مرحبا يا جميلات الليلة بأذن الله بينزل الفصل السابع
كونو با القرب

آرائكم تهمني

الفصل السابع

استدارت مضاوي لسعاد واحتضنت خصرها وبكت بحرقة احتضنتها سعاد وبكت معها
قامت سناء بسرعة لباب الغرفة والشباك وأغلفتهم
عم الغرفة الصمت سوى شهقات سعاد ومضاوي ودموع ريما وسناء الصامتة
مسحت سناء دموعها بمنديل وضحكت/ اعوذ بالله منكم ياعايلة العاصف الباحثة عن الاحزان
أردفت وهي تمسح انفها / الحين انتي وعمتي سعاد وش يبكيكم
والتفتت لريما / وانتي الثانية بدال ماتسكتينا قمتي تجعرين
ريما تبتسم من بين دموعها وبعفوية / مدري شفتكم تصيحون صحت معكم وتخبرين دموعي بسرعة تنزل
تتنحنح سناء وبجدية/ عميمه وصليني لبيتنا الجو هذا ابد ماهو لي ولاهو جوي
سعاد تعتدل وتمسح عيونها بيدها / اجلسي تعشي يالملسونة
مضاوي تنزل من السرير
سعاد امسكت بيدها / وين تبين
مضاوي مسحت دموعها بطرف كمها / بغسل وجهي وجاية
بعد عدة دقائق على السفرة
ريما / الحمدلله ما بغينا ناكل اليوم يوم العاصف العاصف وبس المغرب هوشة بدر والحين دموع امي ومضاوي
نفضت يدها بحماس / يا الله مضاوي فاتك اليوم اكشن ليت طرى لي وصورته لتس
سناء / يالنذلة ومن هو سبب السالفة كلها غيرتس
سعاد / سببها لسانتس الي متبري منتس
سناء ترفع عيونها لسماء / الله فوق
سعاد تصفق يديها بقهر من سناء/ أي والله الله فوق الجميع
التفتت لمضاوي / بعلم مضاوي بالسالفة وهي الي تحكم
سناء تحضن مضاوي وتقبل خدها / حبيبتي الضوة معي ظالمة او مظلومة
سعاد تسرد جميع احداث الموقف بما فيها كلام ثامر مختصر
سعاد تهز راسها با استهزاء / احكمي يا مضاوي من الي غلطان
مضاوي / يعني انتوماتعرفون بدر وغيرته الحمدلله الي جت على كذا
سناء / يعني انا الي معي الحق
ريما بتعجب/ وللحين لتس عين تسولفين
والله ماتخيلت الا أنتس ركض لبيت خالي مساعد وتبكين فكوني ما ابي بدر
سناء بتهكم / وليه ان شاء الله ما ابيه عشان صرخ كم صرخة
خله يصارخ لين ينبح صوته ومرده لي تشوفون وش اسوي فيه
سعاد / والله انتي وهو قدر ولقى غطاه
سناء عقدت حاجبيها بتهكم / والله قدر وغطا شن وطبقة تخبرون متأثرة بالتخصص (سناء لغة عربية)
بربيه لكم يا العاصف ماش ماهي معجبتني طريقة خالتي نورة بتربيته
سعاد تضرب على راسها / الله لا يفضحنا لو يسمعتس احد الحين
مضاوي تبتسم بصمت
ريما بممازحة / الحمدلله شفنا ابتسامة مضاوي
سناء / سلامات ياعيوني انتي وهي وانا صادزة
وبقهر/ والله يافيني قهر عليه سنين مجمعتها له
أردفت سناء / ابي افهم يوم انه غار من ملكة ثامر وقال بملك معه ورى ماكمل جميلة وقال باعرس مثله
مضاوي تنشغل عن كلامها بشرب العصير
سعاد بغيض تصر على اسنانها/ اسكتي وامسكي لسانتس والله لو يسمعتس تقولين كذا انه لا يعرس عليتس قبل حتى ثامر ومضاوي
وتعرفين ابوتس مساعد لو يقول له بدر صل شمال صلى
سناء ترفع حاجبها با استهزاء / ليته يسمع وشفتي ولد اخوتس هذا بديران انا الي بصلي به شرق
على بالتس ناسية سواياه فيني
امسكت بيدها بتوجع مصطنع / قص يدي الا شوي يوم سكر شباك سيارته عليها
