كاتب الموضوع :
طيف الأحباب
المنتدى :
قصص من وحي قلم الاعضاء
رد: للحب سجناء
الفصل "السابع والأربعون"
.
.
.
في مشب بيت الجد بعد العشاء كان الجميع متواجد ماعدا فهد ...،
دخل ثامر وقام الجميع فرحة بقدومه غير المتوقع سلم وجلس بجانب الجد...،
التفت له الجد وابتسم بحنو ومحبه / وشلون قدرت تجي...!
أمس تقول اليوم عندك اختبار...؟
ثامر وهو يمسك بيد جده المتكئ بجانبه / اليوم كان اول اختبار...،
ومن الجامعة للمطار لمجلسك...،
مساعد / تعب عليك الله يعينك كان ريحت بجدة وجاي على رحلة بكرا...،
ضحك محمد/ غريبة بدر مقابلنا ما راح جابك...؟!
بدر بممازحة / دقيت الظهر عليه مقفل جواله وزعلت عليه...،
ثامر / ماني يمك الاختبار أربع ساعات ولازم احضر قبلها طلعت من الاختبار ما اشوف على طول للمطار...،
مريت سيارتي طلعتها من الوكالة وجيت قلت بمر أسلم...،
الجد بقلق / سيارتك جديدة عسى ماشر ...،
اخذ ثامر فنجال القهوة من يد فيصل ووضعه أمامه / اخذتها للوكالة يسوون لها صيانة بشحنها لجدة...،
سلطان / ليه تشحنها وانت يومين با الاسبوع تعب ومخاسير على الفاضي...،
ابتسم ثامر / الشهر هذا عندي أربع اختبارات وكل أسبوع اختبار...،
وصعبة وتبي تركيز وجهد...،
بجلس هناك لين تخلص...،
سعد / أفضل لك عشان تتحاشى التأخير وتعب السفر وانت محتاج كل دقيقة...،
هز ثامر رأسه بتذمر / انا أكثر شي يضغطني الوقت...،
خالد بممازحة / قل أنك صرت شايب ما عاد بك نشاط الشباب...؟
ضحك ثامر بمرح/ والله الظاهر اني شيبت اشوف ما عاد اتحمل التعب اطفش بسرعة ...،
التفت سلطان لراكان / السيارة الي عند بابكم هي سيارة عمك عبد العزيز...؟
راكان / أي هو...،
وبتأفف وضجر / جاي هو وجدتي يقنعون ابوي...،
خفت أسوي لهم مصيبة طلعت وخليت انور عندهم...،
ضحك محمد وبممازحة / وش يقنعونه فيه لا يكون بيزوجونه على عمتي...،
ضحك راكان / ليت كان هانت يبون يقنعونه يزوج ريما لأخو حرمة عمي عبد العزيز...،
سعد الذي كان يجلس بجانبه ماجد قبض على ساعده دون ان يشعر ثم افلته بسرعة...،
اختلس فواز النظر لأخيه ولاحظ وجه ماجد الذي تغير وعرف ان امر اخيه بدأ يفتضح لكن ليس باليد حيله الا بمعجزة...،
زفر الجد بعمق وضيق / الله يستر على سعاد من ها السالفة لا تموت...،
مساعد بنبرة غضب وانفعال / هي ما قالت أمس ان ام راكان كلمتها وقالت ما عندنا بنات هذولا وش جايين يدورون ...؟
والا لازم نتذابح علشان جخيدم يرتاح...؟ّ!
نظر بدر لعمه وهو يحاول تهدئته وبنبرة استخفاف / عمي ترى الموضوع تافه ما هو محتاج كل ها التوتر...!
جا ابو راكان وأمه الله محييهم...،
بيقولون ويحاولون والنتيجة وحدة ماصاير الا الي عمتي وبنتها يبونه...،
راكان / بدر صادق يا خالي ...،
لا ترفع ضغطك هذا طبع عمي لحوح ومره تصيب ومره تخيب وها المرة ان شاء الله بتخيب...،
فواز عقد حاجبيه وبا اندفاع / وان صابت ها المرة...!
راكان بنبرة حازمة / ترى امي مهي رخيصة عند ابوي وعندنا على شان يتسفه رايها...،
التفت الجد لراكان / دارين ان أمك ما لاحقها ضيم ...،
لكن العرب هذولا راعين طويلة ومصرين يبون البنت ...،
أردف / اجل مرسلين يقولون بنحتريها لين تكبر...،
تناول ماجد هاتفه والتفت لجده...،
وبنبرة جادة / جدي تبيني أحل السالفة هذي كلها الحين...،
خالد بترجي / تكفى ماجد كانك بتكلم خوالي فكنا من القيل والقال وزعل جدتي علينا ...،
انا متأكد ان خالي ابو انور بيحلها...،
ماجد التفت لخالد وبنبرة حادة / كلامي لجدي ماهو لك ...،
أردف / أدري خالي ابوانور ما هو مقصر...،
لكن انا عندي حل أسرع ويقفل السالفة هذي كلها من أولها لأخرها ...،
سلطان بسخرية / ويوم عندك حل يا بو الحلول ورى ما حليتها من صارت...،
بدال الشد والجذب والا سحبك هياط خالك عبد العزيز...،
ماجد وهاتفه بيده وكأنه لا يرى الا جده / جدي تبيني أحلها الحين وتوقف معي بلي أقوله...؟
الجد المتكئ بجانب ثامر اعتدل بجلسته / حلها وانا معك وفكنا من ها السالفة ...،
وبتذمر هز رسه / الي يمكن تقضى على عمتك ان ما انحلت...؟
فتح ماجد هاتفه وبحث عن رقم...؟!
طلب رقم ووضع هاتفه على مكبر الصوت ...؟
... / هلا وغلا ابو سلطان...!
