مابعد خلصنا من اسم البزر
جانا المكان السررري
وين بيروحون مضاوي وثامر ؟؟
طيف انت قلتي انه مكان الكل يعرفه
سؤال لكشف المستور :
هل سبق وذكرتيه بالرواية ؟
هل هو مكان بالرياض او بالخرج ؟
هل .... خلاص يالنوري اشغلتي المرة بكثرة الاسئلة ماخبرتك ملقوفة
السموحه طيف بس تعرفين كونان الي بداخلي فيه عرق الشفاحه ههههههههه
المهم ..عطينا تلميحه منا مناك
وين هالمكااااان بوووه !!!!!

الفصل " الرابع والعشرون"

.


.


.

عاد ثامر للخرج فهو مرتبط بدوام الشركة التي يحاول ان يعوض غيابه يومي سفره لجدة بمضاعفة العمل...،

كما ان دراسته تتطلب منه المذاكرة با استمرار حتى وان كان في اجازة نصف العام ...،

.


.


.

في زيارة العصر زار سعاد رفعة مع ابنها خالد...،

وفزه ونورة وابنائهم فواز ومحمد...،

فزه بود ورأفة / الحمدلله على السلامة والله ما دريت انتس ولدتي بعملية الا اليوم من أبو سعد علمني...،

فواز بممازحة / عمه ترى امي من اعرست سناء وهي مهي معنا شكلنا بنرجع سناء على شان ترجع لنا امي...،

ضحكت نورة/ لا والله يا ولدي حنا الي يجينا ما نرجعه تدور لك ولسعد حريم وتترك بنيتنا لنا ...،

فزه بعفوية/ والله سناء لها فقده لكن تروعت اليوم على ام انور...،

رفعة بود مصطنع/ ليه تروعين بسم الله عليها هي ما علمت انها قيصرية ما تبي ها السالفة ...،

فواز الذي كاد ان ينفجر وهو يسمع ما تقوله قرر ان يخرج من الغرفة سلم على عمته وأخبر امه انه في استراحة المستشفى...،

خرج ولحق به محمد وتبعهم بعد ذلك خالد ...،

.

.

.


في استراحة المستشفى

محمد / وش فيك وجهك وجه الزعلان...،

وبممازحة ضحك محمد/ لا يكون بعد انت زعلان تبي عمتي تجيب بنت ...؟

فواز بنفور/ يا الله يا محمد أكره ام ماجد أكرها ماا ادانيها تدري خفت يجينا خفس من كبر كذبتها ...،

امس سوت نون وما يعلمون عشان ما درت اول وحده انه ولد...،

محمد بهمس / اسكت هذا خالد جاي بعدين نسولف...،

جلس خالد / وش فيكم تسحبتو من عند عمتي...،

محمد / خل الحريم يا خذون راحتهم ...،

فواز / لا ما هو كذا أمك يا خالد السبب...،

صمت خالد يريد من فواز ان يكمل كلامه...،

أخبره بكل ما قالت وفعلت...،

ضحك خالد وسط استغراب محمد وفواز...،

محمد / انت وش يضحكك لو أحد قايل عن امي كذا يمكن ذبحته...،

خالد / وليش اذبحه وهو كلامه كله صدق...،

أردف/ حنا عارفين امي وطبعها لكن وش تبونا نسوي...،

وبضيق عقد حاجبيه / تبونا نعقها ونغضب الله...،

وبا استسلام رفعيه كتفيه / هذي امنا مالنا حيله الا انا نعاملها بالحسنى...،

فواز / أمك كل يوم تزيد عن الي قبله...،

خالد / انت تحسب امي لحالها امي وراها جيش خوالي وحريمهم وفوق الجميع جدتي رمسا...،

كلهم لو بيدهم طحنوا عمتي سعاد طحن...،

محمد بتعجب / سبحان الله عمري ما شفت حرمه مكافحة زي عمتي ام أنور يا ليت نصيبي ونصيب اخواني من الحريم مثلها...،

ابي اعرف وش السيئ فيها...،

خالد / السيئ انه مافي مثلها...،

فواز / هذي ميزه ماهو شي يخلي كل العالم تعاديك...،

خالد / ميزة عمتي اشعلت نيران الغيرة عند خوالي...،

ترى كل العداوة الي تشوفونها غيره زرعتها جدتي وخالي عبد العزيز...،

جدتي تبي بناتها مثل عمتي موظفات ومكتفيات وما يحتاجون أحد...،

خالي كان يتمنى حرمته مثل عمتي سعاد راعية بيت ومكفيه خالي أبو أنور هم عياله...،

ويوم ما حصل له الي يبي عادى عمتي وبكل مناسبة يهايط با انسباه ...،

وانهم ناس مقتدرين ويعطونه وجه...،

وبسخريه غمز بعينه / وخصوصاً ها النقطة حط عندها ألف خط معطينه وجه...،

وخالي عبد اللطيف عماني العاصف ما خذين منه موقف...،

محمد با امتعاض / يعني كيف ما يعطونه وجه ...،

أردف / خالك هو عازل نفسه ما اذكر انه دخل مجلس ابوي والا واحد من عماني...!

