الفصل الثالث

بدر/ كل شي مقدر ومكتوب
استطرد بكلامه /لكن بقولها شهادة حق ترى مضاوي مثال للبنت الصالحة عمرنا ما شفنا منها شي يريبنا وانت عارف انها تحت مراقبة الكل بدون قصد ترى
وبمرارة حرك رأسه / اعوذ بالله عدوك العالم تركز عليه
لكن عمرنا ما مسكنا عليها غلط لا في اخلاقها ولا دينها
تهكم ثامر با استهجان / أقول خل عنك والله البنت قرصني قلبي من شفتها عند جدتي لسانها يلوط اذانها
ثرثارة تروع وما عندها الا هجوم متأهبة تبي تاكل الي قدامها
بدربتبريرودفاع عنها/ لا تلوم مضاوي ردات فعلها جدآ طبيعية بنت عاشت وتربت في بيئة الكل يدور الزلة عليها
لا يغرك الي وصلت له الحين والله حفرت بالصخر وفي أشياء نفسيه الواحد ما يقدر يسيطر عليها
وحط في بالك انها ما بقي لها محارم بعد الله الا جدي لا اخوان ولا أبو فطبيعي انها تتبع الأسلوب هذا
ثامر / ما شاء الله عليك طبيب نفسي
بدر يضحك / والله لا طبيب ولا شي لكن انا احلل لك من المعطيات الي قدامي
ثامر بنفور وتذمر/ أقول فكنا الله يعافيك ما عاد صار لنا مواضيع نسولف فيها الا مضاوي
الحين وش الدبرة وجدي مصر على الخرج
بدر بقلة حيله / جدي قرر ونفذ خلاص واحمد ربك يارجال الخرج
اول كان يبي رماح لكن ابوي أقنعه بالخرج
ثامر بتهكم ساخر / يبي رماح كله عشان الشيخة مضاوي تكون قريبة من الجامعة
زفر با اسف / وانا نسو ان القسم الي بدرسه ما في الا بجدة
بدر كتم ضحكته ورفع يديه / نروح ونرجع على مضاوي
اليوم التالي فهد متجه الي الخرج بسيارته
التفت لثامر / وش عند أبو جلال من حركنا وهو سارح
ثامر / سلامتك يا عمي ما في شي لكن بصراحة ما بغيت الخرج ابي ابعد مره ومخطط كنت على جدة لكن
قاطعة فهد / داري وابوي أصر عليك يبي الخرج
أردف / بغض النظر يا ثامر عن راي ابوي لكن الخرج ديرة خير وناسها اجاويد
ثامر بتذمر/ كل الناس خير وبركة لكن انا نفسيا ابي ابعد والتغريب ذا جا في صالحي
وفي جدة خويي لقى لي شغل يعني بأذن الله اموري محلولة
فهد / جدة بعيده علينا يعني تبي تحرمنا شوفتك ما يكفي السنين الي راحت وانت بعيد عنا
وبمحاولة اقناع / يا ثامر ابوي متعلق فيك لا يغرك تشوفه متماسك ويتحجج يبيك قريب عشان جامعة مضاوي
والله لو في يده انه دخل السجن عنك لكن
قاطعة ثامر بوجع / عمي والله داري وماخافيني شي وسالفة السجن خلاص تكفون لا عاد أحد يعيد ويزيد فيها
جدي رايته بيضا يكفي ملايين الديه الي جمع القبايل عليها وفك رقبتي من القصاص
فهد / الله يعين
أردف / المهم الحين انا مواعد رجال مدير شركة عسى اوراقك كاملة
ثامر / أي كاملة ومصدقة كلها البكالوريوس والماجستير
ابتسم فهد / ان شاء الله اني متفائل خير حتى الرجال الي كلمته انبهر يوم علمته بتخصصك
قال جبه لي بسرعة ذا لو ماله مكان بنوجد له مكان
ثامر / خير ان شاء الله والله ياعمي ماهي حلمي وظيفة بشركة لكن بقضي فيها اموري
عشان أكمل دكتوراة
فهد بتشجيع / ايوا ابغاك كذا عندك طموح مثل ما انا خابرك واترك عنك نظرة الانكسار هذي
الي فات مات ولا نقدر نرجعه وذكرياته توجع الراس وان شاء الله خيره انت ما شاء الله وصلت بدراستك
مستوى والله ما هو أي أحد يوصل له
أردف / ترى بنمر مكتب عقار اعرفه يشوف لك شقة بعد ما نخلص من أبو سامي
في الشركة
أبو سامي يقلب في أوراق ثامر وابتسم با اعجاب / ما شاء الله هذا ما يحتاج تكلمني يا بوبدر واسطته شهاداته
أردف / مقبول على طول لكن في استمارات لازم يعبيها
استدعى أبو سامي السكرتير ومد له الاوراق/ عايض هذي أوراق ثامر العاصف انجزوها بسرعة
عايض / ابشر طال عمرك
التفت عايض لثامر / تفضل معاي للمكتب الثاني
بعد خروج ثامر والسكرتير
فهد / مشكور يابو سامي والله ما قصرت
ابوسامي يبتسم / لا يكون متوقع أنى اجاملك
وبا انبهار / ما توقعت ولد اخوك كذا ما شاء الله عليه
فهد / ثامر رجال يا محمد والله وانه مر في شي ما يعلم فيه الا الله وصمد له
أبو سامي / داري يابن الحلال كأن العشرة الي بيني وبينك أمس لنا كم سنة مع بعض
وعارف كل شي ما يحتاج تشرح
فهد / القصد من كلامي ابيك تحطه تحت نظرك انت عارف نظرة المجتمع والناس
بما انه تو طالع من السجن اكيد بيلقى مضايقات
زفر بقلة حيلة /الناس لها الظاهر أي أحد يدخل السجن يختم عليه صاحب سوابق ظالم كان او مظلوم
أبو سامي بطمئنة وضع يده على صدره / ما عليك ازهله ثامر عندي
في غرفة السكرتير
عايض با اعجاب / ماشاء الله عليك ما عطيتني فرصة خلصت تعبئة اوراقك بشكل دقيق وبوقت قياسي
وبا استغراب / شهادتك ماجستير وتدور وظيفة بشركات
الوظايف الحكومية تبي الي مثل شهاداتك اقلها معيد بالجامعة
الشركات الصغيرة هذي خلها لنا لدبلوم ومشابه
ابتسم ثامر / فيكم الخير والبركة والرزق قسمة ونصيب ونصيبي عندكم
عايض وبا ابتسامة تفاءل/ان شاء الله انه من حظنا
بعد ربع ساعة
عايض في مكتب أبو سامي / خلاص طال عمرك أوراقه كاملة ودخلتها الكمبيوتر
