كاتب الموضوع :
طيف الأحباب
المنتدى :
قصص من وحي قلم الاعضاء
رد: للحب سجناء
الفصل السادس
في غرفة مضاوي تدخل سعاد وتجلس بجانب مضاوي المختبئة بين اغطية سريرها / وش عندها دكتورة العاصف استسلمت من اول جولة
مضاوي من تحت الغطاء / ابي انام وما ابي اسمع اي شي
سعاد تسحب الغطاء / قومي دافعي عن حقوقتس ماهو دعستي راستس بها البطانية مثل النعامة
مضاوي ابتلعت غصة بحلقها وبوجع / دعست راسي لأني جبانة
سعاد امالت فمها بسخرية / تدرين عاد دور الضعيفة ابدا مايناسبتس
اردفت بهدوء / مضاوي انتي عارفة كم سنة بيني وبينتس
وبسخرية من نفسها / لو انا معرسة اول مارف قلبي الخبل الي وداني بداهية لخايب الرجا كان عيالي وبناتي اكبر منتس
ومع هذا أحس انتس انتي اكبر مني احب استشيرتس وارتاح إذا سولفت معاتس
زفرت بوجع / حتى نواظر اختي الوحيدة ما تدري با اشياء كثيرة بحياتي انتي تعرفينها
مضاوي بحزن وتعب / والله تعبانة أجلى أي كلام عندتس بعدين
سعاد تطبطب على ظهر مضاوي وتقف لتغادر / ترى ابوي تراجع عن الموافقة على ثامر يقول إذا ما تبيه خلاص مو لازم
مضاوي با اصرار/ بس انا ما تراجعت وموافقة وابيه وسكري الباب وراتس
خرجت سعاد وتركت خلفها مضاوي تبكي بصمت
.
.
.
في غرفة الجد
امام باب غرفة الجد المفتوح وقفت سعاد التفت لها الجد الذي كان يمسك بمصحفه واغلقه بحنو / هاه كلمتيها
سعاد / أي يبه كلمتها وتقول موافقه وماهي متراجعة
الجد/ زين زين وان شاء الله انها ماتندم والله يوفق بينهم بخير
اردف / ما قالت تبي شي
سعاد / لا يبه انت بس ارتاح وما عليك وهي محد مقصر معاها ان شاء الله
.
.
.
في ملحق بدر يجلس بدر وثامر
بدر بفرح / كلمت ابوي وكلم عمي مساعد خلاص بنفحص سوى حجزت موعد خلاص
ثامر يبتسم / الف مبروك الله يوفقك ويتمم لك بخير
بدر / الله يبارك بعمرك وش فيك احس خاطرك ماش
ثامر بنبرة غامضه / لا ابد بس يمكن يجد علم جديد
بدر بتوجس / عسى ماشر وش العلم عساه علمن طيب
ثامر / والله انا بالنسبة لي طيب وخله بوقته لاتصير فضولي
بدر يضحك / ماودي اضغط عليك اعرفك ياخبر اليوم بفلوس
ثامر يبتسم / بكرا يصير بلاش
بدر / وش سويت بشقتك للحين مسكرها ما ودك نطلع بكرا نشوف الأثاث
ثامر / على حالها ويمكن أسلمها خلال ها الاسبوع
بدر با استنكار / خير وش تسلمها الشقة مره ممتازة وجديدة وموقعها حلو
ثامر / مو مشكلة ودك نطلع كوفي
بدر / لا والله ودي نطلع للممشى لكن الجو حر مووت
أردف بممازحة /الله يعينك عرسك بعز الحر
ثامر يبتسم / وعرسك بعد مسوي طالع منها جو الخرج والرياض واحد
بدر / لا انا بس ملكة الزواج بين الترمين السنة الجايه
ثامر با استغراب / غريبة كل ها التأجيل والاغرب ان عمامي وافقو تقعد متملك كل ها الفترة
بدر يضحك / والله من كثر مازنيت على راس ابوي والتأجيل مني
عندي دورة بالشرقية تخلص على إجازة الربيع
وما ابي ارتبط بعايلة وكذا لين أخلص
وبعدين عش الزوجية يبي له شغل وااجد
ثامر بتعجب / ليش ما انت ساكن مع عمي
بدر / لا والله خالتك النوري ماتبي أحد عندها بنزين الملحق هذا مؤقت لين اشتري بيت والا ابني با الأرض الفاضية الي جنبنا
ثامر با استغراب / غريبة في ام ماتبي ولدها وزوجته عندها
بدر / اكيد كل ام واب يبون عيالهم تحت نظرهم
لكن امي وابوي عندهم فلسفة بالحياة غير
يبونك تعتمد على نفسك من بداية حياتك
اول طريق للاعتماد عندهم الاستقلالية بسكنك والحمدلله ماهم محتاجيني
ثامر / لا تقول كذا لاهم ولا انت تستغنون عن بعض
بدر / لاتفهمني غلط اقصد ان ابوي وامي الله يحفظهم مقتدرين ماديا وللحين شباب وبصحتهم
والله لايحوجهم لأحد من خلقه اكيد انا إذا ماشفتهم يوميا اوما سمعت أصواتهم احس يومي كآبه
ثامر / الله لايحرمهم برك ولايحرمك رضاهم
بدر / آمين
ضغط ثامر على جبينه با ارهاق وأغمض عينيه
بدربا استفسار / ثامر فيك شي
ثامر زفربضيق / ابد سلامتك
بدر با إصرار/ يا رجال لا تهرب ماني غشيم عنك انت مضايقك شي
اعتدل بدر بجلسته / قل فضفض ناقصك شي ترى الجيب واحد
ثامر / لا الحمدلله الخير واجد وراتبي توه نازل
وبا امتعاض وتذمر/ بس شوي مشاكل بالدوام
بدربا استغراب / قبل كم يوم تقول شغلك ماشي تمام وش الي جد عليك
ثامر / مو كذا بس واحد من الموظفين عرف بموضوع السجن وأقلقني با اسئلته وفضوله
بدر / لا تعطيه وجه وبينثبر عنك
ثامر با اشمئزاز واحتقار / بلاك ما تعرفه من عرف وهو ناشب لي كيف وشلون وكيف قتلت والسبب
لدرجة امس بغيت اكسر وجهه لو ما استحيت من أبو سامي يا الله امسك اعصابي
بدر / اشوفك جاي بدري اليوم
اخذ ثامرنفسآ عميقآ / استأذنت وجيت قلت بغير جو شوي إذا رحت لدوام احس اني مقبل على جهنم عكس اول ما توظفت
بدر / طيب استقيل ودور لك وظيفة غيرها
ثامر / لا مستحيل اترك شغلي بها الفترة ما ابي أحرج عمي فهد
وبعدين المجموعة الي معاي والله انهم كفو الا هذاك الغثيث
بدر / لا احراج ولا شي اهم شي راحتك
ثامر / الوظيفة أساسا هذي ماهي هدفي يعني شي مؤقت بس أخلص من سالفة ها الزواج
مسح وجهه متابعآ لكلامه/ ابي اتفرغ لدكتوراة هذي بعد يبي لها ذهن صافي وتخطيط مسبق
