صمته كان يذبحني و عناده يعذبني اكثر و اكثر ...وصلنا الشقه دشيت حجرتي ع طول..يلست اطالع الخاتم الي بصبعي..وايد روعه فارس ذوقه حـلو..سرت صوب التسريحه..طلعت العقد الي كان يايبنه لي فـ يوم ملجتنا..بطلت العقد و رجعتته ابمكان و خذت السلسله..و علقت فيها الخاتم..و علقتها برقبتي ...

وضميت الخاتم تحت ملابسي ما ابا فارس يجوفه ...
.يلست اطالع التلفزيون يوم ظهر فارس من البيت ..عقبها فكت ادور طبخه اسويها و اخذها معاي بيت زينب ..طلعت اسهل طبخه فطاير بالسبانخ..رحت المطبخ و سويتها ..اتسلى ..

خلصت ع الساعه 7 ونص نشيت اتغسل و ابدل ملابسي..اتزهب لي ما ايي فارس من برع ...عقب ساعه كنا في بيت زينب ..بس فارس نزلني و راح مع منصور و قال انه بيرجع عقب ساعتين..دشيت..سلمت ع زينب كان البيت فاضي..

نوره: ماشي غيرنا معزومين..

زينب: لا بس انتي و فارس .. قلت مها بس من حملت متلعوزه
تفاجات: مهاا حامل مبروك ..
زينب : الله يبارك فيج جي فارس ما قال لج ..
رديت: لا

زينب اتبرر موقف فارس : يمكن نسى ..يوم سرنا المزرعه ..اغمي عليها..خالد ودها العياده اول مر رجعوا من المزرعه فعرفوا انها حامل ...عقبالج...؟؟

بلعت ريجي ..شو السالفه اليوم اثنين تمنوا لي ان احمل ...كنت بضحك ..انا حامل و من فارس ..كيف ..؟؟؟
زينب: شو يابه معاج في الحراره..

رديت عليها: فطاير توني سويتها كنت متملله فسويتها اتسلى ..
فجت زينب الحراره : اممممممممم ريحتها لذيذه ...

نوره: بالسبانخ..
شويه و دش علينا وليد.: اوووووه بنت الشمال هني..
زينب: قول غزالة الشمال ..
وليد: شحالج غزالة الشمال ..

نوره: ههههههههه الحمدلله...انتوا بتخلوني اصدق روحي ..كل ما جفتوني غزاله الشمال و غزالة الشمال ..
زينب: تستاهلين..

وليد: وين ميود ابا اتصارع معاه الهرم ..

زينب: حرام عليك ..و الله ولدي يلقاها منك ولا من فيصل ..
نوره + وليد=هههههههههههه

نوره: شو عندك دروع بعد بالملاكمه ولا المصارعه ..
وليد: تعالي تعالي براويج جوايزي..

طالعت زينب: صدقه زينب ولا يقص علي..
زينب: لا صج ها متخبل يعشق شي اسمه ريس ..

وليد: تعالي براويج ما باكلج..
زينب: روحي بروح اجوف ميود ...راقد ..

وليد: ابوي وينه ...؟؟

زينب: تدري انه ما يرجع البيت الا ع الساعه 11..من يطلع يصلي العشى هذي عوايده..
وليد: جفتي نوره بحياتي شرات شيبتنا متطور ..

نوره: ههههههههههه انت مينون .......وين جوايزك..؟؟!!

نش وراح حجره جريبه من الصاله الي كنا يالسين فيهاا ...لحقته فج الباب ....تقريبا الحجره فاضيه بس فيها رفوف فيها كذا كاس و ميدليات و كذا درع ...

نوره: كلهم لك..

وليد: قسم بالله ...منصور ما عنده ولا شي ..

نوره: هههههههههه زين محد قالك احلف بس ما شاء الله عليك عيل انت مثالي..
وليد:عيل شو تتحريني بس جوفي هذي خمس ميدالياات و ها الكاسين و ثلاث الدروع مال ربعي..
نقعت من الضحك:ههههههههههههههههه تستهبل شو بقى لك..يا الجذاب ..

وليد: شنسوي ..الله ما كاتب ..


نوره: ههههههههه يا الغبي ...طلعنا من الحجره تفاجات بـ فارس و منصور يالسين فـ الصاله ...و معاهم بو منصور .

وليد: اووه الشيبه راد البيت من وقت..

بو منصور: سمعت عندنا زوار ..
وقفت ابمكاني متلومه ..و ابنفس الوقت خايفه اذا فارس سمع ضحكتي من داخل الحجره ...نزلت زينب من الدري و معاها مايد...

وليد: نوره شو بلاج وقفتي ابمكانج ..
اتجدمت :شحالك بو منصور ..؟؟

بو منصور: الحمدلله شحالج انتي ربج الا بخير..
قعدت جريب من فارس: الحمدلله ...


منصور: منو ها البطل .."وخذ مايد من عند زينب"
زينب: شو اخبار طلعتكم..

فارس : الحمدلله كل شي تمام ..وار بو مايد ماشي خساير ان شاء الله ..
منصور: لي الشرف و الله..
وليد: لو اشتغل معاكم بتجوفون وين بتوصلون ..
منصور: بندين و بنطر من الناس..

الكل: هههههههههههههه
راحت زينب المطبخ..و لحقتها..حطينا العشى و احسها انها كانت امبالغه لانها امسويه وايد طبخات...
نوره: وايد زينب من بياكل كل هاه..

زينب: انتي و ريلج منو بعد.
شهقت: خافي ربج..

وزعنا الاكل في الصحون و الشغاله حطتهم في الصاله شويه و تعشينـا ...فـ البدايه تلومت عقبها حسيت الامر عادي..عقب العشى..يلسنا انا و زينب ابرواحنا
سالتها: الي اعرفه ان خالد ريل مها هو الي ماسك مشروع فارس و خالي حسن ..؟؟بعد ريلج..؟؟
زينب: لالالا..منصور ماله علاقه بـ مركز التجاري مال ابوي و فارس ..منصور ماسك مصنع التمور كله و فارس يساعده في بعض الامور ..

سالتها : مصنع التمور مال منوه ..؟؟

زينب: منصور و فارس مشاركين فيه بس اسهم فارس اتغطي بوايد ع منصور..بس فارس علشان ما عنده وقته عنده دوامه و مركزه التجاري فحطت منصور مدير عاام ع المصنع ..


معلومه يديده ..عيل فارس مب مخلي شيء ..
سالتها: و شركات السيارات ..؟؟
زينب مستغربه: فارس ما عنده شركة سيارات..

كانت مفاجاه لي..عيل عمور كيف قال لي انه كان يصرق من فارس من شركة السيارات يقص علي ولا كان يقصد مصنع التمور مدري بس بسال فارس ..الظاهر السالفه فيها سر ...

..يانا وليد.. لانه قوم فارس و منصور قعدوا يسولفون ع الشغل..فقعد وليد يلاعب مايد و احيانا يفاتن عليه و زينب اتضاربه..كنت اضحك عليهم..
لفتتني مساند الكنبه ..كانت فيها صورة مايد..

سالت زينب: منو مسوي هاه
زينب: انا عيبتج ..؟؟
نوره: وايد كيف مسوتنه ؟..

زينب: عادي اتروحين المكتبه و تشترين علبه..فيها رسمه و خيوط صوب ..مكتوبه الطريجه..اتسلى فيها عقب ما خلصت خذتهاا الخياط و سووا لي هاي الوساده ...
عيبتني الفكره : زين من وين لج صورة مايد ..؟؟اقصد كيف سويتهاا

زينب: خذتها لصاحب المكتبه يومين ..

و رسم لي صورة مايد ع القماش تبين اسويها لج..
ابتسمت : هي بس انتي خذي صورة فارس و انا بشتغل ع الصوف ..؟؟
مدت ايدها : خلال يومين بتكون عندج عطيني صورته ..

انحرجت: ما عندي ..
زينب: هههههههه ما عليج انا اذكر عندي صورة لـ فارس ...
نوره: مشكوره زينب ..

مر الوقت ..ما انتبهت للساعه الا كانت الساعه 11...سلمنا عليهم و روحنا..كنت مستانسه القعده ويا زينب ما تنمل ..كنت بسال فارس عن سالفه شركة السيارات الي قالهاا لي عمور بس جفت فارس مو ع بعضه.. و شكله محرج فخفت اني اضايج به و يقوم يطلع حرته فيني تميت ساكته ...لي ما وصلنا الشقه ..

سار ع طول داخل مكتبه شو بلاه ..؟؟ يمكن علشان المصنع ..؟؟ بس قال كل شي تمام ..؟؟ عيل شفيه لا يكون سمعني اضحك مع وليد في الحجره ..؟لالا ما اعتقد....يلست اطالع التلفزيون..حطيت قناة روتانا الافلام..يلست اطالع الفلم..ياه و يلس مجابلني...
قال لي: عطيني اللابتوب ..؟؟

نشيت بكسل و عطيته...
قال لي: سوي لي شاي ..

اففففففففف متفيج وقت الاحداث فـ الفلم يبا شاي ...امري لله روحت اسوي شاي ..رجعت شفته يرمس بالموبايل ...حطيت الشاي ع الطاوله و صبيت له.
سمعته يقول: انت شو اتقول منصور...لا اتوقع ع أي ورقه ..تسمعني ...

شكله محرج انا قلت السالفه تتعلق فـ شغله ...صكر الموبايل و شرب شاي ..
نقزت يوم صرخ علي : شو ها الشاي مافيه شكر ..

رديت ابرود : زين الحينه بييب لك علبة الشكر ..


سرت المطبخ...يبا يطلع حرته فيني ...حطيت له شكر زياده..حسيت اني متوتره اخاف يطلع حرته فيني ...
سالني: استانسي فـ بيت زينب ..
طنشته اطالع الفلم علشان مره ثانيه يتأدب و ما يطلع حرته فيني .. هزيت راسي بمعنى هي ..
سالني: شو كنتي اتسوين مع وليد في حجرته ...؟

رديت ابرود من غير ما اطالعه : ما كانت حجرته
شهقت يوم جفته عفد صوبي..وقفت ابسرعه زخني من ذراعي هزني بعصبيه: يوم ارمسج طالعيني ...؟؟
ارتجفت خفت منه عصبيته ذكرتني يوم كنا فـ لضاحيه فخفت منه و فضلت السكوت ..

رد سالني بنبره قويه: شو كنتي اتسوين في حجرته..


حاولت اداري دمعتي بس ما قدرت
هزني مره ثانيه: شو كنتي اتسوين معاه..
حسيت ذراعي بنجلع فرديت بصوت واطي: كان يراويني جوايزه ..
تطنز : لا و الله عشان يزيد اعجابج بالبطل..


اذا رديت عليه بكسر عظامي علشان جي تميت ساكته و مستسلمه..حتى شكيت ابروحي لها الدرجه فارس يخوفني ..شو صار لج نوره وينج قبل شسوا فيج فارس ..سحرج ..حسيت ايده خفت من ع ذراعي جربني اكثر منه..حسيت بنصخه ع ويهي ..

عرفت انه هدى و اكيد حس بالذنب لاني ما تماديت معاه فارس بهاي الطريقه ممكن تمتصين غضبه ..فكرت اقوله لا وليد ولا غيره يقدر يبعدوني عنك...رفعت راسي حضنت ويهه بايدي و انا ارتجف ..غمضت عيوني .
بنفس اللحظه همس باسمي : نوره .. كنت بقوله وليد ما يهمني

فهمست : وليد ترا.....

فجيت عيني يوم قاطعني: انا فارس مب وليد..
رديت عليه: انا كنت اقصد ...

ما قدرت اكمل جفت ملامح ويه صارت قاسيه ..كان محرج..كنت بروح بعيد عنه ..بس رجع وز خني من ذراعي بعصبيه ...قال لي : شو عايبنج فيه..

حسيت ان فارس صار شي بعقله..يالله اتعدي هالليله ع خير ..يلست اضربه بصدره بكل قوتي..بس كاني اضرب صخر جامد ما يحس ...

كنت اصيح بصوت عالي اترجااه يهدني..كنت اصرخ و اقوله انت فهمتني غلط..بس ما كان يسمعني ما سوا حسااااااب لـ عذابي ولا آآلامي ولا عبراتي الي خذت مجراها ابشكل سريع ع خدي ...بالعكس قام و دزني ع مكتب التلفزيون..و كأنه مشمئز مني

حسيت ان ظهري انجسم جسمتين صرخت صرخة الم و عذاب حركت ايدي اليمين احطها ع ظهري بس خانتني ..حطيت ايدي اليسار

و يلست اصيح بصوت عالي اول مره اجوف فارس جي قاسي ما عنده قلب ولا رحمه ..اترددت كلمات عمور في بالي "اضمنه لج اضمنه لج اضمنه لج " سافر و خلني مع حيوان ما يحس ..اتجرب مني و نزل ع الارض و زخني من لحيتي

كنت اصرخ و اقوله : بس يا الحثاله ..

بس شكيت انه كان يسمعني ...
صرخ علي: ليش اتسوين جي شو جايفه فيه مب جايفتنه فيني هاه ردي..
يلست اضربه بيدي :ما يخصك ما يخصك فيني ...

حسيت جسمي صار شرات لورقه قاعد يلعب فيهااا.
سمعته يقول : مايخصني!! ..انا ريلج اتعرفين شو يعني ريلج ...