ماجد بترحيب / هلا فيك...،
اردف / وشلونك اخبارك بشرنا عنك...،
.../ ابشرك على ما تحب...،
ماجد / زين الي عرفت صوتي قلت اكيد رواف ناسيني ...،
ضحك رواف / افااا وشلون ما اعرفك والله انت وخالد دايم على البال وعزيزين وأنتم بعيدين ...،
ماجد / هذا من طيبك يا الغالي ...،
أردف / اسمع عندك ازعاج...،
رواف / سلامتك يبو سلطان انا في المحل وعندي زباين ...،
ماجد / إذا فضيت بغيتك بسالفة...،
رواف بريبة / عسى ماشر...،
ماجد / الشرما يجيك خلاص اكلمك بوقت ثاني ...،
رواف / خلك معي على الخط دقيقة ...،
كتم ماجد صوت الهاتف ونظر للجد / جدي اعتمد أنك معي...،
قاطعه صوت رواف / خلاص ركبت سيارتي...،
أردف / آمر يا الغالي...،
أشار الجد لأنفه وهز رأسه بموافقه...،
رواف بتوجس / تفضل اسمعك...،
فتح ماجد الكتم وبا استفسار / سمعت أنك خاطب من خوالي الراكان مدري العلم صدق او لا ...،
نفخ رواف با ارتياح/ روعتني يا رجال احسب في شي كبير...،
أردف / الوالدة وام راكان كلموا يبون بنت خالك أبو أنور ...،
وللحين ماردوا علينا وان شاء الله يصير نصيب ...،
وبممازحة / والا ما تبون نسبتي ...،
ماجد / لا والله أنك كفو وثم كفو يبو راشد وهذا الموضوع الي مكلمك على شانه ...،
أردف / انت عندك خبر ان جد البنت من عند أمها يصير جدي...،
رواف / داري واعرفه وهو ما يعرفني والنعم فيه سعد بن عاصف علمه غانم...،
أردف ماجد وعيونه على الصامتين في انحاء المجلس ينتظرون ماذا سيقول...،
وبنبرة متوترة حاول ان يسيطر عليها / جدي خاطب البنت من امها لواحد من العيال قبل خطبتك ...،
وخطبه على خطبة ما تجوز يا بوراشد...،
جميع من في المجلس نظروا با استغراب للجد وماجد ...،
واشار لهم الجد بالصمت ...،
ماجد بضحكة مصطنعة /خالي عبد العزيز الظاهر اختك مشغله عليه الضغط العالي ومصر يبيها لك وانت وش رايك ...،
رواف / رايي الله يوفقها وانتم أولى فيها وما هو ما خذها اطيب منكم يا العاصف ...،
أردف با اعتذار / والله ما دريت يا يبو سلطان والموضوع كله سهالات ان شاء الله ...،
ماجد / والله أني داري انه بسيط بس انت خابر خالي ابو راكان انتم غالين عليه ويبي قربكم ...،
رواف / والله انه عزيز وغالي أبو راكان وحسبت اخونا الكبير لكن الزواج قسمة ونصيب والبنت مسبوقين عليها ...،
وما يجوز من ابو راكان ها الكلام...،
ماجد / اكيد خالي عبد العزيز ما درى عن الخطبة والكلام قديم وكان بين جدي وام البنت لا تلومه ...،
وما يبون أحد يدري ولو ما الحاح خالي على شانك ما دقيت وازعجتك...،
ضحك رواف / حقك يبو سلطان ما فيها ازعاج ...،
ماجد / يعني اعتمد أنك تتفاهم مع خالي ...،
رواف / افاا عليك اعتبر الموضوع منتهي وانا اخوك...،
ماجد / ما تقصر جعل عمرك طويل...،
رواف / وعمرك يبو سلطان ابد الحين طالع للبيت...،
اختي ام راكان عندنا وبقولها تصرف النظر عن الموضوع كله...،
اغلق ماجد الخط ووضع هاتفه امامه...،
ابتسم ماجد / وهذي السالفة وانتهت...،
سلطان با انفعال / وشلون انتهت الحين انت جبت لنا ورطة جديدة طلعتنا من مشكلة ودخلتنا بمشكلة...،
راكان بتأييد / خالي سلطان صادق يا ماجد ...،
وبنبرة تهكم / وإذا عمي عبد العزيز قعد ينبش وراك ولقاك تكذب...،
خالد بملامة / والله ان يقلب الدنيا علينا ويعاند أكثر ويفضحك عند الراكان كلهم...،
أردف / انت سويت شي ما انت بقده ...،
هز ماجد راسه بثقة / ان شاء الله اني قد كلامي...،
التفت لجده / جدي ما قلت أنك بتوقف معي ...،
ضحك الجد واشار بيده / قمت تروغ بنا مثل أبو الحصين ما عاد ندري وش نقول...،
فواز بتأييد / ماجد حاسبها وعارف وش قال...،
مساعد / وشلون حاسبها وهو تسذب على الرجال وقال البنت مخطوبة الحين ورط عبد اللطيف وعمتك...،
التفت ماجد لراكان / راكان انا طالبك قل جاك قدام جدك وخوالك العاصف ...،
راكان با استفهام / جاك طلبك إذا أقدر عليه...،
ماجد / انت وش تقول بنا ياخوالك...،
راكان / وش اقول والله اني اسجد شكر لربي كل ما تذكرت انكم خوالي ...،
ماجد غير جلسته واستجمع شجاعته /اجل طالبك وانت كفو وبلسان جدي ريما لسعد...،
صعق جميع من في المجلس من طلب ماجد...،
استغل ماجد صدمتهم والتفت لجده الذي يعرف انه اذا استنخاه با اخته اجابه / امون يا اخو رثعه والا ما امون ...،
الجد / تمون وانا جدك تمون...،
راكان كمن شل لسانه لم يستطيع الرد...،
اشار ماجد خلسة لفواز ان يحذف عقاله على راكان...،
فهم فواز مقصد ماجد ورفع عقاله وحذفه على راكان / كفو ابو عبد اللطيف كفو...،
ثم فعلها بدر قام بحذف عقاله / كفو تقول وتفعل ياراكان...،
راكان لا يدري ماذا يقول يتلفت بدهشه وعقال بدر وفواز امامه ...،
مساعد الذي كأنما افاق من اغمائه / أنتم وش جاكم وش ها الكلام...،
خاف بدر ان يهدم مساعد ما فعله ماجد واراد ان يثبت الخطبة ...،
وخصوص ان راكان معروف عنه مندفع ويعتز بكلمته إذا نطقها...،
ربما يحتاجونه في اقناع عمتهم التي يعلم الجميع انها من يأمر وينهي في شؤن ابناءها وليس والدهم ...،
ابتسم بدر وبتشجيع / ماجد ناب عن جدي وخطب من راكان اخته لولد عمه...،
وراكان ما قصر من عنده عطا وما عنده اعتراض والشور الاول لبو انور وعمتي ...،
فواز التفت لجده يساند بدر / وانت ياجدي قلت حرمة سعد عندك ما هو لاقي اطيب من بنت عمتي...،
التفت لراكان / سعد وتعرفه ترد فيه شي ياراكان ...،
راكان بصدمة واندهاش ابتلع ريقه / سعد ما قول فيه شي لكن البنت امرها بيد امي وابوي...،
وبذهول أردف / وبعدين انتو تسولفون عن ريما البزر ما غيرها ترى...!!
