الفصل الثاني والعشرون
بكيتك لين ملتني عيوني...صبرت وطال انتظاري
حرام النوم ماقرب جفوني ...وانت للاسف مانت بداري...
اناجي غربة الليل وشجوني...واراجع في هوى قلبي وقراري
عسى ماتكون خانتني ضنوني..او انه خاب في الحب اختياري..
ركزت على كلام مهاا لآخر حد..وكلنا قربنا روسنا منهاا..
مهاا وهي تتذكر وضامة يدينها بقوة وبنبرة
رومانسية حالمه: تذكرون ملكة بدرية؟؟.."
كلنا هزينا روسناا بصمت....
كملت وهي تبتسم زيادة: كلمني خالي وافي ذيك الليلة...كان حيــــــــــــــــل مبسوط... تعرفون ليش؟؟.."
انا ما هزيت راسي بس ابتسام وحنان طالعوني وكأنهم يطلبون مني جواب...فما قلت شيء ...
كملت مهاا بحماس: اتصل علي يقول...شفتها يا مهاا..شفتها...ملكة جمال الكون..حبيبتي.. مستقبلي... زوجتي...كل اللي ابيه من هالدنياا.."
قطبت حواجبي مو مصدقة.. وافي هذا كان انطباعه عني لمن شافني؟؟..حبني؟؟.. استحاله .. مافيه حب من النظرة الاولى..!!
كملت مهاا وهي تضحك بنعومة: ههههه....اممم...يقول كنت لابسه اصفر..يقول كل شيء فيك غريب.. كأنك جايه من عالم اثيري موب موجود...شعرك ...لمعة عيونك..."
تابعت مهاا وهي تنتهد" شبهك بالغجر مرة..وشبهك بنفسه مرة ثانية..كان يقول هالبنت تشبهني يا مهاا.. والله تشبهني..."
حنان بحماس: طبعاا..عشان كذا قال خطبولي في ليلة الملكة...اناا توقعته متأثر عشان بدريوه حبيبة القلب..لكن علشان شايف له شوفة!!"
ابتسمت مهاا: وشافك مرة ثانية بعد ومرة ثالثة ومرة رابعه ومرة خامسه..."
طالعتها وكأنها مجنونة وتذكرت المرات اللي قالت بلمح البصر..دمعت عيوني.... وماحبيت اجلس اكثر..
ابتسام: الله..مررررررة روعه..مشاء الله عليك يا ملكة..ربي عوضك عن اهلك بوافي"
: ايـــــــه الله يخليه لــ...ي" قلتها بهمس علشانهم بس...ولا اي عوض يعتبر وافي ؟؟!! ..ولا مين اللي بيعوضني عن هلي!!
مهاا وهي تنتهد: يقول ان المرة الثانية شاف فيك جانب ثاني غريب... شاف جانب خيالي ... شاف جانب رومانسي.... كنت تكلمين الهوا والنجوم وكأنك تكلمين شخص قدامك.. وطبعا هالشيء هبل بخالي اللي هو اساسا شاعر...فتصوري لمن يعرف ان حبيبته اللي اختارها على طول..فيها جانب خواطري.."
: وافي شاعر؟؟..."
مهاا بحماس: ايـــــــــــه واحلى شاعر بعد....تراه ينشر قصايده في بعض المجلات تحت اسم العنيد.."
حنان وهي تطالعني: اساسا خالي فيه كل شيء زين...فيه حنان...فيه حب..فيه طيبة قلب.. فيه رومانسية غير...فيه صبر..فيه غيرة... فيه كل شيييييييي تبيه المره من رجلها"
: والله؟؟....يمكن.."
طقوني كلهم على كتفي وقلدوا صوتي: يمكن!!"
: طيب...وثالث مرة وين شافني؟؟.."
مهاا: شافك عند المسبح..تخيلوا يا بنات انقذهاا..انقذهاا خالي.. شوفوا الوناااااااااسه"
ابتسام: ياقهرررررر ليتني ماعرف اسبح!!"
حنان: انا بتظاهر اني ما اعرف اسبح...علشان ينقذني..زوج المستقبل!!"
: والله ما تظاهرت انا فعلا ما اعرف اسبح.."
مهاا وهي ترجع لمحور الكلام: يقول عفرا الحماره بدل ما تنادينه نادت واحد عندهم اسمه زيد..."
قاطعتها بحرارة:اسمه يزيد...بعدين... لا تقولين حمااارة...اهي ماقصدها بس من الخوف الواحد مايفكر زين.."
وقعدت اتذكر ذيك اللحظات وارتجفت... وعضيت على شفتي....آآآآآآآآآآآآآه يا وافي...اثرك حبيتني وكرهتني...من قبل مايكبر حبك رجعت وقتلته..معقول فيه حب بالسرعه هاذي؟؟.. ولاا انتهى باسرع من بدايته؟؟؟
تتوقعونه لسه يحبني؟؟...استحـــاله...وش بيحب؟؟..قولوا لي...بيحب وحده يعتقد انها خانت اهلها وتجرأت وخانت زوجهاا..ليتني ماعرفت كل هالحكي ياليت...
قطع افكاري صوت مهاا وهي تكمل: المهم...جا الاخ هذا اللي اسمه زيــد..."
: يزيد!!" صححتلها وانا محترة..
مهاا بلا مبلاة: المهم...اللي هو...عاد تصدقون انا كرهته..تصوروا واحد شعره طويل وويلبس نظرات وملابسه كأنه جاي من الشارع...الصراحه اكره الملابس ذي.."
حنان بملل: وش علينا منه..كملي عن خالي وملكه..."
مهاا: ايه..خالي وافي يوم سمع صوت صراخ عفرا طبعا جا ركض بيشوف وش السالفه ... لمن جا لقا الاخت ملكه..على الارض..والاخ يزيد على وشك..يحتل حقوق خالي ويلمس زوجته المستقبلية..."
الكل ماعداي ضحكوا على اسلوب مهاا: ههههههههههههههههه..."
ابتسام: والله يا ملكه حركات...ثنين جو ينقذونك موب واحد بس...."
مهاا بنفس الحماس: لحظه...اسمعوا المقطع الحاسم.."
: مهاااااااا...حشا صرت فلم انا وخالك...يله قفلي السيرة..."
مهاا وهي تغمز: تستحيييييييين؟؟..."
حمرت خدودي الحيوانه...ماراح اقدر اشوفهم مرة ثانية إذا دروا عن هالموضوع... صدق وافي مايستحي يوم يكلم بنت اخته كذاا...
مهاا: يا بعد قلبي يا خالي...خلاص هونت ماتستاهلون وحده تقولكم قصة غرامه..."
ابتسام وحنان احتجو بقوة: لااااااااااااااااااالاااااااااا الله يخليك قولي...لا تسكتين"
مهاا وهي تاخذ نفس عميق: يقول شافها مرة تكلم ورودها بالليل...وفي ذيك الليلة قال عنك كلمة وحده...يامهاا حبيبتي مغرورة...مغروووووووووورة..."
ابتسمت مهاا لي وضربتني على خصري: بس ولا يهمك انا دافعت عنك...وقلت يحقلها إذا مثل ماقلت يحقلها تشوف نفسها عليك انت...."
وكملت مهاا وانا اشرب الشاهي البارد: المهم....يا ستات...شافها مرتين بعد وهي خايفه من الكلب اللي هناك...يقول كانت صغيرة حيل...بفستانها الواسع..وبشعرها الاحمر المتناثر على وجهها....يقول كل ماحاولت امنع نفسي من التفكير فيهاا لأني اعرف عيوبهاا... بس الاقي نفسي غصبا علي افكر فيها...على كثر عيوبها إلا ان الكل يحبها هناك.. لدرجة اني حسيت نفسي واحد من جمهورها.."
طالعت بمهاا مستغربة: جمهورها؟؟؟.."
مهاا بحماس: ايــــــــــه.. ماسمعت قصيدته عنك...؟؟..."
: لاااااااا( بصوت خافت بطيء)..
مهاا: قال فيك يا ستي قصيده روووووووعه اسمعوا..
جمـــال وود وعيــون ودلال وكـــــــبرياء شــــعور..
وفتنــــة تخذل عيـــون النهار وينــــــطفي نـــــــوره..
ولك في خافقي صـورة تلاشت بين ضي ونـــــــور..
واخاف اسكت من الفـرحه وتنطق باسمك الصورة ..
عرفتك وانتــهت رحلة قســاوة دربي المــــــــهجور..
والا يا جــملة ايــــام الجفــــا والصـــد مشكــــــورة..
خـــــذتني للجفا عزه واخذنــــي للعنــــــــــاد غرور..
