منى : شوووووو ..؟؟؟.. لا لا لا .. مااااااباااا ..
منال : لا مستحيل ..
حامد : هذا الي استوى ..
منى و هي خانقتنها العبره : يعني غايووه راحت ..؟؟؟!!!..
منال : لا اكيد بترجع ..
سكت حامد و هو يحس انه سبب هالي يعشنه خاواته .. و الاهم منهن .. غايه ..

و منصور من ظهر من عقب غايه و هو شرات الانسان الي ضيع شي .. يالس و يحوط بالسياره في كل مكان .. جنه يدور ع شي فاقدنه ..

و في سويحان ..

هل غايه ما قالو لحد ان غايه زعلانه من ريلها .. و الكل اعتقد انها ياييتنهم بتيلس عندهم كم يوم و بترد .. و الفرق .. ان غايه .. كانت تظهر عكس ما بقلبها .. بينت لهلها انها انسانه قويه .. و ان منصور و معاملته و موقفه منها مازادها الا قوه .. و هالشي الي حسنه صدق .. بس الي محد حاسبه .. هو عذاب غايه و هي بعيد عن منصور .. و هي عنده ممكن اتهون عليها أي معامله او كلمه ممكن يقولها لها .. لانها تعرف ان منصور يحبها و لو هو ما صرحلها بهالحب بالطريقه الي هي تباها ..

سلامه : اللحين شو بتسوين ..؟؟؟؟..
غايه : و رفجه لا اظوي راسه .. و الله بخليه يشرب من مر كاسه ..
طالعتها سلامه بنظرت اعجاب : انتي قد هالتحدي ..؟؟؟..
غايه : خلاص .. خسرت كل شي فهالدنيا .. حتى منصور خسرته بفعل ايدي .. بس ماهمني حد فهالكون كله الا منصور .. و ربي بيسوقه لي .. و بذكرج ..
العنود : و الله ساعات اتمنى اكون قويه مثلج ..
غايه : قويه !! .. الي يدي يدري .. و الي مايدري يقول كف عدس ..
و طبعا هن فهمن كلامها ..

و في بوظبي ..

منصور حاله منجلب .. و لو ان خاواته بغن يرمسنه فالسالفه .. بس من شافنه ماقدرن انهن يتكلمن .. الا صاحن ع حاله .. عزل عمره عن العالم كله .. يمكن فاليومين مره ممكن ياكل .. ما كان يقدر انه ينام عالشبريه .. كان ييلس عالكرسي طول الليل و هو يتاملها .. و هو يتخيل غايه و هي نايمه و شعرها حولها .. يالله .. انا شو سويت ..؟؟؟.. بلي سويته خير لي و الا شر ..؟؟؟؟.. افتر بويهه .. و شاف التواليت .. نش و راح صوبه .. و هو يشوف عطورت غايه و علب المكياج .. و كريماتها .. فهاللحظه .. طاحت عينه ع مشطها .. آآآآآآآآآآآآه فديييييييييييييتج ..

و منى و منال من عقب ما انجلب البيت لحالهم عمره ما مرو بها .. كانن مصرات انهن يتواصلن بغايه .. خلاص غايه صارت جزء منهن ..

مر اسبوع من استوت هالسالفه .. و غايه ولو انها تحاول تغبي حزنها و حسرتها .. بس ساعات .. يلمحون نظرة الحزن فعيونها .. رجعت لهلها بس ما رجعت غايه الجديمه .. لا .. رجعتلهم جسد بلا روح .. و منصور و من بعد هالايام الي قضاهن و هو حابس عمره فحجرته .. و لا يظهر و لا يرد ع حد و لا يشوف حد من هله .. بدى يفهم وضعه .. و ردتله جزء من حاسيته .. و لو انه يليين اللحين مب قادر يتخيل ان غايه طلعت من حياته .. فهاليوم .. طلع منصور من حجرته .. و منى و منال و فياهن حامد .. يالسين و يتكلمون .. و من شافوه افترو صوبه .. و هو يمشي و لا شافهم .. بتفكيره الشارد .. اللحين العصر .. معقوله اتكون تذكر لمتنى العصى فالصاله ..؟؟؟.. و طلع منصور من الفله و راح ..
حامد و هو يهز راسه : عمري ما كنت اتوقع انه يحبها لهالدرجه ..
منى : اريد غايوووه .. و الله كرهنا البيت دونها ..
حامد و هو يمسك تيلفونه : لحظه ..

و اتصل بمطر ..
مطر : الله حيبه ..
حامد : مرحبا بوغيث ..
مطر : مرحبا الساع بالنسيب ..
حامد : علومك ..؟؟؟..
مطر : الحمدلله ..
حامد : و الله مادري شو اقولك ..
مطر : لا تقول شي .. و هالشي قسمه و نصيب و كله مكتوب عند ربك ..
و تمو يتكلمون ..
منى : قوله يعطيك رقم غايوه ..
و خذ من عنده رقم البيت .. و من سكر عن مطر نشن البنات و اتصلن بغايه .. الي ما صدقت انهن اتصلبها ..
منى : حرااام عليج غايوووه .. و الله منصور يحبج ..
غايه : منى .. لا تلوميني ..
منى : انتي ما شفتي شكله كيف .. و الله انه ما ظهر من الحجره الا اليوم ..
غايه : بخوف ليش شي يعوره ..؟؟؟..
منال و هي تاخذ التيلفون : غايووووه لا تزعلين من منصور .. هو و الله يحبج ..

و في نفس اليوم .. رد عبيد من الدوام .. و كانت الدنيا منجلبه من درى .. لانه تواجع فيا مطر و حمد ..
عبيد : انتو السبب ..
حمد : عبيد .. لا تزيد فالرمسه ..
عبيد : شو لا تزيد فالرمسه ..؟؟؟؟.. عايبنك حال ختك هذا ..؟؟؟..
حمد : واقع الا هي الغلطانه .. و الا لو هو منصور جان من ليلتها ظوانا ..
عبيد : شوف حمد .. غايه ما يخصك بها .. و ازيد ما تعنيت في سالفة عرسها لا تتعنا .. ( و جان يفتر صوب مطر ) .. و هذا حالك .. و فرحو اللحين .. من عقب ما هدمتو مستقبل ختكم ..

و ظهر عنهم و هو ميت غيض و دخل حجرته و كانت سلامه تقرى في كتاب .. و من شافته رفعت عينها عليه .. و تذكرت صوت البنت الي كانت عنده .. و نزلت راسها .. و عبيد من غيضه حدر و رقع بالباب .. و هالشي الي حسس سلامه انه متواجع فيا خوانه .. اكيييد بسبب سالفة غايه .. كان خاطرها انها اتخفف عليه .. بس عقب تراجعت .. لا لا .. مستحيل اني اطوفله موقفه .. لوما سالفة غايه كان بيكون لي كلام ثاني فياه ..

فهاليوم ..