ماجد / انت ما عليك اهم شي أنك موافق على سعد والباقي بيتسهل ...،
سلطان بنبرة غضب واستنكار / ماجد انت فيك بلا والا بالع شي ...؟
قمت تهذري ما عاد تشعر بلي تقوله...،
وبا امتعاض / فجعتنا وفجعت ولد عمك بخطبه يمكن مهي براسه ولا فكر فيها...،
ثامر حاول التهدئة من التوتر الذي ساد جميع من في المجلس فقد أدخلهم ماجد بدوامه / الحمدلله الموضوع عادي وكلنا اهل ولحم ودم واعتبروها سوالف ومشاوره بيننا على هالخطبة ...،
حرك سلطان راسه بتهكم / الحمدلله ما في ناس اجناب سمعوا هبال ولدي كان سنين يضحكون عليه ويعايرونه بخباله...،
ضحك محمد / انا حسيت اني اتفرج على مسلسل بدوي وانتظر النهاية...،
فيصل بممازحة / عاد انت يا محمد تنبسط على المواقف الدرامية ...،
بدر / ليش درامية سعد المعني بالموضوع والشور عنده إذا موافق على كلام ماجد يتمم جدي الخطبة ...،
التفت الجد لسعد / انت وش تقول بكلام ماجد وراكان...،
سعد الذي مرت عليه جميع فصول السنة في هذه الدقائق...،
الجميع التفتوا له وشبه متأكدين انه سيرفض خطبة ماجد ويعتذر من راكان...،
تمالك شجاعته ورفع رأسه لجده ...،
وتكلم بثقة / ماجد ما قال شي غلط يدري ان جدي وابوي لهم خاطر أني اتزوج...،
ومن طيبه سافط بنت عمتنا لنا لا تروح للبعيد ...،
وضع يده على صدره / إذا وافقوا اهلها والبنت ما عندها اعتراض علي...،
اتشرف وموافق على بنت عمتي ولا انا بماخذ اطيب منها ...،
وإذا عذرهم عمرها...،
ما عندي مانع انتظرها لين تكبر ...،
ماجد التفت لراكان / وش قلت يا راكان...،
راكان / إذا هذا راي سعد انا من بعد راي ابوي وامي ما عندي اعتراض...،
الجد التفت لمساعد بابتسامة/ عندك شي ودك تقوله ترى جلستنا مشاور مثل ما قال ثامر...،
مساعد المذهول / يعني وش بقول ريما مثل بناتي والي اتمناه لهن اتمناه لها ...،
ان صار نصيب خير على خير ما صار سعاد اختي وهذي بنتها ما هو مغير عندي شي...،
خالد بجدية / الزواج ما فيه مجاملات الي عنده راي يقوله انا اشوف الموضوع يكون بينا هنا يالرياجيل لا يوصل للحريم ...،
ثامر باعتراض / انا رأيي ان جدي يكلم عمتي ويشوف وش عندها...،
إذا وافقت على سعد كان بها ما وافقت ننسى الموضوع كأنا ما سمعناه ...،
والتفت لراكان بود ومحبه / وانت رايتك بيضا سويت وقلت الي تقدر عليه وهذا العشم فيك...،
وقف راكان الذي مازال تحت الصدمة واستأذن بالمغادرة...،
ابتسم له الجد / راكان يا بوك الي سمعته لا تدري أمك واختك عنه لين اكلمهن...،
راكان يأشر على انفه / ابشر...،
خرج راكان وبعده انفض المجلس...،
لم يبقى سوى الجد وبدر وثامر...،
ابتسم الجد بممازحة لثامر / ما هقيتك تصير شجاع وتجي...،
قاطعه بدر وبا اعجاب وهز رأسه / والله الشجاع ماجد اترك عنك ثامر...،
وبممازحة مرحة / مخوفته العنقا لايوطوط بالرياض كلها ذال منها ...،
ضحك ثامر وهو يمثل انه سيقف / لا تحداني الحين ادخل داخل...،
هز الجد رأسه بتعجب / ماجد وش جاه على ها السالفة...،
وبا انتقاد / لو سعد فشله وقال خطبتك مردوده انت بدالي وش بيسوي وقتها...،
بدر بمكر هز رأسه وابتسم / ما خبرتها تفوتك ياخو رثعة...،
الجد با استفهام / قصدك ان سعد...،
اومئ بدر رأسه بتأكيد / قصدي ان الي سم حال سعد يبي ريما وماله طريق عليها وما قصر ماجد سهل له الطريق...،
الجد غير جلسته / بديران لا تلف وتدور علمني الصحيح...،
أردف / ريما من جابتها امها وهي قدامه وإذا يوم سالفة المخيم ما يمدي...؟
الرجال مبطي ناقدين عليه...،
ثامر بتأييد / بدر كلامه معقول والا ما وافق سعد بها السهولة لو مهي في باله قال واعترض او حتى سكت...،
أردف / كم مره تطرون له العرس وهو يتصدد عن سوالفكم...،
الجد بارتياح / الحمدلله يوم عرفنا علته اجل امره هين...،
بدر / الخوف من عمتي الحين ترفض ...،
الجد / عمتك مهي مشكلة مقدوراً عليها...،
المشكلة ان البنت عيت وقالت ما ابيه ...،
ثامر / إذا عيت لا مشكلة ولا شي بيعرف انها ما تبيه وتطيب نفسه منها وبيقول دورو غيرها...،
نظر بدر بطرف عينه لثامر وابتسم بتهكم...،
ضحك ثامر / وضعي تدري انه غير لا تقعد تنغز...،
ابتسم بدر بمرح / دارين أنك انت وحرمتك كلكم غير...،
الجد / يسهلها الله حرمته بس ما يحارشها تبي تهدا ما عليها...،
بدر باستغراب / على طاري حرمته سناء وشروق مستغربات منها يقولن لها كم يوم مالها حس...؟!
