كاتب الموضوع :
بعدين معاكم
المنتدى :
القصص المكتمله
تتوقعون ردة فعل خليفه...؟؟؟؟
انا نفسي عجزت اني اوصفها....
خليفه عيونه كانت متعلقه بويه ابووه اللي كان يشرب قهوته وهو لاهي عن ردة فعله.... واحساسه كان عنيييف لدرجه انه كان يدور اي شي عشان يمسك فيه..وماحصل غير ايد عنوود اللي كانت عداله ..مسكها وهوس عليها قووووو....الامر اللي خلا عنود المصدومه بهالخبر.. تنتبه من صدمتها وتلاحظ اخوها.... وملامح ويهه...وانفاسه اللي ابدا مب مترتبه...وادركت وفلحظه وحده مشاعر اخوها ....وعلى طوووول خنقتها العبره وهوست هي بعد على ايد اخوها كانها تواسيه...
خليفه ماصدق الي يسمعه...مستحيل بعد هالتخطيط كله والتفكير وعوار الراس...حصه تنخطب؟؟؟ ومنو يخطبها..!!..ربيعي انا..؟؟ سيـــــــــــــــــف...؟؟؟؟؟؟..... وانااخر من يعلم..؟؟؟؟...احين انا كنت خايف من سعيد ذاك المسكين..وطلع التهديد كله من ربيعي انا...؟؟؟ سبحان الله كيف الايام تخوونك وانته ماتدريبها. مانخطبت الا يوم حطيت عيني عليها وحبيتها ؟؟؟.. ودارت به الدنيا وحس انه خلاص بيموووووت...حصه ظاعت...ظاااااااااعت...تاخرت وايد بخطبتها .......سحب ايده من ايد اخته وقال بصوت واطي لابوه
" ان شاء الله"
وهو ينش ويشل عمره وسار فوق...
سكر على عمره باب غرفته ويلس على شبريته... ومابغبي عليكم..خليفه دموعه نزلن من القهر والغيض..والحزن.. افكار وايد كانت ادور في باله وكلها مب زينه......رن تيلفونه كذا مره ولا رد عليه .كله كان عبدالله اللي يتصل...كان يترياه فبيتهم وخليفه تاخر....وكل مايتصل مايرد عليه...وهذاك عاد برووحه قلبه على ولد عمه من الاول وخاف انه صاير فيه شي.... اتصل على طول بعنووده...
عبدالله: مرحباا عيوني....شحالج؟
عنود: هلا والله عبادي..انا بخير شحالك الغالي؟؟؟
عبدالله: بخير الحمد لله... بلاه صوتج؟؟
عنود: ماااشي..صح مبرووك خطبه حصه...
فكر عبدالله لدقايق...قلبه مب مطمن..
عبدالله: الله يبارك فيج...درييتووووا؟؟
عنود: هي درينا من شوي..عمي كان يرمس ابوويه وخبره عن عزيمه باجر.. وابويه خبرنا..
عبدالله: هييي ياحيكم.... عنوووووودي وين خلوووف؟؟
رد عنود قلبها يعورها مره ثانيه على اخوها...
عنود: خليفه فحجرته.. من نص ساعه جي راكبلها ولا طلع منها...
عبدالله: في البيت يعني؟؟؟ شوبلاه اتصل له ولا يرد عليه..... !!..فيه شي..؟؟
احتارت عنود شو تخبره...شو تقوله..؟؟ والله خليفه كان يبا اختك وانخطبت احين؟؟؟
عنود: هممممم... خليفه... من سمع خبر حصه.... دخل حجرته وماطلع...
هذا اللي طلع منها...وخله يفهم اللي يفهمه... بطى عبدالله لين ماردعليها.... كان قلبه خلاص ينصهر...كان حاس...والله كان حاس...الله يسامحك يابوووويه جانك ماخليتني اساله من قبل....
عبدالله: عنود...انا بييكم احين... عشر دقايق وبوصل بيتكم....يالله باي
سكر عنها وطلع من الميلس على طووول لسيارته وسار صوب بيت عمه..اول ماوصل استقبلته عنود... وسوت له درب لحجرة خليفه...وعقب قالها تروح وتخليه اروحه يتفاهم مع خليفه...دق عليه الباب...
خليفه: منوووو؟؟؟
عبدالله: انا عبدالله...خلوف بطل الباب...
تظايق خليفه...ماكان وده يشوف حد في هاللحظه خصوصا حد يقرب لحصه..بس مهما كان ..غلاة عبدالله فقلبه اغلى من اخوانه...نش وبطل له الباب ورد يلس على الشبريه.. وحط ويهه بين كفوفه...وهو مساند يديه على الركب...
عبدالله سكر الباب وراه وهو يطالع ولد عمه .... شو هالحاله اللي هو فيها... كان يحس باليأس يطفح من خلايا جسم خليفه كله... لهالدرجه يعني..؟؟؟... الله يسامحنا جميعا يارب.... ظلمنا الريااال..... يا صوبه ويلس جدامه عالارض ..وسحب يديه عن ويهه...
عبدالله: خليفه...طالعني...شو بلاك؟؟؟
خليفه: ماشي..
عبدالله: خلوووف... شو ماشي عنبوو ماكد شفتك بهالحاله انا....
ابتسم خليفه بحزن...واطالع فعيون عبدالله كانه يعاتبه ....
خليفه: مبروك خطبة اختك ياعبدالله....
نش عبدالله من مكانه ويلس عداله.. وقلبه يعوره على خليفه...مسك خليفه من كتوفه وخلاه يصد صوبه...
عبدالله: خلوووف...والله اذا كنت تباها بفج خطبتها وبيوزك اياها... قبل مايستوي كل شي رسمي....
انصدم خليفه من رمسه ولد عمه....
خليفه: لعبة هي ياعبدالله..؟؟؟....الا تخطبون وتفجوون وتيوزون حد ثاني..؟؟؟ بعدين حتى لو كنت اباها..البنت ماتباني...والا ماوافقت...
عبدالله: البنت انا اروحي حاس انها ماكانت تباه..بس كلنا مدحناه لها والكل كان موافق عليه لانه صدق ماحصلنا عليه اي عيب..والبنت ماحصلت اي حل غير انها توافق ويانا...
خليفه: لا...
عبدالله: خلوووف.... والله اني كنت حاس انك تباها...وقلت لابويه هالرمسه ...بس قال لا هو يا يخطب ولا لمح لاي شخص انه يباها... وهي جدامه من سنين ومارمس عليها...ووصاني ماقول لاي شخص عن سالفه الخطبه الا يوم تكون رسمية ....شو تباني اسوي..
خليفه: عمي صح كلامه....لا انا رمست عليها ولا لمحت لاي شخص اني اباها....
عبدالله: بس انته تباها ...
خليفه: اباااااهاااا ...يعلني الموووووووووت اني اباها...بس خلاص عبود ماشي فايده احين....البنت راحت في حال سبيلها وياها نصيبها وخلصنا....ممكن تسد السالفه احين..؟؟؟؟
سكت عبدالله وهو شوي وبيصيح... هو مجرد فكره ان عنود تكون لاي شخص ثاني تخبلبه..كيف عيل شعور خليفه..؟؟؟؟؟....الله يعينك ياولد عمي ...
خليفه: واباك توعدني هالرمسه ماتطلع لاي شخص ..حتى انته نفسك انسااااها...هذا اذا كنت تعزني وتبا مصلحتي ومصلحة اختك...
عبدالله: ولا يهمك ياخليفه....
بس عبدالله مارام يتحمل ...ولوا على ولد عمه وهو متاثر اشد التاثيير....
عبدالله:...... آسف...والله آسف خلوووف اسمحلي...
ابتعد خليفه عنه وهو يبتسم له فويهه عشان يطمنه شوي..
خليفه: على شو آسف.؟؟..مب ذنبك... هذا النصيب وصار.... قم خلنا نطلع والله ظجت...
طلع خليفه وعبدالله وداروا في الشوارع...خليفه كان يتظاهر بانه ماشي صار...كان يسولف عادي بس عبدالله هو اللي كان مظايق وزعلان.... وكله يحط اللوم على نفسه...ليتني رمست....ليتني سالته ولا سمعت رمسة ابويه.... زين احين ظيعت على خليفه وعلى حصه..؟؟؟...الله يسامح اللي كان السبب...وبعد فتره ساله..
عبدالله: ماظني بتحظر باجر صح.؟؟
خليفه: همممممم بحظر...عمي طالبني مخصوص لانه الريال ربيعي... وبعدين خطبه ربيعي على بنت عمي ماتباني احظر وياكم؟؟؟... اوه صح هذا بعد مادقيت له ابارك له...
عبدالله قلبه يحترق وخليفه اخسسس عنه بس مايبا يبين اي شي لاي حد... ولازم يتقبل واقع ان حصه خلاص مب له ولا بتكون له... مسك تيلفونه واتصل على سيف...
سيف: هلاااااااااا والله ومرحباااااااا...
خليفه: مرحبااااا سواااااااااف شحالك؟؟
سيف: بخيييييييير الحمد لله شحالك انته..؟؟
خليفه: اشقح...
سيف: هااااا.... وين داركم...؟
خليفه: والله ندور في الشوارع.... متصلبك ابارك لك عالخطبه...شو عليييييييك ...ثرك يوم تقولي قريب كنت منشن على بنت عمي..؟؟؟
عبدالله من سمع خليفه يرمس وقف سيارته فواحد من الباركنغات القريبه....خلاص مايقدر يتحمل...اذا تم يسوق اكيد بيسوي حادث ....كيف خليفه يتكلم بكل هالبرووووود ويا سيف؟؟؟ ... ماقوى قلبك ياخليفه...
سيف: ههههههههه اسكت ويا هالويه ولا اطلع هالرمسه لحد لا يفركشوولنا السالفه...
خليفه: هههههه لا بيفركشوون ولا شي ولا بيحصلون اخير عنك...مبرووك مبروووك تستاهل والله..
اطمن سيف من فرحه خليفه له...يعني مب حاط في خاطره..؟؟ الحمد لله هذا اهم شي في الموضوع...بس بعد كان خاطره يساله ويتاكد بشكل قاطع...والا مابيسامح عمره ابد اذا تم متشكك بهالموضوع...
سيف: الله يبارك لك ان شاء الله وعقبااالك.... بس صدق صدق خلوووف.. بسالك سؤال متخوف منه من زماااان..واباك اجاوبني بصراحه.... البنت ماكانت فخاطرك؟؟
ابتسم خليفه بسخرية...ماكانت في خاطري؟؟؟؟؟ الا كانت وبتم فقلبي ودمي بعد.... ليتك تدري....
خليفه: ههههههه لو في خاطري ماخليتها لك لين احين ويا هالراس....لا تحط هالموضوع فبالك موليه...
استانس سيف من خاطره.... وعبدالله...اختنق ونزل من السياره...لين مايخلص خليفه رمسته..... كان شاك ان خليفه مابيقدر يتحمل يواجه كل هالامور اللي تتعلق بخطبه حصه....لكن طلع جامد وصامد مثل اليبل...ولا مبين عليه ...بس الظاهر ان عبدالله هو اللي مابيتحمل هالسوالف كلها....مب خليفه... والحمد لله ان السفر مقرب...بيسافر خليفه وبيبتعد عن هالجو كله سنه.....وفي سنه يقدر ينسى...ان شاء الله ينسى...
الجزء الثامن عشر
ادري زعلتكم وقطعت قلوبكم بسبب سالفه خليفه... واتمنى ماتكرهووني...لكن هذا اللي صار... بالاحد الصبح راح خليفه وحجز لنفسه ولولد عمه تذاكر ليوم الثلاثاء... والمسا حظر مع اخوانه وابوه... ومزح مع الكل وتظاهر انه ماشي مستوي عليه...ونجح بطريقه مااا..انه يوصل هالفكره للكل..بان خليفه مب مهتم...والسالفه عادي عنده وفرحان لربيعه وبنت عمه.. لكن بينه وبين نفسه...ويوم كان يرجع لغرفته..كان العذاب يقطعه مثل السجاجين...ودمه يفوووور بعرووقه يوم يتخيل انها ظاعت منه عشان ياخذها ربيعه..وخليفه انسان ديّن...ويعرف ان هذا هو النصيب..واللي الله كاتبنه...لكن قلبه تم يرفض هالفكره...اللي كان متشبث بفكره ان حصه..حقه هو...ومب لاي حد غيره...بس لازم يتقبل الواقع عاجلا ام آجلا... وحمد ربه انه سفره بعد يومين...ولاول مره يستانس انه بيبتعد عن اهله وبيسااااافر...
حصه بدت تتقبل الفكره... كانت تعيد وتزيد في فلم الرزفه..وتحاول تطبع ويهه هو بدال ويه خليفه اللي منطبع من سنين... وماكانت تملك غير انها تتدعى ان الله يوفقها اذا كان هذا نصيبها واللي الله كاتبه لها... واذا ماكان هذا نصيبها..مابتتسهل كل الامووور لهالخطبه بهالشكل... الله كريم...
سيف بكل بساطه ماكانت الدنيا سايعتنه من فرحته... اتفق مع اهل حصه على كل شي ... وحصه خلاص خطيبته رسمي...وكان ماخذ وعد على نفسه بانه يسعدها قد مايقدر....والله يعطي كل انسان على قد نيته...
عبدالله كان يتظاهر بالفرح لاخته...كان يعرف انها بحاجه ان يكلمها اي شخص قريب من خطيبها عن هالريل اللي ماتعرف عنه شي...وبطبيعه الحال كان هو هذا الشخص...وخبرها بكل اللي يعرفه عن سيف...وعن بعض المواقف....عشان تحس انه انسان صدقي مب مجرد فكره.... لكن بينه وبين نفسه كان الذنب يقطعه... ولو انه هو ماله خص..بس كان يحس بالعكس... وكان يتهرب من كل هالسوالف عن الخطبه مع عنوووود...ويحاول يعوضها في هالايام القليله عن سنه كامله من الغياب بيغيبه عنها....
نورة..صح كانت فرحانه لخطبه اختها...بس في نفس الوقت خايفه.... احين انا صرت فويه المدفع....وماتم غيري ينخطب.... ياويلي اخاف ايووني عرب يخطبوني انا بعد ومااحصل غير اني اوافق مثل حصه...صح هي متزاعله ويا سعيد ومنصدمه فيه... لكن كان عندها شعور غريب بان الامور بتتصلح ..وحتى لو ماتصلحت... من ايام مراهقتها وهي تحلم ان زوجها بيكون سعيد وبس...ومحد غيرره...ولين مايعرس حظرته..هي مابتعرس...وعلى طول خبرت امها بانهم مايعرضووولها اي معرس لين ماتتخرج....ويكون هالشي معلووم عند الكل انها مابتعرس الا بعد التخرج...
سعيد نفس حالة نورة...خايف.... لكن مع ذلك حس ان الايدار اللي كان مسوي حاجز بينه وبين خطبه نوره خلاص انزااح.... براااااايها اذا هي زعلانه بالطقاق.... المهم انه بيروح يخطبها بما ان ختها خلاص انخطبت وماتم غيرها....ياسلااااااااام من سنين وانا اتريا هاللحظه.... لكن صبر...!!!... هو لين الحين مايدري شو هالفكره اللي مب زينه اللي ماخذتنها نوره عنه... يخاف انها كبيره بحيث ترفضه نوره....تسويها...مينونه طول عمرها.... لالالالا....لازم يحل الموضوع هذا باسرع فرصه ....ويشيل سوء التفاهم هذا...ويتفقون من اول ويديد انهم بيكونون لبعض نفس ماكانوا قبل..... يالله شكثر متوله على ذيج الايام ...يوم كانت نورة تشوفه كانها ماتشوف حد غيره بالغرفه....وتقوله بعيونها كلام وكلااااااااام ماينوصف....
حمدان...يوم درى بخطبه حصه فرح لها... وبارك لها يوم شافها ... وهو انسان عايش حياته ولحظاته ومايفكر بالمستقبل وشو بيصير....عشان جي ماستغرب فكره ان حصه تكون لواحد غير اخوووه... وتاقلم مع الفكره بسرعه...وكان يالس وياها هي ونوره في الصالة في الليل يوم نش عنهم الشايب ودخل يرقد... الشايب متعود على وجود حمدان فبيتهم... وخذ المساله بشكل عادي.... وكان حمدان ملتهي عن البنات ويطالع التلفزيوون... وحصه ونوره يتصاصرن عليه ويتفقن انهن بيسالنه عن سالفته ويا فطوم الحين بما انه الفرصه سانحه...
حصه: احمممم..اقول حمدان....!!
