الفصل " الستون "


.



.



.



داخل بيت الجد...،

طرق على باب غرفة مضاوي المتمددة على سريرها...،

مضاوي بصوتها المتعب / ادخل...،

تفتح سناء الباب/ سبرااايز...،

حاولت مضاوي النهوض...،

مدت سناء يدها / تكفين حنا نسلم عليتس وانتي منسدحة...،

ابتسمت مضاوي / عاد ما هو الهدرجة...،

وقفت مضاوي وسلمت على شروق وسناء...،

جلست على الأريكة وجلست شروق بجانبها سحبت سناء كرسي التسريحة وجلست امامهم...،

سناء بتعجب / يعني اغيب عنتس عشرين يوم القى مضاوي ثانية...؟!

شروق التي تعدل جلستها / قلت لتس أرضي على نفسي إذا شفتها...،

مضاوي / خلاص هانت تولد شروق وامسك الدور بعدها...،

شروق / امي تقول ما تكملين اسبوع الا انتي والده...،

اردفت شروق / كيف التسوق هناك...،

سناء / عادي ما هو الي بالخاطر لكن لقيت لبس اطفال اعجبني واخذته...،

مضاوي / اهم شي استانستي عوضتي تحسرتس على شهر العسل...؟

سناء / اي والله عشرين يوم كنها يوم واحد...!!

سناء/ جبت لعيالكم لبس يهببل...،

شروق / لا يكون صغير...؟

سناء بتهكم/ ليه بتولدينه يروح للمدرسة اكيد مقاس مولود...!

ضحكت شروق / اللبس الي جا ولدي اتوقع بيلبس مواليد المستشفى لمدة سنة...،

اردفت / امي جهزت وخالتي ام طلال لدرجة رحت بشتري رجعت كل شي شفته لقيتهم شارينه ...،

التفتت سناء لمضاوي / بنتس اخذت لها تطقيمات خطييرة...،

ابتسمت مضاوي / عسى ما كثرتي...،

ضحكت سناء / وش دراتس شنطة لها بلحالها...،

شروق / ولا تنسون لبس جخيدم بعد تقول ريما نزلته لأمي من غرفتي وفتحت الشنطة وقعدت تبكي...،

اردفت شروق بضحك / مت ضحك عليها قالت اللبس ذا اشتريته ويوم انكسحت ومقلبتني امي بولدها كنت اناظره وابكي...،

عطيته امي لبنت مضاوي وقعدت تناظره امي وتبكي اكيد اللبس هذا فيه سر...؟!

زفرت مضاوي بوجع / لا سر ولا شي اللبس ماله دخل عمتي تبكي كانت جالسة اخر مره جا الي ما يتسمى...،

وتلاطشنا على شان الطلاق وقال البنت مقابل الطلاق ...،

شروق / وانتي للحين مصممه على الطلاق...؟

مضاوي / ولا عندي غيره...،

سناء / عشان كذا مقدم على شغالة يقول لبدر بتجي قريب ومرسل مقاطع لبدر اسمعه يعلق عليها...،

يقول خلصت غرفة بنتي ماخذ الفكرة من صديقة ويقول باقي اشياء بسيطة...،

شروق بامتعاض / سبحان الله ما شفت أحد بجيح مثله...!

حرمه ما تبيك طلقها وانتهينا الا تساومها وتاخذ ضناها...،

تنهدت مضاوي بحزن / سالفة اخذ الطفل كانت مني بس ما توقعت بيصر عليها...،

شروق / وانتي بتعطينه البنت...؟

مضاوي تبتلع ريقها بحسرة / ما في الا ها الحل عشان أخلص منه...،

شروق / الواحد ما يدري وش يقول ...؟

لوكان رجال بعيد تشتكين عليه والحكومة تضمن حقتس...،

لكن لحم ودم ونقعد نسحب بعضنا بالمحاكم والله فشيلة...،

سناء/ قلتها لبدر هو ليش مستغل انها ما تبي توصلها لشكاوى...،

يعني لازم يحدها تسحبه بالمحاكم ومن ورى خشمه يطلقها...،

وبسخرية امالت فمها / قال يحبها وما يبي يفرط بها ...!!

زفرت مضاوي بألم / الي يحبني ما يعايرني بأمي كل ما صارت مشكلة ...،

سناء / والله لو انا بمكاننس اوكل محامي وينشب له لين يطلق وبنتي بحضانتي لو يموت ما يا خذها...،

شروق بذعر وضعت يديها على رأسها / يا فضحي وش محاكمة بعد انتي...؟

يمكن إذا ولدت يتراجع ويخلي بنتها معها...،

سناء بقهر/ وش تسوي وش حادك على المر...،

مضاوي / ما هو جاهلني موضوعي...،

وما يحتاج ابداً محامي...،

قضية فسخ نكاح بتقرير المستشفى الي معي ...،

وبعدها قضية حضانة وينتهي الموضوع ...،

سناء بتعجب / طيب ليش معذبه نفستس والحزن شوي ويقضي على حياتس...؟!