واخاف اكون بعــــــنادي حبيـــــب ومــــات بغروره
واذا كانت مسافــــــات الخيــــــانه للغــــــرام قبـــــور
وش اللي يجبر العاشق يخــــــون ويحفـــــر قبوره؟؟؟
وش اللي يجـــــــبر الشاعر يدور للشــــعر جمهور؟؟
مدام انت مـــــحبينه وعشــــــــاقه وجمــــــــــهوره...
ابتسام بحماس: واااااااااااااو....وش اللي يجبر الشاعر يدور للشعر جمهور؟؟..."
مهاا: شفتي شلون خالي يحبك...حتى لو قسا عليك شوي..."
: .................
حنان: الغريبة يا ملكه...ان خالي جات له فترة وسكر على موضوع الزواج نهائيا ولا كأنه فكر فيه اساسا...وكل ماسألناه كان يتهرب مناا ولا يعطينا وجه..."
:...................
ابتسام: اكيد انه كان يبيها مفاجأة؟؟..."
مهاا: ايــــــــــه...صح....وش السالفة ذيك الايام..ايام عيد الفطر ورمضان واللي قبلها بشوي..."
: اممممممممممممم..."
ماكان عندي حكي اقول...فوقفت بملل...
: مالكم شغل....وش بيدريني عن خالكم...يله امشوا نتمشى"
وقفوا معي وهم موب عاجبهم الحكي اللي قلته بس احترموا سرحاني وسكوتي وقاموا يسولفون بلحالهم...
وصلت عند الجلسه الخارجية اللي الكل جالس عندها وانا حاسه بضيق غريب..كل هالضيقه لأني عرفت ان وافي كان يحملي مشاعر فيما مضى؟؟؟.. كيف كانت راح تكون حياتي؟؟..اكيد قمة المتعة.... لكن بعد مساعد...وآآآآآآآآآه من مساعد...الله يسامحه بس... هو وافكاره الغبية...خرب علي حياتي وكان راح يموت...
جلست في آخر المجلس..وكنت في عالم ثاني...بس جاتني صيته وهي شكلها طاقه من الدنيا...وكانت شايله نونو صغنووووووون بيديها..
صيته بأعلى صوت مثل عادتها الازلية: ملكه إذا ماعليك امر....شيلي منو...بروح جوه اشوف وش قاعدات هالشغالات يسون بالمطبخ؟؟.كل وحده قاعد تدربي راسها ميب دارية وين ربي حطهاا...."
:من عيوني...هاتيها عنك...."
وشلت منيرة الصغنونة اللي كانت توها تفتح عيونها المكحلة...ربي يحفظها من العين ما احلاها...
صيته وهي تروح: إذا طفشتك تعاليلي لم المطبخ.."
: لااا ماراح تطفشني..."
وحطيتها بحظني وقعدت الاعبهاا...وكانت صغيرة حيل..يمكن ماكملت شهر.....الاعب شعرها الخفيف الاسود...
: دامك انت ورجلك تحبون هالبزران...وراك ماحملتي؟؟..."
انحرق وجهي من سؤال جدة وافي...وطالعت بحصه كأني ابيها تنقذني...
حصه وهي تصب الشاهي لجدتها: الله يهداك يا ميمة...البنت توها معرسة...ماعدنا مثل اول...الوحده من تعرس وبطنها قدامها..."
الجده بأعلى صوت: ليييييييه وشفيهاا؟؟....مصيرها بتحمل مصيرها بتحمل...حتى لو هجت من تعب الحمال...اخرتها بتجيب لها كم من بزر يشيلون اسم رجلهاا.."
وكملت والوضع موب عاجبها: لاااا والاخ زوجها..مسوي فيها حظاره...يقول.. بعد خمس سنين..ياويلي على عمري...يعني راح اموت وانا ماشفت ولد الغالي..."
قاموا اللي بالمجلس يهدون باعصابها وانا ساكته بمكاني وجهي رايح فيها وبالاخير شلت البزر وقمت من مكاني.....
في الطريق وانا ماشية المطبخ....شفت بنات خالات وافي اللي ماحتكيت فيهم نهائي ومن ضمنهم مرام وكلهم واقفين عند وافي...كلهم كانوا متحجبات...باستثناء الآنسه مرومه... اللي كانت متعلقة بذراعه بحرية...حسيت بحرقة بقلبي...بس طنشت...وكملت مشيي للمطبخ ...
اول ماوقفت عند باب المطبخ...لقيت مريم وصيته يسولفون...
صيته: تعبتك البنية؟.."
: لااا ابدا...بسم الله عليها ملاااك..."
مريم وهي تجي يمي عشان تبوس منو: يا سلااام...بحضن اللي ماتعرفينهم ساكته وانت مجننه امك.."
ضحكت لأن منو قامت تصيح يوم باستها مريم...
قعدت الاعبها بنعومة..احرك اصابعها الصغيرة الوردية...وابوس خدها الناعم...
سمعت حس وافي يوم دخل المطبخ...كان واقف وراي على طول... شفت منو تبتسم له بنعومة وشوي وتضحك بقوة...
الشيء اللي انا متأكده منه ان مافيه مرة تقدر تقاوم جاذبية وافي.... اذا منو اللي تصيح مع الكل ولا تبتسم بوجه احد...يوم شافت وافي قامت تكركر براحه...
وافي: مشاء الله حنونه!!.."طبعا قالها بتريقه للمعلومية بس..وبصوت واطي...
: اكيـــــــد....واكبر دليل اني احن حتى على اللي قلوبهم حجر...مو مثل ناس توزع الحنان بكيفهاا"
لفني جهته: وش قصدك؟؟...مية مرة قلتلك لا ترمين حكي.."
: انت شايف ان هذا وقته؟؟؟!!"
وافي وهو يميل فمه بشبه ابتسامة: آه..صح..نسيت ان في ناس قاعده تشوف الزوجين الجديدين بعيون رومانسية..."
: مخدوعين...لأن فيه ناس قايله لهم
قصص حب...وهمية!!..."
طالعني وهو يعض على شفته ووجهه صار الوان...
وافي بحرارة وبصوت واطي: وش قصدك؟؟."
: ابداا سلامتك...وش اللي يجبر الشاعر يدور للشعر جمهور؟؟.." وطالعت فيه وانا ابتسم بحقد له....
وافي قام يحوس بجيبه يدور له طبعا سيجاره كالعاده...يابنات جاتني فرصه انتقم منه..مثل ما ابي... لا يمكن اضيعها ابداا....لو يصير اللي يصير...
ابتسمت: لو دريت انك ذايب في هواي..كان صارت علوم!!"
طالعني باحتقار وهو يرمي سيجارته بفمه ويولعها بسرعه: وش قصدك؟؟...تكلمي...قولي ..اصلااا....عمرك ماراح تفهمين... اني كنت اتسلى...وكنت اضحك عليهم...لأنهم كانوا صاجيني بسالفة الزواج..."
: تسلى !!! .....اصلااا انا ع************************.. ماكنت ادري انك موجود.."وابتسمت بتشفي..
وكملت وانا اطلع من المطبخ: اساسا..انت ماكان لك اي مساحه بتفكيري...كنت اشوفك عابر سبيل..لا اكثر ولا اقل...حتى شكلك ماكنت اعرفه...يعني لو اشوفك بالشارع ما عرفتك ..."
وافي ووجهه مبهت: طبعاا..كان تفكيرك بحبيب القلب...ولاا اقول حبايب القلب..احسن وافضل واصح!!"
وبكل حقد رمى سيجارته على الارض ودعسه بقوة..واخذ بنت اخته مني بالقوة...
وافي وهو يشيل البنت اللي تصيح: ما احب بنت اختي تلطخ بقذارتك!!....عن أذنك.."
ارتعشت شفايفي بقوة..وحسيت اني ابي ابكي...لكني مسكت نفسي بالقوة يوم شفته يروح لمرام...طيب...يا وافي...انا اصلااا قوية...ولا يمكن انهار...وتشوف كيف راح اخليك تحرم نوم الليالي!!...
رحت انا وحصه نتمشى عند اسطبلات الخيل...كانت حصه حيل مبسوطة فيني... وتعرفني على كل مكان بالمزرعه...وتحكي لي عن طفولة وافي...والحق اني كنت اسمع لها باهتمام...ااي شيء فيه سيرة وافي...لابد اسمعه باهتمام...غصبا علي... هالرجال ساحر ... كل صفاته فيها سحر...تمرده..جبروته...سخريته..حقده...سااحر وسااخر للاسف ..
حصه بحماس واحنا ندخل الاسطبل: بوريك وافي..."
: وافي؟؟!!!!" وكنت مقطبة حواجبي ومصغية سمعي لهاا...
حصه وهي تروح لواحد من الخيل: تعالي شوفيه....توه صغير...عمره ست سنين بس.."