بدر / عاد انتم يا الاقتصاديين كل شي لازم تخطيط
وبود ومحبة ابتسم / الله يوفقك ويسهل امورك
يدخل محمد بوجهه البشوش ويسلم / هلا ثامر وينك يا رجال فاقدينك
وقف ثامر سلم وجلس / هلابك انت الي مختفي وينك
محمد يجلس ويحذف الملزمة على ثامر/ هذا الي مخفيني اذاكر هالمادة مره صعبة
ثامر يقلب الملزمة ويضحك / والله سهلة لكن انت شكلك لعاب
محمد يضحك وبمسكنه مصطنعة / ياربي مدري من اناقش واحد معاه ماجستير وش أقول يعني
زي واحد بسادس بيقنع واحد باا لروضة ان جدول الضرب سهل
بدر يضحك / ما لقيت الا محمد تناقشة يتعبك ولا يتعب عنده تبريرات عجيبة
والا كيف اقنع فهد العاصف بجلالة قدرة انه يحول من قسم لقسم
ثامر يقلب بصفحات الملزمة/ والله ممتعة ها المادة خصوصا ومايبي لها شي احفظ فقط ياكسول
التفت لبدر / ويمكن خيره انه حول قانون يقدر يعطي فيه خصوص ها القسم يبي ناس مثل محمد كذا
محمد / رح ياشيخ الله يوفقك على ها التشجيع ويفتحها بوجهك ويسخر لك دكتورة العاصف
أردف / نسيت ابارك لك ابوي يقول بيشقلونك انت وبدر مع كراعينكم لعش الزوجية
تجاهل ثامر تعليقة وانشغل بالملزمة ودون ان ينظر له سأله / الحين وش الصعب في ها المادة
محمد ينظر لبدر با استغراب واستفهام
رفع بدر كتفيه بمعنى لا اعلم
محمد المستغرب لتجاهل ثامر لمباركته / لا بس المادة مره طويلة حاولت اختصرها ما قدرت
ثامر مد يده لمحمد / عطني قلم واختصرها لك المادة هذي دارسها بقسم الاقتصاد
اعطي القلم لثامر / والله مدري وش ادعي لك شلت عني هم
ثامر / لا تدعي ولاشي نبيك تنجح يا محامي العاصف وتريح عمي من همك
بدر / اشغلك الله يصلحه خلص له الملخص
أردف وهو ينظر لساعة هاتفه / اذان العشاء على وشك بنتعشى بدري وبنطلع نمشي انا وانت
محمد يضحك / ماتبوني امشي معكم
بدر ابتسم بسخرية / لو نبيك قلنا لك تعال
اردف وهو يحذف خدادية بجانبه / ذاكر ترى الاترام الصيفية نعمة تخليك تلحق ربعك
محمد وهو يمسك بها / ابشر يا حضرة النقيب المعرس
محمد يضرب جبهته بتذكر / نسيت اعلمك شرقاوي كلمت قبل شوي
وطار عقلها يوم قالت امي أنك بتملك انت وثامر
تقول أقرب حجز بتجي
بدر يضحك / مهبولة هذي توها مسافرة وبتترك سويسرا واجوائها الجميلة عشان تحضر ملكة والله مهي صاحية
محمد / ليش ماتعرف اختك عند سناء والعنقا ما تلاعب
يمكن لو يخيرونها بين زوجها وبين الثانئي المرح اختارتهن عليه
بدر بممازحة / ما نسمح لك تجيب طاري محارمنا
ثامر يمد الملزمة لمحمد
بدر / هذا انت ازعلت ثامر بعد وهون ماعاد هو بمحدد لك شي
ثامر يبتسم / لا والله خلصت خذها وذاكر الي حددته لاتحذف من راسك شي
محمد يقلب أوراق الملزمة با انبهار وتعجب / ما شاء الله عليك بسرعة خلصتها
بدر / اذكر الله وعطنا عرض مقفاك بنسبقك للمسجد
.
.
.
بعد صلاة العشا في بيت الجد
الجد ينادي الخادمة / وين مضاوي للحين نايمة
الخادمة / ايوا هي في نوم يقول مايبي ازعاج
الجد / روحي اقعديها تقوم تصلي وخليها تجي قولي جدتس يبيتس
طرقت الخادمة ودخلت واضاءة النور
مضاوي تضع يدها على عيناها وبتذمر / ليش تفتحين النور وش تبين
الخادمة / بابا يقول قومي صلي وتعالي بسرعة
تجلس مضاوي مستنده لظهر السرير / خلاص جايه
الحين كيف افهمه ماعلي صلاة وفوق هذا ماالي خلق اشوف وجهي بالمراية
يااليت جدتي ما ماتت كان الحين مرافقة معها ومرتاحة من الصداع كله
تأففت بقهر وتذمر / الله لا يوفقك ياثامر ما ادري منين طلعت لي وخربطت حياتي
التفت للخادمة الواقفة / وانتي للحين واقفة روحي خلاص بغسل وجهي واغير ملابسي وانزل
.
.
.
بعد ربع ساعة عند الجد في الصالة
تقف مضاوي امام الجد / بغيت شي الشغالة تقول أنك تبيني
الجد يوسع مكان بجانبة / تعالي اجلسي جنبي ابيتس
مضاوي تجلس حيث أشار الجد سعد
الجد بحنان / اشوف خاطرتس متعومس انتي للحين زعلانه على جدتس
مضاوي ببرود / لا زعلانة ولا شي خلاص انتو ماتبوني أوافق هذا انا وافقت خلاص
اردفت / لكن لي شرط بعد
الجد يبتسم / قولي الي تبين
مضاوي / ابي العرس نفس يوم الملكة وما يتأجل شي
الجد / والله يابوتس قلته وعارضوني يقولون شهر ويا الله عساه يكفي الجهاز
تقف مضاوي / انا قلت الي عندي وانت فهمهم ومهو لازم هالجهاز بنجهز عقب
الجد ابتسم / ابشري
احضرت الخادمة عشا الجد
التفت لها الجد / اقعدي معي نتعشى
مضاوي وهي تغادر / ما ابي شبعانة عليك بالعافية
.
.
.
بدر وثامر يدورون على الممشى
اتصال من الجد لهاتف ثامر / تعال ابيك تجي
ثامر بتوجس / فيك شي ياجدي
الجد / مافيني الا الخير عسى مكانك قريب
ثامر / ماني بعيد حول البيت
الجد / اجل بسرعة تعال احتريك باا لمجلس
الجد يقفل الهاتف تارك ورائه علامات استفهام على وجه ثامر
بدر با استفهام / وش فيه جدي
ثامر / لا بس يبيني ضروري الحين عنده
بدر / خلاص رح له انت وانا بكمل مشي
ثامر / أقول بس تعال معي نشوف وش فيه
اردف وهو يمسك بذقنه / وهذا وجهي إذا ما بنت هيام مسويه حفلة جديدة
يضحك بدر / انت وش بلاك عليها هذا هي للحين في بيت جدي وانت حاط راسك براسها
.