مطر : عنود دخيلج حسيبي ..
العنود : انت مب مستحي تطلب هالطلب و ختك هذا حالها ..؟؟؟
مطر : انتي ما عليج من ختيه ان شاء الله سالفتها بتخلص ..
العنود : لا مطر .. اصلا عيب عليك ترمس بهالسالفه ..
مطر : اوووووه .. امبونج انتي ما تبيني .. و اللحين الا تتعلثين بسالفة غايه ..
العنود : حرام عليك .. انت ليش اتقول جذيه ..
مطر و هو معصب : شوفي يا بنت الناس عندج يومين .. ومن عقبه اريد ردج ..
العنود : ردي فالشو ..؟؟؟..
مطر : ثنين مالهم ثالث .. يا اما انج موافقه نعرس اللحين .. و الا مب موافقه .. و فهالحاله السموحه منج .. انتي من طريج و انا من طريج ..
العنود و هي منصدمه : شوووو ..؟؟؟؟...
مطر : الله يحفظج ..
و سكر دون ما يعطيها مجال انها ترمس .. و العنود منصدمه لا لا .. مستحيل مطر يقصد هالشي .. لا لا ماصدق .. بس هالمره مطر يرمس صدق و من الخاطر .. جان تظهر العنود و راحت بيت عمها .. و لقتهم كلهم يالسين فالمنصه .. و سلامه و غايه يالسات و يتكلمن .. من عقب ما سلمت عليهم كلهم .. ان مطر ظاهر من حجرته .. و شافها .. تعمد انه يسلم ع هله من بعيد و يخطف صوب سيارته .. و العنود بتموت .. يعني هو قاصد كلامه .. غايه و سلامه كانن يانقشن مخططات يديده دخلت في خطة غايه .. و لا انتبهن للعنود و مطر .. و من اذن المغرب نشن داخل .. و من دخلن خبرتهن العنود ..
سلامه : انتي تتدلعين ..
غايه : العنود خذيها نصيحه من انسانه مجربه .. لا تجرحين مطر بصدج .. لانه ان انجرح منج صدقيني .. مستحيل جرحه يبرى من صوبج طول حياته ..
و من قالن هالكلام للعنود و هي خايفه .. معقوله مطر ممكن انه يودرني .. لا لا هو يحبنيه .. فنفس اليوم فليل .. اتصلتبه العنود .. و هو شاف رقمها و قلبه يدق .. ارد والا لا .. لا لا ما برد اباها تتعلم .. لا ما تهون عليه اخليها .. رد عليها مطر ..
مطر : هلا
العنود : اهليييييييين .. شحالك ..؟؟؟..
مطر و هو يبينها انه يرد مب من خاطره و هو العكس : الحمدلله ..
العنود : ليش اتكلمني جذيه ..؟؟؟؟..
مطر : ليش متصله ..؟؟؟؟..
العنود : يالله اهون عليك ..
عنلاتها تعرف انها العوق .. يالله يعني افدى قلبها ..
سكت مطر لانه ما عرف بالشو يرد عليها ..
العنود و بصوت واطي : ..انا موافقه ..
وقف قلب مطر .. شو يعني !!.. بعرس ..؟؟؟..
مطر : شو ..؟؟؟..
العنود و هي تلعب بالتيلفون و السماعه في ذنها : مواقفه ..
مطر : عالشو ..؟؟؟
العنود و هي مستحيه : ع العرس ..
مطر و بصوت واطي و رقيق : حلفي ..
ياويلي احبه ..
العنود : و الله ..
مطر : آآآآآآآآآآآآآآآآآه يا عذابي فهالدنيا ..

و بالباجر خبر مطر هله انه يريد يعرس و الكل احتشر عليه ..
ام غايه : يالله بالستر ..
مطر و هو يقطع رمستها : هاه العيوز .. الشيمه خلج انتي برى هالسالفه كلها ..
طالعته امه بنقمه ..
مطر و هو يرمس بوه : غايه ما عليها شر .. يومين و بترد لريلها .. و انا جني بعرس ما بعرس قبل شهر ونص شهرين ..
غايه : بويه .. لا تقطع نصيبهم بسببيه ..
و من عقب ما شاورو سعيد و معضد خوان العنود .. تحدد العرس بتاريخ 23-9-2004 و هم اخر شهر 7 ..

و غايه فاليوم ترمس منى و منال زود عن المرتين .. و حامد ما قطع مطر بالتيلفونها .. بس منصور فيوم .. راح لمنال ..
منصور : تعالي ..
و راح حجرته و لحقته منال ..
منصور : لمي قشار غايه و حطيهن في شنط ..
صخت منال : ليش ..؟؟؟..
منصور : بس ..
و راح و يلس عالشبريه و هو يشوف منال و هي تلم قشار غايه .. و من عقب ما حطت الثياب في الشنط .. و لمت القشار .. ما بقى الا قشارها الي عالتواليت .. راحت منال و حطت المكياج في شنطته و العطور .. و توها بنسمك المشط ..
منصور : لا لا .. لا تشلينه .. خليه ..
استغربت منال منه .. و هو عينه عالمشط .. و هو يتذكر غايه و هم في ماليزيا .. غايه .. شو تسوي اللحين ..؟؟؟؟.. و غايه يالسه في حجرتها و هي تحس انها تريد اتصيح من الخاطر .. يالله يا منصور .. ما كنت اتوقع اني بهون عليك و بتخليني كل هالمده دون ما تسأل حتى .. آآآآآه يا قلبي ..

بالباجر ..

كانت الساعه 6 المغرب ..

و تفاجأو بسياره استيشن يديده واقفه جدام بيتهم و فيها دريول و خدامه .. و نزلت الخدامه .. و كانت فيدها كيسه صغيره .. و قالت للخدامات انها تريد غايه .. و كانو كلهم يالسين فالمنصه .. و راحت غايه صوب الخدامه .. و عطتها الخدامه الكيس .. فتحته غايه و لقت فيها تيلفون .. طلعته .. و كان مغلق .. و من فتحته .. وصلتها مسج ..

" اذا نسيت شي ذكريني " ..
صخت غايه من هالمسج .. جان ينش مطر صوبها ..
مطر : شالسالفه ..؟؟؟..
غايه : مادري ..

فالوقت الي فتحت فيه غايه التيلفون و وصلتها المسج .. وصل لمنصور الريبورت .. و جان يتصل .. من شافت غايه الرقم عرفته ..
غايه و هي مرتبكه و ايدها ترتجف : منصور ..
طالعها مطر و من عقب راح عنها ..
مشت غايه عنهم شوي ..
غايه و بصوت مرتبك : .. الو ..
من سمع منصور صوتها احس جنه ارتوى من عقب اسنين من ظماه ..
منصور : الو ..
غايه : مرحبا الساع ..
منصور و قلبه يدق بطريقه مب طبيعيه : شحالج .. ؟؟؟..
يالله يعني افدى صوتك .. تحس بقلبها وقف من سمع صوته ..
غايه : بخير ربي يسلمك .. ( بصوت واطي ) انت شحالك ..؟؟؟
منصور : آآآآآآآآآه .. الحمدلله ..
هالتنهيده مشت في عروق غايه .. يالله فديت قلبك ..
منصور : انا طرشتلج سياره بالدريول و خدامه ..
غايه : شو يعني ..؟؟؟..
منصور : و طرشتلج هالتيلفون .. و قشارج بتلقينه فالسياره ..
غايه : شو يعني ..؟؟؟..
منصور : جني قصرت بشي .. ما يردج الا لسانج ..
غايه : انا اسألك .. شقصدك بهالحركه ..؟؟؟؟..
منصور : ماريد يوصلج القصور من صوبي ..
سكتت غايه و لا علقت .. جنه يقولها .. ماريد أي شي من بيننا .. و ابرى نفسه جدام الله و الناس ..
غايه : مشكور يا فلان .. ماريد منك شي .. لا السياره و لا الي فيها ..
منصور : مب بكيفج ..
غايه و هي تعلي صوتها : بكيف منو عيل ..؟؟؟..
فهاللحظه افترو هلها صوبها ..
منصور : غايه .. جنج نسيتي بذكرج .. تراج حرمتيه .. و الي اريده بسويه ..
غايه : تخسي .. شو تتحسب ما ورايه رياييل ...
منصور : انا الغلطان الي خذت وحده ياااااااااهل .. انتي ما تفهمييييييييييييين ...؟؟؟؟؟؟؟؟؟؟...
غايه و بصوت عالي : و الله محد ظربك ع ايدك و مثل ما خذتني طلقني .. و والله ما اصيحك ..
منصور : شوفي غايه .. ان رديتي ما وصلج مني .. باجر بتوصلج ورقتج ..
غايه : جلعتك ..
و سكرت في ويهه ..
غايه : لا و الله و يهدد بعد .. اوين باجر بتوصلج ورقتج .. عنلالالالالالالالالالالالالالالالالالالالالالاته الشييييييييييييبه .. اكرهه ..
بو غايه : بو غيث اتصلبه ..
مطر : يا بويه ...
بو غايه و هو يقطع رمسته : اقولك اتصلبه ..
مطر : الشيمه .. زهل هالسالفه عنك و انا بقظي الحيـّه ..

راحت غايه الحجره و هي ميته غيض من منصور .. الي من سكرت غايه في ويهه و هو يطبخ عمره في جدر .. عنلاتها هالياهل صدقت عمرها .. عنلالالالالاتها السباله .. دواها عندي .. شوي و انهم حادرين عليها بالشنط و سلامه و العنود ورى الخدامات ..
سلامه : ما كنت اعتقدج بهالتفكير ..؟؟..
غايه : يقهرني .. يذبحني هالشيبه ..
سلامه : شو نسيتي تحديج ..؟؟؟؟..
طالعتها غايه ..
غايه : لا ..
سلامه : عيل شو نسوي ..؟؟؟..
غايه و هي تنش و تمسح دمعتها : بتشوفين شو بسوي ..

بالباجر ..