لو الحين يدي مقطوعة الي ما يعرفني بيقول سناء السروق
التفتت لمضاوي / تذكرين مضاوي بعد سالفة البيرة
ريما تضحك / شكل تاريختس معه حافل
سناء تهز راسها بتوعد/ ماعليتس بيني وبينه تصفية حسابات اصبري بس اصير بعصمته مدري هويصير بعصمتي
سعاد ترفع ايديها / يا خلاف تخلف على ولد خي الي يبي يبتلي بها العوبة
ريما بفضول/ بالله وش سالفة البيرة
سناء بحماس / سالفتها نلعب العصر بحوش جدي انا وشروق ومضاوي وخلود وبنات ناسيتهم من الحارة
لعبة على قولة اخوانا المصريين استغماية وعلى قولتنا شرعدا
المهم شروق هي الي تدورنا ورحت اركض اندعست بمطبخ بيت جدي
انتظرت يلقوني محد عرف مكاني اسمع الأصوات مسكتهم كلهم شروق الا انا
فتحت الثلاجة بشرب موية ولقيت بيرة
اخذتها وطلعت واقرا الي مكتوب واغني بيرة شعير بيرة شعير ومواصلة بصوتي العذب وقبل أوصل البنات
الا طلعت بدر بوجهي مدري منين طلع وابي اهرب منه
ويمسك يدي الي فيها البيرة واصايح ويركضون البنات على صوتي
ويفتح بدر البيرة ويصبها فوق شعري
ويضحك هذي بيرة شعر مهي شعير
مضاوي تنفجر ضاحكة
سعاد تضحك و تناظرمضاوي بفرح / حجت يمينك يابدر على سواتك
سناء / وتبون انسى سواياه بعد معصي مردودة مردودة
ريما / والله لو انا منه حتى الي اسمها مشابه لأسمك ما اخطبها
سعاد تنظر لها بنص / ماعليتس والله بدر يعسفها وتشوفين تهديداتها هذي تروح مع الهوى
ريما بذعر/ ما أنسى شكله وهو يصارخ وثامر يهديه
شهقت فجاءة با اعجاب / يمه ماتوقعت ثامر مزيون كذا
وضعت يدها على فمها ببرائه / صراحة اول مره اشوف واحد احلى من ابوي
مضاوي التفتت لسعاد تلقائيآ ورفعت جيب قميصها على وجهها ودخلت بنوبة ضحك
لم يعرف سبب الضحك الا سعاد التي كانت سعيدة بردات فعل مضاوي لتعليقات سناء وريما
ابتسمت وهي تحاول ان لاتنفجر ضاحكة امام استغراب سناء وريما لضحك مضاوي التفتت لريما / طالع لأبوي مزيون
ريما بعفوية / اول كنت أقول ما احد با العاصف غير جدي وخالي فهد مزايين
وبا امتعاض مطت فاها / وماودي أقول بدر مزيون أخاف تغارين
سناء بممازحة / ومن أسباب موافقتي عليه ياخبله انه مزيون وشروق اخته
ريما / وانا فرحت احسب بتاخذين ثارتس منه الشرير وتبردين قلبي فيه
سناء / ماعليتس الثار ماخذته ماخذته منه ثاري وثارتس
سعاد ترفع رأسها / ارجع أقول الحمدلله ماحولنا احد يسمع خبالكن
سناء تضحك / ريوم دام الموضوع تصفية حسابات وش رايتس نزوجتس سعد تاخذين حقتس منه
سعاد با انفعال وغضب حاولت ان تسيطر عليه / وش ها السالفة الماسخة تدرين ما احب ها السوالف
احرجت سناء من ردت فعل عمتها فهي تعلم ان عمتها تكره ان تقال مثل هذه الأمور لريما وحاولت ان تتجاوز احراجها
وبممازحة / انا قصدي نكوش على الحلوين بعيلة العاصف مانخلي احد منهم يفلت ويروح للغريب
اردفت / والشيون الباقين الشكوى لله ندور لهم مزايين نحسن النسل
ريما بااشمئزاز وقرف / وع من زينه اخوتس الشايب ما ابيه بعدين عندي عقدة ازليه منه اكبر من عقدتس من بدر
اردفت / والله مافيه زين الا انه خريج تربية خاصة
وبعفويه / تدرين من تغطيت لليوم ماشفتهم اول مره اشوف بدراليوم
