كاتب الموضوع :
زهرةالصبار
المنتدى :
القصص المكتمله
(( الحلقـــــــــــــــة الـــــــــثاااااالـــــــــثة ..))
"من يوم وادعت زولك و القلب ملتاع ..للحب سلطان أمره مقضي ومسموع
لا يشغلك قول واشي .. القول خدّاع ما في دروب المحبة حاجز وممنوع"
اتجدمت من خلود و حميد..ارتبكت يوم جفت حميد ما خوز نظراته عني اول مره شخص يطالعني جي صج فيه جرأه ولا اسميها وقاحه ..؟؟..
نوره: السلام عليكم..
حميد: عليكم السلام اشحالج نوره..
نوره: الحمدلله انت شخبارك..
حميد: بخير ربي يعافيج.. و الله و كبرتي و صرتي عروس .؟؟
و ابوي هذا شو ارد عليه الحينه طالعت خلود الي ابتسمت لي و دشت الصاله..وين رايحه يا الهبله امخلتني ابروحي مع حميد.. حميد !!! تدرون منوه حميد اذكر مره خبرتكم انه لوتي ..
ابتسمت له: ما في شي بالدنيا يتم ع حاله..
اتجدم ويل ها وي ياي..جفته يلعب بسويج سيارته الظاهر كان بيظهر ..
حميد: معقوله انتي الشيطانه ..صرتي جي..
اتمصخر عليه: شو كبرت و صرت ابليس
حميد: ههههههــــــــــــهههههههههههه
نوره: خالوه عايشه وين...؟؟
حميد: فيج الخير و صرتي تنشيد عنهااا
نوره: دوم انشد عنها و اسال عنها و ازورها بس ما يصادف اتكون موجود..
حميد: و عمر اخوج..
نوره: شفيه..
حميد: ما قام ينجااف
طالعته مستغربه: بس يوم انشد عنكم يقول انكم تجاوفون في القهوه
حميد: هاه يعني تسالين عنااا
اوهووووو هذا شو يبا الحينه ..شو مشكلته وين يبا يوصل ..لي متى بتم واقفه برع يعني ...
حميد: لا انا اقصد صار لي اياام ما جفته..
نوره: دق له و اساله..بتم واقفه برع واايد..
حميد: حياج حياج ..
اتجدم و انا ورااه ..دش الصاله..جفت نهله يالسه اطالع تلفزيون يا كرهج..من جافتني وقفت اتسلم علي يحليلها طيبه ترا اتمصخر عليها.. سلمت عليهاا..
نهله: و انا اقول غريبه هالخميس ما مريتي علينااا
حميد: ليش كل خميس اتيين و الله ما عندي خبر..
نهله: ترا اهي اتمر علينا حزة العصر و انت مستحيل اتكون موجود هالوقت ..
نوره: وين خالوه عايشه ابا اسلم عليها و اروح ما فيني اتاخر ..
نهله: جي اتخافين من عمور..
رديت عليها بنفس النبره: لا بس انا مب متعوده اكون برع البيت بها الوقت..
نهله: قصدج الشقه..
نوره: ايووووووه الشقه..
حميد: عادي بس اليوم تاخري انا بوصلج جان اتخافين..
نوره: مشكور ما يحتاي ..خالوه بحجرتها..
نهله:قعدت ع الكنبه: هي روحي لهاا
حميد: نهله شو ها المذهب..
نوره: عادي تراني مب غريبه..
نهله: وفرتي علي محاضره من حميد..
حميد: ما عليييييج منها نوره تعالي باخذج حجرة امايه..
كنت بقوله اندل الدرب .. المهم سار جدامي و انا و راه حسيت اليوم صرت ذيل حميد...دق الباب .. سمعت صوت خالوه و هي اتقول الباب امبطل.
حميد: امايه نوره بنت خالوه تبا اتسلم عليج..
خالوه عايشه: هلا يمه تعالي قربي ..
اتجدمت منها حسيت يوم جفت خالوه عايشه منسدحه ع الشبريه ..كبرت عشرين سنة..مدت ايدها اتسلم علي.
اتجدمت منها ..سلمت عليها بست ايدها و راسهاا و يلست حذالها ع الشبريه..جفت حميد يرااقبني تضايجت من حركااته ..بالاول يوم كنت صغيره كنت احب اسولف معاه و اضحك .. و كنت استانس يوم كان يشيلني و يفرني بالهواا جني عصفوره اطير ..بس الحينه احس صار حاجز من بينا يمكن لان كبرنا ..
خالوه عايشه: وينج ما ييتي اليوم..
كانت ماسكه ايدي معقوله الواحد يوم يكبر و يصير شعره ابيض ..يعقل يعني ما يصير لسانه طويل..
رديت عليها: رحت مع قوم خالوه مريم.. عشان انجوف العروس ..ما ييتي..؟؟
خالوه عايشه: قالت لي خالتج مريم خاوينا بس كنت تعبانه و مب رايمه قلت نهله بس ما رضت ..
حميد:-شو شفتوا البنيه..؟؟
انت شو يخصك تسال هالسؤال صج ما يستحي ..
نوره: زوينه ..
عايشه: الله يهنيهم عقبالج يمه و عقبال عمر شحاله عمر اخوج
نوره: الحمدلله ابخير باجر بيمر عليج..
عايشه: هي هو كل جمعه يحليله يمر علي ..
وقفت: انزين خالوه بخليج الحينه..
خالوه عايشه: ما شربتي شي ..