جدي ويا الله بعد يمر مجلسه با الأعياد ...،

فواز / يا الله تعين عمتي وعيالها على خوالك ...،

خالد / تبي اقولكم نكته صارت اليوم...،

محمد / اتحفنا انت وخوالك الي مدري كيف انت وماجد وعيال عمتي طلعتو منهم ...،

ابتسم خالد / على شان حنا تربينا بين عماني متكاتفين ويدهم وحده...،

كل واحد فينا يشوف عمه بمكان ابوه...،

اردف با استفهام / صح او لا ...،

فواز / اي والله واني كم مره اطيح بمشكله ما يحلها لي الا عمي سلطان والا عمي فهد اخاف من ابوي...،

التفت محمد لفواز / خلنا من مشاكلك نبي نسمع نكتة خالد...،

ضحك خالد / اليوم جتنا جدتي رمسا من بيت خالي عبد اللطيف طلبته يسمي الولد على ابوها وعيا...،

محمد بملامه / ماله حق صراحة كان سماه وخلاص ...،

أردف / هذا انا مسمى بخالي محمد عادي...،

خالد زفر با اسف / جدتي الله يهديها يعلمني أنور...،

حتى زيارة ما زارت عمتي ولا دقت تحمد لها بالسلامة يوم جا الاسم جت تفرض امرها ...،

اردف / ما هو والله قصدها تبي اسم ابوها...،

لكن اتفقو مجلس عايلة راكان الموقرة عشان يقهرون عمتي...،

فواز / خلاص يسميه ويفتك من المشاكل...،

خالد با استنكار عقد حاجبيه / انت تدري وش اسم ابو جدتي ...،

فواز / وش دراني هو انا من بقية عيلة خوالك وعساني ماني منهم ...،

خالد يكتم ضحكته / اسمه جخيدم ...،

محمد وفواز لم يستوعبا الاسم...،

خالد وهو يرص على الحروف / اسمه جخيدم وجدتي اسمها رمسا جخيدم تبون خالي يسمي ع قولتكم ويفتك...،

غرقا محمد وفواز بالضحك...،

تبون اقهركم زود / صاحب الشور خالي عبد العزيز...،

محمد / وليش ما سمى عياله انا عمري ما سمعت الاسم هذا بعايلة خوالك...،

خالد ابتسم ابتسامة ساخرة / تدري ليه ما عمرك سمعته لأنه كان اسم خالي عبد العزيز وغير الاسم...،

يوم غير الاسم ياويل واحد منا يغلط ويناديه با اسمه القديم يزعل عليه ...،

فواز با امتعاض/ هذا ما يخاف الله يغير اسم مايبيه وبيسمي فيه ولد اخوه...،

خالد / أدرى تصرفات خوالي تغبن وتقهر لكن الصمت أفضل حل في مثل ها الحالات...،

لأنك ما راح بكلامك تغير شي اللهم تزيد النار حطب ويزيد بغضهم لعمتي...،

فواز/ الحين اسمع بس وش بيصير بين عمتي وخالك من حرب على الاسم...،

محمد / والله يا ليت الاحوال تصدر امر ان الطفل ما يكتب اسمه الا بموافقة من الام والأب على شان يفكون البيوت من المشاكل...،

أردف بممازحة / شكلي بالمستقبل إذا أراد الله وتخرجت وصرت محامي بحا ول أطالب بها القرار...،

والي يعترض من الخوال والا العمام يدفعونه غرامة ...،

زفرخالد بقلة حيله/ ما اقول غير الله يقوي عمتي وينصرها ...،

فواز ومحمد بتعاطف / اللهم آمين...،


.


.


.


خرج الجميع من عند سعاد لم يبقى سوى مضاوي...،

مضاوي وهي تمسك بيد سعاد تحاول ان تنزل من فوق السرير/ لازم تتحركين عشان العملية ويتمدد الجلد ويتحرك الدم...،

وقفت سعاد بصعوبة وتحركت في انحاء الغرفة ...،

مضاوي / الحمدلله الحين أفضل من الصباح تتحركين...،

ادخلت مضاوي سعاد لدورة المياه لتستحم وتستعيد نشاطها...،


.

.

.



بعد نصف ساعة ...،

مضاوي تلبس سعاد ملابسها...،

سعاد بشفقه/ والله عذبتس معاي كان ناديتي ممرضة تساعدتس...،

ضحكت مضاوي / كما تدين تدان انتي يوم كنتي تروشيني وانا صغيرة تنادين احد ...؟

لحالتس تحملتيني خليني ارد من ها الدين شوي تعرفيني ما احب اصير مديونه...،

وبمرح ابتسمت / ادور بس الي لهم ديون علي واسددها ...،

بكت سعاد...،

مضاوي بخوف / تحسين بشي...،

ضحكت سعاد من بين دموعها / لا والله بس تذكرت يوم ماتدانين الشامبو على شعرتس تخافين يدخل عيونتس ...،

وامي الله يرحمها تصبه على شعرها وتقولي غسلي شعري قدام مضاوي على شان ترضى تروش ما تخاف...،

مضاوي / ما قال الرسول صل الله علية وسلم انا وكافل اليتيم كهاتين من فراغ الا ان الكفالة معاناها...،

تنهدت بحزن / الله يكتب اجر امي النيرة وكل من يقوم على يتيم...،

سعاد / اللهم امين...،

حضر لزيارة بعد المغرب عبد اللطيف وابنائه...،

ارتدت مضاوي عباءتها وخرجت لاستراحة النساء...،

واخذت هاتفها معها لتترك المجال لسعاد وزوجها وأولادها...،

رن هاتف مضاوي ابتسمت للمتصل وفتحت الخط / هلا سناء...،

سناء با استهزاء تقلد مضاوي / هلا سناء لاحس ولا خبر ولا حتى نقطة ترسلينها بالغلط...،

مضاوي تهمس / ياالدبة انا بالمستشفى مع عمتي...،

سناء تضحك / داريه رجلتس يشكي لرجلي يقول انه عزوبي بالخرج...،

مضاوي / ما أقدر اسولف افتحي سناب نسولف فيه أحسن...،

سناء / ماني فاضيه بتجهز بنزور عمتي وبعدها بنطلع الشرقية...،

دقيت اعلمتس جايينكم على شان تستقبلون حضرتي واسأل من عند عمتي ...،

مضاوي / ما في الا رجلها وعيالها واتوقع ماراح يطولون...،

اردفت بسخرية /على وصول حضرت جنابتس يكونوم طالعين...،


.


.


.


