مرحبا يا جميلات الليلة بأذن الله بينزل الفصل الثامن
كونو با القرب

آرائكم تهمني

الفصل الثامن

سعاد / شروق افتحي الباب .

تدخل للغرفة ام ماجد وام سعد وخلود

سعاد / تكفون سلمو باليد لا تطبعون على خدودها ..

رفعة بسخرية وتهكم / ليه شايفتنا ما نفهم توجهينا ..؟

سلمت على مضاوي بيدها وبنبرة استهزاء/ الف مبروك ..

ابتسمت فزه بسعادة / الف مبروك الله يوفقتس ويبني بيتس بالفرح والسعادة..

اردفت با عجاب / ما شاء الله تبارك الله ..

بنبرة تشفي سلمت خلود / الله يتمم لتس على خير مضاوي انتي وثامر..

مضاوي بهدوء/ الله يبارك فيكم ..

اقتربت منها خلود وبهمس لم تسمعه الا مضاوي / خدمتيني يوم اخذتيه وفكيتيني منه كفوتس ..

نظرت لها مضاوي با استغراب ولم تفهم ماترمي اليه الوضع لايحتمل الاستفسار عن ماتقصد

قاطعتهم سعاد / يا الله يابنات خلونا نطلع مايصير نخلي ضيوفنا ..

خرج الجميع لم يبقى غيرسناء عند مضاوي

سناء با استغراب / اشوف خلود قربت منتس وتضحوك شكل اعجبها العقد..؟!

تأففت مضاوي و بتذمر / مدري عنها تخثرد ..!

سناء با امتعاض / تدرين حركة ثامر مالها داعي يوم كنسل حجز الفندق سعد مره مقهور منه ..

مضاوي / يابنت الحلال ازين ماسوى وش عاد بتفرق ..

سناء بتعجب / بالله من جدتس معجبتس يسحبتس بلبستس وجهازتس للخرج بليلة العمر..؟!

مضاوي / التعب عليه هو الي بيسوق خله ليته بالربع الخالي بعد ماهو الخرج ..

سناء بممازحة / الا قطعت القلب والتعب والشنط حقت جهازتس يقول ابوي عمتي سعاد ..

طلبتهم ياخذونها الليلة لايبقون منها شي وماخذين جمس جدي الحوض يعبونها فيها وجيب ابوي وعساها تكفي ,

يعني العاصف اليوم كلهم بيتوجهون للخرج معتس ..

مضاوي تبتسم بحزن/ يعني من اول يوم خايفين اهج وارجع عليكم ماخليتو لي اثر ..؟!

سناء / ياشينتس لا دققتي العرايس دايم اغراضهم تسبقهم انتي عشان كل شي بسرعة وبيتك بعيد تغير الوضع ..

وبعدين وحده تتزوج ويصير لها بيتها الخاص وش تبي يبقى لها اثر عند أهلها ..

بدال تحسرتس هذا بس اقري على نفستس للحين مروعتني عيون خلود بغت تطلع يوم شافتس هي وامها ..!

دخلت سعاد مع المصورة

التفت سعاد لسناء / بعد التصوير تنزلين مضاوي للكوشة تحت..

وانا بطلع اباشر الضيوف تعرفين ما اعتمد على احد مستحية من زميلاتي ما جلست معاهم ..

سناء تضرب على صدرها / ماعليتس اعتمدي ..
.
.
.
في القاعة عند الرجال بعد صلاة العشاء

يقف ثامر بالوسط على يمينة الجد ويساره اعمامه ويسلمون على الضيوف

فواز يهمس لبدر / وهذا الي يبونه عائلي امتلت القاعة يارجال ..!

بدر / أقول رح خل المقهوين يدورون بالقهوة في ضيوف توهم دخلو وانت ساكت شف ابوي يخزنا من بعيد ..

في مكان آخر محمد يهمس لخالد / ماشاء الله خالك عبد اللطيف جاي ..؟

خالد /كلمه انور وجا اليوم ..

محمد بتعجب/ سبحان الله رزه ووسامة طاغية وإذا شفته تهابه،

وخرب على عمره بها السفريات والخراب الي يلطه..

خالد بتذمر / فكنا منه وهذي سالفتنا كل ماشفتوه تعيدون وتزيدون بها..

وبإعجاب/ والله الرزة ولد عمك المعرس..

محمد يضحك / عاد هذا خله على جنب حالة استثنائية..

أردف / اموت واشوف عياله من العنقا كيف اشكالهم ...؟!

خالد بممازحة / بيجون عليك شيون ..

.
.
.

ماجد وأنور مازالو في الاستقبال

ماجد با ابتسامة باهته / تفاجئت بكثرة الحضور ..!

أنور / خوالي حبايبهم واجد , ترى هذولا عازمينهم امس واليوم حضرو..

أردف / عرس بدر هو الي أتوقع بيقلب مهرجان..؟

ماجد/ ليته معرس معه فاكنا مره وحده.

راكان بمقاطعة / وش عندكم تهامسون ..!؟

أنور يضحك / ابد يا المهايطي نسولف عن الحضور ..

راكان بسعادة يبتسم / ما صدقت ابوي يحضر..

