مرحبا يا جميلات الليلة بأذن الله بينزل الفصل الخامس
كونو با القرب

آرائكم تهمني

الفصل الخامس


بعد ربع ساعة في غرفة مضاوي
دخلت سعاد لغرفة مضاوي وانفاسها تتسارع من صعود الدرج وتضع يدها على صدرها /وش فيتس يابنت ترسلين وتقفلين جوالتس صايرشي
جلست بجانبها على السرير / جيت اركض بدون شعور خفت على ابوي ما حسيت الا انا على باب المجلس والحمدلله شفت ابوي طيب معناته البلا فيتس
أردفت سعاد وهي تضع يدها على كتف مضاوي / ردي وش بلاتس قلبتي صنم
مضاوي بشرود / وافقت على ثامر
ضحكت سعاد وصفقت بيديها / الحمدلله وهذي السالفة
التفتت لها مضاوي المستغربة من ردت فعلها/ وهذا شي تحسبينه هين تدرين من قلت لجدي عن موافقتي طقتني الحسوفة ابي اتراجع حسيت انربط لساني
وبتذمر / وفوق هذا ثامر عند جدي اكيد بلغة
سعاد / مدري والله دخلت اهابد روعتهم جالس هو وابوي وسعد المساعد يتقهوون
مضاوي تقف بسرعة / ياافضحي وجدي موصيني على الغدا نسيت من الروعة
امسكت سعاد بيدها/ الحمدلله والشكر وش فيتس ارتعتي وش جايبين له طباخة وشغالة
غير للأوقات هذي عارفات شغلهن ما هو توهن بضيوف ابوي لا تنسين كم لتس عن بيتنا غايبة الحمدلله ما ضاع شي الحين هن راعيات البيت
أردفت / قومي بس اغسلي وجهتس عن الروعة وانا بطلع لبيتي اغدي عيالي واجيتس دام تطمنت مافيتس شي
مضاوي تزفر بنفاذ صبر / الحين انا مرسله ابيتس وانتي تقولين غدا عيالي
من جد توني أفقد شروق وسناء الي اعرست وغطت والي طست لخوالها ونستني
سعاد تضحك / يا الله دام فيها تشره ماني رايحة والغدا بكلم الشغالة وريما يكملونه
وقفت مضاوي / امشي ننزل للمطبخ اشوف وش سون الشغالات
.
.
.

داخل المطبخ
سعاد بهمس / لا تقولين شي قدامهن ترى يفهمن أحسن مني ومنتس
مضاوي تغمز بعينها وبصوت منخفض/ توصين تربية ام جلال عساها بجنات النعيم تبين الكتاكيت تلقط الحب وتنشره
خلي بس يرتبون الغدا في المقلط ونروح نكمل سوالفنا بمكان ثاني
سعاد بكسل تتثاءب / اليوم يا الله صحيت على المنبه لصلاة الظهر من سهر امس وركض صليت وزينت غدا عيالي
مضاوي تضحك / انا ابشرتس لين جدي فقدني وأرسل سوناتي تصحيني
أردفت وهي ترتب صحون الغدا / النعمة واجدة ليتس تكلمينهم يجون يتغدون مع جدي
سعاد تجلس على الكرسي / ما دريت اصلن عندكم أحد والغدا عشان راكان ياعيون امه يجي من الكلية يبي غدا
مضاوي / زين اجل ماخذ ترم صيفي
سعاد / أي بسم الله عليه مستعجل مره ينافس أنور يقول بتخرج قبلك واتوظف واسدد ديون امي
مضاوي تشير للخادمة ان تأخذ بقية الصحون واتجهت للمغسلة غسلت يديها / ما عليه التمريض مضمونة وظايفه
يشد حيله خصوصا الحين يبون بكالوريوس ما عاد مثل قبل دبلوم
سعاد با امتعاض / اسكتي بس والله حطيت فلوس ما يعلم فيها الا ربي ما صدقت يوافق يدخلها
والا حضرته يوم ما جاه قبوله بالجامعة يبي يدرس برا بغى يطير عقلي خفت يدج دجت ابوه
ضحكت مضاوي وتناولت منديل مسحت يديها / أقولتس الله اعلم عريض المنكبين بيدخل الجنة من ورى حشتس فيه
سعاد تضحك / وانا صادقة والله يجزى أخواني خير
قالو على طول الولد لا يجلس شوفي له جامعة اهليه يدرس فيها لا يضيع وربتس يسر قبوله قسم تمريض
مضاوي / يا الله كلمي جدي الغدا جاهز وخلينا نكمل سوالفنا داخل
.
.
.
قبلها بساعة
الجد يدخل المجلس الخارجي دخل عليه ثامر وسعد سلمو عليه وجلسو
الجد ببشاشة لثامر/ هلا بك يابوي تباطيتك ما مريتنا
ثامر يجلس بجانب الجد / دوامي لبعد العصر ومتى اطلع وارتاح انام الا جاي اليوم الثاني
الجد / ماجور يابوك الي يسعى على رزقه ماجور
الجد يلتفت لسعد با استغراب/ وانت للحين تبطح ما عندك دوام
سعد يضحك / الالكن نرجع مع عودة المعلمين
تكفى جدي دعواتك الله يرزقني بوظيفة حكومي ارتاح من الاهليات وكرفها
الجد / الله يرزقكم ياعيالي برزقن مثل المطر مال أحد عليكم فيه منه
تدخل سعاد فجاءه عليهم
وبعيون متفحصه / السلام عليكم
الجد با استنكار/ وعليكم السلام وش عندتس تلهثين طايرن شملولتس
سعاد ابتسمت با ا ارتياح/ هاه لا يبا مافي شي
تدخل سعاد وتسلم على ثامر وسعد
سعد با استغراب / عمه وش فيتس صدق روعتينا
وبمعاتبة لطيفة / وشلون تدخلين المجلس كذا افرضي فيه أحد
سعاد با استهزاء / أقول ولد فزه ريحنا من بربرتك شايفني عميا
ناسي باب المجلس زجاجي اشوفكم من وراه وبرا مافي الا سيارة ثامر
ودريت ما في الا شيخكم ابوي والزين كله ثامر الجلال
وانت ياشين الحلايا على قولة الريم
ضحك سعد/ والله ما لومها دلوعتس على شي جاها مني ومن بدر
ثامر التفت لها وابتسم بود/ اجل دام فيها الزين كله اقعدي تقهوي معنا
سعاد تقف / لا والله جايني استدعاء ضروري بروح اشوفه
الجد بأمر / روحي وش موقفتس لتس بربرة ماتشبعين سوالف
سعاد تقبل انف والدها / جعلني ماخلا منك هذا انا رايحة
التفت الجد لثامر/ بغيتك بسالفة
قاطعه سعد بممازحة / جدي يعني اقلب وجهي
ابتسم الجد/ ايه اقلب وجهك بس ما هو الحين بعد الغدا
سعد يضحك / الحمدلله اهم شي ضمنا غدانا
.
