كاتب الموضوع :
طيف الأحباب
المنتدى :
قصص من وحي قلم الاعضاء
رد: للحب سجناء
الفصل الثاني
ضمت سعاد مضاوي / وش له الدموع والبكا جوابتس وعطيتيه
مضاوي بوجع مكبوت / برجع للمستشفى عند جدتي
سعاد / اطلعي لغرفتس إذا تبين اغراض منها خوذيها وانا بجلس انتظرتس
مضاوي تضع يديها على رقبتها / بااختنق تكفين إذا بتوصليني والا بروح مع السواق بالحالي
تنهض سعاد وتزفر بقلة حيله / يا الله مشينا اسبقيني لسيارة شوي ولاحقتس
خرجت مضاوي وركبت سيارة السائق وتوجهت سعاد لمجلس الرجال لتطمئن على والدها
قبلها بقليل في مجلس الرجال
دخل الجد يتوكأ على عصاه بغير الوجه الذي خرج
قام جميع من في المجلس وتوجهو للجد وحاوطوه بخوف
امسك فهد بيد الجد وبذعر / وش فيك يبه
ابعد الجد يده وجلس بتعب /ما في شي نسيت اخذ حبوب الضغط ودخت
مساعد بغضب / لا والله اكيد بنت الخايبة ازعلتك
الجد رفع نظرة لمساعد بغضب حاد/ انقلع لا اشوفك بمجلسي هذي بنت حزام مهي بنت الخايبة
فهد ينظر لمساعد بحنق/ وانت على طول جيت من اقصاك وما انت داري وش العلم
الجد بغضب رمى عصاه عليه / قم انقلع للحين مقابلني
سحب بدر مساعد لخارج المجلس وبرجاء / تكفى عمي امسحها بوجهي تعرف جدي اذا زعل ما يشوف الي قدامه
ثامر يلحق بدر الي خارج المجلس /عمي وش فيك احتديت انت وجدي
مساعد بقهر/ أنتم عميان والا تستغبون ابوي دخل داخل يكلم قليلة المعروف عن زواجها والجواب وااضح من وجه ابوي
ثامر با استفهام / قصدك رفضتني وجدي انقهر
امال فمه بااحتقار/ بطقاق وزين جت منها بعد انا يا الله بلعت الموضوع بكبره
بدر يحاول يهدي الوضع / يمكن السالفة غير الي بروسكم اصبروا على جدي يهدى شوي ويعلمنا وش فيه
مساعد يخرج من البيت يرافقه بدر وثامر
سيارة السائق امام باب النساء خرجت سعاد من الداخل فتحت باب السيارة لتركب
أسرع مساعد لهم امام بدر وثامر واتجه للجانب الذي تجلس فيه مضاوي أشار بيده بتهديد/ اسمعي انتي يالجاحدة
والله لو يصير في ابوي شي أنى ما اخسر فيتس الا الطلقة الي فلتت منها امتس
اتجهت له سعاد وامسكت بيده وبصوت منخفض / تعوذ من ابليس يا مساعد لا تفضحنا قدام الجيران ابوي ما فيه الا العافية توني دخلت عليه
اردفت / ماهو شي جديد على ابوي الدوخة اخذ علاج الضغط وماعليه طيب
مضاوي التي كأن الأمر لا يعنيها لم تلتفت ولم تتحرك من مكانها
بصق مساعد على السيارة بكل اشمئزاز / جاها العلم بنت الخايبة
صمتت سعاد لا تريد ان تجادل مساعد المعروف بعصبيته وسرعة انفعاله وتوجهت للباب الآخر وركبت وأمرت السائق ان يتحرك
امسكت بيد مضاوي المرتجفة / اهدي وش فيتس تنتفضين ماصارشي تعرفين مساعد يزعل بسرعة ويهجد عقبها
مضاوي تبتلع غصة بحلقها محاولة التماسك / وش يزعلني ما قال الا الصدق انا بنت الخايبة
امام بوابة المستشفى نزلت مضاوي ومعها سعاد
سعاد التفتت لمضاوي / بطلع معتس أسلم على امي قبل امشي
في غرفة الجدة رمت شنطتها على سرير المرافق
ودخلت لدورة المياه وأغلقت الباب خلفها وقفت تحت مياه الدش بملابسها وعباءتها
سعاد تسمع صوت المياه وتطرق باب الحمام / مضاوي ردي وش فيتس
مضاوي بحشرجة تتنحنح / ما في شي باخذ دش واطلع اصلي المغرب
سعاد / برجع لعيالي الله يعدي امتحاناتهم على خير
غادرت سعاد غرفة الجدة
داخل دورة المياه
مضاوي بحرقة تبكي تحت الدش ودموعها تفوق حرارة الماء المتدفق / ليش يعني انا مالي حق ارفض
اهلي على عيني وراسي محد يسوي سواتهم لي لكن الزواج قرار مصيري يخصني ما ابي ثامر ماابيه
انا ما كافحت ودرست واجتهدت الا عشان ابني لي مكانه بين الناس واتزوج زواج يرفع من مستواي ماهو يرجعني لورا
الذنب ماهو ذنبي يعاقبوني فيه عشان ماضي مالي دخل فيه
ذنبهم هم وبالدرجة الأولى وماراح اكون جائزة تعطى له بعد ما طلع من السجن
امي النيرة وصتني ما اجامل أحد على حساب مستقبلي محد ينفع مضاوي الا مضاوي
بعد صلاة العشاء
سعاد ترد على الجوال / هلا بدر
بدر / عمه وينتس
سعاد با استغراب / في بيتي
وبخوف / وش فيه
بدر/ مافي شي بس بغيت ندردش انا وانتي بموضوع
و با استفهام / عبد اللطيف موجود
سعاد / تعال حياك الله أبو أنور بدوامه ماهو حولك
بدر / دقيقة وافتحي الباب انا لاف على بيتكم
في مجلس بيت سعاد
سعاد بترحيب وبشاشة/ زارتنا البركة أي رياح طيبة ساقت لنا حضرة النقيب بدر بن عاصف
بدر بضيق/ خلي السلامات الحين
أردف / عمه ابي اعرف منتس الصدق وش صار داخل بين جدي ومضاوي
سعاد بااسف / والله يابدر ماصارشي يسبب كل ها الزوبعة الي صارت
ابوي قال لمضاوي ثامر الجلال خطبتس مني وانا عطيته
قاطعها بدر/ والجواب واضح من وجه جدي رفضت صح
سعاد / شي طبيعي ترى ان مضاوي ترفض ليش مستخسرين في البنت حق ابداء رائيها واختيارها
اردفت / تذكرون امي ما كان جايز لها ان ابوي يعيد ويزيد يوم كانت مضاوي صغيرة انه يبيها لثامر ماتبي يقولون اجبروا ها اليتيمة
بدر بقهر / والله لو عندي اخت بسن زواج أنى لأعرضها على ثامر ما افوته محد يعرفه كثري رجال بمعنى الكلمة
سعاد / كلنا عارفين ثامر ومحد يشكك برجولته وموقفه مع حمد الله يرحمه لكن البنت ما تبيه ياناس افهمو ماتبيه
بدر بتهكم عقد حاجبيه / ليه حضرتها بتاخذ أحسن منه وش اعتراضها عليه ولد عمها ومنها وفيها
وسجنه تدري انه مظلوم فيه
أردف با استفسار / طيب ما قالت لتس شي والا وش وجهت نظرها با الاعتراض
سعاد بضجر / هو يمدي أحد يقول شي ابوي من قالت لا طلع زعلان
وكملها مساعد غسل شراع البنت وفشلها قدامك انت وثامر
وصلتها للمستشفى ورجعت وهي حالتها حاله واكيد اعتراضها له سبب وجيه عندها