أبو سامي با ابتسامة / خير ان شاء الله من بكرا يناسبك تباشر الدوام ياثامر
نظر ثامر لعمه فهد / مدري والله بس انت عارف انا اول مره اجي الخرج
ولازم أأمن لي سكن لو تعطيني مهلة يومين أكون لك من الشاكرين
أبو سامي بممازحة / انا ودي من اليوم اشغلك لكن ابشر معك بدال اليومين أسبوع وعقدك بيبدا بأذن الله من بكرا ضبط امورك وننتظرك
أردف / غداكم عندي اليوم
فهد / لا والله الله يكثر خيرك ماحنا جايين نجربك ورانا اشغال
مواعدين رجال بعد بشغل ينتظرنا وودنا بعد نرجع بدري خبرك بكرا دوامات
أبو سامي / على خير ان شاء الله وعشاكم انت وثامر وقته مفتوح ومالكم عذر
ابتسم فهد وأشار لأنفه / ابشر بس خلها على فضوتنا
في سيارة فهد
التفت لثامر / وش رايك نا خذ لنا لفه تراني مبطي عن الخرج
أردف / أخر مره جيت قبل سنة يوم فيصل سجل بالجامعة
ثامر بهدوء / على راحتك
فهد بحنو/ وش فيك أحسك متضايق الكلام اسحبه منك سحب والا عشان كرشت خويك لايجي معنا
ثامر يبتسم / لا والله ياعمي عادي وبدر أساسا عنده شغل يبي يخلصه بنطلع عمره مع بعض
فهد / ازين شور زيارة بيت الله تجدد نشاطك وترجع بنفسية غير الي انت رحت فيها
خصوصا أنى ملاحظ عليك يوم عن يوم تنطوي عنا وش الي في خاطرك وانا عمك غير قضية السجن لأنه ما عاد في مجال نسولف فيها
ثامر بتردد/ عمي انا ما ابي بنت عمي حزام وجدي مصر عليها والبنت بعد ما تبيني
انا ماني فاهم إصرار جدي هذا ليش
فهد / اول خلنا نتغدى في مطعم مدحه لي فيصل ولو انه غدا متأخر بس يا الله
بعدها بقليل داخل المطعم والهدوء يسود المكان
فهد با استفهام / ثامر انت اعتراضك على مبدأ الزواج والا على هذي تحديدا
ثامر / والله ياعمي كلهن البنت ما ابي اظلمها معاي من جهة والزواج نفسه الفكرة حاليا مستبعدها
ابتسم / يعني من سجن لسجن
فهد ابتسم وبمصارحة / ثامر بغض النظر عن كل شي مضاوي بنت والله تفتخر اذا قلت هذي بنتي او اختي يعني لا يجي في بالك انها مثل أمها الله يستر علينا وعليها
وربك يخرج العالم من الظالم يمكن البنت هذي دواء لجروحك وتعوضك سنين عمرك الي فاتت
ثامر / عمي يوم انفتح مجال ها السالفة بقول لك الي ما قدرت أقوله لجدي سعد
انت عارف ان أمها سبب كل الي صار لنا
يعني كيف تبوني أعيش مع وحده كل ما شفت وجها يرجع لي الذكريات المريرة وسنين عمري الي تسربت من ايديني بسببها
انا ما ابي أظلم البنت معاي تشوف لها نصيب غيري
فهد / انا مقدر لشعورك ذا ومقتنع بوجهة نظرك لكن ليش ابوي مصر عليك انت بالذات ما علمني ولا يبي نقاش بعد في ها الموضوع
وبجدية/ والله ابوي لو قال لي يافهد اليوم تملك على بنت عمك حزام أنى املك وانا مغمض
وبثقة أردف /لأني عارف ابوي ما يخطي خطوه الا هو حاسبها
ثامر بحيرة / طيب والحل
فهد / الحل بيدك وبيدها إذا ما تبون بعض اصرو على الرفض
لكن نصيحتي لك فكر واحيانآ يكون من داك يجيك دواك
ثامر / تعبت من التفكير في ها الموضوع الي مخربط اوضاعي كلها
وبيأس / انا عطيت جدي موافقتي وبكيفها هي وجدي يقنعون بعض يتزاعلون مالي دخل وان شاء الله تقنعه بالرفض
فهد بمحبه وامتنان/ والله مدري وش نجازيك فيه
ثامر با ابتسامه حزينة / جدي ما عاد باقي بعمره كثر الي راح
بجي انا على اخر عمره واعانده يكفيه بعد هو ماجاه
اخوه الوحيد وعياله اثنين كلهم دفنهم كل فتره منفجع بواحد
فهد با ابتسامة رضا / ما عليه الله يكتب له اجر الصابرين
وقف وهو ينظر لجواله / يا الله الرجال الي مواعديهن أرسل ينتظرنا بنخلص شغلنا كله اليوم
في مكتب العقار
صاحب المكتب / حي الله سعادة العميد يا رجال لو مالك حاجه ما سمعنا صوتك
فهد / تحيا وتدوم يبو ممدوح والله مشاغل ما تخلص
وش سويت لنا بالموضوع الي كلمتك عنه
أبو ممدوح / ابد طلبك جاهز وامش معي تشوفه تبون شي غير الي قلت لي
فهد / لا عساك سالم بنشوف الشقة إذا جازت لنا كتبنا العقد
في سيارة فهد متجه لرياض
فهد ابتسم بسعادة / ما شاء الله يا ثامر امورك كلها تياسير ما توقعت مشوار واحد نخلص فيه كل شي
أردف/ باقي الأثاث
ثامر / لا عمي الأثاث خلني على راحتي ماني مستعجل
فهد با ابتسامه /قصدك بتنتظر صراع الجبابرة بين سعد بن عاصف وبنت حزام بن عاصف
ثامر بضحكة / بالضبط
بعد مرور أسبوع على الاحداث السابقة
عشاء في بيت الجد
بمناسبة رجوع بدر وثامر من العمرة في سور بيت الجد يجلس الجد وأبنائه واحفاده
سلطان لثامر / فهد يقول بكرا ان شاء الله بيبدا دوامك لو تخليه بعد بكرا توك راجع من سفر
ثامر / لا والله ياعمي مستحي من ابوسامي ما قصر معي طلبته يومين وعطاني أسبوع
الجد بمحبة / تبيني اروح معاك اونسك
ثامر بود / لا جعل عمرك طويل ساعات الدوام طويلة وما ابي اخليك بالشقة لحالك
سعد بن مساعد/ على طاري الشقة اثثتوها والا للحين
الجد سعد يقاطعه / الشقة تأثثها حرمته ان شاء الله
بدر يلتفت لثامر بهمس / تدري ودي اعرف الفصل الأخير من اصرار جدي على زواجك انت ومضاوي
يا انه بيصير أكشن خصوصا عقب الي شفته المغرب عند جدتي