ابتسم انور بحب / والله ما خالف من قلت له جا .

راكان زفر بتأفف / فشيلة وطيحت وجه لو ما جا كل عماني حاضرين ..

ماجد بحزن حاول ان يكتمه / الله يعدي ها الليلة على خير.
.
.
.
في مكان آخر من القاعة مجموعة من الضيوف

أحد الضيوف / المعرس ولدهم الي توه طالع من السجن ..؟

ضيف ثاني/ أي هو ماتذكر صورته بالقروبات يجمعون الدية حقته ..

الضيف الأول / ماشاء الله بسرعة زوجوه ,

اردف / زين لقومن يزوجه..

ضيف ثالث / سمعت انها منهم الي ماخذينها له ...؟

ضيف رابع / زوجوه بنت عمهم اليتيمة ..

الضيف الاول / قصدك بنت الحرمة الي نكبتهم...؟!

الضيف الرابع / أي هي.

الضيف الأول يهمس با استهزاء/ الله يستر لايذبحها زي ماذبح خوي أمها..

الضيف الثالث با انتقاد / استغفر ربك (لا تشمت بأخيك فيعافيه الله ويبتليك) والله ماشفت مثل الشماتة وسرعة عقوبتها..!

وبعدين سوالف ماتت من زمان سمعناها وحنا أطفال وصرنا شيبان وانت مانسيتها.

الضيف الأول/ استغفرالله ما قصدي لكن السوالف تسحب بعض والناس هذا طبعها السوالف الشينة ماتنساها ..

.
.
.
في بيت الجد

دخلت سعاد غرفة مضاوي

سعاد للمصورة / خلصتي تصوير تأخرتو ...؟

المصورة / خلاص باقي صورها مع العريس.

مضاوي با اعتراض/ وش مع العريس هذي تكفي ما ابي اصور معاه ..

سعاد بمقاطعة / يصير خير يا الله الحين تنزلين للكوشة والله يعينتس على الزحمة ازعجوني بيسلمون عليتس ,

ليت رتبناها بالمجلس الخارجي بدال مجلس الحريم.

بعد عدة دقائق مضاوي على الكوشة

شروق بهمس / صديقاتس مره مشتاقين يشوفونتس ومنحرجين يدخلون وصيت سناء عليهم ..

مضاوي بخوف وارتباك / أحس قلبي بيوقف مدري وش جاني ...؟

شروق تبتسم / هذي اسمها رهبة العرس ماعليتس تعدي.

.
.
.
دخلت سناء ومعها صديقات مضاوي ومضاوي لسلام عليهم

غادة / الف الف مبروك حبيبتي مضاوي الله يوفقك ..

نهلة بحب واعجاب /الف مبروك مضاوي ماني مصدقة اشوفك عروس..

مها تحضن مضاوي / مبروك يا اغلى صديقة محد راح يفقدك مثلي..

نهلة بمعاتبة لطيفة / والله يا مها كلنا راح نفقدها،

اردفت / من جد تركت فراغ محد قدر يسده.

مها تمسح دموعها

غادة بممازحة/ مها لاتبكينا معاك والله حسستيني ان مضاوي امك وتزوجت وخلتك.

دخلت نواظر وسلمت على صديقات مضاوي

نهلة / يا الله عن اذنكم والله مستعجلين لكن حبينا نبارك لمضاوي بزواجها ونشاركم فرحكم.

نواظر / وين مافي روحة ما ضيفناكم،

التفتت نواظر لمضاوي وبود/ تبون مضاوي تزعل علينا.

غادة ابتسمت با امتنان / ماقصرتو الله يديم افراحكم.

بعد خروج صديقات مضاوي

سناء / يا الله كسرت خاطري الي بكت..

مضاوي / هذي مها الي اقولتس داخلة طب غصب..

شروق / ايوااا تذكرتها الي تقولين ماشية بستر الله،

مضاوي تهز راسها بموافقة

نواظر بمقاطعة / المعازيم يبون يسلمون على مضاوي،

وفهد أرسل صوت يقول ان المعرس طلع مع ابوي من القاعة شكلهم على وصول.

مضاوي تقبض على يد سناء بقوة

سناء تلتفت لمضاوي بهمس / وش فيتس خايفة عادي يابنت الحلال،

اردفت / شروق الي تستحي من ظلها ماسوت سواتس ...!

تدخل سعاد / كلمني بدر يقول سوو طريق معه ثامر وجدي بيدخلون ..

سناء تقبض كتف مضاوي بقوة .. مضاوي ترفع نظرها لسناء وابتسمت..

سناء بمكابرة / ماهو وقت شماتة بطلع قبل يدخل المعرس.

شروق با استغراب / كيف بيدخلون والحوش كله حريم ...!

سعاد / لابيدخلون مع باب الرجال.

دقائق ودخل الجد سعد ببشته البني تعلو وجهه السمح ابتسامة فرح

وبجانبه ثامر الذي يرتدي بشتآ باللون الأسود زاد وسامته وسامه، وقع نظرثامر على كل تفاصيل غرفة الجلوس الا مضاوي ...!

وقفت مضاوي لسلام على الجد

قبل الجد جبينها / الف مبروك والله يوفقتس ويسمح دروبتس ..

