لا تلهكم الرواية عن الصلاة في وقتها

موعدنا القادم بأذن الله قريباً

تذكروني واحبابي بدعوه طيبه


(سبحانك اللهم وبحمدك، أشهد أن لا إله إلا أنت، أستغفرك اللهم، وأتوب إليك)

مرحبا يا جميلات غداً بأذن الله تعالى بينزل "الفصل السادس والثلاثون "

كونوا با القرب


آرائكم تهمني

مساكم الله بالخير جميعاً طيف وبنات ليلاس الجميلات 🌷🍃

الله يسعدك طيف على الكرم الحاتمي والفصول الجميلة،،
بداية أعتذر عن غيابي،، كنت مشغولة جداً وما زلت،
بس قلت لازم أمر على الحبايب وأتطمن على أبطالنا ☺
مضاوي المجروحة ماشية في خطة انتقامها من ثامر واللي ما خطرت على بالنا،
الليلة الموعودة راح تكون أشد ألم على قلبها من يوم ضربها،،
راح تستسلم له وهي تحمل له مشاعر البغض والكره، وهذا شي صعب جداً،، الله يكون بعونها.
طلاق خلود مو بشارة والله، راح تتفرغ لثامر ومضاوي، والله يستر منها.😏
العذر والسموحة منك طيف، تعليق بسيط باللي يسمح له وقتي.🤗

متشوقة لأحداث اليوم بانتظارك بإذن الله🍃🌷🍃

السلام عليكم
هلا طيف معلييييش مشغوووولة بضيوفنا بس قلت مستحيل امر وما أسلم
لفت انتباهي كلمة مساعد :
مساعد بنبرة حزينة / بسرعة اعرف وجع الحرق والله كنه بالقلب...،
ياترى هل مر مساعد بحادثه حرق بالماضي وايش قصتها ؟؟
سعد ياشيخ انت تعديت مرحلة العشق وين ام جاسر عنك ههههههه
مضاوي وش هالفكرة الي لمعت براسك !!!!
مستحيل يكون بيت احد ..ومستحيل تفكرين ببيت وحدة من صديقاتك مريم مثلا لان هالشي مستحيييل الا اذا كان عندهم بيت للاجار وقلتي بستاجرة منهم . . مافيه الا الفنادق هي المكان المناسب ..ومايحتاج تسألين صديقاتك وش افضل فندق ..لان الفنادق الكبيرة معروفه وخاصه انك من اهل الرياض .. ولنفرض ان ماعندك خلفيه وماتعرفين وش افضل شي ... ارسلي لأي وحدة من زميلاتك بالواتس وتجيك قائمة بالي تبين ... مايحتاج تسألين عندك قوقل هو ابو العريف ههههههههه
بس لاتجيبين لنا مكان مستحيل وتقولين ماعندي الا هو .. ترى بنكون بصف ثامر لو علقك بالمروحه وشغلها على اعلى شي هههههههههههه

الفصل " السادس والثلاثون "


.


.


.


العذر الذي سييقيها في البيت سيكون المنقذة مريم ولا أحد غيرها لكن لتضمن المكان اولاً

تذكرت مها التي كان زواجها قريب اتصلت بها / مرحبا مها...،

مها بفرحة / اهلين دكتورة مضاوي ...،

مضاوي / هلا فيك اخباركم كيفكم مع الدوام...؟

مها / الحمدلله لكن والله لك فقده ...،

مضاوي ابتسمت / ما تفقدين غالي...،

أردفت بتوتر / مها بغيت منك خدمة...؟

مها / ابشري من عيوني...،

مضاوي بتردد / تذكرين قبل فترة ارسلتي سنابه لي على الخاص كانت بفندق...؟

ضحكت مها / ايوا صحيح ...،

اردفت / كنت مسويه لزوجي مفاجئة ان شاء الله اعجبتك افكاري...،

مضاوي / اي ما شاء الله مره حلوه عشان كذا متصلة ابي نفس الفندق ...؟

بسوي لزوجي مثلك مفاجئة بعد الحادثة وأني قمت بالسلامة وكذا...،

مها بعفوية / هم مميزين لكن مشكلتهم اسعارهم مبالغ فيها ...،

ضحكت مضاوي / ما هو مهم الأسعار...،

مها / تبين شي معين عندك أفكار...؟

مضاوي بحرج /ابي على ذوقك إذا ما يضايقك...،

مها / وش دعوة يضايقني ...!

وبمحبة / انتي بس آمري...،

اردفت باستفسار / متى تبين الحجز...؟

مضاوي / تتوقعين الجمعة القى حجز...؟

مها / اكيد بتلقين ما هو موسمهم والعالم لاهية بالأجواء الشتوية...،

مضاوي باستفسار/ مها أقدر اجيب معي مفرش ويفرشونه وينسقون عليه ...؟

مها / إيوا الي تبين يسوون لك...،

تبين منسقة من برا هي ترتب لك عادي ما يخالفون...،

مضاوي / لا ابي من الفندق بس ابي شي حلو وراقي وشغل نظيف...،

مها / اكيد الواحد ما راح يدفع بشي ما يستاهل ...!!

مضاوي / طيب تقدرين تحجزين وترتبين الموضوع ...؟

مها / ابشري ما طلبتي شي ...،

بكلم الحين الفندق عشان اتأكد الجمعة في حجز او لا...؟

مضاوي / الله يسعد روحك انتظرك...،

اقفلت من مها وانتظرت اتصالها...،

بعد خمس دقائق اتصلت مها ...،

مها / في جناح الجمعة وفي السبت تبين احجز لك او تبين ليليتين عندهم خصم ...،

مضاوي / احجزي فقط الجمعة...،

اساسا زوجي ما هو فاضي يبسافر السبت ...،

لكن حبيت اغير جوه قبل السفر...،

مها / أحسن وانتي بعد تغيرين من روتينك...،

مضاوى / خلاص برسل لك بكرا السواق مع المفرش توصلينه للفندق وشوفي كم يكلف واحول لك...؟

مها / عادي ادفع من عندي ما بينا شي...،

مضاوي / اكيد اخت واعز لكن زوجي ما يرضى...،

اردفت / اهم شي الي وصيتك ابي كل شي توب...،

مها / اعتمدي ولا تشيلين هم بسوي لك شي تقعدين طول عمرك انتي وزوجك تتذكرونه و تشكروني عليه...،

انهت المكالمة مع مها وصعدت لغرفتها...،

دخلت الغرفة وفتحت الدولاب واخرجت منه حقيبة ملابس صغيرة ...،

وعطر وبجامة شتوية وقميص نوم دانتيل ابيض فخم اشترته في المرة الاخيرة التي ذهبت الي السوق...،

لأول مره تتجرأ ان تشتري هذا النوع من الملابس فجهازها تكفلت فيه سعاد...،

فتحت الحقيبة ورتبت داخلها الملابس مع العطر...،

أخبرها ذات مره اينما شم هذا العطر يشعر انها قريبه...،

وان هذا العطر خاص بها ويميزها مثل البصمة صنع لها...،

وكل ما وضعت عطر طلب منها ان ترجع لهذا العطر...،

اخرجت ايضا فستان اسود طويل...،

وضعتهم جميعهم داخل الحقيبة واغلقتها...،

اخذت الحقيبة واقفلت غرفتها ونزلت لغرفة الجدة ...،

وضعتها داخل الدولاب تحسبن ان يراها أحد...،

تمددت على السرير واوهمت نفسها بالنوم حتى نامت...،


.


.


.