حاولت امنع دموعي بس ما قدرت فصرخت عليه: انت مب ريلي ..انت فارس ما غيرك الحثاله ...
صرخ علي : جب لا ترمسين ..ما عليه .انا براويج ...

هدني طحت ع الارض ميته من الصياح..خلاص العيشه مع فارس مستحيله..يا ليتني اقدرارد راس الخيمه ...يا ليتني ..مدري وين راح عني بس سمعت صوت ريوله ياي صوبي .

.شو بعده ما شبع ..ييرني من ذراعي ..
ترجيته: فارس خلاص اعفيني حرام عليك...

ما رد علي ...جفته قاعد يقودني صوب حجرته ...

حسيت ركبي تحترق من كثر ما كان يسحبني ع الارض ...جفت اغراضي كلها فارنها في حجرته ع الارض بشكل فوضوي..طالعته ما فهمت شو قصده ...او شو يبا مني ...

هدني فرجعت لورا اتساند بالكبت لاني كنت احس موب رايمه اوقف لان ظهري شويه و بنكسر ...

قال بنبرة غيض: :من اليوم هذي حجرتج "اشر ع الشبريه" هني ترقدين شبريتج مثل ما هي شبريتي .."و اشر ع الكبت" و هني اتكون ثيابج.."واشر ع باب الحمام" و هذااااا حمامج مثل ما هو حمامي ..
كنت حاسه اني ميهوده بس مدري من وين طلعت لي القوه


و صرخت بويهي : انا ما ابااااااااااااااااك انا اكررررهك يا ال يا ال يا ال لحححححححححثاله ..


حطيت ايدي ع ويهي و صديت عنه يوم جفته تجرب مني من جفت الشر بعيونه صرت اكيده اني اليوم ببات في قبري ...


.,’":؛(( الحــــــــــلقـة الثالـثة و العشـــــــــرون ))؛::.,’

كل شي يهون الا الفراق جرح العيون.. لدقيقه تمر القاها عمر ماينتظر”.. بإختصار ويني انا وين الانتظار.."

في اليوم الثاني فتحت اعيوني استغربت المكان..عقب استوعب كل شي انا في حجرة فارس سمعت صوت الماي في الحمام..حاولت اقعد بس ما قدرت حسيت جسمي كله متكسر ...

طالعت ايدي اليمين جفتها متورمه..حاولت اغصب روحي ع اني اطلع من حجرة فارس قبل لا يظهر من الحمام..مالي خلق اجوف شيفته
.جفت اغراضي اميمعنها كلها ابمكان و احد حشى جنها زباله..نشيت ايير روحي بالغصب ....

شلتها و حطيتها ع الشبريه ...و طلعت من الحجرة ...عقب بردها حجرتي .بعد ما اتغسلت رحت الحمام ....رحت المطبخ...

يلست ع الطاوله ما عرفت شسوي ..؟؟ اسوي له ريوق..بس ها ما يستاهل ..طالعت ايدي جفتها متورمه وايد..لدرجه اني مب رايمه اقبضها او افجها ...هاي اكيد يوم يت ع حد مكتبة التلفزيون ...آآآآآآآآه شو اقولكم....

كل شي ممكن يصير الا اني ارقد مع فارس في حجرة وحده ها الي مستحيل يصير ..اتنهدت بس صاااااااار ..فارس ال يباه كل شي يصير ..

.دشيت حجرته .. و دشيت عالمه او عالم يديد...حسسني اني صرت زوجته و هو زوجي ...بس كل الي صار من بينا ما بغير شي من مشاعري صوبه او مشاعره صوبي ...

مشاعري صوبه !!! صرت اكيده و متيقنه ان مشاعري صوبي فارس تغيرت وايد ...بس مدري لـ أي مدى. نزلت راسي ع الطاوله .. و غمضت اعيوني حسيت بالعذاب ...

شهقت يوم مرت ع بالي ذكرى البارحه ...رفعت راسي من ع الطاوله و مسحت دموعي ..شو تفسير كل ها ...ليش فارس يسوي مشكله يوم ارمس مع وليد ...اشمعنى وليد..عيل فيصل و منصور و خالد عادي ..يمكن لاني وايد احتكيت ابوليد ..

.رفعت راسي و تنهدت تنهيده عذااااااااااااااب ...يا الله ..كل شي بيهون لو كنت متاكده ان الي يسويه فارس صوبي غيره زوج بس انا متاكده فارس ما يحبني ولا يغار علي ..يبا ينتقم مني يبا يحرمني من كل شي يونسني ...مثل ما هو حارمني من اهلي في راس الخيمه ..

.أأأأأأأأأأأأأأأأه يا خالي أحمد وينك عني وينك ...؟؟؟ بس لو اعرف طريج راس الخيمه.. كيف و انا ما اعرف حد هني غير فارس !!! فارس فارس كم عذبني هالانسان ...

كرهني بكل شي ..انتبهت ان باب المطبخ مفتوح و انا مالي خلق موليه ..اجوفه او ارمسه ..جلعت ابليس ..
نشيت اصكر الباب بس اتيبست ابمكاني يوم جفت فارس جريب مني طاحت عيوني بعيونه ...مدري كم من الوقت مر علي ..نظراته لي و كأنه يقول ملكتج بس نظراتي له كانت عتب و لوم ...

صديت عنه و عطيته ظهري من غير ما اكلمه .. و الظاهر خذ طريجه صوب باب الشقه ...

اكيييييييييييد يعرف انه غلطان ...و ماله ويه يرمسني عقب الي سواه فيني البارحه ..حتى عن فطوره ما نشد أحسن لاني ما بسوي لك شي ...ما تستاهل يا الحثاله ..

بها اليوم ...حسيت اني معزوله عن العالم تمام ...قضيت هاليوم بساعاته وحيده ...بالاول كنت ارتاح يوم اجوف الوقت صار العصر و فارس للحين ما شرف ...الشقه ..
حتى اهله ما اتصلوا فيني ...كان التلفزيون هو اجرب شي لي بها اليوم...فتحت عيوني جفت الدنيا توها بدت اتظلم ...قعدت و حسيت بصداع ..و ان الدنيا اتلف حولي ..نشيت من ع الكنبه ..كنت بطيح بس مسكت عمري ..تذكرت اني اليوم مب ماكله شي ...!!

رفعت راسي اطالع الساعه شهقت الساعه 7 المغرب ... معقوله فارس يااه و ما حسيت فيه ...حاولت اساند روحي باليدار و انا امشي .

.طبعا كنت معتمده ع ايدي اليسار لان اليمين كانت تعورني مجرد ما المسها ...
بلعت ريجي بصعوبه ..عقبها فتحت حجرة فارس ..تفاجأت ان الحجره مثل ما هي ع حالها يوم طلع منها الصبح ...

بالبدايه كنت مرتاحه لان فارس ما يااه البيت لكن الحينه بديت اشك ..شو صار له !! رحت صوب موبايلي توقعت انه اتصل بي ...بس للاسف محد متصل ..بديت اهون ع نفسي فارس امممممممممم شرات الساحر ما ينخاف عليه .. يولي و ليش احاتيه ...اصلا ..هو ما رحمني ولا احترمني ...

رحت المطبخ و سويت لي شي أكله اسد يوعي ...اتنهدت و انا احول من قناة لقناة ..حتى التلفزيون صار ممل ...فريت الرموت بعيد عني ...يلست اطالع برع ...ناس رايحه و راده ..الشوارع مليانه سيايير ..العالم كله بحركه ليل و نهار ...الا اناااا .. وحيده ..ما اعرف شو مستوي بالدنيا ..رفعت راسي حطيت ايدي ع حلجي و انا اجوف الساعه عشر فـ ليل ..

فكرت اتصل بـ زينب ..يمكن اتعرف شي عنه ...

زينب : هلا و الله بحرمة اخوي ...زين اتصلتي ..
ابتسمت علشان اخفف عن نفسي و احافظ ع اعصابي : شحالج .. وحشتيني ..؟؟

زينب : الحمدلله ؟ اشحالج انتي ..؟؟
بلعت ريجي حسيت بالراحه مدري ليش يلست ع الكنبه: انا ابخير ..

زينب: دام انج متولهه علينا جي ما ييتي ويا ريلج ...؟؟ اونج تعبانه تتغلين..
فجيت اعيوني يعني فارس كان موجود معاهم ...
زينب : الوووووووووو

نوره: انا معاج ..هي اشويه تعبانه ..
زينب: ما اتجوفين شر يا الغاليه ..
نوره: الشر ما اييج ..زين بخليج بغيت اتطمن عليج..

زينب: مشكوره و لو كان المفروض نحن نتصل بج بس السموحه منج..
نوره: مسموحه بالحل يا الغاليه ..في امان الله
زينب : مع السلامه ..

سندت راسي ع الكنبه ..لحظه لحظه يا نوره فكري زين ...فارس من طلع ما رد الشقه و الحينه الساعه عشر فـليل ...اممممممممممم ..انا ما يهمني شو يفكر فارس ..ولا يهمني الاسباب الي خلته ما يرجع الشقه..

كل الي يهمني الحينه بس ..ارجع راس الخيمه ..كيف !! حطيت ايدي ع راسي و غمضت عيوني افكر بالطريقه الي توصلني راس الخيمه ... و محد بوصلني غيره فارس ..امممممممممم ..تذكرت المواقف الي كنت اجوف فيها فارس !! فارس شخصيته متقلبه ...او مزاجي ممكن ...بس متى يكون رايق ..و يضحك و يسولف معاي ...متى متى يا نوره ..

ايوووه يوم ما اعانده بشيء ..حسيت بالحماس بداخلي ..اذا ما عاندت فارس و عاملته اوكي اكيد بكسبه و عقبهااا بياخذني راس الخيمه اونه زياره بس انا بفسخ القناع و بفضحه و ما برجع معاااااااااااااااه ..
نقزت من مكاني ...مستانسه ...بس يبالي صبر ..اصبري يا نوره و بتحصلين كل الي تبينه ...

يا ويلي الوقت متاخر و فارس ما ياه ..ما يهمني ..اعترف لكم مشاعر حلوه بديت احسبها صوب فارس لكن بدوس عليها علشان احقق الي انا ابغيه ..

حطيت راسي ع الكنبه اتريا فارس لي ما يرجع بس النوم سبقني و ما حسيت بدنيا ولا بمصايبهااا ..
ع الفير نشيت من رقادي ...جفت نفسي راقده ابمكاني ...حطيت ايدي ع حلجي فارس ما يااه ...وين رااح ...انتبهت شي لحااف كان علي ..زخيته و حضنته لا ارادي ..فارس ياه ...ما حسيت به ..ليش كنت بردانه ..عيل ليش غطني ..اتذكرت حالتي ..شليت اللحاف و فريته بعيد عني ... و نشيت ..رحت الحمام عقب ما تغسلت و صليت ...دشيت المطبخ اسوي له ريوق ...اممممممممم اوني عاد ...بعامله زين ولا كأنه شي مستوي بنجوف يا فارس انا ولا انت ...
.نشيت اسوي له حليب ... و حطيت له في الصينيه زبده و صمون ...و زيتون ..بسه يكفيه مع انه ما يستاهل الواحد يسوي له شي بس غصبن علي ..خليني اتجنب المشاكل منه ..زهبت ريوقه ابصعوبه ...لاني ما كنت استخدم ايدي اليمين علشان حصلت صعوبه ...اني استخدم اليسار في كل شي ...طلعت من المطبخ و وحطيت الصينيه ع الطاوله الطعام في الصاله ...حسيت انه طلع من الحجره و ياي صوبي..بغيت اطلع قلبي من صدري و ارص عليه بس علشان فارس ما يسمع دقات قلبي ..للحظه شكيت ان الامارات كلها تسمع دقات قلبي ..رجعت لورا خطوتين علشان ما يسمع دقات قلبي ..ادرى جنون و مستحيل يسمعها بس كـ حذر ...

طنشني ..صار صوب نعاله و بعدين مب لابس ادريس الدوام وين رايح ..؟؟؟
بلعت ريجي: اصب لك حليب ..

رد من غير ما يطالعني : ما ابا شي ...فضيت لج كبت حطي فيه ثيابج..و هذي اخر مره اخليج ترقدين في الصاله
طالعته مستغربه ليش يعاملني جي ...؟؟ حتى انه ما حط عيونه بويهي !!... ولا كأنه من البارحه غايب عن الشقه ..صج هالانسان غريب ....مدري بشو يفكر ..حسبته بنصدم من اسلوبي معاه بس طنشني و خيب ظني

طلع من الشقه و طلعت روحي معاه ...يلست ع الكرسي حاولت امنع روحي من الصياح..بس و الله توقعت بيكون غير جذا..طالعت ايدي فيلست اصيح..من الغيض ..

رحت ارتب حجرة فارس اقصد حجرتي و حجرة فارس ..يلست اشغل روحي بترتيب الشقه.. و غسلت ثياب ...سويت كل شي بس علشان ...امحي فارس من بالي ...اتمنيت اروح المستشفى يسون لي غسيل مخ علشان انسى كل شي ..

نفاد بنسى اهلي و بتعرف عليهم لكن فارس ما اييبونه صوبي ....

