للحب سجناء

السلام عليكم ورحمة الله.🍃

حيّ الله طيف، اللي بتجمع لنا الأحباب بإذن الله ، 🌹
سعيدة بعودتك،، وكلي شوق لقراءة قصص السجناء اللي كبلتهم قيود الحب
.ومتأكدة إنها بتكون قصص جميلة دام إنها من أرض الواقع.
بانتظارك بإذن الله.

الفصل الأول

ذكرياتي الليلة كالبحر الهائج يجرف ما امامه بلا رحمة
تتلاطم امواجها في ذهني بلا توقف ما بين هدوء ظاهري وصراع داخلي روضت نفسي عليه
اصبحت اشعر كأني بطل في مسرحية حيث ابتسم لمن حولي وأبدو مطمئنا بينما في داخلي تتصاعد امواج القلق والخوف من المستقبل
وهل سوف أستطيع ان اعيش واتعايش مع سجني الكبير كما كنت في سجني الصغير هدوئي الظاهري الذي اصبحت اتقنه
يخفي الكثير من العواصف التي تعصف بروحي حتى في وقت انهياراتي في الماضي كنت ابحث عن القوة في نقاط ضعفي
ما يدفعني لتماسك دموع الرجال من حولي عندما كانوا يأتون لزيارتي تمر بيني وبينهم لحظات صامتة
يحمل هذا الصمت ثقلا لا يقاس بالكلمات كلما نظرت في اعينهم رأيت احساسهم بالذنب نحوي
لم يكن تماسكي مجرد خيار، بل كان ضرورة نابعة من ارتباط هذا الدم المشترك الذي يجري في عروقنا فهذا الرباط كان يمنحني القدرة
على الصمود والتمسك با الامل وبأن غدآ سيكون أجمل وان الايام القادمة ستحمل في طياتها فرص جديدة وبدايات أفضل
فالأمل ليس مجرد خواطر عابرة، بل هو قوة داخلية نستمد منها استمرارنا في مواجهة العواصف مهما كانت عاتية
يدور بسيارته بلاهدف بعد ان صدم بطلب جده واعمامه الزواج منها
بقهر وحرقة يحدث نفسه/يعني ما كفاهم سنين عمري الي راحت بيلحقون على الباقي
رد على هاتفه بعد عدت اتصالات وبتذمر وامتعاض /خير يا بدر خير
بدر با استفهام / طلعت وراك على طول ولاشفت سيارتك
وبملامة / تراك خبصت جدي وعماني وضيقت صدورهم ما امداهم يقولون كلمتين ما شفنا الا بياض رجليك
ثامر يتنهد با امتعاض/ وين يعني بطير جايكم
عاد بدر الي المجلس بعد ان أنهي اتصاله
الجد / وش قالك ثامر
بدر/ الحين بيجي ياجدي
فهد/ يبه الله يجزاك خير انت على طول ما عطيت الولد فرصة
بدر يضحك / جدي ما عنده وقت خذوه فغلوه
الجد بغضب / انت يا خذوه فغلوه إذا ما وافق ثامر مالها عن ظهرك تشيلها
فهد يحاول تهدئة الجد المنفعل / الله يحفظك يابيي سنين وحنا مبرمجين عقولنا انها لثامر
الجد بمقاطعة / جاك العلم انت وولدك
بدر بجديه / والله ياجدي انا ما عندي مانع وبنات عمي كلهن عندي واحد لكن بنت اخوك انت محجر عليها لثامر ان فك ربي عوقه
والتفت لوالد ه / وابوي واقف معك ومجلس الشورى الي جالسات داخل ينتظرن وش بينتهي اجتماعكم عليه مأيدينك بها التحجير
مساعد الذي تغيرت تعابير وجهه الي الغضب انتبه له فهد الذي يجلس بجانبه أراد ان يتكلم ضغط على يده
و نظر له فهد نظرة رجاء بأن يصمت ولا يزيد الوضع توتر
والتفت لبدر بغضب / انت الحين ورى ما تسد فمك ترى ماحنا ناقصينك
سلطان بمعاتبة لبدر / ما يصلح منك ها الكلام وانا عمك انت ناسي أنك خاطب بنت مساعد
أردف / وبعدين مجلس الشورى الي تقول عنه محارمك وبنات عمك
بدر ببراءة مفتعله/ ليه وش انا قايل أنتم المجلس الأعلى وهن مجلس الشورى مالكم غناه عن مشورة بعض
مساعد الذي لم يستطع ان يصمت وبغضب / الحين انت وش جابك ومدخل عصك بشي ما يخصك
كل العيال كرشناهم لا يمرون مجلس ابوي اليوم وانت راز عمرك بينا
بدر با ابتسامه صفراء/ والله ياعمي ما بغيت اجي لكن جدي وابوي هم الي أصروا
الجد بجديه يوجه الكلام لبدر / الحين انت وعمك ذا ورى ما تنثبرون وتحشمون الي قدامكم
بدر الذي شعر انه تمادى بالكلام قام وقبل راس جده/ لك الحشيمة ولعماني الله يطول بعمرك واعمارهم على طاعته
رفع الجد راسه وبا امر/ ازهم على خويك شف وينه
في اثناء الكلام دخل ثامر والهم يكسو ملامحه / هذا انا جيت
الجد اشار لمكان بجانبه / تعال يابوك اجلس جنبي ترى الكلام اخذ وعطا
جلس حيث اشار له الجد وجلس بجانبه بدر تنهد بقلة حيله / اخذ وعطا وانتم مقررين كل شي
سلطان بشفقه/ والله ياولدي ما قررنا الا الي فيه مصلحتك
ثامر ابتسم بتهكم / ليتني عرفت مصلحتي من عشرين سنة ما كان صار الي صار
الجد يضع يده على كتف ثامر وبوجع يكبته في قلبه من اجل هذا اليتيم / الكلام بالماضي ما منه فايدة صار الي صار وانتهى وانت ما قصرت من صغرك وانت شيال الثقيلات
ثامر بتهكم / كتوفي فولاذ تشيل ما يحط عليها
بدر يضحك ويطبطب على كتف ثامر/ وانا اشهد ان كلك على بعضك فولاذ أمك الله يرحمها متوحمه على حديد
الجد بغضب وامتعاض / اذكر الله لا تاكل ولد عمك
فهد بغضب يمسك بفنجال امامه ويشير لبدر / اطلع من ها المجلس كله قبل ما ها الفنجال يوقع بجبهتك
بدر قبل يغادر المجلس التفت لثامر / انتهت مهمتي قبل تبدأ الله يعينك
نظر فهد لوالده / انا قايل لك خله ينثبر ما وراه فود ها المرجوج وانت الله يعافيك اصريت يجي