اردفت / اعتذري من جدي إذا هو بنفسه ما قدر على ثامر وقولي إذا ما خذت حقي المحاكم قريبة...،

مضاوي تزفر بوجع / ولا جا في بالي لحظة أنى اوصلها للمحاكم...،

ما ابي اقهر جدي وكلامي كان تهويش يمكن يخاف ويطلق...،

ابتلعت غصة بحلقها ...،

وتنهدت بضيق / والله اموت ولا ادخل اهلي بالمحاكم يكفي المحاكم الي دخلوها قبل...،

شروق بتعجب تحرك رأسها/ انا بحياتي ما شفت مثل مضاوي وبدر بعنصريتهم للعاصف...؟!!

الواحد فيهم عادي يتلقى الضربة بصدره وظهره والعاصف ما يجيهم شي ...،

سناء بسخرية / وتشبهين بدر بمضاوي...؟

والله مضاوي بس ام العنصرية والا بدر يهون عندها...،

مستوعبة ان عندها مية حل لمشكلتها وحاطه يدها على خدها ماهي متحركة...!

شروق بتهكم / وش تبينها تسوي أكثر من الي سوته قالت له بوجهه ما ابيك لكن هذاك معاند...؟!

سناء بقهر / اروح لأخواني انتي ما شفتي كيف اخوانها عيونهم قلوب عليها يوم جو معها للحرم شوي ويشيلونها من الأرض...،

اردفت بانبهار/ والا بيتهم قصر ما هو بيت...،

حتى قلتها لبدر وش يعيش مضاوي بضيم ثامر وهذولا اخوانها بغى يذبحني...،

يقول خيطي فمتس ولا تفطنينها...،

ابتسمت مضاوي بتهكم / قولي لبدر لو قالو الناس كلها روحي ما تركت اهلي...،

أعيش معهم بخرابه ولا بقصر بعيد عنهم...،

التفتت سناء لشروق وبسخرية / ما اقولتس انها مجنونه وخالصة...،

وبمودة / تعالي معانا غيري جو...،

مضاوي / قبل تدخلون كلمتني مريم بتمرني نطلع...،

وبتذمر / والله مالي نفس بالطلعة من اساسها لكن بتحمل عشانها...،

سناء / قصدتس ما تحملين شوفة خلود...،

شروق / ما لوم بدر يوم يقول عيون الحصني...،

مضاوي / الله يتكفل فيها...،

سوناتي تقول كم مره تجي الصباح عند جدي...،

وإذا بتروح تمسك ليليان على جنب سوالف...،

شروق / سود الله وجها اكيد تدور علومتس وعلوم ثامر...؟

سناء / ما قهرني قبل شوي الا ابوي يقول كلهن حجتهن قوية على هوشتكن...،

مضاوي / وعمي وش دراه إذا انا بغيت اصدق مكرها...،

جايه على عمي الي ما تظهر قدامه الا انها المغلوبة على امرها...،

سناء / قلت لتس حولي لي رسالتها الي فيه رقمها ورقم ثامر عشان افضحها وعييتي...،

شروق / سالفة وانتهت اكيد خالد كشفها وبتستحي تعيدها...،

مضاوي بتهكم / هذي تخاف لكن ما تستحي...،

مضاوي / بغيت احذف رسالتها للي ما يتسمى وبعدين تراجعت قلت بخليها هذي مالها امان...،

سناء / يوم كنا مسافرين ارسلت لسهى تسأل منار وش صار وش سالفة الكيس...،

كان ودي تقول عمي كسر عظامها قالت ابدآ ما اطرت شي...؟

ولا كائنا شفنا العنقا قالت عطو خالد او ماجد الكيس...!

شروق / سبحان الي خلقها وخلق منار من بطن وظهر لا اخلاق ولا خلقة...،

مضاوي / ماهي فاضحة اختها لو ايش وما لومها لو سألتها انا بنفسي وجحدت انها شافت كيس...،

ضحكت سناء / الاضداد جدتي النيرة ورمسا كيف اجتمعوا في بيت...؟!

شروق بمرح / وكلن جت نسخة اخلاق شبيهتها...،

نظرت شروق لساعة جوالها ووقفت / يعني مصممه ما تروحين معانا...،

مضاوي / بجلس أخلص شغلي لين تجي مريم صايرة بعد أحس بتقلصات مرات اخاف من الولادة المبكرة عقب الورطة الصدق...،

وقفت سناء وأشارت بيدها / الله يهون عليتس شكلي بكنسل فكرة الحمل شوفتس ما تشجع ابدا...،

شروق بممازحة / كنسليها بدون تردد...،

غادرو شروق وسناء ...،

جلست مضاوي ووضعت يدها على بطنها تتحسسه...،

مع الوقت بدأت تتعلق بحملها ولو كابرت، ولكن لن تخضع لثامر ...،

الخادمة لن تعوض مكان الأم وسينتقده الجميع كيف له ان يعيش وحده مع خادمة حتى بوجود طفل...،

كما قالت سناء انه بدأ بتجهيز غرفة للمولود ربما اخذ المولود وطلقها، ولكن لن يستطيع التحمل وسيرجعه لها...،

قامت لتتجهز للخروج مع مريم التي اصرت عليها لأن والدتها واخواتها يريدون رؤيتها...،


.

.

.


بعد العشاء اجتمعت العائلة في استراحة الجد ...،


.


.


.