نوره: ما عليه مره ثانيه ان شاء الله بس تاخرت وايد..
حميد واقف.. و انت ليش وقفت بعد تباا اتوصلني عند الباب بعد..سلمت ع خالتي و طلعت من حجرتها و كان وراي حميد..بس نهله ما كانت موجوده بالصاله.. احسن مالي خلق اجوف شيفتها..بعد انا مب ناقصتنه ..وصلت عند سيارتي ..
حميد: نوره ما تبيني اوصلج ولا اتأمنين..
نوره: ما يحتاي حميد ما اتقصر..
ركبت سيارتي .. و ضربت له هرن اودعه...يا ربي مب راايمه اسوق فيني رقااااد اوني الحينه سهراانه انا الساعه عشـر .. زين بعد بوصل الشقه ما بجوف عمر بروح البس زلاغي و انخمد ..ا
مدري كيف وصلت الشقه و الله مدري ..من وصلت ..فريت كل شي عبايتي شيلي شنطتي.. و انخمدت ع الشبريه ..اوني سهراااااانه الحينه ...حتى ما قفلت باب حجرتي هههههههه ولا لبست زلاغي مصطله فيني رقااد...
فجيت عيوني ع رنة تلفون البيت.. منو يتصل بها الوقت ليش كم الساعه..اتفأجات الساعه ثلاث فـ ليل منوه يتصل بهاا الوقت ؟؟يمكن عمور ..بس ما دق ع موبايلي... دورت موبايلي تذكرت اني فريت شنطتي فـ الصاله..اووووه نوره متفيجة روحي ردي ع التلفون يمكن شي ضروري ..ابصراحه اتروع يوم اترن التلفونات بتخر الليل..ركضت الصاله..و شليت التلفون..
قلت:السلام عليكم...؟؟
.......:عليكم السلام...عمر موجود..
عااد اتخيلوا شو شعوري الحينه واحد متفيج يتصل باخر الليل عشان ينشد عن عمور الناس اخترعوا موبايلات..كان ودي اهزبه..بس مسكت اعصابي ورصيت ع سماعة التلفون..
........: الـــــوووو
رديت: عمر مب موجود دق ع موبايله ..
.........: موبايله يعطيني مغلق ..
نوره: زين هوه مب موجود..
.......:انتي نوره ...؟؟
فجيت عيوني و جنه يتني صفعه من الخاطر منو هاه يعرف اسمي..يعني تلفون باخر الليل و سكتنا..بعد يطري اسمي !!عمور مفضحني الله يغربل ابليسك..
نوره: منوه انت...؟؟ و كيف اتعرف اسمي ..؟؟
.......: انا فااااااااارس..
مدري شو اقولكم..يوم سمعت اسم فارس..اتصوروا شو سويت..صكرت التلفون ابويهه مدري ليش سويت جي..يستاهل السباااااال يـا قوة عييييينك..و فرحان ابعمرك انا فااارس و حطبه اتكسر راسك..ركضت حجرتي و قفلت علي الباب.. حسيت ابرجفه معقوله انا خايفه..تذكرت نظرااته حسبي الله عليك امسوي لي رعب من يوم كنت صغيره..لصقت فـ باب حجرتي ريولي ما ساعدتني اني اروح و انخمد ع شبريتي..يلست ابمكاني عند باب الحجرة حضنت نفسي ..هذا حس فارس نزلت دموع من عيوني لا ارادي.. فااارس ..فاارس.
XXXXXXXX
فتحت عيوني ع اذان الفير ..حسيت ابعمري مصدعه صداااااااااااع قوي..جفت نفسي راقده حذال باب حجرتي..قمت و كاني ما ابا اتذكر شو صار فـ ليل.. دشيت الحمام و اتيددت قريت سورة البقره..لي ما سمعت الامام يقيم الصلاة..صليت الفير .. و كملت سورة البقره..بعد ما خلصتها..
طلعت زلاغي من الدرج و لبسته..و لبست كوت عمور الاخضر مال الدواام كنت احس يدفيني..انسدحت ع الشبريه.. و تلحفت..تجلبت واييد..تعبت ابا ارقد بس مب رااااااايمه..صارت الساعه ست الصبح و انا احاول ارقد بس مب رايمه ما ابا افكر بشي..بس تعبت ..من التفكير .
.اياام مرت فكرت فيها .. و خلاص يااه اليوم الي انا ارتااح فيه و اعيش حياتي بس كيف .. و ها الي اسمه فارس ظهر بـ حياتنا مره ثانيه.. غااب عنا 7 او 8 سنوات... من عقب هااك اليوم ما جفته.. كل الي اذكره كانت نظراته الشيطانيه علي.. يوم خالي احمد كان يهزبه..
و يروغه من البيت.. كان يطالعني ..و كانه يحسسني انا مشتركه معاه او اني انا السبب بالي صار له.. انا مالي علاقه .. فيه ولا ابا يكون بينا أي صلة. و انا ما غلطت الي جفته قلته ..يعني نظرات الاتهاام الي كان يطالعني فيها..مالها حاية .....
عمر كاان الشخص الوحيد الي يداافع عنه مع انه يدري انه فاارس غلط و سود ويه عمي. بهاك اليوم ..كان عمري 15 سنة... يعني فارس كان عمره 19 شااب مب صغير.. و الي سوااه ما يسويه واحد محترم و مؤدب...المهم..ما ادري عمر اخوي كيف صار جريء ووقف مع فارس ضدنا كلنا...كان يداافع عنه..ع أي اساس ادافع عنه عمور..
