الفصل الرابع

التفتت بذعر ولبست بسرعة طرحتها ونقابها ووقفت
تذكرت وصية الجدة ان رأت ما يريبها تنسحب
لا تنتظر من الجهة المقابلة تبرير التبريرات والتفسيرات تأتي فيما بعد
بعد ان تضمن سلامتها فا الأولوية ان تحمي نفسها وان تخرج من الموقف الخطير با اقصى سرعة
هيام با ارتباك / اهلين ناجي امتى وصلت
اشارة لها واردفت / هذي مضاوي بنتي
ناجي بنظرات اخافت مضاوي / ما شاء الله
أردف / ليش ما علمتينا نقوم بواجبها
وبممازحة ضحك / ما توقعت بنتك بها العمر
هيام بتوتر / البنت منحرجه اول مره تزورني وانت فاجئتنا بدخلتك
ناجي با استغراب / قالت لي الشغالة هنا بنت المدام لكن توقعتها صغيرة
مضاوي بثقة مزيفة همست لهيام / عادي عادي بس ابي دورة المياه
هيام / الحين الشغالة توصلك
نادت هيام الخادمة
.
.
.

خرجت مضاوي مع الخادمة وهي مرعوبة
وتتخيل ان الرجل يركض خلفها
وبهمس للخادمة / وين باب الشارع بسرعة طلعيني
الخادمة / من هنا
خرجت مضاوي مسرعة الي باب المنزل وهي تمسك بيد الخادمة من الخوف
خارج سور المنزل
مضاوي للخادمة بنظرات مذعورة/ في رجال داخل مين هذا
الخادمة / ليش انتي مايعرف هذا مين
قاطعتها مضاوي با استعجال وخوف ان ينتبهو لهروبها فلا مجال للأخذ والعطاء بالكلام / أي عرفته خلاص انتي ادخلي ولا تقولين أنى طلعت
دخلت الخادمة واغلقت الباب خلفها
.
.
.
ركضت مضاوي لسيارة وفتحت الباب بسرعة وركبت
وارتمت بحضن الجدة وبصوت يرتجف من الخوف / جده بسرعة بسرعة
الجدة ضمت مضاوي/ بسم الله عليتس وش فيتس تنتفضين
مضاوي ببكاء مرير / بعدين بعدين
التفتت للخلف /بسرعة ابي بيتنا بسرعة
.
.
.
امام بيت الجد نزلت مضاوي مسرعة الي داخل المنزل مع خروج الجد لصلاة المغرب
وتتبعها الجدة
الجد سعد بخوف وقلق / ام جلال وش فيها مضاوي عسى ماشر
الجدة بطمئنه / ما في شي الحق الامام قبل يقيم تونا جينا من درس وتأثرت
الجد با ارتياح / الحمدلله المؤمن قلبه يخشع وعينه تدمع
دخلت الجدة لغرفة مضاوي اسرعت لها مضاوي واحتضنتها وهي تبكي بمرارة
احتضنتها الجدة وسمت عليها / صلي وعيني خير وجدتس لايحس بشي نكمل هرجنا إذا جدتس رقد
خرجت الجدة من غرفة مضاوي المصدومة والمحطمة نفسيا
.
.
.
في اليوم التالي قبل صلاة العصر
الجد سعد / النيرة وين مضاوي لا افطرت معنا ولا تغدت عسى ماشر
الجدة / الشر ما يجيك مسخنه شوي أرسلت عليها الشغالة تشوفها تقول راقده
الجد / ما تشوف شر اقري عليها وروحي بها للمستشفى لا تهملينها
الجدة / ابشر ان شاء الله
بعد صلاة العشاء في نفس اليوم
في غرفة الجدة
مضاوي مترددة / يمه كنتي عارفة
الجدة با استغراب مصطنع/ وش عنه
مضاوي تمسك رأسها / جدة بنجن مخي بينفجر من التفكير انتي كيف دريتي
الجدة بمراوغة / صاير شي عند امتس
مضاوي بملامه / ليه خليتيني اروح وانتي دارية وش بيصير
الجدة / عطيني علومتس واعلمتس بعلومي
مضاوي حكت للجدة منذ ان دخلت منزل هيام حتى خرجت
الجدة بحزن / محد وانا امتس يتعلم من كيسه لازم الواحد يجرب
لو كلنا نهينا تس ابعدي عنها فكينا من شرها ما انتي طايعتنا لين تجربين
وهذا هي قدرت تلف عليتس من ورانا وتعبي راستس وتستدرجتس
والله يابنتي لا تقولين امي الي ولدتني ما يهمها غير مصلحتي العوج عوج والعدل عدل
الأنبياء وهم انبياء فيهم الي اختبروا من اهلهم الادنين الي ابوه والي ولده والي زوجته والي عمه
تبين حنا يا الضعوف نسلم من الاختبار
مضاوي تفرك يديها بغبنه وندم / جدة ما توقعت الي ها الدرجة توصل بها انا بنتها طيب
كل ما تذكرت وجه الرجال الي دخل ابي استفرغ من الخوف
عضت على شفتيها بوجع وقهر / ليش يوم دخل ما طردته قعدت تسولف معه عادي
الجدة تنهدت بوجع / نفس ها السالفة صارت لها عندنا لكن انتي اليوم ربي سلمتس
استغفلتنا كلنا ومثلت علينا وصدقناها وحنا بشر ما نعلم الغيب مالنا غير الي نشوفه
لين جا ذاك اليوم الأسود لقوها هي وولد جارنا وقال عنها سوالف يعجز لساني ينطقها وصارت المصيبة
الي راح ضحيتها ابوتس وحمد الله يرحمه وولد جلال الي لبسته جريمة ماله دخل بها عجزنا نطلعه منها
هذا هو له سنين مسجون ما يدرى وش اخرها
مضاوي ببكاء مرير / هذي ماهي ام هذي لعنه وشر
الجدة / ماعليتس منها هذا درس لتس وانا امتس لا تأمنين لأحد اهم شي مستقبلتس ودراستس محد نافعتس
وقبلها حطي طاعة الله والخوف منه بين عيونتس وامتس لاتردين عليها غير مارديتي
اردفت / مالومتس انها خدعتس كلنا قبلتس انخدعنا بها
زفرت بوجع واسف / والله لو ما مسكوها مسك اليد والصور المخزية شفناها بعيونا أنى انا يلي قدامتس ما اصدق عليها
حمد الله يرحمة بغى ينجن يعلمنا يوم طلع من التوقيف يقول يوم لقيته عندها يقول هي مستدرجته وغيره واجد ماهو بس هو
اردفت بأسف/ ما قلت لتس كذا الا ابي تبعدين عنها الله يكفينا شرها قد ما تقدرين ابعدي
وبتحذير شديد اللهجة/ نصيحتي لتس وانا فوق الأرض والا تحتها الدرب الي به شبهه لا تمشين به لوكل الناس تمشيه
اردفت وهي تمسك بيد مضاوي بحزم وبنبرة تحذير / كلامي حطيه قدام عيونتس مستقبلتس لا تجاملين أحدعليه واهلتس لاتطاوعين احد فيهم
يجي غريب يبي يستدرجتس و يبعدتس عنهم
اهلتس هم منتس وانتي منهم الغريب يضحك معتس يومين ثم يضحك عليتس
وسمعتس انتبهي تشوبها شايبه خلي راستس دايم مرفوع انتي بنت حزام بن عاصف
لاتعطين احد مجال حتى مجرد شك يشك فيتس
حطي اصبعتس بعينه وانتي واثقة من نفستس وقوي حبالتس مع الله ان خذلوتس الناس الله سبحانه وتعالى مايخذلتس
مضاوي المنهارة تمسح دموعها / توبة ياجدة توبة ما عاد فيه الا مستقبلي وسمعتي احافظ عليهن وما اعصي ربي ولا اخالف اهلي
الجدة / وهذا الصح والي صار ما ابي لابعيد ولا قريب يدري فيه لا قالو ولا قلنا وانا امتس
لو يطلع طرف علم من الي صار خلق الله ماهي راحمتنا ولا راحمتس من الاشاعات والاذاعات الفاضية
الجدة با الم / يابنتي جدتس سعد عقب الي صار على شان خاطرتس حاول يغطي قد مايقدر عليها وكلم خالها جا واخذها لديرتها
لكن مدري وشلون قدرت ترجع وحلف علينا واقسم لاكبير ولاصغير يجيب طاري ها السالفة وندفنها مع حمد وحزام الله يرحمهم
وبعطف وحنو/ كل هذا على شان خاطرتس يبي السالفة تضيع مع الأيام ومحد يذلتس بسببها
اردفت بنبرة حازمة / وافهمي وحطي كلامي بعقلتس واحفظيه مهما حبوتس الي حولتس محد يحب مضاوي ويحرص عليها مثل مضاوي
مضاوي تضم الجدة / ابشري يا أغلى ام وجدة بالدنيا حتى رقمها الحين بعطيها حظر واحذفه وبقول لجدي يغير رقم شريحتي
نامت وهي تنظر لتلك النائمة با امتنان انها لم تحمل يوم هم شيء وهي تستند بعد الله عليها
.
