مرحبا يا جميلات اليوم بأذن الله تعالى بينزل "الفصل الحادي الأربعون "

كونوا با القرب


آرائكم تهمني

الفصل " الحادي والأربعون"

.


.


.


قبلها بساعة في بيت الجد دخلت سناء تبحث عن مضاوي ...،

رأت غرفة الجد مفتوحة ...،

وقفت أمام الباب وطرقته وابتسمت / السلام عليكم ...،

الجد أنهى صفحة القرآن التي وصل اليها واغلقه ووضعه جانبا...،

وانزل نظارة القراءة وببشاشة ابتسم / وعليكم السلام ورحمة الله ...،

دخلت وقبلت رأسه وجلست بجانبه ...،

سناء / وشلونك جدي عقب طلعت أمس...،

الجد وهو يقف / ما علي طيب تونسنا لوما روعتنا الريم...،

وقفت معه سناء ...،

الجد / امشي نروح لصالة ...،

أردف وهو يبتسم / والا المسيار ماهو لي لخويتس ...؟

ضحكت سناء / جعلني ما خلا منك حجة ًبحاجة ...،

جيت أسلم عليك واشوف ها اللي مختفية وتغلى علينا...!؟

الجد وهو يمشي متوجه لصالة ومعه سناء / ما دقيتي عليها قبل تجين ...؟

سناء / دقيت ما ترد قلت ما في الا الهجوم نشوف وش علتها...،

ضحك الجد / الله يقويتس اطلعي شوفيها بغرفتها توها جت من المستشفى تقول يدها توجعها ...،

صعدت سناء الي غرفة مضاوي ...،

.


.


.

على الجانب لأخر في بيت الجد ...،


غرفة مضاوي ...،


انهت مضاوي صلاة المغرب طوت سجادتها ...،

واخذت هاتفها الملقى على سريرها...،

اتصلت بالخادمة لتحضر لها شي تأكله من اجل المسكن ...،

وتوجهت للأريكة وجلست عليها تنتظر الخادمة وبيدها هاتفها...،

طرقت سناء الباب...،

مضاوي لم تقفل الباب وظنت ان من تطرق الباب هي الخادمة...؟

وضعت هاتفها بجانبها وإعادة لف الشرشف على رأسها / ادخلي الباب مفتوح ...،

دخلت سناء واسرعت اليها وجلست بجانبها...،

وبممازحة / الحمدلله لقيتس حيه...،

وضعت سناء يدها بعفوية على ذراع مضاوي...،

جفلت منها مضاوي وملامح الذعر تكسو وجهها ...؟!

نظرت لها سناء بقلق واستغراب/ بسم الله عليتس وش فيتس خفتي...؟!

وضعت يدها على ظهر مضاوي واردفت بخوف / جسمتس نار من ورى الشرشف...؟

تململت مضاوي بضيق وأزاحت يدها عن ظهرها / يابنت الحلال مافيني شي...،

نظرت لها سناء بقلق / من أمس ادق وارسل ما تردين ولا تفتحين الرسايل قلت بس هذي ماتت...؟

مضاوي بتذمر وامتعاض/ تطمنتي اني حيه مابي بلا خلاص يا الله توكلي على الله...،

سناء بقلق وخوف / مضاوي انتي فيتس شي وشي كبير...؟!

اول مره اشوف وجهتس كذا ...؟

اردفت بتردد / امتس جد شي جديد بوضعها...،

احضرت الخادمة صينية الاكل واحضرت طاولة خدمه صغيرة وضعتها امام مضاوي ووضعت عليها الاكل...،

اشارت لها مضاوي على كيس الدواء الموجود على الكمودينة ...،

والتفت لسناء / امي الله يشفيها ما أدرى عنها...؟

ولا سألت ولا حاولت اسأل ولا ابي اسأل...،

اردفت بتذمر/ في شي ثاني ...؟

سناء بتساؤل / طيب ليش رحتي المستشفى...؟

احست مضاوي با اختناق انزلت الشرشف على اكتافها لا إراديا...،

تفاجئت سناء من لون شعر مضاوي وبذهول ودهشه وضعت يدها عليه / متى صبغتيه...،

زفرت مضاوي بضيق وابعدت يد سناء بـتأفف / اوووف ابعدي يدتس راسي يوجعني...،

نظرت سناء ليد مضاوي المصابة ولفت نظرها احمرار ذراعها وانتبهت لذراعها الأخر...،

الاحمرار جديد وليس اثر ضرب العقال وبخوف وذهول / وش صاير عليتس...؟

نظرت لها بتفحص / ايديتس ورقبتس حمرا كن احد خانقتس ...،

نظرت ليدها بتفحص/ ومغيره جبس يدتس ومكبرته ...؟!

مضاوي قطعت طرف التوست ووضعتها بفمها بالكاد تبلعه وشربت من كوب العصير لتستطيع بلع قطعة التوست...،

مضاوي وعينها الي الكوب وببرود / مافي شي لبست بلوزة صوف وحسست بي...،

سناء بعدم تصديق / ماهي اثر حساسية هذي اثر مخوش ...؟!

اردفت بشك / انتي متضاربه مع احد ...،

مضاوي بتوتر حاولت تخفيه/ وش متضاربة ...،

حكيتها وتهيجت هذي كل السالفة...،

سناء / طيب اصبعتس المفروض الاسبوع الجاي تفكين جبيرته ليش كبرتيها...،

مضاوي بتأفف / أصبعي رحت مع مريم لسوق شلت اكياس ثقيلة اثرت عليه...،

التفتت لها وهي تمسك بحبة المسكن لتبتلعها / في استفسار ثاني ...،

غرقت عينا سناء بالدموع / مضاوي انا بعمري ما شفت مسحة الحزن الي على وجهتس الحين الا يوم ماتت جدتي ويوم جدي جته الجلطة الله لايعيدها ...؟!

اردفت وهي تحتضنها وتبكي / والله انه صاير شي وشي كبير...؟؟

ابتسمت مضاوي بالم / فكيني يالدبة والله كل عظم مني يصيح ...،

ابتعدت عنها سناء وهي تمسح دموعها بيدها / انتي ماوقفتي قدام المراية شفتي وجهتس...؟

الحمدلله ان شروق ماجت معي يمكن تسقط حملها من الصياح لو شافتس...،

وقفت مضاوي تدعي القوة واتجهت الي مرآة التسريحة / وش فيني طيبة وبخير لا ناقصه يد ولا رجل ...،

جلست على كرسي التسريحة واخذت مشط امامها تحاول تمريره على شعرها المفتوح والمبعثر...،

قامت اليها سناء واخذت المشط من يدها تريد ان تسرح شعرها ...،

وابتسمت / لا تصبغين ها للون مره ثانية...،

وبممازحة / بتخربين علينا بالمقارنات كل ما صبغنا...،

نظرت لها مضاوي بالمرآة وابتسمت ابتسامة جانبيه / ياساتر على المبالغة ...!!

اردفت / صبغته قلت بجرب وما اعجبني برجعه للاسود ...،

سناء / عادي خليه هو يطول وينزل من نفسه لا تحرقين شعرتس...،

وانتبهت للبقعة الممزوعة وبفرح / مضاوي في شعر طالع مره صغير مغطي الفراغات ...،

ابتسمت مضاوي بمجاملة / كويس ...،

سناء با اعجاب / تبارك الله شعرتس كثافته ونعومته تجنن...،

راحمتس ربي من صوت الاستشوار...،

جمعت شعر مضاوي على شكل ذيل حصان وبا اسف / لكن متى ها البقع يطول الشعر فيها ويلحق الباقي ...؟؟

مضاوي بتهكم/ إذا حلقت شعري على الزيرو...؟

ضحكت سناء / عاد هذا الي بقى ما شفتس فيه...؟!

اردفت وهي تعد على اصابعها / شفتس الحين با الأشقر وشفتس بالطويل ويوم خلصنا الثانوية قصيتيه الي اذانتس...،

ربطت سناء شعر مضاوي وابتعدت عنها وجلست على طرف السرير / تذكرين اول مره بغيتي تقصينه جدتي عيت ...،

وعمتي سعاد اقنعتها قالت خليها تقصه لا تجيها عين وهي مقبله على جامعة كل المدرسات يسولفون بشعرها ...،

ابتسمت مضاوي/ والله لا سولفو ولادرو عني لكن جننت عمتي ابي اقصة...،

سناء / تدرين كلنا استغربنا قصتك له وبذاك القصر بس والله خطيير...،

تنهدت مضاوي بضيق / كان موضة وقتها...،

ضحكت سناء بمرح / لذاك اليوم شروق تدعي ان حملها بنت وبيضا تقول بس خاطري اقصها بوي مثل مضاوي...،

قالت خالتي نورة ماهي جايه علابيها مثل مضاوي لا تأملين واجد...،

اغمضت مضاوي عيناها وتذكرت عندما عادت من عند امها بعد ذلك اليوم الرهيب...،

ورأت لأول مره شعر والدتها كان طويلا وأشقر مقارب للون الذي صبغت فيه شعرها...،

كان وقتها شعر مضاوي طويلا نسبياً...،

عندما رأت والدتها عرفت انها تشبهها الفرق كان لون الشعر فصممت على قصة ...،

لا تريد شيء منها يشبهها لا تريد هذا الشبه ...؟

حاولت مع الجدة فرفضت لجأت لعمتها سعاد بعذر انها تريد ان تغير شكلها قبل بداية العام الدراسي الجديد...،

