من شوي مساعد والحين جراح؟؟ لا ما بقى الا خالد..
فاتن: احممم... جراح حياتي.. وصلنا؟؟
جراح: ها...
فاتن بعصبية: وصلنا يالله..
جراح: ان شاء الله..
ومن غير أي كلمة ثانية طلع من المصعد ووراه فاتن اللي كانت متغيظة على الاخر.. صج لي قالو بنات جليلين حياااا.. ويلي عليج يا مريم.. لكن هين يا جراحو
غزلان طلعت من المصعد واهي واقفة بحيرة.. من هذي البنت.. ما لاحظتها.. ما ظنتها ويا جراح.. اهو دايما ايي هني لحاله.. من وين هالبنت؟؟ لا يكون بس.. وفجت ثمها وغطته بيده: لا يكو ن بس خطيبته... ولا حبيبته؟؟؟ يا ويل قلبي.. بموت... شهالحظ يا غزلان...
وطلعت البنت مسرعة وراهم عشان لا يمشون .. وعند بوابة الشركة شافت سيارته اليوكن تتحرك بالطريج نفسه اللي كان يتحرك فيه.. بس الشي الزين اهي تدل بيته.. وتعرف وين ايصير .. مو اهو ولد جيران بيت خالتها... خلاص عيل مافي السالفة أي حسافة..
فاتن بغيض تهز ريلها في السيارة وجراح اللي حاس لها ساكت ومتحسف على هالجم كلمة اللي قالها للبنت.. الحين اكيد فتون بتوصل كل شي لمريم.. والثانية بعد انا ماقدر عليها.. بتحرقني بنظراتها سنة كاملة.. أي سنة ان ما كان العمر كله.. زين انا مالي ذنب.. مو ذنبي اني حلو وجميل واجذب البنات.. ويييييييه خل جمالك ينفعك الحين.. يوم الي بتشوهك فيه مريم.. وبدى اول خطوة في جس النبض... نبض فاتن طبعا..
جراح: فتون علامج؟؟؟
انفجرت فاتن: علامي.. ؟؟ علامي؟؟ لا يا اخوي ما علامي شي.. الي علامي اني توني عارفة ان اخوي جليل حيا وما يستحي.. لكن الشره مو عليه الشره على هالمزهرية المتحركة اللي من الف لون ولون متمايعة عليك وانت ابد ما صدقت خبر.. بالاول مساعد والحين انت.. يالله كملت السالفة.. ويلي عليج يا مريم.. صج لي قالو اللي ما يعرف للصقر يشويه..
بل بل بل بل بل ... قال لها كلمتين.. وماصارو كلمتين.. ردت عليه بسيل من الكلام الفاضي اللي ماله معنى.. يعني هالكثر اهي معصبة..
جراح بنبرة هادئة: زين أنا شذنبي؟؟ انا مالي شغل.. لا تحطيني وياهم
فاتن: انت اوص.. اوص ولا كلمة.. مابي اسمع حسك.. والله لو اني ماحبك ولا اعزك ولا احترمك.. جان سويت لك العن من جذي.. وخبرت مريم عشان اهي اللي تتصرف معاك.. لكن... ماقول الا ... مالت علي...
جراح: بتقولين لمريم شبتقولين لها؟؟؟ اني كلمت بنت في المصعد؟؟
فاتن مو مصدقة: يعني هذي قليلة
جراح يبتسم على سذاجة اخته: فاتن عادي اكلم البنت مافيها شي انا لا تحرشت فيها ولا تجاسرت عليها كل اللي سويته اني كلمتها وبس.. ترى انتي ابد ما تصلحين لاميركا
فاتن: اميركا غير والكويت غير.. التخالط حرام.. لكن اقول لمن..
جراح: ليش عاد انا شسويت.. ياما حاجيت بنات في الجامعة والمعهد
فاتن: ومستانس على هالشي.. عموما مو انا اللي اصحي ظميرك.. انت حر في نفسك والله يهديك..
جراح: ههههههههههههههه والله حالة اللي يسمعج مقطع هدوم البنت.. عيب عليج والله حاطتني في منصة الاتهام وتغززين عيني بصبعج تتهميني.. انا اخوج حياتج على قولتج.. تقولين لي جذي فتون؟؟ هزلت والله..
فاتن: أي أي هذا انت شاطر بهالحجي.. انا ما عندي كلام معاك.. واسكت عني طول الدرب..
جراح وهو يبتسم بخبث لفاتن: ازين انتي ليش معصبة صج صج؟؟ لاني انا كلمتها ولا.... (يطالعها) لانها كلمت مساعد قبلي وبعدين انا؟؟
بكل عنف صدت له.. تناظره من غير تصديق.. اهو متأكد من اللي قاله.. عيونه كانت تبين انه متأكد.. والجدية ملمح من ملامحه.. وما قدرت ترد عليه لانها ما تقدر تسيطر على نفسها.. شقصده بهالكلام انها تغار على مساعد؟؟؟ تغار عليه؟؟ هذا لو يختفي من هالدنيا انا اقلبها كرنفال احتفال دائم لا ينتهي.. يبيني الحين على اخر عمري اغار عليه.. من زينه ومن حلاه؟؟ والا من حبي له.. والله انا مادري اضحك ولا ابجي بسبب اخوي..
وفضلت فاتن السكوت طول الدرب وما كانت تدري ان سكوتها كان علامة الرضا عند اخوها اللي ابتسم لهالشي.. خلاص عيل.. الخطوة الثانية من وصايا ابوه جريب يتنفذ.. ان ما كان هالسنة راح يكون السنة الياية..
ويوم وصلو البيت فاتن طلعت قبله وبسرعة مثل الريح دخلت البيت واهي معصبة.. توها بتركب الدري لغرفتها وتذكرت امها اللي تنتظرهم يمكن من الصبح.. فمرت عليها المطبخ
فاتن تطل من الباب: السلام عليكم..
وانتبهت لسماء اللي قاعدة وهي تقطع سلطة..وردت ام جراح السلام: وعليكم السلام.. ها يمة وصلتو؟؟ وينه اخوج؟
فاتن وهي تدخل وتقعد يم سماء بالضبط اللي واجتهتا بابتسامة حلوة: كاهو بره..
سماء: يالله عيل انا اخليكم
فاتن اللي ما صدقت تشوف سماء هني: لا.. خلج وين رايحة؟؟
سماء حست ان فاتن تبيها في سالفة: لا بس قلت يعني تاخذون راحتج
ام جراح اللي ابد ما تحب هالحجي: تمي وانتي معزومة على الغدى اليوم..
سماء بدهشة وفرحة: والله؟
ام جراح: أي والله... (تكلم فاتن) يا حلوها هالبنت.. هههههههههههههههههههههه
ابتسمت فاتن لامها موافقة على كلامها.. صج.. ياحلوها سماْء.. ويا حلو نسبها من.. مشعل.. وبس اختفت الام صدت فاتن لسماء بلهفة تبي تسالها الا الثانية تجاوبها
سماء: ادري ادري.. بتسأليني عنه.. لكن.. ماكو خبر عنه..
فاتن بظيج: للحين في الشاليه..؟
سماء: أي..
فاتن: ما يروح الجامعة؟؟
سماء: بلى ايروح هذا دحانه ما يهد الكتب.. بس ما ايي البيت..
فاتن وهي توسد راسها على الطاولة: اووووووف ليش جذي..
سماء: يالله عاد فتون متى بتقولي لي اللي صار امبينكم هذاك اليوم ورد وويهه مثل الشبح
فاتن: شقول لج بس يا سماء.. لو بيدي جان قلتلج من زمان بس... ماقدر..
سماء: على راحتج. بس طلبتج
فاتن : شنو؟؟
سماء تمد القرنبيط جدام فاتن: قصصي هذا والله انه تعبني..
فاتن ابتسمت واستلمت المهمة بكل حب وتمت توريها شلون يقطعونه.. وانتبهت لشي سماء قاعدة في البيت والساعة توها 12؟؟؟
فاتن بغضب: بعد اليوم ما رحتي المدرسة؟؟
سماء: هاا....(بصوت واطي) وليه.. وين طحت انا اليوم.. لا فتون اليوم اجازة من المدرسة..