فارس كان مذنب حتى لو كان رفيجك هذا مب معناته توقف معاه ع الباطل..لليوم و الله لليوم و كان كلمات خالي احمد تترد في اذوني..عمر تبا تتواصل مع فارس اظهر من بيتي و بيت خالتك ..و هالجملة الي خلت عمور و مب بس عمور كلناا ننصدم من كلام خالي احمد...و حرم علينا نطري اسم فارس جدامه.. او نتواصل معااه.. و أي واحد يفكر يرمسه او يتصل فيه .
.بيكون مصيره شرات فارس الطرد.. كنت احس انا الوحيده الي مستانسه بعقاب فارس و احس شويه عليه ..بعد الرمسه الي قالها خالي احمد نقزت خالوه مريم لـ عمور اخوي و قبضته من ذرااعه تترجااه
: بس عمر اسكت لا ادخل عمرك بشي ما يخصك.. خلي خالك و ولده ابكيفهم لا اتخلي خالك احمد يحرج عليك..
جفت عمر يبطل شفايفه و كانه بيرد عليها بس يوم جاف دموع خالوه مريم صخ.. و نزل راسه..بعدها رفعت راسي جفت فارس يطالعني بنظرات لها وايد معاني بس انا ما فهمت منه ولا شي ...بعدين ظهر من البيت وصرنا ما انعرف عنه أي شي.. حتى ثيابه ما شلها معاه..
جذي يكون يوم الواحد يتبري من اهله...حسيت برجفه و قشعريره...طالعتهم كلهم بعد ما ظهر فارس من البيت كلهم كانوا يتألمون حتى خالي احمد..و و عمور اخوووي هذي اول مره اجوف دموعه..ما قدر يسوي شي..لو تكلم.. بيروغه خالي احمد بعدين وين بنروح...
.بعد سنة اشتغل عمور اخوي..و السنة الثانية عطااه الشيخ سعود طول بعمره شقة.. و انتقلنا هناااك انا و عمور و كنت وقتها بثانوية عامه...فـ البداية كنت رافضه اروح معاه و كنت اصيح. بالنسبة لي اليوم الي ظهرت فيه من بيت خالوه مريم اسوء يوم فـ حياتي ....و كلنا عرفنا ان عمور بغى يظهر من بيت خالي احمد..عشان يرجع علاقته بـ فارس .و كان بالنسبه له اسعد يوم فـ حياته ...
.بس خالي قاله..البيت مفتوح لك و لـ نوره باي وقت..تبون اتزورون خالتكم عيال خالتكم حياكم الله ... حسيت ابقهر .. لاني تركت مكان الي تربيت فيه و عشت احلى ايام عمري و طفولتي ..
.بس الحمدلله ع كل الي صار علاقتنا انا و عمور بقوم خالتي شرات قبل يعني سالفة فاارس ما أثرت فيها ...ها اهم شي ..كل الي عرفته من عمور ان فاارس راح بوظبي .. بعد ما ظهر من بيت خالي احمد.. و استقر هناك..مع خاله و خالته..خاله اخو امه من الاب ..تزوج خالته اخت امه من الام..مدري كيف استقبلوه اكيد اكيد قص عليهم ولا هالاشكال و الحثاله محد يأمن يعيش معاهم.. وليش ما يأمنون ..لازم يأمنون ترا فارس اخو عيالهم بالرضااعه.. ابصراحه انا ما اعرفهم ولا اعرف اساميهم و كيف علاقة فارس فيهم كل الي اعرف انه عايش فـ بوظبي مع خاله و خالته.. و اخوانه في الرضاعه ع رمسة عمر.. و انا ما طريت هالشي لا لـ خوله ولا قوم خالي احمد ما فيني ع المشاكل خليه يولي...
سمعت صوت باب حجرة عمور.. نقزت.. و رحت فتحت باب حجرتي..
جفته يفتح باب حجرته:تو الناس بدري ...؟؟
عمور متروع: انتي شو اتسوين اليوم الجمعه ماشي دواام..
نوره:ما ياني رقااد...ليش راد بها الوقت ..انت ما تحاتي اختك..
عمور: كيف ما احااتيج..تراني اسهر ويا الشباب فـ القهوه جريبه من بنايتنا..شوفيج انتي هاليومين ما تنجافين ولا تنشدين حق شو زعلانه..
طالعته بنظرات ..اونك ما اتعرف شو مزعلني بس خلها ع الله..جافني ما رديت عليه..دش حجرته ..و لحقته..
نوره: موبايلك ليش مغلق...؟؟
عمور داش الحمام يغسل ويهه: كان امفضي اخر الليل بس بعد الفير حطيته بالجراااجه في السياره ليش متصله شي استوا..
نوره: لا مب انا المتصله..وااحد اسمه فااارس
طالعني عمور يوم نطقت باسم فارس...ظهر من الحمام و انا تميت واقفه عند باب الحمام..طبعا معلوم ما بيصكر باب الحمام.. صكرته...يلس ع الشبريه..
عمور: عيل اتصل بي و جاف الموبايل مغلق ما قالج شو يبا..
عاتبته: عموووووووور..
رد علي ابسرعه: شو فيج نوره الريال ابشو ضرج..ليش تكرهينه..
نوره: انت مستغرب ليش اكرهه انا المفروض استغرب منك..ليش مرابعنه للحين..