طالعت لوافي باهتمام...يااااااااه...كان جميل...يشبه لوافي كثير...اسود وكله عضلات.. وصوته يوصل لآخر الدنيا...ويوم يتحرك فيه جاذبية رائعه...
حبيت وافي الحصان... كان يشبه وافي الانسان...بس مع فارق بسيط ان الاخير مليان حقد وكره ...بينما اللي قدامي...كان خالي من المشاعر...تصدقون مرات الافضل يكون الانسان بدون مشاعر...عشان لا يتعب ولا تتعب اعصابه..
كان ودي اركبه...لكني ماقلت عن رغبتي هاذي وما اعرف ليش؟؟.. لمست شعره بحنان وقعدت اداعب خشمه واطبطب عليه....وسولفنا بحرارة انا وحصه عن الخيل والمزرعه والجو!!بعد لحظات استأذنت حصه مني بتروح تجيب لنا حليب وترجع...وطمنتني ان ماحد يقرب هالجهة نهائيا...
: ها حصيص..... تبين تركبين اي واحد؟؟.."
صرخت لمن سمعت صوت الرجال: آآآآآآآآه"
...وتخبيت ورا وافي على طول...طبعا رجولي كلها باينه ...الرجال وقف لما سمع صوتي...
: آآه...ارجع...اررجع وراك!!...حصه ميب فيه!!"
الرجال شكله ارتبك مرة...وهالشيء بان على صوته..
: ..مين؟؟...ابتسام؟؟!!"
رديت عليه وانا قاعده اصب عرق وخايفه موت...خصوصا ان وافي قام يتحرك بملل لأني ماسكته...وقام يرافس برجوله...ويصهل بأعلى صوت...
: لاااا مانيب بابتسام...انا..مرت وافي"كنت شوي واصيح...اساسا صوتي اختنق بقوة...
الرجال بارتياح: ياهلااا بملكه....ياهلااا با ام مشاري...كيفك يا الطيبه؟؟.."
ام مشاري...لالالالا...هذا مشاري...ياويلي وش راح اسوي..وتذكرت كلام وافي لي باول ليلة زواجي...كان يعتقد اني معجبة بمشاري....
: الحمدالله بخير...انــ...ــت شخبــ...ـارك؟؟..."
مشاري وصوته يبعد: والله بخير...اسف على ازعاجك...قالولي البزران ان حصه هي اللي هناا...بس يالله..تآمرين بشيء..."
: ما يآمر عليك عدو!!"
واتنفست براحه وانا اشوف ظهر مشاري وهو يطلع مع باب الاسطبل...
اول ماطلع مشاري رجعت حصه ومهاا وكان وافي معهم...لاحظت ان وافي وقف اول ماشاف مشاري..وبعدوا عن باب الاسطبل ..مدري وين راح الله يستر لا يتهاوش مع اخوه علشاني...
قلبي كان يرقع باقوى صوت...وحسيت ان الدنيا حولي احترت...وان الجو انقطع منه الهوا ..والاكسجين... كنت ارتعش بقوة...وشفايفي ترتعش..وعيوني مو قادرة افتحهاا...يا بنات للمعلومية هذا اسمه الخوف...
وانهبلت مهاا اللي مسكتني بقوة اول مابغيت اطيح على الارض... ركضت حصه يمي: وراك يا ملكه؟؟؟...." وحطيت يدها على جبيني وصرخت بمهاا: المره مسخنه..."
كانت مهاا بتروح بس اشرت لها انها ما تروح....وحسيت بغثيان غريب...رحت يم سطل كان بالركن..وفرغت كل اللي بمعدتي فيه...
حصه بارتباك: ملكه...وش فيك؟؟.."
مهاا وهي تبتسم: اكيــــد حامل..اكيد.."
حصه تأشر لبنتها: عيب..."
كنت ارتجف وانا امسك كوب الحليب الدافي....اللي تناثر على اطراف ايدي...فأخذته مهاا اللي كانت تأملني مبسوطة...
: مانيب حامل...انا متأكده.." وشربت شوي من الحليب...وسندت ظهري للجدار الخشبي ...
حصه وهي مستغربة: توني تاركتك مافيك إلا العافية...وش اللي صار؟؟.."
مهاا: يمه..."
حصه: لبيـــــــه..."
مهاا وهي تمسك ايدي: والله انها عين ام فلان...تعرفينها اعوذ بالله..من شافت ملكه وهي ماغير تمقل((تتأمل)) في مرت خالي.."
حصه وهي تضرب بنتها على فخذها بقوة: عيــــــــــــب...ام فلان...تصير خالتي يا قليلة الحياا..."
مهاا وهي تحك فخذها: يا ميمتي الله يهداك...انا قلت اللي متأكده منه...تراني ما تسذب( ماكذب) عليك"
حصه وهي تطالعني بحنان اموي: وراك يا ملكه؟؟..ما تبين تقولين..."
: مشاري...مشاري..."
حصه ومها استغربوا: بلاه خالي؟؟.."
: خفت انه يشوفني..." وحطيت ايدي على صدري...
حصه وهي تضحك وتضمني:ههههههه... كل هذا حياا...(والتفتت على بنتها) نعنبو ذا الوجه تعلمي من مرت خالك"
مهاا وهي تضحك:ههههههههه...يا ميمتي... عـــــــــــادي...ياما شافونا رجال من غير عبايات...ربي ماراح يحاسبك عليهاا..."
حطيت ايدي على الارض ابي اقوم..ماحد فاهمني...يااويلي من وافي...راح يذبحني... راح يذبح اخوه...
ساعدوني امشي معهم...ورجعنا للفله وكانوا بيحطوني بغرفة النوم حقتي بس عييت بشكل هستيري..ورحت اجلس معهم على الغداا مع ان مالي نفس...
مشاء الله كانت السفرة فيها من كل الاصناف الانواع...بس مع هذا ماطب فبطني شيء.. رغم ان مهاا اللي قررت خلاص اني حامل..ملت صحني من كل نوع...وكانت تتأملني وهي حيل مبسوطة..حتى انها ما اكلت غير شوي من كثر الحماس...
: مهااا...انا موب حامل..." قلتلها بصوت واطي..
مهاا وهي تفرك يدينها: ماتدرين يمكن!!...الواحد مايقدر يتأكد من هالاشياء.."
فركت جبيني بملل وش اقولها هالثورة...ياخوفي تروح تقول للكل عن الشيء اللي اهي تعتقده.. وبعدين وش راح يرحمني من وافي!!...
تذكرت المسدس وكيف بغى يذبح مساعد...يمكن هالمرة يفرغه فيني ويدفني.. اساسا عادي محد راح ينتبه اني مختفيه...لأن ماوراي اهل تسأل...
جات لي مهاا وهي تركض بعد الغدا بساعه: ملكه ملكه...تعااااالي معانا..."
وسحبتني وانا مو عارفة وين اروح..ولبستني عباية من عباياتها...
: مهااا ....وشووو؟؟...وين بنروح؟؟.."
مهاا بحماس وهي تعطيني الشيلة: بيسوون سباق سيارات...ياااااااااي...وناسه..."
: مين اللي بيسوي السباق؟؟.."وقفلت عبايتها اللي على الكتف زين...وضبطت اللثمه على وجهي...
مهاا وهي تناقز مبسوطة: خوالي..وافي ومشاري.."
بلعت ريقي بخوف...ولا قدرت اقول كلمة وهي تسحبني بسرعه ونطلع نركض بسرعه يم الاندكروزر...
مهاا بحماس وهي تركب قدام عند الطارة: يله يله مرررررررة متحمسه... ونااااااااااسه ...."
انا ركبت وراها وقفلت الباب..كنت متوقعة ان وافي هو اللي معنا...بس لمن سمعت صوت اللي قاعد قدامي....!!
مشاري: يله يا بنت حصيص....انت قدها وقدوووووووود!!
مهاا وهي ترفع صوت المسجل...: بصدم مراموه وخالي...بخليهم يعرفون اني صدق بنت رجال..."
مشاري وهو يضرب كفه بكف مها بقوووة: اييييييييييه هذا اللي نبيه...يله حركي الجيب بسرعه ..."
انا دوروني ماعاد تلاقوني...احاول افتح الباب...ببطء...لكن خلاص طاح الفاس بالراس.. لأني شفت عيون وافي..تلاقينا رغم بعد المسافه...انا قريت اللي فيهم...قريت كره وحقد واحتقار ينقط منهم....وهو قرا الل في عيوني خوف وارتباك فضيع...
حسيت اني مرضت..حتى ان حرارتي زادت...وقعدت اتنافض..وطحت على الكرسي مغمضة عيوني...