بعد يومين...،

يوم الخميس...،

في الايام السابقة لم يجد جديد...،

العائلة اتفقوا جميعهم ان يذهبوا للمخيم بعد صلاة الجمعة بما فيهم سعاد وعائلتها...،

سعد استمر بالتغيير على حرق يده يوم بعد يوم...،

وبدر استمر بمراقبة خلود من فترة لفتره لكنه لم يلاحظ اي شي وتوقع ذلك لأن ثامر غير موجود...،

مها جهزت لمضاوي جميع ما طلبتها منها...،

والموعد يوم الجمعة بعد المغرب سيكون الجناح الذي طلبته جاهزة...،

مضاوي أجلت اخبار ثامر لا تعلم هل تردد منها او رهبة الموقف او إمعانا في تعذيبه لأنها تعلم انه ينتظر هذا اليوم ...،

بعد صلاة العصر في بيت الجد...،

انهت مضاوي صلاتها وامسكت هاتفها...،

ارسلت لثامر رسالة على السناب (بكرة بعد صلاة المغرب موعدنا ما راح اطلع معهم للمخيم انتظرك في البيت)

لم ترد ان تخبره بالمكان الي إذا وصلوا لوجهتهم خوفاً من مفاجئات لم تحسب لها حساب ...،

وصلت الرسالة لثامر الذي وصل لشقته خارجا من دوامه وتمدد على الكنبة ليستريح...،

وامامة كيس فيه غدا لم يفتحه اراد ان يرتاح كان مشغول في الشركة من الصباح حتى أنهى ما بيده...،

الأحد عودته لجدة لحضور المحاضرات ويعود لجدوله السابق...،

رحلته السبت الي مطار جدة والعودة الاثنين الي الرياض...،

فتح الرسالة ولم يصدق قرئها أكثر من مره...،

أرسل لها (فيس قلب وفيس خجول)

ارسلت له (إذا درى أي أحد عن الموضوع ولو بالصدفة بيكون الاتفاق لاغي)

أرسل (فيس أوكيه)

أرسلت (لا تنسى اتفاقنا السابق ينفذ بدون أي نقاش او اعتراض)

ابتسم لرسالتها الأخيرة بتهكم وهمس لنفسه وبتوعد / والله لو تموتين ...،

أرسل (فيس أوكيه)

شعر بالشبع فجاءة رغم انه لم يأكل طوال اليوم ...؟!

ترك هاتفه ودخل غرفته لا يعلم يضحك اويصرخ...!!!

في البداية لم يتوقع انها صادقة ولو انه تظاهر بتصديقها...،

توقع انها نزوة منها قالت ما قالته وستتراجع وتبقي الوضع على ما هو عليه...،

تذكر رسالتها الأخيرة التي تخبره با اتفاقهم شعر بانقباض في صدره، ولكنه تجاهل هذا الشعور...،

اخرج ثوب له جديد شتوي اسود كان يريد ان يلبسه بزواج بدر...،

لكن مضاوي طلبت منه ان يلبس الكحلي وهذ يلبسه لاحقاً...،

وضع ما يحتاجه من ملابس في حقيبته...،

دخل دورة المياه ليستحم ويجدد نشاطه...،

ما زالت ملابسها التي لبستها آخر مرة موجودة داخل سلة الملابس...،

فقط اخرج السلة بما فيها ووضعها بجانب دولاب الملابس...،

ملابسه كان يجمعها ويغسلها في المغسلة...،

لم يستعمل في الشقة سوى المطبخ والمكتبة وغرفتها...،

حتى الصالة التي كان معتاد على الجلوس فيها وهي موجودة كرهها...،

لا يجلس فيها الا إذا كان مرهق من العمل ...،

شقته لا حياة فيها وانا كان هو فيها...؟!

لبس ترنج رياضي شتوي واخذ حقيبة ملابسه وحقيبته الصغيرة وضع فيها هاتفه ونظارته الشمسية وشاحنه المتنقل...،

وحمل باليد الاخرى كيس الغدا الذي لم يفتحه...،

ركب سيارته وادار المحرك وقبل ان يتحرك رأى احدى العمالة ناداه واعطاه كيس الغدا وتوجه لرياض...،

في الخرج كان الجو بارد رغم انه مشمس...،

اقبل على الرياض كان الجو غائم وامطار خفيفة ...،

أرسل لبدر رسالة (انا جاي لرياض وما ابي أحد يدري خصوصاً زوجتك القاك بالكوفي الي نطلع له دايم انا وانت)

وصلت الرسالة لبدر وهو خارج بسيارته مع سناء...،

أرسل بدر (فيس أوكيه)

وعاد للبيت ...،


.


.


.


سناء باستغراب / بسم الله ما يمدينا طلعنا رجعت...؟!

بدر / واحد من زملائي طالب مني فلاش عليه شغل تو أرسل يبيه...؟

سناء / مو مشكلة خذ الفلاش ونروح مع بعض توصله له...،

بدر يتصنع الغضب / وش نروح مع بعض عيب ...!

أردف / انا السوق ما أحب انزل معكن انتي وامي اخاف أحد من زملائي والا من العسكر يصادفنا تبين بعد اوقفتس قدام بيته...؟!

سناء بغيظ/ يعني تفركش الطلعة عشان خويك لا يشوف حرمتك معك...؟

ابتسم لها بدر / ابشري بالعوض يا قلبي بس خليني أخلص من مشكلة ها الرجال...؟

سناء بتعجب/ هو عنده مشكلة والا يبي فلاش ...!!

بدر با ارتباك / قصدي انتي لا تسوينها لنا مشكلة عشان الفلاش...،

سناء بقهر وتأفف / طيب انا الحين مهيئه نفسي نفسيآ اني طالعة ما ابي ارجع للبيت احس بضيقة وش اسوي...؟

ابتسم بدر بمكر / عندي فكرة وش رايتس انزلتس عند العنقا وحشي فيني لين تروح الضيقة عنتس والله يبيحتس ويسامحتس...،

سناء تفكر / مهي شينه بس عساها موجودة اذكر تقول احتمال تطلع للمشغل ويمكن ترجع عقب صلاة العشاء...،

بدر / اجل ما في الا خالتي ام سعد انزلتس عندها من زمان ما شفتيها...؟

نظرت له بدهشه / وش من زمان ...؟!

اليوم مرتنا جايبه اقط وسمن من جدتي نمشة وتقهوت معنا انا وانت وخالتي ...،

سناء بنظرة شك وارتياب / بدر لا يكون تلعب بذيلك من وراي والفلاش تصريفه تبي بس تصرفني...؟

بدر / وانتي تخلين أحد يلعب والا حتى يفكر...؟

وبممازحة / اصلن قبل كنت ناوي أطبق الشرع بأخذ أربع حريم ...،

سناء بغضب / ما شاء الله على ها التطبيق ولا لقيت بالشريعة حكم الا هذا تطبقه ...!!!

رفع بدر اصبعيه السبابتين وضحك / ابشرتس تبت وأنبت الي الله وأفكر يمكن حتى انتي احذفتس على اهلتس...،

سناء با انتقاد ونبرة جاده / تراها ما تضحك السالفة وما هو اي شي ينمزح فيه...،

لو سمعك ابوي والا امي بياخذون بخاطرهم منك ويمكن ابوي يمسكني عنده ...؟

بدر باعتذار / آســف آســـــــــف اخذني المزح انتي تدرين وش لتس بقلبي...،

والله لو تغيبين عني يوم يمكن يطق عقلي....!!

تلقيني مسنتر بصالتكم حتى ماهو المجلس...؟!

ابتسمت سناء بمرح / هذا الكلام الي يخلي الواحد ينزل وهو مبسوط ...،

نزلت سناء امام بيت والدها ودخلت وتوجه بدر للمكان الذي تواعدا فيه هو وثامر...،


.



.


.


دخل ووجد ثامر في انتظاره...،

بدر بتوجس / وش صاير ما واعدتني هنا الا في شي كبير...،

أشار ثامر بيده / اجلس اجلس ما في شي...،

جلس بدر ينتظر ثامر يتكلم...،

اخذ ثامر نفساً عميقاً وبتوتر / الموضوع كبير وماهو كبير...؟!

بدر بتعجب/ وش كبير وما هو كبير لغز هو...؟

وقف ثامر واخذ هاتفه / الحقني لسيارتي...،

لحقه بدر بسرعة ركب ثامر سيارته وركب بجانبه بدر...!!!

بدر بوجه مرعوب / ثامر ما انت طبيعي صاير عليك شي...؟

فتح ثامر هاتفه واراه الرسائل الأخيرة من مضاوي ...،

نظر له بدر باستغراب / ما فهمت شي...؟!!

