كاتب الموضوع :
زهرةالصبار
المنتدى :
القصص المكتمله
رح أبدأ بتنزيلها وإن شاء اله تعجبكم
وهي في منتهى الروعة والجمال
الحلقــــــــــــة الاولـــــــــــى ..))
".،؛,‘ معزتك عندي ترا مالها نوع ..و مكانتك في القلب ماحد لقاها ..و غلاك في روحي صار مزروع..حتى المشاعر ترجمت لك غلاها و الروح لو راحت لاجلك فداها‘,؛."
فرت نورة الرواية اللي كانت تقراها ..بعيد عنها و جنها مب راضيه بالنهاية او كانت تتوقع نهايه غير الي قرتها ...اففففففففف اكره الروايات اللي تكون نهايتها ماساة أأأأأأأأأأأأأأأأه تذكرت قصة "راحت روحي من محجر عيوني " الله يسامحج يا معاني ..هذي كاتبة القصه ..جتلت بطلة القصه عهود .. قالوا عنها كاتبه و مبدعه انا اعترف انها جي بس انتي يا معاني شريره ...
حطمتي حياة عهود و غير جي ذبحتيها لالالالالالالا و المصيبه ع يد منوه حبيبها و حلم عمرها مايد ... آآآآآآآآآآآآآه يا كيف عشت مع عهود قصة حياتها خطوه خطوه و كلمه و كلمه .. فرحه و فرحه حزن و حزن أي فرحه معاني ما خلت في حياتها فرحه ..
.بروح اسوي لي نـص كافيه ..انا محد يعدل مزاجي و اييب راسي غير النص كافيه ..مدري ليش عهود وايد في بالي ... سبحان الله رغم انها شخصيه خياليه .. الا اني احس انها شرات حياتي مثل حياتها بس شخصيتنا مختلفه كيف كيف يا نوره ..
اووه الماي من زمان غلي شليت الغوري و جبيت الماي في الاسكانه و حطيت نص كافيه و معلقه شكر.. اخ صدقه عمور اكيد في يوم من الايام بيصيبني سكري .. هذا عمور اخوي اكبر عني بثلاث سنوات اممممم يعني 24 يعني انا عمري 21 اخ كبرتب سرعه الايام اتمر سرعه ..شربت شويه من النص كافيه اتذوقه اووف لسعت لساني ههههههه جني ياهل امطلعه لساني ..
يلست ع الكرسي الجريب مني في المطبخ .. طالعت المطبخ صغير بس حلو و مرتب ها بفضلي ..ولا عمر انسان لاهي بحياته ولا جني وحيده بين اربع جدران ما يهتم ولا يفكر عنده اخت يخاف عليها او يحاتيها ...هذا عكس ناصر اخو عهود الي في قصة معاني .. متسلط و يخاف ع اخته مب شرات عمور اخوي مالت عليه .. اخ اخ بس نصور وايد متسلط المفترض كان يوزع الحنان و الحب لـ عهود الي كانت مفتقدتنه و ادوره عند مايد و غيره ..بداال ما يوزعه لـ سعاد و غيرهااا ..
.عهود عهود سرحت بـ عهود ..ع الاقل لو كانت حياتها ماساويه بس حظها عندها اهل عايله اسره .. تذوقت ها الشي ..بس شي تناقض كيف تذوقت .. و هي مفتقده الحنان الي سارت ادوور عليه عن طريج مايد .. اخ عليك مايد ما قدرت قلب عهود ...حطمته بايدك شرات ما حطمت جسمها بسيارتك الي ما رحمتها ولا رحمت اخوها عبدالله .. بس فرق بيني و بين عهود انا ما عندي اهل .. انا من دون ام و اب .. لا ما بقص عليكم ابوي عايش بس وينه .. رفعت راسي ادوره بين جدران المطبخ
..جي هو نمله بس بس ما اقدر اطري ابوي اسمحولي الاب كلمه كبيره لو هي من اربع حروف بس معانتها عميقه و كبيره و تحمل مشاعر ابصراحه صعب الواحد يعبر عنها او يوزنها ... بس بالنسبه لـ لي اجوفها سطحييه .يمكن لاني ما عرفت ولا تذوقت معناتها
.اخ حتى انت يا النص كافيه ما عدلت مزاجي .. حطيت الاستكانه ع الطاوله من غير ما اكمله و هاي اول مره يمكن ما اشرب النص كافيه كااااامل معقوله انا نوره الانسانه الصريحه الحيوية مسولفجيه ..راعية المقالب و الصولات و الجولات هههههههه الله يخلي اخوي عمور ما اجوفه الا باخر الليل تدرون متى اخر الليل عندي الساعه ثمان و اقصى حد عشر ..
اممممم احب الرقاد وايد ...عكس عمور سبحان الله ...مب جنا اخوان ورابين ويا بعض .. ايه الساعه ست المغرب بسوي لي عشى ..
وقفت فتحت الثلاجه ادور شي اكله امممممممم تذكرت عهود خلاص مالي نفس اكل صكرت باب الثلاجه بقوه .. و جني منقهره بعدني من الحياة الي اتصيب بعض الناس يعيشون حياتهم هم و غم و اتكون نهايتهم ماساويه غمضت عيوني ورفعت راسي فوق اخذ نفس طويل .