نواظر تسلم على الجد تتبعها سعاد

سعاد / مبروك عرس عيالك يا تاج راسي عقبال ما تزوج عيالهم..

الجد يضحك / الله كريم الله يبلغنا فيهم..

سعاد بممازحة / وش عند المعرس واقف، اجلس جنب عروستك الله يبارك لكم ويبارك عليكم ويجمع بينكم بخير، ويسخركم لبعض .

سعاد تمسك بيد ثامر وتجلسه بجانب مضاوي

نواظربفرح / الف مبروك يا احلى معرس..

ثامر يبتسم بمجاملة/ الله يبارك فيكم..

ثواني وتدخل نساء العائلة الي داخل غرفة الجلوس للمباركة

نورة بفرحة / الف مبروك ياعمي زواج عيالك..

الجد / الله يبارك فيتس يا ام بدر والعقبى لعيالتس ..

فزه / الف مبروك والله يتمم لهم على خير..

رفعة بتملق / مبروك ياعمي عرس عيالك..

الجد / الله يبارك بكن جميع.
.
.
.
امام غرفة الجلوس يقف بنات العائلة وبعض المعزومات

ناهد صديقة خلود تهمس لها/ معرسكم احلى من عروسكم..

وبا عجاب / وش ذى الزين...!

خلود لأول مره ترى ثامر وجه لوجه وبقهر وحقد حاولت ان تخفيه / لا وهي الي بعد ما تبيه بالموت اجبروها توافق،

وبا استهزاء مطت فمها/ والله انه خسارة فيها..

ناهد بصوت منخفض / اول ماشفتها على الكوشة ابهرتني لكن ضاع زينها يوم دخل معرسكم،

اردفت / شفتي ساعتها ترى مو اي احد يقدر على سعرها

خلود تنظرلها / من جدك، شكلها تقليد ..

سما بمقاطعة تبتسم وبممازحة / وش عندكم بروس بعض، بزعم صديقات..

خلود بتأفف / مافي شي..

ارادت ان تخرج سما فا امسكت بكتفها خلود وبهمس / من الذوق الي مختار طقم مضاوي وساعتها...؟

سما / الطقم اتوقع خالتي سعاد , لكن الساعة هدية من امي .

خلود با استغراب ساخر / غريبة , اذكر عمتي نواظر ما تطيق لها كلمة .. لو قلتي عمتي سعاد اصدق هي الي تهديها..

سما ابتسمت بحرج من اسلوب خلود امام صديقتها الغريبة/ سلامات ماتطيق لها كلمة , لكن تعرفين اسلوب امي مع الجميع ماهو بس مضاوي .

قاطعتها خلود بسرعة/ شكل ساعتها تقليد درجة أولى...؟

سما بتهكم / وين تقليد...؟!

وبمفاخرة رفعت حاجبها / هذي اصلية، ما لبستها الدكتورة نواظر بنت سعد على سن ورمح .

خرجت سما والتفتت ناهد لها وبصوت منخفض رفعت حاجب / وش قلت لك..

خلود عضت شفتيها بقهر وغل / من يومها محظوظة.
همست لها منار التي مرت بجانبهم / اذكري الله وادعي لهم با التوفيق.

سعاد بمقاطعة تبتسم لمنار وخلود / يا الله وش موقفكن هنا, باركتو لها خلاص , اطلعن باشرن الضيوف لا تفشلونا قدام معازيمنا .

منار / تعرفين عمتو الفضول ومايسوي ..

سعاد تضحك / يا الله نطلع عشان المصورة تخلص شغلها.
.
.
.
خرج الجميع بعد اخذ صور الجد وعمات المعرس مع العرسان، بقي ثامر ومضاوي امام عدسة المصورة..

المصورة بتذمر / قرب شوي من العروسة ماهو معقول كذا ...!

بنفاذ صبر اردفت / لي ساعة وانا أحاول اضبط التصوير، ماهي جاية الصور معي صح، كل واحد فيكم الي منزل راسة والي معطي وجهه للجه الثانية ..!

ثامر بملل / خلاص ما انتهيتو من التصوير...؟

المصورة / لاتزعلو لو ما اعجبكم البوم الصور، اخر صورة يا الله اوقفو وانت حط ايدك على خصرها وطالع لوجها..

اردفت وهي تحرك عدسة الكاميرا / الصورة هذي وبس.

ثامر بتأفف / لله الأمر من قبل ومن بعد .

وقف ثامر والمصورة اوقفت مضاوي لأخذ وضعية معينة..

نظر لوجه مضاوي المرخية نظرها للأرض انبهر بما رأى وسرح بتفاصيله/ يا الله كل هذا يسويه المكياج،اسمع انه يغير الملامح لكن ما هو بالشكل هذا ..!

مضاوي بأنين / اوجعت جنبي.

انتبه ثامر لأصابعه الضاغطة على خصرها، مضاوي الحاضرة بجسدها مع ثامر والمصورة المغيبة ذهنيآ , تفعل ما توجهه لها المصورة .

المصورة / الحمدلله خلصنا تصوير..

