كاتب الموضوع :
بعدين معاكم
المنتدى :
القصص المكتمله
الجزء التاسع والاربعون
الاربعاء العصر كانوا اغلبهم متيمعين عند حصه في المستشفى..ام خالد ونوره وفطيم..وبو خالد اللي يا من بوظبي وودر شغله مخصوص عشان حصه...خالد ياها الظهر ورجع البيت عند صلاة العصر..وعبدالله اللي يالس على كرسي قريب من شبريه حصه باللاب كوت ماله...
حصه: امااايه..والله عادي ماعليكم مني...
ام خالد: شقايل يابنتي نسير العرس ونخليج...لالالا انا مب سايره..
حصه: امايه لاتخليني احلف عليج...الا يوم واحد هو شو بيصير فيني يعني؟؟؟ بعدين فظييحه في خالي وحرمته وشيخه...
عبدالله: امايه لاتنسين عرسي عقب اسبوع اخافهم يتنيحسون ولا ايوووون...
التفتت فطيم على نوره تصاصرها..
فطيم: سمعي..يتنيحسون اون...جي يهال.؟؟
نورة: اشششش سكتي...
بو خالد بصوت عالي يكلم ولده...
بو خالد: شقايل يعني تباها تخلي البنت بروحها,..؟ .
عبدالله: حصه ماعليها شر..يالسه تراها في المستشفى..وبتقعد معاها عنود...وانا اصلا مابروح الشارجه الا الخميس العصر بحضر العرس وبرد في الليل على طول... ماعليها شر ان شاء الله...
سكتت الام محتاره..مب هاين عليها تخلي حصه بروحها في المستشفى... ونورة الا بنت ..ماتامن تخلي بناتها رواحهن.. لازم حد مسؤول عليهن..
حصه: امايه لا تفكرين بالسالفه..انتوا طلعوا من العين الخميس الصبح...وردوا الجمعه بعد الغدا..او الصبح..بس لازم تحظرون ماعليكم مني انا...
ام خالد: والله مادري يابنتي ... ماتهونين علي اخليج ارووحج هني..
حصه: ماعليج مني انا مب سايره مكان... وبيني وبينكم تيلفون ..وعنود بتيلس وياي... شو بيصيرلي يعني؟!..
ام خالد: انزين حد من حريم العيال بيقعد وياج..!!!!..
نورة: امايه كلهن معزومات وبيسيييرن العرس....
ام خالد: عنبوو ولا وحده منهن بتقعد..؟!
حصه: انا ما اباهن يقعدن عندي...برايهن مالنا سلطه عليهن نجبرهن يقعدن وياي يحرسني بلا داعي...
بو خالد: خلاص يام خالد البنت ماعليها شر...صدقها هي في المستشفى وعندها بتيلس بنت عمها وعيال عمها هني شو بيصيرلها يعني..؟!.. وكلي الله...انا بقوم اسير عنكم العزبه...يالله تامروني على شي؟؟
الكل: سلامتك..
طلع بو خالد ..وحصه بالها شارد...توترت يوم قال ابوها ان عيال عمها هني...منو يقصد.؟!..منو اللي بيفتكر فيني غير خليفه..؟!..حمدان بيسير العرس... وسلطان وحميد مالهم خص فيها ولا بيحاتون زود يعني....محد غير خليفه ...وهي تدري انه مابيقصر بيسوي اللي عليه وزيااااااااااااااااده....الله يستر بس..
حصه ما تلقت زيارات وايده لانه موصية الكل ماينشرون الخبر هذا...لانها هي اصلا مالها مزاج ومافيها على الزيارات والمجاملات...بس اهلها وقوم عمها هم اللي زاروها...وماشاء الله مب مقصرين الغرفه ماتخلى ..لازم حد يكون معاها...وحست انها محبوبه من اهلها..وهالشي رفع معنوياتها لكثر الاهتمام الي تحصله منهم...وبشكل خاص...اهتمام خليفه الكبير اللي لفت نظرهم كلهم...
بعد ماطلع بو خليفه بفتره...طلع عبدالله وراه يكمل شغله... وتمت العيوز والبنات عند حصه..شوي ويسمعون دق عالباب.... تحجبن البنات للحذر بس...
ام خالد: اقـــــــــــــــــــرب... يامرحبا...
تبطل الباب وطلع راس حمدان منه بعيونه الشيطانه...وابتسامته الفخوره...
حمدان: السسسسسسسسسسلام عليكم....مرحباااااااابج زووود يام خالد...شحالج؟
ام خالد: هلا والله بولد محمد...هلا بالغالي..بخير فديتك شحالك انته..؟
حمدان: دووم ان شاء الله..انا بخير وعافيه...
حرك ايده كانه يشمل الغرفه كلها بحركته..
حمدان: شحالكن يابنااااااااات..؟!
البنات: بخير الحمد لله...
فطيم عيونها متعلقه بحمدان ..وبحركاته..وبروحه المرحه...احيانا تحسده علىهالحيويه اللي فيه...بس ماجنه لبسني اليوم..اشوفه مب عاطني ويه..؟!... مسكينه فطيم ..مادرت ان حمدان من شافها ارتاح قلبه اخيرا...صح ياي عشان حصه...بس يحس انه من زمان ماشاف فطيم ومتوله عليها....بس حاول يدس مشاعره هذي...العيوز متفيزره..مافيه يسويله سالفه ورمسه بعد...!!!..التفت لحصه وخصصها باهتمامه الكامل...
حمدان: هااااااااا حصيص....!!!..شحالج اليوم الغاليه..؟
حصه: بخيييييييير وعافيه احسن عن امس بوااااااايد...شحالك انته حمدان..
حمدان: بخييييير وعافيه...متى بطلعين من المستشفى..؟
حصه: ماقالولي...ماجنه عليك دوام..
حمدان: سكتي قسم بالله شارد عشانج...
حصه: ماااااااااااااااقصرت والله زيارتك ترفعلي المعنويااات وتونسني..بس عاد اخاف ينزل عليك غضب عمي..ههههههه....
حمدان: على قولتهم..اتق شر الحليم اذا غضب..اظن انه جي المثل الله اعلم...عاد ابويه نادر مايعصب..واذا عصب...!!.. سنفروووا بحياااااااتكم...
تناقعوا كلهم من الظحك وهم يتذكرون رسوم السنافر....يوم اييهم شرشبيل يتشاردون وهم يقولون هالجمله.... قعد حمدان يخربط عليهم شوي ويسولف..وطلعت ام خالد تشوف حرمه مرقده عدال حصه..تعرفها من زمان...
نورة: انته بتحظر العرس لاااه..؟
حمدان: انتي وايد اشوفج مرتبشه على هالعرس..!!..همممممممم ( ويطالع نوره من فوق لتحت بمغايظ).... بتشوف الحبايب والا مب عشان سواد عيون العروس حاظرة العرس...
نورة: حرام عليكم حاسديني على هالشوفه اللي من سنه لسنه...حالك احسن عني مسود الويه كل مابغيت تشوف شرفت علينا....
قفطت فطيم ونزلت راسها وهي تبتسم... وانقهر حمدان لانه حس باحراج شوي... وتم يطالع نوره يبا ينرفزها...
نورة: لا اطالعني جي..؟
حمدان: ليش..؟
نورة: بس...
حمدان: شو اسوي .؟..ماقدر امنع نفسي... بنت عمي...احبج..اموووت فيج...تعرفين اني بفج خطبتج من سعيد وباخذج..؟؟؟...مالي خص انتي بنت عمي انا احق فيج عن غيري...
انصدمت فطيم....وبطلت عيونها....ونورة تجهزت لحرب كلامية مع حمدان مثل ماتعودت...وحصة نقعت من الظحك على هالمسرحية...
نورة: كل يوم هالتهديد..؟!..كل ما تسمع شي ما يعيبك مني قلت لي ولد عمج وغصبن عنج بخذج..؟؟.. ثرك باااااااااااااير ولد عمي مايبنك البنات تبا تغصبني عليك...
حصة ماترضى على حمدان
حصة: هههههههه لالا حمدانوه سوووقه مااااااشي عال العال..
حمدان: انا مايبني البنات؟؟ انا بااااااااير؟؟؟....انا بس ارفع ايدي جذي( ورفع صبعة بخــقة فظيعه)... وتحصلين البنات طايحات عند ريولي...
نورة: اتحداك...
حمدان: مب قد التحدي صدقيني...
نورة: انا والا انته..؟؟
حمدان: حظرة جنابج...ولمي ثمج عني لا اسير اقول لسعيد انج داقة سوالف وياي..تحيدينه يغار...
نورة: وشدراك انته؟؟؟
حمدان: مب على حمدان ياعمري.. ماعرفتي ولد عمج..
نورة: صدق ماعرفت ولد عمي..احيدك ريال..بس صدمتني..مب طبايع الرياييل المواشاة والتهديد...!!
حمدان: هذا الاسلوب اللي يتعاملون فيه مع المتخلفين عقليا والجهلة...
حصه: بااااااااااااااااس ايه..شو بتقلبونها حرب.؟!!...
التفتت نوره باستغراب لحصه...
نورة: منو؟؟ انا وحمدان؟؟...لاااااااااااااا نحن حبايب عيال عم...صح ولد عمي الغالي..؟
حمدان: هي فديت بنت عمي انا....اشوفج...صدي هني...امواااح..
تناقعوا كلهم من الظحك خصوصا انه قطع نص البوسه ووجهها لفطيم ..وظحك هو وياهم....وفطيم تظحك وهي قافطه مووووووووت...
فطيم: خس الله هالبوز لك....مافيك سنع..
حمدان: انا يوم اشوفج انسى السنع وطوايفه كلها....
بطلت فطيم عيونها...
فطيم: حمدااااااانووووووه...!!!
ظحك حمدان وغمض عيونه بطريقه مسرحيه وقال..
حمدان: ياعيوووووووووون حمدان انتي..
فطيم: ويه خسك الله يالسبال....
حمدان: افااا.... مب ويه دلع ومغازل...
فطيم: الا انته اللي ماتعرف تغازل كله بدفاشه...
رفع حمدان حواجبه...
حمدان: اهاااااااا افهم من كلامج انج خبيره بامور المغازل...
عصبت فطيم..
فطيم: حشى علي..وجانك تحيدني جي لي معاك تصرف ثاني...
ظحك حمدان...يعرف فطيم انها حشيم...وتربيتها سنعه..
حمدان: شو بتسويين يعني؟
فطيم: بنتف حواجبك....
حصه: اووووووفففففففف طحتي عالعوق...حواجب حمدان تخبلبي...
التفت حمدان لحصه ولبس فطيم...
حمدان: قسم بالله انتي مافي منج اثنين....امووت فيج صدق والله...
قفطت حصه..
حصه: والله حتى انته غالي عندي ولد عمي...خلاص تعال اخطبني وبوافق عليك..
حمدان: صدق والله..؟؟؟؟؟؟
ماتت حصه من الظحك...ماتتخيل ابدا حمدان ياي يخطبها...
فطيم: يعني اذا صدق بتسير تخطبها..؟؟
لاحظ حمدان الغيره تظهر للمرة الثانية...واستانس فيها وايد وقرر يغايظها اكثر..
حمدان: حصة بنت عمي بس تاشر..بصبعها الصغير مال ريلها اللي دوم تتشكى منه...بس اشاااره صغيره... وانفذ اللي تبغيه..
فطيم: آآآهااا هي من نفس نوعك من اللي ياشروون بعد..؟!..
حمدان: الشيخه حصه..اذا اشرت...انا والبنات اللي طايحات عند ريولي ..كلنا نطيح عند ريولها..هذي حصيييص...
سكتت فطيم وصدت صوب ثاني وحمدان يظحك عليها....بسرعة تصدق وتنقهر هالبنت....عميااا..عميا بس اموت فيها....
حصه: ياسلاااااااااااااااام ولد عمي ماروم انا على هالرمسات...
حمدان: بس انتي لا تصدقين عمرج وايد...ما تفرقين بين التقردين والصدق.؟ّ!..
حمدان قالها بجدية وقفطها من الخاطر....نورة ظحكت... وفطوم لبستهم...وحصه برطمت..
حصه: عنبو هالويه لك يالسبال....
حمدان: هههههههههههههههه غاليه والله غاليه...اسولف عليج بس...
ردت ام خالد في هاللحظه...
ام خالد: هاااا..شو بلاكم تظاحكون.؟؟
نورة: سوالف خربطان الا...
ام خالد: هي..دام حمدان عندكم لازم بتظحكون..مااشاء الله عليك ولد محمد.... طالع على ابوك بهالروح المرحه...اذكره على ايام شبابه جذي كان مثلك اممره...
حمدان: افاااااااا..دمّــي ثقيل عيل..
حصه: هههههههههههه حرام عليك حمدان فنان عمي يوم يسولف..
حمدان: وين فنان الا نظحك مجامله عشان مانفشله...!!
نورة: هههههههههههه خسك الله لو يسمعك عمي تقول عنه جي بيروغك من البيت...
حمدان: ههههههههههه اسولف اسولف..كله تصدقوون انتوا ...يالله انا بترخص منكم بسير..