سلطان بوجه السمح التفت لثامر وبحنو ابتسم / ما يحتاج تشيل هم ابوي متكفل بكل شي
ثامر هزراسه وزفر/ طيب سوو الي تبون ماني معارضكم
وبقلة حيله / وش مطلوب مني الحين
امسك الجد بيده وبا امتنان / الله يبيض وجهك ما قصرت
على الجانب الآخر من بيت الجد
في مجلس النساء
رفعة بقلق / ام بدر كلمي ولدتس شوفي وش صار
ام بدر / يابنت الحلال اصبري لو في شي فهد بيكلمني
شروق / امي صادقة لو في شي بيعلمونا
سعاد تميل براسها لشروق وبهمس / الكل خايف ان ثامر يرفض ثم توقع بروسهن
شروق / ضعيف والله ها الثامر كل ما بغيتو تخلصون من شي حطيتوه بظهره
ما يكفي سنين عمره الي راحت بشي ماله ذنب فيه والا ها المسكينة الا ما تدري وش يطبخ من وراها
سعاد/ الشكوى لله الولد القرادة بوجهه من انولد ابوه توفى وماجا عمره ساعة
وأمه قبل عمر الفطام تزوجت وما تهنت بها العرس حملت وماتت ليتها ما اعرست
شروق بصوت منخفض/ امه ما تنلام بعد يا عميمه تراها على كلامكم ترملت صغيرة ووضع عمي جلال الله يرحمه كان خاص
سعاد بحسرة ووجع/ هو وضع عمتس جلال والا الي صار لعمتس حمد وعمي حزام الله يرحمهم خليها على الله بس
ام ماجد تناظر لجهة سعاد وشروق وبتهكم/ ما شاء الله وش عندكن منعزلات وكن الموضوع ما يهمكن
سعاد / سلامتس يا حماتي العزيزة سوالف عاديه انا وشروق
وبا ابتسامة مجاملة/ وبعدين هذولا عيالنا اكيد يهمونا
ام بدر ترد على هاتفها/ زين ما شاء الله ألف مبروك
ام ماجد تلتفت با اهتمام لأم بدر/ بشري يانورة
نورة / ثامر ما عنده مانع موافق على العرس ويبون يخلصون موضوعه با أسرع وقت عشان تروح معه
شروق بدهشه / وش أسرع وقت البنت أساسا ما عندها خبر والحين فترة اختباراتها حرام عليكم مهدو لها الموضوع اول
ام ماجد بحنق / وانتي وش دخلتس بها السوالف اكيد هذا شور عمي وعمي كلامه يمشي على الكل هي وغيرها
سعاد تحاول تهدي الوضع وقفت وامسكت بيدها / شروق قومي معي نشوف العشا تعرفين جدتس ينام بدري
في مكان آخر من بيت الجد سعد بن عاصف
سما بحيرة / بنات وش تتوقعون يصير
ريما / حتى لو وافق هو اكيد مضاوي بترفضه
اردفت / هي طالبة طب على وجه تخرج وهو توه طالع من السجن
وبا استغراب / وين ياعمي فرق بينهم من جد ظلم لها
خلود بتهكم وتشفي / سلامات ليش ظلم
وبا استحقار استطردت / بنات خلنا واقعيين الاثنين ظروفهم صعبة ومالهم حل الا بعض
وبنظرة شماته / والانسيتو من كان سبب سجنه الله ياخذها
سناء با انتقاد / اعوذ بالله وش ها الكلام الواحد ما يضمن وش بيصير له بعد دقيقة اتركو الشماتة عنكم
سما بخوف / لا والله ما قصدنا شماتة قد ما هو فضول
خلود با احتقار مطت فمها / ليش انا كاذبة هذا الصدق السالفة الي من تحت راس أمها من طلعنا لدنيا وهي غيمة سودا بحياتنا كلنا
سناء / البنت وش ذنبها نواخذها بذنب امها
خلود بغل / كان يوم اسود يوم ارتبط اسمنا با اسم أمها الله ينتقم منها
منار التي تجلس بجانبها التفتت لها / تكفين خلود فكينا من ها السالفة
وبا انتقاد ومن بين اسنانها همست لها / ليش تتعمدين تفتحينها وانتي داريه ان جدي محرم أحد يسولفها لو بينه وبين نفسه
بتول بتأفف / ليتني سمعت كلام ماما وجلست اذاكر في بيتنا ولا جيت
نواظر تدخل على البنات بعصبيه / أنتن ما تستحن اصواتكن واصلة لآخر الشارع
بتول تنظر لخلود بغيض والتفتت لوالدتها وهي تضع يدها على فمها / انا للحين ما فتحت فمي هذي اصوات بنات اخوانك
سهى تنظر لخلود با استهجان / عادي عمتو نتناقش
نواظر / هذا ما هو أسلوب نقاش كل وحده تزايد على من صوتها اعلى من الثانية كنكم بحراج والموضوع تافه
سناء بقهر / عميمه بالله كيف تافه وانتي تدرين ان جدي وعماني قاعدين يحددون مصير اثنين مستضعفينهم
والاثنين لاحول لهم ولاقوه
نواظر بعصبيه / ليش بابنت مساعد ماهو عاجبتس الي بيسويه ابوي
سناء تضع اصبعها على جانب رأسها وبتحدي / لامو عاجبني ها الأذلال والتحكم بالمصير
نواظر بتهكم ترفع حاجبها / لو ما وافق ثامر لا تستبعدين انها تنشب بحلق ابوتس والا خطيبتس المستقبلي
سناء بتهكم مماثل / ألف مبروك وابرك الساعات لو يخطبها على قولتس خطيبي المستقبلي إذا هي مقتنعة فيه وهو مقتنع فيها
وابوي تعرفون نظرة مضاوي له وكيف تشوفه
تستطرد سناء وهي متأهبة للخروج / عميمه تراتس حتى انتي في دائرة الخطر ما هو بس امي
خصوصا عايلة زوجتس عندهم تقديس عجيب للعلم ومن ها الناحية ما نحتاج نسولف عن مضاوي عن اذنكم
نواظر تناظر لسناء بذهول / لا البنت ذي انهلبت رسمي
منار بمحاولة لتهدئة النقاش / تعرفين سناء عاطفية بزيادة وساعات ترمي كلام ما تدري بمعناه
في مكان آخر من بيت سعد بن عاصف
دخلت سناء المطبخ وبغضب اشارة للخادمة / ميري بسرعة عطيني موية ريقي نشف
سعاد بذعر التفتت/ بسم الله دخلتي مثل العاصفة وش فيتس
سناء تشرب المويه دفعه واحده
شروق با استغراب تشير لسناء / كنتس طالعة من معركة وجهتس شاب ناار
