السلام عليكم

طيييف هههههههه توني انتبه انها شروق مهوب شوق .. لا ويوم شفت اسم اخت مريم شوق اقول غريبه على طيف حاطه اسم شوق مرتين هههههههههههههه

ام شامخ صدق انها على اسمها امراءة شامخه اتوقع هالمرة بتشوف مضاوي وبتقول انها حامل ويمكن تشوف ريما وتقول هذي لاعب بها الهوى ..وتنصدم سعاد من بنتها كيف انها طاحت مثلها بالحب ههههههه

مضاوي معقولة انت الي بتجيبين ولد مشوه او يمكن شوق اقصد شروق هههههه ويمكن بعدها ام طلال تقول لولدها طلقها ويكون هو الطلاق الثالث بعد رفعه هههههههه

المهم بيجي هنا من الي بيبشر الجد بحمل مضاوي >>نعيد السالفه ههههه
الجد بيسوي معروف بأحد وهالاحد هو الي بيبشر الجد والاحتمال الكبير انه يشتغل بالمستشفى ...
بس لحظه الحين ام شامخ اذا شافت مضاوي ماأتوقع بتقول قدام سعاد انها حامل لان ان قالته بتفوز سعاد بالجمس الحمر ...وانت قلتي شخص مايخطر على البال ..
ممكن تقوله لمضاوي !!ومضاوي بتبلش وشلون تعلم جدها واعمامها وهي لها شهور عندهم على اساس زعلانه وتبي الطلاق !!
اتوقع ممكن مضاوي تفكر بعقل وتدق على ثامر تقوله تعال خذني للخرج بجيب اغراضي وتنام هناك ليلة بس كلن بغرفه ...علشان توهم الجد انها راحت معه .. مادرت ان الكل داري
وبعدها بتبشر مضاوي الجد بحملها ..>>كتبت السيناريو كله ههههههههه
طيييف تسلم يمينك لاخلا ولاعدم دايم ردودك نتحمس لها بعد البارت الله يسعدك يارب
ان ذكرت شي رجعت سلام
.
.
.

مرحبا يا جميلات اليوم بأذن الله تعالى بينزل "الفصل الرابع الأربعون "

كونوا با القرب


آرائكم تهمني

الفصل " الرابع والأربعون "

.


.


.


تمدد ثامر على الكنبة ووضع رجل على رجل / ثقتها أنى وعدتها تنفذ الي ابي وانفذ لها هي تبي...،

وبوجع خفي أغمض عيناه / وهي خابرتني إذا وعدتها بشي انفذه لها مهما كان...،

ضحك بدر وبممازحة مرحة / ما درت انها كانت وعود فترة الملكة...،

لكن بعد الزواج تصير أكثر الوعود الي بين الزوجين وعود مع وقف التنفيذ ...،

ثامر / مع نفسها اهم شي عندي ما توصل الموضوع للمحكمة ...،

اما بتجيني بدراما كرامة وانت ما عندك كرامة وانت ما انت رجال خلها تنابح لين تعض الارض ...،

بدر بتحذير / انتبه تتهور مره ثانيه...،

هد اعصابك وتجاهلها وان شاء الله تعدي هالعاصفة على خير...،

زوجتك إذا بينكم مشاكل مهما كانت كبيرة وانت تبيها ولك رغبه فيها لا تطلق ...،

ترى حلها وهي على ذمتك أسهل من حلها بعد الطلاق بمراحل...،

أردف / اهم شي انت لا يجيك عرق العاصف وتبلشنا مره ثانيه خل اعصابك باردة ...،

ثامر / توصيني بالبرود...؟

البرود لعبتي يا عزيزي ...،

زفر بدر بضيق / احمد ربك انت حالك ازين من سعد الله يعينه ...؟!

استدار ثامر لبدر با اهتمام / نسيت اسألك عنه وش صار عليه...،

بدر / راح صلح فحص شامل وتحاليل...،

كلها تقريبا سليمة عندها نقص بسيط فيتامين دال وفقر دم ...،

ثامر / فقر الدم تراه مرض...،

وبا استفهام / ما عرف وش منه...؟

بدر / اتوقع من قل الاكل والسهر الرجال واضح عليه من نزول وزنه انت متى اخر مره شفته...؟

ثامر / الجمعة يوم عزيمة عمي سلطان ...،

ضرب بدر جبهته / نسيت اعلمك طاح بموقف عدوك مدري صديقك يطيح فيه ما تدري هي دعوه له والا عليه ...؟!

ضحك ثامر/ لغز هو ...!!!

بدر / تخيل كنت جالس بسيارتك جننوني يسألون عنك قلت بهج عنهم ...،

واسمع صراخ الحريم ريما خطفها حرامي ...،

وأحرك السيارة واتبع العيال الي راحوا يركضون سبقونا على رجولهم ...،

الا هذا سعد وفي وراه سواده تمشي...!

وأأشر لسيارات الي وراي توقف ونزلوا عماني ...،

والعيال ركضوا عليهم...،

طلع الي وراه ريما ...،

مضيعه جوالها تدوره وشافته بالظلام وطاحت تحسبه جن مدري حرامي والي معاها هربوا وخلوها...،

هز راسه بأسى / اخذته معي بالسيارة حالته ما تبيها لعدوك...،

ما أدرى كيف الرجال ثبت نفسه لا يغمى عليه لين رجعنا ...؟!

