كاتب الموضوع :
طيف الأحباب
المنتدى :
قصص من وحي قلم الاعضاء
رد: للحب سجناء
الفصل "الثامن والأربعون "
.
.
.
اعتدل الجد في جلسته / اولها وانا ابوتس انا مردد عمامي خوالي امي وابوي كلهم من العاصف ...،
وامي بزمنها ما قعد أحد ما خطبها ...،
خطبوها شيوخ ومن كبار البيوت وجدي معي لا يزوجها ...،
ولها عيال عم واجد ...،
ومن اول ولد العم يحير بنت عمه...،
والي تخطب ولها ولد عم يسألون ولد عمها قبل يخطبونها ...،
إذا له خاطر فيها والا يقدمون على خطبتها ...،
لكن جدي ما عليه لا من الي يوافق ولا من الي يحير ولا من الي يسولف ...،
عنيد شوره من راسه ...،
وصارت بينه وبين اهله العاصف هوشات واجد علشان أمي ويبونه يزوجها واحد منهم...،
وبعض العاصف يجيهم ناس من كبار القبيلة يبون واسطتهم عند جدي...،
وجدي متمسك برايه يقول بنتي انا ازوجها بكيفي محد يفرض رايه علي...،
ويوم زوجها ابوي...؟
ما زوجه بتحيير زوجه من كيفه ...،
ناداه وقال يا جلال انا معطيك مضاوي ...،
وسمعت ابوي الله يرحمه يقول انا لي خاطر بخطبتها لكن خفت من ابوها يرفضني...،
كم واحد طرده من عيال عمنا جو يخطبونها قلت اكيد انا ماني أحسن منهم يبي يطردني مثلهم ليه أفشل نفسي ...،
وجدي كان رجال حار وعصبي وما هو أي كلمة تعجبه ...،
وزعول وإذا زعل على الواحد يبطي ما يرضى عليه ...،
وتزوج ابوي امي ودخلت ناس بحسد وغيره ما يبون جدي يزوجها ابوي ...،
لكن جدي الله يرحمه ما عليه من أحد...،
اخذت ابوي وغلا صار بينهم كل الجماعة تسولف به...،
تقول امي ما عمره ضايقني لو بالنظرة ...،
واغليته مثل ما اغلاني وأكثر ...،
وياما حاولت الناس وحتى أقرب ما لنا يفرقون بينا لكن أدري من انا عنده وهو يدري بقدره عندي ...،
ابتسمت سعاد وبممازحة مرحة / سرقت من دنياه لذة دنيتي ... برضاي سارقني وبرضاه سارقه ...،
ابتسم الجد وأكمل حديث الذكريات / وقعدت معه أكثر من عشر سنين ماجا لهم ضنا ...،
وابوي كان عزيز عند الجماعة والصديق والعدو يجي ينصحه يبيه يتزوج على امي ...،
وكلاً له غايته من نصيحته ...،
ومثل ما يقولون كثر الدق يفك اللحام ...،
وبيوم جا عند امي وقال لها اسمعي يا مضاوي انا ودي اعرس ...،
يمكن ان ربي يرزقني ويرزقتس بوجه الحرمة الي باخذها...،
اما هي نفس معقودة بينا والا هو سبب نبي نعرفه مني والا منتس ...؟
وغلاتس بمكانه ما يتغير ان ما زاد ما نقص ...،
قالت بكيفك يا ولد عمي البيوت مليانة بنات ورح اخطب وانا بعد الي انت خابرني ماني متغيرة ...،
واتفقوا على هالسالفة انه يخطب ويعرس...،
احضرت الخادمة القهوة والضيافة واخذت سعاد الدلة سكبت لوالدها فنجال وثامر...،
مضاوي رفعت يدها بمعنى لا اريد ...،
ضحكت سعاد وبممازحة / مضاوي عقلها معك حتى القهوة عافتها تبي سالفة سميتها ...،
وضع الجد فنجاله امامه وبنبرة الم / عسى فالها ما هو فال سميتها...!