وان الشعر القصير عملي أكثر...،

اقنعت سعاد والدتها بدعوى الخوف من العين والحسد...،

كانت مصره على قصه حتى وان رفضت الجدة ذلك...،

فسعاد تعرفها إذا قررت امر ستنفذه ولو عارضها جميع من في الأرض الا ان يشاء الله...،

قصته على مراحل حتى لا تفجع الجدة التي تكره الشعر القصير خلال ثلاث أشهر...،

كان الشعر الذي يصل الي نصف ظهرها قد وصل طوله الي فوق اذنيها...،

لا تريد أي شي يربطها فيها ولو استطاعت سلخ جلدها الذي كان كثيراً ما ينسب لونه لها لسلخته ...،

قاطع ذكرياتها صوت المؤذن ينادي لصلاة العشاء...،

وقفت بصمت من امام التسريحة وكأنها تجلس لوحدها...،

رمت شرشف الصلاة على جانب السرير ...،

ودخلت دورة المياه اخرجت سلة الملابس عند باب غرفتها ورجعت لدورة المياه...،

جلست فيها تريد الهروب من سناء فهو المكان الوحيد الذي لا تستطيع ان تدخله...،

ستجلس هنا حتى تمل وتخرج من غرفتها...،

لا تريد ان تسمع او ترى أحد حتى نفسها...،

عرفت سناء ان مضاوي تتهرب منها حتى وان تجاوبت معها في الكلام قبل قليل ...،

وقفت ولبست عبأتها ولفت طرحتها استعدادا للخروج...،

دخلت الخادمة لأخذ صينية العشاء ورأت سلة الملابس المتسخة بجانب الباب...،

رفعت العباءة وشهقت التفت لها سناء وذهبت لها امسكت العباءة تفحصتها ...،

وجدتها انها ممزقة بعنف من الامام...؟

عباءتها كانت ازارير من الأعلى ومغلقة من الصدر الي الأسفل...،

قطعت الازارير التي في اعلى الصدر ...،

ومشقوقة الي أسفل وشق بجانب أحد الاكمام...!

والمريب أكثر هو قوة رائحة العطر الملتصقة بالعباءة...؟!

عطر مضاوي تعرفه اشارت عليها في احدى المرات ان تغيره لعطر آخر فأخبرتها انه يعجبها كثيراً...،

امسكت بالعباءة وجلست على السرير وهي تنتفض من الرعب لا تعلم ماذا حدث او ماذا ستسمع من مضاوي...؟!

اشرت للخادمة ان تأخذ الاكل وتترك سلة الملابس وتخرج وترد الباب خلفها حتى تظن مضاوي انه ذهبت...،

توضئت مضاوي وسمعت صوت الباب توقعت انها ذهبت...،

خرجت فوجدت سناء تجلس على السرير وتحتضن عباءتها...!!

ووجها لا يفسر الا بوجه من أخبر بموعد موته...؟!!

وقفت سناء وفردت العباءة تريد تفسير...؟!

تجاهلتها مضاوي اخذت شرشف الصلاة وارتدته ...،

سناء برعب ورجاء حركت رأسها / تكفين لا تفجعيني...!؟

مضاوي وهي تقف على سجادة الصلاة ودون ان تلتفت لها / أدرى وش براستس ...،

شوفيني متوجهة للقبلة واحلف لتس وانا صادقة والله العظيم ما في شي من الي انتي خايفة منه...،

ولااحد مس شعره مني بالحرام...،

من انخلقت الي اليوم وان شاء الله لين اندفن تحت التراب ...،

اردفت باستفهام / الكلام هذا يطمنتس...؟

سناء جلست بعد الخوف الذي اذاب عظامها...،

مضاوي بنبرة جادة / سناء ما ابي أخلص صلاتي وانتي موجودة...

رفعت سناء رأسها لسماء / الحمدلله كل شي غير هذا يهون...،

ركضت احتضنت راس مضاوي وقبلته وقبل ان تخرج وضعت العباية داخل السلة خرجت واقفلت الباب خلفها...،

كبرت مضاوي وصلت العشاء...،

.

.

.

نزلت سناء ولم تجد سوى الخادمات...،

الجد كان قد ذهب للمسجد ...،

خرجت لبيت عمتها سعاد قبل ان تعود لبيتها تريد ان تسأل عن ريما بعد ما حصل بالأمس...،

دخلت بعد ان فتحت لها الخادمة واخبرتها انه لا يوجد سوى عمتها في الصالة ...،

سعاد ببشاشة وهي تضع صغيرها في سريرة / هلا وغلا وش ها النور الي طل علينا...،

جلست سناء بجانب سرير الصغير النائم وقبلته / ابد والله مريت جدي وشفت مضاوي وقلت با اختم الجولة عندكم ...،

اردفت / وين ريما وشلونها عقب أمس...؟

سعاد بحيرة /مدري عنها خاطرها ماش من جينا من المخيم الي خلتني اندم واتوب اطلع له...،

سناء بخوف / وش فيها...؟

سعاد / من أصبحنا ما اشوفها الا إذا ناديتها دقيقة توريني وجهها وترجع ...،

تعذر مره مذاكرة مره مصدعه مره تقول بطنها ممغوصة ...؟

سناء / عيالتس وابوهم وينهم...؟

سعاد / ابوهم طلع لشرقية من عقب المغرب لدوامه والعيال طلعوا للمسجد...،

وقفت سناء / بروح اشوفها ...،

ذهبت سناء لغرفة ريما وطرقت الباب...،

ريما / مين ...؟

سناء بممازحة/ افتحي حرامية تبي تخطفس...،

فتحت ريما الباب وهي تبتسم بخمول / الحرامي ما يقول انا حرامي يخطف الناس على طول...!

دخلت سناء لغرفة ريما وجلست / وش النور الكئيب هذا ما هو وقت حتى نوم...،

ولعت جميع اضواء الغرفة وجلست على سرير ريما ...،

سناء / وش فيتس تعبانة للحين خايفة من الي صار أمس...،

ريما بحيرة / خايفة وماني خايفة ...؟!

سناء / لغز هو الحمدلله جت سلامات وش يخوفتس ودرس لتس...،

في مكان غريب ما ابعد عن المجموعة الي انامعهم...،

وبعدين انتي اساسا خوافة بدون شي وخوفتس ماله ترى داعي...،

ريما / يعني تظنون أني ما احاول ابعد الخوف لكن ما قدرت ...،

أدري الي فيني ما هو طبيعي بس وش أسوي...؟

سناء / الي يحاول يبي ينجح ان شاء الله والي فيتس شي طبيعي كلنا نخاف...،

لكن انتي شوي تبالغين...،

وقفت سناء وسحبت يد ريما / لا تجلسين بالحالتس هنا وعمتي لحالها...،

إذا ماعندتس مذاكرة انزلي تقهوي سوي جو زي اول هبلتي فينا بالسناب تصورين...،

نظرت سناء لساعتها / انا وراي بيت والا كان جلست معكم...،

نزلو سناء وريما لسعاد التي كانت تجهز القهوة بالمطبخ...،

سناء بمرح/ ما شاء الله قهوة وحلى ووجه عمتي ام انور الي يجيب العافية...،

التفت لريما / وكل هذا عندتس وحابسة نفستس فوق...،

أمرت سعاد الخادمة باخذ صينية القهوة وريما اخذت صينية الحلى من والدتها وخرجوا الي الصالة ...،

جلسوا اخذت ريما دلة القهوة مدت فنجال لوالدتها وفنجال لسناء...،

نظرت سعاد لريما بحب / فقدتها اليوم...،

غيبتها عني ساعة احسها سنه ...،

التفتت سناء لريما / ياحظتس ياريما ليت كل الامهات مثل عمتي...،

ضحكت ريما...،

امسكت سعاد بوجه ريما وقبلت خدها بحنو/ عساني ما أفقد ها الضحكة ...،

قاطعهم رنين هاتف سناء ...،

سناء / هذا بدر يمكن الحين يفرمني عند بابكم ...،

ردت وهي تعض على شفتيها وتنفض يدها بتمثيل / هلا ابوفهد...،

بدر با انفعال / خلي ابوفهد على جنب انتي وين منجحرة...؟

جدي يقول مايدري وينتس كنتي فيه ورجع مالقاتس ...،

ضحكت سناء بتصنع / إذا انت عند باب جدي الباب الي قبالك على طول اتقهوى عند جخيدم ...،

بدر / اطلعي بسرعة ورانا بكرا دوامات...،

ضحكت سعاد / انزل تقهوى لا حق على الهوش...،

سناء / عمتي تقول تعال تقهوى...،

بدر / عشان عمتي بدخل...،

افتحوا انا عند الباب ...،

ذهبت الخادمة تفتح وريما حملت اخيها وخرجت من الصالة ...،

دخل بدر الي صالة عمته سلم وجلس ...،

سكبت له سناء فنجال قهوة وقدمت له صحن الحلى...،

بدر بممازحة / الظاهر ماتبيني اداوم بكرة مع ها القهوة...،

سعاد / يابن الحلال ادمنا صرنا نشربها وننام...،

بدر / وشلون ريما عقب خريعة أمس ...،

سعاد / والله خوفتني زين ما انجلطت وحتى اليوم من اصبحت مهي معنا حابسة نفسها بغرفتها...،

التفتت لسناء / غير حرمتك الله يجزاها خير راحت لها ونزلت معها...،

ضحك بدر وبمرح / انا ما أدري يا العاصف لو اهاجر انا وحرمتي وش بيصير عليكم عقبي...،

سناء / ماصاير غير الخير بيلقون بديل...،

ضحكت سعاد / بسم الله عليكم والله مالكم بديل...،

استأذن بدر وسناء وتوجهو الي بيتهم...،


.