مهاا وهي تحرك الجيب: شوف..شوف خالي شلون يطالعناا....طيب يا خال..."
مشاري وهو يلتفت يطالعني: عسا مابك شر يا ام مشاري؟؟..."
فتحت عيوني ببطء: لااا ابد...بس...احس بخنقة شوي..."
مهاا وهي ترتجف: خنقه!!...تبين نفتح الشبابيك..؟؟"
هزيت راسي بقوة...يعني لااااء..
مشاري وهو لسه يطالعني: متأكده انك بخير؟؟.."
هزيت راسي له بتأكيد....فطلع منديل من جيبه وناولني اياه...شكرته بهمس... مايحتاج اقولكم ان هذا كله قدام عيون وافي اللي تقدح شرر!!...
فتحت مهاا الشباك وقامت تضحك: هع هع...شوف خالي...شكله منقهر انا خذينا ملكه قبله..هع هع.."
مشاري وهو مها يسوون حركات يقهرون وافي... لكن وافي سفههم وركب الجيب...جنب ست الحسن والدلال اللي جالسه قدام الطاره..سافره وشعرها يتطاير حول وجهها...آآآه ليتني اقطعه...
ضحكت غصبا علي..تذكرت يوم كنت صغيرة...وبنات جيرانا كانوا دوم يغارون من شعري لأنه طويل وناعم...هالحين انا صرت اسوأ منهم...
تحركت مرام وتحرك وافي بعد ما اعطى واحد من الرجال واعتقد انه متعب زوج ابتسام اشارة البدء للسباق...
انطلقت مهاا بأقصى سرعه ومشاء الله شكلها متعودة على السواقة... ومشاري رافع صوت المسجل لاقصى شيء...وقاعدين يصفقون بحماس...ومهاا تلف على جهة مرام عشان تحد السيارة!!
: مهااااااااااااا....يا مجنونة انتبهي..!!"
كنت ماسكه بمقعد مهاا وانا ارتجف....
مشاري: عليهم عليهم!!....يله بسررررررررعه...دوسي اقوى....اقووى..."
مهاا وهي تبطء السرعه شوي: لحظه لحظه..."
ووقفت نهائي.... لاحظنا ان جيب مرام ووافي وقف...
مها بقلق: وشوووووووو؟؟...."
مشاري وهو يدق على وافي: مادري..لحظة...الحمااااااار مايرد علي!!"
عورني قلبي غصبا علي...انا عارفة ليش مايرد عليك يا مشاري...
: يمكن مرام خافت!!"
مشاري: اففف منهاا هالبنت...قلت لوافي خل حنان بس عياا.."
مهاا وهي تصفق: اساسا حنان قدهاااا صدق بتصير حماااس..."
:وشفيهم؟؟.."
مهاا وهي تصارخ بقهر: آآآآآآآآآآآآه...شوفوا خالي الدب...هو اللي يسوق...غير مكانه ... غش...غش.."
مشاري وهو يفك حزامه: خليني اجي مكانك بسرعه...."
مهاا وهي تهز راسها: لاااااااااء انا قدها يا خال!!..."
انا ربطت حزامي..والله ان وافي مو ناوي على خير..ياخوفي يصدم فيناا....حطيت ايدي على رقبتي..احس بجفاف فضيع...وغمضت عيوني وانا احس بالدوخة تقتلني...تعصرني .. هالحاله كانت معي لمن كنت بالمستشفى...كنت لمن اشوف توم والثانيين غصب علي ارتعش وتصيبني هالاغماءات...
شفنا وافي يمشي بسرعه مجنونة باتجاهنا...فحركت مهاا بسرعه وهي تشد حزام الأمان.. في البداية مشاري ومهاا كانوا انواع التريقة والتصفيق....بس آخر المسابقة...
صرخ مشاري: من جــــــــده ذا؟؟.."
مهاا وهي بدت تخاف: وشفيه خالي وافي....؟؟..يمه يخوف..مايعرف يلعب....."
وحاولنا اننا نهرب منه...بس و كأن شيطان مسيطر عليه...وانا قعدت اصيح بصوت مكتوم ووترت اللي بالسيارة اكثر مما هم متوترين...والتفت علي مشاري يهديني بكلامه.. وانا حاطه يديني على وجهي وابكي بقوة...
قلت وانا متروعه: وقفووووووا....وقفوا بسررررعه!!.."
مهاا وهي بعد متوترة" طيب.....لحظة بس خليني الف!!..."
مشاري بعصبية: خلاص وقفي هناك عند النخيل..."
وقفت مهاا فجأة وطبعا مايحتاج اقولكم ان كلنا صدمنا باللي قدامنا....انا صدمتي جات اهون من مشاري ومهاا اللي حسيتهم يتألمون...
مهاا وهي تمسك راسها: ايييييييييييي...توبه..ماعاد ابي اسوق...ولااا بيسمحون للمره انها تسوق والله ورحنا وطي..."
مشاري وهو يمسك صدره: اي يا ضلعي....احس انه انكسر..مالت عليك يا مهاا..كل سواقتك زينه ماعاد توقيفتك والرويس.."
مهاا وهي تشرح لمشاري بحماس: بالعكس الرويس هين مرة...بس الفرمله صعبه حيل ... مشاء الله يعني كيف توقفون بهداوة ؟؟..."
والتفتت علي وكملت: ملكه حبيبتي...خوفتك..!!"
قلت وانا امسح دموعي بالمنديل الثاني اللي عطاني اياه مشاري الطيب: لااااء بس توترت حيل... تذكرت حادث اهلييييييي..."
وحطيت ايدي على خشمي وقعدت اصيح بمرارة....رجعت مهاا عندي ورا وقامت هي ومشاري يهدوني بكلامهم...
مشاري: يا ملكه ادعيلهم بالرحمه..ما راح يفيدهم بكاك..."
مهاا وهي تضمني وتبكي معي: آآآآآآآآآآه انا السبب...كان مفروض مآ اخذك معي..."
مشاري: يله تعوذوا من ابليس...الميت ماتجوز عليه إلا الرحمه..."
قلت بحرارة: ماني مصدقة موتهم...كل يوم احس انه مجرد حلم...احس اني بقوم كالعاده.. وبتجهز للجامعه وبروح لابوي عشان يوصلني...مووو مصدقة انهم ببساطه ماتوا.... كلهم .. "
وقفت صياح يوم شفت الجيب حق وافي يوصل جنبنا...
مهاا وهي تمسح دموعها رفعت صوتها بجفا: خييييييييييير..جايين تشمتون فيناا..."
ماناظرت جهة وافي إلا اني كنت متأكده انه يطالعني..
وافي بصوته العذاااب: دامكم مانتم قدها ليش لعبتوبها!!"
كنت عارفة ان هالجملة لي..
مشاري: وش اللي سووينا..هي منافسة بنات...يعني مفروض انت ما تدخل.."
وجلس مشاري قدام وطنش وافي ولف السيارة وحرك..
لمن رجعنا البيت...كانوا الكل منهبلين علي وعلى مهاا بعد ما شافوا السباق الحامي بيناا.. ولدرجة ان حصه كانت شوي وتصيح وهي تلمسني انا ومهاا ميب مصدقة عيونها اننا لسه عايشين..
وافي لمن رجع وقف... الكل كان يتكلم عليه...بس عيونه كانت علي انا ولا طالع بحد غيري .. وهالشيء خلاني امووت خوف.. عيونه الحمر.. سجايره المشتعله وحده ورا الثانية.. الازعاج اللي حولنا...كل هالشيء خلاني اجلس مع الحريم ولا احاول احتك معه...
حصه وهي تهمس بأذني: روحي شوفي رجلك....كنه يبيك!!"
طالعت بحصه وعيوني مفتوحه على الاخير: ها؟؟...قالك شيء؟؟.."
حصه بحنان: لااا ماقال لي بس ولدي واعرف وشلون يفكر يا ملكه... مدري ليش احسه انه ضايق..اكيد انت بتعرفين له!!..يمكن خاف يوم شافك تصيحين...!!"
: لااا ما اتوقع...يمكن...لأنكم تكلمتوا عليه...عششااان السرعه.."
حصه وهي تطالع بالسما: اناا ندمانه...لكن وش اسوي..وش اقول؟؟.. هو اول مرة يتصرف بهالطريقة.. كان شوي ويصدمكم..."
بلعت ريقي بخوف...وهربت من عند حصه ونظراتها..ولا رحت يم وافي اللي كان جالس مع الاخت مرومة وحنان ومهاا اللي كانت حيل زعلانه عليه وتعاتبه وتتكلم على بنت خالة امها الدلوعه..اللي شوي وتقعد بحظن وافي..
اول مالفيت ورا البيت..مسكتني ابتسام اللي كانت ماسكة جوالها...