.
.
لحظات وسعاد تتصل بالجد / يبه غداكم جاهز بالمقلط
التفتت لمضاوي / ما يمدي حتى يرد قفل الخط بوجهي
ابتسمت مضاوي بود / ما تعرفين جدي ما قل ودل الكلام عنده
أردفت/ تبين نجلس بالصالة والا نطلع لغرفتي
سعاد / إذا سالفة كبيره مالها وانا عمتس الا جدران غرفتس
مضاوي / اجل اسبقيني للغرفة بشوف شي بارد نشربه متنا من الحر اللهم انا نعوذ بك من حر النار
.
.
.
غرفة مضاوي
سعاد وهي تشرب العصير / يا الله هاتي ما عندك يا فتاة
مضاوي / ما عندي غير موضوع ها الزواج
سعاد / طيب موافقتس وش بنيتيها عليه استخرتي والا من راستس كذا
مضاوي / ايوا استخرت
سعاد / طيب وبعدين
مضاوي / ولاشي استخرت عقب الفجر نمت وصحيت قلت موافقة مع أنى لاحلمت ولا حسيت بشي ابد
سعاد تضحك / ومن كبر حظتس ثامر من عزا امي محد شافه مر اليوم يشوف ابوي اجل ان شاء الله انها بوادر خير
زفرت مضاوي بحيرة وخوف لا تعرف مصدره لكنه يسيطر عليها / تدرين عاد أني ماني متفائلة لكن انجبرت ابي ارضي جدي
سعاد / والله انا عكستس متفائلة مدري ليه وأنكم مناسبين مره لبعض ثامر بسم الله عليه يهبل وانتي مايختلف عليتس اثنين
مضاوي تنظر لسعاد بنص عين / والله عاد انتي لتس تجارب بالتفائل
سعاد عضت على يدها بندم مصطنع / الشرهة مهي عليتس على الخبلة الي بطت لتس القربة ليتني سمعت نصيحة امي
مضاوي تبتسم وبتهكم / ليه انا وش قلت غير انتس خبره ما شاء الله بالمزايين
سعاد بجدية / لا عاد والله يا مضاوي ان ثامر من جد مزيون وان زينه مسكت وانه ما خلى للعاصف بعد زينه زين
أردفت / خلي عنتس خبالي على عريض المنكبين بصراحة ثامر من طلع من السجن انه يوم عن يوم يزين ما شاء الله عليه
مضاوي عقدت حاجبيها / تدرين كم مره اتصادف انا وهو ما اداني اناظره ولا أدرى كيف شكله اللهم ظل زوله
سعاد تضحك / وانا أقول لو انها منتبهه له غير تسوي ازود من سواتي مع عريض المنكبين
مضاوي رفعت حاجبها / تعرفين طبعي إذا ما اشتهي الأدمي ما اناظر بوجهه لو يقعد قبالي مية سنة ما كأني اشوفه
وبا ابتسامة شاردة/ الله يستر بعدين يتغير الاسم للمتعوس
سعاد با استغراب / وش متعوس ذا بعد
مضاوي بسخرية / ماهو خايب الرجا رجلتس والخوف ان هذا يصير المتعوس
ضحكت سعاد على وصفها/ الله يكفيني شر ها الضحك الي من البارحة شاقه حلقي ما تعودت
مضاوي تتأفف وبحيرة / أقول خلينا من السوالف هذي كلها
انا يوم قلت لجدي موافقة قلت ترى عندي شروط وجدي دق الصدر ان كل شروطي تنفذ
سعاد با استفهام / طيب وين المشكلة
مضاوي / المشكلة ان مخي قفل ما عاد أدري وش أقول نسيت وش ابي
سعاد / الله أكبر وش عاد بتشرطين وظيفتس اهم شي والباقي وضع ثامر شارط وخالص
مضاوي با استغراب / ما فهمت
سعاد / اقصد بيت شرعي وكذا بما ان ما عنده لا ام ولا اب او أحد يرتبط فيه
ما في الا ابوي وقرابة مشتركة بينكم وخواله من سنين ما ندري عنهم ولا يدرون عنا
أردفت / طيب تبين مهر مبلغ معين مؤخر صداق
مضاوي / لا كلها ما تهمني ابي شروط تضمن مستقبلي يوافق والا يرفض من الحين عليها
وليت يرفض عشان ارتاح
سعاد تضحك / السالفة يعني تعجيز يااويلك يالزين كله من مضاوي
مضاوي بحيرة / تدرين با احلامي من صغري وراسمتها بمخيلتي أنجزت الحمدلله معظمها انا خايفة ها الزواج يهدها
سعاد / يابنت الحلال ابوي وش قال لتس ما دق الصدر خلاص اجل
مضاوي / انتي عارفة وش معنى أنى طبيبة يعني ثلاث ارباع وقتي ماهو ملكي
ولا ملك الزوج الي بيعيش معي
سعاد / شوفي دامتس فكرتي بها الطريقة اجل ابشري بالخير
مضاوي با استفهام / كيف يعني
سعاد / أقولتس كيف انتي عارفة طبيعة شغلتس وفاهمة ان البيت والزوج لهم حقوق
يعني ترتبون وضعكم على كذا
وهو بعد ترى دوامه اسمعه يقول انه يمتد لساعات طويلة
يعني في شي مشترك بينكم
مضاوي / ما ابي اترك شي لتوقعات ابي أي خطوة اخطيها محسوبة
يعرف طبيعة شغلي وأني انسانة بكمل دراستي مستحيل اقعد كذا على البكالوريوس
سعاد بمناصحة / مو مشكلة اكتبيها بالعقد يجي أحد يقول لتس مو لازم وهذا شي مفروغ منه
إشارة بيدها بتحذير / إصري على ان كل شي ينكتب
أردفت / اقولتس كذا وهو ولد أخوي أي حق لتس لا تتنازلين عنه مثقال ذرة
رفعت كتفيها بتأكيد / الحق حق
قاطعهم رنين هاتف سعاد
ردت عليه/ طيب جايه خلاص
سعاد تلبس عبايتها وطرحتها
مضاوي / اجلسي تغدي طيب
سعاد وهي تلبس نقابها / تبين ريما تنتحر هذا هي اشغلتني يمه وينتس تأخرتي
وبملل تأففت /تلقينها متهاوشة مع راكان اعوذبالله مجاورها مجاور جننها
تخرج سعاد وتترك مضاوي بحيرتها لا تدري كيف ترتب افكارها
.
