الفصل الرابع والعشرين
في اليوم الثاني..
توني مخلصه من مكالمة رائعه مع صيته... الحمدالله رجعت امورها مع زوجها عال العال... وكانت مفاجأة حلوة بالنسبة له...لكنه ماعلق على موضوع زواجه من الثانية...ورفض انه يناقشها فيه...انا نصحتها انها تهدي الاوضاع شوي...وتنسى او تتناسى مرته الثانية...وتسحره السحر الحلال...بحيث انه يقولها بعد فترة آمري وتدللي لو تبيني ارمي الثانية بنار جهنم ارميهاا!!
طالعت بالسرير اللي توني مغيرة المفرش حقه.... الجو كل ماله ويزيد بروده....مسكين وافي إذا تطلقت منه من راح يهتم فيه...واعرفه عجااز ماراح يغير مفرشه بنفسه...سبحان الله من يصدق ان هالشخص عاش عازب طول عمره....زين لقيت عنده بطانية دافيه....
رحت للدولاب عشان ارتبه زين واعزل ملابسي عشان بسهولة احطها بالشنطه حقتي... تلمست ملابسه... معقولة يا ملكه؟؟..معقولة عشتي معه بس شهر واسبوعين.... ومع هذا تعرفين وش يحب ووش مايحب...تعرفين شلون يفكر؟؟...تعرفين وش اللي يتعبه؟؟...في حريم مع رجالهم من ثلاثين سنة ماعرفت وش اللي يزعل رجلها حتى الآن؟؟..
طلعت بعض الملابس اللي تحتاج غسيل وبعض الثياب المصفرة..... ومسحت الدولاب بقطعه معقمه وحطيت له اكياس عطرية بين طيات ملابسه..عشان يتذكرني^_^
سكرت الدولاب وشلت الملابس اللي بايدي... ورحت للمطبخ....حطيت الملابس بالغساله.... وشغلتها....ثمن رحت حطيت لحم على النار....اكيد وافي راح يرجع جوعان على الغداء.. اقله يلاقي اكله جاهز....بعد مو حلوة بحقه كل يوم وانا جايبه من بره....
ورجعت غرفة النوم.... لبست لي بنطلون بني قطيفه ناعم... ولبست بلوفر بيج...ومشطت شعري وقدرت بصعوبة اني المه ذيل حصان...
حطيت لي بلاشر خفيف وكحلت عيوني ببني بعد مارسمت حواجبي.... واخذت شنطتي ولبست عبايتي..وافي خلا باب الشقه اليوم مفتوح عشان إذا جات الريم اقدر ادخلهاا...
توكلت على الله....وخليت الباب مردود...الحمدالله العمارة امان...والكل عارف وافي... ومحد راح يدخل البيت...
نزلت عند البواب في البداية....وسألته عن مواصفات الريم.... وانكر ان فيه احد ساكن بالعماره مثلها...
البواب: اسمها ايه يا ست؟؟"
: اسمهاا....ريم...ام لجين..."
البواب وهو يهز راسه بتفكير: دنه عارف كل واحد بالعماره دي....مافيش حد بالاسم ده... لجين .... لاااء مافيش بت زغيرة بالاسم ده..."
: الله يخليك يا عم احمد... حاول تذكر...يمكنهم ساكنين جدد..."
البواب وهو يعتذر: والله يا ستي... انا بعرف كل واحد بالعماره دي....اصلا جوزك السي وافي.. دنه بعارفه من زمااااان....لما كان عيل صغير...."
طالعت بالبواب...قاعد يبربر علي..هو انا ناقصه؟؟... تركته اول ماسكت بعد ماعطيته من اللحم الي عندنا لأن وافي كان ناوي يعطيه....
بس لسه..انا متأكده اني راح الاقي الريم....يعني معقولة ماتكون ساكنة هناا؟؟..طيب معقولة تكون كذبت علي باسمهاا؟؟..استحاله مافيه ناس بالتفكير ذا؟؟...هاذي حركات بنات الثانوي مو حركات حرمه كبيرة عاقله...
فكرت للحظات وانا بالاصنصير وتذكرت ان ريم مرة قالت لي انها ساكنه فوقنا...رحت لاول طابق فوق شقتي....
ودرت على الشقق كلها ادق..بعضهم مايفتحون وبعض الحريم يفتحون ويوم اسالهم عن ريم ينكرون معرفتهم لهاا...ويقولون انه مافيه احد بالاسم هذا بالعماره كلها...
وصفتها لهم....ووصفت بناتها....قلت كل معلومة اتذكرها عنهم...بس ولا كأن الحرمه اختفت وابلعتها الارض....
رجعت لشقتي وانا محبطه...صابني احباط فضيع.....الدموع تجمعت بعيوني....وحلقي عورني... كنت تايهة ...ضايعه....شلون راح اخلي وافي يطلقني وانا مو لاقية اثبات واحد..يثبت براءتي... يثبت اني طاهرة..شريفه لا عرفت التيلفون ولا قربته....
فصخت عبايتي بضيق ورجعت المطبخ....قفلت على النار..ورجعت جلست بالصاله... ياربي... ياربي دلني على حل...حل واحد بس...كيف ممكن اخلي الريم ترجع لشقتي؟؟...كيف اخلي وافي يسمع اعترافها؟؟..يعرف انها هي اللي كانت تستخدم التيلفون؟؟..
حطيت ايديني على راسي بضيق....فيه حل وحيد...يتيم....لكنه هو اللي ممكن ينقذني..بس فيه مخاطره كبيرة....مع انــــــــ......
وقفت بضيق...انا ملكه افكر بهالشيء؟؟...اكيد اني هبلة...بسس....كذا...بكون مثل مايقول وافي فعلا...شلون اواجه نفسي..ما راح اقدر ابتسم بوجه احد...بحس اني ********************************ة....
رجعت المطبخ وطلعت طماطم من الثلاجه..وقعدت اقطعه وانا مترددة....اكيد عرفتوا وشو الحل اللي قاعده اخربط عنه؟؟...الحل ببساطه اني اكلم مساعد...ايه لا تطالعوني كذا كني مجنونة... صدقوني هذا الحل... اكلم مساعد...اطلب منه يرسل الريم لي...واقوله ان وافي راح يطلقني إذا فعلا تأكد اني ماكلمت احد...وبكذا...اتزوجك!!...
اييييي...جرحت نفسي بدون ما انتبه....سمعت صوت الباب....ورفعت راسي وانا اصبعي ينزف بسرعه... كان وافي توه راد من شغله... ما اجمله!! لابس ثوب اسود..والغترة البيضاا... والنظارات ... افففففف...زفرت لا شعوريا وانا اصد عن عيونه....
يآكلني بعيونه....احس وجهي ينحرق إذا تقابلت عيوناا....مايحق له يطالعني كذاا...انا مو زوجته.. عفوا انا زوجه بالاسم بس...مايحق له يتمقل فيني...يخلي النظر لمرومته! *_*
حسيت بيد وافي تمسك ايدي بقوة...كانت حركته تلقائية وغريبة....قعد يدقق النظر باصباعي المجروحه... ياربي انا قاعده اشتعل هالحين... ليش قريب مني لهادرجة؟؟..
: وافي..خله..." وسحبت ايدي من ايده...بس رجع مسكها بقوة...
وافي وهو يترك شنطته حقت الاب توب على جنب: حيات...ممم..ملكه...اصباعك ينزف بقوة.. وش مسوية فيه؟؟.."
وكمل وهو يبتسم بخبث: الظاهر نسيتي اصباعك مع الطماطم....امممم...عاادي ما الومك..دوم اللي عيونهم زرق نظرهم ضعيف!!..."
:هههه..ما تضحك..اساسا عيوني خضر...ولا هي زرقة...ونظري اقوى من نظرك مية مرة... معروف اني زرقاء اليمامه عند صديقاتي بالثانوي..."
وافي وهو ضاغط على الجرح بقوة: اكيد زرقاء اليمامه بالغش!!..."
: ايــــــــــه بالغش..عندك مانع؟؟؟..."
وحاولت اسحب ايدي من بين ايدينه...بس سفهني وسحبني للمغسله...حط اصباعي تحت الموية... وبعد فترة وانا متخدرة..مو من الجرح ولا من الماء الباااااااارد....متخدرة من هالاحاسيس الموطبيعية اللي قاعده استشعرها وانا جنب وافي.. كل شيء فيني ينبض بقوة...قلبي...وعروقي... وانا نفسي قاعده انتفض....قعدت اطالع بوجهه...شكثر انت جميل!!....ذكرت نفسي بعنف وش فايدة الجمال إذا النفس طالحه!!...ولااا شيء....هذا هو مساعد اخس من وافي... ايه يا ملكه كلهم مثل بعض...خلك اكثر لؤم منهم...كلمي مساعد ووعديه بالزواج وخلي وافي يطلقك واهربي بعيد عنهم....مو لازم تروحين لبيت عمك...اهربي ارض الله واسعه...معك فلوس...معك لغة.. معك ايمان قوي بالله...خلاص..وش تنتظرين؟؟...
عند هالنقطه من افكار..سحبت ايدي بعنف.... حتى ان وافي تفاجأ بهالشيء... طالعني وهو مقطب حواجبه... وهز راسه مستغرب وطنشني وراح غرفة النوم....
دورت لي لصقة جروح...وحطيتها على جرحي.... وتمنيت لو البشر اخترعوا لصقه لجروح النفس اللي كل مالها وتعمق...
ايه جاتني فكرة...ليش ما اروح لاستراليا؟؟..واتزوج سلطان....وخلص بلا وافي بلا مساعد بلا هم.. الحلوين مامنهم غير المرض...بعدين سلطان وش زينه وش حليله وفوق هذا ولد عمي..
ابتسمت بخبث...خلاص...لازم انفذ الخطوة بدون لحظة تأخير وحده...
خلصت غداي...ورحت لوافي اللي ماطلع من الغرفة... دخلت غرفة النوم... كان وافي يطالع الشنطه اللي تركتها مفتوحه على الارض...وحسيت بنظراته شيء...ما ادري وشو بالضبط؟؟.. شيء عنيف..شيء تملكي...مااا ادري..ولااا ابي ادري...
: احممم..."