نوره حبيبتي هدي عمرج ها هي الا قصه و قصه خياليه .. كنتي بتكسرين باب الثلاجه عااد منو بيصلحها لج عمور ويه الفقر .. تعال تعال ببوسك اموووووووووووووووووووووااحه احلى بوسه ل احلى ـ باب ثلاجه الي ما نكسر و تحمل دفاشتي ..حسيت برجفه الجو تغير صار بارد و نحن بشهر ديسمبر احب البرد .. حتى لو كان يأذي لانه يخلينا اندور للدفأ و منو في العالم ما يدور الحنيه و الدفأ
..بها الايام البارده .. عاد الي يسمعني يقول قاعده في الاسكيمو .. فديت راس الخيمه و بردها و حرها و مايها و بحرها و يبالهااا و شمسها و قمرها الي هي انا خخخخخخخخخخخ احسن من الاسكيمو و من اممممم ما بكمل .. بروح حجرتي بنخمممممممد بررررررررررقد ..بنااااااام باجر وراي دوام تدرون شو دوامي الي فرحانه فيه ..؟؟ اقص كروت شسوي ها الي الله قدرني عليه ..اقص كروت و مواعيد للمرضى يالله بناخذ من هاي الشغله الاجر من رب العالمين .. رب العالمين !!! و كيف ارقد الحينه يعني ما بصلي العشا لا حرااااااااااااام ...خلاص اوني بجلب بالفراش لي ما يأذن العشىىىى ..اوووووه صدق الساالفه برد بررررد ولا بس بالشقق جي يكون برد.. ع فكره لو انا من راس الخيمه بس ساكنه في شقه مطله ع كورنيش راس الخيمه ..مكان رهييييييب ..لا تستغربون ..مواطنه و من راس الخيمه و عايشه بشقه .. شسوي ها الي الله كاتبنه .. بس موقع شقتنا حـلو ..
الا رهيب يا سلام .. بحر و حشرة يهال اليرااان و السيايير ابصراحه محد يحسدني ع هالمكان.. بس وايد احب شقتي لانها مكاني الوحيد موطني الصغنون .. لحظه بلبس زلاغي ابصراحه ما اتحمل البرد ..اممممممم ابا كوت .. ما عندي ... اكيد شي بحجرة عمور ..طلعت من حجرتي ركض لـ حجرة عمور الي كانت مجابله حجرتي .. دشيت و ياليتني ما دخلت تدرون ما في داعي اقولكم كيف اتكون حجرة الشباب الي شرات عمور .. ما اتعرفين وين اتحطين اريولج ..؟؟دخيلكم الثياب ابكل مكان .. لا لا اتلوم اوصفلكم حجرته .فضيحة .. اكرمكم الله زباله مب حجره ..المهم كوت كوت وين يا عمور ابا كوت ..
اووه ها لونه بني فاتح .. ابصراحه ما يشجع بس عشان ادفى ..لبسته حسيت بعمري غرقانه يا طولك و عرضك عمور جثه.. تف تف تف بسم الله عليك ما فيني اصمك ابعين .. راس مالي و طوايفي انت فديت بعد عمري عمور .. امووووووحه لبست كوته عشان ارضي ضمري
.اتاملت الكوت تبون الصراحه مب ويه عمور يشتري هالكوت .. شكله من الغالي .. يمكن ليش لاء كل شي جايز ..!!. طلعت من حجرته .. بسم الله زين ما طحت ..صج اتكربعت ..اخ زين يودت عمري شو هاا وزار عمور شو يسوي عند الباب شلته من ع الارض و فريته فوق الشبريه لو طحت الحينه و انطر راسي و طلع دم منو بسعفني بسم الله علي ...دخلت حجرتي ااااااااااه مب حجره جنه جنه مب شرات حجرة عمور .. فرق السما و االارض اخر ترتيب .. و نظافه .تبون تعرفون شكلها .
. اممممم لونها ازرق ادري لون صبياني بس انا احبه لانه هادي ولان حجرتي مطله ع البحر فاحس اني غرفتي عاكسه لون البحر .. انزين ستاير زرقه غامقه و موزع عليها ورود زرقه فاتحه . و اللحاف نفس شكل الستاره اممممم حجرتي صغنونه ع قدي ..
شبريه صغنونه ع قدي بوسط حجرتي و الكبت ع الطرف ..و التسريحه مجابله الشبريه طبعا شي مسافات من بينهن بس بعد صغنونه ..و من الصوب الثاني كانت الدريشه مجابله الشبريه اووه دار راسي المهم ..عاد ع قد حالي لو كان الاثاث من الرخيص بس حلو و مريحني ..و الاهـم .. . ع طول دخلت تحت البرنوص ادفى .. اتصدقون الجو مب لـ هناك بارد بس انا دمي بااااااارد ابسرعه ابرد ماشي طاقه ..حسيت بالدفى شعور حلو و احساس جميل ..
يا سلام زلاغ و كوت وين تبين نوره خخخخخخخخخخخخخخ اممممم وين كنت صح عهود .. و عايلتها ..الظاهر ما برحم عهود هاي .. الله يعينج علي هههههه خلاص ما بطريج لاني احس بثجل بعيوني شكلي رقدت خلاص .. وااااااع وااااااااع وااااااااع يا ربي يا ربي هاصوت الياهل يا ربي انا شو سويت بحياتي عشان اطرش لي هالياهل السوري بو عيون خضر ..
الي سكن حذال شقتي و كل يوم يصيح و يزعجني ابا انااااااااااااااام حشره الله يعين اهله ..اووووووف حسبي الله ع ابليسك كنت برقد .. طيرت الرقاد من عيوني طارت حمامة فواد ابوك.. استغفر الله استغفر الله حطيت ايدي ع حلجي اسكت ها الحلج الي يطلع رمسات و دعاوي ع الفاضي ..
. ليش اطري الناس سامحني يا رب .. خلاص بكفر عن الي قلته و بسوي خير .. تدرون شو .. برتب حجرة عمور ...حرام .. اذا انا ما اشفقت عليه بتم جي .. مزبله اوووه ضااع الاجر استغفر الله .. قمت من مكاني .. شو هالياهل النحيس يوم طار الرقاد من عيوني صخ .
.الله يسامحك و يسامح ابوك يوم سكنكم هني حذالنا يعني ماشي شقه براس الخيمة الا هاي الشقه ويييييييييين الي مجابله شقتنا اووووووووووف .. يالله حرام زلمات ..
و غربه لازم انحن عليهن يحتاجون المساعده لانهم فـ بلاد غربه.. بس مني انا لا تتريون مني شي انا بروحي يالله معتمده ع ها 4000 الي اخذها من قص الكروت ... يالله خذت نفس طووووووووووويل .. الظاهر بغير رايي و ما برتب حجرة عمور بس حرام ما يستاهل ...