رفعت يديها ووضعتها على شعرها ببرائه / الحمدلله ياربي افتكيت من تعليقهم على شعري
التفتت سناء لمضاوي / اجل اسمعي ضوه ترى ولدتس محجوز لريما من الحين اكيد بيجي مزيون
نبي نحسن النسل وانتي فاهمه الوضع الزين عندنا شحيح
ريما تبتسم وبخجل مصطنع / موافقة موافقة
وبغرور امالت رأسها / الحمدلله ياربي جيت مزيونة على ابوي
التفت لوالدتها / وماقصرت بنت سعد جابت العيال شيون فبا احتاط اخاف يجون عيالي على اخواني
سناء بمقاطعة / دايما كذا وضع القعدة يجي حالة خاصة يا توب بالزين ياتوب بالشين
حركت رأسها وضحكت / ما شفتي سهى اختي الله يكون بعون الي بياخذها
سعاد تنظر لمضاوي المبتسمة وتبتسم
سناء تضع يدها على خصرها و با استغراب مصطنع / ليه يعني عشانها اختي ماقول الصدق هي صدق شينة وسميرا
واذا شافوها العالم الي مايعرفونا يااالطيف لطفك يحسبون اهلي متبنينها من بنغلادش
ريما با امتعاض / يويلتس من الله يعني سوسوبنغالية
سناء / صراحة حتى انتي لولا طولتس الفارع الي على ابوتس و وشعرتس الاندومي الي على عمتس رفعة
ماصدقت انتس بنتنا وقلت بعد متبنينتس من دول المشرق الأسلامي
ريما ترفع ايديها تدعي / يااارب ياسناء ان بدر يااخذ حقي انا وسوسو منتس
سناء تضحك / وش عليتس مني انا واختي ادعي لنفستس بس
سعاد تضحك / الحمدلله قلبتن على بعض
مضاوي تبتسم / من جد سناء ترى مزحتس ثقيل
سعاد تحرك رأسها بتأكيد/ انا اشهد انه ثقيل بهذلت سهى ياحرام بهذله
أردفت / مانسى مره جت جلست عند رجول ابوي الضعيفة وتمد رجلها وتناظر برجلها ورجل ابوي
التفت عليها ابوي قال لها انتي وش تسوين قالت جدو سناء تقول شوفي رجل جدو اذا مثل لون رجلتس انتي بنتنا
اذا غير انتي امتس الشغالة الي سافرت وقام ابوي كرشها
ريما تضحك / يعني تحطيم نفسيا ومعنويا على جميع الأصعدة
سناء بجديه / والله بنات صدق تتوقعون عقب العرس اعقل
سعاد تضحك / وين الي لها ثار بايت وتدور العقل
سناء / ما عليه عقب ثاري اقصد اعقل يعني
سعاد ترفع ايديها با استسلام / والله عاد حسب شطارة الخيال
سعاد تنظر لساعتها / تأ خر الوقت من متى انا هنا بروح لبيتي
سناء بتذمر / وامي أحرقت جوالي وصلوني بطريقكم
تقف مضاوي مودعة
سعاد / مضاوي لا تنامين اشوف عيالي وعقب بكلمتس
سناء ويديها على خصرها / وش ها الخيانة عندتس شي قولي قدامنا
سعاد تدفع سناء / أقول امشي قدامي البسي عباتس لا تبلشينا بمساعد وفزه يحسبون مسوين فيتس شي
.
.
.
في ملحق بدر نفس الليلة
بدر متمدد امام التلفاز يقلب القنوات / استعجل العشا برد ماصا رت ترويشة
دخل ثامر وهو يمسح شعره بفوطة / وش فيك يا ازعاج تعش ماهو لازم تنتظرني
قام بدر وجلس على السفرة / والله ودي لكن أكره آكل لحالي
جلس ثامر مقابلة / هذا انا جيت ابلع يا الفضيحة
بدر / ماودك بعد العشا نطلع مقهى والا نفرفربالسيارة شوي
ثامر بتعجب / ولك نفس بعد الي سويته تطلع
اردف وهو يمد يده لسفرة / بتعشى وارقد
بدر يضحك بممازحة/ لا تذكرني اروح الحين اخلي عمي يملك لي عليها علشان اتفاهم معها صدق وجه لوجه
.