في قسم النساء...،

في زاوية ...،

تجلس فزة وبجانبها رفعة ومقابلهم لهم خلود لا تريد ان تأتي، ولكن اصرت عليها والدتها...،

فاضطرت حتى لا يفسر ان مضاوي صادقة وخلود تختبئ منها...،

يكفي انها اثارة الريبة بعدم حضورها غدا الجمعة في بيت الجد...،

همست رفعة بحقد / شفتيها ماجت للعشا من فشيلتها ما تبي توري وجها أحد عقب ظليمتها لبنتي...،

فزه بنبرة تذمر/ يا ام ماجد خلي الحرمة بحالها فكينا من غيبتها...،

رفعة بغيظ / تركناها بس ما تركتنا بتعرفين كلامي بعدين إذا جات بنت أخوي عندتس وش بيجيتس من وراهن...؟

فزه / بصرها هي ورجلها بسوي مثل ام بدر مالي دخل لا بلي داخل والا الي طالع ومريحة راسها...،

رفعة / وانتي مصدقة ان ام بدر ما لها دخل بشي...؟!

امالت فمها بسخرية / والدليل قدامتس بنتس ساكنه بملحق وبنت سعاد بتسكن بفله كل العاصف يركضون عشان يخلصونها لها...؟

فزه / الفلة خطط لها أبو سعد قبل حتى يفكرون بريما...،

وسناء راضية بالملحق تقول بدر قايل لها إذا ما تبيه بيستاجر لها من الفلل الي بالمخطط الجديد ...،

فزه كانت تتكلم بحسن نية ورفعة كادت ان تنفجر...،

شروق وسناء والآن ريما...،

جميع بنات العائلة أكبر وأصغر من بناتها سيعيشون حياة سعيدة...،

وبناتها الكبرى حصلت على لقب مطلقة بسبب تسرعها...،

فطليقها زواجه في الغد كما أخبرها سلطان بأنه أرسل له دعوة ...،

والاخرى لم تسمع يوماً ولو حتى بالمزاح ان اعمامها يريدون خطبتها...،

ريما أصغر منها وتزوجت وسناء عندما خطبها جدها لبدر كانت في سنها...،

حتى العدوة اللدودة مضاوي ابنها ماجد كاد ان يموت يريد منها ان تقتنع بخطبته لها...،

وعندما بالغت في سبها قال لها ان مضاوي حلم كل واحد من ابناء العاصف الموجودون هنا او في ديرتهم، ولكن لم يجرؤا على أحد خطبتها...،

فكان يريد ان يسبقهم اليها لماذا فقط بناتها حظهم سيئ...،

ولم تكن خلود أحسن حالا من والدتها، ولكنها افرغت انفعالها برسائلها مع صديقتها ناهد...،


.



.



.



في مكان آخر تجلس ريما وسهى وسما وبتول ومنار...،

سما / ارجعي افردي شعرك مثل اول بعد الامتحانات...،

ريما / مستحيل ابدآ ما حبيت شعري ستريت...،

بتول / الناعم عليك مو حلو أحس الكيرلي عليك خرافي...،

منار / التغيير حلو كل مره جربي شي...،

سهى / والله ريوم اي شي يزين عليها...،

منار بممازحة / من يشهد للعروسة غير حماتها ...،

ضحكت سهى واردفت / جهزتو للامتحانات...؟

منار / من كثر ماني متوترة منها لو يقولون اختبري كل المواد بيوم قلت موافقة خلصوني...،

سهى / انتبهي تراك اخر سنة التوتر لا يخربطك ويخفس درجاتك...،

سما / اهم شي تكونين مذاكرة صح ومرتبه وضعك وعارفة وش تبين...،

ريما / الحمدلله لو قعدت بالعلمي يمكن ما شفتوني اليوم...،

سما / العلمي خياراتك أكثر بالتخصصات...،

سهى / صحيح أكثر لكن لو ما جابت مجموع دخلها للجامعة ما راح ينفعها الخيارات...،

ضحكت منار / سما تقيس على قدراتها...،

ما درت انا وبنت خالي نحفظ أكثر من ما نفهم...،

سهى / حددتم الاقسام الي تبونها والا للحين مترددات...،

منار / انا استخرت وحسيت مره ارتحت لدراسات القرآنية...،

سما / من زمان قلت لكم طب اسنان وبابا وماما باركو ها الخطوة...،

سهى / بعدكم انا وريما والله يعين على حيرة الاختيار...،

بتول / بنات على طاري الطب ماشفتو مضاوي...؟

من زمان عنها اشتقت لها مره...،

سهى / قبل يومين طلعت مع ابوي بروح عندي دروس تقوية وشفتها نازلة من سيارة جدي نزلت سلمت عليها...،

تنهبلون كيف صايرة من ورى النقاب روعتني...،

سما بشفقة / والله ماتستاهل الي يصير لها خلال سنة انقلبت حياتها فوق تحت...،

منار / يمكن عشان الحمل ونفسيتها تعبانة بسبب مشاكلها مع زوجها...،

ريما / حتى امي تعبانة منها من فترة تذكرون الملابس الي شريتها حقت الأطفال...،

ضحكت سهى / هو هذا شي ينسى مقلب عمتي يكتب بالتاريخ...،

ريما / تخيلوا نزلتها كلها مضايقتني على الفاضي قلت يمه برسلها لبيت جدي...،

فتحت امي الشناط وقعدت تطلع من الملابس تناظرها وتبكي...،

سما باستغراب / ليش تبكي يعني لو جابت بنت بتجي أحلى من ثامر بسم الله عليه...،

ريما / امي تبكي عشان ثامر الجلال حالف ياخذ بنت مضاوي إذا ما وافقت ترجع...،

بتول بانفعال / كيف ياخذ بنتها هذا مجنون ...؟!