.
.
بعد الغداء يجلس الجد وثامر بالمقلط
ثامر / جدي قلت تبيني بسالفة آمرني جعل عمرك طويل
الجد / عمرك أطول يابوك ما بغيت أقول شي قدام سعد
ابتسم وبصوت منخفض يشير بيده / عندي لك بشارة
ثامر يبتسم بفرح / بشارة ومن جدي اكيد بشارة طيبة
الجد / أي بالله بشارة طيبة مضاوي وافقت عليك
صمت وهو مصدوم من موافقتها ابتلع صدمته وحاول ان يتماسك امام جده
الجد بتوجس / وش فيك بهت وجهك
ثامر بتلعثم / هاه لا جدي بس متفاجئ كانت رافضة وش غير رايها
الجد / أدري بنتي ما تعصاني
وبمودة ابتسم / والله أني عاذرها يوم عيت فاجئتها ما مهدت لها السالفة
وانت خابر البنيات يستحن وغلطت الي ما قلت لعماتك يسألنها
تنهد الجد بحزن / لو ام جلال الله يرحمها موجودة وبعافيتها كان قصرت علينا السالفة
واخذت من راسها العلم تخبر الحريم يقنعن بعضهن أحسن منا يالرياجيل
ثامر بينه وبين نفسه / هذي الورطة الي ماحسبت حسابها
عقب ما اقنعت نفسي ان الموضوع انتهى ماقصر جدي انهاه على مايبي
حرك الجد كتف ثامر بخفه / هيييه انت وين رحت ما تسمعني
ثامر بشرود / معك معك جدي وش بغيت
الجد يضحك / لا والله أنك شرقت وغربت اقول كلم عمامك خلهم يجون
عقب صلاة العصر ابيهم ضروري ما عاد بقى وقت على الصلاة
ثامر / ابشر الحين أكلمهم
.
.
.
بعد صلاة العصر في مجلس الجد
يدخل مساعد وسلطان
سلطان / وش عنده ابوي يبينا من كلمني ثامر وانا مستغرب اكيد في شي كبير
مساعد / الحين يجي ونعرف العلم
وبتعجب / البارحة وحنا عنده ما اطري شي
والفجر مصلين معه بعد ما قال شي شكله موضوع جديد
ينضم فهد لأخوته في مجلس الجد
يضحك سلطان / اقولك الموضوع كبير والا ابوي ماسحب حضرت العميد من بيته
وهو عارف طبعة مايلاعب على النوم ويهاوشنا عشانه
فهد بكسل جلس/ يارجال تحسبنا مثلكم يالمدرسين
انا اطلع لدوامي من صلاة الفجر وارجع ما اصدق اصلي العصر انام ارتاح
شبعان تبطح بذ العطلة وتسولف بعد
سلطان بممازحة / ماقلت لك يا مساعد انها عيون ابوبدر يوم حاسونا بالتعاميم الجديدة للمعلمين
مساعديضحك / الا عيونه شقلبت السلك التعليمي كله
يدخل الجد للمجلس يقف أبنائه احترام له
ويدخل خلفه ثامر
بعد السلام يجلس الجميع بصمت في انتظار سبب الاجتماع
الجد بفرحة / عندي لكم علما طيب
ابتسم بسعادة وهو ينقل نظره بين ابنائه / ابشركم مضاوي وافقت على ثامر وابيكم تخلصون الموضوع بسرعة
سلطان بفرحة / ياعساه الف مبروك
فهد ابتسم / زين ما شاء الله الف الف مبروك والله يجمع بينكم بخير
ثامر ابتسم بمجاملة / الله يبارك فيكم
مساعد / الف مبروك والله يبني بيتك
و با استهزاء امال فمه / ما شاء الله مابغت ها الجوهرة تطلع من فمها
الجد بحده / اما قل سالفة طيبه والا صم فمك ولا تقابلني
مساعد اعتدل بجلسته / يابيي والله انها دابله تسبدي يومها ازعلتك
اردف با امتعاض / والله يمكن لو انها بنتي على عنادها هذا يمكن ذابحها مبطي
الجد با انفعال / مهو شغلك ننجاز انا وبنتي نزعل ونتراضى انت وش مدخلك بينا
فهد بمحاولة تهدئة نظر لمساعد بمعنى اسكت / وأبوي صادق مضاوي بنته جلست معه أكثر من ما جلسنا حنا معه
التفت لوالده / لك الامر وعلينا التنفيذ انت بس وش تبي يابوجلال
الجد بحنان / عسى عمرك طويل يافهد
التفت لجميع ابنائه / تقدرون تخلصون العرس با أسبوع
صمت اطبق على الجميع وعلامات تعجب
سلطان يستفهم / يبه قصدك الملكة والا العرس وحفل العرس
الجد با اصرار / كلامي واضح اسبوع ومضاوي رايحة لبيتها مع ثامر
مساعد بدهشه / الفحص وهو فحص أكثر من أسبوع
فهد يهز رأسه بموافقه/ ما عليه تندبر لكن يبه على شان مضاوي تخبر الحريم ومقاضيهن الي ما تخلص
الجد بتذمر / الله أكبر السوق قريب حريمكم وبناتكم يساعدنها بيوم يومين وهي خالصه
سلطان يلتفت لثامر ويضحك / انا عمري ما شفت كبر علامة الاستفهام والتعجب الي على وجه ثامر
وااضح الرجال مثلنا ما عنده خبر
ابتسم ثامر المحرج من تعليق عمه / مثل ما قلت الموافقة نفسها ما دريت الا قبلكم بشوي