فواز يقول يوم رجعنا لبيوتنا ما قدر يسوق سيارته سقتها عنه وخليت سيارتي عند المخيم هو شكله مبعد عن المخيم متضايق ...،

ابتسم ثامر بقلة حيله وبنبرة سخرية / رحنـا نبـي نخفـف ذنــوبٍ عليـنـا... وجينا وعلينا كثرها عشر مرات...،

زفر بدر بأسف / أي والله ليته سلم من ها الطلعة...،

أردف / سعد بلوته ما تدري منين تحلها صعبة سهله هو اعقلنا واثقلنا...،

والله ابي اتذكر مره راهق زينا تفحيط مغازل تميلح كلنا مرتنا ها الاشياء الا هو...،

محترم يعف نفسه عن المناقيد كأنه شايب حتى برجولته سابق عمره رجل يعتمد عليه ...،

ويوم طب طب على وجه بدون انذار وتولع له بورعه ...،

ثامر / هو يدري انكم دارين عنه ...،

بدر / الكل متوقع الموضوع فيه حرمه لكن مستبعدين بنت عمتي ...،

ما في الا انا والمدام وفواز اخوه حتى بالصدفة درينا يوم اعلمك ...،

ثامر / مشكلته زي ما قلت لك ما فيه الا الوقت يحلها هذا إذا البنت بعدين وافقت عليه لو بيتقدم لها...،

بدر / تدري أني خايف من اهل ريما ومن عمتي أكثر من ريما نفسها وعمتي بتصير العقبة...،

ثامر / اهل البنت فهمت موقفهم من عمي مساعد لكن البنت لها ابو وبعدين عمتي كيف عقبه ...،

بدر / عبد اللطيف انت ما جلست معه تستغرب كيف انور وراكان عياله لا شكلاً ولا اخلاقاً...،

تسمع فلان لا يحل ولا يربط هذا عبد اللطيف ...،

لا تستغرب لو تقدموا عماني لبنته ان اهله يطردونهم...،

تحسب بيكون له موقف ابداااا خيال مآته...،

ثامر / سبحان الله يوم اسمع مرات نغز عماني فيه أقول الرجال مقطع أربع لعاب داشر كلاب...،

واستغرب كيف عمتي جالسه معه وهو كذا...،

بدر / عمتي ليت الحريم مثلها متمسكة في بيتها وعيالها نادراً ما تسمع منها تعليق على تقصيره معها تبي الستر بلي هي به ...،

لكن مشاكلها مع اهله والتتشات الي تصير من حرمة عمي سلطان كشفت امور واجد عمتي ما قدرت تنكرها ...،

ثامر / طيب هو كيف وصل لكذا ...،

بدر / مدري عنه تزوج عمتي وحنا صغار ...،

أردف / الرجال بوظيفته مالي منصبه ومحد يقدر ينقده ويخدمك إذا يقدر على شي بعيونه ما يقصر...،

لكن سبحان الله خرب عليه ها الطريق الي يمشي فيه ...!

حرك رأسه بأسف / تدري من الي فضحه ...،

أردف بتهكم وامتعاض / ربعنا الي يسافرون ويدورون الخراب مثله...،

اول كانت تصوير كاميرات والحين جوالات يصورونه ويرسلونها لجدي وابوي ...،

ثامر بتعجب/ والي سربو الصور وش الهدف الي بيوصلون له يعني نصيحة ...؟!

وبنبرة استهزاء/ أنتم ما لقيتوه الا أنتم ماشين طريقة ...،

بدر / الهدف يقهرون جدي وابوي ...،

الي يبي واسطة وابوي ما قدر يخدمه فيها ...،

وجدي بيحسفونه يوم خطبتها من عبد اللطيف عارضو كثير ترى من جماعتنا العاصف القريبين...،

لكن عمي سلطان توسط له وجت ظروف كلها وقفت مع عبد اللطيف ...،

أردف / انا ما اذكر تفاصيل عرسها لكن على كلام ابوي وجدي ...،

حرك ثامر رأسه با اسف / الي قاهرني الي يعيرك بشي فيه...!

وابتسم بتعجب ساخر / يعني حلال عليك وحرام على ...!

بدر / لا والله غرهم ستر الله عليهم الله لا يبتلينا ...،

ثامر / اللهم لا تجعلنا ممن يستهزئ بعبادك ثم يبتلى ...،

ضحك ثامر / حنا شرقنا وغربنا بالسوالف وسالفتنا عن سعد...،

أردف / عمتي كيف تقول بتصير عائق وهي تعرف سعد ما ظنيت بتلقى أفضل منه لبنتها

بدر / وأكبر عائق...،

ثامر بتهكم / اما عاد...،

رفع يدييه يدعو /يارب تحيينا لليوم الي اشوف عمتي ترفض سعد...،

ضحك بدر / مستعجل ابوجلال يبي السنين تمر ...،

أردف / نبهتني حرمتي لها النقطة تقول عمتي لو تتزوج ريما او تخطب يمكن تموت ...،

ومحد بيوقف لسعد لو بعدين خطبها غيرها ...،

ثامر بعدم تصديق / عمتي مستودع اسراركم حتى العاطفية ما اصدق ...،

قاطعهم الأذان الأول نظر بدر لساعة هاتفه ...،

وقف ثامر / خل عنك الجوال تدور محارش بنت مساعد قم تجهز لصلاة ...،

ضحك بدر / ذكرتني افك الحظر من المسجد بطلع الرياض واعدها نروح لسوق وقلت ماني بجاي لسبت...،

.


.


.

على الطرف الآخر بعد صلاة الظهر في بيت الجد...،

في المطبخ دخلت سناء قادمة من بيتها ...،

طرقت باب المطبخ ...،

التفتت لها مضاوي / ما شاء الله توتس تجين متى رحتي بيتس نزلت ادورتس الصباح مالتس أثر ...،

خلعت سناء عبأتها وطرحتها / وش أسوي ما جاني النوم اتقلب ما صدقت جدي قام لصلاة الفجر طلعت له قلت وصلني...،

مضاوي / بالعكس غرفة جدتي النومة فيها مريحه لكن عشانكم ماتعودتو عليها ...،

سناء / تدرين ما نمت للحين نفضت بيتي نفض ما خليت شي واخذت شور وجيتس طيارة ...،

مضاوي تغرف السلطات بالصحون / حرتس من بدر افرغتيها بالشغل...،

سناء / الحمدلله يا بنت الحلال ماجا الصباح يمكن متذابحين الحين...؟

أحس بردت حرتي منه...،

مضاوي / ياحظتس ليت تعطيني قلبتس وتاخذين قلبي...،

ضحكت سناء / لا والله ما بي قلبتس قلب البعير راضية بقلبي الخبل يزعل بسرعة ويرضى بسرعة ...،