سناء / لا معركة ولاشي احتد النقاش بيني وبين خلود وبعدها عمتي نواظر
سعاد با استفهام / والسبب
سناء / ابد ما في غير حديث الساعة ثامر ومضاوي
شروق بملامه / وش تبين فيهن
اردفت / خلود وتعرفين الحساسية الي بينها وبين مضاوي وعمتي نواظر ماتحب أحد يناقشها
سناء عقدت حاجبيها بقهر/ لاحول ولاقوة الا بالله انا وش قايله غير يا ناس حرام الي قاعد يصير
تناقشون وتقررون مستقبل اثنين وتحكمون وتنفذون بدون ما تبون أحد يعترض
سعاد ابتسمت بود / يا قلبي ياسناء حنا ما حنا عدوان لهم وخص مضاوي انتي عارفه مكانتها وخصوصا عند ابوي
يبيعنا ويشتريها واكيد انه ماهو راميها بالنار
سناء با استهجان / الله يرحم والديتس ياعمه كلنا عارفين ان الي قاعد يصير ظلم لا تبررين
استطردت / وإذا جدي يبي يزوجها ما هو من قل خطاطيبها كل شهر إذا ما هو كل اسبوع يكلمونتس او يرسلون أحد على جدي يخطبونها
شروق بيأس/ ترى حنا هربنا من الاعصار الي داير بين نساء العاصف وجينا هنا للمطبخ مالنا الا الصمت وش بنقول يعني
سناء بقلة حيله / خايفه من عقوبة الي يسوونه اهلنا بها المساكين تجي على روسنا
سعاد بخوف / استغفري ربتس وش ها الكلام الي يسمعتس يقول مصدرين حكم اعدام
ترى كله موضوع زواج اتفقوا كان بها ما اتفقوا ربتس حلل الطلاق
شروق برعب / اعوذبالله الا ها الفال اذا فيه طلاق الله لا يكتب ها الزواجة من اولها لهم
سناء با امتعاض / ناقصين فضايح حنا بعد نكملها بطلاق
سعاد با انكسار / وش فيه الطلاق يابنات والله انه حل عظيم وربي ما حلله الا انه فيه مصلحه لطرفين
سناء بحرج / آسفه عميمه والله مو قصدي اقلب المواجع لكن عمتي نواظر تطلع الواحد من طوره
اردفت وهي تقبل رأسها با اعتذار / لا تصيرين حساسة فديتس يا احلى عميمة بالدنيا
ابتسمت بود وممازحة/ والحمدلله انتهت قصتكم على خير
في مكان آخر من بيت الجد
الجد بحضوره المهيب دخل لمجلس النساء / وين البنات خلوهن يجن بسرعة
وقفت فزه / ابشر ياعمي الحين اناديهن
بعد عدة دقايق
جميع نساء العاصف مجتمعات في مجلس النساء امام الجد
الجد / اسمعن يابناتي والكلام للجميع الحاضرة منكن تعلم الغايبة
ثامر اليوم له أسبوع من طلع من السجن واهل المقتول الله يرحمه من شروطهم انه ما يسكن الديرة الي هم فيها وحنا ما صدقنا انهم يعفون عنه
وبا الم وحسرة زفر / شرينا دمه مشترى منهم ولا بعد حنا مخالفين شرطهم انه يبعد ويجلي عن الرياض كلها
ام ماجد بمقاطعه / وعرسه وشلون
الجد با استهزاء / ريحي قلبتس يارفعة افتكيتي من مضاوي
رفعة بخوف / يا عمي ماهو قصدي بس
قاطعها الجد بغيض / قصودتس كلها نعرفها
اردف وهو ينتقل بنظره لجميع الحاضرات / ما بعد فاتحت مضاوي بسالفة الخطبة بشوف ها اليومين نطلعها من المستشفى ونشاورها
وبعطف وحنو أردف/ بغيتها لثامر ماهو والله اني مرخصها وانتن تعرفن من هي مضاوي عندي لكن ثامر كفو ويستاهل وحده مثلها
سناء لشروق بهمس / ياربي بنتحر من سالفة اشاورها اهلتس يكذبون ويصدقون الكذبة
سعاد القريبة من سناء وشروق بتحذير همست / عدو الليلة على خير انتي وهي تعرفن جدكن زين
الجد ينظر لجهة سعاد بحنو وابتسم/ عندتس شي تبين تقولينه يا ام انور
سعاد ببشاشة ابتسمت له / مافي شي عسى عمرك طويل بس أقول أجلو الموضوع شوي لو أسبوعين
مضاوي عندها اختبارات أخاف تتأثرأو يمكن لها راي ثاني
الجد سعد ينتفض / أخو رثعة وش رايها عقب رايي بنتي ماتخالفني
أردف / انا ما جمعتكن تشورن علي؟ جمعتكن عشان أوصل لكن العلم من راسي لروسكن
وبتحذير / وماابي وحده فيكن تصب العلم باأذن مضاوي ولا يطلع خبر الخطبة لين انا أقول
يقف الجد بأمر / وقومن جهزن العشا وعقبه كلن توكل لبيتها
يخرج الجد من مجلس النساء
التفتت نواظر لسناء با استهزاء / هااه ست سناء وش رايتس
تقف سناء وتتبع سعاد التي خرجت مباشرة بعد الجد / وش بيكون رايي غير الله لايجعل امرنا بيد خلقآ ماترحمنا
نواظرتلتفت لأم بدر / الله يعينكم عليها ام لسانين كانها جت في حظ بدر
فزه بغضب / ليه يا ام عبدالله بنتي ماهي عاجبتس
نواظر بتهكم تهز رأسها/ والله بنتس ام لسانين ماهي ابد عاجبتني
شروق بمقاطعة / والله ياحظه الي سناء من نصيبه بدر والا غيره ما يخسر سناء الا الي طايح حظه
امالت رفعة فمها با امتعاض وازدراء وهي تنظر لأبنتها خلود
بعد اربع أيام من الاحداث السابقة
في المستشفى في غرفة خاصة بمرضى كبار الشخصيات في زيارة المساء
طرق على باب الغرفة ومن ثم صوت نحنحه / الضوة
مضاوي بترحيب وبشاشه/ هلا جدي هلا حياك تفضل ادخل
يدخل الجد ويسلم على مضاوي ابتسم وبعطف / تغطي معي زوار لأم جلال يبون يسلمون عليها
مضاوي بترحيب / حياهم الله خلهم ينتظرون ازين غطاها
الجد / ما عليه وانا ابوتس انتي تغطي وكل الي جايين محارمها
مضاوي با استعجال / عن اذنك جدي بروح للاستراحة وخوذو راحتكم