محد بيعطف عليه رفعت ايدي للسما و ادعي ربي من كل خاطري ... يالله اتعرس .. و اتييب لي وحده اتونسني.. اتونسني !!! منوه يونسني غيرها فديتها ..خولة بنت خالووه .. جفتوا طلع عندي اهل غير عمور .. ما عليه يايييتنكم في الدرب حبه حبه بنبدا بـ خوله ... خلوني انظف حجرة عمور .. و ارمسكم بنفس الوقت عن خوله .. خولوه بعمري .. حرام ما طلعت التوأم مالي ..بس للاسف امي و امها توأم .. نحن الظاهر توأم بس من بعيد خخخخخخخخخخ كيف جي ما ادري ولا تسالوني .
. بس خوله هذي ..حبيبتي و عمري و صديقة الطفوله يا ليتكم اتجوفون طيبة قلبها ..هذي بنت خالوه مريم و شرات ما قلتلكم خالوه توأم امايه الله يرحمها ... و عندي خالوه عايشه و هي اكبر خالاتي ... عندها البكر حميد 26 سنة و بعدين محمد ابعمري 21 متزوج خلود بنت خالوه مريم و عندهم جسوووم عمره ست شهور و نهله اصغر عني بسنه يعني اممم هي 20 .. .و ريل خالوه عايشه الله يرحمه ... خخخخخخخخ اخبركم ابسر حميد يحبني اكبر لوتي جفته و عرفته فـ حياتي حميدووه ولد خالوه عايشه ..قال شو يحبني هههههههههه ضحكني اياااااااااام روعه مرت ليتها اتعود .. ..
المهم و الاهم خالوه مريم عيالها خوله و خليفه خلود هذيلا كلهم حرف الخااااااااااا خوله و خليفه توم و خلود عنقود البيت ع فكره فارس البجر بس امه هاجر توفت و ربته خالوه مريم ...عشان جي ما يشبهنا .. انزين و ريل خالووه مريم اسمه احمد ..اكيد استغربتوا ليش ما طريت اهل ابوي ...تبون الصراحه ما اعرفهم قصه طويله و عريضه مع الايام اكيد بتعرفون .. المهم .. كح كح كح ..تدرون ارمس و انظف حجرة عمور كله غبااااااااااار .. كح كح كح ..
ع طاري الكحه يا رب ترزق عمور بحرمه تنفعك وو تنفعني خخخخخخخ هي خوله .. خوله توام روحي ..هذي حبيبتي ..ندري انكم دريتوا ... رغم ان المسافات الي بينا بعيده بس الله يخلي الاختراعات التلفونات و المسجات و هالسوالف ... انا وايد احب خوله ..طفولتي عشتها معاها ..انا و عمور اخوي بعد وفاة امايه الله يرحمها تربينا بيت خالوه مريم ..و لي ما كبرنا و اعتمدنا ع نفسنا.
. فكر عمور نظهر من بيت خالوه مريم .. بعد ما لاحظ ان حميد و فارس صاروا كبار و انا غديت حرمه اوني عاد.. ما انكر عمور خبله و متهور بس مرات يكون حكيم.. ترا قالوا خذو الحكمة من افواه المجانين .. المهم خالوه مريم رفضت فـ البدايه بس بعدين اقتنعت و رضت بالامر الواقع .. بس خالوه عايشه ما تهتم ولا اظني قد فكرت فيني و فـ عمور ... اهم شي عندها عيالها ...
اااااااااااخ اتذكر اليوم الي طلعنا به انا و عمور من بيت خالوه مريم ..كان يوم حزن و خاصه انا و خوله فارقت اختي .. عشت و تربيت معاها اجمل و احلى ايام عمري ... 17 سنة عشتها مع خوله. و بعد ما اتخرجت من الثانويه قدمت ع وظيفه وخالي ما قصر ريل خالتي مريم الي هو احمد سوا لي واسطه في الصحه و اتوظفت في مستشفى صقر اقص كروت ..
و عمور كان موظف بالحرس الاميري من ثلاث سنوات ..يعني الحمدلله نقدر نعتمد ع نفسنا .. و الله يخلي لنا الشيخ سعود بن صقر الي عطانا هاي الشقه ..مجانا تكريم لـ عمور في وظيفته طلع منه فايده اتصدقون .. و عطانا بيت شعبي .. بس اتفجنا انا و عمور انخليه لي ما تتعدل امورنا اكثر .
. و نروح نسكنه لانه عود و يباله اثاث .. ..لو تدرون اشكثر كنت شيطانه انا و خوله كنا انسوي عصابه ضد الاعداء تدرون منوه فارس و خليفه عيال خالوه مريم ومحمد و حميد عيال خالوه عايشه معاهم عمور .. ياما سوينا فيهم مقالب بس كنا نجنب عيال خالوه عايشه لان ما شاء الله عليها عليها لسان ...".قل اعوذ برب الفلق " تف تف ما ابا احسدها ع شو يا حسره ..المهم ما كانت ترضى ع عيالها عشان جي كنا نجنبهم ..و خاصه نهله ام المشاكل .. عدوتنا اللدوده .. خخخخخخخخخخ اذكر مره ..اووه لحظه خلصت حجرة عمور.
. يا حلاتها و هي نظيفه و امرتبه .. اثاثها اخضر .. حتى لون الحجره اخضر.. اصبروا بروح اصلي العشاا و بخبركم .. ايااااام طفولتي ..انا و خوله خخخخخخخخخخخخ توام روحي ..اووه لازم افسخ زلاغي و كوت عمور ..دشيت حمام حجرة عمور .. لا لا يروح فكركم ابعيد ترا الحمام نظيف مب شرات الحجره .. اتوضيت و خلصت.. صليت العشىى و سنة ركعتين و الشفع و الوتر .
. بيني و بينكم .. ما كنت اصلي الشفع و الوتر بس الحينه قمت اعود عمري .. الحمدلله و الشكر .. ابسررررررررررررعه لبست زلاغي و الكوت برررد بررررد و الله برد ؟؟اووه شبريه عمور اجرب لي من شبريتي .. دشيت حجرة عمور .. و دفيت بلحافه نفخت ع ايديني ادفي روحي .. جفت علامة حرق ع ايدي اليسار .كانت بني غامج و مع الايام صار لونها فاتح ....