فاتن: لا والله.. اليوم السبت من الاسبوع االثاني للمدرسة.. هذاك الاسبوع ثلاث ايام مداومة بس.. وهالاسبوع بديتيه باجازة.. ما تقوليلي انتي تغيبين بامر منو؟
سماء بمرح: بامر كيفي ههههههههههههههههههههه
فاتن وهي معصبة زود بسبب استهتار سماء: انتي على هالحال ما بتسوين زين ونسبتج بتكون مثل ويهج؟
سماء: تدرين.. صبح وليل ادعي بهالشي.. زين فتووون قوليلي شلون تقطعينه جذي..
هزت فاتن راسها واهي متعجبة من حال هالبنت اللي كارهة الدراسة.. اهي مو كارهتها اهي كل شي تسويه بالعناد.. تبي تقهر امها وتعصبها لانها مو ماعطتها الاهتمام الكافي .. مسكينة يا سماء.. ضحية المجتمع الراقي انتي.. بس مشعل شلون مخليج جذي ما يهتم فيج كفاية؟؟؟
**********
طاف الوقت بسرعة وكاهم اخوانها وصلو البيت.. والغدى زاهب وكل شي تمام ما بقى الا ينجبونه.. وسماء كانت معاهم طبعا.. ومستمتعة بالجو العائلي الصخب بينهم.. عبد العزيز ومناير وارفيجتها سماهر واختها الصغيرة بشاير كلهم عندهم.. وفاتن وجراح.. والقعدة ولا احلى ..
الا بهذيج اللحظة اللي اندق فيها الباب.. وراحت فاتن تفتحه وردت داخل المطبخ ووراها خالد.. اهني سماء ما استحملت فكرة انها تكون متواجدة معاه في نفس الوقت..
اما خالد اللي كان شكله عادي ومتململ وكأنه متظايق. ويوم شافها طار هالظيج كله والملل.. وبدت ملامح الاستمتاع تعلو ويهه وتكسيه.. واخيرا اكو برنامج يشغل نفسه فيه عن التحسف على فاتن..
ام جراح: يالله كاهو خالد وصل زهبو السفرة ليمن انجب لكم...
وعلى الغدى سماء قعدت بين فاتن وعبد العزيز وجراح وخالد كانو مجابلينها تحت ام جراح.. اول مرة تاكل على الارض ولكن كانت االقعدة وايد حلوة.. الاكل متنوع وتقليدي واطباق متنوعة لكل واحد.. وشافت ان عادات الاكل بيناتهم متشابهة تقريبا.. كلهم كانو ساكتين باستثناء ثلاثة.. مناير وسماهر وعبد العزيز.. دومهم يتنقرشون في بعض ويتناجرون على اقل الاشياء وام جراح تسكت فيهم وحتى جراح.. كان لاباس فيه.. عادي ويتصرف تقريبا مثل مشعل الا ويا فاتن.. كان مزيد حنيته حبتين.. مثلا يجدم لها الاكل ولا انه يصب لها عصير ولا يوصل لها السلطة.. يعني حركات اخو يعز اخته.. وانا المسكينة حتى اخو يعزني ما عندي.. يوم صار.. اختفى وراح .. الله يعينني..
اما خالد فكانت عيونه على فاتن اكثر من سماء على عكس ما كان يتوقع.. ونظرات اللوم في عيونه مو قادر يخبيها.. يحس انه يتقطع من داخله وهو يعرف بانها خلاص راح تروح عنهم وتبتعد.. يحس ان البيت خالي حتى بوجودها.. اااه يا الدنيا .. ليتنا ما نتفارق يا فاتن ونظل هذيلا العيال اللي ما يخفون ولا يركدون..
وانتبه الى سماء اللي كانت تاكل بيدها اليسار.. اهي تستعمل يدها اليسار وباين ان حتى في الاكل تاكل باليسار... وهذي نقطة يقدر يتحرش بها فيها..
خالد: كلي بيدج اليمين
التفتت سماء وفاتن بننفس الوقت.. ولاحظت فاتن ان سماء كانت تاكل بيدها اليسار..
سماء بارتباك: .. ما عرف
خالد: ما تعرفين؟؟ تعلمي.. اكو شي اسمه تعلم بالتعود.. شوفي (يمسك الخاشوقة بيده) وغرفي من العيش.. (ويحط اللقمة في حلجة ويتكلم وحلجه متروس اكل) جذي..
سماء بقرف : صك حلجك عاد..
جراح وفاتن ضحكو في داخلهم بسبب غشمره سماء على خالد اللي انصدم من كلمتها ومن قرفها منه اكثر شي.. ايا ال...
خالد: كلي كلي وانتي ساكتة..
وكلت بيدها اليسار مرة ثانية.. ولاحظت انه عصب.. ورفعت اليسار ومدت اليمين.. ورفعتها واهي تاكل بطريقة تضحك الواحد والكل كان خاطره لو ينفجر من الضحك لكن احترموا موقف البنت انها ما كلت باليمين غير هالمرة..
-------
في اليوم الثاني خبر مساعد أهل بيتهم بسرفته الى اميركا مع جراح وفاتن.. ومريم الي من سمعت خبر السفر تنقعت بدارها لا تطلع ولا تخلي احد يدخل ولا تاكل ولا تشرب الا القليل.. ميتة من البجي ومن الحزن.. ومن بمكانتها ما يبيجي وهو يشوف اعز حبايبها واقرب الناس لها ارفيجتها الغالية تسافر... (ايا على ارفيجتي اللي بالكويت... احبج ف..)
من لها من بعد فاتن؟ من راح ترافج ومن راح تماشي ولا من راح تقول له كل اللي بخاطرها وكل اللي يجيش بصدرها ولمن راح تبث مشاعر حبها وغرامها الى جراح؟ مالها الا الصمت القاتل اللي راح يخلص عليها.. مالها الا انها تكتم احزانها وافراحها الى يوم ترد فاتن.. هذا احسن حل.. لانها مستحيل اتييب احد مكان فاتن في قلبها واسرارها دفينة وعميقة ما تنقال لاحد غير فاتن.. ااااه عليج يا ارفيجتي العزيزة..
ام مساعد طبعا سوت حفلة لكن محد اعتبر لها وسكتو عنها وخلوها تقول اللي بخاطرها فيه.. طبعا لتعليمات مساعد .. لؤي ما صدق هالخبر .. شلون جراح يسافر وهو ما يدري؟؟ وين العشرة ووين الاخوة.. طبعا الاخوة في باله ما طلعت الا يوم سافر جراح عشان يسافر معاه.. لكن هذا كله كان غشمرة.. راح يفتقد جراح االلي بيسافر لمدة اسبوع واحد وبيرد من بعده..
على مساعد الوقت كان ظيج ولازم يتحرك باسرع من جذي.. لازم الليلة يشيل ابوه واخوه ويروح ويتقدم لفاتن.. ما عنده أي استعداد انه يتاخر اكثر.. عشان مرة وحدة ياخذ اجازته السنوية ويظل مع فاتن هناك لمدة بسيطة لمن تتعود على الجو ومن بعدها يرد الكويت .. قلبه مو طايعة على هالشي ... لكن هذا هو الحال.. وفاتن محتاجة الى العزلة عشان تتأقلم على الوضع لنفسها.. وتعمل الاشياء لنفسها .. ما تعتمد على احد وتقوي نفسها بنفسها.. ثقته كانت كبيرة فيها وبقدرتها..
بالليل في ديوانية بيتهم وزوج اخته فيصل كان متواجد بعد.. حس مساعد ان هذا الوقت المناسب في انه ييتكلم بالموضوع مع أبوه
مساعد: يبا...
بو مساعد: سم يا وليدي؟
مساعد: سم الله عدوك .. يبا انا خلاص.. قررت اني اكمل نص ديني وا.. اخطب..
بو مساعد بابتسامة: والله خوش خبر يا وليدي.. انا ما عندي مانع ولا أي اعتراض.. بس امك قلت لها انت؟؟
مساعد: يبا انا ما ابي امي اللي تختار لي .. انا اخترت وخلاص
بو مساعد اللي كان يثق في ولده بعمى: خلاص عيل يا وليدي دامك اخترت.. ماله داعي زود الكلام..
مساعد بابتسامة: انت اصبر شوي خلني اقول لك من اهي بالاول
بو مساعد: يا وليدي انت ريال كبير وفاهم وعاجل وعارف لمصلحتك..
مساعد باستسلام: خلاص عيل.. توكلنا على الله
لؤي: لحظه لحظه انا قول لي من اهي العروس!!