الجد بجديه / لا تطلعين خلتس موجودة ابيتس بموضوع
مضاوي با اندهاش وهي تلبس عبأتها ونقابها / وش فيه
وبا استفهام / عسى مافيه شي كايد
الجد / لا ما فيه غير الخير ان شاء الله تغطي الحين وبتسمعين وش فيه
التفت للباب ونادى / ادخل يافهد انت والي معك حياكم
دخل فهد لوحده وسلم على راس امه ويدها
الجد با استفهام / وين خويك
فهد / يكلم جوال الحين يجي
أشار لمضاوي بيده دون ان ينظر اليها وبا احترام / مرحبا مضاوي وشلونتس بشريني عنتس
مضاوي / طيبه طاب حالك وفالك
فهد/ وشلون امي عسى ما هي متعبتس
مضاوي تنظر للجدة بمحبه وشفقه/ هذي امي وش ما سويت لها ما اطلع من جزاها
الجد سعد / والله حنا الي مانطلع من جزاتس على سواتس لها
سمعت صوت جهوري لأول مره تسمعه دخل ولم تلتفت له
ثامر / السلام عليكم
ردت مضاوي السلام بهدوء وبينها وبين نفسها / بسم الله من هذا الي صوته يروع لا يكون بس ولد عمي جلال المسجون
البنات يقولون طلع اعفو عنه
توجه نظرثامر لاشعوريا للمرأة النائمة بهدوء وابر المغذيات تترك أثرها الواضح على يديها
جهاز الاكسجين فوق رأسها وانبوب التغذية مغروس في رقبتها
سجن، ولكن من نوع آخر قريب من السرير طاولة مفرود عليها مجموعة من الملازم والكتب
ولاب توب صغير وجوالين أحدهما بدون كاميرا والأخر حديث
الجد سعد / ثامر سلم على بنت عمك مضاوي
ثامر رفع راسه لجده
الجد أشار له / شفها الي واقفه وراك وانا جدك
ابتسم الجد بحب / مضاوي مرافقة مع جدتك من طاحت الله يشفيها رفضت أحد يرافق معها حتى بناتي طردتهن قالت جدتي ما اتركها
وبا امتنان /الله يجزاها خير
فهد بتعزيز لكلام الجد / بنت حزام اصيلة وقليل بالبنات مثلها أدب واخلاق ما شاء الله عليها
مضاوي بينها وبين نفسها / ياربي وش عندهم عمي وجدي احسهم يبالغون بالمدح كأني توني متنومه عليها ما هو لنا أكثر من سنتين
قاطع افكارها صوت ثامر
ودون ان يلتفت / كيف حالتس يامضاوي
مضاوي / الحمدلله طيبة
وبنفسها وبتمني / يا الله ليت جدتي بوعيها وتفرح بطلعته من السجن كأنه البارحة يوم حطت يدها على فمي ماتبي احد يسمع وش قلت لها
عن ذاك الاقتراح الانتحاري
وبفرحة بينها وبين نفسها ابتسمت / الحمدلله انها ما طاوعتني بجنوني اكيد كانت تدري انها ردت فعل للي سوته الي اسمها امي فيني
الجد سعد /الضوه أسالتس وش فيتس يابوتس
مضاوي شاردة الذهن انتبهت / هاه جدي
فهد يضحك / شكل بنت حزام ماهي معنا مع الاختبارات
وبتوضيح / ابوي يسأل متى تبدا اختباراتكم
مضاوي / بنبدا اول اختبار بكرا ونخلص ان شاء الله عقب أسبوعين
الجد سعد /هانت الله يسرها لتس شدي حيلتس
أردف / تبين أحد من البنات يتنوم معتس يساعدتس وقت ها الاختبارات
مضاوي وهي تنظر للجدة المسجاة على سريرها بشفقة / لا جدي ماني بعجزانه من جدتي ومعي سوناتي
ما تقصر إذا طلعت الصباح للجامعة تنوب عني تراعيها وحريصة عليها مثلي وازود
والبنات وراهم مذاكرة ما هم فاضين الامتحانات ما عاد باقي عليها شي
ثامر الصامت المستغرب تنادي الجد والجدة بجدي وجدتي وكأنها حفيدتهم وليست ابنة عم والده
زاد استغرابه جراءتها وكأنه غير موجود وهي لأول مره تراه تتحدث مع الجد سعد وعمه بكل بساطة
وقوفها الشامخ بعباءتها الواسعة والنقاب الذي لا يرى منه شيء لا ينفي اعجابه بتسترها
وحركتها الدؤوبة للجدة النائمة من تعديل وسادتها لشرشفها ومراقبة الأجهزة الموصولة بالجسد المسجى على سرير المرض
ورائحة الجدة عطر النظافة ورائحة طيبة تفوح من شعرها المسرح والمغطى بترتيب رغم وجود الأجهزة بيدي الجدة ورقبتها
لا ينفي الاستغراب او ربما شي من الاعجاب للمرافقة مع جدته وكمية الاهتمام منها
ربما تكون الخادمة التي تحدثت عنها هي من تقوم بخدمتها، ولكن في زيارته الأولى فور خروجه من السجن صباحا مع أعمامه
الخادمة كانت موجودة ويوجد فرق ملاحظ بين المرتين
لم تكن مضاوي موجودة ربما كانت في الجامعة كما قالت انها تتركها في الصباح
الجد سعد / اسبقوني يا فهد انت وثامر بلحقكم شوي
خرج فهد وخلفه ثامر
أردف الجد سعد / تحتاجين شي تبين تطلعين للبيت ترتاحين لتس كم يوم
مضاوي با اندهاش / سلامتك ما بي شي كل شي موجود
وبتخوف وتوجس / جدي قلت لي عندك شي بتقوله قبل يدخل عمي فهد
الجد سعد / لا يا بوتس ما في شي بغيتس بسالفه ونسيتها
مضاوي بتساؤل وتوجس / جدي علمني الصدق فيكم شي مهي لكم عادة الزيارات اليومية هذي بفترة الاختبارات
انت زيارتك با الاسبوع مره والاسبوع هذا جيت ثلاث مرات
وبتعجب / وقبل أمس عمي أبو سعد وخالتي ام سعد وامس ام ماجد وخلود واليوم انت وكلكم احس عندكم كلام بتقولونه وتتراجعون عقب
في شي صاير مدري عنه
الجد سعد ينظر لمضاوي بمحبة / ما فيه غير الخير انتبهي لدروستس ونبيتس مثل ماحنا خابرينتس
تجيبين تقدير يرفع الراس
طبطب بحنو على كتفها / تقعدين با العافية