التفت وافي علي: هلاااء...الغدا؟؟"
: ايــه...وش فيك تطالع شنطتي؟؟.."
طالعني ببرود: ابد....اشوفك جهزتي اغراضك..مستغرب من ثقة المدمرة بنفسك..."
قلت بدلع: واثق الخطوات يمشي ملكا...وانا ملكه...فلازم اكون واثقة..."
ايه خلك كذا يا ملكه...خليه يعرف ان الله حق..وانه راح يفقد ملكه...ملكة الدلع والجمال والانوثة... ملكه القوية اللي تدمر عشرة من اشكال وافي ومساعد..
ابتسمت له بنعومة وانا اسبقه على طاولة الاكل...
سحبت له الكرسي فطالعني مستغرب...
: شبيك لبيك ملكه بين ايديك...."
وافي وهو يحك رقبته بتوتر ويجلس: شكراا...!!"
: اممم....اليوم سويت لك غدا غييييير...بمناسبة الاتفاق اللي بيني وبينك..."
وافي بهزء: التحدي...اللي خسرانه فيه..."
طالعته بعتب وانا ابتسم بدلع: اممم اوكي التحدي....سويت لك ستيك لحم...ولا افضل شيف يضبطه..."
وحطيت له الستيك وقعدت ازينه بالصلصة وصبيت له عصير تفاح بكآسة بلورية كشخة...
وجلست قباله وحطيت لي....رجعت الخصل اللي تطايرت من ربطة شعري...ورجعتها ورا اذني بنعومة...
كنت مبسوطة حيل وانا اشوف وافي يطالعني مستغرب....راح ادمرك يا وافي...راح ادمرك.. كافي علي التعب...كافي علي..كل هالحزن...انا لأني خبله..انضحك علي...انا لأني خبله...قدرت ريم توهقني... انا لأني خبله قدرت مهاا تسحبني وراها... انا لأني خبله وهبلة وطيبه انطردت زي الكلاب من بيت عمي...وليتهم حطوني بالشارع..حطوني بمستشفى شوهني وحطمني.. انا لأني خبله خليت وافي يقلب لي حياتي من فوق لتحت....انااا..لأني خبله حبيت مساعد وما حبيت سلطان!!
لكن من هاللحظة... استقوي يا ملكه...تظاهري بالقوة...مثلي ياختي..مثل مهالعالم تمثل... مو الناس تمثل الطيب... انا راح امثل الشر...آآآآآآآآآآه يا خسارة بس الفراش الدافي اللي حطيته لوافي.. مو مشكله يله اقلها بكسب اجر فيه.. مع انه مايستاهل...
طالعني وافي وقال فجأة: اشفيك ما تاكلين؟؟.."
قلت بنعومة ودلع: افكرر...ههه....عجبك الاكل؟؟..."
وافي وهو يرجع شوي ويطالعني مستغرب: وش ناوية عليه؟؟.."
: ابد..سلامتك...مو ناوية على شيء..بس انت زوجي..ولازم اكون قد مسؤولية الزواج... المره مالها إلا بيت رجلهاا"
وافي: افهم من هذا...ان مافيه طلاق؟؟.."
ابتسمت: وافي...دوم اقول عنك ذكي!!....بس شكلي بغير رايي.... فيه طلاق...بس انت اعطيتي يومين واليومين توهم بدوا لسه ماخلصوا...اقلها عيش هاليومين مثل هالبشر المتزوجة..."
وافي وهو يسرح شوي: بعيش حياة المتزوجين الصح...بعد اسبوع..."
ضاق صدري بقوة: هههههه يا حبيلك يا وافي...لسه شاك ببراءتي...يله...الف مبروك يا عريس..."
طالعني ببرود: انا بنوم شوي..قوميني على المغرب...بنروح بيت حصه..."
لمعت عيوني بفرح...زين بنروح لحصه..راح انفذ خطتي بكل بساطه.....
هزيت راسي له وانا اوقف معه: من عيوني..الثنتين" واشرت على عيوني وانا اخذ الصحون للمطبخ...وقف وافي شوي يطالعني...وحسيته مرتبك مو قادر يفكر صح...خله...بقلعته!!
اول ماشفته وصل غرفة النوم...وانا حاطه الصحون بالمغسله ابي اغسلهم...صرخت بألم...: ايييييييييييي..." خطرت على بالي فكرة مجنونة...
وقعدت افرك عيني اليمين وانا اتظاهر بالالم...رجع لي وافي بسرعه...حتى انه ضرب بطرف دولا بالمطبخ...ياقلبييييييه يا حرام مسكين!!! لااا تضحكون صدق قلبي حن عليه!!بس شوي^_*
قلت وانا اصيح: آآآآه..عيني دخلت شي جواتهااا..."
وافي وهو يتألم من حد الطاولة وحاط ايده على بطنه: خلين....ي اشوف!!"
فتحتله عيني: آآآآآآآآآآآآآي..تعووووووور!!"
وافي وهو يمسك وجهي...اووووه...بموووت...وش اللي خلاني العب هاللعبة...حمر وجهي بقوة...ياربي ايده دااااااافيه رغم برودة الجو...
فتح عيني باصابعه: مافيه شيء..."
: آآآآآآآآآي تعورني موت.... اححح..شكلها عينك!!"
وافي وهو معصب: طيب اثبتي على الاقل يمكن غبااار..."
وترك وجهي وفتح الثلاجه وطلع منها قطرة منظفة...
قلت بدلع: ماا احبهااا..."
وافي: لااا يا شيخه.....بطلي دلع..."
ورجع مسكني مثل اول وقطر من القطرة بعيني...غمضت عيني اول مابعد وقفل القطرة....
وافي بنعومة: عيونك عجيبه!!"
: وش اللي عجيب فيهم؟؟.."
واعطيته قفاي وانا افتح الموية عشان اغسل الصحون بعين وحده مفتوحه!!
وافي وهو كأنه يكلم نفسه: لونهاا...غريب...لا هو لون الذهب الصافي..ولا هو لون العشب... ولا لون السماا...احس اني كل ماطالعتك شفت عيونك بلون!!...إذا لبستي الاخضر تلمع عيونك بقوة.. وتصير مثل حبات الفيروز...وإذا لبست الازرق... تغمق عيونك حيل...ومايبين لونهم مرة..."
وكمل وهو يقرب مني وصوته يعلى: كأنها شفافه....قطع زجاجية...فااضحه... تفضح كل شيء.. تفضح وش تحسين فيه بالضبط؟؟.."
طالعته وهو يوقف جنبي بالضبط...فاضحه؟؟...يعني معقول يعرف ايش افكر فيه!!
وافي وهو يزيح خصله متمرده جات على جبيني: لا تحاولين!!"
: وش احاول؟؟" قلتها بخفوت وانا ارجع اغط ايدي بالصابون واغسل الصحن اللي صار يلمع ويلق ومع هذا مستمره بتنظيفه...
وافي وهو يشيل الرباط عن شعري: خلك كذا....ليش ما تحبينه؟؟...ليش تلمينه...خليه متمرد.. مثلك...!!"
مارديت على وافي بس بلعت ريقي بقوة كذا مرة..
وافي من جديد وبنفس الصوت الرتيب الغريب الهادي: ملكه....عيونك تفضحك..!!!"
: وش..تفـــ....ضح؟؟.."
وافي باصرار وهو يبتسم: تفضح وش قاعده تفكرين فيه؟؟...اساسا عيونك ماعورتك!!...."
تجمدت ايديني بالمغسله...
كمل وافي وهو يلف وجهي عشان اقابله: ماعورتك...ولا دخل فيها شيء...مايحتاج انك تلجأين لهالطرق الملتوية.."
طالعته وقطبت حواجبي بضيق: وليش الجأ لطرق ملتوية؟؟.."
ورجعت لصحني اللي صار يلمع ولا افضل محلول غسيل يقدر ينظفه كثري..وقعدت افرك فيه...
وافي بضحكه جذابه: هههه...صحنك يلمع يا حلوه...ومايحتاج تلجأين للطرق الملتوية لاغرائي... لأني متزوج متزوج الثانية..."
وراح وخلاني لوحدي اطالع بصحني النظيف!!^_*
غفيت بعد الغدا شوي بالصاله ... مع ان غفوتي كانت متقطعه... وقمت وانا افكر ونمت وانا افكر...كان كل تفكيري شلون اطلب الرقم حق مساعد من عفاري؟؟..وهل راح ترضى انها راح تساعدني..هل راح تخليني اخون خالها ؟؟ ..بس انت ما تخونينه يا ملكه...اهو اضطرك تستخدمين هالطرق...لازم تنتبهين وانت تنفذين خطتك لانه لو درى وافي انك كلمتي مساعد..راح يذبحك..... ماراح يتردد للحظة وحده....
انقلبت بضيق على جنبي الثاني وانا اطالع بجوال وافي... ومفاتيحه.... شلت الجوال بتردد...دخلت الرسايل على طول... شفت رسايل كثيرة من مرومه...ياااااااااه.. يا مرام راح تشبعين بوافي من جديد... مايحتاج تلجأين لأي خطط ********************************ة....البنت هاذي تحبه...الا تموت بترابه.. ومن مايحبك يا وافي؟؟..استدركت الجملة بسرعه مين مايحبك غيري يا وافي؟؟..
رحت بكل فضول للاسماء..... قلبت بين الاسماء اللي كانت معظمها تبدا بابو فلان وابو علان... لمحت اسم..ما انتبهتله في البداية...بس...مساعد!!....هذا رقمه...!!
حسيت بارتباك... وبدا جبيني يعرق...ووقفت...بتوتر...طليت على باب غرفة النوم... وتنفست الصعداء وبسرعه بسرعه...رحت ادور قلم؟؟...لازم الاقي قلم بسرعه قبل لا يصحى وافي هذا موعد قومته...
دورت في الفازات اللي فوق التلفزيون...ورا البراويز ,في المجلس ,عند المدخل.....ياربيييييييه لازم اروح لغرفة النوم...
فتحت الباب ببطء....وتسللت بخفه.. شفت وافي..يا الله... كان كأنه طفل صغير... فيه براءه مو طبيعيه....دق قلبي بعنف...بس زجرته وانا معصبه مو وقت العواطف!!...هذي فرصتك يا ملكه للخلاص... خلك سريعه..