ابتسام بفرح: واااااااو..وناسه يا ملكه...ليتني ركبت معكم..."
: كان جيتي!!"
ابتسام بقهر: زوجي يعيي...يقول هذولي عيال خالتي... لو انهم خواني عاادي.."
: اهاا....."
وسرحت افكر بوافي وطوايف وافي... لو تدرين يا ابتسام وافي وش يفكر؟؟..يفكر اني ابي اخوه.. اني ابي اغري اخوه الصغير المصرقع....ياررربي سترك... خااايفه حيل... خايفه تصير مصيبة بيني وبين وافي...
ابتسام وجوالها يدق:لااازم اروح هالحين...هذا متعب وعدني يمشيني عند الخيل.."
كنت بقولها لا تروحين بس ابتسمت بالغصيبة: مع السلامه..."
رحت لمجلس الحريم الخارجي... بعد مابدلت ملابسي بغرفة مهاا... كنت لابسه بنطلون جينز ناعم وبلوفر اخضر انعكس على لون عيوني بشكل مرة حلوو....
كان الوقت تقريبا العصر... والاغلبية نايمين...الجده كانت نايمة....وثنتين من خالات وافي الكبار... رحت يم عجوزنا...وقعدت احوس ادور بطانية ثقيلة عشان اغطيها...
تمددت اشوي ابي ارتاح..بس ما امداني اغمض عيوني..إلا ومجموعة بزران جايني وماسكيني مع ايدي..
: وشو؟؟..هاا يا بعد عمري..وش تبون؟؟.."
واحد من البزران: خالة مهاا تقولك تعالي لمهاا"
: قولوا لها تعبااانه..."
البزر الثاني بترجي: لالالالا....الله يخليك بتسوي لنا مسابقة بالمسبح...وتقول ماراح اسويها الين ماتجين.."
طالعتهم بيأس وقمت معاهم..ورحنا ركض لمهاا اللي عند المسابح...
مهاا اول ماشافتني: زييييييييين وافقتي تجين.."
: يا مهااا....حرام عليك تعذبين بهالبزران عشان يسوون اللي انت تبين..."
وقلدت البزر: خالتي مهاا تقووول.."
ماتت ضحك مها: هههههههههههه يقطع شيطانك..اوقفي بس لمي..ترى بنسبح بعدها..."
: وشوووووو؟؟...بررررررررررد....بعدين ما اعرف اسبح.."
مهاا وهي تكلم البزران وتكلمني: يله اوقفوا بصف مستقيم....وش فيك الله يهداك هنا دفا.. ماتحسين بالدفاا..؟؟...وإذا على السباحه فيه لستك كبير وفيه فلينه تشوفينها هناك.. وخلك باللي موب عميق..."
: مهااا..ماجبت ملابس سباحه..."
مهاا باصرار: مقاسي ومقاسك واحد...بعطيك لبس من حقاتي..."
: اناا انحف منك!!" وبغرور..
مهاا وهي تطالعني وفاتحه فمها: لاااا والله....اقول احمدي ربك ان مها بنت آل بتعطيك من ملابسهاا يله اسكتي ترا صجيتينا موب قادره ابدا.."
سكت مضطرة..ورحت اساعد البزران عشان يوقفون بصف واحد...وانتظرنا دقيقة وصفرت مهاا عشان تبدا المسابقة....
كنا متحمسين انواع التشجيع والصراخ والتصفير للبزران.. عاد انا صراحه ماشجعت غير ولد صيته ماعرف غيره...بعدين كافي انه ولد اخت وافي فشيء طبيعي راح اميله اكثر من البقية...
مهاا وهي تصارخ: بسرعه...بسرررررررررررررعه...لا تخليه يسبقك... يا غشااااااااش شفتك.. مطرود...يله برى برااااااااااااااااا.."
!!...
قعدت اضحك على حركات مهاا التلقائية والطفولية...تشبه عفاري كثير...ياااااااااااه اشتقت والله لعفاري وسماح...ما ادري متى راح اشوفهم..ودي اسولف معهم ونرجع مثل اول... اول ما جيتهم كيف كانوا يحترموني ويحبوني...قبل ما اصير ضيفه ثقيله عليهم لدرجة انهم تخلصوا مني مرتين بابشع طريقة...
تنهدت وانا اشوف مهاا توقف المسابقه وتطرد البزران عشان ينظف المسبح... وما انتبهت إلا وهي تأشر لي..
: نعم؟؟.."
مهاا وهي تعطيني المفتاح: لا تخلين احد يدخل...بروح اجيب لك ملابس من ملابسي.. وبجيب اللستك اللي خالي وافي انفخه..."
: ان شاء الله..."
وقفلت باب المسبح وقعدت اطالع بالماء وانا سرحانه..ارتعشت وافي.. وافي في مرحلة زمنية معينه ارتبطت ذكراه بذكرى الماء والمسابح والغرق...تنهدت بمرارة..وهالحين وش ارتبطت ذكراه فيه؟؟..ارتبطت بالالم والمرارة والحقد وكل المشاعر السلبية اللي يثيرها فيني...
طق الباب حق غرفة المسبح..فرحت فتحته.. كان وافي...وقفنا متنحين..ما كان متوقع يشوفني.. ولااا انا بعد!! حاولت اسكر الباب بسرعه...فضربت برجله وصرخ بألم...
فجأة قدر يدزني داخل وقفل الباب وراه: اخيرا لقيتك!!"
بلعت ريقي بخوف:.............
وافي وهو يحط ايده على رقبتي: وش الاستعراض السخيف اللي سويتيه عند مشاااااااااري ؟؟.."
حاولت ادزه بعيد عني كان راصني على الجدار ويضغط على رقبتي بدون تفكير....
: آآآآآآآآآآآآآآآآآآآآآه.....ماسويت شيء..فكنييييييييييييييييي"
وافي وهو يصرخ بوجهي:ماسويتي شيء..كل هذااا وما سويتي شيء...الله يآخذك...قولي آآآآآآآمين....ناوية تفضحيني عند الكل...!!"
بكيت بحرارة وانا احاول ابعده كان راصني على الجدار بقوة ويدينه تحوط رقبتي...
صرخت فيه وانا احاول امخش وجهه: خلنييييييي.... انااا حررررررررررررة ...فاااااهم ؟؟ ... فكنييييييي...اصلك حقيييييييييير..."
وافي وهو يشيل يده عن رقبتي:هذا بس تحذير بسيط....عشان ماتقربين من مشاري الايام الجايه...ولوو...بس سمعت انك كنت وياه...قسم بالله لاذبحك ولا يهمني..."
وكمل وهو ينفض يدينه وكأنه متقرف من دموعي:على الاقل بخلصهم من عقربة قذرة..."
كنت جالسه على الارض احاول امسح دموعي والمس رقبتي اللي تألمني..مجنون.. اكيد هالرجال مجنون...اكرررررررههههه...اكرررررررررررههههههه...
صرخت فيه: اكررررررههههههههههههك...يا حثاله..."
طالعني من فوق لتحت: ماطلبت حبك...ولااا ابيه..."
لاشعوريا صرخت فيه: صح...لأنك ماراح تحصله...اساسا انا عطيته لشخص يستاهل مو واحد مثلك...."
وندمت على الكلمة اللي قلتها..لأنه رجع علي بسرعه....بس لميت نفسي بقوة كنت ميتة خوووف منه..!!
سمعت صرخته وهو يضرب بأيده بقوة في الجدار...وطلع وخلاني..
شفت مهاا جايه وصدمت بوافي...وكأنه تكلم عليها او قالها شيء... رحت بسرعه يم المسبح وغسلت وجهي زين...كذا مرة...
جات مهاا وجات وراها حنان وابتسام ومرام معهم....
اعطتني مهاا الملابس..فرحت بدلت بسرعه بالحمامات اللي داخل الغرفة...كان شورت وتوب بس مطاطي شوي...
رجعت لهم...وكنت خايفه موت من المسبح اللي مو عاجبني اني ادخله...بس توكلت على الله ودخلته...
وجات مهاا وراي وابتسام ومرام وحنان...وكانوا طبعا كلهم يسبحون عادي...وسحبوني وانا لابسه اللستك.وجيت معهم بالنص...كنت خايفه حيل...اشوف الموية تحتي.. عميييييييقه مالها قرار..
مرام بدلع ماصخ: فيه احد مايعرف يسبح في هالزمن؟؟..."
طالعتها وكان ودي اخرب مكياجها الثابت..الله يخلي التاتو...
: ايه اناا.." طبعا قلتها وانا اقلد صوتها الناعم حيل..وابتسم...
حنان فهمت تريقتي فماتت ضحك: هههههههههههه.....بالعكس احلى..هذا يدل على النعومة..."