تنهد ثامر بحيرة / بقول لك السالفة ...،

أخبر بدر بما دار بينه وبين مضاوي صباح الجمعة الماضية...،

واليوم ارسلت له هذه الرسائل...،

ورده عليها انه موافق على طلبها ...،

بدر بفرح / طيب كويس دق الحديد وهو حامي...،

وش بلا وجهك وجه المتردد...؟!!

الا إذا انت ما تبيها وبتطلقها صدق ...؟

ثامر با انفعال / مجنون أطلقها وربي لو تموت ما طلقتها...،

انا من جت رسالتها وانا اقلبها براسي طول الطريق ابي حل لسالفة لا يدري أحد...؟!!

بدر / طيب خلاص فرصة وجتك ويمكن انها يطيح الي براسها ...،

ثامر بتهكم ساخر / ومن الي يقول ما تعرف مضاوي والله ان تسوي تفعل وتنفذ...!!!

ضحك بدر / السوالف هذي قبل اعرس...،

بعد ما تزوجت عرفت معنى السكنى بالنسبة لزوجين وان كل الخرابيط والهياط يضيع بكلمه حلوه من أحد الطرفين او تنازل ولو بسيط ...،

والله حتى عمتي سعاد عذرتها وانا كنت من اشد مؤيدين طلاقها تندمت أني فكرت احثها على الانفصال...،

هز ثامر رأسه وقاطعه بحنق وامتعاض / مدري انت مهبول من قبل والا انهلبت عقب العرس...،

وباستفسار / انت قريت رسالتها زين...؟

بدر يفكر / قصدك انها ما تبي أحد يدري أنك جيت عندها للبيت...؟

أومئ ثامر برأسه / تو رجعت بدر الي اعرفه...،

أردف / الحين قدامي شيئين اما اني اطاوعها واروح لها بدون محد يدري او اني انسحب...؟

بدر با انفعال / مهبول تنسحب وانت تبيها...!!

ثامر بسخرية / دور لنا حل يا فالح اجل ليش حاشرك وحاشر عمري بها السيارة ...؟؟

حك بدر حاجبه وبتفكير عميق/ خلاص نفذ كلامها ورح لها زي ما قالت ولا تعلم أحد...؟

وارجع للخرج من ليلك لا تجي لرياض خلها تبلط البحر بتطير وتوقع...،

هي قالت انها ماهي مشتكيه وتراهن عليك أنك بتطلقها من مزاجك...!!؟

ضحك ثامر ورفع حاجبه وبسخرية / مع نفسها على بالها بأضعف ...،

ما درت انها لفت الحبل على رقبتها صدق...،

ضحك بدر بصوت عال/ احسك صرت شرير...،

ثامر بقهر / عوبا ورأسها قوي تخلي الواحد غصب يلف ويدور معها ...،

بدر بملامة / والله إذا راسها قوي انت يدك اقوى منه...،

تنهد ثامر بألم / ما هو موضوعنا يدي موضوعنا ابي حل قبل حضرتها تتراجع...؟

بدر / خلاص الحل أنك تروح لها وانتهينا ومحد داري وش بيصير بينكم ولا وش صار قبل...؟

لأنه محد يدري ان زواجكم على ورق الا انا واصلن لو قالته محد مصدقها بيقولون كذابة ...؟

هز ثامر راسه غاضباً / اقوله تيس يقول احلبه...،

ومن بين اسنانه / أدري وسمعت وفهمت أني اروح زي ما قالت...؟

طيب رحت لها وحملت الحرمة...؟

وبامتعاض / وافرض بعدها صار لي شي طاحت الطيارة انجلطت مت اختفيت ...،

وبنبرة ساخرة / من بيصدق ان حملها لي وهي زعلانه وجدي وعماني دارين انها ماهي حامل ومصره على الطلاق ...،

بدر برعب وذهول / وربي لا ياكلونها العاصف وهي حيه...،

وخصوصا هي وضعها غير اي زله تنصدق عليها...،

ثامر بقهر وحرقه ضرب مقود السيارة / هو فيه غير وضعها الزفت الي جرنا لكل الي صار...،

ابتسم بدر وبحماس / لقيت الحل ...،

اسند ثامر ظهره الي الخلف وبملامح متذمرة / لا تقول خلها تاخذ موانع حمل ...؟

زفر بضيق / ما ابي ها الحل ولا ابي احطه براسها ...،

خلها على عماها لأني قلت لها أني مسوي فحص وطلعت عقيم...،

ولو قلت لها الحقيقة اكيد بتخاف من الحمل وتراجع وهي الي من جد تبي علي الزلة...،

ضحك بدر وبتهكم / لا تعليق على جنانك...؟!!

أردف / تدري كنت بقولك خلها تاخذ موانع وتوثق زواجك منها وبعدها خل الامور تمشي تزعل سنه سنتين وبعدين ترضى...،

وبسخرية مرحه / ياربي وش حظك لو حملت على طول...؟!!!

ثامر بتهكم ساخر هز رأسه / اعرف حظي بتحمل ولو ما لقيت حل الحين يمكن انسحب ...،

وبتأفف / وتخرب السالفة كلها ...،

بدر بتحذير / أنسى سالفة الانسحاب خلنا نفكر...،

ثامر / وش أنسى تقول اذا درى احد الاتفاق لاغي ...،

وبسخرية / معناها انقلع اقلب وجهك لا اشوفك...،

لمعت عينا بدر بفرحة / لقيتها...،

أردف وهو يغمز بعينه / إذا هن لهن الكيد حنا لنا المكر...؟ً

ضحك ثامر / والله غمزتك هذي قوية تقول أنك جبت التايهة ...!!!

ضرب بدر صدره بحماس / جبتها وانا ابو فهد هي تقول ماهي رايحة معنا للبر وبتجلس تنتظرك في بيت جدي ...؟

أبتسم بمكر/ انت تعال تغدا معنا والكل بيشوفك...،

قاطعه ثامر / هذي مفروغ منها انا قايل لعمي ابوماجد احتمال كبير اجي انا ومضاوي يوم عزمني...،

وبتهكم / والخطوة الي بعدها يافهيم ...؟

بدر / رح لها زي ما قالت لك واكشخ عوض كشختك الي تمقلبت بها ليلة عرسي وحلق شعرك ذا الي ابدآ ما يناسب شخصيتك...؟؟

ابتسم ثامر ومسح على وجهه وشعره / اول شي الله يعافي ام انور الي مدري وش أسوي فيها على ذاك المقلب...،

ثاني شي مضاوي أعجبها الشعر الطويل علي وماني قاصة بحلق وجهي وراتب شعري بدون تحليق...،

تكتف واستدار لبدر وابتسم / ايوا كمل...؟؟

ضحك بدر بمرح / خل شعرك بكيفه ما هو مشكلتنا...؟

إذا مشت الامور تمام بينكم وكتب الله ان زواجكم يصير حقيقي أرسل رسالة قل تم وانا بفهم ...،

خلك عندها بالغرفة لا تطلع وإذا اجبرتك وطلعت اجلس داخل لا تروح ...،

وانا بتعذر با اي شي و بارجع بدري وبسحب جدي معي ارجعه للبيت واكيد بيفهم ان صاير شي...،

الشغالات موجودات بالبيت و بيشوفونك ...،

ثامر بإعجاب / والله جبتها ...،

بدر بممازحة مرحة / البلا ان انكرت قدام جدي وقالت ما دخل علي ولا شفته والا قالت تهجم علي وقلبتها عليك عند جدي...؟

ثامر بتهكم وتوعد / عاد وقتها اوريها حلفها يوم تقول ما ارجع لين حزام بن جلال يطلبني ...؟

والله محد يفك رقبتها من يدي لو جلال ابن سعد طلع من قبره وقال فكها ...،

قاطعهم رنين جوال بدر أشر لثامر بأن يسكت ويغلق نوافذ السيارة...!!