.
.
بعد عشر دقايق
في مجلس بيت الجد يجلس الجد ينتظر ثامر
يدخل ثامر وبدر
بدروهو يقبل انف الجد بود / عسى مافيك شي
الجد يبتسم / لابالله يا المهايطي مافيني غير الخير وبعدين بغيت ثامر انت وش منططك معه
بدر ابتسم بود/ عساني ماخلا منك والله خفت عليك كنت مع ثامر يوم تتصل
الجد يأشر بيده / اجلسوا مافي غير الخير
اردف / مضاوي قبل شوي سولفت معها وجات بعلم مدري يمكن يجوز لك ويمكن مايجوز
ثامر بفرحة ابتسم / الا جايز لي ولا انا بقايل شي والله يستر عليها ويوفقها
الجد يبتسم / وش فيك تضحوك وانا مابعد قلت شي
أردف بفرحة / مضاوي تقول تبي العرس بنفس يوم الملكة ولو الملكة بكرا تبي العرس بكرا
ثامر بصدمة وعدم استيعاب / هذي ماهي صاحية
بدر يضحك / شكل صاير تطورات انا ما أدرى عنها
الجد / ما علمك خويك زين قضب العلم
أردف الجد / عاد انت رتب امورك وشف وش ناقصك وعلم عمانك ما بعد قلت لهم شي
وقف الجد / انا بدخل انام ورانا صلاة جمعة لا تسهرون
دخل الجد الي داخل المنزل تارك خلفه ثامر المذهول وبدر المستغرب
بدر / في شي ما أدرى عنه
ثامر بتذمر / أي صار اليوم العصر
قام بدر من مكانه وجلس بجانب ثامر / اهاااا وانا اقولك فيك شي تقول لا
اجل هذا العلم الجديد يا الله عطنا علومك
ثامر / علومي اليوم ناداني جدي وعمتي سعاد داخل ونادو مضاوي وتناقشنا
واحتد النقاش
بدر بذهول يقاطعه يشير بيده / اصبر اصبر ماني فاهم شي انت وش قاعد تخرف
ثامر / كلامي واضح قاعد ارطن
بدر / ماني مستوعب فهمني شوي شوي
الحين انت ومضاوي تقابلتو قدام جدي وعمتي صح
ثامر / ايوا صح
بدر / والسبب طيب
ثامر / السبب انا اعلمك مضاوي تبي شروط قالت نصها ونصها موهتها على بالها محد بيفهمها وتمشيها
بدر / كيف يعني وش عند مضاوي تموهه البنت كلنا دارين ان وظيفتها شي مفروغ منه
ثامر يتنهد / السالفة مهي وظيفة السالفة حضرتها تبي تكمل دراسة برا المملكة
بدر با استغراب / وانت كيف عرفت
اردف با استفهام / هي طلبت الشرط هذا
ثامر / لا طبعا ماقالت ولا شي حضرتها الكل ماهو فاهم وش تبي تقول عندي شروط وعندي شروط جدي وعمتي مافهمو وش تبي
يوم قابلتها قلت جيبي الي عندتس وش تبين عرفت من سياق كلامها ان اللف والدوران هذا كله انها تبي تكمل برا واجهتها وما انكرت
بدر يحرك رأسه با اعجاب / والله ما انت هين المفروض انت على طول وظيفتك با الادعاء العام والتحقيق
ثامر / والله أنك رايق
بدر / لا والله معجب فيك وبسرعة بديهتك
ثامر / تبي العلم الثاني بعد
بدر يضحك / يا الله وش عندكم بعد يا العاصف من علوم
ثامر بسخرية /يوم ضغط عليها جدي وفشلها قدامي
قالت انا موافقة وبدون شروط وماعاد ابي الطب كله وتهدد إذا كتبنا شرط انها بترفض العرس
بدر بدهشه يصفق كفيه ببعضها / اليوم يوم العجايب صدق
اول مره واحد من العاصف يقابل البنت الي خاطبها وجه لوجه
وبا استفهام / مضاوي الي حفرت بالصخر عشان تدخل طب بتتركه اكيد الدافع قوي مستحيل يكون كذا
ثامر هز رأسه بمعنى نعم / جدي او جعها بالكلام وقال لها إذا ماتبين ثامر اكيد في غيره
بدر بمعاتبة واستنكار / لا عاد الا مضاوي ما ينقال عنها كذا
البنت شهادة لله انها متربية ومؤدبة من صغرها محد نقدها كيف الكلام هذا يجي من جدي
ثامر / والله ماني مرتاح ومستحيل اصدق بنت ذيك الحرمة تطهر
وبتوعد يحرك رأسه / لكن ماعليه دواها عندي والله ياعوباتها وقو راسها لأطلعها من عينها
بدر يضحك / أقول بس تعوذ من ابليس يااخوفي هي الي بكرا تداويك وتجي عندي تدور الحلول الي تراضيها فيها
أردف / الحين خلنا نفكر وش بنسوي
إذا فعلن أصرت ان العرس مع الملكة يعني بالكثير قدامك أسبوع
رفع بدر هاتفه / بكلم ابوي واشوف وش يقول
ثامر يمسك بيده / أقول بس نزل الجوال شف الساعة كم
اجل اقوالك لبكرا شف لي الطريق لملحقك بروح انام
ضغط على صدغيه وأردف / راسي ذبحني من اصبحت وانا مالي شغل الا مضاوي وعلومها
.
.
.