سويت الغدا..مع اني كنت ناويه ما اسويه بس فكرت اشغل روحي ....عقب ما خلصت كل شي ..دخت الشقه.. و اتغسلت و بدلت ملابسي.. حطيت لي ميكاب خفيف جدا..يلست العب باللابتوب..لي ما انفج باب الشقه..اتصورا ..لمحت الساعه كانت 3 الظهر موليه ما انتبهت .للوقت..!!
فارس: السلام عليكم ...؟؟
ابتسمت له: عليك السلام ...

بس ماتت الابتسامه في شفايفي يوم جفته عطني ظهره و راح الحجره ..صكرت اللابتوب بعصبيه و لحقته هاي الحركات مب علي ..المفروض انا الي ازعل مب هو ..انا أول البارحه اتكفخت مب هو ...انا الحينه ايدي متورمه مب رايمه احركها آآآآآآآآآآه يا عذابي ...

دشيت الحجره جفته يفسخ كندورته: تغديت ..
رد: هي برع ..
شهقت: عيل انا اتريااك امسويه لك غداا ..؟؟
طالعني: زين روحي تغدي ...

عصبت عليه: الحينه منوه المفروض يزعل انا و الا انته ..؟؟

دش الحمام يغسل ويهه ..شفت قطراات الماي تزحلق ع خصلات شعره تمنيت المس شعره و العب فيه ..ايه شو هالافكار متفيجه انتي ...انا عاهدت نفسي اني اعامله جي بس علشان ادهن سيره و يردني راس الخيمه ..مب افكر بجماله و بمشاعري صوبه ...يولي هالانسان ما يستاهل ..

سمعته يقول: منو قالج اني زعلان ..؟؟
نوره: عيل تصرفاتك شتسميها ..؟؟؟البارحه موليه ما شرفت الشقه و لا فكرت انك تطمن علي و الحينه امطنشني ..

مسح ويهه بالفوده و يلست اتأمل ملامح ويهه يا الله جميل : شو بلاها تصرفاتي ...

صكيت ع اسناني يحاول يستفزني : لا تستهبل علي فـااااااارس

طلع من الحمام ..طالعني: ما تغير فيني شي..هذي طبيعتي "رفع حياته" لا يكون تتحرين انج تشاركين حجرتي معناتها خلاص صرتي حبيبتي و عمري ..

كلمات كانت مثل الطعون في صدري..هذا هو فارس الي من وعيت للدنـيا .و تلومني يوم اقولكم حثاله و اكرهه ..ماتت كل الكلام و اختفى بلحظه بس ما رمت ارد عليه ..

تجرب مني و تميت واقفه ابمكاني حط عينه بعيني و قال : انتي نسيتي كيف تزوجنا و انا عشان شو تزوجتج ..؟؟
شل عينه عني و راح صوب الشبريه و ختم رمسته: بس بغيت اثبت لج اني ريلج مب اكثر نوره ..و بالمره ما تنسين انج متزوجه و ترمسين ويا فلان و علان ..؟؟

طلعت من حجرته ...جذااااب فااارس جذاااااب يبا يغايضني يقولي هالرمسه ....جان فيه خير ..حط عينه بعيني ..ليش شلها و صد عني ما يروم لانه يحبني...يحبني !! اتصدقون كنت احسب جي...بس كلامه و تصرفاته معاي هاليومين غير ..

حسبت اذا عاملته بالزين ...كل شي بتغير من بينا ..يلست اصيح ..حراام الي يسويه فيني حـراام..عيل انا ليش عايشه معاه اضيع عمري معااه ..شو يبا يعذبني ...ما سده الي سواه فيني ...

مسحت دمعي بكل عصبيه ..ما بصيح ..و ليش اصيح !! انا دوم اقول ها حثاله قذر..لوث.. مع هاا قدر يخدعني ...ما بسامحه ..مدري كيف غاب عني الي سواه فيني هو عمور ..

.قلدت صوت عمور"اضمنه لج نوره" فقدته يوم انك ذيله لازم بتكون وراه شرات العمي..اتنهدت..

غمضت عيني تعبانه من كل الي قاعد يصير حولي ...شسوي كيف الحل ..؟؟...نقزت يوم رن موبايلي ...عفدت صوبه ...صرخت صرخه خفيفه ..صرخة الم لاني زخيت الموبايل بيدي اليمين..طاح مني الموبايل نزلت و شليته بيدي اليسار ..
نوره: السلام عليكم ..؟؟
زينب: عليج السلام ..شحالج ..؟؟

نوره: الحمدلله..انتي اخبارج ..؟؟
زينب: الحمدلله ابخير شو بلاه صوتج ...؟؟بعدج تعبانه ؟؟مزجمه شوه !

طبعا بقولها بزجمه عيل بقولها اخوج امكفخني ولا جرحني بكلامه :هي مزجمه ...

زينب: سمحلي سويتلج بهاي الحزه بس بغيت اعرف بتيين معاي ..نتسوق..و بالمره بنمر المكتبه علشان نعطيه صورة فارس ..شو قلتي ..؟؟

كنت بقولها خلاص انسى ما ابا اسوي وساده فيها صورة فارس بس ما بغيت احرجها ..
رديت عليها: زين بشاور اخوج و برد لج خبر ...؟؟
زينب: وينه هو ...ما داوم اليوم صح ..؟؟
ياني فضول اعرف وين سار : هي .شدرااج ..؟

زينب: تراا راح مع منصور دبي عندهم شغل هناك..عادي يفتحون مصنع التمور هناك فـ دبي ...
نوره: اونه ..؟؟

زينب: هههههههههه اسولف معاج بس مدري المهم شغل ...فارس ما قالج..!!
جذبت عليها: امبلى قال عندي شغل فـ دبي ...

تنهدت زينب: الله يعينا نحن الحريم..
نوره: هههههههه الله يصبرنا..

زينب: آمين و يصبرني ع البلوه الي معاي بروح اجوفه ..
نوره: منوه مايد هههههههه علني فدااه ..

زينب: هي منوه غيره يالله نوره ردي لي خبر ..
نوره: ان شاء الله ..في أمان الله ..
زينب: مع السلامه..

تبون الصراحه ما ابا اروح لان مالي حايه اتسوق ...بس خلونا انغير جـو .

.احسن من جو النكد الي انا عايشه فيه مع فاارس ...ابا ارقد ...

.بس مستحيل اروح حجرة فارس و انخمد هناك و هو راقد..نشيت رايحه حجرتي حاولت افج الباب بس ما رمت افففففففففف يسويها ها الحثاله قفل باب الحجره كل شي بقفله علي كل شي اووووووووووف..

.سرت صوب باب حجرته كنت بشوت الباب من الغيض بس مسكت روحي ما فيني يعفد علي و يزخني من رقبتي ..
.احسن شي اسويه بحياتي ..بروح اكوي الملابس الي غسلتها اليوم ..
.الشي الوحيد الي استفدت منه من زواجي من فارس خلني حرمة بيت سنعه..طباخ و عرفت اطبخ.. والحينه قمنا انكوي ملابسنا ....

.آآآآآآه صج عرف يداويني و هاي الشي الي يحرقني من دااخل..تعالوا كيف اكوي و انا ما اروح اسوي شي بيدي اليمين شسوي عيل ...؟؟ بنحاول بيد اليسار ...حاولت الثوب اخذ لها ساعه لي ما اكويها حسيت بتعب و خاصه اني معتمده ع يد وحده..فريت الثياب ..

و نشيت..رحت اسوي لي كااااااااافيه من زمااااان شربته ...
لمحت فارس خطف جنه بيظهر متى نش هاااااه ...يولي ع باله بلحقه ..الي ما يبااك لا اتصيح اتباه ...اوووووه بظهر اليوم مع زينب...طلعت من المطبخ..جفته قاعد يلبس نعال ..تميت واقفه اراقبه شو اقوله كيف ابدي ...

صد صوبي فااااااااااجأني ...
بلعت ريجي: زينب اتصلت ..
يلس يعابل بموبايله يقهرامطنشني : شو تباا..؟؟
قلته: تباني اروح معاها نتسوق..
عطاني الظهر ..و كانه بيظهر من الشقه ...شو ها يستهبل ...
سالته: بروح معاها انزين ..؟؟
رد علي من غير ما يطالعني بالعكس فج باب الشقه : لاااااااااع

و صكر الباب بويهي....صكر ابواب الدنيا كلها ابويهي...ليش انجلب علي مره وحده انا شو سويت ..؟؟ كل ها علشان سالفه وليد..منو يعني هاه وليد...حسيت بغصه اكررررررهك ..فارس اكررررهك...يلست طول الوقت ابروحي بعد ما قلت زينب اني ما بروح معاها .. و طلعت لها الف حجه ...يلست اعد الساعات علشان يرجع فارس....
كنت احس وحيده ملانه ..شو هاا ..سويت لي عشى خفيف لاني ادرى فارس ما بيي يتعشى ..بيوم و ليله تغير كل شي ...

ع الساعه 11 فـ ليل حطيت قناة الافلام..و يلست اطالع الفلم...ماشي شغله ...فيني رقااااااااد بس ما ابا ارقد في حجرة فارس ما ابا ..رحت حجرة فارس و يبت لي البطانيه حسيت بالبرد الظاهر الشتاا ع الابواب بروح اشتري لي زلاغ...و كوت ..

.اتلحفت..بعد ما انسدحت ع الكنبه و يلست اطالع الفلم .اتوقعت ان فارس بعد اليوم بيي عالفير شرات البارحه .....رقدت .و انا افكر فيه ...لاني كنت ميته رقااااااد ..

شهقت يوم حسيت بويع في يدي يريتها ...و حاولت افتح عيوني بس الرقاد غلبني فحاولت ارجع ارقد بس حسيت مره ثانيه بويع..يرييييييت ايدي ابسرعه و فجيت عيني لاني هالمره صج عورتني ...

قعدت يوم جفت فارس قاعد ع ركبه ع الارض ها شو يسوي هني لا يكون حلمانه ...بس صوته رجعني لـ دنيا الالامي و جراحي ...حضنت ايدي ما ابااه يجوفها.

.فسالني: شو بلاها ايدج ..؟؟ جي متورمه ..
رديت ابسرعه و انا صاده عنه: ما بلاها شي..
مد ايده : اجوفها انزين..

رديت بصوت واطي : لاء
بس تم مااد ايده: اجوفهااا بس..

مديت ايدي بتردد فـ يرها بدفاشه فـ صرخت..كنت بييرها بس تم زاخنها خفت يعذبني انا ما سويت فيه شي علشان يعذبني كان يطالعها فترجيته: اتعورني ...لا اتهوس عليها ...

طالع مستغرب: ايدج وايد متورمه..ليش ما قلتيني...كنت وديتج الطبيب..

لا و الله يستهبل علي اسمعوا اونه ليش ما قلتيني ..ترا اليوم شبعانه سوالف معاك..من اقولك نص كلمه صديت عني ...فضلت السكوت لانه ما كان داعي اجاوبه يستهبل !!

ضغط ع ايدي فجاه فصرخت فـ ييريتها و كنت بصيح ..و كرده فعل رفسته فـ صدره كان بيطيح لـ وراا بس ضبط روحه و ساعدته ايده الي حطها ع الارض من انه يطيح..عفدت واقفه فوق الكنبه.

.واااااااااااايد خفت من الموقف الي صار كنت بضحك عليه يوم كان بيطيح بس خفت من ملامح الغضب الي انرمست في ويهه للحظه وقف جوفوا حتى و انا فوق الكنبه و هو بالارض ماشي فرق بينا غير انه بسيط يوم اقولكم عملااااااااق..

بلعت ريجي و قلته بنبرة اسف مع خوف: و الله ما كنت اقصد انت عورتني ..
كانت ملامحه عاديه : انزلي يالله تعالي ارقدي الوقت متاخر..

يوم جفته مب محرج قلته: عطني مفتاح حجرتي ما برقد فـ حجرتك ..
قال لي يتطنز : ليش حجرتي مب مريحه ...

رديت عليه و انا كارهتنه : كل شي مب مريح في ها البيت ...
طنشني: انزلي يالله ..

نسيت خطتي ..رديت بعناد : لاااااااااع..
سالني و كأنه يهدد: ما بتنزلين ...؟؟

هزيت راسي بمعنى لا ..

سالني بنفس النبره تهديد: و اذا شليتج بتصرخين و بتيمعين علي الناس ..

لصقت في الدار يوم سمعت جملته : ما يخصك فيني مب كافي الي سويته فـ ايدي..لو رحت الطبيب بقولهم انت ضربتني علشان يفتحون لك تحقيق و تنسجن..
ما توقعت ردت فعله : ههههههههههههههههههههههههههههههههههههههههههههههههه تعالي انزلي يا الياهل ...

صديت عنه ع باله قاعده انكت عليه..اصبر بجوف باجر بفضحك ...صرخت يوم يرني من ذراعي و شلني ع جتوفه يلست ارافس بريولي و اصرخ ...

ما كنت اسمع الا ضحكته ..الي كانت تجتلني غييض اما انا فكنت اسبه سب علشان يمكن يحرج و يفرني من ع الارض بس كان يضحك .

.و الي يجوفه يقول هالانسان من زمان ما ضحك ...

في اليوم الثاني ...خذني بيت اهله ...علشان خالته حصه اداويني اونه هي اتعرف بهاي السوالف..كانت تمسح ع ايدي.كنت احس ان روحي بتطلع..مراات ما كنت اخليها بس فارس كان يغصبني وا يلس اضربه و خالوه تمسح..و احيانا كنت اصيح..