.


.


وصل ثامر الي مطار جده ...،

اتصل بالجد وأخبره بوصوله بالسلامة وأرسل رسالة لبدر...،

انه وصل وينتظر اخبار مضاوي منه ...،


.


.


.



في مكان اخر بعد صلاة العشاء ...،

بيت مساعد...،

دخل سعد ومعه اكياس سلم وجلس وضعها بجانبه...،

مساعد / ما مريت جدك اليوم...؟

سعد / لاوالله كنت ناوي بس انشغلت...،

بكره ان شاء الله امره...،

فزه / وش شغلك ما شفتك طلعت من البيت...؟

ابتسم سعد لوالدته / يا ميمتي جعل عمرتس طويل شغلي على النت ماهو برا...،

فزه / وعمرك...،

التفتت للأكياس التي بجانبه / وش هالأكياس...،

امسكها ومدها لوالدته / سهى تبي اغراض من البقالة ومريت جبتها لها وشريت لشغالة معها...،

فزه بمودة / الله يجزاك خير تذكرت الشغالة...،

نادت فزه الخادمة واعطتها كيسها وماطلبته سهى...،

مساعد / الله يفرحك ويدخل السرور لقلبك مثل مافرحتها...،

ابتسم سعد / امين...،

نهض سعد ليغادر المكان...،

مساعد / وين تبي...؟

سعد / بروح انسدح بغرفتي ...،

مساعد / تو الوقت تعش ورح نم...،

هز سعد رأسه / مالي نفس...،

فزه بتأفف وتذمر / وش مالك نفس لا فطور ولا غدا مثل الناس انا مدري شلون حتى تمشي...،

ابتسم سعد بوهن / ماتاكل غير النفس وانا مالي نفس إذا جعت اقعدتس لو انتي نايمة...،

مساعد بتهكم / ومحد يقعد امك وهي نايمة غير انت...،

أردف / والله لو تموت جوع ماتسويها تعلمني فيك...،

سعد امسك رأسه وجلس على أقرب كنبة...،

ركضا والداه اليه بفزع ...،

فزه تمسك وجهه / بسم الله عليك وش فيك وش تحس به...،

امسك مساعد بيده والتفت لفزه بذعر / يده تنتفض...،

ابتسم سعد ليطمئنهم /والله مافيني شي وش فيكم صداع خفيف ويروح ان شاء الله...،

وقف مساعد / انا الي بوديك للمستشفى انت ما عاد ينسكت عنك...،

سعد / ماله داعي المستشفى...،

أردف / يمكن عشان ما اكلت بتعشى واخذ بنادول وان شاء الله اني طيب...،

ذهبت فزه للمطبخ واسرعت بغرف عشاء له كان جاهزاً، ولكن تنتظر ان تجتمع عائلتها...،

رجعت وخلفها الخادمة تحمل الصينية أمرتها ان تضعها على طاولة الخدمة وسحبت الطاولة امامة ...،

فزه / يا الله مديدك...،

رفع سعد نظره وابتسم / طيب خلوني اغسل يدي...،

قام وهو يتحامل على نفسه غسل يديه ورجع...،

ومازال والداه واقفين...،

سعد / طيب اجلسوا شاركوني ...،

مساعد بنبرة غاضبة وانفعال / انت كل ما عليك منا ...،

فزه / شوي وتذوب روحك من الجوع وما انت حاس ...!

سعد كان يضع اللقمة في فمه ويبلعها بالماء ارضاء لوالدية...،

نفض يديه من الاكل / الحمدلله هذا انا طيب اجلسوا ...،

جلس مساعد واشر بيده له بتهديد / بكرة ما تقول يدك لها غيار...،

نظر سعد ليده / اي بكرا اخر شي ...،

مساعد / اخر اول ماهو مهم المهم بكرة تسوي التحاليل شاملة وإذا نزلت بالتطبيق صورها وأرسلها لي...،

والا والله ياسعد اني جايك للمدرسة وما خذك معي كنك بزر يفحصونك...،

أشر سعد على عيناه / ابشر من العين هذي قبل هذي...،

وقف وابتسم / يا الله عاد بروح أكمل شغلي تبون شي ثاني ...،

مساعد / حافظك الله ...،

فزه نادت الخادمة لرفع ما تبقى من عشا سعد ...،

جلست بحيرة / الولد هذا وش فيه وش البلا الي لفه يوم عن يوم حاله يردى...،

نافضة الجوع ما هو واعي بنفسه...،

مساعد يزفر بضيق / حاله يحير بكرة يفحص فحص شامل ونشوف عقبها يمكن مثل ما قالو العيال نقص فيتامينات ...،

.


.


.


دخل سعد غرفته وتمدد على سريرة تذكر ما حدث با الامس...،

طوال الوقت يتهرب منها لا يريد ان يراها حتى لا تزداد النيران التي في صدره ...،

جائته بنفسها ووقعت مباشرة امامه لأول مره يراها من هذا القرب...،

تغيرت ليست كما كانت طفلة انفها عيناها الواسعة شعرها تغير أصبح ناعماً غمازتيها...،

تذكر بدر عندما كان يمازحها انه سيسرق غمازاتها تضع كفيها على خديها حتى يغادر بدر...،

يسمع من والدته واخواته انها كبرت واصبحت جميلة لم ينتبه يوما لمدحهم لها بل يتذكر فقط لعبها ...،

وشقاوتها حتى رئاها اول مره منذ عدة أشهر...،

والبارحة ازدادت جمالاً عما كانت عليه في مطبخ الجد...،

قام لينتهي من بعض اعمال تخص طلابه حتى يستطيع الخروج للفحص ليطمئن والداه...،


.


.


.


على الجانب الاخر في بيت بدر ...،

دخل بدر وسناء...،

توجه بدر لغرفة النوم ومعه ملابسة العسكرية ...،

وسناء دخلت الي دورة المياه توضئت لتصلي العشاء...،

دخلت عليه سناء وامامة بدلتة العسكرية يرتب على متنها الرتب العسكرية والاوسمة على صدره...،

وعندما انتهى علقها داخل الدولاب...،

التفت لها با استغراب / وش فيتس اول مره تشوفيني...،

سناء بذهول / لا لكن اول مره من تزوجتنا تسوي شي لنفسك بالعادة سناء جيبي سناء ودي...،

اغلق الدولاب ...،

ضحك بدر وبممازحة / لين تتعلمين بعدها الله لا يهينتس تركبينها...،

أردف / خفت اقول لتس تشقلبينها واداوم يازين وجهي اصير بالمعسكر نكتة الموسم ...،

سحبت شرشف الصلاة ومدت سجادتها لتصلي ...،

بدر با استنكار / وما صليتي للحين...!

سناء / لا بصلي تكفى لا تلهيني ...،

غير ملابسة وخرج لصالة تمدد على الكنبة وهاتفه بجانبه وفتح التلفاز...،

يقلب على اليوتيوب...،

وصلته رسالة من ثامر يستفسر (وش صار)

ارسل له (لا تدق وريح بالك متى ما فتح فمه الجاسوس المزدوج علمتك)

ارسل ثامر (ضحكة طويلة وفيس الاوكيه)

خرجت سناء من غرفتها وجلست امامه بعد ان اكملت صلاتها / تبي عشاء...،

بدر / وش رايتس نطلب...؟

سناء / بكيفك...،

اتصل وطلب عشاء...،

سناء بتعجب / الحين انت بالصالة تلفزيون وبغرفة النوم تلفزيون ما بقى الا المطبخ ...!!

ابتسم بدر/ ما أحب اتعب نفسي هناك قنوات وهنا البرامج الذكية ...،

رجعت لغرفة النوم احضرت بطانية وعادت لصالة ...،

تمددت على الكنبة المقابلة وسحبت البطانية تغطت بها ...،

سناء / ما شاء الله مريح نفسك...،

رفع بدر حاجبه / اتعب ريالك ولا تتعب نفسك...،

أردف بتوجس / وش عند العنقاء رايحة للمستشفى وساحبة عليتس انتي وشروق...،

نظرت لبدر نظرة عرف ان ورائها شي...،

سناء با استفسار / تبي تفهمني أنك ما تدري عن شي ...،

التفت بدر لتلفاز وقام بتشغيل مقطع اوقفه عندما أتصل بالمطعم ليطلب عشاء ...،

ودون ان يلتفت لها / أدري عن ايش ...؟

اخبرته سناء انها تشك ان هناك امر غامض بين ثامر ومضاوي...!

