عدنا،،
بداية نبارك للشعب السعودي اليوم الوطني، وأسأل الله أن تبقى راية التوحيد خفاقة،
وأن يديم الأمن والأمان على أرض المملكة وسائر بلاد المسلمين 🇸🇦 ❤🍃


جخيدم،، دورت في المعجم عن معنى الاسم، قلت يمكن له معنى !!
بعض الأولين يسمون عيالهم على أشياء من بيئتهم،،أيّاً كانت ، حالة طقس، أدوات صيد، وغيرها
لقيت مصدر كلمة جخد، بمعنى الضخم من كل شيء،، يمكن إن الولد يوم ولادته كان كبير الحجم، فسموه جخيدم تصغير لكلمة جخد. 😅
الرسول صلى الله عليه وسلم، أمرنا باختيار أحس الأسماء لأبنائنا، وهذا من البر والإحسان لهم..
لكن بعض الناس الله يهديهم ،يجرمون في حق عيالهم بتسميتهم الغريبة ،

نجي للسيد عبدالعزيز جخيدم سابقاً،،
آااخ يا القهر، أثاري عائلة الراكان فيها نسخة ذكورية من رفعة!! 😡
مالت عليك وعلى أختك 🤚🏼✋🏼 وع ثم وع.😤
يا أخي سمّ عيالك، أحفادك على جدك ليش تروح بعيد ؟
أنا استغرب سعاد للحين عايشه ما جاتها جلطة خلصت عليها.

خالد،، ما شاء الله عليه، توقعت يزعل من فواز، لكن أخذ كلامه بسعة صدر، وكلامه عين العقل، هو مطلوب منه الإحسان لها وعدم عقوقها، مع إنكار أطباعها الشينة .
سبحان الله، كل هالعداوات أشعلتها إنسانة مريضة وهي الجدة رمسا بسبب الغيرة، وغذّت فيها عيالها ،، عجيب أمرهم!! الله لا يطيّحنا بناس مثلهم.

استوقفني دردشة مضاوي مع سعاد، وذكريات أمها النيرة،،
تذكرت حديث ( حسن العهد من الإيمان) ،، يا زين اللي يذكر من كانت له بصمة جميلة في حياته،
ولو كان موقف بسيط ومو بالعين شي، ومضاوي من الشخصيات الوفيّة اللي أثمر المعروف فيها وما نست أبد دور النيرة في تربيتها وتوجيهها وحمايتها من كل ضرر قد يصيبها.

مبروك لشروق الحمل،كود أم طلال تفك عنها شوي😃
أم جاسر هذي مطلوبة حالاً. في قسم السونار 😅

وننتظر قصة حلا مع هيام، وهل فعلاً بيكون لها دور في جمعها مع مضاوي؟

شكراً طيف على كرمك الحاتمي.🍃🌷🍃

مرحبا يا جميلات بأذن الله بينزل "الفصل الخامس و العشرون "

هدية اليوم الوطني

كونوا با القرب


آرائكم تهمني

الفصل الخامس والعشرون

.


.


.


بعد ثلاثة ايام خلالها ...،

خرجت سعاد من المستشفى الي بيتها...،

وعادت مضاوي لبيت الجد...،

سناء وبدر سافرو لشرقية ...،

شروق اخبرت زوجها بحملها...،

ومضاوي هي من اخبرت نورة بحمل شروق...،

.


.


.


بعد المغرب في صالة بيت الجد...،


الجد ينادي مضاوي...،

خرجت من المطبخ وذهبت اليه...،

ابتسمت / هلا جدي بغيت شي...؟

الجد ببشاشة / لا والله بس ماشفتس من الظهر...؟!

مضاوي / كنت عند عمتي ام انور اخذت غداها وتطمنت عليها تسأل عنك تقول ما مريتها...؟

الجد / لاحقين ان شاء الله اليوم بغيت امرها العصر يقول سلطان عندها حريم...،

مضاوي / اي جدي ام جارنا أبو ساير وحريم عيالها جايين يتحمدون لعمتي بالسلامة...،

الجد / ثامر من راح لا مرنا ولا شفناه يدق علي الضحوية يسلم ويسكر...!

مضاوي / مشغول مره يقول مستحي من ابوسامي على شان اليومين الي ما يداومها وقت الجامعة ...،

الجد / وهو متى يخلص من مشاوير جده...؟

مضاوي / خلاص نهاية السنة يختبر...،

الجد بفرحة / ويتخرج منها...؟

ضحكت مضاوي / لاجدي هو يختبر على شان يبدا بعدها برسالة الدكتوراه ...،

الجد / الله يوفقه روحي يابوتس كملي شغلتس ...،


.


.


.


بعد العشاء في بيت سعاد...،

حضرت نورة وشروق ...،

نورة بمعاتبة لطيفة / يا ام أنور انا خايفة على ها البزر من ريما مخليته عندها...،

سعاد / ما عليه ان شاء الله والله انها احرص مني ومنتس ...،

شروق تضحك / عاد الا جخيدم وجه السعد...،

مضاوي بممازحة / جخيدم ماهو بس وجه السعد الا خلاتس ما تنقطعين عن شارعنا ...،

شروق / اسكتي بس كل ما شفتكن مجتمعات بسناب جيت لطلال قلت له كارهه ريحة البيت تكفى طلعني واذا انت مشغول نزلني عند امي...،

سعاد بممازحة / وخالتي قماشة وينها عنكم...،

شروق ترفع يديها / يارب لك الحمد هجدت عني من درت بحملي...،

واكثر ما هجدها فرحانه انها درت قبل امي...،

نورة تاخذ فنجال القهوة من مضاوي / يا نقاصة عقول بعض الحريم...!!

يعني وش تستفيدين دريتي قبل امها والا عقبها...؟

سعاد / هذي الغيرة ياام بدر تحسبين كل النسوان مثلتس ..!