العصر كان عبيد بيروح دوامه .. و طول هالاسبوع و هو الاسبوع ما يلس فيا سلامه .. الي كانت تتعمد انها تتجاهله طول الوقت و ربشت عمرها بسالفة غايه و عرس العنود .. بس هاليوم .. ماقدر عبيد انه يروح دوامه دوم ما ييلس فيا سلامه .. و من عقب الغدى مسكها عبيد و قفل الحجره ..
عبيد : حبيبي شو فيج ..؟؟؟..
و سلامه كل ما يقولها عبيد حبيبي تموت .. تذكر صوت البنت ..
سلامه و هي تفتر عنه : ماشي ..
عبيد : لا فيج شي ..
سلامه : سلامت قلبك ..
تم يطالعها عبيد .. بس من شكلها ما بترمس .. نش عبيد و وقف و تم يتسفر ..
سلامه : عبيد .. يوم بتكون في اجتماعاتك الخاصه .. اتمنى انك تغلق تيلفونك ..
عبيد و هو عاقد حـيـّاته : اجماعاتي الخاصه ..؟؟؟!!!..
سلامه : انا حرمتك .. سترك و غطاك فهالدنيا .. بس غيري ممكن يتعلث باي شي عشان يفضحك ..
عبيد و هو يفتر صوبها : شو قصدج ..؟؟؟..
سلامه : ماشي .. قلتلك في اجتماعاتك الخاصه اغلق تيلفونك ..
عبيد : أي اجتماعات خاصه ..؟؟؟؟.. انتي عن شو ترمسين ..؟؟؟..
قالتله سلامه السالفه ..
سلامه : انا مالومك .. لاني الفتره الاخيره قصرت في حقك .. و هالشي اعترفبه .. ( فهاللحظه خنقتها العبره ) .. بس ما كنت اتوقع انك انت من بين العرب كلهم ممكن انك اتجازيني جذيه ..
عبيد : حبيبي ..
سلامه و هي تصيح : لا تقول حبيبي ..
عبيد : حبيبي و حياتي و عمري .. انتي نصخ حياتي فهالدنيا كلها .. حرام عليج .. كيف اتشكين اني ممكن اخونج .. ؟؟؟..
سكتت سلامه و نزلت راسها ..
عبيد : فديتتت روووووووحج .. و الله السالفه مب مثل ما انتي فهمتيها .. السالفه ان واحد من ربعي .. كان ع علاقه فيا وحده .. و هو اصلا معرس .. و هي ماسكه عليه صور فياها .. و يا يعطيها فلوس يا انها تعطيهن لبو حرمته ..
صخت سلامه و رفعت راسها صوبه ..
عبيد : و هو سبال ما يعرف ايصرف عمره .. و قالي .. و ارتبشت فياه .. الا و الله ما طرالي ابدي هاللوث عليج .. يعلهن يفدنج من مشرقهن لمغربهن ..
حست سلامه بالصدق في صوت عبيد .. و الحب الي اتشوفه فعيونه يغفرله كل شي ..
عبيد : يالله يا سلامي .. لهالدرجه تغارين عليه ..؟؟؟..
سلامه : حرام عليك يا عبيد .. و الله ما بت الليالي بسبب هالهوياس الي اانيسته بسبب هالسالفه ..
عبيد : فديت قلبج .. انا كنت بقولج .. الا ارتبشنا بسالفة غايه .. و الا انتي ما تهونين عليه .. سلامي انتي حياتي ..
__________________

الاسبوع الي عقبه ارتبشو قوم غايه بتجهيزات العرس .. و خص ان غايه و سلامه هن الي كانن فيا غايه و هي تزدهب .. و في نفس الوقت ميثه و ام غايه يسدن باقي الزهاب .. يعني تحولن البيتين لخلية نحل .. و الكل مرتبش .. و منصور .. لانه ما تم شرات قبل .. و خاواته مثل الاضراب .. ما يكلمنه شرات قبل .. و هو من عقب السالفه الي استوت من بينه و بين حامد ما يكلمه و لا ياخذ سلامه حتى .. و حامد حاس باللوم من غايه .. لانه سبب الي تعيشه هذا .. و هالشي الي جمع من بينه و بين مطر .. الي كان يشوف عمره سبب عذاب غايه ..

كان يوم الثلاثاء يوم اكتشفن منى و منال ان منصور ما بات من زود تعبه .. كان وايد تعبان .. و حرارته مرتفعه و هن ما دربه الا الصبح .. و هو طول الليل و هو يهاذي بغايه .. و من درن ربعن لحامد .. الي شله و راحبه صوب مستشفى السلام .. و سوله فحص شامل يحاولون انهم يعرفون سبب عهالمرض .. بس مب عارفين سبب هالحمه .. فقالولهم نزلت برد قويه .. و فالفتره الي كانو فيها في المستشفى اتصلت منى ع تيلفون غايه .. و كانت الساعه 9 الصبح و غايه فالمزرعه فيا يدها ..
و من شافت رقم منى شلته ..
غايه : هلا و غلا ..
منى : غايووووه منصور مريض ..
غايه : شووووووووووو ...؟؟؟. شو فيه ...؟؟؟؟..
منى : مادري راحبه حامد صوب المستشفى ...
غايه : كيف ما تعرفين ..؟؟؟؟..
منى : ما ندري نشينا الصبح .. كنا نريد انقوله اننا انريد نيج و ريناه مريض و يهاذي ..
غايه : فديييييييته .. حامد ما اتصل يقولكم ..؟؟؟..
منى : لا ..
غايه : عطيني رقمه ..
و خذت الرقم من منى و اتصلت بحامد ... الي ما عرف الرقم و ما رد عليه .. بس غايه حشرته من زود ماهي تتصل .. و من شله ..
غايه : منصور شو فيه ..؟؟؟؟..
استغرب حامد ..
غايه : حامد انا غايه منصور شو فيه ..؟؟؟..
حامد : مرحبا غايه ..
غايه : دخيييييييلك قولي شو فيه ..؟؟؟؟..
حامد : مافيه شي .. نزلت برد بس قويه شوي ..
غايه : حامد .. دخيلك لا تغبي عليه رمس ..
حامد : و الله العظيم ان مافيه شي ..
غايه : عيل اللحين انتو شو تسون ..؟؟؟..
حامد : ماشي بيحطوله مغذي ساعه و من عقب بنرد البيت ..
غايه : من تردون اتصلبي دخيييييييلك حامد ..
حامد : ان شاء الله ..

و من سكر عنها و هو متلوم فيها زود .. يالله .. انا سبب الي يعيشونه اللحين ..
هاليومين غايه ما باتت فيهن .. ع كل دقيقه تتصل بمنى و الا منال اتشوف حال منصور .. و تفاجأت فاليوم الثالث يوم قالها ان منصور داوم ..
غايه : شووو هو يريد يذبح عمره السبال ..؟؟؟..
منال : غايوووه تعبت و انا اكلمه بس مافي فايده ..
غايه : بيشوف السبال ..
و سكرت عنها و اتصلتبه .. و منصور تعبان و حاط كيعان اديه عطاولة المكتب و ماسك راسه و مغمض اعيونه ..
و فجأه سمع

" معذور قلبي اذا لجلك يألمني .. طبعا حبيبه و لو عاذلت ما يقبل .. ما يرتضي فيك ما يسمح يكلمني .. يغرق بصمته و مني يزعل اتخيل "
عرفها .. غايه .. و من افتر لتيلفون .. لقى " منطوق قلبي يتصل بك " آآآآآآآآآآآه فديت قلبج ..
منصور : الو ..
و غايه قلبها يدق بالقو : السلام عليكم ..
منصور : و عليكم السلام و الرحمه ..
غايه : تستحج السلامه ..
منصور و هو يرفع واحد من حيــّاته : ربي يسلمج ..
غايه : ممممممم .. بصراحه ..
منصور و هو يتقدم شوي صوب المكتب : ممممممم .. شو ..؟؟؟..
غايه بدلع : ممكن طلب ...؟؟؟؟..
ياويل حالي ..
منصور : عونج ..
غايه : ممكن ترجع البيت ..
سكت منصور .. و هو مستغرب هالطلب ..
غايه بصوت واطي : ارجوك ..
آآآآآآآآآآه ..
غايه برقه : منصور ..
منصور : لبيه ..
غايه : لباك قلبي .. طلبتك .. و لا تردني ..
منصور : ماعاش من يردج ..

و نش منصور و رد البيت .. و غايه ميته من الفرحه .. هذي اول خطوه عشان اترجع منصور .. كان خاطر غايه انها تتصل بمنصور كل يوم .. بس ما حقت لنفسها هالشي .. هي صح غلطت في حق منصور .. بس هو غلط بعد .. و مثل ماهي تسعاله لازم هو يسعالها ..

