كاتب الموضوع :
ابتسم رغم حزني
المنتدى :
القصص المكتمله
الفصل الأخير
الجزء الأول...
اممم...النور يشع على عيوني بقوة!!..غطيت وجهي بالمخده ....حرام عليك يا وافي!!
وافي بلؤم: يله حياتي قوومي!!..."
قلت بتمرد: لاااااااااااء..يله روح هناك...ابي انووم.."
وافي وهو يفتح التلفزيون ويرفع الصوت على الاخير: ما اذكرك بأحد؟؟"
طالعته من تحت المخده: وافي الله يخليك.."
وافي وكأنه مايسمع: قلتي شيء؟؟..تراني ما اسمع..قومي وتعالي وقوليلي وش تبين؟؟"
ابتسمت بنعومة واستسلمت ورميت المخده:خلاااص هذاني قمت...ممكن تقصر الصوت عشان ما تجينا شكاوي من العرسان اللي في السويتات الثانية!!"
وافي وهو يهز كتوفه ويسفهني ويرفع الصوت لآخر شيء على موسيقى اوبرا قوية...
ويجي يجلس جنبي على السرير..طاالعته شوي..وابتسم لنظراتي فحمرت خدودي مرة..وقمت من السرير...
رحت للحمام واخذت شاور سريع..ورجعت عشان الاقي وافي يفطر على رواق...
وهو يقرأ بجواله...
ابتسم بوجهي اول ماشافني...واشر لي عشان اجلس قريب منه بس سفهته وجلست قباالته...وطلبته جواله لأني مدري وين راميه جوالي؟؟!!
دقيت على مهاا على طول...كانت الساعه 8:00ص...وصدق ان وقتي غير منااسب بس بشوف هالبنت وش سوت؟؟؟..
طول الجوال وهو يدق...وبالاخير...
: الووووووووو...وينك يا الدبه؟؟؟..هاا قولي لي وش صاار؟؟.."
بغى وجهي يطيح يوم سمعت صوت قوي ثقيل يقول: نعممم؟؟..معليش مهاا نايمه.."
قلت باحراج وانا اطالع بوافي واعض على شفتي: اوووه...آسفه مرة...ياليت تقولهاا تدق على هالجوال اذا صحت من النوم...آسفه مرة ثانية.." وقفلت الخط وانا العن نفسي مية مرة على غبائي..
وافي وفيه ضحكة: رد عليك فارس؟؟"
: ايه..واااااااااافي لااا تطالعني كذاا.."
وافي كان يحاول انه مايضحك وانا حاسه باحراج فضيع...وش هالفشيلة ياربي؟؟..اكيد بيقول مرت خالهاا مرجوجة درجة اولى...وبعدين انا وسؤوالي الغبي وش صاااار؟؟..آآآآآآآه...
وافي ماتحمل يشوفني كذا...وقام يقلدني عشان يقهرني..
: الوووو...مهاا وش صااار؟؟.."
اه حررررني مرة...فرميت عليه الخدادية اللي كانت على الارض...فطاح كاس العصير اللي عنده وانتثر على روب الحمام حقه...حقد علي مرة وطالعني مقهور...ومسك الخدادية اللي رميتها ورماها مرة ثااانية...فحاولت اني اهرب لكن ماقدرت...وقمت احذفه باي شيء الاقيه....وبالاخير طحناا على الارض واحنا ميتين ضحك...
رغم اني جواة نفسي كنت اردد الله يكفينا شر هالضحك!!
قلت واناا مبتسمة وبلؤم: آهاا.....مو مصدقة..احس اني اسمع قصة رومانسية خيالية..."
مهاا وهي معصبة: اي رومانسية واي بطيخ...اقولك تهاوشنا امس..وقلبناها من ليلة دخله لليلة نكد عمرها ماصارت باي زمن.."
: مهاا لااا تقولين هالحكي...يمكن كان حاقد عليك شوي بسبب سواياك اللي..." وسكت وانا منحرجه من مهاا..
مهاا بعصبية: سواياي تسواه مية مرة...ملكه...ذلني والله ذلني...تخيلي اول مادخلناا وش قالي؟؟"
قلت وانا اسمع القصه للمرة الرابعه: وش قال؟؟.."
قالت بعصبية: طلب مني اسوي له شاهي... ورديت عليه وقلت له: موب انت اللي تخدم فيني...تخيلي وش رد علي.: الزمي حدودك لااا تخليني اقلب هالليلة عليك نكد...فرديت عليه بغرور: ترا مايهمني...لأن ليلتي من اولهاا نكد..."
قلت وانا اكمل عنهاا: فقام وطالع فيك بطريقة شديدة..وحط شماغه على راسه وطلع وترك...صح؟؟"
مهاا بحسرة: ايه...فيه رجل يقول لمرته روحي سوي لي شاهي من اول ليلة بينهم؟؟..بعدين فيه رجل يقول لمرته لااا تخليني اقلب هالليلة عليك نكد...والنفس يا له متحملتك؟؟؟"
رديت وانا اشوف وافي يتحرك ببطء على فراشه ويتململ من صوتي: مهاا يا عمري...اناا والله مو عاارفه وش اقولك...خلك قوية...انت لو تدرين ان اول ليلة لي مع خالك انضربت فيهاا..."
مهاا صرخت بعصبية: وجع وجع...والله لو يمد يده علي...اني قسم بالله لاضربه والله اهتم فيه.."
بعدين تعوذت من ابليس وانا ساكته ماعلقت كملت بعد شوي: استغفر الله العظيم...معقولة وافي يضرب؟؟..اجل ما الوم فارس لو ذبحني.."
: مهاا...هدي اعصابك...بعد بكره راح نسافر كلناا...حاولي تمالكين اعصابك هاليومين...اخاف يحلف عليك انك ماتسافرين..."
مهاا وهي تتكلم بصوت واطي: يااويلي..الله لااا يقوله...بحاول امسك لسااني..رغم اني ما اقدر..ملكه تصوري اني طلبته يطلقني...مع هذا رفض...شلون الحر يقرب من وحده عايفته؟؟.."
: آآآآآآآآآآآآآه...لااا تقهريني يا مهاا..امسكي اعصابك واذا شفتك لي تفاهم معك...يا شيخه لخليك تعلمين فارس مين مهاا صح.."
مهاا بحماس: اوكيه...بروح انام..عشان اذا قام من النوم...مايقعد يتأمر علي..باي"
سألتها قبل لاا تقفل: دقيت عليك الصبح..ورد علي هو.."
مهاا: ايه...اخذ جوالي مني...يقول اني ما احتاجه خير شر...هذا طبعا بعد مارجع الساعه 6 الصباح..فيه عريس يطلع من بدري ومايرجع غير الصبح..فيه عريــ.."
قاطعتها قبل لاا تكمل: يله تصبحين على خير...امسكي اعصابك ولاا تنافخين وخلك حلوة ووش زينك؟؟...وتززيني..وباي...."
مهاا باستسلاام: باي...بوسيلي سيد السيد حقك نيابة عني.."
: يوصل حبيبتي..باي"
طالعت بوافي اللي كان في سابع نومه...كان شكله يحلم بحاجه حلوة...واضح من ملاامحه اللي تغير 180درجة وهو نايم...احس كأنه طفل صغير محتاجني بقوة...كل الخشونة بملاامحه تختفي..ويحل مكانها راحه كبيرة...
لعبت بشعره بخفه..وقريت عليه المعوذات وآية الكرسي....وبست راسه بخفه...ورحت يم الشباك...