حمدان مازحزح عيونه عن التلفزيووون
حمدان: نعم....!!
حصه: نعم الله عليييك يابني.... اقوووووول..تذكرهم هل الشارجه اللي كانوا عندنا فملجه عبدالله.؟؟؟
الحين انتبه لها عدل.... شووو بلاهم هل الطوول والجمال؟؟ خير ان شاء الله...
حمدان: هي..بلاهم..؟؟؟؟
حصه: احمم... مافيهم غير كل خير...بس بغيت اتخبرك...يوم يبت فساتينا البيت..شو استوى؟؟
ابتسم حمدان ورد صد صوب التلفزيوون..
حمدان: ماستوى شي...
نورة: يالله عاد حمدانوووه..استوى شي ..خبرنا..
حمدان: حصلت بنت عطيتها الكيسه وسرت...
وهو كان عاطنهن ظهره ويطالع التلفزيون وهن وراه مايشوفن ويهه...
حصه: بس هي قالت كلام غير هذا....
حمدان: شوو قالت؟
نورة: قالت عنك قليل ادب وماتستحي على ويهك....
حمدان كان بينقع من الظحك... بس كتم الظحكه وهو يسكر حلجه عدل عشان ماتطلع الظحكه...
حمدان: ............. تتبلى علي..!
نوره طفح الكيل عندها.....نشت من مكانها ويلست جدامه مجابلتنه ومغطيه عنه التلفزيوون...
نورة: مب علينا هالكلام...نعرفها حركاتك...شو مسوي بالبنت..
حمدان: ماسويتبها شي ياوجه النحس....خوزي عني خليني اشوف..
غياظا فيه..نشت نورة وبندت التلفزيووون....
حصه: لا صدق صدق حمدان..يالله قول شو صار..
حمدان: اوووفف.... اول قولن لي شو اسمها...؟؟؟
نورة: ايوه ايوه...طلع الاهتمام....الله يسلمك هذي بنت خالي..واسمها فاطمه...
حمدان: اهااااااااا...
حصه: يالله عاد شو صار...
حمدان: ماصار شي..دخلت وحصلتها ويا عيال عليا..سلمت عليها وسالتها منو انتي قالت لي بنت هلال السويدي..يمكن غلستبها شويه ماذكر...بس ماقليت ادبي يعني ........يمكن شوي مصختها بس مب لهالدرجه ... عطيتها الكيس وطلعت..
اطالعن نورة وحصه فويوه بعض.... لا السالفه فيها اكثر من جي والا مابتعق على راسه كل ذاك السب...
نورة: نعرفها نحن غلاستك.... البنت ماخلت كلمه ماعقتها عليك من زود قهرها...
حمدان: هههههههههههههههههههههههاي....مشكلتها هذي....
حصه: شفت ويهها؟؟؟
حمدان: هي شفته يوم دخلت بس عقب تغشت عني...
حصه: حلوه..؟؟؟
حمدان: ......... شيــــــــنـــــــــة....
نورة: ههههههههههههههاي....حمدان...سمعت بالمثل القائل.... اللي يسبّك يحبّك...؟؟؟!!!
حمدان: الصراحه الا من عندج سمعته..ومالت عليج انتي وامثالج........ بعدين انا ماسبيتها...انا قلت امر واقع...
حصه: هههههههههههههه طالعي عيونه...!!..والله انك تجذب... شفتها وعيبتك والا مابتم اطالعنا في الحوش جي يوم الجمعه الظهر....
حمدان: هههههههههههههههههه فارجن انزين...والا انا بفارج..قومن عني بسير..
حصه: وين ايلس ماسولفنا وياك..
حمدان: يبالي ارقد وايد لاني باجر بوصل خليفه وعبدالله مطار دبي...يالله تامرني بشي؟
نورة + حصه: سلامت راسك....
حمدان: تصبحن على خير...فمان الله..
وطلع عنهن ساير صوب البيت....
من طلوع فجر يوم الثلاثاء وعنود فاتحه مناحه وماوقفت.... عبدالله بيسافر اليوم..واخوها بيسافر اليوم..وبتخلص وناسة هالشهرين... موعد سفرهم كان الساعه 10 في الليل..بس لازم يطلعون من العين بعد صلاة المغرب على طول...وعبدالله واعدنها انه بيمر عليها بعد صلاة العصر عشان يسلم عليها...
خليفه من الصبح يمر على ربعه ويسلم عليهم واحد واحد ونفس الشي عبدالله.. بس يوم وصل السلام عند سيف..تاخروا وياه اكثر..عبدالله يوصيه على كل شي بما انه خلاص نسيبهم...وخليفه...سيف ربيعه وايد وطبيعي انه يطول بالسلام..ولو انه قلبه يحترق بسببه من هالخيانه الغير مقصووده والغير متوقعه بعد...!!.ويوم وصل الوقت الظهر.كل حد راح بيته يتغدى ويا اهله.. بعد الغدا طلع خليفه صوب بيت عمه عشان يسلم عليهم .. وتيمعوا كلهم في الميلس يسولفون وياه لين اذان العصر.. وكان الشايب راقد فترة الظهر عشان جي ترياه خليفه لين مانش وسلم عليه عقب دخل البيت عشان يسلم على حرمه عمه واخته ميره ونورة.......وطبعا حصه بعد....لانه لين الحين ماباركلها عالخطبه...
دخل عبدالله ويا خليفه البيت عشان يخبرهم ايون يسلمون عليه...وخلاه في الصالة يالس مع امه واخته...وركب هو ساير صوب خواته...عبدالله كانت نيته يسلم عليهم احين لانه بيروح ويا خليفه بيتهم وبيسلم عليهم وبيقعد مع عنود ساعه ونص ومن هناك على طول بيطلعون مع حمدان صوب دبي... عشان جي ركب وسلم على خواته اللي كل وحده ماسكه عمرها عن تصيح وكلهن يوصن وهو بعد يوصي وياهن...وعقب قالهن ينزلن عشان خليفه يبا يسلم عليهن.... ونزل عبدالله وتابعتنه نوره..حصه كانت لابسه بجامه نوم وقالت انها بتغير ثيابها وبتنزل... عبدالله دخل على امه اللي كانت تصيح وسلم عليها وعلى حرمه اخوه ميره..وخليفه سلم ولو بشكل رسمي على نوره ووصاها على اخته عنود...
المهم خلصت السلامات وحصه بعدها مانزلت....وخليفه قلبه يدق بالقووو...اذا كان يقدر يخدع الكل برده فعله تجاه خطبه حصه....لازم يخدعها هي بعد...بس يوم تاخرت شافها فرصه...عبدالله كان طلع صوب بيت اخوه ناصر عشان يسلم على حرمه اخووه بعد اللي ماطلعت من بيتها ويحب العيال... وخليفه تم اروحه..صد صوب نوره وقالها.
خليفه: تاخر الوقت... وحصه مانزلت..انا بلحق عبدالله وانتي سلمي عليها وباركيلها عالخطبه...وو....
وقاطعته حصه وهي تنزل من الدري تبتسم..
حصه: افااااااااااا ياخليفه...بتسافر بدون ماتسلم عليه..؟؟؟
انتفض قلب خليفه بقوووو..... ياترا يتخيل والا صدق زاد جمالها من بعد خطبتها..؟؟؟؟... تظاهر خليفه بالابتسام...ومسك نفسه واعصابه...دقايق لاغير...دقايق بس تحمل ياخليفه وعقب بتطلع نهائيا من حياتها...
خليفه: افا عليج.. من الصبح اتريا انا بس انتي تاخرتي...
حصه: السموحه منك..بدلت ثيابي وصليت العصر....هااااه...اممممره مروح..؟؟
خليفه: ان شاء الله.... ومبرووك ياحصه عالخطبه.... اختيارج ممتاز...سيف ريال ماينعاب...
حصه: الله يبارك فيك...وهذي دعوتك انته يوم عطيتك الدفتر اللي وقعت عليه عنود على وثيقه الزواج يوم الملجه...وقلت لي عقباااالج...امره ماواحيت الا وانخطبت...
بان الحزن على بسمه خليفه غصبن عنه.....ياللـــــــــه....صدق انج ماوحيتي.....ماكنت ادري ان هالدعوى بترتد بشكل عكسي عليه....وان البنت صدق بييها نصيبها لكن طلعت مب انا هذا النصيب....
خليفه: شفتي عاد كيف... اخاف اقول حق نوره احين عقبالج وتنخطب بعد يومين..
نورة: لالااااااااااا دخيلك لاتقووولها....ماريد اعرس احين...
ظحكت حصه عليها وخليفه ابتسم..
خليفه: خلاص عيل مب قايل...المهم شي في خواطركم عليه..؟؟؟ بروح تاخر الوقت...
حصه: سلاااامتك..وتروح وترد بالسلامه ان شاء الله...وشد حيلك وتخرج بمعدل ممتاااز...
خليفه: لا توصين حريص..... المهم سامحووونا...وانتن ديرن بالكن على عماركن....وانتي حصه اذا عرستي ونحن متغربين مبروووك من احين..
حصه: اطمن...مابعرس قبل عرس عبدالله.....
سكت خليفه وماقال شي....يعني بنجبر احظر العرس..؟؟؟؟ الله يعيني يارب....
خليفه: على خير ان شاء الله... فمان الله..
نوره+ حصه: الله وياك يارب..
وروح خليفه عنهن وطلع ويا عبدالله اللي شال الشنط واغراضه وحطهن في سيارة خليفه...وروحوا صوب بيت محمد الكتبي...
في بيت بو سلطان كان خليفه يالس ويا اخوانه وامه وابوه...اماعنود فخلووها مع عبدالله في الميلس الصغير... وهذي بروحها مب رايمه اطالع في ويه عبدالله عن تنبق بالصياح...مع ان عبدالله حاول وياها انها تندمج وياه بالسوالف وتنسى شوي سالفه السفر بس ماااااااااااافيه امل...البنت خلاص مب متحمله سالفه السفر هذي...بعد ماتعودت على ريلها بشكل كبيير وماتقدر تفارقه... كان الوقت يمر وعبدالله بعده ماشبع من عنود ومب قادر يهديها...مايقدر يخليها على هالحال ويسافر....كان يالس عدالها وهي حاطه ويهها بين كفوفها وتصيح بصمت.... مد ايده وحطها حوالي كتووفها وضمها بشكل خفيف لصدره.... اسندت عنود راسها على صدر عبدالله ودموعها اربع اربع.... وشهقاتها تقطع القلب....
عبدالله: بس ياعمري لا تصيحين....هي كلها سنه على بعضها.. وبتمر مثل البرق...
عنود:................................
عبدالله: عنوود... لا تخليني اسافر وانا زعلان....
عنود: .................................
عبدالله قال في خاطره ماينفع وياها العتاب هذي...لازم اظحكها... مسكها وبعدها عنه بحيث يقدر يشوف ويهها...
عبدالله: بسم الله طالع الويه.... والله بصورج بتيلفوني عشان اظحك عليج في امريكا...
ومسك تيلفونه ويسوي عمره بيصورها..دزت عنود ايده وهي منقهره...متفيج هذا بعد... انا اصيح عشانه وهو يظحك عليه...
عنود: خسك الله يالسبال....قم ماريد اشوفك...روح ساااااااااافر...
وتمت تظربه بشكل خفيف على اي مكان وصلت له وهو يظحك عليها... وفعلا لقط لها صوره وهي معصبه وخزنها...
عبدالله: فديييتج والله... انزين صوريني انتي بعد... ماعندج صوره لي..والا ماتبين...
يوم ماعطته ويه ..مسك تيلفونها..
عبدالله: خلاص انا بصور عمري...ادري انج بتندمين لانج ماصورتيني...
مسك تيلفونها وصور عمره.. وكانت الصوره شكلها غلط وتنقع من الظحك...يوم راواها الصوره تمت تظحك عليه...
عنود: ههههههه...مالت على هالويه...والله انك متفيج...
عبدالله: تحبيني والا لا..؟؟؟
عنود: مابقــــــــــوووول...!!!
عبدالله: بسافر بعد شوي...ومابتقوليلي اذا تحبيني او لا..؟؟
عنود: كيفك سافر...مب قايله شي...
طالع عبدالله ساعته وفعلا حصل ان الوقت مر وماتم شي..خلاص لازم يروحون احينه لانه بعد شوي بياذن المغرب...
عبدالله: خلاص عيل انا بقوووم...ماشي وقت...
وردت عنود تصيح...
عبدالله: شي في خاطرج؟؟
عنود: .........لااا.........
نش عبدالله وهو يدري انها معصبه وماتعني اللي تقوله..يعرف انها بتلحقه بعد شوي تسلم عليه مثل ماهو مفترض...!!! ...
عبدالله: خلاص عيل فمان الله...
ومشى شويه ويوم وصل عند الباب..
عنود: عبــــدالـــــلــــــــــه...!!!
وقف عبدلله واول ما التفت صوبها الا بقنبله اطيح بين يديه هزت توازنه .....تمسكت فيه عنود ولوت عليه بقوو وهي تصيح وتصيح... وهو ماقدر يسوي شي غير انه يلوي عليها هو بعد... انا اروحي متعذب من هالفراق ..تزيدين عليه بعد..؟؟!!!...
عبدالله: عنووود... لا تصيحيني وياج...فظيييحه اقعد اصيح...!!..
عنود: جذي تخليني ياحمااار..؟؟؟ سنه كامله تفارقني..؟؟ اهون عليك.؟؟
عبدالله: ياعمري والله ماتهونين...بس لازم اكمل دراستي..وانا مب اني بقطعج موليه ..بتصلبج يوميا وواعدنج بهالشي ليش ماتصدقيني...؟؟؟
عنود: غيــــر يوم تكون هني في البلاد عبووود....
عبدالله: بتمر الايام بدون ماتحسين....وانتي بتنشغلين بتجهيزات العرس وغيره... ادعيلي عنوود اني اتوفق بدراستي ...
ابتعدت عنه عنود... بس كانت بعدها ماسكه يديه...او هو اللي متمسك فيها..!!!...والله ماتعرف...
عنود: الله يوفقك يارب وترد لي سالم....
عبدالله: مب عايبنج عبدالله,...؟؟ تبيني اغيره هناك سالم وارد..؟؟
ظحكت عنود ..
عنود: لا تنكت يالخسف.... مب وقته احين تنكت...
ظحك عبدالله بعد...بس خلاص احين يسمع الاذان وماشي وقت لازم يروح..
عبدالله: مضطر اروح غناتي...ديري بالج على نفسج عدل ماوصيج....تامريني بشي..؟؟
عنود: دير بالك على نفسك انته بعد....ومابا غير سلامتك وانك ماتنساني...تروح وترد بالسلامه يارب...
عبدالله: انسى حرمتي..؟؟ افا عليج....
تقرب منها وباسها على الجبين....
عبدالله: انتي تمشين في دمي مب بس حرمتي....عنود لااطلعين وياي..خلج هني لين ماروح....اذا شفتج مره ثانيه ماظني اتحمل ...
هزت عنود راسها وهي تغالب دمووعها كانها تقولها "انزين".....
عبدالله: فمان الله حبيبتي...
طلع عنها قبل حتى مايسمع ردها.. وسلم على الباقي من بيت عمه وسار يصلي المغرب وبعدها رد وركب مع خليفه وحمدان وتوكلوا صوب دبي...
في الدرب كانوا يسولفون شوي...ويسكتون اكثر.. وكل حد في خاطره اشياء يفكر فيها... بس يوم وصلوا دبي.. وكانت توها الساعه 8 ونص..احتشر عبدالله وهو يتذكر عليا وقوم خاله ماسلم عليهم...واصر عليهم انهم يسيرون الشارجه اول ويسلمون بعدين يردون دبي صوب المطار...خليفه وحمدان احتراما لمشاعر عبدالله ماقالوا شي...اهله لازم بيسلم عليهم دامه قريب...وقعد عبدالله يدلي حمدان الدرب...وهذا يحفظ كل تفصيل وكل شارع....شو علييه...بيسير بيت الطويله الحلوه.... وبيشوف وين عايشه..ياسلااااااااام...