او ربما يكون ثامر مريض نفسيا عندما نزلت من عند مضاوي سألت الخادمة من اتى إليهم يوم الجمعة...؟

قالت انها رأت مضاوي تعود بعد العشاء وثامر موجود...،

وكانت اشكالهم توحي لمن يراهم انهم ذاهبون الي احتفال ...،

ولم ترى بعد ذلك ثامر فقط رات في الصباح مضاوي ولا تعلم متى عادت او مع من...،

وصفت له الرعب الذي انتابها عندما رأت منظر عباءتها وذراعاها ورقبتها وتجبير اصبعها كمن دخل بمعركة ...،

وأنها شكت في البداية ان مضاوي ربما قد تعرضت لخطف واغتصاب او تحرش...،

لكن مضاوي حلفت لها وهي مقبله على الصلاة ان خوف سناء ليس في محلة وهذا ما طمئنها ...،

لم يستطع بدر ان يدافع عن ثامر كماهي عادته وانما اكتفى بكلمة البيوت اسرار...،

خاف ان سناء تركز على كلمة مريض نفسي او انه شخص سادي كما تشك...،

ومن ثم يتسرب كلامها بين العائلة وما يسمع غير ما يعرف ...؟

غير الموضوع ودخل في مواضيع أخرى...،

أرسل لثامر حتى يطمئنه ان الامور طيبة ولا يقلق وينفذ ما طلبه منه جده...،

سيخبره بما سمع في وقت لاحق ...،
.

.

.

لا تلهكم الرواية عن الصلاة في وقتها

موعدنا القادم بأذن الله قريباً

تذكروني واحبابي بدعوه طيبه


(سبحانك اللهم وبحمدك، أشهد أن لا إله إلا أنت، أستغفرك اللهم، وأتوب إليك)

مرحبا يا جميلات اليوم بأذن الله تعالى بينزل "الفصل الثاني الأربعون "

كونوا با القرب


آرائكم تهمني

الفصل " الثاني والأربعون"


.


.


.


في اليوم التالي ...،

بداية الدوام للجميع...،

في بيت الجد ...،

نزلت مضاوي من غرفتها متوجهة الي المستشفى ...،

باب غرفة الجد كان مفتوح يصدح فيه صوت الراديو يستمع للأخبار اتجهت اليه...،

وطرقت الباب المفتوح ترتدي عباءتها وبيدها نقابها وتحمل حقيبتها / صباح الخير...،

الجد المتكئ على سريرة ابتسم لها جلس واخفض صوت الراديو/ ياهلا يا صباح النور وشلون اليوم يدتس ...،

نظرت ليدها / الحمدلله أحسن من أمس خف وجعها ...،

الجد / ليه ما طلبتي اجازة ترتاحين بها لما تعافين...،

مضاوي / طولتها عليهم واستحيت كل شوي إجازة...،

بعطي الجهد الي أقدر وإذا حسيت ما أقدر استأذنت وطلعت ...،

الجد / موفقه يابوتس...،

أردف الجد / كم بقي عليتس وتخلصين ...،

ابتسمت مضاوي / تونا با اول الطريق...،

اردفت بممازحة / الي تحمل تولد وانا ما خلصت ...،

الجد / يعني حول التسع شهور...؟

هزت رأسها بموافقة...،

وأردفت / ادون شوي ...،

ابتسم الجد / الله يسرها لتس ...،

ويعوضتس تعبتس ...،

مضاوى / الله كريم ...،

نظرت لساعتها التي تلبسها بااليمين / تأخرت توصي شي ...،

الجد / سلامتس توكلي على الله ...،

غادرت مضاوي ورجع الجد للاستماع لراديو...،


.



.



.


وصلت للمستشفى بداية يوم جديد بعد اجازتها دخلت للعيادة ...،

انهمكت بشغلها لم تنتبه للوقت مابين الفحص على المرضى وسماع توجيهات الطبيب المشرف وملاحظات زملائها...،

انتبهت لصوت يناديها من الخلف التفت له كانت مها ...،

مها استعجلت بالمشي حتى وصلت لها سلمت عليها ...،

مها ببشاشة / والله فرحت يوم شفتك...،

ابتسمت بمرح/ ان شاء الله أعجبكم ذوقي...،

مضاوي بمجاملة / ما قصرتي ما شاء الله روعة...،

دخلوا للكافتيريا وجلسوا انضمت لهم غادة...،

غادة / مضاوي إذا انتي تعبانة استأذني وارجعي البيت لين تحسين نفسك أفضل...،

مها / بصور لك تقارير الحالات تشوفينها...،

وبرأفة / مره شكلك مرهقة وتعبانة...،

ابتسمت مضاوي / لا عادي خمول اول يوم تعرفونه بعد اجازتين نصف السنة والمرضية...،

مها بتذمر/ متى ننتهي من هالسنه ...؟

أحس مره طولنا ...!

ضحكت غادة / بالعكس أسهل سنة من بداية دراستنا بس عشانك تزوجتي وتحسين نفسك مربوطة بين بيت ودوام ...،

التفتت مها لمضاوي / ما لوم مضاوي بداية السنة وهي تركض تناظر ساعتها متى يخلص الدوام عشان ترجع لبيتها...،

اردفت / واقول لنفسي وش مستعجلة عليه...،

غادة / وضع مضاوي غير انتي بيتك قريب من دوامك تقضين ست ساعات وخلاص وهي 12 ساعة اكيد تفرق...،

التفت لمضاوي / والا انا غلطانة...؟

اغمضت مضاوي عيناها وبوجع خفي هزت رأسها / صحيح اطلع خمسة وارجع خمسة...،

مها / اتوقع لو انا راح اتخلى عن وحده منهم اما بيتي او دوامي...،

وبا استنكار / مين يقدر يتحمل كل ها الضغط...؟!

غادة / مضاوي تدرين صرنا نعرف مزاجك...،

الفترة الي تدوامين من الخرج للمستشفى مره نشيطة ومقبلة على العمل...،

والفترة الي تدوامين من بيت اهلك تتغيرين ...،

ضحكت مضاوي / شكلي كنت تحت الضوء وانا ما عندي خبر...،

ابتسمت مها / دائماً المميزين تحت الضوء وانتي مميزه ...،

انتهت فترة البريك وعادو الي عملهم ...،

انتهى وقت الدوام ...،


.



.



.


رجعت للبيت في الثالثة والنصف...،

جدها لم يرجع من المسجد...،

صعدت الي غرفتها...،

اتصلت بالخادمة طلبت منها كيس بلاستيك تغطي يدها تريد ان تستحم...،

اليوم الجو مائل أكثر لدفئ في النهار...،

استحمت لبست ملابسها جففت شعرها بالمنشفة وفرشت سجادتها وارتدت شرشف الصلاة وصلت العصر...،

طوت سجادتها ووضعتها على التسريحة...،

فتحت هاتفها على اذكارها ووردها من القرآن قرأتها...،

شعرت بالم في معدتها من الجوع ...،

اغلقت هاتفها ارادت ان تنزل فإلى متى هذا الهروب في غرفتها ...،

خلعت شرشف الصلاة وطوته وارادت وضعها على التسريحة انتبهت لوجهها بالمرآة ...،

بقى اثار ازرقاق خفيف حول عينها و احمرار خفيف حول رقبتها من اثر سحبه لها بالطرحة ...،

حتى التاتو الذي رسمته على رقبتها وخلف اذنها احست ان لونه بدأ بالزوال...،

مشطت شعرها بشكل سريع ...،

انتبهت للفراغات فعلن بدأ ينمو فيها شعر كما قالت سناء ...،

لبست شال من الصوف لفت شعرها لا تريد للجد ان يرى لون شعرها الأشقر...،

اخرجت سلة الملابس المتسخة امام باب غرفتها واخذت الشاحن المتنقل وهاتفها ...،

نزلت للأسفل الي المطبخ ...،

سألت عن جدها اخبرتها الخادمة انه اتى قبل قليل سأل عنها ثم اتجه للمشب كا العادة ...،

طلبت من الخادمة اكل تكاد ان تنهار من الجوع ...،

غرفته واشارة لها انها ستأكل هنا بالمطبخ ...،

جلست واكملت غدائها ارادت ان تخرج من المطبخ بيدها علبة ماء...،

رن هاتفها كان الجد / هلا جدي ...،

الجد/ تعالي للمشب مبطي عنتس ماشفتس...؟

مضاوي / ابشر بس اخاف أحد من العيال يجي الحين ...؟!

الجد / البسي نقابتس وجلالتس عليتس وتعالي وإذا جا احد تغطي ما هم ماكلينتس...،

تثاءبت بخمول / خلاص جايتك ما ابي انام قبل العشا ...،

اقفلت الخط وأمرت الخادمة ان تحضر لها شرشف واسع من غرفتها ونقاب وطرحة ...،


.



.



.