دخلت سعاد ببشاشة / كيف شغلك مع عرسانا ...؟

المصورة با امتعاض/ أصعب عرسان وجلسة تصوير صراحة واجهتها في حياتي ...!

سعاد بممازحة / قصدك أحلى عروسين صورتيهم.

المصورة وهي ترتب عدت التصوير/ يمكن هذا الي راح يضبط الصور انهم حلوين..

غادرت المصورة

سعاد بتهديد / يااويلكم إذا ما طلعت الصور حلوة..

ابتسم ثامر / حلالتس بس شوفي لنا الطريق بنمشي طفشت ..

غمزت سعاد لثامر بممازحة / طفشت والا تبي تستفرد بالزين لحالك بدون ازعاج.
.
.
.
بعد عدة دقائق

سيارة ثامر داخل سور بيت الجد

خرج ثامر ومضاوي بعد ان ارتدت عبائتها ,وخلفهم سعاد ونواظر , ركب ثامر السيارة .

ضحكت سعاد ونادت ثامر / يلي ما عندك ذوق ركبت وخليت عروستك واقفة ...!

ابتسم لها/ يعني وش اسوي أوقف معها..

نواظر بجدية / المفروض تفتح لها باب السيارة.

مضاوي تضغط على المسكة بيديها بخوف وارتباك وبجانبها سعاد

تقدمت منها سعاد ومسكت بيد مضاوي وبهمس / وش فيتس اعدمتي المسكة..

مضاوي / أحس أني بردانة..

وبرجاء / تكفين تعالي معاي

نواظر تنتبه لسعاد ومضاوي المرعوبة وبنبرة انتقاد/ مضاوي ما انتي طفلة وين تجي معتس..

مضاوي / ماراح اتحرك الا عمتي سعاد معي..

ثامر / انتم مطولين، العيال مشو قدامي للخرج ..

نواظر / يا الله مضاوي لاتفشلينا ,المعازيم للحين موجودين تاخرنا عليهم ..

رن هاتف سعاد وابتعدت عن نواظر ومضاوي
.
.
.
سعاد بصوت منخفض/ هلا بدر..

بدر / وين المعرس ادق عليه يعطيني مشغول ,ارسل رسالة يقول في اجتماع قمة لاتمشون لين ينفض بين المدام وعماتي ..

سعاد تضحك / والله رايق ولد عمك البنت طقتها ام الركب وهو ينكت ..

بدر يضحك / والله ما اصدق العنقا تخاف ..

سعاد بممازحة/ حرام عليك والله انها ضعيفة وولد عمك من الحين فارد عضلاته..

اردفت / انت وينك ...؟

بدر يضحك / عند الباب راكب جمس جدي وشايل قش العروس انتظر الأوامر عشان أحرك..

سعاد / بخاويك انتظرني جايه ..

رجعت سعاد لنواظر ومضاوي

نواظر / سعاد شوفي لتس حل معها رافضة تركب السيارة..

سعاد / ما عليه انتي ادخلي،عيب كلنا تاركات الضيوف , وخلي شغالتي تطلع عباتي وشنطتي تلقاهم بغرفة امي..

دخلت نواظر

امسكت سعاد بيد مضاوي / يابنت هدي اعصابتس هذا انا رايحة معكم بشوف اخرتها معتس انتي وهو..

مضاوي تبلع ريقها وتضع طرحتها على وجهها/ انا وش الي قردني وافقت على ها العرس..

احضرت الخادمة عباءة سعاد وشنطتها

ارتدت عبأتها وبأمر / يا الله اركبي مع رجلتس وانا طالعه مع بدر ينتظرني..

مضاوي تمسك يدها بترجي / لا تعالي اركبي معي..

سعاد بغضب ونفاذ صبر / أقول قدامي اركبي وانا طالعة لبدر والا ترى با ارجع ودبري عمرتس معه..

سعاد تفتح باب سيارة ثامروبأ مر / يا الله اشوف قدامي..

ركبت مضاوي وأغلقت سعاد باب السيارة وخرجت من البوابة لتركب مع بدر

حرك بدر وتبعة سعد وماجد بسيارة مساعد يحملون جهاز مضاوي لبيتها

ومن ثم خرج ثامر من سور بيت الجد وتبعهم بسيارته.
.
.
.
داخل جمس الجد

التفتت سعاد لبدر / تدري بديت أخاف على مضاوي من ثامر ..

ابتسم لها / لا با العكس احسهم كناري حب ..

وبعتاب مصطنع / وبعدين اشوف ما باركتي لي بالملكة ..!

سعاد / الف مبروك والله مضاوي اليوم صدعت فيني، من بداية ها الخطبة وانا على اعصابي للحين

ابي اوصلها بيتها واتطمن عليها عشان ارتاح..

بدر بجدية / تبين الصدق والله كلنا شايلين همها.

سعاد / همها وهم ثامر الله يسخرهم لبعض..

بدر / ثامر رجال ما عليه لكن هي تقطع القلب،لو يضيمها شي وين تروح ,انا شروق لو يضايقها زوجها بس وما تعلمني يمكن اموت .

سعاد / الله ما خلق خلق وضيعه الي حفظها وهي طفلة بيحفظها وهي كبيرة..