مرت الايام .. و منصور يكابر فحبه لغايه .. و غايه مب حاقه لمنصور .. و سلامه اكتشفت انها حامل .. و عبيد ما كان عندها فسويحان يوم عرفت ..
عبيد : حلفي ...؟؟؟؟..
سلامه و هي مستحيه : و الله ..
عبيد : لا لا مب مصدق ..
سلامه : هههههههههههههههههههههههه ..
عبيد : سلامي ما اتخيل عمري بو
سلامه : ههههههههههههههههههههههههههههههههههه .. و لا انا اتخيلك بو بس شو نسوي حكم ربك ..

و قرب عرس العنود و مطر .. الي يالس و يعد الايام و الساعات و الدقايق .. الله يغربل العرس تره ربشه و انا مادري ..
بالثلاثا فليل .. يت الحنايه و حنت العنود .. و غايه ماسكه كيمرة الفيدو و هي اتصورها .. و من عقب ما خلصن الحنايات راحن صوب غايه و سلامه و حننهن ..

و بالاربعا .. انترس بيت قوم العنود .. لانهم مسوين المقصاب بالاربعا الصبح و غدو الحرمات .. و غايه من نشت الصبح و هي في بيت عمها اتعدل الزهاب و اترتب الشنط .. و كانت شاله البيت .. و ما شاء الله يراتهن ما قصرن من الصبح عندهم .. و من عقب ما تغدن الحرمات .. روحن .. ووايد الي يوهم من هلهم في بوظبي و العين .. و توزعو من بين بيت قوم غايه و بيت قوم العنود عشان العرس باجر ..

و مطر ظاربنه حفوز مب طبيعي .. كل شوي يروح و يحوط بسيارته .. و الغصه صدق ان العنود من اسبوع مغلقه تيلفونها .. عنلالالالالالالالاتها السباله ..
بالخميس الصبح .. غايه عند العنود الي من زود حفوزها ما كلت شي من يوم الاربعا الصبح .. و البيت ربشه .. كان الجو وااااااااايد حلو .. و هالشي الي خلى غايه تتحسر ع ليلتها يوم عرسها .. اللحين بس اكتشفت اني كنت غلطانه بلي استوى ..

و بما ان بيت العروس عدال بيت المعرس .. يعني ماشي زهاب و مسيره .. بس الشباب التمو في بيت قوم غايه من الساعه 10 الصبح .. و طبعا حامد من يوم الاربعا عندهم .. و منصور في بوظبي و هو مب عارف شو يسوي بس ظاربتنه غصه .. انه ما يكون من بينهم في هاليوم .. بس هو مب قادر انه يوصلهم من عقب الي استوى من بينه و بين غايه خص انه ما كلم حد من هلها من استوت السالفه ..

عالساعه 10:30 .. تلايمو شباب سويحان و الشباب كلهم من ربع مطر و رفاجتهم و هلهم .. و سووو مسيره عووووده و تمو يحوطون في سويحان كامله .. و هم شالين الدنيا بصوت الاغاني .. و نص الشباب وقفو في باركنات مدرسة البنات .. و طولو عالمسجل و تمو ايووولون من ربشتهم .. كان الجو من الصبح و هو حلو من الخاطر .. و من العصر و العرب يستاقون صوبهم و فرقة المقابيل شاله سويحان شل من صوت الحوربيه ... و عند البنات .. غايه و سلامه عند العنود و هي تتعدل .. و هن تعدلهن وحده ثانيه ..
و غايه و سلامه خلصن قبلها .. و غايه تعوض عن يوم عرسها .. و تعدلت من الخاطر .. و كانت ملكة جمال .. و هي لابسه وردي بذيل طويييييييييل .. و فاتحه شعرها الي تخطى ركبتها .. و حاطه مكياج وردي رهييييييييييييب .. و لابسه البرقع و شيله ساري .. و هي فالبيت ما لبست عباه ..

و بما ان حامد من يومين في سويحان .. ماكان الا منصور الي لازم ايودي خاواته للعرس .. و هن توهن واصلات سويحان .. اتصلن بغايه .. و قالتلهن غايه اينها في بيت عمها .. و وقف منصور .. بس ماقدر انه ينزلهن من الباب الرئيسي لان وااااايد ناس و رياييل ..
منال : غايووه .. وايد رياييل مانقدر ننزل ..
غايه : لا تعالو من باب السكه الورانيه ..
و دخلبهن منصور فالسكه .. و وقف عند الباب الوراني .. و غايه قلبها وقف .. اللحين بشوف منصور .. و منى و منال ما طاعن يدخلن دونه بحجة انهن يخافن يكون حد من الرياييل جدامهن .. نش منصور و نزل فياهن و دخل الحوش .. و كانت غايه واقفه مجابلتنهم .. و من دخل باب الحوش الوراني وقف .. و هو يشوفها جدامه .. و غايه من شافته .. و قلبها عورها .. التعب هد حيله .. و منصور من شافها و هو يحس بالدم يمشي في عروقه .. معقوله ..؟؟؟.. غايه .. آآآآآآآه فديت قلبج ..
مشن البنات و منصور ما مشى .. و خافت غايه لا يفتر و يروووح ..
غايه و هي عانيتنه هو : تعالن هنيه ماقدر امشي صوبكن ذيل الفستان بيخيس ..
ابتسم منصور و هو حاس بقصدها .. و مشى .. و هو يمشي و غايه في كل خطوه يخطيها منصور تحس باحساس ما ينوصف و الابتسامه ما فارقت شفاتها .. و هو كل ما يتقرب .. يحس عمره في عالم غير عن هالعالم كله .. سلمت غايه ع منى و منال و من عقب افترت صوب منصور ..
غايه برقه : هلا و الله ..
و منصور عينه عليها : هلابج زود ..
و غايه تتنفس بسرعه و قلبها يدق يدق يدق ..
غايه و هي ترفع غصله من شعرها عن عينها : كان بودي اقولك قرب .. الا المكان كله بنات ..
ابتسم منصور و عينه عليها .. ظعفت .. فديييييييييييتها ..
غمض اعيونه شوي و من عقب هز راسه و هو مبتسم : لا عادي ..
و منى و منال دخلن و خلوهم بروحهم .. و تمو يشوفون بعض .. تم منصور يتاملها ..
منصور : دخلي .. انا بروح عند الرياييل ..
غايه : ان شاء الله ..
و افترت عنه .. و من افترت لا اراديا لمس طرف شعرها من تحت كندورة منصور .. و منصور تيبس .. و دخلت عنه و هو ثواني واقف و من عقب ثواني و هو مب قادر يمشي من عقب هاللمسه ..

عند الرياييل الجو ربشه بالقو يوله و شلات و اغاني .. و الشيوووخ مرتبشين فيا الشباب خص الشاره الي حطوها .. و حطو شاره للشباب و شاره لليهال ..

و من انحط العشى .. و من عقب ما تعشو الحرمات و الرياييل .. حدرو العروس .. و كانن البنات من قبل فالقاعه .. و دخلت العنود من عقب ما بندو الليتات ..

و دخلت من ورى الكوشه .. و جدامها راشد و سالم و هم ايولون و هي تمشي بروحها وراهم .. و هم يمشون و ايولون و الحرمات ميتات عهالحركه .. و العنود تمشي و هي صالبه عمرها .. و تظحك للكل .. و تتلفت يمين و يسار .. ربي زااااااااادها جمال رباني .. كانت تختلف نهائيا عن العنود الي يعرفونها .. سبحانك ربي ..


و من عقب ما يلست عالكوشه نشت غايه و سلامه صوبها .. و الحرمات ميتات عليهن خص غايه .. كانت رهييييييبه من الخاطر ..

شوي و حدرو الرياييل .. سعيد و معضد و فياهم مطر و بو غايه و يد غايه .. و مطر من ركب الممر و يمشي صوب العنود .. ارتبش و تم ايووول يلييين وصل للعنود الي من شافتهم قامت .. و من وصلت للعنود .. تم ايبس جدامها و هي ميته منه .. و من سوالها التحيه العسكريه و من عقب خر عليها و وايها .. و الحرماااااات ميتاااااااات عليه من الخاطر .. و من عقب ما سلمو عليهم كلهم و تمو يتصورون ..
اشر مطر لغايه .. و من عقب ما راحتله راحت صوب المغنيه ..
المغنيه : هداء خاص من المعرس لام المعرس ..

و اهدى امه غنية البرتقاله لانها كانت لابسه ثوب برتقالي .. و الحرمات عايبتنهن ربشت مطر ..

و فهالوقت عند الرياييل .. منصور من عقب ما شاف غايه .. اتخذ قرار نهائي انه بيرجعها خلاص .. ماقدر اعيش دونها .. و هم يالسين و يشوفون ربشت الشباب نش واحد من الشباب ..
__________________

فهالوقت عند الرياييل .. منصور من عقب ما شاف غايه .. اتخذ قرار نهائي انه بيرجعها خلاص .. ماقدر اعيش دونها .. و هم يالسين و يشوفون ربشت الشباب نش واحد من الشباب ..