نورة: اصبر لحظه...(وصدت على امها)... امااايه.. خلي حمدان يوصلنا البيت عشان نجهز اغراضنا حق باجر...
ام خالد: لا تعبلن عالريال...يمكن وراه اشغال...
حمدان: لالا عادي عموووه..بوديهن جان يبن...
نورة: يالله عيل...حصيص..نحن ماظني نمر عليج باجر...تامرينا على شي من الشارجه..
حصه: سلمي على شويخ وباركيلها واستسمحيلي منها...
نورة: لا توصين..يالله ديري بالج على نفسج..فمان الله...يالله فطيم نروح..
خذن فطيم ونوره اغراضهن وسمعن توصيات من ام خالد عشان بو خالد في البيت وروحن مع حمدان....يوم طلعوا من المستشفى وقف حمدان في الباركنات ناسي وين وقف سيارته...
فطيم: وين موقف خنفسانتك السودا..؟!...
لبس نظارته الشمسية اللي تناسب ويهه وايد..واطالعها بعصبيه...
حمدان: بااااااااااكفخج بهالنعال هااا...جان الرنج استوت خنفسانه....؟!!!!!..
فطيم: هههههههههههههههههههههههههههه...
حمدان: طوفي طوفي... طــوَ لــوَل ..
فطيم: يعني انته اللي امممره مقصر في الطول..؟؟؟
حمدان: الطول مايعيب الريال بالعكس يعدل عليه...لكن حرمه..؟؟..هممممممم...
قالها واطالعها من فوق لتحت....وانقهرت فطيم...وقالت بتهور..
فطيم: يمدحووونه الطول حتىى في الحريم..بعدين عادي تكون طويله المهم ماتطلع اطول من ريلها...يعني لازم يكون طويل بعد...
شقت الابتسامه حلج حمدااااان...وشكله كان فناااااااااااااااااان بالحمدانية والنظارات الشمسية ويبتسم هالابتسامه الحلوه...
حمدان: احللللللللللللللى شي قلتيه لين الحين....درر واللهي درر.... (تقرب منها) ظروري ريلج يكون طويل.. مثلي جذي..
وغمز لها...
تراجعت فطيم قافطه ومنقهره من عمرها ورطت نفسها بنفسها ..وهذا حمدان مايحشم حد اسميه..اللي فخاطره بيقوله سيده ماعليه من حد.....
نورة: حلفوا انتوا بس.....؟؟! ..قولوا قسم بالله..؟؟ موقفينا في نص الشارع تتناقرون..حمدان تراني بوقف تكسي وبروح...
مشى حمدان صوب سيارته..
حمدان: سيري جان تبيني احش ريولج واسدحج في الشارع وادوسج بالرنج ساير ياي كم مره..اللي تقول عنها هالقلم خنفسانه...
نورة: خييييييبه ماصارت... كل ها عشان وقفت تكسي؟..
استغربت فطيم..توه يتغزل مسرع ماقلب عليها... صدق هالحمدان ماينعرفله...
فطيم: قلم بعيييينك...
المهم ركبوا السياره ووداهم حمدان البيت وهم طول الدرب على نفس الوتيره...شوي نقره وشوي ظحك..وشوي احراجات....لين ماوصلهن البيت وروح عنهن...
جهزن البنات اغراضهن لعرس باجر.. وطلعت نوره الفستان اللي بتلبسه وطرشته للدوبي يكوونه ويرتبوونه لانه كان مبهدل شوي من طول التخزين في غرفة الملابس..وبعد ماخلصن تجهيز نزلن تحت عشان مايحصل بو خالد البيت فاظي يوم بيرجع..لانه يعصب يوم يحصله فاظي..
خليفه كان باله مستهم على حصه... ماسال عنها اليوم...ومستحي يروووح..ومستحي في نفس الوقت يسال اي حد عنها...حتى عبدالله استحى يساله عنها.. عنود ماسارت لها اليوم لانه عندها بروفه في دبي ووداها حميد...محد غير نوره بيعطيه التفاصيل..مسك تيلفونه واتصل على تيلفون البيت وهو يدعى انها تكون بالبيت مب في المستشفى... ويوم ردت عليه نوره ارتااااح باله..
نورة: آآلوووو..
خليفه: السلام عليكم...مرحبا نوره..
نورة: وعليكم السلام هلا...من معاي؟؟
خليفه: انا خليفه..
نورة: هييييييييييي هلا خلييفه شحاااااااااالك؟؟
خليفه: بخير الحمد لله..علومكم انتووووا؟؟؟
نورة: نحن منيحييين....ما يييتنا اليوم...
خليفه: وين اييكم..؟
نورة: المستشفى....
خليفه: استحيت والله عشان جي داق................. شخبارها؟
ابتسمت نوره...
نورة: اليوم احسن عن امس وايد...مرتاحه..بخير..
خليفه: الحمد لله... متى بيطلعونها؟
نورة: ماقالوا متى بيرخصونها...
خليفه: كيف جذي.... وراكم سيرة الشارجه انتوا...
نورة: بنسير باجر الصبح...حصه اقنعت امايه انها تخليها وتروح العرس..
خليفه: وانتي مابتسيرين..
نورة: بلى بسير..
خليفه: بتخلوون حصه بروووحها..؟!!...
نورة: عبدالله قال عنود بتقعد عندها...وابويه قال عيال عمها هني ..بمعنى ثاني انته وعنود عندها .....
ارتاح بال خليفه....واستانس لهالثقه اللي عاطينها اياه اهله واقاربه..
خليفه: اهااااااااا...عيل دامها عندنا ماعليها شر...
نورة: هههههههه اكيد بتحطها فعيونك احسن عننا بعد....
قفط خليفه...
خليفه: عندج شك بالموضوع هذا..؟!..
نورة: هههههههه ابد والله ...واثقه منك ومن مشاعرك...
خليفه: همممممممممم....يودتي الرساله اللي قلت لج عليها..
نورة: هييييييييي تعاااااااااااااال ماخبرتك....
خليفه: خير..؟؟
نورة: خبرت حصه انك تباني ايود الشنطه .... يوم ذكرتها بالشنطه ..خذتها وطلعت الرساله منها.. وقعدت تقراها..واخر شي نزلت دمعه من عيونها....
تاثر خليفه...حس بقلبه اختفى...ذاب...سااااح بين ظلووعه...
خليفه: ......والله..؟!!!!!...
نورة: هي والله.....مسود الويه شو كاتبلها....
ابتسم خليفه..
خليفه: مااااااااااالج خص يالفضوليه...
نورة: ههههههههه اكيد كاتبلها احبج وهالشغلات....
خليفه: هههههههههههه والله الرساله كلها مافيها كلمه احبج اصلا...
نورة: هيييييييييييييييييييه ياولد عمي....تخريج امريكا مايعترفون بكلمه آي لوف يووووو... كله خبط لزق...
خليفه: تخريج امريكا فعيينج الله لا يردني لها ان شاء الله لا محتاج ولا سايح ولا مريض...وانتي سالي حصه اذا بغت بتخبرج واذامابغت مابتخبرج..كفاية اللي تعرفينه من اسرار الناس بدون مايرمسون عنها...
نورة: هاهاههاهاااعععععع تعترف اني خطيره يعني واهدد الامن والسلام القومي...
خليفه: ههههههههه اعترف يابوج اعترف..المهم شو سوت بالرساله عقب..؟؟
نورة: ماشي..طوتها وعطتني اياها ايودها..وخشيتها في صندوق حصه في الكبت...
خليفه: تمام... مشكوووره علىهالتقرير..تنفعين في الاخبار..
نورة: لاااا يوووه مافيني اطلع في التلفزيون ..بينترس مبنى التلفزيون رسايل غرام وطلبات زواج..مافيني على الصداع..
خليفه: ياالله يالله......خقاقه ثرج...هههههههه
نورة: لالا....اقر بالواقع على قولة حمدان...
خليفه: هههههههه حمدان رابشنكم ربااااش...يالله برايج..
نورة: تماااااااام ولد عمي...باااااااي..
خليفه: فمان الله..
سكر خليفه التيلفون وانسدح في شبريته...والابتسامه مافارقت ويهه...شو معناتها دمعة حصه..؟!!..حست فيني يعني اخيرا؟؟..اناحسيت يوم شفتها انها اطالعني بنظرة مختلفه هالمره...يااارب ...يااارب تكون متقبله يااارب...اسميني مابخليها فحالها الا يوم توافق.غصب طيب باخذها يعني باخذها...كفاية عذاب وايد عليه الصراحه...
نش وخذ اغراضه وطلع من البيت...
بالباجر(الخميس) الصبح وبما ان بو خالد موجود في البيت..ركبوا معاه وراحوا للشارجة..وخالد وناصر مع حريمهم ..وحمدان ويا امه.. وعبدالله كلهم بيطلعون العصر..وعلى طول بيسيرون الفندق للعرس لانه مافيهم يعبلون على بيت هلال السويدي.. المهم انه قوم بو خالد طلعوا من البيت على حدود الساعه 9 من البيت..وعلى الـ 11 وصلوا البيت .. وطبعا شافوا مرتبش.. بس استقبلوهم احسن استقبال كالعاده ماقصروا وياهم.. سعيد ماكان موجود..كان مشغوووول وايد من كثر الاشغال الي عاقينها على راسه...فما كان في البيت...دخلن البنات وفهمت نوره انهم من بعد الغدا بيسيرون الصالون كلهم..وشيخه بيودونها الغرفه اللي حاجزينها لها في الفندق وبتتعدل هناك وكل شي لين وقت الزفه...
مر الوقت عليهم بسرعه..وكلهم سالوا عن حصه..وخبروهم بالخبر وتموا زعلانين وايد عليها...واتصلوبها تيلفون عشان يتشكرولها بالسلامه ويسلمون عليها.. بعد الغدا..نوره اصرت تروح معاهم الصالون...والعيوز ماقالت شي اهم شي انها تفتك من صدعتها والحنه على راسها بروحها مب متفيجه...على هالحال راحت هي والبنات كلهن الصالون + عليا طبعا....
الضحى في العين وصل خليفه عنود للمستشفى عشان تيلس مع حصه..ويوم دخلت عليها حصلتها نايمه...عشان جي سار خليفه ويلس مع عبدالله شوي في المشتفى..ورد روح..دامها راقده مايروم يدش ويسلم عليها..بعدين بيرجع لها...
العصر وبعد ماتعدلن البنات..عليا خلصت اول وحده وخلت عيالها (لاول مره) عند البشاكير مضطرة.. وراحت الفندق تعابل مع عمتها وتشرف على الترتيبات..وحوالي الساعه 6 خلصن باقي البنات فطيم ونوره ومنال ومنى.. واتصلن بالدريول عشان اييبهن بس طلع هذا مطرش مكان بعيد ومشغوول... وفيصل نفس الشي مشغوول..حتى سعيد مشغول بس بعد القردنه والمحااايل عرف انه نوره معاهم..وهو اصلا ساير البيت الحين يتسبح ويجهز..فوافق انه يمر عليهن.... ويوم وصل سعيد... ركبت فطيم جدام والباقي ورااا...سعيد كان مستاااانس حدة بشوووفة نوره ..ونوره نفس الشي..
سعيد: هلاااااااااااااااااا ومرحبااااااااااااااا بالقاطعين...
نورة: ههههههههه شحالك سعييييييييد..؟؟
سعيد: بخييير وسهاله شحالج انتي خطيبتي الموقرة اللي ماتسال عني ولا تفتكر..
نورة: حرام عليك عاد...ارتبشنا ...
حرك سعيد السياره وسار صوب البيت..
سعيد: ربشتج تنسيج سعيد ؟؟
نورة: لا والله اصلا ماشي ينسيني سعيد...
سعيد: ههههههههههههه زين بنت حمد..قردني قردني...
فطيم: لا صدقها ارتبشنا...حصه مسكينه طاحت بالمستشفى..
انعفس ويه سعيد...
سعيد: لا والله.؟؟....شفييييييييها.؟؟؟
نورة: اول امس سوولها عملية الزايده...بخير احين هي لكن بعدها مرقده في المستشفى...
سعيد: مسكييييييييييييييينه..ماتستاهل والله...تستاهلون سلامتها عيل محد خبرنا..
فطيم: هي ماتبغي حد يدري...
سعيد: ليش عاد..؟؟
فطيم: بس ماتباكم تستهمون عليها...
سعيد: حليلها والله..سلموا عليها...
في هاللحظة رن تيلفون سعيد...ظحك يوم شاف مكتوب" الشيخ حمدان يتصل بك"...
سعيد: ههههههههههههه (ورد على التيلفون)..هلا والله هلااااااا
حمدان: ياخي جب...وين انته انا من نص ساعه واصل وامي دخلت بيتكم وانا في الميلس...
سعيد: ههههههههه السموحه منك طويل العمر الشيخ حمدان بن محمد...احين يايب الاهل من الصالون وياي..
حمدان: متى يعني بتي..؟؟؟
سعيد:ياريال اممره احين واصل البيت... عبدالله مايااا؟؟
حمدان: عبدالله قايلي بيطلع على الساعه خمس ونص جي..يعني قول على حدود السبع بيوصل..اظني بيسير العرس سييده... ونفس الشي اخوانه واهلهم...