سلطان / ماعليه وانا عمك تساهيل ان شاء الله
فهد يبتسم بعطف / لاتشل هم الا لبست البشت
الجد بجدية/ اعتمد يعني أسبوع خالصين
فهد يضحك / وإذا طلبتك تخليها شهر تردني يبه
الجد بغضب / وش شهر واجد
فهد بمسايسة / الملكة مو مشكلة نخلصها لك با أسبوع
اردف / انت داري وش اليوم
الجد / مابعد خرفت الخميس
فهد ابتسم با اعتذار / والله ماهو قصدي لكن بكرا جمعة والدوامات تبدا الأحد متى بيحجز موعد التحليل ومتى بيحللون
والملكة ما تجي الا بتحليل انت عارف والتحليل يبي وقت علشان يطلع
الجد / خلاص شهر وأنتم منهين كل شي
سلطان / يبه شكل حتى مضاوي ماتدري عن شي انت عطها خبر بالموعد
والبنت تشوف بعد امورها مثل ماقال ابو بدر الجهاز يبي له وقت
اردف بممازحة / وفهد خبرك توه خالص من دوشة جهاز بنته
كفرات سيارته للحين ساخنة مابردت من لفلفلة الأسواق
الجد بموافقة / خلاص اجل عطيتكم العلم وأنتم عليكم الباقي
الجد يتأهب للخروج من المجلس
يدخل بدر وخالد لمجلس الجد
بعد السلام على الجميع
الجد / انا بروح داخل اشوفها وأنتم تقهوو عقب كلن يروح يشوف الي وراه
بدر بممازحة / يعني نفهم ان هذي طرده ياجدي
الجد يبتسم / طردتين بعد لك يالمهايطي
خرج الجد وجلس بدر وخالد
بدر / وش عندهم أعمدة العاصف مجتمعين
فهد يبتسم / بارك لخدينك وافقت عليه بنت حزام
بدر با استغراب ينظر لثامر الصامت / السالفة صدق والا تمزحون أنتم
سلطان يضحك / لا والله صدق وجدك كان يبي العرس الأسبوع الجاي لو ماتدخل ابوك وطلبه عقب شهر
يجلس بدر المنهار من الضحك بجانب ثامر ويقبل انفه/ الف الف مبروك
ويهمس له / ما نفعتك خططك يابو الخطط
ثامر مازال صامت
خالد بفرح / الف الف مبروك الله يوفقك ويبني بيتك ياثامر
اردف / وعقبال العزابية
ثامر ببرود / الله يبارك فيك
مساعد / العزابية لو يبون زوجناهم من بكرا يمكن عرس ثامر حل العقدة
خالد يرفع يديه/ آمين يارب وعسى الله يكثرنا جمعنا
وقف فهد والتفت لثامر/ ادخل على تطبيق صحتي واحجز موعد علشان تحللون و نحاول نطلع التحليل قبل الخميس الجاي
خرج الجميع من المجلس وبقى بدروثامر وخالد
خالد با استغراب واستفهام نظر لثامر/ وش فيك مكتم يابن الحلال وجهك ماهو وجه معرس
ثامر بضيق / لا ابد عادي لكن مرهق شوي تعرف ضغط أسبوع كامل دوام واليوم طلعت بدري ركبت سيارتي وجيت
بدر يقف / خلونا نطلع مقهى نغير جو طفشنا من جو الدوامات
خالد / ماني خويكم عندي شغل
.
.
.

بسيارة بدر
بدر / وش فيك يارجال قالب وجهك اسود
ثامر با امتعاض وقهر / يعني تغيشم يابدر والسالفة ذي الي حسبتها انتهت ما شفت الا جدي فاجعني فيها
بدر بمحاولة تهدئة ثامر/ والله لا فاجعة ولا شي انت مكبر السالفة اجل هاالمسكينة وش تقول
ثامر بغيض/ محد طقها على يدها لو قالت لا محد بيجبرها
بدر با استغراب وانتقاد / انت من عقلك تقول كذا والله البنت ماحدها عليك الا وفاة جدتي والا انت شفتها قبل كيف رافضة
ثامربا امتعاض / الي قدرت تقنع العاصف انها تدخل طب على تشددهم محد يقدر يجبرها على شي
بدر بملل وتذمر/ والله انا تعبت وانا اعيد وازيد معك بها الموضوع
اقولك البنت بالحالها واقفة والكل ضدها
وانت هذا ردك إذا انت رجال استسلمت لهم جاي على ها الضعيفة
اردف / المهم اتركنا من قربتك المقطوعة الي انا انفخ فيها يقولون مصائب قوما عند قوم فوائد
ثامر با استهزاء / وش جاك من الفوايد من ورى مصايبي
ضحك بدر على تعليق ثامر / يعجبني فيك سرعة بديهتك
أردف / بكلم ابوي ملكتي مع ملكتك طفشت من الانتظار لهم كم وهم يأجلوني
ثامر يبتسم / زين بعد نلقى لنا مساند يقولون حشرن مع الناس عيد
.
.
.
في بيت الجد في نفس اليوم قبل صلاة المغرب
الجد يدخل ويرسل الخادمة لمناداة مضاوي
مضاوي وهي تنفض يديها ليجف طلاء الاظافر الذي وضعته لتو / خلاص بجي الحين وجهزي قهوة وشاي وخليهم بالصالة عند جدي
تخرج الخادمة ومضاوي ترسل لسعاد رسالة
(الحقيني جدي ينادي جاك الموت ياتارك الصلاة)
.
.
.