نظر الجد لساعته / دوامها الله يعينها عليه ...،
تقول واقفين على رجل من تحضر لما ينتهي الدوام...،
هز ثامر راسه با استنكار / ما يهمها الدوام اكيد فيها شي...،
عندها جلد وصبر على دوامها ما شفت مثلها...،
زفر الجد بضيق / المشكلة انها كتوم ما تسولف، حتى لو بها شي...،
ثامر / وشلون يدها الحين...،
الجد / ما عليها فكوعنها الجبس ولفوها تقول عشان ما تلتطم ...،
وقف الجد استعداداً للمغادرة...،
ثامر / وين تبي...؟
الجد/ جاني النوم وأنتم خوذو راحتكم ...،
التفت لثامر / لا تسري الطريق بعيد عليك وانت توك جاي من سفر...،
اجلسوا والحين اقول لشغالة تجهز عشاكم ...،
ثامر / ما نويت امشي اليوم دايخ ادور الرقاد ...،
بدر / الله يكثر خيرك ياجدي...،
ام فهد مصلحه لناعشا...،
الجد وهو يغادر / عساها على القوة والله يكثر خيرها...،
دخل الجد الي الداخل...،
نظر بدر لهاتفه ووقف / يا الله حياك ما قصرت بنت عمك ارسلت تقول العشا جاهز ...،
تثاءب ثامر وبكسل / الله يكثر خيرك وخيرها لكن ما اشوف ...،
مد بدر يده / اقول قم بس وين تبي تنام عسى هنا...؟
أردف وهو يضحك / تبي تسوي لنا سالفة جديدة مع العنقا ...،
بيت ابوي ما في أحد الا محمد وفيصل خذ راحتك ...،
وقف ثامر وبملل / امرنا لله بنشوف من هو اطول حبل انا والا بنت حزام ...،
غادر ثامر وبدر بيت الجد ...،
.
.
.
قبلها بنصف ساعة ...،
خرج ماجد الذي لحقه به سعد واوقفه قبل ان يدخل منزله...،
سعد بامتنان / مدري وشلون أردها لك...،
ابتسم ماجد / الي يسمعك يقول سويت شي ترى مشوارك طويل...،
ابتسم سعد وهو يمسك بيد ماجد / اهم شي أحد حرك الموضوع الي بعدها ان شاء الله مقدور عليه ...،
أردف بتعجب / انت كيف عرفت الي في بالي وجازفت بها السالفة...،
رفع ماجد كم ثوبه وارى سعد أثر قبضته على ساعده المحمر ...،
ماجد بممازحة / وش الي خلاني اجازف غير وجع يدي بغيت تمزع لحمها ...،
سعد بذعر عض شفتيه بحرج / والله ما توقعتها كذا...،
أردف / ابشر بالعوض لو الي اشوفه ما ينتعوض...،
ماجد / يا بن الحلال لا تشل همي...،
أردف / الحين كل شي يعتمد على البنت إذا قدر جدي انه يقنع عمتي ...،
زفر سعد بقلة حيله / انا راضي با اختيارها إذا وافقت او رفضت ...،
ماجد / ما عليه ان شاء الله...،
اهم شي الحين انت استخر وتيسرالأمور بأذن الله...،
زفر سعد بألم / والله يا ماجد كل يوم أستخير فيها ومرات اتعوذ من شعوري اتجاهها الي يزود وما ينقص...!
وبقلة حيله سخر من نفسه ورفع كتفيه / والمصيبة بنت الناس ما درت عني ...،
ابتسم ماجد بوجع خفي / ما أقدر الومك ولا اشجعك في أشياء الواحد لو انها تخصه ما يقدر يسيطر عليها مثل المشاعر...،
ابتسم بتعجب / أكثر شي خفت منه عمي مساعد...،
ادري ما يواطن خوالي قلت بينشب لنا ويحلف ما نعيد السالفة ...،
ابتسم سعد بمحبة / لا يغرك عصبية ابوي تراه من داخله غييير الي تشوفونه...،
ضحك ماجد / الحمد لله الي شفناك تضحك وتسولف...،
يا رجال كل ما شفت رسالة من فواز على الخاص اقول بيقول سعد يطلبك الحل ...،
ضحك سعد / عاد ماهو لها الدرجة ...،
ابتسم ماجد / الله يجيب العلوم الي تسر البال ...،
.
.
.
في بيت فهد...،
يقف محمد عند باب المجلس ...،
بدر / وش ازعاج البواري الي برا ...،
محمد / هذا فيصل بنطلع للاستراحة تأخرت عليه...،
ضحك ثامر وبممازحة / وش فيكم هجيتم من جيت ...،
محمد انزل نظارته وأعاد لبسها / في مباراة بنحضرها وتأخرنا...،
أردف بممازحة مرحة / تعال معنا إذا خايف تجلس لحالك خويك الحين بيدخل عند حرمته ويخليك بالحالك...،
بدر / توكل على الله قبل لا يمشي فيصل ويخليك ...،
غادر محمد ...،
التفت ثامر لبدر / اشكر ام فهد بالنيابة ما قصرت على العشا...،
بدر / الي يشوفك يقول الرجال لف العشا وانت ما اكلت شي...،
تمغط ثامر وتثائب بكسل / ما نمت زين من صحيت الفجر قلق وتوتر من ها الاختبار...،
بدر / متى بتمشي جده ...،
ثامر / بشحن سيارتي السبت الصباح ...،
ورحلتي نفس اليوم بالليل على عشرة ونص...،
بدر / طيب اختبارك الخميس...!
كان خليت رحلتك الاثنين ...،
ثامر / وييين يابن الحلال الحين جالس عندك وعقلي عند الكتب...،
زفر بضيق / الوقت وما أدراك ما الوقت يا بدر...،
بدر / تهون ان شاء الله ...،
أردف / في حاجة بقولها لك وهي شك مني...،
وبحيرة وتردد / ماني متأكد لكن تعرفني ما أقدر اخبي عنك شي...،
ثامر با انتباه / شكل الموضوع يستاهل نضحي بالنوم...،
سرد بدر جميع ما قالته سناء عما حصل بين ام جاسر ومضاوي وعمتهم سعاد...،
ثامر بتعجب / شي محير كل الي قالته صدق لكن سالفة الحمل مدري اشك...،
بدر / ليش تشك يمكن صدق حامل...،
ثامر / انت ما تعرف مضاوي مثلي...،
لو حامل بتسكت ما تبرر وبعدين التحليل أنهى الموضوع...،
بدر با استفهام / ليش التحليل ما يكون لوحده من الشغالات او اخذته من المستشفى...؟
ثامر / المستشفى مستحيل لأنك تقول بنفس الوقت حللت وش دراها ان الحرمة بتقول لها الي قالته ...،
كان انتظرت اقل شي لليوم الثاني...،
بدر بتفكير/ بنستبعد المستشفى يمكن الشغالات ...،
ثامر / ولا الشغالات اول شي مضاوي تكره ان أحد يمسكها مع يدها الي توجعها والشغالة بتكون تهديد لها...،
ولو ماهي متأكدة انها ماهي حامل ما راح تقول خصوصا أنك تقول ان الحرمة بنفسها حذرتها لا تعلم بالحمل...،
وهي طلبت منها بعد تكتم ع الموضوع ...،
بدر / تحليلك يشبه كلام حرمتي حسيت بديت اقتنع...،
ثامر / لازم تقتنع لأن مضاوي ما كانت مجبورة انها توريهم التحليل ...،
خصوصاً انها مصدقه كذبتي يوم قلت إني فحصت وطلعت عقيم ...،
لكن من فرحتها استعجلت وارسلت لهم بدون شعور...،
بدر بأسف / وانا احسب نفسي ذكي وما قدرت تمشيها علي...،
ثامر أغمض عيناه بخمول / شف لي مكان بنام فيه وما بي ازعاج لين اصحى ...،
أردف بتوعد /وإذا على مضاوي ما عليه خلني أخلص من الامتحانات وبشوف عقب وش اسوي مستحيل بقعد كذا ...،
بدر يضحك / لصبر حدود...،
.