نورة / ما في ام ما تغار من حرمة ولدها وتكذب الي تقول غير كذا...،

والا حرمة ولد تبي احد يشاركها بزوجها لكن عااد ماهو تفتحين على نفستس باب مشاكل لها اول مالها تالي...،

لوت شروق شفتيها با امتعاض / المشاكل ماتجي من اهل البيت...،

اردفت / المشاكل تجي من ها العالم الي تنبح مثل الكلاب وتسوي لك صداع من كلام فارغ ...،

نورة / الي يعطي اذانه لناس يتحمل المغثة الي بيسمعها ...،

اردفت / تزوجت فهد له سنتين متخرج وانا توني بالمتوسط نعتبر كلنا صغار...،

وقتها ابو ثامر الله يرحمه توه متوفي ما من بطى وتوهم بحرة حزنه...،

وعقب اعرس مساعد وسلطان مع بعض وكلنا في بيت واحد...،

ما اتذكر عمتي الله يرحمها عمرها قالت لي صح والا غلط ...،

سعاد / الله يرحم ميمتي والله انها حارة ولا هو اي شي يرضيها...،

نورة / صادقة لكن انا حاطة لنفسي قاعدة اهم شي عمي وعمتي وفهد...،

اعرف وش يرضيهم وش يزعلهم غيره ما التفت له ...،

سعاد / امي اكثر ماعل قلبها رفعه وفزه...،

نورة / شوفي الحكي لله فزه اجودية مشكلتها تعطي اذنها لرفعة ...،

ورفعة الله يهديها من دخلت بيتنا وهي تعادي هذي وتصادق هذي ...،

ومرات هي ورفعة توصل لمعط الشوش...،

سعاد / ترى بعد كنا في بيت واحد حتى لوكلن شقته لحاله يجمعنا الغدا والعشا وهوش البزارين ...،

نورة / وتلوموني يوم اقول بيتي لي وعيالي لهم بيوتهم ...،

مضاوي ابتسمت بممازحة/ ازين قرار على شان اسير على سناء واحش فيتس ما تدرين عنا...،

ضحكت نورة / جعل كل من يحش فيني مثلتس يا العنقا...،

اردفت / ترى لتس هدية من ابو بدر بشارة حمل شروق...،

سعاد بممازحة / نصها لي انا صاحبة الفكرة ...،

ضحكت شروق / هدايا ابوي عاد دايم دسمه...،

مضاوي ابتسمت / الله يكثر خيره ما يقصر ولا له داعي والله...،

ضحكت نورة / والله الدسمة بشارة ولدتس خلي عاد أبو بدر وبشارته ...،

شروق تبتسم بفرح / البشارة الي كلن يترقب من ياخذها ...،

سعاد / انا حالفة لوفزت بالجمس اني لأدخله في بيتي واتقهوى انا ولدهم بحوضه...،

ضحكت مضاوي / كلكم مصرين وتقولون ولد وإذا جت بنت وش بتسوون ...،

نورة / ازين وازين تخطبها ام أنور لسميهم ...،

سعاد / جبتيها يا ام بدر...،

اردفت / ويمدي جخيدم كبران وحمل مضاوي الثاني انا بتفرغ لها واخذها تحدد جنس المولود...،

وان شاء الله ولد وابشر ابوي وافوز بهن كلهن عروس لوليدي والجمس الحمر...،

نورة با استفهام / على طاري تحديد جنس المولود هي صدق والا يلعبون على الناس ...؟؟!!

مضاوي / طبياً ينجح ها الموضوع بنسب كبيرة حسب ما قريت...،

سعاد / والله مدري انا امزح لكن وحدة من المعلمات الي معانا عندها سبع عيال ما شاء الله الله يحفظهم لها...،

تقول راجعت يمكن ثلاث مرات عيادة على شان ها الموضوع...،

وما ضبط معها بالمرات الثلاث كان حملها اولاد يوم تركتهم حملت عشوائي جت لها بنت...،

مضاوي / سبحان الله لو تجري جري الوحوش غير رزقك ما تحوش ...،

دخلت ريما تحمل المولود واعطته والدتها...،

نورة با اندهاش / بسم الله عليتس كيف عرفتي تغيرين له وتلفينه كذا ...،

ريما بحرج/ ليش لفي خطا ...،

نورة / لا والله ما شاء الله عليتس انا مستغربة ما عندنا بزارين نقول شفتيهم...،

اصغر ماجانا عبودي ولد نواظر والحين با المتوسط...،

خرجت ريما من الصالة ...،

شروق بملامة / يمه والله احرجتيها ...،

نورة با اسف / والله يا بنتي ماني قاصدة احرجها ...،

سعاد تضحك / لا احراج ولا شي ...،

وتمد طفلها لنورة / وش قلت لتس عند الريم لا تخافين عليه...،

اخذت نورة الطفل بحضنها واعطته الرضاعة ...،

نظرت شروق له برحمة وابتسمت بمرح / يا قلبي عليه راكب عليه اسم جخيدم...،

مضاوي تضحك وبتعجب تحرك رأسها / ياربِ كل ما تذكرت كيف فكرو يقهرونتس على اسم ولدتس بها الطريقة اقول اعوذبالله من شياطين الانس...!

سعاد وهي تعدل جلستها وتمد فنجالها لمضاوي / ترى ما هو جديد علي ...،

كل عيالي انشبو لي با اساميهم ...،

التفتت لنورة / تذكرين يا ام بدر انور قلت با اسميه فيصل وتعيي خالتي تقول انها حلمت قبل احمل ان عبد اللطيف جاله ولد واسمه أنور...،

قلت زين وبنحقق حلمتس...،

راكان قلت بسميه بجلال الله يرحمه واستجنو وش دخلنا با اهلها اخوانه يسمون عليه...،

بنسمي اجل ببونا قلت مو مشكله ماهو مسمى على اطيب من عمي الله يرحمه...،

ريما طلبته قلت با اسمي با امي النيرة قال طيب...،

ويزعل عبد العزيز ورى ماتسمون با امي ...؟

شروق / يا سلام ومن زين اسم امه ليه هو ماسمى بناته...؟!