غمضت عيوني و انا اتذكر احلام طفولتي ..و كانه البارحه ..اتعودنا انا و خوله بعد ما ياذن العصر و اتخلص صلاة العصر نربع الدكان و نشتري منه البفك و الكاكاو و طبعا البارد الي كان ممنوع ان نشتريه بس كنا نشتريه بالسر ..
نورة: خوله خوله شو رايج انسوي رحله ..
خوله: رحله !! الحين ..؟؟
نوره: هي روعه صدقيني .. تعالي نشتري شبسات و كاكاو و عصاير .. و ماي و انروح ناكل ابعيد..
خوله: الله فكـــــــره روعه اتخبل انزين و ين تبينا انروح ...؟؟
نوره: وين بعد نتمشى بالبراحه الي ورا الفريج..
خوله"نعقد حياتها" مب جنه بعيد اخاف امايه تهزبنها..
نوره: منوه بخبرها !! تعلم الغيب شوه..
خوله: استغفر الله ..
نوره: عيل يالله شو رايج انروح..
خوله: موافقه "وتبتسم"
ما تصورون اشكثر خوله تطلع قمر يوم تبتسم ما شاء الله عليها حليوه.. اذكر كان الكل يقول حلو عودها .. و شعرها سايح.. عكس شعري كانوا يزقروني بلاليط..شو ذنبي ربي خلقني جي ..المهم عن الفضايح.. بس تبون الصج خوله احلى عني ..غيروا الموضوع ..
سرنا الدكان..
خوله: فريد ابا لبن ثلج..
نوره: و انا ابا عصير .. و شيبس الخليج..
خوله: و انا ابا تويكس .. و اممممم
فريد: انته يشتري واجد بعدين ماما مشكل انا ..
نوره: لا لا مافي مشكل ..
خوله: ماما يقول روح حق فريد يشتري حساب ع كيفكم ..صح نوره..
نوره :اتهز راسها" صحيــــــــــن ..
فريد: كل كلام مافي مزبوط
حليله فريد مدري حي ولا مات كان طيوب و ينقص عليه كنا نشتري اشكثر باليوم و يحصل هزبات من خالوه مريم ..
طلعنا من الدكان.. الي كان مجابل بيت خالوه مريم و خالوه عاشوه..
خوله: نوره جوفي نهله اطالعنا..
نوره: البسيها لا تعطينها ويه هاي ام المشاكل ..جوفي شعرها كيف واقف مب امشط..
خوله: ههههههههههههههههههه امنقع فيه شلق
نوره: ههههههههههههههههههههههههه
نهله: وين رايحات..
نوره"ايديها ع خصرها" و انتي شو يخصج ...؟؟
خوله: رايحين مكان خطير..
نوره: خوله اسكتي اسكتي لا اتخبرينها عن تفتن شرات البارحه .. اتعرفينها فتانه ..
نهله"محرجه": انا مب فتانه..
خوله: عيل منوه البارحه امخبر خالوه عايشه اني انا و نوره عقينا الزباله حذال باب بيت علي بن محمد..ابوي ولا يدي طلع من قبره..
نوره: لاااااا يمكن امايه ..
نهله: امايه ابروحها جافتكم و خبرت خالوه مريم
نوره: و خالوه مريم خبرة خالي احمد و خالي احمد ضربنابالخيزرانه و كل ها ابسببج..
خوله: يا راعية المشاكل..
نهله: و اخر مره سامحوني .. " و اطالع الجيس الي شالتنه خوله" خذوني وياكم ..
خوله: تبين تاكلين اكلنا..
نهله:بدفع لكم..
خوله: يالله بكم تشترين..؟
نوره: صبري خولوه ..جوفي نهلوه تبين اتيين معانا ..ادفعي حق الاكل .. و حق السيره بعد ..
نهله"زعلانه" حرام عليكم وايد من وين اييب لكم فلوس ..؟؟
خوله: حرام نوره تعالي انسوي لها ديسكااونت
نهله: هي الله يخليج نوره..
نوره: لا لا لا ماشي تنزيلات ولا ديسكااونت ..جوفي تبين اتيين ادفعي 50 درهم و 50 غيرها عشان الاكل ..شو قلتي ...؟؟ و بعدي حمدي ربج بنقبل ناخذج ولا انتي جايفه شعرج مب مشطنه..شو ها ما عندكم مشط..؟؟
خوله: جوفي ملابسنا انا و نوره حلوه وة نظيفه و شعرنا امرتب ..انتي ليش ما تستوين شراتنا ..
نوره: جوفي خوله هذي نهله اتضيع وقتنا تعالي انروح عنها .. و انتي روحي العبي مع خلود ..في بيتنا .. يالله انروح خوله..
خوله: يالله نوره .. " و مسكت اييد نوره"
نهله: لا لا حرام عليكم صبروني دقايق بروح اييب الفلوس و بيي معاكم..
خوله "مستانسه" يالله ابسرعه.
نوره: بعد للميه اذا ما ييتي بروح عنج ..واحد اثنين..
ركضت نهله داخلت بيتهم عشان اتيب الفلوس..
خوله: خمسين لج و خمسين لي ..
نوره: ههههههه اتفجنا ..النص بالنص
خوله : زين خليفة اخوي وينه حرام سوينا له خيانه..
نوره: زين قلنا توم بس مب جي يلصق فيج.. و بعدين هالوقت يلعب كره مع الشباب ..
خوله: هي هههههه بزعل اذا اكتشف مغامرتنا ..
نوره : و منوه بخبره..اصلا ..سكتي سكتي يت ام شعر منكوش..
خوله"تحط ايدها ع حلجها و هههههههههههه"
نهله: هاه خذوا مية درهم..
نوره"اطالع خوله" ترا هاي اول مره 100 بعدين اغلى ..
نهله: انزين انزين يالله انروح..
مشينا و نحن مستانسات و اول مره انا و خوله نندمج مع نهله ام شعر منكوش ..حتى نهله كانت مستانسه شكلها ما بتسوي لنا مشاكل راعية المشاكل.. طفنا بيت خالوه عايشه و بالمره بيت خالوه مريم.. و عدينا السكه.. اخرتها وصلنا البراحه الي تكون وراا الفريج.. كانت عوده .. و مساحه كبيره ..جفت عمور و حميد و محمد و فارس و خليفه يلعبون كره مع عيال الفريج.. في وسط البراحه ... و سمعت صرخت عمور و كانه محرج من واحد من الشباب لانه ضيع عليهم الجول ...