.
.
اليوم التالي في بيت الجد...،
يوم الجمعة قبل صلاة العصر...،
انتهى الغداء وغادر الجميع لم يبقى في بيت الجد احد...،
سوى الجد وثامر في المجلس الخارجي...،
وفي الداخل سعاد ومضاوي وطفل سعاد ...،
في صالة بيت الجد تجلس مضاوي وتحتضن طفل سعاد وتحاول ان تضع الرضاعة بفم الصغير...،
سعاد با انتقاد مرح / الحين ريما البزر تعرف ترضعه حليبه وانتي يا العجوز بلشتي ...!!
مضاوي / الي يشوفتس يقول ما شاء الله بزارينا مالين البيت...؟
اخر مولود عبودي واطول مني...،
اردفت / توقعت عمتي نواظر تجي اليوم ...،
سعاد التي تتمدد امام مضاوي وتتكئ على يدها / عندها عشا لزملاء رجلها تجهز له وعيالها اختباراتهم تبدأ الاحد ...،
مضاوي / الله يعينها مدارس عيالها لغات ويبي لهم جهد...،
سعاد / والله كل الدراسة صايرة صعبة شوفي ريما تذاكر ليل ونهار ...،
مضاوي / ليه ماجت معتس للغدا...،
سعاد / عندها اختبار بتبدا تذاكره اليوم ...،
تقول المادة طويلة وأمس ما امداها تفتح شي جت خالتي ام عبد اللطيف...،
مضاوي / زين الحمدلله رضت عليكم ...،
سعاد بتهكم / لا رضت ولاشي جايه مع عبد العزيز ولدها بزعم يحاولون فينا نوافق على نسيبهم ...،
مضاوي / ما شاء الله عليهم كل باب دخلوا عليكم منه ...؟
شكلهم متمسكين فيكم ...،
سعاد اعتدلت بجلستها / اسكتي بس أمس اتصبر ما ابي انفجر فيها ما صدقت مشو...،
واليوم الصباح كلم عبد العزيز أبو أنور يقول نسيبي هون ما عاد يبي نسبة ام انور...،
ضحكت مضاوي / الحين نسبة ام انور ويوم بغيتو البنت كانت بنت عبد اللطيف...،
سعاد بامتعاض / بكيفهم اهم شي حلو عن سمانا اعوذبالله من صارت سالفتهم هذي وانا على نار...،
لا نوم ولا اكل ولا جلسة ارتحت بها ...،
مضاوي / واضح عليتس توقعت بعد الاربعين بتغيرين بشكلتس تصبغين تقصين شعرتس ترجعين استاذة سعاد الأنيقة...،
سعاد / كنتس عارفة وش أفكر فيه...،
لكن بلشت بجخيدم انتظر ريما تخلص اختباراتها على شان اروح أسوي صيانة لنفسي ...،
مضاوي / إذا مشاويرتس بعد دوامي اتركيه عندي...،
وبممازحة مرحة / كأني بديت احبه ها الدب والا انا قبل ما ش عليه ...،
سعاد وهي تنظر لصغيرها بحنو وتقبل يديه/ مالتس حق من الي ما يحب الزين...،
اردفت بممازحة وابتسمت بمرح / على طاري الزين شفت سيارة ثامر عند الباب متى جا ...،
مضاوي با استغراب وامتعاض/ جاي وش يبي مستعجل على المشاكل ...،
ضحكت سعاد/ ما هدت عنزتس عنه ...؟!