اشرت مضاوي للخادمات ان يرتبو الغداء بالمقلط ...،

سناء تستفسر بتهكم/ من في الداخل يا جميلتي ...؟

مضاوي وهي تغسل يديها وتخرج هاتفها من جيبها وبتهكم مماثل / كُل الحبايب يا عزيزتي ...،

ضحكت سناء / ازين شي سويتيه غطيتي شعرتس بطاقية ...،

انهت الخادمات ما أمرت به مضاوي واتصلت على الجد لتخبره ان الغداء جاهز...،

ارجعت هاتفها لجيبها وعدلت قبعتها لتستعد للخروج من المطبخ...،

مضاوي / خفت من الهوا توني ماخذه شور وماني فاضيه لتعليقات...،

خرجت مضاوي وسناء من المطبخ الي مجلس النساء...،

سلمت سناء على الموجودات وجلست بجانب والدتها وقريب منها جلست مضاوي...،

فزه بابتسامة حنو لسناء / وينتس من قبل أمس ماشفناتس ...؟!

ضحكت سناء وبمرح/ ليه ما تدرون عندي بيت مشغولة به ...،

شروق المتمددة بإرهاق / البارحة مالكم حس...،

وسيارة بدر ما هي فيه دق عليه محمد جواله مسكر...،

سناء / بدر عنده شغل وانا نمت هنا واكيد شحنه طافي...،

نواظر التفت لشروق بعطف/ الحمدلله سفرت اهلتس خلتنا نشوفتس ...،

شروق بضيق / أحس الدنيا خاليه ...،

فزه / ام بدر لها مكانها الله يرجعها بالسلامة ...،

رفعة / ما شاء الله ياقو قلبها كم سنة ما سافرت لأهلها وشافتهم ...،

نواظر / لو قلبها قوي ما انقطعت عن أهلها كل ها السنين ...،

فزه بعفوية / انا اهلي بالرياض وابطي ما اجيهم وامي الله يحفظها إذا بغتنا عيالي يجيبونها ...،

رفعة بنبرة تهكم / ما شاء الله عليتس ...،

انا ما أقدر لازم اهلي امرهم با الاسبوع مرتين...،

واخواني وامي بشكل يومي إذا ما دقو علي دقيت عليهم...،

نواظر بنبرة ساخرة/ عاد انتي ما شاء الله من مثل قلبتس...؟

على قولتس مثل قلب امتس تبكي للي ما تعرفه ...،

رفعة / وش نسوي بقلوبنا الرهيفة ...،

التفتت نواظر لفزه باستفهام / سعد وش فيه اليوم شفته ما اعجبني نحفان وماهو سعد الي أخبره عسى ماشر ...،

فزه بحيرة وضيق / الشر ما يجيتس مدري من وظيفته والا من هم دراسته...،

من انقبل يكمل دراسته والولد مدري وش جاه حتى العيشة عافاها ...،

نواظر بطمئنه / عادي يا بنت الحلال فترة لين ينظم وقته ويتعود وترجع ان شاء الله اموره عاديه ...،

فزه/ يارب كريم تيسرها له...،

وباستغراب / ام انور ما شفناها اليوم ما خلصت الاربعين ...،

نواظر / الا خلصت من الأربعاء الي فات بس تقول ما تبي تطلع بولدها وما تبي تتركه عند الشغالة...،

اردفت نواظر وهي تنظر لمضاوي با ابتسامة / بعدين ام جلال ماهي مقصرة الله لا يخلينا منها ...،

خلود باستهزاء / وينه ها الجلال شكل بيطول انتظاره ...؟

سناء / وش مستعجلين عليه ناس مشغولة بدراستها وماهم فاضين مسؤوليات ...،

العمر قدامهم ...،

رفعة بنبرة شماته / مهي سالفة وقت لمتى وأنتم داسين زعل مضاوي...؟!

بتكمل شهرين ما راحت لبيتها...،

وكل الناس داريه انها على وجه طلاق ...،

نواظر بغضب مكبوت / كل الازواج يختلفون ويوصلون لطلاق ويمكن يتطلقون ويتراجعون ما هو عيب ولا غريب ولاحرام ...،

لكن العيب ان اهل البيت يدورون الزلة على بعضهم ...،

التفت مضاوي لمنار با ابتسامة وكأن الموضوع لا يعنيها/ منار جعلني افداتس قهوينا مافيني شده من اليوم واقفه على الغدا ...،

وقفت منار وعيون والدتها واختها تكاد تقتلها...،

منار تجاهلت نظراتهم واخذت الدلة والفناجيل ...،

وابتسمت بمحبة / ابشري الكل فلل قهوة بقهويتس انتي وسناء ...،

وقفت بتول واخذت الدلة من منار وابتسمت لمضاوي/ خليها عنتس انا بقهوي الدكتورة مضاوي والشيخة سناء ...،

ضحكت منار وهي تعطيها الدله / مع ان مضاوي طلبتني با الاسم اقهوي بس يا الله خوذيها ...،

مضاوي بنبره جادة / طلبت من منار تقهوينا ما هو قصور لا فيها ولا بالموجودات لكن منار بنتنا وامون عليها ...،

وسما وبتول بنات الناس، حتى لو امهم عاصفيه وغلاهن من غلاها ...،

لكن في اشياء الواحد لازم يمسك بريك عندها ما يتعداها ...،

رفعة بنبرة تحدي / ان كان المقصود بكلامتس انا ترى ماجبت شي من عندي ولا قلت لرجلتس يطردتس من بيتس...،

وبسخرية امالت فمها / وان كنتي سامعه اني قايله شي ترى ماقلت الا الي سمعته لا ظلمتس ولا بهتس ...،