زفرت بضيق / دقيت عليها قبل شوي يا الله ترد تقول مصدعه وإذا محد بيزور تبي تنام قلت اليوم ما في أحد بيجي ريحي
بدريهز رأسه با امتعاض / والله من القو والعناد الي براسها
سعاد / يابدر مضاوي بنت طموحة مستقله بشخصيتها وعاقلة وعقلها يوزن بلد
بدر با استهزاء / واضح يوزن بلد يوم انجنت لين دخلت طب تحدت الكل ما همها اعتراضنا
سعاد با انتقاد / وش فيها دراسة الطب البنت موهوبة وشاطره أساسا حرام تنجبر على أي تخصص ما تبيه
بدر با امتعاض / والله لو ما عمتي نواظر وجدتي ساندوها كان انطقت با أي قسم وكملت غير المجال هذا
سعاد زفرت بملل/ البنت على وجه تخرج خلاص وأنتم تعيدون تزيدون للحين بدراستها
بدر/ لا نعيد ولا نزيد انا جيتس قلت بفهم منتس وش صار وخلاص انا ماشي
أردف بدر بضحك / مشكورة عمه على القهوة الي ما شربتها
سعاد وضعت يدها على صدرها بحرج / يا فضحي منك والله هبلتوني اليوم يا بيت ابن عاصف من أصبحت وانا طردي معكم
ابتسمت بود/ تكفى اجلس خلنا نتقهوى ونتعشى
بدر وهو يغادر/ الله يكثر خيرتس يا ام أنور مستعجل عندي شغلة بسويها والا جلست اليوم على قلبتس مع أنى داري انتس ماتحبين تشوفين أحد فترة الاختبارات
بدر يغادر بيت سعاد ودخل لبيت الجد الواقع امامه مباشرة لا يفصلهم الا شارع فرعي وفي راسه مخطط آخر
اتجه لغرفة ثامر طرق الباب أكثر من مره وفتحه
ثامر يتمدد على سريرة وبيده هاتفه التفت بفزع/ بسم الله
بدر بخوف / وش فيك روعتني اعوذبالله
ثامر بتذمر / يا اخي ما تعرف تدق الباب على طول دفشت
بدر / والله انت شكلك الي ساارح بعالمك دقيت ودخلت وبعدين مره ثانية قفل باب الغرفة بالمفتاح
منعا للأحراج يعني تعرف عيال عمك مخلوقين من الدفاشة
المهم وش عندك بجهة وجدك بجهة توقعت اجي القاكم جالسين و متراكين وسوالف وفلة حجاج
ثامر / جدي صلى العشاء ودخل قال بنام ودخلت غرفتي قلت بريح شوي
بدر / وش سويت خلصت اشغالك
ثامر/ أي الحمدلله ما قصروا عماني معارفهم واجد خدموني
بدر / لا تحمل نفسك جمالة لأحد محد سوى لك شي انت امورك قاضيه
أردف وهو يجلس على طرف السرير /ومتى نويت تطلع للخرج
ثامر حرك راسه بنفي / لا خلاص بروح جدة والا الطائف
بدر با استغراب / وش الي غير رايك
ثامر / الخرج ابداا ما كانت براسي لكن جدي وعمي فهد قالو عشان جامعة الشيخة
والخرج قريبة من الرياض تداوم وترجع للخرج وبما انها ولله الحمد رفضت
خلاص انفذ الي انا خططت عليه
بدر / ما علمتني بشي اعوذبالله انا لو اشرب كوب مويه عطيتك تقرير وانت الصمت الرهيب ما شاء الله عليك
أردف بدر / طيب كيف بتمشي امورك وانت ما تعرف أحد هناك
ثامر / واحد كان معي مسجون بقضية دين وعنده مؤسسة
قال لي إذا خلصت محكوميتك وطلعت بالسلامة وظيفتك عندي
بدر/ والله حرام تدفن نفسك بمؤسسة خاصة وراتبها جدآضئيل وانت ما شاء الله
ماجستير اقتصاد وبتفوق ماخذها
ثامر بيأس وتذمر عقد حاجبيه/ احمد ربي وابوس يدي مقلوبة إذا الوظيفة حصلت لي من يوظف راعي سوابق يابدر خلنا نكون واقعيين
بدر / عاد يااشينك إذا قمت تحلطم طيب انت ما قلت بتكمل دكتوراة
ثامر / اكيد بأذن الله
لكن ابي استقر بالوظيفة اول واشوف جامعة الملك عبد العزيز أقدر أكمل فيها
بدر / طيب انتظر كم يوم بسافر معاك
ثامر يبتسم / يااحبني لك خايف علي اضيع
بدر يضحك / لا والله بس بغير جو طفشت من روتين الدوام
وبعدين جدة والطائف كلها اعرفها كم مره اخذ دورات هناك
يا اخي بصير لك مرشد سياحي لا تحرمني ها الشرف
ثامر هز رأسه بموافقه / لو تبي من بكرا انا جاهز
بدر / تم أخلص كم شغلة واطلع معك بر
أردف بتردد/ ترى كنت جاي لموضوع ثاني
ثامر با استغراب / خير
بدر / ثامر بسألك وقل الصدق
ثامر بتوجس / قل الي بخاطرك ومالك الا الصدق
بدر/ لوجا أحد خطب مضاوي بيكون لك اعتراض اولك خاطر فيها
ثامر با استخفاف/ يا رجال روعتني
وبا استهزاء /عسى عندك لها معرس يفكنا منها
وبا امتعاض/ والله ولا عمرها جت في بالي اذكر زي الحلم يوم انا صغير عمي حزام الله يرحمه دايم يمزح يقول ترى جدك خطب بنتي لك
بدر بوجع / الله يرحمه كان فرحان بها و دايم شايلها ما يخليها تنزل الأرض اما بحضنه والا على كتوفه
ثامر / الله يرحمه ويغفرله
أردف وهو يخلل شعره با اصابعه / يا رجال جبل كاتم على صدري من هم الارتباط فيها
لكن شفت جدي متلهف على زواجها وطاوعته والحمدلله جت منها
بدر بمعاتبة لطيفة ابتسم/ لا تستحقر مضاوي والله ما شفت بنت تخطب مثلها
ثامر با احتقار / ويومها تخطب ورى جدي وعماني ما زوجوها
ويمسك رقبته با استهزاء / شوي ويربطها جدي مع رقبتها يسحبها لي ويقول خذ ها البلوى
بدر يضحك / ما هو عاد الي ذ الدرجة ترى البنت معروفه بزينها
ثامر بتقزز/ الله يقطع زين أمها الي جاب لنا الشر
بدر بمقاطعة / أمها راحت خلاص بخيرها وشرها ما يدري هي حيه والا ميته لكن جدك وعمانك رافضين المناقشة انها تطلع برا
ثامر / والسبب طيب
بدر / جدي سافطها لك وعياله معه وكل من جاهم قالو ولد جلال حاجرها
ثامر با استغراب وسخريه / والله ولد جلال لو ما خاطر جده انه حتى الاسم الي يربطني فيها غيرته
بدر / طيب تعال معي ابي جدي بسالفة عساه ما رقد بس
بيت الجد كان تصميمه الدور الأرضي غرفة الجد بجانبها دورة مياه خاصه للجد
وبجانبها غرفة أخرى بنظام جناح للجدة والتي طلبت ان تكون مستقله وخاصه بها لتجلس فيها مع بناتها
وغرفة كانت مجلس نسائي داخلي خاص بجانب غرفة الجدة رتبوها فيما بعد لثامر بعد ان خرج من السجن امر الجد بأن تفرش له
ومجلس نساء كبير بجانبه دورة مياه ومغاسل خاصة بمجلس النساء وصالة كبيرة مفتوحة اثثت نصفها بكنب مرتفع والنصف الاخر بجلسة أرضية