فيصل يضحك بخفة ومساعد يرد باستغراب: وانت شكو؟؟ ابوي الحين اللي اهو ابوي ما يبي يعرف انت شكو؟
لؤي بتعجب: افا يا مساعد انا اخوك الصغير الحباب.. قول لي عشان اعرف من اهي مرتك اللي بتطبخ لي ولا بتغسل لي هدومي
مساعد: يبا رد عليه انا مافيني على خباله
بو مساعد يتكلم وفيصل ميت من الضحك بس بهدوء: انت ما تقول لي حرمة اخوك خدامة لك تغسل هدومك لا وتطبخ لك
لؤي: طالع هذا مو اهي بتيي مكان نورو.. خلاص..
فيصل: ليش نورة كانت تطبخ لك؟
لؤي: هذي مافيها خير مرتك.. (يبتسم بفرح) الله يخلي ام لؤي.. بتسوي كل شي.. مو مساعد؟
مساعد: بعد سميتها على اسمك.. الحمد لله والشكر يا الله اني لا اشكي اليك وانما اطلب منك القضاء..
لؤي: القضاء علي؟؟ مو مشكلة.. حلو وبارد منك..
بعد ما راح فيصل لبيتهم دخل مساعد واخوه وابوه الى البيت.. والحمد لله كانو في الصالة قاعدين ينتظرونهم.. امه طبعا ما تحط عينها بعينه يازعم معصبة وزعلانه.. ومساعد اختار قربها عشان يغثها وينغز عليها.. واهي ابد مو ماعطته ويه..
مساعد: يمه حرام عليج والله بسج تعبتي قلبي ..
لؤي الي قاعد عند ريل امه: روح انت هذي امي انت لك حرمتك خلاص
مساعد: جب..
نورة نطت: حرمته؟؟؟ أي حرمة؟؟؟
لوي بفرح: أي افرحي يا نورة يببي.. لولولشي.. اخوج بيتزوج..
نورة بفرح كبير: قووووووووول والله؟؟؟
مساعد: انت ياخي خلني اقول سالفتي بروحي
لؤي: ماقدرت احبس نفسي.. (بنبرة نسائية) دنه حطير من الفرحة والا ايه يا ماما..
ام مساعد بعصبيه: لؤيوووووو..
لؤي: يا فديت هاللؤوووووويه منج..
نورة بفرح: ومن هي العروس..
امساعد تلفت.. شاف ان مريم مو موجودة.. وينها؟؟؟: وينها مريم؟
نورة: كانت هني قبل شوي وراحت.. ما قعدت حتى معانا..
ام مساعد بتعالي: قلبها معورها على بنت الياسي.. بتروح وبتخليها.. الشره مو عليها عل اخوها اللي ما تحرك عليها قد ما تحرك على بنات الناس.. ما قول الا ...
مساعد اللي تحسس من كلمة امه لكن مو اهو اللي يزعل ويبرطم منها.. هذي امه اللي خابزها وعاينها.. تقول لكنها ما تقصد...
مساعد: نورة روحي نادي عليها ماقدر اتكلم بلياها..
نورة: شهالحب.. انا بعد حبني جذي
مساعد: ياالله قومي.,,, والا تدرين.. محد بييبها غيري..
وراح مساعد عنهم وهو يمشي.. وصل لدار مريم اللي كانت قافلة الباب...
طق على الباب بخفة
مساعد: مريم... مريم.. .ريمم.. وينج؟
مريم تطلع من الحمام وهي تنشف شعرها وطبعا ما سمعت أي شي من هدو ء طق اخوها..
وتقوت ضربته على الباب: مريم... مريم وينج؟؟
انتفضت مريم وراحت تفج الباب بسرعة: خير مساعد... فيك شي؟
مساعد: الخير بويهج بس علامج صاكة الباب؟؟ فيج شي؟؟
مريم: لا مافيني شي..
مساعد ياشر على عينها بيده: شفيها عينج؟؟؟ متورمة جنج تبجين؟
مريم بحزن: لا بس متظايقه شوي..
بابتسامة تريح القلب: تبجين على فاتن؟
مريم سكتت ولمعت عيونها بالدموع من جديد ولاا سالت بعد: تتشمت فيني؟؟
مساعد بطل الباب ولم اخته بكل حنان: افا عليج مو انا مساعد اللي يموت فيج يتشمت.. بس انتي يا حياتي لا تسوين في روحج جذي .. انا اقوى الموت ولا اقوى دمعج
مريم استعجبت من كلام اخوها لكن الوضعية كانت مريحة وظلت بحظنه تبجي بهدوء ولكن براحة..
مساعد يبعدها شوي: يالله الحين.. شرايج تنزلين تحت و تسمعين الخبر اللي بيزفه اخوج..
مريم: مابي.. امي بتقعد تتنقرش فيني وانا مالي خلق..
مساعد: عيب مريم..
مريم بحيا: اسفة بس.. مو وقتهها هذا..
مساعد يبتسم: زين ما تبين تفرحين لي يعني؟
مريم ترتد لورى: ادري الخبر اللي بتزفه.. ما يحتاج اكون موجودة عشان اسمعه
مساعد: وادري انج رافضة وموقفج من موقف ارفيجتج بس بعد.. انا ما لومج..
مريم اندهشت من خاطر لكن هذي كانت الفرصة انها تعرف: عيل ليش ؟
مساعد يهز راسه ويبتسم: انتي بعدج صغيرة.. لو كبرتي وتوسع تفكيرج اكثر.. بتعرفين.. مع اني تمنيتج انج تكونين اكبر من جذي بس. ما هو عليج انتي ملامي..
مريم بمرح بسيط: هذي صارت اغنيه
مساعد: ههههههههههههههههههههه.. يالله.. تنزلين ولا بتخليني انزل لحالي..
مريم: ما عاش.. دقايق بس الم شعري..
خذت البروش ولمت شعرها به.. ونزلت مع مساعد .. وقعدوو في الصالة..
وتكلم مساعد: الحين يا نورة انا اقدر اقول لج من اهي العروس..
نورة: من؟
مساعد: فاتن بنت عبد الله الياسي
نورة من الفرحة وقفت وصفقت بيدها: صجججججججج.؟. ماصدق.. ماصدق.. كلولولولولولولش
لؤي: ايه انتي جنج مصريه سكتي
ام مساعد بعصبية.. وجنها تطيح فيه كل الي فيها: لؤي يا جليل الحيا..
لؤي بحيا: يمة انا اسف.. مو قصدي..
مساعد: يمة انتي ليش معصبة.. (وبدلال حلو وجذاب) يمة انا ماستاهل منج انج تفرحين لي.. يمة انا مساعد مو لؤي الخقة ولا نورو الدلعة لا ريمو القرقة..
الثلاثه فجو حلوجهم مو مصدقين اللي يشوفونه ويسمعونه.. هذا مساعد ولا احد ثاني؟؟ لا ويسبهم؟؟
ام مساعد: انت اكيد غير.. انت ريحة الغالي ابوك .. لكن انت قاهرني بهالاختيار يا ولدي
بو مساعد: يا سارة بدل ما تعصبين على ولدج لازم توقفين له وتشدين ظهره.. بنت الياسي ماكو اعدل منها.. تراج انتي اللي مربيتها وفاهمة لها وعارفتها مثلها مثل بناتج.. اليوم ياج الوقت وقلتي البنت مو خوش اختيار
ام مساعد بنبرة وقورة.. لان زوجها الي يتكلم مو احد ثاني: يابو مساعد البنت ما عليها خلاف لكن ليش البعيد والقريب اولى..
مساعد تسند وهو يسحب نفس بقهر.. وبو مساعد ماقصر في امهم يوم سمع اللي قالته
بو مساعد باشمئزاز: منو القريب.؟؟ بنت اختج منى؟؟؟ هذي اولى؟؟ اولى بشو؟؟ اهي لا تبي ولدج ولا هم يحزنون.. تذكرين قبل يوم قلتي لهم بسبيل المزحة وشسو لج.. الا احنا مو من قد المقام والا احنا ما نستاهل بنتهم.. شوفي بنتهم اللي كانو حاطينها ماسة العرش شسوت فيهم.. يايين اليوم يبيعونها علينا واحنا اللي ما نبيها.. ليش ولدنا ان شاء الله ناقص ولا فيه عوق.. كامل والكامل الله وريال لا يعلى عليه.. واذا انتي موافقة تراني انا مو موافق..
مساعد بصوت واطي: عاش ابوي..
ابو مساعد: اسكت انت.. بنت اختج ماقول عنها الشين لكن ماهي عاجل.. لو عاجل جان ما تطلقت من خيرة الرياييل ولا مرتين بعد.. سارة.. صلي على نبيج واستغفري ربج.. وباجر لبسي عباتج وشيلي بناتج وروحي خطبي لولدج احسن البنات.. والله ويات خلف عالية .. صج ان ربك يمهل وما يهمل..