سعاد / قلت لرفعة ليه ما سمى قالت حرمته عوبا ما تطيع ...؟

قلت يفرض رايه على بنات الناس ويوقف رايه عند حرمته...!

وتحلف خالتي انها تسمى على اسمها والا غزيل...،

ضحكت نورة / عاد غزيل...،

مضاوي / والله ازين من اسم رمسا ونفس معنى ريما...،

ضحكت سعاد والتفتت لنوره/ غزيل هذي خطبوها قبلي لعبد اللطيف وخلاص بيملكون وتفركشت...،

شروق بغيظ/ من جد اعوذبالله من شياطين الانس...،

اردفت با استفسار/ طيب كيف سميتوها ريما...؟!

سعاد / اقترحت لطيفة اختهم قرعة عشان الكل يرضى كنت نافس عند امي وجت خالتي ومعها رفعة ولطيفة يقهووني...،

قالت لطيفة وش نكتب اسامي قالت خالتي ورفعة اكتبو رمسا وغزيل ...،

شروق بقهر / يمه يااقوهن ..!!

نورة / ما شفتي شي ...؟

التفتت لسعاد وهي تضحك / كملي يا ام أنور...،

سعاد / انا ما في راسي اسم...،

طلبته با اسمي با امي واتفقنا ومخي وقف ماعا د جا في بالي اسم انلجمت ..!

فجاءة مدري من شغل التلفزيون كان في برنامج مدري مسابقات ناسيتة المهم المذيعة مزيونة ...،

اسمها ريما قلت يالطيفة اكتبي ريما واكتبتها ...،

ونادو انور يسحب الاسم ويسحب ويطلع ريما وعيو قالو عيدوها...،

ويسحب الورع يمكن خمس مرات ويجي ريما...،

لين تفشلن كان في حريم عندنا وسكتن...،

مضاوي بتعجب/ يا الله حتى القرعة ما اقنعتهن الا الي يبونه...،

ضحكت سعاد / تذكرين يا ام بدر يوم راحن وش لقينا يوم بغت تموت رفعة...؟!

نورة / ما عرف لهن الا لطيفة...!!

شروق با استفهام / وش سوت...؟؟

سعاد / كانت كاتبة كل الاسامي الي بالقرعة ريما وما درو الا عقب ما راحن لبيوتهن ...،

وكل الحريم الي جالسات اسمعوهن يباركن با اسم ريما...،

اردفت / مع ان رفعة انهبلت ما تبي اسم ريما تقول القرعة لعبة عيدوها...،

لين سلطان حلف لو ما تسكت انه يغير اسامي بناتها وحده رثعة على عمتي الله يرحمها وحده على امها رمسا...،

شروق / يا الله ماتبي اسم امها لبنتها وعادي بنت اخوها بطقاق ...؟!

مضاوي / انا والله اعجبني لطيفة الحمدلله حسيت فيهم احد طيب فكرتي عنهم كلهم استغفرالله...،

سعاد / لطيفة اجودية لكن الكثرة تغلب الشجاعة...،

نزلت ريما من الاعلى ومعها هاتفها مفتوح على مقطع فديو ودميه وجلست بجانب نورة تشرح لها كيف تعلمت تغير وتلبس اخيها...،

نورة تنظر لريما بعطف وحنو/ وانا قلت زعلتي ورحتي...،

اردفت وهي تحتضن ريما وتقبلها / يويل حالي جايبة العروسة والكوافيل تعلميني...،

نذر في رقبتي ان ربي كتب لبدر بنت ما يسميها غيرتس...،

والا مضاوي وشروق بكيفهن...،

ضحكت مضاوي / تونا ننتقد الي يتدخلون با الاسامي ...،

ريما ببرائة وهي تلم ما احضرته / لا خالتي عادي خلاص اصلاً نسيت السالفة ...،

غادرت ريما للأعلى ترجع ما احضرته...،

شروق / ما عمري شفت جسامه وطول ظلمت راعيها مثل ريما...،

سعاد بقهر / الحين ما تداني تروح لحالها لبيت جدتها...،

تقول من يشوفوني جت المدلعة الطول طول نخله والله من شاف طول ريما كره الطول كله...،

لين البنت كرهتهم وما تروح الا مجبورة...،

مضاوي / والله اشوف طولها عادي ليش كل ها التركيز...؟!

نورة / صادقة مضاوي عادي طولها طالعة على ابوها...،

اردفت / مشكلة ريما كبرت فجاءه وكبارها على زين ما شاء الله...،

يعني الي شافها العام واول العام ما يصدق انها هي ...،

.


.


.


بعد يومين

اتم زواج بدر اسبوع وسيعود غدآ من الشرقية...،

ثامر اتفق مع مضاوي انه سيحضر يوم الخميس بعد العشاء...،

اراد ان يحضر وسط الاسبوع، ولكن هي اعتذرت انها مشغولة جدا مع سعاد...،

وهو لم يلح بطلبه لأنه كان مشغول ما بين دوامه في الشركة ومذاكرة كتبه...،

فرسالة الدكتوراه تحتاج لتفرغ، ولكن هو ظروفه لا تسمح فالمجهود كان عليه مضاعف...،

اتصل ثامر بمضاوي يخبرها انه سيتأخر فهناك عمل كلفه ابو سامي لا يستطيع ان يأتي حتى ينجزه...،

حضر متأخرا وبحث عنها...،

وجدها في غرفته نائمة بطريقة توحي انها بردانة الجو بارد منتصف يناير...،

تأملها لم يرد ان يزعجها...،

صعد الي غرفتها في الاعلى وجدها كما تركها دليل انها كانت مشغولة ولم تلتفت لها ...،

هو ايضاً كان متعب من ضغط العمل والمذاكرة...،

انزل بالطو كان يرتديه وخلع شماغة وثوبة ...،

وقف على مرآة التسريحة احس انه منذ زمن لم يرى وجهه...،

طال شعره عن المعتاد لمس عوارضه اخر مره زار الحلاق كان صباح زواج بدر...،

استلقى على السرير ضبط المنبه على اذا ن الفجر...،

وتغطى بالبالطو وغطاء المفرش الصيفي وغط في نوم عميق...،

.