مهاا كانت تسولف مع ابتسام ويغنون بأعلى صوت ويلعبون بالموية...لكن اناا ماقدرت اتسلى وياهم...تفكيري كان بوافي... خنقني...يمكن المره الجايه يذبحني...هالرجال يخوف .. يخوف حيييييييييل.....
حسيت ببرودة مفاجئة تقبض قلبي بقوة... وامتلت عيوني دموع.. تتوقعون لو اني متزوجة مساعد كان صار هالشيء؟؟..لا يمكن...لأنه دوم راح يخليني بأحظانه... دوم راح يحبني. راح يسأل علي.. ماراح يخليني انوم لوحدي...
طفرت دموعي بغزارة من عيني ولاحظت ان كلهم يناظروني مستغربين.. فتركت المسبح وفصخت اللستك عني ورحت ركض لغرفتي...
دخلت غرفة النوم.. ماكان فيها احد..انهرت ورا الباب... وحطيت ايديني على وجهي.. وبكيت بحرارة.... بكيت كل شيء بذيك اللحظه...بكيت هلي...بكيت عمي..بكيت جاسر.. بكيت حتى مساعد وسلطان...بكيت نفسي.. بكيت حياتي المحطمه مع وافي...
لو بسس..آآآآآآآآآآآآآه لو..وش بتسوين يا لو؟؟..لا انت لا مقدمه ولا مؤخرة... لا مخففه علي الالم ولا شايلته بالمرة؟؟..
قمت على شنطتي وطلعت لي بيجاما...دخلت الحمام واخذت لي شاور حار.... ولبست بيجامتي...وطلعت....
لقيت وافي متمدد على السرير وكان يدخن...طالعني بسخرية..
وافي ببرود: يعني كان لازم التمثيلية هاذي قدام هلي؟؟ لازم تخلينهم يعرفون وشلون احنا عايشين...ههههههههههه...مهاا جات تكلم علي وتطلب مني اشوف سيادتكم..ههههههه"
سفهته ولا رديت عليه...رغم ان عيوني على طول امتلت دموع....
وافي بتشفي ********************************: ترى دموع التماسيح ما تأثر فيني..خلاص...لعبه قديمة...العبي غيرهاا .."
ماقلت له شيء رحت للتسريحه امشط شعري....لاحظت انه يناظرني... واحترت وش اقيم هالنظرات فيه؟؟.. لاااء ماكانت سخرية او حقد...كانت شيء ثاني..
وافي فجأه: ليش قصيتي شعرك؟؟.."
غمضت عيوني بقوة....اتذكر الرجال اللي بملابسهم البيضا... اللي سحبوني بقوة.. وحلقوا شعري..حلقوه كله...آآه..حتى انهم جرحو جلدتي بجروح مازال اثرها موجود براسي...
فتحت عيوني من جديد وقلت بسخرية :في المستشفى حبو يخلوني على الموضة!!"
تتوقعون كلمتي كانت رصاصة؟؟..يمكن....لأن وجه وافي بهت... وكأنه ماتوقع هالجواب ..
: حلقوه؟؟..." وافي بعدم تصديق...
ابتسمت له وانا اترك المشط من ايدي: ايه..على الصفر..ههههههه...عادي مرة..جابو المكينه وحلقوه... وكان بيشيلون جلدة راسي بعد..."
واضفت بسخرية وانا احط كريم مرطب على يديني واجلس على الكرسي: الصراحه مالهم حق.. مفروض يكونون متدربين..."
حك وافي جبينه وسكت للحظات طويلة.. كنت ابيه يطلع بس شكله ماراح يفارق الغرفة.. حطيت على رجولي كريم بعد..
وافي وهو يقوم من على السرير ويوقف قدامي: ارفعي راسك...طالعيني....."
مارفعت راسي له...لأن عيوني كانت غرقانه دموع...إلا وافي...ما اقبل شفقته.. لأنه ******************************** ...
رميت الكريم من ايدي لمن رفع راسي باصابعه...ماطالعت فيه....لأن دموعي قامت تنزل بسرعه...وكأنها تبي احد يمسحهاا...
لمسة وافي..احرقتني..كهربتني...حسيت كأني قشه واشتعلت بسرعه..
بلعت ريقي بصعوبة: وشوو؟؟..وش تبي؟؟.."
ووقفت بكسل ابعد عنه: تبي عشا؟؟"
طالعني لحظات: ابيك انت..."
وقفت فاتحة فمي للحظات مو مستوعبة وش وافي قال؟؟...يبيني انااا؟؟..بس مو انا اخونه .. ما احافظ على سمعته؟؟...وش يبي فيني؟؟...
قلت بتريقة بعد فترة صمت طويله شوي: اهاا...تبيني اناا؟؟؟...ههههههههه.... هههههه... صاير تعرف تنكت يا وافي..."
وافي بسرعه رغم ان وجهه شحب بقوة: مدري عنك...يعني وش ابي؟؟..ابيك تسكتين... لأني ما احب انك تحكين لي قصة حياتك..."
وكمل وهو يتمدد على السرير: جيبي لي عشاا......"
هزيت راسي له بطاعه وبإحباط...رغم اني هزئت فيه....إلا اني كنت اتمنى لو شوي..بس يقولي كلمة وحده....لكن انا هبلة..وش كنت متوقعة من وافي؟؟.
...ورحت طلعت من الغرفة ابي اروح المطبخ....دخلت المطبخ...ولقيت الشغالات طلبت منهم يحطون عشا لوافي بسرعه...وكان ورا المطبخ فيه زي المراجيح كبيرة..رحت لها بس وقفت يوم سمعت صوت بنات هناك...
مرام بدلع: عمركم ماراح تفهمون شعوري....احبه....اهو كل شيء بحياتي..."
**:طيب..لازم تدافعين عن حبك بكل الطرق..."
مرام وهي شوي وتصيح: متزوج..وزوجته جميله...وماعاد يحبني مثل اول..حتى طلب مني اني اقلل اتصالات له..آآآآآآآآآآه.."
**: اقول...والله شكل زوجته ميب دارية عنه...اساسا انت لاحظت انه ركبت مع مشاري في السباق...هذا يدل على اثنين.. انها متهاوشة معه...والثانية...ان الهوشة علشانك.."
مرام وهي تصيح: آآآآآآه...شلون اخليه يطلقهاا؟؟...شلوووووون؟؟.."
**: فيه مية طريقة وطريقة"
كنت ابي اسمع اكثر..بس طلعتلي الشغاله وقالت انه خلصت..طبعا انا اساسا كنت متأكده ان مرام تحب وافي...ياليته يطلقني يا مرام..ياليــــــــت...
اخذت صينية العشاا...ورجعت للغرفة....حطيت الصينية على الطاولة....بس لاحظت ان وافي حاط ايده على عيونه....توقعته نايم...لذا ترددت شوي...
سمع وافي حركتي فشال ايده عن عيونه....طالعني وهو مضيق عيونه بقوة.....
اشر لي على راسه: بندول..."
دورت على بندول بشنطتي بس مالقيت... كان وافي شاد شعره بقوة..اشر على صيدلية الحمام...رحت لها...فتحتها فلقيت فيها انواع الحبوب...وهالشيء خلاني اوقف منهبلة وانا اطالع...وافي تعبان..تعبااااان...سمعته صراخه..فقمت ادور واحوس على البندول....
ورحت اعطيته اياه وناولته كاسة ماء....ووقفت قريبة منه اشوفه وهو يحط المخده فوق وجهه ويصرخ صرخات مكتومة...
اختنقت..وحسيت اني مو قادرة اتنفس.... وطحت على الارض اطالعه....كان هو على السرير يتألم بشدة....ويتلوى..وانا مو اقدره اسوي له شيء..
وافي وهو مغمض عيونه: لا تطالعيني كذاا...."
قربت منه بتردد..لمست شعره وبعدته عن وجهه...فتح عيونه..ومسك ايدي..خفت.. مسكها بقوة..
- ليش خايفه؟؟.."
-انت مريض..آآآآآآه...مررريض..."
-طيب..وش اللي مزعلك؟؟...وإذا مريض..يمكن افضل بالنسبة لك!!..."
-لا تقول كذاا....وافي..وش قصة الادوية اللي في الصيدلية؟؟؟...وش السالفه؟؟ ..قووووول ... "
-................
-وافي تكلم..الله يخليك...انااا...انااا..انسى اني زوجتك...آآآه...اعتبرني صديقة... اعتبرني اخوك..اي احد..انسى اني ملكه...انسىىىىىى.."
-لا يمكن انسى انك ملكه....لأنك....آآآه...اتركيني يا ملكه وروحي...."