فتحت ادراج التسريحة ومالقيت قلم....ياربي طلعت من الغرفة ورحت للمكتب الباب مقفل... زفرت بضيق ورجعت لغرفة النوم...
اللهم اهدني ضالتي" ركزي يا ملكه وفتحي عيونك زين اكيد فيه قلم هنا ولا هناك.. وفعلا تنبهت للقلم تحت السرير...تحركت ببطء....فسمعت صوت فجعني...
: ملكه!!....وش تسوين؟؟؟
طالعت بوافي وانا فاتحه فمي مفجوعه... كان صاحي...مفتح عيونه النعسانه خلقه...وشكله مبسوط ...انتبهت للجوال اللي بايدي فخبيته ورى ظهري....وخلاااص كنت عارفه انه مماتي بهاللحظة.. يارب الطف فيني!!...اللهم لا اطلبك رد القضاء بل اطلبك اللطف فيه!!"...يعني قولوا لي وش اقول لوافي لو مسكني وانا معي الجوال وفاتحه القائمه على رقم مساعد...... وانا قاعده افكر بخوف واحاول ارتب جملة كامله مفيده....ابتسم لي وافي بنعومة....ورجع غمض عيونه: خليني انوم زياده ربع ساعه حبيبتي..بكمل الحلم!!"
طالعت وافي مو مصدقة وهو مغمض عيونه....كان نايم في امان الله...
: آآآآآآآآآآآه.." قلتها مرتاحه وانا اطلع من الغرفة...واشكر الله على نجاتي من موت اكيد...طبعا انا مو هبله...علشان كذا قررت اكتب الرقم على ذراعي.... افضل من الاوراق...بعدين ماراح احتاج الرقم إلا اليوم وبس...!!
كتبت الرقم بسرعه...ورحت رجعت الجوال...ورتبت شكلي زين....عند مراية المدخل... ورجعت المطبخ مو مصدقة ان فرجي قرب...
قررت اسوي كيكة علشان مهاا وحصه.... فطلعت الاغراض من الثلاجه وسويتها على السريع وحطيتها بالفرن ورحت لوافي.....
طالعني وافي وهو لابس روب الحمام بس:بسرررعه...ترا ماراح انتظرك!!"
قلت وانا اقلب الكيكة بالصحن واصب عليها الصوص: طيب..تراني شبه جاهزة...."
وافي بضيق: يلاا ملكه...ورحي البس ملابسك..."
: من عيوني....."
وافي بلا مبالاة: تسلملي عيونك...خليهم لك..."
:هههه...باااااااااايخه...لا تعيدهااا..."
وافي وهو يحك شعره ويصرخ: ملكه...يلااااااااااااااااا..."
: يااخي روح البس اول....اففف..ياشينك لا جيت تطلع مكان..."
وافي بضيق: وش هوله كل هالحفله؟؟...ترانا رايحين بيت حصه..."
: عااارفة...بس عيب ندخل على اختك كذا...موب حلوة بحقي وبحقك..."
وافي بضيق وهو يضرب الارض مثل الطفل: كان قلتيلي بالطريق نشتري جاهز..."
: طيب...من عيوني....المره الجايه..."
وافي وهو فاض فيه الكيل: بسررررعه تعالي طلعيلي ثوب...."
هزيت راسي له وقصدرت صحن الكيك والفطاير وغسلت يديني وسحبت الثوب الاسود من النشافه .... رحت وراه غرفة النوم....وحطيت الثوب على طاولة الكوي...
وافي وهو يطالعني مفجوع: لسه ماكويتيه..."
: حبيبي..خلاااااااص.." وما انتبهت لكلمة حبيبي اللي طلعت لا شعوريا....
وافي تنح شوي بس بعدها: طيب...اكويه بسرعه..بحلق وإذا خلصت ومالقيتك جاهزة بروح وبخليك ....ترى حصه عندها عزيمة...يعني مو فاضي ادخل متأخر على الرجال..."
طنشت كلامه وكويت ثوبه بسرعه..وانا افكر وش البس..اهاا...خلصت كوي وعلقت الثوب وانا اسمع صوت ماكينة الحلاقة....
تذكرت شيء..فدخلت راسي الحمام: وااااااافي؟؟.."
وافي: ايييي....وشوووووو؟؟...لا تدخلين زي كذا مرة ثانية!!"
طالعته يوووه ياقلبي عليه جرح نفسه...مسكيييييين...مو مشكله...فيه دم!!..كان ودي اروح امسحه..بس انثبرت مكاني!!
قلت بدلع ومصاخه وانا اتذكر مرام: لا تشيل شواربك...خلها مثل ماهي تجنن وهي خفيفة.."
وافي وهو فاتح فمه: طيب عمتي ملكه..."
بدلع: امممممم...خلك كذا..."
وافي يتريق: آآآآآآآآآه منكم يالحريم...تبيني مثل انا..علشان ماحد يطالع بخشتي...لاااا يا آنسه انا عريس...لازم اصير كشييييييخ بيوم العرس..."
قلت ببراءه وانا ضايقه: والله مو كذا....على العموم...ترى ثوبك جاهز.."
ورجعت الغرفة وقعدت اطالع بملابسي... رجع وافي بعد عشر دقايق وانا لسه واقفه بمكاني...
قلت بدلع: وافيييييييييييي..."
وافي وهو مولع: نعم؟؟..."
رفعت له فستانين عريانه: اي واحد احلى؟؟.."
وافي وهو يعض شفايفه مقهور: كلهم روووعه...." وقلد صوتي: كل شيء حلو عليك.."
: لا تتريق!!...اممم..الشرهة علي اللي اتصرف مثل المره العاقل اللي ماتخالف شور رجلها بملابسهاا..."
وصديت عنه وسويت نفسي زعلانه...وكلها ثواني...وجاا وافي...
- ملكه؟؟.." قالها بهدوء...
- هلاااء..." رديت عليه وانا ماده بوزي...
- ملكه حبيبتي...مو قصدي والله..اتريق فيك..."
-زعلاااانه..."
-ملكه الله يخليك لا تسوين فيني كذاا...البسي ملابسك...والله كل شيء زين عليك..."
- لاااء...موب رايحه..."
- يابنت الناس والله تطردني حصه ومهاا ويخلوني ارجع اجيبك....يله يا حلوو"
-خلاااص مو رايحه...."
وصديت عنه وجلست على السرير وانا امسح دمعه وهمية...
وافي وهو يزفر: اللهم طولك يا رووووح..."
وجلس جنبي: ترضين تضيقين صدري؟؟.."
سكت لثواني وبعدها التفت عليه وانا مبتسمة: اي واحد احلى؟؟.."
وافي وهو يفكر وطول وهو يفكر وشكيت انه يفكر بشيء ثاني وماصار فستان ذا!!
: وافييييييييييي" صرخت فيه برفق..
وافي وهو يفكر: الفستان الاحمر حلو مرة...بس الاخضر عليك شيء ثاني..."
ورجع يطالعني بعجز: مو عارف ايهم حلوو..."
: اختاااار" قلتها بدلع واصرار..
وافي وهو يآخذ نفس ويوقف: الاخضر...لالالا..الاحمر...يا شيخه الاخضر.."
خذيت الفستان الاخضر اللي بدون اكمام وفتحتة مربعه شوي كبيرة ويوصل لنص الساق وكان ناعم مرة وقماشه حرير روعه..وقررت البس فوقه بلوزه صوف مشققه ناعمه مرة بالوان مختلفه....تتناسب معه واهم شيء ان الرقم اللي كاتبته بايدي مايبان..
دخلت الحمام..وارتجفت وانا احس بملمس الحرير على جسمي..كان باااااارد...سكرت الفستان بالموت...وطلعت من الغرفة..وانصدمت لمن لقيت وافي واقف...توقعته راح للصاله يشوف الاخبار...
كان قاعد يزر ثوبه... والتفت علي ورجع صد عني..ثمن رجع طالعني وكأنه يشوفني اول مرة..
طرت على بالي فكرة..فدرت قدامه بدلع: حلووو؟؟.."
ووقفت قريب منه على التسريحه وقعدت امكيج وجهي على السريع عشان مايعصب اكثر...
ووافي وهو ينطقها بصعوبة:اي...شيء عليك...بيطلع حلووو....بسس.."
ابتسمت له بالمراية مع ان خدودي حمرت بقوة بس قدرت اتماسك:وشوو؟؟.."
وافي وهو يمشط شعره: كأنه قصير شوي.."
: وافيييييييي!!....طويل والله..ماشفت البنات وش يلبسون؟؟.."
وافي بضيق: مايهمني...وش يلبسون انت مرتي...ملكه والله قصير..."
: موب قصير يا ابن الناس... انت ماشفت لبسي قبل...بالعكس هذا طويل..."
حسيته مو مقتنع وشفته بيفتح فمه بيقول شيء ...فقلت وانا ارمي الفرشاه حقت احمر الخودي: اففف ملل...حتى اللبس ما اقدر البس زي النااس..."
وسويت نفسي معصبة وكنت بروح الحمام...بس مسكني وافي.. ولفني عليه: خلاص..خلصي مكياجك بسرعه...."
ابتسمت له ممنونة..وراقبته وهو يطلع وقعدت انطق بفرح...آآآآآآآآآآه ذوووق يا وافي شوي.... واعرف وش انت بتخسر؟؟...
لبست عبايتي وبرقعي وطلعت بسرعه من الغرفة بلحق بوافي بس اول ماشافني وانا مدرعمه قباله..حسيته مو راضي عن لبسي بس اضطر انه يسكت...ويوم ركبنا السياره ذكرني بنبرة عدم رضى: ترى ساقك طالعه...حاول تمسين عباتك وانت داخله البيت...كله رجال..."
هزيت راسي له وانا قاعده ارتب شنطتي الصغيرة وارتب الاشياء اللي عند رجلي الاكياس وعلب الحلااا
بيت حصه كان بالرحمانيه...وعرفت من وافي ان حصه ساكنه عند رجل بنتهاا...لأنها رفضت تزوج بعد ماتطلقت من زوجها ابو البنات...
: وافي...ليش ما نجيبها عندنا؟؟.."
وافي وهو يطالعني ويرجع يطالع الطريق: ان شاء الله إذا اشتريت البيت..بشتريه قبل لا تزوج..."