ريما / سمعت امي وهي تكلمه وهو مصمم ولا يبي أحد يناقشه...،

تقول وإذا هي متنازلة مالك حق تاخذ بنتها...،

اقل شي اتركها معها سنة...،

سما / تذكرت امي قبل كم يوم تسأل ابوي عن الحضانة وإذا الأم تتنازل وبعدين تتراجع وش يصير...؟

اكيد تستفسر عن موضوع مضاوي...،

منار بحزن / ليتها اصرت على رفضها اول مره ولا دخلت ها الدوامة...،

ريما بحقد / يا الله كيف أكرهه حتى ثامر أخوي كرهته بسببه...،

ليت سموه على جدي جخيدم ولا هو على اسمه...،

بتول / شفته قبل شوي بغيت احذفه بجوالي واهرب...،

سهى بقهر / افتحي فمتس بس عليه شوفي وش ويسوون فيتس العاصف والله ما تمرين شارعنا...،

بتول / يا زين من هزئه على تفكيره الغبي الرجعي الأناني...،

ريما / الي قاهرني كانت عندنا يوم امي ولدت...،

لو شفتو علاقتهم تنهبلون لدرجة استحي اناظرها إذا دق جوالها وطلع هو...،

وجها يورد وتشوفون السعادة بوجها...،

وسنابات تصورها من بيتها تجنن كلها إيجابيه...،

الحين تخيلوا ولا مره دخلت سناب اراسلها ما تفتح...،

سما / من جد الكل كان ملاحظ مضاوي العاقل الرزين صارت ما تسولف الا قال وفعل ثامر...!

اردفت بتعجب / صدق من قال الرجال مالهم أمان وافقت عليه وهو توه طالع من سجن ويسوي فيها كذا...؟!

بتول / وافقت من ضغط جدي والا ما تبيه ...،

وبقهر وتذمر اردفت/ بس ليش جدي كذا صار مع ثامر وهو اول ما يرضى عليها...!

سهى / ماشفتو هوشتهم الاخيرة تحزن هو يصارخ عليها وهي تلفت ماهي عارفه وش السالفة...!!

يوم قعد يتكلم عن امها صرخت صرخة امي قالت الحرمة ما يجي الليل الا هي والده من صراخها...،

وبأسف / والا جدي بينهم يكسر الخاطر ماسك ثامر يبيه يهدا ويلتفت لمضاوي يترجاها تروح مستشفى...،

واخرتها راحت والحمدلله يقولون بنتها ما فيها شي...،

والدكتورة الي قالت عنها خلود شكلها من زميلاتها حاقدة عليها تبي تسوي شوشرة وبس...،

منار باستغراب / ومن قال انها من زميلاتها...؟

ريما باستنكار / غريبة ما سمعتيها وعمتي ام ماجد قالتها...؟

وكم مره تعيدها ...،

سهى / حتى امي تقول مكلمتها خالتي ام ماجد وقايله لها عن الدكتورة هذي...،

سما / ولو المفروض يوقف مع مضاوي من لها بعد الله غيره إذا رجلها قلب عليها كذا...،

سهى بأسى / من جد تقطع القلب ...،

اول مره أحس بنعمة ابوي واخواني ولو كنت مكانها ورجلي سوى سوايا ثامر يمكن ابوي يفرمه ...،

حتى قلتها لسعد قال ما عليتس مضاوي الله معها...،

منار الصامتة تعلم ان وشاية اختها هي السبب لكن ماذا تفعل خلود تدمر ووالدتها ورائها تبرر لها...،


.


.


.


في مكان آخر من الاستراحة في قسم النساء ...،

تجلس نواظر وسعاد وسناء وشروق بجانب والدتها...،

نواظر / شكل ولادتس مقربه امشي لا تجلسين ...،

شروق / تعبت من المشي...،

من دخلت التاسع وانا امشي...،

سناء / اجل لو شفتي مضاوي كان قلتي اركضي عشان تولدين...،

شروق / تكفين لا تذكريني...،

نواظر باستغراب / وين لقيتوها...؟!

سناء / مرينا بيت جدي وطلعنا لغرفتها...،

نورة / زين فتحت لكم كم مره امر عمي وأرسل عليها ما تنزل...،

سعاد / الله يهديها ويهون عليها...،

نواظر / والله الواحد ما يدري وش يسوي معها ومعه...،

سعاد / نسكت لين الله يفرجها تعبت منهم ومن خبالهم...،

ضحكت نورة / عاد هذي بنتس ...،

مدام قلتي كذا معناته ما عاد نقرب لهم وننصح...،

سعاد / فكوني من طاريهم الي متأكدة ان كل العاصف يسولفون فيهم الحين...،

المهبول الي مقدم شغاله بياخذ مولود ما طاحت سرته...،

والمجنونة الي تقول بعتك ورعي بصك الطلاق...،

نورة / الكلام عقب الولادة ما هو الحين والله ان سواها فيها غير تدورون من يصبخ على راسها...،

تنجن صدق ما هو كلام ...،

شروق / إذا هو يخاف الله ما راح يسويها...،

سعاد بامتعاض/ اقطعوا سيرتهم تكفون خلو المصيبة تنزل مره وحده ما هو نشيل همها...؟

نواظر / الله يسترنا ويعدي مشكلتهم على خير...،

سعاد لا تريد التفكير فقد بذلت كل ما في وسعها ولن تتعب نفسها ينتظرون لوقت الولادة وسيتحدد ما يفعلون...،

نورة بمحاولة لتغيير مسار الحديث / أبو بدر يقول معزوم بكرة على عرس مازن أحد يروح منكم...،

نواظر باستغراب / اي مازن...،

سناء بامتعاض / الي طلق خلود...،

نواظر / نسيتهم الله يوفقهم...،

سعاد / ارسلت امه على جوالي دعوة واعتذرت منها...،

التفت سعاد لسناء / حددت ام جاسر عرس ولدها على بنت ام مازن عرسهم بالصيفية...،

ابتسمت سناء /صرتي لها سبب ...!