ثامر بتذمر / ان شاء الله ما في زواج وخلها تروح بنفسك
فواز يحمل صينية الشاي ويقف امام بدر وثامر / وش عندكم ما تشبعون قرقرة توكم جايين من سفر وبر يمديكم مسولفين سوالف لعشرسنين قدام
بدر بممازحة / أقول فواز انت وعيونك هذي الي كنها عيون الجاحظ اذكر الله ترى لك سوابق با النظل
ثامر يضحك / لا عاد الا أبو الفوز مانرضى عليه
فواز/ ياازينك يابوجلال والله الي ماهو داخل مخي للحين ان بدر صديقك الخاص من بد العاصف كلهم
أردف بضحك / انت عقل وثقل ومصادق ها المرجوج
بدر وهو يمد يده ويأخذ بيالة الشاي يرفع حاجبه/وهذا حلاة صداقتنا التضاد
التفت لثامر/ لا تروح بكرا بالحالك خل فواز يروح معك انا عندي دوام والا ما تركتك
فواز / قدام ما عندي شي وماعليك تراني اعرف الخرج مثل كف يدي
خويانا درسو فيها ونطلع لهم مرات مع فيصل
ثامر بهمس / إذا كذا ابي منك خدمة
فواز انزل رأسه وبا اهتمام / ابشر
ثامر / تسلم ابي استأجر بسكن عزاب
فواز / طيب والشقة الي استأجرتها
ثامر / اول شي الشقة بعمارة عوائل عيب وانا عزوبي بينهم
ثاني شي فاضية ما فيها الا صدا الجدران
بدر بموافقة/ثامر صادق شقق العزابية ما تحتاج الا ملابسك واسكن
فواز انزل الصينية من يده ويخرج هاتفة / ابشر بكلم العيال الحين
بدر يمسك جوال فواز وبصوت منخفض/ سلامات وقدام جدي بعد
كان سألنا فيصل ما يحتاج تكلم وتقولون بدر مطفوق
وبتحذير أردف / لحد يدري خلوها بينا
فواز يأشر على انفه / تم الليلة اجيب لك العلم
في نفس الليلة في المستشفى
جوال مضاوي يرن
مضاوي / هلا عميمه
سعاد / هلابتس ما قدرت امر امي اليوم عند ابوي عشا وانشغلت
مضاوي بممازحة / خلصتي من دوشة الامتحانات استلمتس جدي عزايم
اردفت / وش عنده أبو جلال عسى زوله ما يغيب
سعاد / ابد سلامتس العشا لأبو جلال الثاني وبدر توهم راجعين من مكة
وبقلق /شلون امي الحين أمس ما اعجبتني حسيت وجها مره مصفر
مضاوي / ما عليها بس عشان معها فقر دم تحسين وجها شاحب قبل شوي عطوها كيس دم وعلى بكرة بتكون ان شاء الله احسن
زفرت بحزن/ عميمه جدي مقاطعني ما يرد على جوالي وحتى جدتي ما زارها عقب ذاك اليوم
سعاد / وش نقول عناد الشيبان إذا بغوا شي ما يبون احد يخالفهم وتعرفين غلاة ثامر عند ابوي
مضاوي بوجع / والله داريه لكن هذا مستقبل وحياة ماهو عشان جدي يحبه انجبر اتزوجه انا الزواج كله مااا ابيه
جلست وهي تضغط على صدغيها /حياتي ومستقبلي هي دراستي وتخصصي الي احبه وماصدقت أنى ادخله
سعاد بيأس/ المشكلة يامضاوي موضوعتس مافيه حل وسط ابوي رافض النقاش فيه
مضاوي باالم / تعبت جدي وعماني محاربني محسسيني أنى مسويه جريمة برفضي
وبقهر / مستوعبه من بداية المشكلة من كم أسبوع لحد زيارة اليوم والكل يوميا يجي يزور جدتي
وحتى السلام من طرف خشومهم
من غير عمي مساعد الي كلامه زي السم كل ماجا يزور جدتي قط له كم كلمه علي وطلع كنه يدور الزله
سعاد / لا تحقدين على مساعد ترى قلبه ابيض لكن منفعل عشان ابوي
ابتسمت مضاوي بوجع/ انا احقد على عمي مساعد والله لو يذبحني ما زعلت عليه خلي عاد احقد لكن فضفضة
اردفت / والله ما أحب دور المسكينة او الضعيفة لكن وصلت لمرحلة بنفجر خلاص
سعاد / انتي قررتي قرار خلاص مالتس الا انتس تتحملينه
رفضتس لثامر ما هو أصعب من قبول اهلي انتس تدخلين طب
والحين شوفي كلهم متقبلين تخصصتس وبالعكس أحس مبسوطين ويعدون الساعات عشان تخرجتس
وثامر مع الوقت بيتقبلون رفضتس له
مع ان ثامر والله ماني معتس بالرفض استخيري وشوفي مره مرتين
مضاوي با اصرار / قراري مافيه رجعة توصين شي عميمه بكمل صلاتي اتصالتس جا وانا ماده سجادتي
ضحكت سعاد / تصبحين على خير ولا ترفعين سجادتس الا وانتي مستخيرة يمكن راستس اليابس يلين ويسخرتس توافقين
مضاوي / طيب ابشري
وبينها وبين نفسها / يا الله كل العايلة معاه الي معي والي ضدي معاه ولا أحد شجعني على الرفض
كلهم ربي ساخرهم له وش الميزة في ثامر الكل يشوفها الا انا
قبل عدة ساعات وخروج آخر الزوار للجدة قبل انتهاء الزيارة بقليل
مضاوي / سوناتي لمي الحوسة هذي باخذ لي شور تعبت من الوقوف
ورتبي سريري بريح شوي
سوناتي / اووف كل يوم كله يجي زيارة مافي زي اول يوم يجي ويوم لا
مضاوي / عن البربرة جايين على راستس هم إجازة الحين ما في شي يمسكهم
اتجهت لدورة المياه والتفتت للخادمة واشارة لطاولة / وبعدين شوفي الفطاير والحلى رتبيه علشان توزعينه على العاملات
وانتظري لا تروحين الحين لين اطلع من الحمام خلي عيونتس على جدتي اعرفتس تدورين الدوجة با الاسياب دواره
سوناتي تهز راسها / طيب
بعد ربع ساعة خرجت مضاوي من دورة المياه وشعرها ملفوف بفوطة
تلفتت بالغرفة المرتبة والخالية الا من الجدة وصوت الاجهزة الموصولة بجسدها/ بسم الله مايمدي خلصت تنظيف الغرفة
وطلعت حذرها ما تطلع وما ينفع فيها ما علية ياسوناتي
باب الغرفة يطرق
مضاوي با استهزاء / ما شاء الله نزل عليتس الادب تستأذنين ادخلي جعل سريلانكا تفقدتس