.
.
فتحت عيناها على صوت الخادمة / شوفي ماما
جلست مرعوبة / بسم الله وش اشوف
ضغطت على جبينها / نمت ما حسيت بنفسي
الخادمة / اسمع صوت ماما يتكلم
الجدة تتحرك بهمهمة
وقفت مضاوي بسرعة واتجهت لسرير الجدة وانصتت بتركيز
الجدة تحرك رأسها وتعدد اسماء ابنائها بصوت ضعيف لا يميز ما تقول الا من يعرف أسمائهم / جلال فهد مساعد سلطان سعاد نواظر حمد
استدعت مضاوي الممرضات بجرس التنبيه
مضاوي للخادمة / بسرعة عطيني جوالي وعباتي وطرحتي
تدخل الممرضة وتفحص الأجهزة
مضاوي للممرضة / امي انتكست انا عارفة استدعي الدكتور المناوب بسرعة
اتصلت مضاوي بفهد / مرحبا عمي
فهد بنعاس / هلا مضاوي عسى ماشر
مضاوي / جدتي تعبانة مره كلم جدي والعيال وتعالو
فهد بخوف / لا يكون امي
مضاوي تحاول ان تتماسك / لا لكن وضعها ابدا ما يطمن تعالو بسرعة
فهد با استعجال / طيب طيب مسافة الطريق انا جاي
مضاوي / امانه معك جدي يجي
فهد / ما يمديني اصحيه بوصي العيال يجيبونه يا الله انا جاي
.
.
.
بعد نصف ساعة وفي منتصف الليل
تقف مضاوي امام غرفة العناية المركزة تنتظر
فهد ومساعد اول الواصلين
فهد برعب / علمينا وش صار
مضاوي تفرك يديها بقلق وتوتر / مدري حسيت وضعها مو طبيعي واستدعيت الدكتور المناوب
وعلى طول حولها العناية
مساعد با استفهام/ طيب ماقالو شي
فهد يزفر بقلة حيلة وينظر لساعته / المشكلة من نسأل كلها دكاترة مناوبين وباقي وقت على بداية الدوام
مساعد / انا ماني جالس انتظر بنزل تحت اشوف ادور أحد نفهم منه وش فيها
لحظات والجد سعد وجميع أولاده واحفاده حاضرين ماعدا ثامر
مضاوي امسكت بيد الجد وبكت / جدتي تعبانة مره
الجد وضع يده على كتف مضاوي وبطمئنه / ما فيه غير الخير ان شاء الله
الله يعينها جاها من الامراض ما كفاها
أردف / تعدي ان شاء الله تعدي
جلس الجد على كراسي الاستراحة وبجانبه مضاوي ومازالت تمسك بيده
مضاوي بهمس / جدي ادخل عند جدتي شفها
الجد بحزن/ انا داري من طلبتيني انها مخطره
مضاوي / امي الجلطات انهتها وابيك تشوفها والاعمار بيد الله
الجد بوجع واستسلام / يهونها الله يابنتي يهونها الله
لحظات ارتباك في غرفة العناية بين الممرضات والدكتور امام انظار الجميع
التقطت عيون مضاوي الخطر القادم دخلت بسرعة للغرفة
الطبيب بغضب / من سمح لهذي تدخل هنا
مضاوي تقاطعه/ دكتور انا دكتورة مثلي مثلك لكن المريضة هذي امي
والي واقفين قدام الغرفة كلهم عيالها وانا عارفه وضعها
الدكتور / كويس اجل سهلتي علينا توصيل الخبر
الوالدة وقفت عندها معظم الأجهزة الحيوية ساعات معدودة تفصلها عن الوفاة
الدكتور يغادر المكان
مضاوي ترسل رسالة سريعة لفهد (دخل جدي بالحالة لغرفة العناية)
لحظات ودخل فهد لوحده
وبذعر / وش فيه العيال مجتمعين على الدكتور يستفسرون منه
مضاوي تمسح دموعها المنهمرة وتتصنع الشجاعة / الدكتور ما راح يعطيهم علم كلامه بيكون طمأنة بس
اردفت بحزن /أرسلت لك بغيت جدي يشوفها بلحظاتها الأخيرة
جدتي خلاص توقفت عندها معظم الأجهزة الحيوية
انهمرت دموع فهد ومسحها بطرف غترته استجمع قوته وتماسك وخرج لوالده ودخل معه وهو يمسك بيده لغرفة العناية
تقدم الجد لسرير الجدة وامسك بيدها / الله يبيح منتس ويسامحتس يا ام جلال الله يشهد أنى راضي عنتس الله يرضى عليتس
مضاوي تمسح دموعها من ورى النقاب وتلتفت لفهد / عمي اطلع للعيال هدهم شكلهم سوو مشكلة مع الدكتور
خرج فهد
في اثناء ذلك نادت الممرضة الطبيب دخل وبعد لحظات
الطبيب / البقاء لله
مضاوي تمسكت بيد الجد الذي هو بدوره تمسك بيدها كل منهما يستمد القوة من الاخر لا يريدان ان يوضحا انهيارهما الخفي
خرج الطبيب وأخبرهم بالوفاة وغادر ليرى حاله أخرى
دخل جميع أبنائها واحفادها للغرفة مذهولين من خبر الوفاة وللموت رهبته
ظلت مضاوي بجانب الجد تبكي بصمت
غالب الجد عبراته واستدارلها واحتضن كتفها / انا لله وانا اليه راجعون اللهم اجبرنا في مصيبتنا واخلف علينا بخيرآ منها
تماسك الجد وبثبات ومسح دموعه التي غطت لحيته والتفت الي أولاده واحفاده /جمعتكم هذي مامنها فود والصبر عند الصدمة الأولى استرجعو واطلبو من الله الصبر
خرج الجميع والحزن يحني اكتافهم تتبعهم مضاوي وحيدة تقدم الجميع وتأخر الجد
الجد / يا الله يابنتي ماعاد لتس حاجه هنيا كفيتي وفيتي الله يبيض وجهتس
أردف / بنرجع مع بدر
مضاوي ببحة البكاء / بروح للجناح اجمع اغراضنا خليت الشغالة هناك نسيتها مع الي صار
الجد / على خير اجل الحين اذن الفجر بنلحق الصلاة يمديكن خلصتن شغلكن
.
.
.
