كاتب الموضوع :
أميرة الورد
المنتدى :
القصص المكتمله من وحي قلم الاعضاء
الفصل الثاني والعشرون
*
الله يا قلبي تعبنـا ..!!
تعبنـا من الوقوف ...!
مابقى بالليل نجمـه ..ولا طيـوف ..
ذبلت الشوارع ...وانطفى ضي الحروف ...
يالله ياقلبي سرينا
ضاااااااااقت الدنيا علينا ..
*
*
من بيت ابو طارق رجع لمكتبه على طول ليه..ببساطه ماله نفس يتغدا ..دق تلفون مكتبه ..بعد الرنه الرابعه رد ..
- نعم
المتصل كان صديق لماجد تعارفوا من خلال تجارتهم ومع الوقت صار بينهم علاقه متينه وحلوه ...
حمود – السلام عليكم
ماجد – هلااااا ابو رنا شخبارك
حمود – مافي وقت للاخذ والرد اسمعني
اعتدل ماجد في جلسته وهو عاقد حواجبه – خير اللهم اجعله خير
حمود – ماظنيته خير كارثه كبيره
ضبط ماجد اعصابه – تكلم يارجال روعتني شفيه
حمود – صفقتك مع الوفد الاجنبي
ماجد – شفيها
حمود – بتتكنسـل
شهق ماجد – وشو ؟؟؟
حمود – انا سمعت ان هالشركه مسويه اجتماع قبل ساعتين مع شركه منافسه لك اظنك تعرفها شركة مشعل ..
ماجد مرتفع ضغطه من مشعل ذا صحيح انه انسان ذكي ومحترم بس شرس بالسوق جدا وماتوقع انه يطعنه بظهره لطالما كانت علاقة التنافس الي بينهم مبنيه على المنافسه الشريفه والاحترام ...
فقد ماجد اعصابه هالصفقه حاط فيها سيولته كلها وخسارتها معناها افلاسه ...وش هالكارثه .
حمود – ماجد انت معي
ماجد حس بإجهاد مفاجئ من صدمته لطالما كان حريص بصفقاته وماقد تهور .. ويوم تهور وغامر بكل سيولته تعرضت له هالمشكله الكارثيه ...
ماجد – معك معك
حمود – طيب وش بتسوي غريبه مو اليوم اتفقتوا على كل شي ...وش الي جد وخلاهم يتراجعون .
ماجد حس بنيران القهر تستعر بجوفه – الي جد شي ما يبيض الوجه ع العموم كل عقده ولها حلال بشوف الموضوع .
سكر الخط ...وضم وجهه بين يدينه وش هالمصيبه الكبيره ...ان راحت الصفقه منه معناه بيكون على الحديده ..مستحيل ولاممكن شقا هالسنين يروح بغمضة عين .
كلم سكرتيره وقال بعصبيه – الحين اجتماع مهم بسرعه .
سكر السكرتير السماعه برباشه مرتين والسماعه تخطي مكانها من خوفهوربكته علامه ماجد معصب كلم على المدراء والموظفين المهمين لاجتماع عاجل والي ببيته تم استدعاءه .
كان النقاش ومراجعه العقود حماسي وحامي جدا ... قال المحامي – العقود توقعت ومالهم أي مدخل يفضون هالاتفاقيه الا في حاله اذا جا تقصير من طرفنا وبما اننا بدينا اليوم هالسبب ماله اهميه لا تخاف يا ماجد قانونيا حني بالسليم ولو فضوا الاتفاق ووقعوا مع شركة ثانيه راح نرفع عليهم قضيه واضمن لك مليون بالميه اننا بنكسبها والاجمل بالموضوع ان رخصة عملهم هنا بالسعوديه بتنسحب منهم للابد.
كتم فرحته لين يتأكد انه بالبر
ماجد – ابي كل المعاملات القانونيه عندي هنا ..واهم شي ابي اتاكد هل فعلا اتفقوا باجتماعهم مع مشعل يعطونه الصفقه ولا وش سبب هالاجتماع .
- ان شاء الله ابشر عطني بس نصف ساعه وكل شي بيكون على مكتبك
وقف ماجد – زين الله يعطيكم العافيه تقدرون تروحون بيوتكم
السكرتير- وانت ؟
ماجد – انا بخلص كم شغله وبروح البيت اشوفكم السبت ان شاء الله
الجميع – ان شاء الله .
وكعادته بالاوقات الحاميه من الشغل .. يندمج بقوه .
دق التلفون مره ثانيه وش سالفه هالتلفونات اليوم نكد بنكد ...- نعم وعليكم السلام ...اكيد انا حاضر دايم .متى العمليه الليله الساعه ثنتين ان شاء الله تلقاني محضر بالقسم ...ان شاء الله وعليكم
سكر ماجد التلفون خير اللهـم اجعلـه خيـر ! اليوم فيه عمليه هجوم على ارهابيين وطالبينه يجي بما انه من ضمن فرقه القناصين !
قلبه مو متطمـ ن ولا هو مستريـح ...
خلص اشغاله بسرعه ...وهو طالع لحقه المحامي وهو يمشي بيطلع برا الشركه
-تكلموا بشركه مشعل عن الصفقه وانه بيكون بديل لنا في أي لحظه ممكن نخل فيها بالشروط بصراحه كلام فاضي وش هالتخلف مجتمعين مع شركه منافسه لنا عشان يركنونها احتياط لنا اذا خالفنا البنود الي بالعقد الله يصبرني على هالسنه الكبيسه توقعت انهم محترفين طلعوا أي كلام.
ماجد بابتسامه راحه – الله يعطيك العافيه انا اعرف الي ورى هالتصرفات كلها بس والله لادفعهم الثمن غالي وانا ماجد ، اسمع هالاوراق ابيك ترفع عليهم قضيه اخلال بالبنود ابيك تلعوزهم وابيك ترفع السعر تأديبا لهم طبعا ان كان في مجال نرفعه.
المحامي وهو يغمز – فيه مجال ولايهمك بنخيرهم يا يفضون العقد ويدفعون لنا تعويض او نستمر فيه بالشروط الجديده والبادي اظلم.
هز ماجد راسه ..وطلع من الشركه ..
وياللصدمـــــــــــــــــــــــــه ..
من الي ينتظره ومتسند على باب سيارته ؟؟؟؟؟؟؟؟؟؟
{كثرت صدماتك يا ماجد.................................
......................................../... ..وش بتكون نهاية هاليوم !!}
/
/
>>بيت ابو طارق ...
