مازالنا نتـصارع ... مازلنا ننتظر فجرآ جديد
اه منك يا للحظــــــــــات ..
شهور طويلـه ..عشنا فيك وعشتي فينـا ..
ننتظر .. نترقب .. نبي نشوف على أي مرسى بنرسى .!
على الوداع .. والا اللقى بعد الوداع !
احسها تطلع بصعوبه من ثقل وقعها على قلبـي ..
اليوم ..
وهاللحظـه ..
اقدم لكم البارت
ماقبــــــــــل الاخــــــــــــــــير
من
سرقتك بالزمن لحظه ..وعشتك بالفراق اوقات !
/
الفصل الرابع والعشرون ..
(الجزء الثاني)
*
قالت اسماء لنجوى وهي تزيـن شعرها – احس بيغمى علي من الحماس والربكه تخيلي بعد خمس دقايق بشوفه وبيشوفني ..
نجوى – ههههههه لا تموتين من الفرحه قبل لا تشوفينه المهم البسي شال على الفستان ..
ناظرتها اسماء – نعم يختي
نجوى – مجنونه انتي بتطلعين له كذا وانتي اول مره تشوفينه الفستان مره كاشـف من فوق
اسماء – يووووه لو داريه ماشريته ياربي
نجوى – انتي حره بيجيك الحين طارق وان شافك كذا تعرفين وش بيسوي فيـك
خافت اسماء من طارق واخذت الشال حقـــــــــــــها ...
قالت نجوى بقهر – حسره علي لاطلب يشوفني ولايحزنون
اسماء وهي تغمـز – ايه بس العرس الاسبوع الجاي وش هوله يشوفك
نجوى – من جد انا مقوره ان ابوي وافق على موعد الزواج احد يتزوج بعد اسبوع لا وعائلي بعد
اسماء – خلاص انتي مره تزوجتي بقاعه والحين سوي تغيير
نجوى – امحقه من عرس الا على الطاري الاخ ماجا شفتي
اسماء – ماله وجه يجي تخيلي بس جاي وراز عمره قدام رجلتس الجديد
نجوى – هههههههه رجلي القديم مع الجديد والله فلـه ...
دخلت عائشـه الغرفه – اسماء يالله طارق ينتظرك تحت عجلي
ناظرت اسماء في خواتها بإرتباك – بنات زيـن شكلي طمنني
عايشـه – تجننين ولون شعرك البني مره حلو وهادي يالله اخلصي ترى كلها نص ساعه وبتطلعين من عنده لا تسنترين
اسماء شوي وتبكي – طيب طيب لا تنافخين
عائشه – ههههههههههه مانافخت وجع ,,
طلعت اسماء مع خواتها لتحت وكان طارق واقف مع امه يكلمها قال لما شاف خواته – مبروك
-الله يبـارك فيك
ناظر في عائشـه – عقبالك ان شاء الله
عائشه ماردت من الحيا ..ناظر في اسماء – يالله زوجك ينتظر بالمجلـس
اسماء بصوت مخنوق –طيب
سمت بالله ودخلت المجلس مع اخوهــــــــــــا كان زوجها ينتظرها جلست بعيد عنه شوي ... وطلع طارق من الغرفه وماكانت تبي تجلس بلحالها لانه غريب عنه وماقد شافته بحياتها حتى لما حاولت تلمحه المره الي جاهم فيها ماقدرت ...
قال – شخبارك يا اسمـاء ..
ناظرته لما استجمعت شجاعتها – الحمد لله بخـير .
كمل يسألها شكلها مو ناويه تتكلم اليوم – متى تبين العرس
بلعت ريقها – على كيفك
زوجها – بالعيد شرايك ..
حمر وجهها – الي تشوفـه ,,
-طيب خلاص بجيب لك المهر بكره ..
اسماء كأنها ببغاء وهي تردد كلامه – طيب
ناظر في ساعته وقال – يالله مابي اطول عطيني رقمك ...
عطته رقمهـا وقال – يالله سلام .
وطلع من المجلـس وين الي بتطلع بعد نص ساعه لهم ساعه الحين مع بعـض ..وقفت – سلام .
ابتسم لها ابتسامه لمسـت قلبها وطلع ..جلست مكانها ترتجف لايكون حبته وهي ماتدري مايمديها بعد شوي دخلن عليها خواتها ومسكنها تحقيق ... قال نجوى – العرس بالعيـد
اسماء – ايه بالعيـد
نجوى تستهبل عليها – ماعندك وقت
اسماء وجهها حمر – شدخلني انا هو الي قال
نجوى وهي رافعه حاجب – وانتي ماعندك شي تقوليـنه
اسماء وهي ترفرف برموشـها – موافقه على كل شي
ناظرت نجوى في عائشـه وجلسن يضحكن عليها يامثبت العقل والديـن
قالت نجوى – حسره علي ماكلف عمره يسال عنـي
عائشـه – بكره بنطلع نجهز لك ومستعجله على شوفته كلها عشره ايام وتشوفينه
نجوى – مو عشره اسبوع
عائشه – طيب لا تاكليني اسبوع ارتحتي كذا
نجوى تستهزء – ايه ارتحت ..
دخلن البنات داخل قالت اسماء لامها – يمه كم مهري .؟
امها – 70 الف
ناظرت اسماء بصدمه – يمه انا قايله مية الف
ناظرتها امها بنص عين – اقول اسكتي لايسمعك ابوك ولا واحد من اخوانك
قالت اسماء وهي شوي وتبكي – وش بتكفي 70 الف علميني
امها – تكفي وتزود وان ماكفت انا ازيدك ارتحتي ..
طلعت غرفتـــــــــها ضاربه بوز ونص ... قالت ام طارق لنجوى – وانتي بكره اطلعي جهزي لعرسك مامعك وقت
نجوى – مايمديني على فستان الزواج مافيه فستان يجهز في سبع أيـام بس بدور لي فستان سهره فخم وخلصنا مادام الزواج عائلي حتى عماتي مابيهن يحضـرن ابدآ مابي احد..
ناظرت ام طارق فيها – من جدك انتي؟
نجوى – ايه مابي اشوفهن من زود المحبه بيني وبينهن
ام طارق – خلاص لاتعصبين ماراح نعزم احد
ابتسمـت وراحت لغرفتها تبدا تفكر وتخطط لجدولها هالاسبيوع عشان تخلص التجهيزات
دق جوالها ..>> نوف تتصل
ابتسمت نجوى – هلا وغلا
نوف – هلااااا فيك شخبارك
نجوى – ابدا الحمد لله زينه
نجوى – الف الف مبروك الملكه
نجوى – يبارك فيك عقبالك
نوف – متى الزواج ..؟
نجوى – اخر الاسبوع ؟
نوف وهي تشـهق – مايمديك تتجهزين او تعزمين احد
نجوى وهس تسكر باب غرفتها وتجلس – ماني عازمه احد والتجهيزات بجيب الاشياء الاساسيه والمهمه ...
نوف – الا شخبار عمتك الي ما تتسمى ..
نجوى – كلهن مايتسمن أي وحده تقصديـن
نوف – العله الي على قلبي جويدوه
نجوى – شدراني عنها المفروض انتي الي تعلميني بأخبارها ...
نوف بخبث – شلون اعلمـك وهي عندكم لها اسابيع
انصدمت نجوى – وشو عندنا وين
نوف – تهاوشت مع فيصل وضربها قدامنا
طلعت عيـون نجوى قداااام – ضربها ضرب جود هههههههههه وليه
نوف بحقد – لانها مدت يدها علي يوم جبت سيره ماجد
نجووى – يوووووووو لا ابي السالفه كلها ...
:
بعد ساعه طلعت نجوى من غرفتـها وراحت لامها في الصاله
نجوى – يمه
امها – نعـم
نجوى – ابيك تعزمين عماتي الحلوات
ناظرتها امها من فوق لتحت – تستهبلين انتي ساعه موافقه وساعه لا
نجوى – لا اتكلم من جدي طلعت الاخت جود متهاوشه مع زوجها لها فتره وعند اهلها وضاربها بعد ابيها تحضر عرسي ابي احرهـا
امها – خليها تولي هي وزواجها انتي وش تبين فيها ركزي على جهازك اصـرف
نجوى – بركز مافيها شك بس ابيها تحضـر الزواج
امها – اففففف منك لابغيتي شي خلاص بعزمهن الله يعيـن ..
ابتسمت نجوى ابتسامه كلها وعيد وراحت غرفتـها ..
/
/
... بعد ثلاث ايام ...
جا عمـر من جده .. قالت له جود وهي رافعه حاجب – هاه وين الي له مدري كم اسبوع بيجي ويكنسل
عمر – الشغل كلما قلت خلصت تطلع لي سالفه اصلن مامعي الا الخميس والجمعه مقدر اطول لازم ارجـع
جود – طيب خير البر عاجلـه ...
عمر وهو يصد بعيونه عنه جود – اممممم بما اني بدخل حرب طاحنه مع ولد عم صديقتك ابي على الاقل اتاكد انها حلوه
ناظرته جود – هاه
عمر – ابي اشوفها مافيها شي شوفه شرعيـه
جود – هههههههه طيب البنت حلوه انا قلت لك
عمر – ابي اشوفها طيب
جود – طيب لا رحتوا تخطبون قل لابوها بتشوفـها ..
عمر – عادي يعنـي
جود وهي تهز كتوفها – ايه عادي ماطلبت شي حرام
عمر – طيب خلصنا مني ومن عرسي .... ناظرته جود وهي رافعه حاجبها
... وزواجك انتي لكم كم اسبوع منفصلين والحل ..
جود – مافي حل انا مرتاحه كذا
عمر – لا معلقه ولا مطلقـه
جود ببرود – عليـك نور
عمر بعصبيـه – جود بلا هبــــــــــــــل
جود – عمر ما استهبل الي سواه فيني مو قليل وبعدين انا توني باديه في وظيفتي الجديده والحياه قدامي
عمر – الكلام معك ضايق
جود بحزن – يالله اسفهني مثل اخوانك
عمر حن قلبه عليها – كلنا تهمنا مصلحتك ياجود لاتزعليـن
ابتسمت غصب – مو مشكله نعود لمحـور حديثنا ..
عمر – خلاص انا بروح لابوي عشان يكلم ابو البنت ونتفق على موعد
جود – الله يوفقك عموري ..