مرت أيام العزاء برهبتها ووجعها
بعدها بأسبوع
مازال الحزن يخيم على جميع بيوت العاصف
بعد العشاء في بيت الجد
شروق تهمس لمضاوي / ما توقعت عمتي نواظر تنهار كذا
مضاوي / ترى عمتي داخلها غير الي حنا نشوفه مالها قلب
اردفت / شفتيها يوم غسلنا جدتي طاحت كم مره مغمى عليها عمتي سعاد صارت اقوى منها
شروق بحزن / يا قرادة حظي الي جدتي توفت صبح عرسي
مضاوي / هذا يومها وش دخل حظتس يعني لو ما تزوجتي جدتي بتعيش
بكت شروق بحرقه وضمتها مضاوي المتماسكة خارجيا ومنهارة داخليا
دخل الجد يتوكأ على عصاه جلس امام نساء العائلة
الجد / ماقصرتو يابناتي وام جلال مهي رخيصة عند كل من عرفها
وكلن تأخذ بناتها وتروح تشوف بيتها وعيالها جلسوكن عندي ما هو مرجع شي
تلتفت الجد/ وين سعاد ونواظر ما اشوفهن
نورة / بغرفة عمتي
وهمت بالوقوف / انا ديهن لك
الجد/ لا انا أروح اشوفهن
ذهب الجد الي غرفة الجدة
فزه بعد مغادرة الجد بتأثر وتعجب / أحس عمي كبر عشر سنين مره متأثر وحزين
نورة بحزن /شريكة حياته اكيد بيتأثر
رفعة بلامبالاة / كم لها وهي على فراش المرض الموت للي مثل وضعها أحسن له
نورة با امتعاض من اسلوب رفعة/ أهلها يبونها ماهم مرخصينها حتى لو انها على فراش المرض
صمتت وكتمت بصدرها وجع خفي وغصة ستبقى للأبد على اثنان رحلا دون ان تودعهما
.
.
.
في غرفة الجدة
وقفت سعاد مرحبة بوالدها / هلا يبه
نواظر اسرعت للجد واحتضنته وبكت
مسح الجد على راسها بحنو / افاا وانا ابوتس هذا وانتي بنتي المتعلمة تجزعين كذا
أردف باالم وحسرة / والله يابنتي امتس شافت ما كفاها الله يعوضها الجنة
كم لها وها الأجهزة معلقة بكل مكان من جسدها ما بقى بها عرق ماشكى
نواظر بكت بحرقة وعضت على شفتيها/احس قلبي محروق ما شبعت منها
الجد/ الحمدلله يابنتي ماقصرتن معها لكن الحين ماتبي منكن الا الدعاء ما هو نافعها حبستكن بين اغراضها
التفت لسعاد / يمه سعاد
سعاد / لبيه
الجد بوجع / نادي البنات والا حريم اخوانتس واجمعن عفوش امتس
خلاص يابنتي وش تبقى له لفوها وشوفو أحد يستفيد منها لا تبقون شي والحي وانا ابوتس ابقى من الميت
.
.
.
اليوم التالي صباحا
في مجلس الجد
الجد / ثامر وشلون شغلك عساك مرتاحن به
ثامر / الحمدلله ماشي الوضع
سلطان / الشغل بالشركات الشي المتعب فيه فترات الدوام طويلة
ثامر / بالعكس هذا الي مريحني يومي كله مشغول
مساعد / الحين تقول الكلام هذا لكن بعد ما تتأهل يتغير الوضع تمل
فهد / الوقت ما عاد به بركة يبدا اليوم وينتهي ما تحس فيه
الجد / ريسك بالشغل يمدحك ما شاء الله يوم جا يعزي سألته عنك
ثامر يبتسم / يبالغ ياجدي توني مستلم الشغل ما يمدي على شانه صديق عمي فهد اكيد بيمدحني
فهد / لا تستنقص من نفسك تراك ما شاء الله عليك جيد
اردف با استفسار / خلصت اوراقك ترى مابقى شي على الدراسة
الجد با استغراب / وش دراسته ما تقولون خلص وشهادته طيبة
سلطان يضحك/ الا ما شاء الله عليه لكن تعرف فهد ما يشبع من قولة ادرسو وده الكل يدرس
فهد بممازحة / انا لو في يدي حتى ابوي يدرس للحين
ثامر / لا والله عمي ما فضيت للحين لكن في راسي خطة لطريقة دراستي ان شاء الله بمشي عليها
فهد / على خير ان شاء الله
مساعد يلتفت لفهد/ متى دوامك
فهد/ بكرا ان شاء الله وش عندك تسأل
مساعد / لا ابد سلامتك واحد من زملاي يبي واسطتك ولده عسكري يبي ينقله لرياض وإذا ما نقل بيقدم فصل
سلطان بممازحة / يويلك يا بوبدر لو ما مشت واسطتك
فهد بحدة / الحين يوم الولد سجل عسكري وانقبل وكل شي خلاص
ليش ما يجلس بالمكان الي جا تعيينه فيه ليش يبلش نفسه وأهله وهو الي مختار طريقة
أردف با امتعاض /وأسلوب الواسطة كله ماا احبه
مساعد با استنكار وامتعاض عقد حاجبيه / سبحان الله يوم كان الموضوع لولد اخوك مشيت له بواسطة والحين تتهرب
فهد بتذمر/ ثامر ترى الي وظفته شهادته وعليهم المنه بعد يستاهل شي أكبر وبعدين وش اتهرب
قاطعة الجد / انت سو الي عليك وانا ابوك وإذا ما قدرت حيل الله اقوى
فهد يزفر بقلة حيلة/ يابيي المشكلة العالم تعطي لبعض الأشياء أكبر من حجمها وإذا شافو الحقيقة زعلو
مثل موضوع ولد زميل مساعد بكلم له ناس إذا في مجال لنقلة لكن لو ما نقل بتصير زعلة بين مساعد وخويه
التفت لمساعد / اقل كلمة بتسمعها اخوك الي ما فيه خير بيده ولا سوى لنا شي
سلطان / اكيد بتنقال رضى الناس غاية لا تدرك
ثامر التفت للجد با استفسار/ جدي اشوف شنط واكياس مالية الحوش
الجد / هذي أغراض جدتك الله يرحمها قلت للبنات يجمعنها ويتصدقن بها
بنياتها كل ما دخلن غرفتها شافنها وتجددت احزانهن
وقف ثامر وتفقد مفاتيحه وهاتفه / الله يعين ويجبر كل مكسور
اردف وهو يقبل رأس الجد / يا الله استأذنكم بمر اخذ اغراضي من ملحق بدر وبطلع الخرج
فهد/ تو الوقت خل مشيتك بالليل تعشى وامش
سلطان بممازحة / يمكن ما جازت له جلسة الشيبان
ابتسم ثامر / لا والله انتم الخير والبركة بس في أشياء الشباب بالدوام محتاجيني فيها بروح اشوفها
الجد / العيال وينهم ما اشوف منهم أحد
ثامر / اكيد الي طالع دوامه والي نايم
نظر لساعته وأردف / تو الوقت الساعة عشر
الجد / اجل وانا جدك تيسر الله يحفظك ولاتسرع
سلم على اعمامه وغادر
التفت مساعد لوالده / يبه فاتحت مضاوي بزواجها من ثامر
الجد بغضب / هو وقتها سالفتك ذي
فهد بملامة / ابوي صادق امي توها متوفيه ومحد فاضي لها السوالف
مساعد التفت لفهد بعصبيه/ وانا وش قلت عيب والا حرام والا معجبك ثامر تارك بيت ابوي ومندعس بملحق بيتك من توفت امي وطلعت مضاوي للبيت
سلطان با انتقاد / اجل وين تبيه يجلس بيت ابوي للحين يستقبل المعزين
مساعد اعتدل بجلسته و بقهر وانفعال حرك يديه / يا ناس انتم مدركين وضع مضاوي بينا