وبتحدي / وان كاني كاذبه قولي قدامي يا ام ماجد تراتس تكذبين ...،

خلودبا استهزاء / هذا طلب طلاق مستحيل بيتخبى الي يكشف ان اختياره غلط ما هو عيب انه يصلحه ...،

نواظر التفتت لبناتها وباامر اشارت بيدها / بتول اتركي الدله وانتي والبنات روحوا لصالة اجلسوا والا اطلعوا لغرفتي فوق ...،

امتثلوا البنات لأمر نواظر وخرجوا ...،

نواظر با انفعال وبنبرة حادة / المواضيع هذي عيب تنفتح قدام بناتنا المراهقات...،

ترسخ بروسهن أفكار حنا وهم في غنى عنها وتصير الحياة الزوجية مالها قدسية عندهم ولا اعتبارات...،

التفتت لخلود با نتقاد لاذع /ابوي هو الي اختار مضاوي لثامر...،

انولدت باليوم الي دخل علينا جاي من خواله وقال قدامنا كلنا...،

ان عطانا الله عمر ان شاء الله ان بنت حزام لولد جلال ...،

اشارت بيدها / ترى كلكم يا الأربعة اعماركم متقاربه ما في فرق انتي ومضاوي وشروق وسناء يعني اختياره غلط ...،

رفعة بمدافعة / خلود ما قصدها وانتي جيتي من اقصاتس يم عبدالله ...،

التفت مضاوي لنواظر / عميمه الله يحييتس لا تعصبين تراه نقاش عادي ماهو مستدعي نرفزتس...،

وبسخرية نظرت لرفعة / انا ما كذبتس ولا قلت تكذبين لكن روحي صححي لمصادرتس ...،

تراهم غلطانين خليهم يتثبتون العلم قبل يجيبونه لتس...،

وأشارت با اندفاع بيدها بأربع أصابع / انا لي أربع شهور ما هو شهرين زعلانة وطالبه الطلاق...،

نظرت لخلود با احتقار وتهكم / لكن متفقه مع رجلي إذا لقيت له البديل الأفضل بنتطلق...،

شروق المتمددة ويدها تحت راسها تضحك / اجل ولد عمي بيبطي مالقى بديل لا والله ارجعي ازين لتس ...،

ابتسمت نواظر لشروق / خير الكلام ما قل ودل عطتكم بنت فهد الجواب ...،

فتحت سناء رسالة واتس وارت الشاشة مضاوي التي تجلس بجانبها...،

ابتسمت مضاوي وبهمس / اكيد جالس يتغدا ...،

ضحكت سناء وبهمس مماثل / مرسل الموقع اعتذار شوفيني قريب ...،

نادت مضاوي نواظر / عميمه كلمي أحد من العيال شوفي خلصوا الغدا...،

نظرت خلود لوالدتها وابتسمت بشماتة فهمتها سناء ...،

وقفت سناء / عمه ارتاحي انا بكلم بدر ...،


.

.

.


خرجت سناء للمطبخ ...،

وارسلت رسالة لبدر (انت وينك)

وجلست على كرسي تنتظر الرد ...،

وصلها الرد بعد دقيقتين (بالمقلط على الغدا)

ارسلت (إذا خلصتو أرسل لي عشان غدا الحريم)

أرسل (ابشري وفيس قلب)

دخلت شروق ومضاوي للمطبخ ...،

جلست شروق على أقرب كرسي وابتسمت / وش فيتس شاقة حلقتس تضحكين ...،

ضحكت مضاوي / اكيد ورى الضحكة بدر ...،

سناء / أي والله ماقولتس قلبي خبل ...،

شروق با استفهام / وش فيكم لا يكون متهاوشين ...؟

ابتسمت سناء / هوشة صغييرة وطاح الحطب...،

ابتسمت مضاوي بممازحة / قلبتس فارغ موبس خبل ...،

شروق تضحك / كل الحريم قلوبهن فارغة من جهة ازواجهن انا فيني زهايمر من جهة طلال نتهاوش على شي ...،

من ينسى الهوشة انساها معاه ابي اتذكر وش تهاوشنا عليه تنمسح الذاكرة ...!

شروق با استغراب / وش بلا جبهة خلود زرقا من صابخها ...؟

مضاوي/ سألتهن عمتي نواظر ...،

قالت أمها متروعه وطايحة يوم كشتتكم...،

سناء / اسمعها يوم كنا بالمخيم قالت لأمها طحت بطنب الخيمة بس ما توقعتها كذا ...،

أرسل بدر لسناء ان الرجال انتهو من الغداء...،


.


.


.


على الجانب الآخر في مشب الجد ...،

سلطان / يبه ما كلمك فهد...،

الجد / الا الفجر يقول خلصوا عمرة وراجعين للفندق يمشون بعد صلاة الجمعة للمدينة ...،

فيصل / ياشين بيتنا عقب سفر امي وابوي...،

وبتذمر / مدري متى تخلص أجازة ابوي...،

محمد/ انا أمس ما عرفت انام جننت شروق كل شوي ناط لها...،

مساعد / انت عاد يا محمد ما تعودت تبعد مثل بدر وفيصل ما تنلام ...،

خالد / والله كلنا فاقدين عمي فهد وثامر...،

الجد ينتهد / انا اشهد...،

ضحك ماجد / طالعة من القلب ياجدي ...،

الجد بمودة وعطف ابتسم / كلكم غالين...،

بدر / أمس مريت ثامر يسلم عليكم ...،

محمد / البارحة ما شفت سيارتك اثاريك عنده ليت علمتني رحت معك ...،

بدر / ماني مخطط لها جت كذا ...،

الجد / وشلون اموره...،

بدر / ما عليه طيب غرقان بها المذاكرة الله يعينه ...،

خالد / ما يمر ها الاسبوع ...،

فواز/ كلمته أمس قلت تجي ها الاسبوع يقول ما عندي وقت احك راسي مشغول وإذا جا عمي من السفر جيت اشوفه ...،