عمور: لا تنسين ها رابي ويانا و ولد خالي احمد..و شرات ما تعزين خوله انا اعز فاارس و اكثر
نوره: ولد خالي احمد مب خالوه مريم يعني ما يصير لنا شي.. المهم قوله لا يدق مره ثانيه ع تلفون الشقه..انا من سمعت صوته و انا مريضه مب رايمه ارقد..
عمور: ههههههههههههه ان شاء الله اوامر ثانيـه..
نوره: لا ماشي تمسى ع خير ..
عمورهو يتلحف: و انتي من اهل الخير بندي الليت..
تذكرت و انا اصكر باب الحجرة: صح حميد ولد خالوه عايشه ينشد عنك..
عمور: شو يبا طول ليل مجابلنه في القهوه..
نوره:هههههه ماااااااادري ..نش اليوم من وقت عشان اتروح لـ خالوه عايشه البارحه جفتها امبين عليها تعبانه..
عمور: زين زين روحي خليني ارقد ..
صكرت الباب ..ابتسمت حسيت و انا ارمس عمور جني ولية امره و اتحكم فيه هههههههههه حلو تتحكمين فـ رياااااال ...دشيت حجرتي.. و شليت الروايه الي كانت موجوده ع التسريحه.. و انسدحت ع شبريتي و يلست اقرااا ..اضيع وقتي بدااال هالملل..
XXXXX
بعد اسبوع و يوم الجمعه كنا في بيت خالوه عايشه معزومين ع الغدا.. بمناسبة ختاان جسوم ولد محمد و خلود.. و المناسبة الثانيه تحدديد ملجة خليفه ع شيماا..صاار زمان ما تيمعنا..دشينا انا و عمور بيت خالوه عايشه ..سمعت اصوات و ضحكات طالعه من صوب باب الصاله...
ذكرت عمور: عمور..
عمور: شوه؟؟
نوره: لا تنسى اتغض النظر..
عمور: شو قصدج..
نوره: اونك ما فهمت قصدي...
عمور: عن الاستهبال ...
الجو كان رهييييييييييب و باارد و مغيم.. عشان جي قوم خالوه عايشه ..مب مشغلين المكيفااااات فاجين باب الصاله...و الدرايش ..ابصراحه حسيت بشعور ممتع لان من زمان ما تيمعنا..جذا...كان بويهنا قاعد و مجابل باب الصاله.. حميد و خليفه نزلت راسي يوم جافنا ..
خليفه: ها وصلـوا...المتاخرين..
حميد: قربوا قربوا..
دشينا انا و عمور ..
_السلام عليكم...؟؟
الكل رد علينا: و عليكم السلام...
سلمنا ع الكل بس واحد ما كان موجود منوه منوه ..
نوره: خالوه وين خالي احمد..
خاتلوه مريم: خالج احمد و الشواب مشغولين فـ التجديف
خالوه عايشه: عيل انتوا يا الشباب جي ما سرتوا تدربون
محمد: الله يهداج امايه الجو ما يساعد و بعدين تأجل السباق ع نهاية شهرمارس
جفت عمور يشيل جسوم و يلاعبه.. و جسوم ما يصدق يجوف الريااييل يتعلق بهم..
خالوه عايشه: يالله شد حيلك عمر عرس و ييب لك واحد
محمد: ابوي اذا جي حشره نصيحه لا اتفكر..
الكل:ههههههههه
طالعني عمور و رد ع خالوه عايشه: ان شاء الله خالتيه جريب بس بعد الدوره..
حرجت منه كنت ادري يقصد نهله الحيوان ما فاد فيك يوم زعلت.. الشي الثاني الي كان يقهرني حميد ما شال عيونه عني..عشان جي فكرت اشرد من الصاله..
نوره: خالوه عايشه وين البنات ...؟
خالوه عايشه: خوله و نهله في المطبخ ينجبون الغداا.. و خلود فـ حجرتها..وين تبين اتروح روحي..
قمت من مكاني و كان ودي اركض مب امشي ابسرعه..
قلت و انا اطالع عمور: بسير عند خلود عيل ..
ما ادري اذا فهم نظراتي او لا لاني اجوفه يبتسم لي الطفس..شليت ابعمري و رحت حجرة خلود..دقيت الباب و دخلت عليها جفتها يالسه تتمكيج..
خلود: هلا و الله نوره تعالي دشي..
نوره: شحالج..
خلود: طيبه جفتي جسوم قاعد يصيح ولا صاخ..
نوره: لا دام عند عمور اخوي لا اتحاتين مستانس الريال..
خلود: ههههههههههه
طالعت حجرة خلود..مع اني جايفتنها قبل ..بس الظاهر امغير الاثاااااث ..و معطي شكل الحجره اكبر مع انها وايد عوده ...
خلصت عهود من ميكابها.. و يت يلست حذالي..
قلت لها: ما يحتاي اتحطين ميكاب انتي بروحج ما شاء الله عليج بيضه و حلوه..
خلود: حتى و لو اتحسين المكياج الحين مطلوب ..
نوره: طبعا في كل مكان الا مكان العمل..
خلود: اتصدقين نوره بديت اتملل من قعدت البيت ابا اشتغل..
نوره: هههههههه عندج جسوم يونسج..ولا تبين تشتغلين عشان تشردين منه..
خلود: هههههههه كيف عرفتي اتصدقين ..امـ لوع ابجبدي..
نوره: يالله تحملي تبوون ريل و عيال تحملوااا..
خلود: ما انخطبتي..؟؟
نوره: فال الله ولا فالج شفيج تتحريني شراتج ميته ع العرس..