تراها بنت عمنا افهموا لا هي اخت ولا بنت أخو ولا بنت اخت والا حتى بينا رضاعة مالها الا ابوي محرم
والله لو تطيح والا يجيها شي ان محد منا يقدر يقرب لها غير ابوي
أردف / أقول بس أعجل يبه بزواجها ثامر والا غيره
الجد بأسف حرك رأسه / كل كلامك صحيح لكن يا ولدي والله مالها أصلح من ثامر وهي معانده ما تبيه
سلطان / يبه إذا ما تبي ثامر خلاص في خيارات غيره أي أحد يخطبها لا توقف بطريقها
وفهمها جلوس بدون زواج ما يصلح
فهد / المشكلة انها رافضة الفكرة جمله وتفصيل انا مرسل لها البنات يشوفن وش عندها
مساعد / عندي خبر علمتني سناء قالت تقول انها متزوجة دراستها
وبتعجب امال فمه / بالله هذا كلام اداميه عاقلة
الجد / ما عليه يبي لها مسايس وما ابي اضغط عليها ابيها توافق مقتنعة
وإذا ما وافقت على ثامر الشكوى لله
نشوف إذا الله جاب لها رجال يخاف الله ماعاد انا رافض الي الله يهداها عليه هو الزين
مساعد / يبه هذي عنيدة وراسها قوي والله ما تمشي بالحسنى
ومهو على كيفها نتركها هذي شوفتنا وشعر وجيهنا
فهد بملامة / خلاص يا مساعد لا تشوف ابوي ساكت تراك اوجعته
الجد زفر بقلة حيلة / مساعد ما قال الا الصحيح مضاوي وضعها رمحن بصدري منين ما جيت ابي اسحبه اوجعني
سلطان / والله أنى استغرب رفضها لموضوع الزواج كله
خصوصا هي بنت ذكية وما ينقصها فهم ما فكرت ان مالها الا ابوي الله يطول بعمره
لو غيرها وافقت على أي أحد من ها الخطاب الي دايم يكلمون ابوي
فهد / انا فاهم وش بمخها البنت عبقرية دراسة وطموحه وخايفة من الزواج انها تاخذ واحد ينشب لها على دراستها
وجا مرض امي الله يرحمها وهي متعلقة بها ورافقت معها
يعني ما بعد حست بحاجتها لزواج
الجد / اي والله انها متعلقة با امكم الله يرحمها لكن عاد بشوفها بعد كم يوم وش عندها
أردف الجد / وش باقي على فتحت المدارس
مساعد / ما عاد باقي شي اقل من شهر على عودة المدرسين
فهد بممازحة/ سلطان بيفقد التبطح
مساعد يضحك / ابشرك بيقدم تقاعد مبكر
سلطان / يا رجال خلنا نرتاح الواحد من يوم عمره سبع سنوات وهو يكد لين يموت
والحمدلله خدمتي بمجال التعليم كويسة
الجد / وش تسوي خلق الانسان في كبد
مساعد/ والله سلطان انه ماينلام التعليم ماهو على خبرنا
الطلاب مشاكلهم شي ماهو معقول اعوذبالله
من غير التعاميم الي توصلهم كل تعميم يغثك أكثر من الي قبله
سلطان/ انا ما أدرى وين المشكلة اول تعليمنا ودراستنا بسيطة ومع هذا الطلبة ينجزون
والمدرس يحس انه قام بواجبة
الحين استراتيجيات وغثا ولا شفت الي فالح اقلها بالإملاء خل عاد المواد الثانية الا من رحم ربي
فهد / يابن الحلال احمد ربك ام أنور تقول وقت المدارس يومها كله يروح بحث عن استراتيجيات جديدة لطالباتها
الجد / كلن له وقته وانا ابوكم
نظر لساعته وهم بالوقوف / يا الله مابقى على دخول وقت صلاة الظهر شي
.
.
.
بعد مرور أسبوع على الأحداث السابقة مرت الايام لا جديد
سوى من بعض المعزين الذين سمعوا بوفاة الجدة بعد فترة او حضروا من اماكن بعيدة لتعزية
بعد صلاة العشا في صالة بيت الجد تجلس مضاوي والجد
مضاوي بممازحة / الحمدلله اليوم جدي جدولة فاضي
الجد با ابتسامة / محد فاضي لي وانا ابوتس خلق الله تركض ورى اشغالها
أردف / جهزتي لدراستس ناقصتس شي
مضاوي / لا عسى عمرك طويل ما ناقصني شي
خلاص السنة هذي امتياز
الجد / انا والله ظنيتس تخرجتي لين علمني فهد قال باقي لها السنة ذيا
مضاوي / لازم السنة هذي عشانها مكملة لدراستي وما اعتبر مؤهله للمهنة الا بعد ما اتمم الفترة وانجح فيها
يعني تطبيق لدراستنا السابقة كلها
الجد / وعسى مهي صعبة عليتس
أردف بشفقة/ والله راحت عيونتس من المذاكرة
مضاوي / لا ما هو صعب أسهل من السنين الي راحت الي الصعب كان اختيار التخصص
الجد / وانتي عاد عارفة امورتس ان شاء الله ولا اوصيتس وانا ابوتس با الاستخارة ثم الاستشارة لاتمشين على عماتس
مضاوي ابتسمت / أي جدي من زمان تخصصت طب عيون الحين بنتك بعد التطبيق بتمارس المهنة وتصير دكتوره رسمي
الجد ابتسم با استغراب / وش عندتس على طب العيون
ابتسمت مضاوي با الم / امنيه بداخلي وقلت بحققها
الجد / الله يهونها ويعديها عليتس بخير وسلامة والله أنى شايل همتس
مضاوي تبتسم بحب / ياعساني ماذوق حزن الي شايل همي
الجد ابتسم لها بحنو/ إذا الله طول بعمرتس تبين تذوقينه ما عاد بقى كثر الي راح
مضاوي برعب / عسى يومي قبل يومك
الجد بعطف / لا تدعين يابنتي على نفستس
وبيقين هز رأسه / هذا شي بيد الله ماهو بيدينا لو بيدينا ماراحو حزام وحمد وجلال قدام عيوني وهم انولدو على ايديني
مضاوي بحزن/ الله يرحمهم ويغفرلهم ويرحم جدتي ويبيحها
الجد / امين
أردف بحسرة / والله يابنتي الموت ترى وجعه مهو على الميت الموت يوجع الحي
وانا والله اكلت من ها الدنيا ما كفاني شين وزين
ولو نوخ ركايبه عندي الحين ماني شايل غير همتس وين تروحين
مضاوي بحزن / بسم الله عليك يا جدي لاتقول كذا ولا تشيل هم والله مايضيع خلقه
الجد / والله أدرى لكن حنا ما نعلم الغيب ولا ندري وش يصير علينا بكرا
ويوم جا مجال لسوالف ودي بسويلفه اقولها لتس وراي اشور به عليتس
مضاوي بقلق/ قل ياجدي اسمعك
الجد بحيرة وتردد / سالفة زواجتس يابنتي انتي ما انتي صغيرة عمر
عمرتس قدامتس تناصفتي العشرين والأيام تركض
مضاوي بمقاطعة وبرجاء/ جدي تكفى ثامرالجلال ما ابيه
الجد يتنهد / ماهو لازم ثامر وما تغصب نفس على نفس
انا ابي ازوجتس على عيني وانا حي قبل تغيب عيني وتخاطفتس الناس
ما تدرين من انتي بيده
والله أنى صاد عنتس شي ما يعلم به الا الله
مضاوي / جدي يعني ها الزواج كله وش ابي اطلع منه فيه