بدر برسمية / هلا شوي واكلمكم معي رجال ...؟

اقفل الخط ...،

التفت له ثامر / وش فيك انقلب اسلوبك ...،

بدر /هذي حرمتي تبيها تعلم حرمتك اني معك وانا قايل لها خويي بالدوام يبي مني شغل ...؟

أردف / نسيت اقول لك سناء تقول ان مضاوي طالعة مشغل يمكن ترجع بعد العشاء للبيت ودك نروح لجدي نتقهوى...؟

ضحك ثامر وبممازحة / ما شافوهم يخططون شافوهم عند جدهم يتقهوون ...!!

ضحك بدر / لا تكفى اجل رجعني لسيارتي خلني ارجع لبيتي ...،

ثامر / عندي شغل بكوي ثياب معي بالسيارة وامر حمام ساونا...،

وضع يده على لحيته / وبشوف لي حلاق...،

بدر / رح للحلاق الي رحت له بعرسي شفت فديو العرس طالع شكلك خرافي...،

.


.


.


قبلها بساعة ...،


دخلت سناء لبيت والدها...،

سناء تنادي / يا ال مساعد وينكم ما في حس ولاخبر ...؟!!

صوت فزه قادم من المطبخ / تعالي انا بالمطبخ ...،

دخلت سناء للمطبخ / الحين انتي وش تسوين تحوسين...،

فزه بتذمر / اجهز عدت ابوتس يبيها للمخيم ...،

سناء تمسك يد والدتها وتخرجها من المطبخ / تعالي بنجلس والشغالة انا بفهمها وتكفيتس التعب ...،

فزه بحيرة وتأفف/ تبين تكفيني شوفي ها الي بغرفته من يرجع من المدرسة ما نشوفه يصلي ويعود لغرفته...،

اردفت فزه بحزن / لا يكون جايه مس والا عين...؟

سناء بخوف / بسم الله الرحمن الرحيم يمه وش الافكار ذي ..!!

فزه تتنهد بوجع / والله مدري وش جاه من درت العرب انه بيكمل دراسته ما شاف خير...؟!!

سناء بتهكم / ما شاء الله يعني ما في الا سعد ولد فزه بيكمل دراسته...؟

اردفت / انتي تدرين زود على ان التوظيف في تخصصه محدود...!!

الي يدرسون والي اخذو ماجستير امم مدري وش بيستوعبهم ...،

فزه تنفخ بقهر / انا وين وانتي وين روحي شوفيه يمكن يقولتس شي...؟

ذهبت سناء لغرفة سعد ورجعت والدتها للمطبخ ...،

.


.


.


وصلت سناء لغرفة سعد وطرقت الباب...،

سعد مستلقي على سريره ويعبث بهاتفه...،

التفت للباب / ادخل الباب مفتوح...،

دخلت سناء وجلست على كرسي مكتبه وابتسمت بمرح / ليه حابس عمرك والعالم كلها طالعه ...؟

الناس تنتظر الويكند عشان تهج من البيوت...؟

اعتدل سعد بجلسته ابتسم لها / نعوضها بكرا من عقب ظهر الجمعة الي فجر الأحد لو تبون ...،

سناء بنبرة عتاب / سعد امي مره متضايقة منك...؟

رفع سعد عينيها لها باستغراب / والله ما اذكر كدرتها بشي ...،

سناء بقلق / امي ما هو معجبها حالك من جد تقول خايفة جايتك عين والا سبب ...،

تنهد سعد بضيق / مافي غير الخير ان شاء الله...،

وابتسم بلطف / أنتم تبون الواحد على وتيره وحده ودايم مبسوط...،

سناء بنبرة مليئة بالحزن والضيق / سعد لا تهرب علمني الصدق وش فيك...؟

ابتسم سعد بمودة / عاد كل نظرة ها الحزن تطمني وطمني امي مشاكل بالدوام والدراسة وتنحل قريب...،

وقفت سناء لتعود لوالدتها وبيأس / أدري ما راح اخذ منك لاحق ولا باطل...،

لكن اذا ودك تقولي شي لا يردك الا لسانك يمكن نتوصل لحل...؟

وقف سعد وابتسم لها بحنو / ما تقصرين يا الغالية لو في شي حاس بخاطري اكيد بقوله لتس ...،

نزل مع سناء وأفكاره تعبر عن شعور عميق باليأس والعجز...،

لا يوجد حل الا ان يخدمه الحظ او تحدث معجزة ...؟

يجب ان يبقى هذا الحب مدفوناً...،

اما ان تنزل عليه امطار الحظ فيزهر...،

او يبقى مدفون حتى يذوب ويتحلل وينتهي كما بدأ...،

.


.


.


في مكان آخر بعد صلاة العشاء...،

مشغل ام شامخ ...،

اليوم خميس والمشغل مزدحم وتحسبن ان يرى أحد أثر الضرب على جسدها ...،

طلبت غرفة خاصة ...،

لعمل بد كير ومناكير وصبغت شعرها باللون الذي اختارته وقصت شعرها بقصة على طوله ...،

رتبت حواجبها وركبت رموش ...،

طلبت خدمة رسم التاتو المؤقت ...،

فثامر في يوم من الايام الخوالي تمنى ان يراها ترسم باللون الاسود مثل ما فعلت في زواج سناء...،

رسمت كما كان يريد وأكثر واخبرت العاملة ان تبتعد عن الاماكن التي فيها أثر كدمات وانما الرسم يكون على الاماكن السليمة ...،

اعجبت العاملة باللون الاسود على جسدها الابيض وجمال اختيارها لرسومات...،

وتمنت العاملة لو انها اتت بعد ان تذهب الاثار لكن مضاوي وعدتها ربما ستاتي في يوم ما وتطلبها بالاسم...،

خرجت مضاوي وهي راضية عن كل ما طلبت...،

وحجزت للغد اخبرتها الموظفة انها ربما ستستغرق وقت لأنها شعرها ووجها يحتاج لوقت...،

دفعت العربون واخذت الفاتورة وخرجت لسائق الذي كان ينتظرها...،

وصلت لبيت الجد قبل ان يخرج المصلين من المسجد ودخلت الي غرفتها بعد ان طلبت من الخادمة مدفئة واحضرتها لها ...،

تخلصت من ملابسها التي ذهبت بها للمشغل وعباءتها...،

لبست ملابس اخرى صيفية خفيفة اخبرتها العاملة ان تنتظر ساعتين لا تغسل الرسم ليثبت اللون الأسود...،

اخرجت سلة الملابس امام باب غرفة الجدة واقفلت على نفسها في الداخل قامت بتشغيل المدفئة...،

اخذت هاتفها واتصلت على الطباخة لتجهز لها عشا خفيف وترسله مع الخادمة...،

انتبهت لهاتفها كان يوشك ان ينفذ شحنه وضعته على الشاحن...،

ارتدت شرشف الصلاة ومدت سجادتها وصلت العشاء ...،

انهت صلاتها...،

طرقت الخادمة الباب واحضرت لها وجبه خفيفة كما طلبت اخذتها منها واعادة اغلاق الباب بالمفتاح ...،

وضعت العشاء على طاولة خدمه ...،

فسخت شرشف الصلاة ووضعته جانباً...،

فتحت الدولاب اطمأنت ملابسها عبأتها حقيبتها التي فيها ملابسة جميعها جاهزة ...،

لم يبق سوى العذر الذي ستقوله للجد...،

ويجب ان يكون قبل ان يذهب الجد مباشرة حتى لا يجلس ويفسد خطتها...،

هي لا تريد لكائن من كان ان يعرف بذهابها مع ثامر...،

العذر موجود مريم لكن لا تريد مفاجئات تعلم ان الجد سيخبرهم بعذرها...،

فلو بالفعل مريم أتت لبيت الجد في خلال غيابها مع ثامر بماذا ستبرر كذبتها ستكشف لا محالة ...،

تأففت بحيرة / يجب ان تحتاط لكل شيء فغداً إجازة الأسبوع ومريم تعرف بيت الجد قد يأتي في بالها ان تأتي وتطمئن عليها...،

فهذه الأمور تحدث كثيراً اشخاص يأتون في أوقات لا تخطر على بال ...؟؟؟!!