التفت الجد لسعد / ليه ما تغديت يا سعد...،

سعد / افطرت متأخر ...،

مساعد با انفعال / وأمس ما تعشيت بعد تغديت متأخر ...،

سلطان / وش فيك طرت فيه ما تاكل غير النفس ...،

مساعد بوجع وحيرة يشير لأبنه / ما تشوفونه ما عاد بقى منه الا جلد لام عظامه...،

بدر / الحمدلله دام تحاليله كلها كويسه يمكن ضغط عمل مأثر عليه نفسيته ...،

مساعد / الاسبوع الي فات شفت بالشارع الي ورانا ارض للبيع كلمت راعيها ...،

والحمدلله ما بيعت موجودة للحين ...،

قاطعه سلطان با استفهام / قصدك الأرض الي جنب ابوبجاد...،

مساعد يهز رأسه بتأكيد/ اي هي...،

سلطان/ وش تبي فيها بيتك ما شاء الله كبير وهذيك انا شفتها صغيرة وبعيدة عن بيتك إذا تبيها مجالس...،

التفت مساعد لسلطان / ابيها لسعد من أخلص اجراءاتها ببدا اعمرها ...،

نظر لسعد / بزوجه نبي نداوي علته الي مالقتها التحاليل...،

شعر سعد ان ما نطق به والده كالسوط على وجهه ولم يعلم بما يجيب لا اعتراض ولا موافقة ...!

الجد بفرح / اي بالله راي طيب وش عاد ينتظر ...،

بدر الذي لاحظ اسوداد وجه سعد اراد ان يطمئنه ان كلام عمه تنفيذه يتطلب وقت طويل ولا يستعدي منه ردت فعله هذي...،

نظر لعمه / يبي لك اقل شي سنة على ما تخلص العمارة وبالوقت هذا يمدي سعد جاه تعيين ...،

مساعد / ما نقلناهم هم عرسه ولاهم عيشته الحمدلله الخير واجد...،

بدر الذي كان يجلس بجانب جده همس له / جدي هد الوضع تكفى ...،

الجد الذي لاحظ التوتر في وجه سعد قبل ان يتكلم بدر / اجل على بركة الله انت اشتغل على بيت سعد...،

وانا بوصي البنات يشوفن له من البيوت الطيبة ...،

اعتدل الجد في جلسته بعد ان كان متكئ وضرب على صدره / حرمة سعد عندي لا تشل همها ...،

التفت مساعد لسعد وبتحذير / هذا انت سمعت الكلام...،

معك لين أخلص بيتك تدور انت وابوي لك حرمه...،

سعد الذي تنفس الصعداء بعد هذا التوتر / ابشر يبه مالك الا الي يرضيك...،

وقف سعد ليغادر المجلس...،

سلطان / وين بغيت تو الوقت...،

سعد / فيني نوم ما عاد اشوف من الفجر صاحي ...،

مساعد بانفعال / من الفجر والا ما نمت خير شر ...،

قاطعهم ماجد استأذن واخذ بيد سعد وخرجوا ...،

الجد التفت لمساعد بملامة / انت وش فيك عليه واقف بحلقه ...،

مساعد / انا الي واقف بحلقة والا هو الي ذبل حاله ومهو حاس بنفسه ...،

أردف مساعد بنبرة حزينة / يعني هو جايز لي اني اضغط على سعد والا اكدر خاطره ...،

وبعطف ابوي / سعد الي ما عمره رد لي كلمه ولا كدر خاطري ...،

فواز بممازحة / قام حظك يا سعد ابوي تزهل البيت وجدي عليه العروس وحنا لنا الله ...،

مساعد / ليته مثل لسانك السليط كان ما شليت همه...،

بدر بمودة / انتبه لصحتك يا عمي انت مع سكر وضغط ...،

أردف / علمت سعد بلي عندك وهو ما هو مخالفك ان شاء الله ...،

زفر مساعد با الم / الله يفرجها يابوك على هالولد ويرده رداً جميل ...،

.


.


.

خارج بيت الجد...،

سعد وماجد يمشون متجهين لبيوتهم ...،

ماجد /لا تلوم عمي وضعك ما عاد ينسكت عنه...،

وبحيرة / العمى يشوف ان فيك عله ...؟!

سعد بإرهاق / خلاص يا ماجد تعبت تعيدون وتزيدون كلكم نفس السالفة...،

زفر بتأفف / ما فيني شي يا ابن الحلال ...،

امسك ماجد بيد سعد بلطف / ما اصدق لو تحلف من اليوم لبكرة...؟

انت تمر بشي وشي خطير علمني يمكن نلقى حل...؟

ابتسم بود / وهمومك إذا شاركتها مع اهلك تخف عنك...،

سعد وهو يعض على شفتيه بضيق / الله يعين ...،

ماجد / أدرى مهما ضغطت عليك ما راح تقول شي...،

لكن تعرف جوالي وتدل بيتنا إذا حسيت نفسك ودك تفضفض انا ماجد اخوك الي انت خابره ...،

وضع سعد يده على كتف ماجد/ عساك ذخر يبو سلطان أدرى ما تقصر...،

ابتسم ماجد / ابشر والله بلي ما يتركك لو على رقبته ...،

تفرقا سعد وماجد امام بيوتهم...،


.


.


.


في نفس اليوم بعد صلاة العشاء في بيت سعاد ...،

نواظر با انفعال / سعاد انتي ما تشوفين وش يسون البنات بولدتس ...؟!

ضحكت سعاد / ما عليه هذا رجال يتحمل...،

مضاوي بممازحة مرحه / عمتي من الحين تبي جخيدم يعتمد على نفسه ...،

نواظر التفتت لمضاوي / وانتو للحين معلقين على اسم جخيدم اسمه ثامر...!