و كانت فرقة بو صلاح ماخذتلها بريك بيرتاحون ..
احمد : السموحه منكم الشيوخ .. الا بغيت اهدي عرب هالشله و عساهم يفهمون قصدي ..

باسم الدموع النازفه والمناديـل
والـورد لاحمـر والأمـل واضمحالـه

والضيق والتفكيـر والهـم والويـل
اكتـب بـدم القلـب آخـر رسالـه

حروفهـا مـا تحتـمـل اي تـأويـل
تبكـي معانيهـا بعـيـن الجـزالـه

وداعـة الله قلتـهـا دون تأجـيـل
صبـري وصبـري قـد تعـدى احتمالـه

قلبي الذي يا (و سكت ) يغليك بالحيل
لك السعد به يا غلا والشقـا لـه

صهيـل احزانـي بقلـبـي تراتـيـل
عانق ربوع الشـرق وابكـى شمالـه

عشتـك بمـا يكفـي معـزه وتبجيـل
عشتـك جـواب ٍ حايـر ٍ فـي سؤالـه

عشتك روايه غارقه بعتمة الليـل
مضمونهـا حـلـم ٍ تـعـذر منـالـه

فيها الاسى والصد والجـور والميـل
فيها البطل يرثـي ويرثـى لحالـه

فصولـهـا متـأزمـه بالتفـاصـيـل
عنوانها في الحب (( آخر رساله ))


الشباب : الله لا شلك يا بو شهاب ..
و منصور من سمع هالقصيده عرف قصد احمد .. و هالشي الي ذبحه .. بعده يحبها .. آآآآآآآآآه .. و اتصل بخاواته و خطف عليهن عند باب القاعه و شلهن و ردو .. و هو ميت .. ليتني ما حظرت العرس .. ليتني مت .. ليتني ما اعيش زود عن ما عشت فهالدنيا ..

و من عقب ما ردو البيت المعاريس و تصورو .. سرو صوب دبي .. و غايه هالليله ما باتت .. و قلبها يدق بالقو .. لا اراديا عالساعه 3 ما قدرت تمنع نفسها و ما تتصل بمنصور ..

و منصور امبونه عالبحر .. و من شاف " منطوق قلبي تتصل بك " تم متردد .. ايرد و الا لا .. بس ماقدر انه يمنع قلبه و لا يرد ..

غايه برقه : الو ..
و منصور ايغمض اعيونه .. مب عارف شو يسوي .. خلاص كرهتها ..
منصور : هلا ..
غايه : هلا و غلا ملايييييييييييين و لا يسدن ..
سكت منصور ..
غايه : شو فيك ...؟؟؟؟..
منصور : شو تبين ..؟؟؟..
غايه : اباك انت ..
صخ منصور من كلامها ..
غايه : بكل صراحه .. بصوت وااااطي رقيق ) .. احبك ..
وقف قلب منصور و هو يسمعها اتقول هالكلام .. تحبنيه ..!!!..
منصور : ... اها ..
انصدمت غايه من ردت فعله ..
غايه : قلت شي غلط ..؟؟؟..
منصور : وليش اللحين اتقوليلي انج اتحبيني ..؟؟؟..
غايه : لانك اتحبنيه ..
منصور : غايه .. مب كل من قالج .. احبج .. يحبج .. كل الرياييل يحبون .. بس لازم تفرقين من بين الي يحبج صدق ..و من يقول هالكلمه و هو يتسلابج ..
غايه : منصور حرام عليك ..
منصور : ارجوج ..
غايه : انت الي ارجوك .. منصور حرام عليك .. و الله حرام ..
سكت منصور فتره .. و غايه ادموعها على خدها .. و ايدها ترتجف ...
غايه بصوت مبحوح : .. منصور ..
منصور : حبيتج .. و الله اني حبيتج .. ( هز منصور راسه ) .. حرام عليج ..
غايه و هي تصيح و ما تشوف من دموعها : و انا احبك ..
منصور : بعد شوو ...؟؟..
غايه : دخيلك عطني فرصه ثانيه ..
منصور : من بعد ما ذبحتيني ؟؟؟!!!..
غايه : منصوووووور ..
منصور يرتجف من هالمشاعر و الاحاسيس الي يحسبهن : خافي ربج فيني يا بنت الناس .. و الله الطعن فالميت حرام ..
غايه : يعل يومي قبل يومك ..
فهاللحظه نزلت دمعة منصور : يالله يالقدر .. ييتج .. و انا حاطلج قلبي بكفه و حبي بكفه .. ( غمض اعيونه ) .. ييتج و انا محتاينج .. و الله كنت محتاي احط راسي ع صدرج .. اشكيلج من تعب هالسنين .. كنت محتاي اسمع صوتج .. همسج .. أي شي منج .. أي شي يعيشني باقي حياتي ..
غايه و هي منهاره و تصيح : دخييييييييييييلك ارحمني ..
منصور : و انتي ليش ما رحمتيني ..؟؟؟؟!!!.. ليش ما رحمتي حبي ... ليييييييييييييش ..؟؟؟؟..
غايه : بسوي أي شي انت تباه بس دخيييييييييييييييلك .. لا تخليني ..
منصور من بعد ما تنفس بصوت عالي : آآآآآآآآآآآآآآآآه يا غايه .. تعرفين شو الي يفصل بين الحب و الكره ؟؟.. شعره .. اتشوفين شعره من شعرج .. ( فهاللحظه شاف غايه جدامه .. نايمه .. و شعرها متناثر حولها .. هز راسه .. يريد هالصوره تتلاشى من خياله .. ) .. شفتيها .. شفتي مرفعها ؟؟؟..هذي الي تفصل بين حبي و كرهي لج .. كنت احبج حب ما ينوصف .. لو ما خوفي من ربي .. كنت عبدتج .. تعرفين شو يعني عبدتج ..؟؟؟.. ( غايه تسمعه و تمسح ادموعها .. بس ما ظنتي سيل الدمع تمنعه بلمست اديها ) .. و الله حبيتج ..
غايه و هي تصيح : منصور ..
منصور : ذبحتيني .. ذبحتي حبي قبل لا ينولد ..
غايه : بيدنا نحييه ..
منصور : من يموت انسان يندفن فالتراب .. فما بالج ان ماتت المشاعر .. ؟؟ .. انا انسان خالي من المشاعر ..
غايه : منصور عطني فرصه ..
منصور : فرصه لشو ..؟؟؟.. غايه صدقيني .. و الله اني كرهتج ..
غايه : لا لا .. مستحيل حبك لي يروح بهالسهوله ..
منصور : من يقول انه راح ..؟؟.. حبي موجود .. بس مب لج ..
غايه : لا تكابر .. ادري انك تحبنيه ..
منصور : كنت .. بس اللحين اكرهج ..
غايه : مستحيييييييييييل .. مستحيييييييييييييييل .. ما اصدقك ..
منصور : خلاص .. ما عاد لج بالقلب حب باقي ..
غايه : انت ليش اتذلني ..؟؟..
منصور : انا ما اذلج .. قلتلج .. مالج مكان لا بقلبي و لا بحياتي ..
غايه : بهالسهوله ..؟؟؟!!!!؟؟..
منصور : ههههههههه .. ليش انتي ما تشوفين الوضع سهل ..؟؟؟!!!!!؟؟؟..
غايه : .. لا ..
منصور : بس يوم صرحتيلي بحبج القديم كان الوضع سهل .. ؟؟!!
غايه : لا بس ..
منصور و هو يعلي نبرة صوته و يقطع رمستها : يوم تنعتيني باسم .. ( حس جنه ينطعن ) .. باسمه .. كان الوضع سهل .. ؟؟!!
غايه : انت ليش ما تريد تفهمني ..
منصور : كل الي اقدر افهمه انج غدرتي بقلبي .. غدرتي بحبي ..
غايه و هي تصارخ : ماااااااا غـــــــــــــــدرت ..و لا فكرت اغدربك .. انت حياتي .. انت عمري .. كيف اغدربك ..؟؟؟؟... حرام علللللييييييييييك ...
تمو ساكتين .. تمر الثواني عليهم كنها اسنين ..
منصور من بعد ما هدى : عيشي حياتج دوني ..
غايه : مالي حياه من دونك ..
منصور : ربي يوفقج في حياتج و ..
غايه و هي تقطع رمسته : دخيييييييييييييييييييييييل قلبك ..
منصور : مع السلامه ..
و ما عطاها منصور مجال انها تتكلم .. سكر التيلفون و من عقب اغلقه .. آآآآآه ..
ماتت غايه .. لا لا هذا شي فيه .. مستحيل ايكون انسان طبيعي .. ساعه يحبنيه و ساعه يبغظني ..