.
.
بعد العشا
بدر يقف ويسحب يد ثامر / الدجاجة أحد ينام با لويك يند
ضم ثامر ذراعه بقوة و أغمض عينيه وتأوه بوجع
جلس بدر بجانبه وتحسس ذراعه / وش ذا وارمة يدك لا يكون كسر
أردف / قوم نروح أقرب مستوصف نتطمن عليها
ثامر / يابن الحلال لاتكبر الموضوع اجلس بس
بدربا اصرار / قم البس ثوبك والله انت الي ما تجلس عليها كذا
تفحص يد ثامر وبخوف واستغراب / كيف صار كذا
ثامر با استهزاء / كيف صار وتسال بعد يوم اسحبك من فوق الرجال بغيت تذبحه
يقف بدر ويلبس ثوبه / نكمل سوالفنا بالسيارة يدك ماتطمن ابد
.
.
.
في المستوصف
الدكتور وفي يده الاشعة ويشير الي مكان الاصابة / في شعر جدا بسيط في الدراع يحتاج فقط لراحة وماتحركش دراعك كتير
بدر بخوف / متأكد يا دكتور انه بس شعر أخاف ذراعه مكسور
ثامر / يابن الحلال وش فيك انت تحسب الكسر هين زي ماقال الدكتور شعر بسيط وكم يوم ويخف
بدر لدكتور / طيب ليش يده فيها ندب كذا
الدكتور / مالهاش دخل رضوض خارجية تروح عادي
وهو ماشاء الله بنيته قوية وجسمه رياضي مسألة وئت بس
أردف الدكتور / حكتب لك على مسكن
وبلاش ممارسة الرياضة العنيفة وحمل الاثقال والسباحة
رياضة المشي كفاية في الوقت دا
بدر / الا الرياضة يا دكتور ادمان عنده
الدكتور يضحك / واضح ماشاء الله عليه وهو دا الفايدة من ممارسة الرياضة
جسم الرياضي يتحمل اكتر من الانسان العادي يعني الضربة الي حصلت لدراعه لو كانت لأنسان عادي ابسط حاجة حتحصل كسر مضاعف
.
.
.
غادر بدر وثامر المستوصف
بدر بقهر / اعوذبالله من حزة ابليس تسببت على يدك قبل عرسك
ثامر / وش فيك اكلت نفسك متعود على ها السوالف كم مره بالسجن افك هوشات
أردف / بعدين يابدر ابيك تترك عنك ها العصبية هد شوي ماهو كل شي يوخذ بالعضلات
بدر يلتفت له / ليش تبيني ديوث يعني ما شفته كيف دخل راسه بالسيارة
ثامر / الرجال شغله يحافظ على اعراض الناس وحنا ترى موقفنا غلط
بدر / ياحظك بطولة بالك وتبرر بعد
ثامر / والله لو شفت الي شفته بالسجن جرايم صارت من أشياء تاافهه عوايل تشتت بسببها
زفر بوجع / انت على بالك طولة البال من شي هين اكتسبتها
لا والله من طول السنين الي عشتها بذاك المكان روضتني والا تعرفنا نيران تعصف على اسمنا
يضحك بدر / تكفى اجل خلك كذا دايم ضابط اعصابك ترى حنا اعوذبالله اذا ثرنا ثرنا
.
.
.
بعد يومين صباحا في بيت العاصف
نزلت مضاوي من غرفتها على صوت الجد يناديها وهي ترتدي عبائتها وطرحتها وتمسك بنقابها
قبلت راس الجد / صباح الخير
الجد بترحيب / هلا يا الله يابوتس استعجلي راح الوقت
أردف / اوراقتس معتس
مضاوي تتفقد شنطتها / ما عليك كل شي معي انت اطلع لسيارة ولاحقتك
.
.
.