شد كلام الجد كلاً من مضاوي وثامر اللذان يسمعان القصة لأول مره...؟!
ثامر قضى اول عمره بين جدران السجون وما سمعه بطفولته مجرد اسماء لا يفقه ما حدث لأصحابها...،
ومضاوي لم تكن تهتم لسماع هذه الأمور...،
حياتها دراسة فقط ومرافقة الجدة التي لم تكن تشغلها هذه القصص...،
والسنوات الأخيرة قضتها مع الجدة في المستشفى ...،
أكمل الجد كلامه / امي الله يبيحها مشهورة بزينها وشاعرة وكريمة في بيتها...،
لكن معروف عنها شخصيتها قوية وما عليها من أحد ...،
كل ما أرسل ابوي على عرب يخطب منهم عيو عليه...،
يقولون عندك العنقا ما نزوجك...،
طولت خطبات ابوي وما لقي من يزوجه من الجماعة...،
الحريم ما يبون يجاورونها...،
سعاد بتعجب/ يعني الحريم خايفات من جدتي ...!!
الجد / ماهو خوف منها لكن هن عارفات ماهن قبيلات لها ...،
الحرمة إذا اخذت الرجال اكيد انها تبيه كله لها ...،
لوعنده غيرها ثلاث حريم...،
وامي عارفاتها وعارفات ان ابوي ما اعرس فسقان ابوي اعرس يبي له ضنا...،
والحرمة الي بتجيها مالها منه غلا...،
الغلا لمضاوي...،
تناول الجد فنجاله شربه / مالكم بالطويلة عقب ما صار لهم حوالي 15 سنة ...،
جا عند امي قال بيوت الجماعة كلها تعذرتني ...،
الحريم يقولن حنا نهاب العنقا لكن عندي لتس شور ...،
ان كان وافقتي والا الزواج هذا كله ما نبيه وانا وانتي يعوضنا الله ...،
قالت عطني شورك يمكن انه يجوز لي ...؟!
قال لها انا برجع اخطب ومن سألني عنتس قلت اني مطلقتس...،
وإذا قالو وش السبب أقول مافي أي سبب...،
غير ان حنا نبي نترزق الله انا وهي نبي لنا ضنا ...،
وإذا وافقوا وملكنا بقول رجعتس ...،
ردت عليه امي انها موافقة...،
وقالت سوى الي تبي وانا راضية اقعد معك ان جاني ضنى والا ماجاني...،
وانت ولد عمي وعيالك عيالي ...،
كل الجماعة تدري ان ابوي يدور العرس...،
لكن للحين ما لقى ولا قال السالفة الي بينه وبين امي...،
وجوها حريم من جماعتنا وقالن لها ان جلال بن عاصف يبي يعرس عليتس ...،
قالت من حقه رجال ابطى ماجاه عقب ويبي له عيال محد لايمه...،
قالن لا بالله ما هذا السبب ولا هذا الي سمعناه ...،
قالت اجل وش السبب...،
قالن يقول ان السبب انا من اخذتها ما اخذت حرمه اخذت لي رجال يناطحني ...،
قوية راس وباس...،
لو على الضنى ما اعرست لكن ابي حرمة مطواعه ...،
إذا قلت لها هذا الطريق قالت صادق، حتى لو أني غلطان...،
ما هو حرمتن تمد قبل امد وتكرم قبل أكرم...،
حتى بيتي الناس ما يقولون قلطنا في بيت جلال ابن عاصف...،
يقولون قلطنا عند العنقا واكلنا من خيرها وهو خيري وحلالي...،
فضحتني قصيدها تردده الرياجيل بمجالسها...،
ولو ماهي بنت ولد عمي وحاشم ولد عمي انه تخيرني على كبار الجماعة وزوجني كان مبطي مطلقها...،
ابي اتركها على ذمتي على شان ولد عمي واتزوج...،
مضاوي بذهول / الحين جدتي ماهي بنت عم جدي...،