من عقب هالليله .. خلاص فقدت غايه الامل فمنصور .. الي ظربته ظيجه من الدنيا كلها .. و راح و حجزله تذكره عشان يسافر لندن .. و تفاجؤبه و بدون مقدمات ظاهر من البيت بشنطته ..
منال : انتي وين بتروح ..؟؟؟.
منصور : لندن ..
منى : منصوووور ..
افتر صوبها بس ما تكلم ..
حامد : بصراحه .. طحت من عيني ..
وقف منصور و هو مصدوم من كلام حامد ..
حامد : عمري ما توقعتك جذيه ..
منصور : شو قصدك ..؟؟؟..
حامد : عمري ما توقعتك بهالظعف ..
طالعه منصور بنظره ..
حامد : تعرف .. اكتشفت انك ما تستاهل غايه .. و الله هالانسانه تستاهل واحد احسن عنك ..
افترن خاواته صوبه ..
حامد : غايه مالها ذنب بالسالفه الي استوت من بينا ..
منصور : حامد ..
حامد : كوني اريد اخذ طليجت ولد عمك هالشي غايه مالها ذنب فيه ..
منال : شوووووو ..؟؟؟..
حامد : عصب لاني قلتله احب شيخه طليجة علي ولد عمي ..
صخت منال و يلست من الصدمه ..
منصور : يوم بتكون نذل لدرجة ان حرمة ولد عمك تتطلق متعمده من ريلها عشانك ما تستاهل اني اكلمك ..
حامد : انا احب شيخه من زماااان و مب ذنبي ان علي خذها و انتو غصبتوها عليه ..
منى : انت تحب شويخ ..؟؟؟!!!!...
حامد : و باخذها ..
طالعه منصور بنظره ..
حامد : مب غلطت غايه انها دافعت عني و هي ما تدري بشي ..
منصور : طاعو منو يتكلم .. مب انت الي ييتني و قلتلي عن غايه و احمد ..
حامد : بس هي ما خانتك ..
سكت منصور و ظهر عنهم .. و سافر لندن .. و غايه فحالة انهيار عصبي .. خلاص فقدت الامل انها ممكن ترجع منصور .. فهالفتره مطر و العنود سافرو لبنان شهر العسل .. و العنود متغصصه لانها وقفت هالكورس من الجامعه .. بس ماقدرو انهم يتاخرون وايد بسبب شهر رمضان الي بيهل في نص شهر 10 .. و ردو قبل رمضان 3 ايام .. و منصور بعده في لندن .. مايريد انه يرجع البلاد .. و حامد التزم بالشركه و الشغل من عقب ما راح منصور ..

و غايه و لو انها خلاص .. فاقده الامل بمنصور .. ماقدرت انها تبغض خاواته الي كانن شرات خاواتها .. و و من ردت العنود و مطر .. عزمتهم غايه كلهم فالعزبه .. و عزمت منى و منال و حامد ..

و فالبر ارتبشو العرب بالقو من الصبح و هم فالبر .. و الشباب ياييبين دراجات فياهم .. و البنات يالسات ورى العرقوب و اوونهن يلعبن .. و هن من قبل لا يركبن الدراجه يصارخن .. فهاللمه شاف حمد منى .. و ما بغى يشل عينه من عليها .. و تمو فالعزب يلين المغرب و من عقبو ردو الشعبيه و قوم حامد ردو بوظبي و هم متحسرين ما يبون يودرونهم .. خص غايه .. بس ما بيدهم حيله ..

قبل رمضان بيوم ..

رجع منصور من لندن .. و كان انسان ثاني .. صدق انسان منهار .. بقايا انسان .. و حامد كل ما يشوفه ظارتنه غصه .. لانه سبب الي يعيشونه ..

هل عليهم شهر رمضان .. و الكل مرتبش .. و اللمه كانت وااايد حلوه .. و لو ان غايه كانت تتغصص كل ما تشوف خوانها كيف يعاملون حرماتهم .. خص مطر و العنود .. كانو مثال للحب .. مطر من يدخل البيت لازم العنود توقفله و توايهه .. صارت عاده عندهم هالحركه لدرجة الكل تعود عليها .. و سلامه و لو انها كانت تعبانه بسبب الحمل .. بس تعبها يهون و هي اتحس ببذرة حبها و عبيد فهالتعب ..

من عقب النص من رمضان .. مسك حامد منصور و كلمه ..
منصور : حامد .. لا تحاول ..
حامد : ممكن تسمعني ..؟؟؟؟..
منصور : خلاص .. انا من عقب العيد بطلق غايه ..
صخ حامد ..
حامد : ليش ..؟؟..
منصور : ماقدر اجبل صوبها ..
حامد : انا سويت شي ..
منصور و هو يفتر صوبه ..
حامد : انت ما استغربت ان طول هالفتره هل غايه ما كلموك ..
منصور : هيه ..
حامد : تعرف ليش ..؟؟؟.. لاني رحت و كلمتهم .. و قلتلهم يصبرون عليك .. لاني اعرف انك اتحبها ..
سكت منصور ..
منصور : لو احبها .. ماقدر .. ماقدر اجبل صوبها .. اتخيلها فيا احمد ( هز راسه ) ماقدر ماقدر ..
حامد : انا كلمت احمد ..
افتر منصور بسرعه صوبه : شوووووو ...؟؟؟؟...
حامد : هالشي الي كانت المفروض انت تسويه ... انا كلمته .. و هو حلف انه ماقد كلم غايه و لا يعرف عنها شي .. و فالسعوديه .. قالي انها صدته ..
منصور : بس هي اعترفتلي ..
حامد : بس قالتلك انه وهم ..
منصور : بس كانت تهويسبه فليل ..
حامد : ما بتعرف حقيقة هالشي الا ان سألتها و كلمتها ..

يومين و منصور مب مصدق الي يسمعه .. انا ظلمتها .. معقوله ... آآآآآآآآه يا غايه .. ياربي شو اسوي ..؟؟؟... يومين و منصور عايش بحيره .. مب عارف كيف ممكن انه يكلم غايه .. كيف ايقولها انه و بكل بساطه جرحها .. آآآآآآآآآآآآه يا قلبي
__________________

¨¨¤¦ آاه من عين تدمع فرقات غالي .. بوخليفه ما مات .. بوخليفه في قلوبنا اللين الممات .. يالله عساه في جنة ربي خالد ¦¤¨¨°


يوم الثلاثاء 2- نوفمبر- 2004 الموافق 19 من رمضان من سنة 1425 هـ

كانو توهم العرب فاطرين .. و غايه فالمطبخ تعابل الفواله الي بتنحط من عقب صلاة التراويح .. و فياها العنود ..
و امبونه عبيد فياها .. و جان يرن تيلفونه ..
عبيد : مرحبا الساع ..
عبيد و هو مصدووووم : شوووووووووووووووو ...؟؟؟؟..
و نش عبيد و هو يربع من البيت صوب سيارته ..
و ام غايه مب عارفه شو بلاه .. خافت لا حد من خوانه استواله شي .. و اتصلت بعبيد ..

و فجأه سمعو ام غايه و هي تزقرهن .. ظهرن من المطبخ و هن يترابعن و الخدامات وراهن ..
غايه : امايه شو فيج ...؟؟؟؟..
و ان ام غايه منزله راسها و شيلتها ع ويها و اتصيح بحرقه ..
العنود : عموووه شو بلاج ..؟؟؟..
غايه و تصييييح بحرقه : يا حزني يا غايه .. بو خليفه غاب ..
صخت غايه و العنود ..
ام غايه : يا نفاااااد الدار من عقب يا زاااااااااايد ..
غايه : امايه انتي شو تقولين ...؟؟؟؟..
ام غايه : يااااااااااويل حالنا من عقبك .. آآآآآآآآآآآآآآآآآآآآآآآآآآآآآآآآآآآه ..
فهاللحظه حست غايه ان السالفه فيها شي ..