وكمل وهو يسحب الغطا على عيوني: غطي عيونك...فيه رجال..."
زفرت بضيق: يا ابن الناس انا بالسياره هالحين...وش جاب سيرة الرجال؟؟.."
وافي: عارف بتسوين نفسك ناسية..او بتنسين صدق..."
ضاق صدري اسوي نفسي؟؟...اففف...يله كلها يوم واتطلق وارتااااااااااااح...
وصلنا بيت حصه بعد ربع ساعه تقريبا....ودخلنا السيارة جوا بالحوش... دخلت انا مع الباب الرئيسي...بينما شفت وافي يروح لديوانية الرجال...اللي كانت اصواتهم عاليه وريحة دخانهم تصرع...
دخلت البيت....واول مادخلت شفت عيال صيته..اللي سلموا علي اول ماشافوني واعلنوا عن وصولي: خاله ملكه....خاله ملكه وصلت..."
شلت البرقع..ورتبت شعري وانا اطالع بمرايا المدخل....الفخمة... وانتبهت لصورة لعبير وزوجهاا...
عبير هي بنت حصه الكبيرة اللي جات لشقتي ذاك اليوم..بنت مرة عاقله مالي اي علاقة فيهاا بس اني احبهاا من محبتي لمهاا وحصه...
: يا مشاااااااااااااااء الله...فستاااااااااان روعه..."
التفت على مهاا اللي كانت لابسه ترينق ولامه شعرها...
سلمت عليها وسحبتني للغرفة بعد ماخلت الخدمات يشيلون اغراضي....
تعطرت او بالاصح غرقت نفسي بالعطر.... وساعدت مهاا بمكياجهاا ولبسهاا... ونزلت تحت لخوات وافي وبعض جارات حصه....وسلمت عليهم كلهم وجلست جنب صيته اللي كانت طايره من الفرحه لشوفتي...
صيته: مشاء الله قمرر....فستانك روعه..."
: يفداك يا قلبي..."
صيته باقتناع: قوليلي....كيفك مع وافي؟؟.."
: الحمدالله زينه...بس لسه مصر يتزوج علي"
صيته وهي خايفه: ياربييييييه...لااا ان شاء الله يطلع كلام بس!!"
: ما اتوقع يا صيته....بعدين دامه قال لحصه فهو متزوج متزوج..."
صيته: ترى حصه ماعلمت احد....عشان مهاا راح تقلب الدنيا لو عرفت...."
: الله يستر..."
صيته: ماعليك يا ملكه..انت قمر...وبتقدرين دايم تروضين وافي....بس اصبري....لا تسيرين مثلي... هذاني تحديت..واكلني تراب بالاخير..."
: ان شاء الله يطلقهاا..."
وقمت من عند صيته ورحت المطبخ...واخذت الكيكه وقعدت ازينه بالمكسرات وانتبهت للرقم بايدي فتذكرت جوال مهاا!!
رجعت طلعت بسرعه فوق...ودخلت على مهاا بغرفتها....
مهاا: هلاااء..وش فيك رجعتي؟؟"
: ليش ماتنزلين تحت؟؟؟؟"
مهاا: لحظة بس خليني ارتب هالكشه..."
: مهاا ترى شعرك مايحتاج شيء... مرتب من الله..."
سفهتني فقلت وانا اجلس على سريرها:" مهاا..بطلبك طلب؟؟"
مهاا بدفاشه: واسطه عند خالي..لااااء...فلوس من خالي...لاااء..."
: ياعلك اللي..هونت مانيب طالبه"
مهاا بفضول وهي تترك المنشفة وتجلس على السرير: وشو؟؟...وش تبين؟؟"
: مانيب قايله هونت.."
مهاا بترجي: يله عاااد..خاله ملكه..."
: اممممممممم...مانيب قايله..."
مها بضيق: يله عاااااااااااااااااااااادي"
: طيب...جوالك...ابي اكلم عفاري ضروري...."
مهاا: ليش؟؟.."
ياربي ذي وش اقولها عشان تروح...
: امم...جايبتلها عريس...بس مابي احد يعرف عشان مايضغطون عليهاا..."
مهاا وهي تضربني: اه يالخاينه...تجيبين لبنت عمك عريس وانا مرتزة عندك مافكرتي تزوجيني.."
: اييييييييي....مايصلحلك..... يا مهااا...نااااااعم وانت دفشه..."
مهاا وهي تعطيني الجوال: دامه ناعم خل عفاري تشبع به....تراني بنزل تحت"
ارتحت يوم شفت مها تطلع...ومسكت الجوال ودقات قلبي تتطاير بسرعه....ياربي هو انا اللي اسويه صح؟؟؟... بلعت ريقي بخوف...وبديت ادق ارقام الجوال بتوتر...واغلط فيهم واعيد الدقات....
خلاااص...قسم بالله احس موتي قرب....حتى اني مو قادره اوقف على رجولي... اخيرا دقيت.. بدا الجوال يرن...كنت ادعي ربي يطلع الجوال حقه مغلق...او مفصول...اووو يرد احد ثاني غيره...
جاني صوت مساعد اخيرا...وكأنه ف مجلس رجال..وارتجفت بقوة وانا اسمع صوته..
: الوووو..."
: الوووو...مين معي؟؟...ترى بقفل..."
حركت شفايفي ببطء ابي ارد عليه بس وقف قلبي يوم شفت الباب ينفتح ووافي واقف عنده...
من يشتري قلب همومه ملايين؟؟؟
ويبيعني قلب من الهم خالــــــــي؟؟؟
الفصل الخامس والعشرين
انا متأكده ان اللحظة اللي تقابلت عيوني فيهم بعيون وافي وقفت دقات قلبي.... لدرجة ان ايدي لا شعوريا تركت الجوال فطاح على الارض وانكسر...
صرخت لمن شفت جوال مها منكسر ولا اراديا اذا نقدر نقول!! قلبت الوضع على وافي وصرخت فيه: لاااا تدخل بهالطرريقة مرة ثانية!! فجعتني ..!!"
وافي اللي انتبه للجوال اللي طاح: ليش خفتي؟؟ من كنت تكلمين؟؟.."
رديت عليه بتوتر: خفت؟؟...وافي...لا تكلمني بهالطريقة...انااا...قلتلك فجعتني لأني ضنيتك مشاري...!! وبعدين كنت ادق على عفرااا..."
كنت اتنافض وانا اكلمه بس مع هذا صوتي كان نوعا ما متماسك... دقات قلبي سرعتهم جنونية وكانهم في سباق الموت!!.... حلقي جف بشكل كبير...وحسيت ان لساني لصق بحلقي يوم قرب وافي مني...
وافي بشك: عفااري؟؟...هذا مو جوال مهاا؟؟؟"
: ايـــه...ماا..ما كنت ابيــ....ــك تعرف الموضوع..."
وافي ببرود: موضوع؟؟..وش موضوعه؟؟...."
: موضوع اللي كنت....بكلم عفاري علشانه...."
ما اهتم باللي قاعده اخربط فيه..حسيت ذهنه مشغول بحاجه فضيعه...
سوى حركة خلتني اغمض عيوني بقوة..حط ايده على عرق ينبض بجبيني: ليش متوترة؟؟؟"
حسيت بحرارة اصبعه وكأنها بتخترق دماغي وتعرف انا وش كنت ناوية اسوي؟؟..
قلت بصوت خافت وانا اناظر بعيد: وش كنت تبي من مهاا؟؟.."
وافي وهو يطالع الجوال اللي على الارض: كنت ابي اكلمها بموضوع...." وكمل فجأة: تعرفين ان مساعد الكلب ال******************************** هنااا...."
طلع وافي علبة سجايره وسحب منهم وحده....وحطها بفمه وولعها واخذ نفس بطيء منها وقال وهو معصب: ابي اعررف له عين يجي بعد...صدق انه سافل...عارف اني ما اقدر اسوي له شيء عند الرجال..."
حسيت بنفسي اتهاوى....بس مسكت بطرف السرير وجلست عليه..مساعد هناا!!...ياااويلي وش كنت ناوية اسوي انا؟؟..صدق اني غبيييييييه...ياربي الطف فيني....
وافي وهو يطالعني: لسه تبينه؟؟" كان تقرير اكثر منه سؤال...
ماعرف شلون لقيت القوة عشان اجاوبه...بعد ماحسمت الحقيقة المره...وهي اني ماعدت احب مساعد لكني بعد ما احب وافي لذا...
: ايـــ...ــه..." هذا صوتي؟؟...لالالالا..هذا صوت وحده ثانية صوت ناعم جبان ينتفض بقوة...
غريبة ماذبحني...ماخنقني..ماضربني!!....رفعت عيوني لوافي...كانت سيجارته على الارض... وكان يطالع مكان رجوله....لاحظت انه قابض ايدينه بقوة.... وحسيت انه ينتفض...ايه ينتفض... مااعرف ليش خفت عليه في ذيك اللحظة؟؟!!وخفت منه بعد!!
: وافي؟؟؟"
سمعت منه سبة قوية....وبعدها رد ببرود وهو يرفع عيونه: خير؟؟!!!"
وكمل بصوت غريب: خايفه عليه صح!!...ماقدرت توقفين على رجولك من كثر شوقك له.. مساعد ....حبيب القلب...."
وبعدها ضرب يدينه ببعض وقام يضحك بسخرية: ههههههههههه....صدق مهزله..."
طالعت فيه بخوف ماعندي رد..... اخاف منه!!...رغم انه هو هلي....إلا اني اخاف منه!!... آآآآآه...
: آآآآآآآآآآآآآآآآآآآه..." استغربت لمن سمعت صوتي طلع مني بدون ما انتبه..
حسيت بوافي عند هالنقطة انهار....ارتكى على الجدار اللي وراه باهمال....كانت عيونه زايغه.. وحسيت انه قاعد يختنق...
وافي ببرود فضيع:آآهة طالعة من قلبك!!...هه...ياااااه...وش كثر مشاعرك قوية ناحيته؟؟.. مشاعرك اللي مفروض تكون لي اناا...اللي مفروض تكون لرجلك.."
: وافي....عمرك ماراح تقدر تحكم قلبيه...لأنه مخلوق متمرد لا يمكن في يوم تقدر تحبسه بقفص.. حتى لو كان هالقفص هو الزواج.."