.


.

في صباح اليوم التالي

جلس الجد في صالة بيته المفتوحة دخلت عليه مضاوي...،

نظر لها وابتسم / اليوم ما انتي خويتي...،

نظر الجد لساعته / ماهي لتس عادة تنامين لها الوقت...،

مضاوي وعليها اثار النوم / ما نمت الا متأخرة وجو الشتاء يجيب النوم ...،

... صباح الخير...،

ضحك الجد / جا النوام الثاني...،

تفاجئت عندما رأته كانت تعتقد انه مازال في الخرج...،

عندما صحت من النوم ارسلت له رسالة (تجي اليوم) ...؟

ولم ترى رد وخرجت للجد...،

ثامر / والله ياجدي ماني نوام مع أني البارحة جيت متأخر لكن شفتني قدامك بالمسجد...،

وقف الجد / انا بقوم اتجهز لصلاة الجمعة وانت افطر ولا تأخر عن الصلاة...،

التفت الجد لمضاوي / كلمي ام انور بمرها عقب الصلاة ...،

مضاوي / ابشر...،

الجد / لا تنسين غدا العيال راعية بيتنا التهت عنا ...،

مضاوي / عمتي نواظر تقول لا تزينون غدا هي بترسل غدا لبيتنا وبيت عمتي سعاد...،

الجد/ على خيران شاء الله الله يكثر خيرها ام عبدالله ...،

غادر الجد وجلس ثامر ومضاوي داخل الصالة...،

ثامر بعطف / احس جدي مره فاقد عمتي ام أنور...،

مضاوي / اكيد عمتي في بيتنا اكثر من بيتها خص من طاحت جدتي الله يرحمها شالت عمتي البيت...،

اردفت / تبي فطور أقوم أصلح لك...،

اقترب منها وابتسم/ خلينا من الفطور...؟

امسك يدها وبهمس / ليش كسحتيني البارحة جيت ادورتس مالقيتس...،

ضحكت مضاوي وبهمس مماثل / ياعيار متى جيت اصلن تفاجئت يوم شفتك...،

افلت يدها ووضع يديه على وجهه وعطس/ الحمدلله ...،

مضاوي / يرحمك الله وش فيك...؟

ثامر بتهكم وسخرية نظر لها/ وش فيني..!!

نمت بغطا خفيف الغرفة الي فوق شوفي لي حل فيها ...؟

اردف / ما أدري منين القاها من كبر الغرفة الي يضرب فيها الهواء والا من المفرش الخفيف ...،

جيبوا لي بطانية اي شي بغيت اموت من البرد...،

وبممازحة/ احتليتي غرفتي الدافية لتس واناارسلتيني للقطب الشمالي لحالي...،

ضحكت مضاوي / ما فضيت انت شايف الوضع والا هي نيتي التفت لها ...،

ثامر بلهفه وعدم تصديق / من جدتس بالله والا تمزحين...؟

مضاوي با استنكار / اكيد وش فيك مستغرب ...!

ثامر / لا بس ماني مصدق...،

وبا استفهام/ وش الي صار...؟

مضاوي بصوت منخفض / لو دقق احد من الشغالات انفضحنا ...،

اردفت / يعني غرفتي فوق وغرفتك تحت اكيد تلفت الانتباه...،

احس ثامر من كلامها بتقدم بعلاقتهم لكن مازال متردد ان يصارحها...،

فلو رفضته لا يمكن ان يرجعوا كما كانوا وهو لا يريد هذا...،

اما ان يكون زواجهم حقيقي...،

او ان تبقى علاقتهم كماهي الآن فهو اصبح اناني بحبها يريدها بكل الأحوال...،

تمنى لو يوجد اختراع انه لو صارحها ورفضته...،

يلجأ لهذا الاختراع ينسيه وينسيها ما طلب منها...،

مضاوي / ثامر اذن الاذان الاول وانت ما افطرت ...،

وقف ثامر ليستعد لذهاب لصلاة ووقفت معه مضاوي / خلي الفطور بعدين و طلعي ملابسي بسرعة بتروش الحق جدي قبل يزعل...،

تعرفين ابوجلال ما يضايقه شي مثل تأخير الصلاة...،

دخلوا غرفة ثامر وجهزت ملابسة...،

وتمددت على السرير...،

التفتت له وابتسمت بود / لا تطلع فوق غرفة جدتي مفتوحة تروش بحمامها أسرع لك...،

اخذ ثامر ملابسه وابتسم / سويتي فيني معروف مشوار لدور الثاني...،

مضاوي وهي تتغطى / بريح عظامي احس متفككة وبردانة...،

فتح ثامر باب الغرفة والتفت لها / لا تنامين بتروح عليتس الصلاة...،

مضاوي / ماعلي صلاة بقوم إذا جت عمتي نواظر...،

خرج ثامر وهي اغمضت عيناها ونااامت

.


.


.



بعد الصلاة الجمعة

طرق على باب غرفة ثامر كانت الخادمة صحت مضاوي من النوم ...،

وتوجهت لدورة مياه غرفة الجدة...،

جمعت ملابس ثامر التي وجدتها ملقاه في دورة المياه...،

غيرت ملابسها التي كانت تضع بعضها في دولاب غرفة الجدة وخرجت...،

توجهت للمطبخ وكان في المطبخ نواظر تجهز مع الخادمات الغداء...،

سلمت مضاوي...،

نواظر بممازحة / وش هالنوم لا يكون وحام...،

ضحكت مضاوي وهي تمد يديها / والمناكير...،

نواظر تضحك وبممازحة / فرحت قلت بضبط علاقتي معتس على شان تعلميني وافوز بالجمس حق ابوي...،

دخل ثامر للمطبخ ومعه كيس ..!!