اهني تغرقت عيون مساعد بالدمع .. مجرد يسمع اسم عالية من احد خلاص تتهدم كل اركان الهدوء في قلبه... يا ترى راح تقدر فاتن انها تكون مثل عالية في قلبه او اكثر؟؟ يا ترى راح تقدر تهز عرش عالية في قلبي وتستحله وتخليه لها اهي ما احد غيرها؟؟ ماظن..
ام مساعد: لا تعور قلبك يا بو مساعد البنت خلاص انخطبت..
نورة هي تحوس بثمها بصوت واطي: أي مينون خطبها (صدت عليها ام مساعد بنظرة تحرق الواحد).. اقصد من الي تقدم لها.. .؟؟ صاحب الشأن والشرف..
ام مساعد: لا تتطنزين.. الله ما يطق بعصا.. خطبها ولد عمها مشاري..
لؤي: الحمد لله .. نورة سمعتي النكتة اللي تقول.. مينون تزوج مينونة يابو عشرة ميانين
نورة ومريم: هههههههههههههههههههههههههههههههههههههههههه
وعلى الضحك انجرت ام مساعد بعد على الضحك وياهم.. وضحكتها هذي كانت الاشارة انها رضخت لفكرة ان ولدها يبي يتزوج البنت اللي اهي الوحيدة تحس انها ما تناسبه.. بس ما كانت فرحتها بالشكل المتوقع.. كانت تحن على زواج مساعد اكثر من أي احد في هالبيت.. وردت فعلها كانت طبيعية جدا .. وعادية جدا... محد يدري.. شنو راح تكون مشاعرها مع الايام.. تجاه مسألة فاتن وزواجها من ولدها الحبيب..؟؟
***********
اليوم الثلاثاء.. اليوم الرابع على تواجد مشعل في الشاليه.. الجامعة بدت واهو مواظب لكن من غير أي حس.. ما يدري بالي وراه ولا اللي جدامه.. الهم والحزن كاسح كل شي فيه ومحطم نفسيته اللي طول عمره كانت مهشمة.. اخر موقف صار مع فاتن تركه محطم.. والشخص اللي حقره جدامها خلاه يحس بمدى صغر حجمه وتفاهه مشاعره تجاه فاتن مع العلم انها كبيرة وعظيمة.. شلون قدر يحطمني بكلمات.. يمكن ما تجاوزت العشر من العدد..واثرها كان بليغ؟؟ من اهو؟؟ وشنو علاقته بفاتن واهلها..كان موقفه حازم كانه.. كانه؟؟؟ مادري مادري يا ربي.. بس خايف من هالشخص اللي مادري من وين طلع لي..
وانت لي متى بتم خايف يا مشعل؟؟ لي متى بتم جبان جذي وموقفك ضعيف تبي كل شي يكون جاهز ومرتب ومصفوف والكل ينتظرك وانت تتحرك ببطء.. البنت ما بتوقف لك.. ولا بتنطرك لو انت حبيت الانتظار.. بتطير من يدك وانت بتم قاعد تناظرها شلون تطير..
شلون يا ربي ..؟؟؟ ابي حل.. انا ادري اني مو قد مسؤولية ولا زواج ولا ارتباط.. وحتى هلي.. امي بالاخص !! اللي راح توقف في ويهي مثل الجدار المنيع.. وتمنع زواجي من فاتن لو كان هذا اخر شي تسويه في حياتها..
وقف عند البحر وهو يتنسم والهوا ما يدخل حتى لاقرب نقطة... و حس بالوحدة الكبيرة.. اهو يا هني لغرض انه يقدر يفكر بهدوء ويبتعد عن الذنب وتأنيب الضمير .. لكن.. اهو هني بعيد ما يدري شقاعد يصير هناك.. انقطعت اخبارهم كلهم.. جراح اكثر من مرة اتصل فيه وهو من زود ما احساسه بالذنب ما رد عليه.. وسماء اللي في اليوم فوق العشر مرات تتصل ما يرد الا عليها مرتين.. وما يطول بعد..
الظاهر ان الوقت صار انه يرد البيت.. مو اليوم.. باجر ان شاء الله.. تهدى نفسيته ويصير الشي منسي مع ان الشي مستحيل نسيانه.. محفور في تعرجات الشارع اللي بين بيتهم وبيته.. في ويه فاتن وفي ويه هذاك الريال.. تتمسك فيه قضبان بوابه بيت فاتن الصدئة.. والاهم.. نسمة الهوا اللي حملته من مكان لمكان..
الله يعين قلبك يا مشعل.. يا ترى ردتك هذي خير لك ولا ... شر.. !؟!؟!؟!؟!
******
مساعد اللي ما قدر انه يقعد اكثر من غير ما يتكلم مع جراح عن هالموضوع.. اهو مر عليه قبل يومين في المكتب لكن ما حب انه يفاتحه لان فاتن كانت معاه بعد بس في مكتب نجاة.. وما حب انه يزف لها الخبر في نفس الوقت.. اهي يبيها تكون اخر من يعرف عشان الناس اللي حولها يعدونها للوضع بطريقة صحيحة.. ونورة ومريم ما راح يقصرون ابد..
في قلبه كان خايف ان فاتن تمرض ولا يصيبها شي.. اهي ما راح ترفض.. يعرف هالشي اكثر من غيره.. لانها ولو كانت في سن غبي ولها غلطاتها اهي تعرف الصح والغلط وتفهم لهم بنفس ما يفهم الكبير.. وتعرف ان الانتظار على حب.. او نزوة هذاك السخيف مضيعة للوقت واهدار لكرامتها وعزة نفسها.. بس الخوف انها تمرض وتتعب نفسيتها لان مهما كان يبقى الموضوع مستحل اكبر مساحة من اهتماماتها.. ويمكن يكون مركزها ان ما كان يبالغ.. بس.. اهي لازم ترضخ لواقع انها لي.. مو له.. لي انا وبس..
وكاهو عند باب بيتهم .. توه واصل.. يبي يتكلم في الموضوع مع جراح ومع ام جراح بنفس الوقت.. صحيح ان الوضع مو تقليدي.. بالعادة ام الريال اهي اللي تيي لام البنت تكلمها في الموضوع.. بس.. اهو يبي اول شي يضمن فاتن عشان يخلي هله يتقدمون رسميا.. مو سالفة تحدي للتقاليد بس.. حفظ لكرامة هله واهل فاتن..
وكاهو جراح يتقدم ناحيته بابتسامة مريحة على طول خلت شفاة مساعد ترسم ابتسامة بالمثل..
جراح: يا حيا الله من يانا.. حياك مساعد ليش واقف عند الباب..
مساعد: الله يحيك...
وسرع جراح يولع الديوانية ومساعد وراه.. كان لابس دشداشه بيضا ورافع الاكمام وشعره الناعم اطول عن طوله العادي.. بس اهو كان في حاله بعيدة جدا عن الاهتمام في مظهره.. بس الي كان من صج مستهم منه اهو الشيب الابيض الخفيف اللي غزى مقدمة راسه.. بس.. يالله الشيب وقار ماهو عار..
جراح: ولو اني زعلان عليك ليش انت ماخبرتني قبل اكثر عشان ازهب لك الدار..
مساعد: انا بالعمد ييتك من غير موعد عشان اني ماحب الترتيبات ولا القدوع .. لان الموضوع اللي انا يايك بخصوصه اهم من هالترتيبات والعادات.. ولانه ما يتحمل اني اقدع ومن بعدها اتكلم..
جراح: لا عادي حياك الله باي وقت عزيز وغالي..
مساعد بابتسامة ولكن يدينه كانو يرتجفون: الله يخليك.. الا.. ما خبرت الوالدة بجيتي؟
جراح: لا بلى خبرتها.. الحين اهي في جية..
وبالفعل, اندق الباب االمفتوح على الزراعة اللي في البيت.. وكانت اهي ام جراح اللي استقبلها ولدها بابتسامة عريضة.. واهي كانت تبتسم لكن مو بمثل ابتسامة جراح.. لانها تركت البيت وفاتن واقفة بنص الصالة ونظرات الخوف والرعب تكسيها من راسها لي ريلها.. البنت حاسة ان اكو شي يصير.. وشي جايد بعد..