صحـت نجوى على ازعاج اسما وعايشه وهن يتهاوشن ...طلعت من غرفتها لابسه بيجاما بيضاء صارخت – وجــــــــــــع وش هالازعاج الواحد مايعرف ينام
اسماء وعايشه كل وحده تتشكى – هي الباديه لا هي الباديه
قاطعتهن وهي ترجع شعرها ورى بعصبيه – افففففففففففف منكن بزرااااااااااان خربتن نومتي
- ماصارت نومه النـــــــــاس الحـين المغرب
كان صوت طارق وشكله معصـب ..
التفتت نجوى – كملت ...
طارق – بدال منتي نـــــــــايمه لا شغل ولا نفعه روحي ساعدي امي بالبيت
نجوى – اليوم مو دوري لا تنسى فيه جدول يوم لامي ويوم لي ويوم للاخوات واليوم يومهن تفاهم معهن انا هلكانه مانمت زين .
طارق وهو يصـارخ على خواته الصـغار – انزلـن تحت ساعدن امي بسـرعه
ناظرن في بعض بخــــــــوف ونزلن يركضن ركـض ...
قال لنجوى الي بترجع غرفتها تكمل نومتها – تدرين ام ماجد جاب ورقه طلاقك اليوم
طار النوم من عيونها والتفتت قالت تستهزء – يوم مابقى من العده شي ارسلها
طارق – بقى ولا مابقى هي نفـس الحاله
نجوى بدون اهتمام – يرتاح ويـريح
طارق يأس من امه وخواته وكل شــــــــــي ب هالبيت الي يجيب النكد ...الحمد لله ان عنده رحلات وانه بيفتك من هالبيت ..دخل غرفته بعد ماعطاها نظره اشمئزاز وجمع اغراضـه ... عشان السفر..
دق جواله وهو نازل – هلا
مشـــــاري – السلام عليكم
طارق – ياهلا وغلا اخبارك
مشاري – بخـير الله يسلمك اسمع فيه جمعه الليله باستراحتنا تجي
طارق – والله ودي بس وراي رحلات وهذاني متوجه للمطار
مشاري – يوه خسـاره
طارق – يالله نعوضهـــــــــــــا مره ثـانيه ان شاء الله
مشاري – متى بترجع
طـارق – بحدود شهر ونص شهرين وراجع
مشاري – اجل مطول
طارق – ايه ..
مشاري – الله يرجعك بالسلامه
طارق – الله يسلمك
مشاري – يالله فمـان الله
طارق ..فمان الكريم...
وسكـــــــــــــر الخط !
/
بعد صلاة العشا ...>>
دقت جود على فيصل والرقـم مشغول مشـغول ....
سكرت التلفون بقوه بغت تكسره ...
دخل ابوها والوليد وهي جالسه بالصاله مكتئبه ...
قال الوليد – شفي الحلو معصب
ابتسمت جود عصب وقامت وحبت راس ابوها ...جود – لا ابد سلامتك ادق على المستشفى مشغول
ابو متعب – حنا تو جينا من عند فيصل
جود بلهفه – شلونه اصابته خطيره ولا لا
الوليد – ههههههههه على هونك الرجال طيب والاصابه مو خطيره بيجلس ايام بالمستشفى وبيطلع .
جود – زين
ابوها – والله يا عنده امه يالله قدرنا ندخل عليه ونسـلم
الوليد – ايه المستشفى مليان رجاجيل مافي مجال لاهله يزورونه
جود بقهر بقلبها – ايه هو قال لي لاتزوريني
ابو متعب مأيده – ماينلام حنا يا الرجاجيل يالله وصلنا له ..
الوليد – اهم شي انه بخير وطلع منها بس
ابو متعب – ما اقول الا حسبي الله على هالناس الي مايخافون الله والي بس يدمرون بـهالوطن الي كبرهم وغمرهم بخيره .
الوليد – ان ماخذوا جزاهم بالدنيا وين بيروحون من ربهم بالاخره .
ابو متعب صدقت وانا ابوك ...
طلع ابو متعب من الصاله وبعد شوي لحقه الوليد وجلست جود بلحالها تاخذها الوساوس وتجيبها ..رجعت دقت عليه وبعد الرنه الرابعه رد – نعم
جود – السلام عليكم
فيصل – وعليكم السلام والرحمه
جود – شخبارك الحين ان شاء الله احسن
فيصل – زين ماعلي هالحمى ساعه تجيني وساعه تروح
جود بغصه – الف لا باس عليك
فيصل – الله يسلمك وانتي شخبارك
جود – بخير ما دامنك بخير قلي محتاج شي تبي شي
فيصل – لا ابد سلامتك احتمال اطلع اخر الاسبوع ان رضى الدكتور
جود – لسى مصر ما اجيك
فيصل بنيره هاديه فيها قسوه – جود الي اقوله لازم اعيده يعني
جود وصلت حدها خلاص بكيفه – زين الي تشوفه تامر بشي
فيصل – لا سلامتك معك فلوس لمصاريفك ولا اكلم واحد من اخواني يجيب لك
انا ويـن وهو وين !
جود – ههههههههههههههه
فيصل – شفيك تضحكين
جود وهي مبتسمه – انا وين وانت وين ..
فيصل – مو معنى اني مريض خلاص منتي بلاقيه من يصرف عليك
انجرحت جود من كلامه – انا ببيت ابوي مو بيت غرب
فيصل – كنتي مسؤوله منه والحين مسؤوله مني
جود – فيصل شتقول ...
فيصل – انتي زوجتي
بسم الله شفيه معصـب ..هدت جود الوضع – طيب لا تعصب انا زي ماقلت لك مو محتاجه شي ولو احتجت بقولك
فيصل – زين يالله الحين بروح قسم الاشاعه يشيعون الكتف
جود – الف لا باس عليك يارب .
وسكرت الخط ...
سندت ظهرت ورجعت شعرها بيدها دلالة كآبه وملل ..
نزلت البتول من بيتها وشافت جود جالسـه سرحانه والهم كاسيها– الحلوه مكتئبه للحين
جود بابتسامه حزن – جيبيلي احد مرتاح
البتول بحزن – على قولتك محد مرتاح
قالت جود بتغير الجو الكئيب الي بينهم – شسويتي امس يا ام الخطط عسى اخوي رضا عليك
البتول شوي وتصيح – رضا ومارضى
جود – شلون ذي
البتول – خليها على ربك الضرر كبير ويبلي صبـر عشان ابني علاقه سليمه معه
جود بكآبه – على الاقل بندر فيه امل مو انا ياحظي زوج جاف بطبيعته جفافه يجيب الموت لروحي
اخذت جوالها ودقت على عمتها الي ماكلمتها ...