خرج الجد المستند على عكازه واكتافه الشامخة حملت من الهموم والمصائب الكثير الكثير ولكن لم تنحني
خارج المستشفى يقف الجد وثامر وفهد
ثامر / جدي تامر بشي انا ماشي
الجد سعد / سلامتك
فهد/ وين رايح تعال معنا
ثامر ابتسم / جعلك سالم وراي اشغال واجد واوراق لازم أخلصها
طبطب فهد على كتفه بود / يا الله اجل مع السلامة
داخل سيارة فهد
التفت للجد / اشوفك تأخرت عند امي
الجد ينظرله با ابتسامة/ يعني مستصعب تسأل وش قلت لمضاوي وعلمتها والا ما علمتها
فهد يضحك / والله يبه ان الموضوع تبي الصدق محرج بس هي وش ردت لك
الجد بحيرة / ما قلت لها وهي حاسة ان ورانا شي
حرك الجد رأسه وبعطف وشفقه زفر / قطعت قلبي يوم شفت كتبها منثره ووجيها شاحب من المذاكرة مجهده نفسها مره
قلت ما ودي أقول شي يشغلها ويضيع تعبها مع دراستها هذي الي ليت موافقتكم عليها
فهد بتأييد هز رأسه/ سويت بها خير خلوها تذاكر على راحتها
أردف وهو يدير محرك سيارته ويخرج من مواقف المستشفى / قل عسى بس ما تلقف وحدة من ها الحريم وتصب العلم بأذنها قبل تعلمها
الجد بغضب / والله حذرتهن وحلفت ان جاها العلم من أحد قبلي والا سمعت طرف علم ان ما يحصل لهن طيب
فهد بقلة حيله / والله يبه الحريم مااينحلف عليهن إذا بغن يطلعن علم أنك ما تلحق على من قالته لو تركب صاروخ
الجد / يصير خير وانا ابوك
في سيارة ثامر
كعادته منذ خروجه من السجن مكان اختلائه بنفسه هو سيارته
بجانب طريق بعيد عن الازدحام تقف سيارة ثامر على ضيقها أصبحت أوسع من بيت جده الكبير
وضع غترته بجانبه وشبك يديه خلف رأسه واسند ظهره للخلف يفكر با احداث اليوم
وبينه وبين نفسه / وش فيك يا رجال مهي هذي الأيام الا انت تمنيتها من عشرين سنة الحرية خارج اسوار السجن
تضحك على نفسك انت ترى طلعت من سجن بتدخل سجن ثاني
سجن بنت الحرمة الي جنت على ال عاصف كلهم وانت صرت كبش الفداء
يمكن البنت فيها خير والله عوضك فيها
انت بعقلك تسولف الحية ما تعقب الا حيايا مثلها وانت شفتها اليوم بعينك
جراءتها مع عمي فهد تأخذ وتعطي ولا استحت مني صوتها يلعلع
زفر بضيق / يا الله أنى في حيره من امري فدبرني فأني لا أحسن التدبير
يقطع تفكير ثامر رنين الجوال
هلا خالد
خالد / وينك يا رجال جينا لبيت جدي ما حصلناك
ثامر يدير محرك سيارته / عندي اشغال رحت خلصتها والحين راجع
خالد / تعال بسرعة كلنا مجتمعين في مجلس جدي
ثامر بتوجس / من أنتم
خالد بضحك / وش فيك كنك خفت عيال عمانك بدون الشيبان
انا وماجد أخوي وسعد ومحمد وأنور
ثامر / وبدر وينه
خالد / يابن الحلال تعال بس يعني مايزين المجلس الا بلقافة بدر
بعد ربع ساعة في مجلس الجد سعد عاصف
يدخل ثامر ويسلم
خالد وهو يمسك بيده وبممازحة/ تأخرت بغينا نرقد
سعد يضحك / ما هو حولك الرجال بعالم ثاني
انور بممازحة / هم العرس ولا وجع الضرس
محمد ضحك وبممازحة / لا والله كلن على همه سرى أنور توه راجع من مستوصف الاسنان
ومتأثر من الحوسه الي حاسوها بخشته
أنور يحذف محمد بخدادية / ياااشينك إذا استظرفت والله الدكتور لو لاعب بفمك زي ما سوى لي
ان تعتزل العالم شهر من وجع راسك
ماجد / وانت لا يكون رحت لمستوصف غير الي قلت لك
أنور / الي قلت بعيد وزحمة قلت ذا أقرب والدكاترة واحد
بقهر /ما دريت انه سباك بشهادة دكتور
ماجد يضحك / تستاهل ماجاك اسأل مجرب قلنا لك لاتروح لأي أحد
محمد بممازحة التفت لثامر / شفيك مكتم والا شفرتك ما يعرف لها الا بدر
ثامر يبتسم / لا والله كلكم خير وبركة بس متضايق شوي
خالد بقلق / افاا عليك ياولد عمي بعنا بالسوق ولا تقول متضايق
ثامر يربت على كتف خالد/ تسلمون يا الغالي أدرى ما تقصرون بس لي أوراق مجبور أخلصها قبل تنتهي المهلة
وبضيق/لازم اطلع من الرياض بسرعة
أنور بقهر / يعني ما كفاهم الملايين الي اخذوها عقب كل ها السنين بعد يشترطون أنك تتغرب
ثامر وهو يفرك جبينه بألم / امر الله بعد وش نقول والتغريب من الدولة ترى
وأفضل فتره هذي لجميع الأطراف
محمد بحماس / يا الله نفسي اعرف السالفة ذي من أولها محد معطيني وجه اكيد للقصة وجهين
يلتفت ماجد لمحمد فالجميع محظور عليهم تداول تلك القصة الرهيبة وبا انتقاد عقد حاجبيه / يااشينك عاد إذا تحمست
ليتك تخلص دراستك الي كل سنه ناط لقسم على فضولك ذا
ضحك خالد بمحاولة لتبديد الاحراج الذي رئاه في وجه محمد وبممازحة / ولد عمي ما عليه
بس مشكلته كل ما مدحو له قسم شال قشه وعسكر فيه أعجبه والا راح يدور غيره
ثامر با استغراب / من جدك والا تمزح
خالد/ لا والله ماجاك الا الصدق تكفى لا تمدح له تخصصك ثم يشل شلايله ويا الله على قسم ثامر
محمد / وش أسوي كل ما دخلت قسم درست ترم اما جو قالو لي ماله مستقبل والقسم ذا خسارة الدراسة فيه
والا صعب عساني اعدي المواد لا يشوتوني انذار
الحين الحمدلله قسمي هذا ارتحت له خل في العايلة يجي لكم محامي