بعدها بنصف ساعة ...،

عند سعاد خرج عبد اللطيف وابنائه وبقيت ريما...،

وصلو بدر وسناء ...،

سعاد بفرح ابتسمت / توقعتكم سافرتو ...،

بدر بممازحة ضحك / ماتجي نسافر ودينمو عايلة العاصف متعطل لازم نتطمن عليه...،

سناء / عميمه وين المزيون ما شفناه ...،

سعاد / ما طلبته ما أقدر أشيله...،

رن هاتف سناء ردت على المتصل وأغلقت الخط والتفتت لعمتها / عمه هذا سعد جاي ومعه سهى...،

دخل سعد ومعه سهى سلمو على سعاد سهى ذهبت الي الجهة التي فيها مضاوي وريما...،

وسعد اختار زاوية تبعده عن اي مجال يسمح له برؤية ريما...،

انضم اليهم فهد ومعه ابنته شروق التي تزور عمتها لأول مره بعد الولادة ...،

سعاد لم يزرها الي الآن من اهل زوجها سوى رفعة...،

فقط اتصال من لطيفة تبارك لها ورسائل تهنئه من زوجتي فلاح وعبد العزيز اعتذروا عن الزيارة انهما في مخيم بعيد عن الرياض مع أهلهم...،

فهد بموده ابتسم / ما اخترتو للمزيون اسم الي الحين ...؟؟

سعاد التي قررت ان تسميه بثامر بناء على طلب والدها لم تستعجل الامور خوفا من امور قد تطرأ ليست بالحسبان / لا للحين جعل عمرك طويل ...،

فهد يعلم ما تعرضت له ريما من احراج بسبب انها كانت تظن بان المولود بنت...،

التفت لريما وبعطف ابتسم / خلاص ريما تسمي اخوها...،

ريما بيأس / لا خالي مقدر اسمي...؟

فهد بتشجيع / ليه ماعليتس ان ادعمتس اختاري اسم وابشري به ...؟!

ريما بعفوية / راح علي الاسم...،

واردفت بفرح طفولي / لكن جاني تعويض بسمي الي تولده مضاوي...،

بدر بنبرة مقصودة / سمي اخوتس ازين لتس ولد ثامر بتبطين ما سميتيه...،

فهموا جميعهم انه لن يسمح لريما ان تسمي فالمتعارف عليه ان ولد ثامر جلال ولن يكون لولده غير هذا الاسم ...،

فهد / اجل خيرها بغيرها ان شاء الله...،

ماعليتس من كلام بدر وانا خالتس ما خلي بنفستس هالاسم...،

أشار بيده / اي وحده من الحاضرات سناء والا شروق والا مضاوي...،

اول بنت تجي لوحده منهن انتي تسمينها الاسم الي تبين...،

ضحك بدر وضرب على صدره بخفه / تبشر الريم ما طلبت الااسم ...،

لو تبي غيرت اسم سناء وخليتها تسميها...،

شروق بممازحة / لا والله سناء تعودنا على اسمها ما نسمح لك تغيره...،

لكن اصمل ولا تغير دقت الصدر...،

فهد التفت لريما / ما شاء الله بسرعة سمو الولد ...،

وبتعجب / با العادة أبو أنور يبطي ما يكتب اسم عياله...،

ريما / اي خالي اليوم جدتي جتنا وطلبت ابوي...،

سعاد با استهزاء / ابو بدر اسأل ريما وش سموه...،

فهد استغرب أسلوب سعاد بالكلام ونظر لريما التي نطقت قبل ان يسألها...،

وببراءة/ جدتي تبي على اسم ابوها جدي جخيدم ...،

بدر الذي كانت علبة الماء بفمه التفت لسناء التي بجانبه وبخ الماء عليها...،

انهار جميع من الغرفة بالضحك....،

سعد انسحب وخرج من الغرفة شعرانهم احرجو ريما بضحكهم وهو أحرج معها...،

جلس على كرسي في الممر ووضع يديه على وجهه يتذكر الموقف ويضحك...،

.


.


.

المتواجدين عند سعاد كل ما أرادوا ان يتمالكوا أنفسهم ينظرون لريما المستغربة من ضحكهم...،

لم يكن الضحك فقط لغرابة الاسم، ولكن اسلوب ريما الطفولي ونطقها الخاطئ للأسم هو من جعلهم ينهارون من الضحك...،

بدر الذي يحاول ان يتمالك نفسه حتى لا يضحك / والله يا ريما انا اول كنت متردد اخليتس تسمين بنتي...،

لكن عقب ها الموقف واسم اخوتس هذا...،

لو قلتي سم بنتك بهلوله قلت لتس تم ...،

خرج بدر وهو يمسح دموعه من الضحك ليجلس بجانب سعد الذي ما ان رأه حتى جلس بجانبه وغرقا بالضحك...،

.


.


.

فهد وهو مايزال يضحك / الحين الاسم هذا ماكان اسم ولدهم عبد العزيز...؟

سعاد / الا اسمه وغيره ويويل من ينطقه والا يذكرهم انه كان اسمه...،

اردفت / تذكر عقب ما ولدت راكان وخالتي وقتها قالت انها تحسفت انها سمته على ابوها...،

لا هو الي جاي مثل ابوها وبس ابلشت ولدها با الاسم الغريب...،

همست شروق بقهر لمضاوي / واضح طلبهم هذا يختبرون صبر عمتي...،

مضاوي بهمس مماثل / الله كفينا شرهم ...،

فهد / هو لو كان الاسم متعارف عليه ما فيها شي...،

لكن ثقيل وقديم ولا هو وقته ...،

أردف / اهم شي راي عبد اللطيف ...،

سعاد / والله يا فهد ما في أغلى من ابوي ومن اخواني ما سميت لا عليه ولا عليكم...،

عيالي كلهم هم مسمينهم لكن ولدي هذا ابوي سماه وانتهى...،

والله ما كنت بقول لين يكتبه عبد اللطيف...،

ما ابي اخذ وعطا بالموضوع لين يجيهم الاسم جاهز ويسمعونه من ولدهم ...،

فهد / ما عليه وانا اخوتس خوذي الأمور برويه اهم شي عندنا صحتس وتقومين بالسلامة...،