كملت وانا انتفض لا شعوريا ويرتفع صوتي تدريجيا: مشاعري...مشاعري يا وافي..تقدر تملكها بغير هالطريقة...بغير هالجبروت بغير هالتحكم...مشاعري مثل الريح القوية عمره ماراح توقف قدام شيء...ولا احد يقدر يغير مسارها حتى لو بالقوة!!"
رفعت عيوني وتلاقت بعيونه: طلقني..!!..طلقني يا وافي...لا انا لك ولا انت لي..."
سكتنا فترة موب قصيرة عيونا قاعده تبحر في بعض.... عيونه تدور علي..على وجهي...وعيوني تتهرب من عيونه....يمكن ماعاد اشوف هالوجه ابد!!...فماله داعي اعور قلبي بمشاعر وليدة للحظات صغيرة بيني وبين وافي...
تحرك وافي من مكانه وجا يطلع من الغرفة...وبنفس هاللحظة جات مهاا فضربت بصدره...
مهاا:...الله...خالي هنا..." وباسته بحب كبير...
وافي وكأنه ماشاف مهاا طالعني وبكل قسوة قال: ولااا حتى بأحلامك.."
طالعتني مهاا باستغراب بعد مابعدها وافي عن طريقه بقوة وطلع...
مهاا وهي تقرب مني: وش السالفه؟؟..وش فيه معصب؟؟..وش اللي ولااا حتى باحلامك؟؟؟"
وانتبهت للجوال المكسور: لاااااااااء....جوالي الجديد..ليييييييه يا ملكه؟؟.."
وجلست على الارض تحاول تركب الجوال وتركب الشريحة من جديد...كنت اطالعها وانا حاسه اني مخنوقة...ليه يا وافي؟؟..لييييييييييييييييييييييييييه؟؟...مو من حقك تملكني...
ياربي قمت من مكاني وانا حاسه اني بدوخ...وحاسه بحرارة فضيعه..طلعت من الغرفة ولا اهتميت بصوت مهاا اللي ناداني...
طلعت من غرفة مهاا ورحت للدور السفلي ورجعت للحريم....ولقيت ان جدة وافي كانت موجوده ...وابتسام بعد..وحتى مرام اللي من شفتها حسيت ببرودة فضيعه... رحت سلمت على جدتنااا وبعدها على ابتسام اللي طلبت مني اجلس جنبهاا...
ابتسام: مشاء الله فستانك رووووعه....من وين شاريته؟؟.."
: هااا؟؟...وشو؟؟"
ابتسام وهي تطالعني مستغربة: سألتك عن فستانك؟؟..لا تقولين لي انك ماتحبين تقولين من وين شريتيه عشان محد يقلدك؟؟"
: ايه..صح..."
قطبت ابتسام حواجبها مستغربة من ردي: ملكه؟؟؟..انت بخير؟؟"
رفعت عيوني لهاا: وشو؟؟.."
مسكت ايدي وسحبتني وطلعنا بره الصاله ووقفنا بسيب: وشو؟؟..قوليلي وش فيك؟؟" هذي كانت ابتسام وهي تهزني عشان تصحيني...
: تعبااانه يا ابتسام...انا احس بتوتر...مدري وش فيني؟؟.."
ابتسام وهي تبتسم مبسوطة: تحسين بغثيان؟؟.."
: ايه...احس بغثيان...واحس اني كارهة هالدنيا..وودي اهرب..."
ابتسام وهي تضمني بفرح: مبروووك انت حامل!!"
بعدتها عني بعصبية: ابتسااااام!!"
ابتسام وهي مبسوطة: وناااااااسه..وانا بعد حامل...ماكنت راح اعلم احد...بس دامك حامل عادي اقولك...ماراح تحسديني.."
حسيت بمشاعر قهرر من تفكير ابتسام الغبي....: مانيب حامل..وارجوك لا تقولين لأحد..."
ابتسام وهي مستغربة: عيوني ملكه...ترى انا كنت متأكده اني موب حامل..بس لمن رحت المستشفى اكتشفت هالشيء..."
: بس انا متأكده.."
هزت ابتسام اكتوفها باحباط: طيب...وش فيك؟؟.."
: ابدا...كارهة هالدنيا..وحاسه شكثر هي صغيره...ياربي متى امووووووت؟؟..."
ابتسام بزعل:اكيد وافي مزعلك....ملكه ماحب اسمع هالكلام..وش هالافكار؟؟؟..تعوذي من ابليس.. والانسان مفروض مايستعجل الموت... وحتى لو وافي زعلان منك..بكره راح تتصالحون من جديد...لأنه يحبك!!"
طالعتها لثواني وهزيت راسي لها وانا مو مقتنعه باللي قالته......
رجعت الصالة وجلست جنب الجدة اللي كانت مبسوطة حيل بشوفتي وقعدت تسولف علي براحه .... وحاولت اني اقنعها عشان تجي تعيش معناا....بس كانت رافضه للفكرة نهائيا... لاحظت مرام بطرف عيني وهي تطالعني وتآكلني بعيونها...كانت صابغه شعرها احمر!!...وحسيت ان فيهاا شيء متغير مرة!! بس وشو ما ادري؟؟...وحسيت انها تشبه...!!...عرفتم تشبه مين؟؟.. تشبهني...
كنت راح اضحك على النتيجه اللي وصلت لها....بس كتمت ضحكتي وانا اشوف جوالها يدق وتقوم من الصاله..ما اعرف ليه حسيت ان هالشخص اللي دق هو وافي؟؟؟...يمكن نظرتها لي... اسلوبهاا السخيف لمن قامت وهي تتدلع....مين قال الدلع زين؟؟؟...إلا يجيب المرض!!..صدق ان الرجال ماعندهم سالفه!!
الجده وهي مغتاظه: نعنبو ذا الوجه...ذي ماتستحي...ماتعرف الحيااا....شوفي وين رايحه؟؟...لم الرجال...آآآآآه..بس والله اللي ماعرفوا يربونهاا..."
-الله يهداك يا جده وراك مغتاظه؟؟...ماعليك منهاا...الشره على اهلها"
الجده وهي تكلم بصوت واطي: اناا خايفه تآخذ منك رجلك يا بنيتي...ترى الرجال ضعيفين قدام المره..."
- ولا عليك يا جدتي...انا ملكه مو اي وحده ثانية..." وكملت وانا امزح: بعدين لا يغرك ولد بنتك ترى ماملى عينه غير ملكه..."
الجده وهي تضحك: اقووول...تذكريني ببنت خالتي عمشة ...بس يوم اعرس عليها زوجهاا... حرمت تغتر بنفسهاا..."
-حراااااااام عليك ياجده..انا مغرورة...على العموم بروح الحق رجلي اخاف اجي القاه معرس عليهااا..."
ضحكت ابتسام وجدتي على الموقف ورحت انا للمدخل بشوف صدق وافي مع مرام ولااا لاااء؟؟... وش تتوقعون؟؟؟..طبعا لقيتها واقفه...وشعرها يتطاير بنعومة حول وجهها ونظراتها اللي رافعتها لوافي ناااااااعسه ولا احسن فيلم رومانسي....حسيت بغيض فضيع...وافي كان يطالعها وحسيت انه متفاجأ واتمنى اعرف وش تقوله عشان يصير متفاجأ بالطريقة هاذي؟؟؟
ماقدرت امسك اعصابي فقعدت اصفق برواقه: مبروووووووك...افضل مشهد رومانسي للسنة هاذي؟؟"
لف علي وافي وكأنه ما توقع شوفتي: ملكه؟؟...وش هالكلااام اللي قاعده تقولينه؟؟"
-لااا ابداا...بس قاعده اصفق لكم...مشاء الله ابدعتوا بمشاعركم..."
تقدم وافي مني ومسكني بقوة مع ذراعي....: ايييييييييييييي...وافي عورتني.."
وكملت وانا اشوف مرومه ترتجف غيض: ماله داعي تظهر مشاعرك قدام الاعدااء..."
مرومه بعصبية: ما اعداء إلا انت..."وبحركة مفاجئة استغربتها بقوة رمت الكاسه اللي بأيدها بوجهي...ضمني وافي بسرعه ونزل راسه...فجات الكاسه قريبه من كتفه مرة وضربت بالجدار وطبعا حاست ثوبه...ما ادري كم مر من الوقت؟؟...بس انا كنت متسمرة هنااك...مصدومة...وافي دافع عني!!...عني اناا؟؟؟.. ماخلى مرام تطقني؟؟؟...معناته...معناااته يهتم فيني!!....وافي يهتم فيني..!! كنت ارتجف عدم الاستيعاب...وضليت ماسكة بصدره فترة...وسمعنا صوت كعب مرام وهي تروح بس ماتحركنا من اماكنا....
سمعت صوت صيته فبعدت عن وافي بسرعه بس مافاتت صيته الحركة: السلاا...."
وسكتت تطالعنا..انا كان وجهي الوان واعتقد ان وافي ماكان احسن مني...وكنت ارتجف...
صيته بنعومة: آآآآسفه..نسيت ان فيه عصافير حب في البيت هذاا..."
ولع وجهي بسبب كلام صيته..وحاولت اتحرك...بس سمعت وافي يتكلم مع صيته فوقفت بينهم..
وافي: صيته...قولي لعبير تطلعلي ثوب من اثياب رجلهاا..."
صيته وتوها تنتبه للكاس: وش ذاا؟؟..مين اللي كسرها؟؟...صراااحه..انتم حب.."
قاطعتها وانا حاسه ان لساني مو راضي يتحرك: صيته!!..."
ضحكت صيته وهي تلف" طيب..انتظروني هناا..." وكملت عشان تغيضنا قبل لا ترجع المطبخ: ياعصافير الحب!!..."
كنت اطالع بجزمتي وانتم بكرامه ولا تحركت من مكاني...ووافي كان واقف بمكانه بعد...
وافي بعد مدة شوي طويله: ترى مرام ماقصدها...بس اهي ماتمسك اعصابهاا.."
رفعت راسي له ورغم اني كنت خجلانه من لحظات لكني رديت عليه بحرارة: اصلااا هي قليلة ادب...للاسف مااعرف ليش انت معيطهاا وجه؟؟.."