سعيد: حياهم الله ...خلاص انا احين وصلت وبييك..
حمدان: تمام..فمان الله
فطيم كانت تتسمع المكالمه بكل اهتمام....حمدان فبيتنا يعني.؟!!!...وناسه..
وصلوا البيت ونزلن البنات ودشن البيت سيييده...وسار سعيد الميلس عند حمدان.. وهم نفس الشي ركبوا فوق في غرفة سعيد عشان يتسبحون ويبدلون ملابس ويتكشخون..
في نفس الوقت هذا وبعد ماطلع عبدالله من العين...راح خليفه المستشفى عشان يشوفهم..اتصل على عنود يوم دخل المستشفى وقالها انه ياينهم... وهي بدورها خبرت حصه..اللي ارتبشت داخليا بس ظاهريا ماطلعت تاثر...عدلت حجابها وقعدتها ورتبت اللحاف عليها.. وشوي يسمعون دق عالباب...
عنود: اقــــرب... تعال خليفه محد غريب..
دخل خليفه الغرفه..
خليفه: السسسسسسسسلام عليكم..
عنود+حصه: وعليكم السلام والرحمه...
تقرب خليفه بجرأة وسحب له كرسي عدال شبرية حصه.. وراقب تورد خدود حصيص..وعرف انها بخير...شكلها احسن عن قبل بوايد.. قال بهداوة..
خليفه: شحالج حصه؟..
حصه كانت قافطه بلا شي.... وكل مايتحرك زياده تقفط اكثر..ليش ؟ الله اعلم..
حصه: احم...بخير الله يسلمك..شحالك انته خليفه.؟
خليفه: الحين بخير...
وابتسم... وابتسمت عنود..وحصه استوت طماطه وكان ودها تشرد...
حصه: ان شاء الله دوم...
خليفه: وياج... متى بيطلعونج؟؟
حصه: يمكن باجر او ورا باجر الصبح... مابتسير العرس؟؟
خليفه: No..
حصه: ليش؟؟
خليفه: انتي تحت مسؤوليتي..وين اروح واخليج؟؟؟..
ابتسمت حصه..
حصه: انا ماعليه شر..ماعليك مني..
خليفه: افضل اني اقعد هني عن احضر اعراس...اصلا مافيني...من قبل انا متعايز...
عنود: خلووووف..لاعت جبدي من غداهم في المستشفى اليوم...هاتلنا عشا يواعا...
خليفه: ماااااااااااطلبتي...شو مشتهيات؟؟
عنود: شو رايج حصيص؟؟؟
فكرت حصه شوي...
حصه: بيتزا...شو رايج؟
عنود: تماااااااام..مشكله..
خليفه: فالكن طيب...تبن سلطات بعد وهالسوالف.؟؟
عنود: هي هي...سلطة ملفوف وذرة مع مايونيز...
خليفه: وراج عرس بتنتفخين ومابيووزلج الفستان...
ظحكت حصه...
عنود: ههههههه لا تخاف انا ما امتن...
خليفه: زين...صبيلي جاهي اول ..بشربه وبسير اصلي المغرب عقب بييبلكن العشا..حصه محتاجه انتي شي من البيت؟؟ ملابس ..اغراض اي شي؟؟
على طول يا على بال حصه انه هو اللي بيجهز وبيفتش اغراضها...وحمر ويهها...وانتبه خليفه لهالشي وابتسم..
خليفه: بقول للخدامه اجهزلج..هههههههه..
حصه: ههههههههههه لالا مشكور..امايه يابتلي كل الاغراض اللي احتاجهن...
خذ الجاهي من ايد عنود...
خليفه: تمام عيل....
تم يشرب ويسولف وياهن لين اذان المغرب..سار يصلي ومن عقبها راح اييبلهن العشا....
في العرس.. كل حد تكفل باهله يوديهم العرس...نوره سارت مع ابوها وامها... وفطيم مع سعيد...حمدان شل امه وراح...وخالد وناصر كل حد مع حرمته بعد...اما عليا وعمتها ام فيصل من قبل في الفندق عند شيخه...
كان ترتيب الكوشه ولا اروع...مزين باشكال روعه من الورد...والاضاءة كانت راقيه... وترتيبها حلووو... حتى ترتيب الطاولات وتوزيعهن..كل شي كان مرتب.... نوره وفطوم طااارن على طول عند شيخه يشوفنها ويشجعنها...اكيد ميته من الخوف...ويوم شافنها كلهن صفرن باعجااااااااااب...كانت طالعه ناعمه وايد.... هادية ..وواثقة..بس ارتجاف ايدها الوحيد اللي يبين خوفها وتوترها...يلسن عندها شوي يكلمها ويخففن عنها التوتر... ويراجعهن معاها شو لازم تسوي...لانها بتنزف برووحها مع الفرقه.. مابيكون حد معاها...وبتتسلط الاضواء كلها عليها...وبعد ماخلصن كانت القاعه انترست حريم.. وقالت لهن ام فيصل ينزلن يقربن بالحريم ويسلمن ويجاملن..فظيحه يتمن منخشات جذي... وهذا اللي صار..نزلت فطيم ونوره...ودارن عالحريم وتاكدن بان كل شي تمام..طبعا خوات المعرس كانن يساعدن بعد..وكانن حبوبااات وايد...عنده ثلاث خوات تقريبا من نفس السن مع نوره وفطيم وحصه... واندمجن معاهن بالسوالف.. بس كانن يخربطن بينهن...يتشابهن ومسويات نفس المكياج ومطقمات في كل شي...وكانن رقاصات الفرقه اللي ملبسينهن كلهن مغربي يرقصن من الخاطر .. والربشة مشتله...
في العين خليفه بعد ماخلصت صلاة العشا ياب العشا ووداه غرفة حصه... لاول مره حصه تاكل من الخاطر بس كانت قافطه من وجود خليفه اللي يالس مرتاح عالارض يتعشى معاهن ويسووولف ويظحك.. حوالي الساعه... عقب نشت عنود تتغسل وهي تقول انها بتتوظى لصلاة العشا.... وعنود يوم تتوظى..يعني تتسبح..تتاخر واااااااااااااااااااايد في الحمام..وهذي عادة مب زينه فيها...يوم دخلت عنود الحمام.. كان خليفه يظحك على سالفه ...ويفكر..نفض كندورته من بقايا البيتزا.. وقعد يحط الكشره في الزباله اللي عداله.. نش وقعد عالكرسي بعد ماخلص... وحصه حاطين لها عشاها في ذبانها في صحن... والبيبسي عدالها في الطاوله.. كانت مخلصه عشا تقريبا..رفعت نظرها لخليفه اللي كان شارد بذهنه وعينه عليها..ويوم انتبه لها نزل عينه مرتبك...حصه كان خاطرها تقوله شي..اي شي...تشجعت ورفعت عينها..
حصه: احمم..خليفه...آآآه...(رفع نظرة لها)... ابا اقول..اني آسفه..
عقد خليفه حياته ومافهم..
خليفه: على شو حصه؟؟؟
حركت حصه ايدها ورفعت كتوفها محتاره..
حصه: آآسفه..وبس..جذي..
تم خليفه يطالعها يفكر...وعرف من شكلها بانها تعتذر لانها عذبته وجرحته بدون قصد...ومافهمته... ابتسم لها كانه يقولها انه فهم عليها..نزل عينه للارض ونش...وسار صوبها.. تقرب من السرير وايد...وارتبكت حصه.. مد ايده يشل الصحن عن ثبانها وحطه على الطاوله...
خليفه: مافي داعي تعتذرين بشي مالج ذنب فيه.. هذا نصيبي ونصيبج...
سكتت حصه..مب عارفه شو تقول...وسكت خليفه بعد وحط ايده فمخابيه وهو واقف عدالها..
خليفه: حصة...همممم...فكرتي بالموضوع..؟!..
توترت حصه بزيااااده...ياويلي...ياويلي شو اقوله..؟!!...مااحس اني متاكده من شي...ماصليت استخاااره ..كيف اجاوبه؟؟..
حصه: خليفه...انته فكرت بالموضوع عدل؟؟
عقد حياته..
خليفه: هذي يبالها تفكير بعد..؟!!.. انا اباج تكونين حرمتي ومابغير رايي...
قفطت حصه..
حصه: بس خليفه...انا ارمله...كنت متزوجه...
خليفه: ويعني..؟!!!...
حصه: يمكن حد يعارض عشان هالسبب... خليفه..فكر...انا كنت زوجة انسان ثاني..ريال اعتبرته زوجي..قعدت معاه..كلمته...مسك ايدي كذا مره....وباسني على راسي بعد كذا مره...وو..
قاطعها خليفه وهو مغمض عيونه محترق من داخل...
خليفه: حصه الله يخليج لا تعذبيني بهالكلام....بس...ادري شو ممكن يصير بينج وبين ريلج ...بس قوليلي...انتي غلطتي معاه في شي؟؟
بطلت حصه عيونها وانتفضت بعصبيه..
حصه: لا طبعا انته كيف تفكر فيني جي...؟!..
خليفه: بس عيال...انا كنت اباج لي قبل هو مايفكر فيج اساسا..... بس سبقني... وتوفى...الله يرحمه عزيز وغالي علينا كلنا لكن خلاص حصه المفروض نجدم بحياتنا مانوقف عند هالنقطة...
نزلت راسها وهي تحس انها خلاص بتصيح....ماتتحمل حد يتكلم وياها بهالطريقه... هدا خليفه اعصابه..
خليفه: حصه.... انتي محصله عليه عيب او شي...
حصه: لا والله خليفه....انته ريال ولا كل الرياييل...واي وحده تتمناك...بس ليش تربط نفسك بوحده ارمله...
خليفه وايد عصب من كلامها وشوي بيفقط اعصابه..
خليفه:الوحدة هذي تصير بنت عمي...الانسانه اللي انا حبيتها..تمنيتها لنفسي... تحلمت فيها ليل نهار... وتعذبت بسبتها شهووور...كنت اتمنى امووت بس عشان افتك من ذاك العذاب... والحين تقوليلي لا تربط نفسك بي يوم سمحت لي الفرصه..؟؟؟؟
تاثرت حصه وايد بكلام خليفه...وحست ساعتها انها مستعده ترتبط معاه طول حياتها...لكن تخاف هو يندم...
حصه: خليفه.. مابتحمل تعايرني باني كنت متزوجه قبلك عقب..فكر...
خليفه: انا بعايرج بهالشي حصه...؟؟ انا..؟؟؟.... والله العزيز اني من يوم انخطبتي وملجتي ..طول ذيج الفتره وانا بعدني احسج لي انا وبس...ماكنت حاس انج لواحد غيري فعلا... شو اللي بيخليني احس بعد العرس بهالشي يوم بتكونين حرمتي؟؟؟...
حصه كانت ترتجف...كلام خليفه قوي وما توقعت انها بتتناقش مع واحد وبتتكلم معاه بهالطريقه...لهالدرجه يحبني..؟؟؟؟ يالله يارب اسميه حظي من السما....
حصه: خليفه....انته متاكد من قرارك هذا...
خليفه: متاكد....مليون بالاميه...انتي شو قرارج...؟؟ تعرفين ان قوم عمي مابيردوني..القرار قرارج ..مستعدة ترتبطين فيني طول الحياة؟؟؟..
سكتت حصه...ونزلت راسها..منحرجه..ومتاثره..شوي وبتصيح...حس خليفه براحه يوم طلع اللي في خاطره صوبها..وحس انها موافقه بعد...ابتسم ومد ايده تحت ويهها ورفعه صوبه...استغربت حصه من جرأته بس هي ذيج الساعه مب في حال...
خليفه: تعرفين يابنت عمي..اني مابسويلج سالفه...وبخطبج من عمي بنفسي بعد عرس عبدالله مباشرة... وبتاخذيني غصبن عنج...عودي نفسج من الحين على هالفكره...
كان يمزح...ابتسم لها.... وعورها بطنها...كالعاده..بس مب من العمليه... من الاضطرابات المعويه...وابتسمت بحياا هي بعد..خلاها خليفه وابتعد....ثقلت عليها اليوم وايد...بخليها تفكر بالكلام كله وتتقبل منه اللي تباه...حصه بتكون لي ... يعني لي...
خليفه: بخليكم انا بسير اقضي كم شغله...اذا احتيتن شي اتصلبي اوووكي...
حصه: ان شاء الله..مشكور خليفه ماقصرت...
خليفه: مافي داعي..اسوي هالشي لاني ابا..مب لانه الواجب.....يالله تصبحين على خير...
حصه: وانته من اهله...
طلع خليفه عنهم وهو يحس عمره بيموت من وناسته...عنود اللي كانت تتسمع من داخل الحمام قعدت تناقز من الوناسه...ان شاء الله قريب وبيحقق اخوها حلمه..فديته ياربي يستاهل والله...