طالعت بالرياض في آخر الليل...كان الهدوء غالب على المكان...ويادوب تمر بعض السيارات من وقت لثاني..
رفعت عيوني للسماء..يمه..يبه...اناا بديت اعيش الحياه...اناا مو مصدقه كل شيء فعيوني غايم..احس حتى ضحكة وافي لي شيء اكبر من اني اصدقه...يمه...يبه...اناا خايفه...خاايفه وافي يروح لكم..واقعد وحيده...اقعد من جديد يتيمة...انا ذقت مرارة اليتم وتجرعتهاا مرة ورى مرة...
لوو...حصل ان صار لوافي شيء..فأعتقد اني راح امووت فوق قبره من الحزن والالم والهم!!
سمعت صوت وافي.. فالتفت عشان اشوف وش يبي..بس لقيته نايم ويحلم..رحت يمه بسرعه عشان اسمع وش يقول؟؟.
كان يقول بصوت واطي: احبك..لااا تتركيني...والله آسف!!.."
ومسك ايدي بقوة مرة...حاولت اني اسحبهاا منه واقومه بس كان اقوى مني...ولااا قدر يقوم من النوم...
وافي وهو يتكلم بحزن فضيع: لاا ترووحين...خلك هناا...انت هناا..لااا ترووووووووحين!!" صرخ بآخر كلمة بقوة...
فتح عيونه وصرخت فيه: واافي قوم انت ناايم...قوووم..."
وافي وهو يحاول يستوعب انه مو ناايم: ووووين؟..وش صاار؟؟"
كان جسمه معرق وصدره يلمع عرق...حتى شعره التصق في وجهه...طالعني وغمض عيونه بقوة...
قلت واناا امسك ايده: وشو؟؟.."
وافي وهو يعض شفته بقوة: اناا خايف..." قالهاا لي ورمى براسه على صدري وحوطني بقوة بيدينه وهو يرتجف..
استغربت من خوفه وحاولت اني اهديه قد مااقدر...بس ظل يرتجف لوقت طويل!!...حتى غلبناا النوم سوه!!
في المطار...كنت مومصدقة اني اشوف مهاا... اول ماشافتني ضمتني بقوة مرة...وبدون تفكير..بالناس اللي حواليناا...
وسلمت على وافي بعد....وافي راح يم زوجهاا واخذوا منا الاوراق المهمه عشان يخلصون اجراءات ونروح كلناا سوا...
جلست جنبي مهاا في آخر صف الكراسي حقت الانتظار...وقالت وهي ترتجف: قهرررني يا ملكه...تصوري اني قعدت اتوسله عشان مايلغي السفره.."
قلت واناا احط ايدي فوق ايدهاا: ليش؟؟..وش اللي صار؟؟"
مهاا بعصبية وبصوت شوي مرتفع: حيواااان!!....اكرررررهههههه...اكررررررهههه مرة..يقول اني ما احرك فيه شعرة...واني ابدا مو حلوة..ومدري ليش اشوف نفسي عليه...فرديت عليه وقلت له يحمد ربه اني اقدر اطالع بوجهه من غير مايجني غثيان.."
: وشوووو؟؟..هدي اعصابك يا مهاا..يمكن مقهور من حركااتك..وبعدين فيه عروس تقول لرجلهاا كذا..."
مهاا وهي تغمض عيونها بقوة عشان ماتصيح: الله لااا يسامحك يا يبه...ظلمتني وطول عمرك ظاالمني..."
: ريحي نفسك...الدعاوي ماراح تريحك يا مهاا...لأن المكتوب صار..ولاا عاد يمديك تسوين شيء...غير ترضين بقدرك..اسفهي فارس يا مهاا..اسفهيه....لااا تتهاوشين معاه.."
مهاا بحسرة: ليتني اقدر اسفهه...بس اذا شفته غصب اتشاكل معه...تصوري زواجنا له يومين كنهاا سنتين..."
: طيب وش قلت لامك؟؟"
مهاا ببرود: وش قلت لها بعد؟؟..قلت لهاا اللي تبي تسمعه...مثل ماقلت لوافي...الحياه اروع ماتكون مع فارس"
: احسن ماسويتي...لااحد يدري عن مشاكلكم...وبأذن الله اني لساعدك واخلك تخلين فارس هذا خاتم في اصباعك تحركينه مثل ماتبين..."
مهاا وهي تهز راسها: ماابي منه شيء...ابيه يطلقني...صدق انه وجه قرادة..بسبته تزحلقت اليوم بالحمام وبغيت اموت...ولااا مسوي فيهاا مساعده..جاا يساعدني حظرته بس طردته بره..."
طالعت مهاا واناا مو مصدقة هالبنت شرسه مرة...ماعندهاا اي رقة الله يعينك يا فارس عليهاا..ومانتبهت اني قلت الكلمة بصوت عاالي..لأن مهاا طالعت فيني مقهورة: ياختي ادعي لي انا اولى.."
عضيت على شفايفي وسكت واسفهتني مهاا لأن صدرهاا ضاق مرة..من كلمتي اللي سقطت سهوا..
دخلناا الطيارة وافي كان ماسك ايدي بكل رقة...وخلاني اجلس جنب الشباك مكاني المفضل على طول...
قلت بنعومة وانا اشوف فارس يأشر لمهاا تجلس بالمكان اللي تبي وهي تبعد صدره عنهاا بقوة وبطريقة ابدا مو لاايقه: شوف بنت اختك.."
وافي وهو يحك شعر راسه بقهر: ودي امسكها واطقهااا...ياربي هالبنت اخلااقها تراب!!"
: هههههه...يا بعد عمري يا فارس..!!"
وافي وهو يسوي نفسه معصب: نعععم؟؟...اناا بعد عمرك وبس!!"
: اكيد انت بعد عمري وقلبي وحياتي وعيوني وكبدي..وووبعدهم كلهم.."
وافي برضا وهو يبتسم لي: اكيد؟؟!!.."
: اكيد.."
غمض عيونه ورمى راسه على ورا...طالعته براحه...بدى شوي يرجع لوافي اللي اعرفه...امس انقلب علي بطريقة غريبة...كان شكله تعبان وطول وقته يطالعني..واحس انه وده يقول لي شيء...بس كان رافض يتكلم...وبآخر الليل اجبرته يتكلم ويقول وش فيه؟؟" كنت متأكده ان الموضوع بسبب الحلم...وفعلاا طلع مثل ماتوقعت...قالي وهو يرتجف غصبا عليه....شفت نفسي ارميك بالبحر...واغطس راسك فيه بقوة عشان اموتك...كنت احس بحقد غريب...وانت كنت توسلين لي وتصيحين بأعلى صوتك وتحلفين لي انك بريئة...لكن انا ما اهتميت...رصيت على راسك بقوة عشان ماتقدرين تنفسين وتموتين...
لكن كانت الرياح في البحر قوية مرة...فطحت من القارب اللي كنت فوقه...ولقيت نفسي اناا اللي اغرق وانت تبعدين عني...وترفضين انك تنقذيني...رفضتي يا ملكه انك تسامحيني...!! رفضتي ونظرت لي وعيونك مليانه دموع وصديتي عني ورحتي!!
قلت واناا اقرا لوافي المذكرات لأنه يحب صوتي مرة: ممكن اوقف؟؟"
وافي وهو يسحب مني الكتاب: وقفي بس انا بكمل قرايه.."
قلت له: وااااااااااافي...خلنا نسولف!!"