أردف / إذا أبو أنور وافق على الاسم الي تبين كان بها...،

ماسمى بكيفهم هذا ولدهم وهم احرار خليهم يسمون الي يبون...،

واذا كبر ولدتس وما اعجبه الاسم بيغيره مثل عمه...،

وقف فهد / انا طالع عند العيال خذو راحتكم...،

والتفت لشروق / متى مابغيتي المشيه انا برا انتظرتس...،

غادر فهد الغرفة ...،

مضاوي فتحت نقابها وجلست / الله يسعدتس ياريما مثل ماغيرتي جونا...،

سهى بتذمر وقهر / انا ما بغيت انفجر قدام عمي وبدر لكن بالله من جدها جدتكم ذي...،

ريما / اي من جدها يوم جتنا اليوم الصباح تهاوش وتهدد ابوي لو ما سمى ...،

سعاد / مع نفسها هي وولدها تشوف له حرمه غيري وتسمي عيالها...،

سناء بقهر وامتعاض / سبحان الله في اباء وامهات غصب الي يخلونك تعقهم يسحبونك برقبتك سحب الين تعصاهم...،

مضاوي / بر الوالدين له حدود الله سبحانه وتعالى نهى ابراهيم عليه السلام انه يستغفر لوالده...،

في اشياء مصيرية ما يقدر الانسان يجامل فيها ولو كانوا والديه...،

انتهت الزيارة...،

غادر الجميع لم يبقى الا مضاوي وشروق التي طلبت من زوجها ان ترافق مع عمتها فوافق ...،

ورجعت ريما مع والدها بطلب من امها لابد من وجودها في البيت ...،

مضاوي بممازحة / زين أطلق صراحتس ابو سعود...،

شروق وهي تصب فنجال قهوة لعمتها ومضاوي / يا زينه لو ما هو معطي اذنه لخالتي...،

مضاوي تضحك / الظاهر خالتس مثل خالة عمتس...،

شروق با انفعال وتقزز / لا اعوذ بالله والله انها ارحم وبناتها عسل...،

خالتي جننتها الغيرة وفي ناس توزها علي لكن اتوقع لو يعرسون اخوان طلال بتخف عني وتتركني...،

مضاوي وهي تنزل عباءتها / والراكان بعد يمكن غيره لكن غيرتهم طولت...،

شروق با امتعاض / ماهي غيره اعوذبالله مرضهم مزمن على عمتي ...،

سعاد / اهل عبد اللطيف الكل شان هجوم علي من بعد زواجي بشهرين...،

رحت سكنت معاه بالشرقية استخفوا يحسبوني استفردت فيه...،

وبعدها توظفت وجن جنونهم الي اليوم ويمكن الين اموت بعد...،

شروق / بسم الله عليتس وهم بطقاق ربي مغنيتس عنهم...،

سعاد / انا ما يقهرني الا الناس الي تلومني وحاطين الذنب علي ومصوريني شيطان...،

مضاوي وهي ترتب الغرفة وتفتح بوكيهات الورد / مع نفسهم حياتس محد عايشها غيرتس وشفتي كل الي مخطينتس ومصورينتس شيطان ...؟

والله لو كانوا بموقفتس انهم يدورون الي يريحهم ويسوونه ...،

الناس ترى تسولف بالمثاليات ولا تطبقها...،

سعاد با استغراب لشروق/ وش فيتس من اليوم تقهوينا ولا تقهويتي...،

يقاطعهم اتصال لهاتف شروق / هلا طلال...،

... لحظة

شروق كتمت سماعة هاتفها والتفت لعمتها / عمه طلال يسأل تبون عشا والا مشتهين شي ...،

مضاوي اشارت بيدها بمعنى لا...،

سعاد / ما يقصر ابوسعود وسلمي عليه مانبي شي...،

فتحت الكتم شروق...،

.. لا سلامتك ما نبي شي كل شي موجود...،

اردفت / عمتي تسلم عليك ...،

.. الله يسلمك خلاص بكيفك...،

.. مو مشكلة بكرا ارجع مع ابوي والا اخواني...،

اغلقت الهاتف...،

شروق / وش كنتي تقولين قبل الاتصال...،

سعاد / اقول وش فيتس ما اعجبتس القهوة...،

شروق / لا والله لكن صايرة ما احبها زي اول...!

حتى قهوة امي الي ماكنت أشبع منها كرهتها...،

سعاد تذكرت كلام ام جاسر / يمكن حامل...؟!

ما حللتي ...؟؟

شروق / لا ما ابي انكسح زي الشهر الي فات حللت وماطلع شي بس احرجت نفسي قدام خالتي...،

شافت طلال وهو يجيب المخبار وحللت وما في شي...،

مضاوي / ما يحتاج مخبار بالبيت إذا دورتس تأخرت أقرب مستوصف اضمن لتس فحصهم...،

شروق / المشكلة دورتي من تزوجت ما عاد انتظمت...،

مضاوي / خلاص بكرة اخذتس للمختبر وتحللين اذا دورتس متأخرة...؟

شروق / هي متأخرة لكن مالي خلق تبين انفس عليكم اذا مافي شي...؟

سعاد / يابنت الحلال روحي ما انتي خسرانة شي...،

وان شاء الله تبشرينا وبعدتس مضاوي...،

ابتسمت مضاوي / لا انا تو الوقت لا تتحرون لين ثامر يخلص دراسة...،

شروق / توقعتس تقولين لين اخلص تطبيق...؟

سعاد / ليش تأجلون ترى ثامر ماهو صغير وانتي بعد...،

مضاوي تحاول ان تبرر / انتي شايفة كيف وضعنا راتب ثامر عساه يسد الي اخر الشهر...،

نجيب طفل وبيزيد علينا العبء ...،

سعاد / وش المنطق الاعوج والله لوعندتس عشر اطفال ما فكرتي كذا...؟

شروق / اقول بس اتركي الموانع اللي تاخذينها واحملي...،

ما شفت احد ينتظر حفيد مثل اهلي ما ينتظرون ولد ثامر...،

مضاوي / يصير خير لا تناقشوني قبل انهي سنة الامتياز ...،

سعاد بتوجس وبنظرة شك / إذا على الامتياز ما بقى شي كم شهر وخلصنا...،

اهم شي ما يكون في شي ثاني...،

مضاوي اخافتها نظرة عمتها وأنها تكشف امرهم...،

وخصوصاً وضع ثامر، حتى لو زواجهم أصبح حقيقي فثامر سيحتاج فترة للعلاج...،

لا تريد لأحد ان يكشف ان ثامر يعاني من مشكلة في الانجاب حتى لا يشعر بالحرج امام أهلهم ...،