مضاوي / ولا راح تهدا لو بعد ألف سنه لين يفكني من نشبته ...،
اشارت بيدها وبنبرة هادئة وحازمة / الآن حنا باستراحة محارب ...،
هزت سعاد راسها باسف / ياقو راستس ...،
تنهدت مضاوي بقهر / ويا قو جرحه...،
صوت نحنحت الجد ينادي / مضاوي ...،
مضاوي بترحيب / هلا جدي حياك تعال مافي غير بناتك ...،
التفتت لسعاد واردفت بمحبة / يا كثر ما أحب هالصوت عساني ما أفقده...،
ضحكت سعاد وبممازحة / ما شاء الله المشاعر جياشة ...،
ابتسمت مضاوي وبنبرة صادقة / لا والله شعور الأمان كل ما سمعت صوته...،
دخل الجد ووقفت سعاد تسلم عليه ...،
الجد ببشاشة / ياحي الله ام أنور...،
سعاد با ابتسامة / تحي وتدوم يا الغالي ...،
جلس الجد بجانب مضاوي وطلبها الصغير وجلست سعاد مقابله لهم ...،
قبل الجد الصغير بمحبه / حي الله سمينا يوم جانا بمحلنا...،
اخرج الجد من محفظته نقود ووضعاها بجيب صدر الطفل ...،
ابتسمت سعاد بحرج / خيرك سابق يا بيي ماله داعي...،
الجد / هذي مهي لتس هذا عشا سمينا ...،
اخذت مضاوي الصغير من جدها ووضعته في سرير صغير بجانبها...،
مضاوي بممازحة / اعذرنا يا شيخ جخيدم من القصور هذا ما هو حقك...،
ضحكت سعاد وبمرح / ماجا منكم قصور انتي ماشا الله جايبه له ها السرير الفخم ...،
وابوي عشاه وش يبي بعد...،
مضاوي / السرير من زمان شاريته كل ما بغيت ارسله لكم أنسى...،
سعاد / لا تكفين عندي واجد بالبيت جته هدايا...،
خلي هذا هنا إذا جيتكم يلقى الشيخ جخيدم مكان ينام فيه...،
التفتت مضاوي لصغير تمسك بيده الصغيرة وكعادة سعاد إذا انفردت بمضاوي صورتها خلسة لثامر وارسلتها...،
تعلم انه يتشفق لرؤيتها...،
انتبهت لها مضاوي ...،
وبشك / وش عندتس على الجوال لا يكون تصورينا ...،
ابتسمت سعاد وبا ارتباك حاولت ان تخفيه / صورتكم وارسلتها لريما تقول تبي جخيدم اشتاقت له ...،
اردفت وهي تنظر لوالدها بتحريض مصطنع/ يبه شفت مضاوي ما عرفت تعطي ولدي حليبه ...،
ضحك الجد والتفت لمضاوي بمحبة/ وش عرفها هي صغيرة بيتنا جعل قدرها كبير...،
سعاد بممازحة / تقول على مضاوي العجوز صغيرتكم وتلوموني يوم اشوف الريم صغيرة ...،
ضحك الجد / وشلون الريم ما شفناها اليوم ...،
سعاد / ما عليها طيبة عندها اختبارات تذاكر ما قدرت اليوم تجي...،
الجد / زين الله يوفقها...،
أردف الجد / امس راكان يذكر عمامة مارينكم ...،
سعاد / جتنا خالتي وعبد العزيز يبونها تقنعني بنسيبهم ...،
الجد بتوجس/ واخذو منكم كلام...،
سعاد / لا كلام ولا شي وطلعت خالتي زعلانة من عندنا...،
واليوم الصباح دق عبد العزيز يقول هونو عن الخطبة كلها...،
اردفت بضحك / يقول نسيبنا ما عاد يبي بنت ام أنور...،
الجد / بنت ام أنور حنا نبيها ...،
سعاد بمحبة / جعل ربي يجبر بخاطرك يابيي...،
الجد بنبرة جادة / هذي مافيها جبر خواطر انا صادق ابي ريما لبناخيتس سعد ...،
صمتت سعاد لم تستوعب ماقاله والدها ...،
ومضاوي تقلب نظرها مابين الجد بملامحه الجديه وسعاد المصدومة...،
سعاد / يبه شكل راكان اعداك صرت تمزح مثله...،
الجد / لا والله ما امزح انا جايتس اخطب بنتس لولدي...،
سعاد بدهشه / ترى ريما بزر انت تدري كم بينها وبين سعد...،
الجد / أدري لكن بناخيتس ارسلني عليتس وشاري قربتس ...،
التفتو لصوت العالي الذي قاطعهم...،
.... / وييييييع عطر ثامر...،
انتبهت مضاوي لنفسها ولم تعرف ماذا تقول او تبرر فما نطقت به كان بصوت عالي ففضلت الصمت ...،
فاجئهم دخول ثامر غير المتوقع لصالة ...،
قبلها بقليل ...،
عندما وصلته سنابة سعاد كان في مشب الجد لوحده...،
فالجميع غادرو لبيوتهم واراد ان ينام قبل صلاة العصر ...،
عندما رأئها لم يستطع الجلوس وغامر بالدخول وليعتذر بعدها بأي شيء...،
لن ينطق بكلمة كما حذره الجد يريد فقط ان يراها، حتى لو استفزته ...،
ثامر بابتسامة / السلام عليكم ...،
قامت سعاد بفرحة لتسلم عليه...،
سلم عليها وقبل رأسها...،
واستدار الي مضاوي التي تشاغلت بتفقد القبعة التي تخفي بها شعرها ...،
نزل ثامر لها وهو يمسك بيد عمته وقبل خدها...،
الجد وسعاد تجاهلوا ما فعل ثامر ولم يعلقوا كأنهم لم يروه ...،
مضاوي انقلب وجهها للون الأحمر واخذت منديل مسحت بها مكان قبلت ثامر...،
انتبه لها ثامر وتوقع ردت فعل أكبر، ولكنه أكمل سلامة يسأل عمته عن احوالها ...،
سعاد بمعاتبة لطيفة / لو تبي اخباري كان مريتني ماهو تنتظرني امركم...،
ثامر / جيت والله هلكان تعب ما صدقت نمت وقلت اشوفتس اليوم ...،
الجد بممازحة / وليا متى وأنتم واقفين اجلسوا...،
جلست سعاد وجلس بجانبها ثامر...،
الجد التفت لثامر / يوم أنك جيت نبيك تقنع عمتك...،
خطبت بنتها لولد عمك سعد واشوف مالها خاطر ...،
ثامر / ما هم مزوجين اطيب من سعد...،
أردف / لكن قبلها نبي قهوة سنعه مبطي من القهوة ...،
ارادت ان تنهض مضاوي فمسك الجد بيدها واجلسها ...،
التفت لمضاوي ومازال ممسك بيدها / كلمي الطباخة تجدد القهوة ...،
امتثلت مضاوي لأمر الجد الذي كان لا يريدها ان تغادر يعلم اشتياق ثامر لها ...،
اراده ان يروي هذا الاشتياق ولو بالنظر اتصلت مضاوي بالخادمة واخبرتها ...،
الجد / هذا ثامر زكا سعد عندتس وقال لتس ما جايكم اطيب منه...،
سعاد تهز راسها بنفاذ صبر / السالفة مهي على اطيب...،
اخو حماتي كلن يمدح فيه ورجال مقتدر وبعمر سعد ...،
لكن بنتي صغيرة وما هو وقت زواجها ورفضته ...،
نظر ثامر لعمته مستفهماً / ما هو وقت زواجها قصدتس ...،
والا ماتبين خير شر تزوجينها عشان تقفلين ها الباب ...،
أردف بمناصحة / عمه ترى باب خطبات بنتس انفتح خلاص ...،