في المستشفى
داخل المختبر سناء ومضاوي وام سعد
سناء تنتفض بخوف وتوتر / خلاص ما ابي احلل العرس كله ما عاد ابيه مالقت عروق الممرضة
فزه وبغضب مكبوت وصوت منخفض / هو لعب فضحتينا من اليوم الي قدامنا ورانا خلصو وانتي اشغلتي الدنيا
مضاوي التي تقف بجانبها / كلها شكة ابرة هذا انا جيت بعدتس وخلصت
سناء با امتعاض/ وش شكة ابرة توها تقول العروق صغيرة حاولت ما عرفت ما ابيها تسحب لي خلاص
مضاوي / عادي أكثر العالم كذا
أردفت بمسايسة / تبين انا اسحب لتس العينة
يقاطعهم صوت نسائي / مضاوي العاصف
استدارت لها مضاوي سلمت بترحيب / هلا غادة كيفك
غادة / وينك ماهو على أساس تطبقين ها الأسبوع مع المجموعة
مضاوي / بأجله ان شاء الله عندي ظرف طارئ
أشرت لسناء وفزه/ هذولا معاي جايين
بناخذ عينة دم من الحلوة هذي وماتبي الممرضة مالقت عرق
غادة تضحك / يا الله نتعاون عليها
إشارة لسناء / مدي يدك
سناء تمد يدها بخوف وتغمض عيونها
بعدها بدقيقة غادة تبتسم / خلاص حسيتي بشي
سناء تعدل كم عبائتها / لا والله مشكورة يدتس مره خفيفة ما شاء الله
غادة تشير بعينها لمضاوي/ اشكري الدكتورة مضاوي هي الي اخذت العينه
سناء تقف وبود وامتنان تبتسم لمضاوي / تسلم لي صاحبة اليد الي ما حسيت فيها
مضاوي تبتسم / يا الله بسرعة تراتس مسوية زحمة والمختبر خلقة مزحوم
خرجت سناء وام سعد للمواقف
.
.
.
في احد زوايا المستشفى
مضاوي با استفهام / آمري غادة اشغلتيني
اردفت / تقولين ابيك بموضوع ضروري
غادة / مضاوي مابغيت استفسر قدام الي كانو معاك
وبا استفهام / ليش بتأجلين
مضاوي تبلع غصتها بصمت
يقاطعهم صوت رجالي / مرحبا دكتورة وين تقرير المريض الي انتي ماسكة حالته
غادة / اهلين دكتور عبد الله موجود التقرير
اشارة لمضاوي / ما عرفت الدكتورة مضاوي
الدكتور / اهلين دكتورة مضاوي ماشفناك اليوم بالمجموعة ليش متغيبة
غادة / مضاوي تقول بتأجل التطبيق
الدكتور با استنكار / حرام والله طبيبة مثلك تفوت وقت عليها
مضاوي با انكسار وحسرة مكبوته / ظرف خاص اضطرني لتأجيل
الدكتور / مهما كان هذا مستقبلك طبقي اقلها شهر عشان اختبار الهيئة
غادة / ليتك بديتي معانا بعد التخرج على طول كان ماباقي عليك شي
.
.
.