اليوم التالي بعد صلاة الجمعة الجميع في بيت الجد المجلس الخارجي
مساعد / على البركة يبة ماسمعنا
الجد / الله يبارك بعمرك
سلطان / ماشاء الله صار الي تمنيته فهد يقول انكم اتفقتو تقدمون الموعد
الجد / خير البر عاجلة
اردف الجد / اخلصو شغلكم بسرعة ماعاد فيه وقت
فهد / ما عليك يبه لا تشل هم كل واحد بيمسك له شغلة ونخلصها
سعد بن مساعد بممازحة / جدي ربعن تعاونو ماذلو
لو تبي اليوم خلصناها
مساعد يلتفت لسعد/ ماشفنا منك الا السوالف إذا انت صادق بكرا مافي دوامات اطلعو لشقة ثامر اثثوها
ثامر / لاعمي الشقة انا بأثثها
مساعد / ماقلنا شي لكن اقلها الأساسيات
غرفة نوم مطبخ مكيفات هذي يبي لها شغل ومجبور فيها وبعدين كملو الباقي على مهلكم
سلطان يلتفت لثامر/ عطني مفتاح شقتك وانا بشوفها
ثامر / عمي و
قاطعه سلطان ومد يده/ أقول لاتحلف تراك بتكفر يمنيك
الجد بامر / ثامر عط أبو ماجد المفتاح
اخرج مفتاح الشقة من بين مفاتيحه ومده لعمه
سلطان / بطلع بعد صلاة العصر للخرج
خالد / يبه ما تبي لك خوي
يضحك سلطان / اكيد لو ماقلت سحبتك مع اذنك واخذتك
فهد / ابو ماجد ليش ما تخليها بكرا وانا اخاويك
سلطان / اليوم وبكرا ان شاء الله نروح
فهد / اجل احجز الأدوات الكهربائية كلها وبكر يركبونها الصباح مايمدي اليوم
اردف / المطبخ مايحتاج شفت صاحب العمارة مركبه
وغرفة النوم ومجلس الرجال خلها علي باخذها لهم من هنا يوصلونها ويركبونها ماتاخذ وقت
وباقي الأثاث انا اشوف ثامر وحرمته على ذوقهم يختارونها عقب
سلطان / خلاص شورك وهداية الله
بدر يهمس لثامر / الشقة وراح همها الحين بقى شغلك انت
ثامر / وش شغله مصدق بعد انت هذا عرس
بدر با استغراب/ اجل وش يسمونه
ثامر / على بالك العوبه هذي بتفوتها كذا انتظر فلمها التالي بس
بدر / والله انا ماعاد أتوقع وش بيصير لكن حنا بنسوي المتعارف عليه خلها تفلم على كيفها مردها لك رسنها بيصير بيدك
بنروح شوي تفصل ثياب وبتاخذ بشت وعطورات ونشوف وش ناقصك
نبيك تبيض وجهنا قدام الدكتورة
ثامر با استهزاء / ضروري يعني
بدرابتسم بود / ماعليك انت امش وراي وبتفلح
ثامر يبتسم / يا الله بنشوف اخر ها التمثيلية
.
.
.
عند النساء في بيت الجد
رفعة با ازدراء/ جينا من بعد صلاة الجمعة مباشرة مافيه الا الشغالات يحومن با البيت اسأل عن مضاوي يقولن نايمة وش ها النوم يا كافي
فزة / والله ما أدرى مثلي مثلتس ماشفتها للحين
نورة/ احسنو الظن يمكن البنت تعبانة
تدخل سعاد وخلفها نواظر
نواظر/ السلام عليكم ماشاء الله بدري جايين اليوم بالعادة كل أسبوع نسمع اعتذارات
نورة بضحك / عاد الا يوم الجمعة من تزوجت فهد والله مافوت جمعتكم الا بظرف قاهر
سعاد / قول وفعل يا ام بدر نواظر تمزح
رفعة بود مصطنع/ تعودنا على لسان ام عبد الله عادي تقول الي بخاطرها
نواظر تجاهلت تعليق رفعة و با استغراب / وش عندكم يا العاصف اغيب يومين اسمع عقبها قرارات مصيرية
سعاد / زي ماسمعتي ولد اخوتس وبنت عمتس يبون شكلهم يسنون سنة جديدة يرجعونا لزمن الطيبين عرسهم خطبة ملكة عرس با اسبوع
نورة / والله إذا جينا لصدق خير الزواج ايسره اهم شي الله يوفقهم
سعاد تضحك وبممازحة تغمزلنورة / الحمدلله يا ام بدر ان عرستس ماهو بوقتنا هذا والا فزعة فهد لتس خلت عيال سعد بن عاصف يبيعون بيوتهم كلها
نورة تضحك / لاوالله كان ماعرفتكم ولا عرفتوني
اردفت / وازين ماسوى عمي انه بيخلص عرسهم وش عاد يأجلون له
رفعة با انتقاد/ ماقلنا شي بس عاد ماهو كذا فجعني سلطان يوم قالي الصباح ترى ثامر قدم عرسه
سعاد / الله لايفجعنا بغالي هذي بشارة مهي فجيعة
نواظر تنهدت بحزن / أحسن قرار امي توها متوفيه والله مالنا خلق شي
نورة / فهد يقول كذا بعد عشا الرجال في بيت عمي والحريم في بيتنا
سعاد عقدت حاجبيها با امتعاض / وفهد يفتي من راسة كلها في بيت ابوي بيت ابوي كبيرويشيل الجميع
الصباح يوم كلمني قال مافي حريم انتم بس وإذا مضاوي بتعزم صديقاتها مايخالف
نورة با احراج / والله ما اقصد شي يا ام أنور قلت الي سمعتة وعلشان نكون شوي معزولين عن الرجال إذا البنات حبو يحتفلون وكذا
نواظر بغضب / عساكم بترقصون وامي توها متوفية
رفعة/ الحزن ماهو مرجع أحد يا نواظر وإذا البنات يبون ينبسطون مع مضاوي ماله داعي التنكيد
سعاد تتنهد بتذمر / اللهم طولتس يا روح بقوم اشوف الغدا
التفت لنواظر واشارة لها ان تتبعها
.
.
.
داخل المطبخ
نواظر / وينها العروس ماشفناها مافيه الا حريم اخوانتس متقابلات لحالهم
سعاد تضحك / جايات تعرفين في اكشن جديد با العايلة حتى ما انتظرو بناتهم
نواظر / الا صدق حاسه في شي مو طبيعي
سعاد / بعدين خلي نشيك على غدا العيال عقب نسولف بغرفة ابوي الجدران لها اذان
.
.
.
بعدها بربع ساعة بغرفة الجد سعد
سعاد تدخل على نواظر / تأخرت عليتس
نواظر بتعجب / وش شغل المخابرات هذا
سعاد بصوت منخفض/ ما ابي حريم اخوانتس يدرون بشي والحمدلله جو لحالهم والا السوالف بتكبر وتكثر حتى بنتي ما ابيها تدري
اردفت / البارحة صارت زوبعة ابوي قابل ثامر بمضاوي وتلاطشو بالحكي وهذا الي قدم العرس
نواظر با اندهاش وذعر / انتي وش تقولين تقابلو لا يكون مضاوي رفعت ضغط ابوي
سعاد / لا والله ابوي الي رفع ضغطها
نواظر / ابي اعرف السالفة من أولها
سعاد حكت لنواظر الموضوع بكامله
نواظر بغضب / ليش على كيفها ما تبي تكمل وش عقبه الا تكمل وهي ماتشوف الدرب بعد
سعاد / نواظر هدي اعصابتس تعرفين مضاوي وعنادها انا ماعلمتس عشان تقولين كذا
انا ابي نقنعها با أسلوب لاتضيع مستقبلها
نواظر / بطلع لها هي وينها ماشفتها من جيت
سعاد / اكيد حابسة نفسها بغرفتها ماتبي تشوف احد وهي أساسا تعبانة من امس عليها الدورة
انتظري العالم ذي تمشي ويفضى البيت ونشوفها انا وانتي
.
.
.