البتول – مالنا الا الصبر الشكوى لله ..
ردت ام فيصل على الجوال – الو
جود- السلام عليكم
ام فيصل – وعليكم السلام والرحمه
غريبه وش هالبرود!
جود بلعت غصتها – شخبارك يا عمه
ام فيصل – زينه
شفيها ذي؟
جود – شخبار عمي والكل
ام فيصل بعصبيه – زينين كلهم ..ماشبعتي من اهلك للحين
انصدمت جود – وشو ؟
ام فيصل – زوجك تعبان وانتي جالسه عند اهلك ومستانسه
جود بعصبيه مكبوته – وش اسوي يعني اذا هو مايبينا نروح له المستشفى وبعدين شدراك اني مستانسه
ام فيصل – هذا الواضح ماجبتي خبره
جود ببرود – مايعلم الي بالقلوب الا رب العباد انا حبيت اكلم واسال عنك والي اشوفه انك بخير مع السلامه
وقفلت الخط بوجهها خير شفيهم ذولا وكأنها هي السبب بالي صاب ولدهم الناس انهبلوا ولا وش مشكلتهم ..رحمتك ياربي ..
البتول – جود شفيك ...
ناظرتها جود وعيونها مليانه دموع والغصه بحلقها تحرقها ..قالت بصوت باكي وهي كل مانزلت دمعه تمسحها بسرعه
– شقول يا البتول لازوج سنع ولا اهل سنعين الله يصبرني بس .
وقفت وراحت غرفتها تداوي جروحها بنفسها ما تعلمت هالشي طول هالسنين ...
ماتعلمت تعض على الجرح وتخفي حزن الخفوق بفقدانها ماجد ..
ماتعلمت الصبر والقوه من انتكاسات ابوها الصحيه...
ماتعلمت ترضى بقدرها ونصيبها يوم تزوجت فيصل واهله المتقلبي المزاج .
اه ..من قلـة الحيله ..
واه منك ...يالاآآآه ...
/
>>بالمستشفى ...
ابتسم ماجد – شده وتزول ان شاء الله والحمد لله على سلامتك
فيصل – الله يسلمك الا كيف دخلت بوقت غير الزياره
ماجد – يمدحون الواسطات
فيصل – هههههههههههه أي والله صادق ...
ماجد – المهم ترى عشاك عندي بعد ماتطلع من المستشفى ..
فيصل – يالله العافيه بنبدا موال العشا والغدا
ابتسم ماجد- سلوم العرب عاد وهذي عاداتنا لاطلع الواحد من الشر ...
فيصل – لا طلعت يصير خيـر ...
ماجد – ان شاء الله
فيصل – سمعت ان فيه عمليات ارهابيه
ماجد – حسبي الله عليهم هالمفسدين .
فيصل – اه يالقهـر بس ليتني ماتصوبت ابي اشوف بعيوني يوم يطيحون بقبضتنا
ماجد – انت ماقصرت وقواتنا ماقصروا هالعمليات الي عرفنا مواعيدها بسبب نجاح هالعمليه وهالشي اعلنوه اليوم بالاخبار
فيصل – انت بتكون من ضمن فرق العمليات ولا ماطلبوك
ماجد – للان ما عندي خـبر ..
اسرار العمـل وخصوصآ الامنيه لازم تكون ببير لان للجدران اذآن !!!!
ناظر فيصل بماجد ووصله الجواب ...فعلا للجدران آذان !
هز فيصل راسـه – خير ان شاء الله ..
وقف ماجد – يالله اشوفك على خير
فيصل – الله يسلمك ماقصرت ..
ماجد – تعرف الظروف ولا كان جيتك من بدري ..
هز فيصل راسه وطلع ماجد من عنده ..مايمديه يروح البيت يلبس ويطلع سلاحه ويمر على امه ..
/
/
>> بعد نصف ساعه ...
الساعه 10:45 م
دخل ماجد البيت تنحنح عشان تغطي ندى وجهها عنه ...وبعد دقايق دخل لقى ندى متغطيه بجلالها وريووف عندها جالسات يناظرن بالتلفزيون
ماجد – السلام
البنات – وعليك السلام
ريووف – وينك ماجد ماجيت الغداء
ماجد – كان عندي شغل وين امي
ريووف – عند جارتنا اكيد على وشك تجي الحين لانها مو متعشيه .
ماجد – زين
ريووف تناديه يوم طلع من الصاله – احط عشاك
ماجد – لا مايحتاج
وكمل طريـــــــقه لغرفته ...ناظرت ريووف في ندى
قالت ندى – شفيه ماجد
ريووف – مدري عنـــــــــــه مو على بعضه غريبه
ندى – غريبـه من جد !
دخلت ام ماجد الصالــــه – السلام عليــــــــــــــكم
- وعليكم
ام ماجد – اشوف سيارة ماجد هنا وينه ؟
ريووف – طلع غرفته
امها – حطي عشاه طيب
ريووف – يمـــــــــــه عيا يقول مايبي
ام ماجد – يمكن متعشي
ريووف بتردد – مدري
ما انتبهت ام ماجد لتوتر ريوف جلست ونادت الشغاله تاخذ عبايتها ...
/
بـ هالوقت ....
سكر ماجد ازارير البدله العسكـريه واخذ سلاحه معه ...
ونزل الدرج بســـــــــــــرعه وهو مار نادته امه ...رجع ودخل ..
ماجد – هلا يمه ناديتيني
ام ماجد – خير اللهم اجعله خيـر
ماجد – مافي الا الخير ان شاء الله
ناظر الدموع بعيون امه جلس جنبها وحب يدها ..- مابي دموع يمـه انا نذرت عمري لديرتي وهالشي انتي عارفته ادعيلي انا و الشباب الي معي
ام ماجد – الله يحفظك وانا امك ويردك لي سالـم غانـم باذن الله ..
حطت يدها على راسـه تقرا عليه اية الكرسي والمعوذات الثلاث ...حس ماجد بالكسينه وبحنان امه يلفه رجال بمنتصف الثلاثين ومع كذا قلبه مثل ماهو... طفل ماكبر ..!
حب راسها ويدها من كل قلبه وزي كل مره ...يصير فيه أي عمليه له ..تكون روحه مهدده وكانه رايح شايلها على كفه ...
ماجد وهو يوقف ويعدل لبسه – انتبهي على نفسـك يمـه وسلميني على اخواني ..