ومطبخ له ثلاثة ابواب باب يفتح للمقلط الكبير الذي كان بين قسمي الرجال والنساء وملحق به دورة مياه ومغاسل
وباب لداخل البيت وباب يفتح لسور البيت الخاص بالقسم النسائي
الذي يوجد في زاويته طاولة رخامية كبيرة ثابته في الأرض مع كراسيها عرفت بأنها خاصة بمضاوي
وخلف البيت مخزن كبير من جهة قسم النساء لمؤنة البيت وطبخ عزائم الجد الخاصة او عندما تجتمع العائلة يوم الجمعة
والجهة الاخرى كان يوجد سور فيه مجلس كبير لرجال ويقابله مشب أكثر ما يستخدم في فصل الشتاء ودورات مياه لرجال ومغاسل
وبايكة مظلله بداخلها يركن جمس يرجع موديله الي اكثر من خمسون عامآ خاص للجد
وغرفة لسائق بيت الجد تفتح على الشارع الذي يفصل بين بيته وبيوت ابنائه المقابلة له
بيت سعاد يقابلة مباشرة وبجانبه بيت سلطان وبجانبه بيت مساعد
وبيت فهد ملاصق لبيت الجد فقط يفصل بينهم جدار بجانب بيت فهد من الجهه الأخرى ارض مسورة بنى مؤخرآ فيه ملحق
ومواقف لسيارات خاصة له ولأولاده
الدور الثاني كان نظام اجنحه تم تصميمه با الاتفاق مع الجد والجدة والابناء
الغرف كانت اجنحه كل غرفه ملحق بها دورة مياه
غرفه لسعاد وغرفة لنواظر وغرفة لمضاوي وصالة كبيرة وغرفة للعفش
ومصعد بجانب الدرج المؤدي لدور الثاني والثالث تم وضعه مؤخرآ من اجل الجد والجدة
ولكن لا يستخدم كثيرا منذ ان تعبت الجدة
والدور الثالث غرفة للخادمات ملحق بها غرفة صغيرة للغسيل ودورة مياه
بدر وثامر امام باب غرفة الجد المفتوح
بدر / جدي انت راقد
الجد يجلس على حافة السرير/ ايه راقد وش عندك هاجدنا توالي الليول ما وراك دوام
بدر يدخل لغرفة جده ويضحك يقبل انف جده والتفت لثامر / تعال وش عندك ساد الباب بغيت ابن عاصف بسالفة وابيك تحضرها
دخل ثامر والجد ينتقل بنظره لأحفاده / عسى خير ياولد فهد وش فيه
بدر بتردد وتوجس / جدي وش تعدني من الرياجيل
الجد با استهزاء / مرجوج ومطيورومهايطي وش غيره
بدر يضحك / جعلني فدا خشمك ابي الصدق بروح اخطب لي من عرب وابيك جاهه لي
الجد بغضب / وبنت مساعد ما قال ابوك انكم لكم خاطر بها
بدر ابتلع ريقه وبتوتر حاول ان يخفيه / بنت عمي الله يوفقها والخطبة من الحريم
والي جاي اخطبها بعد بنت عمي
الجد بتهديد / اسمع يا بديران بناتي ماهن لعبه عندكم مره تبون هذي ومره هذيتس
أردف وهو يحرك رأسة /اعرف كلها اشوار نسوان بغن وانفرن
بدر / والله العظيم شوري ذا من راسي وانت ما عرفت من ابي والفكرة كلها جت في بالي اليوم
وللحين حتى ما شفت لا امي ولا اختي عشان تقول نفرن بنت عمي
يقاطعه ثامر / جدي شف بدر وش عنده كل شي با الخناق الا الزواج با الاتفاق
الجد يناظر لثامر بغضب / وانت يا الكمخة عساك جاي جاهه تخطب له
ثامربا احراج / والله انا مثلك تفاجئت من كلامه واول مره أدرى انه خاطب من عماني
الجد بحزم واستنكار / وانت عارف بدر من يبي يخطب
ثامر با استغراب / لا والله ما ادري وبنات عماني الله يستر عليهن ما عرفهن و كلهن خير وبركة
الجد يقف بغضب / بدر جاي يخطب مضاوي
بدر بتعجب / وش دراك والله ان هذي الي اقصدها
الجد بتهكم امسك بلحيته / والله ياولدي ان كان الأيام ما درستني اجل ما من فايدة من ها الشيبات
الجد ينظر لساعته / من دخلت وتسحب وراك ثامر دريت هذا هدفك
اردف / تعوذ من ابليس يا بديران
بدر / بس ياجدي
الجد يقاطعه بعطف / لو انها بخاطرك وتبيها صدق أنى غير اشاورها
لكن خطبتك فزعة أنى حلفت انها ما تطلع من بيت العاصف
بدر / ياجدي الحريم واحد ومضاوي مثلها مثل أي وحده من بنات عماني
أردف /يوم رفضت ثامر وهو ماله خاطر فيها انا أولى واحد فيها بعد ثامر
الجد بسخرية / عندي خبر حتى ان ماجد بعد يبي يخطبها لكن هي ما تبيه
اردف وهو يشير لبدر/ وهو اطيب من وجهك وشلون تبيها توافق عليك
ثامر / ياجدي البنت يمكن ما تبي من العايلة إذا جاها رجال مناسب زوجها لا توقف نصيبها علينا
الجد بغضب وانفعال / وانا حلفت ماياخذها غيرك طال الزمان والا قصر
ان كاني فوق الأرض والا تحتها مالها عن لحيتك رضت والا انرضت ومصيرها بتطخ إذا مهو اليوم بكرة
أردف الجد / يا الله كلن يسري يشوف الي وراه ابي ارقد
غادر بدر وثامر غرفة الجد وبالمجلس الخارجي
بدر بملامة لنفسه / والله ماهو قصدي ان الموضوع يتطور لكذا وجدي يحلف عليك ها الحلف
ثامرابتسم / تعوذ من ابليس ولا تشل هم ما يصير الا الي ربك كاتبة
بدر بتذمر / لا والله انا الي بغيت اكحلها واعميتها
ثامر يضحك / انا اشهد أنك بغيت تعمي حظك مره وحده لو جدي طايعك
بدر / والحين وش بتسوي عقب حلف جدي
ثامر / ما عليك بنت عمنا عوبه ما راح يمشي عليها لا كلام جدي ولا غيره يعني برد على قلبك ها الزواجة ماراح تتم
بدر يضحك / بهذي معك حق هي عوبا عوبا وعناد في راسها قذيفة ار بي جي ما تأثر عليه
زفر بتعجب / كلن له من اسم سميه نصيب
ثامر ينظر لساعته / راح الوقت انت وراك دوام وانا رجال عطال بطال بجهز اغراضي عشان نمشي
بدر / تصبح على خير
ثامر / والقايل بخير
قبلها بساعات في غرفة الجدة في المستشفى
سعاد تتصل باالخادمة / سوناتي ليش مضاوي ماترد على الجوال
الخادمة / مضاوي في حمام لسى ما يطلع
سعاد / دقي باب الحمام عليها قولي لها مدام سعاد تقول ردي على الجوال
والا كلنا بنجي نشوف وش فيها
الخادمة / خلاص مدام خمسة دقيقة بعدين كلم
الخادمة تطرق باب الحمام / مضاوي افتحي الباب مدام سعاد يقول ردي على الجوال والا كل بيت بابا جدو يجي مستشفى
مضاوي من ورى الباب / طيب طيب انا طالعة
اردفت مضاوي / سوناتي عطيني ملابس بغير ملابسي كلها موية
بعد ربع ساعة
مضاوي ترد على جوالها / هلا عميمه وش بغيتي
سعاد بغضب / وش فيتس خوفتيني
شوفي جوالتس كم مكالمة جتس عليه