وافي وهو معصب: البنت مريضة..."
: مرررريضة؟؟!!!...وش هالمرض اللي لازم تراعونها كلكم بهالطريقة؟؟...وافي...مرام مافيها إلا العاافية....ماله داعي تقعد تلزق فيك بهالطريقة المهينة!!..." وحسيت اني راح انفعل اكثر لو ماسكرت الموضوع..
وافي بلهجة تسلية: كأني اشم ريحة غيرة!!.."
طالعت فيه وانا اضيق عيوني: غيرة!!...هه؟؟..تمزح انت؟؟..اكيد طبعاا..لا غيرة ولا غيره هذي شغلة احترام لقدسية الزواج...وشغلة كرامه"
وافي بنعومة: اهااا...؟؟..صدقتك.."
: صدقتني؟؟...ليش كنت متوقع اني اكذب؟؟.."
وافي وهو يشوف عبير جايه من بعيد ويقرب مني: لاااء يا زوجتي العزيزة...انت اكبر من انك تكذبين على رجلك..."
تمنيت لو اشوه وجهه بس آآآآآآآآآآه ماكل مايتمنى المرء يدركه!!...
جات عبير واخذتنا لغرفة نومها الفخمة...وطلبت منا نآخذ راحتنا...وكانت بتعطيني من ملابسها.. بس انا عييت ودخلت حمام غرفتها بينما وافي دخل غرفة الملابس عشان يلبس ثوب نظيف...
في الحمام مسحت بقايا العصير اللي جات على لبسي...ولقيت كحل وماسكرا على المغسلة... فزينت وجهي من جديد وطلعت لوافي ولقيته واقف عند التسريحه..يمشط شعره برواقه...تلاقت عيونا في المراية..ولأول مرة اشوف وافي يبتسم لي بصدق..
وافي: خلصتي؟؟..."
: ايـــه.....وانت؟؟.."
وافي وهو يعدل شماغه: خلاااص..."
: وافي؟؟..وش اقول لصيته بالنسبة للموقف....اللي...تعرف؟؟!!"
وافي وهو يبتسم بنعومة: قوليلها اللي تقولينه....ماراح تفرق مع صيته لأنها كونت موقف وانتهى..."
: طــ....ـيب.."
طلعت مع وافي من غرفة النوم وهو نزل الدرج عشان يروح للرجال اما انا كنت ابي اروح لمهاا بس قررت اتناقر مع صيته اول قبل ماتفضحني بين خواتهاا....
بعد نصف ساعه تقريبا..
لقيت غرفة مهاا مقفلة فطقيت الباب كذا مرة...لدرجة شكيت اذا كان في احد بالغرفة...بس لمن انفتح الباب...كان فيه وافي ومهاا قاعده تبكي...استغربت..وقبضني قلبي...وش فيهاا مها تصيح؟؟ .. لا يكون وافي قالها شيء عني...
: مهاا عيوني وش فيك؟؟.." وجيت جلست على السرير ومسكتها من كتوفي....وانصدمت من رد فعلهاا.... دفتني بقوة...وكانت عيونها حمر من الدموع...
وافي بعصبية: مهااا..ما اسمحلك تمدين يدك على مرتي....هذي جزاتها انها خافت عليك..."
مهاا وهي تصيح اكثر وتطالعني وانا اوقف: اطلعوا برررررره....انت ومرتك....ما ابي اشوفكم ..."
وافي وهو يطالعني وبعصبية وبصوت واطي: وش سالفتها هالبنت؟؟؟...صار بينك وبينها شيء؟؟"
: لااااء....نهائيا.." وطالعت بمهاا وانا مستغربة من صياحها وهي دافنة نفسها بين مخداتها وتنتفض ...
وافي وهو يسحب ايدي: على العموم يا آنسة مهاا إذا راقت اعصابك..انتظر منك اعتذار..."
وطلعنا من غرفتها وسكرنا الباب...
وافي وهو يلفني اواجهه وبعصبية خوفتني: بذمتك...صار بينكم شيء؟؟.."
: لااااء...طلعت انا على طول بعد ماتركتني...."قلتها بدفاع...
وافي وهو يآخذ نفسا ويتكلم ببرود: دقت علي وقالت انها تبيني بحكي مهم.... كلها خمس دقايق... جيت لقيتها منهارة وعيت تقولي وش هو الطلب اللي اهي تبيه....ولا قالت ولا كلمه لي..."
: طيب..مفروض ما نخليها لوحدهاا..."
وافي وهو يبعد عني عشان ينزل الدرج: الافضل انك تخلينها بحالهاا اعرف مهاا اذا كانت زعلانه ..."
طالعته وهو ينزل الدرج..ورجعت طالعت بباب غرفة مهاا...ابي ادخل اكلمهاااا...الصراحه انا مستغربة من ردة فعلهاا...لا يكون زعلت لأني طلعت من غير ما اكلمهاا...بس مهاا مو سخيفه لهالدرجة...ياربي....ترددت للحظات بس قررت اني ادخل على مهاا بالاخير واللي يصير يصير ...
فتحت باب غرفة مهاا..مالقيتها على السرير...سكرت بباب الغرفة وناديت باسمهاا باعلى صوت..
بعد لحظات انفتح باب الحمام...وطلعت منه مهاا...كانت عيونها حمر متنفخه...وماسكه كرتون مناديل بايدها...ودموعها قاعده تسيل بسرعه..
: مهاا ياقلبي....وش فيك؟؟"
ورحت لها كنت ناوية اضمها...بس بعدتني عنها بقوة...
مها بعصبية وباحتقار: لا تقربين مني...ياعقربة...."
لدغتني كلمة عقربة....انا عقربة؟؟؟!!...طيب ليش يا مهاا..وش صار؟؟؟..
: مهاا وش هالكلام؟؟"
مهاا وهي تمسك الجوال وترميه بقوة على الجدار: انت اللي قوليلي وش هالكلام؟؟...ليييييييه يا ملكه؟؟...وش ناقصه؟؟...قووولي..."
طالعت بالجوال اللي تكسر على الجدار....وحسيت اني شوي تايهة...
: وش تقصدين؟؟..."
مهاا وهي تتهاوى على سريرها: ابداا..ما اقصد شيء...غير ان كل الحكي اللي بيني وبينك انتهى يا ملكه..."
: مهاا....فهميني وش السالفه؟؟..ليش تصارخين علي.؟؟ ابي اعرف وش الذنب اللي انا ارتكبته؟؟ ..."
سكتت مها لحظات ومسحت دموعها بكفهاا وهي تحاول تآخذ نفس عميق: ملكه..انت خاينه..."
حسيت وش كثر هالكلمة قوية؟؟...وطالعت بالجوال اللي متكسر على الجدار...لقت الرقم!!... اكيد اتصلت عليه!!
مهاا وهي تشاهق: ليه يا ملكه؟؟..وافي يحبك..يحب كل شيء فيك....ليش؟؟...حرااااااااام عليك تخونينه...اهو اللي مستعد يعطيك الدنيا كلهاا...خنتيه بدون اي تفكير...." وحطت ايدها على فمها واخذت تضغط عليه بقوة عشان مايطلع صوت صياحها عالي...
قربت منها بتردد: مهاا...انت فاهمه غلط!!"
ماكنت ابي اخسر مهاا...لكن مهاا وقفت وقامت تضربني بقوة بايديها..كانت تضربني بقسوة... وانا ماكانت عندي اي قوة عشان ادافع عن نفسي قدامها..انا حاسه بضعف...حاسه ان كل مشاعري قاعده تنقلب ضدي وتضعفني وتهزمني...
صرخت فيني: خااااااااااينه!!.....خااااينه...."
وكملت وهي تضربني بقوة على يديني اللي رفعتها قدام وجهي: ومستخدمه جوالي بعد!!...آآآه... مو بس خنتيه...خنتيني معه يال********************************ة....ياليتيمة....صدق انتي مو وجه خير...انــ.."
قطعت جملتها فجأة...وحسيت فيها تبعد عني...كنت ميتة صياااح...شلت يديني ببطء...حطت ايدها على فمهااا من جديد...وكملت بعد لحظات: كاتبه رقمه بعد على ايدك؟؟؟...وين قابلتيه؟؟.. تكلمي ؟؟ ...توك عروس ومع هذا...آآآآآآآآآآآآآآآآه...ياخسارة وافي فيك...ياخسارة كل لحظه عشتيها معه..."
ورجعت تسحبني بقوة وانا اتوسلها تسمعني....ودخلتني حمام غرفتها ومسكت ذراعي اللي مكتوب فيه الرقم وقامت تغسله بعصبية: لا تدخلين هالقذااااارة بيتناااااا....فاااهمه؟؟؟...بيتنا مايصير فيه الحرااام..."
وبعد ماخلصت طلعتني بره غرفتها وقفلت الباب...انا وقفت عند باب غرفتها اتنافض بقوة...كنت حاااسه بخوف...وحسيت ان اوصالي قاعده تذوب..انا حرااام!!....ليييييييييييييه؟؟؟؟...ماكان قصدي اسوي الحراام...اناا...غبيه!!...مشيت بتعب وانا متسندة على الجدار...كان قلبي ينتفض مثل عصفور جريح....وعيوني غاشيتهم الدموع.... تذكرت المستشفى وشلون كانوا يعاملوني فيه ويضربوني....حسيت ببرد قوي يدخل ويعصرني من جوا....يلعب فيني...يجمد اوصالي.. يوقف دقات قلبي....ينهيني...ببساطه يقتلني!!....حسيت بظلال كثيفه من حولي....ومسكت درابزين الدرج وحسيت نفسي اتهاوى ببطء... لما فقدت السيطره على نفسي...!!!
-يبه!!!"
طالعت بأبوي مستغربة...وش يسوي هناا؟؟....ابوي انت مفروض ماتكون هنااا...انت ميت... شلوون...؟؟!!
قرب ابوي مني وهو يبتسم كان وجهه يشع نور ولحيته الطويلة السوداء زايدته جمال!! وريحته كلها مسك...
-يبه ملكه.....ليش تسوين كذاا؟؟.." سألني ابوي بحسرة...وعيونه تمتلي دموع...