-ماراح اروح...بجلس يمك...انت تعبان...تعباااان فاهم؟؟....قولي..تبيني اسويلك شوربة؟؟ ... اي شيء؟؟"
-سويلي مساج..مثل المرة اللي سويتيه لي قبل...." واخذ ايدي حطهاا على راسه..وغمض عيونه ودفن وجهه بقوة في المخده...
داعبت شعره للحظات بحنان....وافي مسكين...مسكين يا ناس...مريض...يتألم....لازم اداويه...بس شلون...
في ذيك الليلة جلست طول الوقت اسوي لوافي مساج...وطبعا رفض انه يأكل اي شيء.. وماقدر ينام كثير بس على الاقل ارتاح شوي...اول مانام دخلت الصيدلية حقت الحمام وطلعت كل الادوية اللي فيها...حبوب اشكال والوان....مخيفه وكثيرة.. وفيه علب حجمها مرة كبير..حسيت بالأم يعتصرني... زوجي مريض..واناا ما ادري عنه...
قعدت اقرا الاوراق اللي عليها.. بس ماكان فيه شيء واضح مصطلحات طبية صعبه...لكن اللي تأكدت منه ان معه شقيقة حاده لأن واحد من الحبوب كان عند امي...بس فيه شيء مع الشقيقة....وشو هالشيء؟؟.. ماابي حتى اخمن...ويا خوفي يكون اللي في بالي....
طلعت من الحمام وشفت وافي...كان نايم مثل طفل صغير...يتألم ماسك الفراش بقوة ووجهه تعبان...اول مرة انتبه ان وافي نحل كثير عن اول يوم بزواجنا..كأنه فقد نص وزنه.... شعره طال بدون اهتمام.... لحية خفيفة نابته..بس مع هذا كان عذاب... وسيم..
رحت يمه وغطيته زين..وتمددت جنبه...وحاولت اني انوم!!...
طول الطريق للرياض وانا ووافي ساكتين... ما كنا نتبادل اي كلمه..اللي اعرفه بس ان كل العوايل طلعت معانا... وعلى كثر ماكنت ابي اجلس هناك وأخر مواجهاتي مع وافي لأبعد مدى...لكن ماكل ما يتمنى المرء يدركه....
توادعنا انا ومهاا وحصه وحنان بحرارة...ووعدوني يجون يزوروني بشقتي الاسبوع الجاي .. وطلبت منهم إذا بغوا يروحون لأي مشوار يمرون لأني عارفه ان وافي ماراح يرفض لهم طلب...
وشفت مرام تودع وافي بحنان فياض... وحسيت ان ودي اكسر لها راسها... خصوصا انها جلست مع وافي اكثر مني...لأني من بعد ذيك الليلة ماعاد نمت عند وافي.. رجعنا للجفا من جديد.. كنت انوم عند مهاا والبنات..وماحد كان يعلق على تصرفاتي الغريبة.. خصوصا اني عروس فمفروض اكون مع زوجي طول الوقت...
ارتعشت وانا اتذكر جو الشقه حقتنا...كان كئيييييييييب...المطبخ اللي ماكان وافي يآكل منه شيء... غرفة النوم البارده اللي انقفل علي فيهاا...المكتب والتيلفونات المتكسرة فيه... وش اللي بقى؟؟...ولااا شيء..مجلس وافي اللي ينوم فيه...
وافي بعد مالاحظ ارتجافتي: بردانه؟؟.."
: لاااء..."
سفهني وفصخ الجاكيت حقه الجلد وحطه على كتوفي...الحركه نفسها خلتني احسى بدفاا غريب... لدرجة اني احتريت رغم برودة الجو...
: وانت؟؟..راح تبرد.."
جاوبني بلا مبالاة: ماعليك مني..اهتمي بنفسك.."
طالعته بكسل...شعره الناعم الغجري..اللي ينزل على رقبته باهمال...حواجبه الكثيرة والجرح اللي فيهم..قاطعهم من النص... خشمه الحاد...شفايفه الرفيعه اللي مسكرها بقوة..دقنه العنيد...رقبته السمرا الطويلة..
انتبه اني اطالعه..وكنا واقفين عند الاشارة...حسيت بخجل.. ما احب انه يغتر بنفسه... صح انه حلو...بس حتى ما ابيه يعرف اني اطالعه كل ماكان موجود...
وافي وهو يشوفني اشيل عيوني: طالعيني..."
كان امر...وامر قوي...لكني ماقدرت ارد عليه...احس ان وجهي ولع..خدودي صارت نيران ..
حط ايده تحت دقني وخلاني اطالعه..ذبت بعيونه..حاولت اني اكون قوية واطالعه بنفس الجرأة اللي ناظرني فيهاا...بس ماقدرت..حسيت ان دقات قلبي تناقز بسرعه.. عدلت جلستي بملل وطالعت قدامي..
وافي وهو يرجع يلف وجهي يمه..مبسوط بتعذيبي: لا تستحين مني!!...انا زوجك!!"
: موو...ب مستحيــ...ه.." قلتها وانا اطالع بحواجبه وبجبينه اللي باينه عليها تقطيبات الزمن المر!!
ابتسم وافي بنذاله: لا تطالعين بحواجبي...طالعي بعيوني..."
هزيت راسي باصرار اني ما اقدر اطالعه.. فشفته مستسلم بس ماشال عيونه من علي...
سمعنا صوت بوري وراناا..فضرب وافي راسه بيده..اوف..تخيلوا فتحت الاشارة مرتين ولا انتبهنا لهاا....
مشى وافي وهو يبتسم بسرعه..لمس طرف اصابعي...فجزعت ولملمت ايديني بحجري.. ما ابيه يلمسني...وافي مدمر...لا يمكن اخليه يستغل اي شيء ضدي...
لاحظت انه كشر بشراسه...وحسيته مثل ذيب كبير اسود على وشك يهجم علي ويقطعني بمخالبه...بس اللي صار..انه مد ايده ومسك ايدي بالقوة...
حسيت بقلبي شوي ويطلع من مكانه...كانت ايد وافي كبيرة...تعتصر ايدي الصغيرة برقة!! ... شعور غريب..ما اقدر اوصفه..احاسيس غريبة تدور فيني مثل الاعاصير... غمضت عيوني وتسندت على القزاز بكسل..فترك وافي ايدي بعدها بلحظات... حسيت بخيبة امل!!..تمنيت انه ما يتركها..ليت عندي نفس جرأته...ليتني مثل مرام...ليتني اقدر امسك ايده بنفس القوة والاصرار اللي اخذ فيهم ايدي!!...
تمددت على الكنبه اللي بالصاله بكسل..بعد ما اخذت دش حار...كنت مغمضة عيوني لمن حسيت بحركه بالصاله....فتحتها بسرعه..
شفت وافي جايب فراشه وتمدد على الكنبة اللي قدامي...ابتسمت غصبا علي على شكله..
-وافي..."
- ه..هلاااء.."
-ترى جوال جدتك خليته بالمزرعه.."
-وشووو؟؟..وش قصدك؟؟.."
قلت له وانا اهز كتوفي: يعني لا تنوم عندي.لا تراقبني...ماعندي لا تيلفون ولا موبايل.. والاهم باب الشقه مقفل.."
كان مصدوم بكلامي اللي انا عارفه انه سخيف جدا لكن غصبا علي... ما ابيه يكون قربي.. ايه يبعد عني ويخليني لوحدي...بدنيتي اللي انا بنيتها وتعايشت فيهاا...
- الافضل اني اسكت..لأني لو برد عليك يمكن ارتكب فيك جريمه!!"
طنشته وعطيته ظهري...وسمعت صوته وهو يتمدد على الكنبه اللي قبالي.... كنت عارفه انه يراقبني حتى بعد مرور نص ساعه...
رجعت لفيت اواجهه: الافضل نقلب غرفة النوم غرفة معيشة..."
طالعني بنص عين: ماطلبت شورك!!"
: هذا بيتي..مثل ماهو بيتك"
ابتسم بطريقة غريبة: بيتك؟؟!!"
: ايه..بيتي...عندك مانع؟؟.."
وافي وهو يغمض عيونه: لاااء..ماعندي مانع...يله نومي..عشان بكره تقومين بدري تكوين لي ثوب وشماغ...وراي دوام!!.."
مانمت بس اهو على طول نام... صدق الرجال عجيبين..مخلوقات غريبه...بمجرد مايغمضون عيونهم ينامون.. بعكسنا احنا الحريم.. اللي نفكر بكل شيء... نفكر بالفطور والغداء والعشا وتنظيف البيت وكوي الثياب ووووو...اوووووووووف...الافضل اني انوم قبل ما انجن صدق!!