وان تأخر حملها ستنسب المشكلة لها...،

وأنها من تعاني من مشاكل تمنع حملها وتخضع لعلاج...،

اخرجها من هذا الاحراج دخول الممرضات للفحص الروتيني...،

.


.


.

في صباح اليوم التالي في المستشفى...،

الا طباء في جولة صباحية...،

في غرفة سعاد...،

الدكتورة عفاف / الحمدلله كل شي كويس احتمال با اذن الله بنكتب لك خروج بكرة الصباح ...،

استمري على الادوية خلي أحد يصرفها لك من صيدلية المستشفى قبل تطلعين وما قدامك الا العافية اهم شي المشي...،

حاولي تمشين لا تجلسين...،

غادرت الطبيبة والممرضات بعد ان دونت ملاحظات في ملف سعاد...،

مضاوي تنظر لساعتها / خلاص المختبر فتح يا الله ننزل...،

سعاد / وش فيتس خايفة روحي مع مضاوي حللي إذا فيه حمل كان بها مافيه محد داري يابنت الحلال...،

مضاوي / بسرعة طلعي بطاقتس الطبية واشوف قدامي...،

ضحكت سعاد/ اول مره اشوف مضاوي متحمسة...،

غادرت مضاوي وشروق للمختبر...،


.


.


.

اجرت شروق الفحص وطلبت مضاوي من الممرضة التي كانت تعرفها ان تستعجل بالنتيجة...،

ابتسمت الممرضة / المفروض النتيجة بموعد في العيادات لكن الواسطة فوق القانون ...،

خرجت مضاوي وشروق من المختبر...،

شروق / خلينا نطلع لعمتي...،

مضاوي / لا وين مشوار من المختبر الي قسم الولادة...،

والنتيجة ما راح تطول ...،

شروق بخوف / مدري ليش حاسة ان ما في حمل...،

اردفت / صرت اتخيل نفسي عقيم...،

مضاوي وهي ترص على يد شروق التي كانت تمسك بها / انسي التشاؤم والافكار السوداوية الي براستس وتفاءلي...،

شروق با استغراب / مضاوي تقول كذا ...،

حركت رأسها بتعجب / ما هو منتس من الجوال الي ما هجد كل الليل والسناب يأشر...،

اردفت / انتي وين ساحبتني وراتس...،

مضاوي / ماعليتس تعالي بس...،

دخلت مضاوي ومعها شروق لغرفة الممرضات وسلمت عليهم...،

كان متواجد عدت ممرضات...،

سلمت عليهم مضاوي وشروق وجلسوا...،

كانو يتجهزون للبدء بالعمل...،

منى / وش الساعة المباركة الي جابتك لغرفتنا ...،

مضاوي / انا مرافقة مع عمتي الي ولدت صباح الجمعة...،

نشوى / الحمد لله ولادتها وقت اجازتكم ...،

حلا قدمت كوبين قهوة سريعة التحضير لمضاوي وشروق...،

اخذت مضاوي كوب القهوة / الله يسعدك مشكورة...،

وشروق كوب القهوة الأخراخذته مجاملة...،

نشوى بممازحة / ما قصرتي يا حلا...،

حنا اخذتنا السوالف ونسينا نضيفهم...،

منى / ماتقصر ها الحلا انا عمري ما شفت وحده خدومة مثلها ...،

اردفت / حتى لو على حساب نفسها إذا شافتك محتاجة قضت لزومك...،

ضحكت منى / ولو الموضوع يحتاج مشوار تروح ما عندها مشكلة...،

حلا تضحك / ليش اجل سمونا ملائكة الرحمة...،

اردفت / والرسول صل الله علية وسلم قال بالحديث ((من نفَّس عن مؤمنٍ كربةً من كرب الدنيا نفَّس الله عنه كربةً من كرب يوم القيامة))

ابتسمت مضاوي بشكر وامتنان / عليه الصلاة والسلام والله ما قصرتي طمنتينا على عمتي...،

حلا با استغراب / هي بنت عمك والا عمتك...،

ضحكت شروق / كلهن ...،

نشوى وهي تجهز الفطور / أفطروا معنا حياكم...،

ابتسمت شروق / تسلمين افطرنا فطور المرافقين من بدري مع عمتي فوق...،

نشوى / الله يعز الدولة ما خلت قاصر لا علي المريض ولا على المرافق...،

مضاوي / اللهم آمين...،

اردفت / خلي الآكل امره بسيط أحيان مرافقين ما يعجبهم الاكل...،

لكن شوفي الأجهزة الطبية الي توفرها وصيانتها با استمرار والأدوية...،

اردفت / هذي نعمة بحد ذاتها تستحق الشكر...،

استرسلت مضاوي بكلامها وبا استشعار لهذه النعمة / بعض الادوية اسعارها برا با الالاف والحمدلله وفرتها الدولة مجاناً للمرضى ...،

منى التفتت لحلا / حلا توها تعينت من اسبوع حكومي كانت بمستشفى خاص هي الي حاسه بها النعمة...،

حلا با اسف واسى/ اي والله كثير مرضى يطلعون ماكملو علاجهم يقطعون القلب...،

شروق تنظر لنقاب مضاوي بتفحص / يابنت شكل نقابتس مقلوب...،

مضاوي تمسك بنقابها / من جدتس..!