في بيت سعاد
ريما تبتسم / ماما وش فيتس تناظرين الجوال وتضحكين
سعاد أغلقت هاتفها ووقفت / لا بس جدتس مرسل علي يبيني بروح له
ريما بملل وتذمر/ يا الله من يوم طلعت مضاوي لبيت جدو وانتي تاركتنا وجالسة عندهم
سعاد بملامة / الي يسمعتس يصدق وش جالسة عندهم
اول شي من بعد بيت ابوي ومن طول الفترة الي اقضيها فيه دقايق وارجع
واكثروقت روحاتي انتم نايمين
ابتسمت لها بحنو وفتحت ذراعيها واحتضنتها وقبلتها/ يا الله يا الشكاية تعالي معي
ريما با استسلام / لا خلاص بروح اتابع دورة تجميل مسجله فيها بس لا تأخرين ابي أغراض عشان الدورة من السوق
ابتسمت سعاد لهذه المدلله التي بلغت الخامسة عشر ومازالت تخاف كطفلة في الخامسة من عمرها / طيب بشوف وش عند اهلي وارجع
.
.
.

في بيت الجد
مضاوي تجلس مع الجد بقلق
الجد / وش فيتس تلتفتين من جلستي تحترين أحد
مضاوي بتوتر تنظر لهاتفها والثواني فيه أصبحت ساعات / هاه لا جدي بس عمتي سعاد قالت بتغدي عيالها وتجي تقهوى معي وتاخرت
الجد يهز راسه / اهاا ماهو من بعد بيتها متى مانوت رجل هناك ورجل هنيا
مضاوي تحاول تغير الموضوع وهي تعرف مسبقآ التفاصيل / الزين في عبد اللطيف انه بنى بيته قريب من بيتنا
الجد التفت لها وبغيض / يعقب هو وجهه هذا بيت سعاد محد تعب عليه غيرها الارض هذي لنا كنت ابيها لثامر لكن سوايا اهل رجلها بها
حدتني اعطيها الأرض قلت انتي اولى بها ابنيها واسكنيها وريحي راستس من مشاكلهم
مضاوي / سبحان الله توني أدري وكنت مستغربة ان عمتي بيتها بين بيوت العاصف
توقعت عشانه اخو ام ماجد وخصوصا ان بيوتهم جنب بعض
الجد / خلينا من علوم عبد اللطيف وسعاد
تدخل سعاد / وش ازين من سعاد وعلومها
الجد يضحك / جت على طاريها
أردف الجد بممازحة / وانتي ورى ماتقرين في بيتس ماغير ها العباة ماترتاح من فوق راستس
سعاد تقبل راس والداها / افاااا يابوجلال مليت مني
والله اليوم الي ماتصبح واتمسى فيه بشوفتك انه مايعد من عمري
الجد/ عسى عمرتس طويل يا ام أنور
اردف / لكن عاد يوم جيتي عندي سالفة لمضاوي ودي اقولها قدامتس
مضاوي تبلع ريقها بتوتر وتنظر الي سعاد
سعاد بنظرة اطمئنان لمضاوي / وانت يابوي دايم ماتسولف ولا تقول الا الزين
أردفت وهي تجلس بجانبه / جب ماعندك يا الغالي
الجد / انا أدري انتس دريتي بموافقة مضاوي على ثامر من يوم جيتنا الظهر
وقبل شوي اخوانتس درو وقلت لهم ودي نخلص العرس با أسبوع
مضاوي قاطعته با اندهاش وذعر /وش أسبوع
سعاد تحاول تهدي مضاوي / يبه وش أسبوع والله لو انه زمان جد جدي أسبوع مايكفي
الجد يهز راسه / داري قال لي فهد شهر وانا وافقت
مضاوي بمقاطعة / جدي وش شهر انا الأسبوع هذا ببدا التطبيق
وبعدين وين وعدك لي تنفذ كل شروطي
الجد / وانا عند وعدي لتس شروطتس من لحيتي خوذيها
سعاد / يبه مضاوي صادقة شهر وش يسوي
الجهاز يبي له وقت ومضاوي وراها دوام خلوها طيب لإجازة الربيع
الجد المتكئ يعتدل بغضب / وش ربيعه السنة الجاية قصدتس
سعاد / أيوا يمدي خالصين عادي ملكو الحين والعرس
قاطعها الجد ووقف / لا بالله الربيع الجاي يمدي ولدها يلعب بحضنها
نملك وحفلة بينكن وتروح لبيتها وهذا الي عندي
سعاد تقف وتمسك يد والدها / يبه اجلس ولا تعصب مو مشكلة
انت بعد للحين ماسمعت شروط مضاوي
الجد / انا قايل لها شروطها تاخذها مني كلها
مضاوي تقف بيأس / خلاص جدي انا موافقة على كل الي تبيه
لكن تذكر أنك ماسمعت وش شروطي ووافقت عليها
الجد با استغراب / ماتبين وظيفة وبيت مثل كل البنات وش الشروط غيرها بعد يابنت حزام
مضاوي بحزن / سلامتك ياجدي سو الي تبي نسيت ان الي مثلي ينفذن وبس
غادرت وصعدت مضاوي الي غرفتها
سعاد تجلس الجد المتوتر وتجلس بجانبه / يبه الله يرضى لي عليك الأمور ماهي كذا
مضاوي ترى وافقت بس على شانك انت بعد تنازل شوي واسمع لها
الجد عقد حاجبيه با استنكار لردة فعلها/ وانا وش انا قايل قلت الي تبيه ينفذ
سعاد / يابيي الكلام غير والفعل غير وانت تكلم بلسان ثامر ترى
لا انت الي سمعت مضاوي وش تبي ولا انت الي دريت ثامر وش بيقول
الجد با استسلام / خلاص روحي لها وشوفي وش تبي وعلميني
سعاد / بروح لها وانت كلم ثامر
وانا إذا عرفت وش تبي مضاوي علمتك قدامة وهو بكيفه يوافق والا يرفض
الجد بحزم / وش يرفض مهو على كيفه
سعاد / يبه ترانى مابعد قمت وشفت مضاوي وش تبي لكن انا أدري ان كل شروطها عن وظيفتها ودراستها
الجد بحيرة / طيب يابوتس وانا وش أقول من اليوم
سعاد / عساني ماخلا منك انت عارف دراستها صعبة ودوامها مهو كل رجال يرضى فيه وياما بيوت انهدمت بسبب الوظيفة لازم ثامر يكون عنده خبر بكل شي
الجد با امتعاض / طيب طيب الحين كلمي ثامر يجي ابيه وقومي شوفي وش عند مضاوي خلونا نخلص من دوخة ها الراس
.