جلست لتناول العشاء فهي ستقع من شدة الجوع كانت تقلب بهاتفها وهي تأكل بين القروبات ...،

الواتس وسناب قروب يتواجد فيه خلود كانت نادرا ما تفتحه...،

قروب زميلاتها قروب يجمعها فقط هي وسناء وشروق...،

وقروب أخر فيه سعاد وشروق وسناء وانظمت اليه ريما مؤخرا...،

فتحت قروب بنات عمها وعماتها ...،

أرسلت سهى تستفسر من سيحضر منهم ...؟

أرسلت سعاد انها ستحضر هي وعائلتها...،

نواظر أرسلت يوجد مناسبه عند اهل زوجها ولن تحضر...،

مضاوي / ارسلت انها ستكون اول الحاضرين...،

منار ارسلت قلوب...،

وسهى عبارات ترحيبيه...،

بتول فيس يبكي...،

خلود قرأت ولم تعلق...،

سهى ارسلت للخاص تطلب من مضاوى سينبون وفطائر تجيدها طباخة بيت الجد ...،

ارسلت مضاوي فيس اوكيه ...،

قامت وارتدت شرشف الصلاة لتخبر الطباخة ان تجهز ما طلبت سهى وبعض الحلويات سيأخذونها معهم للمخيم...،

.


.

.


قبلها بقليل

دخل ثامر الذي سأل الخادمة يوجد أحد من البنات في الداخل واين مضاوي...؟؟

اخبرته انه لا يوجد أحد فقط مضاوي وحضرت قبل قليل من الخارج ودخلت الي غرفة الجدة...،

رأى سلة الغسيل وبداخلها ملابس وعباية امام باب غرفة الجدة تذكرها عندما كانت تعود من دوامها...،

وتركض بنشاط تسابق الوقت اشتاق لغدائهم المتأخر رائحة البخور الفواحات طبخها...،

الذي كانت مره تجيده ومره لا لكن كان يتلذذ بطعمه حتى وان كان سيئا...،

صعد الي الاعلى يريد ان يستحم بعد ان رجع من الحلاق...،

حاول ان يفتح الغرفة وجدها مقفلة...؟؟

رأى الخادمة تصعد بملابس مضاوي لغرفة الغسيل سألها اين المفتاح اخبرته انه مع مضاوي ...،

واخبرته ان جميع ملابسة وما يخصه تم ارجاعها الي غرفته وهذا الغرفة لا يوجد فيها سوى ما يخص مضاوي...،

اغاظه ما فعلت لكن لا يريد ان يستفزها...،

نزل يريد ان يستحم ...،

فالدور الارضي لا يوجد الا غرفة الجدة ملحق بها دورة مياه

غرفته وغرفة الجد جميعها غرف عادية

دخل غرفته وجدها نظيفة ومرتبة وجميع أغراضه موجودة حتى المفرش الشتوي الذي كان في الاعلى وضعته هنا...،

اخذ نفساً عميقاً يساعده على الهدوء وخرج الي سيارته...،

انزل جميع ملابسة التي تحتاج الي غسيل وثيابه المكوية ودخل الي البيت من باب النساء ...،

اعطاها الخادمة تغسل وتكوي ما يحتاج الي غسيل وتعلق ثيابه داخل دولابه ...،

دخل الي غرفته واخرج ملابس نظيفة ومنشفة ليستحم في أحد دورات المياه الداخلية ...،

رأى باب غرفة الجدة مفتوح تراجع لا يريد أي احتكاك بها خاف ان يحدث بينهما صدام ومن ثم تتراجع عن قرارها ...،

تسلل بهدوء الي دورة مياه قسم النساء ...،


.


.


.
قريباً منه...،

دخلت مضاوي للمطبخ وجلست على كرسي نادت الطباخة ...،

لتريها صور ما طلبته سهى وبحثت عن صور معجنات ارسلتها لها سناء ومنار على الخاص...،

صنعتها الطباخة قبل فترة ...،

كتبت الطباخة جميع ما طلبته مضاوي بورقة الصقتها على باب الثلاجة ...،

وقفت مضاوي تراجع ما كتبته الطباخة...،

تذكرت انها لم تكتب حلى طلبته منها ريما...،

اشارت لها ان تعطيها القلم اخذته وارادت ان تكتب أحست بألم في يدها ...،


.


.


.


نفس الوقت قريباً منها ...،

ثامر الذي استحم وعاد لغرفته بحذر ليكمل لبسه...،

لبس ملابسه وتعمد ان لا يضع عطر حتى لا تشعر بوجوده...،

ذهب للمطبخ وهو يمشي بحذر يريد ان يشرب ماء ويخبر الخادمة ان تأخذ ملابسة من دورة المياه...،

ويخرج للمشب المتواجد فيه جده واعمامه من باب المطبخ الآخر ...،

اطل برأسه تفاجئ من وجودها في المطبخ وقف امام الباب...،

رئاها تقف امام الثلاجة وتلف شرشف الصلاة على كامل جسدها بشكل محكم بجانبها الطباخة...،

وتحاول ان تكتب وتتأفف ان اصبعها لا يساعدها ...،

لم تشعر بوجوده وهو ويراقبها...،

أعطت الطباخة القلم لتكتب عنها دون ان تلتفت...،

وبغضب وتضجر تنفض يدها وتتأفف وبصوت مسموع / ما أدري من ادعي عليه ...؟!!

اخذت نفس واردفت / يا الله كلها بكرة مثل ها الوقت واحنا خالصين لا لنا ولا علينا ...،

سمع ما قالت تراجع للخلف بهدوء وخرج دون ان تشعر به هي او الطباخة ...،

خرج من باب النساء الي الباب الاخر المفتوح ودخل للمشب المتواجد فيه الجد وابنائه...،

.


.


.

دخل وسلم عليهم وجلس...،

ابتسم مساعد بفرح / ما شاء الله متى جيت ...؟

ابتسم بمجاملة / قبل شوي تأخرت داخل نزلت اغراض لي ...،

الجد ابتسم بمحبه/ وشلونك وشلون امورك...،

ضحك فهد وبممازحة / ما يحتاج اموره طيبه سيماهم في وجوههم ...،

مساعد / قال أبوماجد انك بتجي لكن قلت يمكن انك قلتها مجامله...،

ثامر الذي انزل قبعته الصوف ورجع لبسها / الله يعين ما عندي وقت احك راسي لكن جيت علشانكم ...،

وبضيق /الرسالة صعبة صعبة الله يعديها على خير ...،

فهد بتشجيع / ومن يتهيب صعود الجبال يعش ابد الدهر بين الحفر...،

أردف / خل همتك عالية انت مريت بالأصعب...،

الجد / بدر وينه ماواق علينا اليوم ...؟

ضحك فهد / طلعنا من المسجد قلت تعال نمر جدك قال اصبر بستأذن من بنت مساعد أخاف منها تهاوشني...،

ضحك الجد / والله من العيارة الي براسه...،

ابتسم مساعد بود/ محليه ربي هو وعيارته...،

فهد بممازحة / تمدحه انه نسيبك ...،

ضحك مساعد / لا والله هذا رايي فيه قبل يصير نسيبي ...،

قاطعهم دخول سعد وفواز سلموا على ثامر...،

دخل بعدهم بدر سلم على ثامر بحفاوة وكأنه لم يره الا لآن وجلس بجانبه ...،

فواز بممازحة / من عرفت بدر وهو مكانه جنب ثامر لاصق به...،

ضم بدر كتف ثامر وضحك وبممازحة مرحة / ياخوك مدري ليه مرات أحس انه ابوي...،

ابتسم فهد بعطف / من جابه ابوي من خواله وبدر ملاصق له...،

ضحك بدر / كان بودي قارد عيال العاصف اي أحد يهاوشنا نركض ندوره...؟

ضحك فواز / ليه وانت وش وظيفتك ...؟

بدر/ لا هو كان دب شوي وطويل وعيال الحارة إذا شافوا زوله يحسبونه كبير ويخافون منه ...،

فواز بممازحة / يمكن قلبه اقوى من قلبك لا تقول طويل ...،

أردف / إذا على الطول انت وسعد وثامر وأنتم مقفين لو ما اعرفكم شخصياً اقول اخوان ازوالكم متقاربه ...؟؟!!