الساعه 10 ونص في الليل انزفت شيخه للقاعة...اضواء خافته على كل القاعة.. والكشافات مسلطة عليها هي بس....حورية طالعه من البحر بنعومتها...وبنات الفرقة يزفنها على موسيقى كلاسيك هادية وايد... لابسات لبس ابيض ملائكي وحاطات اطواق ورد على روسهن وماسكات عصافير حلوه... كان الزفه واايد روعه وحلوه... ام خالد عيبنها المقهوياااات الفنانات...كانن هن بعد مثل الشركه وخذت بطاقتهن واتفقت معاهن عشان عرس ولدها...وايد استانست عليهن وعلى ترحيبهن بالعرب والخدمه النظيفه ...يعني صدق مقهويات مثل مال اول...فنانات...
بعد ساعتين تقريبا دخلوا المعرس...سعيد كاشخ بالسفره والعقال... وفيصل نفس الشي ..وبو فيصل + ابو المعرس..كلهم زفوووه لشيخه .. وكانت نوره وفطيم واقفات بعيد..بس نوره قدرت تراقب سعيد وشو يسوي.. وعرفت انه قاعد يفكر بعرسه كيف بيزفووونه وشو بيكون شعوره... واستانست يوم انه ما تصدد ولا تلفت للبنات اللي تارسات القاعه... ياعيني عليك يامحترم...تدريبي اني اراقبك عشان جي ماسك نفسك ... ريل شيخه كان انسان كاشخ...طويل عريض ..وابيض...وشكله حبوب...
بعد جلسات التصوير وقص الكيك طلعوا قوم سعيد والشباب كلهم وردوا للرياييل..وتم الريل مسكين بروحه يسلمن عليه خواته ودنيا... خلاص قرب العرس يخلص..نوره وفطيم تغشن وركبن للكوشه يسلمن على شيخه.. طبعا نوره ماسلمت على ريل شيخه لكن فطيم سلمت ...ونزلن...بعدها زفووا المعاريس لغرفتهم اللي بيبدلون ملابسهم فيها عقب بيطيربها المعرس الله اعلم وين.... مخلنها مفاجأة على قولته...بعد ماخلص العرس تلخبط الحابل بالنابل... وايد شباب قاموا يدشون القاعه يدورون اهلهم وهم طفروا من كثر مايتريون برااا... حمدان الملقوف واحد منهم يدور امه عشان يرد العين...طبعا كانوا اغلب المعازيم روحوا بس اللي متاخرين هم الاهل والاقارب ..يشطبون عالمكان ويدورون اغراضهم الظايعه في ربشة العرس... حمدان اتصل كم مره على تيلفون العيوز بس ماتشله...شكلها ماتسمعه..قام ودخل بس عدال الباب عشان تشوفه وتيييه... وهو يتلفت شاف نوره قاعده على واحد من الكراسي مع بنت اجنن... يوم دقق النظر عرف انها فطيم... وقعد يراقب من بعيد...وهو مستانس...حلللوه...الله يستر لا تنخطب واروح وطي...فاجاته امه يوم وصلت عنده وطلع معاها وسلموا على الجامعه وروحوا سيده العين...
خالد وناصر وعبدالله نفس الشي..روحوا العين بعد العرس..اما نوره وامها وابوها باتوا في بيت هلال...
الجزء الخمسين
من الربشة اللي صابتهم بيت هلال عسب العرس.. اغلب البنات رقدن بمكياجهن...حتى سبوح مارامن يتسبحن... اول ماوصلت كل وحده منهن شبريتها بختها برقده وهي مب داريه بعمرها..خصوصا عاد..فطيم...الرقاده العوده..
قوم خالد وناصر اول ماوصلوا العين على حدود الساعه 1 جي على طول ساروا بيتهم..الا عبدالله..اللي راح على طول المستشفى يطمن على حصه.... وصل باب الغرفه وتردد...يدري انها راقده احين...وعنود معاها..بس هو شو عليه من عنود.؟؟.حرمته واخته...يعني عادي... فتح الباب شوي شوي ودخل...الغرفه مظلمة...وهدووء...سكر الباب وراه وسار لعند حصه...حط ايده على راسها يشوف اذا فيها ارتفاع حراره والا شي.. شكلها بخير...ابتسم..وصد صوب الشبريه الثانيه عالزاويه...وكتم ظحكته..هذي قطوة راقده مب عنودي.. سار عندها...وقعد يتاملها ولو انه ظلام بس ينشاف شوي...سند ايده عدال راسها..وتقرب..تووه بيبوسها على يبهتها الا وعيونها تتبطل وتنتفض زايغه.. على طول عبدالله امتدت ايده على حلجها عشان ماتصرخ...البنت ميته من الخوف قامت تظارب وادز عبدالله وهو يظحك ويحاول يمسكها ..
كلمها بهمس...
عبدالله: يالبقره انا عبدالله...يووووزي...!!!
هدت عنود وبطلت عيونها على اخرها...وهي تتامل فويه عبدالله اللي مب واضح..
عبدالله: والله انا عبدالله.........بفجج احين,..لا تصارخين حصه راقده..
هزت عنود راسها واول مابعد ايده كافأته بكفخه على جتفه باقوى ماعندها...
عبدالله: آآآآآآآآآآآي...
وطت صوتها هي بعد..
عنود: تستاهل..(اعتدلت في مكانها ويلست)... شو هالحركات عبدالله...؟!
ظحك عبدالله بصوت واطي يلس عدالها عالشبريه وهمس..
عبدالله: بغيت اتاكد من رقدتج قبل ما ابتلش واخذج.. اذارقدتج ماعيبتني مابخذج...
ظحكت عنود شوي...
عنود: سخيف...وشو شفت؟؟؟
مسك عبدالله ايدها ورفعها..وباسها بخفه...
عبدالله: قطوة....!!
هزت عنود راسها ...
عنود: طيحت قلبي والله...
عبدالله: فديييييييييييييييت هالقلب انا..سلامته..ماقصدت..والله توني ياي من العرس وبغيت اطمن عليكن..
عنود: نحن بخير...شو العرس؟؟
عبدالله: فنان....عنود مافيني صبر...مافيني اصبر اسبوع بعدني...
قفطت عنود...
عنود: هااانت ياعبدالله ماباقي شي...
عبدالله: والله كل ما يقرب العرس يقل صبري اكثر...على فكره عنوودي جهزت المكتب.. ماشفتيه طلع كاشخ..مكتب مدراء..
عنود: وانته الصادق..مكتب دكتووووور قد الدنيا...
عبدالله: حليلي توني ماطلعت من البيظه خليتيني قد الدنيا...!!
عنود: انته بالنسبه لي جي..محد احسن عنك..
عض عبدالله على شفايفه متخبل عليها...
عبدالله: عنودي..غمضي...
عنود: ليــــــــــــش.؟!!!
عبدالله: انتي غمضي بس...
عنود: اول قول شو بتسوي...
عبدالله: غمضي وبتعرفين...
اطالعته اول عنود بتهديد...عقب غمضت عينها وهي تبتسم... ظحك عبدالله على شكلها اول...عقب تقرب..مد ايدها مسك ويهها وباسها البوسه اللي قطعتها عليه..بس حولها للخد...باسها بالقووووووبوسه طويييييييييله... وعنود منصدمه من الجرأة...ويوم فجها ظحكت وغطت عيونها من القفطة...
عنود: حماااااااااااااااااااااار....هههههههههه...
ظحك عبدالله..
عبدالله: آآآآآخ هالحمار يحبج... يالله رقدي انا بسير عنج...
برطمت عنود...كانت مستانسه بالقعده معاه مع انها مانعتنه من قبل...
عنود: بتسير.؟
عبدالله: هي عمري بسير ارقد عندي دوام الصبح...
عنود: دوام الجمعه.؟؟؟
عبدالله: هي الغاليه نحن دكاتره مب موظفين حكوومه... بعدين انا اشتغل دبل لاني بخذ اجازه شهر بعد العرس..
ابتسمت عنود..
عنود: والله؟..شهر...بنقعد في الامارات؟
ابتسم..
عبدالله: ياوييلي عالفضول...مايخصج..ويالله رقدي ..
عنود: هههههههه انزين...
عبدالله: تامرين على شي...
عنود: سلامتك..تلحف عدل عن البرد...
عبدالله: مابا...
عنود: ليييييش؟؟
عبدالله: ابا اتعود اهمل اللحاف عشان انتي تلحفيني عقب العرس ..ههههههههههه...
عنود: هههههههههههه ويا راسك..تستانس يوم تقفطني...
عبدالله: يعيبني شكلج يوم تقفطين.. يالله حبيبتي.. بسير..
عنود: الله وياك عيوني...
عبدالله: فمان الله..
مشى عبدالله وهو يطالع حصه للمره الثانيه كانه فحص اخير.. وطلع من الغرفه بهدوء مثل مادخل...
خليفه ذيج الليله مارام يرقد...اشياء وايد كانت تمر في باله...اولها موقفه مع حصه...مب قادر يصدق ان العقبات زالت...والبنت صارت تدري بالموضوع..وموافقه...من كثر ماهو متعقد كان يحس بعقبات زياده يايه في الدرب..بس هو مابيقعد يترياها هالعقبات...بيخلص امووره قبل ما توصل له..باجر بعد صلاة الجمعه بيكلم ابوه في الموضوع...اما بخصوص الامر الثاني اللي يفكر فيه..هو انه مب هاين عليه انه حصه معاهاعنود بروحهن في المستشفى محد وياهن شخص كبير مسؤول عنهن..هو امس من روح عنهن اتصل مرتين بعنود عشان يطمن ..بس يوم يت الساعه 12 قال فخاطره خلاص بخليهن يرقدن...لكن باجر من الصبح لازم اتصل واطمن...وعقب ما اتخذ قراراته هدى باله شوي وقدر يرقد...
سعيد نش الساعه 7 الصبح..تسبح وطلع على طول البحر..يحب يروح البحر الصبح.. وبعد ما شبع منه رد البيت كانت الساعه حوالي ال8.. حصل الشواب ناشين.. امه وابوه.. وبو خالد وام خالد.. صبح عليهم ويلس عندهم يتريق... كانوا متعودين ان شيخه تنش من الصبح بعد هالوقت.. وتحسفوا كلهم يوم ادركوا انه شيخه مابتنش لانها مب موجوده في البيت..واذا بيعتمدون على نشه فطووم..!!..عيل بيتريون لين الظهر...ويوم فكر سعيد بينه وبين نفسه بالموضوع اكثر...مات قهر...شيخه وراحت..وفطوم وبترجع العين اليوم...وانا ويا منو اقعد واسولف.؟؟؟ ويا منى ومنال؟؟؟؟؟ آآخ يالقهر مالي خص ابا اعرس... اطالع ساعته ونش...تقريبا من بدت فطوم دوامها في العين اشترك هو في النادي..حتى لياقته البدنية زااادت اكثر عن قبل...
ام فيصل: وين تبا ابويه ماكملت ريوقك..
سعيد: بسير النادي امييه....
ام خالد: تلعب كووره..؟؟
ام خالد متعوده على عيالها ماعندهم غير الكوره يلعبونها...
سعيد: لااا عموووه العب حديد...رياضه...
بو خالد: حديد..؟!!...
سعيد: هي نعم عمي..ماتشوف العضلات زادت...
ورفع ايديينه يسوي حركه يراويهم العضلات..لانه كان لابس بجامه نص كم ..طلعن عضلاته على قولته..
ام خالد: يابووويه شو تبااابه الحديييد بيكسر ظلووعك...
ام فيصل: قلت له والله يام خالد لكن عيزت مايسمع رمستي..
سعيد: افا عليج عموووه..جي ياهل انا يكسر ظلوعي..باجر بنتكم نوروه اذا انتفخت مره وحده وطاحت مابروم اشلها..لازم اسويلي عضلات..والا بييبلها قالوووصه...ههههههههههه
ظحكوا كلهم على رمسه سعيد..وهم يتخيلون نوره منتفخه.. ومحطوطه عالقالوصه...
ام خالد: على طاري نوره...انته بتسير فوق؟؟
سعيد: هي نعم ببدل ثيابي وبشل شنطتي وبطلع..
ام خالد: عيل ماعليك امر دق عليهن الباب وعهن خلهن يجهزن..هبابهن يخلصن بنروح العين نحن..
سعيد: يااااااااااااالله عمووه مابتغدون عنبووو.؟!!.
ام خالد: لا يابويه بنروح حصه فديتها مايندرابها اروحها هناك....
سعيد: هيييييي...انزين ماعليه بدق عليهن...
روح سعيد عنهم وركب فوق..دخل غرفته ..بدل ثيابه ...لبس الشووورت الاسود..وفانيله بدون اكمام كحلية مرسوم عليها كوبرا عند الصدر.. ولبس الدلاغات وجوتي الرياضه الاسود المخطط بابيض.. فتح الكبت ولبس كاب كحلي.. وخذ شنطته اللي فيها ملابس ثانيه وفوطه وبعض الاغراض الشخصيه +تيلفون والبوك والسويج وطلع من الغرفه.. وقف جدام غرفه فطيم.. وابتسم... يتخيل اشكالهن وهن راقدات كيف..خصوصا نوره لانه فطيم شايف شكلها وهي راقده من قبل كيف يعتفس...فر شنطته عدال الباب ..ودق عالباب كم دقه...