خوله: جوفي جوفي نوره عمور محرج..
نوره: اسمع حسه جنه بالع مكبر صوت حشى مب صوت ادمي ..
نهله و خوله هههههههههههه
نوره: المهم لا تخلونهم يجوفنكم .. نمشي ورا الشير ..
اخرتها وصلنا اخر البراحه مكان فاضي و محد اييه ..
خوله: الله الجـــــــــو روعه غيم و هوا ..
نوره: احلى شي الهدوووء .. خوله جوفي نهله صاخه شفيج نهله..
نهله: ماشي بس مب جنه ابتعدنا وايد....
خوله: ليش انتي خايفه ويوييوويو خوافه هههههههههه
نوره: ههههههههههههه عادي نهله لا تخافين ..جوفي هناك.." و أشرت وراي الشيره الي نحن مندسين وراها " جوفي اخوانا هناك يلعبون ..
نهله: بس بعيد ..احجامهم صغيرونه ..
خوله"طفرانه " اووه لا تخلينا نندم انا يبناج..
نوره: يالله يالله تعالوا ناكل ...
يلسنا ع الارض.. و فرشنا الاجياس بعد ما طلعنا ...الشيبسات و العصاير و الكاكاو ...
نهله: ابيه انتوا مشترين كولا ....خالوه مريم بتحرج..
خوله: و شدراهاا امايه ...محد يدري عن شي نهلهووو
نوره: ندري انج فتانه و يا ويلج اذا خبرتي علينا ..
خوله: خليها اتخبر هي بعد بتتحاسب معانا لانها يايه ويانا ..
نهله: لا لا ما بخبر وعد ..
قعدنا ناكل و نسولف و نضحك .. و اول مره نهله جي تندمج معاي انا مع خوله .. كنا مستانساات..قمنا نغني و نرقص و نلعب ...
نوره: تخيلوا هني بحر..
خوله: انظروا الموج القادم من الجنوب..
نهله: يا للهوله ما نفعل و كيف النجاة..
نوره: البسوا طوق النجاه هياا يا رفاق ..
خوله: الويل لنا هلكنا ...
نوره النجده النجده ..
نهله النجده و تمينا نصارخ و نتراكض ورا بعض اونه الموج بشلنا و نحن انصراخ النجده النجده..
وقفت ابمكان امبطله عيوني يوم جفت قوم عمور اخوي يايين ركض صوبنا ..!! لها الدرجه صوتنا عالي ..
نوره: خوله لحقي قوم عمور يايين صوبنا ..
خوله: الشرده..
نهله : و الاكل..
نوره: أي اكل بعد خلصنا هاي قراطيس فاضيه يالله نشرد.. قبل لا يوصلون لنا و يفضحونا ..
ركضنا فـ البدايه كنا خايفات نركض و انطالع ورانا .. بس بعدين حسينا جنا نلعب ركضنا و نحن نضحك صوت عالي .. مسكتنا نهله و كانها اتقولنا ابا اتم معاكم جي ع طول .. مسكت ايدها و رصيت عليها و جني فهمت قصدها .. و خوله مسكتها من ايدها الثانيه.. وصلنا الفريج ع اذاان المغرب .. اتفقنا يكون عهد ووعد بينا و يتم سر .. راااحت نهله بيتهم ..و دشينا انا و خوله بيت خالوه مريم .. و سيده ع غرفتنا قبل لا اتجوفنا خالوه.. اتغسلنا و اتنظفنا ..طلعنا انجوف تلفزيون كان يعرض بهذاك الوقت مسلسل خليجي الى ابي و امي مع التحية " كلنا كنا اتابعه يعني نتيمع بها الوقت حتى خالي احمد ريل خالوه مريم ..
خوله: نوره اخاف قوم فارس اخوي جافونا ..
نوره: ما عليج سوي روحج ما اتعرفين شي شو دليلهم ..
خوله "تبتسم" صدقج شو الدلليل ..
خليفه: اش عندكم تساسرون ..
خوله: انت شو يخصك اسرار البنات
خليفه : افا خوله ..صارت من بينا اسرار ..
فارس: شو خلوف انت بنيه شو تبا بهم..
نوره: انت منوه طلب رايك..
فارس: و انتي منو رمسج..
عمر: ترا ندري شو كنتوا امسوين العصر ..كشفناكم..
احمد: بس عاد خلونا نتابع المسلسل رمسوا وقت الفاصل .
خلود: انا ابصراحه ما اتشجع لها المسلسل مدري شو يعيبكم فيه بروح اساعد امايه فـ المطبخ..
احمد: ما شاء الله ع بنتي هبة ريح ..
فارس: عيل تتحرا شرات هذيلا و ياشر علي و على خوله"
نوره: لو سمحت فارس ما يخصك فيني ارمس عن اختك بس
عمر: لا و الله عادي فارس خذ راحتك انا سامح لك..
نوره: لا و الله
وقفت ابا اطلع من الصاله بس ما كنت عارفه ليش .. عشان نظرات فارس لي ؟؟ ولا اني خايفه انهم صج كشفونا انا و خوله و نهله ..!! صبروا نهله اكيد هي امفتنه ..لا لا ما اعتقد كانت شكلها مستانسه و اكيد تبا اتكرر الرحله عشان جي مستحيل اتفتن
خوله: وين رايحه نوره..
نوره: بسير عند خالوه المطبخ .. انا ما اقعد عند هالاشكال باستثناء خالي احمد و طالعت فارس بنظرات و فهمته اني كنت اقصده ..
خوله: بيي معاج..
خليفه: انتي ذيلها ابكل مكان لاحقتنها ..
خوله: كيفي هذي توأمي ..
خليفه: عيل انا منوووووووووه..
نوره: ولد البطه السوده ..