اول ماوصلوا ..قالوا لعبدالله انهم مابينزلون وبيتريونه في السياره بس هو اصر عليهم انهم يدشون الميلس... وكان بها..نزلوا كلهم ودقوا الباب.. فتحت لهم البشكاره ويوم سالها عبدالله وين سعيد..؟؟... قالت له انه داخل البيت وبتزقره...المهم دخلوا الميلس وعبدالله يعتبر نفسه من اهل البيت...بعد شوي ياهم سعيد وهو يرحب بهم ويسلم عليهم...قاله عبدالله انهم بيسافرون بعد شوي ومستعيلين ويبا يسلم على الاهل...وعليا.. دخل سعيد البيت مره ثانيه وزقر له عليا وياب هلال وياه ...فيصل وابوه ماكانوا موجودين في البيت..وهالشي ظايق عبدالله لانه كان خاطره يسلم عليهم بعد... تعلقت عليا باخوها تلوي عليه وتوصيه على عمره وسلمت على خليفه بعد.. وبعد ماخلصوا السلامات عرض عليهم سعيد انه يسير وياهم المطار ..وعبدالله رحب بهالفكره... سعيد قال انه بيلحقهم بسيارته بس حمدان قال لا..وانه مستعد يوصل سعيد مره ثانيه للبيت...عرض هالفكره عمدا لانه لين الحين ماشاف البنت..ويمكن يوم يرجع تسمح له الفرصه انه يشوفها...
على هالحال طلعوا من البيت بعد ماسلم عبدالله على الكل فبيت خاله..ووصى اللي شافهم يسلمون على اللي ماشافهم...وروحوا صوب المطار...خلصوا الاجراءات وركبوا الطياره وكل حد شايل هم كانه وزنه يبل...غصبن عنهم..بلادهم وفيها حبايبهم مايبون يفارقونهم...لكن غصبن عليهم...
في الطياره ..وقبل مااطير..تلاحق عبدالله عمره ومسك تيلفونه...وطرش مسج لعنوووده...
< انا احين في الطياره وبعد شوي بغلق تيلفوني...حبيت اقولج اني احبج ...واقولج بعد بسج من الصياح..>
كانت عنود فعلا تصيح في غرفتها...وزعلانه العشا وماتباه...ويوم سمعت المسج فكرت انها اطنش..بس يوم شافتها من عند عبدالله ماتت من وناستها..
< انا بعد احبك والله...وتوصل بالسلامه يارب...اول ماتوصل بليز بلغني..بتريا رد منك>
< فديتج...بخبرج اكيد اول مااوصل...بغلق تيلفوني احين...فمان الله عنودي>
واغلق تيلفونه وهو على الاقل مطمن شوي ..
وطارت الطياره شاله خليفه وعبدالله فيها... سايرين صوب بلاد النحس....امريكا...
حمدان وسعيد كانوا في الطريج صوب بيت سعيد...وهم يسولفون عادي كانهم ربع من سنين.... ويوم وصل حمدان البيت...حلف عليه سعيد انه يدخل ويتعشا... حاول حمدان انه يتمنع ويرفض لكن ماقدر لسعيد حيله...واول مادخل البيت طاحت عينه على فاطمه اللي كانت يالسه في الحوش بلا شيله ولامه شعرها اي كلام ورا راسها وتقرا مجله... احمر ويه سعيد من الظيجه... وفطوم اول ماشافت سعيد ووياه كندوره بيظا غير معرووفه الملامح نشت بسرعه وشردت داخل البيت بلمح البصر... حمدان فز قلبه.... وتراه وقح عشان جي مانزل عينه اول ماشافها.... هو اصلا ماصدق يشوفها..بس يوم حس ان سعيد بيلتفت صوبه نزل راسه وسوا عمره يلعب بتيلفونه من الصبح عشان يحسسه انه ماشاف اخته وبالتالي يريحه شوي من هالاحراج... وهذا اللي صار... دخله سعيد الميلس وسار صوب البيت...
سعيد: فطوووووووووووووووم...!!..فطووووووم ويهد...
ومحد غيرها كان يالس في الصاله وهي متوتره...وتعرف انها بتحصل هزبه...
فطوم: هااا انا هني...
دخل عليها الصالة...وحط ايديه على خاصرته...
سعيد: مسودة الويه...عنبووو ذاك الطول لج..انتي من متى تيلسين في الحوش بلا شيله هاااااااااا..؟؟؟
فطوم: كل يوم ايلس في الحوش ...وانا اصلا مالبس شيله فبيتنا....وانته اللي من متى ادخل علينا رياييل بدون ماتخبرنا اول..؟؟؟؟
سعيد: عنبوو هاللسان لج ...لسانج اطول عنج...قومي ذلفي المطبخ حطيلنا عشا انا والريال...
فطوم: تعشينا حبيبي....خلص العشا...
سعيد: فطوم بصفعج...تصرفي ..سوي اي شي خفايف اي شي... المهم عشااا.... الريال وراه درب للعين ماريد أ أخره وايد...
فطوم: من هل العين بعد..؟؟؟؟ منو من اهل العين..؟؟
سعيد: اووووففف...حمدان ولد عم عبدالله....ارتحتي؟ خلصتي تحقيقج؟؟ ممكن تذلفين المطبخ وتسوين عشا عالسريع اذا ماعندج مانع يعني...
خلاها وروح عنها صوب الميلس وهو معصب....فطوم انعفس ويهها..... اهلا اهلا....!!.... احين انا...انهزب...واتشرشح...واسير نص الليل المطابخ واسوي عشا....عشان هالخسف حمدان..؟؟؟؟
كان خاطرها ماتقوم....بس حكم القوي عالظعيف...نشت وسوت اللي قدرت تسويه وجهزت العصير ..وشلت صينية العشا وحطتها جدام باب الميلس... دقت الباب دقتين وشردت مره ثانيه للبيت... بطل سعيد الباب وشاف العشا..شله ورد دخل الميلس تعشا هو وحمدان...وترخص منه حمدان عقب وشكره وايد عالعشا ...وخذ رقمه بعد....وعقب توكل للعين..وهو مستانس....صح هي ثانيه وحده بس اللي شافها فيها...بس المهم شافها....واليايات اكثر ان شاء الله...
الجزء التاسع عشر
يوم الخميس من نفس اسبوع سفر عبدالله وخليفه.. كانوا هل سيف الشامسي معزومين عالعشا فبيت حمد الكتبي.....وحصه من العصر مرتبشه...اطبخ وتعدل..ونورة تساعدها.... ويوم اذن المغرب بس فظت لعمرها وهي كلها توتر... اليوم اول مره بتشوف عمتها واهلها اليداد..لانها يوم شافتهم اول مره ماهتمت ولا عرفتهم.... وكانت تسحي شعرها اللي ماحصل يتشربك الا اليوم يوم اقتحمت نورة عليها الحجره..
نورة: حصيييييييييييص..شو تسوين يالبقره..تعالي..
ويتها طيراااان وسحبتها من ايدها للدريشه وحصه مب عارفه شو السالفه... درايش البيت كانت عاكسه.. في النهار اللي داخل يشوف اللي برا...واللي برا مايشوف اللي داخل...لكن من تغيب الشمس...ينعكس الوضع.. ويوم وقفن جدام الدريشه ماجابلن غير عمارهن... عصبت حصه وابتعدت عن الدريشه..
حصه: خبله انتي تبينهم يشوفونا..؟؟؟
فتحت نورة الدريشه شوي...
نورة: قسم بالله بيفوووتج ترا... ريلج برااا يسلم على اخواني... تعالي بسرعه ...بسرعه....افااااااااااا دخلواا ..فاتج...
حصه: لاحقين على شوفة هالريل.....
وردت تسحي شعرها.. ونوره كانت بعدها عن الدريشه...وردت تصرخ مره ثانيه ...
نورة: حصووووووووووه والله تييين...رد طلع....هيي اثره زاقر امه.... تعالي بسرعه بسرعه...
غصبن عنها حصه حست بريولها تسير صوب نورة....وفتحت نوره الدريشه اكثر عشان حصه تقدر تشوف وياها... في اللحظه اللي عطا سيف امه ظرف... خذته الام وردت تدخل البيت ..اما سيف فتم واقف مكانه...
نورة: طالعي...احلى على الطبيعه تبين الصدق..وياسلام متكشخ.... ملامحه وايد هادية..
حصه: هب عيون عليج فصفصتي الريال..... وبعدين قصري حسج بيسمعج................ هذا شو موقفنه..؟؟؟ شو يسوي..؟؟؟
نورة: شو عرفني..شكله سرحاااان....والا حد يرمسه من عند باب بيتنا....
والي مايعرفنه ان سيف واقف لانه سمع صوت الدريشه وهي تنفتح... ووقف مكانه عشان يتاكد....وسمع حسووس تتهامس... وما استغرب....اكيد هاي حصه واقفه في وحده من الدرايش اطالعني..وهالحركه معروووفه.... في هاللحظه فاجاهن ورفع عينه لمصدر الصوت.... وبغا يموت من الظحك يوم شافهن يسكرن الستارة بسرعه ويندسن... طبعا ماعرف اي وحده منهن هي حصه... اكيد الثانيه اختها لانهم خبروه ان عندها اخت اصغر عنها بسنه.....هز راسه سيف وهو يظحك ...زين اني مطرشلها صوره عشان تشبع من الشوف.... حليلها.... تحرك ودخل الميلس وين باقي الشباب...
حصه حاطه ايدها على صدرها وويهها كله ملامح رعب فظيع...ونورة كاتمه الظحكه...
حصه: هزرج شافنا...؟؟؟
نورة: لالالا...لا ماشافنا...عنبو هب عيون عليه...
حصه: جـــــب لا تحسدينه.....والله انه شافنا....وسمعنا بعد..والا مابيوقف جي.... حسبي الله على بليسج يانوروه احين شو بيفكر فيني...؟؟؟؟...بطيح من عينه بيقول هاي تبصبص عالرياييل...!!!
نورة: هههههههههه الا ياحظه ريلج الموقر يوم نحن اهتمينا وبغينا نشوف شكله..... بالعكس بيستانس...
حصه: قومي...قومي ظهري عني مالت عليج.... خليني اتجهز...
نورة: ان شاء الله يالعروووس...
خلصت حصه كشختها الهادية ونزلت تحت وقلبها يدق مثل الطبل....سلمت على عمتها وحرمه سالم..ويلست عدال عمتها ... لان هذي زقرتها تباها عدالها...وسولفت وياها وخذت علوومها.... وحصه حبت العمه هذي...ودعت ربها انه مايكون دهان سير بس قبل العرس..وبعد العرس اطفربها... بس الصراحه مبين عليها طيوووبه وحنوونه...
سيف من جهة ثانيه كان صحيح يالس بين الشباب ويسولف ويظحك..بس عقله ماكان وياه...كان داخل البيت...ياترا شو رايها فيني...؟؟ شو اللي خلاها توافق عليه..؟؟... كل اللي اتمناه ان يكون هالاهتمام متبادل بينا....
المسا كانت حصه يالسه في حجرتها تحاول تفجج هالشعر اللي مارامت تفججه المغرب ولمته اي كلام عشان ماتتاخر...دخلت عليها امها ويلست عندها عالشبريه..
ام خالد: هاا بنتي.... شو تسوين..؟؟
حصه: اووفف..امايه مارمت افجج هالشعر..اندووج سحيه جان ترومين...
عطت امها المشط ويلست تحت عالارض بس على الركب ..لانه اصلا شعر حصه لين الركب...
ام خالد: ماشاء الله تبارك الله... طول عن اخر مره شفته...
حصه: حلوو للشوووف بس يلعوز راعيه...جان ماقصه امايه...
ام خالد: بزوااالج بنت حمد تسمعيني.... ولا تقربين المقص صوبه مووووليه...!!
سكتت حصه وتذكرت غصبن عنها رمسة خليفه يوم يقولها لا تفجين شعرج...وعورها قلبها غصبن عنها وتمنت انه بخير في الغربه ...
ام خالد: شو شفتيها عمتج..؟؟؟
حصه: طيبه وايد والله....
ام خالد: كلهم ناس طيبين وبتستانسين وياهم باذن الله...
حصه: الله يسمع منج..
ام خالد: سيف مطرشلج صورته...
حصه: هههههههه زين افتكر...
طلعت ام خالد الظرف وحطته على الطاوله اللي عدال الشبرية...وردت تكمل سحاااي...
ام خالد: يقول ابوج الرياييل يتخبروونا متى نبا العرس...
حصه: بعد عرس عبدالله...
ام خالد: خييييييييييبه بعد سنه..؟؟؟؟
حصه: امايه مالي خص...انتوا قايلين بتخلوني اتعود عالفكره..وبعدين انا ابا عبدالله يكون موجود في عرسي...وخليفه ولد عمي بعد...
ام خالد: يابنتي الريال مابيروم يصبر هالكثر...
حصه: عيل يكنسل....كيفه....
ام خالد: واذا طلب انه يملج..؟؟؟
حصه: هو طلب؟؟؟
ام خالد: لا بس اقول...اذا طلب..؟؟
حصه: يوم بيطلب خبروني وبفكر بالموضوع...
ام خالد: يصير خير.... هذوووه شعرج فججناه..يالله عقصيه ورقدي...
حصه: مشكووره امايه.. تصبحين على خير...
ام خالد: وانتي من اهل الخير...
طلعت ام خالد عن بنتها وتمت حصه تعقص شعرها.. وعينهاعلى الظرف... وتفكر بالموقف اللي صار قبل ماتنزل...آآآآآآآخ يالفشله...مدت ايدها صوب الظرف وطلعت صوره..فيها صورتين مدموجات...وحده متسفر..والثانيه بغتره وعقال...ظحكت عليه حصه في خاطرها...متفيج هالسيف...يراويني شكله بكل الحالات...خلني اروح اظحك نوره عليه...
شلت الظرف وطلعت ودخلت حجرة نوره بدون ماادق...نوره اتفاجئت بهالاقتحام ...لاحظت حصه ان نوره لاويه على شي..
نورة: بسم الله جي يدخلون الناس عالعرب...؟؟؟.. طيحتي قلبي...
يت حصه ويلست عدالها عالشبرية....تبا تميز الشي اللي لاويه عليه نورة مب عارفه...حاظنتنه بقووو وماينشاف..
حصه: شو في يديج..؟؟!!
نورة: ماشي...
مدت حصه ايدها وسحبت ايد اختها...ويوم طلعت الصدفه اخيرا....قالت
حصه: شو ياج لاويه عليها...؟؟ متى شريتيها هذي ماحيدها عندج...
نورة: هذي طبيعية محصلينها في البحر...
حصه: حللللفي...والله حللوه...متى سرتي البحر...؟؟؟
نورة في خاطرها تتافف...السالفه كلها كانت سررر ومافيها تخبر حد احين...
نورة: فطوم عطتني اياها... انا ماسرت مكان...
حصه اطالعت اختها بنص عين...
حصه: ولاويه عليها لانج متولهه عالشارجه هاااااااااااا..؟؟؟
ظحكت نوره....فسرت على كيفها الاخت...يالله بجاريها انا شو خسرانه...
نورة: هي متولهه عالشارجه...المهم شو عندج...
مدت حصه ايدها بالظرف...وخذته نوره وطلعت اللي فيه وظحكت...
نورة: ههههههههههه ياحليييييييييله نسيبنا..... مطرشلج صوووره..
حصه: شو رايج فيه,.,...؟
نورة: مثل ماقلت لج قبل...ملامحه هادية واحس انه حلوو يوم يظحك... احلى مافيه حواجبه...
حصه: امي تقول الرياييل يتخبرون عن موعد العرس متى نباه...؟؟
نورة: ومتى قالولهم..؟؟؟
حصه: مابعرس انا قبل عرس عبدالله خبرتج... بس امي قالت دام السالفه جي يمكن انه يطلب يملج...
نورة: وبتوافقين انتي عالملجه..؟؟
حصه: مصييري بوافق بس ماريد الحين...يعني بعد فتره شهر شهرين يقولي ابا املج مب مشكله..على الاقل اكون تعودت عالفكره...
ردت نورة الصورة في الظرف وعطتها اياه..
نورة: الله يوفقج ان شاء الله..
نشت نورة وشغلت كمبيوترها...
حصه: شو تسوين..؟؟؟ متفيجه هذا بدال ماترقدين..؟؟
نورة: ابا اطلع جدول الصيفي من النت... حظج ياحصوووه خلصتي.... بس انا برد ادرس ورا باجر... بموت من القهر...
حصه: تحملي مثل ماتحملنا....
نورة: دام الدراسه بتبعد عني العرس اسميني الا بدرس وبدرس وباخذ الماجستير والدكتوراه بعد...
حصه: يالله هذا كله عشان تبعدين الخطاطيب,.؟؟
نورة: هي والله...
قعدت حصه تفكر...نورة تغيرت الفتره الاخيره....
حصه: حتى لو ياج سعيد بترفضينه,,....؟؟؟
فز قلب نورة... حتى انه يديها ثقلت ولا قدرت تكتب اي باسوورد عالكمبيوتر...وتمت ساكته ولا ردت..