خلود: شسوي ما صدقوا قوم خالوه عايشه خلصت من الثانويه سيده خطبوني ولا انا ما اريد..
نوره: هاااااا علينا حلفي انتي بس ..
خلود: ههههههه المشكله كان المعرس محمد لو واحد غيره صدقيني ما قبلت..
نوره: معلوم ابويه معلوم..تبين منوه و ما تبين منوه انتي من يوم كنتي صغيره صاااايعه..
خلود: هههههههههههههههههههه غربلج الله ..لسانج يباله قص..هي صج ع فكره جي ما رحتي عند خوله و نهله في المطبخ..
نوره: اخ لااه ما ابا اجابل شيفة نهلووه انتي كيف طايقتنهاا
خلود: شسوي بنت خالتي و عمة ولدي و اخت ريلي
نوره: هههههه خيبه اتخيبهاا من كل صوب عافده عليج..
خلود: انتي بعدج ما ادانيينها زين هذاك اول الحين كبرتوا ...
نوره: انتي ابذمتج مرتاحه معاها..
خلود: تبين الصج ..لا ..بس مرات اتكون طيوبه...بس محمد دوم هو الي يتفاهم معاها لو عقت علي رمسه لكن خالوه عايشه ..يحليلها ما قد قالت لي شي ...
نوره: مع ان نهله طالعه عليها..
خلود: هههههههه هي اتصدقين ..عيل الله يعينج باجر..
نوره:ع شو..؟
خلود: اتصدقين محمد قال لي ان حميد خبره يفكر يخطبج..
نوره: شووووو يخطبني لا و الله ليش ان شاء الله...
خلود: شو ليش ان شاء الله ...ليش يبون يخطبون بعد..
نوره: ده بعده.."وقفت" قومي خلينا نتغداا لا اتغثيني خليني اتغدا ع راحتي..
خلود: الله يعينه..
نوره: منوه..
خلود: الي بياخذج..
نوره: ههههههههههههههههه هوه لسه شاف حاكه..
خلود: شريره..
بطلت علينا الباب خوله..
خوله: هااه نوره ضحكتج واصله برع شو اتقولون..
خلود: يالله بالستر ..
نوره: تعالي سلمي بالاول فقتج..
خوله"اتسلم ع نوره" يالله نشن تعالن تغدواا
نوره: وين ..؟؟
خوله: فـ الصاله خلاص الرياييل راحوا الميلس...
خلود: عيل يالله ..
طلعنا من حجرة خلود..جفت نهله يالسه و معاها جسوم..هاه اكيد عمور الهيس جافها و سلم عليها ولا هي ليش مستانسه مالت عليهااا.عااد هي ما اتصدق تراني اعرف طينتهااا ....المهم سلمت عليها.. و قعدنا نتغداا...بعد ما خلصنا... حسيت ان نهله كانت تجنبني و مطنشتني . و انا بعد تراني مطنشتنها مب بس هي تعرف اطنش..انزين...
شويه ودش محمد و حميد الصاله..
خالوه عايشه: وين عيال خالتكم..
محمد: يلس حذال خلود.. و شل عنها جسوم: عمور ظهر واحد من الربع دق له.. و خليفه بعد مدري وين سار..
نوره: شو عمور روح عيل منوه بوصلني البيت يستهبل هاه ..
الكل: ههههههههههه
خوله: الظاهر نسااج...
خالوه مريم: مب غريبه انتي تراج بيت خالتج.قعدي لي ما يخلص شغله و بيمر عليج..
نوره: خالوه الله يهداج عمور باجر الصبح بخلص شغله..
خالوه عايشه: هييي هااا العمر يخلص و الشغل ما يخلص ..
حميد: مب مشكله نوره لا تضايجين..قولي لي متى تبين اتروحين و انا بوصلج بدربي..
نهله: يالله ما انرووووم ..
نوره: اونج انتي ..ما اتروميين
خوله: ايه جنه شي مطر..
ركضت خلود برع اتجوف..
محمد: اندوكم انتوا حرمه معرسه و عندها ولد..
صاح جسوم يوم جاف خلود تركض برع يباها اتشيله..
ردت خلود داخل: لا ماشي بس الجو فنان ..
حميد: من زمان ما تيمعنا جي..
خالوه مريم: ناقصنا احمد..
محمد: شو رايكم عيل الاسبوع الياي اذا كان الجو جي فنان نطلع البر..
خوله: الله رووووووووعه صج محمد ..فكره حلوه.
خالوه عايشه: لا ما اروم اظهر وياكم..
نهله: حرام عليج امايه لا اتخربين علينا الطلعه..
خالوه عايشه: و جان الجو عادي ما فيه غييم..
خلود: لا ان شاء الله بيكون روعه جي و فنان ...
نوره:خلاص خالتيه دام انج تتحججين ما اترومين اتروحين خط انروح البحر..
نهله: ليش انتي بتروحين معانا ..
و ابوي هاي الحينه شو ارد عليها..شو محد بسكتها عني..اويه كلهم يطالعوني لا لا حبيبتي نهله تتحسبيني بنحرج ولا بتغلبيني بها التغيزاات..
نوره: طبعا حبيبتي بروح و بعفد السياره قبلج..
الكل: ههههههههههههههه
خوله: خيبه نوره شويه و بتصرطينها..
نوره: ع بالها يالسه فـ بيتهم ما برد عليها..
حميد: اوب اوب ضرابه ..