وطلعنا من الصاله و سرنا المطبخ عند خالوه مريم.. كانت اتسوي خبز ..يا سلام اتخيلوا بها الجو البارد و الدنيا امغيمه و هوا بارد يضرب ويوهنا ..و ع ريحة الخبز ابصراحه شي روعه ..
ساعدنا خالوه مريم انا و خوله و خلود ... شويه ودش علينا فارس المطبخ...اتاففف و جافني فارس ها ليش لاحقنا ...
فارس: امايه خالوه عايشه تلفون تباج..
طالعنا انا و خوله بعض اكيد نهله خبرت علينا ..
مريم: خبرها اني بتصل بها عقب ..مشغوله الحينه..
فارس: قلنالها بس تباج ضروري ..
مريم: متفيجه عاشه اختي دومها لحوحه ..خلود يمه انتبهي للخبز عن يحترق ..
خلود: ان شاء الله الغاليه ..
طالعت خلود ..كانت صغيرونه و عنقود البيت بس ما شاء الله عليها هاديه و حبوبه و رزينه اتحب الطباخ و شغل البيت عكس خوله.و عشان جي خالوه مريم وايد تعتمد عليها .. اكثر عن خوله ..بس . و الي يجوفها يقول اكبر عن خوله .لان رغم انها جميله و فيها ملامح من خوله بس ما شاء الله عليها لها جسم.. و فيها عرض و طول عكس خوله اليابسة ..و بس عودها حلو ..بعد ما طلعت خالوه مريم..
نوره: نعم ليش واقف فوق روسنا..
فارس: خوله تعالي ابا اقولج كلمة راس ..
خوله: قول ما في شي يتخبا بيني و بين نوره..
فارس: بس نوره ما اتحبني
نوره: ما احب نظراتك
خلود: انتوا بتيلسون تضاربون ظهروا من المطبخ خلوني اشتغل ع راحتيه..
فارس: كيفج خوله بتندمون برمسكم عن طلعت العصر و النجده !!
طالعنا انا و خوله بعض شدراه ..
نوره: انت ما يتخبا عنك شي ساحر انت ...؟؟كيف عرفت كيف عرفت..
فارس: تبوني ارمس عدال خلود..
خوله: لا لا مب ناقصين مشاكل ..
خلود: ليش شو مسوين بعد !!
نوره: ما يخصج يالله خوله انرمس فارس انجوفه شو يبا ..
طلعنا من المطبخ .. اتفاجانا بـ عمور واقف بوسط الحوي ..
فارس: لا تخافون ترا ها الزعيم ههههههههه
نوره: عمور انت !!
خوله: متفجين علينا..
عمور: اسمعوا ما بنضيع وقت ترا خالوه عايشه اترمس خالوه مريم عن سالفه الرحله..
نوره"محرجه" قلتج خوله ما بناخذ نهله ادريبها فتانه ..
فارس: لااااااااااااااااا مب بس جي و 100 درهم بعد..فضحتونا..
عمر: هههههههههههههههههه لواته..
نوره: احم خوله أي 100 درهم..
فارس: هاا لا اتضيعون وقت ..تبونا انساعدكم عطونا 100 درهم..
خوله: انتوا عندكم وايد بيزات .. و نحن مب محتاجينها بس خذناها عشان انذل نهله..
عمر: ليش اتذلونها...
نوره: كيفنا ما انحبها راعية مشاكل..ام شعر منكوش
فارس: ههههههههههههههه و انتي شو بلالييييييييط ما اتجوفين شعرج..
نوره: انت ما يخصك فيني انا اكرهك لا اترمسني
حسيت اني جرحت فارس بها الكلمات الي طلعت مني من دون قصد ..كنت بصلح الموقف بس صياح خالوه مريم روعنا انا و خوله و ضحك عمر و فارس علينا..
خوله: خلاص خلاص انا بعطي 50 درهم مالي حق عمر ..
نوره: ليش تستسلمين خوله نحن شو اتفجنا ..
خوله: اخاف نوره يمكن امايه اتقولج شي بس انا بتاكلني ..
نوره: اووووووووووف خلاص بعطي 50 درهم لـ فارس صدقه.
فارس :اونج انتي صدقه..
مريم: انتوا شو مسوين ها
خوله"ترتجف" شو امايه !! ما سوينا شي ..
مريم: خالتج عاشه اتصلت امحرجه البنيه محمومه حق شو معطينها بارد بها الجو ..
نوره: اصلا نحن ما جفنا نهله خالوه ..
مريم: لا و الله انتن الثنتين اصدق ابليس ولا اصدقن ..يالله فضحتوني جدام خالتكن شو اقولها الحينه ..
فارس: امايه نهله جذابه نوره و خوله كانوا ويانا العصر يلعبون ما جفنا نهله صح عمور..
عمر: هي صدقها نهله تتبلى ع خواتي ..
مريم"نظرات شك ": خلاص عيل انا بتصرف
من دشت خالوه الصاله نقزنا مستانسات الحمدلله لولا فارس و عمر كنا في ورطه ..
فارس: هاه وين 100 درهم..
عمر: ابسرعه ابسرعه ..
خوله: زين الحينه بنروح انيبها ..
دشينا حجرتنا ... و خذت 100 و تمت خوله داخل الحجره عشان تكتب واجبها المدرسي طلعت من الصاله ورحت جفت فارس ابروحه و عمر مب موجود..
نوره: وين عمر..
فارس: ليش اتخافين اتمين ابروحج معاي..
نوره"تجتف " طبعا لا بس انا ما اداني نظرات .."صرخت عليه" لا اطالعني جي جنك شيطان ..
فارس: هي لو حميد ولد خالوه عايشه يطالعج جي بتستانسين..
نوره"ابتسمت اغايضه مع اني مستغربه شو دخل حميد في السالفه " اتقول حميد فرق بين حميد و فارس
و فريت البيزات بويهه ودخلت
..بعد ساعه تعشينا كنا متيمعين في الحوي و فارشين الحصير .. تعشينا خبز الحار كنت اتجنب نظرات فارس.. و خوله لاحظت ان عمر و فارس وايد يتساسرون مدري ع شو يخططون .. المهم انا تعشيت و شبعت .. و خليتهم يولون.. و رحت انخمد عشان باجر وراي مدرسه ...