لا جواب..
شي اكيد يعني شو كان يتوقع...!!..دق مره ثانيه بشكل اقوى..
سعيد: فطيييييييييييييييم....فطوووووووووووووووم قومي نشي...
ويرد يدق مره ثانيه...داخل الغرفه..فطيم طبعا ماتسمع...راقده وحاطه المخده على راسها...وريل في الشرق والريل الثانيه في الغرب.. ونص اللحاف طايح عالارض..نوره انقهرت..انزعجت من هالدق.. قعدت عالشبريه وهي دهماااااااااااانه مب عارفه هي اصلا وين ..وتسمع الدق والزعيج..
نورة: اوووووووووووووف...
نشت عالشبريه وتمشي صوب الباب وهي كل شوي تتخرطف بغرض عالارض..فتحت الباب وهي مغمضه عينها وتساندت عليه..
نورة: هااااااااااااا..؟!..
سعيد تراجع ورا شوي وبطل عيونه...
سعيد: بسم الله الرحمن الرحيم...اللهم سكنهم في مساكنهم... نسينا نحن بعد امس خميس...!!!..
ومات من الظحك على شكل نوره...شعرها من بعد التسريحه كان بعده ياابس ونافش من الاسبراااي المحطوط عليه.. والمكياج بعده موجود عالويه ونصصه سااايح ومعتفس.... ونوره بعدها متسانده عالباب ومغمضه عينها فتحتهن شوي شافت شكل ريال...منو ها.؟؟..عبدالله والا سعيد واحد منهن كلهم نفس الجسم والطول...اوووف احين شو يبا.!!..ارمس خلصني...
نورة: شووووووووو..؟!..
سكت سعيد عن الضحك..وعقد ايده على صدره...
سعيد: صباح الخير حبيبتي...ياسلااااااااااام نوااري..شو هالمكياج الصباحي اللي يشيب الرااااس...؟!..قاعده تعطيني فكره كيف بتصبح بويهج عقب العرس..؟!!!!...
كان سعيد يدري انها دهمانه... وقفط بعد يوم شافها بكشتها..مب مغطيه راسها... ولاحظ بعد انها لابسه بجامه (قطعتين :بنطلون وقميص) حرير وردي...وطالعه خطيره عليها لولا هالشكل المعتفس اللي خرب كل شي .. بس ما اهتم..هذاك قبل ينزل عينه لو شافها بلا شيله بس احين خطيبته...بتستوي حرمته قريب وماعليه من حد...
نوره بعد كلام سعيد انتبهت على نفسها..وتلفتت حواليها..تعرفت على غرفه فطيم..ويوم شافت فطيم راقده عالشبريه والشكل الي كانت عليه من المكياج السايح والكشه...تذكرت نفسها..وان هي بعد مستويه نفس الشكل. ويمكن اخسس....تيبست مكانها... والتفتت للباب..وشافت سعيد شوي وبيموت من الظحك وهو رافع الكاب على فوق شوي..شهقت نوره ورقعت بالباب على ويهه...زاد ظحك سعيد ورد يدق الباب ونوره تركظ صوب الحمام..
سعيد: بطلي البااااااااااااااااب يا جوليا روبرتس...
نورة: لحظاااااااااه شوااااااااااااااي....
رد سعيد يظحك بزيااده عليها ..يوم وصلت نورة للحمام جابلت نفسها في المنظره وكانت شوي وبتصيح.... بسم الله الرحمن الرحيم شو هالكشل اللي يروع....ياويييييييييلي يافظييييييييحتي جان سعيد شافني بهالشكل خلاص بيكنسل عني..فتحت الفوز وغسلت ويهها ثلاث مرات بالماي والصابون لين خاز كل المكياج عنه ورد طبيعي... ورشت ماي على شعرها عشان شوي يلبد..ربعت للحجره وسحبت شيله بيظا تشيلت بها وتحجبت عدل وفتحت الباب وهي منحرجه حدها...شافت سعيد واقف يلعب بسويجه ويطالع مكان ثاني بس يوم فتحت الباب صد صوبها وهو رافع حاجب واحد والثاني نازل..
نورة: هاااا.؟!..
تساند سعيد عالباب..وهو يبتسم..
سعيد: سوري ماباج انتي... ابا ام دويس اللي شفتها من شوي...
ظحك وظحكت نوره بقهر..
نورة: سعيييد عاااااااااااااد.... ( واطالعته من فوق لتحت تنتبه للي لابسنه).. شو لااااااابس..؟!..
سعيد: سبوووورت.... بسير النادي..!
نورة: اهااااااااا..(لعبت بحواجبها له)...ياعيني ياعيني عالكشخه...
كانت نوره معجبه بشكله ..رياضي قح... وعرض الكتوف مبين.. وعضلات الايد بارزه شوي..وضعف الخصر..ياسلااااااااااام ياحظي فيك...ماشاء الله عليك...
سعيد: شو رايج فريلج...يطيح.؟!.
نورة: ليش منو تبا اطيح؟؟؟
سعيد: ام دويس اللي شفتها..قتلج...
نورة: هههههههههه ام دويس طايحه من زماااان ...كفايه عليك انزين..
سعيد: كفاية ونصصصصصصصص...ليش حد يحصل ام دويس ويقول ابا غيرها؟؟؟؟
نورة: ههههههههه ويا ويهك..يالله قولي شو تبا شحقه داق.؟
سعيد: امج تقول قوموا تزهبوا لانكم مابتقعدون للغدا...
وبرطم...
نورة: احلف؟؟ افااااااا..
سعيد: اون عشان حصه اختج...
نورة: هي صدق فديتها حصيص...انزين خلاص بوعي فطيم..
سعيد: نوره...تاخروا لين ما ارجع اوكي...لا تسيرون وانا محد...
نورة: ولا يهمك ههههههه ام دويس وراها سبوح عدل وغسااال معتبر للراس اليابس.. وحيزبوونه نفس الشي..
ظحك سعيد وعرف انها تقصد فطيم بحيزبونه...
سعيد: تمام عيل اشوفج عقب....باي...
نورة: تمام..لا اطيح بنات هااااااا...
سعيد: ولا يهمج..ان طاحن عند ريلي بجوتهن..
نورة: ههههههههههههههه توك تعجبني...باي
سعيد: هههههههه باي..
شل شنطته وراح النادي...ونوره دخلت تتسبح وبعد ماخلصت طلعت ووعت فطيم...وبظرااااااااابه وحرب نشت حيزبونه..ودخلت تتسبح..اما نوره نزلت تتريق..
الساعه تسع في المستشفى كان حصه واعيه من ساعه.. ومنسدحه مكانها تفكر بالقرار اللي اتخذته هل هو صح او غلط.. وعنود بعدها راقده...شكلها تاخرت بالرقاد امس..!!..المهم خلتها ماتبا تزعجها...فجاة رن تيلفون.. تلفتت حصه وماعرفت وين هالتيلفون اللي يرن... عرفت انه داخل شنطه عنود اللي عالطاوله عدال شبريتها..مدت ايدها للشنطه ومسكت التيلفون..ناوية ترد على التيلفون او تسكره ماتباه يزعج عنود..ويوم مسكت التيلفون شافت "خليفه" عالشاشه..ارتجفت ايدها واحتارت ترد او لا...عقب تشجعت وردت عالتيلفون...
حصه: آآلوو..
عقد خليفه حياته ...مب صوت عنود هذا..
خليفه: السلام عليكم...
حصه: وعليكم السلام..
تاكد خليفه انها مب عنود..عنود ترحب به يوم يتصل ماتخلي كلمه ماتيبها... ابتسم..
خليفه: ...حصه.؟!!!
حصه: هي...شحالك خليفه؟
استغرب خليفه..ليش خليفه شاله تيلفون عنود..؟!!..بس استانس بعد..
خليفه: بخير..انا متصل اسال عن حالج انتي...
حصه: هههههه انا بخير...خطفت النيرس عليه اليوم وقالت انه بطلع العصر او المغرب...
خليفه: والله.؟؟؟؟ زيييييييييين...شفتي هاي البيتزا خلتج تصحين بسرعه ههههههه
حصه: هههههههه شكلها الا جي.....
خليفه: عنود وين عنج.؟؟
حصه: عنود راقده لين الحين...مسكينه اظني ما ارتاحت بالرقده ورقدت متاخر امس..
خليفه: خليها..مابيستويلها شي ..عبدالله ماياج؟؟
حصه: لا لين الحين ماياني...
خليفه: اهاااااا...مب محتاجه شي من البيت.؟؟
حصه: لالا مشكوور..
خليفه: هي...احممم....اقول حصه...انااااا....قررت اكلم ابوويه اليوم بالسالفه....بعد صلاة الجمعه ان شاء الله...
سكتت حصه ..وهي تحس انه يسمع دقات قلبها اللي ارتفعت في اذنها مثل الطبل...
خليفه: موافقه والا تبيني اأجل شوي...
حصه: انته ماقلت بعد عرس عبدالله.؟!..
خليفه: هي..انا بس بكلمهم اليوم...اما برمس عمي بعد عرس عبدالله ان شاء الله...
حصه: ..............على راحتك....
ابتسم خليفه ...
خليفه: قولي انج موافقه علي عشان يرتاح بالي....ماسمعتها منج لين الحين...
حصه: يعني بخليك تسوي اللي تباه لو كنت انا مب موافقه,..؟؟؟
خليفه: ادري...بس قوليها...يالله حصيص عشاني...
ابتسمت حصه...
حصه:.... موافقة ياولد عمي....
غمض خليفه عيونه مرتاح....
خليفه: اوعدج بشي....مابتندمين...
حصه: وانا متاكده من هالشي...
خليفه: الحمد لله.....اخليج احين.. ودامج بتطلعين اليوم بشوفج في البيت ان شاء الله..
حصه: ان شاء الله...ماقصرت خليفه..
خليفه: لا تقولين جي..يالله تيك كييير...فمان الله
حصه: مع السلامه...
سكرت حصه التيلفون وردته مكانه بالشنطه... ورد خليفه ينسدح على الشبريه مرتاح...حصه بتطلع اليوم...الحمد لله يعني بخير وماعليها شر...يالله الثلاث ايام اللي طافت مثل الكابوس...الحمد لله انه عدى على خير..
حصه بعد ماسكرت ..زاد تفكيرها بالقرار هذا..وتذكرت سيف..وكلامه بانه مابيامن حد عليها غير خليفه...اذا كان هالشي بيريح سيف فانا بتزوج خليفه..بس الحق يقاااال..اني ما رضيت بخليفه بس عشان اريح سيف...لازم اعترف اني احس بشعور غريب اتجاه خليفه من سنين وسنين...بس للاسف ماكنت حاسه بهالشي..ولا مدركه له من قبل... سمعت دق خفيف عالباب وبعدها انفتح.. وطلع عبدالله...ابتسم لها ودخل وسكر الباب وراه..
عبدالله: صباح الخير...
يا صوب حصه ووايهها...
حصه: صباح النور هلا عبدالله....شو تسوي هني اطلع عنود راقده...
وقف وهو رافع حواجبه يطالعها باستغراب...فجاه استوعبت حصه..
حصه: هي صح عنود حرمتك ..ههههههههههههه..نسيت تصدق...
عبدالله: هههههه مب منج...من الطر اللي فبطنج....!!
حصه: اسكت لا تسمعك امايه...كل يوم تشوف مكان العمليه وتصيح..ذبحتني...
عبدالله: حليلها...خلوف يخبرني انها بغت اطيح عليه يوم قالها بالموضوع مع انه ماذكرت كلمه عمليه..هههههههه..
ابتسمت حصه...مسكين ياخليفه كم تحملت..!!...
حصه: خبرني شووو العرس..؟!!..
مسك عبدالله ملفها وقعد يجلب فيه...
عبدالله: نورة بتخبرج شو العرس..اناحظرت عرس الرياييل وماظني يهمج..المهم انه حلوو...
حصه: متى بيووون قوم امايه؟؟
عبدالله: اتصلت بالشايب اليوم الصبح يقول بيطلعون هالوقت..يعني بيصلون الجمعة هني ان شاء الله...
وحط الملف مكانه ويا صوبها وقعد...
عبدالله: بتطلعين اليووووم...مبرووك.
حصه: الله يبارك فيك..عفت المستشفى....
عبدالله: محد يداني المستشفيات...(وصد صوب عنووده وابتسم).. قطوة..اممره قطوة ملتمة على عمرها...
حصه: ههههههههههه عنود من هي صغيره ترقد جي...تتكود...
ظحك عبدالله وسكت...
عبدالله: شو بخصوص شغلج..؟؟
حصه: قالولي خليفه خذلي اجازة مرضية...
عبدالله: شو الله بالنج ؟؟..شو تبين بالشغل فنشي..
حصه: بفكررر....
حصة بروحها كانت لايعه جبدها شوي من الشغل...خصوصا بعد سالفة راشد...