ماجد / يا رجال وش تبي باالقانون قلنا لك من الأول ادخل كلية عسكرية امسك طريق ابوك واخوك بدر
محمد بتذمر / هو انا قايل شي ابوي اصلن رافض حتى ان بدر يدخل العسكرية لكن بدر غصب دخلها سجل بدون علم ابوي
رفع حاجبه بتهكم / ليه ماتعرف عمك يعشق شي اسمه عذاب قصدي دراسة يقول بشهادتك تخدم وطنك أكثر ماهو لازم عسكرية
أنور / عاد احس خالي فهد متفهم ولا يفرض اراءه يناقش تقنعه او يقنعك
محمد بضحك يهز رأسه/ صحيح هو يناقشك ويقنعك او تقنعه لكن ترى خالك بعض المرات يقلب دكتاتور
أردف / تبي الصدق اول ما تخرجت من الثانوية سجلت بكل الكليات العسكرية لكن رسبت بالنظر
أنور / تدري اول مره أدرى بسالفتك ذي توقعت عشان المجموع ما دخلت
وبعدين خالي فهد واصل ما شاء الله عميد والله لو بغى مشاها لك
محمد با استهزاء / لو بغى خالك لكن مايبي من غير خوالك الي ما خلو شي شين ما ورثوه لنا
قصر النظر الي انا فيه وراثي لو ما رسبت بالنظر والا كان سويت مثل بدر ولا علي من احد
ثامر يلتفت لسعد / وانت وش تخصصك
سعد / انا حذفوني التنسيق تربية خاصة عشان مجموعي ما اهلني
التفت لماجد / كنت ابي ادخل مع ماجد انجليزي
لكن قلت يا ولد بيضيع عمرك إذا حولت امسك طريقك بس وكمل
وكلها دراسة اهم شي بعدها وظيفة وقعدت بجهاد مع ذا القسم لين تخرجت
وننتظر التعيين اطقطق بمدراس أهلية لين ربك يفرجها
ماجد با امتعاض / احمد ربك يارجال مليون مره دخلت الإنجليزي على بالي بخلصها با أربع سنين حافظ لي كم كلمه من أيام المتوسط
واخرتها اكلت تبن ما شفت الوثيقة الا عقب ما نشف ريقي سبع سنين كرف دراسة
والي يزيدني غبن إذا أحد سأل ماجد متى التخرج
يضحك محمد / هذا عاد ودك تسحبه للجامعة وتقول ادرس أسبوع عني إذا ما طق راسه شيب من الروعة والا يمكن ينخرس بعد
ابتسم ماجد / تدري وصل الوضع فيني اخر سنه ادخل غرفتي وابكي من القهر متى بس اصحى من كابوس متى تتخرج
والحمدلله عدت على خير
ضحك محمد والتفت لثامر / تدري وش النكتة ياثامر ان ماجد متوظف بشهادة حاسب ماهو انجليزي التخصص الي دخله عن حب
ثامر يبتسم ويهز راسه / سبحان الله انا دخلت القسم الي تخرجت منه كان المتاح لي بالسجن والا ماحبيته ابدآ
حلم حياتي قسم تستصعبه الناس لكن ما حصل لي
مع ان مجموعي بالثانوي يدخلني لو ابي أي تخصص واقلها طب لكن التخصصات للمساجين محدودة بما ان الدراسة عن بعد
أنور بممازحة / ما عليك يا رجال ام العيال بدالك دخلت طب
ثامر با استغراب / وش ام العيال
أنور بحرج / والله ما هو قصدي ياثامر بس سمعت طرطشة كلام أنك بتخطب مضاوي الحزام
ثامربا استغراب وبا ابتسامة صفراء / غريبة سمحو جدي وعماني بدراسة الطب
سعد / العرب ماهم على خبرك كلهم اتجهوا للمجال الطبي أخوي فواز اشعة
وراكان أخو أنور تمريض وفيصل ولد خالي فهد اسنان الي شذ عنهم خالد وانور هندسة
ثامر بمقاطعة / ما اقصد العيال اسأل عن البنات
ماجد ابتسم / تبي الصدق والله ما ندري وش يدرسون بالجامعة لكن بنات عمانك ما شاءالله منتشرات بجميع الأقسام
وبا ارتباك حاول ان يخفيه/ مضاوي عشانها طب وصار لغط كثير قبل تدخل الجامعة بين جداني وعماني ناس معها وناس ضدها
ثامر / طيب كيف اقتنع جدي
محمد بسخرية رفع حاجبة/ اقتنع بسلامتك وينه وين القناعة مضاوي قومت الدنيا وقعدتها
عشان تدرس يوم شافوها مصره ومعاندة ماتبي الا ها القسم وافقو وعمتي نواظر وقفت معها واقنعتهم بدراستها
ثامر بنفسه / يا الله رحمتك وعنيدة بعد منين تلقاها يا ثامر
خالد / هييييييييييه يا ولد وين وصلت
ثامر ابتسم با احراج / / معكم
محمد وهو يقف ليغادر/ يا الله تصبحون على خير ورانا بكرا شيل وحط مع الجامعة وبعد بكرا اول اختباراتي دعواتكم
طلعوا الشباب وتركو ثامر خلفهم يصارع أفكاره
فجر اليوم التالي
ثامر ثامر ثامر
قفز مرعوب / هلا جدي وش فيه
الجد بحنو / بسم الله عليك وش فيك نايم هنيا وتارك غرفتك
ثامر وهو ينفض يده / مافي شي بس العيال طلعو من هنا متأخرين ونمت ما حسيت بنفسي
الجد بخوف / وراك تنفض يدك
ثامر / سلامتك احسها شوي ثقيلة وتوجعني
الجد بملامة/ يدك ليلك كله نايم عليها من عذرها توجعك
أردف / تجدد لصلاة والحقني للمسجد
ثامر وهو يتثاوب من شدة النوم / ابشر انتظرني خمس دقايق ونطلع سوى
الجد وهو يغادر المجلس يا الله استعجل وانا بقصر خطاي الحق الإقامة
صباح اليوم نفسه
الجد وثامر امام سفرة الافطار
الجد / ثامر افطر لك ساعة وخبزتك بيدك تقلبها
ثامر وهو يقف / الحمدلله شبعت تامر شي بطلع
الجد سعد / وين تو الناس بدري
ثامر / بروح أخلص أوراقي من إدارة السجون واختم شهادتي من الجامعة
ما عاد باقي وقت لازم اقضي اشغالي قبل تخلص المهلة
الجد بلطف/ عسى الله يقويك ويسهل امرك أعجل أخلص اشغالك ويمدي مضاوي قضت اختباراتها
ثامر يتفقد مفاتيحه وجواله / على خير
بعد مرور أسبوعين على الاحداث
في المستشفى في غرفة الجدة النيرة