وبدهشه اشارت بيدها / ما هم عيال اخوان...،
هز الجد رأسه بنفي / لا ما هم عيال اخوان يصير ولد عم ابوها ما هو ولد عمها ...،
استكمل الجد القصة / امي سمعت ها الكلام وشالت بقلبها على ابوي ولا علمت ابوي وش سمعت...،
وكل يوم جايتها وحده من الجماعة وجايبه لها سالفه أكبر من الي قبلها وامي تسمع وساكتة...،
لين ملو قلبها على ابوي وأخر ما وصلها انه من يخطب ويملك يطلقها...،
مر على اتفاقهم شهر مدري شهرين...،
سمعت امي طرف علم انه خاطب ولا قال لها لين سألته...،
قالت انت خطبت والا للحين قال أي بالله خطبت...،
واجهت فلان وخطبت بنته وانتظر الجواب ...،
ابي اعلمتس بالخطبة وانتي سبقتيني وسالتي قبل اعلمتس ...،
قالت انت قلت لبوها بلي بينا...،
قال اي بالله علمته وإذا بخاطرتس شي والا تبين شي ...؟
لا يردتس الا لسانتس...،
قالت لا بالله مابي شي ابي حاجه وحده منك ...؟
قال ابشري أغلى من يطلبني وأغلى من البي له ...،
قالت تعلمني بيوم الملكة ولا ابي شي غيرها ...،
قال وبس هذي...؟
قالت ما غيرها...،
عقب كم يوم طلبت ابوي تسير على اهلها قال روحي مسموحة...،
اخذت ملابسها واغراض لها من بيت ابوي وراحت لأهلها ...،
أشار الجد بيده / خوالي بيتهم ما هو بعيد عن بيت ابوي تروح لهم مشي...،
ابوي جاه الجواب ان العرب وافقوا ...،
وانتشر خبر ان جلال بن عاصف طلق العنقا بنت حزام وخطب...،
و العنقا راحت لبيت أهلها مطلقة ...،
وسمعت امي من الحريم ان أبو البنت الي خطبها ابوي...،
قايل رجع العنقا ليه تطلقها ..؟
بنت عمك عقيم وكبيرة بالعمر من بياخذها عقبك...،
خلها على ذمتك علشان ولد عمك الي تخيرك من بين الجماعة وعطاك بنته...،
وان ابوي معيي يرجعها وقايل ماطلقتها وابي ارجعها...،
ثامر بتعجب / الحين ابو جدتي مضاوي اسمه حزام ...،
الجد هز راسه بتاكيد / الله الله حزام أخوي سمي جدي ابو امي...،
سعاد بنبرة استنكار / الحين صدق جدي قال كذا عن جدتي...؟
الجد / لا قالها ابوي ولا يمكن يقولها ...،
لكن مصيبتك من العدو الي يجيك بجلد الصديق تظنه ناصح لك وهو يحفر لك...،
ا ردف الجد / جا يوم الملكة وابوي ما علم امي مثل ما طلبته ما يبي يضايقها...،
وسمعت من الناس ان اليوم عقب العصر ملكة جلال بن عاصف ...،
يوم جا عقب العصر لبست امي عباتها وتوجهت لبيت اهل العروس ...،
ودخلت على مجلس الرياجيل وابوي فيه واهل العروس وناس من الجماعة...،
من بينهم ضيف جاي من الكويت من شيوخ قبيلتنا صادف جيته خطبة ابوي ...،
وعزموه اهل البنت يبونه يحضر الملكة...،
دخلت امي عليهم ووقفت على الباب سلمت...،
قالت عرفتوني يا ال فلان تقصد اهل العروس...،
قال بعض الرياجيل الي في المجلس اي والله عرفناتس...،
انتي مضاوي الحزام وبعض الي في المجلس ما عرفها...،
قالت الي ما يعرفني انا مضاوي بنت حزام بن عاصف حرمة جلال بن سعد الي جالس بمجلسكم ويبي يملك على بنتكم ...،