بعد الغداء وخروج الجميع
في صالة بيت الجد نواظر وسعاد والجد سعد
الجد يتلفت / وين مضاوي من أصبحت ماشفتها
سعاد بتردد / توها دخلت غرفتها بتريح شوي تقول مصدعه
الجد بخوف / بسم الله عليها وش فيها
نواظر / لا يبة مافي شي تخبر دلع عرايس
الجد / ايه زين
أردف الجد / دامكن مجتمعات لاتخلن بنت عمكن ترى مالها غير الله ثم انتن شوفن وش ناقصها
لا تخلون بنفسها حاجة
يخرج الجد بطاقة مصرفية من محفظته ويمدها لسعاد /عقب صلاة العصرروحن معها لسوق اقضو شغلها
اخذت البطاقة سعاد/ ابشر يبه مالك الا الي يرضيك ويرضيها
اردفت بممازحة / يبه لاتروع إذا سحبنا كل رصيدك
يضحك الجد / حلالها بنت حزام الي تبيه تشريه
يقف الجد مغادرآ لغرفته ونواظر وسعاد الي غرفة مضاوي
.
.
.
امام غرفة مضاوي
سعاد تطرق الباب المقفل / مضاوي افتحي الباب دارية انتس صاحية
مضاوي من خلف الباب / تكفين عميمه راسي مصدع وماالي خلق سوالف
سعاد بهمس / افتحي ماراح اتزحزح من مكاني لو لبكرا وانا واقفة
مضاوي تفتح الباب وتدخل نواظر وسعاد
نواظر با انتقاد/ السلام لله ماتعشيت البارحة انا وانتي
مضاوي تسلم على نواظر ببرود وتجلس على السرير
سعاد تهف على وجها / اعوذبالله وشلون جالسة بها الحرلا مكيف ولا شي
نواظر بمقاطعة / انتي شوفي البطانيات الي مكومة فوق السرير والله بعز الشتاء ماسويناها
مضاوي تتكتف بتذمر / والله حسيت اني بردانة وتغطيت فيها شي بعد والمكيف وقت الدورة ما افتحه
عندكم استفسارات ثانية نجاوب عليها
نواظر تجلس على كرسي التسريحة وسعاد بجانب مضاوي
سعاد با ابتسامة / ابوي قبل شوي يقول روحن مع مضاوي لسوق اقضو شغلكم
مضاوي بملل / تعبانة مالي خلق سوقه
نواظر / كيف مالتس خلق والعرس خلال ها الأسبوع عسى يمدينا نسوي شي
مضاوي / ما طلبت من أحد شي ولا ابي سوق
نواظر بغضب / خبال هو والا عناد فاضي
مضاوي بسخرية / والله عاد سموه الي تسمونه موافقه ووافقت وش تبون بعد
سعاد امسكت يدها بمودة / بالله هذا كلام مضاوي العاقلة تبين تضحكين العالم عليتس اعرست ماجهزت
مضاوي با امتعاض / العالم وش دخلها هذي حريه شخصية انا راضية اروح له بملابسي الي علي احد له شي عندي
اغمضت عينيها وامسكت برأسها
سعاد بخوف وضعت يدها على يد مضاوي / وش فيتس تمسكين راستس
نواظر / ماتشوفين عيونها كيف مفقعة ماتدرين نوم ماتدرين بكى
وبا استهجان / وانتي مستغربه انها تمسك راسها زين ما انفجر مخها
مضاوي تزفر بتذمر/ والمطلوب
نواظر / المطلوب قومي جهزي نفستس بنطلع السوق واتركي عنتس العناد
مضاوي تتمددعلى السريروتتغطى بالبطانية / إذا طلعتو سكرو الباب
سعاد بمحبة تسحب البطانية عن مضاوي / أقول قومي قدامي يا لعنيدة اذان العصر على وشك
مضاوي بمعاندة/ ماني قايمة وجهاز ما ابي ويكون بعلمكم من الغرفة هذي للخرج لقبري
نواظر / وش ها الكلام ودراستس يا ام قبر كلنا بنروح لقبرونا لكن وحنا موجودين بها الدنيا نكافح هذي سنة الحياة
مضاوي / دراستي ماعاد ابيها دفنتها مع امي النيرة
نواظر بغضب / انتي وش تخرفين يوم قربتي توصلين تراجعتي يومتس كذا ليش رجيتي الدنيا عشان تدخلين طب واخرتها كذا تفشلينا
أبعدت مضاوي البطانية با انفعال وعقدت حاجبيها با امتعاض/ وانتي هذا همتس الفشيلة
نواظر تصرعلى اسنانه بعصبيه وتشير بيدها لمضاوي/ شوفي مضاوي اتركي عنتس الجنان والعناد جهاز بطقاق
مهو لازم تجهزين منتس لنفستس لكن الدراسةلا
مضاوي تشير با اصبعها لرأسها وبعناد / مستقبلي وبكيفي محد له عندي شي
نواظر /انتي مستوعبة للخطوة الي انتي بتقدمين عليها
متفوقة بدراستس من اول يوم دراسي بحياتس الي الآن وفجاءه توقفين انتي حاسبة حساب كمية الاشاعات الي بتطلع عليتس
مضاوي / والله تعب محد تعب معي الا جدتي الله يرحمها ومحد له فضل علي الا جدي سعد
والتعب الي تعبته انا معجبني اني اضيعه والاشاعات شي متعوده عليه بنت هيام
نواظر بقهر وغيض تحرك رأسها / يالجاحدة ونسيتي وقفتي معاتس يوم الكل نشب لتس وقعدت على روسهم لين لينتهم لتس
مضاوي بقهر ومرارة / ليتس ما لينتي احد لي ولا دخلت ها الكلية من أولها
انهمرت دموعها بغزارة / حتى دراستي الي هي جهدي وتعبي صارت منه علي
مسحت دموعها بكمها / فزعتس لي هدفها تبين تتفاخرين قدام اهل زوجتس الي كلهم دكاترة انه في عايلتس دكتورة يعني ماسويتها لله
نواظر بغضب تستعد للخروج /والله محد بياكلها غيرتس والله يعين ثامر عليتس والله ماتستاهلينه
التفتت لها بقهر / وقفتي معاتس والله علشانتس انتي وعلشان مستقبلتس والا اهل زوجي الي كلكم ماسكينها علي تراهم ارقى من انهم يقارنون احد با احد
تخرج نواظر وسعاد تقف بتعجب ولوم / ابد انتي ما انتي مضاوي الي اعرفها
اردفت / انا طالعة لسوق بعد الصلاة وبتقضى لتس
مضاوي بمقاطعة / قلت لكم ما ابي شي
سعاد / عشان ابوي الي ضايق صدره عليتس وادري بيجي يوم تشكريني فيه
خرجت سعاد تاركة ورائها مضاوي الغارقة بدموعها
.
.
.