وافي قفل الكتاب: يله سولفييي..واناا اسمع..."
قلت واناا اشوف المضيفه جاية تصب القهوة لناا: صراحه هالمضيفه مو عاجبتني..من اول وهي توزع ابتسامات لك.."
وافي : ههههههه...عاادي معجبه...مثلهاا مثل غيرهاا.."
وكمل بغرور: عااد انت لاا تنكرين جمالي يا ملكه...ترى جمالي له تأثير مو طبيعي على البنات..."
قلت وانا مقهورة منه: ترى مافيك زود...رجال عادي...هذا تقييمك...يعني من واحد لعشرة تآخذ سبعه..."
وافي بغرور اكثر من اول: سبعه!!..هه...ياحليلك خلي مهاا تقيمني تعطيني عشرة وزود..."
مديت بوزي يوم وقفت المضيفه فوق راسناا وهي تسأل اذا نبي قهوة او لاااء؟؟...
مد لهاا وافي فنجاله واناا بعد مديت لهاا فنجالي...ابتسمت بوجه وافي بنعومة...وعيونهاا تطوف عليهاا..
اناا ولعت غيرة هناا...وحسيت اني ياله ماسكه نفسي.. وافي عارف وش افكر فيه بس سفهني...ورجع لكتابه...
طالعت بره الشباك..كان الهوا بارد مرة...والدنياا ظلاام...بيناا وبينهم تقريبا سبع ساعات...يعني على الفجر تقريبا هم هالحين..
رجعت طالعت بوافي اللي كان متأثر بالكتاب اللي يقراه...وحسيت بملل..بس بالاخير تركت قهوتي على جنب...وحطيت راسي على كتف وافي..استنشق ريحة عطره الحلوة...ابتسم لي بنعومة وقمنااا نقرا الكتاب سوه...
في آخر الرحلة وماعاد بقى على مونتريال شيء كثير...
كشفت الغطاا اللي على وجهي بخجل...ماكان ودي اكشفه..بس بالاخير اضطريت اني اسمع كلاامه واكشف وجهي بس...وابقي على باقي حجابي...
مهاا من ركبت الطياره اساسا كشفت ولاا اهتمت بفارس نهائيا...وشرح لي وافي انهاا متعودة اذا سافرت بره انهاا ماتلبس اي حجاب...وكل العايله تقريبا مثلهاا...وقال لي اذا ابي اكشف ماعنده اي مشكله...
بس اناا رفضت نهائيا...كافي اني كشفت وجهي...تذكرت موقف عمي معي...لمن اجبرني انزل عبايتي...كان انسان فضيع..ماعنده اي اسلوب او طريقة للتفاهم...
ارتجفت غصبا علي وانا اذكره...ومسكت يد وافي بقوة...قالي وافي وهو ياكل شبس: بردانه؟؟.."
هزيت له راسي بدون ما اتكلم..ففصخ جاكيته الجلدي الانيق وحطه على كتوفي...حسيت بامتنان فضيع له...ولمست شعره ببطء...وكنا بدنيا ثانية...بس صوت مهاا خلانا نبعد عن بعض على طول...
مهاا وهي توقف فوق راسناا: يا عيني على الرومانسية...بس ترى مكانهاا غلط..."
وافي اللي طالع حوله منحرج: بروح اجلس يم فارس..."
مهاا وهي تطالع بوافي وتغمز له: عشان كذا حاجز لناا بفندق..خايف نجي ونقلق راحتك!!"
: مهاااااااا...وش هالحكي...تعالي انثبري...ياطول لسااانك.."
طالع وافي بمهاا اللي انحرجت من كلاامي: لقطي وجهك.."
قال لهاا وراح جنب فارس...اما مهاا جات جلست بجنبي وتقول لي: شفتي كيف كسرت عينه؟؟..فصخت عبايتي ولاا قدر يتكلم ويقول كلمة وحده بس!!"
: مبروووووووووووك..مشاء الله عليك..وش هالانجاز؟؟" قلتهاا بتريقة..
اخبطتني مهاا على كتفي: هالانجاز بالنسبة لي يعني كثيييييير...شوفي كيف منزل وجهه مسوي مستحي.."
: آآآآآآآآآآآآآآآآه...بسكت عشان ما اضايقك.."
مهاا ابتسمت وهي تغمز لي: وش هالحركات انت وخالي وافي...معقووووول فيه رجال سعودي يتخلى عن انانيته ويعطيك جاكيته.."
طالعت بجاكيت وافي وابتسمت: فيه..وافي يا حبيبتي..بس قولي مشاء الله.."
مهاا بلؤم: لااااء ابي احسده عشان تحسين بمعاناتي.."
عصبت عليهاا: مهاا قولي مشاء الله..."
مهاا بعناد: لاااء..." وطلعت مراية من شنطتهاا وقامت تسوي شعرهاا الكثير والناعم وتضبط مكياجها الثقيل... وكملت: وش رايك بلبسي؟؟"
طالعتهاا وانا اشوف الحريم يروحون الحمامات ويطلعون بشكل ثاني اللي بحجاب بس يغطي شعرهاا...واللي بعباية ملونه.. واللي على طول خلعت كل شيء مثل مهاا: لبسك حلووو..مرة"
مهاا وهي تطالع بحجابي: طيب انت روحي البسي شيء زي الناس.."
قلت لهاا وانا اسوي طرحتي زين: مهاا كافي اني شلت النقاب...وزين وافي خلااني البس عباية على الكتف..وهذا صراحه كافيني...وبعدين ان شاء الله اذا وصلت شقتنا دورت لي لبس مرتب وساتر ولبسته..."
مهاا وهي تهز كتوفهاا: انت حرة!!..."
وسفهتني وقامت تقرا بمذكرات موسليني اللي كان وافي يقراها..
واخيرا وصلنا...
ضحكت على حركة مهاا وفارس وشلون يطالعون ببعض بغيض..ومهاا بكل بساطه تركت شنطة التجميل حقتهاا وخلت فارس يشيلهاا..
وجات وراي بالضبط واناا مع وافي وشايلين شنطنا الخفيفة لأني ما اخذت ملاابس كثير...على اساس اني اشتري من كنداا كم قطعة...ومافيني صراحه اشيل معي شنطة كبيرة..
نزلناا اخيرا من الطيارة...كان الهواء بارد مرة فارتجفت منه بقوة رغم ان جاكيت وافي لسه علي...وانتبهت ان القميص اللي لاابسه خفيف مو ثقيل...فأول مالامست رجولناا ارض كندا...عطيته الجاكيت ولاابسه بسرعه بدون مايناقشني..
خلصناا اجراءات المطار للاسف مو بسرعه...وكنت متأكده انه بسببي اناا وحجابي...وكمان لأن الطياره جايه من السعودية..
بس مهاا ورجلهاا خلصوا بسرعه..لكن اناا ووافي توهقناا شوي...بس بالاخير كل الامور مشت على احسن حال...
وصلناا للشارع...واخذناا باص..واناا كنت مبسوطة اطالع بكل شيء بفرح...لأني متعودة اجي لكندا مع اهلي اول..وانا اللي طالبت وافي يآخذني هناا...
كنت اتنفس الهواء بفرح وحسيت ان ودي اركض...واترك وافي ومهاا وفارس واروح لوحدي...اركض وسط الامطار والطبيعه الخلاابة...لكني تحكمت بنفسي وركبت الباص معهم...