اردفت سعاد وهي تتذكر /يا الله يابدر تذكر يوم جت أمها من مركز الشرطة لبيتنا وشافتها مضاوي بعباتها ,

ومن عقبها كل ما شافت حرمة لابسه عباية طار قلبها من الصياح تبيها..

بدر / الي ما نساه بكاها ليل ونهار ما تخلينا ننام من صياحها..

تنهدت سعاد با الم / اذكر مره الشغالة دخلت علي تبكي فجعتني بالليل، قلت لها وش فيه قالت مضاوي طلعت لشارع تركض،

شافت كيس زبالة اسود وحضنت الكيس وعيت تفكه تحسبه أمها كسرت خاطرها وجت تعلمني وهي تبكي,

ومن عقبه اخذت امي فترة وهي تلبس عباتها وحاضنتها علشان تسكتها..

بدر حرك رأسه بوجع لذكريات احزنت جميع افراد عائلته / وقت وراح تحمد ربها ان ربي حطها في بيت زي بيتنا،

تخيلي لوناس غيرنا والله يطلعون عيونها ويعاقبونها بذنب أمها جدي وجدتي حطوها بعيونهم ولا سمحو لأحد يجرحها بكلمة،

حتى أمها يوم اهل المقتول كذبونا انها السبب وقالو ان الصور حنا مفبركينها من حظها كان خالها جاي للحج

كلمه جدي وبسرعة سفرها معه والا لو ثابت عليها شي سجن مؤبد والا رجم ما فيها كلام.

سعاد اغمضت عيناها بوجع لتلك الذكريات الحزينة / دخلنا بصدمة سوات عمي بنفسه خصوصآ ان المسدس ثبت انه مسدس ابوك،

والشرطة خافو من اهل القتيل وتحفظو على ابوك وعمانك،

وابوي استعجل بسفرها خاف من شي أكبر ان مساعد إذا طلع ولقاها بيذبحها،

وفعلن مثل ماتوقع مساعد يوم طلع من التوقيف انجن يوم درى انها سافرت يبي يذبحها،

استطردت تتذكر تلك الأيام / من غير ان كلنا مصدقين ان ثامر هو القاتل حمد اعترف لأبوي يوم قالو خلاص ان ثامر تحت حكم القصاص الا إذا اعفو اهل القتيل.

بدر با الم لتلك الذكريات / جدي داري لوعمي مساعد ذابحها ما راح احد يستفيد بس يشيل وزرها،

أردف / ترى بعد الشي هذا جا من حظ مضاوي يقعد موضوع هيام بين الناس على غبش،

محد داري وش الصدق تخيلي لو أمها مسجونة للحين والا اقامو عليها الحد،

و با ابتسامة حزينة / تكفين غيري الموضوع ترى السالفة هذي تحسسني بطاقة سلبية.
.
.
.
في سيارة ثامر صمت

التفت لمضاوي / وش فيتس تنتفضين ...!

ردت بصوت مرتجف / بردانة قصر على المكيف..

ثامر با استهزاء / بردانة بشهر أغسطس اشد شهور السنة حر!

هذا اسمه دلع جواره الا انه يكون برد..

ضمت يديها لصدرها وصمتت ولم ترد عليه
.
.
.
في سيارة ماجد وسعد

سعد / الحين الشنط ذي الي معنا كلها بس لمضاوي!

ابتسم ماجد/ لا ابشرك من غير الي مع بدر ويمكن بعد سيارة ثامر..

سعد بتعجب / انا ابي اعرف شي واحد الحريم ذولا متى يستهلكون كل ها الملابس الي يشترونها ...!

ماجد / ليت توقف على هذي ,الا بعد كم يوم من العرس تلقى العروس وهي بشهر العسل ,

تلفلف الأسواق بزوجها تشتري ما كفاها الي شرت قبل العرس!

أردف / من جد يا اخي البنات غريبات ماهم زينا.

سعد بتردد/ ماجد بسألك ولاتفهمني غلط سؤال جا في بالي نقطع به الطريق...؟

ماجد با استغراب / اسأل مهي لك عادة تحط مقدمات اكيد سؤال خطير ..؟!

سعد / لا والله عادي يمكن فضول انا أدرى ان لك خاطر بمضاوي من زمان،

ليش يوم خطبها جدي لثامر اول مره ورفضته ما طلبتها انت ...!

ماجد / اول شي الله يوفقها وثامر يستاهلها وتستاهله، ما طلبتها يا طويل العمر لأني عارف ان مضاوي بترفضني.

سعد / طيب انت وش دراك انها بترفضك ...؟

يمكن تشوفك أفضل من ثامر لو خاطب رسمي توافق عليك بما انها رفضته خلها ضربة حظ يمكن تضبط معك..

أردف / مع ان كلنا عارفين من زمان ان جدي وعماني يبونها لثامر إذا طلع من السجن لكن كانو خايفين انه هو يرفضها..

وبتعجب / محد فكر انها هي الي بترفضه.

عض ماجد على شفته بحسرة / تبي الصدق انا قطعت الأمل منها قبل حتى يطلع ثامر..