مديت ايدي له بضعف ابي المسه...ابي اضمه...ابي اصيح بحظنه...ابي اقوله خذني معك وعمرك لا تتركني...بس هو ميت!! ميت ولا يدري!!....شلون يمشي هناا؟؟...
- ابوي انا تعبانه بدونك انت وامي..انااا محتاجه لكم...ابيكم ترجعون لي...الله يخليكم..."
- ملكه...انا ماربيتك كذاا...وين ايمانك بالله؟؟؟...معقوله لسه تنتظريني انا وامك واخوانك؟؟"
حطيت ايدي على فمي بضعف وانا انتفض: طول عمري راح انتظركم...انتم هلي شلون انساكم.. ابي اجيكم...ابي انوم معكم...خذوووووووني وياكم...لا تخلوني اجيكم بالغصب...."
طالعني ابوي بعتب يوم قلت كلمتي وامتلت عيونه دموع وهز راسه باسى..ودار عني وراح!!
قمت ببطء من الأرض اللي انا متمدده عليها...ولحقته بسرعه..ركضت وراه ودورت عليه بكل مكان بس اختفى...ابوي حبيبي زعلته واختفى!!....كل الي يحبوني يروحون...كلهم يختفون... كلهم يزعلون مني!!
حطيت ايديني على وجهي وصحت بمرارة...وحسيت ببرودة جليدية تخش عظامي يخالطها حر غريب..شلت يديني بذعر عن وجهي...ورجعت غطيت وجهي بخوف..مااااابي..ماااابي اشوف... كانوا يحترقون هناااك....على بعد امتار قليلة مني....صرخت مترجية...خااايفه انااا!!....شفتهم يمدون ايديهم لي!!....ما اقدر اسوي لهم شيء...جباااانه اناا..كان مفروض رميت نفسي معهم.. كان يمكن لحقتهم وارتحت!!
حسيت ببطانية ثقيله تغطيني....فتحت عيوني ببطء....شفت عيون كسلانه تطالعني...حمرت خدودي وتسارعت دقات قلبي....الساعه كم؟؟...متى نمت اناا؟؟؟....
تحركت بضعف على السرير....بس وافي مسكني بقوة...: ارتاحي!!"
طعته بدون ما اجادله..وتنبهت اني مو بالشقه...حاولت اتذكر آخر شيء صار لي!!...وليش انا هناا؟؟...
غمضت عيوني بقوة...وحسيت بقلبي يعورني...مهاا..مساعد..الجوال!!!
وافي بنبرة قلقانه: ملكه..وش فيك؟؟.."
- من متى؟؟" وفتحت عيوني اطالعه...تتوقعون انه عرف؟؟..اكيد علمته مهاا...
وافي بهدوء: من امس!!..." واضاف بقلق:وش قالت لك مهاا؟؟"
- مــ...هااا؟؟؟..ولااا شيء!!"
وافي ببرود: على العموم انا تفاهمت معهاا..."
وكمل بنبرة عتب: ماقلتلك لا تكلمينها وهي زعلااانه..."ومسك ايدي برقة وكمل وهو يبتسم: مهاا موب ناعمه مثلك!!"
:وافي!!.." وسحبت ايدي منه بتعب..بس مسكها بقوة....
وافي بصوت غريب علي: ملكه....اناا..يمكن...اسات التعامل معك....كثير!!...بس خلاص.. هذا وقت التغيير..."
استغربت هدوءه وخفت منه كثير...اكيد عرف اني كلمت مساعد...بس يتصرف معي بهالطريقة.. لأني بالمستشفى...بلعت ريقي بخوف...
: وافي...انااا..انااا..." وحاولت اني ما ابكي: ابي اتطلق منك!!..."
وافي وكأنه ماكان متوقع وما اعرف ليش: ملكه!!...لا تفكرين بهالموضوع هالحين........"
هزيت راسي بعناد وصوتي يختنق: وافي...اناا...دورت عليهااا...بسس..اهي...اختفت...."
حط ايده على شعري: مين؟؟.."
: ريم!!..ريم اختفت يا وافي.." صرخت فيه بقلة حيله وصوتي يتهدج بضعف...
وافي وهو يوقف: خلاص ملكه انسي موضوع ريم!!...اناا...وانت...لااازم...نبــــ..."
قطعته بعصبية: ليش؟؟....ليش ننساه؟؟؟...ما اقدر يا وافي..ليش ماتبي تطلقني؟؟؟..تبي تهيني؟؟.. تبي تلعب باعصابي؟؟...تبي تتعبني اكثر من تعبي؟؟....خلااااااااااااص...طلقني يا وافي....ترى ماعادت النفس قادره تتحمل..."
وافي وهو يرجع يمسك ايدي: ملكه....انا عارف اني ماراعيت مرضك..ولااا..."
صرخت فيه وانا اسحب ايدي بقوة: مرضي؟؟...صح...ذكرتني...للحظة نسيت اني مجنونة....صح انا مريضة... بس انا مابي شفقتك....ابي ورقة طلاقي...مااابي شفقتك..."
وتكلمت وانا كلي ارتجف بقوة: خلاااص ماعدت احتمل عيشتي معك!!..."
وافي حاول يهديني وقرب مني علشان يمسكني...صرخت بقوة فيه...ما اعرف ليش خفت منه؟؟؟.. ليش تذكرت توم!!...المستشفى....كل شييي...مسكت مخدتي ورميتها بوجهه وقعدت اصارخ بأعلى صوت....كنت اطلب منه يطلع بره وحسيت باعصابي متشنجه على الاخير.... دخلوا علي مجموعة ممرضات وطلعوا وافي بره واعطوني ابرة مهدئة...
تفاجأت وانا طالعه من الحمام على الساعه 8:00م بوجود حصه وصيته بغرفتي وجدتهم.... ابتسمت لهم بحرارة وانا احيي واهلي فيهم...كانوا جايبين لي شاي وقهوة وبعض الاكلات... وصيته ملت الغرفة ورود حمر!!
جلستني حصه على السرير وغطتني بالبطانية اللي جابها وافي لي: سلامااات يا ملكه...ماتشوفين شر...وش هالحكي يا بنتي؟؟؟..اكتئااااااب مرة وحده...."
صيته بتأثر: ملكه يابعد عمري..صدميتنا وطيحتي قلوبنااا...."
- صدق انكم راعيات واجب...بس ليش كل هالحفله اللي جايبنهاا؟؟.."
حصه: علشان متى ماحسيتي بالجوع اكلتي....اساليني عن اكل المستشفيات..."
ابتسمت لها باامتنان...واهي قامت عشان تحط لي اكل...
: انا اقول هذا بسبب قلة الاكل وكثرة النوم!!" كانت هذي جدة وافي...
ابتسمت وانا ارد عليهاا: والله اني آكل يا جدة...بعدين نومي موب كثير!!"
العجوز باصرار: إلا والله...هذا وافي كل ما اتصلت عليه لقيته ناايم....ترى كثر النوم يا بنيتي موب زين...شوفي شلون غادية؟؟...عظما يكسيه جلد..."
صيته تغمز بعينها لي: الله يهداك يا ميمتي...هذا جسم عارضات الازياء..."
الجده وهي تضرب صيته بعصاها بخفة: وشووو؟؟.......والله الجسم الزين...موب تسذا.. انا راح آخذك اول ماتطلعين من هالمكان...واعتني فيك...مير وافي ذا مايخاف الله فيك..."
حصه وهي ترجع وتعطيني الصحن: والله يا ميمتي ان وافي ماراح يوافق...انت تعرفين ان وافي مايقدر يعيش بدون حرمه...ولاااا يموت بمكانه.."
وكملت صيته عنها وهي تغمز لي: وملكه موب اي حرمه..ملكه مرته..."
الجده باصرار: وافي مايعصاني!!...كلي..كلي وش تنتظرين تطالعيناا؟؟"
اخذت صحن الثريد اشوف البخار اللي يتصاعد منه...مالي خلق آكل...بس عشان صيته وحصه وامهم الثانية بجاملهم وآكل...
صيته وهي تشوفني آكل: وش اللي صار يا ملكه؟؟؟...معقولة يصيبك اكتئاب؟؟...احس اني مصدومه ...."
حصه وهي تلعب بشعري بنعومة: يابعد عمري...صدق ان الرجل مايفهم المره ابد...يا ملكه..مية مرة قلتلك انا مثل امك....اذا تبين تصارحيني بشيء متعبك تعالي وقولي لي..."
دمعت عيوني بقوة وخفضت نظري عشان ماينتبهون...
حسيت بيد حنونة تربت على اكتافي...ويوم طالعت...شفت وجه حبيب شربه الزمن من كاسه الكثير ..... ضميتها بقوة...كنت ابي استشعر حنان مفقود من زمان مالقيته....ابي حنان يا ناس...ابي صدر ارتمي عليه....ابي حظن ابكي فيه...ابي يد تمسح دموعي عن وجهي...بكيت بحرارة...ورجعت ابكي الاطلال والحاظر والمستقبل...بكيت امي وابوي واخواني وشغالتنا وعفاري وجاسر ونورس وكل شيء...كل شيء بكيته...وزاد احتظاني لجدة وافي اللي كانت هي تبكي بعد.......محد كان عارف وش فيني بس مع هذا شاركوني المشاعر....ماتعتبرون هالشيء... اعظم المشاعر!!..طهارة قلوبهم....انهم تأثروا معي وانا ما اقربلهم...وانا حيا الله مرت اخو!!...
على الساعه 11:00م طلعت حصه وصيته والجده اللي كانت مصرة تبي تنوم عندي بالمستشفى بس بالاخير قدرنا نقنعها ان المستشفى راح يضرها ولا راح يفيدني خصوصا ان المكيفات زي الثلج..وهي عجوز وعظامها تألمهاا....اكتشفت ان مشاري هو اللي موصلهم وسلم علي من ورى الباب...وحسيت بحقد على وافي اللي يتجرأ يشك ان بيني وبين مشاري شيء..
رجعت ارتمي على السرير...وانا اطالع بالحوسه اللي اتركتها صيته وراهاا....غطيت نفسي زين ...وفتحت المصحف وقعدت اقرا بسورة البقرة..
سمعت صوت الباب حق غرفتي ينفتح ببطء... وعرفت وافي من ريحته العطره اللي جات قبله.. غمضت عيوني بقوة وعديت لعشرة عشان ما انفعل اذا شفته..