قعدت ام جراح بعد السلامات مع مساعد.. ونفس الكلام اللي قاله جراح قالته
ام جراح: يمة عاد جان خبرتنا بييتك نزهب لك شي ولا شيات.. فشيله جذي..
مساعد: الجايات اكثر خالتي.. بس انا اليوم يايج في موضوع.. واظن انج انتي وجراح عارفينه.. يمكن حتى فاتن تعرفه..
مررت ام جراح نظرها الخايف الى ولدها تبث شويه من مشاعرها الذعرة: أي ... نعرفه..
مساعد: انا لا يايكم استعيلكم عشان شي.. تعرفين السفر قرب.. وانا مالي خاطر انها تسافر جذي بلا احد ولا سند.. قلت اهي لو سافرت بسافر معاها.. طبعا بعد الملجة.. واكون معاها لفترة ليمن ترسى على بر.. وبعدها ارد الكويت وانا مطمن.. ولو اني ماطمن ولا أآمن.. بس.. شنسوي؟؟
ام جراح: يا وليدي مادري شقول لك.. بس... احنا للحين ما شاورناها.. واهي كانت مريضة باخر الايام فلذا.. السالفة بتطول شوي..
مساعد: مو مشكلة خالتي ترى كل اللي قلته لج تخطيطات بسيطة ومسهلة
ام جراح: أي يمة بالعكس اللي قلته صح وانسب شي.. بس.. بعد البنت لازم نسألها.. ونعرف شنو رايها..
مساعد كان حاس بظيييج كبير والتوتر حارق كل اعصابه .. ما يدري من وين ياب هالبرود وهالتجلد..: ماعليه خالتي.. اهي طرف مهم في هالموضوع.. بس انا ييتكم اليوم عشان اطرح عليكم هالفكرة.. وما ادري.. اذا توافقون عليه ولا لاء..
ظلو الثلاثة ساكتين من بعد ما خلص كلام مساعد.. يمكن كلهم كانو متوترين بسبب هالموضوع.. فاتن ما بينت لا موافقة ولا معارضة على الموضوع.. يعني ما رست ولا رستهم معاها على بر.. اهي صج هادئة وحالتها الصحية في تحسن وما يبين عليها الهم.. بس النظرات والمظهر اللي بدت عليه يوم عرفت ان مساعد ياي يكلم امها واخوها رجع كل الخوف وكل الرعب يدب فيها وفي اوصالها..
كانت في الصالة الي حكت ارضيتها وهي تروح وتيي.. قلبها حاير ومخها داير ما تدري شتسوي.. اهي صج حاطة اتكالها على رب العالمين ومسلمة مصيرها له.. بس بعد.. الشي اكبر منها .. الرفض على طرف لسانها لكن ... ما تقدر تتكلم... تخاف انه يهددها ويفرض الشي عليها.. واهي بصراحة ما بتسكت عنه ويمكن تتطاول عليه بجم كلمة..
يا عجب تأثير هالانسان فيني.. يطلع الي مخفي واللي عمري ما حسيته يتواجد بي.. اكرهه.. ليش ما يفهم هالشي.. نظراتي وتحركاتي واحساساتي اللي اوجهها له.. ما يحس بها؟؟ انسان هذا ولا جماد.. اكيد جماد.. عيل اكو انسان في هالدنيا ما تغيرت نظرته الا مرتين.. يوم اللي صرخت عليه .. ويوم اللي وصلني بالسيارة..
لازم يفهم انها ما تبيه.. ما تبيه.. وتمت تتلعث بكل شي.. تمسك الستارة واهي ملت من النظر. تنتظر امها واخوها ليمن اييوون لكن ما تبي تسالهم .. في قلبها شوق انها تسمعه شنو يقول لهم.. تبي تعرف شنو قاعد ايصير امبينهم.. ياربي يا حبيبي.. انصفني.. انصفني بقدري يا ربي..
وفاتن على هالدعاء دخلت امها من الباب وهي تفج الشيلة عن راسها.. وانتبهت لها واقفة بنص الصالة وكانها كانت تنتظر.. ابتسمت لها الام وراحت عنها داخل المطبخ.. تعجبت فاتن من حركة امها؟؟ شمعنى دخولها للمطبخ جذي؟؟ وراحت وراها...
بتوتر تسالها: يمة... شكان يبي منكم؟؟؟
ام جراح: منو؟؟؟؟
فاتن: مس.. مساعد.. اخو مريم...شيبي؟؟
ام جراح تلتفت لها بنظرة جامدة: انتي تعرفين اهو ليش ياي.. يعني ما له داعي ازيد عليج واقول لج..
فاتن بخوف: وانتو....... انتو شرديتو عليه...؟
بابتسامة اسف توجهت ام جراح لها: حسافة على الزمن يا يمة.. اللي ياب سوء ظنج فينا .. اننا نقدر نبيعج او مستخسرينج..(مسكت الام كتف فاتن دلالة على الحزن وبعين ملينانة دموع) حتى ثقة ما عدتي تثقين فينا يا بنتي؟؟؟؟؟
كان الالم النابع في صوت الام.. وكلماتها الحزينة مثل الصفعات المتكررة لفاتن.. مو لانها كانت غلط .. بالعكس.. اهي ظنت مثل ما قالت لها امها.. بس.. ما قدرت تترجمها الا يوم يات امها وقالت لها هالكلام.. شكثر دنى مستوى تفكيرها بأهلها.. شكثر اهي قاسية معاهم وشكثر مواقف خلتها تطيح من عينهم واهم.. ابد.. ما حركو لها ساكن.. لاعاقبوها ولا ناقشوها ولا سوو لها شي.. وان صابها شي طقوا الصدر حامي عليها والراح تصفع الراح من الخوف عليها.. واهي...
راحت امها عنها فوق واهي ظلت بالصالة وعيونها مفتوحه من غير تصديق على اللي اهي تسويه.. كل هالقساوة وكل هالظلم وكل هالنفور من أهلها.. كل ما عندها في هالدنيا.. علشان كونها تحب انسان ثاني.. هالكثر مشاعرها مهمة وثمينة.. اكثر من أهلها.. اهم شنو ذنبهم يوم اني احب من وراهم.. وشنو ذنبهم يوم اني معلقة روحي في واحد... بعد موقف واحد راح وتخلى وغاب.. حتى السؤال ما يسأل.. أي حب هذا؟؟ انا الحب لي.. اهو خوف جراح علي ومتابعته لي اول باول.. اهو اللي كان عايش حياته ما عليه من احد.. تخلى عن حريته الشخصية ومتعه عشاننا.. ولا امي.. اللي مغطية كل احزانها وتتجرع الهم ورى بعضه.. ولا تشكي ولا تحجي لاحد.. وانا؟؟؟ انا شنو دوري من بين هالناس؟؟؟ شنو موقفي؟؟؟ العداء.؟؟ النرفزة؟؟؟ التشكيك في نوايا اهلي تجاهي...؟؟؟
غطت ويهها بصدمة كبيرة ... صدمة الصحوة على الواقع المؤلم اللي اهي آلت اليه.. صدمة انها وصلت لمرحلة انها تتعارض مع اهلها على امنيات.. تافهة وسخيفة بالمقابل لفرحة اهلها.. ماهي تضحية عشانهم ولا هو الواجب.. هذا المقابل.. لطيبتهم ولحبهم لي وولائهم ووقفتهم معاي.. انا لو أحارب هلي عشانك يا مشعل.. هل انت راح تقدر تحارب هلك عشاني بيوم من الايام؟؟؟ هل راح تقدم تضحيات مثل تضحياتي.. انت عندك بس مستواك العائلي.. .انا عندي امي واخواني واختي.. وولد خالتي وارفيجتي... حتى مساعد نفسه.. ولو انه ماله مكانة في حياتي..
لكن يا فاتن.. هل معناته المقابل انج ترمين نفسج في علاقة انتي ما خططتي لها ولا وقع اختيارج على الشخص اللي بيدخل فيها معاج؟؟؟
لا... طبعا لا... انا مساعد ماعرفه.. ماعرف اهو من وين ولا شنو طبعه ولا من وين ياي!!
يعني مشعل اللي تعرفين اهو من وين؟؟ مادري.. مادري.. اللي اعرفه ان مشعل كان معاي لمدة سبع سنوات.. سبع سنوات وهو في مخيلتي ايعيش فيها وفي احلامي وامنياتي وامالي العريضة اللي رسمتها بسقف داري ..