والله ما انتبهت لبسته مستعجله...،

ضحكت وهي تنزل نقابها/ يعني من اليوم ادوج ومقابلتكم بنقاب مشقلب...؟!

فتحت طرحتها وعدلتها ولبست نقابها...،

امام عيون حلا المذهولة ...،

التفت مضاوي لشروق / كيف شكله زين...؟

ضحكت شروق / ما عليه ...،

نظرت مضاوي لساعتها ووقفت / يا الله عن اذنكم يا جميلات ...،

ضحكت منى وبا اعجاب / والله مافي جميل غيرك...،

خرجت مضاوي وهي تأشر بيدها لمنى / شكرا على المجاملة...،

بعد مغادرة شروق ومضاوي...،

نشوى لحلا با انتقاد/ وش فيك سرحتي بالبنت يوم نزلت طرحتها خفت تنتبه لك فشيله...،

حلا بحيرة / يا ناس البنت هذي اعرفها مخي راح يطق إذا ما تذكرتها ...؟

نشوى / يمكن ايام الجامعة او درستو ثنوى مع بعض...،

منى/ خلي عنك والله ما ترتاح حلا لين تجيب علمها...،

حلا / من جد من شفتها ذاك اليوم ما راحت من بالي لكن ما أدري وين او متى شفتها...،

اردفت / يارب يجيي تعيينها هنا ياازين نفسيتها...،

نشوى / اكيد راح تتعين على طول تراها من الاوائل على دفعتها...،

حلا / تعرفينها من زمان...،

نشوى / مها بنت خالتي معها من اولى كلية درسو مع بعض...،

تمدحها مره حتى اذكر يوم تزوجت خافت مها انها تطبق بمستشفى ثاني...،

حلا با اندهاش / الحين هذي متزوجة...؟

نشوى / اي من زمان ماخذه ولدعمها مها حضرت زواجها ...،

تضحك منى / ياربي عساه يستاهل زينها...،


.


.


.



امام المختبر رفضت شروق ان تدخل...،

مضاوي / يا خوافة خلاص انا بدخل اطلعها...،

شروق وهي تنفض يدها من التوتر / خلاص بروح لعمتي فوق...،

مضاوي / وش فيتس انتظري هنا إذا ما تبين تدخلين معي...،

وإذا ما في حمل محد داري ...،

اول مره يعني تحللين...؟

اردفت / ترى الموضوع جداً بسيط...،

شروق / اول مره احلل بمستشفى هذا الي مربكني...،

تركتها مضاوي ودخلت لأخذ النتيجة استغرق انتظار مضاوي اقل من عشر دقائق اخذت النتيجة...،

وخرجت لم تجد شروق...؟

اتصلت بها / وينتس يا الجبانة ...؟!

شروق / طلعت فوق عند عمتي...،

مضاوي / انا طالعة الحين...،

.


.


.


في غرفة سعاد ...،

سعاد / بشري وش قالت...؟؟

شروق / تقول جاية ...،

سعاد / ليش ماسألتيها عن النتيجة...،

شروق بتوتر وقلق / مدري خفت من الصدمة ...؟

سعاد تضحك / لاحول ولاقوة الا بالله الي يسمعها يقول متزوجه من عشر سنين ترا ما كملتي سنه...!!

شروق زفرت بتأفف وتذمر / ما جربتي رجال يجننك كل شهر هو وأمه يسألونك متى ومتى لدرجة حسسوني اني عقيم...،

سعاد تذكرت كلام ام جاسر/ والي يقولك والله اعلم أنك حامل...،

يقاطعهم دخول مضاوي...،

سعاد / هاه بشري قمحة والا شعيرة...؟

مضاوي تبتسم / بكيف العقيمة وش تبيها...؟

بكت شروق / قلت لتس ما ابي احلل...،

ضحكت مضاوي واحتضنت شروق بمرح وحنو/ يا بنت الحلال قمحة مهي شعيرة وش فيتس...؟

سعاد بفرح/ الحمدلله ألف مبروك...،

شروق لم تستوعب وبذهول / تكفين مضاوي لا تكذبين علي فكينا من حركات سناء...؟

مضاوي / شوفي النتيجة ...؟

مدت لها الورقة واخذتها شروق وهي تمسح دموعها / الحمدلله ببشر امي وطلال...،

سعاد / اهجدي شوي...،

اردفت / من بيرجعتس لبيتس اليوم ...؟ّ

شروق / أرسل لي طلال بيمرني اذا خلص دوامه ويا خذني...،

سعاد / حلو دخلي ورقة التحليل بشنطتس وإذا وصلتو البيت خبري زوجتس وجه لوجه...،

وبود ابتسمت / ما تقولين متشفق لحملتس...؟

شروق بسعادة ابتسمت / مرره اكثر مني...،

اردفت / طيب وامي...؟

سعاد / امتس مضاوي مثل مابشرتس تبشرها...،

إذا علمتي زوجتس أرسلي مسج لمضاوي عشان هي تبشر امتس...،

ارادت سعاد ان تجنب شروق ملامة ام زوجها انها من المفروض انها علمت بخبر حملها قبل غيرها فهي تعلم غيرتها...،

والامر بسيط لا يحتاج ان يضخم ويعطى أكبر من حجمه...،

وارادت ان تسعد قلب مضاوي بأنها ان زفت مثل هذي البشارة تسمع عبارات تفرحها ...،

وتحفزها اكثر لفكرة الحمل عندما تسمع وترى فرحتهم بحمل شروق وزوجها الذي يعتبر بالنسبة لهم غريب...،