تهدج صوتها بالبكاء ...وهالشي عنده اعظـم من الموت ..اعظم من الخطـر ...يهون كل شي بالكون ولا دمعه امـه ...يموت ولا يشوف دموعها ....
ابتسم بحنـان وحب راسها مره ثانيه وطلـع وهو بالطريق دخل مشـاري البيت ..شاف لبس ماجد الرسمي وسلاحه وتغير لون وجهه صـــــــار اصفـر
مشاري بصوت مختنق – عندك عمليـه ..
ماجد – ايه عندي انتبه على امي يامشـاري وعلى خواتك ..
مشـاري بعصـــــــــــــــــبيه – شفيك ماجد مو اول مره تروح فيها عمليه لا تفاول
ماجد – ما فاولت بس حبيت انبهك عشان اروح وانا مرتـاح ...
سكت مشاري وباين على وجهه انه معصـب من كلام اخوه ...صحيح الفراغ الي تركه ابوه كان عظيم لكن ماجد قدر يعبيه ويكون لهم ابو واخو وكل شـي ... عاطفته له ماتنوصـف دمجت حب الاب مع حب الاخ وكونت حب اعظم واعظم ...
ضـم اخوه وقال من قلبه – الله يحفظك ويرجعك سـالم
هز ماجد راسـه وطلع برا البيـت ....
/
/
ركب سيــــــــــــارته ....
بعد ما حط سلاحه جنبه ..ربط حزام الامان ومشـى .,. اليوم هذا كان مجهد بكل ماتعنيه الكلمه من معنى وكله كوم والي صار بموقف سيارته الخاص بشركتـه كوم ثـاني !!!
بمجرد مارفع راسـه الا يشوف الاخت جانيت واقفه بكل وقاحـه وبكل جرأه لا ومتسنده على باب سيــــــــــارته ...شبت نيران الاشمئزاز بصدره وحس بكبده تتقلب من الاشمئزاز والقرف ..
مشى لها وقال بعصبيه – خيـر
جانيت – ماجرى اليوم كان مجرد تحذير يا ماجد
ياكرهي لاسمـي وهو طالع من فمـك !
مشى ماجد وسحبها مع يدها بقرف وبعدها عن سيارته بحركه سريعه جلست تتعثر شـوي وتطيـح لما اختل توازنها
صرخت فيه – لم يهني احد مثلما اهنتني
ماجد وهو يصارخ – انتي ماتفهمـين ماتحسـين انا مسـلم محافـظ بمجتمع متدين محافـظ بوطن محافظ ..
جانيت وهي رافعه حاجب – كل هذه الامور تستطيع انت بنفسك تغييرها انه قرار شخصي
ماجد – قرار شخصـي ..هه هذي اخلاقيات واساسيات تربينا عليها وتعلمناها من ديننا حنا مو حيوانات مثلكم ..انا بالنسبه لك مثل الطريق المسدود بعـدي عني ولا تخليني احظك براسـي
جلست تتحداه – وماذا ستفعل...؟؟
رفع ماجد حاجـــــــــب – مثلا الصفقه الي تسوون اتفاقيات من وراي عليها راح تكلفكم ضعف المتفق عليه بيننا
انصدمـت وصار لون وجهها اصفـر – ماذا..؟
ماجد وهو يفتح باب سيـارته – اظن كلامي واضح انا لحمـي مر وعدو لدود للي يطعني بظهري !
حاولت تترجاه – لكني لم اقصد لقد اجبرت صديق ابي على فعل ذلك ..ارجوك مااا..........
قاطعها ببرود – فات اوان النـدم ...
ودخل سيارته وسكـر الباب وتركها واقفه زي الخبله بوسط الشارع !!!
،
شال الي صـار اليوم من تفكيــــــــــــــره وركز على الجـــــــــأي ...على هالليلـه الخطيـره ...
تنهــــــــــــــد – آه الي نبي عيا البخت لايجيبـه ...
ارحـــــــــــم نفسـك ارحمها .. من الشقـا ارحمها
من الحزن ارحمها
من الخسـاره ..
لاتكون مثل الي يتعلق بشـي غصب لانه ماقدر يحصل عليه..
لاتكون كذا...
ضـــــــــــــــــــــــــرب بيده من القهر ..لا انا مو كذا ..اعرف ان الي احس فيه حزن حقيقي واعرف ان هالقلب ماراح يسكنه غيرها انسـان والاهم اني انحكم علي ابقى عزوبي طول العمـر ...!
يالله مايندرى كم من سنيني بقى!!
كم بقى حتى يكون فيه حد للوجع الي مالي قلبي ومحتل اظلوعي ووجداني !
كأن المســــــــــافه لمقر شغـــــــــله سريعه بسـرعـة البـرق وصوت الرعـد ...وقف سيـارته بالمواقـف المخصصه ونزل سلاحـــــــــــه في يده وروحه في تحضيـرات للتضحيه الي تعودت عليها .. لوهبها سـاعه اللزوم فدا للوطـن !
دخل ولقـى ربعـه وزملاؤه واصدقـاء عمـره موجوديـن متحضـرين والمكان في حالـة تأهب وتوتــــــر عظيم !
ماجد – السلام عليكم
- وعليكم السلام والرحمه وينك يا رجال تأخرت ..
نزل ماجد اغراضه – ابد سلامتكم تعرفون الوالده لاصار عندي عمليه لازم اطمنها ..
- أي والله مافي ارهف من قلب الام
هز ماجد راسـه – يالله نبدا شغلنا
وانكبـــــــــــــــــوا كلهم على وضع الخطط والمناقشات والاتفاق على كل شي ....
طلعوا كلهم فرق فرق كلن بمهمته الخاصه فيه ..
شاف ماجد واحد من زملاؤه قلقان وشكله متضايق – شفيك شكلك متوتر
قال زميله– زوجتي وانا جاي بالطريق للقسم نزلتها بالمستشفى تولد
رفع ماجد نظره له وركبوا السياره سوا ... كمل وهو يسكر الستره الواقيه من الرصاص – الله يقومها بالسلامه ويرزقك بالولد الي تنتظره سنين طويله ...
ابتسم الرجال بحزن – الله يمدني بالعمـر عشان اشوفه
ناظره ماجد بقوه – يارجال تفاءل خير شفيك مو اول مره نطلع فيها عمليه ...