لكن.. الاحلام ما تجيس ارض الواقع بسبب قساوته وجديته.. الاحلام معادية الواقع.. والواقع يا فاتن اهو اخر محطة انتي بتوصلينها بالاحلام.. يا انها تردج بهداي.. ولا انها ترطمج لدرجة انج تطيحين في غيبوبه ما تقدرين تطلعين منها... وان طلعتي.. الله العالم شلون راح تمضين حياتج وانتي اللي تعودتي على الاحلام المجانية... الواقع ثمنه غالي.. يدفعه الانسان من حياته.. والاحلام.. مالها أي ثمن الا .. معاناتج..
يعني شنو؟؟؟؟؟
خلاص؟؟؟؟
انتهت الاحلام.....؟؟؟
لا .. الاحلام يا فاتن عمرها ما تنتهي... الاحلام.. تظل باقية في ذاكرة الانسان.. وذاكرة القلب يمكن قبل العقل.. لا ترجعين لها .. ولا تحرمين نفسج من الحق بالحلم.. احلمي قد ما تبين.. لكن احلمي بواقعج الحقيقي.. حاولي انج تكونين في اطاره.. لا تطلعين عنه ولا تتجاوزين حدود المعقول!!!
دخل جراح البيت وهو يبتسم وشاف فاتن قاعدة وهي تناظر جدامها بطريقة غريبة.. وكأنها قاعدة مع احد يكلمها وتكلمه.. واهي مثل المستمعة.. راح قعد يمها وهو عاقد حواجبه.. وبنبرة هادئة كلمها عن لا تخترع..
جراح: فاتن.. علامج قاعدة هني بروحج؟؟
فاتن اوتعت من السرحان وهي تسمع صوت اخوها السلسبيل. لا إراديا ابتسمت في ويهه بحنان: لا بس.. جذي..
جراح: وينها امي عيل؟؟
تذكرت فاتن ان امها راحت عنها واهي زعلانه: فوق في دارها.. بس .. لا تروح لها..
جراح: ليش؟
فاتن: انا بروح لها...
جراح استغرب موقف فاتن بس ماحب يعارضها: على راحتج...
فاتن: تصبح على خير..
الوقت كان مبجر لكن.: وانتي من اهل الخير..
وبخطوات واثقة ناحية غرفة امها, رسمت فاتن على وجهها ابتسامة التقبل, والرضا, والقنوع.. ولو انها كانت بمثابة السجين الحادة اللي تطعن في قلبها.. بكل خطوة كانت تدوس على حلم.. وبكل خطوة كانت تمحي ذكرى, وبكل خطوة.. تبني ذاكرة جديدة لحياة جديدة.. حياة بعيدة كل البعد عن اللي كانت تبيه.. بعيدة عن مشعل وحب مشعل, وقريبة.. من مساعد, وسيطرة مساعد...
دخلت دار امها من غير ما تدق على الباب بعوايدهم.. وامها اللي كانت قاعدة على الكرسي تخيط في دراعة من دراعاتها رفعت راسها واهي تناظرها بحزن.. لكن وجه فاتن الباسم كان سبب انها ترسم اهي الثانية ابتسامة.. ما كان من طبع ام جراح يوم انها متظايقه تكشر في ويه عيالها.. كانت دايما تجابلهم بالحسنى وبالابتسامة والفرحة..
قعدت فاتن عند امها واهي تناظر اللي قاعدة تخيطه: يمة شقاعدة تسوين؟؟
ام جراح باستغراب: اخيط دراعة عندي طايح تطريزها شوي..
فاتن:.. يمة.. شرايج لو انج تخلين الدراعة لبعدين.. وتقعدين تخيطين لي فستان عرسي.. مو احسن؟؟؟
انصدمت ام جراح من كلام فاتن اللي رافقته ابتسامتها المرحة والحزن اللي ماقدرت تمسحه من عينها... مدت ام جراح يدينها بلا تفكير الى بنتها.. مو لانها اخيرا وافقت على اللي هم يبونه لها.. لا... مدتها لانها تعرف ان بنتها محتاجة لاحضانها بذيج اللحظة.. وفاتن اللي كانت نتظر الاشارة من امها على طول.. رمت بنفسها والدمع يتطاير من عينها...
حلاوة الاحساس كانت غامرة النفوس.. لكن الحزن.. ما يروح بسرعة.. الحب مستحيل ينمسح او ينسى.. الحب يظل باقي مثل المرارة اللي تمر في نفس الانسان.. لكن.. القوة تكمن في ان الانسان يدفن هذا الحب من غير نسيانه.. عشان لو حصل في يوم ومر في تجربة عاطفية يقارن بين هذا الحب.. وهذاك الحب.. ويعرف.. أي واحد فيهم اهو الحقيقي؟؟؟
الفصل الثاني
-------------
((بحضر زفافك))
اول ما استلم جراح الخبر فرح فرحة كبيرة.. موافقة فاتن كانت سريعة بعكس ما كانو يتوقعون.. ام جراح ما حاولت انها تظهر الفرحة الكبيرة عشان بنتها فاتن.. وانتظر جراح الصبح بفارق الصبر عشان يخبر مساعد هالخبر.. يدري انه لو عرف راح يرتاح.. كان يبين عليه البارح ان هالسالفة شايلة معظم تفكيره.. وتوتره اللي اول مرة يشوفه كان اكبر دليل على هالشي..
مساعد اللي صحى اليوم وهو تعبان راح الدوام حتى من غير ما يشرب الجاي اللي متعود يشربه.. كانت السيارة هادئة على عكس كل مرة.. يكون القرآن اهو اللي يعمر في اجوائها.. كان محتاج لاكبر قدر من الهدوء.. حتى انه دخل المكتب وما وقف مع الموظفين.. حتى صباح الخير ما ردها عليهم.. مخه كان مشغول والتوتر عامي بصيرته..
اول ما دخل قعد على الكرسي وهو يسكر عيونه.. مسحه بظهر كفه علامة على التعب والنعاس.. البارح قضاه من غير ما يرقد او تجيس عينه النوم, الانتظار طويل, الخوف اكبر.. بس.. اللي الله كاتبه بصير..
واول مكالمة وصلته..
بصعوبه رفع صبعه للتلفون يرد على السكرتيرة: هلا ميا؟؟
السكرتيرة: ابو زياد متصل فيك أستاذ!
في خاطره مساعد تململ من اتصال ابو زياد لكن: هاتيه
واول ما سمع بو زياد: الوو مساعد.. تعال عندي شوي ابيك في موضوع
مساعد: ان شاء الله ابو زياد..
سكر مساعد وقام على طوله الى مكتب ابو زياد... دخل هناك وكان ابو زياد قاعد على كرسي الطاولة وهو يناظر باوراق..
مساعد: صباح الخير ابو زياد..
ابو زياد يرفع عينه ونظارته على خشمه: هلا صباح النور مساعد.. حياك اقعد..
مساعد: الله يحيك.. خير بو زياد اليوم من الصبح طالبني؟
ترك بو زياد الاوراق وواجه مساعد: علامك يا معود سمعت انك بتسافر اميركا.. ما قلت يا ولدي..
مساعد وهو يبتسم لنبرة التحبب من ابو زياد: لا والله يا بو زياد الموضوع يا بالصدفة وما وافقت عليه الا لاني كنت المتوافر الوحيد..
ابو زياد: بس هم انا طالع باجازة ومسافر ويا العايلة!!! وما يصير انا و انت بنفس الوقت نطلع..
مساعد: والله مادري يا بو زياد انا سفري مهم جزء من الشغل..
ابو زياد: والله انا ما ودي اطلع اجازة لانها تخملني بس العيال ذابحيني..
مساعد: بس احنا مو لازم نكون بهالتشكك.. ماشاء الله المكتب قايم بوجودنا ولا عدمه.. لان الموظفين ماشاء الله عليهم مبيض الويه.. وان جان على الادارة غسان رد امس.. ونجاة بعد بتظل.. يعني الاثنين يقدرون يغطون معظم القرارات الادارية..
ابو زياد: وانت جم مدة اجازتك؟؟
مساعد: شكلي باخذها سنوية.. يعني شهر..
بو زياد: حتى انا بعد قلت باخذها شهر.. يالله انا بقصرها وانت خذها كاملة.. وعليك بالعافية
ابتسم أبو زياد ورد عليه مساعد الابتسامة: تسلم يا بو زياد.. بس هالشي مو اكيد.. يعني اذا تأكدت بخبرك..
ابو زياد يتفحص بويه مساعد: علامك مساعد؟ اليوم مو على عوايدك.. تعبان ومالك خلق..
امساعد: لا بو زياد بس شوي.. ما رقدت زين..