ابتسم لها وقام يدور ابـوه ...لقاه جالس مع امه والعايله موجوده – السلام عليكـم
-وعليكم السلام
جلس جنب ابوه وبعد مده الكل صار لاهي الي يكلم والي يسولف مع الي جنبه والي يناظر بالتلفزيون قال – يبه
ابو متعب – نعم
عمـر – ابيك تكلم ابو البنت الي بخطبها عشان نحدد موعد ونخطبها
ابو متعب – انت مصـر خلاص تبيها
عمر – ايه يبه
ابو متعب – سمعت انها لولد عمها
عمر – ولد عمها انسان مريض وهي مو له ولا كان ماخطبتها وجود تعرفها وعلمتني انها ماتبيه واهلها مو قادرين يفتكون منه
ابو متعب – اللي يريحك وانا ابوك
عمر – الله يسلمك يبه
ناظر عمر في امه لانها كانت تكلمه طلع ابو متعب جواله ودق على ابو اريـج وبعد السلام عرفه ابوها وجلسوا يسألون عن احوال بعض قال ابو متعب – والله حنا نبي نسبكم وكلمتك عشان تحدد لنا الوقت الي يناسبكم عشان نجيكم
ابو اريـج تفاجا وقال – حياكم الله أي وقت يبو متعـب .. انا موجود ببيتي العصـر ماطلع الا لابرد الجو شوي
ابو متعب – اليوم طيب يناسبكم..
تورط ابو ريج معنى كلامه انهم بيجون بعد ساعتين ... قال – حياكم الله
سكر ابو متعب بعد ماخلص ..قالت ام بندر – هاه اليوم بتروحون .
ابو متعب – خير البر عاجله
عمر شوي ويتشقق من الوناسـه ..دق ابو متعب على ابو طارق عشان يحضر معهم ويجيب عياله ..ودق على ماجد بعد وقال له يجي هو واخوانه عشان يروحون سوا ...
/
قبل صلاه العصـر بربع ساعه
نزل ماجد من غرفته وهو كاشخ ومتعطـر شافته ريووف – ياسلااااااااام وش هالكشخه
ابتسم ماجد – بنروح نخطب
طلعت عيون ريووف وفهمت غلط – بتخطـــــــب جد
ماجد – مو انا عمي بيخطب لعمـر وكلمني عشان اروح معهم ...
ريووف تبخرت حماستها وقالت بنبره عاديه – طيب الله يوفقه من بيخطب
ماجد – مدري ما سألت ما امداني الوقت من الدوام لغرفتي غيرت ونزلـت ...يالله متواعدين نصلي بمسجد حارة عمي عشان نروح كلنا سوا ..
ريووف – طيب ..
طلع ماجد من البيت بعد شوي الا مشاري نازل ومعه ندى لابسه عبايتها ... ريووف – ياعيني الحبايب بيتجمعون هونيك
مشاري – عمي بيذبحني تاخرت ماجد راح ولا لا
ريووف – توه طالع ...
ندى – ريووف امشي معنا
ريووف – لا ويـن لاصارت الملكه بنتجمع وننبسط
ندى – ياااااااااااااارب
مشاري – يالله مشينا ...
ندى – سلام
ريووف – مع السلامه ...
وصلوا بيت عمهم على اذان العصـر وسلموا وهم واقفين ..قال ابو متعب – يالله مشينا نصلي عشان نحرك للناس ..
وطلعوا كلهم ... دخلت ندى عند البتول وجود الي مستانسات مره ...
ندى – سلااااااااااااااااااااااااااام
البنات – وعليكم السلام
ندى – ماني مصدقه ان عمر بيتزوج لا ومن اروجه والله وناسه
جود – عسى الله يسهلها ويفكهم من شر ولد عمها
ندى وهي تغمز – عمر ماينخاف عليـه
جود – الله يوفقه يارب ويسعده
البتول – اللهم اميـن ... يالله ندخل داخل نتقهوى ونجلس مع عمتي
ندى – يو نسيت اسلم على امي
جود – هههههههههههههههه الله يخلف بس
ندى – يالله بس تنسون الواحد انتم كل شي
البتول - حطيها على روسنـا
ندى – ايه اكيد بحطها ياراس البلا منك لها
جود – ههههههههههههه الحمد لله والشكر
دخلن البنات عند ام بندر الي الابتسامه ماليه وجهها سلمت ندى على امها وجلست جنبها
ندى – شخبارك يمه
ام بندر – الحمد لله زينه انتي شخبارك واخبار ريوف وام ماجد
ندى – كلهم بخير الحمد لله
دق التلفون جنب ام بندر وردت عليـه – وعليك السلام ... جعله مبروك ان شاء الله ..ايه ان شاء الله ..بقول للبنات زين الله يسلمك هلا فمان الكريم
ناظرن البنات في بعض قالت جود – من ...
ام بندر – ام طارق تعزم على عرس نجوى بيكون عائلي وملزمه تجن
ناظرت جود – ماني رايحه
ام بندر – تبين تزعلين اخوك
جود – اخوي وش يزعلـه زواجها الاول وحضرته مو حلا
ام بندر لندى – عقلي اختك ياندى
ندى – مالك داعي ابو طارق بيزعل
جود طفشت على الاخيـر – والله الي بيزعل يزعل بكيفـه انا روحه ماراح اروح
البتول – من هنا ليوم زواجها يصير خير خلونا نستانس بخطبه عمـر
ندى – عين العقل ...
وقفت جود وشكلها متضايقه ندى – على وين
جود وهي تبلع غصتها – بروح المطبـخ
البتول – ليه
جود – جوعانه وبجيب لي شي أكله ...
وطلعت من الصاله ...
ناظرن البنات في بعض
قالت ندى – جوعانه ورى ماتاكل من الفطـاير الي ماليه الطاوله ..
ام بندر – تاخذ راحتها اهم شي تاكل من يوم ماتركت زوجها وحالتها النفسيه تعبانه ومهمومه
ندى – طيب وش صار على الموضوع ماجا زوجها
ام بندر – عقب جيته ذيك ماعاد ندري عنه
ندى – صدق مافيـه خير
ام بندر – الله يهديهم بس ...
ندى – اللهم اميـن!
دخلت جود المطبخ ومسحت دموعها خير صايره ما تتحمل شي ينقال لها ربطت شعرها عن وجهها وفتحت الثلاجه تحس نفسها ميته جوع ... وبدت تسوي لها ساندوتش ... وقفت الشغاله تناظر فيها وعيـونها شوي وتطلع من محاجرها ناظرتها جود – شفيك
الشغاله – مافي شي ماما
وراحت تشوف اشغالها وهي تناظر في جود بين لحظه والثانيـه حطت جود تونه وعليها خيار مخلل وجبن شيدر وشطه ...والشغاله تناظر مذهولـه ... حطت جود الساندوتش بصحن بعد ماسخنته بالمايكرويف واخذت معها كوب حليب وطلعت للصاله جلست مقابل للبنات ...ناظرن في بعض قالت البتول – وش ذا الي تاكلينه
جود – ساندوتش
البتول - عارفه انه ساندوتش اجل كبسه لحم .. بس اول مره اشوف ساندوتش كذا شكله
ناظرتها جود وهي رافعه حاجب – قطيعه تعالي ذوقي عينك فيه
ندى – ههههههههههههههه
قامت البتول وجلست جنبها عندها فضول تعرف وش مخبصه ... عطتها قطعه واكلتها صارت عيونها طالعه برا وتهف على وجهها وبسرعه قامت تشرب عصيرها الي على الطاوله جنب ندى
البتول وهي تكح ومكشره – جود وجع وش ذا الي تاكلينه وش مسويه انتي
جود – عادي تونه
البتول – مو تونه بس وش حاطه عليها ؟
جود ووجهها احمـر – مخلل خيار ... وشطه .. وجبنة شيدر ..ارتحتي
ناظرن البنات في بعض بقرف ... ندى – اللهم ادمها من نعمه ...
البتول – أي والله الله يديمها من نعمه وش هالخبايص احد ياكل كل هالاشياء سوا
جود وهي تاكل بتلذذ – يمـــــــي والله لذيذ
ندى – اسكتي والي يرحم والدينك ..
جود – انتم الي تتلقفون انا شسوي فيكم ..
ندى – ههههههههههههه من الي نشوفه
البتول – ايه والله ههههههههههه
سفهتهن جود وكملت اكلها ...
،
،
،
بيت ابو اريـج ...
بمجلس الرجال /
قال ابو متعب لابوها – حنا جايين نخطب بنتك الصغيره لولدنا عمـر ...
واشر ابو متعب على عمر الي جالس جنب ابو طارق ..
ابو اريج – الله يحييكم وماراح نلاقي نسب احسن من نسبكم بس لازم نشاور البنت .
ابو متعب – ايه طبعا
ابو اريج –عمر ولدنا واعرفه ونعم الرجال وسمعته وسمعت اهله مسك بين الناس انا بقوم اسالها الحين وان شاء الله مايصير الا كل خير
استانس عمر على الاقل ما ماطل وقال بنرد عليكم بعد ايام هو مو قادر يتحمل اربع جدران بلحاله كل ليله ...
كان موجود بالمجلس اخوان اريج وكانوا كثار .. طلع ابوها ياخذ رايها .. كانت اريج بالصاله جالسه مع امها وخواتها المتزوجات قال ابوها – اريج تعالي شوي انتي وامك ابيكم
قالت اختها الكبيره – اوووووه شكل السالفه فيها خطبـه مادام ناداكم بلحالكم
اختها الثانيه – ههههههههههه نفس حالتنا يوم انخطبنا
حمر وجه اريج وطلعت مع امها وبالطريق قابلت زوجه اخوها الغبيه حقرتها بنظره وراحت مع امها ..دخلن المجلس الثاني وماضيع ابوها وقـت
-اريج وانا ابوك اليوم جايك خطيب وش رايك
حمر وجهها – خطيب
وطرا عليها ولد عمها هذاكـ
قال ابوها – ولد صالح ابو صديقتك جود اسمه عمر وهو تو انتقل لجده وصار مقر عمله رجال ماعلى سمعته غبـار
قالت اريج بغصه – وش الفايده من رايي يبه اذا ولد اخوك بيجي يوم الملكه ويقلبها على راسي
ابوها بضيق – يمكن ربي يهديه هالمره ..
اريج – زين يبه انا موافقـه يكفي انه اخو جود ..
ابوها – الله يقدم الي فيه الخيـر ومبروك ..
ابتسمت اريج وطلعت من المجلس بسرعه ... قال لامها – شرايك ماسمعت حسك
ام اريج – الله يوفق هالبنيه ويفكنا من ولد اخوك
هز راسه وطلع ...
قالت زوجه اخوها لها – سمعت انك انخطبتي
اريج بدون نفس – ايه انخطبت
زوجه اخوها – وراك فرحانه طيب تاليتها بيجي عمر ويكنسل السالفه ..
رفعت اريج حاجب وسفهتها.....
طيب يا اريجوه ان ماقلبتها عليك نكد ماكون بنت ابوي قامت من الصاله وهي يالله تتحرك من كرشتها الكبيره دخلت جناحها وسكرت الباب دقت على جوال ام عمـر ولد عم اريج ..