ارتدتها وخرجت للمشب كان الجد يجلس وحده كعادته ينتظر ابنائه ...،

دخلت عليه قبلت رأسه وجلست امامة والباب خلفها...،

ارادت ان ترفع الدلة بيدها اليسرى لتقهوي الجد ولم تستطع...،

ابتسم الجد له بمودة ومرح / اتركيها انا بقهويتس...،

وضعت يدها على يده / لا والله مالي خاطر فيها لكن على شانك...،

الجد / والله انا مثلتس مالي خاطر فيها لكن قلت على شانتس ...،

أردف / وشلون الدوام معتس ...،

وبود ابتسم/ مبطي عن سوالفتس عن دوامتس ...،

مضاوى التي كانت ترفع نقابها المربوط على رأسها / الحمدلله ماشي الحال...،

اردفت / اليوم جتنا حالة طفل عيونه تعبانة عنده مرض اسمة رقرقة العين...،

لما فحصت عليه واسأل امه قالت انه مرض وراثي عندهم هي وزوجها أقارب...،

وعندها اكثر من طفل اكبر منه حالتهم اصعب من هذا...،

هز الجد رأسة برأفه / لاحول ولاقوة الا بالله...،

مضاوي / قلت لها طيب فحص ما قبل الزواج يبين الامراض قالت كان زواجهم قبل الفحص ...،

الجد / الفحص هذا جا نعمة لناس لو ان بعض ناس ما هو جايز لها ويزعلون إذا ما صار تطابق...،

مضاوي / يزعلون بكيفهم ولا يتزوجون وينجبون اطفال يجنون عليهم...،

خصوص زواجات الاقارب الي منتشر بينهم مرض معين ...،

الجد / قبل فيه جاراً لنا عنده الأجودي عيلة عيال وبنات...،

حرمته يمكن قال انها بنت خالته او بنت عمته ...،

مسح الجد على لحيته يتذكر/ يقول سبحان الله ينولدون ورعانه بست اصابع وإذا كبرو شوي راحوا سوو لهم عملية وشالوا الاصبع الزايد...،

مضاوي / الحمدلله هذي ان شاء الله انها محلوله عمليه بسيطة وتنهي المشكلة ...،

الخوف من التخلف العقلي وامراض الدم ...،

الجد / الحمدلله وتدابير الله سبحانه فوق كل شي...،

قاطعهم رنين هاتف الجد...،

الجد / هلا ما فيه الا مضاوي تعالي للمشب ...،

اقفل الجد هاتفه ...،

ونظر لمضاوي / هذي شروق جاية ...،

ابتسمت مضاوي / حياها الله عند أهلها...،

وصلت شروق بيدها كيس هدايا سلمت على الجد ومدت له الهدية ...،

استدارت لمضاوي سلمت عليها وجلست بجانبها امام الجد ...،

شروق / وشلونك ياجدي عساك طيب ...،

اردفت / جدي هذي هدية مني ومن طلال...،

الجد / طيب طاب حالتس ...،

أردف وهو يفتح كيس / وهدية مقبوله...،

ابتسم بممازحة مرحة وهو ينظر للهديه / تدرين جدتس يحب المسابيح ...،

امسك الجد با المسباح ورفع نظره لشروق وبمعاتبه لطيفة / ليه يا بنتي تكلفون على حالكم...،

بها المسباح الغالي ...؟

ابتسمت شروق / ماحنا متكلفين لأعز وأغلى منك ...،

تلفتت في انحاء المشب / من زمان ما شفت مشبكم من يوم جددتوه ...،

الجد / جددناه قبل الشتاء بس انتي قطوع...،

شروق / لا والله ياجدي مهي قطاعة لكن مشغولين وحنا فاضين واليوم جايه اشوفك مخصوص...،

ضحك الجد / انا اشهد مشغولين وحنا فاضين وحياتس الله عند جدتس ...،

تلفتت شروق في انحاء المشب / يشرح الصدر ما شاء الله تبارك الله...،

التفتت لمضاوى / لو انا منتس ما اطلع منه وخلي العاصف يدورون لهم مكان ثاني يجلسون به...؟

ابتسمت مضاوى بالم خفي / وين تبين أشرد عماني بعد ...؟

فهم الجد ما تعنيه وتجاهله فقد أصبح كثيراً ما يسمع منها عبارات كثيرة تلوم نفسها عما حدث لهم في الماضي وكأنها كانت من أسبابه...،

نظر لها الجد بحنو/ لو تبي بنتي سويت لها بقسم النساء مثله وأزين منه...،

وضع يده على صدره /هي عليها الآمر وانا علي التنفيذ...،

رفعت شروق عيناها ويداها لسماء / يارب تعطيني القبول عند مخاليقك مثل مالمضاوي عند جدي...،

التفتت مضاوي لشروق / كلنا عند جدي واحد...،

ضحك الجد/ والله انتي عندي فايزة عليهم عقب ابوتس الله يرحمه...،

تنهدت مضاوي وبنبرة حزينة / الله يرحمه...،

شروق / جدي بسألك عمي حزام وشلون انضرب وجهه...،

استغرب الجد سؤالها وابتسم لها / وش فطن عليتس هالسالفة ما عمر أحد سأني عنها...،

ابتسمت شروق / لا والله يا جدي ما في شي...،

اردفت / فيصل قبل كم يوم أرسل لي صورة جايه على قروب العيال قال هذا عمي حزام ...،

نظرت لمضاوي / وشفت وجه مضاوي على جنب مدري ليه تذكرته الله يرحمه...،

أشر الجد على القهوة والحليب والشاي المصفوفة على جانب النار / انتي الحين قهوينا وبعدين السوالف...،

التفت لمضاوي بعطف / راعية البيت يدها ما تعينها...،

وقفت شروق لتحضر ابريق الحليب وتضعه بالصينية...،

وعادت لمكانها / انا القهوة ما ادانيها لاهي ولا الشاهي بقهويكم حليب...،

ابتسمت مضاوي / اخر وحده تكره القهوة انتي ...؟!

القهوة عندتس ادمان...،

شروق / خبرتس عتيق تذكرين حتى سنابات ارسلتها لكن فيها صور قهوتي حذفتها ...،

ضحك الجد / يا دافع البلا عاد القهوة ...،

التفتت للجد / والله ياجدي اني صادقة ما امزح ...،

سكبت للجد ومضاوي حليب وقدمته لهما / علمني بسالفة عمي حزام قبل ننساها...،

الجد بحزن انزل الحليب من يده/سالفته والله يابنتي عجيبة الله يعوضه الجنة ...،

جا مع امي الله يرحمهم جميع من الديرة وسويت لهم عشا ...،

وعزمت جيراني ودخل حزام ومعه صينية فناجيل وبيالات ...،

وراه جلال شايل مدري دله والا ابريق ناسي...،

تنهد وعدل من جلسته / التفت علي واحد من الجيران قال يا سعد يا كبر عيون اخوك كبراه ...،

لو حطيت عينه بيدي ما تضمها من كبرها ...،

ما امدى الرجل قال كلمته الا طيحة الصينية من يد حزام وجلس با الأرض وغطا وجهه بيديه...،

وجلال طاح وراه وانصرع ...،

مدري تروع الورع من طيحة الصينية والا شاف دم عمه...،

وضعت شروق يدها على صدرها بذعر/ اعوذبالله من عينه...،

مضاوي بلهفه وذعر / وش صار بعدين...،

الجد / قاموا كل الي في المجلس يركضون عليهم انا رحت لحزام ومسكت ايديه عيا يفكها من وجهه...؟

وانطلق الدم من بين أصابعه مدري منين يفور...؟!

شلته وعلى طول لمستشفى الشميسي والرياجيل الي بالمجلس تركتهم عند جلال...،

شروق بتعجب / مشوار ياجدي متى بتوصله يمدي تصفى دمه...،

الجد / الشميسي ماهو بعيد عن بيتي الي كان بالملز وما في زحمة مثل ها الحين...،

وصلنا وعلى طول دخلوه الطواري ...،

يوم فحصوه اثاري قزاز الفناجيل والبيالات طاير من الارض وشاق وجهه...،

راثع القزاز بخده الايسر رثيعه وجاي على عروق هي سبب الدم الي يفور من وجهه...،

وعينه اليسرى محد يدري وش مصيرها ...،

مضاوى برعب / لاا اله الا الله ...،

التفت لها الجد...،

وأشفق على وجهها المذعور وبود ورأفه قال / وش فيتس يابوتس السالفة لها سنين راحت والحمد لله على كل حال...،

مضاوي / لا ياجدي بس الموقف مرعب...،

شروق بفضول / وش صار بعدها ما قدرو يعالجون عينه ...،

الجد / حاولوا الأطباء والله ما قصروا وتنومت عليه...،

طولنا بالمستشفى ...،

عينه اليسرى الله يعوضه بالجنة راحت طلعوا شظايا قزاز منها...،

والحمدلله عين وحده ولا الثنتين فكه ربي من العمى...،

وبتعجب أردف / سبحان الله وجهه ان جيته من يمين تقول ما فيه ازين من وجهه...،

وان جيته من يسار القزاز لعب بالجهة اليسرى لعب ما تعرف وجهه...،

شروق / وعمي جلال وش صار عليه...،

الجد / جلال تعودنا عليه ينصرع وياخذ شوي ويصحى وفكه ربي من الابريق ما أدرى الدله لا تحرقه...،

سألناه عقب يقول روعني عمي قبل تطيح الصينية منه...؟

رجع علي كن مطلقن عليه قذيفة وحذفت الي بيدي بعيد لا يحرقنا انا وياه ...،

شروق بقهر / والله قذيفة عيون جاركم هذا حسبي الله عليه الواحد ما يعرف يذكر الله...،