قال الرجال وهو يمسـح عرقه عن جبينه – لا مو اول مره طبعا سنين وحنا نقوم بـ هالعمليات وياما فقدنا من اخوان وربع
ماجد – شهداء ان شاء الله ماخسـروا شي ماتوا بشرف لا تنسى هالنقطه
الرجال – عني ما اهتميت وانا اخوك تعرف الي مثلنا لازم يكون قلبه ميت مايعرف خوف ولا جبـن .. بس تفكيري بالولد الي ممكن يتيتم وهو ماشاف دنيا
تنهد زوجته من بكاها بالسياره وخوفها عليـه ضيقـت صدره ...وحس لحظه انه ظلمها بـ هالزواج
ابتسم لماجد وجلس يزرر سترته بدوره ...- الحرمه ضيقت صدري بالسياره وهالشي مخليني متوتر
ماجد بابتسامه – حنا اوادم وانا اخوك ربك كريـم والمكتوب ما منه مهروب توكل على ربـك وركـــز ورانا ليله طويلـــــــــــــــــــــه ,,,
هز الرجال راسـه ...
سـال واحد من الي معهم بالسيـــــــــــــاره – اظننا قربنا الموقع يالله البسوا الخوذات حقت الراس ..
قال ماجد بقوه – جهزوا الاسلحـه .... انت وانت وانت وانت تعالوا معي وخليكم وراي ، وانت وانت وانت مكانكم بالسطح على المبنى المقابل للموقع تمركزوا ووجهوا اسلحتكم
ناظر الرجال الي كان يتكلم معه قبل شوي – انا موب خويك
ماجد وهو يناظر في المكان بعين تركيزها قـــــــــــوي – انت خلك على راس الفرقه الي بتكون على السطح
الرجال – بس
ناظره ماجد بقوه – مو وقت نقـــــــــاش ..
قال السواق – وصلنـــــــــــــــا ...وهدا الجو بالسياره وكأن مافي احد موجود ..كان الظلام بالمكان كله ولبسهم الاسود مخليهم مخفيين مو واضحين .. توزعوا زي ماقال مـــــــــــــاجد ...
بانتظار اشـــــــارة البدايه .. وبانتظـار تدخلهم الخـاص !
دقيـقه ...
دقيقتـــــــــين..
عشــــــــــــر ..نصف ســـــــــــــــاعه ..ساعتيــــــــن ....................
كانوا واقفين متأهبين متخفين ...
الاتفـــــاق كان عمليه سريعه .. مافيها أي مشاكل وتعقيدات وهالشي بفضل دراسه وافيـه مستفيضه لكل الإمكانيات والمشاكـل الي ممكن تعترضهـم ...
كانوا رجال الامن بالعشـرات كلا جاهز بمركزه ومركزّ على الواجب الي ينتظره ... والسكون الي كان مالي المكان تبـدد بصـوت صـراخ وتنبيه لوجود امـن بالمنطقه واندفع الكل وندا الواجـب يلوح لهم وقدام عيونهن ومالي قلوبهم ...
اشـر ماجد لفرقته واقتحموا المكان ...على حيـن غـره وقدروا يعتقلون المجرمـين بدون خساير ...
صرخ واحد من فرقه ماجد – انتبه
التفتت ماجد بسـرعه ...كان واحد من المجرمين بيتهجم عليه وبيده سكيـن ... مسكها ماجد بيده ونصلها الحاد جرحه بكفه ..تدخلوا فرقته بسرعه وبعدوه عنه ...
- طمنـا فيك شي
جمع ماجد على كفه – لا جرح بسيط ...حتى انت يدك تنزف
رفع الرجال يده – شي بسيط السكين حاده عسى ماتكون مسممه ...
كان المــــــكان في حالـة استنفار تـام ... وكلا في شغله والعمليه ماكان فيها خساير لرجال الامن بس اصابات بسيطه وهالشي لابد منه ...كانت عمليه ناجحه بكل معنى الكلمه ...
قيدوا المجرميـن ... وتركوهم بيد الشـرطه !
طلع ماجد مع فرقته والفخر مالي وجيههم ..هالفخـر الي كان بوجيه الكـل ..سلموا على بعـض وتحمدوا لبعـــــــــــض بالسـلامه ...
مشوا للمسعفيـن عشان يشوفون جروحـهم ...جلس ماجد ينتظر الممرض يخلص خياطة الجرح الي بيده ..ضمده – خلصنا وحمد لله ع السلامه ماقصرتوا
ماجد وهو يوقف – هذا واجبنا ...
مشـى يشوف الاوضاع وباقي اصدقاءه وكانوا كلهم حيين ^_^ وهذا المهـم ..
ابتسم ماجد من قلب لما شاف خويه الي زوجته بتولد – قلت لك المكتوب مامنه مهرب
الرجال- ههههههههه أي والله احلى يوم بحياتي ولادة زوجتي وهالعمليه الي ترفع الراس وتبرد القلب
هز ماجد راسـه وهو مبتسم
/
كان الوقـت بحدود الظـهر لما رجـع بيتـــــــــــــه تعباااااااان له اكثر من 24 ساعه صـاحي ...
كان تعبان عرقان ملابسه السوداء مغبـره ..كف يده مضمـد ...
دخل البيت لقى العايله كلها موجودين وعلى اعصابهم بس ما انتبهوا لوجوده ...
ماجد – السلام عليكم
هبت امه وريووف والكل لــــــــــــــه ..
امه – الحمد لله على سلامتك
ماجد – الله يسلمك يمه
فــــارس – سلامات شفي يدك
مشـاري بلهفه - سلامات
ماجد – جرح بسيط ...اخباركم
ريووف – زينه اهم شي انت طيب
ماجد بابتسامه – زي ماتشوفين مابي الا العافيه انا بطلع اغير وانام صحوني لا اذن العصر لا تفوتني الصلاه
امه – احط لك غدا
ماجد – تغديت بالمركز مع اخوياي ابي النوم بـس
امه – اطلع يمه ريح ..
وطلع غـرفته ...وبالطريق لقى ندى طالعه من المطبخ – سلامات يا ماجد
ماجد – الله يسلمك يابنت العم ...
وكمل طريقه ..
ام ماجد – ياربي لك الحمد والشــــــــكر الي نجيته وحفظته
فـــــــــــارس – الحمد لله والشكـــــــــر
نزلت ندى ابريـق الشاهي ...- الحمد لله على سلامته ريووف لازم اليوم نسوي عشا عائلي ونعزم الشعب بسلامه ماجد
مشاري يستعبط – حنا يالشباب معزومين
ريووف – نفكر
مشاري – مالت عليكم يالثنتين ...
وهمس عند ندى – مالت عليك اغصان قلبي يا قلبي ...
كان فارس جالس جنبهم ورامي اذنه لهم ...