عبدالله: احين انتي بترومين تحظرين عرسي وانتي جي..؟؟
حصه: اسميني بحظران شاء الله لو على عكااااز ...مابفوت عرسك لو اشووو...
عبدالله: هههههههههههه توج حرمه...يالله انا بخليج هذي ان نشت وشافتني هني بتسويلي قرقر زياده...
حصه: ههههههه اوكي...
طلع عبدالله...وبعده بربع ساعه وصلت ام سلطان يايبه وياها الدلال وجميع انواع الريوق ..يايبنها الدريول ويايبه الخدامه وياها تنظف وتروح..تقوم بالواجب فغياب ام خالد عن بنتها...
في الشارجه كانوا كلهم متيمعين في الصاله..يذكرون العرس ويسولفون عنه..سعيد كان موجود معاهم لانه توه واصل من النادي هو بعد..تسبح في النادي وبدل ثيابه هناك ويا البيت.. وهو مظايق نفسيا ان البيت بيفضى عليهم...فطيم محد وشويخ محد..والحين نوره بتسير وهو ماشبع من شوفها..بس بالله متى يشبع من شوفتها هذي..؟!!..ما يشبع موليه...بس استانس من الخاطر يوم درى ان عليا بتسير بعد يومين للعين وبتم هناك عشان عرس اخوها...وتكفل هو انه يوديها...وهو يقول في خاطره ياريتني اروم ايلس انا بعد بس الدوام الله ياخذه...
المهم ردوا هل العين للعين...ووصلوا قراب صلاة الجمعه...ماكان شي وقت يروحون لحصه الا بعد الغدا..عسب جي ساروا الريايل يصلون الجمعة وبعد مارجعوا تغدوا... وبعد الغدا سارت ام خالد اللي خبروها ان بنتها بتطلع اليوم فسارت هي بروحها للمستشفى والبنات يلسن في البيت ...
في بيت محمد الكتبي وبعد الغدا..يلس خليفه عدال ابوه اللي قاعد يشرب شاي حمر ويقرا الجريده...والعيوز يالسه وياه..وحمدان منسدح وحاط راسه عريوولها ويطالع التلفزيون...عنود طبعا كانت في المستشفى مع حصه...
خليفه: ابووويه...بغيتك بموضوع...
التفت له ابوه يعطيه كل اهتمامه..والعيوز بعد ويااااه..رزه...
بو سلطان: خير خليفه.؟!..
خليفه: خير يابوويه ان شاء الله... انا...استويت ريال الحين واشتغلت والحمد لله استقرت امووري..وابا اكمل نص ديني...
ام سلطان: هاااي الساااعه المباركه...فديتك انا من متى اتريا هالرمسه منك... من اليوم بدور لك على حرمه سنعه...
خليفه: شحقه ادورين يامايا دام البنت جدام عيونا....
عقد بو سلطان حياته..
بو سلطان: منووووه..؟؟
وحمدان يتسمع ويبتسم وما ظهرت منه اي حركه انفعال للخبر..من متى يتريا هالرمسه من خليفه... ويعرف شو بيقول سلف....اخيرا حسيت على دمــك ياخوي؟؟؟؟..يا واااد يا تــئـــيـــــــــــــــل..!!!
خليفه: بنت عمي حصه....
قال بو سلطان بصوت عالي شوي..
بو سلطان: والنعـــــــــم فيك ياولد محمد...
في نفس الوقت العيوز بانفعال....
ام سلطان: شوووووووووووو.؟؟؟؟
نش حمدان عن ريول امه...شكلها بتنشب حرب كلاميه... واعتدل في يلسته مستعد للدفاع عن حصه باي شكل عشان تدخل هالبيت..ماصدق ان اخووه يحس اخيرا...بتطلع العيوز تعترض..؟!!!.
التفت خليفه مستغرب هو وابوه لام سلطان...
خليفه: شو شووو..؟؟؟ حصه بنت عمي...اباها...
ام سلطان: بس يابوويااا...حصه متزوجه من قبل...
حمدان: حصه ملجت ماتزوجت...وبعدها بنت...
خليفه: وشو فيها اذا كانت متزوجه امايه..؟؟؟ مب هي اللي كنتي انتي تبينها وحاشرتني عليها..
ام سلطان: هي بس ذاك قبل..حصه الحين ارمله...
حمدان: امايا اسمحيلي..بس كلامج مايدش العقل...حصه ماتتعوض...
بو سلطان: انتي شو تقولين يام سلطان...تبينه يخلي بنت عمه يخطبونها الغرب...!!!..هو احق بها من الغريب..
سكت خليفه منقهر...هذي العقبات اللي انا كنت حاس فيها....بس عمري ماتوقعت ان امي اللي تعترض... افاااا يا امايه...!!!..
ام سلطان: وراهم هالغرب ماخطبوها لين الحين.؟!!..لانهم يدرون انها متزوجه...
بو سلطان: البنت الا من شهر ونص طالعه من العدة وين تبين حد يخطبها من الحين...؟؟؟؟
ام سلطان: شو بيقولون عنا النااااس يا محمد..!!!...ماحصلت بنت لولدي اقوم ايوزه وحده معرسه من ربيعه من قبل..؟؟!!!!
صرخ خليفه بعد مافقط اعصابه...
خليفه: اماااااااااياه...... حصه انا ابغيها من قبل ماتنخطب... ودامها الحين حررره...بخطبها ان شاء الله اذا كانت من نصيبي...اما عن رمسه الناس...شو بيقولون الناس عني انا...اني خليت بنت عمي ياخذونها الغرب وولد عمها ما تحرك...مثل ماقال ابويه انا احق بها من الغريب....وباخذها يعني باخذها...وكيفج انتي تتقبلين هالشي او لا...
نش خليفه عنهم وطلع من البيت مفووول من عصبيته....هذي اخرتها...؟!!... امي انا تعترض سعادتي..؟؟؟..اعرس وهي مب راضيه عن عرسي..؟؟؟؟؟ شو اسوي...؟؟ هذي امي....وحصه حياتي... ماقدر اتخلى عن الثنتين...!!!!
في البيت العيوز محتشره..
ام سلطان: شفت كيف يرد عليه ولدك..
بو سلطان: عنده حق....موقفج مب منطقي...شو ماسكه عالبنت؟؟؟
ام سلطان: الله يعلم ان حصه احبها مثل بنتي..وانا كنت ابغيها وحاشره ولدك عليها عشان يخطبها قبل بس هو مارضى...ووقت ما انخطبت حزت في خاطري وايد لاني كنت اباها لولدي..لكن الحين..الوضع تغير...البنت كانت متزوجه وترملت الحين..وكلنا نعرف انها كانت تظهر لسيف الله يرحمه وتكلمه في التيلفون..والله يعلم شو بعد...!!
عصب حمدان....شو بعد هاي الله يعلم شو بعد.؟؟؟..شو القصد يعني..؟؟؟
حمدان: امايا...اكيه بنتج ...تكلم عبدالله اربع وعشرين ساعه...ويوم يكون موجود في البلاد.. يومين وترك يتلاقووون.. يدخلون هالميلس ويصكون على عمارهم والله يعلم شو يصير بينهم...
حمدان واثق من اخته وولد عمه انهم مايسوون شي غلط...لكن بس يبا يقنع امه ويهاجمها بالحجه اللي هي ماسكتنها...
ام سلطان: انته كيف تقول جي عن اختك..؟؟؟؟؟؟
حمدان: وكيف انتي تقولين جي عن بنت عمي....؟؟؟؟...امايه...الحق ينقال...قوم عمي وطريقة تربيتهم لعيالهم احرررر بوايد عنا نحن....
بو سلطان: صدقه حمدان...احين انتي ..لو بنتج لااااااااسمح الله توفى عنها عبدالله قبل العرس..ترضين حد من الناس يقول عن بنتج مترمله ومابناخذها والله يعلم شو صار بينها وبين ريلها؟..
ام سلطان: وابوي لاتفاولووون عالبنت شو صايرلكم...
حمدان: شو صايرلج انتي امايه..؟؟!!..صراحه مستغربين منج نحن..... حصه انسانه دينه ومحترمه واخلاقها لا يعلى عليها... وانتي ادرى عنا بهالشي.. والله مابتحصلين اخير عنها لولدج...بعدين فكري بخلوووف... خلوف يحبها امايه..يبغيها من الخاااااطر...
ام سلطان: وانته شدراك..؟؟
حمدان: انا ادري من زماااااان....بس لام حلجي وساكت وماادخلت...
سكتت ام سلطان وهي جزئيا مقتنعة بكلامهم...هي تدري انه حصة ماتتعوض ابد..واي حد يتمناها...تذكرت ويه خليفه وقت ما قاله ابوه ان حصه انخطبت...ونظرة عنود لاخوها...حست وقتها ان خليفه انصدم وانجرح....
بو سلطان: عزة... لا توقفين بطريجه...دامه يبا بنت عمه مب وحده غريبه خليه ياخذها...تدرين خليفه مايحب يطلع عن شورج ولا شوري..لا تجبرينه يسوي هالشي غصبن عنه... ريحي ولدج لا تنغصين عليه حياته....
سكتت ام سلطان وهي شوي وبتصيح...صدقهم...انا شو ياني على ولدي..؟!!..شبيت فويهه مره وحده وزعلته ...!!!...فديتك ياولدي...برايك جان تباها خذها مب قايله شي...
ابتسم حمدان وهو يراقب الصراع اللي داير على ويه امه..ويعرف انها لانت...واقتنعت بكلامهم.هي محد يلومها..كل ام تبا لولدها بنت ماعرفت حد من الرياييل قبل ولدها...بس عاد حصه..؟؟ حد يرفض حصه..؟؟؟؟
بو سلطان: استهدي بالله يام سلطان... انا بقوم ارقد شوي...
نش بو سلطان وحمدان بعده يراقب امه ويبتسم...مسكينه شرشحناها.. انا وابويه مره وحده على امي..؟؟؟؟ مابتتحمل ....ممسكينه ...وظحك فخاطره وهو يرد ينسدح ويحط راسه عريولها..بس شوي ومسكت راسه العيوز وخوزته عنها..
ام سلطان: قم عني مسود الويه....
تفاجا حمدان...
حمدان: بــــــــــــــلللللل... تنطرين راسي جي عاد يالعيوز...مارمتي لابويه تستقوين علي انا...!!
ام سلطان: عيز حيييييييييلك ولد محمد...
ظحك حمدان عليها..ورد انسدح وحط راسه غصب طيب...وسحب ايدها وحطها على راسه..
حمدان: اماايه حججيني ...استانس يوم ادلعيني...
ام سلطان: مافيك سنع انته ..همك الا تدلع..
حمدان: اخر العنقوود وادري انج تموتين فيني..لاني اشبه ابووويه....اذكرج به يوم كان شباب....ادري انا بقصة حبج انتي وهو في السكيك...
ام سلطان: قممممممم مسود الويه صدق مافيك معنى...قم نش عني..قم
حمدان: ههههههههه مابا...حججيني اول...
ام سلطان: خس الله هالكشه الناطره لك..وراك ما تتحلق..؟!
حمدان: ههههههههههههه البنات يحبن شعري جي..يطيحن يوم يشوفنه سايح...
ام سلطان: ياربي بيذبحني هالولد...!!!! قم عني اقولك... مالت على هالرمسه لك...
حمدان: اسووولف امايه انتي كله جي مشتطه...يالله يالله حججيني شوفي شغلج...
سكتت عنه العيوز...ماتروم له..وقعدت تحجج شعر ولدها وهو يطالع التلفزيون مبسوووط ومكيف...
خليفه كان منقهر من الخاطر..هو يدري بنفسه انه مابيتراجع عن قراره بس كان خاطره الكل يستانس له ويبارك له خصوصا امه.اللي محتشره من زمان عليه تباه ياخذها..والحين يوم قرر ياخذها اعترضت..؟؟ ليش عاد النحاسه انا شو سويت.؟؟؟..تم يدور في الشوارع ويروح اماكن مختلفه...اخر شي سار عين الفايظة لبحيرة البط اللي كانت فاظية وخلى تيلفونه في السياره ويلس هناك.مجابل هالبحيره و يفكر بالساعات...
الساعه ثلاث رجعت عنود البيت مع الدريول والخدامه...والعصر طلعت حصه من المستشفى...مع عبدالله وام خالد... وعبدالله ماسكنها يساعدها عالمشي...مكان العمليه مازال يعورها..وقالها انه بييبلها كرسي لين السياره ورفضت..شوي شوي لين ماوصلوا السياره ووصلهم عبدالله للبيت ونزل معاهم لانه اصلا مخلص دوام...نزلوا من السياره وحصلت استقبال عدل من الكل...نورة وفطيم وحريم اخوانها حتى اليهااال قاموا ينططوون عدالها عمووه وعمووه مستانسين برجعتها... سلمت عليهم كلهم وهي مستانسه من الخاطر وارتفعت معنوياتها وايد على هالترحيب الحلو...وقفت جدام دري البيت.. وحست بكسل من انها تركبه...
عبدالله: تعالي انا بشلج...
حصه: لالالالالالالالالالالالا....شو تشلني..