خالوه عايشه: انتوا بتمووون طول عمركم جي ..مب تتتصالحون..
نوره: خالتيه الي يعطين كلمه اعطيه عشر..
محمد: و ابوي طالعه ع امايه نوره..
خالوه عايشه: سود الله ويهك امبونك ما تستحي ع ويهك..
الكل: ههههههههههه
خالوه مريم: اذا الله راد و سرنا نوره خبري عمور اخوج يروح واذا ما طااع قوليله كلنا ما بنروح اذا ما سرت..
حميد: ها ها بديت اغار شمعنى عمور يعني ..
نوره: لحظه حميدان "طلعت عفويه بس ما توقعت الكل بتفاجأ بهاي الكلمه طنشتهم و كاني ما قلت شي غلط" خالوه اشمعنى عمور حتى انا اغااار يعني اذا انا ما سرت انتوا عادي بتروحون ..
خالوه عايشه: يالله مريم توهقتي ها الاخوان قاموا يغارون ..
نوره: طبعا ممنوع التفرقه العنصريه ..
محمد: مال اول تفرقه عنصريه..
خوله: انت عطني جسوم حاطنه بحجره..
نوره"غمزت لـ خوله: انتي ما اتوبين بعدج تبين اتشيلين جسوم..
خوله:صخي عن الفضايح..
خلود: ليش شو بلاه ولدي جسوم..
نوره: ما بلاه شي اعوذ بالله ..يالله منوه بتبرع و بوصلني..
حميد: انا بوصلج شراييييييج..
نوره: ابروحنا !!
الكل: ههههههههههههه
خوله: انا بيي معاج..
نهله: انا بعد ترا الجو رهيب بالمره كشته...
خلود: لا و الله و انا و جسوم بعد بنيي
خوله: استحي ريلج يالس و تبين اتيين ويانا..
خالوه مريم: لا تاخذين جسوم اخاف يمرض الجو بارد..
خلود: خلاص عيل ما بروح الوحده يوم تعرس تنحرم من كل شي عفانا الله ..
محمد: فديتج و الله خلود نشي و يبي معاج جسوم بنظهر رواحنا بنتمشى..
خلود"طايره من الوناسه" و الله يالله يالله
خالوه عايشه: الباب عن تدعمينه خلود
الكل: ههههههههههههههه
طلعنا انا و خوله و نهله .. مع حميد.. يلسنا ورا انا و خوله و نهله جدام حميد..
بالفعل الجو وايد رهيب لو اوصفه لكم ما بتصدقون ..زين عمور شرد سوا فيني خير ..هههههههه
نهله: حميد دخيلك مر صوب البحر..جوف الجو هناك غييم اسود..
خوله: معناته شي مطر..
حميد: لا لا ماشي شو تتحرون طلعتن معاي عشان امشيكن يالله مناك..
نهله: حرام عليك حميد..شويه بس ما بننزل من السياره ..نوره قوليه يمكن يسمع كلامج..
نوره: لا و الله ...
خوله: يالله عاد نوره قوليه خذنا البحر ..
حميد: يالله اذا قالت نوره خذنا الحينه بغير الشارع..
خوله و نهله: حراام عليج نوره لا اتذلينا.
نوره: خخخخخخخخخخخخخخ ما بقول كمل كمل طريجك حميداااااني صوب شقتي..
حميد: خلاص عيل ماشي سيرة ع البحر..
خوله: حرام عليج نوره و الله انتي ماصخه..
نوره: زيديني ملح .."طلعت لساني" جفت حميد يراقبني من الجامه فضحك علي ضحك .. ما توقعته سخيف لها الدرجه..
نوره: زين ترا شقتي مطله ع البحر..
حميد: يا حافظ..
نوره: هي شو بعد نزلوني و روحوا تطمشوا ع البحر ..
نهله: لا انا ابا بحر الرمس..
حميد: بيييييييل تبين تاخذينا اخر الدنيا ..
خوله: انا مع نهله..
نوره: و انا منو معاي..؟؟؟
حميد: طبعا انا ..
نوره: خلاص عيل تساوينا ماشي سيره ..
نهله: نوره اتعرفين تذلينا..
نوره: ههههههههههه انتي من صغرج و انا مشبعتنج ذل..نسيتي..
حميد:ههههههههههه شيت نهله لو انا منج فريت روحي تحت السياره..
خوله: الله جوفوا الدنيا ظلمة من الغيم..
وصلنا عند بنياتنا ... طبعا نهله اول مره اتجوف البنايه الي انا ساكنه فيها خوله كذا مره ييت شقتي.. المهم..قبل لا انزل غيرت رايي
نوره: خلاص غيرت رايي
نهله و خوله = شووووووووو
نوره: بروح اييب زلاغي و بردلكم عشان انروح البحر شو قلت حميد..
حميد:زلاغ !!!
نوره: هي تراني يوم ابرد لازم البس زلاغ و كوت..عمور..
حميد: ههههههههههههه
خوله: فضحتنا ..الله يخسج..
نهله: هههههههه برايها روحي روحي نتريااج..
نوره: لالالالالالالا لا لازم حميد يقول هي ولا لاء ..نحن حزب و انتوا حزب نسيتوا شو؟؟؟
نهله"اتنافخ" ذليتينـــــــاا
حميد: زين بنتريااج روحي..
ابتسمت لـ خوله و نهله اغايضهم..و نزلت من سياره..كان الهوا البارد يضرب ابويهي.. رصيت ع شيلتي عشان ما اطيح..سمعت صوت يزقرني قبل ما ادش البنااية..