فارس وهو يحاول يكتم ضحكته – ههههههههه احححم ههههههههه
استحت ندى من فارس ..وناظرت في مشاري نظرة وعيد
ريووف رحمت ندى من الاحـراج , مشاري وحركاته الي مايخليها ابدا
مشاري مسوي ثقل – اجل انا بعزم الشباب باستراحه وانتم بالبيت
ريووف – اوكي اتفقنا ...
/
>> بالمطبخ
ناظرت ندى في ريووف – اقول بدال مانطبخ ونتعب نطلب عشا من برا
ريووف – تهقينه
ندى – ايه نبي نستانس
ريووف – اوكي العشا ففتي ففتي بيننا
رفعت ندى حاجب – نو نو الي بيدفع العشا مشمش
دخل مشـــــــــاري المطبخ وقال بابتسامه – كني سمعت اسمي
ريووف – هههههههههه ان مااختفت هالابتسامه عن خشتك لاسمعت وش عند ندو ماكون ريووف
مشاري مسوي ضعيف – خير وش صـاير
سوت ندى ملامحها جـديه – قيمـة العشا عليك ...
مشاري وهو مبتسم – عارف مو قلت بعزمهم على استراحه
ريووف – هههههههههههههه
مشاري – وجع يوجع ابليس علامك تضحكين
ندى – انت بتدفع قيمة عشانا بعد
سوا مشاري مصـدوم – قولي قسم ...
ندى بتنفجـر ضحـك – قسمين
ريووف – هههههههههههههه قلت لك بتختفي هالابتسامه
مشاري – مصـره
ندى – يــــــــــس ..
مشاري – طيب موافق .../جلس يتحلطم/ ..انتن تعزمن وتطيح براسـي
ندى وهي مبتسمه – قلت شي ...
مشاري – لا لا سلامتك طال عمرك
ندى – هههههههههه على بالي
مشـاري – تسلم لي هالضحكه ياناس,,, وقرب يضمها حطت ريووف يدها على عيونها تستهبل وطلعت من المطبخ.
/
/
/
>>> بعد المغـرب ...
عزمت ندى وريووف بنات ابو متعب وجحدن ام طارق وبناتها مو ناقصات هـم وغـم ...جهزن القهوه والحلا وكل شـي ..
ام ماجد – ما صحـى ماجد يا ريووف
ريووف – انا صحيته عشان يصـلي المغرب واظته صحى
ام ماجد –زين وانا امك جيبي له قهوه وحلا خليه يتقهوى لا نزل
ناظرت ريووف بالساعه – ان شاء الله احطها له من عيوني ...
بنفس الوقت دقت جود على زوجها واستأذنت منه تروح للعشا وما قال شي وافق ...سمعت صوت الوليد تحت ينادي لبست عبايتها واخذت شنطتها ونزلـت ...
............>>> بعد عشر دقايق
وصلوا بيت ماجد نزلت هي وامها ودخـلن ...
ام ماجد – ياحيا الله من جانا
ام بندر – الله يبقيك
ام ماجد – هلا ببنيتي جود
سلمت عليها جود – هلا بك يا عمـه
ام ماجد بعد ماجلسـن – اخبار زوجك يمه عساه بخـير
ابتسمت جود – كلمته اليوم العصر وهو بخـير متضايق يبي يطلق من المستشفى
ام بندر – من يلومه محد يحب المستشفيات
جود – هانت كلها ايام ويطلع هذي اصابه رصاص مو سهله ...
ام ماجد – الله يعافيك ويخليه لك ...
تلفتت جود – وين البنات يا عمـه ...
ام ماجد – ندى فوق وريوف بالمطبخ ..
وقفت جود – زين بروح لها بالبيت احد
ام ماجد – مافيه االا ماجد ويلبس ملابسـه بينزل ...
هزت راسها ...وراحت للمطبخ تدور بنت عمها الغاليــــــــــــه ...
دخلت المطبخ وشافت ريووف لابسه فستان صيفي تحت الركبه ورافعه شعرها بشباصه بشكل فوضوي – هاااااااااااي
التفتت ريوف ورمت السكين الي معها – هااااااااااااااايين هلا وغلا
سلمت على جـــود – شخبارك شمسويه
جود – الحمد لله زينه انتي شخبارك
ريووف – الحمد لله زينه ونـص ..
جود – طمنيني لايكون ماجد مصوب ولافيه شي
ريووف – جرح بسيط بيده ومضمد
جود – الحمد لله الواحد صار يوسوس من ورى هالعمليات ..
ريووف – أي والله
سمعـن صــــــــــوت رجـال يتنحنح عشان لو فيه بنات يتغطـن ، ريووف – هذا مجود لحظه اودي القهوه لهم وبرجع
جلست جود على الطاوله ..وراحت ريوف تودي القهوه والحلا
،
،
بالصاله دخل ماجد لقى ام بندر – السلام عليكم
ام بندر – وعليك السلام سلامات ماتشوف شر
ماجد – الله يسلمك الشر مايجـيك ..جلس معهن بالصاله دخلت ريووف بالقهوه والحلا ...ناظر بريوف – في احد بالبيت
ريووف – خذ راحتك مافيه الا جويده وعندي بالمطبخ بنسنع القهوه للجايين ...
قهوتهم كلهم وطلعت من الصاله ...قالت ام بندر لماجد – عسى اخوياك وانا امك ما تصوبوا ولا جاهم شي
ماجد يمزح – اشياء خفيفه ..فلقات على كدمات على شدوخ
ام بندر وماجد – هههههههههههه
ام ماجد – هذا ماجد وهذا جوابـه لكل سؤال
ابتسم – اسرار امنيـه ...
ام بندر – الحمد لله الي جابها على قد كذا مو مثل فيصل زوج جود عظم الكتف متأذي واجد من الرميـه
ماجد – انا زرته امس وشكله بخير ما تاثر واجد من الطلقه
ام بندر – الحمد لله على كل حال
ام ماجد – مازارته جـود لسى.؟
ام بندر – مايبيها تجـي الله يحنن قلبه بس ..
ام ماجد – يوه وراه
ام بندر – مدري عنه تبين الصدق معه حق بس جود من يفهمها لا عاد تاكل ولا تشرب زي الخلق من يوم ما دخل المستشفى ...
جلس يناظر ببيالة الشـاهي حقته وهو مايشــــــــــــوف من بد كل هالسوالف الي بالكون مالقيتن الا ذا السـالفه ..يعيـن الله ..يعيـن الله !!!!!