بدر بتهكم / ليه هي نورة الراضي الله يرضى عليها ولدتني ها الكبر اكيد كنت صغير وسعد أصغر مني...،

أردف بأمر / قم قهونا ما يقولون صغير القوم خادمهم...،

التفت لثامر / ولا ترى بعلم ابوي ثامر يجلدك...،

ضج المجلس بالضحك على تعليق بدر...،

وامتثل فواز لأمر بدر بخوف مصطنع...،

ابتسم فهد بود/ الله يغني ثامر بولد من صلبه وش يبي له بولد أكبر منه...،

سعد بممازحة / بالعكس أحسن يجيه ولد جاهز ما تعب عليه...،

التفت مساعد لسعد / وانت ما رديت لي جواب للحين بلي طلبتك ...؟

صمت سعد وتلون وجهه لا يعرف بماذا يجيب يعرف ما قصده والده فلو أصر ليس امامه الا الرضوخ ...،

ابتسم فهد لسعد / وش الطلب الي أحرج سعد ما قدر يجاوبك...؟

التفت مساعد لفهد / قلت له البارح بخطب لك بنت عمك خلود واشوفه يتصدد عني...؟

تلقائيا التفت فواز لبدر يريد منه انقاذ الموقف فهو الوحيد في هذا المجلس يعلم ما يعانيه سعد...،

اراد ان يتكلم بدر، ولكن سبقه فهد بنبرة ملامة / الحين انت يا مساعد تحل وتربط وتقرر من راسك...؟

اول شي البنت توها مالها اسبوع من تطلقت ولو تبي العرس ما طلبت الطلاق ...،

ثاني شي سعد ما هو فاضي للعرس...،

اعتدل فهد في جلسته / مقبل على دراسة صعبة ووظيفته ما يدري اي يوم المدارس الأهلية تنهي عقده ...،

وبانتقاد وتذمر هز فهد راسه / الله يهديك بس...،

تنفس الثلاثة الصعداء وارتاحوا بعد شد الاعصاب من الموقف وخصوصا سعد من دون ان يلاحظ أحد تعابير وجوههم ...!!

التفت ثامر لبدر شعر ان هناك امر غريب بين فواز وبدر وسعد، ولكن لا يعرف ما هو استفسر بعينيه، ولكن بدر تجاهله...،

التفت مساعد لفهد بمعاتبه / ترضاها بنت اخوك تطلق وتقعد كذا وش بتقول الناس عنها...؟

فهد / بنت أخوي هذا طلبها محد جبرها هي الي بغت الطلاق وتتحمل تبعاته...،

أشار لصدره / انا بنفسي مكلمها وحاولت فيها اصرت على رايها...،

وبعدين الناس مسولفه مسولفه اما أنك تدق الصدر تبي تسكر حلوق خلق الله...،

والله انك تهلك نفسك والناس مارضت ولا درت عنك...،

بدر / انا ياعمي مع ابوي...،

التفت لسعد / ابدا ماهو وقت زواجه العرس يبي ما هو لعب والحريم ما عاد يرضيهم شي...،

يبون مثل الي يشوفونه ...،

حرك الجد رأسه بأسف / الظاهر ان مساعد يبي يغرق سعد بالديون...،

يبيه يصير مثل حال عمه سلطان من دين لدين...،

فهد / مشكلة سلطان ما هو بعيد عن مساعد يقرر الشي وينفذه ما هو داري بعواقبه ...،

مساعد / لا والله سلطان ضعيف قدام رفعة ماهي سالفة قرارات وديونه كلها منها ما يقولها لا ...!

فهد / لا تظلم الحرمة يا مساعد كله من اخوك...،

وبا امتعاض وتذمر/ اجل أمس رايح بيطلع قرض بيرجع لمازن بن شافي فلوسه...؟؟

هاوشته قلت شف الي بقى من المهر وانا اكمل الباقي لا تاخذ قروض...،

الجد بتهكم / المهر انا سألته وش بقى منه قال لعبت به طيرة شلوى...،

اردف / وعطيته مفاتيح الجمس يبيعه ويخلص بنته وعيا ...،

فواز با اشمئزاز وقهر / والله انها ما تستاهل تضحي بجمسك على شانها...؟

خلوها تاخذ هي قرض وتسدد ليش عمي يتحمله عنها هي الي بغت الطلاق تتحمل ...؟

الجد بعطف / ياولدي الوالد مهما اخطو عياله ما يعطيه قلبه عليهم...،

قاطعهم دخول سعاد يتبعها راكان...،

وقف الجميع لاستقبالها بما فيهم الجد اراد النهوض...،

اسرعت اليه وقبلت رأسه ووضعت يدها على كتفه / والله ما تقوم...،

نظر لها الجد وابتسم بفرح / حي ذا الوجه وحي اقباله ...،

قبلت يده وانفه وسلمت على اخوانها وابنائهم وافسحوا لها مكان لتجلس بجانب والدها ...،

سلم راكان على الموجودين وجلس بجانب فواز...،

فواز بممازحة / يوم دخلت عمتي وقفو شيبان العاصف احسب دخلت علينا اميرة ...؟

وبمرح / ما شاء الله وش ها الحفاوة ...،

ابتسم الجد ببشاشة / وام انور اميرة ...،

بدر بتأييد/ اي والله عمتي عندنا اميرة الاميرات...،

فهد بترحيب / يا حي الله ام أنور...،

نظر لها الجد بحب / حي الله راعية بيتنا

ضحك مساعد / غريبة طلعتي بالعادة لين تطبقن يالحريم شهرين وعقب تطلعن...،

ضحكت سعاد وبممازحة / نندعس عن الاوادم والاسواق ما تفقد ازوالنا من سوق لسوق...؟!!

اردفت بعفوية / الشيخة ريما ارسلت لها مضاوي سنابة لميري تزين حلى...،

وانهلبت تبي تشوف الطريقة وانت تخبرها خريش لازم أحد يوصلها...،

التفتت لثامر با ابتسامة / وراكان شاف سيارة ابوجلال وعلمني قلت بجي اشوفة مبطيه منه...،

ضحك الجد وبممازحة / لا تحطين ثامر عذر قولي راكان عيا يوصل الدجاجة بنتس وانتي جيتي ...،

التفتت لوالدها / انا اشهد انها دجاجة...،

راكان بغيظ / ياجدي انا ما قاهرني الا طولة لسانها داخل البيت ..؟؟!

أردف بتعجب / والحوش بالليل ما تطلع له الا تتأكد ان في أحد منا يشوفها...؟؟

ثامر با استغراب / هذا خوف مرضي لازم تلقون له حل يمكن صاير لها موقف سبب لها ردات هالفعل...؟

زفرت سعاد بندم / والله يا ثامر انا واخوانها السبب...،

وهي صغيره الله يصلحها لعوب تموت على طلعت الشارع ...،

وكل ما طلعت نهددها ...،

اطلعي عشان البلدية تخطفتس ونجيب لها من قصص الله لا يوريك...،

اردفت وهي تشير بيدها / في بنت حرامية شافوها تلعب عند الباب وذبحوها...،

في بنت طلعت عند الباب ومدري وش جاها ...،

فهد با استغراب وانتقاد / عاد انتي المتعلمة ومربية اجيال يطلع منتس ها الكلام ..؟؟!!