الحمدلله ما عاد باقي لي شي وأخلص ووظيفتي ان شاء الله مضمونة
الجد بملامه / انتي تحسبين الزواج فلوس ومن يصرف عليتس والله لو مادرستي
الحمدلله مالاحقتس جوع ولا عرى حنا ناس ماحنا عاد من الناس الي تملك ملايين
لكن مع عافية الله الحال مستور ومن الله ميسور
الزواج أمان للبنت وستر والزوج الصالح ظهر تستند الأنثى عليه بعد الله
مضاوي / ياجدي السند بالحياة بعد الله الوظيفة وراتب يغنيك عن الناس
هذا عمتي سعاد وش حصلت من الزواج لوما وظيفتها كان حالها الله اعلم فيه
وش نفعها سند عبد اللطيف
الجد / سعاد موضوعها غير واختيارنا له من الأول غلط
لكن الله يصلحها عصتنا وافقت عليه وحذرتنا الناس منه لكن غرها زينة وعرض كتوفة
مضاوي با ابتسامة / انا توقعت عشان أخو ام ماجد
الجد با اسف / ويمكن بعد عشانه اخو رفعة والحريم زينن الموضوع وخلصنه بسرعة
وبتعجب اشار بيده / لليوم ما أدرى وشلون لفو راسي وراس ام جلال الله يرحمها وعطيناهم
وقلنا ها السوالف يمكن اشاعات وأول ماهو مثل الحين الحين كل شي مكشوف للعيان
وتدري بخويك لو انه من ورى قندهار والا قبل كل شي مستور الا الي بيفضح عمره
مضاوي / ما عليه جدي ان شاء الله عيالها يعوضونها وهو اسم ظلال رجال على عياله
بعد عمتي سعاد يحسب لها ما شاء الله عليها صبرها على الي جاها من اهله
الجد / ام أنور اجودية وتستاهل لحية اطيب من لحيته
وقلت لها يوم معها أنور كبيه وخليه يويلي
كل يوم جايتنا سالفة من تحت راس رفعة وامها الله يهديهن
قالت ما افرق ولدي عن ابوه وهو مصيره بيطخ ويعقل واهله ماعلي منهم
مضاوي بحسرة / ومرت السنين وأبو أنور على طبعه واهله ماتغيرو
الجد / الحمدلله اكرم الله بنتي بعيال ما شاء الله عليهم دين وصلاح الله يثبتهم
وعبد اللطيف الله يهديه ويكفيه شر نفسه
مضاوي ابتسمت / جدي اسهرتك اليوم وانت متعود تنام بدري
انا للحين على جدولي مع جدتي الله يرحمها
الجد با امتنان / بيض الله وجهتس ما قصرتي معها لين وصلت قبرها
مضاوي زفرت بحسرة / يعني انا وش سويت لو قدرت اقاسمها المرض اخذت عنها
والله ما الحق جزاها لين اموت ضفتني وربتني
مضاوي غلبتها دموعها / والله ما حسيت الا انها امي الي جابتني وان فقدها كسر قلبي كسر
ليتها بقت لي بها الدنيا لو انها على فراش المرض راضية
الجد بحزن / محد مخلد بها الدنيا والمنايا تخطف الشباب المتعافين وشلون عجوز نخر عظامها المرض نخر
وهذا طريق كلنا ماشين عليه زعلنا والا رضينا
الموت برقاب العبيد الحظيظ الي اعماله تزين
أردف الجدبا ابتسامة ود / وانا طالبتس وانا جدتس تفكرين وتستخرين
مضاوي بمقاطعة /جدي تكفى لاتقول ثامر
الجد بيأس نفض يده / يابنتي ماهو لازم ثامر هونا عنه
اردف بمسايسة / غيره واجد انا ما ني تاركتس وراي بدون زواج
مضاوي برجاء/ جدي لا تعيد سالفة اتركتس تخوفني
الجد / وهذا الي انا ذال منه من اخليتس له
والله لو حزام على راستس ما لحيت عليتس لكن امر الله مالنا حيلة
ابي ازوجتس على عيني وماني مرخصتس لا والله لكن العمر يمشي والأيام مثل ما انتي شايفة السنة تمر تسنها أسبوع
يجيتس ضنى اول عمرتس يكبرمعتس وانتي الحين شباب تخيرين من ما بغيتي
لو تقدم بتس العمر مايجيتس الي على هواتس
وإذا قصدتس ثامر انا سافطة مسافيط لتس
مضاوي بنفور مطت فاها/ لا تزعل ياجدي ثامر هذا من الله أكرهه ونفسي والله ما متقبلته حتى إذا جا في بالي ان قلبي يوجعني ما أدانيه
اردفت بوجع/ يعني تحسب خاطرك هين عندي لا والله أنى فكرت وفكرت وقلبتها براسي عجزت اتقبله وانت مصر عليه ما أدرى ليش انا بالذات
البنات واجد لو تخطب بتلقى له
الجد بمودة/ وانتي بعد تحسبين خاطرتس هين عندي والا انتس رخيصة
انتي الي بقى لي من اهلي يامضاوي لا تقولين جدي له عيال واحفاد ترى كلهم بكفه وانتي بكفه لحالتس فايزة عليهم
وبوجع وحسرة على ذلك الغالي الذي رحل بريعان شبابه دون انذار / انتي بنت حزام الغالي ولدي قبل عيالي وأقرب لي منهم الله يرحمه ويعفي عنه
ماعابه الي صار بوجهه وانه ارجل من مية رجال ولا تحمل نظرة الناس له ساعة وحدة يوم هاك المصيبة صارت
ذبح نفسه ولا يشوف بعيون الناس المهونة
الله يتجاوز عن ذنبه ويغفر له
مضاوي بوجع / اللهم امين
الجد امسك لحيته وبمسايسه / انا يوم ابي ثامر لتس وش تظنين بلحيتي هذي
مضاوي / محشومة لحيتك عن كل ردى
الجد / ثامر رجال يرتكى عليه وحبيب وباله وسيع وعاقل
مضاوي بنفسها / بلاك ياجدي ما تعرف وقاحته
الجد / ولحمتس ودمتس يابنتي لحمك ان ما حبك رحمك واتطمن انا عليتس معه وأحسن من الغريب
اردف بمحاولة اقناع / اذا جا من ثامر زله والا خمال بحقتس لنا يد عليه نزعلة ونرضيتس وهو ولدنا وانتي قدام عيوني تروحين وتجين علي ما تبعدين
لكن الغريب لو ازعلتس مالنا يد عليه نصير معه ضدتس حتى لو هو غلطان
ويبعد بتس عني ما اشوفتس كل مابغيت
يردف الجد بضحك ويمسح لحيته / وبعدين وليدي مزيون مثلي
انتي ماتقولين ما اخذ الا وأحد يشبهك جاتس الي يشبهني وانتي اخلفتي قولتس
مضاوي بتردد / والله مدري وش أقول ياجدي
الجد يمسك بيد مضاوي بعطف / الحين لا تقولين شي استخيري الليلة
ووزني الأمور بعقلتس وانا خابرتس عاقلة
زواج لابد من زواج ماني تاركتس انتي امانة برقبتي
ما ابي اواجه ابوتس الا وانا متطمن عليتس ثامر والا غيره
نظر الجد لساعته / الساعة عدت عشر أخرت نومتي على شانتس بقوم اوتر وانتي مثل ما وصيتس
غادر الجد الي غرفتة وترك خلفة مضاوي تصارع افكارها خرجت لسور المنزل
وجلست على إحدى الكراسي الموجودة حول طاولة من الرخام اعتادت الجدة ان تجلس عليها
مضاوي بنفسها / يا الله كنها البارحة وانا وامي بنفس المكان
.