تنهد بضيق/ والله لو كان عندي امل واحد بالمية انها توافق علي اني ما اخلي طريقة ولا اذخر جهد على شانها..

أردف / يوم توظفت بعد تخرجي أرسلت عمتي سعاد لها,تخبر علاقة عمتي فيها وعلاقتنا حنا بعمتي,

عمتي تعطيك على جوك وتمشي معك لين انت تتراجع قلت لها لي نيه اخطبها اذا توافق علي،

قالت شف راي امك وابوك قلت ماعليتس امي وابوي بااقنع جدي يقنعهم اهم شي رايها،

وراحت كلمتها تقول يوم كلمتها بغت تنجن وترجت عمتي ان ها الموضوع لايسمع فيه أحد من العايلة،

خصوص جدي وان الزواج اصلن لاغيته من حياتها لا انا ولا غيري..

سعد يضع يده على يد ماجد بمؤازرة/ والله ما هو قصدي اضايقك لكن قلت نسولف نقطع الطريق،وانت والله الف بنت تمناك ..

ابتسم ماجد بوجع/ من الالف بغينا وحدة وما بغتنا..

أردف / تكفى سعد انسو الموضوع هذا تماما والله يوفقها بحياتها الجديدة ويوفق ثامر.

سعد / آآمين الله يوفقهم وبغض النظر عن كل شي ترى مضاوي بمقام اخت لنا كلنا قبل والحين،وثامر اخونا اكيد الموضوع مدفون لا تشيل هم .
.
.
.
اسند ماجد ظهره للخلف وتذكر،

عندما أخبر والدته برغبته بخطبتها كادت ان تجن وحلفت لو أفكر مجرد تفكير فيها ستغضب عليه طوال عمرها،

واخبرت جدته ام عبد اللطيف التي ايضآ اتت لبيتهم وبدورها كالت عليه اللوم كيف يفكر ان يخطبها ويقهر والدته،

لم يرد ان يخبر والده لأنه يعلم انه سيقف معه حتى برغم معرفتهم لرغبة الجد انه يريدها لثامر،

فا اقنع نفسه انها ليست من نصيبة بعد ان رفضته على لسان عمته سعاد،

فلو انها أعطت موافقتها سيحارب الدنيا من اجلها لكن رفضها كان مؤلمآ له وهو ماجعله يتراجع،

دفن هذا الحب في صدره لأنه كان يعلم ان هذا الحب مستحيلا بعد رفضها القاطع،

وحاول ومازال يبرمجه على انه حب أخوي كما كان افراد عائلته ينظرو لها هذه النظرة،

وذهابه اليوم مرافق لتوصيل جهازها كان بطلب من عمته سعاد،

وترجته ان يذهب مع سعد ليوصلو جهازها،

حتى ان كان هناك اقل القليل من الامل فليقطعه فقد أصبحت بعيدة المنال قولآ وفعلآ,

.
.
.

بعد ساعة وربع وصل ثامر ومضاوي أولا لبيته،

ثامر بتهكم / حي الله البردانة في ربوع الخرج.

نزل من السيارة اخذ بشته وحمله على يده ,

ودخل باب العمارة التفت لها ماتزال تجلس داخل السيارة،رجع لها وفتح الباب ,

ثامر با استهزاء / انزلي وش تنظرين اشيلتس مثلا...!

مضاوي تنزل بصمت وأغلقت باب السيارة.
.
.
.
مشت وراءه بهدوء ودخلت الشقة خلفه..

مع دخول ثامر لشقته رن هاتفه / هلا بدر وش فيكم تأخرتو ...؟

بدر يضحك / عمتك ام أنور قالت مانبي نوصل معهم بنتأخر عنهم شوي ياخذون راحتهم..

أردف / وصلت لبيتك ...؟

ابتسم ثامر/ الحين انا في الشقة وخل عنك الهبال أدرى حركاتك،

أنتم وراكم طريق تعال وين تدوج آخر ها الليل ومعك عمتي..

بدر / قريبين منكم وسعد وماجد وراي هذولا هم سعد يكبس لي ..

اغلق بدر الهاتف والتفت لسعاد / ما شاء الله ينكت الشيخ مستعجل على رجعتنا ,يبي الفكة يقول وراكم طريق..

سعاد / اشوا طمنتني، بالله تحس من كلامه مبسوط ...؟

بدر / وش فيتس اكيد معرس ما تبينه مبسوط،

اشار لها / الحين نوصل هذا بيتهم الي اول الشارع..
.
.
.
دقائق ووصلت سيارة بدر،

وخلفها سيارة سعد وماجد،

نزل بدر وسعاد،

سعاد / بدر تكفى بشويش على الشنط وانتم تنزلونها،فيها أشياء قابلة للكسر..

بدر بممازحة / تبشر ام جلال بالعوض إذا خرب شي..

سعاد / وصلني لشقتهم وانتم نزلو الأغراض..

بدر / بكلم ثامر ينزل ياخذتس لشقته وبقول للعيال ينزلون الاغراض ويطلعونها..

اردف بضحك / ما شاء الله عليكن ما خليتن شي بالرياض ماشريتنه..!
.
.
.
في شقة ثامر

نظر لها با استغراب / وش فيتس واقفه متخشبه اجلسي ارتاحي..!