عبدالله: يابنت الحلال مابترومين تركبين بتتعبين..بوديج حجرتج..
ام خالد: شلها شلها..ماتروم..
حصه: لالالالالالالا امااايه لاااااااا عبدالله مابا مابا بركب ارووحي...
بس ماسوالها سالفه...مسكها وشلها وكلهم يظحكون وهي قافطه مووووووووووووووووت... صح اخووها بس استحت وااايد من هالحركه...
حصه: عبدالله نزلني حرام عليك....
سكت عنها وهو يظحك ركب دري اللي جدام البيت ودخل...احتشرت مره ثانيه..
حصه: نزلني نزلني..بقعد في الصااله ماريد اسير الحجره....
عبدالله: الدكتور عبدالله يقول لازم ترتاحين..
حصه: حرام عليك عبدالله نزلني...
ركب الدري عبدالله وسار الطابق الثاني ونورة تربع عداله وسبقته عشان تفتح له الباب وتعدل الفراش...
اخيرا وصل...وحط حصه على فراشها...ووقف يناااهي...
حصه: تعبت..؟!!..محد قالك قلت لك نزلني...
عبدالله: ماتعبت ولا شي بس كنت حابس نفسي... يالله بدلي ثيابج ورقدي ماريد اشوفج تحت..
حصه: ماريد ارقد انا متولهه عالبيت..
عبدالله: ان نزلتي بزوالج...اباج تصحين بسرعه عشان تحظرين عرسي وانتي بخير...
سكتت حصه ونزل عنها عبدالله وخلوا نوره معاها تساعدها تبدل ثيابها...
قراب المغرب راح حمدان لبيت عمه...ودخل الميلس وحصل عبدالله هناك مع كم واحد من الربع..
وبعد السلامات صاصره حمدان...
حمدان: حصه ردت من المستشفى..؟
عبدالله: هي من ساعة داخل البيت...تعال وين اخوك..؟؟؟ اتصلبه مايرد..
تلفت حمدان مب عارف بشو يرد عليه....يدري انه خليفه مايرد عالتيلفون لانه اتصلبه كم مره نفس الحاله...
حمدان: مايرد عليك..؟؟؟
عبدالله: لا...وينه.؟؟
حمدان: آآآآآآآآآ....مادله وين..طلع من البيت زعلان...
حمدان مايعرف يجذب...
عبدالله: ليش..؟؟؟ بلاه..؟؟؟
حمدان: بعدين بقولك...انا بسير داخل اسلم على حصه...
عبدالله: حصه انا قايلها ماتنزل من حجرتها...
حمدان: هههههههه وظنك بتسمع كلامك.؟؟
عبدالله: لا والله ادريبها احين متفيزره في الصاله داقة سوالف....
حمدان: هههههههه خلاص عيل بسير داخل البيت انا...
طلع حمدان للبيت واذن المغرب على طول بعدها.. ورجع عبدالله يتصل بخليفه....ماشي فايده.. مايرد....قلبي منقبض عليه..وينه..؟؟ وليش زعلان؟؟ شو صار بينه وبين اهله؟؟؟؟ افففف من هالحاله...نطلع من شي ندخل في شي ثاني,,,!!
خليفه كان يالس ومب حاس بالوقت...المنظر في بحيرة البط كانه لوحة فنية...خصوصا الجو مغيم وحلوو..ويساعد الواحد انه يسترخي...يوم سمع اذان المغرب نش وراح لسيارته..مسك تيلفونه.... والعثره...!!... 25 مسد كوول..؟؟؟ من متى انا مهم لهالدرجه يعني... شاف انه اغلب المكالمات من تيلفون امه وتيلفون حمدان...وعبدالله... ماله بارض يتصلبهم احين..اغلق تيلفونه مره وحده...وفررة عالسيت..وراح المسيد الموجود في عين الفايظه وصلى هناك...
عبدالله بعد صلاة المغرب..راحوا الشباب عنه...رد اتصل على خليفه وطلع مغلق..طلعت ينوووونه....قبل مايرد.. والحين مغلق..؟؟؟؟ شو صاير..؟؟؟؟؟ طلع من الميلس وهو معصب وشاف حمدان توه ياي من المسيد... اللي ماواحاله يروح البيت ويسلم على حصه بسبب اذان المغرب..
عبدالله: حمدااااااااااان..؟!!..
التفت له حمدان..
حمدان: هااا...
عبدالله: تعال..خل عنك البيت احين...تعال اباك فسالفه....
رفع حمدان حواجبه وراح ورا عبدالله...يدري بالسالفه اللي يباه فيها عبدالله..واحتار حمدان يخبره او لا...اكيد انه عبدالله بيحسس من الموضوع وبيزعل ...مهما كان هاذي اخته...مايرضى عليها...
يلس وياه في الميلس وصب لعمره جاهي...
عبدالله: شو السالفه..؟؟؟ وين اخوووك..؟؟
حمدان: قلت لك مااااااادري... تبا جاهي.؟؟
عبدالله: اتصلت به ولقيته مغلق... قولي شو السالفه حمدان ...؟؟؟ شو بلاه خليفه..؟؟
حط حمدان كوبه عالارض بعد ما عاافه...شو بقوووله.....شو بقوووووله..؟؟؟؟
عبدالله: ارمس خلصني...مظارب ويا اهلك..؟؟
حمدان: احم...مب ظرابه...سوء تفاهم وعدى على خير...
عبدالله: لو عدى على خير بيرد علينا خليفه والا ليش مايرد بالله..؟؟؟
حمدان: لانه خليفه مايدري انه عدى على خير...بعده معصب...!!!
عبدالله: قولي شو الموضوع...انا مب غريب...
حمدان: وانا ماقلت انك غريب...
عبدالله: ارمس عيل...
حمدان: يووووووووووه...بس عاد عبدالله ...بيرد الحين..لا تخاف عليه....
عبدالله: بترمس والا شووووووو..؟!!!..
حمدان: همممممممممممم...خلوف..رمس ابويه اليوم..يبا يعرس...
عبدالله: شوووووووووو..؟؟؟ انزين وشو صار..؟؟؟
حمدان: تعرف منو يبا يخطب....
عبدالله: هي اعرف وبعدين.؟؟؟
حمدان: ابويه مستانس لكن...لكن امي شوي....اعترضت في البداية..
سكت حمدان....يعرف انه عبدالله بيفهم...وفعلا..عبدالله رفع راسه وهو شوي يحس بالمهانه...اختي انا تنرفض..؟؟ حصه اللي يتمناها الكل..تنرفض..؟؟؟..وعشان شووو.؟!!!!!
عبدالله: هييييي.....فهمت...
حمدان: شو فهمت...؟
حمدان حس بالزعل من هالموقف...
عبدالله: حمدان.......حصة مب طايحه فجبودنا...عشان نفرضها فرض على عمّه ماتباها..
حمدان: عبدالله انته شو تقول..؟؟؟..والله ان امي تتمناها تحبها وااايد مثل عنود... ومن زمان وهي حاشره خلوف عليها... بس تقول الحين الوضع مختلف لكنها غيرت رايها على طوول بعد ماطلع خليفه من البيت...
عبدالله: غيرت رايها والا اقنعتوها انتوا بالغصب..؟؟؟؟
حمدان: اقنعناها بالحجة مب بالغصب....ردت لعقلها وفرحت مثل ابويه...
هز عبدالله راسه كانه رافض الفكره...
حمدان: عبدالله...الشييييمه....الشيييمه دخييلك لا تطري هالسالفه عند حصه ولا خليفه ..لا تقول اني خبرتك...حصه ان درت بترفض...
عبدالله: اكيد بترفض...عيل تباها تفرض نفسها على ناس مايبونها...؟؟
حمدان: ياخي بلاك انته جي...والله اننا نباها....وحتى امي...ماعليك منها تراها الا رمسه ... ردة فعل وطااااافت..الحين عااادي ..لا تكبر المسائل... انتي تدري بخليفه شكثر يباها...
عبدالله: ادري...بس صراحه ماتوقعت هالموقف من عمووه...
حمدان: ولا نحن توقعنا.... مثل ماقلت لك تخبلت شوي وردت لعقلها...طوفها لا تحاسب على رمسة حريم...
عبدالله: يصير خير... بس والله انها حزت في خاطري هالرمسة...
حمدان: حتى انا..وانته تعرف بمعزة حصه عندي....لا تطريها اوكي... خلوف طالع زعلان لانه مايدري ان امي ردت عن رمستها...
عبدالله: احين وينه هووو... قاهرني ماحب حد يسوي هالحركات يختفي جي...
حمدان: بطرش له مسج وبخبره بالسالفه ..عشان يرد علينا..وانته سو عمرك ماتدري اوكي..ولا جني قلت لك..
عبدالله: يصير خير...
قعد حمدان يكتب المسج لخليفه ويخبره انه امه اقتنعت ورضت.. وعبدالله يفكر بهالسالفه كلها..كان خاطره يعترض على هالخطبه...عيل حصه تنرفض..؟؟ عسب شووو..؟؟ عسب شي مالها ذنب فيه..؟؟؟..هذا نصيب..عمر ريلها خلص..حد يتحكم بالموت..؟؟؟؟ يدينونها عشان شي مقدر ومكتوب..؟؟؟ ناااس متخلفه...!!!..بس يوم يفكر بسعادة خليفه وحصه.... وعذاب خليفه الطويل عشان يوصل لهني..يهدي نفسه...هذا شي يخص خليفه وحصه ومايخص حد غيرهم...زين منه مسكين انه تشجع وتقدم هالخطوة الكبيرة... تطلع حرمة عمي تعترض..؟؟؟؟؟ عليك حظظ ياولد عمي...لكن ماعليه..انا بسكت.. بس عشان خاطره هوو والله...والا حصه الف شخص يتمناها..والف شخص يقدر يسعدها... لكن يتم خليفه المبداااي..ولد عمها ويحبها من زماان وتعذب عشانها....بسكت...ولا بطري السالفه...بس والله ان هالشي يقهر في الصميييييييييييم.....حصه تنرفض..؟؟!!!!!!...كيف تفكر هالناس..؟
خليفه بعد ماصلى المغرب..راح السوق...وبالتحديد البريمي...راح لمحل يبيع البرامج هناك..يدور على كم برنامج لكمبيوتره...برامج حمايه ووكشف وغيره من هالامور..يشغل نفسه شوي عن التفكير..بعد ماخلص رجع سيارته..ويوم حط الكيس على السيت اللي عداله انتبه لتيلفونه المفرور..شله وفتحه..على طول وصلته مسج من عند حمدان...قراها..وابتسم بسخريه...احين رضيتي ياامايه...عقب ماقلتي رمستج اللي تحرق لفواااد رضيتي..؟؟؟ عقب شوو...تراج بينتي وجهة نظرج بانج رافضه هالشي ومب فرحانه لي...حط التيلفون عالمسند ماله وحرك سيارته.. يفكر..حصة طلعت من المستشفى والا بعدها.؟؟؟ قالت لي بتطلع اليوم...مايندرا... يالله يالقهر..قلت لها اني بشوفها في البيت...بس مالي مزاج اروح لهم احين...اخاف افضح نفسي ...يقولون كل شي يبين على ويهي..وهي تدري اني برمس اهلي اليوم...... مافيني ازعلها هي بعد.... ماتستاهل... شوي ويرن التيلفون..التفت له خليفه وشاف "عبدالله"..عالشاشه..مد ايده وحطه على السبيكر...
خليفه: مرحبباااااا..
عبدالله: مرحبا فعينك....وين انته ياخي..؟؟
توقع خليفه المهاااازب...
خليفه:........في السوق...
عبدالله: شو تسوي في السوق..؟؟؟
خليفه: اشتري برامج ...خلصت ..
عبدالله: انزين..وليش ماكنت ترد عليه..؟؟
خليفه:............. ماكنت عند التيلفون...
عبدالله: ويوم اغلقته ماشفت اني متصلبك كذا مره..؟؟؟ ليش مارديت ادق..
خليفه: ...........اغلقته لاني كنت اصلي...
عبدالله: وبعد الصلاة..؟؟
خليفه: يييييييييه مادريت انك حرمتي وقاعد تحاسبني...!!! ....بعد الصلاة ييت السوق وانشغلت...خير..؟؟؟
عبدالله: ليش تكلمني جي..؟؟
خليفه: ماتشوف عمرك فاجلي تحقيق...!!!!
عبدالله: شغلت بالي استهميت عليك...
خليفه: هممممم مشكورعبوود .مافيني شي...
عبدالله: مافيك شي....!!!!
خليفه:...............لا مافيني شي......حصه طلعت؟؟؟
عبدالله: من العصر في البيت...
خليفه: ...... ياحيها والله...
عبدالله: الله يحييك...انزين تعال بيتنا...
خليفه: وليش انته ماتي بيتنا...؟؟؟
عبدالله: مب مشكله..انته بتسير البيت..؟؟؟
خليفه:.................لا...
عبدالله: تعاييينااابك...وين بتسير.؟؟
خليفه: ماعرف والله..
عبدالله: خلوووف....مب عليه اناهالحركات ..شوفيك..؟؟؟ من شو مظايق..؟؟
خليفه: مافيني شي ...خلاص بيييك البيت..الميلس مب البيت...