مر اليوم الدراسي ابسرعه ..رجعنا انا و خوله مستانسات وعرفنا ان نهله مريضه غمضتنا شو ذنبنا يوم هي ما عندها مناعه فكرنا انزورها بس خفنا من خالوه عايشه لانها عصبيه وايد ... بعد اذان العصر نشيت ع رشت ماي بويهي قمت اشهق و جنه روحي بتطلع ..فتحت عيوني جفت فارس و عمر و خوله يضحكون علي .. و معاهم خليفه..
عمر: يا المحتاله وين البيزات..
قعدت من الرقاد امحرجه ممنهم و ضحكتهم استفزتني ..
نوره:انا امش الماي من ع ويهي" أي بيزاااااااات
خوله: نوره ليش ما تعطين البيزات حقهم نحن وعدناهم..
طالعت فارس .. مستغربه ..جفت نظراته الشيطانيه ..
نوره: عطيتهم ....لـ فارس البارحه..
عمر: جذابه انا كنت مع فارس ما جفتج اتيين..
خوله: نوره اتقصين علي شو
نوره: خوله كيف تصدقينهم و اتجذبيني اقولج عطيتهم لـ فارس ..
فارس: جذابه ما عطتني شي و عمور شاهد..
نوره"شاهد الثعلب ذيله
عمر: شو قصدج اتقصين علينا..
نوره: محد قص علينا غير فارس هو خذ البيزات ولا انت و عمور متفجين علينا تبيون 100 درهم غيرها ..
خوله محتاره: يسونها ...
عمر: جوفي نوروووه عندج للمغرب اذا ما يبتي البيزات بخبر عليج خالوه مريم..
طلعوا من الحجره صدقت ان فارس و عمر صج ثنائي عصابه و مب أي عصابه ..
خوله: انتي عطيتهم الفلوس..
نوره: و الله عطيتهم .. اممممممممم اصبري انا بخليهم يعترفون بجوفين كيف ..
نشيت من رقادي و قمت اتغسلت و زقرت خليفه و خبرته بالسالفه كلها .. و بعد ما ترجته خولووه وافق انه يساعدنا ..حسيت اني ابا اغيض فارس ع موقفه الجذاب و الحرامي .. فسرت بيت خالوه عايشه ..طبعا ما دشيت لاني ما احب ادخل بيتهم وايد.. يمكن لان ما استلطف خالوه عايشه دايما اتغار من صداقتي لـ خوله ..و تطنيشي لـ نهله .. اترييت عند باب البيت جفت خلود و محمد يلعبون مع بعض طبعا معروف ان محمد و خلود كل ويا بعض خلود وايد متعلقه بـ محمد حتى لو كان اكبر عنها بثلاث سنوات .. بس اخرتها تزوجها من خلصت الثانويه عقبال خوله حليلهاااا بعد ما تطلقت من جابر ... المهم زقر محمد حميد..
حميد:"يتجرب مني" نوره غريبه شتبين !!
نوره: اباك اتساعدني في شغله ..
طبعا هاك الوقت كان عمري 13 سنة و حميد كان عمره 17 سنة ابعمر فارس ..ولد خالي احمد و عمور اخوي اصغر عنهم بسنتين
خبرته السالفه ..كلها .. و جذبت عليه باشياء عن نهله عشان ما يحتشر عليها..
حميد: 100 درهم و انا اقول منو سرق فلوسي..
حطيت ايدي ع حلجي مسكينه نهله سرقت من اخوها عشان اتيي معانا الرحله بس حليلج نهله غمضتيني ...بس ما توقعتج حراميه ..خخخخخخخخخخخخخ
نوره: عيل فرصه ترجع حقك و حلالك شو قلت..
حميد"بنظرات خبث" لا ما ابا 100 درهم نفاد عندي بدالها الف درهم بساعدج بس بشرط..
نوره: انا موافقه ع كل شروطك..
يريييته من ايدينه ..يالله ابسرعه تعال قبل لا يخبرون خالوه مريم ..
حميد: لحظه ما تبين تعرفين شرطي..
نوره: عيوني لك حميدووه بس قبل لازم اغايض و انتقم من فارس و عمر .
حميد: خلاص عيل اباج تعطيني بوسه..
وقفت ابمكاني اطالعه مستغربه بوسه.. ضحكت من خاطري وقتها كنت صغيرونه و افكاري بريئه.. ضحكت و قلته ع بالي طلب جايد خلاص موافقه مليون بوسه جان تبا يالله .. تعال..
جفت نظرات وناسه بعيونه و كانه ما توقع ردي ..ضحكت عليه و ركضنا ..سوينا خطتنا انا و خوله و خليفه و حميد ..مع ان خوله استغربت اني دخلت حميد بـ سالفه ما كنت تدري اني ابا اغايض فاارس..المهم نفذنا الخطه ..و سحبنا فارس و عمر ..مكان رحلتنا انا و خوله و نهله ... ع اساس نلعب معاهم و ما شكوا بشي لان فـ بالهم ان خليفه و حميد مستحيل يعرفون السالفه ..المهم الفنا لعبه ... و نجحت خطنا .. قدرنا نربط فارس و عمر بالشيره الي كنا نلعب تحتها انا و خوله و نهله البارحه..
بعد ما ربطناهم حضنا بعض انا و خوله مستانسات و يلسنا نضحك.. و فارس و عمر ..مستغربين..
عمر: يالله فجوا قيدنا ..
خوله: احلم يا عمي ..
ههههههههههههههههههههه
فارس: شو تبون خليفه فج قيدي ..
خليفه: اسف وعدت خوله اني ما افج قيدك ..
عمر: ليش .. بياذن المغرب..
نوره: بالاول اعترفوا وين 100 درهم ..
فارس: انا ما ادري حميد الله يخليك فج قيدي..
حميد: ابصراحه ما اقدر متفج مع نوره و ع شروط..
خوله: هيهي انتصرنا هههههههههههههههه
نوره: ما بتعترفون .. خلاص يالله انروح و نخليهم هني يباتون ..
عمر: نوره تعالي فجي قيدي و الله اضربج ضرب ..