سناء مره ضااق صدرها عليتس تبي تجي تشوفتس وعييت عليها
مضاوي / لا بس مصدعه شوي باخذ بنادول وانام
اردفت /أحد بيجي منكم لزيارة المغرب
سعاد / لا ما ضنيت اليوم ريحي العالم للحين ماخلصو امتحاناتهم والي خلصوا منصرعين من الإرهاق من بكرا بيبدا الازعاج
مضاوي بملل/ طيب مومشكلة سناء على الخط بشوف وش عندها
سعاد / يا الله استودعتكم الله
سناء با انفعال ونرفزة / انتي وينتس عن الجوال من متى وانا معلقة على الخط يرن ماتردين
لا تقولين نايمة لأني ماراح اصدقتس
مضاوي بضجر وتأفف/ لا ما نمت بنام شوي جوالي صامت وما انتبهت له
سناء با استفهام / صاير شي اليوم بينتس وبين جدي
مضاوي بحنق ومن بين اسنانها/ سناء رجاااااائن ما ابي اسمع أي تعليق على ها الموضوع انا تعبانة برتاح
مضغوطة طول السنة عطوني فرصة أشبع نوم اريح مخي بعدين نسولف بلي تبون
اردفت وهي تضغط على جبينها / بقفل جوالي نبهي على البنات بالقروب أي شي يبونه يكلمون سوناتي على الجوال الثاني يا الله مع السلامة
اغلقت هاتفها ووضعته جانبا
الخادمة مدة لها منشفة / مضاوي شعرك مويه بعدين تتعبين
ابتسمت مضاوي با استهجان واخذت المنشفة من الخادمة ولفت بها شعرها / والله يا سوناتي صرت امشي بلا عقل نسيت حتى انشف شعري
زين بعد طلعت عليتس لابسة ملابسي
جلست بجانب سرير الجدة وامسكت يدها وبينها وبين نفسها / انا بحيرة وش اسوي ارضخ لطلب جدي واضيع مستقبلي
والا أصر على الرفض وأكمل مشواري الي بديته
ثامر ما هو حلمي ولا الزواج بواحد مثله يحقق طموحي
انا بعد التخرج ابي ابتعث للخارج وأكمل ماستر ابي اتحدا نفسي واتفوق عليها
ما عندي ظهر يسندني غير شهادتي لا اب ولا اخ
ما عاد لي الا الله ثم انتي وجدي ماقصرتو معي من صغري ضميتوني وربيتوني ولا خليتم احد يضيمني ولا ذقت مرارة اليتم دينكم برقبتي للممات
ياليتك تسمعين شكواي وتدليني على الحل زي قبل يوم كل مشكلة يا ام جلال تصنعين لها حل
مثل مشكلتي مع امي الي لوما حكمتس وحسن تصرفك كان ضعت
قبل ست سنوات بعد خروج اخر المعازيم
مضاوي بغرفتها تخزن رقم أمها بجوالها
مضاوي بحيرة وفضول/ أكلمها اشوف وش عندها والا انتظر لحد ماهي تكلمني
قاطع تفكيرها نغمة رسالة لجوال مضاوي من رقم أمها / إذا انتي لوحدك عطيني رنة ابي اكلمك ضروري
{أمك هيام}
مضاوي بيد ترتجف تضغط على زر الاتصال وتقفل الخط
ثواني رنين الجوال لنفس الرقم
هيام/ هلا مضاوي عندك حدا
مضاوي / لا بالحالي بغرفتي
هيام / مشو ضيوفكم
مضاوي / ايوا من زمان وش بغيتي أخاف امي تمر غرفتي وتزعل إذا شافتني اكلم في ها الوقت
هيام/ ليش بيعاملوك هيك ما انتي صغيرة بيحطو عليك جهاز مراقبه والا عشانك ما انتي بنتهم
مضاوي / لا عادي جداني مع الكل كذا حتى بنات عماني امي النيرة ما تسمح لهن يكلمون بها الأوقات
هيام بغضب / شو امي وامي هي زوجة عمك خالة والا عمه وكتير عليها
مضاوي بوجع / والله ما خبرت لي ام غيرها
هيام تبكي / ما هو منك من الشي الي عبو راسك فيه
حسبي الله عليهم الظلمة حرموني منك وانتي صغيرة وبيمنعوني اشوفك وانتي كبيره
استمرت المكالمة بين مضاوي وهيام من منتصف الليل الي قبل آذان الفجر بقليل
مكالمة جرت بعدها عدت مكالمات
استطاعت هيام تسيطر على أفكار مضاوي وتجذبها لها
بعدها با اسبوع
الجده تطرق باب غرفة مضاوي وتدخل / ضوه وش ها النومة العوجه يا امتس ماهي لتس عاده
مضاوي تفتح عيونها بصعوبة / كم الساعة
الجدة / ما عاد الا خير آذن الاذان الأول وجدتس طلع لصلاة الجمعة
مضاوي برعب / ما صليت الفجر يويلي من ربي
الجدة با استغراب / ماهي عوايدتس تغسلي لصلاة واقضي فرضتس
خرجت الجدة من غرفة مضاوي وهي متأكدة ان وجه مضاوي يخفي امرا ما
مضاوي بعد صلاة الجمعة
مضاوي تتهرب من الجدة/ جدة بروح غرفتي بغيتي شي
الجده / سلامتس شفتي الغدا تخبرين الشغالة لازم لها مراقبه
مضاوي / ايوا كل شي جاهز بالمطبخ شيكت عليه
الجدة نظرت لساعتها / الحين يجون البنات
با استغراب / غريبة تفوتين الجلسة معهن يوم الجمعة
وبا استفهام /أحد مكدر خاطرتس
مضاوي / لا والله بس شوي مصدعه برقد لين صلاة العصر
الجدة بتوجس / على راحتس لكن إذا في خاطرتس شي او عندتس علم ودتس تشورين جدتس فيه
تدلين غرفتها
مضاوي تقبل راس الجدة / ما في شي جعلني ماخلا منتس
بعد الغداء في مجلس النساء في بيت الجد غادر جميع النساء لم يبقى الا الجدة وبناتها
سعاد/ يمه غريبة نومة مضاوي لا يكون بس طقتها عين من حفلكم الأسبوع الي فات
الجده / لا بسم الله عليها مصدعه شوي امس ما نامت مقابله الشغالات يرتبون المخزن والمطبخ ما بقى شي على رمضان الله يجيبه بخير وسلامة
نواظربا استهزاء / قولي يمكن طقها الغرور على بالها ما في أحد مثل تقديرها
سعاد با انتقاد/ اذكري الله على البنت
نواظر تمط فاها بتهكم/ ما شاء الله وش قلنا يعني بحسدها
سعاد با استهجان / يا الله كيف تدورين الزلة عليها
حركت رأسها بحيرة / ودي اعرف السر الي خلاتس توقفين معها وتقنعين ابوي يسمح لها تدخل طب
الجده بمقاطعة / انا اعلمتس السر نواظر هدفها اهل رجلها إذا درو
ان بنت عمها عيوا أهلها تدرس الدراسة الي هي تبيها تنهز صورتها قدامهم تخبرين اختس مهايطيه
نواظر / انا مهايطيه هذا جزاتي أنى وقفت معتس انتي وهي عشان تدخل القسم الي هي تبيه
الجدة تغمز بعينها / لو مالتس مصلحة سحبتي نفستس ولا فتحتي فمتس بكلمة لكن عاد جت الحمدلله من مصلحة بنيتي
نواظر / يعني يمه هذا فكرتس عني
الجدة / هذي مهي فكره هذا الصدز وانا امتس اهل رجلتس ناس ماشاء الله واصلين بالعلم
وانتي مالومتس تجارينهم
ودتس بعد ان اهلتس عندهم شي تفتخرين به وماقصرتي مع بنت عمتس