ريما وهي تلاعب الصغير الذي تمسك به سما / بالعكس خالتي اسم جخيدم احلى عليه ...،

بتول تمد يدها لسما / دوري من جلسنا وهو معاتس...،

مدت سما الصغير لبتول...،

سما بممازحة/ خالتي ولدتس واضح بيصير وسيم على سميه ثامر...،

ريما بتقزز/ من زينه الدفش والله جخدومي احلى منه...،

أشارت سعاد لريما / خلي عنتس لحم ها المسلم وخوذي الزمزميات هذي للمطبخ...،

وقولي لصوفيا تزين قهوة جديدة وشوفي الحلى الي صلحته العصر جيبيه ...،

ريما بتهكم / ما شاء الله كل ها الطلبات على شان قلت ولد اخوتس دفش ...،

غادرت ريما ووقفت امام الباب وتعد با اصبعها بقهر وحنق / شفتي ولد اخوتس هذا دفش ودب ومريض ...،

ومضاوي أحلى منه ومن وجهه ألف مره ...،

امالت فمها با اشمئزاز / من زين وجهه ...،

سعاد تكتم ضحكتها / انتي روحي سوي الي قلت لتس وخلي ولد أخوي بحاله...،

سما تضحك / والله ياريما حاقده من قلب...،

بتول تضحك وتضع الصغير بحضنها / مضاوي بطلبتس طلب تحققينه لي...،

مضاوي ضنت ان بتول ستطلب منها ان تقنع والدتها ان تقص شعرها مثلها ...،

بعد ان رأته لأول مره عندما دخلت عليهم قبل قليل وانتقدتها نواظر واعجبت هي فيه ...،

مضاوي وهي تلتفت لنواظر / ابشري الله يسهل الأمور ...،

بتول بنظرة رجاء / ابي تحققين لي ها الأمنية قبل اموت اشوف بنتكم انتي وثامر كيف شكلها ...؟!

اردفت بتول / تكفين احسها بتكون ملاك...،

ابتسمت مضاوي/ كان ودي والله احقق لتس هالأمنية لكن يا للأسف انها من الاماني المستحيلة دوري غيرها احققها لتس ...،

نواظر بأسى/ إذا كتب لتس ربي شوفتها بتشوفينها ...،

مضاوي تجاهلت تعليق نواظر والتفتت لسعاد/ جدي فاقدتس ما عاد لتس عذر خلصتي الاربعين خلاص...،

وبود ابتسمت / اليوم ياحياتي يحسب لتس من ولدتي كم يوم ...،

سعاد / انشغلت عن غدا اليوم ما هو قصد الأربعين بكرة زميلاتي بيجون ولازم أرتب لزيارتهم ...،

اردفت / ليت ابوي جا معاكن...،

نواظر / حسيته اليوم متضايق من شي ...،

طلبته يجي معانا قال بنام انتو روحو تونسو...،

سعاد بخوف / قستو الضغط شفتو السكر كيف ...،

مضاوي / شفتها كلها الحمدلله معدلها طبيعي السكر والضغط ...،

سعاد / يمكن فاقد أبو بدر...،

نواظر / يعني اول مره فهد يسافر هو الوحيد الي ما يجلس كل ما ترقى نقل لمنطقة ...،

مضاوي / لا جدي أتوقع متضايق من شي ثاني ...؟

نواظر / ما صار شي اليوم يضايق قبل صلاة الظهر متقهوية معه ما فيه شي ...،

مضاوي / مريته بعد ماطلعتي لقيت عشاه زي ما حطيتيه ما اكل شي منه...!

سألته بشوف وش فيه يقول عمي مساعد ما هو مرتاح من سعد واليوم عصب عليه ...،

سعاد / وهو توه بعصبية مساعد يثور شوي وعقبها يهدى ...،

نواظر / لا يا سعاد فعلن الولد فيه شي مو طبيعي...،

يعلمني مساعد يقول كل تحاليله سليمة...،

مضاوي / على شان كذا عمي يقول حل الي فيه الزواج ومصر يزوج سعد...،

التفت الجميع على صوت من جهة الباب ...،

قفزت سما بسرعة تحذر ريما/انتبهي تتحركين الأرض كلها شظايا وراك وقدامك ...،

وقف الجميع من الصدمة...،

سعاد نادت خادمتها وخادمة نواظر وقامو بتنظيف المكان...،

امسكت سعاد بيد ريما واجلستها على أقرب كرسي...،

سعاد بخوف / بسم الله عليتس وش فيتس ...؟

ريما بذهول / مدري صدري اوجعني...،

سعاد التفت لمضاوي بخوف ...؟؟؟!!

تقدمت مضاوي من ريما تجس نبض يد ريما / نبضها طبيعي...،

اردفت / تحسين راستس يعورتس فيتس دوخة ...،

ريما تمسك صدرها /بس قلبي أحس مدري وش فيه...؟!

مضاوي تمسك كتف ريما الايسر وذراعها / طيب تحسين بوجع هنا ...،

ريما تهز راسها با النفي...،

نواظر اعطتها كوب ماء / سمي بالله واشربي يمكن ارهاق او سهر...،

بكت سعاد / انا بنتي من طلعنا للبر ماهي طبيعية...؟!