ابتسم فجاه لما تذكر خويه وزوجته الي بالمستشفى بتولد فتح جواله ودق عليه بعد الرنه الثانيه رد
ماجد – السلام عليك
خويه – وعليك السلام
ماجد – بـــــــــــشر شخبار الاهل!
خويه – ابشرك جابت ولد قبل نص ساعه وسميته ماجد على اسمك
ماجد بقوه – ابشر بالسمايه وانا ولد سلمان والف مبروك يتربى بعزك يارب
- الله يسلمك وعقبال مانبارك لك
ابتسم بحزن – ربك كريم يالله ماطول عليك فمان الله
- فمان الله ياهلا ..
ام ماجد – من ذا الي مسمي باسمك
ماجد وهو مبتسم – واحد من اخوياي يوم جانا المركز امس كان مودي اهله المستشفى والولد توه شرف قبل نص ساعه
ام ماجد بعاطفه – الله يخليه له ويصلحـه يارب
ماجد – اللهم امـين ... تورطنا بالسمايه الحين (قالها يمزح)
ام بندر – اذا انت ماعطيت سمايه اجل من بيعطي
ماجد – ههههههه الله يعين ....
ياشينـها لاصار تفكيرك بوداي وقلبك بوديـــــــــــان ..
ياشينها لا صـرت بحضورك مجرد جسـد ...وروحك بمكان ثاني هايـمه ...
ياشينها لاصرت تسمع همسها
..وتشم ريحة عطرها
........... وتكون القريب البعيـد ..!!!
،
أزيف ضحكتي .. مهما بقى فـي خاطـري ونّـات "
" وأضمد طعنتي .. مهمـا ظـروف الوقـت ذلنّـي
وترى لو شفتني أضحك وأجامل .. وأكثر الضحكات "
" ترى كل السنين اللي مضتلي .. مـا ضحـك سنّـي
،
كانت واقفه عند باب المطبخ ظهرها لريووف الي تكلم الشغاله تشـرح لها شغله ... ماحست الا دمعتها نازلــــــــــــــه ..الله يصبـرني كلكم اذيتوني بلا ذنب وخطيـه ... ولد عم عشمـني فيه وخلاني ابني قصور احلامي عشـان خاطر عيونه وبعدين تخلا عني ..وزوج مايبيـني ولا يهتم فيني واهل متقلبيـن مزاج !!
ببيت بندر >>...
جلس بندر يزين شماغه قال بهدوء – ماخلصتـي
ناظرته البتول وهي من الداخل مقهوره لمتى البـرود ؟.!!لمـى الجفاف بالمعامله صحيح اخطيت بس الي تجرعته كفاني العمــــــــــــر كله بالي فيه ..خلاصيابندر تضررت كرامتي من صدودك لين قالت يارب العافيه انا سويت الي علي تبيني روحا ةقلبا انا موجوده جنبك اقرب من انفاسك ومدى شوفك...!
ان ماعذبتـك لين تقول التوبه ماكون البتول ...كانت جاهزه ولابسه ناظرت فيه معطيها اشكل ولاكانها موجوده صحيح انه يكلمها ويسولف معها بس مو بندر الي تعرفه ..مو بندر !! هذا انسان بارد متحفـظ بشكل كـبير وقاسي وبخيل في عطاه واحاسيسه..ضحكت من نفسها بالسر سبحان مغير الاحوال الي يغير ولا يتغيـر
ناظرته من طرف عينها وشافته تقريبا جاهز فكت السلسال الي سكرته بعد علـــــــــــه ومعاناه ..وطيحته بالارض..
قالت بصـــــــوت يسـمعه – افففففف من هالسلسال عقدني
بندر – شفيك انتي و هالسلسال
البتول ببراءه – عيا يتسكر معـي ..
بندر – البتول ترى تاخرنا مره وعلى بال مانزلك ببيت اهلك واروح لاستراحه الشباب مشوار
البتول تستهبل– شسوي طيب تبيني اروح ماكشخت ويصيرن خواتي احلى مني
ابتسم – انتي حلوه مايحتاج
البتول – ايه اكل بعقلي حلاوه ..ياربي شسوي مع هالسلسال رفع ضغطي ...
افهمهــــــــــا عاد يا الله يا بندر والله انك تنكه !!!
تنهد ووقف وجا لها – هاتيـه
ابتسمت وعطته له وخلت وجهها بوجهه ارتبـك واشر بيده تعطيه ظهرها – تيـرن
البتول تستهبل – وشو
بندر – اقول ديوري بلبسك السلسال
البتول بملامح غبيه – طيب سكره احد قال لاتسكره
بندر بضيق – شلون بسكره وخشتك بخشتـي
البتول بدلع- شفيها خشتي تجنـن
ابتسم وعيونه تلمع – وانا اشهـد بس اذا تبين تروحين ديوري اشوف
كانت مستعده تتهاوش بعد يهددني ماروح لبيت ابوي ...ناظرت في عيونه والي شافته مو تهديد او تحذيـــــر شي ثـاني حمر وجهها وعطته ظهرها ...
- هههه زين فهمتي علـــــــــــــــــــــــــــــــــــــــــــي ...اوكي خلصنا ...الا وريني وش المكتوب فيه ..
طاح قلبها ومسكـت التعليقـه بقوه...- مافيها شي
بندر بالحاح – وريني طيب ؟؟
وش اوريك حرف اسمكـ يعانق حرفي ..معصي يابندر ..
مسكت التعليقه الفضيه الي على شكل قلب بيدها بقوه اكبر ، قالت تلهيه – يو ناظر تأخرنا يالله مشينا..
قدرت تصرف نظره عن هالسالفه الي ماوراها الا إذلال لها ..اخذت عبايتها وشنطتها وطلعت...ماله مزاج يلح عليها اذا ماتبي هي حره وبعدين هو مو مهتـم مره يعرف وش مكتوب فيه...
مو مهتم
ولا مهتـم ويكـــــــــــابر!!!!!!
،
>>> بيت ماجد ....
بعد ماتجمعن البنات كانت جلسـه خياليه ..ومن احسن مايكون ...
قالت البتول – فكه من ام طارق وبناتها
امـــــــاني – حراام عليك شتبين فيهم
البتول – بلاك ماشفتي شسون باخر جمعه
اماني – ههههههههههههههه قالت لي ريووف مو صاحيات الله لا يبلانا ...
اريام – أي والله الله لايبلانا ولا يقلل عقولنــــــــــــــا
ناظرت اريام في اختها السرحانه – جود وين وصلتي ...