والله انها تحسب لتس من عندي جماله وطيب يوم وقفتي معها
سعاد بضحك / برافو عليها حبيبة عمتها جابتس على خشمتس وانتي حتى وجه ماتعطينها
نواظر / وش على خشمي ارتقي با الفاظتس يااختي الي في قلبي عليها والله من شي سوته أمها كل ما ناظرت وجها تذكرت ذيك الليالي السود
نسخة وجه امها ليت ربي ما كان جابها لاهي ولا امها
الجدة / اقطعي واخسي مضاوي بنتي والي يزعلها يزعلني مهو ذنبها ان حظها العاثر جات على امآ مثل هذي
والله انها ابرك و أبر منكن يابناتي وتراعي خاطري أكثر منكن
وانتن بناتي لحمي ودمي وهي حي الله ابوها ولد عمي وعم عيالي
ترى هي الي قايمة بها البيت ومريحتكن انتن وحريم اخوانكن وعزايم ابوكن الي ما توقف
ومواعيدي ما تفوتها دروسها تنقلها معها مره تقرا مره تكتب والا تراكض ورى علاجاتي
وبا امتنان اردفت / وش الي يحدها غير طيب معدنها كان قالت عندي مدرسة وماني فاضية من بيلوم عليها
والله محد مثل مضاوي لنا
قاطعهم صوت مضاوي تنادي / يمه في احد عندتس
سعاد/ هلا حياتس ما في احد
تدخل مضاوي وتسلم / وين البنات شكل راحت علي نومه
سعاد تبتسم بود/ وش النومة ذي دخلت عليتس الغرفة تعبت وانا اصحيتس
اردفت سعاد / ماشاء الله شكلتس بتحللين العطلة من أولها
نواظر تلتفت لمضاوي با انتقاد وملامة / خلي عنتس النوم والربادة وابحثي بالقسم الي تبين تتخصصين فيه
مضاوي / عمه احس بدري على التخصص الحين سنه تحضيرية
نواظر / وش بدري الأيام تمشي بسرعة
والتحضيري ما اعتقد بيكون صعب عليتس بتعدينه ان شاء الله بتفوق يعتمد على الانجلش وانتي لغتك ما شاء الله ممتازة
سعاد/ الله يعينتس على الشقى ليتس دخلتي حاسب والا انجليزي اربع سنوات وتتخرجين هذي كم سنه وانتي بجهاد
اردفت سعاد بشفقه/ احس الدكاترة طول عمرهم يذاكرون
نواظر / هي ما أقدمت على ها الخطوة الي هي عارفه العواقب لا تفشلينا يامضاوي
مضاوي / لا ان شاء الله انا ما قررت ها القرار الا بعد استخارة وان شاء الله أنى قدها
التفتت لسعاد / اكيد طول عمرهم يذاكرون الطبيب لازم يطور من نفسه والمعلومات الطبية تتغير با استمرار
الجدة / انتن بسم الله وش فيكن عليها من دخلت استلمتنها لاحقه على الدراسة
بعدها بقليل غادرو سعاد ونواظر منزل والدهن
مضاوي بخجل / جدة سمعت كلامتس انتي وعمتي نواظر
اردفت / ليه احتديتي عليها تراها ماقصرت معي
الجدة / احتديت ماعاد ابيها تغثتس بكلمة
الجدة تبتسم / ذبحتنا كل ماقامت انا وانا
اردفت بممازحة / كسحتها وانا امتس كسح والله ما عاد تضايقتس
مضاوي / عادي خليها تقول الي تبي أدرى من ورى قلبها حتى لو عصبت علي
الجدة / ما علينا منها تسولف وتسكت
الجدة/ مضاوي
مضاوي تلتفت بسرعة للجده/لبيه
الجدة بموده /لبيتي بمنى ماعندتس شي ودتس تقولينه لي
مضاوي بتردد وتوتر / هاه لا ما في شي سلامتس
استمرت مكالمات هيام لمضاوي بخفيه عن اهل المنزل
وفي احدى الليالي اثناء مكالمة هيام لمضاوي
هيام / ما باقي شي على بداية الدراسة وانا ابيك عندي تدرسي
مضاوي / يمه والله ما أقدر افجع جدي بها الطلب وادري بيرفض
هيام/ شو يرفض انتي الحين داخله على عمر 18 سنة وهو أساسا عمك ماله حق فيك متلي
لو ارفع قضية عليه من بكرا المحكمة تلزمه يسلمك لي
مضاوي بذعر / لا يمه تكفين والله جدي يموت لو سويتي كذا
اردفت بعطف / هذي جدي مستحيل اقهره لو ايش ماكان
هيام بضجر/ طيب طيب ابيك تزوريني والا هذي بعد يموت ازا عرف
اردفت / كم لي وانا اطلبك زيارة او صورة وانتي رافضة
مضاوي / بحاول خلاص
هيام / الأسبوع الجاي يوم ميلاد اخواتك راح أسوي لهم حفلة بسيطة وفرصة تتعرفين عليهم
مضاوي / خلاص أحاول
في الوقت الحاضر
في اليوم التالي في وقت الزيارة
الزوار سناء وشروق ومنار وبتول بنت نواظر وام ماجد وام بدر
مضاوي بترحيب/ ياحي الله من جانا في مستشفانا
ام ماجد(رفعة) با استهزاء/ يا دافع البلا مستشفاتس مره وحده
منار بحرج / يمه مضاوي صادقة مستشفاها كم لها مرافقه مع جدتي
التفتت لمضاوي / صح قربت تكملين سنتين هنا
مضاوي با ابتسامة جانبية تحرك أصابع يدها / ابشرتس أربع اترام دراسية
اردفت مضاوي / غريبة اليوم على غير العادة زيارتكم من كل بيت فرد والزيارة نسائية
ام بدر(نورة) تضحك / ما غريب الا الشيطان من دوشة الامتحانات ما شفنا خالتي
وشروق ابشرتس تحدد عرسها قلت بنشوف خالتي قبل انشغل مع جهاز بنتي
مضاوي بفرحة / ما شاء الله اول عرايس عايلتنا الف الف مبروك والعقبى للعزابية
ام بدر(نورة ) / الله يبارك بعمرتس و
قاطعتها ام ماجد با استغراب / افااا يانورة توتس تعلمينا
ام بدر بتبرير/ ما علمونا الا امس يابنت الحلال
اردفت / أبو الولد كلم فهد وقال حجزنا القاعة يبون عرس رياجيل اول وبعدين ابوها بيزين لها حفله خاصه إذا رجعوا من السفر
التفتت سناء لأم ماجد/ من يوم ملكو قبل سنة وهو معروف ان زواج شروق بعد مايرجع أبو طلال
ام ماجد بعتب / لا ماش ام بدر ما عاد هي حماتي الاوله صرنا ندري با اخبارها متأخر مثل الناس البعيدة
مضاوي تضحك بمحاوله لتبسيط الموضوع/ يابنت الحلال الدعوة كلها سهالات هذا انا دريت معتس وعادي اهم شي ربي يوفقها
بتول بقهر تزم شفتيها / وش ذا الحكم عرس الرجال اول شي سلامات نبي ننبسط ونرقص ونحس عندنا عروسة
سناء / ما علينا منهم نزين حفله ونرقص ونفلها ولا أخليها بخاطرتس
بتول تضم سناء / ياالبيه يا بنت خالي عساني ما خلا منك
شروق بممازحة / انتن بدال ها المشاعر الفياضة وين سلال القهوة والشاي
واكياس الحلى عسى مانسيتوها
منار تمسك بجبينها / نسيتها بسيارة السواق اعتمدت عليكن
ام ماجد ترفع ايديها لسماء / الله يخلف علي وانا كم وصاه موصيتس لاتنزلين الا الأغراض معتس