.بس مع الوقت كنت احس ان ايدي وايد قامت اتخف و ترجع لحجمها الطبيعي ...حتى الألم ما قامت احس فيه شرات قبل ..؟؟

مرات يوم كنت اروح بيت خال فارس علشان خالته تمسح ايدي..اتكون مها موجوده.. و كانت وايد اتعق رمساات ..ان ايدي متورمه من ضربه بس كنت اطنشهاا..

و الشي الي يقهر ما كانت اتقول هاي الرمسه جدام فاررس طبعا تباا اتبين له انها هي الملاك و انا الشيطان..

ع العموم انا اصلا مهاا قمت اتجنبها من يوم فـ المزرعه..و فارس هزبني عشان خاطرهااا ..

.رغم الايام الي مرت كنت تقريبا يوميا اروح بيت خال فارس...مع هذا علاقتي فـ فارس كانت تبعد اكثر و اكثر ..ما كان يسولف معاي شرات قبل.. و اكثر شي كان يصدني..احيانا كنت اعامله بمثل ...بس لاحظت اصلا ماشي فرق عنده كلمته او ولاء ....

علشان جـي..قررت اني اكون بحالي مثل ما هو بحاله..أي نعم عايشه معاه في نفس الشقه و نفس الحجره...و احيانا كان يشاركني طعامي يعني عايشين كأي زوجين بس للاسف قلوبنـا متنافره بعيده عن بعض و كل ما يااه يوم بعدنا عن بعض اكثر و اكثر و الغريب اني نسيت الاتفاق الي اتفجته مع نفسي .....

حتى يوم دش علي فارس كنت في المطبخ اسوي له حليب ...
نقزت يوم سمعت صوته من واري : شتسوي...؟؟

هذي اول مره يدش فيها المطبخ و يسالني شسوي رديت عليه ابرود : حليب ..؟؟؟
عقد حياته:حليب بها الحزه..

رفعت جتفي مب مهتمه: هي احب اشرب الحليب أي وقت...ليش شي قانون يحدد متى يشربون الحديد..
رد علي :لا تستخفين دمج..

صديت عنه اصب الحليب في الكوب:ان شاء الله..
سالني:شو اخبارها ايدج..؟؟

رديت :الحمدلله احسن ما اتعورني

عااد الخقه رد علي: طبعا لولا خالتي جان ما شفيتي ابسرعه...
طنشته كنت بطلع من المطبخ بس وقفت ابوسط المطبخ لانه كان ساد علي الباب طالعته و كاني اسئله شو يبا بعد..؟؟

فارس: زين ليش ما تسالين ابا حليب ولا لاء..؟؟ ما عندج ذوق..؟

استغربت منه: مب بالعاده تقعد اتسولف معاي و تشرب معاي حليب ولا شاي ولا غيره ..؟؟؟
فارس : ابرايه اصلا ما ابا...بس بغيت اقولج باجر بنروح البحرين بنقعد فيها جم يوم..
اشرت لـ نفسي: انا بروح البحرين..

رفع حياته مستغرب : هي البحرين مب القمر ...؟؟
حسيت انه يتمصخر علي سالته اغير استهباله علي : منو بعد بيروح..؟؟؟

طلع من المطبخ و لحقته سمعته يقول : انا و انتي ..؟؟
قعد يجلب قنوات التلفزيون سالته: بس !!

طالعني: ليش ودج حد يروح معاااانا ..

ما اعرفت شو ارد عليه اصلا ما فهمت شو يقصد لان نبرة صوته كانت فيها رنة غريبه ...
ابتسم و تجدم مني: لا تتحرين شهر العسل ..؟؟ عندي شغل هناك و فكرت اخذج بدال ما اتمين هني بروحج ..؟؟

استفزتني مصخرته لي و ابتسامته الي رفعت لي الضغط لاخر لحظه مسكت عمري كنت بحرقه بالحليب الي معاااي رديت عليه بانفعال: ما خطر ع بالي شهر عسل او غيره بس انا ما بروح معاك...

رد عليه من غير ما يطالعني حط قناة رياضيه يطالع المباراة : بتمين مع منوه..؟؟
رديت ابسرعه: بروح راس الخيمه ..؟؟

حط الرموت ع التلفزيون و تجرب مني..ابصراحه ما كان امبين عليه انه محرج مع ها خفت يوم تجرب مني رديت ابراسي لوراااا يوم جفته ياشر باصبعه ع راسي و
قال : راس الخيمه شيليها من هني .. انسيها...

طالعته و كنت بصيح: حرام عليك تحرمني من اهلي و ناسي ...حتى انك فرقت بيني و بين اخوي الوحيد...
رد علي بانفعال : توج حسيتي و عرفتي شو يعني تنحرمين من اهلج ..ذقتي جربتي .الي انا جربته..هذا انتي 4 شهور ما تحملتي ...كيف شو بتقولين عني الي صبرت 8 سنين ..

حطيت الكوب ع الطاوله و رديت عليه: انا ما يخصني ابوك الي راغك انا شو ذنبي..
غمضت عيوني يوم صرخ علي: انتي الي فتنتي علي..

رديت عليها بنفس النبره: شو يعني انا الظالمه و انتي البريء ..محد قالك اتسوي سواتك..سودت ويووهنا و انا ما قلت الا شفته..

عفد علي و زخني من لحيتي اتنفست ابسرعه خايفه منه رفعت راسي اطالعه جفت امحرج و كأنه ماسك عمره
صك ع اسنانه: انتي يوم ما اتعرفين السالفه انجبي..سبق و قلتلج لا ترمسين عن هاي السالفه مفهوووم
ما رديت عليه يسوي سواته و بعدين يلومنا نحن ..

هز راسي بيديه و كأنه يهددني فرديت ابسرعه: مفهوم ..هدني ..

رمسني و كأنه مشمئز مني : زهبي شنطتج و شنطتي ..

و اختفى من الصاله..يا الحيوان خاطري ازغتك خاطري اجتلك..عمور وينك يا عمور يلست اصييييح ...قمت من مكاني و سرت صوب التلفزيون شليت موبايلي و يلست اضغط باصابع ترتجف ع رقم موبايل خوله..بس كان الخط ينقطع ما يوصل ..

.حاولت كذا مره نفس النتيجه ..فريت الموبايل ع الارض تبطل قطعه قطعه..طنشته و رحت حجرتي فجيت شنطتي بكل عصبيه

يلست اصرخ و ارمس بصوت عالي جني خبله : اذا ما رحت و عاندته بيكسرني يباني اكون شغالته ...اكررررررررهك يا الحثاله ...مدري شو مصبرني عليك ..

و يلست احط ثيابي في الشنطه بكل عصبيه .\

.و حطيت بشنطته كذا و اشياء الشخصيه الي تعنينه ...كنت انافخ من كثر ما كنت احط الاغراض في الشنطه و انا قاعده اصكر الشنطه طاحت السلسه الي كانت متعلقه في رقبتي طاحت عيوني ع الخاتم...مدري شو صار فيني ..مسكت الخاتم حضنته بقوه..

مدري شو الشعور الي يخليني احن لـ فارس و اشتاق له من اجوف ها الخاتم يمكن لان المناسبه الي لبسني فيها الخاتم ..كانت حلوه بالنسبه لي ...يا حلاته اول ما تزوجنا انجلب علي من تعشينا فـ بيت زينب..و لها اليوم و انا اعاني منه آآآآآآآآآآآآه كم بتصبر يا قلب ..كم و كم ..؟؟؟

كان الوقت متاخر و فارس للحين ما رجع..فكتبت له بورقه صغيرونه "رتبت اغراضك بس شيك ع الشنطه يمكن ناقصنك شي زين عمي" حطيت الورقه ع شنطته و انخمدت ...

في اليوم الثاني ...نشيت ع الساعه عشر جفت فارس بعده راقد الله يعلم متى رد فـ ليل...تميت اتامله..حسيت اني متلومه منه مع انه راقد بس كنت احس انه يحس فيني..قمت من مكاني ابسرعه.. دشيت الحمام..اتغسلت عقبها لمحت ورقه ع شنطتي ..

.شليتها نفس الورقه الي كتبت بها رساله حق فارس ..جفته كاتب من وراا " بتغدا في بيت خالي و عقب المغرب بنروح المطار و ادفعي قيمة الموبايل الي كسرتيه""

يتني الضحكه اتذكرت موبايلي الي خليته ع الارض ..قطعه قطعه..طلعت من الحجرة رحت اسوي لي كوب حليب..عقبها..سرت الصاله ...جفت الموبايل فوق التلفزيون شيكت عليه الظاهر ان فارس عدله ...يلست اطالع قنوات التلفزيون الصبح شي ممل ماشي شي اتابعينه..ع اذان الظهر قمت صليت ..جفت فارس يتجلب ع الفراش بعد ما سمع موبايله يرن ..


قلته: نش يالله
رفع راسه يطالعني و رجع رقد : ما اباااااا

حسيته ياهل رديت عليه: ما تبا اتروح تتغدا بيت خالك ..؟؟
رجع و قال بنفس النبره كسل: ما اباااااااااااا

طويت سيادتي : كيفك انا بلبس و بتكشخ و بتصل ..
تروعت يوم قعد فجاه: بتتصلين في منوه ..؟؟؟

حطيت ايدي ع حلجي شو بلاه

رد سالني: هااااا بتتصلين في منوه ..؟؟
رديت :كنت بقول بتصل فـ الدريول ...

نش من ع الشبريه بكسل: ع بالي بعد...؟؟

يقهر شو يتحرا عمره يملك كل شي..فجيت باب الكبت ادور لي بدله ..اخترت بدله شريتها مع خوله لويت شفايفي حسره ...اوني بسافر لندن ....حطيت البدله ع الشبريه و قمت امشط شعري ....

طلعت برع الحجره ادري فارس قاعد يسبح و ما اباه يجوفون فـ الحجره يوم بظهر ...يلست ربع ساعه في الصاله....جفته لابس و متعصم كاشخ الريال !

سالني: متى بتلبسين ..؟؟؟
وقفت؟: الحينه ثواني ...

ركضت صوب حجرة فارس ..جفت بدله زرقه ع الشبريه ..ع كيفه يبا يلبسني ع ذوقه بعد..شليت البدله كنت برجعها في الكبت بس جفته واقف حذال الباب : لبسي هاي البدله ..؟؟

من غير ما اطالعه: ما اباها ...
عاندني: انا اباااااااه..
طالعته: انت تباها البسها ابروحك ..
قال لي بنبره حاده شويه: لبسي ها البدله ولا تضيع وقت ...

صكرت باب الكبت بعصبيه شو ها الادامي ...ع كيفه يبا يمشيني حتى في ملابسي ...لا اله الا الله ...
طالعته بعصبيه : اطلع برع ببدل ...؟؟

اتجتف اتسند ع الباب : لا و ااااااااااااااالله ..

ما رديت عليه ادريبه يبا يستفزني علشان اضارب معاه عقبها يضربني يباني اروح بيت خاله مكسوره الخاطر..صديت عنه و دشيت الحمام بدلت ..

و طلعت من الحجرة جفته محد..لبست عبايتي و شيلتي و ظهرنا ...ما كنت ادري انهم كلهم بيكونون موجودين في بيت خالي حسن ..هااااااا علشان الريال كاشخ و حالته حاله عليااااا هني ....

المهم طول اليلسه حاولت اتجنبها و اتجنب تعليقاتها و تعليقات مهاا .. و كنت وايد محتكه في عايشه و زينب و فيصل..الحمدلله وليد مش موجود ما فينا ع المشاكل مع ها المريض نفسي ...بعد الغداا طلعنا فوق نحن البنات ..
زينب عطتني العلبه: اندوج نوره..
مها: شو هاي ..؟؟

زينب: هديه مني لـ نوره "و غمزت لي بعينها"
ابتسمت لها : مشكوره ...

عليا: جي و نحن مالنا رب ..
زينب: امبلى بس الناس مقامات ..

عايشه: زينب بتزعليني منج..

زينب: ههههههههه ما كنت اقصد و الله ابروحي اسولف مع علياا ..
عليا: يا الله اتصبرنا ع ما بليتنا ..

عمى بعينج يعني انا الحينه صرت بلوه ..في حياتج ..علج الدحق ...
مها : عليا جوفي نوره بتاكلج بنظراتها ..

عليا: بسم الله علي ...كل شي خذتيه مني شو تبين اطالعين بها النظرات .

عايشه : يالله عاد بدينا ..

رديت عليها بحده: شو خذت منج ..؟؟

زينب: نوره ..بلاج حرجتي

نوره: ما اتجوفينهن زينب من قبل ما نتغدا و هن ما شبعن تعليقات ..و انا ساكته لهن ..
مها: انتي شو محد يسولف معاج..

رديت عليها بعصبيه: لا محد يسولف معاي ...؟؟و لو سمحتي ما فيني ع المشاكل ...خلج فـ حالج..
زينب: خلاص نوره هدي لا اتحرجين ..

عليا: شو فيها عليج مهاايه..

نشت مها و قالت ابرود: ما فيني اقولج علياا ..هي ابروحها تدري ..

طالعتها بنظرات لو ما تذكرت عنها حامل كنت بقوم و بشوهه ويها ..