جود – هاه..لا ابد معكــــــــم
اريام – شفيك اليوم مو طبيعيه
البتول – من يوم حادث فيصل وهي كذا
جود – حراام لا تبالغين
البتول – والله انك مهمومه من بعد الحادث
امانـي – شي طبيعي زوجها الي بالمستشفى
البتول – غير انها ما زارته
اماني شهقت – ماتوقعتها منك يابنت عمي زوجك مريـض ومارحتي له
جود – هو معيي اروح له مو بيدي
سكتت اماني وشافت وجيه البنات متغيره فقالت تغـير السـالفه اصــــــــــــــــرف ...- شصار على وظيفتكم انتي وريووف
جود – ان شاء الله قريب تخلص المعاملات كل شي مسهل ...
اماني – حلـو
ريووف – أي والله ملينا من البيت وجلسته ...
جود- صادقه تغيير وتحسـين بكيانك ...
اماني – متى بيطلع من المستشفى
جود – احتمـــــــــــــال على الاسبوع الجاي او الي بعده لسى ما قرروا الاطباء ..
اريام – الله يقومه بالسلامـه ...
جود – اللهـم اميـن ....
جت ندى وجلسـت ,,,
البتول – وين اختفيتي فيه
ندى – بالمطبخ
البتول وهي تغمـز – من اليوم بالمطبخ
ندى – هههههههههههههههههه كلا يشوف الناس بعين طبعه
البتول ببراءه – ماقلت شي ...
ندى – مره هههههههههههههههه
البتول للبنات – بنات انا قلت شي
البنات- لا ابدا
وجلسـن يضحكن عليها ...ومرت هالسهره حلـوه مثل أي سهره تجمع البنات سوا ...بدون عذال ^^
/
/
/
((بعد اسبوعيــــــــن وكم يـوم))
قال بندر لجـود ....
- تبين شي ناقصك شي
جود – الله يسلمك بندوري يالله اشوفك على خير ...
وسكرت سيارة اخوها وفتحت البيت بالمفتاح ودخلت ...
من زمان عن بيتها وفيصل بيكتبون له خـروج بعد العصــــــــــر .. زين ان معها مفتاح ولا كان ازعجتهم بـ هالصبح عشان يفتحون لها الباب ...
دخلت مامعها الا شنطة يدها ماطبت هالبيت ابد وتحمد ربها ان لها ملابس ماليه الدرج بغرفتها ببيت ابوها ...
دخلت وناظرت في الصاله مافي احد هدوء يعم المكان احسن بعد مالها خلق احد منهم ...
طلعت الدرج لبيتها ووصلت له ثم فتحته بالمفتـــــــــــاح ودخلـت ..كان البيت مغبر له زمان ماتنظف ..نزلت عبايتها يالله مايمديها ترتب بيتها وتجهزه زوجها بيطلع ...رفعت شعرها بشباصه ولبست بيجاما وسيعه ناعمـه وبدت تنظف وتمسح وتنفض...مر عليها وهي تشتغل ثلاث ساعات مسكت ظهرها بيدينه انكسر من الشغل... حست انها ميته جوع ودخلت المطبخ تدور شي تاكله وتمشـي حالها بأي حاجه ..جهزت غداها وتغدت بسرعه ماعاد بقي الا ساعه على اذان العصر وهي مالبست وكشخـت غسلت صحون الغداء ... واخذت شاور سريع ...لبست تنوره جينز قصيـره وبدي ملون الوانه تبهج العين زينت شعرها وخلته مالس وناعم ... حطت ميك اب خفيف ... وبكذا تكون خلصت كل شي راحت للمطبخ تسوي قهوه تتسلى لين يجي الانتظار صعب وقاسـي ..والاهم انها ماتدري عن ردة فعله بعد الي صار امس لما اصرت تجي للبيت بينما هو مصر يمرها ياخذها اخ من عنادك يا فيصل ...
ماتدري كم راح من وقت الا وتسمع باب البيت ينفتح ويسكـر ..حست بالفرحه لرجوعه البيت ..طلعت من المطبخ بعجله ..وشافته وملت عينها ابتسمت – الحمد لله ع السلامه اخيرا نور البيت
فيصل – منور باهله اجل مشيتي الي براسك وجيتي
حست بطعنه الخيبه بارده بصدرها ابتسمت بشجاعه – ابي استقبلك ومابي اكلف عليك
قربت منه بتسلم عليه بس خافت من صده وهي مو متحمله صد زود كفايه الي فيها قربت منه وناظرت بيده المربوطه على صدره – كيف يدك
فيصل – زينه ماعليها طلعي لي ملابس باخذ دش ...
جود – ابشـر من عيـوني ...
دخلت غرفتها معصبـه بيطق براسها عرق هذا جزاي وانا متحمسه بشوفك مشتاقه لوجودك كزوج لي كشريك حياه مهما كان بيننا اختلافات ..الا ان الود موجود !
طلعت ملابسه وجهزتها له ...ناظرت لقته عند باب الغرفه يناظرها ..ضبطت كل شي ومشت بتطلع تجيب القهوه وتزهب الشاهي ...وقف بوجهها ماتحرك...حط يده على خدها ثم دخل عشان يبدل ملابسه ..
جود- تبي مساعده
فيصل – لا ما يحتـاج بس ابي مسكن لوجع الراس مصدع
جود – الدرج الي عندك فيه المسكن تلقى علبته بيضاء
وطلعت المطبـخ ...تزين القهوه والحــــــــــــــلا ...
123456 ...اهدددددددددددددددددي ...مو نيه شينه منه ...مو كره ...هذا طبعه ...انتي كنتي عايشه مع اخوانك العيال وتعرفين تقلبات المزاج عندهم وتعرفين ان سوء الطبع راجع لعوامل كثيره...ياطبع ياضغوط يا تنفيس لالـم جسدي ...
بلعت ريقها وكملت شغلها ...
لبس فيصل ملابسه شوي شوي ...اففففففف من هالصداع ومن هالناس الي جايين يتحمدون له بالسلامه تعبان ماله خلق احد ...وهالصداع كملها ...
مشط شعره بسرعه وفتح الدرج يدور الدواء الي قالت له عليـه جود ..
لقاه بس لفت انتباهه علبه لونها مميــــــــــــز
رفعها وهو عاقد حواجبـــــــــه .. ولما عرف وشهي قبت جنونه براســـــــــــه وطلع من الغرفه مايشوف قدامه
:
:
:
انتهى البارت ...
نلتقي بنبض جديد وبارت جديد الاحـد الجاي ياحبايبي قراءه ممتعه
|
12-07-07, 03:59 AM
جديد مواضيع قسم القصص المكتمله من وحي قلم الاعضاء
العرض العادي