بدر يضحك من ورى الباب / زوار يابنت حزام
مضاوي با احراج / لحظة يابوفهد لحظة
ارتدت مضاوي عبأتها ونقابها بسرعة ووقفت بجانب سرير الجدة واتصلت على سوناتي
مضاوي بغضب مكبوت / يامال الحمى وينتس في زوار عند باب الجناح
تدخل الخادمة مسرعة وهاتفها بيدها / ايوا انا اشوف ويجي بسرعة في اتنين رجال
مضاوي / حياك الله يابوفهد
بدر / معي زوار لجدتي ماحنا مطولين بنشوفها دقيقة ونطلع
مضاوي / الله يحيي زوار ام جلال انا بدخل وانتو خوذو راحتكم
تدخل مضاوي لاستراحة الجناح قبل دخولهم
دخل بدر وثامر لسلام على الجدة
بعد السلام يتلفت ثامر في انحاء الغرفة
بدر يهمس بممازحة / وش عندك تدور شي لك ضايع
ثامربهمس مماثل / لا والله وش ادور يعني لكن اطالع الغرفة مره فخمه تحسه مستوصف خاص
بدر / اكيد فخمة جدتي داخلة وعلاجها على رتبة ابوي ولهم مميزات خاصة الله يعز دولتنا وحكامنا ولا يعز عليهم
ثامر / اللهم آمين
مضاوي من الاستراحة / أبو فهد تقهوا وقهو ضيفك شف القهوة قدامكم
بدر يلتفت لثامربا ابتسامة ماكرة / الله يكثر خيرتس يابنت حزام ضيفي ماهو غريب الي معي ثامر
مضاوي با استفهام / ثامر الجلال
بدر / الله الله هو
أردف / اعذرينا جينا بها الوقت ثامر بيسلم على جدتي بكرا ماشي للخرج
يا الله نستأذن حنا ماشين تخلفنا عليكم العافية
مضاوي بحزم / لحظة اجل ابي ولد عمك بكلمة قبل تطلعون وانت معه ابيك تسمعها
بدر با استغراب وتحفز / عسى ماشر قولي وش فيه
ثامر يهم بالخروج وبدر يمسك بيده
بدر / انت وين رايح البنت عندها علم بتقوله ونطلع
ثامر / عارف علمها وش ما يحتاج إذا بتسمعه اجلس تلقاني بالمواقف تحت
مضاوي تخرج لغرقة الجدة / الحمدلله يومك عارف وفرت علي مقدمة طويلة عريضة
اردفت / اسمع الظاهر وصلك العلم ان طلبك مرفوض وانا عارفة انك رافضني وماتبيني ومن تحت راسك جدي زعلان علي
فليش ماتاخذ موقف رجولي حازم وتقول كلمتك لجدي بنت حزام ما ابيها
وبتهكم لاذع / ماهو تاركني بوجه العايلة والكل ضدي وحضرتك متفرج يحسبون الرفض من جانب واحد بس
ثامر با استهزاء / والله انا عبدآ مأمور ولا أقدر اخالف جدي ماني شجاع مثلتس قال جدي بنزوجك قلت حاضر قال بنت حزام قلت ابرك الساعات
ولو قال لي جدي بنزوجك الشغالة ذي الي معتس وتاركتها تلوب با الاسياب وماتدرين وش تسوي من وراتس بقول بعد حاضر وموافق
بدر يمسك ضحكته / وش فيكم استهدوا بالله ومايصير ان شاء الله غير الخير
مضاوي بغضب التفتت لبدر / وانت الثاني تراني ماني لعبة عندكم يا العاصف
تحاذفوني من لحيه للحيه مايبيها هذا شوفو هذا
جاني علم خطبتك العمياء مدري وش تحس فيه يومك داق صدرك بتفك خويك من خطبتي
ثامربا انتقاد لاذع / أقول اقصري صوتس وعيب عليتس بدر مايستاهل منتس ها الكلام
وبااشمئزاز/ سلمه الله والا بغى يتهور ويبدل الشيخة بنت مساعد فيتس
وبتهكم ساخر امال فمة / والله يعيني انا الي بتطيحين بتسبدي
مضاوي بغضب وتحدي / علما يوصلك ويتعداك والله يا ولد جلال لو مايبقى من الرجال غيرك على وجه الارض ما اخذتك
واني لأسكن قبري قبل اسكن بيتك
ثامر ببرود قاتل مصطنع/ ماعليه الموضوع هذا يفصل فيه جدي وإذا انتي فيتس خير فكي عمرتس مني
كلام جدي يمشي علي وانتي مع نفستس سوي الي تسوينه قدامتس سعد بن عاصف ناطحيه كان فيتس شدة والا انا اسف ما اقدر
أردف ثامر / يا الله يا بدر تأخرنا
مضاوي بقهر / ليتك ما طلعت من سجنك
ثامر وهو يغادر / طلعت عشان بس ادخلتس لسجني
وبا استهزاء دون ان يلتفت / عليك بالجادة وان طالت وبنت العم لو بارت
يخرج ثامر ويتبعه بدر
مضاوي / اعوذبالله من الشيطان الرجيم يوم جيت أصلي نط لي ها الثامر مثل ابليس
اكمل صلاة وانااام اليوم جاني ماكافاني
بعد مروراسبوعين لم يتغير شي الجميع يجهز لزواج شروق
يوم زواج شروق
في بيت فهد العاصف بعد المغرب
الحضور فقط نساء العائلة
نورة تسلم على مضاوي بحفاوة وترحيب / هلا والله يوم تأخرتي قلت اكيد بتنفذ كلامها وماهي حاضره
مضاوي / والله ياخالتي علشان خاطرتس وخاطر شروق جيت
وانتي شايفه كيف العالم هنا شابه علي
نورة / ما عليه وانا خالتس ازمه وتعدي
اردفت /اطلعي لشروق فوق تراها فاقده الامل انتس تجين
مضاوي / عندها أحد
نورة / مافي الا اهلتس الي تخبرين اهل المعرس محد جاي منهم مشغولين بعرس الرجال واهلي اعتذرو مصيفين با الاردن
في غرفة شروق
مضاوي تفتح الباب فجاءه / سبرااايز
التفتت سناء بفرحة واسرعت لمضاوي وضمتها / أحلي مفاجئة
تركت سناء واتجهت لشروق / الف الف مبروك يا الغالية
شروق بفرحة / ما توقعت تجين البارحة وانا اكلمتس ابدااا ماعطيتيني امل تحضرين
انقهرت يوم عمتي سعاد وصلت هديتس قلت هذي رسالة أنتس ما راح تحضرين
مضاوي بود / معقولة افوت ليلة مثل هذي
خلود بسخرية / السلام والاحضان بس لسناء وشروق واحنا مزهريات
مضاوي تسلم على البنات الموجودات وبمجاملة ابتسمت / شدعوه خلود كلكم خواتي ولكم نفس المكانة