سعاد بأسف/ عاد هذا الي صار ومتحسفه عليه...،

ثامر با استفسار / طيب كيف اسلوبها بالبيت...؟

راكان يعض شفتيه ويزفر بغيظ / اسلوبها اسألني...؟

داخل البيت إذا بغت الشي لو بيدك اخذته...،

ضحك فواز / عاد حظك يا راكان انت جيت لعمتي مريبيع وهي اخذت طول ابوك...،

هز راكان راسه بقهر مصطنع / وهذا البلا ...؟

أردف وهو يضحك / تدري مرات اخاف منها واهج ...؟

ضحكت سعاد / والله انت الي تجننها وحاط راسك براسها وتوقف لها على الكلمة ...،

راكان بعفوية / تخيلوا لها فترة حاطه براسها بتدرس تربية خاصة ...؟

عقب ما جننتنا تبي طب مثل مضاوي وعجزت من المواد العلمية حولت ادبي...؟

والحين فاتحة اليوتيوب طول اليوم وتتعلم لغة الإشارة...،

تناديها ترد بالإشارة تطلب منها شي بالإشارة ...؟

التفت لسعد وهو يسكب الشاي / قلت لها انتي بنزوجتس سعد المساعد ...،

اخذ سعد بيالة الشاي بدون شعور وشربها لاحظ الجميع تغير وجهه بسبب الشاي الحار...،

علق راكان وهو يضحك / ما لومك أحرقت فمك من يبيها قرعوطة...؟؟

أردف / اجل لو سمعتها يوم تقول متى العرس عشان افتك من وجهك...،

يمكن تصب على نفسك بنزين وتحرق نفسك من الروعة ...؟

نظر بدر لفواز وانفجروا ضاحكين الضحك الذي فسره الجميع انه على طفولية ريما ...،

فهد بممازحة / ما شاء الله اليوم عروض الزواج على سعد شغالة...،

ضحك الجد بمرح / الفقر بيوم والغناه بيوم ...،

استغربت سعاد ما يعنونه وسألت / شكل في خطبات ما ندري عنها...؟؟

الجد / ما في شي ماغير مساعد يبي سعد ياخذ خلود ...،

التفت سعاد لمساعد وبمعارضة شديدة تجهم وجهها / ولا تفكر بها السالفة ابدا ...،

اردفت / خلود بنت أخوي ومثل بنتي لكن والله لمصلحة الجميع ما تنفع لسعد ...،

البنت الله يصلحها ماده لحافها بزيادة ولو اخذها ما تطول معه عندها المظاهر فوق كل اعتبار...،

مساعد / ما عليه الرجال اذا اخذ الحرمة يشكمها...،

سعاد بمسايرة / ما قلنا شي لكن ليش تحط نفسك وولدك بها المواقف ...،

رفعة وسلطان ما يرضون أحد ينتقد عيالهم...،

ويمكن خلود مع الايام يجيها ما تمنت من غيركم...؟؟

فواز / عمي أبو ماجد حبيب ورحوم لكن ام ماجد هي الي تفزع...،

كلكم تذكرون هوشها للعنقا عشان خلود كم مره تبكيها قدامنا وحنا صغار...،

وعمي يفزع لمضاوي ويهاوش ام ماجد علشانها...،

ثامر التفت لبدر وعيونه تكاد تخرج من رأسه من الغضب فهمز يده بدر بمعنى اهدا...،

هز الجد رأسه بأسف / انا اشهد شيبن عينها ...،

خلود الله يصلحها كل شي تشوفه تبيه وامها تتبعها...،

مره ام جلال الله يرحمها طردت رفعة طردتن قشرة من البيت ...،

يوم سألتها وش تبين منها قالت هي وبنتها عينهن على ها اليتيمة...،

تشوف بنتها تلعب بشنطة البنية وهي تصدد تسنها عميا لاعبه بحاجات مضاوي ومخربتها...،

ابتسم راكان بحرج / يا الربع ترى ام ماجد عمتي احترموا وجودي شوي...،

ضحك فواز / يعني انت الي سلمت منها كم مره شفتها تهاوشك وتدبغك على غاربك بالشارع...،

التفت راكان لسعد بممازحة / قلت لك خذ قرعوطة هديه من عندي فكنا منها وامي تعرفها حبوبه...،

ولا عمتي ام ماجد تسوي بك مثل العنقا اذا لفيت ودرت مع بنتها انتفت شواربك...،

ضحك الجد / ما لقيت الا سعد تهديه اختك سعد لو مزوجينه على عمره كان عنده بنت كبرها...؟

ضحك راكان / قل لو مزوجينه بالمتوسط والا بالثانوي...؟؟!!

فهد / الصحابي الجليل عبد الله بن عمرو ابن العاص بينه وبين ابوه اثنا عشر سنه...،

الجد بعفوية / انا زوجني ابوي الله يرحمة عمري17سنة ...،

فواز بتعجب / اجل جدتي كم عمرها ...؟

الجد / كبري انا سابقها بشهرين...،

التفت راكان لوالدته وبممازحة مرحة / يعني مالتس عذر جدي وجدتي اعرسو وهم اكبر من قرعوطة بسنة...،

اردف / زوجيها السنة الجاية وفكينا منها...،

ضحكت سعاد وبحب / يويل قلبي تبيني ازوج الريم انا اذا داومنا افقدها متى ارجع اشوفها تبي ازوجها ...،

ازوجكم أنتم وابوكم واطردكم والريم عندي...،

بدر بممازحة / راحت عليها جاها جخيدم ...،

ابتسمت سعاد بود / والله ان غلاها كل يوم يزيد...،

الجد / الله يخليها لتس ويخليتس لها ...،

الجميع / آمــــــين ...،

الجد / متى تمشون باتسر ...؟

ماحنا مفوتين صلاة الجمعة بالمسجد والخطبة ...،

فهد / بعد صلاة الجمعة مباشرة ...،

أردف / تروح معي نصلي بالمسجد الي انت دايم تصلي فيه الجمعة ونمشي من هناك...،

التفت الجد لفهد/ اهلك ما هم رايحين...؟

فهد / ام بدر تجي مع عيالها مهي مشكلة ...،

بدر / اجل خلاص نتفق من هنا...،

جدي يروح معك وامي معي...،

وبممازحة / وبالرجعة اسلمك امي وتسلمني جدي...،

ضحك فواز / تبادل منافع...،

الجد / شوراً طيب انا اول ودي اروح مع ثامر...،

ثامر / ابشر يا جدي وانت معي ...،

ضحك بدر / جدي يحب سواقة ابوي خصوص إذا مسك خط خلها بالرجعة إذا ما هو معك معي...،

فهد / تم خلاص ابوي معي وأنتم عقب اتفقوا...،

الجد / سلطان ماله بينه محد شافه ما صلى العشا معنا...،

راكان / انا شفته عقب المغرب سلمت عليه عند بابه ...،

يقول بيروحون لسوق ناقصهم اغراض ...،

هز مساعد راسه / الله يعينه ...،

فهد / يمكن يبون اغراض لطلعت بكرة هو شالها يقول لحد يجيب شي حتى الطبخ هو الي بيطبخ ...،

التفت فواز لثامر / شفت كيف الشعر الطويل عليك حلو...،

راكان بإعجاب / حتى شكله تغير بدون شماغ طلع أصغر...!!

مسح ثامر على رأسه / والله ابي احلقه لكن نشب لي الي جنبك وفيصل الله يصلحهم قلت بخليه فتره وبعدين بحلق...،

فواز بممازحة / خل عنك نشبتنا قل أعجب العنقاء وخليته...،

نظر الجد لفواز/ العنقاء اعقل منكم ما هقيت يعجبها شعرا اطول من شعرها ...،

بدر / شكل شعر ثامر ما هو جايز لك يا جدي وانا شفت صورتك من اول شعرك اطول من شعره الحين...،

الجد / لا بالله ماهو معجبني وصاير شين شعره اول ازين...،

ثامر / ابشر لو تبي الحين رحت الحلاق وحلقتة ...،

راكان / لا حرام عليك والله شكلك طالع مز جدي يمزح معك يوم شفتك قبل شوي قلت الرجال اليوم عرسه والا ملكته...؟!