حصه: ليش ساكته,,,!!!
نورة: سعيد مابيي عشان ارفضه...
استغربت حصه...مب هذي هي الفكره اللي كانت ماخذتنها عن علاقة نورة بسعيد.. هي صح ماتعرف بالضبط شو بينهم..بس اللي تعرفه ان بينهم شي كبير...وكبير وايد...لدرجه انهم مب قادرين يخبووونه...
حصه: شو دراج..؟؟
نورة: وانتي شو دراج انه بيي ..؟؟؟
حصه: يعني...احس انه يباج من الخاطر...
نورة: حتى انا كنت احس جي..... بس بنت خالته خوله ظامنه اكثر عني وعنج بان سعيد بيخطبها هي وتتريا الموضوع يستوي رسمي بينهم...
انصدمت حصه من هالخبر.....
حصه: شو قصدج يعني..؟؟؟ خطبهاااا,,.؟؟؟
نورة: ماعرف...لا لين الحين ماخطبها... بس قالت لي اترياهم يعزمووون والا هي اصلا واثقه....يعني مكلمينها في السالفه..على عكسي انا طبعا...
كانت نورة تتكلم ببروود بس حركاتها وهي تكتب وتحرك الماوس تبين ان دمها فاير فعرووقها... احتارت حصه بشو اجاوب اختها...بس حتى هي نفسها حصه شافت نظرة سعيد لنورة....مستحييييل اي شخص يبا يلعب يطلع هالنظره هاي....السالفه فيها ان....
حصه: هممممممم ماعرف شو اقولج بس اناحاسه انج فهمتي السالفه غلط... تاكدي ولا تظلمين الريال...
سكتت نورة ولا قالت شي.... وتقول في خاطرها انا ماظلمت حد...هو اللي ظلمني وظلم حبي له كل هالسنين.... حصه حست ان اختها اظايقت وماتبا ترمس...فقعدت تسولف وياها عن اي شي خطر فبالها... ويوم تاخر الوقت طلعت عنها عشان تسير ترقد...
مرت الايام بسرعه..نورة بدت دراستها الصيفي.... وكانت دايما تحس بمرض ...طفراااانه وماتبا تدرس بروحها في الجامعه...صح ربعها وياها...بس يوم تطلع من البيت وتخلي حصه راقده متهنية تموت قهر... لانها هي بروحها اللي تعاني...حتى العيااال رقوووود ماجزين من الدراسه شو عليهم....الكل يصبح راقد ماعدا نورة واخوانها...خالد وناصر...حتى الشايب قام يرقد وايد بسبب الحررر ....بس في خاطرها نورة كانت تقول على الاقل شي يشغلني عن التفكيير بسعووود..... فكرت وايد بكلام اختها حصه.... معقوووله اكون ظلمته.؟؟؟.. معقوووله يعني اكون فهمت السالفه غلط,..؟؟؟ مستحيل...شو مصلحتها خوله تجذب عليه وهي ماتعرف شي عن اللي بيني وبين سعيد....واصلا هي يابت السالفه بشكل عفوي...ماكانت متقصده تطريه هو بالذاات... لكن عشان تبري ذمتها قررت انها تفتح هالسالفه وتتاكد... باي طريقه كانت المهم تتاكد..حتى لو اضطرت تسال سعيد نفسه...واللي يصير يصير...
حصه.. شوي شوي بدت تتاقلم مع موضوع الخطبه.... كانت الزيارات بين ام سيف وامها شغاااله.. بس بعدها كانت مصرره انها ماتملج احين... تو الناس....المهم انه خطب وظمن وهذا اللي يباه.... خله يتريا شوي...
سعيد... كان يخطط لكل شي ... ويعرف انه بيشوف نورة قريب ان شاء الله.... لانه بعد اسبوع ملجه اخته شيخه.... وبعد فتره بعد بتطلع نتيجه فطوم للثانوية العامه ..وهذي الخبله حالفه انها تسوي عزيمه ..بالتالي اكيد نوره بتي...وعنده فرصتين عشان يحل الموضوع وعلى السريع.... طفر من هالخلاف...ويبا يخلص منه عشان يتفرغ للتخطيط ...عن خطبته لنووره وكيف بتكوون... لازم يسالها متى تباه يخطبها..؟؟ لانه من طرفه هو خلاص مستعد دام حصه انخطبت...ويتريا الرد منها هي...بس طبعا لازم يحل هالخلاف التافه اول....
حمداان بعد ماجز...وكان عايش حياته ويتمتع بكل لحظه...واغلب الوقت كان يروح لربعه.. ويطلع وياهم طلعات وكشتات...بس كان يدري ان بنات عمه رووحهن واكيد ظايجات..فكان يمر عليهن احيانا ويسولف عليهن واييبلهن افلام ويطالع وياهن... حتى انه مره وداهن هن وعنود وياهن يبل حفيت وعشاهن..بس بعد اقناااع مستمييييت للشايب.... بس يوم كان يروح اي مركز ويحاول يغلس على اي بنت..كان يتذكر فاطمه... ويظحك... وهو في خاطره مايبا يتعلق فيها....يدري وصولها صعب.... وهو بعده صغير عالعرس اساسا... فخله يعيش حياته احسن له..
عنود كانت دايما تيلفونات مع حصه او احيانا تروحلها البيت بما ان عبدالله محد... وكان واقع انهن ثنتيناهن يتجهزن للعرس قرب بينهم اكثر...وتغيرت سوالفهن واستوت كلها عن تجهيزات العرس وغيره ..حتى ان نوره قامت ماتحس بالراحه وياهن... لانه سوالفهن تغيرت...وهذي حال كل عرووس تجهز لعرسها...
خلونا نروح لامريكا...عبدالله كان باذل جهده بآخر سنه له في الدراسه...وهي اصعب سنه وهذا شي معرووف... هانت...يتخرج من هني ويستوي دكتور ويعرس ... لازم يصبر... وكانت على اتصال دايم باهله... خصوصا عنوود بسبب وعده لها... يتصل بها يوميا يكلمها دقيقتين ويسكر.... وصدق خسرته من الخاطر بسبب الاتصالات اليوميه هاي.... بس ماعليه كل شي يهون علشان تكون عنوووده مرتاحه... وماتحس بالنقص... تعلقه بها زاد من سافر...وكان يعد الايام عشان يرجع ...
خليفه... رغم ان الايام اطوف عليه متشابهه.... والمفروض انه يتعود على سالفه خطبه حصه..لكن مب قادر... لين الحين يتالم وبشكل اكبر في غربته..كان يتصور ان الموضوع بيسهل عليه بسبب ابتعاده عنهم... لكن طلعت السالفه اخسسس... كان دايم التفكير باللي تسويه حصه احين... وشو يخبرونها عن سيف,...واذا تلاقوا او لا..وشو يصير بينهم من سوالف...والغيره تاكله.... كان يخاف يسال عبدالله اي شي عشان مايبين انه بعده متاثر بهالسالفه....ومن جهة ثانية عبدالله مايخبره اي شي عشان مايزيد عليه..لانه يباه ينسى... وبالتالي خليفه بعد كان يركز على دراسته اشد التركييز...اخر سنه ولازم يتخرج بمعدل زين...
كان يالس في الكافتيريا مع عبدالله وعلي وواحد ثاني من ربعهم بعد اسمه عيسى.. كانوا يتغدون ويسولفون...
خليفه: اقول عبوود... انته يايب وياك شريط الدراجات؟؟؟
عبدالله: هي يايبنه..في غرفتي..
خليفه: واحد من النمسا ذبحني.. يبا يشوف برررنا ودراجاتنا وكيف نلعب.. مادري من عند منو سمع انه عندنا فلم جذي..
علي: ههههههههه ابتليت به عيل....عن يسرق الفلم عنك..
خليفه: لا هو ذكي الخايس.... لين احين ماشفت هاكر يروم يغلبه... بس ذكاءه هذا في الكمبيوتر وبس ..واهبل في باقي الاشياء..
عبدالله: على ظمانتك...الفلم في شنطة افلام الكاميرا...بتحصل ثلاث افلام كبار... وكلهن نفس اللزقه عليهن.. دور اي واحد فيهن فلم الدراجات وشله..
خليفه: بسير اييبه له... لاني بتلاقى وياه فالمحاضره بعد شوي..... وانتوو؟؟
عيسى: انا بعد وراي محاظره..
عبدالله: انا وعلي متواعدين نسير المركز... ماعندي قمصان بسير اشتري...
خليفه: تمام عيل اشوفكم عقب...
خذ مفتاح الغرفه من عند عبدالله وراح ...حصل الافلام الثلاثه وماعرف اي واحد فيهن فلم الدراجات... فتح التلفزيون والفيديو وحط اول فلم وطلع فلم الرزفه...طلعه وحط اللي وراه...وطلع فلم الملجه..ظحك وهو يشوف اخته... ماشاف هو هالشريط...اسميك ياعبود مب مخلي شي مب يايبنه..وكان بيطلع الفلم بس وقفت ايده فجاه وهو يشوف حصه يالسه تظحك بعد ماركزوا عليها الكاميرا عدال عنود... ركز عليها النظر وهو يشوف حلاتها وجمالها... حظك ياسيف....والله حظك من السما... اعتصر قلبه وهو يشوف الفلم ومب قادر يوقف ..يدري انه يرتكب اثم وهو يشوفها ويشوف شعرها من دون علمها...لكن مب قادر...قلبه متحكم فيه ..ونادر مايتحكم قلبه فيه....ياربي لين متىهالعذاب يعني...!!!... يوم شاف ساعته حصل ان الوقت يمر وماشي باقي عن محاظرته..سكر الفلم ورده مكانه وشل الفلم الثالث وتاكد انه فلم الدراجات ..شله وياه وسار محاظرته...
الجزء العشرين
بعد يومين ملجه شيخه... وهل الشارجه عزموا بيت حمد كااامل باللي فيه... نورة بتضطر تغيب عن الجامعه عشان هالسيره يوم واحد .. الشباب خالد وناصر ماطاعوا يسيرون.. اون شكلهم رزه...والملجه للحريم..هم وين بيحطونهم ؟؟ ماعندهم مكااااااااان.... وفعلا ان بيت خالهم ماشي مكان وايد..غرفة ضيوف وحده بس.. لكن المصيبه ان ميره وحمده معزوومات بعد..وام خالد قالت فظيحه مايروحن لان هم يوا كلهم في ملجه عبدالله..وعيب يقصرون فيهم... عاد ميره وحمده بعيالهن وين يروحهن وهو اصلا رياييلهن خالد وناصر مابيحظروون ولا بيسيرون...؟؟!!. فكروا فيها شوي وكان الاتفاق كالآتي,,,
ام خالد بيشلهم بو خالد ووياها حصه او نوره وحده منهن..ومعاهم حمده وعيالها..
ميرة عزرت على حمدان هو اللي يشلها هي وعيالها وبيشلون وياهم وحده من البنات..يعني نوره او حصه...
اما وضعهم في بيت هلال بيكون جذي..
نوره كالعاده مع فطوم...وحصه مع شيخه... بو خالد وحرمته بيرقدون في غرفة الضيوف.. وحمده وعيالها بيرقدون في غرفة منى ومنال...ومنى ومنال بيرقدن مع امهن وابوهن في غرفتهم... اما ميرة وحمدان بيردون في نفس الليله للعين.... وماكان فيه حل غير هذا...اذا كانوا يبون يحظرون كلهم...
وهذا اللي صار.. نورة راحت مع قوم حمدان ..لانه طبيعتها تحب سوالف الشباب..وحمدان عن مية واحد ماشاء الله عليه... وبعدين ابوها بطيء في السواقه...وحمدان يطيربهم... صح انها طايحه وياه نقره طول الدرب بس كانت قلوبهم صافيه ومحد يشل عالثاني في خاطره....وفكرت نوره في لحظه خبااااااااال.... بان حمدان لو كان اكبر منها جان ما فوتته....لانه صدق ماشاء الله عليه مايتفوت... واي بنت مهما كانت طبيعتها وشخصيتها بتحبه وبتستانس وياه... بس هي تحبه مثل اخووها.. وجذي بتم الامور...احسن... اصلا ماشي مجال في قلبها... خلاص فوووول... حب سعيد ماخلى مكان لاي شخص ثاني...
كانوا طالعين من العين الضحى..فوصلوا قراب الغدا... يوم الخميس... سعيد استانس يوم شاف حمدان. .عالاقل حد من الشباب يسولف وياه......وكالعاده هو اللي استقبلهم... ولاحظ ان وياهم حريم..اكيد حريم اخوانهم هذيلا..ولاحظ بعد وبقهر واضح ان نورة متغشيه وتمت متغشيه لين ماوصلت داخل البيت..طبعا سعيد مايروم يلحقها... سار هو وحمدان وبو خالد صوب الميلس ويلسوا فيه تغدوا ..وبعد الغدا دخل بو خالد عشان ييطيح شويه لين العصر..اما سعيد فطلع هو وحمدان يتحوطون في الشارجه ودبي لين مايي المغرب .. حمدان اصرر انه مايحظر الملجه وقال انه بيروح السينما وبيشوف له اي فلم وعقب بيرد يشل اخته وبيرد العين... وسعيد مارام له حيله... فخلاه على راحته...
من بداية العصر والعروس وياها راعية الصالون... وحصه ونوره مع فطوم تمكيجن وخلصن بسرعه... حصه كانت لابسه فستانها مال التخرج..لانه محد شافه من قبل...اما نوره فاصرت انها تلبس مغربي.. اما فطوم لبست فستان احمر مع ابيض...مفصلتنه مخصوص لملجه شيخه وعلى السريع.. واول ماخلصن نزلن تحت يعاونن الحريم على التجهيزات...بعد صلاة المغرب وصل حمدان سعيد للبيت وروح هو للسينما اللي ناوي يسيرلها.. نزل سعيد ودخل البيت وشاف الكل مختبص... شاف منال اخته ومسكها وقالها تسويله درب لانه بيطووف.. بس الخبله سارت وماردت.. فتوكل سعيد على الله ودش البيت... كان يسمع اصوات نوره وفطوم وحصه وحريم ثانيات في الصالة .. بس ماشي وقت للرومانسيات احين...لازم يبدل ثيابه بسرعه..ركب فوق ودخل حجرته وهو كل شوي يطالع حد من اليهال يتراكظون يمين ويسار...هذيلا عيال خالد وناصر...المهم انه دخل حجرته وتسبح وتلبس وتكشخ وكله في ظرف عشر دقايق... والحين يا دور النزله..الله يستر..فظيحه اذا صادف وحده من حريم عيال عمته.....وقعد مسكين يمشي ويتحنحن بس محد معبرنه..ولا صادف اي حد..طلع من بيتهم وراح على طول الميلس وين كانوا موجودين ابوه وفيصل وابو خالد وريل خالته وكم واحد من القرايب المقربين عند ابوه...
وتمت الملجه على خير... وكانت بسيطه وحلوه وهادية... وبعد ماراحوا المعازيم اللي تارسين البيت ياهم سعيد لين البيت ورمس امه لانه بيدخل راشد (ريل شيخه) داخل البيت عشان يسلم على حرمته.. فدخلت الام وخبرت كل الموجودات واللي كانن هن بس اهل البيت واهل العين...ومن سمعن الخبر طلعت كل وحده سايره حجرتها تبدل ثيابها وتمسح المكياج..
الساعه 11 ونص اتصلت ميره بحمدان...وقالت له يمر عليها احين عشان يسيروون.وحاولوا وياها انها تبات بس ماطاعت لانها قايله لريلها انها بترد الليله.... وقف حمدان سيارته ونزل ودخل البيت بتردد... فيصل روح يرقد وسعيد في الميلس مع اخو راشد واسمه محمد... استحى حمدان انه يدش الميلس..شكله رززه فتم واقف عند الباب واتصل على ميره عشان تنزل بسرعه ويروحووون...ونزلت ميره هي وعيالها بعد ماسلمت على الحريم وقف حمدان عشان يساعدها ويشل الشنطه الصغيره عنها اللي كانت حاطه فيها ثيابها... وكانوا بيطلعوون لولا ان فاطمه زقرت على ميره فجاه.. وهي لابسه شيله بيظا وبجامه نوم...انصدمت فطوم يوم شافت حمدان... اووففف هذا لازم اشووفه بين فتره وفتره يعني..؟؟؟ تغشت وسارت صوبهم وهي تسوي عمرها رزين...
فاطمه: السلام عليكم...
حمدان : وعليكم السلااااااااااااااااام والرحمه... شحالج الشيخه..؟؟
فطوم منقهره..رد يقولي شيخه مره ثانيه...