غايه : لا لا مستحيل .. زاااايد مااااات .. لا لا اكيد جذب .. ما اصدق .. منو قال ..؟؟؟.. لا زاااااااااايد حي .. لا دخييييييييييلكم لا تقولون زايد مات .. زااااايد عايش من بيننا ...
ام غايه : يابنتي .. دخيييييييييلج لا تزيديني ..
غايه و هي تصيح و تصااارخ : لالالالالالالالالالالالالالالا ... لالالالالالالا .. زاااااااااااااايد حي .. لا دخييييييييييلكم .. لا تقول زايد مات .. لا لا ماصدق ..
العنود و هي منهاره و تصيييح : غايووووه دخييييييلج ...
غايه و هي تمسك العنود بكتفها : عنود زايد مات ..؟؟؟.. يجذبوووووووون ..
العنود و هي تصيييح : لا ما مات اكيد يجذبون .. صح عموه ..
ام غايه و هي اتحط اديها ع راسها : اااااااه يا قلبي .. دخيييييييييييلكن سكتن عني .. شو حياتنا من عقب زاااااااااايد ..
غايه : لا ما مات .. انتي منو قالج ..؟؟؟..
ام غايه : ..خوانج ..
غايه و هي تهز راسها : لا لا لا .. لا يجذبون ..

و اتصلت بالتلفزيون ... بس محد شله .. حاست على الإمارات .. و تافاجأت بالقرااان يقرى فالقناااااااه ..

غايه بحرقه : لالالالالالالالالالالا .. زايد ما مات .. آآآآآآآآآآآه .. زاااااااااااايد ..

و ربعت غايه لحجرتها .. و هي منهاره من الصيااااااح .. لا مستحيل مستحيل زايد مات .. ماصدق .. لالالالالالالالالالا ... ياربي ... زااااااااااااايد ..

انجلب حال الإمارات من شاع هالخبر .. الكل منصدم .. زاااايد مااااااااااات ... يعني ما بنشوف زايد عد هاليوم و هو يرمس و هو يحوط فالبلاد .. و هو يوقف عند الناس و يسلم عليهم و يكلمهم .. خلاص راح زاااااااايد .. كل الامارت مفجوووعه .. شيخنا .. ابونا راح .. راح و يا شين الدار من عقبه .. شمن حياة بنعيشها من عقب زااااااااااايد ..؟؟؟.. البلاد من مشرقها لمغربها .. الكون كله .. الكون كله يبكي ع فراق زااااااااايد .. الكافر قبل المسلم .. الاجنبي قبل العربي .. يالله .. ليت العمر ينعطى .. و الله العمر يفدى بو خليفه ..

من انتشر الخبر عن طريق التلفزيونات و الاذاعات .. الدار فضت .. و ماتضوفون سياره تمشي .. الكل منصدم .. و من الصدمه ... كل الرياييل راحو صوب بوظبي .. و سويحان ما تسمعون فيها صوت .. الصوت الوحيد هو القرآن في كل بيت .. حتى المساااااايد .. القرآآآآن .. هذا حال الدوله كلها .. من العين لدبي للفجيره لعيمان لشارجه راس الخيمه .. و الحزن تخطى الإمارات .. و تخدى دول الخليج .. هالحزن عم الكون كله .. من اكبرهم لاصغرهم ..

مب مصدقين .. اتخيلو عد هاليوم ما بنشوف زايد و هو واقف و يحي الشعب .. تتخيلون .. خلاص .. روووح زايد امست فالسمى عند رب العالمين ...

دخلت العنود ع غايه .. الي من دخلت حجرتها و هي ع الشبريه و اتصيح .. من شافتها العنود يتها و لوت عليها ..

العنود : غايوووه .. ما اتخيل الدار دون زااايد ..
غايه : آآآآآآآآآآآآآآآآه يالعنود .. زاااااايد راح .. ليتني مت قبل هاليوم ..
العنود : آآآآآآآآآآه يا بو خليفه ..

ساعات ما تنعد .. و العيون تبكي بو خليفه ( الله يرحمه ) ..

دخل راشد عليهن و هو يصيح : عموووه .. بابا زايد مااااات ..؟؟؟..
و ان ميثه امه وراها ..
ميثه و هي تصيح : راشد ..
راشد : لا لا .. بابا زايد حي .. ما مات ..
راحت ميثه و هي منهاره و تلوي ع ولدها ..
راشد و هو يضربها : ماااااااااااااااااااحبج .. ليش اتقولين بابا زااااااااااايد مااااااااااااااااااات .. ماااااااااااااحبج .. مااااااااااااااااااااحبج ..

و ظهر يربع من البيت .. يلست ميثه عدال باب غايه و تمت تصييييح .. عنبوج يالدنيا ما بغيت غير نظري اتشلينه .. آآآآآآآآآآآه يا زاااااااااااايد .. عسااااك في جنة ربي خااااااااااااالد ..

و ان يد غايه حادر عليهن ..
يد غايه : بتخبرك شتصيحله ..؟؟؟.. انتن صاحيات ..؟؟؟.. منو جاذب عليكن بهالخبر .. بوخليفه بخير و ما يشكي باس ..
و البنات يتصايحن ..
يد غايه و هو يمشي صوب غايه .. و يحط ايده ع كتفها : افا يا بنت معضد .. اتصيحين زااايد و هو حي ..؟؟؟؟..
غايه : يدي زاااايد مااااات ..
يد غايه : لا لا بنتي .. بو خليفه ما مات .. بو خليفه هنيه ( و اشر بايده ع قلبه ) .. بو خليفه فالقلب .. بو خليفه ما مات .. فهاللحظه خنقته العبره .. و لا قدر انه يمسك عمره زود .. و طلع عنهن ..

يد غايه : عنبوووج يالدنيا .. الزين شليتيه و الشين باقي .. لا اله الا الله ..

ساعات و الحال انجلب فالدوله كلها .. الريايييل موقفين سياييير و يصيحين ..و الهنود .. و البتان .. عم الحزن دار بو خليفه .. هالحزن ما فرق ما بين عود و صغير حرم و ريال .. جتعمت الدوله كلها فهالحزن .. آآآآآآآآآآآآآآآآآآه عساك في جنة الخلد يا زااااااااااايد ..

من قدرو العرب يستوعبون الخبر و يستوعبون حالهم .. نشو و قرو قرآن يترحمون ع بو خليفه .. هالليله .. ما فرد فالدوله و العالم كله نام ..

و الكل مواصلين و يصلون و يقرون القرآن ع روح بو خليفه الله يرحمه ..

ب الاربعاء الصبح .. توافدو الوفووود الرسميه للدوله عشان يشيعون جثمان بو خليفه ( الله يرحمه ) .. و الناس مواصلين .. و لا جفت مدامعهم .. و الحزن قطع اقلوبهم .. و الرياييل و الشباب من وصلهم الخبر و هم فالعاصمه بوظبي .. و من عقب الساعه 12 الظهر الشرطه سكرو الطرق الرئيسيه للعاصمه بسبب الوفود الي بتوصل الدوله من كبار الشخصيات ..

و القناوات باثه مراسم التشييع ابداءا من استقبال الوفود .. و توافدو كبار الشخصيات و رؤساء الدول الشقيقه .. و توجهو الشيوخ لمسيد سلطان بن زايد عشان يصلون العصر .. و من عقب العصر بيصلون صلاة الجنازه ع بو خليفه . .. توافدو الناس كافه من مواطنين لوافدين لاجانب لهنود لبتان لهالمسيد .. و الكل مفجوع في بو خليفه .. من وصلو الشيوخ صلو العصر .. و من عقب تمو يرقبون الجثمان ..

و كل الحرمات و البنات فالدوله كلها .. اعيونهم و قلوبهم تدمع ع بو خليفه و هن يشوفن الجنازه فالتلفزيون .. و من وصل الجثمان عند المسيد و الكيمره عالسياره و هي تمشي من بين جموع الناس .. و من عقب ما وقفت السياره .. نزلو جثمان بو خليفه .. آآآآآآآآآآآآآآآآآه يالدنيا بو خليفه الي من وقف وقف بشمووووخ آل نهيان .. بشموووخ فارس .. اليوم يشلونه ..!!!.. يشلونه و هو جسم ٍ بلا روووح .. آآآآآآآآآآآه .. نزلو جثمان بو خليفه و هو ملفوف بعلم الإمارات .. و الكل يكبر ..

و غايه و امها و الباجيات .. ايشوفن فالتلفزيون .. خلاص .. بابا زايد راح صدق .. و عيال زايد ايشلون جثمانه و حطوه فالمسيد .. و الكل يشوف .. امنع ادموعي ..؟؟؟.. امنع نزف قلبي ..؟؟؟.. اذا ما دمعت اعيوني و قلبي ع بو خليفه عمنوه تدمع ...؟؟؟؟.. و من انحط الجثمان ع الارض .. وقفو الشيوووخ و كبار الشخصيات يصتفون .. عدا بو خالد .. الشيخ محمد بن زايد .. الي اتعب و الحزن هد حيله .. الكل مب قادر انه يشوف بو خليفه و هو ملفوف بالعلم .. جثه هامده .. عدا بو خالد .. افتر صوب بوه .. و شافه بنظره .. نظره انحفرت في قلب كل اماراتي .. نظره اسحبت الدمع من اعيون الصغير قبل الكبير ..