التفتت نواظر ومضاوي المشغولات بتجهيز الغدا لصوت ضحكة / ياهالجمس الي اشغل العاصف كلهم...،

اردف / والله ماسويت بنا خير يابدر...،

وبممازحة ونبرة مقصودة فهمتها مضاوي / حتى لو حصل ها الحمل ماضتني بيجي ولد من شفحتكم ..,

ضحكت نواظر / بديران ماسماه ابوي المطفوق من عبث...،

اردفت / تدري لو انا بمكانك احرمه بدر وانا الي افوز فيه...،

نظر ثامر لمضاوي وهويكتم ضحكته / علمينا بالخطة يا دكتورة ...،

نواظر / ما يحتاج خطط اذا ولدت اكيد محد داري قبلك بشر ابوي وخذ الجمس ...،

مضاوي لم تعرف بماذا ترد انتبهت للكيس وبممازحة لثامر / شكل ها الكيس هديه لي ...،

مد لها الكيس / وهو لتس ...،

استغربت مضاوي / ما شاء الله تعيش وتهدي...،

ابتسم لها بحب / هذا بشارتس من عمي أبو بدر يقول وصلها ام جلال...،

نواظر بفرحة / تعيشون يا اهلي وتعطون البشاير...،

اردفت / خلاص قلط العيال غداكم جاهز وحنا غدانا عند سعاد...،

مضاوي / انا بتغدا هنا والحقتس بعد ما يروحون العيال...،

ابتسمت نواظر وهي تغادر / على راحتس الحين انتي راعية البيت...،

دخل ثامر للمقلط وخرجت مضاوي لصالة تحمل الهدية...،

.


.


.

نفس الوقت في مكان آخر...،

دخل عبد اللطيف على والدته المتواجد عندها ابنائها عبد العزيز ولطيفة وفلاح الأصغر ...،

عبد اللطيف ينحني ليقبل راس والدته دفعته بقوة...،

ام عبد اللطيف بغضب / ما ابي سلامك ولا تسلم علي الي راكبة راسك بنت النيرة ما قدرت تخالف كلامها...،

عبد اللطيف تأفف بقلة حيله / يعني وش تبين أسوي أطلقها على شان ترتاحون...؟

عبد العزيز با استهزاء امال فمه/ ليته ازين بعد...،

فلاح بقهر وملامه / انت ما تخاف الله وش ها الكلام ياعبد العزيز وش جاك منها...،

لطيفة با امتعاض/ واذا طلقها على بالك العاصف يبخلونكم بيحذفون بنتكم عليكم عقب ما صارت عجوز...،

فلاح التفت لأمه / والله اني خايف من عقوبة ربي تعمنا من تجنيكم عليها...،

ام عبد اللطيف با استهزاء / وش جاها ...؟؟

ما يكفي جرت ها الخروف اخوك لو غيرنا كان قلنا مثل ما بنتهم جنبهم بنتنا جنبنا...،

لطيفة بقهر / الله يقطع ها الزواج الي اختي عندك واختك عندي...،

فلاح يهز راسه با اسف/ والله لو اني أدرى انها بتوصل لكذا ان وحده من الزواجتين ماتتم ...،

ام عبد اللطيف / اخذناها من مدح رفعه لها طيرتها مادرينا انها عقرب طين...،

فلاح با امتعاض / عقرب طين يعني حريمنا ماشاء الله عليهن...،

اردف / خلينا يا ميمتي ساكتين ترى الحريم كلهن واحد ...،

ام عبد اللطيف با استهزاء / حريمكم ليتها نصهن ما غير الديون راكبه راس اخوكم وهي عيالها راكبين سيارات ما ركبتوها أنتم يا الشيبان...!!

لطيفه / عيالها عيال عبد اللطيف وعبد اللطيف راتبه ما شاء الله يسمح انه يشتري لعياله افخم السيارات ...،

عبد اللطيف / يعني بعد عيالي احرمهم ...؟

يا يمه الله يطول بعمرتس والله ماشافو مني شي امهم شايلتهم ...،

راتبي لي ولديوني الي على غير سنع...،

زفر بحسرة وندم/ ام انور لو ادور الدنيا ما القى مثلها...،

ام عبد اللطيف تضرب على صدرها بقهر وحرقة وتحرك رأسها با اسف / والله انك المسحور...،

لطيفة بهلع / اعوذبالله يمه لا تقذفينها ...،

التفتت لبنتها /ما تسمعينه يدافع عنها...،

فلاح با اسف / ما يحتاج يا أبو أنور تبرر امي وعبد العزيز ما عاد يشوفونها غير عدوة...،

زفر عبد اللطيف بوجع / والله كرهت هالحياة معها بسببكم ابي مره ادخل عليكم تنسون طاريها...،

غادر عبد اللطيف المكان ولحق به فلاح...،

لطيفة بملامة وعتاب / يعني ما ترتاحون لين تنكدون عليه ما تشوفون وجهه وشلون صاير ...؟

عبد العزيز بملامه / من فعل يده ...،

لطيفة بقهر وانتقاد/ وشو فعل يده لا تحسبنا ماندري ولا نشوف يا عبد العزيز...،

اردفت وهي تعد با اصابعها/ من هو الي كفلك على راتبة وسحبت وخليته يسدد ترميم بيتك ...؟؟