سناء تضحك وبممازحة/ كله من بتولة شوقها لمضاوي نساها تذكرنا
ام بدر تضحك / ما عليه انا اكلم السواق يطلعها لنا
بعد انتهاء الزيارة
تخرج ام ما جد وبنتها منار وام بدر وبتول
مضاوي / ما شاء الله وانتن وش مجلسكن
سناء تنسدح على سرير المرافق / ليش ما اشتقتي لنا يا الظالمة
مضاوي بممازحة / اشتاق لكم لكن إذا انتن الثنتين مع بعض بصراحة أخاف ادري وراكن بلا
شروق / اهب عليتس يا المتشائمة تفاولي خير
سناء / بما أنى طلعت حاملة مادة وبيتأخر تخرجي فصل دراسي كامل
مدت يدها لشروق / بالله اشرحي لنا وش كان شعورتس اخر يوم با الاختبار وترم التخرج يوم تخرجتي قبلنا
شروق تضحك / سوالتس متأخر سنتين
اردفت بفرحة/ شعور ما يوصف لدرجة ماكنت مصدقة لين شفت الوثيقة بعيني
مضاوي / ياارب متى اشوف ها الوثيقة الي حاسة بموت ما كحلت عيني بشوفتها
سناء / والله ما كذبت شروق انتس ام التشائم هذا كيف لو ما انتي مضاوي الحزام على سن ورمح
الله يرحم حالي اجل انا وش اقول
شروق / وجع انتي الثانية اذكري الله عليها
سناء بممازحة / تف بسم الله عليتس
مضاوي با ابتسامة ودودة / سنو تشوفني بعيون المحب
سناء / أقول بس ترى انا الي بنام على السرير انتن دبرن اعماركن
مضاوي / هذي غرفة خاصة ما يقصرون معتس يا المشفوحة
سناء / أي والله نسيت جعل عمر عمي فهد طويل
شروق تقف بجانب سرير الجدة وتمسك يد الجدة وتقبلها / يا الله يابنات من جد الدنيا ماتسوى
من يقول جدتي النيرة تطيح كذا
مضاوي / تدرين اني للحين مصدومة كيف ذيك الانسانة الجبارة بهيبتها يهزمها المرض
سناء / والله يابنات أنى كنت أخاف منها أكثر من امي وابوي
ودايم وانا صغيرة أقول ياحظ مضاوي ولا مره شفت جدتي تهاوشها ما غير تقرص وتكفخ بنا
مضاوي بضحك / انا اعرفها وش تبي من عيونها أدرى هذا يزعلها وهذا يرضيها
شروق / والله انا ازيد منتس ياسناء كنت اخاف منها أكثر من اهلي
مضاوي با الم وحزن /هذي جدتي طول عمرها توجع بالنصيحة لكن تنبهك لشي يقعد درس لك طول عمرك
اردفت بوجع خفي / الله يخلي من بكاني وماضحك علي الناس
سناء / الحين جدتي ماافي امل تتشافى ابدا
مضاوي تحرك رأسها با اسف / الجلطات انهت جسمها والعمر له دوره
المفروض يحولونها لنقاهة لكن عمي فهد ما وافق حجز لها غرفة خاصة هنا والدكاترة با استمرار يمرون
شروق / والله ابوي يبيها عندنا بالبيت لكن الدكاترة رفضوا
مضاوي / يوووه لا عادت يوم عاند هو وعمي مساعد وطلعوها للبيت أسبوع شوي وتموت اعوذبالله
سناء / أي اذكر يوم جا حلقها التهاب
مضاوي التفت للجدة بحزن / أنبوب التغذية تلوث عشان وضعها لازم مكان مجهز ومعقم
شروق بعطف وشفقة / يبونها قريبة منهم
مضاوي / دارية والله ان القصد من الي سووه يبون يبرونها لكن بعض أمور تجبرك على غير ما تحب
اردفت مضاوي / بالله غيرو ها السيرة الي تضيق الخلق خلونا بعرس شروق
سناء بضحك / وانتي مصدقة ان شروق توها تدري بموعد زواجها
مضاوي با استغراب / ليش ماهو تو حددوه
سناء / لا اعلنو تو بس شروق عارفه وقاضيه شغلها من زمان
اردفت / أبو رجلها ماكان عنده دورة عسكرية بالخارج وتوه الي رجع وحددو العرس
مضاوي تضع يدها على جبينها / نسيت ان شروق تتواصل معاه بالجوال
سناء بممازحة / جبتي طاريه الحين يدق عليها والا يرسل يدورها
شروق تضحك / ابشرتس الجوال قفلته وتركته بالبيت الشحن فضى والشاحن ضايع
سناء / ان كيدكن عظيم
اردفت وهي ترفع حواجبها بتشويق / عندي لتس خبر طازج تو صار بعايلتنا
ضحكت مضاوي وغمزت بعينها / تدرين حسيت ورى رفعة علم بس كل ماجت تفتح فمها خالتي ام بدر ضيعت السالفة
اردفت با استغراب / بس وش الخبر الي خلا ام ماجد بجلالة قدرها وهي ما تطيقني تجي معكن
بالعادة تمر إذا انا طالعه للبيت وإذا صادفتني دقيقة وتطلع ماتقعد معي الا اذا في شي تبي تغثني فيه
سناء بسخرية امالة فمها / تبي تصب با اذنتس خبر بدر ولد عمي خطبتس من جدي
مضاوي وقفت بذعر/ وش تقولين انتي صاحية
سناء / يابنت خليني اكمل السالفة
مضاوي التفتت لشروق / اخوتس وش فيه انهبل
شروق / انتي اسمعي السالفة اعوذبالله اكلتينا
جلست مضاوي على كرسي مقابل سرير المرافق وكتفت يديها لصدرها ووضعت رجل على رجل / يا الله اشوف كملي
اردفت وهي تهز ساقاه بعصبية وتوتر/ أنتن ماجيتن الليلة مع بعض الا وراكن بلا
شروق / انا اعلمتس با اختصارأبو الفزعات بدرراح لجدي وقال إذا مضاوي ما تبي ثامر انا ابيها
وجانا جدي للبيت سوى حفله على ابوي وحلف ان بدر يملك على سناء
مضاوي بضحك تصفق يديها ببعض / كفو جدي ازين ماسوى ومتى الملكة
سناء بتهكم ترفع حاجبها / ومن قال لكم أني موافقة
شروق بغضب / ليش هو لعب بزران وش غير رايتس ماتقولين استخرت وموافقة باقي بس تفحصون
سناء بحدة / أي لعب بزران انا ماني لعبة عند مهايط اخوتس كل شوي داق الصدر يبي ينقذ موقف على حساب حياتنا وش يضمني ما يكررها
مضاوي با انفعال ومن بيني اسنانها بصوت منخفض / قصرن اصواتكن فضحتنا بالمرضى والا الحين اكلم عمي فهد يرسل احد يجي يقلعكن
شروق بقهر واغروغت عيناها بالدموع / انتي شايفة المهبولة ذي وش تقول والله لو تنفذ كلامها ان بدر ينجن وبدرما يستاهل من يقهره
مضاوي بمحاولة تهدئة ابتسمت / ام دميعه اكيد سناء تمزح وانتي اعوذبالله طرطعتي على طول والدموع شلال ياكافي
سناء بضحك / اكيد امزح والا انا فاقده عقلي أخلى واحد مثل بدر
لكن بغيت اوريكم كيف القهر من الحركة الي سواها
شروق تمسح دموعها / وجع والله صدقتس وما تخيلت الا المشاكل والمصايب الي بتصيير إذا نفذتي كلامتس
وبقهراردفت / لا ومن زين الحظ يوم قرب عرسي