قال واحد بالمجلس من اهل البنت او انه من المعازيم...،
والنعم والله بتس يا بنتاخي والجيزه قسمة ونصيب...،
والله حلل الطلاق مثل ما حلل الزواج...،
قالت لا والله ما حرمت شيً حلله الله ولا حللت شيُ حرمه الله ...،
لكن ابن عاصف كذب عليكم تراه ما طلقني وانا بذمته للحين...،
المجلس كله انبهت من سالفتها وخصوص اهل البنت...،
التفت ابو البنت على ابوي وقاله بنت حزام صادقة ...؟
قال اي بالله انها صادقة وأنها بذمتي الي ها الحين ...،
وما حدني غير كل ما جيت اخطب من جماعتي ردوني على شانها ...،
والحين يوم اتضح الامر مضاوي حرمتي ولا انا مفرط فيها وانا على خطبتي منكم...،
ردت عليه امي قالت تمم طلاقك مني ومبروكة عليك بنت ال فلان ما انت مناسب اطيب منهم ...،
ابوي قام وقال كان ال فلان بيزوجوني انا قابل لكن ماني بمطلقتس ...،
حلفت امي ان رجلها ما تخطي مجلسهم الا وهو مطلقها ...،
ضج المجلس الي يقول طلقها والي يقول اسكت عنها والي يقول يا مره اقصري الشر وروحي وراتس ...،
الا هذي جيت جدي حزام الله يرحمه ...،
دخل عليهم ...!
جدي حزام له مده طويلة مسافر وتوه يرجع لديرة اليوم...،
شافه واحد من الجماعة قبل يدخل بيته وسلم عليه وشلونكم وش علومكم...؟
قال والله ما عندي من العلوم غير ولد عمك الي انت تخيرته على الجماعة كلهم وزوجته بنتك...،
خطب من ال فلان وافقوا عليه...،
قال جدي حقه وألف مبروك ويستاهل ولد عمي ...،
من يصبر صبره الي اعرسوا عقبه زوجوا عيالهم...،
قال له الرجال تبارك له وهو يقول لو أني أدري ان بنت حزام بتاخذ اطيب مني كان طلقتها...،
قال جدي وهو صادق لو ما هو طيب ما عطيته بنتي الا طيب ولد طيب...،
شافهم واحدا ثاني وجا يسلم على جدي مبطي عنه...،
ويسأ له وشلونك وش علومك...،
قال علومنا طيبين لكن سوات ولدعمك ماهي سواه زوجته بنتك واكل شبابها ...،
وساكت عنه لك سنين لا ولد ولا تلد...،
ويقوم الرجال يجيب من العلوم والسوالف الي تغث الكبد...،
لين سكته جدي...،
وقال امسك لسانك يا رجال تراك الي تسولف عنه وتسبه ولد عمي...،
قال ولد عمك اليوم ملكته على بنت فلان ويقول ما قاضبني عن طلاق مضاوي الا أني مستحي من ابوها ...،
ابي اعرس واخليها عندي علشان ابوها...،
قال جدي الله يجزاه خير حاشم بنتي من حشمتي ...،
وهم يسولفون جاهم رجال من الجماعة...،
قال يا حزام بن عاصف انت رجال ما تخاف الله ومخوف ولد عمك عجز يطلق بنتك...،
ما طلقها الا يوم أنك سافرت...،
أشار الجد بيده/ من اول البيوت متباعدة شوي لكن وانت على باب بيتك تشوف البيبان مفتحه وتشوف الي يدخل والي يطلع منها ...،
وهم واقفين شافوا رياجيل مرو مسرعين رايحين لأهل بيت البنت الي خطبها ابوي ...،
التفت واحد من الرياجيل وينادي جدي ...،
قال يا حزام بن عاصف الحق بنتك يقولون دخلت على مجلس ال فلان والمجلس مصتك بالرياجيل...،
ودخلت بينهم ...؟!!