رفضتي نسيبكم وجاكم سعد وبيجي غيره ...،
كان يختلس النظر لمضاوي المتشاغلة مره بهاتفها ومره بصغير سعاد ...،
سعاد بنبرة حازمة / والله لو يجي مليون خطاب ما زوجتها...،
بنتي صغيرة وما بعد شبعت منها ...،
ثامر بممازحة / حلى هي والا لعبة تقولين ما شبعت منها ...،
الجد بلطف ومسايسه / ترى يابنتي ماهو كل يوم جايكم رجالن يستاهل ...،
فكري بالموضوع واستخيري وشاوري ابوها واخوانها ...،
سعاد با انفعال وتوتر / ماني مشاوره احد بنتي ماني مزوجتها وتبعد عني...،
الجد بمعاتبه لطيفه / هذا ماهو كلام ناس عاقلة بنتس ماهي قاعده صغيرة تبي تكبر وهذي سنة الحياة...،
التفتت مضاوي لسعاد / ما قدامتس الا حل واحد استشيري ريما واقطعي الموضوع مره وحده...،
اردفت وهي تنظر لسرير الصغير وبنبرة غامضة/ ولا تضغطين عليها بموافقة والا برفض خلي قرارها من راسها ...،
الجد / انا مع راي مضاوي تسألينها والا انا امركم واسألها...،
سعاد بحزن/ لا جعلني افدا راسك امس جدتها سوت لنا سالفة نادتها وقالت لها عن خطبة نسيبهم قعدت تبكي لين انقطع قلبها...،
الجد بنبرة جادة / انتي امها وشاوريها وتقول الي في خاطرها لتس...،
وافقت والا ما وافقت كلهن ماهن مغيرات من قيمتها عندنا...،
مضاوي / انتي ماراح تنتهين من موضوع سعد عند جدي لين يسمع رفض الريم بنفسه...،
ضحك الجد / مثل ما قالت مضاوي ماحنا تاركينتس لين نسمع جواب الريم...،
ثامر / وبعدين سعد والله فرصة ولد اخوتس وإذا صارت موافقة اشرطي عليه الي تبين...،
ضحك وبممازحة / قولي العرس بعد عشر سنين ما هو مخالفتس...،
سعاد تبتسم بتهكم / انت متوقع ريما بتوافق...،
الا بتصيح زي صياحها امس...،
مضاوي / اجل لا تفتحين الموضوع معاها لين تنتهي الاختبارات تشغلينها وبعدين اسأليها وتنتهي السالفة...،
التفت لثامر ورفعت حاجبها باستفزاز / وعلى قولة خوالي هون حفرنا وهون طمرنا ويا دار ما دخلك شر...،
ثامر ابتسم ابتسامة جانبية على تعليقها والجد وسعاد تجاهلوها ...،
التفت سعاد لوالدها / بسوي الي قلتوه لي لكن توعدوني ما عاد تفتحون معي موضوع زواج ريما...،
ابتسم الجد / هذا الظاهر انتي تبينها تمشط راسها ابيض وهي مقابلتس ...،
تشاغلت مضاوي بهاتفها وبتهكم / تمشط شعرها ابيض عند امها ازين من زواج فاشل...،
وقف ثامر وعيناه تنظر لمضاوي بنظرات تكاد تقتلها ...،
نظرت له بتحدي نظره لم ينتبه لها سواه ...،
سعاد / وين بتروح ما بعد شفناك ...،
ثامر بنبرة ساخرة / وين بروح بشوف سميي ...،
تقدم لسرير الطفل وتعمد ان يقترب منها ...،
كان يريد ان يتأكد ان شامتها بالفعل لم يعد لها وجود في عنقها...،
كادت مضاوي ان تستفرغ لولا ان تمالكت نفسها لا تريد ان تجلس بالمكان الذي ضاق منذ ان دخل ...،
ولا تريد ان تخرج حتى لا يفسر ثامر خروجها انه ضعف وهروب منه...،
واستجابة لرغبة الجد بجلوسها...،
تأكد انه لم يكن يتخيل عدم وجودها...،
حمل سرير الطفل ورجع بجانب عمته وضع سرير الطفل بينهما ونظرله ...،
امسكت سعاد بيد طفلها / وش رايك بولد العجوز تغير عن اخر مره شفته...،
ابتسم ثامر وبأعجاب / تبارك الله هذا ازين من عيالتس كلهم...،
ضحكت سعاد وبمرح/ ختامه مسك عمتك ما تلعب يوم خربتها خربتها صح...،
ابتسم الجد / الله يخليه ويصلحه مثل ابوه وخيته الريم ...،
أردف / ابوه ما شاء الله عليه مزيون ما نقدر ننقده لكن سمينا ازين منه...،
وبممازحة عفويه / الظاهر ماطير عقل عمتك يوم يخطبها غير زينه خطبوا العصر وجتني امها بالليل قالت سعاد موافقة...،
التفتت سعاد تلقائياً لمضاوي التي كانت تكتم ضحكتها وتتشاغل بفتح ولف الضماد الذي يلف يدها...،
ابتسمت سعاد / الحمدلله عاد حسنت النسل جبت لكم الريم وسميكم مزايين...،
ثامر/ البنت ما شفتها من ولدتيها لكن عاد كانها تشبه سميي وما صار نصيب لسعد انا الخاطب الي عقبه ...،
رفعت مضاوي نظرها له وباستهزاء/ الله لا يردي حظها تستاهل مثل سعد واطيب...،
ابتلع ثامر غضبه بعد ان نظر له الجد نظرة أمر بأن يصمت...،
الجد بممازحة / حنا يا العاصف الزين من عيالتس علينا والشين على الراكان...،
سعاد / والله يابيي من هو المزيون بكم وبالراكان ...،
اردفت / الراكان ما في الا عبد اللطيف على عمي راكان الله يرحمه...،
والباقين كلهم لخالتي سمارهم وعيونهم والله مابقو منها شي من اظفر اليد لشعر الراس...،
وأنتم ما في الا انت مزيون وما سحبت الا ثامر وابوه الله يرحمه وأبو بدر وسعد وبدر والباقي الله يستر عليهم ...،
ضحك الجد / تعلقين على ام عبد اللطيف ورى ما قلتي طارت بشباهكم امتس الله يرحمها بعد...،
مضاوي بنبرة حزينه / والله ان امي النيرة قمر ولا أحد مثلها...،
الجد / ام جلال الله يرحمها ان جينا لزين والله انها شرق وهو غرب لكنها عاقلة وسنعه وراعية واجب وحرمة تخاف الله ...،
وهذا الي زينها عندي وعند كل من عرفها ...،
سعاد / جعلها في جنان النعيم والله ما اذكر أحد قال انها ماهي مزيونة وكنت اظنك تحسبها قمر...،
الجد / ما تسذبتي وهي قمر بعيني لين دفنتها...،
أردف بتأكيد/ الاخلاق وانا ابوتس تزين الادامي بعينك، حتى لو هو شين تشوفه ما مثله...،
حمل ثامر صغير سعاد بحضنه وبممازحة / وش الخمس ميات الي بسرير السمي ...،
ضحكت سعاد / هذا عشا سميك من ابوي اليوم...،
اخرج ثامر محفظته من جيبه وفتحها واخرج مبلغ ووضعه في سريره / وهذا غداه بكرا...،
سعاد بخجل / والله تفشلون الواحد بكرمكم يا العاصف...،
الجد / الاسم ما هو بلاش خليه يكرم سميه...،
سعاد منذ فترة تريد لمضاوي ان تسمع قصة جدتها...،
لكن لم يكن هناك فرصة لعلها تتعظ، ولكن لا تعرف كيف تستنطق الجد...؟!