جلست اناا ومهاا جنب بعض...وكانت مهاا لاابسه بنطلون جينز وبوت عالي وبلوزة صوفيه اكمام طويله لونهاا عنابي..
كانت مهاا تأشر لكل شيء مبسوطة لأنهاا اول مرة تجي لهالمكان...واناا بعد كنت اوريهاا الاماكن بفرح..فارس ووافي كان واضح عليهم التعب...وحتى ماتكلموا كانوا مغمضين عيونهم...وقف الباص كذا مرة...وكان ينزل ناس وناس تركب..
بالاخير وصلناا قريب للفندق اللي مهاا ورجلهاا لاازم ينزلون له...باستني مهاا ووعدتهاا اننا نتقابل الظهر او العصر...وحلفتهاا انها ماتسوي اي مشاكل مع رجلهاا..وهزت راسها لي ان شاء الله..
جلست جنب وافي..وطالعناا بالشباك...وشفناا مهاا وهي تبعد عن ي زوجهاا اللي كان مادهااا..فغمضت عيوني بقوة..ووافي بعد تأوه..لأننا تذكرناا ببعض وكيف كنا متمردين بقوة؟؟؟...
وافي وهو لسه مغمض عيونه: ليش لااازم بعض الناس تنكد على نفسهاا في البداية؟؟.."
مارديت عليه وراقبت بعيوني مهاا وفارس حتى يوم بعد الباص عنهم...ولااحظت انهم وقفوا في نص الشارع وكان واضح ان مهاا تصرخ بوجهه..هزيت راسي بحسرة على فارس المسكين!!..
ورجعت طالعت بوافي اللي كان يفكر بنفس تفكيري..وعشان اشغله عن هالهم..قعدت ااشر له على بعض الاماكن واحكيله عني اناا واهلي...ووش كنا نسوي؟؟..
وافي بعد تفاعل معي وقام يحكيلي عن بعض المغامرات اللي عاشهاا هناا هو واصحابه لمن كان يدري الجامعه بامريكا..
وتفاعلناا بالحكي مرة...وكنت احاول اني احفظ كل معلومة يقولهاا وافي...لأني احب كل شيء يخصه...وابي اكون اكثر وحده تعرف عنه كل شيء..اكثر من مهاا وحصه وجدته والكل...
تأملت العماره الصغيرة المكونة من طابقين..واعجبني شكلهاا المريح نفسيا نوعا ما...سلم البواب على وافي وكان واضح انه يعرفه ومتذكره...وشال شنطنا القليلة...
وصلناا للشقه اللي في الدور الثاني...وكانت شقه مرتبة مرة..وشكلهاا حلووو..وحسيت فيهاا براحه مرة..بس مدري ليش اشتقت بنفس اللحظة لحصه وصيته وكل اهل السعودية...
وقررت اني اكلمهم بعد ما اقوم من النوم...قال وافي وهو يقفل الباب حق الشقه: بآخذ لي شاور سريع...وبننزل نروح نفطر في مكان..."
قلت له وانا افصخ عبايتي: ان شاء الله...."
وشفته وهو يدخل لغرفة..وعرفت انها غرفة النوم..رميت الشيله اللي على راسي بضيق..خنقتني مرة...وحررت شعري الاحمر...
ورحت للشباك الكبير اللي بالصاله وفتحته على اوسع شي..وطالعت بالشارع وبالحركه اللي فيه...ماكان فيه سيارات كثير...كانت فيه باصات كثيرة تمر..وكمان ناس راكبين على سياكلهم..
وناس كثير يمشون على رجولهم..محد له شغل باحد...كلن ماشي بحاله وهو يفكر بهمومه ومشاكله..
اخذت نفس...اتنفس هوى مونتريال البارد..وارتجفت واناا اسمع صوت الموية بالحمام..وافي!!...الله يستر عليه.. ان شاء الله يكون انتظر لين ماتدفى الموية..
رجعت قفلت الشباك..ودخلت المطبخ غسلت وجهي بالموية...فتحت باب الثلااجه بفضول مع اني متأكده ان مافيه شيء..
بس اللي استغربته اني لقيت الثلااجه مليانه بكل شيء...اجبان انواع مختلفه..معلبات بكل الانواع...وعصيرات...
بس انا كنت مشتهية قهوة تركية...فطلعت كيس القهوة...وركبت موية على النار...وقعدت على كرسي انتظر الموية تغلي ووافي يرجع لي...
رجع وافي بعد نص ساعه..وكان شكله ميت برد..وراح يشغل التدفئة...وبعد ماشغلهاا رجع وجلس قدامي...وقام ينشف شعره...حطيت ايدي على خدي وقعدت اتامله وهو يمسك جواله ويدق على....مدري مين...
وافي وهو يطالعني: الووووو..."
ابتسمت واناا اسمع صوت حصه وهي تصيح: ووووينكم؟؟..ما قلتولي انكم وصلتواا...قلقت عليكم مرة.."
طبعا وافي كان فاتح السبيكر...رحت للموية اللي تغلي وسويت لناا القهوة وجلست قباله..
اخذ مني فنجال القهوة..وشرب منه شوي...وسولف مع حصه بعد ماشال السبيكر..
شربت شوية قهوة ولااحظت ان لسه شعر وافي مبلول..ياربي هالرجال مايعرف ينشف شعره...
قمت وتركت قهوتي واخذت المنشفه منه..وقمت انشف شعره بسرعه...
وافي وهو يضحك ويعلم صيته: كلمي مرت اخوك...تعاملني كأني طفل..."
قلت وانا اخذ الجوال منه: هلااا والله بحصه...شلونك يالغلااا؟؟..شفتي شلون اخوك مايملى عينه شيء.."
وافي بأعلى صوت: انااا؟؟...انا ماقلت لك عامليني مثل هالبزران.."
قلت مبررة: والله يا حصه...اني بس كنت خاايفه عليه...تارك شعره مبلول...والجو بارد مرة.."
حصه وهي تدعي: يا رب..ان مهاا تعامل فارس بهالطريقة.."
قلت لهاا وانا اعض شفتي: يا حصه..دقي على مهاا..ترى والله انها مهبلة برجلهاا.."
حصه وهي تحسر: دقيت...قاهرتني يا ملكه...بس مو قادره اسوي لهاا شيء.."
: الله يهديهاا انا بحاول قد مقدر اني اخليهااا ترضا بنصيبهاا وتحبه بعد..."
وافي اللي سحب الجوال مني: ياهووه اجلوا مخططاتكم بعد شهر العسل.."
قلت وانا ارمي عليه المنشفه فوق راسه: اعاملك كنك طفل؟؟...صدق اني غبية.."
وتركته ورحت مسوية حالي ان صدري ضايق...بس مالحقني الا بعد عشر دقايق تقريبا...
قال وهو يشوفني منسدحه على السرير: خففتي علي الله يخفف عليك...ودي اروح اقابل صديقة قديمه وكنت مستحي اقولك..وجات من رب العالمين.."
صرخت فيه وانا ارمي المخده: مالك امل تروح لوحدك..."
وافي اللي تخبى ورى باب الدولااب...: طيب خلااص..روحي البسي ملاابسك...عشان نطلع.."
قلت وانا اسحب باب الدولاب: ولااا فيه شوفة لصديقات؟؟"
وافي وهو يهز راسه: حاظر عمتي...بس خلصيني والبسي.."