في صالة بيت الجد نواظر وسعاد
سعاد / انا بطلع السوق تجين معي
نواظر با استحقار تمط فمها / تخسي هي وجها والله مااتعب نفسي على شانها خليها تنقلع
سعاد / اقصري صوتس ابوي لايسمعتس
انتي داريه ان مضاوي معصبه والكلام الي تقوله من زعلها
نواظر / ياشيخة تحمد ربها بعد واحد مثل ثامر اخذها
سعاد با انتقاد / مضاوي ما تستاهل منتس كل ها الهجوم ليت ماقلت لتس شي
ابي فزعتس نقنعها زدتي النار حطب
نواظر لبست عبأتها /انا ماشية لبيتي ماني فاضيه لجنان مضاوي
بعدها بدقايق
سعاد تتصل بسناء / هلا سنو وينتس ماجيتي لبيت ابوي
سناء بممازحة / امي عيت تقول اتركي عنتس تنطنط قدام ام بدر كأن خالتي نوره ماتعرفني
سعاد بضحك / طيب لتس والا لذيب
سناء / يخسى الذيب وش بغيتي نذبح رفعة وامها
سعاد تضحك / الله يقطع شرتس لاتسمعتس رفعة
اردفت /ابي السوق وابي لي مرافق تجين
سناء / قدام ابشري بالحالتس والا معتس احد
سعاد / لا بطلع مع سواق ابوي ابي أغراض لمضاوي
سناء / أي صدق نسيت بسألتس من امس ادق على جوالها مقفل
سعاد / خلتس من الثرثرة بالجوال السوالف إذا تقابلنا
القاتس بعد الصلاة مرتزه قدام باب بيتكم
سناء / حاضر ابلة سعاد بستأذن امي وعسى ماتعارض بعد
سعاد / انا بكلمها وان شاء الله ماتخالف
.
.
.
بعد عدة ساعات في المجمع التجاري
تجلس سناء بتعب في المصلى/ يا الله عميمه خلاص رجولي تكسرت
ريما بتأفف / انا ايدي ما عاد احس فيها من كثر الاكياس ليت جبنا معنا شغالة تساعدنا أوف
سعاد / الله يعطيكن العافية والله انجزنا باقي أشياء بعد الصلاة بناخذها
ريما / انا اول مره اشوف عروس تخلي غيرها يتقضى لها
سعاد / مضاوي تعبانة شوي وانا اعرف ذوقها نستغل الوقت عشان نخلص قبل نهاية الأسبوع
سناء بممازحة / بذي صدقتي ماهو تعرفين ذوقها وبس
المشكلة تقتنع بذوقتس لو خيشة تحسها منتس حرير
سعاد بمحبة / الضوة من صغرها وانا لبسها انا الي اشتري لها وأنسق لها ولا تنكرن والله انها اكشخكن
ريما تضحك / عشانها حلوه أي شي يلوق عليها ونشوفه عليها واااو
سعاد بمودة / أي والله يزينها لو ما راسها اليابس
اردفت / يا الله نكمل كم شغله باقيه ونرجع ما عاد فيني حيل
سناء / كلنا ما عاد فينا حيل خليتس جالسة وانا وريما بناخذ الأغراض لسيارة ونرجع لتس
سعاد / اجل تلقوني عند محل العود الي بالزاوية
.
.
.
في نفس المجمع
ثامر / يا اخي تراك اقلقتنا مابقى عطر ماشريناه ولا بقى حوسها ما حسناها خلاص
تراه عرس ماهو هجرة السيارة مليتها أكياس وبعدين الأسواق بكل مكان
بدر بممازحة / ما انت مهاجر لكن كم مره الواحد بيعرس
ثامر بتذمر / يعرس أربع مرات او لين يلقى الي على مزاجه هذا ماهو عذر
بدر / أقول بس تعال خلنا ندخل محل العود هذا عنده عود بيعجبك
.
.
.
داخل محل العود
سعاد تتحدث بهاتفها بتذمر / أنتن وينكن خلصت بحاسب واطلع ماجيتن
سناء / ليش ما تعرفين ريما إذا دخلت محل اكسسوارات تحنطت
بدر بمقاطعة / هلا عمة وش ها الصدفة الحلوة
سعاد لسناء / اسبقوني لسيارة
اردفت بترحيب / هلا والله وش عندكم
بدر / ابد نقضي للمعرس
ثامربا استهزاء / للمعرس وبس وانت يعني طالع منها
بدر / عمه ليش جايه بلحالتس لو داري مارينتس انا وثامر
سعاد / وش تمرني معي البنات
بدر يتلفت / معكم احد من العيال والا بس البنات
سعاد بتهرب / خلصت الحين طالعه لهم
بدر با انتقاد / اكيد بالحالهن هذيلا مايستحن
أردف بتساؤل/ من الي معتس
سعاد بهمس / وش فيك فضحتنا تصارخ الي معي بنات كبار ماهم صغار
ثامر بهدوء / عمه تراه صادق روحي شوفيهم انتي وياه وخلي اغراضتس بحاسب عنها واجيبها معاي
بدر يهمس بغضب/ ثامر اطلع مع عمتي وانا الحقك لأسوي سالفه الحين
سعاد بتوتر / انا طالعة والاغراض ماهو لازم وقت ثاني ماهي ضرورية
خرجت سعاد
بدر بغضب / الحقها انت وش قاعد تنتظر
ثامر / هد اعصابك ماصارشي وش فيك طرطعت
خرج بدرخلف سعاد
و بقى ثامر يحاسب على أغراض سعاد
.
.
.
اتصلت سعاد ب سناء / وينكم بسرعة اطلعن لسيارة لقيت بدروعيونه شرار يوم درى انكن داخلات محل بالحالكن
سناء بسخرية/ سلامات وش عنده ترانا بسوق ماهو مرقص
سعاد بهمس / انا طالعة لسيارة الحقوني
سعاد تقفل جوالها واتجهت للمواقف
ريما بخوف / سناء وش فيها امي وش صاير
سناء بغضب مكتوم وسخرية / وش صاير يعني بدر شاف عمتي وقالت له ان حنا معها
ريما تسحب سناء مع يدها / بنطلع مو لازم خلاص ماعاد ابي شي
سناء بعناد / والله الي ماطلعت لين تاخذين الي تبين
ريما / يا الفضيحة إذا بدر عرف مكانا والله يقلبه على روسنا
سناء / انا حلفت وانتي خوذي الي تبينه انتي الي تأخرينا ترى
بعد دقائق تخرج سناء وريما من المحل
سناء / وهذا بس الي اخذتيهم خلخال واسوارة
توقعتس بتقشين المحل كله
ريما / يابردتس انا عظامي ذابت من الخوف متى أوصل السيارة بس
والله اخذتهم تسكيته لتس
سناء بمعاندة/ تبين نرجع للمحل خاطرتس بشي
ريما با انفعال وذعر / يا مجنونة تدرين من هو بدر
سناء / وإذا يبلط البحر وش سوينا نتسوق ماسوينا جريمة
ريما / تسوين نفستس ما تعرفينه الشرير أبو لسان سم هذا
اردفت تنفض يدها بخوف /ياارب نسبقه للبيت قبل يشوفنا
.
.
.