عمر:اوووووه نوره ههههههههههههه اتصدقين نسيتج بيت خالوه..
طلعت له لساني كـ رد عليه ..بس ابسرعه حطيت ايدي ع حلجي انتبهت ان السياره الي واقف حذالها عمور فيها واحد ما ينجاف لان السياره عاكس..بس جفت هيئته ها عمور طول عمره بيتم طفس يرمسني و يزقرني جدام كل حد فضيييييييييحه...دشيت البنااايه عشان ما اتاخر ع قوم حميد و خوله و نهله لحظه انا ليش قمت ازقره حميداان!!!مب وقته ركضت حجرتي لبست زلاغ و جوتي و شليت كوت عمور مال الدواام الاخضر.. و ركضت برع البنايه..توقعت اجوف عمور يسولف مع حميد..بس الظاهر.مب جايفين بعض لان كذا سياره امغطيه ع سيارة حميد.التفت صوب عمور جفته بعده واقف عند ربيعه ..هو برع و رفيجه داخل السياره قاعدين يسولفون ماشي منونه خلصن الامااكن واقفين بنص الشارع..زين بعد عمور ما انتبه لي بس الظاهر رفيجه خبره لانه طالعني ..اتذكرت اني تاخرت..فركضت صوب سيارة حميد...فجت الباب و ركبت..
نهله:اخيرا وصلتي..
حميد: يالله سريييييينـا..
نهله+خوله+نوره=سرييييناا..
شويه ورن موبايلي ..هاه عمور..
رديت عليه: هلا "تعمدت اقول اسمه" عمـــــــر..
عمور: انتي شو عندج داشه تراكضين و ظاهره من البناية تركضين وين رايحه بها الجو..؟؟
نوره: رايحه البحر مع عيال خالتي..
عمر: بها الجـو ..؟؟ منوه ماخذنكم..
نوره: حميييداااااان
عمور: صار حميداااااااان
نوره"جفت حميد يطالعني من الجامه و يبتسم": هي حميداان حلاته يالله يالله لو سمحت انا مشغوله..و مره ثانيه تأدب لا تزقرني جدام ربعك..
عمور: خخخخخخخخخخخخ يالله مع السلامه..
خوله: بسم الله الريال متصل يتطمن عليج و انتي كلتيه..
نوره: يستااااااهل محد قاله ينساني بيت خالوه عايشه..
نهله: يحليله عمور..
رديت عليها ابسرعه: ما يخصج انتي..
طالعتني خوله مستغربه من ردت فعلي حتى حميد رفع راسه يطالعني من الجامه..صديت عنهم و يلست اطالع برع..تمينا ساكتين.. و جني خربت طلعتنا...المهم بعد نص ساعه وصلنا بحر الرمس...نزلنا من السياره...نتراكض صوب البحر..انا و خوله و لحقتنا نهله... بس حميد تم يالس فـ السياره بس امبطل الباب ..يطالعنا ..
لبست كوت عمور ضحكوا علي خوله و نهله بس كنت ع الاقل احس بالدفىى..كان الهوا يطير عبينا و شيلتنا ..تذكرنا موقف الرحله و يلسنا نضحك..
خوله: يالله الحينه صج جنا بنغرق..
نهله"صرخت بصوت عالي" النجــــــــده النجـــــــده
ضحكنا للحظه نسيت خلافي مع نهله... الجو كان بارد و الهواا بعد بارد..كان يضرب ويوهنااا ..و موج البحر كل ما كان يتجرب منا ..كنا تراكض..بعيد و نحن نضحك.. و لما يصير البحر جزر نتجرب منه و امجرد ما يصير مد نتراكض و جنه يلحقنا..حسينا ان رجعنا 8 سنواات لـ وراا جنا يهااال ..تمنينا اتكون عندنا كاميرا عشان ما نفوت الجو..اتذكرت ان حميد موجود معانا..التفت صوبه جفته يالس يطالعنا..رحت صوبه و خليت نهله و خوله يلعبون ارواحهن..جافني اتجدم منه فنزل من السياره و صكر الباب و تم واقف حذال سيارته لي ما وصلت له...
نوره: ليش ما اتيي تشاركناا..؟؟
حميد: هههههههه انتن متخبلات و انا ما اريد اصير شرااتكم..
ابتسمت له حسيت بشعور يحذبني صوب حميد..اتساندت بسيارته اطالع خوله و نهله يتراكضون.. و خوله صرخت يوم رشتها نهله ماي و خرست عبايتها..ضحكنا انا و حميد عليهن...
حميد: خوله عمرها ما بتكبر الي يجوفها الحين ما يقول وحده كانت معرسه و تطلقت...
نوره: و انا !
طالعني: انتي ابعمرج ما بتتغيرين بنظري ..طفله مليانه بالحياة تجذبني شقاوتج..
اتنهدت: الدنيا حلوه.. ولازم نستانس بكل لحظه انعيش فيها...
حميد: بس الاسبوع الي طاف يوم جفتج ما كنتي مستانسه..
طالعته مستغربه :كيف عرفت ...؟؟!!
حميد: يعني صج كان شي مضايجنج..
نوره:طالعت خوله و نهله: هي شي صار و انتهى ..
حميد: منوه عمور..
هزيت راسي بمعنى نعم...
رد علي: يعيبنـــــي عناااااادج ..و اصرااارج..
طالعته: قصدك اذا بغيت شي لازم اسويه..