.
.

في سيارة بدر
ثامر رد على اتصال سعاد
ثامر / خلاص شوي وراجعين ماقالتس وش يبي
سعاد بممازحة / لا ماقال وش يبي يقول هذي اسرار خاصة بالعاصف بس
ثامريغلق الهاتف وبا امتعاض وتذمر / ارجع لبيت جدي يبيني مدري متى راسي يرتاح من ها السالفة
بدر/وش دراك خلاص ماهو تكلمتو واتفقتوا
ثامر / ماعلية هذا انا وهذا انت إذا ماهي مسوية زوبعة حضرتها وجدي عشان كذا مناديني لا تسميني ثامر
بدر / هد اعصابك يارجال وإذا سوت زوابع تراك انت الرجال وبيدك أي قرار
ثامر بتذمر ويأس زفر ووضع يديه على رأسه / والله العظيم داري بيدي كل شي واقدر اسوي شي انت نفسك ما تتخيله
لكن ما ابي اضايق جدي حتى موافقتي عليها قلت تحصيل حاصل وش بيجيني اكثر من الي جاني
وتوقعت وتمنيت انها ترفض لكن عاد ماجات الأمور على مابغيت
وبتوعد يحرك رأسه / لكن الحين اوريك فيها أني لأقلبها عليها واصير لها أزود من عمي مساعد يوم بغى ذبحتها قدامنا
بدر يضحك / حدك عاد الا النسيب والله ياعليه لسان اعوذبالله إذا عصب
ودك تركبه صاروخ وللمريخ لين تهدى أعصابه ويرجع
يبتسم ثامر / الظاهر من شاف بلاوي غيره هانت عليه بلوته
الله يستر لاتكون بنته مثله واقعد بها يابدر
بدر يضحك / والله قلبي يقول انها اعبر من عمي لكن ماعليك والله لأاعسفها
وبعدين تراها هي وشروق ومضاوي حزب من يوم كانوا صغار
ثامر / اجل الله يعينك إذا هي صديقة الملسونة الي جات بحظي
أردف / يا اخي البنات واجد ماهو ضروري الا هي كان دورت غيرها
شف غيرها من بنات عماني اومن خوالك
بدر يضحك / تدري هي الي فطنت على نفسها وحاطها في بالي مبطي وأقلمت نفسي انها نصيبي
ثامر با استغراب وتعجب / كيف فطنتك على نفسها
بدر / لايروح بالك بعيد السالفة اشبه بنكتة لكن هي لزقت بمخي وماعاد طلعت
وبعدين بنت عمي ماهي بعيدة
أردف / بعد ما خلصت الثانوي هدية ابوي كانت سيارة وتخبر فاز فيها وادخلها داخل الحوش
وهي كانت تدرس با الابتدائي وكل ما جيت بطلع الا هي مثل القطو تحوم حول سيارتي
واحذرها سناء لا تقربين من سيارتي طسي العبي بعيد
وتعاند صارت إذا شافتني ركضت تطبع ايديها على شبابيك السيارة وتنحاش
مره ركبت السيارة وبدون ما أكلمها فتحت الشباك أدري بتسوي لها حركة ودخلت يدها وسكرت الشباك على يدها
ما فكيتها لين بكت
ثامر بملامة/ حرام عليك زين ما كسرت يدها
بدر / عاد ليتها تابت
بعدها بكم يوم طلعت ابي لي شغلة وقتها ضرورية
لقيتها واقفة عند آخر كفر منسمه لي الكفرات الأربعة
ويجن جنوني عليها ومع شعرها سحبتها من بيتنا لبيت عمي مساعد
والقى امي وامها يتقهوون واحذفها بينهن
قلت احرصوا عليها مالي من الحريم غيرها
المهم بعدها ما شفت وجها من ذاك اليوم لليوم
دخلت الكلية وهي كبرت وتغطت والكل متوقع أني اخطبها
وما ابي اخيب ظنهم
ثامر يبتسم / تخيب ظنهم والا شي ثأني
بدر ينظر امامه ويتنهد / كلهن ياثامر كلهن
.
.
.
في بيت الجد سعد
سعاد ترد على الهاتف / هلا ثامر طيب لحظة
نظرت لوالدها وهاتفها بيدها / يبه ثامر وبدر في المجلس ودك تطلع لهم والا يجونك هنا
الجد وهو يقف / قولي له يدخل وبدر يوسع وجهه
سعاد تضحك / اظن سمعت الجواب
ثامر / خلاص انا جاي شوفو الطريق
يقفل الهاتف والتفت لبدر / جدي يبيني لحالي داخل الله يستر وش مسويه هذي
بدر بمودة / ان شاء الله مافي غير الخير وتذكر انها يتيمة لطيمة مالها أحد بعد جدي غير الي بيتزوجها
تأفف ثامر وبحنق / والله محد غيري يتيمن لطيم
بدر / ادخل شف وش عند جدي وانا راجع لبيتنا إذا ودك بعدين تمرني تلقاني بالملحق
ثامر /خير ان شاء الله
.
.
.
بعد دقائق
اتصل ثامر على سعاد / عمة وينكم
سعاد / تعال للغرفة الي على يمين المطبخ ما قدامك أحد
دخل ثامر وسلم
سعاد تبتسم / وش فيك متوتر ترى اليوم ما هو عرسك
أردفت بمحبة / بقولك شي قبل يجي ابوي
ترى البنت بانيه أحلام ما تتخيل كيف على دراستها لا تكسر بخاطرها
ثامر يجلس قريب من سعاد وبا انزعاج / ها الموضوع مسوي لي ازعاج ابيه ينتهي بلي هي به
وبا استفهام / جدي وينه استعجليه
يدخل الجد مستند على عكازه يقف ثامر احترام له ويجلسه ويجلس بجانبه / هذا انا جيت ياجدي آمر وش بغيت
الجد يتنهد / والله يا ولدي مدري وش أقول
ثامر / قل الي في خاطرك ولا صاير الا الي يرضيك لو انها رقبتي
الجد يمسك بيد ثامر / هذا العشم فيك وأدري والله أني اضغط عليك
لكن مضاوي تقول عندها شروط ولا بعد عرفتها
بناديها الحين وابيك تسمعها من فمها لأذنك وقدامي
ثامر / ما يحتاج تناديها موافق على شروطها
سعاد بمقاطعة / ثامر ترى ابوي صادق يمكن في شروط ما تجوز لك من الحين تتفقون
ثامر عقد حاجبيه وبا امتعاض/ وش يعني الشروط المعجزة الي بتطلبها
الجد يلتفت لسعاد / قومي قولي لها ثامر عند ابوي ويبون يسمعون شروطتس
.