ابو زياد بضحكته المشهورة: هههههههههه الظاهر انك تحب؟؟ تحب يا مساعد ومن ورانا؟؟
امساعد اللي انحرج من قلب بسبب هالكلمة.. اهو ان جان على الحب يحب من زمان.. بس ليش الاثار توها ظاهرة عليه
مساعد: الله يهداك يا بو زياد.. أي حب.. شيبنا على الحب.. خله للصغار..
ابو زياد وهو يرتب شواربه: لا يابوك.. تكلم عن نفسك.. انا بعدني شباب وصغير على الحب
امساعد بحاجب مرفوع: وينج ياام زياد..
ابو زياد: احم احم.. يالله عاد ماله داعي تدخلها بالموضوع.. اهي في القلب.. وسيدته وحامته
مساعد: هههههههههههههههههههههههه والقفل؟؟ من قافله؟؟؟
بوزياد: لا.. قلب الريال ما ينقفل.. انا انقفل زحمة.. من للحرمات العازبات..؟؟
مساعد اللي مات من الضحك: هههههههههههههههههههههه يقطع بليسك يا بوزياد والله اني كنت متظايق اليوم الصبح ههههههههههههههههههه
ابو زياد وهو مبتسم: مو انا بالعمد خرتها ونجبتها معاك عشان تبطل هالتكشيرة اللي في ويهك.. الحين اانا تطمنت عليك.. قوم روح مكتبك وشوف شغلك
مساعد: مع انها طردة بس يالله.. حلو وبارد منك .. عن إذنك..
راح مساعد وابو زياد يفكر فيه.. والله ان مساعد خوش ريال.. كل واحد لو يشوفه ويتعامل معاه ويعرف شكثر اهو شاطر.. يتمنى لو انه ما يفرط فيه.. ودي بس لو يكون له نصيب ويا غزلان.. احس ان محد بيحافظ عليها كثره.. لو بس.. لوو...
********
غزلان من طرف ثاني كانت قاعدة في حديقة بيتهم تتريق يم المسبح كالعادة.. ابوها راح من شوي واهي قاعدة تشرب النسكافيه بهدوء.. وتفكيرها كله متجه الى رفيق المصعد.. قالت البنت اسمه.. جراح.. يا حلو اسمه.. يناسبه.. مع انه قديم شوي بس.. كل شي عليه حلو.. ابتسمت بينها وبين نفسها وهي تضرب رأسها بسبب ينوننها.. إلا وأمها يايه صوبها
ام زياد: الحمد لله والشكر..
غزلان بدلع وهي تتخصر: ليش ان شاء الله؟
ام زياد تبتسم: انتي اللي تتبسمين لحالج.. الغزيل فيج وما ادري؟؟
غزلان وهي تشرب: مافيني شي... سلامتج..
لكن الابتسامة كانت اكبر مخبر عن حالها.. طالعتها امها على طرف وشافت الابتسامة اللي على ثمها اللي تجاهد في اخفائها لك على من يا غزلان؟؟ على امج؟؟
ام زياد: الا اقول يمة..
غزلان: هلا ماما..
ام زياد: الحين انتي اللي حددتي اننا لازم نسافر بس وين رايحين؟
غزلان بمرح: يمة بنروح مكان لاصار ولا استوى مثله؟
ام زياد بفرح مشارك: خوش عيل قوليلي وين رايحين؟
غزلان: رايحين يا ماما سيشيل ايلاندز.. جزر سيشيل!!
ام زياد الي ما عرفت المكان: فيه عرب؟
غزلان: يمة العرب كل مكان اكيد بنلاقي احد هناك..
ام زياد : اهم شي.. والله اني ماحب اروح هالاماكن بس انتي الله يهداج..
غزلان: يمة الانسان لو ما استكشف بحياته هالمناطق بهالوقت متى بيسكتشفها بالله عليج؟؟
ام زياد: بس بس عاد.. كولومبوس مادري ابن بطوطة الكويت..
غزلان بغرور وهي ترفع ريلها لداخل الكرسي: واحسن بعد... ابن بطوطة ما يتحداني..
ام زياد: بقوم عنج شكلج ينيتي انتي.. نزلي ريلج قبل
ونزلت غزلان ريلها: مسامحة
و راحت امها عنها وتركتها مرة ثانية تغوص في احلامها الكبيرة.. احلام تتضمنها اهي وجراح و.. جزر سيشيل... ضحكت بينها وبين نفسها على هالافكار المجنونة لكن ما تنكر.. كانت افكار حلوة.. ويا حلوها لو تصير صج..
**********
جراح الي توه قاعد من الرقاد بوقت الظهر حس ان ظهره يتقطع.. كان قراره حكيم بانه ينسحب هالكورس من الجامعة وان شاء الكورس الياي بيدش مرة ثانية.. لان ظروف عايلته ما تسمح له انه يتغيب عن البيت.. طبعا اهو باول اسبوع راح يسافر مع فاتن وثاني اسبوع راح يرد ومن بعدها التعديلات في البيت وامه من لها في البيت غيره.. يالله برتب لها البيت وكل شي وبعدين بيدش الجامعة وبيسحب معاه خالد..
كان فخور بنفسه.. ما كان يظن ان حب العائلة والوقفة معاها بهذي الحلاوة.. يمكن لان السيطرة صارت له اهو بس وان محد يشاركه فيها الا امه بنسبة بسيطة بعد.. الله يرحمك يا يبا.. بفقدك تركت هوة كبيرة لكن ان شاء الله اكون قد المقام واقدر اني البي لهلي كل ما نشدوني..
على طول من بعدها قضب التلفون واتصل في مساعد عشان يخبره بموافقه فاتن .. اللي صح يات سريعة لكن في محلها.. اكيد اقتنعت بالاسباب وبان سفرها مع مساعد واهي مخطوبة اريح لها من سفرها واهي عازبة.. فديت اختي والله..
واتصل في مساعد.. اللي ما كان يستقبل أي مكالمات... وقاعد في مكتبه يفكر ويفكر من غير ما يشتغل.. اصلا نية الشغل ما كانت في باله ابدا بس جذي يشخبط عشان يبين لنفسه اللي ماكانت مقتنعة ابدا انه قاعد يشتغل..
دقت السكرتيرة عليه ورد بملل: ها ميا مابي أي مكالمات..
ميا: بس أستاذ هذا جراح الياسي ويبيك ضروري..
نقز مساعد من مكانه.. جراح اللي متصل... بهالسرعة؟؟؟ ليش يا ربي شصاير؟؟ لا يكون بس رفضت.. مستحيل توافق بهالسرعة.. وبدت معدته تضطرب عليه.. حتى العرق عرقه..
مساعد بنبرة سريعة: وصليني به..
ووصله خط جراح..
مساعد: قوة جراح
جراح: هلا فيك مساعد شخبارك؟؟؟
مساعد: ابخير الحمد لله وانت؟
جراح: الحمدلله لايكون بس مشغول لان السكرتيرة قالت لي..
قاطعه مساعد بنبرة متلهفة: ما عليك منها قول لي.. شقالت اختك..
جراح ابتسم .. الريال ملغوث على العرس.. : والله مادري شقول لك .. ما ودي اكون انا اللي يوصلك هالخبر بس..
اهني طاح قلب مساعد في بطنه.. ولسبب غبي عصب.. وبدت اعصابه تثور: ليش... شنو الخبر؟؟
جراح: مبروك.. وافقت فاتن..
سكت مساعد.. ما قدر يتكلم.. حس انه انصم من بعد هالكلمة.. ورد سال جراح
مساعد: شنو الخبر؟؟؟؟؟؟
جراح: هههههههههههههههههههههههه .. وافقت فاتن...
مساعد بحيرة: متأكد؟؟
جراح: تصدق لا.. بروح اسألها مرة ثانية.. اقول لك وافقت تقول لي متأكد؟؟
مساعد : لا بس.. الموافقة يات سريعة!!
جراح: لا بس فاتن كانت باخر الايام تفكر في هالموضوع من جذي يات الموافقة سريعة..
مساعد بابتسامة قلقة ما قدر يفسر سببها: الحمد لله.. عيل ماكو وقت عندنا.. متى *****م..؟؟
جراح : والله حياكم باي وقت.. اليوم الاربعا..يوم الاحداث في بيتنا.. ههههههههههه
مساعد: ان شاء الله ليلة باجر عشان البيت يكونون مستعدين..
جراح: براحتكم.. يالله.. اخليك الحين تشوف شغلك.. مع السلامة
مساعد: مع الف سلامة..