الجد / جارنا توفى مبطي الله يرحمه والله انه اجودي لكن سبحان مبتلى...،

يعين بدون ما ياعي...،

مضاوي / المفروض اي واحد يحس فيه ها الصفة ما يترك ذكر الله من لسانه ولا يركز بخلق الله يبتليها ...،

الجد / العين مذكورة بالقرآن لكن بعض ناس تزعل اذا قلتي لهم اذكرو الله ترى عيونكم حاره ...،

جلال الله يرحمه راحت امه لعرس واخذته معها والورع ما كان فيه شي...،

ولا خبرت احد فينا من جدودنا الاولين ذكرو ان فيه صرع ...،

من جت من العرس والولد ادناة شي يصرعه لين توفى الله يرحمه...،

قاطعهم صوت مساعد...،

وبنبرة عالية / عندكم أحد...،

الجد / ادخلو مافيه الا بنات اخيكم...،

تغطت مضاوي ورجعت للخلف ووقفت شروق دخل فهد ومساعد ...،

سلمت شروق على والدها وعمها ...،

جلسوا فهد ومساعد...،

وقامت شروق تقهوي والدها وعمها ...،

مساعد / وشلونتس يامضاوي بشرينا عنتس...،

مضاوي / طيبه جعل يطيب حالك...،

فهد / وشلون امورتس بشرينا عنتس

مضاوي / ابشرك بخير...،

فهد / متى تخلص اجازتس...،

مضاوي / داومت اليوم ...،

فهد / زين زين ماشاءالله ...،

أشار فهد لشروق لتجلس بجانبه ...،

مساعد بممازحة / حنا نضحك على سعاد وبنتها الظاهر فهد ازود منهم ...،

قامت شروق وجلست بجانب والدها ...،

ابتسم فهد بحنو/ فاقدها ما شفتها أمس جت وماكنت فيه...،

الجد / سعاد اعوذبالله محد مثلها الظاهر حتى ان اعرست تلحقها ...،

التفت فهد لشروق وبمودة /وشلونتس الحين امتس تقول تضايقين من بيتس...،

شروق / اي والله يبه انخنق واتضايق من يوم اقبل عليه ما اصدق يصبح الصبح اهج لبيت عمي ابوطلال والا اجيكم...،

فهد بعطف/ تبين استاجر لكم شقة مفروشة انتي ورجلتس قريبة لين تولدين...،

ضحك مساعد والتفت لوالده / وتقول سعاد محد مثلها هذا ولدك بيستاجر لبنته متوحمة على بيتها...،

ابتسمت شروق والتفتت لعمها / حتى عمي سعود قال لي تعالي عندنا والا اخذ لكم شقة لين يروح وحامتس...،

أشار مساعد على جوال فهد / شوفي جوال ابوتس وش الصورة الرئيسية ...،

ضحك فهد بمرح/ صورة ابوي...،

هز مساعد راسة بممازحة مرحة / صورة ابوي ومن الي جالس بحضن ابوي ...،

سحب مساعد الجوال من امام فهد واراه والده / يبه من الي بحضنك...،

ضحك الجد / هذي شروق يمكن عمرها سنة صورها فهد بحضني ...،

ارجع مساعد الهاتف لفهد وفتح هاتفه / يا الله برسلك صورة لأبوي لحالة اشوف غير الصورة وحط صورة ابوي لحاله....،

اخذ فهد هاتفه وهو يضحك / عاد انت لا تدقق ...،

شروق بعفوية / ودي إذا ربي كتب حملي ولد سميته على ابوي وقبل شوي طلال يقول ان امه تبي اسم عمر...،

على اخوه وعمي أبو طلال قال لا اسمه فهد...،

فهد / لا بالله ه ما يسمى علي اذا ربي كاتبه ولد اسمه على سعود...،

الجد / اي والله ان ابو طلال وجهاً يستاهل من يسمي عليه...،

مساعد / يقولون دايم السمي يا خذ من صفات سميه...،

فهد / على طاري السمي سعد وش سوى...،

مساعد / يقول اليوم راح للمستوصف واخذ تحاليل شاملة تطلع النتيجة بعضها بكرة وبعضها يبي لها يومين ثلاث...،

الجد / ان شاء الله ما فيه شي...،

تقف مضاوي وقبل ان تغادر / اليوم عشاكم عندنا لا تروحون...،

ابتسم الجد / تقول وتفعل بنت حزام...،

التفت فهد لوالده / الا ام حزام ان شاء الله ...،

أردف / عسى عمرتس طويل انا والله عندي شغل مع واحد مواعده عقب المغرب...،

مساعد / وانا بعد مرتبط ام سعد تبي السوق هي وبنتها ...،

الجد / اقعد تعش معنا وهن يروحن مع فواز والا سعد...،

هز مساعد راسه / ودي والله لكن العوبا الي اسمها سهى تقول ما ابي اروح الا مع ابوي ...،

ضحكت شروق / عاد انت يا عمي لا تزعل شوي عصبي...،

والله لو انا منها رحت مع اخواني...،

فهد بممازحة / شفتي ها العصبي الي يعلق علي يركض لبناته ركض...،

خلي بدر يزعل سناء وش يسوي به ...،

ضحك مساعد / علشان اخلي اذاني واذانه اربع...،

ضحك الجد / الله لا يحرمكم منهن ولا يحرمهن منكم ...،

غادرت مضاوي بهدوء...،

لحقت بها شروق بعد ان استأذنت...،

التفت مساعد لوالده / اعوذ بالله يا نبرة صوتها نبرة الحزين...،

فهد / وش نسوي ما بليد حيلة...،

الجد / الله يرزقها من بطنها من يبرها ...،

أردف بالم وشفقه / انتم تسولفون وتمزحون عن بناتكم وانا عيني على عيونها ترواغ بالدموع الله يعوضها يتمها...،

مساعد / والله يبه انك ما قصرت معها ورايتك بيضا...،

الجد / مهما سويت ياولدي ماني صاير بمكان ابوها لو ما يسوي لها ربع الي سويته لها...،

تنهد بحزن ووجع واختنق بعبرة حاول ان يخفيها عن أولاده / اااخ يا مساعد يا ولدي محد يعرف وجع فقد الابو مثلي محد يعرفه...،

قام مساعد وامسك بيد والده وقبلها وقبل انفه بمحبه ومواساة / والحمدلله عوضك الله ...،

هز الجد رأسه بموافقة والا الم القديم مازال أثره في نفسه ...،

.


.


.


على الجانب الأخر في بيت الجد...،

مسحت مضاوي دموع جاهدت ان لا يراها سوى نقابها ...،

نادت الخادمة واعطتها النقاب والشرشف اعادت لف شال الصوف على راسها ...،

دخلت شروق خلفها ...،

وهي تزفر بملل / ياربي كل البيوت حلوة الا بيتي ...،

ابتسمت مضاوي بممازحة / وين اول مملكتي ومملكتي ...،

شروق تزم فمها بقرف / يا شيخة اسكتي لا تجيبين طاريه...،

عساني ما أكره طلال مثل ما كرهت بيته ...،

فصلت مضاوي هاتفها من الشاحن وأشارت للخادمة على البطارية / اذا فللت شحن حطيها بشنطة الدوام شوفيها فوق ...،

التفتت لشروق / وين تبين نجلس والا بتروحين ...،

شروق بممازحة / شكلتس متوذيه مني عادي اذا ماتبين اجلس بروح لبيت اهلي...،

والا بدور بيت من بيوت العاصف ادخله ...،

ابتسمت مضاوي / لابالله دامها كذا خلتس هنا ...،

وبوجع خفي / مالنا غير ظل ها البيت يسترنا ...،

شروق / خلينا نروح للحوش نقعد على طاولتس الاثرية ...،

أمرت مضاوي الخادمة با احضار وسائد ليجلسوا عليها ...،

توجهوا لسور المنزل ولحقت بهم الخادمة احضرت ما طلبت منها مضاوي رتبتها على الكراسي وجلسوا...،

مضاوي / تشتهين شي تسوي لتس ميري ...،

شروق / لا تكفين خليها مستورة الحليب يا الله بلعته عند جدي...،

تلفتت بحنين وابتسمت / يا زين ها المكان وذكرياته ...،

كل شي تغير الا ها الطاولة رمموا بيت جدي وغيروا وحطو وهالطاولة بمحلها ...،

مضاوى با الم / لأن الشي الي يبنى على اساس ثابت ما يتغير...،

قاطعهم رنين هاتف مضاوي ...،

مضاوي / هلا مريم ...،

مريم / هلا يا النساية وين رقم صاحب الكوش والا ما تبين أحد يقلدس ...،

مضاوي / وش دعوة ابشري أرسلي مكان الحفل حقكم وانسي الباقي ...،

مريم / لا وين مضاوي تكفين لا تحرجيني...،

ابتسمت مضاوي / لا والله يا ملاك الرحمة لا احراج ولا شي ترى ما راح أرسل الرقم الا إذا أرسلتي العنوان ...،

مريم بحرج/ والله ما أدري وش أقول...،

مضاوي تضحك / لا تقولين ولا شي على قولة البدو انتي راعية الاوله وراعي الاوله ما ينلحق...،