خلاص يا بو خالد .. زااايد راح و خلانا و ربي يصبرنا بشوفتك .. و شوفت عيال زااايد .. الكل مفجوع و الكل مصدوم .. ايصلون ع بو خليفه و بقلوبهم مب مصدقين .. معقوله ..؟؟؟... معقوله بابا زااايد راح عنا ..؟؟؟؟.. آآآآآآآآآآآآآآآآآآآآآآآآه ..

من عقبو ما صلو صلاة الجنازه ع جثمان بو خليفه الله يرحمه .. شلو الجثمان .. و مشوبه .. و فجأه من بين كبار الشخصيات و الشيوخ و رؤساء الدول .. طلع واحد بتاني .. و يى يربع صوبهم .. و خاطره بس يمسك جثمان زايد .. بس عشان يصدق .. ان بوهم و بو الكل مات .. و من مسك الجثمان .. وقف و ويه ليدار المسيد و تم يصييييح ..



آآآآآآآآآآآه يا بو خليفه .. حزنك تخطانا و صاب الكل ..

و رجعو جثمان بو خليفه لسياره


و الناس برى .. مب مصدقين .. تخطاهم جثمان زااايد .. يسيرون صوب مسيد زايد .. هالمسيد الي وصى بو خليفه ان قبره ما يكون الا عنده .. و تمشي السياره بين جموع الناس ..



غايه : تخيلو .. هذي اول مره بو خليفه يمشي بين شعبه دون ما يرفع ايده يحييهم ..
و تمسح دموعها .. و الكل يصيح .. آآآآآآآآآآآآآآآآآآه .. من عقب ما كان يمشي من بين الناس بشموخ رافع ايده اليمين يحييهم و هو مبتسم .. اليوم يمشي من بينهم و هو جثه هامده .. سبحان الله .. و من وصل الجثمان مسيد زايد ..



فاللحظه الي بيدفنون فيها بو خليفه نشت غايه .. مب قادره .. مب قادره اتشوف بو خليفه و هو يندفن .. و دخلت حجرتها و تمت تقرى القرآن .. و من خلصت تمت تدعيله ..

ربنا اغفر لوالدنا الشيخ زايد
ربنا باعد بينه و بين خطاياه كما باعدت بين المشرق و المغرب
ربنا نقيه من خطاياه كما ينقى الثوب الأبيض من الدنس
ربنا اغسله من خطاياه بالماء و البرد و الثلج
ربنا وسع عليهم مدخله و ثبته عند السؤال
ربنا و اجعل قبره روضة من رياض الجنة و لا تجعلها حفرة من حفر النار
ربنا نحن أبنائه و نشهد جميعا ببره و تقاه
ربنا و ارحمه كما رحمنا
ربنا و ارحمه كما رحمنا
ربنا و ارحمه كما رحمنا
ربنا اجعله مع الأنبياء و الصديقين و الشهداء
اللهم انك سميع تجيب الدعاء
يا حي يا قيوم برحمتك ارحمه يا خير الراحمين
يا رحمن يا رحيم
ربنا نشهد بأنه أكرمنا و أكرم دينك و عبادك
ربنا فأكرمه في جنات النعيم
يا سميع يا مجيب
ربنا و اجعل قبره روضة من رياض الجنة يا رءوف يا رحيم
ربنا انه كان من عبادك المؤمنين
ربنا فاغفر له و ادخله الجنة مع النبيين و الصديقين و الشهداء
ربنا و حرم عليه النار
ربنا و نجيه من عذاب القبر يا رحيم
اللهم أغفر لهُ وأرحمهُ وعافهِ وأعفوا عنهُ , وأكرم نزلهُ ووسع مدخلهُ
وأغسله بالماء والثلج والبرد , ونقهِ من الذنوب و الخطايا كما ينقى الثوب الأبيضُ
من الدنس , اللهم أوسع عليهِ قبره , وفرش قبره من فراش الجنة ,
اللهم اجعل قبره روضة من رياض الجنة ولا تجعلها حفرةً من حفر النارِ يا رب العالمين , اللهم أبدله داراً خيراً من داره وأهلاً خيراً من أهله وزوجاً خيراً من زوجه , وأدخله الجنة وأعذه من عذاب القبر ومن عذاب النار .
اللهم هذا الدعاء ومنك الإجابة وهذا الجهد وعليك التكلان , سبحان ربك رب العزةِ عن ما يصفون وسلامٌ على المرسلين , والحمد لله رب العالمين , وصلى اللهم على نبيك محمد وعلى آله وصحبه الطيبين الطاهرين وسلم تسليماً كثيرا.

طول الاربعاء و الخميس و اليمعه .. و الإمارات تستقبل التعازي .. و الناس مرتبشين .. و هل غايه من بوها لخوانها كلهم ما شافوهم .. من يوم الثلاثاء .. و غايه منهاره .. و كارهه حياتها ..

دخل عليها يدها ..
يد غايه : بنتي .. زايد غاب وباقي عن الشهر 11 يوم .. ظنج اصومهن عنه ..
غايه و هي تمسح دمعتها : لا يدي ..
يد غايه : يابني ما كمل الشهر ..
تمت غايه تصيح .. و هي مب قادره خلاص .. و الي زادها صدق حالت يدها .. من زود ماهو تعبان و متأثر بوفاة بوخليفه .. ما تم يبات الليل .. دوم اتشوفه و هو يالس ع طرف فالصاله و يصيح .. آآآآآآآآآآآه ..

هالليله غايه ما قدرت انها تنام .. كانت اتحس باحساس ثاني ... احساس ماتقدر توصفه .. كانت اتحس بقلبها مقبوووض زووود عن قبل ..

و طول الفتره من يوم الثلاثا و غايه مغلقه تيلفونها .. و باليمعه الساعه 2 فتحته .. و اول ما فتحته وصلتها مسج من منصور .. و بعدها ما قرت المسج ان منصور يتصل ..

من شافت غايه الرقم ماقدرت انها ما ترد عليه ..
منصور : غايه ..
غايه : مرحبا ..
منصور : خلاص بموت ..
غايه : بسم الله عليك .. شو فيك ..؟؟..
منصور : بو خليفه راح .. و انتي رحتي عني .. خلالالالاص بمووووووووت
غايه : فديييييييييييييييتك انا ما رحت انا عندك ..
منصور : غايه اريدج عندي .. دخييييييييييييلج لا تخليني ...
فهاللحظه صاحت غايه ..
و طولت غايه و هي تحاول انها تهدي منصور الي حسته منهار .. اول مره اتشوفه بهالطريقه .. ساعه و هي تكلمه ..

منصور : طلعي ..
غايه : شوو ..؟؟؟..
منصور : طلعي انا عند باب بيتكم ..
فزت غايه من مكانها : و الله ..؟؟؟..
منصور : و الله ..
و طلعت غايه و انصدمت و هي اتشوفه صدق عند باب بيتهم .. نزلت التيلفون من عذنها و تمت اتشوفه .. و هو من شافها نزل من السياره و سار صوبها ..

و تمو واقفين ثواني .. و منصور يشوفها .. و هي اتشوفه ..
منصور : دخيييييييييييييلج .. لا تخليني ..
غايه و هي تهز راسها .. مستحيييييييييييل .. مستحيييييييييييييييييل اني اخليك عد هاليوم ..

أهداء للغائب الحاضر..

أيها الغائب الحاضر .. يا من سكنت روحك أرواحنا.. قد رحلت اليوم عنا بجسدك .. و لكن .. اعلم بأن روحك الطاهرة مازالت ساكنة في أرضك الطاهرة .. أبي يا من صعب علي ّ فراقه .. و جادت عيني بالدمع حسرة ً عليه .. أسأل الله العلي العظيم عدد دموع اليتامى التي ذرفت على فراقك ... أن يسكنك فسيح جناته .. و يلهم قلوبنا المفجوعة برحيلك الصبر و السلوان .. و نحن على عهدك و وعدك باقين .. محفورة في قلوبنا صورتك حتى الممات ..

التوقيع : بذرة زرعتها يديك الطاهرة في أرض ٍ مباركه
__________________

في تكمله بسيطه راح اتنزلها الكاتبه هي عبارة عن ملخص فيه نهاية كل واحد من الأبطال.. وراح احطه لكم
__________________