-السلام عليك وش اخبارك
ام عمر – بخير الله يسلمك بشري مانزلتي حمولتك
قالت وهي تتنهد – لا لسى توني داخله الثامن الله يعين بس
ام عمر – الله يقومك بالسلامه
قالت بخبث – اللهم امين ماسمعتي اخر الاخبار اريج انخطبت اليوم وملكتها اكيد بعد كم يوم
ام عمر بصدمه – انخطبت لمن ومتى هالكلام
-تو الحين انخطبت لاخو صديقتها هذا الي اخذناه من الصديقات مو بعيده يكون شافها وعشان كذا جا يخطبها
ام عمر بعصبيه – مو على كيفهم ولدي يبيها وهي بنت عمه واحق فيها من الغريب
قالت تكذب – عاد ياما حاولت فيهم بس محد يطيعني اقول البنت لعمر الي مافيه مثله اثنين ومحد عطاني وجه
ام عمر – بنات هالزمن ماتربن وش فيه ولدي يوم معيه عنه حتى ابوها موافق عليه
-عاد انا سمعت انه الملكه خلال هالايام الرجال مستعجل بيتزوج
ام عمر- ليه عجل الله في اجلـه!
-عايش برا الرياض ويبي يتزوج
ام عمر بوعيـد – ايه يجيب الله مطر
وبعد ما سوت الي تبي – يالله ماطول عليـك فمان الله ...
سكرت الجوال وهي مبتسمه بتشفي والله يوم ملكه الاخت اريج بيكون يوم لاينسى وجلست تضحك!
مسكت ام عمر جوالها وتدق على ولدها ومايرد وين راح ذا ..رمت الجوال على الصوفا بقهر قال ايش تتزوج اريج وهو يبيها مابقي الا هي ....
بمجلس الرجال اتفقوا تكون الملكه بعد ماتطلع نتائج الفحوصات المعتاده للي بيتزوجون , مبــــــاشرة ..
::
جاء عمـر مع اخوانه وعيال عمه البيت وشكلهم ناويـن يتعشون قالت جود لعمر اول مادخل – هاه بشر
عمر – وافقت وبكره بنسوي الفحوصات
جود شوي ويغمى عليها من الفرحه – ياااااااااااااااااااااي وناسه اخوي وصديقتي بيتزوجون (بعدين كئبت) يعني بتاخذها بعيد عني وبتسكنون بجده
عمر – ههههههه شرايك اخليها معك هنـا مو احسـن ..
جود – فكره حلـوه ...
عمر – يالله بس وين امي بروح ابشرها ..
جود – بالصاله مع ندوش
عمر – ندوش هنا على بالي مشاري جاي بلحاله
جود – شكلك ماجبت خبرها تفكر بخطبتك
عمر – هههههههه يا لله بس وبعدين لحظه انام القاك تاكليـن .. اقوم القاك تاكلين ..اطلع من البيت تاكلين ..ارجع القاك تاكلين ترى شهر على هالحاله وبتنفجرين
جود وهي تتأفف – ياربي وش هالبخل الي نازل على العايلـه ..وبعدين ترى كله شبس قيمته ريال واحد ..
عمر – هههههههههههه شبس ولا مو شبس ما يلغي هالشي واقع انك صايره ماتشبعين..
عصبت جود – زين كذا ماعاد ابي اكلـه ...
عمر وهو يسحب منها الشبس – هاتي انا اكلـه ...
جت لهم ندى وهم يتناقرون – خير شفيكم
جود – شوفيه ماخذ شبسي ..
ندى – يوه المطبخ مليان روحي خذي لك واحد هذا المعرس لاحد يكلمه
عمر – شفتي الناس الي تقدر
جود – مالت على العدو ..
وراحـت المطبـخ .. بسرعه وهي تتلحطم – وش فيها لاصرت مشفوحه اكل لازم يدققون ياشين البخل بس ..
/
/
/
(يوم زواج نجوى )
قالت ام بندر بعصبيه – جود خير ماتجين بيزعل اخوك انتي من يهمك اخوك ولا الحريم
جودبتأنيب ضمير – اخوي يمه بس ماني رايحه مابي برسل باقة ورد أي شي بس روحي مابي يمه انا متاكده مدبره لي شي يضيق خلقي مابي مشاكل
ام بندر بعصبيه – جود ان مارحتي العرس والله لازعل منك
وطلعت من غرفتها بعصبيه ..دقت جود على ريووف – الو
ريووف – هلا وغلا ..
جود – ريووف بتحضرين زواج نجيو
ريووف – مدري للان محتاره وانتي
جود بعصبيه – امي هزئتني مره وشكلي بروح
ريووف – الله يعينك
جود – بليز ريوف احضري مافيني حيل اقابلها بلحالي ابيكم كلكم تحضرون
ريووف – يوووووه مصره
جود – بليـز
ريووف بكره – طيب يا جود عشانك بس ولا من له مزاج يقابل بنات اخوك وامهن ..
جود- الله يعين يالله بروح ادور شي بدرجي البسه
ريووف – انا عني بلبس جلابيه فخمه
جود – بدور لي تنوره وبدي كشخه والبسه .. يالله سلام
ريووف – سلام
زينت جود شعرها وحطت ميك اب حلو ولبست تنوره جنز فخمه وبدي ذهبي كشخه وصارت جاهزه وتنتظر امها تخلص
دخلت امها الغرفه وشافتها ضاربه بوز ونص .. تعرف انها قسـت عليها بس اهم شي علاقتها بأخوها ما تتزعزع ...
وقفت جود واخذت عبايتها ...وحمدت ربها ان ام ماجد وريووف وندى سبقوهم لبيت ابو طارق وصلوا البيت بوقت تحسه ثواني ونزلت مع امها
دخلت الصاله بعد مانزلت عبايتها واشوا الحفل كان عائلي ومافيه اغراب .. ونجوى صديقاتها مو ذيك العلاقه ..سلمت على ام طارق وبناتها الصغار وجلست جنب ريووف – وش هالكشـــــــخه لبسك روعه
جود بدون نفس – الساعه تسع يا طول الوقت الي بجلسه هنا
ريوف – ههههههههههههههه الله يقطع ابليسك لا تسمعك ام طارق وتاكلنا
جود وباين انها طفشانه – تجهزي للمصيبه الي محضراتها لليوم
ريووف – اسكتي تراي اتحرى من اليوم لحركه من حركاتهن
جود- ههههههههههه والله وتعودنا عليهن
بعد شويات جت نجوى وجلست بعد ماباركوا لها بالزواج كانت لابسه فستان سهره سكري وله ذيل ورافعه شعرها شنيون حلو ميك ابها كانت يجنن ..
توزع الحلا وريووف وجود يناظرن في بعض وينتظرن حركه من حركاتهن
قالت نجوى – اقول جود صدق الاخبار الي سمعناها
دفت جود ريووف بشويش وكأنها تقول بدن حركاتهن ...
جود بدلع – أي اخبار
نجوى – انك متهاوشه مع زوجك
مافيه غيرها الملسونه نويف ...
جود بابتسامه بارده – كلها اشاعات لاتشيلين هم
دقه بالصمـيم ...طاح وجه نجوى لكنها كملت – ويقولون ماد يده عليك
ضحكت جود – بعد انقلب فلم هندي ...
تفشلـت نجوى وسكتت بس جود ناظرت في امها وعاتبتها بنظراتها زين يمه هذا الي تحصلت عليه بجيتي هنا ..
عدت السهره بسرعه وحمدت جود ربها ان ابوها مايحب السهر كثير ورجعوا بيتهم بدري قالت جود لامها يوم دخلن البيت – شفتي يمه شفتي ماعزمتنا الا عشان تحرني وتحرق قلبي
ام بندر – يمه انسي كل شي وتذكري فرحه اخوك يوم شاف خواته كلهن حاضرات اخوك هو سندك وعزوتك بهالدنيا لازم تراعين خاطره وما تتاخرين عنه وانتي ماقصرتي هجدتي نجيو بنتي واعرفك محد يدوس لك على طرف
قالت بصوت فيه بكيه – لو محد يدوس لي على طرف ما تجرأ فيصل وضربني قدام امه وخواته ..
ام بندر – يمه الكف الي ضربك ياها راح يدفع ثمنه يكفي انه جا بيتنا ورديناه خايب بعد ماعطاه ابوك محاضره طويلـه ..
جود بألم – اقول يمه قفلي على هالسيره تصبحيـن على خيـر ...
ودخلت غرفتها بعصبيه .. لسى ماتخطت الي صار لها وجروحها ماتحتاج احد يصحيهـا الله ينتقم منك يانجيو اذيتيني بحياتي بدون سبب بدون ذنب ارتكبته كل هذا من الغيـره كل ذا لان امك انسانه تغذي كرهك لي جعلك تتعذبين نفسيآ زي ما انتي تستهزئيـن على حالتي ووضعي مع زوجي ..
*
ببيت نجوى الجديد...>>
قال زوجها لها – بناتي الثلاث بيسكنن معنا
ناظرته نجوى كملت بعد بناته هنا ...!
كمل – ابيك تعتبرينهن مثل خواتك او بناتك الي تحبين ..
بناتي يا سلام من جد كملـت ..!
سالته نجوى – ورى ماحضرن العرس
زوجها – رفضن يحضرن
بعد !
كمل – ماينلامن لانهن يبغني ارجع امهن
مابقي الا هي !
-......... بس الي بينا انتهى من سنين وهي متزوجتني غصب ويوم توفى ابوها ماصدقت خبر وتركتني
ناظرته نجوى صدق غريبه وغبيه تتركه وهي عندها بنات كبار ياخوفي بس لا ترجع له والله لاموت
دق الجوال حق زوجها – نعم .... هاه وشو متى هالكلام ..انا جاي الحيـن
وقف – بنتي مدخلينها المستشفى بروح اشوفها
وقفت نجوى بعصبيه – الليله ليله زواجنا وتطلع تتركني
عصب – هذي بنتي ..
نجوى بعصبيه – بنتك عندها خوالها امها وزي ماعرف انها دايم يغمى عليها وتدخل المستشفى ساعه وتطلع ..معقوله تطلع وتروح مشوار مدته ساعه عشان شي يصير دايم وانت تعرف ان مامنه خطر
طلع من عندها بسرعه ..انهارت في مكانها وجلست تبكي – خييييييييييييييييير يتركني ليله زواجي ..
بعد خمس دقايق دخل الغرفه .. اه يعني ماراح وغير رايـه
شافها تمسح دموعها ..قال – كلمني خالها ويقول انها بخير وبتطلع الحين ..
ناظرته نجوى وماردت
قال – بناتي حياتي كلها يا بنت الناس هذا شي حطيه في بالك هن اغلى ما املك بـ هالوجود
ناظرته بجرح – وانا وش اكون
سالم – انتي زوجتي وشريكه حياتي ..
كملت وهي تحس من جد بالجرح – ومتى اكون اغلى ماتملك
سالم – هذا شي بيدك انتي والوقت راح يثبته لي ...
/
(بعـد كم يـوم)
كانت جود بالدوام كالعاده ...اخذت جوالها ودقت على اريـج ...
جود – صباح الخيـر
اريج – صباح النور
جود – انتي نايمه
اريج – وين نايمه الناس داخله على الظهر ولا تنسين ملكتي اليوم
جود – هههههههههههه انسى تستهبلين انتي تراك ماخذه اخوي يا آنسه ..