مضاوي / الله أكبر على طول برمجتيها بمختس يا ام خيال واسع ماصاير الا الخير ان وافقت سنو والا رفضت
شروق بذهول / انتي صاحية تفكرين كذا والله ما تعدي على خير وانتس اول خيار من ابوي وجدي لبدر
ما تبين هذا خوذي هذا ما تعرفينهم
مضاوي بعصبية / سلامات لعبه انا عندهم من ثامر لبدر انا مبدأ الزواج كله رافضته
سناء / مضاوي ترى شروق صادقة عمتي سعاد مستغربتها منتس تقول مضاوي ما عطت ابوي فرصة يمكن لو قالت أفكر وارد خبر وبعدين ناقشته
يمكن تقنعه او يقنعها
اردفت سناء / تدرين عاد من جد اليوم بغيت احلف أنى ما اخذ بدر وتدرين من خلاني اتراجع
مضاوي با استنكار وتهكم/ والله ما يحتاج لتس اقناع انتي مقتنعة فيه من زمان
سناء / صحيح لكن اليوم من جد نويت اخربها وعلمت عمي فهد قلت ولدك ما ابيه
قال بكيفتس والقرار راجع لتس إذا انتي ما تبينه ما راح اجبرتس
لكن من الحين أقول لتس ترى بدر قليل بالرياجيل مثله
ماهو انه ولدي با امدحه انتي بعد بنتي
لكن بدر نادرات وصوفه بوقتنا هذا شهامته الزايدة الي يفسرها الغير انها هياط دايم تطيحه بمشاكل
رجال صدوق وكريم وراعي صلاة وحريص على وصل لحمه ودمه
لا تخلين وانا عمتس لحظة غضب تخرب عليتس
مضاوي بتأكيد/ عمي صادق بدر ما يعيبه شي
شروق بتردد/ مضاوي فكري بموضوع ثامر شوفي انا والله ما اعرفه بحكم الوضع الي كان فيه
لكن اثق بكلام بدر يمدحه والله بيموت قهر من رفضتس يقول حرام ان مضاوي تفوته
سناء بتأييد/ من جد مضاوي والله حتى اخواني منبهرين منه ومن شخصيته وهم مالهم معه أسابيع
مضاوي تهز رأسها وبتهكم / انا يوم أقول ان احساسي ان اجتماعكن الليلة عندي وراه شي ماكنت غلطانة وبريحكن
انا الزواج كم مره أقول لاغيته من حياتي انا ما في قلبي وعقلي الا شي اسمه طب دراستي وبس ما ابي شي يوقف في طريقي
اردفت /لو ابي اتزوج كان من زمان وانتو عارفين ما يحتاج أقول خطبوني الي أفضل من ثامر الآف المرات
شروق با اعتراض / مضاوي لاتخدعين نفستس انتي عارفه ان الرفض القوي جاي من جدي
مضاوي / ما أنكر ان جدي لا نقاش عنده لكن انا معجبني الوضع والا با امكاني أقنعه لو كان في راسي زواج تدرين كم عمري
وانتي عارفه جماعتنا البنات الي بعمري عيالهم يركضون وراهم انا طموحي أكبر من الزواج
اردفت / الزواج بالنسبة لي عائق
اشارة وهي تعد على اصابعها/ قدامي سنة امتياز واتخصص واحقق الحلم الي حلمته من دخلت اول يوم بالمدرسة
سناء تتنهد بحيرة / من جد مضاوي وضعتس صعب ومحير إذا سمعت وجهت نظرتس اقتنع وإذا سمعت اهلي بعد اقتنع
مضاوي / لا صعب ولا شي انا عارفة انهم يبون مصلحتي لكن مصلحة من وجهة نظرهم
وانا لي وجهت نظري الي مستحيل اتنازل عنها
شروق بضحك / ماش الكثرة ماغلبت الشجاعة ها المرة خطتنا فشلت
مضاوي با استغراب / وش خطته
سناء بممازحة / خلي شوقنا لتس على جنب والله الصدق ابوي وعمي فهد
مرسلينا لتس نقنعتس بثامر مادرو انتي اقنعتينا
مضاوي تضرب كتف سناء بخفة / قلت لكم يابنات العاصف احساسي مايخيب
يوم آخر في بيت مساعد
مساعد بغضب/ ليه رافضة مهو على كيفها
سناء / يبه الله يحييك ليش معصب كذا البنت رافضة الزواج جملة وتفصيلا
مافي راسها الا الدراسة
ام سعد بغيض/ والله مافي راسها الا العوابه بنت هيام
مساعد با انفعال التفت لها / انتي ماتعرفين تسدين فمتس هذي بنتنا بنت حزام بن عاصف
سناء بقهر/ يمه ليش انتي متحامله عليها كذا والله مضاوي مافي مثلها ومثل ادبها وشخصيتها
اردفت / عندها هدف تبي تحققه
مساعد / هدفها دراستها واكيد ثامر ماهو معارضها وزواجها رغبة ابوي
مثل ما ابوي وافقها على الي تبي ملزومة هي توافقه على الي هويبي
سناء بمحاولة اقناع والدها/ يبه هذا زواج يعني مستقبل وحياة شي يخص مضاوي هي الي بتعيشه
مساعد بمعاندة/ والله يخص مايخص كلمة وقلتها لو مضاوي عاندت ابوي
ولا نفذت الي ابوي يبيه ان ذبحتها عندي مثل ذبحت الخروف
فزه (ام سعد) بذعر ضربت على صدرها / تذبحها انها رفضت تتزوج وش تبي فيها تضيع نفسك عشانها
مساعد با امتعاض / والله انا الزم ماعلي ابوي لو يجيه شي من تحت راسها اني لأنحرها
فزه بقهر / انت تفازع لعمي وعمي يبيعك ويبعينا ويشتري بنت هيام
مساعد بتهديد رفع وهو يصر على اسنانه / لا اسمعتس مره ثانية تقولين بنت هيام هذي بنتنا والا والله مالتس عن باب بيت اهلتس
فزه بتهكم / والله محد من العاصف ينشب لها ويهاوشها مثلك والحين تدافع عنها
مساعد عقد حاجبيه / وانتي وش دخلتس بينا حنا عاصف بينا نقول على بعضنا الي نبي لكن مانسمح لغيرنا يتعدى على واحد منا
وقفت فزه بتذمر / اللهم طولتس ياروح
اردفت وهي تغادر / أقوم اشوف شغل بيتي ازين لي
المساء في بيت الجد
ثامر / جدي ان شاء الله بكر الفجر انا وبدر طالعين جدة
الجد / وش عندك انت وبدران المهايطي بجدة
ثامر / كلمت واحد عنده مؤسسة قال لي شغلك جاهز بس تعال والمهلة مابقي منها شي
الجد بمعاتبة/ وحنا وش قلنا ما قلنا فترة التغريب تقضيها بالخرج وش جاب جده على بالك
ثامر بمحاولة اقناع / تدري جدي ان الخرج كانت عشان الموضوع الي ماتم والا انا مالي خاطر بالخرج
الجد بصرامة / الموضوع ان شاء الله بيتم والشغل فهد بيدبره لك تعوذ من ابليس واترك عنك الهبال
الخرج من قريب إذا بغيتك جيتك وتنفذ امر الدولة
قاطعهم رنين جوال ثامر
رد على جواله / هلا بدر عند جدي تعال
بدر / واقف عند الباب وماشوف سيارتك
ثامر / بالوكالة يشيكون عليها شوي اطلع اجيبها
دخل بدر يقبل راس جده دفعه الجد / ابعد ما ابي لك سلام
بدر بممازحة / افاااا شيخ العاصف زعلان علي
الجد بقهر/ لو اكسر باكورتي على ظهرك يابدران انه ما يبرد خاطري منك