الذي لا يمكن لأحد ان يعرف تفاصيلها او يقولها بصدق مثله ...،
طرأت لها فكرة ...،
سعاد / يبه مضاوي وش اكرمتها سميتها الله يرحمها...،
التفت الجد لمضاوي وابتسم بمحبه / ما حضرتها الله يرحمها جت عقبها...،
وباستغراب / ما تذكرين يوم توفت...،
سعاد / ناسيه متى توفت لكن زينها ما ينسى الله يرحمها اذكر كنت اتمنى أني على اسمها وبزينها...،
الجد / امي الله يرحمها مزيونة ماجا عليها أحد الا مضاوي...،
وبحنو ابتسم / والله ما خلت منها شي...،
سعاد / شفتها كبيرة على عصاها يوم تجي من الديرة لكن واضح انها طويلة ...،
الجد / هي طويله الله يرحمها والا ابوي ما من طول رحنا بالطول انا وحزام لها ...،
سعاد با استفهام/ عمتي رثعه ما شفناها ما تشبه لها...،
الجد بالم / رثعه الله يرحمها مثل أبوها سمرا...،
أردف / ابوها الله يبيحه مزيون وله هيبه ...،
شيخ اخلاق وشيخ اسم ...،
لكنه اسمر شوي مثل سمار سهى بنت مساعد...،
سعاد / ماجاها شي غير الجازي...،
الجد / لاو الله هي الجازي بكرها وتوفت نفاس ...،
مضاوي با استفهام وشفقه / توفت الله يرحمها وقت الولادة ...،
الجد / هي تربت عندنا بالبيت ما بين بيت ابوي وبيت جدي الله يرحمه أبو امي...،
يوم كبرت زوجها ابوها لولد عمها وراحت معه للكويت ...،
هز الجد رأسه بأسف / زوجها صغيرة وما ابطت حملت ...،
يوم قربت ولادتها قالت لرجالها ابي اروح عند امي وجتنا وولدت عندنا ...،
أردف بأسى / عقب الولادة جاها سخونة وما اخذت أسبوع وتوفت الله يعوضها شبابها بالجنة...،
التفتت سعاد لمضاوي / شكلها حمى نفاس واول ما يعرفون ها الأشياء...،
اردفت بتذكر/ ام ثامر توفت حامل اذكر امي تقول جتها حصبه راحت هي وحملها منها...،
ثامر بوجع / الله يرحمها ما اذكر شكلها حتى صور ما لقيت لها...،
الجد / اعرست أمك الله يرحمها انت صغير ما وعيتها زين ...،
اردف الجد / الحمدلله على نعمة الطب والعلم اول الناس جهل ويتأخرون على اداميهم اما ان ربي يشفيه والا يروح منهم...،
والي يجيه جدري أهله يرحلون ويخلونه بمكانهم ان مات بمحله وان تشافى وعاش لحقهم ...،
سعاد / يبه الحين جدتي ماجا عليها بنات من جدي جلال والا بس انت وعمي...،
مضاوي با استغراب / عمتي رثعة ماهي بنت جدي جلال...،
سعاد تهز راسها بنفي/ عمتي رثعة بنت جدتي من رجال غير...،
مضاوي با اندهاش/ اول مره أدرى ان جدتي متزوجه قبل جدي...،
سعاد بتعجب / من جدتس تسألين...!
وبممازحة ابتسمت / انتي وين انتي عايشة ...؟
ثامر / الحين عمتي رثعة ماهي أكبر من عمي حزام وأصغر من جدي وبنتها رضعت مع ابوي...،
سعاد با استنكار / معقولة ما تدرون ...،
سعاد لم تصدق ان الفرصة اتت ليحكي الجد امام ثامر ومضاوي هذه القصة...،
اردفت سعاد بترجي / تكفى يبه قلها والله انها تصلح مسلسل ...،
ضحك الجد / ماني قايلها لين توعديني تشاورين الريم بسعد...،
ابتسمت سعاد / ابشر لو اني عارفه مردها بس على شانك وقدامك بعد بسألها انت ومضاوي...،
الجد بممازحة مرحة / وعد ما هو اجيب اسراري وعلومي وتهونين...،
ضحكت سعاد / وعد واخر يوم اختبار لها انت ومضاوي معزومين عندي وقدامكم اسألها...،
اشارت بيدها / لكن بشرط تسكرون باب الخطبات عني مره وحده...،
ضحك ثامر ورفع يديه يدعو/ يارب انها توافق بشوف وش تسوين...،
التفتت له سعاد وابتسمت بسخرية وهزت رأسها / بطرد سعد وازوجها لك...،
ضحك الجد/ والله يا ثامر ما دعيت الا بيوم مبروك يمكن ان دعوتك رفعها ملك...،
سعاد با استعطاف / يابيي اتركنا من ثامر الي عنده قمر ويدور النجوم عطنا سالفة اختك الله يبيحها...،
نظر الجد لساعته / سالفتها طويلة لكن عساني اجيبها قبل يأذن العصر...،
أردف الجد / رثعة اختي ام الجازي اختي من امي وثامر صادق الجازي رضعت مع ابوه كبر جلال الله يرحمه...،
ماتت امها عندنا وبلشو بالبنت وجلال تو عمره يمكن شهرين ثلاث ارضعتها النيرة الله يرحمها فوق السنة وجو اهلها واخذوها...،
سعاد بترجي / نبي السالفة من اولها تكفى ...،
ابتسم ثامر / أحس اني تحمست من سوالف عمتي قبل اسمعها ...،
سعاد بحماس ابتسمت / تهبل قصتهم ...،
نظرت لوالدها بحب / لو ما قدامي ولدها ما صدقتها...،
وأقول خيال ولا يمكن انها تصير...؟!
.
.
.
|
25-11-24, 09:24 AM
جديد مواضيع قسم قصص من وحي قلم الاعضاء
العرض العادي