ودراسة ولدك با الخارج من طلعتها من ظهره غير ابو أنور...،

بيت امي من الي بناه لها وتكفل بتأثيثه ..،

والله انه حط عليكم اكثر من الي على عياله وكلن داري الا انتم مغمضين...،

وبغبن وقهر / والله بعمري ما شفت وظيفة وراتب جنت على راعيها مثل عبد اللطيف أخوي...؟

زفرت با الم / الي كلن استفاد من وراه الا بيته وعياله...،

هزت رأسها با اسف / واذا رفض طلباتكم تهددونه بزعل امي ...،

ام عبد اللطيف / انتي تبين مثل بنت النيرة تفرقين بين الاخوان تحاسبينا وش يعطينا و ش ما يعطينا ...،

لطيفة / اشوفتس انتي تشجعين رفعة كل ماجتس تعلمتس تقول جاب سلطان وحط سلطان وتسلف ...،

تقولين اذا ما يتسلف لتس ولعيالتس من يتسلف له...،

وبتعجب / يعني حلال على بنتنا وحرام على بنتهم ...،

ام عبد اللطيف بحنق / سلطان لو ما الدين الي على ظهره كان مبطي حاط على راس اختس حرمة يعاقب بها رفعة...،

لكن ربه اعلم بنيته ونصر رفعة عليه ...،

لطيفة با اسف / حتى بالنوايا تبون تدخلونا ...؟!

عبد العزيز بغضب / والله لو ما انتي اكبر مني لتسمعين رد مايعجبتس ...،

وبتهكم / وبيته وعياله ما شفت احد شاف قاصر عليهم غيرتس ...؟!

اردف با امتعاض / بعدين راتبة يغطي وزود والي عطانا كله مايجي راتبين والا ثلاث من رواتبه...،

وفلوسه تروح على بيت امه واخوانه ازين من خرابيطة...،

لطيفة تهز راسها بقهر / لا والله ادري ان ابو انور ضعيف وماله قلب ولا يعرف يقول لا...،

وخرابيطه الي تقول عنها لو تلاحقناه من اولها ما صارت سيرته الحين على كل لسان...،

عبد العزيز بلا مبالاة/ هذا رجال ما يعيبه شي والحين تغير ما عاد هو مثل اول ترك السفر عنه والطريق الي كان ماشي فيه ...،

اردف بتهكم / والله لو يخطب من أي بيت يزوجونه وهم مغمضين...،

لطيفة عقدت حاجبيها با امتعاض / وهذا المقياس عندك لو يعرس يعني الناس نست سوالفه...؟

اردفت / والله العيب مو بس على الحرمة حتى على الرجال...،

.

.

.

في مجلس بيت ام عبد اللطيف ...،

الذي دخل اليه عبد اللطيف ولحقه فلاح وجلس بجانبه...،

فلاح يمسك بيده بعطف/ وش فيك يعني كنك اول مره تسمع امي وعبد العزيز...،

سنين وهذي اسطوانتهم واحمد ربك رفعة ماهي فيه...،

عبد اللطيف بنبرة حزن وارهاق / مليت يا فلاح وتعبت من كل شي راح عمري ما سويت لعيالي شي...؟

فلاح / ما عليك يابن الحلال كل شي يتعوض انت بس تعافى الامور الثانية ملحوق عليها...،

عبد اللطيف / وش الي يتعوض من متى متوظف بيت ما املكه مثلكم اللهم ها السيارة الي تحت رجلي...،

وبوجع / ضيعت سنين عمري يوم عطيت اذني لكم...،

اولها كنت طايش محد وجهني يوم تزوجت وبغيت ابدا حياة جديدة...،

اختي حطت حرمتي براسها وجيشتكم عليها...،

ماخلت كذبه ماكذبتها على ظهرها ولا ظلم الا وظلمتها...،

اردف عبد اللطيف بقهر / يوم اقول خلوني اطلقها افتك نشبتو لي ان طلقتها اختك تتطلق ...،

ابي طيب اتزوج ابي اعيش حياتي مثل الناس...،

ابي حرمة تحتوني وتطلعني من الي انا فيه ...،

تقولون لا سلطان بيعرس على رفعه ...،

ما عاد عندي وسيلة الا الهروب اما لدوامي والا سافرت ابي الفكه من وجع الراس...،

ادمنت السفر والشراب ابي انسى ابعد عن المشاكل...،

امل واطفش من السفر والشرب واجيكم ابي ارتاح...،

تجننوني العاصف قالو العاصف سوو...،

وارجع اهرب بالسفر والشرب منكم...،

فلاح / يارجال والله رفعه مريضه وامرضت امي معها...،

عبد اللطيف بملامه وعتاب / ويومها مريضة ليه تربطون حياتي فيها ...،

هي عايشة حياتها ومبسوطة وانا كل ماطفت النار رحتو شبيتوها...،

سعاد ما اقول انها كاملة لكن حرمه ماشفت منها شي غير الزين...،

خليتوني بفترات اشوفها شيطان كلكم حتى انت يافلاح...،

فلاح / يا عبد اللطيف خلك بمكاني انت رجلها الي عايش معها تأثرت جاي علي ...،

اردف / رفعة من تدخل بيتنا لين تطلع وهي تشكي وتصيح منها...؟!