على الجانب الآخر يقف ثامر بجانب سيارة الجد
ثامربا استغراب / جدي ليش انت هنا
الجد / جيت مع مضاوي وجالس انتظرها
أردف بقلق/ مساعد اخذ اهله ومشو وحنا وصلنا للمستشفى مع بعض تأخرت علي
ثامر / جوالها ماهو معك
الجد / الا بس ادق عليها مقفل
ثامر / يمكن مافي شبكة داخل عطني جوالك
الجد يناول ثامر هاتفه
ارسل رقمها لهاتفه
اتصل عليها هاتفها مغلق
التفت للجد /بدخل اشوفها
دخل ثامر وصادف امامه
مضاوي ومجموعة من زميلاتها والدكتور يحاولون بمضاوي
غادة / شوفي نهلة ومها اول دوام لهم اليوم
نهلة بترجي / من جد مضاوي حاولي والله مانستغني عن ملاحظاتك
مها / إذا بتأجلين بطلب تأجيل زيك
مضاوي بوجع خفي/ والله العظيم ظرف قاهر بحاول اتخطاه با أسرع وقت واكمل معاكم
مضاوي تنتبه لثامر الواقف قريب منهم ويشير لها بهاتفه
فتحت شنطتها وانتبهت لهاتفها المغلق واعادتها لشنطتها
غادرت المكان / عن اذنكم تأخرت على السيارة
تتبعها مها / من جد مضاوي با اسحب ترى إذا ما راح تجين
مضاوي تهمس بغضب وتصر على اسنانها / مجنونة انتي تربطين نفسك فيني
مها / ما أدرى ليش اتفائل فيك إذا تاخرتي عني با انكب
مضاوي / تعوذي من ابليس انتي مشروع دكتورة ناجحة لاتربطين نفسك با احد
مها تنتبه لوجود ثامر / مضاوي واحد عينه علينا من اليوم تعرفينه
مضاوي بتهكم ساخر / أي اعرفة هذا الي حظه أردي من حظي
أردفت مضاوي وهي تطبطب على يد زميلتها / تأخرت مره لكم ساعة ماسكيني
تغادر مضاوي المستشفى دون الاهتمام لوجود ثامر
يلحق بها ثامر ومن بين اسنانه بغيض / انتي مافيتس دم تاركة جدي بالحر ينتظرتس ومسكرة جوالتس
مضاوي تمشي وثامر قريب منها
مضاوي بهدوء / انت قلتها ما فيني دم
ثامر با اشمئزاز /والمناكير الأحمر ذا لا اشوفتس حاطته
.
.
.
تصل لسيارة الجد وتركب
الجد يلتفت لها بقلق / عسى ماشر تأخرتي وجوالتس مقفول
مضاوي / اخروني بنات من الي معي في الكلية لقيتهم هنا وجوالي طافي شحن تو الي انتبه له
الجد ابتسم با ارتياح/ الحمدلله والله خفت عليتس قلت يمكن داخت عقب التحليل
مضاوي / لا تشغل بالك ماعلي طيبة
.
.
.
بعد ساعة امام بيت الجد
تقف سيارة الجد وخلفها سيارة ثامر
نزل من السيارة وفتح باب سيارة الجد / توصي شي انا طالع الخرج
نزل الجد من السيارة / سلامتك توصل بالسلامة
مضاوي تنزل بسرعة وتغلق باب السيارة بقوة
ثامر بتهكم / هذي وش فيها بغت تطيرنا
الجد يضحك / ماعليك منها
أردف / ماقالو لك متى النتيجة
ثامر / ما أدرى والله لكن لا تشل هم بتجينا رسايل على الجوال اذا جت كلمتك
يقبل ثامر راس جده ويتجه لسيارته
.
.
.
في نفس الوقت في بيت مساعد
فزه التفتت لسناء/ صدق مضاوي بتأجل دراستها
سناء تنظر لأثر الابرة في ذراعها / ما أدرى سمعت مثل ما سمعتي
مساعد / ما لقيتي الا مضاوي تلاعب على مستقبلها
وبتمني واعجاب/ الا ليتها عطت عيالنا وبناتنا من حرصها شوي ما شاء الله عليها عساني ماضرها
فزه / لا يا مساعد ما شفتها وهي تقوله
سناء / يمه دايخة بطلع غرفتي اريح
تغادر سناء لغرفتها وبالها مشغول بقرار مضاوي
مساعد / ماعليه نشوف السالفة هذي بعدين خلتس منها
أردف / احتمال بكرا اوبعده نتيجة التحليل
عرس ثامر مع الملكة شوفو وش ناقصكم انتي وبناتس وارسليه لي
فزه/ انا ابي ملكة بنتي عقبهم بزين لها حفل
مساعد با انفعال/ ماهو على كيفتس كلهم بيملكون سوا
وثامر عشا نفس يوم الملكة وياخذ حرمته ويتوكل على الله
عقد حاجبيه با امتعاض / وانتي لا تخططين من راستس اتفقي مع ام بدر وشوفو وش الي يصلح
.
.
.