عايشه حطت ايدها ع جتفي: نوره خلاص بعدج ما تعودتي ع سوالفهن ما يقصدن شي..

ردت مها قبل ما تظهر من الحجره: لا اقصد... و هي اتخاف مني لان تدري فارس بجتلها مثل ما سوا في ايدها هذاك اليوم..

و طلعت من الحجره لا شعوري من سمعت جملتها قبضت ايدي اليمين و حضنتهااا ..كانت اتحاول تحرجني بالفعل احرجتني..

.بس هي شدراها ان ايدي كانت متورمه ابسبب فارس ما اظن كانت ويانا هذاك اليوم في بيت زينب...اتلومت مع السالفه انتهت و رجعنا انا و فارس انسولف عادي ..

شرات يوم كنا نصغار نضارب و نتصالح...بس نظرات زينب و عايشه و عليا لي احرجتني ...

عليا: ليش فارس يضربج ما احيده متوحش ..؟؟
عايشه: عليا شو هالسؤال ..؟؟

كنت بطلع من الحجره ..بس طلعتي او هروبي بياكد لهم ..

زينب : مستحيل فارس يسويها هاي مها اتخمن شدراها هي..
اتصنعت ابتسامه : يمكن اختج تعلم الغيب
عايشه: استغفر الله ..
عليا : ادري زينب فارس ما يسويها بس نوره اطلع الواحد من طوره ..
رن موبايلي ..فرديت عليه كان المتصل فارس ..

فارس : تعالي انزلي بنروح..؟؟

رديت اتدلع في رمستي: ليش حبيبي انت مب من ساعه قلتلي بنسافر "وركزت عليها" عقب المغرب ..؟؟
فارس مستغرب: حبيبي !!

كنت بضحك ع ردت فعل فارس بس كنت ابا اثبت لهم اني انا و فارس ع وفاق ...

نوره: يالله لاحق علي انزين ..
فارس مستغرب : نوره..؟؟

رديت بدلع يوم جفت عليا اطالع عايشه : عيونها قلبها حياتها امرني ..

فارس: انزلي من فوق لاييج الحينه ..

ضحكت بس ضحكتي ما كانت تمثيليه لان فارس ضحكني : هههههههههههه زين "تكلمت بجد"..زين بسلم ع البنات .. و بنزل..ما بتاخر ..

فارس: اوكى حبي ...اترياج تحت..

قال حبي طالعت موبايلي مستغربه فارس قال لي حبي !!!يقصدني انااا !!
زينب: ههههههه نوره شفيج اطالعين موبايلج..

انتبهت : ها لا ماشي ..."ابتسمت" فارس يباني انروح تدرين ورانا سفره ...

عليا: يا حافظ..
عايشه: تردين بالسلامه..

نوره: الله يسلمج..ان شاء الله عقب ما تزوجين فيصل بنسافر رباعه و العوانس يقرون هني .."كنت اطالع علياا حسيت انها انحرجت اتولي " سلمت عليهن و نزلت.... بعد ما سلمت ع قوم خال فارس
يلست ادوره: وين فارس ...؟؟

حصه: هههههه يترياج فـ السياره ....
نوره: زين سمحولي ...فيمان الله ..

الكل: مع السلامه..
طلعت ..لمحت فارس قاعد فـ السياره يترياني لحظه انا الحينه شو اقوله ..؟؟؟ لا يكون صدق عمره يوم كنت اتغزل فيه...سويت جي علشان اقهر علياا ..اخ تمنيت اتكون مها هناك ..ركبت السياره ..

سمعته يقولي و كأنه يتطنز علي : تاخرتي حبيبي ...؟؟

طالعته ورديت ابسرعه اطالع برع اتلومت ما عرفت شو اقوله ..زخ ايدي و سالني : شو هالحركاات ..؟؟
بلعت ريجي : انت فاهمني غـلط..؟؟

سالني: كنتي تبين تغايضين منوه ..؟؟
حاولت ايير ايدي : محد ..هدني ..
فجاه هد ايدي و حرك السياره وصلنا الشقه ..علشان ناخذ الشنط السياره ...سمعته يرمس بالتلفون ..و انا كنت مشغوله ترتيب الشقه قبل ما نظهر ..حسيته به واقف وراي ..صديت اطالعه جفت بعيونه نظرات ما فهمتها بس جنها كانت عتب ..

سالني: شو بينج و بين مهاا ..
يعني الي كان يرمسها من شويه مها ..

بلعت ريجي : ماشي شو بينا ..؟؟

رد علي بحده: لا تستهبيلين سبق و قلتلج ما يخصج فيها..

خذت نفس طويل: و للحين انا ما يخصني فيها..

جني قهررته ببرودة موقفي فيرني فتجدم مني و رص ع ذراعي : نوره

حسيت ان ذراعي بنجلع : أأأأأأأأأأأأأأأأي ...هدني يا الحثاله ..

رص علي ذراعي اكثر: شو قلتي ..

كنت بصيح بس يودت عمري: ماشي ..انت تعورني ..

صك ع اسنانه: مب قايلنج لا تتحرشين في مها..هـاااا

عاد ما رمت ايود عمري صحت و قلتله: هي الي تبدي و معاها علياا اسال عايشه و زينب ...دوووووووم من اتجوفني اتعق نغزات

هد ذرااعي مسكت ذراعي اهوس عليها مكان لمسته مدري دموعي ولا كلامي خلته يحس ..ما تكلم بس انا ما سكت ..
.كملت : كل تتحرش فيني و اخرتها هي الي تشكى..عيل انا اروح اشتكي لمنووه منوه بيدافع عني مع اني ما غلطت في حقها ...
"مسحت دموعي قهرتني الصراحه ما تحملت الموقف تعق نغزات يوم ارد عليها ما ترضى و تروح تشتكي بعد.."

اتجدم مني فصديت عنه عطيته ظهري ...يلست امسح ادموعي..شهقت يوم لف ذراعه ع رقبتي حسبته بخنقني بموتني ..

مسكت ذراعه ابسرعه احاول اقاومه بس كانت لمسته وايد رقيقه حنونه غمضت عيوني حسيت بصوته جريب من اذوني همس بنبرة ما عرفت معناتها تهديد او شي ثاني

فقالي : و الله يا نوره خاطري اموتج شرات ما انتي تموتيني كل يوم ...

..انهار كل شي بينا ..ابتعد عني و كأنه تكهرب فجاه ...صديت له جفته يبتعد عني

و يقول : يالله لبسي عباتج عن تاخر عن الطياره ..

تمنيت شي واحد في حياتي ..خااطري خاطري بس افهم فـارس ...؟؟

كان الصمت هو الوحيد فارض نفسه علينا ... و كانه فارس كان في عالم و انا في عالم ... حتى يوم وصلنا المطار ..كنت اباااه يخفف عني لاني كنت خايفه من فكرة اني اركب الطياره و هذي اول مره بالنسبة لي .. و نحن رايحه صوب الطياره زخيت ايده ..ووقفت ..طالعني بنظرات مستغرب ..رديت عليه بنظرات خوف ..ما رمت اتكلم.. و الناس كانت تختطف ...ييرني جريب منه ...

طالعني: لا اتخافني ما في شي يخوف ...

حسيت ابرجفه: بس انا خايفه "رصيت ع ايده و كاني اخاف انه يودرني "

\ابتسم لي حسيت ان ابتسامته ردت لي الحياة: انا معاج لا اتخافين ..

صدقوني ارتحت يوم قالي هالكلمتين بس بعدني كنت خايفه ..
ييرني: يالله انروح ..ما بتحسين بشي احلف لج ...

تجدمت و كملت معاااه خطوه بخطوه يلسنا في الكراسي المخصصه لنا ..من الدرجة الاولى ..حاولت اشغل

نفسي باي شي بس علشان انسى سالفه الطيران بالجو ..تجدمت منه و همست في اذونه

و قلته: ندمت اني ماخذت حبة امنوم ..علشان ارقد و ما احس بشيء..

ضحك علي ضحكته هزت كل شي ينبض فيني تمنيت و انا اجوفه يضحك ابويهيي اضمه للابد ..

صابني شعور اني بتخبل لو فقدت فارس..عاتبت نفسي ع هالافكار الغبيه و المشاعر الي قاعده احس فيها ...و جاوبت نفسي يمكن لاني خايفه ووحيده علشان حسيت بها الاحساس .

.ولا ها فارس منوه يحبه ..

قال لي : عيل انتي ناويه اتروحين لندن ..انتي البحرين جريبه منج مدري شو بيصيبج شو صار فيج لو سافرتي ويا عمور ..

ها ما يستحي ع ويهه مب جنه امخرب علي سغرتي بعد يطريها ولكأنه امسوي شي

رديت عليه: بكون مع عمور بأمان

طالعني: ليش ما اتحسين بها الاحساس و انتي معاي .

صديت عنه و طالعت برع ..زخني من ايدي بقوه طالعته بعصبيه

سمعته يقول : يوم ارمس معاج لا اتصدين عني تفهمين لا ولاء

طالعته بنظرة و صديت عنه ما قال لي شي...لمحته يبطل شنطته الصغيره و يظهر منها اوراق قريت كذا كلمه الظاهر انها تتعلق بشغله..غمضت عيوني و ارقدت ..غفلت..جفت خوله اترمسني و كانها كانت تعاتبني لاني قطعتها ...و اتفجنا انروح المنار نتغدا هناك شرات اياام قبل ...

عقب فاجاتني بانها حامل..فجت اعيوني..جفت عمري طايحه ع جتف فارس ..رفعت راسي اطالعه كان راقد..شفت مرت حوالي ساعه طالعت فارس اتصدقون اول مره احس انه بينه و بين خوله شبه..مع انها تووم خليفه..رديت لورا يوم

سمعت فارس يرمس ع بالي راقد : اول مره اتجوفيني ...
عدلت بيلسي : ع بالي راقد ..؟؟


فتح عيونه :توني كنت بغفل ..بس انتي ازعجتيني ...
همست و طالعته بنظرات اترجااه : فارس

طالعني من غير ما يرد و كأنه يعرف شو يبانـي اقوله ..

بلعت ريجي و همست : ابا ارمس خوله اشتقت لهااا ...

طالع جدامه و كأنه كلامي ما عيبه ترجيته: دخيلك بس خوله هذي حبيبتي ..لا تحرمني منها ابا اعرف اخبارها ..
رد بس كانت نبرة صوته جافه : اهي ابخير ..

اتجدمت منه : زين خلني ارمسها انا حاولت اتصل بها البارحه بس الخط ما يوصل ..
طالعني و كانت بعيونه نظرات تهديد : ادري انج حاولتي تتصلين بها هذي اخر مره حذرتج نوره ..

حط ايدي ع ذراعه: الا خوله لا تحرمني منها..
ابتسم يتطنز علي: بعد جم شهر توج ذكرتيهااا ..؟؟

رديت ابسرعه: كنت مقهوره من عمور علشان جي ما فكرت فيها بس هي ما يخصهاا "ترجيته"فارس ..
رجع و غمض اعيونه: لا اتأذيني لا يعني لا ..

شويه و بصيح: انزين ليش..

حسيت كل الي في الطياره سمععوني طالعني بنظرات عصبيه صكت عنه و يلست اطالع من الدريشه و انا ميته من القهر كان ودي اضربه اكسره علشان ابرد غيضي ها الانسان حرمني من كل شي ..

مسحت الدموع الي نزلت من عيوني ...انسان متحجر قلبه ...طالعت برع جفت الدنياا كأنها نقطه تروعت حسيت بدوار ..مديت ايدي ابسرعه و حضنت ايد فارس..طالعني متفاجأ مني حركتي جاف الخوف بعيوني ..
سالته: متى بنوصل ...؟؟

رد علي: حق شوه اطالعين برع دام انتي جي جبانه ...؟؟

قهرني رده و ها هالانسان ما عنده اسلوب ابد..الظاهر بعده متضايج من سالفه خوله..

سكت و نزلت راسي تميت ساكته ..اضم خوفي و اكتمه احسن من اذل عمري لها الحثاله ...عقبها وصلنا البحرين..ركبنا سياره وصلتنا الفندق كان الوقت متاخر ..

.كرهت حياتي ..كل شي يباله ساعه المطار و اتريي السياره كل شي ما صدقت وصلت الفندق اتغسلت .. و فريت روحي فوق الشبريه ...كنت اسمع فارس يرم خاله يخبره انا وصلنا بس ما سمعت باجي الرمسه لاني خلاص نمت ..

فتحت اعيوني بس رجعت و غمضتها لاني ما قدرت اقاوم اشعة الشمس الي ضربت اعيوني..صديت الصوب الثاني و فجيت اعيوني ..

.استغربت المكان عقب تذكرت اني في البحرين ..نشيت فارس مش موجود ..؟؟ وين رااح كانت الساعه 11 الضحى ..اكيد راح شغله ها ما يضيع وقت الحينه تعالي يا نوره اتريي ماشي شغله..

رحت صوب الدريشه يا روعة المكان خباااااااال ..البحر ابكل مكان الله روعه زين و الله موقع غرفتنا ممتاز ...يلست حوالي عشر دقايق اطالع المنظر برع ..

.سرت الحمام اتغسلت حسيت بطني يقرصني يوعااااااااااااانه فتحت الثلاجه الصغيره الموجوده في الممر ...شليت لي عصير ..يلست ع الكنبه اشرب عصيري ..