اريج – هههههههه طيب لا يطق بك عرق على اني حاقده ليش ماقلتي لي ان عمر بيخطبني
جود – انا مالي دخل هذا كلام بين الرجال يصيـر وقدرك كبير عندي عشان كذا مسكت لساني بصعـوبه لا اكلمك واعلمك لاني ابي كل شي يكون عام ورسمـي
اريج بخوف – الله يتممها على خير عندي احساس يقول انه ولد عمي مو معديها على خير وسكوته هالايام نحس ..
جود – يووووه يا اريج لاتصيرين مثل الي يدور شي ينكد عليه فرحته تزيني واكشخـي بس ..
اريـج – يختي قهر كنت ابي اسوي عزيمه بس اخوي النذل مقنع ابوي على قولته ان الزواج قريب ف وشهوله نسوي حفله , صدق ماعنده سالفه يبي ينكد علي بأي طريقـه
جود – بنت اليوم ملكتك لا تطفشيني وتطفشيـن عمرك .. خليك رايقه واستانسي اخيرا بتودعين وجيه النحس ..
اريج بغصه – على اني مبسوطه اني بفتك الا اني بشتاق لامي وابوي وجمعات اخواني ببيتنا...
جود – هذي سنه الحياه
اريج – الا على طاري سنه الحياه ماتلاحظين ان لك شهريـن عند اهلك ومافي جديد في موضوعك
جود بضيق وخوف من انكشـاف سرهـا الي تخبيه عن الكل – احسـن فكه منه ..
اريج – جود خلي قلبك كبيـر
جود – قلبي كبير دايم بس الي سواه جرحني بقوه خلينا من سيرته ..تلقينه ماصدق خبر يفتك مني
اريج – جود يكفي انك مقفله جوالك طول هالمده كيف بيتصل بك او يتطمن عليك
جود بدا صدرها يضيق – اريج اذا تعزيني قفلي هالسيره الي تغم
اريج – عشاني اعزك مصلحتك تهمني مو معقوله كذا فكري وشوفي وش قرارك الوضع هذا مو زين لامتزوجه ولا مطلقه ماينفع كذا ...
جود بغصه – طلاق
اريج – وش رايك يعني تجلسين على ذمته وانتم متفارقين هو ماعليه يقدر يتزوج بدالك مو وحده ثلاث انتي الي بتضيعين فكري وقرري
جود – يصير خير يالله امي تناديني ..
سكرت جوالها بعد ما صرفت اريج بحجة ان امها تناديها والغصه خانقتها لمتى بتخبي هالسـر عن اهلها وعن فيصل بنفسـه ياشينه من توقيـت لازم تتعقد المسائل لازم يصير شي يضعف موقفها ويخليها تتنازل عن اشياء كثيره كلام اريج يعذبها كانه صوت المنطق الي مزعجها نفسيآ فتحت جوالها بيد ترتجف دفنت وجهها في مخدتها مامرت نص ساعه الا جوالها يدق رفعت وجهه عن مخدتها ومسحت دموعها بقفا يدها .. فيصل المتصل حست برجفـه قويه تهز جسمها هز ... – نعـم
فيصل بعصبيه – خير قافله جوالك لايكون طلعتي رقم ثاني ...
انا وين وهو وين !
جود – انت مكلمني تهينني صايره ذي عاده عندك ...
فيصل – استغفر الله ياربي ماودك ترجعين بيتك
جود وهي تبكي – البيت الي انهات كرامتي فيـه
فيصل – انتي السبب وبعدين كلكم اخذتم الي فيه النصيب جا نوف الي تستاهل وزياده
جود – ضربك لاختك ماينفي واقع اني انهت لا واختك داقه على بنت اخوي الي تكرهني ومعلمتها بكل الي صار وماقصرت نشرته على الخلق ...
فيصل – وبعديـن يعني الي صار صار منتي براجعه بيتك ..
جود – هالبيت ماراح ارجع له
فيصل – والمعنى ؟
جود – المعنى ابي بيت لي بلحالي ..
فيصل بعصبيه – نعم
جود – الي سمعته ابي بيت لي وهذا شرطي
فيصل وصوته يعلا – تبيني اترك اهلي مجنونه انتي
جود – كيفك تبيني ارجع جبلي بيت لو شقه من غرفتين اهم شي اكون بلحالي
فيصل – هذا اخر كلام عندك
جود – ايه
فيصـل – متأكده
جود – ايه متأكـده
فيصل – سلام
وسكــــــــــــــر الخط بوجهها .. رجعت جود تبكي هذي نصيحتك يا اريج فتحت الجوال وش استفدت ..عطاني كلمتين تغم النفـس ..دقت البتول عليها غرفتها وش مصحيها البتول هالوقـت ...
البتول وهي تشوف حالتها ..- جود شفيك
جود وهي تقوم عن سريرها عشان تغسل وجهها – الرجاجيل محد ياخذ منهم الا النكـد
البتول – فيصل تقصدين وين جاي ولا مكلم
جود – تو كلمني
البتول – و ...
جود – ولاشي كلم يستعرض قوته علي وسكر وهو معصب وماتفاهمنا
البتول – وبعدين ياجود بالله ناظري في شكلك عيونك مورمه من الصياح انتي تبينه ولا لا
ناظرتها جود بحـزن – فات الاوان على هالسؤال
ناظرتها البتول – وشلون فات .. مافات شي اذا ماتبيه قلعته قولي لعمي وانتي تعرفينه انتي بالذات مايقدر يغصبك على شي ماتبينه
جود وهي تصد عن البتول لاتشوف سرها بوجهها – انا قلت له يجيب لي بيت بلحالي ومستعده ساعتها ارجع واذا ماجاب لي بكيفه ولو مايبي يطلقني ماتفرق عندي عاد تصدقين انا مليت من قلب من الفشل والخيبه والوجع والحمد لله اني على الاقل موظفه و لي استقلاليتي ...
البتول – الحب مايجي الا بعد معاناه ووجع .اسأليني انا كنت اكره بندر وكان هو من محبته لي صابر علي وفجأه انقلبت الادوار وامتلت نفسه بالشكوك علي حتى كرهه غلب هالحب الي كان مصبره على عصبيتي ودلعي الزايد ..وصرت انا الي ادور حبه وذقت الي هو ذاقه من وراي وفي وقت ما استسلمت وحسبت حياتنا انتهت بدينا بدايه جديده وبعز ماكنا نتهاوش جا الصلح من الله فجأه والحمد لله لي فتره مرتاحه وانا كل يوم اهزء نفسي على الشهور الي ضيعتها وانا اتهاوش مع حبيب قلبي فيها واحرق دمه
ابتسمت جود – سبحان مغير الاحوال بس صدقيني يا البتول نفسي طابت من كل شي انا احس اني ضايعه بالفراغ الي بصدري احس اني مخدوعه مقهوره ومتألمــــــــــــــــــــه كل الي احبهم مالي منهم الا الذكريات الي تحزني وتشيل البسمه عن حياتي ..احس اني اكرههم .
دمعت عيون البتول – يوه ياجود انتي الوحيده الي كنت متوقعه تاخذ الحياه بحلوها ومرها بكل بساطه كل ذا بقلبك
جود وهي تحارب الانهيار الي جايها في الطريق احيانآ احزاننا لما تفيـض نخاف تتفجـر وتكشف الخافي لناس مانبيهم يعرفون عنها سواء كانو احباب حتى ما نألمهم بألمنا وهم مابيدهم حل ولا ربط او حاقدين وعذال حتى ما نعطيهم سلاح يدمروننا فيه ...- الي بقلبي مايشفيه انسان ..
نزلت دموع البتول غصـب وهي جالسه عند جود ...ناظرت وشافت علب ادويه على الطاوله – جود وش ذا
رفعت عيونها وانصدمت قالت بهدوء – ادويه ..
البتول – عارفه لايش اول مره اشوف هالاشكال
جود – فيتامين ومقويات عندي فقر دم
البتول – ياحياتي لازم تتغذين (وقالت بتلطف الجو) عاد العريس اليوم الغدا بيجيبه من برا كاشخ عمر
ابتسمت جود – الله يوفقـه عموري ويعدي هاليوم على خـير
البتول – اللهم اميـن ,يالله بروح اصحي بندر للصلاه
ابتسمت جود – زين
طلعت البتول من غرفتها وقامت ووزت الادويه بدرج ملابسها ماتبي تتلقف وحده من خواتها عليها وتكشف المستخبي ...سكرت درجها بقوه ..وجلست وراسها بين يدينها ..على الاقل ماتحس باعراض الكل يلاحظها شهرين وهي مخبيه شهرين وهي تشيل داخلها حياه ثانيه خحطت ينها الثنتين بشعرها اه من حظـي الشين الي كنت خايفه منه صار والفراق الي كنت اتوقعه صار يوم حملت .. سلاح بيد فيصل حتى ترجع له وتعيش معه العمـر كله بس راح تقاوم عشان راحتها واستقرارها النفسي .
قامت عشان تصلي وتدعي ربها يهونها عليها ...
:
:
على وقت الغداء ...
دق باب البيت والعايله متجمعه عشان يتغدون ..
قام يزيد عشان يفتح الباب وطلع برا ..فتح الباب طلع له رجال شكله مو مريـح – نعم
الرجال – هذا بيت صالح ال .........
يزيد – ايه بيته من تبي
الرجال – ابي عمر موجود
يزيد – من اقوله
الرجال – قل له واحد يبيك با
ناظه يزيد ببرود – طيب بناديه الحيـن ...
دخل يزيد البيت قال ابوه – من الي يدق الجرس ..
يزيد – واحد يبي عمر
رفع عمر نظره – واحد ماعرفته مو من اخوياي
يزيد – اول مره بحياتي اشوفه وبصراحه شكله مو مريـح
عمر يفكر بنفسه شكله الي ببالي قام عن سفره الاكل ونادى يزيد ..لما صاروا بعيد عن مسمع اهله قال لاخوه – اذكر العام كان عندك عجرا (عصا عريضه ) وينها
يزيد – من تبي تضرب
عمر –هي عندك ولا لا
يزيد – الا عندي
عمر – اجل هاتها وانت ساكت
يزيد وهو يهز كتوفه – طيب
جلس عمر ينتظره لين رجع والعصا معه – خلاص رح اجلس وخل فمك مسكر
يزيد – زين
راح يزيد وجلس جنب بندر قال له بهمس – عمر اخذ العجرا حقتي وطلع
ناظر فيه بندر بصدمه وقام عن السفره بسرعه ..
قال ابوه بعصبيه – شفيكم انتم من الي عند الباب ...
قام الوليد ولحق اخوانه ....
طلع عمر برا ولقى الرجال واقف برا يدخن اول ماشاف عمر رمى السيقاره
عمر بعصبيه بعد ماحط العصا قريب من الباب وبعيد عن عيون هالرجال – نعم
الرجال وهو يناظره من فوق لتحت – انت عمر
عمر ببرود – وش تبي .؟
الرجال بثقه – انا عمر ولد عم اريـج
عصب عمر ونزل عنده – لاتجيب سيره زوجتي على لسانك
الرجال بعصبيه – ماصارت زوجه لك هي بنت عمي وانا ابيها
عمر – بعصبيه وهي ماتبيك ماتفهم
الرجال – مو بكيفها ...