اما احدى بوابة المجمع التجاري
سعاد داخل السيارة وبدر يقف امامها
بدر بغضب / بسرعة كلمي الي جو معتس واستعجليهم
سعاد / يابن الحلال هد اعصابك ما صارت تراهم حريم ماهم بزران
بدر / ومن هن الحريم من اليوم اسألتس تتهربين
إذا حريم عماني امشي الحين لكن إذا من البنات شغلهم عندي
ثامر يصل ويفتح باب السيارة ويناول الاكياس لسعاد / عمه اغراضتس
يقاطعه رنين جوال سعاد
ريما / ماما وينك طلعنا ما لقيناك بالمواقف
سعاد بصوت منخفض/ طلعت من المواقف عند بوابة رقم واحد بسرعة تعالو الله يعدي ها الليلة على خير
التفتت لثامر بهمس / فديتك تكفى كمل معروفك وخذ خويك لايسوي لنا سالفة شفه يحوم حول السيارة تقل وحش
ثامريذهب لبدر ويمسك يده / تعال معاي البنات خلاص على وصول
بدر بغضب ينفض يد ثامر / انا بشوف الي عمتي ماتبي تقول مين
الي يدوجن لا حسيب ولارقيب
تصل سناء وريما لسيارة ويركبون بسرعة
سعاد / سليم حرك بسرعة
بدر بغضب يقف امام السيارة ويضرب مقدمتها / وقف لا تحرك
يقف السائق ويطفئ محرك السيارة
تقدم وفتح باب الراكب الامامي / من انتم الي مع عمتي
سعاد بترجي / بدر يكفي عناد استرنا يشوفونك الأمن تسوي لنا سالفة
بدر با إصرارويضرب اعلى السيارة انا للحين مهدي اعصابي من انتن من البنات
سناء بهمس لريما / انا داريه بيتأكد انا مع عمتي او لا
ريما تفرك يدها بخوف وبهمس / سناء لا تقولين اسمتس بتصير سالفة صدق
قولي صديقة ريما يمكن يتفشل ويروح
سناء بتحدي / نعم يابدر انا سناء المساعد والي جنبي ريما بنت عبد اللطيف
بدر بغضب / انتن مالكن والي تدوجن بالمحلات بالحالكن لا وليل بعد
ماتستحن جيتن مع عمتي تنثبرن معها لين تقضن شغلكن
يقاطعه رجل الأمن
رجل الأمن / خير يا اخوي معترض للعايلة وش عندك
بدر يلتفت له / وانت وش دخلك
ثامر بمقاطعة / هذولا أهلنا يا الاخو
رجل الأمن يتجة لباب السائق ويسأله / تعرفون هذولا
بدر لحق برجل الامن واشتبك معه / خير مدخل راسك بالسيارة
ثامر يفك الاشتباك ويقف بينهما / توكل على الله قلنا لك أهلنا
سعاد بخوف تنزل من السيارة / الله يجزاك خير هذولا عيالنا تأخرنا عليهم وانزعجوا شوي
التفت ثامر لسواق / سليم يا الله بسرعة للبيت
حرك السائق وخلفه بدر وثامر تشابكوا مع اثنين من رجال امن اخرين اتو مسرعين
.
.
.
وصلت سعاد لبيت الجد بعد صلاة العشاء
سعاد تنزل عبايتها وطرحتها وتنادي على الخادمة / سوناتي نزلي الأغراض الي في السيارة كلهم ودخليهم غرفة امي
ريما بخوف / ياماما تكفين بنروح لبيتنا
سناء / وش فيتس يا الجبانة محد بداخل هنا
اردفت / أقول بس تعالي نتغسل عن غبرت السوق ونعين خير
سعاد بملامة / ليه ما انطميتي بس ثورتي ها المهبول علينا والله اعلم وش صار ورانا
سناء رفعت حاجبها بشماته / يستاهل مااجاه وش خايف علينا منه كنا بزران
الكاشيرات والبايعات كلهم حريم وريما وقفت عند كشك ما دخلت داخل محل تشتري
سعاد بحنق / ياقو راستس
توجهت سناء لدورة المياه وتركت سعاد وابنتها المذهولتين من برودها
.
.
.
بعدها بقليل في صالة بيت الجد تجلس سعاد
دخلت سناء
تتبعها ريما
سعاد بتذمر / امتس تراها ازعجتني تقول وينها
سناء تمسح يديها بمنديل / اعوذ بالله ادوشنا ولد اخوتس حتى جوالي نسيتة ماشفتة انا الحين بكلمها
فتحت سناء هاتفها واتصلت / هلا يمه بقعد شوي في بيت جدي مسكتني مضاوي حلفت ما اروح بتوريني اغراضها
كتمت ضحكتها / لا مايحتاج تجين تاخذيني ماني مطولة عمتي سعاد قالت انا ارجعتس
يقاطعهم صوت الجد بفرح / حي الله بناتي
ريما وسناء يسلمون على الجد
سناء تقفل جوالها / الله يحييك جدي
اردفت / وين مضاوي ما اشوفها للحين ماقعدت
الجد / قبل اطلع للمسجد أرسلت الشغالة عليها قالت نايمة
اردف بضيق / من امس ماشوفها الا إذا أرسلت عليها
سعاد بممازحة/ عروس ومستحيه
سناء / ما عليك جدو الحين أصلي واروح اشوف ها المستحية
يجلس الجد بالصالة في مكانة المعتاد / سعاد وش سويتو اربكم خلصتو شغلكم
سعاد قامت وجلست بتعب بجانبه / باقي يبه أغراض الوقت ما امدى والسوق زحمة
تخرج سعاد البطاقة وتمدها / هذي بطاقتك
الجد / خليها معتس لين تخلصن كل اشغالكن وما ابي الضوه ينقصها شي من الخيط للمخيط
سعاد تمسك بيد والدها وتقبلها / الله لايحرمنا منك يا ابوي
ريما بهمس لسناء / يا حظ مضاوي بجدي والله الابو ما يقول كذا
سناء / اذكري الله بسم الله ما كنتي قبل شوي منصرعة من الخوف
ريما / لا ابشرتس راح الخوف يوم شفت جدي أدرى محد واصلنا
تقف سناء / بروح أصلي واكل لقمة فاطسه جوع وبعدين نشوف سالفة العروس المستحية
سعاد / انا بعد بقوم أصلي
.
.
.
بعدها بربع ساعة
سعاد تجلس عند الجد بالصالة
الجد / وين البنات
سعاد / الحين يجونك راحن لمضاوي
الجد / خلي الشغالة تجهز عشاي بتعشى وارقد
سعاد تقف / ابشر الحين يجيبونه لك
الجد / ترى من قمتن اسمع صوت جوال ماسكت
سعاد تفتح شنطتها / صوت جوالي شكل عيالي يدوروني
يضحك الجد / عساهم مايفقدونتس
تبتسم سعاد / وعسانا ماننحرم من دعواتك
.
.
.