فتحت عيوني وشفته جاي وشكله قرفان من الدنيااا....رمى نفسه على الكنبة الجلد....الغير مريحه ...
: نعم؟؟!!..وش تبي؟؟..خلص وقت الزيارة..."..
وافي بفتور: عااارف!!" وحك جبينه بقوة وهو يفتح ازرار ثوبه العلوي..
حاولت آخذ نفس عميق: وافي...ماراح اسمحلك تنوم هناا!!"
وافي بلا مبالاة: ما اخذت رايك...."
فكرت للحظات وقلت بعصبية: تشك فيني؟؟؟...صححح؟؟.." وحسيت بقلبي يألمني بقوة...
وافي وهو يطالعني بكسل: ملكه...اجلي الهواش ليوم ثاني...ابي انوم.."
: وافي لا تنوم هناا...لا تحرجني وياك....لا تخليني الجأ للحول الصعبه..."صوتي بدا يخوني ويرتفع تدريجيا ويهتز بقوة...
وقف بعصبية وحسيت انه يحاول يتمالك اعصابه...بلع ريقه: ملكه....لا تخليني اخذك من المستشفى بالقوة..."
:اطلع بره..." وهزيت راسي بانفعال: اطلع برررررره..."
رمى شماغه بقوة على الارض: وش تبين منييييييييي؟؟...طلااااق ماراح اطلق..."
: بره..اطلع...ماااابي اشوفك...برررررررررره....اطلع عن وجهي..."
مشى باتجاهي بسرعه..صرخت فيه بهستيرية لمن مسكني بقوة مع اكتافي: ملكه اقصري صوتك .."
صرخت فيه وقعدت اضربه...بقوة وامخش كل مكان بجسمه تجي ايدي له...حاول يهديني يسيطر علي...ما قدر....
صرخت فيه بأعلى صوتي وانا اتنافض: طلقنيييييييييييي.... اكرررررههههههك.... بررررررره ... ياحقيييييييييييير...رووووح عن وجهيييييييييييي.. ما احبكك...فاااهم..انت ولااااا شيييييي"
وصلت بوافي لأقصى حد...فقعد يهزني بقوة وتألمت كثييييير....بس هالشيء ماخلاني اهدا.. بالعكس زادني جنون حتى اني قمت احذف عليه بعض الاشياء اللي جنبي والكتب...
دخلت ممرضة على صوت صراخي..وانفجعت من اللي شافته...وحاولوا ان وافي يطلع بس رفض... فاضطروا يدقون على السكيروتي....اللي سحبوا وافي غصبن عنه ورموه خارج المستشفى .. انا كنت اتنافض بمكاني...احس ان عروقي بتنفجر...احس ان قلبي بيوقف.. احس باحاسيس غريبة...احاسيس كرهتها...احاسيس حقد وكره..احاسيس وحشية...حسيت باحتقار لنفسي.. انااا ملكه اتنافض من كثر كرهي لوافي...اكررررررررههههه...اكرررره قلتها بضعف وانا اصيح بصوت مهتز واتكور على نفسي في ركن الغرفة!!
طالعت بالكتاب اللي بأيدي...كان من صيته ارسلته لي مع السواق...قوانين الحب العشرة... شكله ممتع جدا....كانت حاطه رسالة اهداء في البداية..بخط ايدها...
" ألى من علمتني....ان الحب بحاجة لتضحية ليمشي بهداوة خلال امواج الحياة العاتية....إلى ملكه .... "
تلمست غلاف الكتاب العنابي...وضميته بقوة لصدري...وانا افكر بوافي...كان موقف مهين له امس...صرفته بدون رحمه...طردته...انااا ملكه؟؟!!..وين انسانيتي وين عطفي وين تسامحي؟؟.. اطرد زوجي!!...غمضت عيوني احاول اني ما ابكي...وافي لازم يطلقني...كافي اني قاعده اتحول لانسان ثاني غير اللي انا كنته...انا ملكه الحنون الطيبة...تحولت لمخلوق ثاني...صرت شريرة.. خاينه...العب على الحبلين...كنت ناوية استغل مساعد عشان اتخلص من وافي... وكنت ناوية استغل وافي كحجة للوصول لسلطان!!..
كرهت الصورة اللي تكونت بعقلي عن نفسي... ففتحت عيوني وبديت اقرا بالكتاب...القانون الأول... احب نفسك ليحبك الآخرون!!....فكرت بنفسي للحظات...انا احب نفسي؟؟!!..ايه احبها لأنها رقيقة وشفافه لأنها حنونة ومعطاءه....
صرخ فيني صوت بقوة: بس انت خاينه!!...انت تغيرتي...انت صرت تلعبين..حتى لو ماطبقت اللي فكرتي فيه....لو مااكتشفتك مهاا...كنت راح ترجعين وتفكرين من جديد..وترسمين خط جديد للهروب من وافي...للانتقام من مساعد..للسفر لسلطان!!معقوله بعد هذا كله احب نفسي؟؟!!
كملت قراءة الفصل الأول..وللاسف تأكدت اني ما احب نفسي ابداا!!....طويت الصفحه للحد اللي وصلت له..ورميت الكتاب بزعل!!...
رحت لشباك الغرفة اللي انا فيها...طلبت من الدكتور ينقلني للقسم النفسي....واخذت موعد عند واحد من اكبر الدكاترة النفسيين بهالمستشفى....بنات انا تبعانه...حاسه اني ابي ارجع للمستشفى اللي بأمريكا...مفكرة اكلم عمي وارجع هناك....استغفر الله ياربي...احس اني راح انتحر!!... وهالاحساس قاعد يزيد بشكل غير طبيعي...عارفين وش المضحك...اني لقبل فترة بسيطه وانا مقتنعه اني شخص سليم..مانيب مجنونة مثل مايقولون....لكن حاليا لااااء....انا فعلا تعباانه..لو شفتوني كيف صرخت على وافي؟؟...اناا مرة كارهة عمري...مسكين ماكان يسوى عليه يصير له هالموقف التافه...
قال لي الدكتور وهو يوقف: على العموم...يا ملكه...عندك خيارين....يا انك تآخذين حبوب اكتئاب عشان تعيشين حياتك بشكل طبيعي....يا أنك تضلين مثل ماانت...لكن راح تكثر انهياراتك وراح تتدمرين...!!...انا كدكتور مفروض اجبرك على هالحبوب...لكني دائما افضل ان الانسان يآخذ خياراته بنفسه..."
: بس يا دكتور....راح اصير مدمنة!!..."
الدكتور بتفكير: إذا التزمت بالجدول اللي حاطه لك....لا يمكن توصلين لمرحلة الادمان..."
: اناا خايفه....محتاااره....ابي اجلس هناا..."
الدكتور وهو يحط يده علي كتفي: ملكه...انت محتاجه تختلطين بالناس....كونك عشتي فترة ماتعتبر قصيرة في غرفة مترين بمترين...."
: بسس!!....انااا... ما ابي ارجع لزوجي...ابي اطلق منه!!...ماابيييه.."
سكت الدكتور لفترة ثمن قال: هالقرار بيدك...حياتك بيدك يا ملكه...لا تضيعينها...انت الوحيده اللي تمتلك قدرهاا...إذا تبين تطلقين من زوجك...تناقشي معه بشكل عقلاني وبهدوء واكيد ماراح يرفض...."
هزيت راسي له واخذت منه اسم الحبوب..
راقبت الدكتور وهو يطلع...وقمت من السرير....رحت الحمام غسلت وجهي كويس...وحطيت كحل على عيوني...ولملمت شعري بطريقة مرتبة...ولبست البنطلون الجينز اللي جابته لي صيته والبلوفر البني..طلعت من الحمام وضغطت زر استدعاء الممرضات...وجاتني الممرضة بعد دقيقة واعطيتها الروشتة حقت الحبوب وطلبت منها تجيبها لي....
الدكتور يقول انه ماله داعي اني اجلس بالمستشفى لأن مشكلتي نفسية.... والأفضل لي ان اطلع...بس وين اروح؟؟...اخذت نفس عميق احاول اني اطرد الافكار هذي من راسي... طالعت بالورود الحمراء اللي تارسة الغرفة...وابتسمت بكسل وانا اتذكر مساعد...مساااعد!!...وين سمعت هالاسم قبل؟؟...ههه ليلة سقوطي..الليلة اللي مهاا شرشحتني فيهاا يعني قبل يومين تقريبا... ليه يا مهااا؟؟؟.....صح انك بتوقفين مع خالك..بس ما اهتميتي بسماع جانبي من الحكاااية... اي حكااية؟؟ .. الخيانه اللي كنت مقدمة عليها وانت بكامل قواك العقلية؟؟..
وقفت افكاري عند هالحد...لمن سمعت الباب حق الغرفة يفتح...جيت بسرعه عشان اشوف مين اللي عند الباب..اول شيء تقابلت عيوني بعيون...لحظاات واستوعبت اللي انا قاعده اشوفه... فصرخت بخفوت وانا اغطي وجهي عن عيون هالغريب.... اللي صرخ بأسف: اوووه...آسف... شكلي غلطااان بالغرفة..." وطلع من الغرفة بسرعه...اما انا ظليت ارتجف لللحظات قبل ما استوعب اللي صار..وجاتني ضحكة قوية غصبا علي..فما كتمتها قعدت اضحك واضحك على شكل الرجال اللي دخل الغرفة....يااااربي لا تحطني بهالموقف مرة ماااله داااعي....
سمعت صوت صراخ بعد لحظات وبعدين اصوات تجمهر ناس...وشكله في مهاوشة... تمنيت لو اقدر اطل...بس ماكان في يدي اي شيء اسويه بيطلع شكلي غلط لو لبست عبايتي وطليت..دخلت علي الممرضة وكانت شكلها مفجوعة اعطيتها فلوس واخذت الحبوب...وصبيت لي كاسة مااء عشان اخذ لي حبة اكتئاب...اخذت حبتين مثل ماهو مكتوب بالجدول...وما امداني اسأل الممرضة عن اللي يصير إلا سمعت صوت انا اعرفه زييييييييين
12-03-07, 06:57 PM
جديد مواضيع قسم القصص المكتمله
العرض العادي