عمر بعصبيه – انت جايني بيتي تهددني ارجع لسيارتك لاخلي اليوم اخر يوم بعمرك
خاف منه وهو يشوف ان عمر ما قال كلامه عبـث ..
تراجع لسيارته بعد ماطلعوا بندر والوليد وكل واحد الشر بعيونه ناظر فيهم هو نحيف وطويل وهم طوال وعراض والله ليفرمونه ما عاشت حرمه يموت عشانها
قال وهو يركب سيارته – بروح لعمي الحين واخليه يكنسل الملكه تشوف
عمر بعصبيه – اعلى مافي خيلك اركبـه
وركب سيارته وماعاد ينشاف الا غبــــــــــــــــارهـ ...
قال بندر بعصبيه – من ذا وش يبي ..
عمر – واحد مريض ...
الوليد – كان مسكته بعصاك ذي وهشمت راسه
عمر – شوي وافقد اعصابي معه ..
قال لاخوانه وهو يمسح العرق عن وجهه – دخلنا البيت حرقتنا الشمس ...
قال عمر – هذا ولد عم زوجتي
الوليد – الي محجرها الحمد لله والشكر هذا من يزوجه باين عليه رجال مو سنع
عمر – قلعته صادقه جود يوم قالت ماعنده سالفه
بندر – اشوى انه ذلف وماصار شي بينك وبينه مو ناقصين مصايب
عمر – الحمد لله شكل ابوي معصب
ابوهم ماعطاهم فرصه حتى يجلسون – خير من ضربتم انا ماصدقت كبرتم وصرتم رجاجيل ماتتركون عنكم التهور
ابتسمـوا العيال يوم تذكروا تهورهم وهوشاتهم يوم كانوا مراهقيـن ...قال عمر لابوه السالفه لانه بيدري بنهايه الامر من ابو اريـج ...
رجعوا يكملون غداهم ولاكن شي صــــــار ...
مرت فتره العصـر بسرعه ... وثم المغرب ... وجا وقت العشا والملكه بتكون بعد صلاه العشا وبيجلسون الرجال للعشاء وعمر بيشوف زوجتـه ...
خلص عمر ملابسـه وكشخ ... واخذ الهديه الي شراها لاريج ونزل ...
صفرت جود يوم شــــــــــــــــافته – وش هالزيـن وش هالرزه
عمر – انا دايم كشخه اصلا ...
جود تمزح معه – ايه اكيد لازم تكون انت اخوي ولازم تطلع علي ..
عمر – ضفي وجهك بالله
جود – لاتنسى اني صديقه اريـج
عمر يتمصلح – ايه طبعـا (ناظرها يقال عصبي) ياويلك ان طلعت شينه
جود بخبث – شفها واحكم
عمر – بشوفها ... يو يو ابوي معصب يالله سلام
جود – بحفظ الرحمن ..
ثال ابو متعب بعصبـيه – اخوك الثاني وينه
تلفت عمر الوليد موجود ويزيد اجل المختفي بندر قطيعه ياعمر هذا وقتك تتأخر دق على جوال بندر ولقاه مقفل لا مو معقوله .... راح للداخل معصب كانت جود طالعه من المطبخ تاكل قال عمر – انتي يالمشفوحه روحي لبيت بندر وناديه
طلعت عيون جود – مابقي الا هي تبيه رح انت ناده
عمر – جويده روحي ناديه تاخرنا اشوا ان مشاري هو الي بيجيب الشيخ الي بيملك لي ...
جود – عمر لاتحاول دق عليه عيب اروح ازعجه
عمر وصلت معه للشيطان الرجيـم ..قال- بدق على البتول اصرف
/
دق جوال البتول وشافت رقم عمـر واخزياه ....
-بندر حبيبي يالله اخوانك تحت ينتظرونك
بندر – قولي شكثر تحبيني ولا ماراح انزل
البتول حمر وجهها – بندر يالله عاد عمر اليوم ملكته
بندر وهو جالس بكل برود – قولي شكثر تحبيني ...
البتول شوي ويغمى عليها من الضغط بسبب الفشيله وعمر يدق وماردت عليه ومازال يدق وبين بندر واحراجه لها
قالت بخبث – لارجعت اقول لك
ناظرها وهو ساكت ..
جرته مع يده لين وقف وعطته شماغه وعقاله – يالله اطلع ...
وصلته عند الباب وقبل لايطلع وهو ماسك يدها قال – الوعد لارجعت
وغمـز وطلع حست البتول وجهها شوي ويحترق الله يقطع سواليفك يابندر
*
نزل بندر بسرعه وقلبه يدق بيعطيه ابوه محاضره طويله وعمر بياكله وهو حـي ...
نزل ولقى عمر واقف تحت – بدري كان مانزلت ...
ناظر بندر في ساعته – تونا شفي بصلتك محروقه
عمر وهو حاقد – ابدا مافي سبب عشان تحترق بصلتي
ضحك بندر من اخوه المعصب وطلعوا طبعا بعد ما اخذ له محاضره من ابوه على التأخيــــــــــــــــــر
ببيت ابو اريج لقوا المجلس مليان اخوانها وعمانها وعيال اخوانها المكان كان مليان رجاجيل جلس عمر جنب الشيخ الي بيملك لهم وتمت الملكه على خـير باركوله ابوه واخوانه وعيال عمه وطارق وتركي
دخل ابو اريج على بنته قبل عشا الرجال بساعه وناداها ... كانت اريج كاشخه لابسه فستان ناعم ومسيحه شعرها وحاطه ميك اب خفيف ..دخلت المجلس ورى امها وهي تنافض .. وقف عمر وسلم على عمته ام زوجته
ام اريج وهي تجلس بصعوبه واريج ماسكتها تجلسها – مبروك وانا امك
جلست اريج جنبها وعيونها بالارض ...- الله يبارك فيك ياعمه ..
شكثر كبرت بعينه بسبب حنيتها الي لمسها على امها الكبيره بالسن!
ناظر في اريـج وقال – شخبارك يا اريج
قالت بهمس وعيونها بالارض – طيبه ..
قال في نفسه شلون بشوفها زين ووجهها بالارض .. والمشكله امها موجوده مقدر اتجرأ بالحيل ...
وقفت ام اريج وناظرت اريج فيها كأنها تقول لاتطلعين وتتركيني بس امها سفهتها وطلعت ...
قال عمر بهدوء – ليش بعيده كذا تعالي قريب مني او انا جيت قربت منك
طلعت عيونها من الصدمه وقالت – كذا زين
ابتسم – لا مو زين احس الكلام يجلس ساعه على بال مايوصل لك
وكان المجلس كبير وهي جالسه قدامه وبينهم مسافه كبيره ... قام من مكانه وجلس قريب منها ..عطاها علبه الهديه وقال – ذي هديه بسيطه مني ان شاء الله تعجبك
اريج – ليش تتعب نفسك
عمر – لا تعب ولاشي قولي لي انتي تشتغلين ولا لا ...
ابتسمت غصب لما تذكرت مناقشاتها هي وجود لانها كسوله وماتحب تتعب وتشتغل – لا ما اشتغل
عمر لاحظ ابتسامتها الحلوه – ليش طيب ابتسمتي اكيد تذكرتي شي
اخو جود مايفوتك شي!
اريج وهي ترفع راسها لاول مره – لا بس ماصدقت خلصت الجامعه بروح اشتغل
ابتسم هو بعد وقال لماجت فرصه يفتح موضوع سكنهم بجده – هنا يمكن ماتحتاجين للشغل لان ماعندك وقت فراغ ولان حولك اهلك ومشغلينك بس لا سافرنا لجده بيكون فيه وقت فراغ كثير ..
ناظرته اريج –كيف نظام شغلك
عمر – من الصبح للظهر .. واحيانا من المغرب لين 12 بالليل
اريج – الله يكتب الي فيه الخير
عمر – بس حبيت اوضح لك انه ماعندي مانع اذا حبيتي تشتغلين وتملين وقت فراغك ..لي هناك اصدقاء وساكنين بنفس العماره ومتزوجين جدد وفيه الي عنده ولد او ولدين تقدرين تسوين علاقات مع زوجاتهم ..
ياحليله يحاول يخفف علي غربتي عن اهلي وعن الرياض !
ابتسمت الا بدخول اخوها المنحوس وهو يناظرها بإنتـقاد قال لعمر على باله يمزح – لكم ساعه تسولفون ماشبعتوا ...
عمر على باله الثاني يمزح بس كان متقصد – زوجتي وحلالي انت وش تبي
كشر اخوها لان الرساله وصلت له – ابد قلت اناديك تجلس مع الرجال
عمر – انا مستانس هنا لاجا العشا بطلع
سكت اخوها وعطاها نظره يعني قومي اطلعي من الغـرفه بس سفهته اذا امها وابوها ماتكلموا يحشر نفسه ليه في الي مايخصه اخر شي طلع وهو مقهور ونفسه يضرب احد صدق اخته ماتربت ويبيلها سنـع
حس عمر ان اريج تنكدت لما شافت اخوها والجو بينهم كان متوتر ...لكنه ماحب يحرجها ويستفسـر وخصوصا انها ماتعودت عليه للحيـن ...
قال عمـر – يناسبك الزواج بعد ثلاث اسابيع
ناظرته اريج بارتباك – بس
عمر – غصب عني لاني تو متعين هناك جديد صعب اخذ اجازه اكثر من اسبوع انتي اشتري الاساسيات والباقي كمليه لاجيتي معي جده ..
حمر وجهها وش هوله تأجل الزواج وتزيد في ضيقه صدرها خصوصا ان اخوها بدال مايهجد زايد وشاب عليها نار باخلاقه الشينه ...
هزت راسها علامه على الموافقه ...ناظر عمر في ساعته لهم مده طويله جالسين سوا ..
طلع جواله وقال لاريج – عطيني رقمك ..
عطته رقمها بعد ماغلطت من الارتباك مرتيـن ...ابتسم وهو يشوفها بتموت من الحياء وقف وقال – يالله اشوف ان شاء الله على خير انا اعطيتك نغمه الحين هذا رقمي خزنيه وبيننا اتصال قريب ان شاء الله وقفت معه ..
وقبل لايطلع مسك يدها وباسهـا وطلع من المجلس انهارت اريج على في مكانها الي جالسه فيها وقلبهاااااااا يدق بقوه ... يالله دخل قلبـــــــــــها بسرعه قياسيه بذوقه بطيبته باحترامه لها بشخصيته الي يفرضها حضوره ...
بتبدا بكره تجهز لزواجها بسرعه قياسيه ...
دقت على جود – هااااااااااااي
جود – الف الف مبروووووووووووووك ملكتوا صح
اريج – ههههههههههههههههه لا لسى شرايك يعني
جود – قولي الله يبارك بعمرك طيب ...
اريج- الله يبارك بعمرك اليوم اسعد يوم بحياتي
جود بخبث – هاه شرايك بأخوي عمور ..