اي وحده فيهم هم ما شاء الله كثار ...؟

سعاد / أكبر وحده الي اسمها انوار...،

نواظر / درست وحده فيهم البنت صراحة ونعم التربية...،

سعاد / قلنا لها اول ما بغت تخطب منهم...،

ام عبد الله درست وحده منهم وتمدحها...،

وكلمتني بعدين قالت وفوق المدح عايلة اجواد ومستورين...،

سناء بتعجب / سبحان الله كيف نصيبها يوم جت ام جاسر تطلع خلاص لبيتها قالت لها عمتي...،

ضحكت سعاد / وهم حاضرين عرستس كلهم وماشافو بعض وطاولاتهم جنب بعض يوم شافتهن ام جاسر تذكرتهن...،

ابتسمت نورة / النصيب إذا حكم خلاص لا تسألين كيف وشلون...،

ضحكت نواظر / مثل نصيبتس انتي وفهد...،

ابتسمت شروق بمحبة / وأحلى نصيب وأطلق من يفزع ابو بدر...،

سعاد / من يشهد للأبو غير بنته...،

ضحكت وبممازحة التفت لنورة / الحمدلله الي وقتها الغنم رخيصة والا كان للحين فهد وعياله يسددون بمهرتس...؟!

ضحكت نورة بمرح / وغنم ميته ليتها بعد حية استفاد منها ...،

سناء / سالفة عمي وخالتي لو صارت الحين عادية لكن وقتها كانت غريبة...،

نورة / كل وقت وله ظروفه وناسه...،

التفتت سعاد للمكان الذي تجلس فيه فزة ورفعة...،

سناء بتذمر / يا معاناة امي مع رفعة كل ما رجعت من مكان نعرف إذا جلست مع رفعة أولا...،

شروق / خالتي فزه بسرعة تتأثر ويوضح عليها...،

نواظر بممازحة مرحة/ بكرة سعاد وفزة كل يوم طق عصي واخرتها يبحثن يلقون رفعة ورى السالفة...،

هزت سعاد راسها بأسف / وهذا من ضمن الا سباب الي خلتني معترضة على سعد...،

سناء / سعد من الحين مفهم امي قال اي خبر اسمع وابحث وراه القى رفعة وامها جابوه انتي امي على عيني وراسي...،

لكن هن ما راح افوتها لهن...،

نواظر / الله يطول بعمره ويقويه والله أني شايله همه منهن...،

ولا شلت همه من امها الي هي اختي...،

سناء بتعجب / يا ربي ها الرمسا يقول ابوي من خلقت وهي هذي رمسا ام عبد اللطيف ما تغيرت...!

نواظر / هم كذا بعض ناس اختبار من ربي سبحانه وتعالي...،

لكن لها نهاية على ظلم ظلمته امي الله يرحمها...،

التفتت لشروق وباستفهام / غريبة ما انشبت لتس رفعة وين خالتس ام طلال مثل كل عزيمة...!؟

شروق بتأفف وامتعاض / فكنا الله منها الحمدلله ابشرتس تدق ما ترد خالتي عليها...،

سناء بممازحة / تلقينها مربطه لها عصاعص من جهتها وكاشفتها...،

شروق / كنتس تدرين...،

اردفت بصوت منخفض / يعلمني طلال يقول لينا اخته كاشفه لها محادثات أصوات تبربس بعلومها...،

سناء بتهكم / وتو حماتس تعرفها ...؟

شروق / يعرفنها من ردات فعل أمهن...،

ضحكت سعاد / يعني مثل ما يعرفون المساعد فزه ...،

شروق / انا اشهد ...،

اردفت بهمس / تخيلوا يقول طلال من فترة خواتي شاكين ورى امهم أحد يقلب مودها علينا...،

وقبل فترة خالتي عطت لينا جوالها تبيها ترسل تهنئة مدري تنزل حالة لمناسبة عندهم...،

وبالغلط فتحت على رسالة كانت رسالة صوتيه من ام ماجد ياهي سابتنا سب...،

نواظر بقهر / وانا أقول ام طلال ماهي الي حنا خابرين...!

نورة لشروق بانتقاد / انتي وش تبين بها السوالف تغثين بهاعماتس ...،

اردفت / ام رجلتس ماشاء الله زانت لتس وخلي العلوم الي راحت بطريقها لا تردينها...،

سناء بغيض / هذي مدري وش اعبر وش أقول...،

ومن بين اسنانها / لو ما خوفي من الله وخاطر عمي وعياله كان انا كفيتكم قطعت لسانها وخليتها بيديها تسولف...،

شروق بقهر مكبوت / والله يمه قاهرتني ومغبونة منها ...،

مستوعبات وش تسوي برسايلها لخالتي ام طلال...؟

ترسل وبعد تحذف الرسالة...؟!