مضاوي مازالت واقفة بعباتها وطرحتها على وجهها..

رن هاتف ثامر وبتأفف / لا تقول انكم ما وصلتو...؟

ضحك بدر وبممازحة / اعصابك يا ابن الحلال هذا حنا تحت انزل خذ عمتي ماتدل شقتك..

ثامر / جايك الحين..

اغلق هاتفه والتفت لها وبا انتقاد/ اجلسي نزلي عباتس عمتي سعاد بتجي الحين عيب تشوفتس كذا.

لا يعلم هل هو يقصد ما يقوله ام انه يريد ان يراها مره أخرى ...!

مضاوي ترتجف بصمت،
.
.
.
خرج ثامر للحظات ورجع مع عمته

دخلت سعاد لشقة ثامر وتلفتت في انحاء الشقة/ ما شاء الله تبارك الله وش ها الزين..

ثامر / حي الله عمتي في بيتي المتواضع انا نازل للعيال..

غمز ثامر لسعاد بعينه وأشر لمضاوي الواقفة /وانتي خوذي راحتس..

خرج وتقدمت سعاد لمضاوي امسكت بيديها / بسم الله عليتس وش فيتس تنتفضين ...؟

حضنت مضاوي سعاد / بردانة أحس ضلوعي تكسرت من البرد..

سعاد تجلس مضاوي على اقرب كنبة بالصالة وتنزل عباءة وطرحة مضاوي / اهدي يابنت الحلال الي فيتس ماهو برد الي فيتس خوف وتوتر..

مضاوي / ماني خايفة بس بردانة.

سعاد / تعلميني فيتس رجفة البرد هذي ماتجيتس الا إذا انتي خايفة او متوترة هدي اعصابتس ما انتي طفلة تراتس ..

رن هاتف سعاد ورد ت/ هلا ثامر ..

ثامر / خلي مضاوي تدخل وحده من الغرف العيال بيطلعون الشناط ويدخلونها لشقة..

سعاد / ابشر الحين.

أغلقت الخط وذهبت تبحث عن غرفة النوم.

مضاوي بذعر/ وين رايحة تعالي ...؟!

سعاد / انتي الي تعالي العيال بيدخلون اغراضتس ..

وقفت مضاوي وتوجهت لها..

دخلت سعاد لغرفة النوم وهي ممسكة بيد مضاوي

سعاد با اعجاب / ما شاء الله غرفتس روعة ماتوقعت ذوق العيال كذا ...!

تأففت مضاوي بملل/ انا وين وانتي وين ..

سعاد ترتب شعر مضاوي / شعرتس انحاس من الطريق..

مضاوي تبعد يد سعاد / خلي شكلي تكفين لا تروحين اليوم..

سعاد تضحك / تبين ثامر ينومني بالشارع من جدتس انتي وش تبون فيني ...!؟

مضاوي تقف وتفرك يديها بتوتر،

سعاد / وش فيتس وترتيني معتس تعوذي من ابليس واقري المعوذات تهدين شوي..

اردفت بود وطمئنه / والله ثامر عسل بس انتي ما أدرى وش فيتس عليه..

رن هاتف سعاد / الله يستر هذا عبد اللطيف،

ترد سعاد / هلا أبو أنور،

..... تونا واصلين،

..... ان شاء الله مسافة الطريق،

.... الله يسلمك.

يسلم عليتس أبو أنور،

مضاوي / الله يسلمه ويسلمتس.

سعاد / ينتظرني بالبيت وشكله زعلان مع اني أرسلت له رسالة قلت طالعة للخرج وقال ما يخالف...!

مضاوي بتذمر / يا الله للحين تراعين خاطرة،

يقاطعها طرق باب الغرفة ويدخل ثامر..

التفتت سعاد با ابتسامة / هاه خلصتو ...؟

ثامر بتأفف / مابغينا تعالو شوفوها..
.
.
.
خرجت سعاد معه

ضحكت سعاد لمجموعة الشنط التي ملئت المكان والتفتت لثامر / انتم شغلكم هين الله يعين مضاوي كم بتقعد ترتب بها الأغراض ...!؟

ثامر يجلس على الكنبة / انقطعت ظهورنا اسكتي بس..

وبسخرية / لا وبدر يوصي يقول عمتي تقول في أشياء قابلة للكسر انتبهو عليها.

جلست سعاد بجانبه وبنبره هادئة / وهو صادق في عطورات وعلب مكياج واغراض ما تتحمل،

اردفت بمودة / ثامر انتبه لمضاوي ولا تضغط عليها البنت مره متوترة احسها خايفة منك.

ثامر رفع حاجبه بتعجب / هذي تخوف ديرة تبينها تخاف مني...!

ابتسم وطبطب على يد سعاد / ماعليتس دلع بنات لا تشيلين هم..

سعاد / لا والله اعرفها من اليوم تنتفض بردانة عجزت اهديها وهذا طبعها إذا خافت،

والا زعلت وتوترت تصيبها حمى بعز الحر تشوفها تنتفض من البرد.