اريج برومانسيـه – اااااااه
جود – ههههههههههههههههههههههه خير ان شاء الله
اريج شوي وتبكي من فرحتها – ماتوقعته كذا مره رهيب
جود – عمر عسل ويجنن ..عاد اخوي لازم امدحه ههههههههههه
اريج –ههههههههههه يستاهل المدح بصراحه ... جود زواجنا بعد ثلاث اسابيع
جود – يوه ماكأنه مستعجل بس ماينلام تعب وهو رايح وجاي من جده للرياض
اريج – بكره ببدا اطلع اتسوق واتجهز للعرس تطلعين معي ..
جود – انا مافيني حيل تعبانه
اريج – جود بلا دلع ذوق خواتي مايجوز لي انا وانتي ذوقنا واحد بليز اطلعي معي
جود ووهي تعرف ريج لابغت شي محد يردها – اوكي اختاري سوق وبخلي السواق يوصلني ونتقابل هناك
اريج بفرحه وتمصلح – اوكي يا صديقتي الغاليه والحبيبه والرائعه
جود – ههههههههههههههههههه ياشين التمصلـح يالله على الاقل ادور لي فستان للزواج معك
اريج – دوري الي تبين اهم شي وافقتي تروحين معي يالله سلامو
جود – مع السلامـه ...
انسدحت جود على فراشـها تحس بملل وفراغ ووحده كلن لاهي بحياته ندى اختها الغاليه تزوجت وصارت ملتهيه بزوجها وبيتها ريووف ماتقدر تروح بيت عمها تخاف لا تشوف ماجد بالصدفه وطارق مشغول بسفرياته وشغله ولها مده ماشافته ...
والحين اريج بتتزوج وتسافر .. جلست تبكي ودموعها تسيل يالله من جد من جد صايره صياحـه ..خير ان شاء الله ... وكله كوم وفيصل ومكالمته الي تنكد يا الله صدق ان فيه ناس مهما كانو زينين من جوا اخلاقهم الضيقه وقله صبرهم تفسد هالطيبه الي فيهم وتخليهم منفريـن ..يالله كله مكتوب ومقدر ومحد ياخذ الا نصيـبه في هالحياه ...
حطت يدها على بطنها وابتسمت وقالت تكلم ولدها – انت بهجه حياتي ونورها اعد الايام حتى اشوفك قدامي ...
طفت نور غرفتها وحطت راسها على المخده ونامت ..
/
اليوم الثاني ...
قامت نجوى على صوت زوجها ناظرت في الساعه لقتها سبع الصبح - نعم
زوجها – وين الفطور وراي دوام ترى
دفنت وجهها في المخده – افففففففف الساعه سبعه الصبح ابي انام
عصب عليها – قومي حطي لي فطور ونامي عقبها لين تشبعين
قامت من النوم معصبه قالها قبل لا تطلع – البسي ملابس بتطلعين كذا قدام بناتي
ناظرت نجوى في قميصها الابيض الطويل – شفيها ملابسي
-قلت لك غيريها والبسي شي ساتر
شوي وتضحك الحين هذا شي مو ساتر عنده , اخذت غطا القميص ولبسته وهي تناظره بحقد وطلعت المطبخ ... حطت الفطور وهي معصبه وطفشانه انه خرب نومتها وكله كوم وبناته الي ساكنات معهم كوم ثاني اصلن من يوم ماجت بيتها وهن مو طايقاتها وجالسات بغرفهن ومايطلعن الا اذا حزه اكل وهي الي تكرف ... حتى شغاله مافيـه ...
نزلت الفطور ودخلت غرفتها تنام ... ما ان حطت راسها على المخده الا باب غرفتها يدق بقوه .. قامت وهي معصبه رجعت شعرها ورى وقالت بعصبيه – من
قالت بنت زوجها الوسطى – انا نجلاء
نجوى بعصبيه – نعم وش تبين
نجلاء – نجوى تعالي اختي ما تتحرك اهزها وما تجاوب
بردت عظام نجوى وطلعت من الغرفه تركض – خير شفيه
نجلاء وهي مصدومه – مدري علامها ..
دخلت نجوى الغرفه وشافت البنت طايحه ومغمى عليها جلست جنبها تهزها والبنت بارده ماتتحرك دقت على زوجها وجواله طلع ناسيه بالبيت يا الله وش الدبره ..دقت على زوج اسماء نايف على الاقل ساكن جنبهم يمكن يكون موجود بعد عشر دقايق رد –نعم
نجوى – نايف انا نجوى ...
نايف انصدم زوجه عمه وش تبي اول مره تدق عليه – خير ان شاء الله
نجوى بارتباك – وحده من البنات طايحه مغمى عليها ومدري علامها وعمك مو موجود
نايف وهو يفز من مكانه – يالله طلعيها انا بجيب سيارتي عند الباب
نجوى – طيب ...
قالت للبنات يطلعون عبايه اختهم وراحت هي ركض لغرفتها وبدلت ملابسها واخذت عبايتها .. بمساعده البنات شالن البنت المغمى عليها ودخلوها سياره نايف وجلسن كلهن ورى ...
دخلوها المستشفى وطلع معها فقر دم حاد جلست نجوى هلكانه طول الصبح ولين العصـر والبيت مافيه احد .. وزوجها جاي بالطريق ..لانه توه عرف بالي صار
.سمعت وحده من البنات تقول – امي
رفعت عيونها وشافت مره متوسطه العمر جايه تمشي معها رجال غطت عيونها ... طبعا زوجه سالم سفهت نجوى والبنات سفهنها وجلسن بمقاعد ثانيه ...
قالت الممرضه لنجوى – وقعي على اوراقها
قام الرجال الي مع زوجه سالم الاولى بياخذ الاوراق لكن نجوى سفهته ووقعتها وعطتها للممرضه
قال باحتقار – امها موجوده ليش توقعين
قالت ترد احتقار بوجهه – ليه اجل هي تعرف تقرا او تكتب
ناظرها من فوق لحت وراح يجلس مع اخته وبناتها ...رفعت عيونها وشافت زوجها جاي سرعه
وقف مع بناته .. وزوجته تكلمه وهو يرد عليها حسـت بالغيره والقهر يعني تتعب وتنكرف واخر شي يسفهها ويكلم زوجته ...
بعد شوي جا لنجوى الي جالسه .. – شكلك تعبانه .. بتطمن على البنت وبنرجع بيتنا
ماردت عليه اصلا ما امداها لانه على طول دخل غرفه بنته ...
بعد ماخلصوا و طلعوها من المستشفى راحن البنات مع امهن ورجعت نجوى مع زوجها وهيساكته ماتكلمت سالها – تغديتي
نجوى – لا مو مشتهيه الاكل
سكت ورجع البيت وكان حاس ان زوجته معصبه ...قال لها – بعدين شيكي على اشيائي لاجيت اطلع الدوام
نجوى فاض فيها صبرها من يوم ماتزوجت متحمله نظرات الاحتقار من بناته المراهقات وتعليقاتهم وتأمره هو – الحين انا ملطوعه من الصبح مع بنتك بالمستشفى وتكمل بجية امهن لا وبعد انت واقف معها تكلمها وانا محد معتبرلي وجود ..
زوجها ارتبك من هجومها – لاتنسين انها ام بناتي ومو عشاني كلمتها يعني برجعها لي
ناظرته نجوى وهي مدمعه وراحت غرفتها عشان تاخذ شاور وتنعش نفسها لاتنهار ...طلعت وبدلت ملابسـها ..ودخلت المطبخ تسوي قهوه على الاقل تهدي اعصابها وتخليها تروق لقت زوجها جالس بالصاله وشكله مهموم حست بتأنيب الضمـير
قال وهو يشوفها كاشخه وشكل اعصابها هاديـه – جت بوقتها القهوه ...
صبت له فنجان وعطته له ..
- قالت له – اشوفك مهموم اذا على بنتك ف مافيها الا العافيه
سالم – فقر دم حاد
نجوى – مع الفيتامين والاكل المناسب بيزول
سالم بحزن – احيانا احس بتأنيب الضمير لاني فرقهتن عن امهن
ناظرته نجوى بنص عين
..كمل -............ افكر اشتري الارض الي جنب بيتنا وابنيها لهن ولامهن
ياسلام يقربها اكثـر مني !
ناظرها - شرايك ؟
نجوى بغيره – تقرب زوجتك منا ؟
ناظرها وهو عاقد حواجبه – انا لو ابي ارجعها ماراح تمنعني المسافات عنها لو بيني وبينها بحور ..
تفشلت وحمر وجهها ..
قال وهو ناقد عليها – الواحد يكون فكره واسع وقلبه اوسع ترى بالنوايا الشينه ماراح يوصل لمكان ..ولا يدخل قلب احد ولا راح يوفقه ربه اشوف احيانآ فيك حنان على بناتي واحيانا اشوف برود حتى بديت اشك اذا عندك مشاعر ولا لا.
ناظرته نجوى وهي شوي وتبكـي – بناتك مايواطنني بعيشة الله مايطيقني
سالم – تزوجتيني وانتي عارفه ان عندي بنات وانك راح تواجهين صعوبه في كسب محبتهن بس حتى ماحاولتي تتقربين منهن ولامره شفتك تسالين وحده عن دروسها او اذا تحتاج بشي ترى المحبه للغير مو صعبه ...
حست بضيق لانه ينتقدها وبضيق اكـبر لانه صادق بكل شي قاله وهذا الي مضيق خلقها ..بس هذا طبعها وماتقدر تغيـره ..حست بالكون يطبق عليها من يوم ماتزوجت وهي تحس بشي يخنقها يخنقها لدرجه شوي وماتقدر تتنفس ...شي داخلي وكأنه طابق على ضلوعها ..ااااااااااه وين الراحه يوم كانت داخله دار لتحفيظ القرآن كانت من اسعد ايام حياتها ...لكن الدنيا والي معاشرتهم قسوا قلبها بقووووووه ..دمعت عيونها وهي تتذكر ام انـس ..صديقتها الطيبه الي كانت تنصحها .
ناظرت في زوجها تتمنى لو يعطيها ربع من حنيته على بناته لكنه متباعد معها صحيح مو قاسي ولا ظالم بس الفرق شاسع بين معاملته لها ومعاملته لبناته ...رمت هالافكار الي تضعفها في حريقه بناته كلهن مايهمنها ولو بمثقال ذرهـ ...
:
:
:
مضت الايام بسرعه وجاء زواج اريجو عمـر ..
كانت يوم زواجها ملكه
..فستانها كان ضيق ونافش من تحت وله ذيل طويل وشعرها كيرلي ولابسه معه تاج صغـير ...وميك ابها كان ناعم وحلو ...اما جود فكانت لابسه ساري هندي لونه احمـر مع ذهبي على الاقل مو بين التغير البسيط على جسمها بسبب حملها بالشهر الثالث ...قضن الايام يتسوقن وبسرعه خلصن جهاز اريج
قالت اريج لجود – امي معصبه لاني ما شريت طرحه للفستان
جود – لا كذا حلو وانتي ماتحبين الطرح مع فساتين الزواج
اريج – احسها غبيه بعدين انا مفصله شال كبير فخم عشان لاصورت البسه ويعطي للفستان جو
جود – خلاص اجل فليها .