.اتذكرت كل شي دار بيني و بين فارس في الطياره..لاحظت اني امجرد ما اطري له اني ابا اتصل لاي حد من اهلي يحرج و يتعكر مزاجه...اونه يبا يحرمني منهم بنجوف لـ متى كل هاه ...

سمعت صوت الباب يوم ينفتح جفت فارس داش الحجرة ...شرف رجل الاعمال ...
ابتسم لي و ما كنت متوقعه ابتسامته: صباح الخير يا الكسوله ..

رديت من غير ما ابتسم : صباح النور ...

البارحه كان مزاجه زفت اجوفه اليوم مستانس يمكن نجح مشروعه بيوم واحد..يستوي و الله ...يلس ع الشبريه مجابلني : متى نشيتي ..

رديت من غير ما اطالعه اوني العب بالعصير : من شويه ... ..؟؟

ابتسم : البارحه امبين عليج كنتي وايد تعبانه ..الفتي مجلدات من القصص
استغربت من كلامه : انا ! ما احيدني ارمس و انا راقده..

هز جتوفه : عيل مدري منوه كان يسولف
سالته: شو قلت ..؟؟

فارس : وايد كلام مب مهم اصلا نصه ما فهمت مدري باي لغه كنتي ترمسين ..
طنشته فهمت انه قاعد يتمصخر علي فغيرت الموضوع : انت شو سويت الصبح ..؟؟

رد علي : ماشي طلعت اتمشى برع ما ياني رقاد مع اني تعبااااااان حسيت انج بطولين فطلعت اتمشى ..
طالعته جفته يطالعني اتلومت فنشيت اوني افر العصير بس الصراحه كنت اهرب من نظراته ..
قلته: ع بالي طلعت اتجوف شغلك..

فارس : مب اليوم باجر ليش مستعيله ...تبين الفكه مني شوه ..؟؟\

طالعته وقفت ابمكاني ما ابا ايلس جريب منه و يقعد يطالعني ما اباااااه : شو الفرق بتم كل الوقت ابروحي انت ياي علشان الشغل بس ..
اشر للكرسي الي كنت يالسه فيه : تعالي يلسي هني ...

تجدمت كأني ما صدقت قالي قعدت زخ ايدي قعد يلعب باصابعي حسيت بنار فـ خدودي مدري شو صابني كنت ابا ايير ايدي من ايده و بـ نفس الوقت كان عايبني الوضع سالني من غير ما يطالعني : يوعانه ..؟؟
رديت له : توني شاربه عصير ...؟؟

طالعني و ابتسم : اونج بس شبعتي احيدج اكوله ..
شهقت : انا الأكوله الحينه ولا انته نسيت شوه ..

ضحك: ههههه شو ذكريني ..؟؟
رديت عليه : كنت بتذبحني بس علشان اسوي لك ريوق ولا غدا ولا عشى ..
انكر : انا متىىىىىىىىى

ضربته بجتفه ابكس : اونك يا الجذاب ..

فارس : هههههههه انتي الي كنتي اتصيحين تبين اتروحين المطعم علشان تاكلين قولي بعد جذاب..
رديت بانفعال : و الله انك جذاب ..

فارس : هههههههههه

حسيته به مستانس و صج نفسيته تغيرت ..دام انه مستانس حق شوه اضايج ابعمري انااا خليني استانس شراته ..حلال عليه و حرام عليه و الله ..

فارس : ليش تبتسمين ..؟؟
نوره : ع خبالك ..

وقف وسحب ايدي فوقفت معاه : انتي الخبال و الله انج عذااب "تغيرت نبرة صوته" خبلتي فيني ...

كلماته خلت الدنيا اتدور فيني فارس مينون ولا فيه حالاات انفصام الشخصيه ..شو قصده انا خبلت فيه ..
يير خشمي فصرخت : لا اطالعيني بها النظرات تراني ما اتحمل ..

شهقت : عورتني بتجلع خشمي ..بتخليني من دون خشم ..

فارس : ههههههههه بتكونين احلى ..و انتي شو بتسوين فيني
رديت : انا !!
فارس : هيه انا بجلع خشمج علشان اخليج احلى ..

طالعت المنظره : ليش خشمي مب حلو !!! "طالعته " قول و الله ..
فارس : هههههههههه موليه مب شي..

ابتسمت له: انت غيران مني لاني احلى عنك ...

فارس : شووووه انتي احلى عني ..تعالي تعالي انجوف فـ المنظره منوه احلى ..
ييرني صوب التسريحه طالعنا المنظره جنا خبال فارس: يالله منوه احلى انا و الا انتي ..

نوره: زين نزل راسك يا الطويل
فارس: اركبي الكرسي انتي قصيره ..

نوره: هههههههه انا قصيره جوفي ويهي ابكبره ظاهره في المنظره و انت مب ظاهر منك شي غير حلجك"حطيت ايدي ع راسه" نزل هالطبر ..

فارس هز راسه: اييه لا اتخربين شعري شو غيرانه منه ..
نوره: هههههههههه بس بها الشي انت احسن عني شعرك انعم ..

رفع خصله من شعري: بذمتج ها شعر بنيه الحينه..
ضربته بيده : شيل يدك عن شعري يا المحتر ..

فارس: هههههه انا محتر ..زين اعترفي اني احلى عنج ..

نوره: انا احلى عنك "وطلعت له لساني" عمرك ما بتوصل لـ جمالي..
فارس: عداااااااااااال شعرج شعرج الحلـو ..

رحت بعيد عنه : احلى عن شعرك.. البنات يروحن الصالونات بس علشان يسون شرات شعري بس انا طبيعي
فارس : ههههههههههههههههههه يا حافظ ..

فارس غير ..؟؟البارحه غير .. و الحينه غير !! انا مب مصدقه الي جدامي ها فارس اول مره جي يندمج معاي و يضحك من خاطره ع تعليقاتي بالاول كان يتطنز علي و الحينه مستانس يمكن الجو او المكان ما ادري ..جفته جريب مني ما حسيت بقربه مني ..

سالني : شو بلاج ..؟؟

صديت عنه اطالع برع: ماشي ..
لفني صوبه و حضن ويهي بايده : ليش صخيتي فجاه شو صابج ..؟؟

تاملت ويهه مب شعره بس الي احلى عنه رموشه خبال ابتسمت له لاني ما ابا اخرب وناستنا خاصه هاليوم عقبها بنشغل باعماله حسيت ويهي صار حار تحت ايده رفعت ايدي

ومررت صبعي ع رموشه : رموش البنات
غمض عينه استانست لاني خذت راحتي اتامله : يوم كنت صغير كنت اقصها لان عمور و قوم حميد و خليفه يعايبون علي رموش البنات ..كنت كل اقصها عشان جي طولت زياده و صارت كثيفه .."شلت ايدي ابسرعه يوم بطل اعيونه " و الحينه انتي اتعايبني علي..

ضحكت له: لا بالعكس وايد حلوه كل البشر يتمنون اتكون رموشهم جي ..
سالني بنبره عيبتني : انتي بعد..

هزيت راسي بمعنى نعم ..حسيت اني منحرجه كنت ابا اغير الموضوع علشان اطلع بالدوامه الي انا فيها فسالته: عيل انا ما اعرف سالفة رموش البنات يوم كانوا يعايبون عليك ..قوم عمور ..

هز كتفه : هذا ها انتي عرفتي ..
اتنهدت:ايام ما كنا صغار ايااااام روعه بس الحينه كل شي تغير "ابتسمت له "صح ....؟؟

ما رد الابتسامه اختفى كل شي حلو بينا..و كأني صج قدرت اطلع من الدوامه الي انا فيها ..لان جفته فجاه ابتعد عني ..شل فودته و هو رايح الحمام من غير ما يطالعني قالي : اتزهبي بنطلع نتغدا برع ..

صكر باب الحمام يلست ع الشبريه اطالع الفراغ انا كنت بحلم ولا شوه..ليش جي انجلب فجاه انا شو قلته عشان تضايج !!..؟؟

انا عشت مع فارس فتره جربت شخصيته بكل الاوقات..عمري ما توقعت اني بحب اللحظات الي يكون فيها مسانس و مزاجه اوكى ..بس للاسف ابسرعه ينجلب ..الظاهر بتم طوال عمرنا جي نضحك و نستانس دقايق و نرجع شرات اول ساعات ..

ااااه يا قلبي مالك غير الصبر ..تحمل و تحمل بس مدري لي متى ..؟؟ لي ما يمل مني فارس و يقرر ينهي انتقامه مني خلاص بعد ما يدمرني و يحطمني و هو ما عنده خبر اني خلاص صرت تايهه و محطمه من عشت معاه في شقه وحده و غرفه وحده ..


.,’،:؛"(( الحـلقــــــــة الرابــــــــعة و العــــشــــــــرون))":‘،’,.


ادري في قلبك كلام ودك تقوله..ادري فيك وانا معاك تشتاق وتوله....ودي اسمع كلمه منك فيها نور عمري..ودي اسمع انا احبك..قول خل ليالي الشوق تجيني..قول خل تطير الدنيا فيني...يللي كلمه وحده منك ترسم الدنيا بعيوني"

خلصنا غدا في احد مطاعم المراكز ...عقبها طلعنا نتمشى برع ...فـ السياره الي اجرهااا ...الظاهر ان فارس متعود ايي البحرين لانه دلني ع اماكن وايد .. وحلوه بعد ..

وقفنا صوب البحر ...رن موبايله ...قعد يسولف ..الظاهر كان منصور ريل زينب ...اشرت له اني بنزل ..من السياره ..هز راسه انه موافق ..فجيت باب السياره و نزلت ...

حسيت الهواء يضرب خدودي الله روعه الجـو الظاهر الشتا ع الابواب ..حسيت برجفه بريولي وين زلالالالالالالاغاتي بشتري لي واحد ..من الحينه..

طالعت وراي جفت فارس يطالعني و بعد يرمس بالتلفون ابتسم لي ...تدرون ما كنت ادري اذا يبتسم لي انا او لـ منصور ..صديت من غير ما ابتسم له..اطالع صوب الصياديين تذكرت خالي احمد..علني فداااه ..؟؟اتنهدت ع ايام زمان آآآآآه حنيت لها ابصراحه ..
.فاجاني فارس : ليش تتنهدين ..؟؟
طالعته: تذكرت شي ..
وقف حذالي يطالع البحر : شو تذكرتي ..؟؟؟
اتجدمت كنت ابا ابعد عنه : مب مهم ..

ييرني من ذراعي و خلني اوااايهه : جذاب ..لو ما كان مهم حق شو تنهدتي ..
اشرت له مكان الصياديين : هناك ما يذكرك بشيء ..؟؟
طالع و رجع طالعني : منوه !!

ابتسم له : خالي احمد ...؟؟
رجع و طالع صوب الصياديين : قصدج ايام ما كان يروح البحر..

رديت له: هيه و للحين يروح صح ...
ما رد علي طالع البحر..يا ربي كل ما بكلمه عن اهلي ينجلب حاله ..

بلعت ريجي كنت ابا ارضى فضولي : متى اتروح راس الخيمه ..انا ما لحظت انك اتروح ..؟؟
رد علي : اروح بس اسلم و ارجع ..
سالته: متى هاه ..

رد علي بانفعال دهشتني : ما يخصج .. قلتلج انسي راس الخيمه ولا اتمين تقعدين تسالين كل شويه عنهم ..
رد عليه بعصبيه: اسال عن اهلي انا ...مب كافي حارمني منهم بعد ما تباني اعرف اخبارهم..؟؟
حرج علي : ما بتعرفين شي انتي اصلا خلاص ما بقى لج حد في الدنيا ..عادي لو افرج هني و ارجع دار زايد بجوف كيف بتوصلين لهم ..

حسيت برجفه هزت جسمي ..شو يهددني ..حطيت ايدي ع رقبتي و كأنه كلامه خنقني ..شو يتحرا عمره نحن باي سنه عايشين علشان يسوي جي ...بس تدرون وايد خفت من فارس وايد ..ما رحمني كمل طعونه لي و قال : ع بالج بتهونين علي ..حرمتيني من ابوي و اخواني و تبيني ارحمج..

ماله داعي هالرمسه..اكرررهك فارس كل ما تقدمنا خطوه بعلاقتنا نرجع عشر خطوات ..رجعت السياره ابسرعه ..و كأني خايفه انه ينفذ تهديده..يالله اشكثر حاقد علي ..يلست اصيح ابصوت عالي الحينه شو الي صار عشان يتغير كل شي فجأة ...

معقوله ها فارس الي من ساعات كان يضحك و يسولف معاي ...الحينه فهمت يوم يقول خبلتي فيني و عذبتيني علشان حرمته من اهله و انا شو يخصني محد قاله يسود ويه خالي احمد ..حاولت اسكت روحي بس ما قدرت فيلست اشاهق من كثر الصياح ..

.فتح باب السياره صديت اطالع برع ...انا علشان ارتاح لازم جدام فارس ابد ما اطري راس الخيمه ولا اهلي بس ما اقدر ما اقدر ...ما يحس فيني ها الحثاله ...

حرك السياره من غير ما يقول أي كلمه ...يلست اطالع شوارع البحرين ..ما كنت اعرف اذا كان طريجنا الفندق اولا ...وقف السياره ابمكان .. و نزل راقبته جفته طالع من المحل و بيده آيس كريم ..ركب السياره .