فاطمه: بخير الله يسلمك.... ميرة نسيتي شنطه العيال...
ومدت ايدها بالشنطه الصغيره اللي كانت فيها ثياب شما بنتها الصغيره...
ميرة: اوووه ..يزاج الله خير مشكووره ..
فاطمه: العفووو.... سلموا على عنووود..
حمدان: يوصل سلامج ان شاءالله..
ميرة: فمان الله الغاليه وسلمي عليهم كلهم..
فاطمه: يوصل ان شاء الله..توصلوون بالسلامه فمان الله..
حمدان: فمان الله فاطمه....
حمدان يتعمد يغايظها.وعمدا قال اسمها وخلاها مرتبكه... هذا من وين ياب اسمي..؟؟؟؟ محد غيرهن بنات عمووووه مخبراتنه...ماعليه بيبيين منكن دواكن عندي.....طلع حمدان ركب سيارته وركبت ميرة وعيالها وتوكلوا صوب العين... وفطوم ردت تدخل البيت ..
على الساعه 1 في الليل كانن نوره وفاطمه متسدحات في الغرفه ويسووولفن...
فطوم: تلاقيت ويا ولد عمج من شوي...
نورة: منوووو حمدان..؟؟
فطوم: ماغييره..كان ياي يشل ميييره...
نورة: هيي قايله هي انها بترد اليوم...انزين وسلمتي عليه؟
فطوم: هي قلت السلام عليكم ..وهو ترا مايقصر .. ترا ميره كانت ناسيه شنطه وسرت اوديها لها قبل ماتروح..
نورة: اهاااااااااا... وايد حبووووب حمدان ماعليج من غلاسته..يحب يغلس عالبنات...بس هو وايد طيب..
فطوم: هي ..لازم بدافعين عنه ولد عمج... بعدين منو سمح لكن تعطنه اسمي..؟؟؟
نورة: خيييييييييبه كل عاده دق سوالف وياج وزقرج باسمج..؟؟؟
فطوم: لا مادق سوالف لكن قالي فمان الله فاطمه....
نورة: ههههههههههه الريال مهتم..ويوم بغينا نعرف منه السالفه اللي صارت بينكم ماطاع يقول الا يوم قلناله اسمج اول...وبعدين مافيها شي..الا اسم هووو
طنشت فاطمه السالفه وقررت انها ماتظيع وقت اكثر...الفرصه سانحه ولازم ماتفوتها..وبتكلم نوره عن سالفتها مع سعيد...
فطوم: المهم طبي هالموضوع...انا ابا اسالج سؤال محيرني من زمان الصراحه....
نورة: شو هووو..؟؟
فطوم: ليش زعلانه على سعيد..؟؟؟
انصدمت نوره ..ماتوقعت للحظه ان هذا هو سؤال فطووم... بس قررت انها تصارحها وتفتح قلبها يمكن تطلع بنتيجه تريحها...فطوم تعرف سعيد اكثر من اي حد ثاني...
نورة: ليش هو قالج شي..؟؟؟
فطوم: هي قالي انج زعلتي عليه فجاه وقطعتي اي علاقه كانت بينكم...وهو يقول انه ماسوا شي...
نورة: هممممم فطوم..انتي تدرين اني مابزعل زعله جذي بدون سبب....
فطوم: ادري..وانا ابا اعرف شو اللي خلاج اتغيرين عليه 180 درجه...في ظرف ليله بس...لانه قالي انج الليله اللي قبل ماتزعلين كنتي تعاملينه وايد اوكي..
تذكرت نوره ذيج الليله...يوم شل سعيد عنها شنطتها وركب وياها الدري..وكان بيعترف للمره الثانيه انه يحبها وهي منعته مره ثانيه.... وتذكرت وبشكل محرج ان هي بعد لمحت له انها تحبه قبل ماتدخل الغرفه...
نورة: هي..لاني ماكنت ادري باللي كان يسويه من ورااااي...ومادريت غير بالباجر من خوله يوم انتوا كنتوا في السووووق....
فطوم استغربت...شو خص خوله بالسالفه هاي كلها...؟؟؟
فطوم: شو شو شوووو..؟؟؟ خوله..؟؟؟ ليش شو قالت لج؟؟
وخبرتها نوره بالسالفه كلها..... فطوم مسكت راسها... ماتنلام نورة يوم زعلت هالزعله.... ليش خوله تقول جي..؟؟؟ ومنو عطاها الحق اصلا بهالكلام...؟؟؟.... ياربي ياسوء التفاهم الفظيع هذا.... لازم تخبر سعيد بكل شي...بس بعد لازم تشرح لنوره اللي صار بالضبط..
فطوم: ياربي بذبحها خوله هذي يوم بشوفها....سمعي نوره ...السالفه هذي كلها خرطي وتحريييف...وانا بقولج شو صار بالتفصيل... الله يسلمج انا غلطت وسرت ويا خوله مثل ماهي قالت لج..لكن خوله كاشفه وايد يعني القصه برااا والعباة مفتوووحه والعطر من بعد كيلوو ينشم والتيلفون في الايد... ويوم ردينا البيت كان سعيد في سيارته بعده مانزل ونحن ماشفناه... ويوم نزلنا من السياره كانت سياره شباب تابعتنا..او بالاحرى تابعه خوله... سعيد عصب من هالحركه لانها بتيب الفظايح لبيتنا..وهزبني انا وهزب خوله وشرشحها وقالها اذا ماتسترتي لا اطبين بيتنا ولا انتي بنت خالتنا ولا نعرفج.... واصلا سعيد من الاول مايرتاح لها خوله لكن من بعد هالسالفه كرهها صدق... بس اللي ماتعرفينه ان خوله تموووووووووووت في الارض اللي يمشي عليها سعيد..وغرورها عامنها وتخيلت انه يغار عليها ويحبها ويبا ياخذها... ماتشوفينها دوم مطيحه عندنا..؟؟؟... وسالفه انه سار يستسمح منها..هو ماسار لها هي..ساير لخالووه اللي زعلانه وهي ماتعرف شو السالفه وليش انراغت بنتها من بيت خالتها... وخبرها السالفه واستسمح منها غصبن عنه لانه امي غصبته على هالشي... والظاهر ان خوله رضت من بعد هالسالفه بشكل غريب ... وهذي هي كل السالفه...
نورة كانت شوي وبيغمى عليها....اي لعبه اللي طاحت فيها هذي,...؟؟؟..كيف تفكر بسعيد هالتفكير...!!!.... كيف ماقدرت تميز الجذب من الصدق...؟؟؟ كان شعورها ساعتها ماينوصف..
نورة: ياربي....لييييييييييش ماخبرتيني من قبل هاااااااااااااا..؟؟؟؟
فطوم: وانتي خليتي حد يخبرج ويا هالويه.... بس والله يانوره....وانا حلفت احين...انج مابتحصلين حد يمووت فيج ويحبج ويحترمج كثر سعيد...ماتتصورين حالته من بعد هالسالفه..موول تغير مب سعيد الاولاني...كله كئيييب ...ومايتفاهم...
نورة: فديييته والله حتى انا اموووت فيه...
فطوم: لالالا... سمحيلي اييب المسجل واسجل هالمقطع...عشان اسمعه اخووويه وترد له الرووح..
نورة: هههههه ويا هالويه والله انج متفيجه....احين شو اسوي.؟؟؟ ظلمته فطوووم ظلمت سعيد وااايد ..كيف بتصرف...؟؟
فطوم: انا بخبره بالكلام اللي دار بينا...وبقوله انه سوء تفاهم وانحل وانكم بتردون مثل قبل...موافقه..؟
نورة: هي..وقوليله اني آآسفه وايد على صغر عقلي... بس خوله يابت السالفه بشكل مقنع وصدقتها...
فطوم: الله يسامحها... مادري كيف بيتصرف سعيد بخصوص سالفه خوله هذي..جان مايسيرلها لين البيت ويهزبها..
نورة: تصدقين كرهتها...خله يهزبها احسن...
فطوم: هههههههههههه ماعليه المهم عرفنا وين المشكله وحليناها... خلينا نرقد احين تاخر الوقت..ولا تحاتين على سعيد...بيستانس يوم بيدري...
نورة: الله يسمع منج...تصبحين على خير..
لكن سعيد ماستانس...بالعكس فار غيظه بشكل يخوف... وكانت فطوم ناشه الصبح وخبرت سعيد باللي صار امس وياها...
سعيد: شووووووووووووووووو..؟؟؟؟.....
فطوم: هذا اللي صار...هذي خوله يبالها تاديب...
سعيد: انا مب عن خوله الكلبه اتكلم....عن بنت عمتج...نوره تصدق عني هالكلام...؟؟؟؟؟؟ ....نووووره..؟؟؟؟؟؟ انا العب عليها الحين...لهالدرجه انحط تفكيرها فيني...؟؟!!!!...
فطوم: شو تباها تفكر يعني بعد الكلام اللي سمعته من خوله...؟؟؟ ماتنلام الصراحه...
سعيد: الا تنلاااام..ومية مرة بعد تنلااااام....بدال ماتي وتخبرني وتستفسر عن السالفه ..تقطع اي صلة بيني وبينها بهالطريقه,,,....؟؟؟؟.. واذا ماتبا تقولي انزين تقولج انتي.... تتاكد...مب جذي تحكم عليه من رمسة سمعتها.... واصلا حتى لو سمعت المفروض ما تصدق...مب من اليوم وامس هي تعرفني وتعرف اني ابغيها... صارلنا عمـــر..... الحين تيني وتقول انته تلعب عليه كل هالسنين..... شو هالخريط هذا..؟؟؟؟..
سعيد كان فعلا معصب...وفطوم ماتعرف كيف تتصرف.... وتمت ساكته...احين البنت معاها حق...واخوها بعد عنده حق..ماكان المفروض تصدق هالكلام عنه....
سعيد كان وده يكسر شي...يظرب حد... يقطع شعره من الغيظ...اي شي... التفت صوب فطوم اللي كانت كاتمه انفاسها من الخوف...
سعيد: في حجرتج هي...
ومشا بالسريع يبا يطلع من الغرفه... دارت فطوم بينه وبين الباب وحاطه يديها على صدر سعيد عشان مايطلع...
فطوم: وين بتروووووووووح..؟؟؟
سعيد: خوزي عني فطوم....
فطوم: سعيييد دخيلك لا تفظحنا شو بتسوي...؟؟؟
سعيد: بسمعها رايي فيها بصرااااااحه.... خوووزي...
فطوم: ينيييت انته ...؟؟؟... بتدخل عالبنت جذي...شو تباهم يقولون عنا..؟؟
سعيد: خووووووزي عني فطوم لا اييج شي ماشفتيه...ولا تجبريني امد ايدي عليج انتي بعد...
فطوم: مد اييدك عليه انا شوي وبرضى...بس لا تتخبل وتسوي شي تندم عليه...
سعيد: انا احين ندمان اني ظيعت عشر سنين وانا احب وحده تفكر فيني بهالطريقه.....خووووزي
فطوم: انته احين معصب وماتعرف اللي قاعد تقووله....البنت اصلا راااااااااقده....
سعيد: بسيطه ... بنوعيييهاا...
ودز فطوم عنه وفتح الباب وطلع وكان فعلا في طريقه لغرفة فطوم الا فطوم لحقته مره ثانيه ودارت بينه وبين الغرفه...
فطووم : دخيييييييييييييييلك ياسعيييد لا تسوي شي.... وغلاااااااة نورة عندك...
يوم كانت فطوم تتكلم انفتح الباب وطلعت منه نوره وهي لابسه شيلة بيظا وتوها قايمه... انصدمت من المنظر اللي شافته ومن الكلام بعد اللي سمعته.... " سعيد لا تسوي شي ...وغلااة نورة عندك..!!!" .. شافت فطوم في الممر ماسكه ايد سعيد بقوووه...وسعيد اللي كان يتنفس بصعووبه..وومعقد حياته وعيونه مثل النار وهي اطالع نوره فويهها..عرفت ان سعيد عرف بالمووضووع... وانه مب راضي.... ومعصب وايد... بس شو كان يبا يسوي..؟؟ وليش يطالعني جي..؟؟؟ ياويلي انا شو سويت ؟؟ خربت كل اللي بينا....
تموا على هالحال يمكن دقيقه او دقيقتين.... كل حد يطالع في الثاني... وفطوم ظايعه في الطوشه... نوره خايفه موووت ومب قادره تنطق بشي...وسعيد..وده يظربها..يذبحها... ويقولها انه يكرهها... بس ماطلع منه اي حرف... مهما كان اللي صار ... حب عشر سنين مايظيع في ثانيه وحده.... واتم نورة بالنسبه له
.... " شي مقدس" ....
يوم حصلت نوره لسانها...كل اللي قدرت تقوله له ودموعها متجمعه فعيونها تهدد انها تنزل...اللي خلا قلب سعيد يتقطع ... صح معصب بس كله ولا دمووعها...
نورة: سعيـــــد... والله آآآسفه...
ابتسم سعيد بسخريه.... بعد شو اسفه يانوره.....؟؟؟... التفت وطلع من البيت وما رد غير المسا... وكانوا هل العين ردوا بيتهم خلاص... ونورة شايله هم اكثر من اللي كان فيها من قبل....
الجزء الواحد والعشرون
مر الوقت.. وطلعت نتيجة فطوووم..اللي كانت 91.3 % ... البيت كله اشتل عشانها وهي بروحها قعدت تصيح من فرحتها... وماخلت حد مالوت عليه وصاحت... وفي هذاك اليوم ماقدرت تبتعد دقيقتين عن التيلفون بسبب الاتصالات اللي تيها وتباركلها..ومن ظمنهم هل العين... وفطوم غيرت رايها بخصوص العزيمه وقررت تكون اهليّة بس..يعني قوم خالتها وهل العين..لانها عافت الحفلات والربشه اللي ورا بعض هذي...
نورة وحصه محتشرات على امهن اللي خونت فيهن وسارت السوق وخذت لفطوم هدية وهي ( سلسلة ذهب ابيض مع قلب وخاتم).. وقالن انهن يبن يشترهن هداياهن برووحهن...
نورة: مكاان واحد مافي غيره.... العين مووووول...
ام خالد: بن عروه بيوديج العين مول.. انا ماحب المراكز هاي..
حصه: امايه شو نسوي يوم هو فيه كل المحلات الزينه..!!!..
ام خالد: لالا انا مابوديكن...
نورة: انزين انتي لا تودينا..ناصر والا خالد بيودووونا... امايه ماشي وقت يومين وبنروح الشارجه..
ام خالد: يوووووووووه...شاورن ابوووكن...!!
حصه: طالع طالع..!!... يوم ماتروملنا حيله قالت شاورن ابوكن ...امايه شو هالحاله..؟!
نورة: خليها خليها... انا برمس ابوويه...
المسا يوم كانوا كلهم متيمعين... ابو خالد وام خالد وميرة وعيالها وحصه ونوره... اما حمده وعيالها كانت عند اهلها..كلمت نوره ابوها في السالفه...
بو خالد وهو معقد حياته: منو بيوديكن؟؟؟
نورة: خالد والا ناصر...
ميرة: خالد باجر عنده زاااام ...
نورة: انزين ناصر...
ام خالد: ناصر ساير ويا ولد عمه سلطان دبي عسب مشرووع...
نورة: انزين امايه ويا الدريول...
ام خالد: انا مب سايره مراكز خبرتكن من قبل..
بو خالد: ماعندنا حد يوديكن...
في هاللحظه يسمعوون حس حمدان من برااا..
حمدان: هوووووود هوووووووود يابنات تغطن حمدااان ياي....
تحجبن البنات والكل يظحك على حمدان وسوالفه...... دخل عليهم حمدان...
حمدان: السسسسسسسسسسلاااااااااااام عليكم...
الكل رد السلام عليه ورحب به.. سلم حمدان على عمه واخته ويلس عدالها وحاط شماني في ذبانه..
حمدان: شخباااااااركم..؟؟؟
ام خالد: بخيييييير ياولدي... انته الوحيد اللي مايقطعنا..والا خوانك مايوونا الا في السنه حسنه...
حمدان: شفتي كيييييف عموووه انا غير...
ام خالد: اشهد انك غييير عنهم ...شخبارهم اهلك..؟؟
حمدان: يسلمووون عليكم... تعشيت عمي..؟؟؟
بو خالد: لا بعدني...بتعشا وياي..؟؟
حمدان: كلنا بنتعشى رباعه ماعندنا حد غريب...
وفعلا حطوا العشا وتعشوا كلهم رباعه.. وبعد ماتعشوا يابت الخدامه العصير ويلسوا يشربون ويسولفون..