اغلقت الخط مضاوي من مريم ...،

اتصلت بسعاد ...،

سعاد / هلا وغلا بلي تغلى...،

مضاوي تبتسم / الي يتغلى يبي منتس خدمه ...،

سعاد / ابشري عمتس الحمدلله قدرت تنطلق وتروح وتجي آمري بس ...،

ضحكت مضاوي / عسى عمرتس طويل ...،

ابي عنوان المحل الي طلبتس ذاك اليوم حق الكوش وما ارسلتيه لي ...،

بزين هديه لمريم كوشة زواجها ...،

ضحكت سعاد / تدرين من أمس افكر...،

أقول في شي طلبتني مضاوي بس مدري وش...،

وبممازحة مرحة / حالة النسيان الي تجي ما بعد الولادة الله يكفيتس الشر...،

برسل لتس استقرامهم وشوفية وشوفي الي عندهم والي يعجبتس صوريه ...،

سليم يعرف مكانهم تقدرين ترسلينه لهم تخلصين شغلتس ما يحتاج تروحين ...،

مضاوي / أرسلي كل شي الله لا يحرمنا منتس ...،

اغلقت الخط ووصلها ما طلبته منه عمتها...،

ارسلت لمريم استقرام المحل وطلبت منها تختار ما يعجبها وهي تتكفل بالباقي...،

شروق / هذي البنت الي بالخرج تقولين عنها ...،

مضاوي وهي تضع هاتفها على الطاولة / اي هي الله يسعدها عرسها الاسبوع الجاي هنا بالرياض...،

شروق بتردد / وانتي وش بتسوين بموضوعتس...،

ابتسمت مضاوي بتهكم / شامة ريحة وساطات ...،

شروق وهي تنزل طرحتها وتعيد لفها / لا والله لا واسطة ولاشي دريت ان سالفتس ماهي طيحة ثامر ماد يده عليتس ...،

مضاوي تنظر لها با استفهام ...،

شروق تتنهد / ما يحتاج تسألين كيف عرفت ...،

اردفت / ما قصرت رفعة ما خلت أحد ما قالت له بقى تحطها ترند بتويتر...،

شروق تعدد / كلمت خالتي ام طلال وقالت لها جتنا لبيت اهلي وعلمت امي ...،

تقول امي الله يهديها رايحة لعشا بشاليه لواحد من جماعتنا امي حضرته...،

من جلست وقالو وشلونتس وش علومكم...،

شروق با اسلوب استهزاء / ما عندنا من العلوم الا بنت حزام ضربها رجلها لين وصلت الموت وحذفها على عمي وبيطلقها...،

مضاوي تهز راسها بقهر /الي قاهرني ماهو سوالفها الي قاهرني كيف درت ...؟؟

وبغيظ/ الي ها الدرجة موضوعي مشغلها...،

شروق / قبلتس بدر بغى يموت هو وسناء كيف درت اخرتها طلع عمي سلطان قايل لها ...،

ضحكت شروق / مالوم جدي اذا شافه قال استر ياستار جاكم رجال رفعة بين اذانه علم ...،

ضحكت مضاوي / استغفر الله ياربي شر البلية مايضحك ...،

قاطعهم دخول سناء من المدخل الداخلي تضع يدها على خصرها / ماشاء الله وش ها الخيانة تجتمعون ولا علم ولا خبر...؟!

التفتت لها شروق / مافاتس شي يبنتاخي سلطان...،

ضحكت مضاوي حتى تساقطت دموعها...،

جلست سناء تنظر لمضاوي با استغراب / وش بلاها مرشوش عليها بلا...،

شروق تضحك / لا والله كنا بسيرة عمي يوم علم بهوشة مضاوي ورجلها وانتي دخلتي...،

سناء وهي تعدل جلستها وبقهر / امانه لا تذكروني لأروح من بكرة للمحكمة اتبرا منه ...،

شروق / المشكلة انه حبيـب وقلبه كبير وعلى نياته ما يمديتس تكرهينه...،

سناء / وهذا البلا والضبعة الي عنده عارفته نافضة مخه وجيوبه ...،

اردفت / ما شفتيه يوم جت ريما حنا وعمتي نبكي وهو يبكي معنا...،

شروق / الحمدلله ربي ردها سالمه...،

مضاوي / وش السالفة...،

سناء / يووه فاتس يوم الجمعة وش صار علينا يوم عسى مصايبه ما تكرر

سردت سناء القصة لمضاوي وشروق...،

شروق / كلمت عمتي يوم دريت تقطع القلب تقول انا وش ابي حياة مابها بنتي ...،

سناء / شكلتس كلمتيها بحرة السالفة ...،

مضاوي / لاو الله ترى عمتي من غير هي متعلقة بريما ما شفتوها اذا راحت معي ...،

تدق بالساعة ستين مره عليها وبالبيت كل شي حاذفته عليها ...،

على قولتها الا النار مادانيها تقربها ...،

ضحكت سناء / الظاهر بنشقل عمتي وبنتها لنفسية ندور لهن علاج والا شيخ يقرا عليهن...،

مضاوي / يمكن عشانها الوحيدة وقعدت بعدها سنين ما حملت ...،

شروق / ماهو شرط انا بعد وحيدة وماسوو امي وابوي مثلها...،

اردفت / انتو شوفو شخصية البنت كيف عمتي تعاملها كنها بزر ولاصقات في بعض...،

مضاوي / تدرين عمتي تقول احسها للحين بالروضة...،

شروق / ما ينفع كذا لازم من جد ماهو مزح عمتي وبنتها يروحون لمستشارة موثوقة تشوف لهن حل ...،

سناء / المشكلة الحين ريما متعلقة بعمتي وبعد ولادة عمتي بتنشغل اكيد مع مولودها...،

الله يستر لا البنت تنصدم وعمتي ما تقدر تسيطر على الموضوع...،

مضاوي / عمتي والله ما ينقصها الذكاء وتسيطر على الامور بسهوله المشكلة اذا قلتيها لها تطلع لك عشر حلول وكله مجديه...،

شروق / هذا البلا عمتي مع ريما ينطبق عليها جيدة لناس خرقا في بيتها...،

سناء با انتقاد / وانتن جالسات تصفقن بيديكن لا شاي لاقهوة ...؟!

التفت لمضاوي / قلنا هذي وحمة انتي طيب...،

شروق / ما قصرت مضاوي لكن انا ما ابي شي ما صدقت معدتي تهجد...،

اردفت / وبعدين ما درينا حضرت جنابتس جايه...،

سناء وهي تضع رجل على رجل / ماني ناويه لكن اخوتس سحبني يقول ان تقابلنا نمت الحين وبالليل مقدر انام وراه دوام بكرة ...،

شروق / والله ازين شي الدوام اقل شي يفكتس من وجهه الرجال كم ساعة ...،

سناء / شكلتس متوحمه على طلال ...،

شروق / مدري وحام او لا صوته ما ادانيه ولا عطره والا عادي ماهو زي ما اسمع من الحريم يكرهن رجالهن ...،

ضحكت سناء/ وكل هذا ما انتي متوحمه عليه...!

مضاوي / كم لتس الحين...؟

شروق / بعد أسبوع ادخل الشهر الرابع...،

سناء / ما شاء الله والله توقعت توتس بالثاني انتي حللتي بعد عرسي...،

ضحكت شروق / ليت ما حللت كنت يازيني من حللت اشتغل الوحام مثل المراوح شوي شوي تتحرك بعدها تجيب سرعتها...،

مضاوي / معقولة ما حسيتي قبل...،

شروق / ابداا ولا فكرت تذكرين انتي وعمتي هبلتو فيني حللي حللي...،

اساسا دورتي من بعد ما تزوجت ما انتظمت ...،

مره قعدت شهرين ونص ماجت وحللت ما في حمل...،

سناء / أحس لو احمل مستحيل الوحام بيأ ثر فيني عادي...،

شروق بتهكم / اما انتي اصدق الوحام بيهج لبدر منتس هو الي بيتوحم ...،

سناء با استغراب / معقولة في رياجيل توحم عن حريمها...،

ضحكت مضاوي / قريت من زمان مقال عن موضوع كذا اسمه الحمل المتعاطف او نفاس البعل وهو شي نفسي ما هو حقيقي يعني من ضمن اسبابه الغيرة...،

يغار الزوج من الجنين او يغار من زوجته على الجنين وأحيان يكون ضعيف شخصية مثل ما نقول خروف لها...،

سناء حركت رأسها بحيرة مصطنعة / بنات تتوقعون عمي ابوماجد جاه ها الوحام...،

انفجرتا مضاوي وشروق بالضحك...،

شروق وضعت يدها على بطنها / انا ما ابي احلف اذا صدق موجود ان عمي ياخذ حبوب الغثيان بعد ...،

مضاوي تضحك وتمسك راسها/ الله يكفينا شر ها الضحك...،

سناء / لا والله يازينه وخص انتي كم لنا ماشفنا سنونتس حزينه وحزنتينا معاتس...،

شروق / اي والله فليها وانسي الكآبة اعوذ بالله اليوم يوم دخلت وشفتس بغيت اصيح لو ما استحيت من جدي...،

سناء تشير بيديها / يويلي ما شفتيها امس كان رجعتي لعهد قبل الاسلام ...،

و شقيتي جيبتس ولطمتي وجهتس لكن الحمدلله اليوم احسن ...،

مضاوي تتثاوب / هي الحياة كذا تقلبنا وتذوقنا من حلاها ومرارتها ...،

وصلت رسالة لجوال مضاوي فتحتها...،

مضاوي / من مريم مرسلة صورة كوشة ...،

مدت جوالها لشروق وسناء ليرو الصورة...،

شروق / تهبل بس مره ناعمة تصلح لملكة ما هو زواج...،

سناء با استفهام / هذي لمريم الي رحتي لها الجمعة...،

مضاوي / اي زواجها الخميس وش رايكم نروح عازمتني...،

شروق تبتسم / من جد بتروحين...،

سناء / وليش ما تروح تغير جو وتستانس اجل تقعد كذا...،

شروق / ما قصدي شي لكن هي ما عودتنا تحضر قبل ها السوالف...،

سناء / طيب شعرتس وش بتسوين فيه...،

شروق تضحك / نسيت اعلمتس رفعة قايلة ان حتى شعرتس مقصقصه...،

سناء بقهر / ياربي وش دراها لو قلنا مصدر اخبارها عمي...؟

وشلون شاف شعر مضاوي...!