طعت بنطلون جينز..لبسته ولبست فوقه جاكيت طويل لحد الركبة ولونه عسلي...وحطيت على راسي ايشارب ملون يغطي شعري..ولاا حطيت مكياج..وطلعت مع وافي اللي تفحصني من فوق لتحت وبعد ماسوى بعض التعديلات بلبسي وافق اني اطلع وياه...
اممم...لذيذة هالقهوة...الذ قهوة ممكن تذوقونهاا..دسمه وفيها طعم توفي غير شكل..على قولة وافي..
كان المقهى الصغير اللي رحنا نفطر فيه مرة بيتوتي...كأنوا صاله في بيت..كنبات وبينهم طاولاات صغيرة مرة للقهوة...
ختم وافي كلامه: ما كانت ايام مميزة بحيااتي..عانت فيهااا كثير..."
قلت وانا اتذكر موضوع المرض اللي فيه: ليش عانيت؟؟.."
وافي وهو يغمض عيونه يتذكر: بعد سنة من جيتي لامريكا...اكتشفت اني مريض بمرض صعب اني اقوم منه.."
سألته بتردد: مرض؟؟....سر....سرطان قصدك؟؟"
فتح وافي عيونه بقوة: شلون عرفتي؟؟..."
بلعت ريقي وانا احاول اركز على الكلاام اللي راح اقوله: اناا عرفت من فترة يا وافي.."
وافي وهو مستغرب: بس..شلون ما احد يعرف عن السرطان نهائيا..."
قلت اشرح له: لقيت بصيدليتك ادوية كثيرة...وو...و..عرفت منهاا المرض.."
وافي وهو يضرب جبينه وابتسم: ايه احتفظت بالادوية هناك.."
سألته وانا اتألم: المرض له سنين وهو معك..ومع هذا ماعالجته؟؟...ليمتى يا وافي؟؟.."
وافي فتح عيونه الناعسه على الأخير وطالعني كأنه مو فاهم وش قاعده اتكلم عنه...
قلت بمرارة: تخيل الآلامي يا وافي..واناا اتاملك كل ليلة وميتة خوف انك تموت..ميتة خوف انك تألم ولا اقدر اخفف عليك...لدرجة اني حتى الفرحه حرمت نفسي منهاا لأني عارفه الالم اللي بيلحقهاا.."
وافي وهو يشد شوي من شعره وبعدين يرجعه ورى: مو فااهم حبيبتي...ليش خاايفه؟؟.."
وكمل وهو يجي يجلس جنبي وانا عيوني كلها دموع ابكي بصمت لأنه مصر يخفف علي حتى رغم ألمه!!
: ملكه...اناا شفيت من هالمرض..ونسبة رجوعه كبيرة...بس حتى الآن..ما رجع لي.."
فتحت فمي مو مستوعبة اللي قال..وطالعته...غمضت عيوني من جديد....ودفنت راسي بصدره..ابكي..وابكي..وابكي...
وافي وهو يضحك على شكلي: مفرو تضحكين بأعلى صوت ان رجلك مافيه اي مرض مو تصيحين.."
قلت له وانا اشاهق والناس تطالعني مستغربة: انت مو فااهمني...اناا عشت بكابوس...طول الفترة اللي فاتت.."
وافي وهو يرجع يجلس مكانه ويمسك الآيسكريم اللي بالكاسه الكبيرة: ملكه..من متى وانت تعرفين بموضوع المرض؟؟"
طالعته وانا امسح دموعي: من فترة طويله..."
وافي بابتسامه باهتة: رجعت لي بس علشان اعتقادك اني مريض؟؟"
ترددت في الاجابه...ماودي اكذب..بس هذا الصدق رجعتلك لأنك مريض...وغفرت لك واعطيت نفسي فرصة بس لأنك مريض...كنت ابيك تعيش كل ايامك الباقية بفرح..وتموت وانت راضي علي..!!
وافي اللي قرا الاجابة في عيوني...بلع ريقه وحسيت انه يجاهد عشان ماينفجر بوجهي..رجع شعره ورى كذا مرة... وقام يطقطق اصابعه...وشرب كوبين قهوة...والمصيبه العظمى..طلب علبة سجاير...
جات له علبة السجاير...فطلع السيجارة الطويله النحيفه اللي اكرهها...ورماها بفمه وولعها!!
قلت وانا آكل شوي من الكروسان اللي معي: ماحكيتي لي حكاية مرضك؟؟"
وافي طالعني ببرود وقال وهو يهز اكتافه: بعد ماجيت لامريكا بسنة..اكتشفت ان معي ورم في راسي...وهالورم كان قريب مرة من مناطق البلاغه في دماغي اللي تتحكم بحركتي وكلاامي...فرحت وازلته عند دكتور شاطر وكبير هنا..."
قلت بلهفة: وبعدين؟؟..والادوية اللي في صيدليتك؟؟"
وافي وهو يرمي السيجارة الاولى ويطلع سيجارة ثانية وبهمة ونشاط يولعهاا ويرميها بين شفايفه: الادوية...لأني بعد العملية..عانت من الآلام فضيعه....وصداع مو طبيعي شوي ويشق راسي من قوه...فكتبوا لي الدكاترة بعض الادوية اللي تخفف الألم..استخدمتها فترة طويله وبعدين خذيتهاا معي كلهاا للسعودية...كنت احب اني اشوفها عشان اتذكر النعمة اللي انا فيهاا..اللي مثل حالتي مفروض ميت من سنين...وشوفة الادوية كانت صدق..تخليني احمد ربي صبح وليل..."
اتنفست بفرح: الحمدالله....توعدني اذا رجعنا السعودية ترميهاا كلهاا الا حقت الشقيقة.."
وافي ببرود: لااااء...وبعدين.."
وسكت وحاول يدور كلمات: خلااص انت هالحين..تقدرين ترجعين تعيشين مع..مع جدتي.."
ووقف وتركني وطلع من المقهى!!
لحقته بسرعه...بس ما اهتم فيني بالمرة...سفهني..وكان واضح ان صدره ضايق مرة...
انتبهت ان الجو مغيم...والمطر على وشك ينزل...والبرد...اووووووه..مو طبيعي..
قلت بحسرة بنص الشارع وبأعلى صوت: والله احبك.."
وافي وهو يلتفت: فضحتينااا!!"
قلت واناا مو مهتمة واركض بسرعه عشان اجي قدامه: مايهم...خل هالعالم كلهم يعرفون قد ايش انا احبك...وقد يش انت قاسي علي.."
وافي وهو يطالع حوله: ملكه..مايحتاج تزاعقين.."
قلت بحرارة: بس انت بتتركني...وبتردني عند جدتك...انت ماتخاف الله فيني.."
وانقهرت منه يوم سفهني وحط سماعات الجوال بأذنه....ضربته بقوة على صدره وتركته...حاول انه يلحقني....بس هربت منه قبل مايقدر يمسكني...وركبت باص شفته على وشك يتحرك...
طلبت من الباص يآخذني للفندق اللي مهاا فيه...وصلني للمكان اللي طلبت...
نزلت من الباص...والمطر بسرعه بللني...بغمضة عين... ما اهتميت بالبلل اللي انتشر بملاابسي...
فتحت شنطتي...وطلعت جوالي...لقيت فوق الثلااثين مكالمه من وافي...سفهته ودقيت على مهاا...
ردت علي من اول مرة...وكان واضح انها تبكي بحرارة..
: الحقينييييييييي ملكه.."
قلت وانا مفجوعه ونسيت نفسي: وشووو؟؟..ووينك؟؟"
مهاا وهي تشاهق: شوفيني في الصالة حقت الفندق..."