بو خالد: ابوويه بتودي خواتك السوق..؟؟
الكل انصدم من هالطلب..!!!... معقووووله ..!!..الشايب يطلب من حمدان يودي بناته السوق؟؟ ..هذا اذا كان يدل على شي، فانه يدل على حب الشايب لحمدان وثقته فيه... وفعلا حمدان مب مقصر فيهم كل يوم وطاب عليهم ومايقطعهم..واي شي يبونه عادي يطلبونه من حمدان...
حمدان: نعاااااااااااااااااام اني بوديهن... وين يبن؟؟
حصه: نبا نسير العين مووول... بنسير ناخذ هدية حق فاطمه بنت خالي...
وغمزت لحمدان اللي قرر انه يستهبل..
حمدان: ليش انخطبت..؟؟؟
نورة: لا وانته الصادق...نجحت في الثانوية العامه...
رفع حمدان حواجبه وهو مستغرب...ثانوية عامه.؟؟؟؟ ماشاء الله عليها...يبين عليها انها في الكلية مب ثانوية عامه...
حمدان: لا والله..؟؟!!... وكم يابت..؟؟
حصه: يابت 91.3% ...
حمدان: ماشاء الله عليها....ادبي..؟؟
حصه: علمي...
حمدان: ثرها مب هينه..ماشاء الله عليها...
ام خالد: وانته من وين تعرف البنت..؟؟؟؟
ارتبك حمدان..
حمدان: ماعرفها عمووه..من وين بعرفها يعني..بس اسمع البنات يطرنها... المهم متى تبن تسيرن..؟؟
نورة: باااجر..ماعندنا وقت...بنسير اخر الاسبوع الشارجه...
حمدان: تمام..بعد الغدا بمر عليكن وبنسير...
كان المتفق ان عنود تروح وياهم..بس هذي مرضت ..يتها بلاعيم وحمى.. فخلوها في البيت وروحوا عنها العين مول...وحمدان فعلا شخص يقدر الواحد يعتمد عليه.. حصه ونوره كانن يتوقعن انه يستهبل كعادته يوم يسير السوق..لكنه كان حريص عليهن وايد وماخاز عنهن... واللي يشوفه يقول هذا على رزانته عمره 30 سنه.. يعني لا التفت لا مني ولا مني... مع انه نوره وحصه لاحظن ان كذا بنت تبصبص على حمدان وتراقب حركاته ..لكن هو ولا افتكر...نورة قررت انها تاخذ لفطوم عدة المكياج كامله... لانها تعرف فطوم تحب هالسوالف...وطاحت بباريس غالري وماخلت شي ماخذته حقها... وطلبت تغليفها وتعديلها ويوم خلصوا شلتها ودفعت عنها وراحت...اما حصه فطاحت بهوم سنتر ولايف ستايل..... وخذت لها تحف وصناديق واشياء وايد روعه لغرفتها...خلصوا وكانوا بيروحون بس قالهن حمدان يقعدن في واحد من المقاهي يوم شاف انه فاظي ومافيه شباب وروح عنهن وخلاهن بروحهن يشربن كوفي...وبعد ربع ساعه رد وهو حاظن دبدووب بني كبييييييييييييييير... كبير يعني يوم تحطه عالارض يوصل لين خصرك من كبره.. نوره وحصه فجن حلوجهن.... شو هذا؟؟ شووو يايب؟؟...وهو ماسكنه ويظحك ومستانس انه حصل اللي يبغيه..يلس وياهن وقال..
حمدان: شو رايكن.؟؟؟
نورة: رهييييييييييب الصراحه... وايد حلووو....
حصه: شو تبابه..؟؟
حمدان: مب لي..
حصه: لمنوو عيل..؟؟
حمدان: حق الطويله....بنت خالكن..
نورة: حق فطووم؟؟؟؟ ماخذ هدية حق فطوم؟؟؟....باي صفه..؟؟
حمدان: بصفة اني حمدان بن محمد الكتبي... شو بعد هاي باي صفه..
حصه: تباها تفره على روووسنا..؟؟
حمدان: مابتفره على روسكن..هذي هدية النجاح...حد يرفض هدية نجاح..؟؟؟
نورة: وتبانا نقوللها من عند حمدان..؟؟؟
حمدان: مب لازم تقولن شي...بكتب لها كرت وبفكن من الصدعه..
حصه: بعاااااااااااد ..كرت..!!..ياعيني ياعيني..
نورة: حمدااان... صدق صدق...شوياينك انته عالبنت..؟؟؟؟
حمدان: تبين الصدق يابنت عمي.... قسم بالله مادري... بس مادري كيف ماقدر اقاوم اني اغايظها واطفربها... ويوم اتذكرها انقع من الظحك... وانا ادري انها ماطيقني... عشان جي شريت الهدية...نحاول نلطف الجو شويه...
حصه: ياويلي انا عالرومانسيه.....
نورة: ياخي حمدان ليش انولدت عقبي انته..؟؟؟
حمدان: لييييييش شو عندج..؟؟
نورة: لو اكبر مني جان مافوتّك...!!
حمدان: هههههههههههههههاي... لو الدنيا كلها مافيها غير بنت وحده وهي انتي..مابخذج..شحقه ابلي عمري بمينونه..؟!.
نورة: ههههههههه يالهرم... الا ياحظك....قم قم خلنا نروح..
حمدان: يالله...
..في طريق الرده اصرن البنات انهن يمرن على عنود ويسلمن عليها ويتشكرن لها بالسلامه... وام سلطان ماكانت موجوده.. وحريم سلطان وحميد كل وحده فبيتها... نزلهن حمدان وراح الميلس يشوف منو فيه... وهن دخلن على عنود وحصلنها طايحه عالشبريه وسلمن عليها ويلسن وياها شوي عقب ردن طلعن وشلهن حمدان البيت عشان مايتاخرن.. حمدان وصى حصه ونوره على الدبدوب.. وكتب بطاقة على السريع وعطاهن اياها ..هو مستانس من اللي سواه... لانه فاطمه يا انها بتحن عليه شويه... يا انها بتعصب زياده وهذا هو اللي يظحكه في السالفه اكثر....
نورة على الرغم من العذاب اللي تحس فيه الا انها كانت متحلفه لسعيد عشان تراضيه...مستحيل تظيع اللي بينهم... لازم تتفاهم معاه...وكانت مخططه لكل شي بتسويه في سبيل انها تراضيه... حتى لو كان هالشي خطير او عيب..بس مايهمها...تراضي سعيد يعني تراضيه...
اول ماوصلوا الشارجه دخلوا سياره سعيد ماكانت موجوده جدام الباب... بس وين بيروح من نوره..؟؟ مصييره يرجع البيت ويشوفها.. ام خالد كانت يايبه بناتها ويا البشكاره والدريول بس.. ومحد وياهم يعني رياييل...لانه محد فاظي... دخلوا وسلموا وباركوا لفطوووم اللي ميته من الفرحه... والمسا يوم قوم خوله وهالشي خلا نوره تلوع جبدها وحاولت قد ماتقدر انها تجنبها....وسعيد رد البيت وعلى طوووول الميلس .. لانه ريل خالته هناك + فيصل وابوه..والصراحه انه ماكان يبا يشوف نوره.. كان بعده متغيظ منها ومنقهر... ولوشافها مايعرف شو بيسويبها...على هالحال مادخل البيت الا الساعه 1 يوم تاكد ان الكل راقد... دخل حجرته على طول ورقد هو بعد... نوره وفطوم كانن يسولفن في الحجره وتراويها فطوم الهدايا اللي وصلتها.. وتقدرون تقولون ان فطوم تم تجهيزها للجامعه بكافة الاشكال...
امها يابت لها عقد الماس صغييييير وبسيط وايد بس رووعه لانه وايد ناعم
ابوها ياب لها موبايل مع رقم طبعا..وهو يعرف انها يوم بتروح الجامعه بتطلب واحد..عشان جي يابلها من الحين وفك عمره من الصدعه...
فيصل عطاها الفين تسوي فيهن اللي تبغيه عنه وعن حرمته طبعا...
شيخه ربعت السوق وماخلت بدله ولا قميص ولاتنوره الا وخذته حق فطوم.. وطبعا كلهن كاشخات ومرتبات..
سعيد كان ناوي اييب لها لاب توب... بس يوم عرف ان الكلية اللي ناويه تلتحق فيها بيعطونهم لاب توب كنسل السالفه... وخذ حقها بدال اللاب توب.. كاميرا ديجيتال اللي تشبك على الكمبيوتر على طول..
فطوم لين الحين تتحسب ان الدبدووب هذا اللي تخبلت عليه من عند نووره..لكن يوم عطتها نوره الكارد وهي تظحك ..وقرت فطوم اللي فيه وكان..
" الى <الشيخه> فاطمه...
الف مبرووووووووك على النجاح..وعقبال الباكلريوس.... بسج باكلريوس ماتبين دكتوراه..!
واذا كنتي زعلانه علينا...السموحه منج ..ترا كلها كانت سوالف ومزح...
ولا تحطين بخاطرج.....
المهم الف مبروووووووك.... 91.3 % نسبه ممتازه... والله يوفقج
الشيخ ..حمدان"
انصدمت فطوم من هالهدية والبطاقه... وماعرفت بالضبط بشو تفكر او شو المفروض تكون رده فعلها... هذا ناوي مايفكني من حركاته... بس الدبدوب وايد روعه..ومابفرط فيه.. عشان جي ابتسمت وخشت البطاقه في السده... مايهم من عند منووو ...المهم ان الدبدوب عايبنها ومتخبله عليه....
قبل ماترقد نوره ظبطت الساعه على خمس.. وهي تعرف عدل ان المنبه بيوعيها هي قبل فطوم لانه فطوم نومها ثجييل وايد....وفعلا اول مارنت الساعه نشت نوره..لانها اصلا ما ارتاحت برقادها من كثر التوتر..نشت توظت وصلت الفجر..بعدها مسكت تيلفون فطوم اللي تعرف ان رقم سعيد مخزن فيه..واتصلت به... مره ..مرتين...ثلاث...لين مانش ورد عليها وصوته كسلااااااااان..... واول ماسمعته سكرت بويهه..على الاقل احين تروم تدق عليه وينش بسرعه لانه واعي.. نشت ولبست شيلتها البيضا وطلعت من الغرفه... ترددت عند بابه وقلبها مثل الطبل وتحس انه دقاته تنسمع... والرجفه ترجف بجسمها كامل... بس يوم تذكرت زعل سعيد عليها وانه الفرصه هذي مابتتكرر...تشجعت ودقت الباب.....
داخل الغرفه سعيد استغرب...ماكان يعرف رقم فطوم بعده عشان جي ماعرف منو هذا اللي متصل عليه وماذنه عشان اخر شي يسكر فويهه... ومافكر انه يرد يتصل لانه ميت من الرقاد يبا يرقد..كان لابس وزار وفانيله ومنسدح على شبريته...ويوم سمع الدق استغرب اكثر...شو السالفه اليوم..؟؟ حالفين مايخلوني ارقد.. خيبه يمكن مستوي شي...!!!..نش بسرعه وبطل الباب وويهه معتفس...ويوم دقق النظر...انصدم من اللي شافه... نـــــــوووووره..؟؟؟؟؟!!!!!!!!
نوره بعد انصدمت....اوكي انا وعيته من رقاده لكن ماكنت اتصور انه بيفتح لي وهو بوزار وفانيله...!!!... آآآآآآآآخ يالفظيحه..شو بسوي الحين... نزلت عيونها بسرعه..واي كلمه كانت مجهزتنها عشان تقولها له طااااااااارت....تبخرت.... وماتم شي غير الاحراج...!
سعيد ماعرف بشوو يفكر....ياترى يحلم والا شو السالفه..؟؟؟ نوره شو يابها عندي..؟؟ وليش ادق عليه في هالوقت..؟؟؟؟..وفي لحظه خوف نسى الزعل وسالها باهتمام...
سعيد: خيـــــر نوره..؟؟؟ شو بلاج.؟
تشجعت نوره وقررت انها تتكلم غصب... ما تقدر تفوت هالفرصه...لانها ما بتتكرر مره ثانيه... وان شاء الله انه محد بيدري في البيت لانه كلهم ينشون 9 او عشر تقريبا...
نوره: آآآ ..الخير بويهك... ..آآ..آآسفه اني وعيتك ..الحين....بس...هممممم.... اباك تقوم..وتصلي.. وتتلبس....وووو... تيب سويجك وتنزل للحوش....بترياك هناك...
وشردت قبل مايسالها اي سؤال....ماصدقت تخلص من هالاحراج..ولا تدري هي شو قالت بالضبط بس المهم وصلت الفكره...بتروح احين وبتهدي اعصابها وبتترياه في الحوش...
سعيد ماصدق اللي قاعد يستوي....بلاها هذي تخبلت..؟؟؟...حد قايلها توعيني والا شو سالفتها... طلع في الممر يشوف..البيت هادي واكيد كلهم رقوود ...الا هالساحره واعيه والظاهر انها دهمانه...!!.. بس خلني اسوي اللي قالت عليه واشوف شو سالفتها...دخل وتسبح والرقاد طار من عينه كله... وصلى الفجر وتلبس وخذ سويجه وتيلفونه ونزل عندها.. ومثل ماقالت...كانت يالسه عالحشيش مثل ماتعودت ... قال في خاطره " بسم الله" ..وسار صوبها... والزعل رد في خاطره ..بس الفضول غلب عليه...يبا يعرف شو سالفتها وشو تبا...
نوره اول ماشافته رد لها التوتر..وفزت من مكانها ووقفت.. يوم وصل لها سعيد...حاولت تبتسم.... قالت له
نوره: صباح الخير..
سعيد: صباح النور...خير...شو مستوي..
نورة: مب مستوي شي... يبت سويجك..؟؟
وسوا حركه بيديه يراويها السويج... سارت نورة صوب الباب الرئيسي...
نوره: تعال وياي...
سعيد تعطل الفكير في مخه..وقرر انه يجاريها ويعرف شو في خاطرها.... لانه فعلا مب قادر يفهمها... تبعها لين برا البيت ويوم طلعوا سكرت نوره الباب وراهم ..
نورة: افتح السياره...!!
سعيد: نوره شو عندج..؟؟
نوره: افتح السياره سعييييد....!
هز راسه وسار صوب باب السايق وفتح السياره... وعلى طول نوره فتحت الباب للكرسي اللي عدال السايق وركبت...وهي تاشر له تباه يركب بعد... فتح بابه وركب عدالها..
سعيد: قاعدين نلعب لعبه نحن..؟؟
نورة: لا...
سعيد: انزين...!!..ركبنا...وبعدين..؟؟؟
نورة: ودني البحر لو سمحت.....
بطل سعيد عيونه ....
سعيد: نعم...؟؟؟؟ البحر..؟؟؟ نوره ينيتي انتي..؟؟
نورة: لا ماينيت..بتخلي البحر في خاطري بعد...؟؟
سعيد: موعتني من رقادي عشان اوديج البحر..؟؟؟....انزين جان يبتي فطوم وياج..
نورة: لاني ماريد اسير ويا فطوم.... ممكن تتحرك قبل مايظيع علينا الوقت...!
سعيد: اصبحنا واصبح الملك لله....
وحرك السياره ونوره تتبسم.. الخطوه الثانيه ونجحت...باقي الثالثه..والله يستر من ردة الفعل....وصلوا البحر ونزلت نوره ..ويوم شافته مانزل ولا تحرك احتشرت..
نورة: انزل...بتخليني اروحي..؟؟
سعيد: نوووره.... اختصري هالحركات كلها وقوليلي شو فخاطرج...
نوره: في خاطري ارمسك بسالفه بس مب في السياره...
سكرت الباب وراحت للبحر ..وقعدت على التراب.... وبعد شوي تبعها وهو مقرر يهدي اعصابه... لين مايشوف اخرتها وياها... وصل لين عندها ويلس مجابلنها..
سعيد: وهذي يلسه.... رمسي...شو فخاطرج..
سعيد كان متنرفز وكان مبين على صوته وطريقة كلامه ... يعني باختصار مايشجع حد يتكلم معاه....سكتت نوره.. وماعرفت كيف تتكلم ومن وين تبدا.... ليش يتصرف جي...؟؟؟..ابدا مب متعاون.... يتعمد يوترها... زين جي احين ظاع الكلام كله اللي مجهزتنه...!!!!!
نورة: سعيد.. لا اتم جي عاد ...ماعرف ارمس جي..