يوم سمع جدي ها الكلام راح يركض لمجلس الرجال الي ابوي خطب منه...،
درى انها ما راحت عبث وأنه في شي كبير...؟
وصل العرب الا هذي امي واقفه على الباب ووقف جنبها وسال وش الي موقف بنتي قدامكم ...؟
علموه بالسالفة...،
عقب ما سمع ان ابوي كذب بطلاقها وساقها مثل الحيلة...،
انقهر وصدق الي حكوا با ابوي عنده...،
وهو الله يرحمه عليه لسان ما يهاب ولا يخاف ...،
قال يا ولد عمي تبي تعرس ومحد لا يمك اعرس بكيفك...،
والله يا البنت الي تجي من ظهرك انها تسوي عندي ألف ولد من الغريب ...،
لكن بنتي مهي لعبة تلعب بها تستدرج بها بنت الناس ...،
ان جاك ضنا حذفتها علي وان ما جاك خليتها عندك شجرةً يابسه لا جذر ولا ثمر ...،
ومسك يد امي وحلف ما يتركها لين يطلقها ابوي ويتمم ملكته على البنت الي خطبها...،
قاموا الرياجيل يبونه يغير من رايه حلف بالطلاق من ام عياله انه غير يتنفذ قوله...،
والمهر وتكاليف العرس كلها عليه...،
كرامة لولد عمه على صبره كل ها السنين على بنته...،
انجبر ابوي يطلق امي بمكانه وملك على هذيتس...،
سعاد بتاثر / جدتي ما تحسفت يوم سوت ها السواه ...،
الجد / وإذا تحسفت ما عاد يفيد...،
أمي صدقت الحريم الي حشو راسها...،
وسوت الي سوته بزعم ترد كرامتها...،
لكن السالفة كبرت ابوي طلقها واعرس بنفس المجلس...،
وابوها اخذها عنده...،
ثامر باستغراب ودهشه / كيف طلقها على شان ما جاه عيال وشلون رجعت وجابتك...!؟
ابتسم الجد/ يوم رجعت بذاك اليوم لبيت جدي امست طيبه واصبحت مرضانه محد يدري وش جاها ...؟
عدت كم شهر وهي بفراشها مريضة ويحسبونها اهلها من حزنها على ابوي...،
مضاوي باستفهام / جدي جلال وش سوى تزوج خلاص...،
الجد / ابوي الله يرحمه تمم عرسه وما طول طلقها يقول عجزت اتقبلها...،
تعلمني امي تقول جتني البنت الي اخذها ابوك...،
تقول يا ام سعد انتي وش انتي مسويه لرجال...،
والله أني شفت ظهره ولا شفت وجهه واني طلعت من عنده مثل ما دخلت عليه...،
مضاوي باستفهام / كيف شافت ظهره ما شافت وجهه...!
سعاد بنبرة سخرية مرحه / يعني ما تعرفين وش معناها...؟!
اردفت / يعني كنه طلاق بملكة لا دخل عليها ولا دخلت عليه...،
مضاوي بنبرة استغراب / سبحان الله ...