تدخل بعد آخر يوم اختبارات
مضاوي تسلم على سعاد وبترحيب / نورتي المستشفى وش عندتس جايه بدري
سعاد/ هلا فيتس بشري كيف اختباراتس
مضاوي تنزل عباءتها ونقابها وتعطيها الخادمة / الحمدلله ما بغينا نخلص يهبل آخر اختبار ما توقعت انجز فيه كذا
اردفت / لحظة عميمه بصلي العصرما امداني آذن وانا بالطريق
مضاوي وهي في طريقها للحمام / من جيتي معاه
سعاد / سواق ابوي ماعلمتس نزلني وراح يجيبتس من الجامعة
مضاوي التفتت بخوف / عسى ماشر لايكون جدي فيه شي جيتس ماهي طبيعيه بها الوقت
سعاد تبتسم بطمئنة / كلنا مافينا الا العافية روحي صلي لا يفوتس الوقت
جلست بشرود وبينها وبين نفسها/ ليتك يبه تستخير وتفك مضاوي من ها الزواجة الي الله اعلم بنهايتها
حرام كذا بنت مقبله على الحياة بتفاؤل تنظلم مع واحد الله يعينه وش بيواجه من ها الدنيا
مضاوي تأشر بيدها امام عيون سعاد/ عميمه وين وصلتي من اليوم اناديتس
سعاد / خلصتي صلاتس
مضاوي بضحك / صليت وقريت اذكاري وانتي سارحه بعالم ثاني
اردفت با ابتسامة / ما انتي خالية يا الله اشوف علميني وش الي جاب الشيخة سعاد بنت سعد بها القوايل
سعاد ابتسمت بود وحنو / والله انتي الشيخة عساني ما خلا من ها العيون الي إذا شفتها حسيت الدنيا بخير
مضاوي تضم سعاد/ يااويل قلبي يا عسى عيوني ماتذوق حزنتس والله ان وراتس شي ما انتي خاليه صدق
ابتعدت عنها وبا استفهام / لا يكون خايب الرجا رجع لعلومه
سعاد ابتسمت / خايب الرجا على قولتس عنده دورة بدوامة ماهو جاي الا عقب أسبوعين
وبحسرة زفرت / الحمدلله هاجد من عقب المصيبة الي انتي خابره
اردفت بتردد/ مضاوي ابوي مرسلني يبيتس الحين تروحين له
مضاوي بخوف تضع يدها على صدرها / والله ان قلبي حاس ان جدي فيه شي ياربي لا تفجعني فيه
سعاد بمحاولة طمأنة/ يا بنت الحلال والله ما فيه الا العافية وعندتس الجوال دقي عليه وتأكدي
مضاوي تلبس عباءتها ونقابها بسرعة / السالفة كبيره و جدي سعد فيه شي
بعد نصف ساعة في بيت الجد سعد بن عاصف
مضاوي تمشي بسرعة لداخل البيت وتنادي / ليليان ميري وين بابا جدو بابا فيه شي
خرجت لها الخادمة ليليان / بابا كويس في مجلس برا كل ولد هناك
مضاوي بمقاطعة / ماايحتاج تكملين الحمدلله تطمنت عليه
سعاد دخلت بعد مضاوي / بسم الله وش فيتس نزلتي قبل توقف السيارة روعتيني طول الطريق ساكته يوم شفتي البيت طرتي
مضاوي زفرت باارتياح / أوف الحمدلله الحين ارتحت جدي ما فيه شي
مابغيت اضغط عليتس بالسيارة سكت خفت تفجعيني بشي
اردفت مضاوي / يا الله هذا انا جيت نادي جدي
ليليان تقول عنده رياجيل وكلهم ما شاء الله محارمتس
سعاد تضحك / الله لا يخلينا من ها المحارم
أردفت / الحين روحي خوذي لتس شور وغير ملابستس الامتحانات هدت حيلتس هد ولا حقه على ابوي
مضاوي وضعت يدها على صدرها با انزعاج / يويلي وش تقولين انا جالسه على نار بشوف جدي وش يبي وانتي رااايقه تبيني
بعد انتظر بسرعة ناديه انتظركم بالصالة
اردفت بضحك / لولا الحيا والخوف من حريم اخوانتس كان طبيت عليهم في المجلس وسحبت جدي شفت وش عنده
سعاد بضحك / كان تروحين ملح ما بين فزه ورفعة لو يشمن علم
خرجت سعاد للمجلس لتنادي الجد
واتجهت مضاوي لصالة وجلست سرحت بفكرها / جدي مستحيل يناديني لشي بسيط اكيد صاير شي
لا يكون بس هذيك رجعت تبي تشوفني
قبل ست سنوات
في بيت الجد عشاء بمناسبة نجاح مضاوي بتفوق وقبولها بكلية الطب
الجدة تجلس بغرفة ضيوف جانبيه لوحدها مع امرأه غريبه / تعالي يا مضاوي سلمي على الحرمة جايه متعنيه تبي تسلم عليتس
تدخل مضاوي للغرفة بتردد واستغراب
مضاوي تسلم على المرأة وتجلس مقابله لها وللجدة
المرأة جميلة لا يقال عنها الا انها فتنة تمشي على الارض
الجدة / مضاوي ازهمي جدتس سعد خليه يجي قولي جدتي تبيك لحالك لايدرون عماتس وعمانتس
خرجت ونادت الجد
لحظات والجد يدخل
الجد با استغراب وتوجس / عسى ماشر يا ام جلال وش فيتس مضاوي تقول تبيني لحالي
ويلتفت للمرأة الجالسة بعباءتها وغطاها بهدوء
ويردف با انفعال / ورى ما تقولين ان عندكم ضيوف
الجدة بترقب وحذر / مامن غريب يا بوجلال هذي هيام جايه تسلم على مضاوي
الجد سعد بغضب / الله لا يسلمها وش جابها
هيام بجدية / يا بوجلال ماني جايه ادور السلامات انا جايه ابغي بنتي يكفي السنين الي انحرمت منها
مضاوي تنتقل بنظرها ما بين الجد والجدة والمرأة با استغراب
الجدة بقهر/ ما شاء الله وتوتس تدرين ان لتس بنت جايه تدورينها
هيام / ضناي يا ام جلال وانتي ام وعارفه حرقة فراق الضنى
الجد سعد بقهر وامتعاض يحرك رأسه/ والله الي تبي ضناها على قولتس ماتسوي سواتس
هيام / ياابو جلال انتو حكمتم ونفذتم حتى بدون ما تسمعوني وسحبتو بنتي من حضني
الجد بمقاطعة / سحبنا بنتنا من يلومنا هي سواتس هينه والله الذبح فيتس حلال
الجد يحرك يده با انفعال / المصيبة الي صارت من تحت راستس شردتنا وهجينا من بيوتنا