لكن شرقاوي عشانها اليوم عروس لها ميزه خاصة
سما بحماس / عقبالتس ضوه
مضاوي با ابتسامه / لا والله العقبى لكم انتم انا انسو أنى اتزوج خلاص تزوجت دراسة الطب الله لا يفرقنا
بتول بممازحة / الضوه بتعيش بقية عمرها ناسكة
مضاوي تضرب كفها بكف بتول ابتسمت بمحبه / ياازينتس وزين تعليقاتس مع ها الحرف الي نطقة من فمتس غيير
وغمزت بعينها / وهذا الي بيصير ان شاء الله
خلود بتحدي تميل فمها / نشوف من يمشي كلامه انتي والا جدي
ريما بهمس لمنار / تو بدا الاحتفال
منار بقلة حيلة وبصوت منخفض / الله يلهم مضاوي الصبر علينا
سعاد تدخل بفرحة / هلا مضاوي ما صدقت يوم قالت نوره انتس فوق
مضاوي ابتلعت غضبها وبا استعجال / جيت عشان خاطر شروق وبمشي خلاص جدتي لحالها مع الشغالة
سعاد / وين تمشين احضري زفة شروق وتعشي
اردفت / من جيتي معاه اليوم سليم (سائق بيت الجد ) مأجز فيه نزله معويه تعبان
مضاوي تأشر لسناء / الذيبة الي وراتس أرسلت سواق وشغالة عماني الفهد وجيت معهم وبيرجعوني
خلود با استهزاء / لا يكون زعلتي بس
مضاوي بتهكم / لا وش دعوه ازعل عليتس
سعاد با استغراب تدير نظرها بينهم / وش السالفة
مضاوي تلبس نقابها وتخرج بسرعة
سعاد / بنات وش فيكم تناظرون بعض
سناء بغضب / ابد سلامتس ما في شي غير خلود من شافت مضاوي وهي هجوم
ما امدى البنت تسلم الا قامت تحارشها
سعاد تلتفت لخلود وبا انتقاد / ليه طيب وش بينتس وبينها للحين غيرة البزران ماكبرتي عليها
عقدت خلود حاجبيها بتهكم/ وش غيرته
وبتكبر وغرور مطت فمها / انا اغار منها
وبلا مبالاة / سناء تبالغ انا ما قلت لها شي
قاطعتها سهى / ياويلتس من الله ياخلود يكفي انتس فشلتيها قدامنا حطيتيها تحدي بينها وبين جدي من الي يمشي كلامه فيهم على الثاني
سعاد بذعر وضعت يدها على صدرها/ لا يكون فتحتو معها موضوع خطبتها
سناء با امتعاض / ليش هو في شي احد قدر يذل مضاوي فيه غير هالخطبة القشرا
سعاد بغضب وتهديد/ والله لو يدري ابوي انتس ازعلتي مضاوي تعرفين وش يجيتس
لكن ما عليه تعدي هالليلة بس وحسابتس عقب
في مجلس النساء في بيت فهد نساء العائلة تدخل مضاوي بثقة
مضاوي / يا الله استأذن وعساه الف مبروك وافراحكم دايمه يارب
نورة بمودة / وش معجلتس اجلسي انبسطي معانا كم لتس ما طلعتي من المستشفى غيري جو شوي
مضاوي ابتسمت بمودة وهي تمسك يد نورة / تسلمين مقدر أتأخر عن جدتي ما اثق اتركها عند الشغالة
رفعة با استهزاء / من جيتي معه يامضاوي جدتس اليوم ما هو فاضي طلع للحفل من اول النهار
والسواقين اذكر ما يرضى تركبين أواخر الليول معهم لحالتس
وبنبرة خبث مقصودة / الدنيا وحالها
مضاوي تحاول ان تسيطر على غضبها / ماعليتس لاتشلين همي انا وجدي نتفاهم
نواظر بحده وانتقاد التفتت لها / وش دخلتس بها السوالف يا رفعة ليش مضاوي طفلة تحاسبينها من جابها من وداها
رفعة با امتعاض/ بسم الله وش انا قايله
وبتهكم / مضاوي بنت من بناتنا وما ابي يلحقها كلام جايه بالليل لحالها من لها محرم في بيتنا غير عمي الله يطول بعمره
نواظر بسخرية / الحين وش جاب طاري المحارم
مضاوي بمقاطعة / جدي عارفني عسى عمره طويل يا ام ماجد والكلام ما لحقني وانا بزر فبيلحقني عاد هذا كبري
وبنبرة حادة /ترى الله سبحانه وتعالى يحاسب كل شخص على قوله وفعله الي يسويه هو
وبغضب مكتوم / ما يحاسبه على أفعال غيره {ولا تزر وازرة وزر أخرى}
غادرت مضاوي المجلس بسرعة
تتبعها عيون بنات ونساء العاصف المتواجدات بالمجلس
امام بيت فهد العاصف
السائق يهم بركوب السيارة
بدر ينادي السائق / سندو وين رايحين انت وليما
السائق / يرجع مدام مضاوي مستشفى
بدر ينظر لثامر بمكر / مدام مضاوي موجودة
السائق / ايوا يجي قبل شوي والحين كلم يقول يبي يرجع
ثامر لبدر / أقول انت فاتح تحقيق وراح الوقت بنمشي للحفل تأخرنا
يقاطعهم خروج مضاوي الغاضبة وتقف امام البيت با احراج
مضاوي بهمس / يا الله ما ناقصني الا شوفة ها المزعجين
بدر وثامر يبتعدون عن سيارة السائق
بدر / مسيتي بالخير يابنت حزام
مضاوي تركب السيارة / مساء النور
اردفت/ يا الله سندو تأخرنا
ثامر يقاطعها / عقبالنا يابنت عمي
مضاوي / مترين بمتر ولا وجهك الودر بسرعة سندو
يحرك السائق تارك وراءه ثامر الغارق بالضحك وبدر المندهش
بدربا استنكار وتعجب / الي ابي اعرفه انت وش تبي فيها تستفزها
ثامر يضحك / تدري ليه ابيها تزيد إصرار على الرفض أخاف تضعف لضغط جدي
بدريفتح باب سيارته / أقول يا الله اركب الله يعينها عليك انت وجدك مزعجنا تأخرنا وتأخرنا ومحد أخرنا غيرك
في مجلس النساء في بيت فهد العاصف
رفعة بغيض / وش فيكم كلكم قلبتو محاميات لمضاوي
نورة با انتقاد وملامة / لا يا ام ماجد ترى اسلوبتس مستفز مع البنت
نواظر / نورة صادقة وش تبين فيها تحارشينها ابوي ماحذركن
وقال مضاوي اتركوها واقطعوا سالفة الخطبة
يقاطعهم دخول سعاد الغاضبة / وهنا بعد مضاوي وش صاير بعد