.
.
تقف سعاد متوجه لغرفة مضاوي طرقت الباب ودخلت
سعاد تجلس بجانب سرير مضاوي / وش عندتس منسدحه وتقلبين بالجوال
جلست مضاوي / ما علي صلاة واقرا وردي من الجوال
سعاد / ابوي جالس تحت بمجلس الحريم ينتظرتس
اردفت / جالس عنده ثامر
مضاوي با اشمئزاز/ وهذا وش يبي داخل
سعاد / ابوي ناداه يبيتس تقولين شروطتس قدامة
نزلت مضاوي من السرير بسرعة وبنبرة غامضة/ زين اطلعي لهم قولي جايه
سعاد امسكت بيدها / مضاوي اشوف عيونتس تنطق شرار هدي اعصابتس وزيني لسانتس
وتعالي با أسلوب ومثلتس ما تنوصى
خرجت سعاد تاركة ورائها مضاوي بحيرة وقهر / يا الله كيف أوصل له أني ابي أقدم على بعثه
زفرت بتذمر وتأفف/ متى ينتهي ها الكابوس من حياتي
لبست مضاوي عبأتها وطرحتها ونقابها وخرجت خلف سعاد
.
.
.
سعاد / هذا هي وراي جاية
يرفع ثامر نظره لسعاد وشد انتباهه طول قامة التي خلفها كأنه لأول مره يراها
ثامر بنفسه /فرق بينها وبين طول عمتي وفرق واضح بعد
يمكن عشان اول مره اشوفها جنب حرمة
كل ما شفتها الا معي رياجيل وصوتها يلعلع
تدخل مضاوي وتجلس على أقرب كنبه امامها بجانب سعاد / سم جدي
يبتسم الجد / الناس اول ماتدخل تسلم على بعضها
سعاد بممازحة / يبه مضاوي سلمت بس انت وثامر مشغولين ماسمعتو
الجد يضحك / عليتس وعليها السلام
أردف الجد وهو ينظر لها ويشير لثامر/ مضاوي هذا ثامر قدامتس قولي الي بخاطرتس من شروط
مضاوي توجه نظرها لجدها / جدي انت عارف نوعية دراستي والوظيفة الي بتوظفها بعد ما أخلص
الجد بمقاطعة / الوظيفة والدراسة شي مفروغ منه انا قايل لتس وش تبين غيرها
مضاوي تفرك اصابعها بتوتر/ جدي انا ماكملت كلامي
ثامر يناظر مباشرة لعيون مضاوي من خلف نقابها / وجهي كلامتس لي مهو لجدي الشروط علي مهي بعليه وش غير انتس بتتوظفين
مضاوي اربكتها واحرجتها نظرات ثامرابعدت عيونها عنه ثامر وتشاغلت بطرف كم عبائتها / انا الحين امتياز وببدا الأحد الجاي وبعد الامتياز انا ابي اكمل
ما راح اقعد على البكالوريوس واكيد ان الدراسة تمتد لسنين طويلة
ثامر با استفزاز وتهكم عقد حاجبية / سلامات يعني ها الحياة ما شاء الله نقضيها كلها دراسة
وقفت مضاوي / شكل عندك اعتراض وانا مابعد كملت كلامي
سعاد تسحب يد مضاوي وتجلسها / اجلسي وقولي الي عندتس لاتقومين الا وانتي قايلة كل الي بخاطرتس
ثامر يرتكي على طرف الكنبة ويضع كفه على خده / يا الله كملي وش بعد
مضاوي التفتت لسعاد/ انا ابيه يعرف ان دراستي محور حياتي مستحيل أوقف عند نقطة معينة ما يقعد ينشب لي
اردفت بتوتر / وبعدين دوامي اختلاط ومرضى ومريضات وأحيان عمليات طارئه يستدعوني أي وقت
نظر ثامر الي أصابع مضاوي المتوترة باشمئزاز وبنفسة / يا الله نسخة ايدين أمها وبياض مفاصلها
حتى لون مناكير الاظافر الأحمر الكريه الي كانت امها تحطه هي حاطته الله يقطع ذيك الايدين وذكراها
ينتبه ثامر ليد جده التي وضعها على يده / انت وش رايك بلي تقوله مضاوي تبي تسمع رايك
ثامر يعتدل بجلسته / انا عارف من لفتس ودورانتس هذا كله الي تبين توصلين له
رفع حاجبه وأردف / انتي با لعربي تبين تكملين دراستس برا وهذا الي موترتس صح والا انا غلطان
استنتاج ثامر لسبب توترها ادهشها واخافها وحاولت السيطرة على انفعالها / وش الي يمنع أني أكمل هنا والا بالخارج عادي
الجد بغضب / وش الي عادي مبطي قايل لتس دراسة بغيرديرتنا مافي
ثامر يضع يده على كتف الجد يهديه و با ابتسامة صفرا نظر لها / انتي عندتس خبر أني علي سابقة
يعني صاحب سوابق ومقدر اطلع خارج الدولة كم سنة قدام
يعني انسسسسي سالفة البعثة والأبتعاث
اردف بسخرية/ عندتس شي ثاني تبين تقولينة
مضاوي بقهر حاولت ان تخفيه وبا استفزاز / ماسمعت منك جواب موافق على دراستي أولا
ثامر / دراستس خالصين منها
أردف / الحين قصدتس الدوام انتي سنة امتياز مثل ماقلتي
اشار بيده وبهدوء عكس مابداخله من غضب/ فرتبي كلامتس لاتجيبين الكلام عشوائي كذا
مضاوي با امتعاض / عاد الي هو انت وش رايك بالموضوع
ثامر بغيض حاول ان يخفيه / اسمعي يابنت عمي انا رجال ما أحب اللف والدوران ولا الكذب
خليني اجيبها لتس من الآخر
وضع يده على صدر / لتس عندي بسنة الامتياز هذي إذا بتطبقين بمستشفيات الخرج
انا اوديتس واجيبتس إذا في الرياض ومافي مجال ابداا ابدا تنقلين للخرج راح اضطر ادور