ثامر بممازحة / ماهي شينه إذا حولك مزيونة اخطبها لي...؟

راكان / تبي جدي وامي يذبحونك تعرس على غاليتهم العنقا ..؟؟؟

أردف / وبعدين حتى ولو بزوجك ما عندنا الا صوفيا والا ريما...؟

ضحك الجد بعفوية / زوجه صوفة ريما ما تقول بتزوجها سعد والا هونت عن عطيتك ...؟

ضحك راكان / ما هونت لكن سعد تلقاه يدعي علي بقلبه ابلشته بها...؟؟

التفت لسعد وأردف / ترى شعرها فردته وصار ناعم لا تخاف مهي الشمس المشرقة الي انت خابرها...؟

ضحكت سعاد / لا والله ماني مزوجة شغالتي الي نافعتني ولا بنتي الي مونستني ...،

سعد الذي كان ظاهره هادئ كان كمن يجلس على الجمر يريد ان يخرج قبل ان يلاحظ أحد عليه شي...،

لا يعرف بما يعتذر ويخرج فلاذ بالصمت ...،

الجد بممازحة / سعد ما هو يمكم ولا يم العرس بلش بالشاهي الي احرق فمه ...؟

ابتسم سعد بمجاملة / ما علي ان شاء الله ما هو حار مره...،

مساعد برأفه / وش ما عليك وانت وجهك من اليوم يصفر ويحمر كانه حاسن بك رح لصيدلية يمكن الصيدلي يفيدك...؟

وقف سعد أحس ان جائته ساعة الفرج وغادر مجلس الجد لم يصدق انه خرج من الباب وتوجه الي بيتهم ...،

هز مساعد راسه بحيرة وضجر/ ها الولد مدري وش بلاه انا ملاحظ عليه من فترة ما هو معنا ...،

قبل كم يوم احرق يده والحين فمه وأمس اخذ من امه قدر طاح من يده ما به حيل ...؟

فهد با استفهام / راح مستشفى سوى تحاليل...؟

يمكن نقص فيتامين ما تدرون...،

مساعد / قلت له امس يقول بروح...،

الجد با اعتراض/ مبطي وانا ناقدن عليه ماهي سالفة كم يوم ...؟

عيونه ذابله ويمشي مشية المهموم فعله فعل العاشق والله اعلم...؟!!

مساعد / وما لقيت الا سعد يايبه كنك ما تعرفه يستحي من ظلاله ...،

فهد / وهذا البلا الي يستحي ما يعلمك وينحرج انه يصارحك ...؟

فواز با ارتباك / وش عاشق يمكن صدق نقص فيتامينات او عنده فقر دم بعد هذي تلعب بجسم الانسان لعب ...؟

ثامر / خلاص ياعمي لا تجلس عليه انت رح معاه واطلب تحاليل شاملة تطمن عليه...،

خصوصا فيتامين دال فعله ازود من السحر بالجسم...؟

حركت سعاد راسها بتأكيد / انا مع ابوي وملاحظته بعد بس قلت يمكن اني وهمانه ...؟

حتى قلت بقول لسناء بينها وبينه تسأله وتحقق معه...،

اذا يفكر بالعرس ولا في راسه احد ومستحي يقول لكن ما فضيت...،

بدر وفواز كلن منهما يتحاشى ان ينظر للأخر...،

مساعد الذي شعر ان ثقلن نزل على صدره...،

خاف ان يكون سعد قد تورط اما بزواج سري او بخطبة لا تناسبهم ولا يستطيع ان يخبرهم ...،

انتبه ثامر لوجه عمه الذي أظلم فجاءه وبطمأنه / عمي لاتشل هم سعد عندي ما عليك انا بشوف وش وراه ...،

أردف / لكن اول شي يحلل تحاليل شاملة ماهو نقعد نبني على احتمالات واخرتها الموضوع يطلع بسيط ما يحتاج لكل ها التفكير...،

زفر مساعد با امتنان وابتسم / الله يفرج همك يا ثامر والله أنك طمنتني ...،

فهد / وانت من اي شي يا مساعد تهتم ...،

وخير يا طير وطلع انه يبي العرس وش المشكلة نخطب له ونزوجه وينتهي الموضوع...،

مساعد / البلا ماهو بزواجه البلا كانه طايح على له ناس ما ينعرف اصلهم من فصلهم والا مورط نفسه بله بلوى...؟!!

فهد / طمن بالك من ها الناحية ما هو سعد الي يسوي الي انت خايف منه...،

ثامر قال لك عندي خلاص ارقد وآمـن بتنحل ان شاء الله...،

قاطعهم رنين هاتف سعاد اقفلته ووقفت / هذي ريما اكيد خلصت شغلها بقوم أسلم على مضاوي وارجع لبيتي ...،

غادرت سعاد لداخل وخرج مساعد وفهد يتبعهم فواز وراكان وقام الجد الي الداخل ...،

لم يبقى في المشب الا بدر وثامر...،

نفخ بدر بتذمر وملل/ يااااوك ياطول ها الجلسة طولاه ...؟؟!!

ثامر الذي قام وغير مكان جلسته قرب النار / ماهي سالفة طويلة سالفة ألف موضوع دخلت في بعضها...؟

من غير سوالف رفعة وبنتها مع مضاوي...،

ضحك بدر / كلن على همه سرى

أردف / هذي سوالف قديمة وانتهت الخوف من الجديد ...؟

ثامر با استفهام / قصدك وضع سعد ...؟

هز بدر رأسه / بالضبط ...،

ثامر بتأكيد / من جد سعد ما هو الي اول ما طلعت من السجن...؟!!

لكن قلت يمكن ضغوطات او هو طبعه كذا وكان اول يجاملني...؟

نظر بدر الباب المشب...،

ثامر با استغراب التفت للباب / وش في عيونك تلاقط على الباب تقل عيون حرامي ...؟!

بدر بحذر / ما سمعت الي يقول الجدران لها اذان والابواب لها عيون...؟؟!!

ابتسم ثامر وحك لحيته / اجل وراك علمن عميق...؟؟

قام بدر وجلس بالقرب من ثامر وبصوت منخفض / ما هو بس علم...؟

السالفة ان سعد مثل ما قال جدي وعمتي...؟

ثامر الذي كان يحرك الجمر التفت لبدر با انتباه وحذر / قصدك انه ...،

بدر بتأكيد / ايوااا عليك نور انه غرقان لشوشته ودافن السالفة بصدره وبدت تفوح ...؟

ثامر باستفهام / وش يحده يحرق نفسه إذا في باله وحده يخطبها وإذا هي تبيه وشاريته بتتقبله على وضعه...؟

ما تبيه بطقاق ينساها والي خلقها خلق غيرها...،

عقد بدر حاجبيه بتهكم / عاد ما يقول ها السالفة الا انت ينساها ليه هو النسيان سهل نشرب علاج وننسى ...؟!!

أردف بسخرية / كان عطيناك وفكيتنا من المطارد وراك انت والعنقا...؟

ثامر بتأفف/ وضعي انا ومضاوي غير لكن هو مازال على البر ...؟!

ضحك بدر / والله ان وضعه أصعب من وضعك ...؟

ثامر / بدر تراك خوفتني لا يكون سعد متورط مع أحد...؟!

بدر بتهكم / بالله وجه سعد من ها النوع ...،

أردف / سعد حياوي ازود من البنات وتقول متورط ...،

وبهمس / سعد الي يبيها ريما...،

ثامر لم يستوعب / من يبي...؟؟؟

أردف بذهول / لا يكون قصدك البزر الي كل ما شفتو عمتي علقتو عليها ...؟!

هز بدر راسه بتأكيد / البزر هذي يمكن تقضي على ولد عمك الجلف الي طول وعرض...؟!!

ثامر بتحذير / بدر ترى السوالف هذي ما ينمزح فيها ...؟

بدر / والله ما امزح واني صادق وكنت شاك وتأكدت من اخوه فواز ...،

سألته وقال الرجال شكله من العام ناضج قلبه لكن يتكتم لين انسم حاله ...،

ثامر با استفهام / والحل ...؟

بدر / ما قلت لك الا ابي تساعدني نلقى له حل قبل الرجال يروح من ايدينا ...؟

أردف / تخبر اذا اجتمع مخي ومخك نطلع حل من تحت الأرض...؟


.


.


.