وحنا بشر ما نعلم الغيب عمرها ما شكت من سلطان واهله مثل ما شكت منها ...،

عبد اللطيف بمرارة وقهر ويأس/ ضاع عمري وضاع بيتي وبليت بنت الناس والسبب كله اختي...،

فلاح / لا تذبح نفسك من القهر الي صار كله مقدر ومكتوب...،

ومن تاب تاب الله عليه والحمدلله انت تتعالج وفي تقدم ان شاء الله...،

وبيتك الحمدلله ام انور ما قصرت حافظت عليه وعلى عيالك...،

عبد اللطيف بندم / سعاد مالها حظ ماعرفت قيمتها الابعد فوات الأوان...،

ضحك بوجع وسخرية من وضعه / انا وين كان عقلي يوم كنت اطاوعكم عليها...،

درت بمرضي ولا فضحتني الي متأكد امي واخواني الي داخل لو درو يمكن حتى الجلسة مايجلسون معي...،

فلاح / يابن حلال رب ضارة نافعة شفت كيف التهاب الكبد الكحولي الي جاك صار سبب انك تترك ام الخبايث...،

وانا قايل لك اذا تحتاج تبرع بالكبد انا جاهز لا تشيل هم ...،

عبد اللطيف امال فمه بسخرية / لا اشيل هم وامي الي تصدد عني وما ابي اغضبها وش اسوي...،

فلاح / وش تسوي يعني سو الي يرضي رب العالمين...،

امك لها حق وام عيالك لها حق...،

وبحزم / غير من شخصيتك يا اخي...،

عبد اللطيف بتأفف / التغيير ماهو بيوم وليلة ...،

فلاح /امي بتتزعل عليك ورفعه بعد ماهي مقصره لكن تذكر ان الله يحاسبك ترى على معاملتك لأهل بيتك...،

عبد اللطيف / ياليت لقيت واحد منكم يقول ها الكلام من زمان...،

فلاح بندم / كلنا ظلمنا حرمتك وانا عن نفسي والله ندمان ثم ندمان...،

واعتذاري عن غلطي بحقها بوقف معك لنهاية ونصلح الي نقدر نصلحه...،

وبا اعتذار / والله ماعرفت انها اجودية صدق الا بعد طيحتك ووقفتها معك وسترها عليك ماسمعت كلمة عن مرضك حتى من عيالك ...،

وضع يده على كتف عبد اللطيف / قم وانا اخوك تعوذ من ابليس خلنا ندخل ونتغدى مع امي وخلك مثلي مرات اذن طين واذن عجين...،

وقف عبد اللطيف / والله انك هونت علي ضيقتي ...،

فلاح / الهموم اذا تشاركوها اثنين تخف وانت اخوي الكبير بعد ما انسى وقفاتك معاي ماعمري احتجتك واعتذرت ...،

وبا ابتسامة محبه وود / تبديني على نفسك ...،

.


.


.

بعد صلاة العصر في بيت سعاد

اجتمعو نساء العاصف وبناتهم في بيت سعاد ماعدا سناء ومضاوي...،

سعاد / تسلمين يا ام عبودي على الغدا كلفتي على عمرتس...،

نواظر التي تحمل طفل سعاد / ما تكلفت لأعز من اختي الكبيرة...،

رفعة / ام بدر معارسيكم ماوصلو ...؟

نورة / الا وصلو بدر صلى الجمعة مع عمانه ماعلموتس العيال...،

نواظر التفتت لرفعة وهي تعيد تمهيد الطفل / ما يحتاج العيال يعلمونها سيارة بدر واقفة قدام بيت ابوي الي رايح والي جاي يشوفها...،

سعاد لم تتمالك نفسها وضحكت على تعليق نواظر...،

التفت نواظر لخلود / وش فيتس من جيتي ما سمعنا لتس حس والا بزعم اني باعرس واروح عنكم...،

اردفت با امر / قومي قهوينا خلتس احسن من الي مدري وين اختفن...؟!

سعاد / اكيد كلهن بغرفة ريما ...،

ضحكت فزه / يا قلبي قلبها هي للحين زعلانه...،

سعاد / لا ابشرتس رضت وهي الي قايمه فيه الحين...،

ابتسمت سعاد / تقول الحمدلله انه ولد والا لو انه بنت يفشل ولدتس شين...،

نورة ابتسمت بموده / الله يصلحها ويوفقها ما شفت احد مثل قلبها حنونه...،

رفعة تشير بيدها بتأكيد/ سبحان الله كنها امي قلبا وقالباً ان كان شكلها وان كان اخلاقها...،

ما في احد مثل قلب امي فديتها تبكي للي ما تعرفه ...،

فزه بحسن نيه / الاخلاق والله مدري لكن الشكل وين يارفعة فرق...!

امتس كنها خلود سمارها وعيونها حتى الشعر مثل شعر امتس...،

الفرق خلود نحيفة وامتس الله يعافيها مليانة...،

نواظر با استهزاء مصطنع / ريما شينه على امها عيونها كبار مثل عيون البقرة...،

وبيضا بياضها ما فيه ملح وعصلا كنها عود مكنسة...،

ما قالته نواظر بتول اخبرتها به ان ريما قالت انها حضرت مناسبة في بيت جدتها...،

وسمعت احدى النساء الكبيرات في السن من أقارب جدتها بأن ريما تشبه لوالدها وانه تذكره وهو في عمرها...،

فردت رفعه ووالدتها هذا الرد...،

ضحكت نورة وبممازحة / يا ليتنا شيون مثل شين ريما ...،

خلود تكاد تتفجر من الغضب لطال ما كرهت هذه الكلمة انها تشبه لجدتها رمسا...،

سعاد انتبهت لوجهها الذي احتقن من الغضب تعلم كرهها لهذا التشبية ...،

لكن فزه على نياتها ولم تقل الا الحقيقة...،

سعاد لم تنسى ما فعلته خلود بمضاوي...،

وهي لا تريد لهذا الحقد ن يتضخم وتريد نزع هذا الفتيل...،

سعاد وهي تاخذ فنجال القهوة من خلود / خالتي ام عبد اللطيف ماشاء الله عليها تهبل لكن السن له احكامه...،

والتفتت لخلود با ابتسامة / خلود تبارك الله ماناقصها بعد زين...،

اردفت / ما حددو عرس خلود...،

رفعة / لا للحين ام مازن تقول ما لقو حجز زحمه...،

فزه بعفوية / ما فيه اكثر من قصور الرياض وقاعاتها...!!

رفعة بتصنع / الله يهديهم يبون بنفس قصر بدر >> رفعه هي من طلبت ان يكون الزواج في نفس القصر...،

سعاد / الله يعين ويسهل الأمور...،

نورة بعفوية / فاقدة مضاوي ليش ماجت...؟!