.
.
قبل اربع سنوات
الحادية عشر ليلا
مضاوي تبكي بغرفتها دخلت عليها الجدة
الجدة برعب تمسك بكتفها / بسم الله عليتس وش فيتس الشغالة روعتني تقول انتس تبكين
مضاوي بقهر / راح علي الوقت وعندي بكرا اختبار صعب ما ذاكرت له زين راحت علي نومه
نظرت الجدة لساعتها / توالوقت عيني خير قومي تروشي وانفضي الكسل عنتس
صلي ركعتين واطلبي ربتس والحقيني للحوش بقول لشغالة تزين لتس عشا من جيتي الظهر ما ذقتي العيشه
بعد نصف ساعة
الجدة ومضاوي حول الطاولة التي بالسور وامامهم صينية اكل
الجدة / يا الله تعشي وعقبها افتحي دروستس انا معتس ليل ساري لين تخلصين مذاكرة
مضاوي تقف وتحضن راس الجدة وتقبله / يابعد قلبي ياجديدة مدري وش اسوي من غيرتس
الجده تضحك / اتركي عنتس الجوارة تعشي وذاكري
اليوم التالي عادت مضاوي من الكلية ودخلت للمنزل
الجدة تنتظرها بقلق / هاه بشري وش سويتي
مضاوي تحضن الجدة وبفرح/ الحمدلله اختبار اليوم أحسن اختبار
الجدة تنفست با ارتياح / الحمدلله اجل بروح ارقد قبل يأذن العصر دايخة
مضاوي بخوف / تونسين شي
الجد ه با ابتسامه ود/ لا والله مافيني غير العافية لكن مانمت من أمس ضاق صدري عليتس
تعود مضاوي من ذكرياتها على صوت رنين هاتفها / / هلا عميمه
سعاد / لا يكون نايمه وصحيتس
مضاوي / لا والله لانايمة ولاشي جالسة بالحوش بالمكان الي انتي خابرته طفشانة
سعاد بحنين/ مكان امي جعل مكانها بجنات النعيم
اردفت / وانا اطفش منتس والاسبوع الجاي عودة المدرسات والدنيا خرم ابرة الله يجيرتس
مضاوي بممازحة / تعالي وانا أخليها لتس قمرا وربيع
سعاد / يا الله جهزي القهوة والشاي ونخليها صباحي والله يعينا على ابوي إذا لقطنا ما يداني السهر
مضاوي / ابشري ماعليتس إذا قرب يصحي صرفنا عمرنا
سعاد / اجل بقول لأنور يوصلني
مضاوي بتهكم/ انعديتي من ريما
اردفت بضحك/ لو تنقزين على رجل وحده على قولة جدي امداتس وصلتي
سعاد / يا الله عن الهذرة جايتس
.
.
.
بعد ربع ساعة في سور بيت الجد سعد
مضاوي ترتب القهوة والحلى على الطاولة / يازين ها الليل الي ذكرتس فيني
سعاد وهي تطوي عبأتها وطرحتها وتجلس / يا نصابة العصر وانا ما رتكم
مضاوي بممازحة / انا الي ما يتعنى لي ما عدها زيارة
اردفت / العصر لجدي كانت جيتس
سعاد تتنهد بوجع / يا بعد زولي زوله
مضاوي تمد فنجان القهوة لسعاد / اللهم امين
يا الله تقهوي وعلميني وش عندتس ها التنهيدة وراها شي كبير
وضعت سعاد الفنجال على الطاولة ووضعت يداها على وجهها وبكت / ضايقه فيني الوسيعة
تقف مضاوي وتحضن سعاد / تكفين تراني والله على جريف ادور الي يهيضني من عقب جدتي وانا والله ما اداني البكا
سعاد تمسح دموعها / والله امي ارتاحت انا ألي ما ارتحت
مضاوي بترقب وخوف /صاير شي ماندري عنه
سعاد بتهكم موجع / الي صاير أنى حامل
مضاوي وضعت يدها على فمها بذعر / وش تقولين كيف وشلون انا ماحذرتس
سعاد بسخرية/ عاد هذا الي جاتس
اردفت/ طلعت للمستوصف الي ورانا قبل يومين أحس حيلي مهدود توقعت نقص فيتامينات
صلحت تحاليل شاملة ومن ضمن التحاليل تحليل حمل روتين عندهم
حتى ما طلبته واثقة ما في حمل كلموني المغرب اخذ النتيجة وانصدمت من الخبر
بكيت لين نشفت دموعي وما طرى الا انتي اشيلتس هم فوق الهم الاول
جلست مضاوي على الكرسي وزفرت بقلة حيلة / لاحول ولاقوة الا بالله يا بنت الحلال يعني انتي متعمدة تغثيني
انا الي كشفت موضوع رجلتس بنفسي
اردفت بقهر / حسبي الله عليه ونعم الوكيل
والله اسمع بهم الي لا ينشكى ولا ينبكى لين شفت رجلتس
سعاد بتذمر / ما عاد يفيد لا شكى ولا بكى انا ابي حل لها المصيبة
مضاوي / الحين الخوف ان وضع الرحم عندتس يأثرعلى الجنين
بنشوف إذا تقدرين تنزلينه قبل تنفخ فيه الروح
اردفت / كم قالو لتس أسبوع
زفرت سعاد / 14 أسبوع
مضاوي تصفق بيديها بذهول / اكثر من ثلاث شهور خلاص تكون
وبا استنكار / شلون توتس تدرين ياربي ماحسيتي بوحام يوم تأخرت الدورة
سعاد بوجع / وين احس من مشاكلي مع اهله توقعته قولون
والدورة قلت يمكن بدت تضطرب عشان تنقطع
مضاوي / وش تنقطع توتس صغيرة
سعاد / وين صغيرة عمري 45 سنة وش بعد تبين
مضاوي / الدورة الي مابعد الخمسين ماهو عذر هذا
الحين لازم لتس متابعة نشوف وش بيصير
اردفت بحزم / ما ينفع كذا من بكرا تحاليل شاملة بمستشفى حكومي الأجهزة متطورة أكثر
وبسألك عن استشاري ممتاز
سعاد / الله يعينتس علي مشيلتس همي من اول وتالي
مضاوي / والله همتس ووجعتس محد شايله غيرتس انا وش مسوية يعني
ماعندي غير السوالف
سعاد / وتحسبين بعد السوالف هينه تجي ضايقة فيك الوسيعة
تلقى أحد يسولف عليك ويرشدك لشي غايب عن بالك ويساعدك بحل مشكلتك وتقولين سوالف
مضاوي تتنهد / على طاري السوالف عندي سالفة
تضحك سعاد وهي تمسح دموعها / اكيد انها سالفة كبيرة تخبرين الليل مايجيب الا العلوم الدسمة
مضاوي با ابتسامة حزينة / تذكرين جدتي الله يرحمها يوم تقول احذرن من هروج الليل
تكبن عشاكن وأنتن ماتدرن
زفرت سعاد بقهر وعضت على شفتيها / أي والله وانا وش ورطني بعبد اللطيف الا هروج الليل
نسمر انا ورفعة وتمدح با اخوها لين طار قلبي عليه قبل حتى أشوفه
مضاوي تضحك / ما يقولون الأذن تعشق قبل العين أحيانا
سعاد بتهكم/ لا ابشرتس انا طحت بهن كلهن احفرت براسي رفعة ليت طيحتني
واقعد اترقب زوله مع الشبابيك اتصيد شوفته لين شفته
والي عاد صدق خربتها اما هذا والا فلا
مضاوي / من جدتس وين جداني ماكشفوتس خلي هذولا
طيب عماني وينهم عنتس ما لقطوتس وعمي فهد خصوصاهو الي عاد مايعدي علية شي
ودايم عندنا بالبيت يعني مايمديتس تغيبين عنه
سعاد تهز راسها بتهكم / والله الحريم إذا بغو شي ان يسوقونها على الي أكبر من فهد
مضاوي تضحك / ما اتخيل الا عمي مساعد ماسك رقبتس وهي تومي مع الشباك
والله لا يكسرها لتس ويمكن يحذفتس معه
سعاد تضحك / ليته صايدني وحاذفني ولا ها الزواجه الفاشلة