غرقت عيون ريما بالدموع من بكاء والدتها ...،

سما / خالتي عادي انا كذا واسألي امي دايم تجيني ها لحاله وقت الامتحانات ...،

نواظر تهز راسها بتصديق / الي في بنتس ارهاق يا بنت الحلال واحنا فترة امتحانات شهريه اكيد ما تنام كويس...،

التفتت لريما / صح ريما ...،

ريما تهز رأسها بموافقة لطمئنت والدتها ...،

قاطعهم رنين هاتف نواظر...،

نواظر / هذا شايد اكيد عند الباب بنمشي ...،

سعاد تمسح دموعها / تو الوقت ماجت الساعة تسعه ...،

ردت نواظر على هاتفها كان زوجها وابنها عند الباب ...،

بتول تضع الصغير في سريره / خالتي ما تعرفين ابوي وقت الامتحانات ينومنا مثل الدجاج ...،

نواظر / عبودي بينزل يسلم عليتس ...،

والتفت لبناتها / وانتو بسرعة قدامي لا تتأخرون...،

مضاوي با ابتسامة ود / من زمان عنه بطلع مع أسلم عليه ...،

سما تضحك / مضاوي تغطي عنه تراه ينبسط يحس نفسه كبر...،

نواظر تضرب سما على كتفها بخفه / وهو رجال الحين خلاص دخل المتوسط ...،

بتول تربط نقابها بتهكم / غصب مسوينه رجال انتي وبابا ...،

والا لو على كيفه كان يلعب الحين مع ثامر الصغير ...،

خرجت نواظر وبناتها وتبعتها سعاد ومضاوي لسلام على ابن نواظر...،

سلموا وعادو...،

دخلت مضاوي وتبعتها سعاد الي الصالة...،

مضاوي بمودة وعطف / يا قلبي عليه كبران بسم الله عليه...،

ضحكت سعاد / مت ضحك يوم ما مد يده لتس يسلم ...،

مضاوي / الله يخليه لهم عمتي تحسينها غصب تبي تكبره ...،

سعاد بشفقه / تلومينها ما عندها غيره وشايد ازود منها ...،

تقول من دخل المتوسط وهو معه ما يفكه متصادقين ...،

مضاوي التي تجلس بجانب ريما / وهذا المفروض إذا كبر ولدك خاوه خصوص بزمانا هذا...،

التفتت لريما / شلونتس الحين تحسين نفستس احسن ...،

ريما تهز راسها / الحمد لله ...،

سعاد / روحي غيري ونامي ...،

ارتاحي شكل صدق الي فيتس ارهاق...،

وقفت ريما وغادرت الصالة...،

التفت سعاد لمضاوي وبقلق / ابيتس تاخذينها معاتس الاحد تشوفين وش قصتها ...؟

وضعها بدا يقلقني...!!

مضاوي / المختبر مايقفل الي الساعة اربعة العصر خليها تجي من تطلع من المدرسة ما يحتاج تغيب...،

سعاد / الحمدلله ابوها ما عنده دوام هالأسبوع مع اني ما اعتمد عليه اخاف عليها ...،

مضاوي با انفعال /خليها تعتمد شوي على نفسها تراها ما شاء الله حرمه...،

يوم ولدتي من كان ماسك بيتس غيرها...؟

ويوم رجعتي كيف شفتيه...؟

اردفت با استفسار / احسن من يوم انتي فيه صح والا نا غلطانة...،

وبملامة /عمة وش فيتس وش صار لتس انتي الي كل العاصف كبيرها وصغيرها اذا ضاقت ركضو عليتس...،

سعاد/ ما أدري يا مضاوي انا عند ريما ينطمس مخي...!

مضاوي با استنكار / كيف ينطمس مختس ...؟!

ريما خلاص كبرت كم سنة تنفصل عنتس تتزوج وتصير لها حياتها...،

سعاد بذعر / وانا وش يصير بحالي ان راحت بنتي وخلتني ...،

مضاوي با استفهام ساخر / وش بيصير يعني...؟

تعيشين زي ما عاشت امتس وخالتي فزه وعمتي نورة شفتيهم ماتو جاهم شي ...،

سعاد / لا ريما مهي مثل سناء وشروق ...،

مضاوي باستهزاء / وليه ان شاء الله مهي مثلهن والله انها اذكى وأكبر عقل منهن بعد...،

سعاد بارتباك / بنتي ما ازوجها لين هي تطلب الزواج بنفسها...،

للحين صغيرة ...،

هزت مضاوي رأٍسها بأسف /المشكلة مهي في الزواج ...،

الزواج قسمة ونصيب ما تدرين هي تتزوج اوما يكتب لها زواج المشكلة بتفكيرتس ...،

لازم تأقلمين عقلتس انها انسان لازم يكون له كيانه الخاص...،

خليها تعتمد على نفسها البنت الفرن ما تولعه تخاف ...،

قاطعتها سعاد بهلع / وش تولعه تبينها تحرق نفسها...،

مضاوي ترفع راسها لسماء بقهر / الله يلهمني الصبر لأصرخ صرخة يسمعون صداها قنانيص الربع الخالي...،

اردفت وهي تكتم غيظها/ البنت انتي محملتها مسؤولية بيتس كله...،

مضاوي تعد على اصابعها / غسيل تنظيف حتى الكوي يدها قبل يد الشغالة مقاضي بيتس قدامي ترسلها لتس من جوالها...،

وتأشر على الطفل النائم / حتى ها الضعيف تشيل وتحط فيه ماسمعتس قلتي شي واثقه انه معها ما راح يجيه شي...،

جت على النار يعني...!

عطي ريما الثقه وخفي عليها شوي...،

وقفت مضاوي لتغادر ...،

سعاد / اجلسي تو الوقت بكرة مافي دوام...،

مضاوي وهي ترتدي نقابها / بروح اشوف جدي وعندي بحوث مطلوبة يكفي الغياب الي غبتة من غير اصابة أصبعي ...،

ما أقدر اطول اكتب لا على الاب توب ولا بيدي...،

من ردات حظي الاصابة بيدي الي اكتب فيها...؟!

سعاد / لا تنسين بكرة تجين ...،

مضاوي بتأفف وتذمر/ إذا رفعة بتجي فكيني خلي مخي يرتاح من مقابل وجها ...،

سعاد / ارسلت لها مجبورة تبين سلطان وخالتي ام عبد اللطيف يزعلون...،

مشت مضاوي ومعها سعاد توصلها للباب / وام عبد اللطيف مهي زعلانه ولا تمركم وش تبي بعد...،

سعاد / خليها على الله محد هز شخصية ولدها غيرها ...،

مضاوي تهز راسها وتضحك / خوذي درس منها ولا تعيدين سوالفها ...،

اردفت / كلمي سوناتي تفتح الباب نسيت جوالي...،

.