وقفت سعاد ووقف معها ثامر / خلاص انا بمشي بس بدخل على مضاوي أسلم عليها،

اردفت / ثامر الشنطة الصغيرة هذيك اسحبها ودخلها للغرفة فيها ملابس لمضاوي رتبتها لها..

ثامر يبتسم / الله يعيني على دلعتس لها كيف بتحمله..

سحب ثامر الشنطة واوصلها لباب غرفة النوم،

دخلت سعاد ودفعت امامها الشنطة.

مضاوي التي كانت تجلس على حافة السرير وقفت بهلع،

ضحكت سعاد على حركتها العفوية وبممازحة / والله رجعتيني مع ها الحركات لعرايس زمن جدي وجدتي ناقص بس نجيب لتس وحده تحرس الغرفة وترجعتس إذا هجيتي .

مضاوي بتذمروتأفف / يا الله الصبر من عندك..

سعاد امسكت بيدها واشرت على الشنطة / هذي فيها ملابس لتس رتبتها،

خوذي لك شور هدي اعصابتس وغيري فستانتس بس ماهو الحين،

خلي لين ثامر يشوف شكلتس عشان يطبع بعيونة وقلبه ودايم يتذكر ها الزين.

مضاوي تزفر با اشمئزاز / الله يعطيني روقانتس .

تضحك سعاد / بيعطيتس ماعليتس يا الله انا ماشية استودعتكم الله..

مضاوي تمسك يدها وسعاد تبعد يدها / يابنت تأخرت على بدر احرق جوالي،من غير عبد اللطيف الي عسى الله يعدي ها الليلة معه على خير,

ولاتنسين الي جالس برا يحتريني افارق وجيهكم.
.
.
.
خرجت سعاد لثامر وهو يتحدث بهاتفه / خلاص ماعليك هذا هي طلعت لك..

سعاد تبتسم / اكيد هذا بدر أزعجني ازعاج..

ثامر / يقوله ادق على عمتي تعطيني مشغول والا ما ترد..

سعاد / داريه والله انا تأخرنا لكن ثامر لا اوصيك على مضاوي،

تراه غالية امي وابوي الي يزعلها يزعل ابوي ويزعل امي بقبرها.

ثامر يأشر على انفه / ابشري مالها الا الي يرضيها.

سعاد با ابتسامة رضا / وهذا العشم فيك ادخل عندها الحين طمنها تراها مره متوترة،

وحط ايدك على راسها وادع لك ولها بالتوفيق وصلو ركعتين اطلبو الله يسخركم لبعض ويوفق ما بينكم .

مشت سعاد للباب بجانبها ثامر / بنزل معاتس .

سعاد وضعت يدها على صدره / حلفت ما تطلع معاي بدر اكيد ينتظرني عند الباب،

يا الله استودعتكم الله.

خرجت سعاد لسيارة بدر

ودخل ثامر وتوجه لغرفة النوم وقف امام الباب وهومتردد بالدخول.
.
.
.
في سيارة بدر

بدر بتذمر / يا الله ياعمه مابغيتي تطلعين ماجد وسعد قربو يوصلون الرياض..

سعاد / يا ابن الحلال بلشت بمضاوي البنت عمري ماشفتها بها الحالة.

بدر / عادي اكيد شعور طبيعي البنت مقدمة على حياة جديدة حنا وحنا رجال يجينا رهبة من ها الموقف بتتعود بعدين,

بكرا كلميها وهذا وجهي إذا ردت عليتس انتي بس الي مشغلة عمرتس.

سعاد بفرحه / الله يسعد قلبك كيف كلامك يطمن ويشرح الصدر..

بدر يضحك / خلينا من ثامر ومضاوي الي الحين بعالم ثاني وانتي قلبتس ضو عليهم ,

وعطيني اخبار حرمنا المصون كل ما سألتس عنها رجعتينا لمضاوي وثامر..

سعاد / حرمكم المصون ما شاء الله عليها اليوم ما كأنه ملكتها الوضع عادي عندها،

قامت بعرس مضاوي قومه تبيض الوجه.

بدر / اكيد بتقوم بمضاوي هذي تؤمها السيامي
.
.
.
شقة مضاوي وثامر

فتح الباب بهدوء ودخل للغرفة وقفت مضاوي مفزوعة اقترب منها ووضع يده على راسها ودعا.

أنهى دعائها وبا استغراب سألها / وش فيتس ترى انا بشر مثلي مثلتس كأنتس شايفه وحش ...!

أردف / غيري لبستس ذا..

مضاوي بهلع / لا ..

ابتسم ابتسامة جانبيه / وش الي لا ما يجوز تصلين باللبس هذا والا ها المناكير ترانا مسلمين..

خرج من الغرفة بهدوء بعكس العواصف التي ثارت في داخل كل منهما.

وضعت يدها على قلبها وزفرت بضيق / ياربي عونك ضاق بي كونك يارب تكفيني شره وترزقني خيره..

وبسخرية / ماشاء الله مركز با المناكير!

توجهت لباب الغرفة واغلقته بالمفتاح.

لا تلهكم الرواية عن الصلاة في وقتها
موعدنا القادم بأذن الله قريبآ
تذكروني واحبابي بدعوه طيبه