يقول طلال ان اخته لينا عرفت تحريضها عليكم من ردود امي...،

وبسخرية / وشكلها ترسل أصوات من القهر الي فيها عليكم ما يمدي تكتب كتابة...!؟

سعاد تزفر بقهر وتحرك رأسها با امتعاض / بالله وش استفادت غير رجلتس الغريب مستصغر عقلها...؟

شروق / وش مستصغر عقلها...؟!

اردفت / والله يا عميمه لو تدرين بحركة مسويتها تو يعلمني فيها طلال...؟

سناء تعض على اصبعها بغبن / في غير الرسايل بعد شي...!؟

شروق / تخيلوا أيام ملكتي مكلمه خالتي قايله لو أدري بتزوجون ولدكم من بعيد ...؟

كان علمتكم عن بنات اختي ...،

وبازدراء وسخرية تميل فمها / أحسن من بنت أبو بدر المدلعة لو تزعلونها بكلمة ...،

خربت الصداقة بينكم وبين ابوها وبكرا تسوي فيكم مثل عمتها بأخوي...،

نواظر تصفق يديها بقهر وبصوت منخفض / الله لا يوفقها فاضحتنا عند الغريب والقريب...،

نظرت نورة لشروق بملامة / يعني وقالت بيطيعها أبو طلال والا طلال ...؟

وبنظرة تهديد / خلاص اقطعي سوالفها وفكينا من غيبتها...،

نواظر / حتى ولو يا ام بدر العيار الي ما يصيب يدوش وش بيقولون عنا اهل رجل شروق...؟

شروق / وش بيقولون ...؟

وبسخرية واحتقار / مسمياتها خوات طلال القصابة ما خلت أحد من عايلتنا ما قطعت من لحمة...،

نواظر وضعت يدها على فمها بخوف / لا يكون معلمتهم عن سالفة هيام ...،

قاطعتها سعاد با ابتسامة ساخرة / هي ما خلت الأمور الصغيرة جايه على الأمور الكبيرة...؟!

شروق / لا الحمدلله الشي الوحيد الي ما سمعته السالفة هذي...،

سناء تحرك رأسها بامتعاض وسخرية / هذي جنيه داريه انها لو تفتح فمها بها السالفة عمي بينفذ حلف جدي...،

ان الي يوصله علمها من حريم عياله انها كاره شريط سالفة هيام عند أحد يحلف على رجلها يطلقها وما تقعد بحارة العاصف يوم...،

نورة / أبو طلال يدري وعنده خبر من السوالف القديمة الي صارت الله لا يعيدها على بيت مسلم...،

اردفت / كنا جيران بنفس الحارة...،

شروق / الشهادة لله انهم ناس راقين...،

ومن جد قلوبهم بيضا ويخافون الله ولا عندهم سوالف التقليب بالدفاتر القديمة والسوالف الي تغث...،

ابتسمت نواظر بود / ما حبهم ابوتس الله من فراغ...،

سناء بحنق وبقهر مكتوم / ارجع واعيد سالفة ابوي ان سوسة السن منه فيه ما تجيه من برا ...،

ابتسمت سعاد بسخرية / يا ربي ما في اخبار تونس...؟

من علوم خبول العاصف مضاوي وثامر لمغثة وعلوم رفعة...،

ضحكت نورة / الا ان شاء الله ما يجي الصباح الا شروقة والده وادق عليتس ابشرتس...،

سعاد تحرك يديها بسعادة وتضحك / هذي الاخبار الي تسر الخاطر وتوسعه...،


.


.


.



على الجانب الآخر قريباً منهم ...،

في قسم الرجال...،

يجلس الجد وأبنائه وأحفاده على كراسي مركاز...،

وضع العديد منها على الثيل الأخضر في سور الاستراحة ...،

فالليل في هذه الأيام أصبح مائل للبرودة...،

وامامه مقاديع التمر والقهوة والشاي يتعاقب شباب العائلة على صبها...،

مساعد / الله يكتب اجرك يا بيي يوم شريت الاستراحة...،

طلعتنا من جو البيوت...،

ابتسم سلطان / الحمدلله حمد الشاكرين...،

وأشار بيده بتعجب/ اول ما شفتها ما توقعتها تجي كذا...!

فهد / انا بعد ما اعجبتني وتخوفت منها ...،

لكن من فضل الله زانت بعد الترميم والأثاث...،

ماجد / فعلن تغيرت صارت شكل ثاني...،

سعد / لا تنسون بعد الاضافات الي اضافها خالد مره أبدع مهندسنا ما شاء الله عليه...،

محمد بممازحة / تمدحه عشان لا ياخذ عليك فلوس بتعديل مخططك...،

سعد / يستاهل ابو سلطان لكن شهادة حق مبدع حتى بمخطط بيتي نبهنا لأشياء غافلين عنها ...،

بدر / شفت المخطط قبل وبعد...،

مره بطله فكرته باستغلال المساحات الفاضية...،

ابتسم خالد بحرج/ احرجتوني لا تخلوني اصدق...،

ابتسم ثامر / فعل ذراعك خلاهم يمدحونك لوما تستاهل محد أثنى عليك...،

خالد بتقدير / عسى عمرك طويل يبو جلال وعقبال ما اخطط لك بيتك ...،

ضحك ثامر/ بيتي مطول على ما اقرر ابنيه يبي لي كم سنه قدام ...،

التفت فيصل لخالد وبممازحة /اثبت له شطارتك الحين يمكن يتحمس وخطط له واحد من البيوت الي شرتها العنقا بالديرة ...،

فاجئ كلام فيصل ثامر فلم يخبره أحد عن شيء...؟!