وبتعجب اردفت / يعني قالت السالفة عادي ما خافت من أحد ينتقدها ...؟
سعاد بعفوية / وش بينقدونها العرب عليه ...،
الرجال ما يبيها وجبره جدي عليها جبر ...،
عضت مضاوي شفتها واغمضت عيناها بقهر وهزت رأسها بندم خفي لم يفهما سوى ثامر...،
والتفت للجد / وجدي جلال وش سوى عقبها ...؟
الجد / ابوي من سمع ان امي مرضانه طلق الحرمة وطلع من الديرة كلها تعذر يدور شغل...،
وعقب ما انتشر خبر طلاق امي أرسلوا عليها ناس واجد من الجماعة يخطبونها وامي تردهم...،
وحاول جدي انه يزوجها لكن عيت قالت العرس جربته ولا عاد لي خاطر منه ...،
امي يوم راح زعلها وابوي طلق الحرمة الي اخذها تبي الرجعة على ابوي...،
لكن جدي قال ما ترجعين عليه وانا حي...،
مر على طلاقها أربع شهور والا خمسة وهي بفراشها مريضة ما تخالط أحد ...،
جاهم الشيخ الي حضر ملكة ابوي وخطبها...،
وعطاه جدي وملك له وما علمها الا بعد ما صارت بذمة الرجال...،
راح لها وقال فلان جاني عانى من الكويت لسعودية على شانتس وهو رجال ما ينرد...،
وتراني ملكت له اليوم والعرس عقب أسبوع...،
وتقعد امي تصيح قالت انت وشلون تملك ما تشاورني ملكتك تراها باطلة...،
قال ملكتي صحيحة...،
وجلال لا تحلمين حتى حلم أني برجعتس له ...،
تراني كل يو م طارد لي خاطب...،
خلق الله رايحه جايه على مجلسي قبل حتى تخلص عدتس...،
واليوم مالي وجه جاني ها الرجال متعني وجايب معه وجيه الجماعة...،
قالت عدتي ما انتهت وانا حامل من ابن عاصف ...،
وما دريت بحملي الا عقب ما طلقني والحين لي ست شهور حامل...،
طلع جدي لرياجيل الي بمجلسه وقال لهم السالفة وان الملكة باطلة...،
قال الرجال الي خاطبها انا على كلامي...،
وكانك تبيني يا حزام بن عاصف نسيب لك انا شاري نسبتك بلي انت تامر فبه...،
وابي بنتك من شفتها على باب ذاك المجلس ...،
وموافق ارجع عقب ما تالد وراضي فيها وبضناها يعيش معي مثل عيالي...،
سعاد بتعجب / يا الله كيف النصيب وهو ما شافها الا وهي واقفة ومتغطيه وتهاوش بعد ...!
ضحك الجد / الزين يا بوتس يفرض حضوره واكيد انه قبل سامع عنها وعن زينها ...،
مضاوي باستنكار واستغراب/ الحين الرجال هذا تزوجها وهي حامل...،
الجد / يوم ملكوا محد يدري بحملها الا هي...،
أردف / رجع لديرته بعدما عطاه جدي مهله كم شهر قال تجي وهي حرمتك...،
مرت الشهور وولدتني امي وصار عمري حول شهرين...،
وجا الرجال على الموعد الي بينه وبين جدي ...،
ثامر باستفسار / جدي جلال درى انها حامل ...،
الجد / ايه درى ورجع وحاول يرجعها وعيا جدي حزام قال ما ترجع لو على موتها...،
ولا تصير لك بنتي حرمة وانا حي ...،
وملك لشيخ الي خطبها مره ثانية...،
وجو ناس لأبوي قالو خذ ولدها منها...،
اقهر ابوها مثل ما قهرك عليها وزوجها قدام عينك...،
قال ابوي والله ما تبتسي مضاوي على سعد وانا حي...،
الله يوفقها وانا الله يصبرني وتحرم علي الحريم من عقبها...،
اعرست امي واخذت الرجال هذا وقعدو بالديرة فترة ورجع للكويت واخذ امي وانا معها ...،
الرجال هذا عنده حلال وخير واجد وماخذ قبل امي حريم...،
امي تعلمني عقب...،