حطيت ايدي ع جتف حميد ..:- انا فـ حمايه ولد خالوه .
.اتعمدت اقول هالرمسه عشان فارس يموت من الغيض ..جفته ويه صار احمر ...مدري عصبيه ولا قهر و لا غيض ما قدرت افهمه ..
خوله: يالله انروح بيأذن المغرب الدنيا بتظلم ..
روحنا بعدنا مسافه قصيره .. سمعناهم يزقرونا .. ردينا لهم طبعا مستحيل و من سابع المستحيلات .. اصلا نتركهم هني ارواحهم ..
فارس: خلاص انا اعترف اني خذت البيزات من نوره و تجاسمناها انا و عمور .. و كنا نبا نخدعكم عشان ناخذ عنكم بيزات غيرها..
خوله: يا الحراميه ... جفتي نوره ..يبون يسرقونا
انا ما تغايضت كنت واثقه من عمري المهم قعدت اصارخ و اقول ظهر الحق ظهر الحق ..
قام خليفه يفج قيدهم .. و انا ركضت اتعلقت برقبة حميد و بسته ع خده .. ع حسب الاتفاق ..
خوله: نوره شو اتسوين..
نوره: انا وعدته ..اذا ساعدني ابوسه ..
و من وناستي تعلقت برقبته مره ثانيه و بسته هذاك الوقت ما كنت اعرف ان حميد كانت نية و افكاره شينه بس يوم كبرت فهمت شو كان يبا حميد ... مسكت ايد خوله .. و طالعت فارس الي كانت عيونه اطلع شرار ..
و ركضنا البيت نتسابق مع الزمن و ضحكتنا تسبق خطواتنا ..مدري ليش بهذاك اليوم تاخروا الشباب ...المهم تعشينا و رقدنا ..فـ اليوم الثاني اتفاجات خالوه مريم تزقرنا ..و كانت محرجه مني و من خوله .
.اكتشفنا ان فارس و عمور خبروا علينا خالوه مريم عشان جي كانت محرجه مناا ..جفناها اتحمي الملاس ع النار و حطته ع ايدي و ايد خوله عشان ما انكرر الي سويناه ..
.رفعت ايدي اطالع العلامه الي لليوم مرسومه ع ايدي اليسار .
. كانها مشوه ايدي..هذي العلامه قوة علاقتي بـ خوله.. حسينا صج المنا واحد و ضحكنا واحد و كل شي يجمعنا واحد الين ما فرقت بينا الظروف و الحياة .. و ما قمنا نتجاوف الا بالمناسبات لاني انشغلت بدوامي و انشغلت بدراستها في الكليه و هي خريجه هالكورس ...ايااااااام جميله مرت بحلاوتها و مرها . و صارت ذكرى في حياتي ..نقزت يوم جفت ليت الحجرة يشتغل ..و رجعت للارض الواقع او دنيتي الي اعيشهاا .
نوره: عمور ..؟؟
عمر: انتي شو تسوين بحجرتي .. و بعدين شو لابســـــــــه ..
نوره: تذكرت الكوت..
قمت من ع الشبريه و اتجدمت منه جافني لابسه زلاغ ..ضحك علي ههههههههههههههههههههههه
عمر: شو ها نوره من احينه شتيتي ..
نوره:حضنت ذراعي برد عمور غريبه شو اتسوي ياي ..
عمر: يااي ارجع كوت رفيجي ..زين زين منظفه الحجره مشكوره لا يكون تبين تاخذيها اجوفج منسدحه ع شبريتي ..
نوره: لا لا لا نظفتها عشان اكسب فيك اجر ولا انا ما استغنى عن حجرتيه ..تعبت قلت برتاح و تذكرت ..سالفه صارت زمان..
عمور: أي سالفه !!
نوره رفعت ايدي اليسار فوق اراويه هاي العلامه تذكرها..
عمور: هههههههههههههههههههههههههه دوااج كنتي شيطانه..
تثاوبت جفت الساعه 8 نص ا
نوره: ابيه ما رقدت..
عمر: طبعا انتي الحينه سهرانه ؟؟
تخطيته ..روح روح دور كوت رفيجك انا رتبت ثيابك اكيد بتلاقيه داخل الكبت ..
عمر: تعالي أي كبت هذووه انتي لابستنه افسخيه فضحتينا ..
شهقت ها كوت رفيجك و انا اقول بعد من متى عمور قام يشتري من الغالي الغالي ..
عمر: افسخيه افسخيه ..فارس يترياني برع ..
نوره: فارس !! فارس ولد خالي احمد.
عمر: هي ولد خالج احمد..ييبي كوته..
نوره: شوووووووووو هذا كوته ..
فسخته بسرعه و كانه حرقني ..فريته بويه عمور ..و سرت عنه ..حسسني بالدفى .. بس بعد ما عرفت انه كوت فارس ولد خالوه احس الدنيا صارت حاره بس ليش عمور ياييب كوت فارس شو يسوي هني .. اصلا فارس شو ذكره فينا الي اذكره صار خلاف بينه و بين خالي احمد بعد ما سود ويه خالوه مريم و خالي احمد.. اممممم استغفر الله ما بحش فـ الريال بس انا اعرف طينة الناس و اميزهم و كنت اعرف ان فارس من هالنوع الخايس و ما جذبت يوم صارت سالفته سود ويوهنا فضحنااا..بس عمور رفيج عمره .. وقف معاه لازم رفيجه بدافع عنه ..المهم كل الي اعرفه ترك راس الخيمه ... و مدري وين رااح محد قام يعرف عنه شي .. ظهر من البيت .ومحد درى عنه .!!! ما حبيت اسال عمور عنه وشو الي رد علاقتهم ..ما يهمني ولا لي شغل فيه .. فسخت زلاغي فريته بعيد عني .و انا احس بإشمئزاز صوب هالانسان . تلحفت .. و كاني ابا احسس عمري اني كنت فـ احلم ..
اتظروني بالجزء الثاني
زهرةالصبار
|
23-12-06, 11:49 PM
ابوي ابوي لو صد عني ماترجيته / للكاتبة : معاني ..
جديد مواضيع قسم القصص المكتمله
العرض العادي