فهو لم يأتي في الفترة الماضية لبيت الجد حتى يسمع الخبر...؟

اندهش بدر الذي يسمع الخبر لأول مره فقد تمت البيعة وهو مسافر...!

مال الجد لفهد الذي يجلس معه في نفس الكرسي وبينهم مركى وبهمس / جاب العلم بناخي سلطان...،

كتم فهد ضحكته وهمس للجد / وبالتفصيل...،

ابتسم الجد وتشاغل بمسباحة الذي بيده...،

عقد ثامر حاجبيه بدهشه وتلفت في وجوه الحاضرين وباستغراب سأل / وش بيوت الديرة...؟!

عم الهدوء وتفاجئوا انه لا يعلم عن اي شيء...!!

يعلمون بخلافهم، ولكن المبلغ الذي اشترت مضاوي به المزارع وملحقاتها لا يمكن انه يخفى على أحد وخصوصا زوجها...؟!!

ابتسم بدر المتفاجئ مثل صاحبه وباستفسار/ الظاهر صايرة أشياء واحداث وانا مسافر ما دريت عنها...؟!

أردف باستغراب/ العنقا وش تبي بالديرة وبيوتها تترك الرياض وتروح هناك ...!!

قولوا غير ها الكلام ...،

تذكر والتفت لجده / لا يكون بيوت العاصف القديمة الي اطريت العام بيعتها ...؟

اومئ الجد رأسه بتأكيد / هي ما غيرها...،

مضاوي شرتها كلها مع مزارع العاصف ...،

واخذت الاراضي الي محادتها عارضينها اهلها للبيع ...،

وفقها الله بشريتها وضمتها لمزارعنا...،

ثامر بغضب وانفعال / وعلى كيفها تأخذ مزارع العاصف...؟

بيت ابوها يمكن نقول عشان بيت ابوها والاراضي الي اشترتها بكيفها...،

لكن مزارع العاصف ليش تبيعونها لها...؟

اتسعت عينا الجد بغضب ومن بين اسنانه / وش تقول ...؟

وبحزم / المزارع حق ابوي ورثه من اهله وجدانه...،

وعلى حياته قال كلها لحزام الله يرحمه بأراضيها وبيوتها وانا رضيت بطيب خاطر...،

أشار بيده بنفي / ومضاوي عيت لا تقبلها قالت جب أحد يثمنها وخذ حقك...،

الايام اطول من اهلها وإذا عطيتني بتحاججني خلق الله من يصدق وصية جدي...؟

مساعد بمحاولة ان يخفف من حدة التوتر الذي عم المكان / الحمدلله ما راحت لغريب هي من العاصف وضناها للعاصف...،

الجد بنبرة حادة / يوم أني شفت خاطرها بها قلت ابي اعطيتسياها هبه...،

رفضت عطيتي واجبرتني اخذ فلوسها ووثقتها لها...،

حرك رأسه بأسف / اثاري بنتي صادقة بيطلع من يننشب لها...؟!

فهد / عداها العيب بتضمن حقها خص الورث دايم يجي عليه اخلاف...،

اشار الجد على اولاده / كلكم كنتم شهود محد بكم عارض البيعة ...،

أردف وهو يشير بأصبعه السبابة / وعيت تاخذ ريال واحد منكم...،

واشار لنفسه / عطتني حقي واخذت حقها بشرع الله...،

وقف الجد وبحركة مفاجئة لم يتوقعها أحد جمع سبحته بيده وبكل قوته ضرب وجه ثامر...؟!

وبتهديد وانفعال أشار اليه / / وابوها لجبت طاريه لا تقول عنه ابوها...،

حط يدك على راسك وقل عمي أبو مضاوي الله يرحمه...،

صمت الجميع من الصدمة والبعض وقف والبعض الأخر ظل جالساً مذهول بمكانه...،

وقف فهد الذي كان الأقرب للجد وامسك بيد الجد واعاده للجلوس بمكانه...،

وما زالت علامات الغضب والتجهم على وجهه...،

أدرك ثامر كما أدرك الجميع ان الجد قد اغضبه ما تفوه به ثامر عن مضاوي...،

استوعب ثامر الموقف فقام بسرعة قبل رأس الجد...،

دفعه الجد بقوة ونظر له بغضب وأشار بيده / انقلع عن وجهي...،

امسك ثامر يد الجد وباعتذار / والله يا جدي اني تفاجئت وما عاد ادري وش أقول...،

حاول ان يسحب الجد يده من يد ثامر، ولكن ثامر ظل متشبث بها / تكفى يا جدي الا زعلك ...،

حرك الجد رأسه بامتعاض وحنق / لا تحسبني مرخصها يوم أنى اشوف وابلع فعايلك وساكت...،