تقول اغلاني غلا ابن الحلال ما عاد يشوف الا انا ...،
وولدي عنده أغلى من عياله...،
سعاد / كم قعدت جدتي معه...؟
الجد / طولت معه ثمان والا تسع سنين انا اذكره الله يرحمه ...،
يجلسني بجنبه قبل عياله ولا عمره حس خاطري بكلمة...،
ولا اذكر انه هاوشني حتى لو انه زعلان...،
مرات حريمة يشكون مني...،
كنت صغير ويمكن اني اخرب واتعبث واضرب عيالهن وما يجوز لهن...،
يقول ضوتي مالها غيره ويهاوشهن على شاني...،
ابتسمت سعاد بتعجب / يا الله وقتها جدتي حرمه كبيرة ويدلعها بعد...،
اردفت / وعمتي رثعة متى ولدتها يوم يقول مالها غيره ...،
الجد / امي من اخذته تحمل ويطيح حملها...،
ما تم الا حملها برثعة الله يرحمها ...،
حملت قبلها وبعدها كم مره وكلهم راحو ...،
مضاوي / ليه يطيح حملها اكيد فيه سبب ...،
الجد / الي سمعته من امي تقول كل السنين الي عشتها معه...،
ما عمره قهرني ولا كدر خاطري بكلمه...،
ومن اقول اشتقت لسعودية ترك الي بيده وجينا للمملكة لين يطيب خاطري ثم نعود للكويت...،
لكن على طيبه معي عجزت نفسي تقبله ما ابيه ولا له مكان بقلبي...،
وما فيه عيب يخليني اطلب الطلاق...،
وصابره وساكته ما بيدي شي أسويه ...،
ابوي ان جيته نار موقده...،
وبنتي على يدي صغيرة خفت انحرم منها...،
سعاد / يمكن سبب تسقيطها نفسي...،
الجد / تقوله الله يرحمها من كثر ما قلبي صاد عنه...،
من أدري اني حامل طاح الورع ما كتب لها ربي الا رثعة...،
مضاوي / طيب كيف حملت با ابوي وشلون طلقها وهو يحبها كذا...؟
الجد / هو عنده حلال واجد ويطلعون له وقت الربيع...،
مره فيه جمل يبي يبركه الراعي وعجز منه وقام الراعي مسك راس الجمل وتعلق به...،
حرك الجمل راسه وضرب راس الراعي وطاح الراعي وقام يصيح...،
يوم شاف الجمل الراعي طاح برك جنبه ...،
تقول امي شفته وقعدت اضحك على طيحت الراعي...،
الا هذا ابو رثعة مدري منين جاي وانا اضحك ...،
ويقوم يتلفت بيشوف وش انا اضحك عليه ما شاف شي...،
قال ام سعد انتي وش تضحكين عليه...؟
تقول وانا أشر له على الراعي الي جالس وماسك راسه والجمل بارك جنبه...،
قلت والله جملك عنيد واعند منه راعيك ما تركه لين بغى يكسر راسه ...،
قال وهذا الي خلاتس تضحكين معاند الجمل لراعي ...،
تقول ويهز راسه متعجب ومتهول وقال...،
انا لي تسع سنين انا وياتس وانتي لابسه ثوب الحزن...،
ابي بس شوفت ضحكتس والا هرجتن تقولينها قبل اسالتس ...،
لو يقولون يا سلطان بكم تشري ضحكت مضاوي...؟
اقول يفدى مضاوى كل مالي وحلالي بس اشوفها تضحك وخاطرها مسفهل ...،
والحين تضحكين من راعي عسره بعير...،
صاد بقلبتس عني جلال ابن عاصف...،
روحي وانتي طالق ولتس مابغيتي من الحلال...،
والله يسامحتس ويبيحتس ...،
بغينا قلبتس وقلبتس ما بغانا ...،
مضاوي بتعجب واندهاش / يا الله يا شهامته وطيبه معقولة في رجال كذا ...،
ثامر بذهول / الحين قاعده معه كل ها السنين ولا عمرها سولفت ولا ضحكت معه وصابر وساكت عنها...؟!
الجد / والله اذكرها الله يرحمها وانا صغير دايم متلثمة حتى وهي نايمة كنها ضيفه تبي تمشي ماهي في بيتها ...!