.و مد ايده : خذي هاه طعمه لذيذ..

اونه ولا جنه من شويه مصرخ علي ابكل برود يعطيني ايس كريم شو يتحراني لعبه بايده ..
صديت عنه : ما ابا ..

فارس: بعيبج طعمه صدقيني كل مره بتطلبينه و انا بقولج اووووه مقدر اروح اشتريلج ..؟؟

تميت صاده عنه ما ارد عليه ...انجلع انت و ايس كريمك صج ويهك لوح ..لا بعد قاعد ينكت ..حطيت الايس كريم و زخ لحيتي خلني اطالعه و قاللي بنره طيرت عقلي : لا تضايجي مني نوره ..

ما عرفت شو ارد عليه ..تهت ما بين نظرات عيونه و بين نبرات صوته و كأن افكاري وكل شي فيني تشلل
فارس : زين انا اسـف ..لازم اتعلـم امسك اعصابي و ما احرج عليج..بس انتي تجبريني ع هالشيء

قلته: و ما تجرحني في الرمسه..
ابتسم: و ما بجرحج

شلت ايده من ع ويهي و تميت زاختنها : قول وعـد ..؟؟
يير ايده: لا عاد ها الطلب وايد عود و انا ما اضمن روحـي ..

نوره: ع الاقـل اتحـاول
شل الايس كريم: بالاول خذي هاه ..

ضميت ايدي : اول قول وعـد ..
ضحك: هههههه يا الياهل ..وعد اوعدج زين..

سالته: توعدني بشوه..
فارس طفران: يالله عاد ذليتيني ..

صديت برع : ما يخصني ...
سمعته يضحك:هههههههه زين اوعدج اني احاول موليه ما اجرحج بالكلام زين جي..

طالعته و ابتسمت له: وايــــــــــد زين..عطني ايس كريمي ..
فارس : اندوج هفيه كله..
نوره: هههههههه صل ع النبي ....

بها اليوم ما رجعنا الا باخر الليل ...كنا كل اندور في الشوارع و امر ع المراكز ..اقترح علي انروح السينما بس انا ما رضيت لان بحياتي ما دشيتها و ما افكر ادشها زين انه احترم قراري ..

و بعد ما اصر ..
يلست اطالع التلفزيون من ظهر من الحمام : انت باجر متى بتنش من الرقاد الوقت متاخر ..
طالعني : ليش ..؟؟

نوره: شو ليش ما اتجوف الوقت متاخر باجر لازم اتنش من الصبح..
فر روحه ع الشبريه قال بكسل: يولي الشغل ..انا تعبان ابا ارقد..
ابتسمت له: عيل انت حق شو ياي هني..
لف يبهته بذراعه : شكلي ما بسوي شي
شهقت: ليش ..؟؟ اتقول جي..

رفه ذراعه و طالعني و ابتسم : لانج انتي معاي ..شكلي بنسى الشغل..
ابتسامته ردت الروح فيني : عيل اكيد ندمت انك يبتني معاك..

فارس: و الله مب ندمان بالعكس ..ابرايه اذا ما سويت شي بنطرش منصور ..
نوره: مسكين منصور
فارس: هههههههه بس ما بطرش معاه زينب وميود يمكن بعد ينسى الشغل ولا يتكاسل عنه مثل ما سويتي فيني..

مدري شو كان يقصد ابجلامه بس تدرون استانست مدري ليش
سالته: زين شي وقت ...؟؟اليوم اول يوم لنا.
اشر ع الشبريه: تعالي ارقدي بسج رمسه.. و بعد انا حاط فـ بالي بنقعد ثلاثة تيام..
رديت : بس !!

فارس: عندي اشغال قد شعر راسي في بوظبي
نوره: انا ع بالي اسبوع ..

طالعني بنظراته الشيطانيه ..لالا مب شيطانيه نظرات عذاب عذبت كل شي ينبض فيني سمعته يقول لي
فارس: و الله يا نوره لو تبين اتمين اسبوع بنتم.. و جان تبين انروح اوربااا بعد مستعد من باجر احجز بس مقابل شي..

رديت ابسرعه : شوه ..؟؟
فارس ابتسم و اشر ع شعري : عدلي ها الكشه بديت اتروع منها..

حطيت ايدي ابسرعه ع شعري اوني اعدله جفته يضحك علي شليت المخده فريته : يا البايخ ...
نشيت ع صلاة الفير ..صليت .. حاولت اقوم فارس نش صل انسدحت ع الشبريه اطالعه قاعد يعدل اوراقه ...لمحني :ما رقدتي..؟؟

ابتسمت له : لا اراقبك شو قاعد اتسوي ..؟؟
اتنهد: ارتب هالاوراق شكلي بروح اليوم اجوف شغلي جم الساعه..
طالعت الساعه : بعدها خمس الفير ...

فارس: قولي و الله ع بالي سبع
نوره: هههههههه ما اتجوف الدنيا بعدها امظلمه ..

فر الاوراق من ايده : زين بعد قوميني الساعه سبع..

انسدح ع الشبريه و غمض اعيونه هزيته: قوم ما بقى شي ع الساعه سبع ..انا برقد ..قوووووم
لا حياة لمن تنادي ما صدق انخمد...انخمد معااه .. و ما قمنا الا ع الساعه 4 العصر ...

حسيت ابفارس يلعب باصابع اريولي ..بطلت اعيوني بكسل ابتسم لي : صباح العصر ...؟؟
ما تحملت لمت اصابعه ع ريولي رفسته: خوز برقد ..
يير اللحاف عني: ما تشبعين رقاد الساعه 4 العصر..
عفدت : جذااااااب

فارس: هههههههه و الله ...قومي قومي بدلي ميت يوع ...
نشيت اتغسلت ابسرعه و صليت الظهر و عقب العصر ...بعد ما لبست و خلصت..كنت احس ابفارس يراقبني بكل حركه كنت اسويها بس حاولت اطنش علشان ما ارتبك .

.و في السياره سالته: رحت الشغل..
فارس: يوم انتي معاي ..بنفلس باذن الله..

نوره: ههههههههههه "ضربته ع جتفه" اونك ..حتى انت ..يوم معاي مب مصليه باوقاتي ..انا عمري ما جمعت بين صلاتين..
اتنهد: فديييييييتج
طالعته مستغربه فارس تفداني ولا انا ابروحي تهيأ لي ...!! صديت اطالع برع
سالني: وين تبين تتغدين..؟؟

طالعته: شدراني ..أي مكان يعيبك..
فارس: زين اذكر مره دشيت مطعم طباخه ازقرت ..

سالته: ابروحك..؟؟
رد علي: لا انا و مها و ريلها و اهله..

اهله منوه يقصد باهله ...سمعته يكمل: كنا يايين انغير جو بس قعدنا اسبوع و ردينا ...
سالته: عليا كانت معاكم..
رد من غير ما يطالعني: هي ..ليش سالتي عنهااا ..

رديت ابسرعه : لاني اكرهها ما ادانيها..
طالعني مستغرب:شو سوت فيج..
نوره: كيفي ما احبهااا ...شو مب عايبنك..؟؟

رد ابسرعه حسيت انه يتمصخر علي: لا و الله انتي كيفج اتحبين الي تحبينه مع اني اشك اذا اتعرفين اتحبين ..؟؟

طالعته: شو قصدك ..
رد و كأنه مل من السالفه: ماشي..

نوره: امبلى شي ..بس تذكر البارحه وعدتني..

طالعني: بتصخين انتي ولا اففففففف اسميج حشريه خليني اتذكر المكان ..
نوره: انا حشريه..يعني انت وعودك كلها اخرطي..

طالعني خفت منه بس ما كان امعصب: صخي شويه نوره..شوفيج..
قلته: باول قول عليا الحشريه مب انتي..

قعد يتصدد يمين و شمال و جنه محتار باي شارع يروح : انتي مب علياا ..
صرخت عليه: فارس ..
طالعني: انتي ما بتسكتين يعني ...

رديت بانفعال: ليش ادافع عنها اعترف..
فارس: هذا الشاره ايوه و عقب اللفه بيكون المطعم صح صح..

هزيته من ذراعه: ايه انا ارمسك ليش امطنشني..
طالعني مستغرب: شو انتي واحد ترمسين بهالاسلوب ..؟؟؟!!
نوره: هي انا واحد يالله قول عليا الحشريه ..
ابتسم و كأنه يغايضني: انتي الحشريه..صخي بندعم بسببج..
قهرني: انا حشريه ..يا المناف........

طالعني بنظرات بس هالمره روعتني بلعت ريجي ابسرعه و قلت ادافع عن عمري: اذا وعد اخلف..
فارس: صخي ..عني

نوره: ما بسكت شو بتسوي..
فارس و كأنه يهددني : ما بتسكتين...

هزيت راسي بمعنى لا ..
فارس: متاكده..
هزيت راسي بمعنى نعم..
عفد علي ولف رقبتي بذراعي و سحبني صوبه و نزل راسي ع ركبه حسيت اني بموت بختنق يلست اضربه بايده صرخت: بس بسسسسسسكت هدني بموووووت

شل اذرااعه رفعت راسي اتنفس بصعوبه فارس: خيبه استويتي حمره ..كنتي بتموتين شوه ههههههههههه
ضربته بركبته : تستهبل
فارس: بعد ما بتسكتين انتي..

صرخت عليه: بسكت بسكت هاه "وحطيت ايده ع حلجي و صديت عنه اطالع برع "
فارس : ههههههههههه يا الياهل ..

وصلنا المطعم.. ما جذب فارس طعم الاكل لذيذ..كلت لي ما حسيت اني بنطر..
نوره: انا بستوي بوتمبه ابسببك

فارس: ابرايه كل شي عليج حلو ..
نوره: اونك ..

ها المره اشتريت كذا شغله حق زينب وولدها باول ما بغيت اشتري لـ مها بس ما كنت ابا اضايج فارس.. يا حلاته و هو رايق ..ابصراحه استانست معاه وايد تمنيت ان الدقايق ما اتمر..طالعته جفت تقاسيم ويهه ..كنت ادري اني مع غير فارس مستحيل اعيش ....

هاليومين بس اكتشفت ان كل ها الاحاسيس و المشاعر الي احس بها صوب فارس ما هي الا الحب ..حب !!..انا احب !! احب منوه ..فارس يا ويلي حالي ..


احس حطيت نفسي ..امكان ما اقدر اطلع عنه..فارس امجرد ما يحس انه قضى علي خلاص ..بهدني..ما سويت حساب لاي شي ..كل الي عرفته صار غصبن عليه و علي اموت به و اعشقه ...

بهذاك اليوم ..تميت حزينه خايفه افكار تاخذني و اتييبني..ما عرفت شسوي ..بس كنت خايفه و اسال نفسي متى بيي اليوم الي فارس بودرني....

من اكتشفت اني صرت اسيره فارس انجلب حالي...من عرفت ان حبي له واقع و فرض نفسه علي..تهت في هالعالم حسيت بالضياع..كنت احس مع فارس بالحب و بنفس الوقت بالكره .. و احس معاه بالامان بس بعد بنفس الوقت بالخوف..

دش علي ..كنت اطالع البحر من الدريشه ...ما صديت له ولا اهتميت ..ياني احساس ان طاحت عيني بعينه بقعد اصيح...بس ليش اصيح و حق شو و الله مدري ..
حسيت بخطواته ياي صوبي ...وقف وراي : نوره شو فيج ..؟؟
كنت بقوله انت سبب عذابي ..بس سكت عنه ....................؟؟
هزني بجتفي : ارمسج انا ..
همست: ماشي ..

سالني: تبين تردين الدار ..مليتي مني..
بلعت ريجي ها شو اقوله الحينه ..؟؟ بعد سكت و ما رديت ..
همس باسمي: نوره شو بلاج..

خاطري اصرخ بويهه و اقوله اكتشفت اني احبك و انا ما اباا احبك لاني حبيتك ولا بغضتك نفس الشي ما بفرق عندك بس بتعذبني ..زخ ايدي و لفني اوايهه قالي : طالعيني..زين..

دزيته سرت عنه بعيد صرخت: ما ابااا انا ما اباك..
طالعني مستغرب حسيت بنفسي صرت هبله ولا مينونه ..

فارس: ليش شو الي تغير ...كنا مستانسين..

يا الله كلامه يعذبني ..سمعته يقول : زين باجر بنرجع الامارات اتحمليني ها اليوم بس ..
ها الغبي ما يفهمني ..يلست ع الكنبه و اصيح منهاره ..

.قعد حذالي و زخ ايدي ..ما قال لي شي بس كان يسمع صوت صياحي و جنه عايبنه ..تمنيت اني ارد نوره نوره ليتكم تعرفون شو اقصد ليتكم تفهموني .

.ابا ارجع نوره القويه..اياام ما كنت عايشه في راس الخيمه ..فارس من خذني حطمني غير كل شي في حياتي جلب كل شي فيني و اخر شي شو صار ..احبه و الحينه زااخ ايدي و قاعد يلعب باصابعي شو ها الظروف الي خلتنا نوصل جي ..رصيت ع ايده من غير ما اقصد ..بس انا احبه ..

قعد يمسح ع شعري و كأنه يخفف عني : زين انا اسف اذا ضايجتج بشي
همست بعذاب : فارس لا اتسوي فيني جي ..