دخلت بسرعه للفندق...وشفت مهاا واقفه في نص الصاله...بملاابس بسيطة عادية..
اول ماشافتني استغربت وضمتني بقوة...وزاد بكاءها...سحبتهاا وطلعناا من الفندق..
مهاا وهي تبكي: اناا اكرررههه نفسي....اناا اسوأ انسان في هالعالم.."
مسحت دموعهاا وجلسنا على كراسي موزعه في الشارع...
قالت مهاا يوم انتبهت لشكلي: صح..ليش انت هناا؟؟"
قلت بحسرة: خلااص انتهى الحلم الجميل!!"
مهاا وهي تحط ايدها فوق ايدي بتفهم: وش صار؟؟...وش صار لك انت بعد؟؟..وش هالنحس اللي يطاردنا بكل مكان؟؟..ليش مايحق لنا نعيش سعداء طول العمر؟؟"
قلت لهاا وانا امسح دموعي: انا كنت سعيده طول عمري...بس من ماتوا اهلي...تغربلت وتبهذلت...وافي بالذات...عشت معه ساعات فضيعه مميتة مؤلمة...ويوم حبيته.." غمضت عيوني بقوة امنع الدموع اللي بللت وجهي...بس ماقدرت...فصحت بحسرة وحطيت ايديني على وجهي...
مهاا مسحت على راسي من فوق الحجاب وهي تصيح: يا شيخه الرجال والله مايستاهلون اللي نسويه لهم...قساة متحجرين..."
وكملت بألم: صدق ان اللي يبينا عيت النفس تبغيه..واللي نبيه عيا البخت لاا يجيبه.."
قلت لهاا وانا ارفع يديني من فوق وجهي: صاادقه...تخيلي ان اول حب لي...كان حب ممنوع..حب مستحيل...لاا يمكن ارتبط فيه لو يصير اللي يصير...وتصوري انه بنفس الوقت اللي كنت احب فيه....كانت فيه قلوب تعذب وتحبني...ومنهم خالك..وافي...تخيلي اني يوم حبيت وافي..حسيت ان فيه اشياء كثيرة تمنعني عنه...دايم فيه حاجز دايم فيه شيء يوقف بوجهناا...ليش حظي كذاا؟؟..ليش ما اعيش سعيده بدون الم وبدون حب وبدون هم؟؟..تخيلي ان بدرية حبت مساعد وهو حب غيرهاا...تخيلي ان عفرا حبت جاسر ومات...تخيلي ان روعه حبت سلطان لكن مشاري هو اللي حبهاا...تخيلي ان صيته حبت صالح لكن هو راح لغيرهاا...ليش؟؟...ليش كلناا كذا؟؟..ليش مافيه وحده فينا حبت وانحبت وانتهى الموضوع..."
مهاا وهي تشاهق: روعه وسلطان؟؟..آآآآآآآآآآآآآآه عليك يا خالي....اسمعي قصتي اناا....تخيلي ان فارس يحبني...يحبني من زمااان مرة...تخيلي اني اناا قاسية معه..ملكه انا بالثلااث ايام اللي فاتت سمعته حكي زي السموم...لو بقعد اعوضه العمر كله مايكفي..ملكه انا متحطمه...احس اني انسان سيء ماله اي قيمة...احس اني مثل دود العلق..اللي يمص الدم عشان يعيش..."
قلت واناا احاول اخفف على مهاا: تقدرين يا مهاا تعوضينه...انتم مالكم الا ثلاث ايام.."
مهاا بحسرة: عمري...ماراح اقدر اعوضه يا ملكه...خلااص..فيه شيء انكسر بيناا...وعمره ماراح ينصلح.."
ضميتهاا بقوة ولاا تكلمناا...خلااص وش نقول؟؟..وش نحكي؟؟..هذي هي الدنيا..وهذا المكتوب..وهذي اقدرانا بكل بساطه...
بعد ثلااث ايام...
وافي وهو يجلس قريب مني على السرير: زعلاانه لسه؟؟"
قلت وانا اهز راسي ببرود: لاااء..ليش ازعل؟؟.."
وافي ابتسم ببرود: لأني احبك سويت كذا...عارف اني قاسي...بس غصبا علي...انجن يوم اعرف انك حبيتيني شفقه!!...شفقه يا ملكه.."
قلت وانا اتحرك من على السرير: احبك شفقه؟؟؟...هه...الشفقه يا وافي اني اواسيك من وقت لوقت..مو اني اعيش معك..مو اني اعطيك كل شيء...وافي حرام عليك لي ثلااث ايام اشرح لك...ليش مو راضي تفهم.."
وافي بحرارة: احاول افهم...لكن مو قادر..حبي لك يمنعني من اشياء كثيرة...حبي لك يسبب لي الجنون...ملكه صدق...انت انسانه غريبة...انسانه تسببين جنون للي يعرفك.."
ابتسمت غصب علي وقلت ببرود: يمكن لأني مجنونة!!"
وافي عصب علي ووقف وقال: خلااص انت حرة...مجنونة مجنونة...بس المهم اني ابيك واحبك حتى وانت مجنونة.."
ورجع ركع جنب السرير ومسك ايديني: خلااص يله...ابتسمي بحرارة...لاا تخليني احاسبك على هروبك مني بذيك الطريقة قبل كم يوم.."
قلت وانا مقهورة منه: من حقي اهرب...مفروض اني ما ارجع ابد لك...عارف مفروض اعيش هناا طول العمر.."
وافي وهو يآخذ نفس: متهورة...انت متهورة...لو وحده ثانية كان تعلقت فيني موب راحت لأول باص تشوفه..."
كنت بتكلم بس عطست بقوة...ضحك وافي علي..فعصبت ورميته بالمخده اللي جنبي...طبعا انا مسامحته مايحتاج يسألني..مسكين يا وافي..ماتدري ان الحق معك مو معي؟؟!!( ان كيدهن عظيم!!)
انقطعت اتصالااتي مع مهاا...ولااا تقابلنا معها هي ورجلهاا خصوصا اني انا مرضت شوي..بسبب الامطار اللي ذاك اليوم..وكنت طول وقتي اعطس واكح...ووافي منعني من الحركه الكثيرة...
سمعت وافي يكلم رجلهاا: ايه...لاا المنطقة مرة ممتازة..انتم روحوا ولاا تخافون..فيهاا بعض السباع...بس لاااء..ماتقرب من المناطق المأهولة..ايه..سلم لي على مهاا..."
قلت بعد ماقفل: وافي...بيروحون للغابة؟؟؟.."
وافي وهو يتمدد ويرفع صوت التلفزيون: ايه...غيرانه منهم؟؟.."
وكمل عشان يقهرني: محد قالك تسوين فلم هندي وتركضين تحت المطر..."
قلت واناا صدق غيرانه لأن هذا كان مخطط الرحله لي ولوافي: يا ثقل دمي!!"
وافي اللي عارف اني اقصده ضحك من قلبه...ورجع يتأمل التلفزيون..كان الفلم رومانسي قديم..واسمتعت بشوفته...خصوصا اني انا رومانسية وابكي بسرعه...وافي اول ماشاف الدموع بعيوني ناولني كرتون المناديل عشان امسح دموعي...وهو ميت ضحك علي...دوم يتريق فيني..يعتقد ان البكاء سلااح للمرأة...لكنه يقول لي انه مايهتم بهالسلااح بالذات...وانا عمري للصراحه ما استخدمت البكاء كسلااح..بالعكس اخر ما افكر فيه اني اصيح عشان يتحقق طلبي..فيه طرق كثيرة مرة ممكن اخليه فيهاا يجيب لي اللي ابي بدون صياح ووجع قلب!