نفض يده من يد ثامر وبنبرة قوية /ولا تظن أنك ابدا منها عندي...،

نظر الي الجميع بنظرة شاملة وقال / حطو كلمتي بروسكم كلكم واحفظوها زين ...،

بنت حزام الاوله ثم الاوله ثم الاوله ...،

زم حاجبيه بحده / الا مضاوي ابيعكم كلكم واشريها...،

الي يزعلها يزعلني والي يرضيها يرضيني...،

وبقهر وحرقة عض على شفته ونظر لثامر / والله لو ما سوات حمد بك انه ما يكفيني منك حتى سلخ جلدك عن لحمك...،

همس فواز لماجد الذي على يمينه / هذا جدي الي اعرفه عند العنقا يكشر عن انيابه...،

ماجد بشماته وبهمس مماثل / يستاهل زودها لكن مالنا يد عليه...،

فهد الذي جلس بجانب والده التفت له وقبل رأسه / مضاوي تستاهل من يبديها وهي الاوله ...،

والي بينها وبين رجالها ماله دخل بقدرها عندك وعندنا...،

وثامر ما قصده خانه التعبير...،

قام فهد واجلس ثامر مكانه يريده ان يسترضي الجد...،

ثامر امسك بيد جده / والله يا جدي فعلا ما هو قصدي تفاجئت ...؟!

عيال عمي يدرون وانا اخر من يعلم...!

نظر له الجد بنظرة حادة /الحلال الحين حلالها وباسمها علمك ما هو مقدم ولا مأخر...،

مساعد / تستاهله ومن حصل شي يستاهله شين والا زين...،

ابتسم بدر / ياعساه ألف مبروك على بنت حزام وجعلها من زود في زود...،

أردف / الي فاجئنا انا وثامر والله ما هو حسد لها...،

لكن ردت فعل لشي ما يخطر بالبال والله يبارك لها ...،

ابتسم ثامر للجد وامسك بجبينه الذي عليه أثر ضربة المسباح وبا استعطاف / وش الي يرضيك علي وانا اسويه ...،

ابتسم الجد ولمس جبين ثامر / تذكرها كل ما طرى لك أبو مضاوي الله يرحمه ...،

أردف / ماني زعلان لكن مضاوي لحد يغثها ...،

اراد ان يتكلم ثامر فأشار له فهد ان يصمت...،

قام من جانب الجد وقبل رأسه وانفه ورجع لمكانه بجانب بدر...،

همس فهد لوالده وضحك الجد وهو ينظر لفيصل...؟!

منذ ان رأى وجه جده يتغير قام بفتح كاميرا الجوال وسجل كل ما حدث بينهم...،

حتى ابتعد ثامر عنه وجلس بجانب بدر...،


.


.


.


.

لا تلهكم الرواية عن الصلاة في وقتها

موعدنا القادم بأذن الله قريباً

تذكروني واحبابي بدعوه طيبه لعلها تصادف ساعة اجابة


(سبحانك اللهم وبحمدك، أشهد أن لا إله إلا أنت، أستغفرك اللهم، وأتوب إليك)

صبحكم الله بالخير بنات ليلاس🌷

تسلمين طيف على الكرم الحاتمي فصلين بيوم واحد 😍

عين العقل يوم اشترت مضاوي أراضي ومزرعة العاصف في الديرة، مستقبلها رمادي مع ثامر، ومثل ما يقولون العقار ابن بار، وهو من أفضل الاستثمارات🤗

أخيراً لحظة ضرب الجد لثامر بالمسباح، يستاهل، ليته مزود العيار حبيتين، بس الجد رحوم قلبه ما يتحمل شي يوجعه،،
شكراً فيصل إنك وثّقت اللحظة، إن شاء الله يوصل المقطع لمضاوي يبرّد على قلبها😅

قلبي قارصني من السوسة خلود،، ليش خذت مفتاح جناح مضاوي، وش المصايب اللي مجهزتها لها،، أنا من شفت ابتسامة الانتصار يوم تجمعوا عليها اخوانها ووالدينها ،، وهي تقلب السالفة على مضاوي، وأنا قلبي منقبض،، وش بتسوي زود في المسكينة!! الله يكفيها شرها .

مضاوي بدى ألم الطلق يجيها !! 😓
يمكن إذا طلعت مع مريم يزيد الطلق، وتوديها المستشفى ، وتكون حالتها حرجة مع نقص الحديد، وضعف بنيتها، وحالتها النفسية ،، ويضطرون لعملية قيصرية 🥲
الله يكون بعونها، ما ودّي يصير هالسيناريو 😓
إن شاء الله تولد بالسلامة بدون أي مضاعفات .

شكراً طيف ، بانتظارك بإذن الله.🍃🌷🍃

بنت حزام الاوله ثم الاوله ثم الاوله ...،
.......................................
ياألله كش جسمي من هالكلمه ابدعتي طيوووفه في رسم ردة فعل الجد >>كفووو
اتوقع ثامر عقب كلام الجد ماراح يقول نص كلمه لمضاوي بعد اليوم ..
اتوقع المقطع بيوصل لمضاوي وبتعرف انها فعلا ماأختارت اهلها على اخوانها عبث

اتوقع مضاوي بتجيها ولادة وهي عند مريم وام مريم بتروح معها وبترافقها للمستشفى الى ولادتها .. وهي الي بتبشر الجد ..

يالله ياسعاد بتجيك البشاير وراء بعض هههههه
نسيت وش كنت بقول ..موقف الجد نساني كل شي ...

.