فكيف فرحتهم بحملها وهي ابنتهم وزوجها ابنهم...،

شروق تضم يديها لصدرها بفرحة/ الحمدلله يا ربي ...،

مضاوي تضحك / وجه جخيدم على شروق حلو...،

ضحكت شروق / عاد سناء جننتني البارحة تراسلني تقول عرسنا وجهه خير عمتي ولدت...،

وانتو يا الطلال عرسكم توفت جدتي...،

سعاد / ما تعرفين سناء وعيارتها...،

سعاد هزت رأسها كأنها تذكرت امر ما / سبحان الله...،

شروق / وش فيه عمه...،

سعاد وهي تنظر لمضاوي / لابس تذكرت سالفة سمعتها من ام جاسر...،

مضاوي / من ام جاسر...،

سعاد / صديقة ام شامخ الي شفتيها ام شعر احمر بعرس بدر واقفه معي اخر العرس تسأل وتدور عروس لولدها...،

مضاوي / اي تذكرت شكلها ما شاء الله تهبل ...

شروق با استغراب /ليه وش فيها...؟!

سعاد بتعجب/ ما فيها شي بس سمعت منها كلام بديت اخاف منه ...؟!!

ارادا مضاوي وشروق الاستفسار عن مخاوف سعاد وقاطعهم رنين هاتف سعاد...،

سعاد / هلا عبد اللطيف...،

.. من جدك انت ها الاسم اخوك غيره وانا اسميه ولدي...،

.. واذا بكت امك بسلامتها والله ماشفتها بكت علي وانا بغرفة العمليات...،

.. ولا شفت ولا سمعت اتصال منها ويوم وصل للأسم طلعت الأصوات...،

.. انت بتجنني ما يكفي جنيت علي بتجني على ولدي با اسم جد جدكم...،

.. اذا منحرج تكتبه عط انور تفويض وهو يكتبه وريحنا...،

.. يا اخي طول عمري ممشيه اموري بنفسي ما كلفت عليك ولا اتعبتك...،

مضاوي بخوف / عمه خلاص اهدي تكفين لا ينفك الجرح...،

سعاد وهي تصرخ / خلي ينفك الجرح يمكن اموت ويرتاح عبد اللطيف من البلوى الي اسمها سعاد...،

اخذت مضاوي الجوال من يد سعاد وشروق تهديها...،

مضاوي / مرحبا ابو أنور...،

عبد اللطيف / هلاهلا ...،

مضاوي بجديه / ترى الانفعال ماهو كويس لعمتي هي مسويه عمليتين وخطر عليها...،

اذا في بينكم خلاف اجلوه حتى يلتئم جرحها ...،

عبد اللطيف / عطيني أكلمها...،

اعطت مضاوي سعاد الهاتف...،

سعاد بقهر/ وش بعد باقي تبوني اكلم سلطان يهددكم برفعة عشان تهجدون عني...،

عبد اللطيف يتنهد / خلاص يابنت الحلال والله العظيم اني تعبان اكثر منتس...،

انا الحين قريب من المستشفى بطلع تبليغ الولادة وش تبين اسم خلينا نسجله ونفتك...،

سعاد / ابوي مايبينا نسمي عليه ...،

خلاص بسمي بثامر الجلال...،

عبد اللطيف / طيب وش رايتس با امير اقترحته ريما...،

سعاد بعصبيه / يعني اي شي اهم شي ماهو اسم قالته سعاد...،

اردفت بغضب / والله عاد ماله اسم الا ثامر وانتو وريما تنفلقون...،

وبغيض وضجر / يا الله مع السلامة...،

اقفلت الخط من عبد اللطيف وهي تضع يدها على مكان العملية

مضاوي / تحسين بشي...؟

شروق دموعها تتسابق بصمت...،

سعاد بتذمر وتأفف / اعوذبالله يطلعون الواحد من طوره...؟

التفتت لشروق / وانتي امسحي دموعتس مافيني الا العافية...،

اشرت لمضاوي /تعالي ساعديني بروح الحمام اتحمم واغير لبسي شوفي قميصي امتلى حليب...،

اردفت / وبعدها بروح اشوف جخيدم الي تذابحنا على اسمه وللحين ما شفته...،

شروق بعفوية / الحمدلله اهل طلال كل اساميهم حلوة...،

ولو ما عجبني اي اسم عمي ابوطلال الكل يخاف منه اطلبه اسمي ...،

لم تتمالك نفسها مضاوي وضحكت على كلام شروق

ضحكت سعاد وهي تعض على شفتيها من الالم /انا اقول ريما من طالعه عليه ...!!

مضاوي / كلن على همه سرى...،


.


.


.


بعدها بربع ساعة ذهبوا مضاوي وشروق وسعاد لحضانة الأطفال...،

دخلت سعاد الي داخل الحضانة ووقفوا مضاوي وشروق يشاهدون سعاد وهي تحمل الطفل...،

شروق بعطف وشفقه / يا الله صغير مره وغامقة بشرته ما كذبت ريما يوم تقول بسة سودا..!

مضاوي / لا هو وزنه ماعليه شوفي الي حوله ما يبانون من الأجهزة...،

شروق برأفه / يارب ترحم حال ضعفهم...،

اردفت / ليتك تخصصتي نساء وولادة والا اطفال ...،

ضحكت مضاوي / ليه تأثرتي من عمتي وشوفة المواليد...،

شروق / لا والله من زمان تذكرين كلنا مستغربين ليش اخترتي عيون...؟!