صوت التيلفون ازعجناا واقلقناا.. كنت نايمه على بطن وافي وعلى الأرض بالصاله...واستغربت مين اللي بيدق بهالوقت...كانت الساعه 2:00ص..
قمت وانا اترنح من النوم...ورحت للتيلفون...رديت وانا احاول اتنحنح عشان يوضح صوتي..
:Hello
سمعت صوت كأنه بعيد: الووو...ملكه؟؟..."
: ايه...مين؟؟.."
:هذا اناا مشاري....وين وافي؟؟.."
استغربت انه ماقالي كيفك وش اخبارك؟؟؟..وحسيت ان بطني يعورني فسألت مشاري: وش فيه؟..مشاري صاير شيء عندكم في السعودية؟؟.."
مشاري بتردد: ملكه...الله يخليك...خلي رجلك يدق علي...بسرعه...يله روحي...سلاام.."
طالعت بالسماعه..ومسكت صدري بقوة...دقات قلبي تتعالى..مين؟؟..وش صار؟؟؟...غمضت عيوني بقوة وطحت على الارض...
وافي اللي فقدني..تحرك من مكانه ببطء...ولمن لااحظ اني موب جنبه..رفع عيونه يدورني...شافني عند سماعه التيلفون...وشكلي مفجوعه وميته خوف..
وافي وهو يحك عيونه: ملكه؟؟..وش فيك؟؟..بسم الله الرحمن الرحيم...انت عارفه الساعه كم؟؟.."
قلت وانا اتكلم ببطء: وافي...تعال بسرعه..اناا مو قادرة اوقف.."
وافي اللي صدق انفجع علي...وقف وجا يمي بسرعه وسندني عشان اوقف...
قلت وانا ارتجف: مشاري اخوك.."
وافي باهتمام: وش فيه؟؟.."
: مدرري...اناا خايفه..."
وافي وهو يبعد شعري عن وجهي: ملكه..مشاري وش فيه؟؟"
وصرخ فيني بقوة: وش فيييييييييييييييه؟؟"
قلت وانا ارتعش: دق علي...شكل..فيه مصيبه...روح..ارفع السماعه...وافي..اناا....اناا خايفه..."
وافي تركني ومسك التيلفون...حاولت اني احافظ على قوتي وتمسكت بطاولة التيلفون...
وافي: هلااء..مشاري...وش فيك؟؟...هااا؟؟؟ميييييين؟؟؟...قول والله...مشاري...وش هالحكي...؟؟"
مع كلمات وافي اللي واضح انها مو طبيعية...كنت اتمسك فيه بقوة..وصرخت فيه هو واخوه: وش فييييييييييه؟؟؟..مين؟؟..مين مااات؟؟؟"
وافي قفل السماعه ومسك التيلفون ورماه بقوة على الجدار...قلت وانا ارتعش: وافي وش فيه؟؟..طمني...قولي ماصار شيء...وااافي.."
وحطيت ايدي على فمي اكتم صرخااتي....
وافي طاح على الارض...وضرب ايده بقوة على الارض كذا مرة...وكان شكله منهاار...اول مرة اشوف دموع وافي..كانت دموعه تنزل وتطيح على ايده وعلى الارضية الخشب...
قلت واناا احاول احافظ على البقية المتبقية من عقلي اللي طار بسبب هالمكالمه: وافي رد عليييييي.."
وافي عيا يرد علي...كان يبكي...وافي يبكي...وبحرارة...قربت منه..وضميت راسه بقوة...كان يصيح مثل الطفل...وافي انهاار...وش اللي خلااك تنهار يالغالي؟؟؟...
قال لي بصوت مرتعش: ماتت يا ملكه...ماتت..."
بعدته عني بسرعه: مييييييييييين؟؟؟.."
صرخت فيه...طالع فيني وعرفت انهاا قريبه مني..
قلت لاا شعوريا: لاا تقول عفاري..."
وحطيت ايدي على فمي يوم هز راسه...انهرت...حاولت اوقف...لكن ماقدرت رجعت طحت من جديد...كنت اتخبط مو مصدقة...عفاري تموت...عفاري اكثر انسانه عايشه عررفتهاا...شلون؟؟..لاااء اكيد ماماتت يمكنها مريضة او شيء؟؟؟..
طلعت بوافي وصرخت فيه بقوة: لااا تكذب علي"
وافي بحسرة: وهالأمور ينكذب فيهاا؟؟.."
قلت واناا ارتعش بقوة: بس عفاري...لاا يمكن تموت..."
وافي وهو يغمض عيونه بقوة: انتحرت يا ملكه..عفاري انتحرت.."
صرخت فيه بقوة: انتحرت؟؟...آآآآآآآآآآآآآآآآآآه...لااا تقول كذاا...وافي انت تمزح....عفاري لاا يمكن تنتحر...هي وعدتني..."
وضربت الارض بقوة وحاولت اني اتنفس...بس ماقدرت كنت احس بخنقة كبيرة..وابي اشم هواء...
عفاري ليش انتحرتي؟؟..ليييييييييييش؟؟؟...خسرت اخرتك ياعفاري خسرتي اخرتك...خسررتي كل شيء....ماعاد بقى شيء تقدمينه لربك...
ليه يا عفراء؟؟...حرااام...والله يا دنيا حرااام...ليش يصير فيني كذااا؟؟..
غطيت وجهي بيديني...وبكيت بمرارة...
في دبي....في بيت عمي....في العزاء...
كان السواد موشح المكان...كل شيء اسود...الناس ...الاثاث ....الحدايق..كل شيء حزين على خسارة عفاري...حتى الطيور مو راضيه تغرد...كل شيء ناقصه شيء...فيه شيء مو طبيعي حتى بالجو...حتى الاكسجين كأنه نقص وقل..معقولة الحزن يحسسنا بكل هالاشياء؟؟؟..ولااا الكون حزين لعفاري؟؟
عمي وعمتي نورا كانوا في عالم ثاني...عمي الى الان ماكان مستوعب اللي يحصل...كان واضح عليه عدم الاستيعاب...حتى وهو يستقبل الرجال ويعزونه ويرد عليهم...كان واضح انه مو فااهم شيء...كان معه سلطان...وسلطان كان خلااص واضح عليه انه منتهي..عيونه حمر...واضح انه بكى قدام الكل بدون مايهتم...حتى شعره كان واضح عليه انه شاده كثير....كانت اشكالهم مخيفه..مغبرة مؤلمه...اول مارجعوا من الدفن..وكان وافي معاهم...جاا وافي وبكى بحظني بمرارة..كان يقول لي حكي غريب..يقول لي عن عفاري وثقلهاا والكفن...واشياء مخيفه مرة...مخييييييييفه...ولاا قدرت اسمعهااا...كنت ارتعش خوف..وانا اتخيل عفاري تندفن..خيالي ماكان يقدر يشيل هالصورة....
بدرية ومحمد وريم كانوا حزينين...وريم كانت مريضه مرة....اماا محمد فكان واضح انه مو فااهم الموت مرة...لأنه رغم عمره بس واضح انه مو فااهم وش يعني موت؟؟؟
..بدرية...حزنهاا كان اخف من حزن الكل...او يمكن اهي من الناس اللي مايبين عليهاا الحزن...