اخذت هاتفها واتجهت للمطبخ
فتحت هاتفها واتصلت بثامر / هلا وينكم
ثامر / تونا داخلين ملحق بدر وينتس عن الجوال من اليوم بدر معلق جواله يدق عليتس
مافك الجوال لين شاف السواق وسأله عنكم
سعاد / أي تو اشوف جوالي لقيت له خمسين اتصال
اردفت / هو عندك
ثامر / لا دخل داخل بيتهم
سعاد / طيب تجي انا في بيت ابوي شوي وماشيه لبيتي
ثامر با ارتياب / فيه شي ضروري
سعاد / لا والله سلامتك بس بدردش معك قبل اروح بيتي
ثامر/ خلاص انا طالع الحين تلقيني بالمشب الي برا
سعاد التفتت للخادمة/ ميري بسرعة جهزي عشاء بابا وخوذيه لصالة
وعشا البنات طلعيه لغرفة مضاوي
.
.
.
قبلها بربع ساعة
سناء امام غرفة مضاوي تطرق الباب وتدخل
سناء بتعجب / بسم الله وش الظلام وهالحر
تتفتح النور وشباك الغرفة
مضاوي وايديها على عيونها / اعميتي عيوني طفي النور
سناء تسحب البطانية / قومي من متى خامدة ولافه نفستس ببطانية الاحزان الي من اشوفها أدرى فيتس بلا
مضاوي تجلس وتسند راسها على ظهر السرير / خير وش عندتس تبرقين وترعدين
سناء بحنين / يا الله هذي كلمة جدتي إذا انقدت والا انزعجت من الواحد
مضاوي تسحب البطانية وتتغطى فيها / إذا طلعتي قفلي الشباك وطفي النور
سناء تمددت بجانب مضاوي / بنام جنبتس ولا انا مطفيه نور ولا مقفلة شباك
.
.
.
في المشب الخارجي لبيت الجد
سعاد تدخل على ثامر ويقف احترام لها
سعاد بخوف وذعر / وش فيك كنك طالع من معركة ثوبك مشقق
ثامر يبتسم / ما شفتي وش صار عقب ما مشيتو
بدر كفخ السكيورتي بالموت افكه منه
سعاد بذعر/ عسى ماجاهم شي
ثامر بطمئنه / لا الحمدلله فكيناهم من بعض والسكيورتي قال انا بعد اخطيت ما توقعتهم اهلكم وتصالحو قبل توصل الشرطة
سعاد / الله يهديه فيه طفاقه وصل السالفة لكذا
ثامر / عمه ترى بدر صادق بنات وبين المغرب والعشاء ما معهم رجال تراها قوية
والله انقهرت لكن مابغيت ازيدها على بدر يوم شفته معصب
سعاد / والله دايم نروح ونقضي اشغالنا ولامره طحنا بها الموقف البايخ
واليوم الله يهديه نكد علينا ما بعد خلصت اشغال مضاوي
ثامر بتسائل / مضاوي كانت معاتس بالسوق
سعاد بنفي حركت راسها / بنتي وبنت مساعد الي معي
اردفت بممازحة/ خطيبتك مصدعه وماهو من حبها للأسواق
ثامر بتهكم / ما شاء الله زين المدام طلع فيها ميزه ما تحب الأسواق وترضى با أي شي
سعاد بمعاتبة لطيفة/ لا عاد ترى ازعل عليك عمتك ام أنور ذوقها مو أي شي
ثامر يبتسم با اعتذار / السموحة يا عمتي لكن مستغرب حرمة ما يطير مخها على طاري سوق
سعاد بود / مضاوي ام الذوق كله لكن وقتها ما تفضي دراستها وهي الي قايمة با امي الله يرحمها
وانا كافيتها من زمان الأسواق ناادر ما تطلع لسوق وترى والله مضاوي جوهرة نادرة
وبعدين عمتك للحين شباب لا تخاف ما تشتري لحرمتك الا الزين
ثامر تنهد بصمت ووقف/ بغيتي شي برجع لبدر
سعاد / لا والله سلامتك بس حبيت اتطمن عليكم أدرى بدر ماهو معديها على خير
وما بغيت اكلمه ما ابي اثير أعصابه زود على الي سوته سناء
ثامر يبتسم / ماشفتية طول الطريق وهو يتوعدها الله يعينها عليه
عسى عقب موقف اليوم ماتتراجع البنت
سعاد تضحك / الله يستر منكم يا العاصف
بلشنا فيكم يوافق هذا ويعاند هذا عسى الله يتمم بخير
ثامر / لا ماعليتس ان شاء الله ان كل شي بيتم بخير وسلامة
أردف ثامر / انا طالع تبين شي
سعاد بمحبة / عسى مايبيك الشر ياالغالي سلامتك وانا بعد بجلس مع ابوي شوي وارجع لبيتي
.
.
.
في غرفة مضاوي ريما تطرق الباب وتنادي سناء
سناء / ادخلي ريوم ما في غريب الا مضاوي متنيومه
ريما تدخل وتتأفف / وش ذا الحر وين ريموت المكيف
مضاوي تجلس بتذمر / الحين وش تبون انتي وهي
الي تبي البراد بيت جدي كله غرف مكيفه روحو لإي غرفة اجلسو فيها حبكت الا عندي
سناء / أي حبكت انا وحده ملكتي قريبة والحمدلله مايحتاج اراكض ادور احد يصلح لي حمام بخار
غرفتك ساونا جاهزه وآمن وامان ما أخاف في كاميرات تصور
ريما تضع يدها على فمها بتعجب / تدرين عقب موقف اليوم قلت بترفضين العرس كله
يقاطعهم دخول سعاد خلفها الخادمة إشارة لريما / ساعدي ميري خوذي الصحون منها
اتجهت ريما للخادمة / الله فطاير وعصير ومكرونة ميري التي لاتقاوم
ريما ترتب السفرة
تنزل سناء من السرير وتجلس على السفرة / يا الله حياكم الله على قل الكلافة بغرفة الدكتورة مضاوي العامرة
ريما / يالمشفوحة انتظري امي ومضاوي
سعاد تجلس بجانب مضاوي وبحنان / يا الله قومي تعشي معانا
مضاوي بوجها المتجهم / ما ابي شبعانة
سناء بممازحة / من الكذب شبعانة وجهتس ناشف وراتس عرس قومي لاتفشلينا بالرجال
يقول هذي الي تقولون مزيونة العاصف هذي سعلوة العاصف
سعاد/ وانتي يا ام لسانين ماتسكتين شوي
ريما بترجي / تكفين تعالي تعشي معانا والله شوفي عيون مامي تتوعدني اذا مديت يدي
وانا بنهااار من الجوع
سناء / كولي ماعليتس من عمتي والعروس السعلوة الي ياكل على ضرسة ينفع نفسه
سعاد تحذف سناء بمخدة / مايكفي سواتس اليوم وللحين بعد لتس وجه تسولفين
تلتفت لمضاوي وبهمس خافت / يا الله قومي تعشي معانا علشان مضاوي الصغيرة
سعاد تمسك يد مضاوي وتضعها على بطنها
استدارت مضاوي لسعاد واحتضنت خصرها وبكت بحرقة احتضنتها سعاد وبكت معها.
|
23-07-24, 08:18 AM
جديد مواضيع قسم قصص من وحي قلم الاعضاء
العرض العادي