دق باب غرفه اريج وقبل لاتروح جود سالتها – جود فيه شي مخبيته ومعرفه
صار وجه جود اصفر – شي ايش
اريج – مثل انك حامل
طلعت عيون جود وتسمرت في مكانها وراحت اريج تفتح الباب الي يدق له فتره ..طلعت المصـوره جايه تنهي التحضيرات الخاصه بالزفـه ...
قالت اريج وهي تناظر في جود – تحسبيني غبيه ما عرفت انك حامل ومخبيه عن الكل انا استغرب كيف خالتي مانتبهت انك حامل
انهارت جود على الكرسي وبان الهم على وجهها – اااااه يا اريج احس هالكلمه لا عرف بها الكل بتقلب موازين حياتي ... زوجي اليرافض يجيب لي بيت والي ماسمعت عنه خبر لي 3 اسابيع لو درا بيزيد بعناده او بيخليني عند اهلي يا معلقه او حتى مطلقه وبالنهايه ياخذ ظناي مني الي خفت منه وحاربته هالشهور تحقق وحملت في هالزواج الي متزعزع والحين انا بين نارين ...
خنقت اريج لغصه ومسكت يد صديقتها – كل شي مقدر ومكتوب ومحد ماخذ اكثر من نصيبه مو هذي كلمتنا الي نرددها دايم لاضاقت فينا الوسيعه وسبحان الله يمكن مقدم هالبيبي خير عليك..
ابتسمت جود – بهجة حياتي هالبيبي ..
جلست الفلبينيه ترطن يعني لازم تطلع اريج عشان الزفـه ...ابتسـمت جود وتجهزت اريج للزفه وانزفـت ..جلست جود جنب خواتها وبنات عمها ..وكانت نجوى مع امها وخواتها قالت ريووف – ماتلاحظين ان نجوى نحفاااااااااانه صايره عود
جود – لايق عليها النحف ..
ريووف – سبحان الي يغير ومايتغير البنت متغيره بعد زواجها ..
جود – يالله شعلينا من الناس ..
ريووف - على قولتك
جود – الا شخبااااااااار نوره
ريووف بابتسامه – البنت ذي تجنن ومتفائله مره وهذانا كل يوم بالدوام الفطور مره علي ومره عليها ومكاتبنا جنب بعض
جود – هههههههههههههههه والله وناسه
ريووف – ايه والله شوفيها جت بروح اسلم واناديها..
راحت ريووف تمشي وطالعه رزه في فستانها الملون وتسريحتها المرفوعه فوق ..- هلا وغلا
ام وافي – هلا فيك يابنتي شخبارك
ريووف – بخير ياخاله انتي شخبارك
ام وافي – بخير الحمد لله
ريووف – تعالي ياخاله امي وعمتي ام بندر وجدتي هناك بالطاوله الاولى ...
قالت نوره تمزح – سلمي يا مال الي موب قايله
ريووف – هههههههههههههههه خير ان شاء الله ترى امس كنا مداومات سوا..
نوره تستهبل – بس حنا خارج نطاق العمل الحين
ريووف – الي يسمعك يقول وزيره تعالي بس نجلس مع البنات شوفيهن هناك الا خواتك وين
نوره – بالبيت مستحيات يجن
ريووف – هههههههههه ماطلعن على اختهن
نوره – يالله بس انا مالي شبيه
ريووف – اعصابك طيب ...
نوره – طيب لاتدفيـن ...
ريووف – ههههههههههههههه الله يقطع سواليفك ..
سلمن على البنات وجلسن ...يسولفن بوناسه ..انقبض قلب جود وهي تشوف ام فيصل وبناتها حاضرات ناظرت في البنات بس التوتر باين على وجهها ...
قالت ندى بهمس – شفيك
جود – ام فيصل هنا هي وبناتها
ندى بدون ماترفع عيونها – طيب واذا ابوي اكيد بيعزم ابو فيصل وبيجن وش تتوقعين يعني ..
جود – ولاشي ولها عين جايه نويفوه ..
ندى – ناظري فيها البنت مو المغروره الي دايم فيه شي مو مضبوط بالموضوع ..
جود ببرود – خليها تولي ..ربي انتقم لي منها ابوها بيزوجها ولد عمها غصب
ندى بصدمه – تمزحين
جود – بالله ذي خشة وحده تمزح ..
ندى – طيب اللهم لاشماته
سكتت جود وناظرت في البتول ..الي مبتسمه
قالت جود لندى – هههههههه كلن على همه سرا ..
ندى – ههههههههههههه أي والله
ابتسمت البتول مره ثانيه بندر يرسل كلمه احبك حرف حرف ياحبيله سبحان الي يغير ومايتغير !
ارسلت له بنفس طريقته حرف حرف ... ا م و ت ف ي ك
وابتسمـت بقوهـ ...
*
بقسم الرجال
قال ابو متعب لبندر الي طول الوقت يطقطق بجواله – قم شف لك شغله بدال منت جالس وخشتك بـ هالجهاز
ماجد – ههههههههههههههههه خل احبك وحبيني تنفعك وقم اشتغل
حقد بندر عليـه – بردها لك يومآ ما ويارب مايكون بعيد لاشفتك تراسل حبيبة القلب
ماجد وهو مازال مبتسم – ايه يصير خير ان شاء الله
قام بندر وسوا لفه عشان يوري ابوه انه يشتغل ورجع جلـس ...
ماجد – لا تعبت من جد
بندر – بسك عني يكفي ابوي ياخي ماتخلون الواحد يستانس ويصير رومنسي
ماجد – ههههههههههه صر رومنسي محد رادك .
بندر – بصير ماني مشاورك ...
ماجد وهو يشوف ابو فيصل وعياله موجودين الا فيصل – اقول نسيبك وينه ماله اثر
بندر – أي نسيب
ماجد – فيصل
بندر – بحقد وله وجه يجي
ناظره ماجد – شفيك حاقد على الرجال
بندر – مافيه خير ياخساره اختي فيـه !
وش السالفه ماجد مو فاهم شي من كلام بندر ...!
ناظره بندر وعرف انه ماعنده خبر – متهاوش مع اختي لهم مده طويله جا مره وكرشته جود وعقبها ماعاد شفناه ..
انقبض صدرهـ - لا عاد تصدق ماحد قال لي .
بندر – سالفه ماتفرح يوه ابوي يخزني بقوم استعرض عنده شوي وبرجع لك احجز مكاني(قالها يستهبل)
ماجد – هههههههههههههههههههه خير ترانا متخرجين من الابتدائي لنا عشرين سنه
بندر وهو يقوم – عشرين يالظالم طلعتنا شياب ...
ووقف يستعرض زي ماقال عند ابوه ...
معقـوله تجمعهم الاقدار مره ثانيه ..!
بس هل يبقيل فيها بعد ماكانت لغيـره !
في وقت كان يتمناها له وحده !
لا تتعشم واجد يا ماجد كم الخيبات حصلت بحياتك !
هالمره مو لازم تكون استثناء.
*
بقسم الحريـم ...
اضطرت جود تسلم على عمتها وبناتها بعد مده من جيتهن الحفل وشافت نوف ماتحط عينها بعيونها صدق الواحد لا انكسرت نفسه يبان عليه اللهم لاشماته
قالت ام فيصل – كيفك يا جود ماعندك نيه ترجعين لبيتك
قالت جود – انا بخير ياعمه انتي شخبارك
وتجنبت الرد على السؤال لانها ان ردت بتكون وقحـه وهي ماتحب تجرح احد !
سلمت على مها الي واضح انها تحبها – جود اشتقتتتتتتتتت لك
جود – وانا بعد شخبارك مهاوي
مها – بخير الحمد لله ..
وجتها من الله .. وحده من العاملات تناديها عشان شغله بتسأل عنها وراحت لها
بعد شوي دق عمر عشان بيدخل على زوجتـه ..
دخل عمر مع ابوه وابو اريج واخوها الكبير وسلموا عليها كلهم ...
بعدين طلعوا الرجاجيل ماعدا المعرس وسلمن عليه خواته وجدته ام صالح وبعد التصوير ..
طلعوا ..
بالسياره قال عمر لاريـج – بدال ما احجز لنا بفندق مسوي لك مفاجأه
اريج الي اخذت على عمر كثير خصوصا انه كان يكلمها كل ليله ..- وين المفاجأه
عمر وهو يغمـز – اصبري وشوفي ...
بعد مده ... وصلوا للمكان الي يقصده كانت مزرعــــــه كبيره خضراء وفيها فيلا باين ان توها جديده ..
المكان كان روووووووعه ناظرتها بصدمه – مزرعه
عمر – ههههههههههه ايه ابوي تعبان عليها
اريج بفرحه – المزرعه لنا
عمر – ايه ابوي اكتشف انه ماعنده مزرعه وشرا ذي من فتره قليله وقلت تغيير نقضي كم يوم فيها قبل لا نسافر جده ..
دمعت اريج – بصراحه عمري مافكرت اني اشوف مكان خيالي زي كذا .
عمر برقه – لو بيدي اقدم لك العالم بالي فيه ماقصرت ..
اريج – انت عندي تسوى العالم ومافيـه !
/
بعد شهـر ونص...
قالت ام بندر لبنتها – حامل وتوك تقولين لي
جود تحاول تخفف الصدمه عن امها – يمه مادريت الا قبل كم يوم
جود – تلعبين علي معقوله توك تعرفين
جود تحاول ماتبين انها تكذب – يمه ما العب عليـك ...
ام بندر بحزن – يالله حامل وانتي بـ هالظروف
خنقت الغصه جود حتى امها فكرت نفس تفكيرهــــــــــا – يمه عساه مقدم خير علي
امها – يابعد قلبي بصير جده
ضحكت جود ضحكه فيها بكيه مكبوته – احلى جده بعد ...
امها – لازم نقول لابوك ..
جود انقبض قلبها – وابوي بيقول لفيصل لا يمه انا مابيه يرجع عشان ولده ابيه يرجع عشاني
مسكتها امها وجلستها جنبها – يمه اسمعيني زيـن
قالت جود بغصه – نعم يمـه !
ام بندر – يمه ولدك الي ببطنك يستحق انك تعطين ابوه فرصـه اخيره انتي عاقبتيه شهور وهو اكيد بيكون مشتاق لك مهما انكر
ايه بالحيـل !
-..... جربي هالمره عشان هالنفس البريئه ..عشان ماتندمين بعدين وتقوليـن ليتني وليتني ...