طريقة تضمن دوامتس من الخرج لرياض
وبعد التخرج وظيفتس قلت موافق عليها وأتمنى يكون تعيينتس قريب من بيتس لكن اكمال دراسة اسمحي لي
مقدر الا إذا شي قريب وتقدرين تروحين وترجعين على البيت ابدا مافي مانع
اردف بنبرة تهكم / اهم شي ماتقصرين بواجباتس الزوجية
مضاوي ابتلعت حرجها من تلميحاته ونظراته الناريه لها / المستشفى انا اخترت من زمان الي بطبق فيه واكمال دراستي لانقاش فيه
ثامر عقد حاجبية وبا انفعال / كيف لا نقاش فيه
مضاوي بعصبيه / اكيد لا نقاش فيه المهنة الوحيدة الي تجبر الشخص طول عمره كأنه طالب يدرس هي الطب
التفت ثامر للجد / جدي انا قلت شي غلط أقول لها إذا في مجال ما عندي مانع
يقف الجد بغضب مستند لعكازه ويلتفت لثامر / انت عداك العيب وماجا منك الا الكلام الطيب
اردف وهو يوجه الكلام لمضاوي ويأشر با أصبعه بتهديد/ اسمعي يابنت حزام ماعاد ابي اسمع شي
تروحين معي متى ماحجز ثامر موعد التحليل انا الي بوديتس تحللين ومن تطلع النتايج تملكون غيرها الكلام ماعندي
مضاوي بعصبيه / بس ياجدي
الجد بمقاطعة / وش الي بس انتي تخبصين خبص مافهمنا منتس شي
قلتي وظيفة قال موافق قلتي تبين تدرسين قالتس موافق
وبغضب / وش تبين بعد علميني وش براستس
وبا اصرار أردف / الزواج يا مضاوي معرسه معرسه ثامر والا غيره
وبا استفهام / إذا يابنتي براستس أحد علمينا وانا موافق عليه
وكلامي ما اثنيه اليوم الخميس ومعتس الي يوم موعد التحليل فكري واختاري
مضاوي تقف بقهر / انا ياجدي ينقال عني كذا ومن الي يقوله انت الي مربيني تشكك با أخلاقي وتظن بي سوء
الجد يجلس وزفر بتذمر / ومن جاب طاري ظن السوء انا مقصدي يمكن من خوياتس
وكم مره يكلمن عماتس حريم يخطبنتس ماهو عيب ولا حرام الزواجات كلها الحين من شور النسوان
ثامر يكتم ضحكته / جدي عداه العيب
وبنظرة استفزاز يشير لها / والحين الكورة بملعب بنت عمي وجدي صادق يمكن ماني قد المقام
اردف بتهكم ساخر / وخوياتها إذا خطبوها اكيد دكتورات مثلها وما يجيبون لها الا شي يستاهل مهو مثلي خريج
قاطعته سعاد بعصبية / ثامر وش ها الكلام
مضاوي بغصة قهر / جدي انا موافقة خلاص ولو تبي اليوم الملكة ولا تكتب شروط بالعقد
إذا تكتبون شرط واحد ماني موافقة والدراسة هذي كلها ما عاد ابيها ارتاحوا يالعاصف من البلوى الي اسمها بنت حزام
خرجت مضاوي من الصالة وهي تنتفض من القهر
سعاد / يبه وش الكلام الي قلته
وبملامة/ مضاوي ماتستاهل منك ها الكسحة
والله انك قهرتها يوم قلت كذا وانت خابرها وعارف اخلاقها
الجد يجلس ويفرك يديه بحسوفه / أدري ضغطت عليها بس والله دبلت تسبدي
تمطمط هرجها وماهي عارفة وش تبي
سعاد / مضاوي ماتبي الا ها الدراسة الي مشاركتها روحها
ثامر بحنق / هذا هي ريحتنا ما تبيها ما سمعتيها وش قالت
سعاد با استهجان / انت الي وش تقول مضاوي لو تترك دراستها تموت دراستها هي حياتها
انا بعمري ماشفت انسان يحب دراسته ويستمتع وهو حتى يذاكر مثلها
الجد بمقاطعة / خلاص روحي شوفيها وش بخاطرها وعلميها ان الي يقهرها يقهرني قبلها ولو ها العرس هذا كله ماتبيه هونا عنه
سعاد / والله انتم وهي حيرتونا ماعاد نفهم عليكم
الجد بندم/ الله يكفيني شر دموع ها اليتيمة غصت بعبرتها غصة الي ماله حيله
ذهبت سعاد لغرفة مضاوي
ثامر بود/ جدي لا تضايق خلها بكيفها إذا موافقة خير على خير وإذا رفضت خلاص
انت سويت الي عليك لا تحمل نفسك فوق طاقتها
الجد يتنهد / والله مابغيت لها الا الزين وأدري محد يتحملها ويدفن خطاها غيرك
ولو مالت عليها الدنيا انك عز وسند لها لكن شوفة عينك
ثامر بنفسه / وش شوفة عيني وقحة وملسونه وعوبا وعنيدة وامها هيام منين القاها انا
عساها تعاند وترفض وافتك منها
الجد با استغراب/ وش قومك سجيت ما انت بمعي
ثامر / لا جدي معك آمر
الجد برجاء حاني / ما بيك تستعجل والي سمعته هنيا انسه ولا تطري لأحد شي إذا وافقت وحنا تممنا العرس ما وافقت الله يرزقك ويرزقها
ثامر يقف ويحرك رأسه بموافقه/ آمين تبي شي جدي ودك نروح للمجلس
الجد / لا بالله ابي اروح لغرفتي
خرج ثامر خارج بيت الجد وتوجه الجد لغرفته .

لا تلهكم الرواية عن الصلاة
موعدنا القادم بأذن الله قريبآ

ما صدقت عيوني وفرحت مرة يوم شفت رواية جديدة باسمك لانه اكيد كثير ما يدروا ان لك رواية جديدة اسلوبك مميز وننتظر نكمل الرواية