وسكر جراح عن مساعد اللي طاح في نوبة تجمد.. مو عارف شلي قاعد يصير؟ كان ينتظر هالموافقة على احر من الجمر.. والحين .. يوم ياته بدى يتشكك من سرعة الموافقة؟؟ ليش يا ترى؟؟ ليش وافقت بهالسرعة؟؟ يا ترى كلامها في المستشفى كان صحيح؟؟ ولا انها وافقت عشان اهلها؟؟ انت الحين كنت تبيها باي ثمن والحين يوم ياتك على طبق من ذهب بديت تتشكك؟؟ صج ما عندك سالفة.. بس... ليش هالشك فيني.. ليش؟؟
خله يتحرك في هالموضوع باسرع طريقة ممكنة عشان يقدر يختلي فيها ويقدر يسألها اللي يبيه بينه وبينها.. وتبدى الرحلة مع فاتن.. ويا نظراتها..
اول من اتصل فيه اهي مريم.. اللي كانت طبعا في الجامعة باول اسبوع واخر يوم فيه وبالصدفة صارت مواعيد انتهاء المحاضرات عندها مع مساعد كل يوم..
ردت عليه بفرح: هلا سعودي
مساعد بابتسامة: هلا فيج.. ماقلنا بطلي سعودي هذا ماني ياهل عندج
مريم بمرح: ههههههههه سعودي احلى.. تخليني اتخيلك ياهل صغنون تلعب في الطريج ههههه
مساعد: وايد قرقة.. زين بقول لج.. باركيلي!!
مريم: مبروووووووك.. شريت سيارة يديدة اكيد..
مساعد بخيبة: لا يا مينونة.. ارفيجتج وافقت
مريم بحيرة: وافقت؟؟ وافقت على شنو؟؟ (تذكرت وانصدمت) وافقت على... الزواج؟؟؟؟؟
مساعد بحاجب مرفوع: أي وافقت على الزواج.. ليش ان شاء الله مستغربة؟؟ فيها شي لو تزوجتني؟؟
مريم: لا والله مافيها شي.. انت ما عليك قصور بس موافقتها يات سريعة..
ورد الشك يستفحل في مساعد.. حتى مريم حاسة بنفس الشي: ايه.. اخوها يقول انها كانت باخر الايام تفكر.. وو.. (ما يقدر يقنع نفسه بهالكلام)
مريم اللي مثله ماقدرت تقتنع: زين مساعد ممكن خدمة..
مساعد: هلا..
مريم: قطني عند بيت عمي بو جراح قبل لا نروح البيت.. ابي اقعد عندها شوي واستفسر منها..
مساعد: مو من الحين الناس ظهر.. العصر يصير خير.. الا اقول لج متى تخلصين
مريم بحزن: على الوحدة
مساعد: وحدة وربع انا عندج.. يالله مع السلامة
مريم: الله يسلمك..
سكرت مريم عن اخوها واهي تدور مكان تقعد عشان تركز على هالصدمة او هالخبر المريع.. فاتن وافقت على مساعد؟؟؟ شلون؟ ومتى؟؟ وليش؟؟ اهي تحب مشعل فليش تتزوج مساعد؟؟ صار شي بينها وبين مشعل خلاها توافق على مساعد.. لا .. انا لازم اروح لها واشوفها..
مساعد الي ماقدر يظل اكثر في المكتب استأذن من الشغل وطلع مبجر.. يعني على الساعة 11 جذي.. وراح مباشرة البيت.. عشان يكلم امه.. لازم يستغل الوقت قبل لا يستغله.. ويوم دخل البيت سأل الخدامة عن امه وقالت له انها في غرفة نورة ترتب اغراضها لانها بتاخذهم بيتها جريب.. وراح لها مساعد.. الله يعين قلب امي الحين اكيد ملتاع على نورة.. بس هذي سنة الحياة.. البنت تكبر وتنضج عشان يوم من الايام يسلمونها لواحد غيرهم.. يكمل مسيرة الصون والحفظ..
الباب كان مفتوح.. ودخل مساعد منه وهو يبتسم لامه اللي انتبهت لدخوله واهي تطوي في هدوم نورة بحزن.. ابتسمت له بالمقابل وانتبهت ان الوقت مبجر على ردته
ام مساعد: مبجر يا وليدي اليوم؟؟ عسى ما شر؟؟
مساعد اللي قعد يمها واهو يلمها بذراعينه الطوال: ياي مخصوص عشان اخبرج بخبر انتي تستحقين حصريته..
ام مساعد بابتسامة: خير يا وليدي.. وافقت بنت عبدالله؟؟
انصدم مساعد: من قال لج؟؟
ام مساعد: عيونك قالت لي.. وبعدين.. انا ادري انك امس رايح بيتهم عشان هالسبب..
مساعد ترك امه وهو يبتسم ومد يدينه في حظنه ومنزل راسه.. وامه تناظره بمرح
ام مساعد: ويييييييييي علامها العروس استحت
مساعد بصدمة وضحكه: هههههههههههههههههه يمة الله يهداج...
ام مساعد: هههههههههههههههههههههههههههههههه مبروك عليك يا وليدي.. منك المال ومنها العيال..
مساعد: يمة من قلبج هالامنية؟؟
ام مساعد: اكيد يا عقلي.. وين ما تي من قلبي وانت قلبي كله.. بس انشاء الله تسعدك وتهنيك.. وان ظايقتك في يوم من الايام لا تظن اني بكون متساهلة معاها.. مو انا الام اللي تلوم عيالها على اولاد الناس.. انا الوم اولاد الناس على شقى وعنى عيالي لاني اعرفهم.. مربيتهم بهذين اليدين.. ما شقوني.. بيشقون غيري؟؟
مساعد وهو يلم امه: لا خلى ولا عدم منج يالغالية..
ما يدري ليش حلت له موافقة فاتن الحين اكثر عن قبل.. لان معاها كانت موافقة اغلى مخلوقة على هالكون.. أمه الحبيبة ما غيرها.. وبدت له الحياة احلى عن قبل.. وان الالوان الزاهية انرمت على رتابة حياته وبساطتها.. كل هذا بسبب دخولج في حياتي يا فاتن.. لكن.. انتي.. شنو شعورج من كل هذا..
مساعد ما كان خبل ولا كان غبي. يعرف اكثر من غيرهم بمشاعر فاتن.. يدري انها تحب هذاك الخايس اللي شافه واقف عندها.. لكن.. اهو بقدرته راح يخليها تنساه وتنسى حبه.. بس اهو على كلمته.. اهو راح يتزوجها صح لكن.. اهي اللي راح تتخذ اول خطوة تجاهه.. ما راح يخليها تتحكم في العلاقة من اولها.. والا هو ليش الريال..
مساعد: زين يمة.. متى يناسبج نروح لهم؟؟
ام مساعد: الليلة زينة.. خلنا نروح لهم الليلة..
مساعد بابتسامة: والملجة؟؟
ام مساعد بصدمة: تبيها الحين؟
مساعد :أي يمة لانها بعد 7 ايام بتسافر وانا لازم اسافر معاها..
ام مساعد: بس عيل.. في خلال هالسبعة ايام بنملج ولو اني بغيت افرح فيك..
مساعد: يمة مابي حفلات ولا شي.. خلي الملجة تكون عادية عائلية بيننا وبينهم.. والعرس ان شاء الله اسويه لج من اكبر العروس عشان تعزمين اللي تبينه.. خصوصا ان ابوهم ما صار له الثلاثة شهور من توفى.. ما نبي حفلة كبيرة..
ام مساعد: صح كلامك.. بس عيل.. روح خبرهم اننا بنكون عندهم هالليلة..
مساعد: يصير خير ان شاء الله..
وقام مساعد على طوله يتصل في جراح عشان يخلي هله يستعدون لهم.. وبالصدفة كان خالد عندهم في البيت.. اللي طبعا ما يعرف عن الموضوع حتى مستهله..
جراح بنبرة محببة: هلا والله بمساعد..
مساعد: هلا فيك شخباركم؟؟
جراح: والله ما تغيرنا من قبل ساعة.. انت شخبارك؟
مساعد: ابخير.. بس حبيت اعلمك عشان تخبر هلك ان الليلة بنكون عندكم جذي بعد العشا..
|
10-05-07, 06:04 PM
we sada9ti el9issa kthiir 7olwa we incha'Allah ta3jeb elkoll
جديد مواضيع قسم القصص المكتمله
العرض العادي