سعيد: شو تبيني اقولج يعني والا كيف اتصرف... وانتي تسحبيني مثل التيس من مكان لين مكان وماتقوليلي شو السالفه...!! وموعتني من الساعه خمس....
اظايقت نوره... الفكره كلها كانت مب زينه...وخلها ترد البيت احسن لها واحفظ لكرامتها...نشت ونفظت التراب عن ثيابها..
نورة: آسفه خلاص... ردني البيت...
تلوم سعيد ... ويوم وصلت عداله مسكها من ايدها وهو بعده يالس...
سعيد: سووري......خلاص يلسي...وخبريني باللي في خاطرج...
ايد سعيد ومسكته لها يابت لها هشاشه في عظامها..واضطرت تقعد وتسكت...
سعيد: شو بلاج نوره.... ؟؟؟ خذي راحتج رمسي عادي... قولي الي في خاطرج..
نورة حست انه سعيد تفهم موقفها المحرج شوي... ونوره من النوع مايتحمل كلمه من حد غالي عنده..وتصيح على طول... بس كانت كاتمه وماسكه عمرها....
نورة: سعييد... انته ليش زعلان عليه..؟؟؟؟
رفع سعيد حواجبه... وردت له الفكره اللي نوره ماخذتنها عنه واظايق...
سعيد: خبريني انتي اول...ليش كنتي زعلانه..؟؟
نورة: انته تعرف ليش كنت زعلانه....فطوم خبرتك..
سعيد: ابا اسمع السالفه منج....
نورة: كنت منصدمه من رمسة سمعتها من خوله... قالت لي كلام بما معناه انك تحبها وتباها...وبتخطبها قريب... وانك تغار عليها...انا انصدمت من اللي قالته... وقلت في خاطري هذي ليش تتكلم بكل هالثقه..؟؟؟ اكيد عندها شي تستند عليه..وان حد مرمسنها انك بتخطبها... ومادري كيف فكرت ساعتها...بانك دام رمست عن خطبة خوله...معناته انا مالي مكان فحياتك.... وان خوله هي اللي بتاخذها ...وانا مجرد تسلية بين فترات...
سعيد: وزعلج هالشي..؟؟؟
نورة: اكيـــد زعلني..... وذبحني بعد...
سعيد: ليش نوره..؟؟؟
رفعت نوره عينها فعينه.... وشافت عيونه تلمع بشكل غريب وحلوووو وايد....
نورة: انته تعرف ليش....
سعيد: ماعرف..
نورة: تعرف....
سعيد: مااااااااعرف...اذا كنتي تبينا نتفاهم خلج صريحه بكل شي..
سعيد كان ناوي يذلها ذل...ومايبا يسهل اي شي عليها....احتارت نوره...اقوله احبك..؟؟؟ ماقدر.. ماتطلع مني مااجرأ... وفجاه يت في بالها فكره انها تكتبها بدال ماتقولها...اسهل صح...؟!
مدت ايدها على التراب اللي فاصل بينهم...وكتبت" لاني احبك " ... تابع سعيد حركتها وقلبه خلاص ذايب..مايعرف بالضبط متى راح الزعل..بس تظاهر بالعكس.... نوره تقوله احبك..؟؟ من متى وهو يتريا هالكلمه.... بس مابيخلي السالفه سهله عليها..لازم يطفربها شوي...
سعيد: سوري ثقافتي انجلييزي...ماقرى عربي...
نورة عرفت انه سعيد يبا يغايظ ويطفربها..لكن ده بعدك على قولت اخوانا المصريين... ومدت ايدها مره ثانيه تبا تكتب " I love u" بس مسك ايدها قبل ماتكتب...
سعيد: ماريد اقرا شي....ابا اسمع...
نورة: سعيييد ..!!.
سعيد: قوووولي...
نورة: اووووفففف.... احبــــــــــك...خلاص اترتحت..
نورة دمعت عينها وهي تقول هالكلمه...ابتسم سعيد ..وعقب رد ظحك... وهو يحس باحراج... و بعده ماسك ايدها.. مايقدر يتم زعلان عليها...صح حاط بخاطره بس بيتفاهم وياها على كل شي... يدري شكثر تطلب منها جرأة وشجاعه انها تسوي اللي سوته اليوم....ومايقدر انه يغض النظر عن كل هالاشياء...وفوق هذا نوره قالت له انها تحبه...شو يبا اكثر من جي...؟؟
سعيد: تدرين اني انا بعد احبج واااااااااااايد نوره... وتعرفين شكثر ابغيج واني اتريا بس حصه تعرس عشان اخطبج...صح والا لا؟؟
هزت نوره راسها وهي منحرجه وعيونها على الكلمه اللي كتبتها من شوي عالتراب... فج سعيد ايدها وهو يقولها بعتااااب واضح..
سعيد: دامج تعرفين... كيف قدرتي تفكرين فيني هالتفكير...؟؟؟؟
نورة: بشو تباني افكر وانا اسمع هالرمسه منها...؟؟
سعيد: المفروض تتاكدين...بالله عليج نوره انا اسوي هالسوالف..؟؟...ترمسين جنج ماتعرفيني.....خليني اقولج شي...اي واحد يوم بيلعب.. بيلعب شهر...شهرين.....سنه ان كثر..... بس مايلعب عشر سنين...!!!
نورة: آسفه والله... لا اتم زعلان عليه... آسفه مابشك فيك ثاني مره....
ابتسم سعيد...
سعيد: قولي احبك مره ثانيه وبيطيح الزعل كله....
نورة: ههههههههههه مشكله الطمع... قوم خلنا نرد البيت...
سعيد: تو الناس... توها ست الا ربع... ماتبينا نلعب شوي عالبحر..؟
ووافقت نوره... وقعدوا يتمشون وكل واحد منهم الدنيا مب سايعتنه من فرحته..ويسولفون عن اشياء وايده ويعاتبون بعض... وكل حد يخبر الثاني عن ردات فعله تجاه بعض المواقف اللي صارت بينهم... ويوم ردوا البيت ووقف سعيد سيارته... قالها.
سعيد: تصدقين نوره...احس ان هاليوم احلى يوم مر عليه فحياتي لين الحين...
نورة: والله حتى انا... يسد انه راضيناك وافتكينا من زعلتك الشينه..
سعيد: لا والله...؟؟ منو الي زعلته شينه احين انا والا انتي..؟؟؟
نورة: والله ثنيناتنا.... يالله انزل..
ويوم بغت تنزل قالها سعيد..
سعيد: صبري نوره... ابا اسالج... متى تبيني ايي واخطبج..؟؟؟ لانه حصه انخطبت خلاص...
انحرجت نوره...كيف ترد على هالسؤال... بيذبحها ان درى باللي مسوتنه...
نورة: سعيييد...انا يوم كنت زعلانه عليك سرت وحلفت على امي ما يجدمولي اي معرس لين سنه... لين ماتخرج...
انصدم سعيد... عقب كل هالتخطيط يتريا بعده سنه...!!!!!!! مايقدر...
سعيد: بذبحج.....
نورة: سوري والله.... ماتروم تصبر...؟؟
سعيد: نص سنه وبس.... ست شهور بالتحديد... وبعدها بيي اخطبج ومالي خص... على الاقل عرس ماشي لين ماتتخرجين.... بس الخطوبه قبل...تسمعين..؟
نورة: هههههههه اوووكي ولا يهمك...
نزلوا من السياره ويوم دخلوا البيت حصلوه على حاله مثل ماخلووه... وبالتالي محد درى عنهم..يوم دشوا البيت حصلوا الريوق محطوط... سار سعيد يبا يتريق وشاف نوره انها بتسير فوق...
سعيد: تعااااااااااااالي..... وين سايره...؟!
نورة: اوووص لا تصارخ.... شوفيك..؟؟
سعيد: بتخليني اتريق رووحي....تعالي تريقي عقب سيري فوق...
ظحكت نوره ...طبعا مابتمانع... تريقت وياه وهم كله يسولفون ويظحكون ..ويعوضون عن فترات الزعل...ويوم خلصوا وركبوا فوق ..وقف سعيد جدام غرفته...
سعيد: نورووووه...!!.. وعيني والا وصّي اي حد يوعيني الساعه 11 اوكي..؟؟
نورة: من عيوووني الثنتين...
ابتسم سعيد...
سعيد: فديت عيونج الثنتين انا.... وانتي بعد سيري رقدي...
دخل كل واحد منهم غرفته وهو يحس بونااسه ماحس مثلها من قبل ابد....اول مادخلت نوره الغرفه... اول شي سوته مسكت تيلفون فطوم ومسحت المكالمه الصادره .. ودقت على تيلفوون امها عشان تخوز اي اثر في التيلفوون يدل على انها اتصلت بسعيد الصبح...ويوم اطمنت من كل شي...رقدت وهي تسترجع كل شي صار بينهم .. وهي ميته من الوناسه...
الجزء الثاني والعشرين
نشت نورة على حدود الساعه 12 الا ربع..واول ماشافت الساعه فزت من نومها... ياويلي..!!..سعيد محد وعااااه,.... نشت وتلبست ثيابها وتغسلت وتعدلت ولبست شيلتها البيظا وطلعت من الحجره... وفطوم بعدها راقده.... نزلت تحت للصالة وحصلت الكل متيمع.. امها وحصه وعلياوفيصل وخالها وحرمته وشيخه ومنى ومنال .. يعني سعيد بعده راقد..!! ياوييييلي.... يت وسلمت عليهم كلهم ..بس ماقدرت تيلس..لازم توعييه حرااااام... ردت نشت ...
حصه: وين بتسيرين.؟؟؟
نورة: هاا..؟؟..آآآ ... بوعي فطووووووم...خاست من الرقااد...
وطلعت من الصالة ويوم كانت بتركب الدري ..انصدمت بسعيد نازل ومتكشخ لصلاة الجمعة.... اول ماشافها ابتسم... الحمد لله يعني مب معصب...بس وقف وطالع ساعته ورد يطالع فويهها وعلى ويهه تعبير يظحك كانه يحاسبها عالتاخير هذا...
سعيد: عيونج ميفنه... توج ناشه.؟؟
نورة: هي والله....سووري راحت علي نوومه ونسيت اقول لحد يوعيك..!
سعيد: هههههههه ليش انا رمت ارقد اصلا..؟؟؟ ناش من عشر...
ظحكت نوره وتمت ساكته... كمل سعيد طريقه ونزل لين وصل عدالها..... وفرر راسها بريحه عطره.. عنبوو متسبحبه ياسعيد..!!!...
سعيد: وين بتسيرين.؟؟
نورة: بسير اوعي فطووم...
سعيد: وبتسيرون بعد الغدا؟؟
نورة: كالعاده...
سعيد حاس بوزه كانه مب عايبنه الوضع هذا...بس ماباليد حيله... وعليه بالصبر..
سعيد: همممم..خلاص براايج.
كملت نورة طريجها لحجرة فطوم وسعيد روح عندهم في الصالة... بعد شوي ساروا الرياييل يصلون ويوم ردوا حطولهم الغدا وتغدوا.. ونفس الشي للحريم... وبعد الغدا فطوم ونورة كانن في الغرفه لانه نوره تلم اغراضها في الشنطه عشان تنزلها..
نورة: فطوووووم.. بخبرج بشي .. لاني اعرف انج مستهمة من الموضوع...
فطوم: خيييييييير..؟؟
نورة: تراضينا انا وسعيد اليوم..الصبح..بس بليز لا تساليني كيف...المهم تراضينا وخلاص..
فرحت فطووم وااايد.
فطوم: والللللــــــــه..؟؟ الحمد لله مااااااااااابغييييييتوووووا...!!
نورة: ههههههههه شو نسوي...زعلته شييييييينه اخوووج...
فطوم: والله زعلتج انتي اشين الصراحه...ما تتفاهمين...
نورة: يعني اخوج اللي يتفاهم... خيبه كان ياي يظربني بروحج شفتيه...!!
فطوم: هههههههههههههه خسج الله.... كان معصب..ولا كان بيظربج بعد...اونه كان ساير ينازعج... بس اصلا حتى لو صار ووصل لج..مابيقول شي...لانج ماتهونين عليه...
نورة: فديييييته والله.... تعااااااااالي....
فطوم: هااااا...؟؟
نورة: هذا النجاح ونجحتي.. احين لازم تاخذين ملفج من المدرسه وتسوين فحوصات الجامعه وتين العين تسجلين...
فطوم: هي ادري..
نورة: متى بترمسين ابوج عشان السكن عندنا..؟؟؟
فطوم: خلال الاسبوع الياي.... بس بقنع سعيد اول عشان يساعدني ..
نورة: هههههههههههاي سعيد ارووحه بيعطيج طراق ان طريتي السالفه......
فطوم: ههههههه بكم تراهنين.؟؟؟... ماعليج انتي منه..يوم بيشوف اني بسكن عند عرب مزايييين وبيشوووفني سبب مقنع يخلييه يروح العين.... بيوافق وبيقنع شيبتنا بعد وياه...
نورة: والله عليج تفكيير...؟؟.....المهم خبريني باللي يصير وياج...اتصلي مب تقطعينا...
فطوم: افا عليج..احين عندي موبااايل بحشركم كل يوووووم ههههههههههه...
بعد فتره كانوا كلهن متيمعين في الحووش قبل مايروحون هل العين..ماعدا سعيد... ونوره كانت ادوره بعيوونها...وييينه..؟؟ يدري انه نحن بنروووح احين ليش منخش؟؟... بس قاطعت افكارها امها...
ام خالد: امايه سيري هاتيلنا دبه ماي بارده حق الدرب...
نورة: ان شاء الله امايه...
سارت نورة صوب المطبخ..ويوم دخلت كان سعيد توه طالع من البيت وشافها وهي تدخل المطبخ... يوم صد صوب باقي الاهل شافهم لاهين في الحوش ومحد منتبه له... لحقها ودخل المطبخ وراها....
نورة كانت اطلع دبة ماي من الثلاجة ويوم سكرت باب الثلاجه والتفتت حصلت سعيد جدامها....
نورة: انته وين من الصبح..؟؟؟؟؟
سعيد: تولهتي عليه..؟؟؟
نورة: بغيت اسلم عليك قبل مانسير....
سعيد: همممممممم يالله سلمي عليه...
نورة: اووفف منك يالغلس ... قوم عن الباب..مابسلم خلاص كنسلت..
سعيد: هههههههههه افااا ... نورووه لا تروحين.... والله مب مستوعب انج بتسيرين..
نورة: ههههههههه عندي دوااااااام...
سعيد: خليييييييه يولي...
نورة: شو هالخريييط..؟؟ تعرف انه محد بيخليني اقعد شحقه تطلب....
سعيد: انزين متى بتون مره ثانيه..؟؟
نورة: والله ماعرف ياسعيييد...
سعيد: بتخبريني يوم بتون..؟؟
نورة: بخبر فطوم وهي بتخبرك....
سعيد: ماباااا...خبريني انا..
نورة: هممممممممممممم اتصلك يعني....!..هذا قصدك...؟
سعيد: هممممممممممممم هي...
نورة: لا والله..؟؟؟ صاحي انته تطلب مني اكلمك في التيلفون..؟؟؟ جي شو قالولك عني.؟؟ ظايعه..؟؟
سعيد: هههههههههههههه انزين انزين بسم الله كلتيني...كانت محاولة يائسه لاغير.... انزين بالايميلات..؟؟؟
نورة: عندك ايميل..؟؟؟
سعيد: حلفي انتي بس..؟؟؟؟ يعني واحد يشتغل بالاتصالات....بالله اذا انا ماعندي ايميل منو عنده يعني..؟؟؟؟
نورة: همممممممممم بفكر....
مسك سعيد قلمه اللي في مخباه وخذ كلينكسه من العلبه المحطوطه عالطاوله وكتب فيها ايميله ... وعطاها نوره..
سعيد: لا تفكرين... بس راسليني عالاقل بين فتره وفتره .....
نورة: ههههههههه انزين ...شي في خاطرك؟؟
سعيد: اهتمي بعمرج... وعن السوالف الزايده ويا حمداااان....
ظحكت نورة ...لو تدري ان حمدان حاط عينه على اختك شو بتقوووووول..؟؟؟
نورة: ان شاء الله..وانته بعد اهتم بعمرك.... مع السلامه
سعيد: فمان الله..
طلعت نوره وهي شالة دبة الماي وسلمت عليهم كلهم .. وبعد شوي لحقها سعيد وسلم على عمته وحصه.. وركبوا اهل العين سيارتهم وراحوا....
في هاللحظه كانت عنود تكلم عبدالله..