حميد: هي و اظن بغيتي شي من عمور.. ورفض عشان جي تضايجتي..
رديت عليه متفاجاه من كلامه: شي مثل شو..؟؟؟!!
حميد: عااد لين هني ما اقدر اقولج انتي ادرى انا ما اعلم الغيب..
كلامه لي و تحليله شخصيتي فاجأني حميد يقدر يقرا افكاري و يفهم مشاعري.. حميد يقدر يفهمني..ايه نوره لا تتخبلين تذكري ان حميد لوتي ...
نوره: و شوه بعد..
حميد: ماشي بس عشان جي تميتي تزقريني حميداان عشان تغايضين عمور صح ...
اتنهدت ما عرفت شو ارد عليه..مدري استانس لانه يقرا مشاعري ولا احكره و اطنشه..طالعته جفته يضحك ع نهله و خوله ..يضاربون جنهن يهالووه
حميد: شو اول مره اطالعيني..
انحرجت يوم سمعت رمسته فصديت اطالع خوله و نهله..
سمعته يقول لي: انتي عجيبه نوره عجيبه..
نوره: و انت بعدك لوتي ما تغيرت..
طالعني مستغرب مب متوقع كلامي و بدوري استغربت يوم جفته يضحك ابصوت عالي..حتى خوله و نهله التفتوا لنا...
نهله: هااااااااااه شو عندكم واقفين هناك..
خوله: حميد ليش تضحك..
نوره: كل منك اتييب لنا الشبهه
حميد: مب منج من كوتج الاخضر..
نوره: ههههههههه مال عمور بس انا استوليت عليه..فجاه طاااااحت امطااااااااار صبيبه..استانسنا و نحن واقفين تحت المطر بس يوم سمعنا صوت الرعود و جفنا البرق..اتروعنا نحن البنات..انا دشيت ابسرعه السياره.. و نهله و خوله..قاموا يتراكضن صوب سياره حميد..ضحكنا عليهم انا و حميد..كان شكلهم يضحك...ابصرااحه اليوم كان رهيب و استانست وايد..
ووايد اشيا خلتني استانس..العزومه بيت خالوه عايشه الكشته.. و الوناسه و الضحك مع خوله و نهله..من عجايب الدنيا السبع انا و نهله نضحك و نلعب مع بعض... و شي سبب بعد ..حميد..احس صرنا قريبين من بعض..حسيته انسان تغير و صار محترم..ليش لاء...داام انه ما غلط معاي للحين.. و كان كلامه حلو و محترم...
نهله: حميد دخيلك خلنا انعيد الرحله..
حميد: اذا رضت نوره..
خوله: لا و الله عيبتك السالفه اجوف نوره و نوره..
نوره: هههههههههه ارمسوا بالزين تراني بحرمكم من الطلعه مره ثانيه..
خوله: المهم نوره خلينا ذكرى حلوه هني ..و بها الجو الروعه..
طالعت لا اراديا صوب الجامه يوم خوله قالت ذكرى حلوه..جفت حميد يطالعني و بعيونه كلام واايد ابتسمت له ..ورديت ع خوله: احلى شي بالحياة الذكريات بحلوها و مرهاا..
نهله: يا سلالالام ما انروم..
نوره: اونج انتي بس ..
خوله: المهم بنكرر الرحله الاسبوع الياي بنطبق فكرة محمد ريل خلود ..شو رايكم..
حميد: اذا عمور يااه..
نوره: اسالوا نهله..
نهله: و انا شو يخصني هاه..
نوره: مدري عنج من ساعه في بيتكم اتقوليني "اقلد صوتها" ليش بتروحين معانا يعني لازم اذا فكرنا انروح لازم نستأذن منج..
خوله: حووووه نوره شفيج خفي ع البنت ..
نهله: ههههههه خليها خوله..تعودنا ع اسلوب نوره خلاص خبري عمور ايي معنا ..
نوره: لا و الله ..
حميد: هههههههههه مب جنكم عيال خاله جنكم عداايل..
شويه ووصل حميد شقتي..و قبل ما انزل..
نوره: مشكور حميد ما اتقصر انت الي فيهم.. السموحه منج نهله يمكن تموتين اليوم لا سمح الله خلينا نستسمح منج..
نهله:بسم الله علي..المهم مسموحه بالحل..
خوله: خلينا ع اتصال نوره ..
نوره: اكيد حياتي انا ما برتاح الا يوم ايوزج عمور اخوي..
هههههههههه ضحكت يوم جفت اشكالهم.. صكرت باب سياره حميد قبل لا اسمع رد أي واحد منهم..ركضت و دشيت البناية.و كان المطر يصب ابقوه ...
.اووه نسيت اطالع اذا سيارة رفيج عمور برع اولا..لالا ما اظن ..فتحت باب الشقه .و قبل ما ادش ا عشان ما اوصخ الارضيه..فسخت الجوتي و الزلاغ..و تميت لابسه الكوت ع الاقل بدفيني...
كنت اضحك يوم تذكرت ملامح نهله و خوله و حميد يوم قلت لـ خوله انا ما برتاح الا يوم بيوزج عمور اخوي اول مره اصارحها بفكرتي و حذال نهله و حميد ..احسن الحينه نهله بتموت من الغيض .....صكرت باب الشقه..بس ماتت الضحكه مني يوم طاحت عيوني بعيون فااااااارس..
>>>>يتبع
..
زهرةالصبار
|
05-01-07, 04:02 PM
جديد مواضيع قسم القصص المكتمله
العرض العادي