صفقت بيديها بسخرية / الا ليته فتش كتبي يوم ارسم فيها قلوب وحروف
ومافي قصيدة حب من مجنون ليلى لحد ماوصلت لدايم السيف والملتاع والبدر الا كتبتها وحفظتها
اردفت وهي تخمس على وجهها بيدها /كش علي وعلى وجهي ما دريت هذا اخرها
مضاوي تمسك راسها / استغفرالله اوجعني راسي من الضحك
سعاد / لا وازيدتس من الشعر بيت بغيت ارسب مره با اختبار
علمتني رفعة ان أهلها خاطبين له من خواله والحمدلله ماجت سالفتها الا بوقت كان بكرا اخر اختبار
ورحت للاختبار مدري كيف حليت ونجحت بالمادة على الحفة مدري دفوني
وعقبها شهر كامل وجعانة محد يدري وش علتي
عطلة الربيع راحت علي منسحده حرمت اهلي الطلعة اتخيل عبد اللطيف خلاص بياخذ غيري
مضاوي تضحك / ما على العاشق ملام خفتي عريض المنكبين يطير
اردفت وهي تمسح دموعها من الضحك / تدرين عاد مااقاهرني الا رفعة يومها تعرف اخوها كذا ورى ما انطمت
او اقل شي علمتس بعيوبه
سعاد / خلينا واقعيين رفعة هذا اخوها وتشوف ان الي يسويه طيش شباب
وهي من أنصار زوجو ولدكم ويعقل
هذا انا من تزوجته لنا 23 سنة وهو على طريقة
مضاوي / يا الله والله عمر الله ياجرتس على صبرتس بس
سعاد بحسرة / الي قاهرني ان ابوي وامي مابغوه وخصوص ابوي مره معارض
لكن اقنعة أبو ماجد والا ابوي والله له نظره ما عمرها خابت ليتني طعته
مضاوي / تدرين عاد توه اليوم يقول زواج سعاد مدري وشلون لفو راسي ووافقت
سعاد / لفته قرادة حظي
عضت اصبعها / استغفر الله واتوب اليه
اردفت وهي تمد يدها لأخذ فنجال من يد مضاوي / قلتي عندتس سالفة وش هي
مضاوي بتردد/ هي مهي سالفة تقدرين تقولين طلب نصيحة اواستشارة
سعاد تمد فنجالها لمضاوي / بالأول قهوينا شكلها من جد صباحي
الله يرحم امي يوم تقول سوالف الليل تجر بعضها
يا الله هاتي ماعندتس لا يكون بعد لتس فارس أحلام عاد هنا يمكن انتحر صدق
مضاوي تمد الفنجال لسعاد وتضحك / لا وين راح فكرتس بعيد لو ان المضمون وأحد
سعاد بدهشة / وش المضمون
مضاوي / جايتس بالكلام
اخذت نفس عميقا/ اليوم جدي رجع فتح لي موضوع العرس والله قطع قلبي وكسر خاطري
خصوص انه استسلم لرغبتي برفض ثامر قال أي أحد ماهو لازم هو وكلامه من جد أقنعني كمضمون
سعاد / طيب وين المشكلة ثامر كابوستس وراح خلاص اجل أي أحد عقب يخطبتس
استخيري واكيد بيسألون عنه إذا مناسب توكلي على الله وافقي
مضاوي / انتي وش رايتس جدي مايل لثامر مره وقال لي أسبابه
لوانتي ماكاني وش تسوين
سعاد تضحك وبممازحة / انا سواتي سودا بعيد عنتس عصيت اهلي واخذت على قولتس عريض المنكبين
انا أقول لا تسمعين نصيحتي نصيحة ابوي ازين
مضاوي تضحك /خلاص فكينا منه هذا اسمه خايب الرجا خسارة فيه عريض المنكبين
سعاد تضحك وبممازحة / تبين بعد اقهرتس زود شفتي علومي قبل العرس واني انمرضت يوم اهله اخطبوا له كلها صبيتها با اذنه
والله يا اني كبرت راسه وخصوص ان خطبته الي من خواله دريت عقب ما هو هو الي انسحب لا هم كرشوه
مضاوي تسحب منديل تمسح دموعها / اليوم قطعناه تقطيع مابقى عليه ذنوب من حشنا فيه
نظرت لها / من جد ابي رايتس بحياديه بثامر
سعاد بجدية / شوفي بحيادية ومن جد انتي بنت عمي الوحيدة
وبنتنا الي تربت قدام عيونا مثل عيالنا
صدق ثامر ولد أخوي لكن ما تربى معنا مثلتس عشان ظروفه
زفرت با الم / توفى ابوه الله يرحمه يوم ولادته وامه ما طولت بعد يقولون اعرست وتوفت وهي حامل وعقب اخذته جدته ام امه ورفضت تعطيه ابوي
وجلس عند خواله لين توفت جدته يعني جانا ما شاء الله وش كبره داخل المدرسة
وعقبها صارت السالفة وكبر بالسجن ما نشوفه الا وقت الزيارات
مضاوي بملل وامتعاض / طيب والخلاصة
سعاد /يعني لو بمدحه لتس اكذب والا اسبه بعد اكذب
لكن شهادة حق الولد رجال من صغره من يتحمل الي تحمله شال جريمة عن عمه
وبعد ما طلع الي شفته منه انه انسان خجول يستحي وصادق ما عنده لف ودوران
وفيه والله ما شاء الله دين وخاتم للقرآن الكريم
اردفت / تدرين من توفت امي وهو كل ماجا أكثر جلوسه بملحق بدر الفهد عشانتس موجودة ما يبي يضايقتس
مضاوي بتهكم/ وكل هذا وماتبين تمدحينه كيف اجل المدح
سعاد تضحك وتهز رأسها / المدح سوالف رفعه علي يومها تقنعني بخايب الرجا على قولتس
مضاوي تضحك / دخيلتس لا اسمع سيرة رجلتس
سعاد / تبين نصيحتي من الآخر
مضاوي با استهزاء / يعني ياحظي يوم اشاورتس وش ابي
سعاد / استخيري وادعي بسجودتس ان الله يلهمتس الصواب ويكتب لتس الخيرة
مضاوي تتنهد بحيرة / والله محتاره وخصوص ماني فاضيه بحاول ابدا التطبيق من الأسبوع الجاي
سعاد / ما قلتي بتبدين مع المدارس وش غير رايتس
مضاوي / هذاك اول قبل على حياة جدتي
الحين ابي أخلص بسرعة وتعرفين بعد وراي اختبار الهيئة هذا الي احسه عن سنوات الدراسة كلهن
سعاد بممازحة / ازين ما سوو ذبحتو العالم با الأخطاء الطبية
نظرت لساعتها / يا الله راح الوقت بدون ما نشعر أذن الفجر
مضاوي / خلينا ندخل نصلي وافطري معي انا وجدي عقب روحي لبيتس
سعاد / لا وين بخلي ابوي يوصلني إذا جا يطلع للمسجد عيالي أخاف يفقدوني
مضاوي با استهزاء /عيالتس شيبان يدرون انتس مرات تنامين هنا قولي أبو العيال بيفقدني
سعاد / أبو العيال طالع لدوامه من امس اجل ليش جيتس
اردفت وهي تشير لصدرها / ابرد النار الي في تسبدي منه شوي لو انه فيه ذابحته ما يحتاج اكل بنفسي واعور قلبي
الجد يخرج من الباب / أصبحنا وأصبح الملك لله لكن قرقره من فجر الله
التفت لسعاد / وانتي تاركه بيتس وجايه وش جايبتس
وقفت سعاد وتوجهت للجد قبلت رأسه وبود /عسى عمرك طويل جيت اول الليل وانت راقد
التفتت لمضاوي / الضوة ضايق صدرها
الجد بخوف يلتفت لمضاوي / بسم عليتس تانسين شي
مضاوي بنظرة تهديد لسعاد / عمتي تبالغ مرت تبي تطمن عليك ومسكتها ما تروح خفت ترجع لحالها
الجد با ارتياح / الحمدلله اهم شي انتس طيبة
سعاد / يبه وصلني بطريقك
الجد / يا الله البسي عباتس والحقيني
خرج الجد تتبعه سعاد واتجهت مضاوي لغرفتها
.