عبدالله: هممممممممممم تمام...اترياك...
خليفه: اوكي...فمان الله
عبدالله: الله وياك...
سكر عبدالله التيلفون وصد على حمدان....
عبدالله: يكلمني من طرف خشمه.... طرشت له المسج انته..؟؟؟
حمدان: هي... بس تلقاة بعده حاط فخاطره...بيي هوو.؟؟
عبدالله: يقول ياي في الدرب..
حمدان: لا تقعد تسوي وياه تحقيق.. وتساله اساله كانك تعرف...بيشك مب غبي...
عبدالله: متعود اسوي وياه تحقيق يوم اشوفه مب طبيعي...ماتشوفني اعرف كل سوالفه.؟؟؟ مب من زود ماهو يفتح لي خاطره ترا...كله بالغصب يطلع....
حمدان: ههههههههههههه هذا هو خلووف...
عبدالله: الله يعينا عليه...امك بعد حركااات صراحه..
حمدان: بس عاادة لاترد عالسالفه..اعتبرها ماصارت..
عبدالله: بس هي صارت وتحز في الخاطر....
حمدان: ادري... بس امي تراجعت عن رمستها وخلاص...لا تسندرلي راسي احين انته بعد.. بسير اسلم عحصيص انا...
نش حمدان وطلع من الميلس ساير صوب البيت...يوم دخل البيت خنفس...سمع صوت ناصر في الصاله ..وظحكه حصه...نوره اكيد معاهم...بس فطيم... I don’t think so.....
حمدان: احمممممممم هووووووووود...
ناصر: هدااااااااا...اقرب حمدان...محد غريب..
عقد حمدان حياته..شو يقصد الشايب.؟؟؟ فطيم غريبه..!!!!...والا اووه صدق يمكن يقصد حرمته حمده..!!
دخل حمدان الصاله ..مثل ماتوقعت...ناصر وحصه ونوره... ياكلون مكسرات ويسولفون ويشربون شاي..
حمدان: السسسسسسسسسسسسسلام عليكم...
ناصر+البنات: وعليكم السلام والرحمه....
توايهوا حمدان وناصر...
ناصر: ياهلا ومرحبا بولد العم...حياك استريح...
حمدان: الله يحييييييييك.... هااااااااا حصيص...ياي مخصوص عشانج اليوم..
نورة: انته دومك ياي مخصوص عشانها اصلا...
حمدان: لانها شييييييختج...
نورة: سييرولللللللل....
ناصر بتانيب..
ناصر: نورووووووه..!!!!
حصه: لا تبدون بليز...شخبارك حمدان..؟؟
ابتسم حمدان وهو يطالع حصه بحنيّة...حد يرفض هالطيبه والهدوء..؟؟؟..مينونه امي..
حمدان: بخيييييييييير وسهاله يابنت عمي...مبسوط انج ظهرتي من المستشفى...
حصه: تسسسسسسلم والله حتى انا مستانسه..
حمدان: الله يسلمج... نوروه صبي جاهي..
صبت له نوره جاهي وسمعت كلامه عشان ماتحصل تهزيب من عند ناصر..
حمدان: اخوج الدكتور ماهنى عليه بالشاهي في الميلس...
نورة: هههههههههههاي..
حصه: جي شو عنده..؟؟
حمدان: همممممممم ماشي ماشي يسولف بس...انتي شو اليوم؟؟ اهون؟؟؟
حصه: والله اليوم تحركت اكثر عن الايام اللي طافت وجنه الا الويع ردلي..بس يوم برقد بيخوز..عاطيني دوا هم بعد ومسكن..
حمدان: الله يعينج...
التفت على ناصر..
حمدان: ناصر شفت طيير محطوط تحت النخله..طيرك..؟؟
ناصر: هي نعم...
حمدان: والله...!!!...شارنه.؟؟
ناصر: هي شريته قبل كم يوم...وبسويله عششه ورا البيت...وعقب عرس عبدالله ..اطري يوم يرجع من شهر العسل بنروح نخيم للقنص ان شاء الله... بتي ويانا..
حمدان: وناااااااسه...ياريت وين ارووم ناسي الدوام..؟؟؟؟؟
ناصر: بتفوووتك عيل..
حمدان: بعطيكم كيمرتي....صورووا...
ناصر: عبدالله عنده كيمره...
حمدان: بس عيل زين..المهم نشوف شو سويتوا هناك..
ناصر: لين عقب شهر يصير خير...بنسير نحن وشله شباب..وسلطان خوك...خليفه مادله بيسير والا لا..بس عبدالله قايلي انه يبا يروح ويانا...
حمدان: وين يسير ؟؟ ودواامه..؟؟ بيكون ماخذ اجازه شهر مايروم ياخذ اجازه ثانيه..
ناصر: والله مادريبه...ما استقر على راي..
حصه: هههههه اخافه يكشت في عنوود ويقص شهر العسل من النص..نص حقها ونص حق القنص هههههههه..
حمدان: هههههههههه ياويله منها ان سواها... عيل وين عمي..؟؟
ناصر: يا من الشارجه متوله عالعزبه والرجاب...ولين الحين هناك...
حمدان: وعمووه..؟؟
نورة: يت تعبانه من المستشفى وانسدحت ترتاح في غرفتها..
قعد يخربط معاهم شوي وعقب نش يبا يروح..يوم طلع من الصاله شاف فطيم نازله من فوق ماسكه كتاب..
حمدان: اوه اوه اووه...اهليييييييييييين خت العرووس...
ابتسمت..
فطيم: اهلين الشيخ حمدان بن محمد..على قولة سعيد...
حمدان: هههههه شحالج..؟؟
فطيم: منييييح...u؟؟؟
حمدان: doing fine والله.... احممم..تسمحيلي اقولج كلمه...
فطيم: قول..
تقرب حمدان منها وعلى ويهه ابتسامه شيطانه...
حمدان: كنتي امس..وايد وايد ..وااااااااايد حلوه في العرس...ان شاء الله بس تسلمين من الخطاطيب..
وتوسعت ابتسامته زياده يوم شاف فطيم مبطله عيونها...روح عنها وركب سيارته لانه مواعد راشد....
وفطيم مندهشه..شو دراه بشكلي في العرس..؟؟؟ ماشافني.....والا..؟!...متى شافني..؟؟ يالفظيحه..!!! بس بخصوص دعوتك ياحمدانوه.... آآآآآآآآآآآمين الله يسمع منك واسلم من الخطاطيب....
في الميلس..خليفه كان يالس مع عبدالله اللي فاتح وياه تحقيق..وخليفه مب طايع يقوله شي ..لانه يدري ان هالشي بيجرح عبدالله... ومادرى انه حمدان مخبرنه بالسالفه..
خليفه: اوهوووووووو عبود ترا ان تميت تسالني زياده بروح عنك والله...ياخي خلاص ماريد اقول ممكن تسد السالفه..
عبدالله: افاااااااا..ماتثق فيني...
خليفه: ياريال السالفه مب سالفه ثقة وعن الاستهبال اوكي...؟!..
عبدالله يبا يعرف بالموضوع من طرف خليفه..صح هو يدري..بس يبا خليفه يرمس عشان يتناقش معاه بالموضوع مب يتم كاتمنه فخاطره ويحاتي... يدري ان خليفه مايبا يقول لان هالشي بسبب جرح له...وهو مقدر هالشي...بس مهما كان لازم يقوووله ...يباه يتكلم...
عبدالله: ابا اعرف....يمكن اخفف عنك..
خليفه: انا بنسى السالفه من نفسي...عبدالله خلاص خلني انساها...
عبدالله: تتعلق بمنوه انزين..؟؟
خليفه: عبوود بذبحك....
عبدالله: انزين خلاص خلاص...
سكت خليفه يدور مووضوع ثاني يتكلم فيه...
خليفه: متى بتركبون الخيام جدام بيتنا...؟؟؟
كانت جدام وحوالي بيت قوم خليفه مساحه فاظيه وكبيره..هي اصلا ارض مب مبنايه ولا مسوره...تصلح انهم يسوون عرس الرياييل فيها... طبعا من بعد ما استاذنوا من صاحب الارض..
عبدالله: انا متفق وياهم على اساس يوم الثلاثاء يركبونها.. والثلاثاء والاربعاء بيكون ديكوراتها وترتيها كل شي جاهز...ان شاء الله..
خليفه: هممممم..عرس الحريم وين..؟؟
عبدالله: عنود محتشره من زمان على روتانا...وحجزوا فيه...
خليفه: يقولون قاعته صغيره روتانا...
عبدالله: ماعليه..بتكفيهم...المهم اعرس..محد قالها تختار هالفندق...
خليفه: ومنو بيزفك انته..؟؟
عبدالله: كلكم ادشوون وياي..
خليفه: منو كلنا..؟؟
عبدالله: ابويه وعمي وانتوا خوانها...
خليفه: خيبه شو يدخلنا عند الحريم...؟؟!!!
عبدالله: ماتبا تسلم علىاختك فعرسها..؟؟
خليفه: بسلم عليها قبل او بعد...مب شرط وهي عالكوشه..
عبدالله: واللللللللللللللللللللله يا خلوف..مادش الا وانته وياي وخل عنك الخريط..
خليفه: يارياااااااااااااال....
عبدالله: ماااااااااااااااافي....ادش وياي يعني ادش وياي..ادري بحمدان بيدش بدون عزووومه.. سلطان وحميد كبار ومعرسين ولا عليهم بيدشووون يسلمون علىاختهم وبيظهرون...ابوي وعمي ..ظروري..لكن انته...غصب طيب ادش...
ابتسم خليفه ..يتخيل شكله...رززززززززه وين ابا امشي ويا المعرس..؟!!!.. يالقفطه جاني بدخل عند حريم ماعرفهن..وكلهن يطالعنناا.... بس ماعليه عشان عبدالله بدش...الله يعيني...
حمدان كان عند راشد فبيتهم....وكان معاهم ربيعهم عزوز...اسمه عبدالعزيز بس هم يزقرونه عزوز...يلعبون ورقه ويظحكون...
حمدان: طاااااااااااااااااااالع....!!!!!! شو قايلك انااااااا...؟!
عزوز: هههههههههههههههههههههههههههههههههههههه...
حمدان: اطلع براااا ..اطــــــــلع...ماتعرف تلعب...
عزوز: انته اللي ماتعرف تعلم...
حمدان: ابلخ انته ابلخ...ماتفهم..
راشد: حمدان شو ياينك عالريال... عزوز ياخي مايصير تحط هالورقه الحين...بعدين اصلاماكان دورك انا محول الدور لحمدان...
عزوز: يوووووووووه(فر الاوراق عالارض) ..لعبتكم خراا انتوا... لعبوا لعبة ثانيه...
حمدان: انته فاهم اللعبة بس جي نحاسه فينا تغلط.... اصلامالك مزاج تبا تخرب علينا بس..
عزوز: هي..ماريد العب ورقة ابا العب كيرم...
راشد: الكيرم احلى تلعبها ونكون اربع او اثنين...ثلاثه مب شي...
حمدان: اصلا الخمسين ظايعه ذاك اليوم ادورها ماحصلتها...
راشد: لا لا خبرك عتيج...شرينا حجر يديد...
حمدان: لا والله....زين عيل.. خلنا نلعب..
في هاللحظة يرن تيلفون عزوز..ورمس فيه شوي عقب قال وهو ينش..
عزوز: انا اترخص منكم بسير البيت..
حمدان: ويييييييييييين تو الناس...
عزوز: يدي طالبني... اليوم الجمعه...اجتماع عائلي والا نسيتوا...انا اروحي نسيت...
راشد: هيييي دام الشايب العوود طالبنك مانروم نرمس...الله وياك....
حمدان: فمان الله..
طلع عزوز عنهم وروح بيتهم..
حمدان: عيل دام عزوز روح... تعال بنلعب كيرم..
راشد: هههههههههههه قسم بالله لو يدري بيصفعنا انا وانت...
حمدان: هههههههه خله..محد قاله يخرب علينا لعبتنا ويتنيحس... وين الحجر اليديد..؟؟؟
راشد: في السياره احيده...مادري وين فريته...اصبر بسير اييبه....
شل سويجه راشد وطلع... وتم حمدان في الميلس... سياره راشد كانت برا البيت موقفه.. والمطبخ كان عدال الميلس بس اقرب للبيت... طلعت ام راشد وهي اطالع صوب الميلس..شافت ظهر ريال يمشي طالع من البيت وعرفت انه حمدان....مثل ماقلت حمدان وراشد يتشابهون لحد غريب...حتى بالطول والجسم..والعيوز تحسبت حمدان اللي طالع من البيت ...وشافت من قبل عزوز يطلع ..وعرفت ان ولدها بروحه في الميلس...
ام راشد: مريــــــــــــــم..!!..يوووووه مريم...!!
طلعت مريم من المطبخ وهي ماسكه سكين ....
مريم: هااا امايه....؟!..
|
27-06-10, 07:26 PM
جديد مواضيع قسم القصص المكتمله
العرض العادي