سالني : نوره انتي مرتاحه معاي ..؟؟
هزيت راسي بمعنى نعم و طالعته : ابا اتم معاك ع طول جي مرتاحه

فارس: علشان جي متضايجه صح..
صديت عنه ما عرفت شو اقوله كمل كلامه: تظنين ان كل شي بنتهى اذا رجعنا الامارات ...
زخني من لحيتي وجبرني اطالعه: جاوبيني ..

رديت باستسلام: هي هي ..
كرهت اني اكون ضعيفه و خاصه مع فارس بس للاسف ها الي يصير ...توقعته بضمني له و بقولي احبج و مستحيل اذييج..بس فاجاني يوم وقف و راااح بعيد عني حسيت ان قلبي تقطع ..
فارس : لبسي علشان بنظهر ..؟؟

طالعته مستغربه هالانسان من شو مخلوق ما يحس ...

مسحت دموعي و انا كارهه كل شي صار من بينا ..كان المفروض اثبت له انه ما قدر ينتقم مني .او يحطمني .بس كيف اثبت له و قلبي و كل شي فيني ينبض خانوني ووقفوا معاه..
سالته: وين بنروح...؟؟

فارس: أي مكان
بدلت ملابسي و لبست عبايتي ..حتى انا كنت احس اني مخنوقه و ابا اطلع اشم هواااا حتى لو كان مع فارس ..نزلنا في حديقه و كانت الدنيا امظلمه و شي ناس في الحديقه بس مب وايد..

.نزلنا نتمشى..زخ ايدي ..
طالعته: احس الجو بدا يشتي..؟؟
فارس: صح انزين..بردانه شوه ..؟؟

نوره: شويه ..لازم اشتري لي زلاغات..
فارس: حق شوه..؟؟
نوره: علشان البرد ما ارقد من دون زلاغ

فارس: ههههههههه يا العيوز..
نوره: ما اتحمل البرد اتصدق اني اني البس كوت ..
فارس : بعد...

نوره: ههههههههه البس كوت عمور دوم يدفيني ها الاخضر مال الجيش..
فارس : ذكيه..

دزيته: شو قاعد تتمصخر علي..

فارس: هههههههه حشى و الله ...بس ادري انج تلبس ملابس عمور..

رفعت حياتي مستغربه: مستحيل عمور يخبرك..صح انه يتحرا ربعه كلهن خواني يزقرني و يسولف معاي جدامهم بس مب لها الدرجه
فارس: لا لا لا ..يحليله عمور دوم تظلمينه ...

لصقت فيه من غير ما اقصد : عيل كيف عرفت...
كنت ببتعد بس زخني من ذراعي و كانه ما يباني ابعد عنه : اممممممم عرفت بطريقتي الخاصه ..
نوره: بصدقك لانك ساحر..

فارس: شكرا..
نوره: صج كيف عرفت..؟؟

فارس: مره عمور خذ الجاكيتي ...و يوم رجعه لي جفت فيه شعره ملتويه شرات البلاليط..
نوره: اونك..
فارس: و الله ..انتي كنتي لابستنه صح..!!
نوره: هييييي صح تذكرت ..ابيه جفت شعره من شعري..

فارس : هي شرات البلاليط..
نوره: لا تستخف دمك من زين شعرك..

فارس: ههههههههه تتحدين..
مدري ليش خطر ع بالي عمور ..وقفت ابمكاني اتريا فارس اييب العصيرالطازخ الي طلبه لنااا ..
ناولني فقلته: شكرا..
فارس: عفوا..

سالته: فارس اترمس عمور ..
رد من غير ما يطالعني: هي باستمرار ..
سالته: شخباره..؟؟

فارس: تفيجتي بعد شهور تسالين عنه ..
قلته: ليش الي سواه فيني شويه ..

شرب شويه من عصيره : شي و انتهى ..
فارس: خوله حامل.

شهقت من الوناسه : و الله الحمدلله الحمدلله ...فديتها خوله يا رب تسعدها دوووووم
فارس : شو بلاج ...عن تتخبلين بس شوي شوي بعمرج..

نوره : ما تدري اشكثر ونستني ..
فارس: عسى دوم ..

نوره: ههههههههه و الله ايام. كنت اتجاتل مع عمور علشان يخطب خوله.. و الحينه خولوه حامل ..الله يعوضها خير يا رب ...
فارس ساكت ........................"ماشي رد"

نوره: و الله يا عمور ما تسوى ظفر خوله...الحيوان..
فارس: بعدج حاقده عليه..

نوره: ع بالك بنسى ..
فارس: ادريبج ...قلبج جاسي..

سكت لاني حسيت ان فارس بدااا يجلب علي ...ليش نسى الي سوا فيني عمور قص علي
طالعته: حتتى انت قصيت علي...خدعتوني ..انا ادري ان عمور ما
صرق منك..شي
يلس ع الكرسي الجريب منا و فيلست حذاله ...
كملت كلامي: انا ادري ادري ان ما عندك شركات سيارات ..

و عمور ما صرقك..بس سويتي سالفه اوراق و تواقيع و شرطه ...صح..
رد ابكل برود: صح ...توج بس اكتشفتي..

كان يستفزني : ع بالكم بطوف علي لعبتكم..

طالعني و ابتسم : طافت عليج خلاص و الدليل انج انتي معايه الحينه ...

كرهت نظرات الانتصار الي بانت في عيونه ..صديت عنه كنت بسبه بس غيرت رايي يلست اراقب شلت يهال يلعبون بالكره جريب منااا ...

سالته من غير ما اطالعه: عمور يدري اني اكرهك موت ..ليش سوا جي..

فارس: يبا يضمن و يأمن مستقبلج وهو بعيد عنج مثل ما انت كنتي مهتمه به و تبين تزوجينه خوله ..
رد عليه بحده: شي فرق بيني و بينك و بين عمور و خوله ...

كلمني بصوت واطي بس نبرة تهديد: لا اطولين صوتج علي
صديت اطالع اليهال مره ثانيه ..ييت الكره صوبنا..ركض الياهل و شل الكره الي طاحت جريب من ارولي ابتسمت له ..رد الابتسامه و ركض صوب ربعه ...

فاجأني فارس بسؤاله : بعدج تكرهيني ..
رديت ابسرعه و بغباء : هي اكثر عن اول ..
فارس: هههههههههه جذابه ردج يثب لي العكس..

طالعته: لا اتصدق روحك اني ميته فيك.
تجدم مني و لصق فيني قلته: وخر عني انت ما تستحي العالم بجوفنا..

فارس: و شو يعني انتي زوجتي ..
تطنزت عليه: يا ساتر ..

فارس: اتمصخري ع كيفج.."زخ ايدي" تكرهيني
نبرة صوته جلبت و غيرت الجو الي كان بينا حسيت اني متلومه منه ..عكس قبل دقايق كنت محرجه منه ..
يير ايدي: تكرهيني وايد ..؟؟

هزيت راسي بمعنى لا ..مدري ليش سويت جي بس ما قدرت امنع روحي..
فارس: اشكثر يعني ..؟؟

طلعته : كثرك ..نفس شعورك بالضبط..
فارس: ما فهمت !!
نوره: ولا انا ..

فارس: زين قولي انج ما بتهديني موليه..

ها مينون انا الي خايفه انه يهدني و كنت اصيح من ساعه .

.و الحينه هو يطلب مني هالشيء ...طالعته ..عيونه نظراته خبال ها فارس ناوي يقضي علي صديت ابسرعه عنه ووقفت :يالله انروح تاخرنا..
وقف جريب مني : بالاول قولي انج ما بتهدين..

قلته ابسرعه: انا ما اقدر اهدك ما اقدر يا المينون ..
مشيت ابسرعه ..

هبله غبيه عبيطه ليش قلته جي الحينه بذلني ع هالكلمتين..بس بلاعكس تم ساكت و بدور سكت ...لي ما وصلنا الفندق ..



.,’:"؛(( الحــــــــلقـــــــة الـــــخــــامســـــة و العشـــــــــــروون ))؛‘":.,،

""وممنوع .....مد الخطاوي وعاود يا خلّي إبساع ...في خافقي صار حبّـك يالزّين مطبوع ..الحب بيني وبينك مكشوف القناع ..يعطي البراهين ما بين آهات و دموع..""

وصلنا مطار بوظبي بعد صلاة المغرب ...اقترح لي انروح بيت خاله حسن بس قلته لو نرجع الشقه انغير و نتغسل و عقب انروح لهم ع وقت العشى ...

الحمدلله انه اقتنع بكلامي ..زين منه اول مره يشاورني فـ شي ...كانت سياره تتريانا الظاهر دريول قوم منصور ...

سالته: ع بالي بستقبلونا..
فارس: حق شو اربعة تياام الا هي ...بس انا في بالي شي ثاني ..
طالعته: شوه ..؟؟

ابتسم : منصور الحينه جان بيصيح و بسوي لي حفله ..
استغربت: ليش ..؟؟

رفع شنطة الاوراق الصغيره و ضحك: ههههههههههه مثل ما خذتها رديتها ..ع باله سويت شي ..
نوره: هههههههههه اتخيل شكله..
فارس: لا لو اجوفينه بتضحكين ...

وصلنا الشقه..طلعت الاغراض من الشنط لي ما فارس يتسبح ..عقب ما خلص رحت اسبح ...طلعت من الحجره سمعته يرمس بالتلفون .. و شكله كان متضايج ...ادري الي بسويه غلط بس كنت ابا اعرف يرمس منوه ..؟؟منو هاه الي مخلنه متضايج جي ..؟؟؟

فارس: زين اسمعيني ..؟عطيني فرصه ارمس ...........ها بدال ما اتقولين الحمدلله ع السلامه .............خلاص انسي نوره صارت زوجتي و انا مستحيل افرط فيها ..

ما اتخيلون كيف اوصف لكم شعوري ..يا الله كيف الواحد يقدر يعبر عن شعوره..فارس قال ما يبا يفرط فيني ..يا ويل حالي فارس يباني ...حطيت ايدي ع حلجي امنع ضحكتي ان توصل لـ فارس ..ما فيني يجوفوني و يجلب الدنيا ع راسي ...سمعته يرمس

فارس : مهااااااااااااا لا اتخليني اعصب عليج اوكى ........................عليا !! عليا انتوا الي خطبتوها لي و كنتوا تدرون اني ما افكر فيها ......

دار راسي فارس ما يحب عليا ..فارس يحبني..منوه طلع عليا جدامه ..هاي الحقيره ليش متصلبه به الحينه اتنكد عليه اكيد لانها غيرانه كنت مع فارس برع زيييييييييين ها ريلي ..

بس حسيت براحه حطيت ايدي ع قلبي مستانسه رجعت لورا كنت بطيح بس اتساندت فـ الباب ..سمع فارس صوت الباب ..فسمعته يقول ..

فارس: زين عقب بنرمس .............مها عقب برمسج يالله في امان الله ..

سرت له الصاله اوني ظاهره من الحجره ..الظاهر انه صكر التلفون بويها ..حطيت عيني بعيونه ابتسمت له من الخاطر فارس اتحبني عيل ليش ما اتبين طالعني من غير ما يرد الابتسامه تميت واقفه ابمكاني
سالته: شو بلاك ..؟؟

اشر ع الكرسي الجريب منه : ماشي تعالي يلسي

مشيت و يلست ع الكرسي الي اشر له استهبلت عليه: كنت ترمس بالتلفون ..؟؟
اتنهد: هي
ابتسمت اوني انكت عليه: اكيد منصور ههههههههههههههههه

فارس: لا مب منصور "زخ ايدي و قعد يلعب باصابعي كنت اطالعه الظاهر وايد يعز مهاا ولا ما انجلب جي حاله مدري شو يحب فيهااا "

سالته: فارس شو فيك متضايج..
رد من غير نفس: مب متضايج بس ما ابا ارمس ..في شي..

قلته: ما بتروح بيت خالك ..؟؟
رد بنفس النبره: امبلى ..

كنت بساله متى انزين بس غيرت رايي يوم جفته ماله نفس يرمس يلست اطالعه هو يلعب باصابعي يا ربي ما تحرمني من ها الانسان يا الله مالي غيره في الدنيا ..ابيع الدنيا كلها فدوه لعيونه ...

مدري ياني شعور غريب غطيت ايدي اليسار ع ايده الي كانت زاخه ايدي طالعني مستغرب ابتسمت له كنت عارفه انه بستغرب من حركتي قلته: شكلك وايد متضايج ..عشاني لا تضايج ..؟؟

سمعته يقول و بعده مستغرب : نوره اناا...........

بس سكت كان نفسي اعرف شو كان يبا يقول اكيد كان بيقول احبج اكيد سالته ابسرعه \
نوره: انت شو فارس ..

بس فجاه وقف و ابتعدت ايدي عن ايده تميت يالسه ابمكاني مستغربه من موقفه ..رفعت راسي اطالعه ..
كنت بساله : فارس ...؟؟

قاطعني: زهبي روحج بنروح بيت خالي..

وقفت مب كل مره يسوي فيني جي..مب كل مره يعيشني بعالم جميل ورعه و اخرتها يبدد كل شي و يروح عني و يخليني وحيده يعذبني معقوله للحين مب رايم ينسى ان ابوه راغه اببسبي عيل انا ليش نسيت شو الي سوااه من زمان و حق شو خالي احمد رااغه ..بلعت ريجي ...