ولد جلال ضاعت حياته بالسجن ولا ندري متى ينزل قصاصة
الجدة تمسح دموعها / هو ولد جلال والا حمد الي راح بشبابه والا أبو بنتها الله يعفي عنه بسواته
مضاوي بنفسها / هذي الحرمة من كلامهم امي لكن غريبه تذكرتني بعد ها السنين
لا يكون صدق بتاخذني واترك جدي وجدتي واروح معها اكيد لديرتها
وبخوف / انا اموت لو اطلع من حتى شارع اهلي كيف لو اسافر بعيد
هيام / الي صار سالفه قديمة وانظلمت فيها وكلن اخذ جزاه والحين ابي بنتي
الرجال الي تزوجته بعد أبو مضاوي توفى الله يرحمه ومافي أحد يمنعني عن بنتي
الجد بحده ومن بين أسنانه / انا الي امنعتس تاخذين بنت أخوي وسوي الي تسوينه
واطلعي من بيتي بستر عندنا ضيوف لا تفضحينا يا بنت الناس
وبحسرة وقهر / فضايحتس الاوله ماابعد طفت نيرانها
هيام تمسك يد مضاوي وبرجاء / مضاوي انا أمك وأحق منهم فيكي البيت هذا من إلك فيه تعالي معي لبيتي وبيت اخوانك
هنا مالك الا عمك والباقي حي الله عيال عم تعالي معي هناك تعيشين بين اخوانك
مضاوي تنفض يد هيام وعينها على ام جلال المنهارة والجد سعد المكسور
وبصوت منخفض وبنبرة رجاء / تكفين استرينا اطلعي وبعدين نتفاهم البيت كله معازيم لا تقهرين جدي وجدتي
هيام تغادر المكان وبهمس/ علشانك يا مضاوي بس مثل ما قلتي نتفاهم بعدين
مضاوي تناظر الجد والجدة / بوصلها الباب عشان إذا أحد سأل أقول مانعرفها غلطت بالبيت
خرجت هيام ومعها مضاوي
هيام تفتح شنطتها وتسجل رقم جوال وبهمس / معاك جوال
مضاوي / ايوا معاي
هيام با ارتباك وخوف تنظرحولها/ كويس هذا رقمي إ زا انتي لحالك كلميني لا يدري عمك وام جلال
وبقهر /أدرى انهم مسودين صورتي قدامك إزاء كلمتك راح اشرح لك
رجعت مضاوي للجد سعد والجدة
الجد جالس ويضع رأسه بين يديه بحزن والجدة تبكي بصمت
مضاوي تقبل راس جدها
وتجلس بجانب الجدة وتحتضن كتفها / ليش تبكين الموضوع ما يسوى دمعه من عيونتس
واليوم المفروض ما يكدركم شي بنتكم نجحت وماهو أي نجاح
الجدة تبتسم وتضم مضاوي وتقبل جبينها/ والله غثتني امتس مالقت تجي الا بها اليوم المبروك
مضاوي / ما عليتس منها انتي امي وانا بنتس ما يصير الا الي يرضيتس
تقف مضاوي وتقبل راس جدها/ جدي تكفى لا تضايق ويرتفع ضغطك ترى الموضوع كله ماايستاهل
يقف الجد ويتنهد / الله يكفينا يا بنتي شر المقبلات
يقطع تفكير مضاوي ضحك سعاد
سعاد/ وين الأخت وصلت تنهد وسرحان لا يكون بس جايبه العيد با الاختبار وتضحكين علي
مضاوي با اشمئزاز / لا والله بس تذكرت سالفه تمغث التسبد لا عادت من ذكرى
اردفت مضاوي بتساؤل / وين جدي
قاطعهم دخول الجد بترحيب/ هلا هلا بنوارة الحارة هلا بدكتورتنا
مضاوي بضحك / والله انت نورها الدنيا كلها
قبلت رأسه ويده
يجلس الجد ويمد يده لمضاوي / تعالي وانا ابوتس جنبي عطيني علومتس وش سويتي با اختبارتس
مضاوي جلست بجانب الجد/ على ما تحب بنتك بنت ابن عاصف مااترضى با أي شي
الجد بفخر / كفو كفو
سعاد تقف / يا الله عن اذنكم بنتكم وجبتها لكم تراها اقلقتني تقول ماسحبتيني بالقوايل الا جدي فيه شي
الجد بمحبه / جعلني ما خلا من الي خايفة على شايبها
مضاوي بود ابتسمت / انت شيخ الشباب ولوما زعل جدتي كان مبطي مزوجتك من زميلاتي
الجد يضحك وبممازحة / مااش مابتس فود والا سافطه لجدتس من ها المزايين يجدد شيبته
سعاد تضحك / يبه ما لقيت عاد الا الضوة تزوجك على امي
مضاوي تخطب لرياجيلنا كلنا وتمشي بعرسهم الا انت حزب مع جدتها
الجد/ اجلسي وين تبين اشوفتس بغيتي تمشين وش عندتس
سعاد / سلامتك بس انت خابر عيالي يختبرون للحين والله يصلحهم ما يذاكرون لين يشوفون زولي
الجد بحنو / عساهم ما يفقدون زولتس اجلسي شوي بغيتس تسمعين سويلفه عندي بقولها لبنيتي مضاوي
مضاوي با اهتمام وتوجس / جدي وش فيه ترى انا حاسة فيكم شي من فتره بس مكذبه عمري
الجد يضم كتفها بعطف / عندتس شك بيوم ان ابوتس سعد يسوي شي يضرتس والا شي ضد مصلحتس
مضاوي تلتفت لجدها/ لا والله واني داريه ان مصلحتي تبديها على رضاك
الجد بمودة وعطف / غلاتس من غلاة حزام الله يرحمه وانتي والله تستاهلين الغلا
مضاوي بخوف وترقب / جدي تكفى ادخل بالموضوع خوفتني
الجد سعد بجديه / تعرفيني ما أحب اللف والدوران ثامر الجلال خطبتس مني وانا عطيته
الخبر مثل الصاعقة نزل على مضاوي وقفت وقاطعت الجد/ لااااااااااا زواج لا ومن الشخص هذا بالذات لا
يقف الجد بعصبيه / انا ولد ابوي والله ماظنيت بتس ها الظن يا بنت حزام تكسرين كلامي
أردف با انفعال/ سعاد شوفي وحده منكن ترافق مع امتس والا كان بنت حزام ودها ترافق مع جدتها وصليها
غادر الجد المكان وسط ذهول سعاد من عصبية الجد ودموع عصية الدمع مضاوي
لأول مره ترى الجد يرفع صوته على مضاوي وهو الذي لا مانع عنده ان يبكي الجميع من اجلها

انتظر تفاعلكم وردودكم على البارت
آرائكم تهمني