سعاد / طيب وعمتي وين راحت ...؟
الجد وهو يمد فنجاله لسعاد / رثعة يوم ابوها طلق امي وقال خوذي الي تبينه من حلال ومال...،
قالت امي حلالك ومالك الله يبارك لك فيه...،
ما بي منك الا بنتي ما تاخذها مني لين هي تطلبك...،
مضاوي بتعجب / وتركها كذا بدون مشاكل تروح ...؟
رفع الجد كتفه / وش يبي يقول بغاها وما بغته...،
اذكر هو الي رجعنا الله يرحمه ومعنا واحد من عياله كبير لين وصلنا لديرة ونزلنا ...،
وقال لجدي وجه ام سعد ابيض لكن القلوب ما تجبر على بعضها...،
و رثعة امانه عندكم ومشى الله يرحمه ...،
سعاد / وجدي جلال وش سوى وكيف رجعها ...،
الجد / ابوي من اعرست امي ما قعد بالديرة راح يشتغل ودرى عقب ورجع خطبها...،
وعيا جدي الله يرحمه وطرده وما خلا أحد الا وجابه يتوسط...،
وعقب الناس لامو جدي يكفي البنت انحرمت من ابوها ...،
خل سعد يعيش بين امه وابوه ...،
ورجعت امي على ابوي عقب فراق 14 سنه...،
عقد ثامر حاجبيه بذهول / يعني جدي حاول خمس سنين عقب طلاقها على شان يرجعها...؟!
الجد / ولو ما الناس اكلت وجه جدي وشاف منها ميل لأبوي ما يرجعها ...،
سعاد باندهاش/ يا الله وش فرحة جدي يوم رجعها وكيف تقبل بنتها الي جت معها...،
ضحك الجد / صارت رثعة أغلى مني عنده الي يزعل رثعة يزعله والي يرضيها يرضيه...،
وكل سنه ياخذني انا وهي نزور ابوها وعمانها بالكويت...،
ويمرنا ابوها الله يرحمه ويكرمه ابوي قبل جماعته...،
أردف/ ويوم سمع ان امي جابت حزام أرسل الجمس الحمرالي انتم تشوفونه...،
ومالي حوضه حلال وارزاق يقول هذي هدية وبشارة ولد العنقا...،
ابتسمت مضاوي بتهكم / لو بوقتنا هذا كان كل واحد فيهم تفنن بتعذيب الثاني ...،
سعاد تجاهلت ما ترمي له مضاوي / الحين سلطان أخوي مسمينه عليه...؟
الجد / ابوي سماه عليه وامي سمت نواظر...،
كان يبي رثعة نواظر على امه وقالت لهم عجوز سموها رثعة...،
يمكن انها تعيش وسماها وعاشت لين اعرست وجابت بنتها الله يرحمها...،
سعاد / سبحان الله كيف الاولين عقولهم وتفكيرهم سامي ...،
ثامر بتعجب / في سوالف تسمعها لو ما كانت من ناس ثقات تقول ضرب من الخيال...؟!
سعاد بممازحة / الحمدلله الي رجعت جدتي العنقا والا ما كان شفنا مضاوي...،
التفت الجد لمضاوي وابتسم لها بمودة وعطف/ اي والله الحمدلله ان ربي جاب حزام الي ترك لي مضاوي ...،
سعاد / يبه بسالك وتكفى تعلمنا بالحقيقة لو يخيرونك بينا وبين مضاوي من تختار...،
ضم الجد كتف مضاوي بحنان / هذا ما بها خيارات اكيد الضوه هي الاولى عليكم كلكم ...،
سعاد برجاء مرح/ والثاني من هو يبه تكفى ...؟
ضحك الجد / والثانية مضاوي والثالثة مضاوي والعاشرة انتي...،
سعاد بممازحة / الحمدلله راضية بالعاشرة اهم شي لي مكان ...،
نظر الجد لساعته وبممازحة / قربت الصلاة يا الله قومي شوفي اشغالتس مقابلتنا وتاركة بيتس ...،
ابتسم بمرح / علومي وجبتها لتس ولاتنسين الوعد الي بينا ...،
وقف الجد وغادر الصالة ليتجهز لصلاة ووقفت بعده مضاوي لتغادر المكان...،
.
.
.
|
28-11-24, 09:49 PM
جديد مواضيع قسم قصص من وحي قلم الاعضاء
العرض العادي