مضاوي ابتسمت بوجع / لغاية في نفسي واستخرت وسبحان الله ربي خيرني فيه...،

خرجت سعاد من حضانة الأطفال...،

سعاد بفرح / الحمدلله شفته وتفقدته سليم والله خفت يجي فيه شي...،

اردفت / بس احس عيونه فيها شي شفتيها يامضاوي...؟؟

ضحكت مضاوي وبحنو/ اول ما شفت عيونه ...،

اردفت / الحمدلله التهاب بسيط ويروح ان شاء الله...،

وبشفقة / الضعيف الي عاناه معكم تحسبينه هين...،

سعاد / من صحيت من البنج وابي اشوفه وترددت خفت والله انا بعالم وانتم بعالم الحمدلله ياربي على تمام الخلقة...،

شروق / احسه اسمر مره ما هو مثل اخوانه...،

سعاد / بيرجع ريما لو تتذكرون شكلها يوم ولدتها...،

في الممر رن هاتف سعاد...،

فتحت الخط ...،

.. طيب انا قريبه للغرفة...،

سعاد / هذا عبد اللطيف بشوف بعد وش عنده...،

ضحكت شروق / يمكن يبي يشوف جخيدم...،

وصلوا لغرفة سعاد وكان يقف عبد اللطيف امام الباب...،

دخلت سعاد ودخل خلفها...،

وبقيت مضاوي وشروق خارج الغرفة مشو حتى ابتعدوا عن الغرفة ...،

شروق بتعجب / تدرين كل ما شفت عبد اللطيف اتعجب زود وزود منه..؟!

مضاوي / ليه بالعكس احسه مره كبر...،

شكله الحين اكبر من يوم زار جدتي الله يرحمها اخر مره...،

شروق / لا مو قصدي عمره رزته وطوله وسامته وإذا شفتيه هيبه تقولين بس من ينتسب له من الشيوخ...؟!

حتى وظيفته مرموقة...،

ابتسمت مضاوي / كنتس توتس تعرفينه معرس على عمتي قبل نوعي لدنيا...،

شروق / تفاجئت قبل كم يوم عمي ابو طلال يقول واحد من اخوانه زميل عبد اللطيف...،

تخرجوا من نفس الجامعة وتعينوا مع بعض...،

تخيلي شاري مزرعة قبل شهر من غير بيته الي ساكنه قصر ما هو بيت...،

شفته بسناب شادن اخت طلال ماخذه اخو حرمته...،

وعبد اللطيف ساكن في بيت عمتي واهله ناشبين بحلقها...،

مضاوي / هذي ارزاق مقسمها ربي سبحانه والحمدلله عمتي ما عليها قاصر...،

شروق / الحمدلله على كل حال لكن مستغربه ...،

عاد هذاك شفته خلق الله حسن شين مره فرق بينه وبين عبد اللطيف لكن المخ سبحان مقسم الارزاق والعقول...،

مضاوي / الناس مخابر ماهي مناظر...،

اردفت / واحينآ سوء ادارة الشخص لأمواله وقلة البركة...،

شروق تمسك بيد مضاوي وبممازحة / عاد انتي تبارك الله محد مثل ادارتس وفلوستس مبروكة...،

مضاوى تضحك / اذكري الله...،

شروق تضحك / ماشاء الله تبارك الله يزيدتس من فضله...،

مضاوي / اللهم آمين...،

خرج عبد اللطيف وعادو مضاوي وشروق لغرفة سعاد...،

شروق / وش عنده ابو جخيدم...،

سعاد تضحك وتمد ورقه لشروق...،

شروق / زين الحمدلله رحمتو ها المسكين من اسم جد جدكم...،

مدت الورقة لمضاوي...،

اخذتها وقرأت الأسم بصوت عالي وبا ابتسامة / ثامر عبد اللطيف راكان...،

شروق تنفض يدها / اجل ياويله من شي بيجيه من اهله...،

مضاوي بتعجب / يا الله احس ضعيف شخصيه...!!

سعاد / وش ودانا بداهية الا ضعف شخصيته ...؟

رجال طول بعرض لا يحل ولا يربط ما هو قادر يصرف نفسه ولا يمسك العصا من النص بين اهله وزوجته...،

شروق / تدرون عمري ما كرهته ولا اتذكر منه شي شين...،

سعاد / والله ياصفاته من أعجب الصفات...،

سكنت معاه بالشرقية لحالنا وبين جيران من جميع مناطق المملكة وبعدها سنين عند اهله...،

مستوعبات عمره مارفع عينه لا على جاره ولا على حماه ولا زاغت عينه على شغالة ...،

وانه يستحي من ظله حتى دراسته ما هو فاشل هو تخرج من الجامعة بتقدير جيد جدا يعني يعتبر شاطر...،

والي بجيوبه ما هو له ...،

مضاوي با استغراب وتعجب / يا الله صفاته صفات النبلاء...،

شروق با اندهاش / سبحان الله طيب كيف وصل وضعه للي هو فيه...،

سعاد / الله يكفيتس شر رفقاء السوء ولا فيه توجيه له من الكبار...،

اول ما طاح بطريق الخراب محد احتواه...،

اهله اهم شي عندهم محد يدري بتسكر والا تصيع سافر برا...،

دج على كيفك اهم شي محد يشوفك من الجماعة ...،

مضاوي بمرارة وامتعاض / يا الله اهم شي عندهم وش تقول الناس ...،

وبتعجب / مع ان شخصيته واضح طيبه وبسهولة تأثر عليه ...،

سعاد بتأييد / أي والله انه طيب وطيبته بزياادة...،

اردفت / هو فيه من ابوه واجد الله يرحمه اجودي وكريم...،

ابوي ما خطب رفعه الا على شان ابوها...،

ترى ما بدت دجته صح وظهرت للعلن الا بعد ما توفى ابوه الله يرحمه...،

مضاوي / ما اذكر ابوه من طلعت لدنيا واسمع الله يرحمه...،

سعاد / توفى بعد ما رفعة ولدت خالد...،

شروق / الي يقهر كل الي فضحوه وسولفو عنه يعني كيف دريتو...؟!

سعاد با استهزاء وسخرية / لأنهم كلهم مجتمعين بنفس المكان...،

زفرت سعاد با اسف وضيق / فكونا من ها السيرة الي تغث...،

ابتسمت بحنو / اهم شي جخيدم ولد العجوز...،

ربي اكرمني بعافيته وسليم الحمدلله الباقي ماعليه...،

.


.


.