.


.

دخلت مضاوي الي بيت الجد ...،

تطمنت على الجد انه نائم وصعدت الي غرفتها ...،

غيرت لبسها توضئت وصلت الوتر وقرأت وردها ...،

جلست على الاريكة التي اصبحت مكانها المعتاد ...،

امامها الاب توب وبجانبها حقيبة الدوام...،

احست الم بمعدتها توترت اليوم كثيرا بدئن برفعة وخلود ومن ثم مناقشتها مع سعاد...،

ارادت الاتصال بالخادمة لا تعلم اين هاتفها بحثت عنه وجدته على السرير ملقى ...،

اخذته لتتصل وجدت مكالمات رسائل سناب واتس ...،

اتصلت بالخادمة لتحضر لها الحليب ...،

وتمددت على السرير ...،

يوجد لسناء أكثر من عشرين اتصال...،

اعادة الاتصال بسناء / نعم يا مزعجة ...،

سناء / بدري ماشاء الله توتس تردين...،

مضاوي / كنت عند عمتي وجوالي نسيته بغرفتي ...،

سناء / طلعت لسوق وقلت بمرتس إذا خلصت...،

مارديتي ورجعت لبيتي...،

مضاوي تتثاءب / تقهوينا عند عمتي والحين بنام لا تنسين بكرة قهوة عمتي...،

سناء / خلاص اجل امرتس ونروح مع بعض...،

مضاوي / بروح متأخرة شوفة رفعه وبنتها صايرة تغثني ...،

سناء تضحك / لا يكون متوحمة على رفعه وبنتها...،

مضاوي / اقول فكينا من غيبتهن اخر ها الليل وخليني انام الاحد وراي بحوث ما مسكتها ...،

اغلقت الخط مضاوي فتحت تطبيق الواتس ودخلت الي الحالات ثامر لا يوجد مازال يحظر رقمها...،

حالات معن جميعها ادعيه لأمه او يطلب الدعاء لها بالشفاء ...،

احست بضيق في صدرها خرجت من التطبيق...،

وألم في ظهرها ربما موعد الدورة الشهرية ...،

فتحت تطبيق صحتي دورتها تتأخر كل شهر يومان او ثلاثة ومن المفروض ان يكون موعدها با الامس...،

احضرت الخادمة الحليب الساخن أمرتها ان تضعه على الكمودينة...،

شربت الحليب ولم تستطع مقاومة النوم ونامت...،

.


.


.


في اليوم التالي بعد العشاء...،

مضاوي لم تخرج من غرفتها الا للاطمئنان على الجد قضت يومها ...،

بين النوم وكتابة البحوث ومراجعة تقارير حالات فحصتها قاطع اندماجها رنين هاتفها ...،

سعاد / وينتس من اليوم ننتظرتس ...؟

نظرت مضاوي لساعتها / هلا عميمه ما حسيت بالوقت خلصت شغل متراكم علي...،

سعاد / ام شامخ عندي تقول وينها بنسلم قبل نمشي ...،

مضاوي / عندتس بس ام شامخ ...؟

سعاد / ما في الاهي وام جاسر وسناء جت قبل شوي...،

مضاوي / خلاص باخذ دش على الطاير وجايه ...،

بعد ربع ساعة في بيت سعاد...،

تدخل مضاوي لمجلس النساء...،

سعاد بابتسامة مرحه / هذي مضاوي الي اتغلى عليكم...،

ام شامخ تقف وتسلم ببشاشة/ ما شاء الله الحلو مسموح له يتغلى...،

سلمت مضاوي ووصلت لأم جاسر سلمت عليها وجلست قريبة منها ...،

ام جاسر بابتسامة / مابغينا نشوفك...؟

مضاوي / عندي شغل لدوامي واخذني الوقت...،

ضحكت ام جاسر بممازحة / قولي اشغلني العريس الدوام ما هو عذر...؟!

التفتت لسعاد / انا ماخذه على خاطري منك يا ام أنور...!؟

سعاد با استغراب وتعجب / ليه يام جاسر والله ان خاطرتس غالي عندنا...!

التفت ام جاسر لمضاوي / ليش ماعزمتونا على زواجها...؟

اشارت لسناء / قلت لك يوم زواج الحلوة هذي اعزميني يمكن القى لولدي عروسة ...،

الصدمة الجمت جميع الموجودات سعاد وسناء وام شامخ ومضاوي...،

قطع الصمت سناء / ام جاسرالله يحفظتس هذي متزوجة من العام وكان زواجها عائلي...،

عقدت ام جاسر حاجبيها ونظرت لمضاوي التي تحول وجهها للون الأحمر من الصدمة...؟؟!!

ابتسمت ام جاسر بنبرة متلعثمة / ما شاء الله بنات كثير ما يوضح عليهم انهم متزوجات...!!

سعاد انتبهت لمضاوي التي ذابت في مكانها من الخوف والاحراج ...،

وبممازحة /الحين تشوف نفسها على ولد أخوي لا تكبرين راسها ...،

ام شامخ / بسم الله عليها تستاهل خليها تشوف نفسها ...،

التفت ام شامخ لأم جاسر/ شرايج بقصة شعرها...؟

مو عاجبة سعاد ...!

ام جاسر / نفس طلب بنتي بس ما عرفو لها عاملاتكم خربتو شعر بنتي...،

ام شامخ تضحك وبممازحة مرحة / بنتج شعرها عرادة ومضاوي حرير...،

ضحكت ام جاسر/ صارت مشكلتنا التقليد يناسب ما يناسب ها البنات يبونه ...،

.


.


.

لا تلهكم الرواية عن الصلاة في وقتها

موعدنا القادم بأذن الله قريباً

تذكروني واحبابي بدعوه طيبه


(سبحانك اللهم وبحمدك، أشهد أن لا إله إلا أنت، أستغفرك اللهم، وأتوب إليك)