.
.
بعد صلاة الفجر في غرفة مضاوي
وبينها وبين بنفسها / انا لازم احسم ها الامر ليش اعذب جدي واشغل الي حولي فيني
جدي كلامه كله واقع انا من لي غيره لو راح انا وش بسوي
ماقال انه صاد عني شي كثير الا انه شايف شي انا ما شفته مرض جدتي وانغماسي بدراستي غيبني عن الي يصير حولي
الحين قدامي طريقين
اما ثامر او البديل الي الله اعلم وش وضعه
وهل البديل بيتقبل شروطي وصعوبة مهنتي وماضي امي
رفعت يديها وبا الالحاح توجهت لربها
(اللهم دبرني فأني لا احسن التدبير اللهم بحق قولك فأوجس في نفسه خيفة موسى قلنا لا تخف إنك انت الأعلى اجعلني الأعلى من من أحتك بهم اللهم اجعلي الخير حيث تريد اللهم اختر لي برحمتك وعافيتك اللهم يا ابصر الناظرين لايخفى عليك حالي فدبرني)
قامت فرشت سجادتها وصلت الاستخارة ونامت
.
.
.
بعد صلاة الظهر
الجد يسأل الخادمة / وين مضاوي مالها عينه
الخادمة / نايمة
الجد بغضب / والله من سهرها امس هي وسعاد
اطلعي لها بسرعة واقعديها تصلي وقولي جدتس يبيتس
.
.
.
بعد نصف ساعة في صالة بيت الجد
مضاوي تدخل على الجد
الجد بملامة / وش ها النوم يابنتي ماهي لتس عاده
مضاوي تضغط على جبينها / لا والله ماهي لي عاده حتى المنبه ماصحيت عليه ويوم صحيت مصدعه
الجد / والله من سهركن وقرقرتكن انتي وسعاد لكن طبها عندي
مضاوي تنادي الخادمة وتطلب منها مسكن وماء
الجد / وش تبين با الادوية وعلى الريق وهذا وانتي دكتورة
أقول اتركيها عنتس واقري الفاتحة وانفثي وان شاء الله يروح ها الصداع
نظر الجد لساعته / بيجيني رجال عقب شوي يتغدى معي
مضاوي / ليتك مصحيني بدري يوم بيجيك ضيف يافشلتي منك ومن ضيفك ياجدي
الجد بطمئنه/ ماعليه وانا ابوتس لاتروعين والشغالات الي سردي مردي بها البيت وش شغلهن
معلمهن انا من صبح بالغدا
أردف الجد بتردد / مضاوي
مضاوي تبتسم / لبيه اشوفك كنك متردد بغيت شي
الجد مسح لحيته وابتسم/ وش قلتي بسوالفنا البارحة شاورتي والا استخرتي
مضاوي تضحك / قالت لك عمتي شي
ضحك الجد / والله ما أدرى قالت لي وحنا نمشي يبه يمكن في بشاير بالطريق
عاد يقولون كلن على همه سرى قلت يمكن بينكن علم البارح
مضاوي بحيرة / جدي انا استخرت واكذب عليك إذا قلت لك مرتاحة او ماني مرتاحة يعني عادي الوضع
لكن خاطري مايل للموافقة ابي اريحك من همي
الجد بمقاطعة / لاتقولين كذا يا الضوه والله ماعمرتس صرتي هم لكن يابنتي انتي عارفة ومايحتاج اعيد هرج امس
مضاوي / جدي انا بعد الاستخارة وازنت الأمور وفكرت
وعندي شروط قبل كل شي
اابتلعت ريقها بتوتر / انا موافقة على ثامر لكن بشروطي
الجد بفرحة / الله يبشرتس بالخير وشروطتس تاخذينها من لحيتي قبل ثامر
أشار لصدره بتعهد /لتس الي تبينه اشرطي لايردتس الا لسانتس
يقف الجد مبتهج / والله ان شاء الله ماتندمين وانا جدتس
اردف / بروح ابشره
مضاوي بترجي / جدي انتظر لاتستعجل
الجد بدهشة/ وش استعجل ما قلتي انتس موافقة خلاص
مضاوي / اقصد لين يروح ضيفك بعدين كلمه
الجد وهو يغادر الصالة / ضيفي الي بيتغدا معي ثامر
غادر الجد تارك وراءه مضاوي مبهورة
صعدت لغرفتها بسرعة
وارسلت رسالة لسعاد / عميمه تعالي بسرعة ابغاتس ضروري
وأغلقت هاتفها
وصلت الرسالة سعاد اتصلت بمضاوي لكن لا مجيب الهاتف مغلق.

لا تلهكم الرواية عن الصلاة
موعدنا القادم بأذن الله قريبآ

حيّ الله الحامل والمحمول،،،
وفصل جديد بين لنا ملامح بعض أبطال الرواية،،


هيام الخايبة،، وش تحس فيه وهي تعرض بنتها على رجال غريب!!🫢
لا حيا من الله ولا من خلقه 😡!

أجمل مافي روايتك الحالية والسابقة يا طيف، هي الدروس والعظات اللي يتم ارسالها عن طريق كبيرات السن،،
نصايح الجدة لمضاوي توزن بالذهب، ليت بنات المسلمين يفهمونها ويتمسكون فيها.

( وصارت المصيبة اللي راح ضحيتها ابوتس وحمد الله يرحمه)
السالفة كبيرة حيل وراح ضحيتها رجال،،
أول ظنيت إما إن حزام قتل ولد الجيران وراح فيها قصاص ،
أو صار تبادل اطلاق نار ومات حزام وحمد بسبب الحادث..
لكن تفاجأت من كلام الجد لما قال إن حزام ما تحمل نظرة الناس وذبح نفسه!!🫢😥
طيب ثامر شلون شال جريمة عن عمه، وراحت سنين عمره بالسجن ظلم؟

أثاري يا رفعة لك تاريخ أسود من قبل ومن بعد. ودبستي سعاد بأخوك الأعوج😡
سالفة زوجوا ولدكم يعقل ،،
يووه يا طيف يا كثر ما سمعنا عن زواجات من هالنوع لا الولد عقل ولا الزواج نجح،،
يا ويلهم من ربي اللي يدرون بخمال ولدهم ويزوجونه من بنات الناس الغافلين عن سواياه.

موافقة مضاوي على ثامر تمت بسرعة على غير ما توقعت بعد العذاريب اللي حطتها فيه ،،
أكرهه،،تكفى جدي ثامر ما أبيه،،😅

ننتظر الفصل القادم ونسمع شروط الدكتورة مضاوي☺

شكراً طيف، بانتظارك بإذن الله 🌷