نواظر / قلت لها قالت بعد الغدا شكلها انشغلت مع رجالها...،

خلود التي كادت ان تسكب القهوة على يدها...،

لم يلاحظ ردت فعلها سوى سعاد وتمنت ان ظنونها خاطئة...،

فمهما كان الخلاف بينها وبين رفعة تبقى خلود ابنت اخيها...،

ضحكت فزه / والله شكل الي مشغلها سناء مهو رجلها...،

قاطعهم دخول مضاوي وخلفها سناء...،

نظرت نورة لفزه وضحكو...،

سلمت مضاوي وسناء وجلسو ...،

نواظر / الطيب عند طاريه ترى كنا بسيرتكن ودخلتن...،

سناء/ مريت سلمت على جدي...،

وهي تطوي عباءتها وطرحتها / ولقيت الشيخة منصرعة سحبتها وجبتها...،

فزه / بسم الله عليتس وش فيتس ...،

مضاوي / لا بس يمكن خشة برد...،

سعاد تضحك / خشة برد تخليتس تحطين مناكير...،

فهم الجميع ان مضاوي معها عذر شرعي...،

رفعة / كم لتس معرسه ماحملتي للحين...،

اردفت بملامة / ليه مارحتي تراجعين تشوفين عمرتس ...،

نورة / يووه يا ام ماجد لاحقة توها صغيره...،

رفعة / والله إذا هي صغيرة رجلها ماهو صغير...،

مضاوي / على يدتس اذا تعرفين دكتورة شاطرة بروح لها تفحصني...،

رفعة با اهتمام مصطنع/ خلاص بسأل لتس لا تجلسين كذا...،

سعاد ونواظر ابتلعو كلام رفعة على مضض...،

رفعة لم يكن حرص منها وانما هدفها ان تحزن مضاوي...،

نواظر التفتت لمضاوي / ماعلمتينا وش الهدية الي جتس...؟

مضاوي ابتسمت / راحت لصاحب النصيب ...،

نورة بمعاتبة / ليش عاد أبو بدر متحرص انه يعجبتس ...،

سعاد / وش هديته...،

نواظر/ فهد ارسل لمضاوي بشارتها بحمل شروق...،

رفعة با اندفاع / ماشاء الله شروق حامل ما اسرعها تو الوقت...،

ضحكت نواظر / توتس تبين مضاوي تحمل...،

مضاوي تمسك ضحكتها / ام ماجد ما قصدها...،

شروق رجلها توه صغير وانا رجلي شايب تبي لي الزين...،

سناء / وش الهدية ما شفتها ...،

مضاوي ابتسمت / جوال...،

خلود با استهزاء / خسارة عاد الهدية ماتهدى...،

سعاد با اسف / ليتس اهديتيها لثامر جواله قديم ...،

مضاوي / وهو لثامر الله لا يخليني منه...،

ضحكت سناء / ازين ماسويتي اقلها يحلله ابوجلال مهو انتي الي ودي اعطيتس جوال كشاف ...،

فزه با استنكار / والله انتي ما يعجبتس العجب...؟!

مجننه سهى على الجوال والحين تضحكين على مضاوي انها ما تهتم بالجوال ...؟

نواظر / الجوال والله صار ادمان للكل خص المراهقين شر لا بد منه ...،

مضاوي / انا والله ما افضى له يعني متى اجي من المستشفى...،

متى أخلص شغل بيتي وزوجي بعد يبي من يقابله...،

كانت تتكلم وتختلس النظر لخلود لا تعلم لماذا تريد ان تغيظها...،

سناء با امتعاض/ عاد الرجال ينجن اذا شاف معتس الجوال...،

نورة / اذا شفتي رجلتس ابعديه عنتس...،

الجوال مهو طاير ولا تسوين مشكلة من لاشي ...،

سناء تقف / ياربي من جيت لاقهوة ولا شاي ولا حلى كني توني طالعة وراجعه لكم...،

اردفت / ترانى جايه من سفر ...،

قامت بمناداة الخادمة وأمرتها بتنظيف المكان وتبديل السفرة...

ضحكت نواظر / الحيي يحييك والميت يزيدك غبن...،

خلود ورفعه لم يعجبهم ما قالت نواظر...،

مضاوي ذهبت لسرير الطفل وحملته بحضنها جلست جنبها سناء...،

نزلو البنات ريما وسهى ومنار وسما وبتول وسلموا على مضاوي وسناء...،

نواظر / أنتن وين اختفيتن..,

بتول تقبل كتف والدتها / بغرفة ريما...،

نواظر / وكل ها الوقت...،

سهى / ساعدنا ريما جمعنا الاغراض الي كانت مرتبتهم اول تقول عشان بنت مضاوي...،

نواظر عدلت نظارتها وبا انتقاد / وما شاء الله عليكن حكمتن على طول بنت مضاوي...،

سما بممازحة / ماما ترى ضربتين بالراس توجع اول شي خالتي سعاد بعدها مضاوي كذا اوفر على ريما...،

ضحكت ريما /عادي عندي احتياط سناء وشروق خالي فهد وخالتي نورة وعدوني...،

سناء ترفع يديها وتدعي / يارب مضاوي تحمل بولد بشوف ها الشنط الي مليانة ملابس كيف بتصرفونها...،

سهى ترفع ايديها وتدعي / وانتي ياسناء يا بنت مساعد وفزة يارب انك تحملين وتجيبين بنت وها اللبس يكون لها...،

سناء بممازحة / انا ما شفت وحده تحب بنت عمتها اكثر من اختها...،

سهى بتهكم تميل رأسها / وانا ما شفت وحده تحب بنت عمها اكثر من اختها...،

ضحكت نورة / ترانا عصر جمعة عسى دعاوي الخير مقبولة ...،

.


.


.