مضاوي عقدت حاجبيها وبتفكير / تدرين من مصدرها...؟

شروق / مستحيل يكون منا ...،

مضاوي /توني تذكرت مصدرها الشغالات سمعتها قبل اسبوع تكلم ليليان ...؟

ما خلت ولا بقت شي ما سألت عنه واخذت الجوال من الشغالة حظرت رقمها وحذفته...،

وحذرتها إذا لقيتها مرجعه الرقم وشايلة الحظر بسحب جوالها...،

سناء / ما تطلع اسرار بيوتنا لا من ها الشغالات...،

شروق / الغبن اذا بلاك منك فيك يعني مثل رفعة من اهل البيت تعتبر...،

ولو بتحذرين الشغالة منها ما ينفع تدخل البيت عقبتس ...،

وتبرمج مخ الشغالة من جديد ماكنتس حذرتيها ...،

سناء / خلونا من سوالف رفعة ما تخلص...،

التفت لمضاوي / شعرتس ماقلتي وش بتسوين فيه...،

مضاوي / الحلول واجد ماعليتس بس ما قلتو بتروحون معي...،

شروق تضحك / معزمة ام حزام الروحة ...،

مضاوي ترفع حواجبها / تعرفيني إذا قلت فعلت ...،

شروق نظرت لمضاوي وفي عيناها كلام...،

ابتسمت مضاوي / وش فيتس كنتس بغيتي تقولين شي وهونتي ...،

شروق / الحمدلله انتس ما حملتي...،

سناء / اي والله كان صدق انربطت بها المريض الحمدلله نفذت بجلدها...،

ابتسمت مضاوي / اخيراً وقف احد معي..،

سناء بتهكم تهز رأسها/ يالتسذوب حنا من انخلقنا معاً على الصراءُ والضراءُ...،

شروق / ما هو دايم مرات تجحدينا ...،

سناء / انا اجحدكن والدليل دخلتن علمي ورحت اهابد وراكن ولله الحمد سقطت...،

وبتهكم ساخر/ وش استفدت منكن غير تأخرت سنة ...،

مضاوي تضحك / مشكلة الي ما يعرف امكانيته...،

ضحكت سناء / انا اشوى من مصيبة خلود يوم رسبت حولت ادبي والحمدلله مشت اموري...،

هي واصلت علمي تبي طب حضرتها وهي كانت نسبتها بالسبعينات...،

وامها رجت الدنيا وتوز عمي على مضاوي...،

اردفت با استهزاء وسخرية وتشير بيدها / بنت حزام تبي تفضحنا تدخل طب واختلاط...،

ابتسمت مضاوي بتهكم / لقيتها انا وجدتي قدامنا يوم رحت اطابق اوراقي بالجامعة بعد القبول...،

سناء با استغراب / وش رايحة تسوي ما يطلبون المطابقة الا التسجيل منتهي...!

مضاوي / خلود كاذبة على عمي وامها انهم قبلوها طب احتياط ...،

وهم اساسا قبلوها احتياط ادارة اعمال الترم الثاني...،

حركت شروق رأسها بتعجب / كيف مشتها على أهلها ...،

رفعت كتفيها بحيرة / رفعة نقول ما كملت دراسة بتمشيها عليها لكن عمي جامعي ...،

مضاوي / وش دراه عنها اكيد الاهل يبون لعيالها أفضل التخصصات...،

وأحيان الثقة الزايدة وحبك لعيالك يعميك عن عيوبهم وما تبي تصدق فشلهم بشي...،

سناء / سبحان الله كل ما بغيت ارحمها واقول بنت عمي ولحمنا ودمنا الا ما تسوي حركة تكرهتس فيها...،

شروق بامتعاض / شفتي الي سوته بالمسكين الي ملك عليها وعقب ما تحمل قروض الدنيا من سببها طلبت الطلاق...،

اردفت / يقول ابوي فشلتنا معه...،

انهبلت لين طلقوها منه...،

سناء بقهر/ ما شفتي فواز كيف منقهر يقول ماجد يبي يشتري سيارة من زمان نفسه فيها...،

وخلاص على اخر الشهر يكيش فلوسها سمع عمي بياخذ قرض يسدد طليقها وهون عطى عمي فلوسه الي مجمعها...،

شروق با اشمئزاز / الله يخسها على سواتها بعمي وماجد...،

اردفت / ربي رحم ها المسكين منها...،

ابوي يمدحه مره يقول محترم وعاقل و منغبن من سواتها وساكت...،

مضاوي بتعجب / يا الله تدرين جتني رفعة تقول عمها فهد طلقها منه وتنفض جيبها انه راعي بلاوي وطلبوا الطلاق...،

سناء بغبن / مالوم ابوي يوم قال ليت علمتوني الين جنوبها با العقال الي مثلهن مالهن غير ضرب العقـــ ...؟!

صمتت سناء فجاء وقفزت الي مضاوي تحضنها من الخلف وتقبلها / والله اسفة ماهو قصدي...،

دفعتها مضاوي وهي تكتم ضحكها / يا بنت الحلال فكيني كسرتي رقبتي ...،

ضحكت شروق / فكيها من شرتس ماتبي ها الاعتذار وفكينا من علوم خلود الي تجيب الغثيان...،

افلتتها سناء وهي تنظر لوجها من قريب / زعلانة ...،

مضاوي تفك شالها وتلبسه / ماني زعلانة بس ابعدي بغيتي تموتيني...،

شروق بتعجب ودهشه / مضاوي انتي صابغة شعرتس ...،

مضاوي / قلت بجرب حسيته مانسبني برجع اصبغة اسود ...،

سناء / بالعكس يجنن عليتس وتغيير...،

شروق / من جد انا مع مضاوي الأسود أحلى عليها...،

ابتسمت بود / بالشعر الأسود احسها بنتنا...،

لكن با الأشقر مدري احسه يغير ملامحها ويصير شكلها غريب...،

سناء بتهكم / والله اللون الأشقر يأخذ العقل...،

مضاوي / لولا اختلاف الاذواق لبارت السلع...،

سناء / خلونا من شعر مضاوي وش رايكن من جد نحضر العرس...،

التفتت لشروق / استأذني من طلال وانا بقول لبدر ومنها تغييرين جو تشوفين ناس جديدة...،

شروق امسكت بجبينها / تذكرت كان في بالي شي ونسيته...،

اردفت / ترى الكوشة الي اختارتها خويتس بسيطة...،

اتوقع ما تبي تكلف عليتس كنت بقول لتس ودخلنا بستين موضوع...،

اختاري لها شي أفخم ...،

مضاوي / هي اعجبتها كوشتي وش رايتس أسوي لها مثلها...،

سناء / سوي مثل الدزاين حق كوشتس لكن الورد خليه نفس ألوان الورد الي هي اختارته بيجي خطير...،

شروق تنظر لسناء / والله يجي منتس يالدبيه

نظرت سناء لجسمها وامسكت بخصرها/ حرام عليتس أحس نفسي نحفانه عن اول...،

شروق بسخرية / مع نفستس نحفانه الي نحفانة مضاوي...،

مضاوي / من جد سناء تراتس سمنانه...،

شروق / من بلع المطاعم شوفي سنابها تصويرها لأكل المطاعم مثل تصويري للقهوة قبل...،

سناء بتأفف / البركة با اخوتس الي ما يعطي فرصة اذا ما لقى شي جاهز على طول ان ما طلب راح وجاب بنفسه...،

شروق / زوجتس على ما تعوديه...،

قاطعهم اذان المغرب وقفت شروق وسناء...،

مضاوي / وين تبون اقعدو تعشو معنا...،

شروق / بروح لأهلي اشوف امي بيطلعون زيارة للمدينة وعمره هي وابوي الأسبوع الجاي...،

سناء / وانا ودي اجلس لكن تعرفين الحب عنده دوام بكرة وبجهز أغراضه...،

خرجوا سناء وشروق ودخلت مضاوي صعدت الي غرفتها لتصلي المغرب...،

.


.


.