فزه / ما صار الا الخير حماتس ام ماجد تلاسنت مع مضاوي شوي
سعاد بغضب / الحين بنتس فوق وانتي تحت ماتخافن الله بها المسكينة ما أدرى أنتن مستضعفاتها
والا وش قصتكن
رفعة بقهر وانفعال / ليش وش انا قايله ابيها ترجع لعقلها وتفكر وتوافق على ثامر تعرس و تريح عمي من همها
سعاد بتعجب واستهزاء من اسلوب رفعة / الحين مضاوي هم
زفرت بتهكم / والله كلنا هم على قلب ابوي الا هي
رفعة با امتعاض واستهزاء/ عاد انا اشوف ان زواجها من ثامر هو اصلح شي لها
سعاد بقهر / ما شاء الله عليتس
اردفت بسخرية /بعدين إذا انتي خايفة يرجعون عليكم مره ثانية عشان خلود ارتاحي ابوي وعدني ماعاد يفتح الموضوع معتس انتي وبنتس
لو يقعد ثامر طول عمره بلا عرس
نورة بمعاتبة / ياحريم استهدن بالله يعني انا وبنتي مالنا خاطر عندكن كل وحده تبي تاكل الثانية
نواظر / من جد ما هو وقت ها السوالف والحمدلله مابينا غريب كان فشلتونا فيه
فزه (ام سعد) / الحمدلله اليوم فرح وفاضو من صلاة العشا خلونا نطلع للبنات نرقص وننبسط مع شروق قبل يجي رجلها
نورة تقف / كلمني فهد يقول على الساعة عشر جاي هو والمعرس
في المستشفى في جناح الجدة
مضاوي تدخل وتعطي الخادمة عبايتها وشنطتها وتدخل لدورة المياه
تخرج من دورة المياه وعيونها محمرة من البكا
الخادمة / انتي روحي حفلة لازم يرجع فرحان ليش يرجع بسرعة ويبكي
مضاوي تحرك رأسها با الم وانكسار / ابكي من قلة الحيلة
خلينا اروح أصلي واطلب ربي ازين من سوالف معتس لا تودي ولا تجيب
على سجادة الصلاة
مضاوي ترفع يديها / (اللَّهُمّ إنْي أَشْكُو إِلَيْكَ ضِعْف قُوَّتي وَقِلَّة حِيلَتي وَهَوَانِي عَلَى النَّاس يَا أَرَحِم الرَّاحِمِينَ أَنْتَ رُبَّ الْمُسْتَضْعِفِينَ وَأَنْتَ رَبِّيٌّ إِلَى مَنْ تَكِلنِي إِلَى بِعِيد يَتَجَهَّمنِي أَمْ إِلَى عَدُوّ مَلِكَته أَمَرّي إِنْ لَمْ يَكُن بِكَ غَضَب عَلِيّ فَلَا أُبَالِي وَلَكِنَّ عَافِيَتكَ هِي أوْسَع لِي أَعَوَّذ بِنُور وَجْهكَ الَّذِي أَشْرَقَت بِهِ الظُّلْمَات وَصُلْح عَلَيْهُ أَمْر الدُّنْيَا وَالْآخِرَة مِنْ أَنْ يَحُلّ بِي غَضَبكَ أَوْ يَحُلّ عَلِيّ سُخْطكَ لَكَ العتبى حَتَّى تَرْضَى وَلَا حَوْلَ وَلَا قُوَّة إِلَّا بِكَ)
بعد الصلاة
مضاوي / سوناتي راسي مصدع بنااام وانتي خلتس صاحية إذا بغيتي تنامين صحيني
الخادمة / ما في مشكلة نامي وانا يجلس عند ماما
مضاوي بتوعد/ نشوف موقته جوالي يااويلتس لو اصحى والقاتس طالعة تدوجين بين الغرف
استلقت على سرير المرافق وعيونها على النائمة من سنتين اغمضت عيناها
مضاوي بنفسها وبعبرة تخنقها / انا عارفه جدي يبي من زواجي هذا يتطمن علي وعيال يشيلون كبرتي
طيب هذا العيال وش نفعوا امي النيرة يوم طاحت عن حيلها هذا هي لحالها يقلبها المرض يمرونها ويمشون زوار
ماقدرو يشترون لها العافية يمكن لوما عندها عيال الحين تمشي بعافيتها
الامراض الي فيها من مصايب جتها عشان عيالها كانت فوق طاقتها
لا يامضاوي جدتس صادق كيف العيال ما ينفعون
لولا الله ثم ولدها فهد كان ما تنومت بجناح خاص وطاقم التمريض خدمتهم ممتازة
والخادمات الي يوفرونهم لها عيالها با استمرار ومرافقات معها بشكل دايم لو ما عندها عيال كيف كان الوضع
حتى بناتها ما شفت بنات مثلهن بارات با امهن
وبحسرة تنهدت/ يا الله ياجدة فقدتس
ياليتس تسمعين افكاري وتحاوريني مثل قبل محتااجة تعلميني وش أسوي وتلينين راس جدي لي
تعرفين وش ابي قبل اقوله امي الي ولدتني وهي امي ماهي مثلتس لي
رجعت مضاوي بذاكرتها الي قبل اكثر من ست سنوات
مضاوي دخلت على جدة بالمطبخ وبتردد / جدة بقول لتس شي قصدي بطلبتس
ام جلال تبتسم بمودة / خير وش عندها شيخة الغزلان بحليقها كليمة مهي طالعة
مضاوي تجلس وتحضن كتف الجدة وتقبله/ بقول بس لا تزعلين ولا تعصبين
الجدة با استفهام وتأهب / وش فيه أحد متعرض لتس غلطان عليتس
مضاوي / لامو كذا بس بطلبتس طلب
الجدة با ارتياح ابتسمت / اشواا روعتيني اطلبي وجاتس طلبتس قبل اعرفه
اردفت الجده وهي تأشر لعيونها / من العين ذي قبل ذي
مضاوي تقبل راس الجدة / جعل عيونتس سالمة والله طلبي بسيط
لكن أدرى عندكم صعب
الجدة بتعجب واستفهام / عندنا صعب ومن حنا ومن انتي انتي منا وحنا منتس
اردفت الجدة بطمئنه لمضاوي وابتسمت / قولي طلبتس وابشري به الي لتس ساعة تغاصصين عجزتي تنطقينه
مضاوي بتوتر وترجي/ امي هيام عازمتني تكفين بروح لها
الجده التفتت لها برعب / وهذي وين لقتس تعزمتس حتى الدراسة مابعد بدت علشان نقول راحت لتس للجامعة
اردفت / سكري السالفة والله لو يدري جدتس يذبحني ويذبحتس
تنهض الجدة متوجهه لغرفتها وتلحق بها مضاوي وبا الحاح / تكفين ياجديدة ابي اشوف اخواني
هي تقول عندي اخوان ابي اشوفهم تكفين تكفين
تجلس الجدة على طرف السرير / لاحول ولاقوة الا بالله
الحين علميني السالفة من أولها وين لقيتي امتس عقب نشوف
مضاوي بتوتر تفرك اصابعها / أقول ولا تزعلين