عبدالله: شحالج غناتي..؟؟
عنود: متولهه عليييك موووووت... شخبارك انته..؟؟
عبدالله: والله حتى انا متوله عليج وعليكم كلكم والله...شحاله عمي وعمتي وخوانج كلهم..؟؟
عنود: كلهم بخير وسهاااله....شحال خليفه عندك..؟؟؟
عبدالله: همممم والله...على حاله...بخير بخير..
عنود: عبااادي..بعده خليفه زعلان على سالفه حصه..؟؟..
عبدالله: هذا اللي احسه انا....دوومه مويّم وسرحان ومايسوولف مثل قبل... لكن يوم اساله يتظاهر بالعكس..
عنود: فدييته والله... مسكين مايستاهل...
عبدالله: شو نسوي بعد هذا النصيب...لايكون خبرتي حد انتي..؟؟
عنود:لالا ماقلت لحد... شخبار دراستك.؟
عبدالله: والله ماشي الحال مع انها اصعب عن قبل....عنووده قوم امي في البيت.؟؟؟ دقيتلهم محد يرد..
عنود: لا عمري...اظني انهم الا في الشارجه...ترا بنت خالك نجحت في الثانوية العامه وساروا يباركولها..
عبدالله: وانا اقوووول وينهم....ثرها العيوز عند اهلها... ماسووا شي في قسمنا..؟؟
عبدالله صح كانت عنده غرفته اللي هو فيها حاليا...لكن مسوين له قسم خاص داخل البيت عبارة عن غرفتين وحمام وصاله..وهو بعده مش ماثث...يبون يجهزونه لعرس عبدالله..
عنود: لا ماظني سووا شي.... عندهم وقت براايه لين عقب..
عبدالله: تمام عيل....بخليج عنووده ماقدر اطول وايد...اهتمي بعمرج لا تخليني احاتيج... شي في خاطرج؟
عنود: سلامتك الغلا...انته اللي اهتم بعمرك وسلم على خليفه وايد وايد..
عبدالله: يووووصل ان شاء الله.... فمان الله وسلمي
عنود: ان شاء الله...الله يحفظك ياربي...
بعد اسبوعين .. رجع سيف بيت عمه حمد وقالهم انه يبا يملج... وان الملجه مابتستمر سنه وبيعرسون ان شاء الله قبل عرس عبدالله...واذا كان على حظور عبدالله وخليفه العرس... يقدرون يرجعون البلاد فتره اسبوع ويردون مره ثانيه امريكا.. لانه حتى سيف كان مصر انه مايعرس الا يوم يحظرون عبدالله وخليفه.... بس هذا مب معناته انه يصبر سنه وشي لين مايعرس عبدالله بعدين هم يعرسووون.... !!...
ووصل هالكلام حصه... اللي قالت لهم بتفكر في السالفه هاذي... وبينها وبين نفسها كانت متوجسه... وخايفه... ياترا توافق عاللي قاله سيف..؟؟ اللي هو منطقي... والا تعاند وتتريا لين مايعرس عبدالله... بس فتره سنه وشي فتره طوييله وسيف معاه حق... يعني هي وافقت عليه.... وتدري ان العرس مب لعبه ..خلاص وافقت عالخطبه يعني انها بتعرس قريب..وهي ماعندها شي يمنعها عن العرس...واذا على عبدالله وخليفه..مثل ماقال سيف..يقدرون ايوون فتره اسبوع ويحظرون العرس ويرجعون بعدين امريكا يكملون دراسه....
حصه: خلاص موافقه...سووا اللي تبونه..
ام خالد: مب نسوي نحن اللي نباه...مابنغصبج على شي ماتبينه...
حصه: انزين خلاص..حددوا وقت للملجه بس ابا وقت اجهز...
ام خالد: ثلاث اسابيع يسدنج تجهزين.؟؟؟
حصه: اعتقد..
ام خالد: على خير ان شاء الله..
ساعتها نوره كانت في غرفتها ويالسه عالكمبيوتر وميته من الظحك على رساله سعيد... اللي سبها سب بسبب تاخرها بارسال رساله حقه... وخبرها بعد انه فطوم خبرته بسالفه السكن في العين...وهو بعد تردد وافق عالسالفه... وكاتب بعد " لغرض في نفس يعقوب" وحاطلها غمزه... عاد انتي فهمي اني انا موافق لانها بتسكن وياج واني بقدر اسير العين متى مابغي بحجه اني ساير لاختي....
دخلت عليها حصه الغرفه وملامحها غريبه...لانه هي اصلا مب عارفه بشو تفكر..تفرح والا تظايق..؟؟؟
حصه: شو تسوييين..؟؟
نورة: ماااشي يالسه عالنت.... بلاج؟
ومسكت نوره كوب والماي وشربت منه يوم قالت لها حصه..
حصه: نوروه ..ملجتي بعد ثلاث اسابيع.......
انصدمت نوره وبغت تختنق..وطلعت اللي فحلجها كله عالشاشه...
حصه: ههههههههههههههههه ياااااااااااع....
نورة: شووو تقوووولين انتييييي..؟؟؟؟
حصه: مشي مشي الشاشه عن تنقع فويهج....
وفرت عليها الفوووطه اللي كانت عالشبريه..شلتها نوره ونظفت الشاشه.... وملامحهامصدوومه..
نورة: ويا ويهج ليش جدمتي الملجه..؟؟
حصه: انا اللي جدمتها احين..؟؟..سيفووووه محتشر يبا يملج....ولا ازيدج من الشعر بيييت.... حتى عرسي بيكون قبل عرس عبدالله....
نورة: عشوووو مستعيل ويا راسه..
حصه: شو درااااني... حشرووني ووافقت.. على شرط ان عبدالله وخليفه يحظروون عرسي... واذا ماحظروا تراني والله بكنسل كل شي ولا عليه من حد...
نورة: وكيف بتجهزين عمرج فثلاث اسابيع..؟؟ لازم تروحين تشترين قطعه للفستان بسرعه وتختارين الموديل..يالله يالله يخلص في ثلاث اسابيع...
حصه: بتدبر ان شاء الله....
بعد ثلاث ايام في امريكا... كان عبدالله يكلم ناصر اخووه وخليفه يالس وياه في الغرفه يدرس.. ويوم سكر عبدالله كان ويهه معتفس...وتم ساكت....رفع خليفه نظره وقعد يطالعه...
خليفه: شوفيك..؟؟
عبدالله: ماااشي..
خليفه: لا والله..؟... بلاك.؟؟ الاهل فيهم شي..؟؟
عبدالله: لالا مافيهم شي..مستانسين ...
خليفه: عيل بلاك من سكرت معتفس ويهك.؟؟
تم عبدالله ساكت....يخبره..؟؟؟..والا مب ظروري..؟؟...مسكين عليه امتحان بعد يومين مافيه يزيد عليه... بس والله بيعصب اذا ماخبرته...
خليفه: بتقول والا اصفعك....!!
عبدالله: همممممم... خلوووف... ملجه حصه بعد ثلاث اسابيع....
انصدم خليفه....بهالسرعه ياحصه..؟؟ ... كان عندي احساس انها بتكون لي وبترجع لي ..لكن احين صدق بفقد الامل هذا.... يارب ساعدني.... مابيدي شي غير اني اتمنالها التوفيق وتستانس بحياتها...
كان عبدالله يراقب تعابير ويه وهو قلبه يعوره... مانسى..!!...خليفه بعده مانسى حصه... لو كانت بنت ماتقرب له يمكن ينساها بشكل اسرع...بس بنت عمه...!!..ويسمع اخبارها دايم...وريلها ربيعه...!!..كيف بينسى بالله...؟؟؟
عبدالله: مابتقول شي..؟؟
خليفه: الله يوفقها ويسعدها....
عبدالله: خلوووووف....الله بيرزقك باللي احسن عنها بمية مره...
سكر خليفه كتابه وجمّع باقي الكتب والدفاتر وشلهن... ولاحظ عبدالله ان ايد خليفه ترتجف...
عبدالله: وين ساير..!!!
خليفه: بسير الحديقه اللي عدالنا بدرس فيها...
عبدالله: ايي وياك..؟؟
خليفه: لا..عبود...ابا اتم بروحي شوي...
طلع خليفه وسكر الباب وراه....وعبدالله متندم انه خبره بهالخبر... هذا قاله عن الملجه بس.عيل لو قاله ان العرس بيصير وهم بعدهم في امريكا شو بيقووول...؟!.. الله يعينك ياولد عمي...
حصه ونوره شلتهن امهن بوظبي عشان يختارن قطع ويفصلنها هناك بالمره ..خلال هالاسبوعين قبل الملجه..... حصه كانت مشغوله بالتجهيزات مع امها ..وعنود تعاونهن متى ماحصلت فرصه.. وحمدان متى ماطلبوا منه شي مايقولهم لا.... كانوا في نص شهر ثمانيه في هالاوقات.... نوره بعد الملجه باسبووع بتخلص الصيفي...وفطوم شافت الوقت يظيع منها وقررت انها تكلم ابوها في السالفه..لانه اصلا المفروض تروح للعين عشان اجراءات التسجيل والارشاد وتحويل وضعها في الجامعه من طالبات السكن لطالبات العين... كان الوقت في الشارجه العصر... وسعيد كان في البيت..سارت فطوم وخبرته عشان يرمس ابوها وياها..ونزل..ويلس عدال ابووه وامه وعليا وفطوم..وفتحت له فطوم السالفه..
بو فيصل: شوووووووووووو؟؟.. لالالالالا...امين يايبه هالفكره انتي..؟؟
فطوم: ابووويه دخيييييييييلك.....ليش انزييين؟؟
بو فيصل: وين تبين تيلسين فبيت عمتج تغثينهم...
عليا: افاااااااا ياخالي... شو تغثهم بعد بالعكس البنات وامايه وايد يحبووون فطوم...
فطوم: بعدين ابوويه انا الصراحه ماريد اقعد مع بنات غرب في السكن...واختلط ببنات الله اعلم بهن... انا ماقول ان كلهن مب زينات بس واااااايد اشياء تستوي في السكنات يخبرونا عنها....
بو فيصل: خلي عنج... اكييه اختج شيخه سارت وسكنت في السكن ودرست وخلصت وتخرجت ولا صار عليها شي ولا تغيرت علينا....
سعيد: ابووويه ويييييييين زمااان شويخ ووين الحين....احين البنات استون اقوى عن قبل... والصراحه نحن نسمع سوالف وايد عنهن.... يعني اللي تروح صاحيه من بيت اهلها تخترب هناك.... الا البنت اللي هي ماسكه عمرها ومتربيه عدل فبيت اهلها.... بعدين الصراحه فطوم احسن لها ويا بنات عمووه وتحت نظر عموووه ومراقبتها... ونحن بنكون مطمنين عليها اكثر... ومتى مانبا بنسير لها... شحقه تسكن في السكن دام عندها اهل في العين وبناتهم في الجامعه...بتسير وبترد وياهن ...
فطوم: فديييييييييتك ابوووويه...... على الاقل اول سنه...
بو فيصل: يابنتي مابترتااحين وياهم..... عندهم ريااايييل وميلسهم دوم مايخلى من ربعهم...
سعيد: ابويه اذا على خالد وناصر كلهم معرسين وعندهم عيال وكل حد فبييته واصلا هم مثل اخوانها... وعبدالله تراه مسافر واصلا اول مايرد بيعرس ....
بو فيصل: اشووفك انته موااافق..؟؟؟
سعيد: انا الصراحه مواااافق...بنطمن اكثر عليها فبيت عمووه...بتكون تحت نظرها ومراقبتها... ونحن بنعرف ويا منو تسير ومنو ترابع ومتى سارت ومتى يت.... مب مساله عدم ثقه لكن عشان نطمن اكثر.... خلها تسكن عندهم واذا ماعيبك الوضع ومارتحت على تصرفات فطوم ردها السكن...مب مشكله...
بو فيصل قعد يفكر بالساااالفه... وفطوم تدعى ربها انه يوافق... وسعيد يتبسم... يعرف ابووه..اذا شاف حد من اخوانها موافق بيقتنع... لانه يعرف انهم حريصين مثله...
بوفيصل: ....... يصير خير...!!
فطوم: ابويه ..فديييييييييييييييييت روحك انا...يعني موافق..؟؟
بو فيصل: يعني بنشاااور عمتج وريلها... مابنفرضج عليهم فرض نحن....
سعيد: ههههههه خلاص ظمني الموافقه....
فطوم: الله يسمع منك.... بس آآآآآآآآخ اتخيل عمووه تقول لا ماباها هههههههههههه...
سعيد: هههههههههه صدق والله بتتحطمين.... لا فديتها عمووه مابتقول غير مرحبابج الساع....
بس قبل مايتصل بو فيصل على اخته شاور اخوها العود فالسالفه هاي... وهذا ماعاارض الفكره بالعكس ايدها وقال انها احفظ للبنت ... وهم واثقين فيها... ويوم اطمن بو فيصل ان امها واخوانها موافقين... وهي تشوف عمرها بترتاح وياهم...رمس اخته في السالفه...
ام خالد: عنبووووووووو يالغااالي...تشاورني..؟؟؟ حياها الله بنت هلال هذا بيتها تراه..
بو فيصل: تسلمييين يام خاالد.. بس اذا كانت فيها مغثه والا شي لا اجاملينا...
ام خالد: ويدي ياهلال..شو هالرمسه بعد.... !!!... والله مرحبابها فاطمه والبيت وسيييع وبترتاح عندنا ونحن بعد بنستانس فيها... انته هاتها وماعليك من اي شي ثاني...
بعد يومين في مكتب سعيد وجدام كمبيوتره...فتح الايميل اللي صار يشيكه اكثر من خمس مرات في اليوم...وحصل رساله من نوره...استانس من الخاطر وهو يقراها وكانت تقول..
" السلااام عليكم....
مرحبا سعيييداااااااان... شحالك ويا هالراس....؟؟.. شو اخباركم...
الحين الساعه 12 ونص في الليل... من شوي كنت اشوف فلم الرزفه.. مع حصه... هي تشوف خطيبها سيف وانا اشوفك انته لوووووول... بقولك شي بس لا تتخقق.... حلوه رزفتك...
ماباقي شي عن ملجه حصيييص.... باقي 10 عشر بالضبط .. انتوا متى بتوونا؟؟؟
هي صح بغيت اتخبر عن فطوووم... شفت بنات التاسيسي ايين الجامعه..حظرتها متى بتي ؟ والا ناويه ماتمتحن امتحانات تحديد المستوى.؟؟؟؟
المهم انتظر رسالتك...سعووود دير بالك على نفسك... وووووووو وخبرني باخبارك...
احم
ابا اقول شي بس مستحيه...
والا اقولك .
مابقول
هههههههههه
باي
Yours,
NoOoOoOoRa"
ظحك سعيد على نوره... هو يعرف شو بغت تقول ومستحيه ..بس بييها يوم وبتقوله هالكلمه بدون حاسيه... سار وكتب لها رد..
" السلااااااااااااااااااااااااام عليج يالبخيله..
شحالج حبيبتي..؟؟ متوله علييييييييج مووووووووووووووووت...
وتراج مقصره ويايه ولا اطرشين لي دووووم... بس ماعليه احسن من لاشي بعد ..مانروم نقولج شي..
نحن هني كلنا بخييير... والله اني دوم افكرفيج... وانا احين تراني في الدواااااام....والساعه عشر وثلث...
فطوووم ابشرج عنها.... اقنعنا ابووويه انه يخليها تسكن عندكم.... يوم اقولج فطوم مب هينه...!!... المهم الخلاصه ان نحن بنيكم انا وهي يوم الجمعه..يعني بعد ثلاث ايااام... وبتم عندكم لين ماتخلص شغلها في الجامعه .. يعني يمكن اتم اسبووع فاظيه فيه قبل مايبدا الدوام رسمي... وبنيبها الشارجه وعقب بردها عليكم ان شاء الله....وابشرج بعد تراني انا توصيت فسيراتها ورداتها..يعني بتشوفيني كل اسبوع ...
يالله عاد جهزولها حجره زينه... وتوصّووا في اختي... وخلووا بالكم منها....
وعلى فكره تذكرين هدية البشااره اللي مارمت اعطيج اياها بسبب زعلتج يالزعاااااااااله..!!!؟
شرييتها..وبييبها وياي بالجمعه ان شاء الله...
ماشي في خاطرج من الشارجه..؟؟؟ اذا شي في خاطرج لا تستحين ..طرشيلي رساله وخبريني...
بتريا منج رسااله..
وابا اقوولج شي..
بس انا مااستحي..
اموووت فيج...
سعيد.."
|
27-06-10, 07:02 PM
جديد مواضيع قسم القصص المكتمله
العرض العادي