في الصباح بعد ماراح وافي وبعد مانظفت البيت زين...جلست عند التلفزيون اطالع بالقنوات بملل..من قناة لثانية....ليت عندي تلفون...ليتني ماتركت جوال الجده في المزرعه.. كان على الاقل قعدت اسولف مع سارا او مع عفاري او سماح يا قلبي.. اللي مادري كيف حال ابوهم؟؟...اكيد انه مريض حيل...اكيد مسافرين عنده هالحين....الله يعنيهم ويخفف عليهم مصيبتهم ويصبرهم...ما يستاهلون والله... بنات مرة حبوبات... الله يخلي ابوهم لهم ياررب...
سمعت طق على الباب...فانهبلت ووقفت لحظات مو مصدقة...بس بعدين سمعت حس مهاا وهي تصارخ علي من ورا الباب..
: افتحيييي....انا مهاااا"
معقولة؟؟؟..وش تسوي مهاا هنا بالصبح؟؟.
فتحت الباب دخلت مهاا زي الصاروخ....طالعتني وهي مبتسمة وهي تشيل الغطاا عن وجهها: يووه...بررررد..."
: مهاا وشوو؟؟..وش تسوين هناا؟؟.."
مهاا وهي تضحك: الله من حسن الضيافة..جايه اسليك...روحي البسي..بنطلع نفطر وبعدين تروحين معي الجامعه.."
بتردد: مهاا من صدقك انت؟؟..الوقت..مررة بدري..."
مهاا وهي تطالع بساعتها: لااا موب بدري 8:30 نروح لمملكه نفطر..ونروح الجامعه.. يله بسررعه تراني طفشااانه.."
دخلت غرفة النوم وجات وراي مهاا مدرعمه....كنت مترددة حيل...
شافت مهاا شنطة الملابس على الارض: ماطلعتي ملابسك من الشنطه...لسه؟؟.."
ضحكت بخجل: ههههه..كل يوم اقول بكره.."
وطلعت لي تنورة سوداء نص الساق وبلوفر ناعم مشمشي....دخلت الحمام وطلبت منها تدق على وافي عشان تقوله وتركتها وهي تدق رقمه..
لبست ملابسي على عجل...وحطيت مكياج خفيف على وجهي...وكحلت عيوني وطلعت من الحمام...
مهاا وهي تعبس: مارد علي..حاط البريد الصوتي..."
خفت وبلعت ريقي بتردد: مهاا.. ما اعتقد ان خالك راح يكون مبسوووط.."
مهاا وهي تتوسلني: ليه انتم كذاا؟؟..عاادي بندق عليه لين يرد وباقوله انك معي.."
ترددت كثير بس بالاخير حسمت امري ووكلته لله.. لبست عبايتي وطلعت انا وياها بعد ماعلقت ورقة على باب المطبخ وعلمت وافي فيها اني مع مهاا ويدق على جوالها عشان يتأكد!!وكنت ميته خووف من اللي راح يصير!!
نزلت انا ومهاا وركبنا سيارتهم مع السواق....طلبت منه مهاا يودينا للمملكه... كنت اطالع بالسما..الجو يجنن الصباح... رغم برودته.... حتى ان البخار يطلع من فمنا لمن نتكلم.. بس بعد كان حلوو...
مهاا: افففف..مدري وش فيه خالي مايرد علي بالمرة..."
: حاولي مرة ثانية.....الله يخليك"
مهاا: وش هالرعب اللي مسببه خالي لك؟؟.."
: اي رعب يا بنت الحلال...بس هالشيء لازم تخيلي لو اموت هالحين ووافي موب راضي عن طلعتي..."
مهاا وهي مفجوعه: اعوذ بالله... وش التفكير؟؟... لااا ان شاء الله محنا بميتين.."
وترجع تدق على وافي من جديد...كنت خايفه موت من ردة فعله... انا عارفة وافي شلون يفكر..الله يستر!!...
حاولت اني اسولف مع مهاا وانبسط وحكيت لها عن اول يوم في الجامعه لي...ونسيت وافي مؤقتا مع السواليف..
وصلنا المملكه...وطلعنا فوق لسبازيو....وطلبنا لنا فطور دسم...
مهاا فجأة بحسرة:يووووووووه!!"
: وشووو؟؟.."
مهاا وهي تدخل جوالها بالشنطه: كله بسبتك خلص شحن جوالي.."
: نععععم؟؟...مهاا الله يخليك قولي شيء غير كذاا.."
مهاا وهي تعبس: للاسف قفل...بس عادي...انت كتبت رساله لخالي...ان شاء الله يشوفهاا..."
:..............
مهاا وهي تشرب من قهوتها: ملكه؟؟!!"
: وشو؟؟.."
مهاا بتردد: فيه شي غريب...يعني...ما ادري..خلاص انسي الموضوع.."
: مهاا وشو.؟؟ قولييي..لا تعلقيني كذااا...يله..."
مها بتردد اكبر: يعني...حياتك مع خالي..غرررريبة..."
حمر وجهي وبغيت اشرق بالقهوة: غريبة؟؟...من اي...ناحيه؟؟"
مهاا: انت فاهمتني...يعني ملابسك لمن دخلت البيت...يعنييي...معليش كانت مرة مو انيقه... وشعرك..كنت لامته بطريقة..اممم" وهزت كتوفها...
حسيت باحراج: اه...خالك مايحب المكياج الكثيــ.....رر...ووو....ما يحبني البس..ملابس متكلـ..فه في البيت..."
مهاا وهي مستغربة: معقووووووول؟؟؟..خالي وافي كان هو اللي يشتري لنا افخم الملابس .. كان يحب يشوفنا دوم مرتبات ويهاوشنا إذا شافنا..بشكل حوسه...."
طالعت فيها مترددة: هذا اللي يصير معي.."
وكملت باكبر نصبه في حياتي: اساسا اهو يقول اني لو البس خيشه طلعت قمر.."
مها: هههههههههههههههههههه...
: ايه...موب مصدقة روحي اساليه"
مها: ههههه...لااا عاد اهو صادق..مشاء الله عليك...الله يخليكم لبعض..."
خلصنا فطور ورحنا الجامعه..وسلمت على زميلاتي بالصف واستاذاتي...وبعضهم اتاثروا بكوا لمن عرفوا ان اهلي ماتوا..وانا بعد تأثرت لمن شفت جامعتي وكليتي الحبيبه... حتى اني ماكان ودي اطلع....سارا كانت موجوده...وانهبلت يوم شافتني وقمنا نصارخ بحماس ... حتى انها ماحضرت المحاظرات اللي عندها وهي تسولف معي...
سارا تعاتبني: من تزوجت ماعاد عرفت علومك..نذذذذذذله...دايم كنت تقولين انا صديقات حتى لو بعد الزواج والاطفال..."
: سارا يا عمري..مشغولة حيل ماعندي وقت لأي شيء..."
سارا طالعني بشك: نحفتي كثيييييييير...تغيرتي..."
: للاحلى؟؟.."
سارا وهي تتاملني: تصدقين...للأحلى...النحف ناسبك مرة..طالعه قمر...والشعر القصير حلو عليك بعد...بس شعرك اول ازين..."
:...والله لك وحشه يا سارا ولامك وابوك واخوانك وحشه..ان شاء الله ازوركم يا عيوني ..."
سارا بحماس وهي ترفع اصبعها قدام عيوني: طالعي...خاتمي الالماس..."
: وااااااااااو..مبرووووووووووك..الف الف مبروك..."
سارا مبسوطة: انخطبت...خطبني ولد جيرانا...يقول انه كان يحبني من كنت صغيرة... عاد ابيك تجين ملكتي..."
: ولووو..اكيد..."
والتفت على مهاا: هاا يا مهاا تراك بتجين معي عشان خالك يوافق..."
مهاا وهي تنط وسطنا: دام فيها معرس وعرس جايه جايه..ههههههههههه"
وودعت سارا ووعدتها اني ادوام الترم الجاي بعد ماكلمت الوكيله ووافقت على طول وقالت لي ان موضوعي سهل مرة..
طول الوقت بالسيارة وانا ومهاا راجعين ضحك وسوالف... كان حنين الجامعه يغمرني.. وحسيت براحه كبيرة حتى اني نسيت وافي نهائيا... مرينا البيتزا واشتريت غدا لي ولوافي ووصلتني مهاا وودعتها ووعدتني انها تجيني هي وامها وخواتها الربوع...
طلعت لشقتي...ودقيت الجرس..ماحد فتح لي..معقول وافي مارجع؟؟... استغربت..وطولت عند الباب....وبالاخير انفتح الباب...وطلع وراه وافي..اللي طالعني وكأنه شايف جني
12-03-07, 01:46 PM
nadeeer
جديد مواضيع قسم القصص المكتمله
العرض العادي