بدر / ليش ياجدي انا وانت ما تصالحنا خلاص
الجد بعتب حاد / لا ما تصالحنا انت كل ما تخلص من سالفة يطلع لك علم جديد ورى ماتقولي ان ثامر يبي يهج من الديرة كلها
في اثناء الحديث يدخل ماجد وخالد يسلمون على الجد
ماجد يلتفت لبدر ويبتسم/ شكلك مزعل جدي اسمع صوته وانا برا
بدر بممازحة / انت وش دخلك ولا تصيد بالماء العكر انا وجدي نتفاصل بينا
الجد / الا بالله مزعلني يبي ياخذ ثامر ويبعد به لجدة
بدر بدهشة / جدي انا وش دخلني قال بروح قلت معك
الجد / لا بالله شجعته ويمكن بعد من تحت راسك ها الروحة
خالد با استغراب / ما قلتو بيروح الخرج وش طرى عليكم جدة
ثامر/ جدة فكرتي بدر ماله دخل بعدين الخرج من الأول ماني مقتنع فيها
خالد / بالعكس الخرج حلوة
أردف / فيصل يدرس هناك لو رحت لها بتعجبك وبتغير رايك
و با اعجاب / كم مره نطلع له ونشوفها تتطور اكثر من الروحة الي قبلها
الجد بحزن/ قله ياخالد وين يبي يبعد
أردف / الخرج قريبه كل ما بغيته جيته والا جاني
بدر التفت لثامر / ترى انا ماني معك بسالفة جدة وجدي صادق الخرج متى مابغيناك جيناك يعني ماتستاحش لحالك
ماجد بممازحة يضحك/ الحين يابدر تمدح بالخرج وانت تبي تطيره لجده عشان تستفرد به
محد واصلة غيرك خصوصا ان دوراتك اكثرها هناك
الجد بوجع ممزوج بحزن / ماله عن الخرج مابيه يبعد عني كثر ما ابعد
التفت لثامر / تروح انت وفهد يشوف معارفه الواجده الي على غير سنع يلقون لك شغل
ماجد يضحك / كيف جدي على غير سنع اجل وش فايدة روحته مع ثامر
بدر بتهكم / وانت كل كلمه تدقق فيها جدي جعلني فدا خشمه يمون ويقول الي يقوله
الجد يبتسم / على زين سوالفك ذي اجل روحو معه وشوفو شقة لثامر علشان يمدي تفرشونها
خالد بعفوية / واجد شقق العزابية ومفروشة جاهزة هناك واكثرهم طلبه يدرسون
الجد / سلامة عمرك وش عزابية نبي له شقه يعرس بها
ماجد بتوجس وتوتر / وش عرسه ما تقولون مضاوي عيت خلاص
الجد / ما عليه تعيي اليوم وترضى بكرا مالها عن لحيته
ماجد تشاغل بهاتفه عن نظرات خالد المشفقة عليه والناقدة لردات فعله التي لايلحظها سوى من يعرف ما بجوف هذا الكتوم
خالد وهو ينظر لماجد / جدي والله ليتك تزوجني العنقا يوم رفضت ثامر
الجد بمقاطعة يسكب الفنجال على خالد / اقطع واخس تمهزا ببنتي
خالد يقف مرعوب نفض ثوبة وانحنى قبل راس الجد با اعتذار / جعلني فدا راسك والله مهو قصدي لكن بنتنا ماتنرخص لغريب وحنا نشوف
ثامر بهمس لبدر / وش العنقا ذي بعد
بدر يكتم ضحكته وبصوت منخفض / اسكت لا يسمعك جدي لا تخاف هي مضاوي
ثامر همس بتهكم / اشوا قلت بعد في بلوى ثانية تبون تلزقونها بحلقي ما صدقت اني افتكيت من هذيك
بدر ابتسم ورفع حاجبه وبصوت منخفض / اسكت بس عليها رقبة يروع طولها
وجدي يناديها العنقا من يوم كانت صغيرة لقب امه الله يرحمها وش بلاك فقدت الذاكرة
ثامر/ يارجال سنين ما سمعته ونسيته
زفر با ارتياح /روعتني قلت ذي بعد منين طلعت
وبسخرية/ وطول الرقبة ما جمل الزرافة
بدر بمكر رفع حاجبه / لا والله ان طول الرقبة ميزه للغزلان خل عنك كل من عاصر جدتي مضاوي العنقا وشافها قال مضاوي الحزام عليها
ثامر / انت الي خل عنك الضرب تحت الحزام البنت ذي لو زينها يكتب عنه اساطير ما ابيها انا وافقت مسايره لجدي
والحمدلله هي اكفتني سالفة رفض ها الزواجه
أردف بتشفي / خلها تعلق مع جدي وعماني وانا اطلع منها والتفت لنفسي أرتب وضعي اشغلوني مع ها العرس اعوذبالله
بدر بتهكم / انت مصدق ان جدي بيستسلم لرفضها تراه للحين ما بعد حط ثقله الصح
ثامر بتذمر/ يالليل يعني ماحنا منتهين من ها السالفة
الجد التفت لثامر وبدر / وأنتم وش تبربرون ماتحشمون المجلس الي أنتم فيه لكم وزوزه روسكم بروس بعضكم
بدر / لا ياجدي اعلم ثامر انه لايشيل هم السكن في الخرج كل اموره هناك ان شاء الله محلولة
الجد / أي اشوا الحين انت ولدي صدز
خالد يضحك / ليت ربي يعطيني قبولك يابدر عند جدي
بدر بممازحة / عن الحسد اذكر الله لاتشبها بيني وبينه
أردف/ جدي وش رايك تجي معنا للخرج بكرا نتمشى وتغير جو
الجد / لا ماني رايح ان شاء الله الا قد بيت ثامر جاهز واسير عليه هو وحرمته
بدروضع يده على فمه وبهمس لثامر / ما قلت لك والله جدي إذا بغى شي ونواه مسويه مسويه
ثامر / وانا أقول لك بعد ان رقبة الزرافة ع قولتكم ماهي هينه وهي الي بتكفيني فركشت العرس هذا وتريحنا
بدر با استهزاء مقصود / ماقلنا رقبة زرافة قلت ان طول الرقبة ميزة للغزلان
وغمز بعينه / ما سمعت ياولد عمي بعنق الريم وفهمك كفاية
ثامر تجاهل تعليق بدر والتفت للجد / جدي بروح اطلع سيارتي توصي شي
الجد / سلامتك وارجع بدري عن السهر بكرا وراك مشاوير
ثامر / ابشر
أردف ثامر / بدر إذا ما عندك شغل تروح معي اطلع سيارتي
بدر بموافقة يبتسم / من يعاف خوتك
خالد / لنا الله بدر وبدر
بدر بمزح يخمس بوجه خالد/ ومن شر حاسدا إذا حسد
في سيارة بدر
ثامر بتردد / بدر بسألك
بدر يلتفت لثامر / اسأل وش عندك من ركبنا السيارة وانا أحس ان عندك كلام ومتردد تقوله
ثامر بغموض / انت الي فهمته من كلامك طايح مديح في بنت عمي حزام انت وين شايفها
بدر بتعجب واستنكار / انت من جدك ها السؤال
أردف بدر / ترى مضاوي تربت معنا يوم اخذها جدي من امها كانت صغيرة مره وهي بينا وكبرت معنا
تذكر قبل تصير السالفة عمي حزام بيته جنب بيت جدي وصارت المصيبة ونقلنا من حارتنا الاوله
قال جدي ما بيكم تبعدون عني واخذ جدي وعماني الأراضي الي عليها بيوتنا ذي
ثامر تنهد بقهر وحسرة / ليت ما شفنا أمها ولا شفناها
بدر بااستسلام / كل شي مقدر ومكتوب
|
09-07-24, 06:03 PM
جديد مواضيع قسم قصص من وحي قلم الاعضاء
العرض العادي