مهاا وفارس حظروا العزاء...وكل اهل وافي واهل نورة...الناس التمت من كل مكان...وعفراء لها صديقات كثار كلهم جوا...وطبعاا اصحاب عمي من كل مكان جو له..
سمعت همس حريم واناا جالسه جنب عمتي نورا..اللي كانت لاابسه اسود وحاطه شيلتهاا فوق راسهاا....
وحده تقول: يقولون انها انتحرت..الله لاا يبلاانا.."
والثانية ترد عليهاا: ايه..عاد كانت مزيونة...انا سمعت انها خافت من الفضيحه بعد موت خطيبهاا...شكلها كانت..."
وطالعوا ببعض بشماته..
ارتجفت وانا اسمع حكيهم.... ياويلهم من ربي..قاعدين يحشون بوحده ميتة....طالعت فيهم بطريقة خلتهم يحترمون انفسهم ويستأذنون عشان يطلعون..
استأذنت من عمتي نورا..ورحت للدور الثاني...
فتحت باب غرفتها بتردد...تخيلوا اني طقيت الباب في البداية...طالعت وانا ارتجف في المكان..كان فيه شيء مو طبيعي بالغرفة...
شفت دمهاا لسه على الارض...بلعت ريقي...دخلت وقفلت الباب...
طالعت بالاثاث اللي ماتغير مكانه....بادوات المكياج المفتوحه مكانهاا......بالعطور اللي بعضهاا طايح على الأرض...
شفت بعض ملاابسهاا اللي شكلهاا لبستهاا اخر مرة..رحت لروبهاا السماوي..وضميته بقوة واناا اشم ريحتهاا فيه..
ياااااااااه وش كثر ريحتهاا جميله؟؟...وش كثر مميزة؟؟...ضميت الروب بأقوى ماعندي...احاول اني اتذكر عفراء..آآآه..لي فترة ماشفتهاا...ليتني ماتزوجتك يا وافي..ليتني كنت يم عفراء...آآآآآآآآآآآآآآآآآآآآآآآه...صرخت بقوة....طلعت الآه من صدري وبست روبها بقوة..
طالعت ببقعة الدم اللي على الأرض...
ارتجفت واناا احس بالهواء يدخل عظامي..تخيلت عفرا مرمية هناك على الأرض... ودمهاا مغطيهاا...
طحت على الأرض بقوة..وحطيت راسي على الكنبة حقتهاا...ودفنت وجهي بين الخداديات..وتلمستهم وكأني ادور على ايد عفرا بينهم....حبيت على ركبي...عشان اوصل لسريرهاا...راح يرسلون اغراضها لجميعة خيرية...بس لااااء...اناا ابي المس كل شيء واحتفظ بكل شيء...ماابي انساهاا...اهي كل شيء...عفرا هي آخر شيء باقي من عيلتي...
ضميت فراشهاا بقوة..حتى تغرق بدموعي..كانت ريحة عطرها لسه منتشره بالمكان...كنت اشاهق بحرارة..تذكرت عفراا بكل وقت...
تذكرت شلون كانت تعاملني اول ماجيت بيتهم...تذكرت كيف كنا نروح انا وياها للسوق...تذكرت ابتسامتها الطفولية...وشعرهاا الاسود الحريري...تذكرتهاا يوم كانت تشوف جاسر...وكيف كانت تبتسم بخجل له...تذكرت مكالمتها الاخيرة...وارتفع صوت صيااحي..اناا السبب...ماراعيتهاا..كان واضح انهاا تحتظر...ومع هذا اهتميت بعمري ونسيتهاا...
طالعت بصورتهاا اللي كانت معلقه فوق المكتب حقهاا...كانت تبتسم براحه...رغم ان فعيونهاا دموع...صورة غريبة...
شلون تجتمع الابتسامه مع الدموع!!
الحزن مع الفرح!!
الشتاء مع الصيف..
وكانت حاطه صورة جاسر في ركن الصورة..جاسر؟؟..انت السبب يا جاسر...انت السبب..قلتهاا بضعف...واناا اطالع بدمهااا...دمك يا عفرا...دمك...ذبحتي نفسك..قلتهاا واناا مو مصدقة..وحسيت ان فيه يد تخنقني بقوة..فاضطريت اركض للباب...
واطلع من غرفتهاا..شفت بدرية قبالي...كانت عيونهاا حمر....طالعتني من فوق لتحت...
قالت ببرود: ليش جيتي العزاء؟؟؟..اللي مثلك الافضل انا مانشوفهاا.."
مارديت عليهاا..
قالت بدرية: انت السبب في موتهاا..عارفة هالشيء؟؟"
قلت مدافعه ومصدومة: اناا؟؟؟..ليش؟؟..ماسويت شيء.."
قالت بدرية بحقد وهي تبكي: الا انت السبب...بآخر مكالمه لكم...كان واضح ان عفرا بتنتحر...مع هذا مافكرتي تدقين تطمنين عليهاا...مافكرت حتى تجين تزورينهاا.."
قلت واناا ابكي: لاااا والله ما انتبهت....ماكان واضح...بعدين اناا...اناا...اناا كنت مشغوولة.."قلت آخر كلمة بعجز...
بدرية ببرود وهي تمسح دموعها: مشغوولة؟؟...سفريات للخبر ومونتريال وبعد تقولين مشغولة؟؟..وش كان عندك يا آنسه ملكه.."
قلت وانا اصيح: انت ليش كذاا؟؟..مافيك قلب...ماتشوفين شلون حزني عليهاا..اناا احبهاا والله..."
بدرية وهي تمسح دموعهاا: تحبينهاا؟؟..اناا اكرهك..اكررههك...عندك كل شيء..رغم انك ماتستاهلين شيء...عفاري كانت تحبك اكثر مني...وبالأخير لمن نسيتيها انتحرت...اهي قالت لي بلسانها...انك انت السبب.."
قلت بحرارة: لااااااااااء...مو انااا.."
وغطيت وجهي اصيح...بس ما اهتمت فيني بدرية..وقامت تنفث حقدهاا وسمومهاا علي...كأنها ثعبان عملااق ناوي يآكلني ويموتني ويحطمني...
قالت وهي تتكلم بمرارة: لمن قطعت عروقهاا...اناا اول وحده لقيتهاا ...تخيلي وش قالت؟؟..قالت لي سلمي لي على ملكه..وقوليلهاا اني فقدتهاا كثير وكنت محتاجتهاا.."
ضميت نفسي بقوة مابي اسمع هالحكي..كله كذب...بكذب...بدرية تكررههني وتغار مني....
بدرية وهي تقرب مني مرة: والله لأنتقم يا ملكه....لأنتقم منك...وقريب مرة مرة..لأنك خذيتي مني مسااعد..وراح انتقم منك...لأنك خذيتي مني عفاري...راح اخليك تكرهين كل ساعه انولدتي فيهاا...راح اخليك تكرههين نفسك وعمرك...وانت بنفسك تلحقين عفااري.."
صرخت فيهاا بدون ما اهتم بالناس اللي بالدور اللي تحت: روووووحي عن وجهيييييييي...رووووحي....انت استحاله تكونين بشر..."
طالعت فيني بدرية من فوق لتحت...وبعدت عني...وهي تبكي..واناا بعد كنت ابكي..تعلقت بباب عفاري وحاولت اني انسى فكرة اني اناا السبب بموتهاا...لكن خلااص انا ايقنت اني انا السبب..
|
16-03-07, 07:34 AM
جديد مواضيع قسم القصص المكتمله
العرض العادي