الجده تتنهد بقلة حيلة/ قولي يابنتي ليلنا طويل مع هيام وعلومها
مضاوي / اخذت رقمي يوم جتنا اخر مره
وصرت اتواصل معها عن طريق الجوال
الجده تهز راسها بشك وريبة / انتي متوكدة بس الجوال ما فيه منا والا منا
مضاوي بصدق / لا والله بس الجوال وهي الي تدق علي بعد
الجدة بقهر وقلة حيلة / انا أدرى لو بعيي هيام بتطلع الف طريقة وطريقة توصل لتس لكن انا بمشي معتس لآخر الطريق
مضاوي بخيبة امل / يعني شلون اروح والا ما اروح
الجدة بطمئنة / تروحين تروحين بس خليني اشوف عذر لجدتس تعرفينه ما يحب المراويح الواجد
مضاوي تضم الجدة / يابعد عمري والله ما توقعت توافقين
الجده بتحذير / المهم لحد يدري بشي لا جدتس ولا عماتس ولا بنات عمتس خليها بينا
مضاوي بفرحة / ابشري والله ما اعلم أحد
الجدة بممازحة تبتسم/ يا الله فارقي عن وجهي بصلي
تخرج مضاوي من غرفة الجدة لغرفتها
أرسلت رسالة لوالدتها (ماما ابشرك جدتي وافقت ازورك)
هيام بفرحة ارسلت ( الله يبشرك بالخير متى طيب تزوريني اخوانك مره مشتاقين يشوفوك)
مضاوي (ان شاء الله قريب)
وبشوق أرسلت (ماما صدق صدق عندي اخوان)
أرسلت هيام ( اذا جيتي تشوفينهم للحين يعاتبوني انك ما حضرتي حفلة عيد ميلادهم)
مضاوي (نعوضها ان شاء الله )
هيام (متى طيب )
مضاوي (اكلمك قبلها اكيد واتوقع بكرا او بعده جدتي اذا وعدت تنفذ بسرعة)
بعد يومين
تدخل الجدة لغرفة مضاوي
الجدة / مضاوي ما تسمعين من اليوم انادي
مضاوي / لا والله جدة ما سمعت
تنظر الجدة الي الملابس المبعثرة على السرير
الجدة بممازحة / وش عندتس تبين ترحلين
مضاوي / لا والله بس قاعده اجهز لبس لي إذا رحت اشوف امي واخواني محتارة وش البس
الجدة زفرة بتذمر/ طيب طيب تجهزي اجل اليوم عقب العصر خوذي العنوان بوديتس انا والسواق
بس اسمعي لا تعلمين هيام أنى معتس قولي جيت مع السواق لحالي
مضاوي با استغراب / ليش طيب ابي تنزلين معي استحي اول مره ادخل بيتهم
الجدة / وش تبين بي انتي روحي شوفي امتس واخوانتس وانا اجلس انتظرتس بالسيارة
مضاوي /أخاف أطول عليتس وانتي رجولتس ماتستحمل تطولين جالسة وصليني وارجعي للبيت
وانا عقب ادق عليتس أقول تعالي خوذيني
الجده بحنو / ماعليتس مني رجولي ماعليها طيبة با انتظرتس لو تبين لصبح بعد
مضاوي تحضن الجدة / والله ما أطول بس اشوف امي واخواني
احس قلبي بيطير من ضلوعي من الفرحة اذا تذكرت ان عندي اخوان
الجدة بعطف ومودة ابتسمت/ زين الله يتمم الافراح
تخرج الجدة من غرفة مضاوي
مضاوي ترسل رسالة لهيام
(جدتي وافقت اليوم بعد صلاة العصراجي )
هيام تتصل / مضاوي انتي متأكدة انها وافقت
مضاوي بفرحة / أي والله بس ما راح أطول مع المغرب لازم نرجع للبيت بدري جدي ما يدري
هيام / لا تطلبين أحد يجي معاكي تعالي لوحدك تحرجينهم وتجيبن لهم مشكلة إذا درو اهلهم
مضاوي بتلعثم / هاه أي اكيد بالحالي بجي
ارسلي لي العنوان
بعد صلاة العصر
مضاوي تدخل غرفة الجدة / انا جاهزة متى نمشي
الجده تضحك / كل هذي عجلة
اردفت وهي تنظر لها با اعجاب / ما شاء الله وش ها الزين ماخليتي شي ما لبستيه
مضاوي تضم يديها بسعادة / والله ياجدة ما تتخيلين وش كبر فرحتي
الجدة / يا الله هذا انا بلبس عباتي
ترى قلت لجدتس في درس بدار التحفيظ اليوم ابي مضاوي تروح معي وقال ما يخالف
اذا سألتس قولي رايحة مع امي احضر درس
والله يعيني على ها الكذبة ما تعود أبو جلال مني كذب
مضاوي تقبل راس الجدة وبا اعتذارورجاء/ والله داريه اني حديتس بس ابي اشوف امي واخواني
في السيارة مضاوي والجدة
مضاوي لسائق / ايوا وقف هنا هذا العنوان
مضاوي تفتح الباب بسرعة والجدة تمسك بيدها
الجده / اصبري لا تنزلين كلمي امتس تفتح واسأليها في أحد عندها
مضاوي بفرحه / بتنزلين يمه تسلمين
الجدة / لا وين انزل انا بجلس انتظرتس وانتي خوذي راحتس
مضاوي بفرحة / طيب
مضاوي تتصل بهيام لتفتح الباب
قبل ان تنزل مضاوي من السيارة
الجدة بحزن / مضاوي استودعتس الله وبوصيتس وانا امتس أي شي تشوفينه يريبتس لا تقعدين بسرعة اطلعي لاتلتفتين وراتس
مضاوي بخوف / جدة وش فيه امي سمعتيها تقول ما عندها أحد هي واخواني بالحالهم بس
الجدة زفرت بحزن وابتلعت غصة بحلقها / مافي شي انزلي شوفي الشغالة فتحت الباب انا بخلي السواق يبعد شوي عن الباب ما بي أحد يشوفنا
إشارة بيدها /بنوقف بمواقف ا لمحلات الي قدامنا وانتي خوذي راحتس
تنزل مضاوي من السيارة وتدخل بيت هيام
داخل منزل هيام الجديد في بنائه والفخم تأثيثه
هيام با استقبال وترحيب حارتحتضن مضاوي / اهلين مو متخيلة إنك قدامي
مضاوي با احراج ترفع غرتها ورى اذنها / هلافيك
هيام / ليش خجلانة هيك كأنك اول مره تطلعي تزوري حدا
مضاوي بتوتر / لا عادي بس عشان اول مره اطلع بدون جدتي
هيام / مين الي وصلك لهون
مضاوي / جدتي والسواق
هيام با استفهام واستغراب عقدت حاجبيها / ام جلال معاك وينا
مضاوي بتوتر / لا نزلتني ورجعت للبيت بتجي تاخذني مع المغرب