جا كلام امها على الوتــــــــــــــر الحساس .. من بنت لاخت لزوجه لام عرفت ان احساس الامومـه ماينوصف احساس التملك والحمايه والاهم التضحيه وش بتخـسر هي مستعده تسوي كل شي عشان ماتفترق عن ظناها ابد ولو على حساب سعادتها ناظرت في امها وقالت – خلاص يمه انا ماعندي مانع بس شرط اكون ببيت بلحالي
امها – مايصير الا الي تبغينـه
ابتسمت بحزن وخلت مهمـة نقل لخبر لابوها على امهــــــــــــا ...
امتلا البيت بالفرح يوم دروا ا جود بتصيـر ام ...وصاروا يعلقون عليها طول الوقـت
قال بندر – مو مستوعب للحين انتي بتصيرين ام
جود – هههههههههههههههه لا والله وش الي منقصني لاكون ام
بندر – ههههههههه مو راكب الوضع عليك
البتول – عاد انا اقول جود وراها تاكل ولايبين عليها طلعت تاكل عن اثنين
جود – ههههههههههههه مالت عليكم بس ..
قاطعهم ابوها ... – يبه فيصل يبي يقابلك برا
ماتت البسمـه الي على وجهها وعلاه الشحوب .. قامت ببطء الحين هي بشهرها الخامس وتوه يفكر يسأل عنها صدق الي مافيه خير مافيه خير ..
دخلت المجلس وهي تحاول تسيطـر على اعصابها لا تتنافض ..وجلست تطمن نفسها ابوك قالك انه موافق يحطك في بيت بلحالك ...بس يبي يقابلك
جلست قدامه بعد مارمت السلام بهدوء ..
ناظرها شقـد تغيـرت ..وبطنها واضح قال لها – حامل بخمسه شهور وتوني ادري
جود بنفس لهجته – بلا اخباري تهمك مره عشان كذا توك تدري
فيصل – يعني تتعمديـن تعاقبيـني
جود بالم – لا اعاقبك ولاتعاقبني اول مادريت اني حامل ققلت لك ..
فيصل – انا استأجرت لنا شقه وفرشتها
يالله هالرجال ملغي وجودي من حياته !
سكتت ..يالله لازم تمشي الامور بينهم على الاقل عشان تاخذ الاجـر مادامنه انهم في شهر رمضان ..
ناظرته – زين
فيصل – يالله خذي اغراضك بنمشي
جود – زين
وقفت وخلت غرفتها وجعت اغراضها راحت تنادي الشغاله تنزلها لانها ثقيلـه عليهـــــــا
تذكر فيصل وهو جالس ينتظرها كلام ابوه انه يتزوج عليها عشان يأدبها ناقص هو عله جديده
نزلت جود وودعت اهلها ودمعتها بعينـها قال بندر – جود اذا ماودك ترجعين علميني
قالت بحزن – برجع عشان ولدي مو عشانه يالله فمـان الله
طلعت بسـرعه لا تنهار بترجع لحياتها القديمه للضيق بس لاجل عين تكرم مدينـه ...
اخذ اغراضها وحطها في السياره وراحوا بيتهم الجديد ..
قال فيصل – بصراحه ابوي ماتوقعها منك
ناظرته – وش الي ماتوقعه مني
فيصل – انك يابنت الاصل والفصل تتركين بيتك وزوجك كم خمس شهور
جود بسخريه – بس عادي ماستغرب انك تمد يدك علي
حشرته في زاويه وناظرها وسكـت ..
وقفوا عند مبني عماره قريبه من ابيت اهله يعني هم وراها وراها بكل مكان ...نزلت ودخلت البيت كان صغير وعلى قدهم ابتسمت وهي تنزل عبايتها ..
قال فيصل – من بعد فيلا كامله هذا الي اخترتيه
قالت ببرود – اهم شي راحـة البال ..؟
ودخلت ترتب اغراضها ....قال فيصل وهو جالس على السرير - على فكره بكره بسافر مكه
جود – ليه
فيصل – بروح اخذ عمـره ...
جود – بروح معك ..
فيصل – انتي حامل وين تروحين
جود – واذا حامل بروح اصلي مابي اعتمر اذا كان مافي مجال
فيصل قلبها في راسـه – اوكي بس قبل نمر على الدكتوره ونشوف رايـها .. جود- اوكي اصلا لي موعد بكره عند طبيبتي
فيصل – موعد ايش
جود – متابعه الحمـل ..؟
فيصل – اااها
،،،
اليوم الثاني >>
سمحت الطبيبه لجود تسافر بعد ماعطتها اللازم من الادويه..
دخلوا البيت واخذوا الاغراض الي يبونها ... قال فيصـل – عجلي شتسوين
جود – هذاني خلصت
وطلعوا من البيـت ..ركبوا السياره وبدت رحلتهم لمكه ...
كانت المسافه بعيده جلست جود تقرا قرآن وفيصل يسـوق بسرعه
جود – ممكن تهدي السرعه
فيصل – وين اهدي مايمدينا نوصل قبل المغرب
جود – حتى لو انا مسويه لنا فطور خفيف
بس تحذيرها راح هباء منثورآ ..بعد ما انفجرت كفرة السياره الي قدامهم وخر فيصل عنها بسرعه لانها بدت تتقلب لكنه صدم بسياره كانت جايه يمهم على السيد الثاني .. مر الحادث بسرعه قياسيه حتى العقل ما استوعبها ...وبعد صدمه قويـه ...استقرت السيارات جنب بعض الدخان الاسود يعم الجو ..كان فيصل في نص وعيـه على وشك يغمى عليه شاف جود جايه على قدام وماتتحرك همس – جود جود
لكنها ماترد ..لايكـون !!!!!!!!!!!!!!
وغـــــــــــاب عن الوعـي ....!
جت الشرطه والاسعاف والدفاع المدني ونقلوا المصابين للمستشفى بمن فيهم فيصل وجود
ودقوا على ابو فيصل ...
طلع ابو فيصل من بيته يحس بالدنيا تدور فيـه ولدي وزوجته مسوين حادث كبير ركب سيارته وهو يرتجف ودق على ابو متعب ..
ناظر ابو متعب الرقم – خير اللهم اجعله خير
رفع الوليد راسـه لانه كان جالس مع ابوه ...
ابو متعب – وشو حادث متى هالكلام وهم كيف حالهم
وصار لو وجهه ابيض طاح الجوال من يده فز الوليد بسرعه – يبه خير شفيك
ابو متعب مصدوم – اخت ورجلها صار عليهم حادث
حس بقلبه يزيد النبض فيه – اختي أي وحده
ابو متعب – جود
الوليد – لاااااا وكيفها
اخذ الجوال الطايح – الووو ...كيف حالتهم
ابو فيصل – حرجه بالحيل
الوليـد - هم باي مستشفى يالله جايين
وركبوا السياره هو وابوه وطاروا للمستشفى لقوا ابو فيصل وعياله هناك ..قال ابو متعب – كيف حالهم طمنوني
ابو فيصل وهو يهز راسه بغم – مدري محد يعطيك علم بيـن
جلسوا وقت طويل على بال ماطلع الدكتور وقال لهم ....
جلس ابو متعب بعد ماسنده الوليد – جود مات الي في بطنها وجتها ضربه قويه على الراس...
الدكتور يحاول يهون الامـور – اهم شي سلامتها والحمل يتعوض ان شاء الله وحنا للان مو متأكدين من مدى الضرر الي اصابها بسبب الضربه والجروح الي براسها ...
مسك الوليد يد ابوه البارده بقوه ...
كمل الطبيب – فيصل تكسر عنده كم ظلع وفيه كم رضـه والحمد لله ان اعضاءه الداخليـه سليمه وماجاه نزيف او شي خطير !
*
نزل ماجد على حزة الفطور عشان يفطر شاف ريووف تمسح دموعها وامه مهمومه والفطور زي ماهو محد ذاقه ...
ناظرهن – خير ان شاء الله شفيه
مسحت ريووف دموعها كانت مو قادره تتكلكم تو كلمتهم البتول وعلمتهم عن الي صار
عصب ماجد – شفيه
امه – جود وزوجها صار عليهم حادث كبير
حس نفسـه بينهار همس – حادث
امه – ايه قبل العصـر ...
ماجد – وكيف حالهم
امه – فيصل طيب بس جود مات ولدها وفي غيبوبه مايدرون الضرر الي جاها
وقف مكانه جامد مايتحرك ... قالت له امه – تعال افطـر
تراجع وطلع من الصاله بدون شعـور وطلع لغرفته وسكر الباب ظل بمكانه واقف مصدوم والصدمه شالته من الى !!
جود مريـضـه ...بين الحيا والمـوت ..!!
جلس يهزء نفسـه ...
اعقل البنت متزوجه ..
بس هي بنت عمي مني وفيني ..
ان ماكانت الي تمنيتها من كل قلبي فهي على الاقـل عزيزه علي بكل الاحوال ..!
دق باب غرفتها ودخلت امه معها صينيه – يمه افطر حراام عليك تجوع نفسـك
ماجد – مو مشتهيه
امه باصرار – عشاني طيب كل تمره واشرب كاس مويه
عششانها بس ..اخذ حبة تمره وشرب مويـه ..
اخذ شماغه ومفتاح سيارته وطلع من الغـرفه ....دق على بندر – وينك
بندر – بالمستشفى
ماجد – مافي شي جديد
بندر بهم واضح من صوته الكئيب – لا جديد
ماجد – انا جايك بالطريق
بندر – زين لاوصلت تلقاني بقسم الطورائ
وصل ماجد بسرعه ودخل شاف بندر والوليد موجودين ...ووجيههم ما تنتفـسر ..
قال بندر بغصه – بنت جود الي ماتت لازم ندفنها
قال ماجد بغصه مثله – كم عمرها خمس شهور صح ...
هز بندر راسه – بنتظر لين بكره ان ماطلع فيصل او صحى بندفنها بدونـه ..
هز ماجد راسـه – هاه ماقال الطبيب شي حالتها حرجه مره
بندر وصوته مخنوق – مايدرون الاضرار بالضبط وش عددها ينتظرونها لا صحت ...
ماجد – يعيـن ....
*
اخذ عمر اجازه من شغله اول ما درا دخل بيته وكانت اريج تنظف بالمطبخ – اهلين حبيبي
قال وكأنه ضايع او مصدوم – جهزي اغراضك بنرجع الرياض
انصدمت اريج – الرياض الحين
عمر – ايه ايه بسرعه
رمت اسفنجة المواعيـن من يدها – عمر وش صاير شكلك مو مطمني
قال بحزن – جود وفيصل صار عليهم حادث وحالتها حرجه بالمستشفى
اغمى عليها ومسكها عمـر لا تطيح جلس يحاول فيها لين صحت وجلست تبكي ضاق صدر عمر مو ناقص ... قالت اريج – لاااا يالله نرجع بسرعه الرياض
عمر – يالله مشينا قومي جهزي الاغراض
قامت وبسـرعه الصاروخ جمعت كم غرض حتى ماتدري وش الي اخذت معها ومشوا للرياض ...
*
*
وهذي هي الايام يدور رحاها..القاكم بآخر بارت قريبآ
21-08-07, 04:40 PM
جديد مواضيع قسم القصص المكتمله من وحي قلم الاعضاء
العرض العادي