هيام تنهدت با ارتياح / أووف خوفتيني ابغى اخذ راحتي معاكي
اردفت هيام وهي تحتضنها / يا الله شو مشتاقة لأليك
وبحنو / نزلي عباتك ليش لابستها
مضاوي / عادي مرتاحة كذا
هيام / يا الله عن اذنك شوي وراجعة بخبر اخواتك إنك وصلتي
مضاوي / طيب
تنزل طرحتها على كتفها
مضاوي بنفسها / يا الله وش اللبس هذا الي امي لابسته
وهي تقول اخواني الحين كبار بالمتوسط يعني سن تمييز وهي قدامهم ببنطلون ما يجوز اللبس هذا قدامهم
التفت برعب للباب / بسم الله كأني شفت ظل رجال قدام الباب
اعوذبالله من الشيطان بس هي قالت انها ارملة ومافي الا اخواني وامي ما عندها اخوان
اكيد يتهيئ لي
يقاطع تفكير مضاوي دخول أولاد اثنين بعمر13 تقريبا
هيام بحب تبتسم / هذي اختكم مضاوي الي ازعجتوني تبون تشوفونها
تقف مضاوي وتسلم على الأولاد
هيام / هدولا اخواتك احمد ومعن
مضاوي تسلم بفرحة ممزوجة بخجل / كيف حالكم ما شاء الله فيكم شبه من بعض مره
يضحك احدى الاولاد /احنا تؤم
مضاوي بتعجب / ما شاء الله اول مره أدرى انكم تؤم ماما ما قالت لي
احمد يبتسم بخجل/كويس قالت لك ان عندها اولاد وانتي صدقتي
مضاوي تبتسم / بالعكس ما نادتني الا عشانكم وعشان نتعرف على بعض
معن يضحك وبممازحة/ احمد قصده ان ماما تحب تتشبب
مضاوي تبتسم بسعادة / ماما مايحتاج تتشبب هي شابه وجميلة ماشاء الله عليها
هيام بضحك / هذي بنتي الي ترفع معنوياتي ماهوا نتو وسوالفكم ثقيلة الدم
احمد يضحك بحرج / انتو فهمتوني غلط كثير من اصحابي الي شافو ماما ماكانو مصدقين انها امي
معن يلتفت لمضاوي / من جد اصحابنا مايصدقو
أردف بضحك / كيف لو قلنا عندنا اخت أكبر مننا راح يقولو عيال شاكر الكدابين
هيام تتنهد بوجع ممزوج بحزن / يقولو الي يبغو بس تكونون كلكم بحضني وقدام عيوني
تدخل الخادمة بعربية الضيافة
هيام بفرحة تضم يديها وترفع رأسها لسماء/ يا الله شو ها اليوم الحلو الي بنتي واولادي مجتمعين
جلست مضاوي بحرج/ ليش ياماما مكلفة على نفسك
هيام وهي تقدم القهوة وصحون الحلى امام مضاوي وببشاشة/ شو كلافة وماكلافة
اردفت / ما في غيرنا نزلي عبايتك لشو لابستها انتي مع امك واخواتك
مضاوي / ما أقدر انزلها استحي خليها لزيارات الثانية
هيام ابتسمت بحنو / براحتك
احمد يفرك يده برجاء / عادي ماما نروح نلعب سوني شوي ونرجع لمضاوي
هيام با انفعال / الحين وقت لعب وانتو ازعجتوني متى نشوف اختنا متى نشوفها
مضاوي بمقاطعة / عادي عادي انا من اهل البيت روحو كملو لعبكم
معن با اعتذار طفولي لمضاوي/ ماراح نطول بس احنا واصلين مرحلة وإذا ماكملنا راح نعيد اللعبة من جديد وماما السوني عندها بمواعيد محددة
هيام با استسلام تتأفف / خلاص بسرعة كملو ها المرحلة الي جننتكم وارجعوا نجلس مع بعض
اردفت وهي تلتفت لمضاوي /بعد شوي تجي كيكة طلبتها مخصوصة بمناسبة زيارة مضاوي
خرج التؤم من المجلس
مضاوي ابتسمت / شكلك مره شاده عليهم من ناحية السوني علشانه تركو جلستنا وراحو
هيام بحنو/ والله انتي الي ابغاك تجلسين معاي طول العمر لكن عمك رافض حسبي الله ونعم الوكيل بلي كان السبب
مضاوي / تكفين ماما لا تدعين على جدي
هيام بقهر وغيض / ليش عاجبك انهم رافضين حتى اني اسمع صوتك
مضاوي / ما عليك بنلقى طريقة تخلي جدي يسمح لنا نتواصل انا وانتي واخواني
هيام بتردد/ انا عندي طريقة تخليك دايم عندي
مضاوي بلهفه / قولي
هيام بتلعثم وارتباك / ولد زوجي انسان مره كويس وعنده خير وفلوس وزوجته توفت من قريب ويدور على زوجه
لو توافقين عليه اضمن لك أنك تكونين معاي طول العمر
اردفت / شو رايك اقترح عليه يخطبك هو بيعتبرني مثل امه
مضاوي بصدمة / ايش قلتي ما فهمت
يقاطعها صوت رجولي / ام معن وينك
يدخل رجل في أواسط الثلاثينات من العمر
التفتت بذعر ولبست بسرعة طرحتها ونقابها ووقفت.

لا تلهكم الرواية عن الصلاة
موعدنا القادم بأذن الله قريبآ

تسلم يمينك طيف 🍃

وما زال موضوع خطبة ثامر لمضاوي هو السائد على المشهد،،
لكن زاد اليوم عليه المواجهة بين الطرفين، وتراشق بالكلام، وكل واحد يبيّن للثاني رفضه للخطبة بصورة غير جيدة ، كأنه متقرف من الطرف الآخر،، هذا أشعل فتيل الحرب الباردة بينهم، وطبعاً ماراح يكون في صالحهم مسقبلاً.

هيام الخايبة هي سبب مشكلة ثامر وسجنه، لذلك من الطبيعي يرفض بنتها،،
والشايب له وجهة نظر،، ننتظر ليما نسمع منه.
مبروك الوظيفة يا ثامر، إن شاء الله إنها فاتحة خير لك.

رفعة وبنتها خلود شخصيتين بغيضتين،، نضمهم للشخصيات اللي ما بلعتهم😄

المقلب اللي سوته الخايبة في بنتها وضّح لنا مدى حكمة الجدة، وإن شكوكها في محلها، وكيف إنها ما أمّنت مضاوي عندها وهي أمها،،
لذلك انتظرتها في السيارة تحسّباً لأي طارئ..
هل بعد هالموقف قطعت مضاوي صلتها فيها؟

شكراً طيف،، بانتظارك.🍃🌺🍃

با اذن الله تعالى اليوم ينزل الفصل الرابع من الرواية

اتمنى اشوف ارائكم ونقدكم لرواية
ماتسطرونه في متصفحي جدآ يهمني