في غرفة سناء تتصل بمضاوي هاتفها مغلق
سناء بنفسها / لا الموضوع مايطمن
تعاود محاولة الاتصال
مضاوي / هلا
سناء بلهفه / ليش جوالتس مقفل
مضاوي / طافي شحن تو الي دخلت البيت وشبكته على الشاحن
سناء / صدق الي سمعته اليوم كلامكتس لزميلتس
مضاوي / مثل ماسمعتي
سناء / الكلام بالجوال ماينفع انتي وراتس شي ولازم اعرفه
بعد المغرب جهزي القهوة والحلى جايتس
مضاوي تبتسم / حياتس الله مبطية عن خبالتس
.
.
.
بعد المغرب في بيت الجد
في مجلس النساء
مضاوي ترتب القهوة والشاي
عاد الجد من المسجد ودخل لمجلس النساء
الجد يبتسم / ماشاء الله وش ها الزين والقهوة من بيضيفكم
مضاوي / هلا جدي مافي احد سناء قالت بتجي وتتوعدني اذا مالقت قهوة وحلى سنع
يضحك الجد / ها البنيه والله انها ملح بيت مساعد كله
يقاطعهم دخول سناء وتقبل راس جدها ويده / والله انت ملح وقبلة الدنيا كلها
أردفت وهي تنزل طرحتها على اكتافها/ادخل جدي ليش واقف تقهو معانا
الجد / تقهوى معكن العافية الحين يجي فهد بروح اشوف وش يبي
سناء وهي تنزل عبأتها وبخجل مصطنع/ وش عنده عمي الغالي
الجد يبتسم/ والله مدري واجهته بالمسجد قال يبه شوي والحقك للبيت
خرج الجد
مضاوي با انتقاد / يا الله ياالقافتس وفضولتس
سناء تحضن مضاوي / يا الله انا الي ياكثر ما احبتس
مضاوي تدفع سناء / اووف ابعدي ذبحتيني ياالدبه
سناء تزم شفتيها بحب / زينتس وانتي تدلعين عادي قولي دبه واااثقة من نفسي
مضاوي تبتسم / الحمدلله اجل العقدة انحلت يوم تصايحين تدورين الوزن المثالي
سناء ترفع حاجبيها / اكيد انحلت عززت ثقتي بنفسي وصرت اشوف نفسي حلوة
أردفت المهم / طلعي العلوم الي داستها غبت عنتس كم يوم شكل صاير نون ومايعلمون
مضاوي تقدم فنجال القهوة لسناء / أقول تقهوي بس وسالفتي وش تبين فيها تغثين عمرتس ومالها حل
سناء / كل شي له حل الا الموت وهذا وانتي دكتورة تقولين كذا
مضاوي تتنهد بوجع / ليت ها الموت يجي وارتاح
سناء با انتقاد / اعوذبالله منتس وش هالتشائم
هذا دولاب الحياة يلف يوم زين ويوم شين ويا الله مشها يا ابن آدام
يقاطعهم صوت سعاد / خياااااانة مجتمعات ومحد معبرني
تقف سناء ومضاوي لسلام على سعاد
سعاد بتهديد لمضاوي / زعلانه عليتس اول البارحة قلت بكلمتس قفلتي جوالتس
واليوم رحتي تحللين ولا قلتي لي
مضاوي تبتسم / مشيها على قولة سناء
سناء ومضاوي يجلسون
سعاد / لا تجلسون عندي لكم مفاجئة
وقفوسناء ومضاوي متحفزات للمفاجئة
أردفت سعاد بممازحة / اظهر وبان عليك الآمان
تدخل شروق
سناء بفرحة / ياربي حلم والا علم
شروق تسلم على مضاوي وسناء وتجلس وبسعادة/ علم اكيد
سناء / وش رجعكم بسرعة وليش ما قلتي انتس بتجين
ماقلتو بتجلسون شهر
مضاوي با امتعاض / بسم الله اكلتيها شوي شوي
شروق وهي ترتب شكلها / ماعليتس منها متعوده على طفاقتها مايمدي انساها
قهووني اول وعطوني علومكم
سناء / ابد على حطت يدتس علومنا مافيه الا انا ومضاوي بنلحق بركب المتزوجات
شروق / وهذا الي رجعني ما ابي شي يفوتني
شروق تلتفت لمضاوي / وش فيتس متصنمه ماهي عاده ماتعلقين تاركة سناء تاكل المجلس
مضاوي با ابتسامه / الحمدلله على سلامتس ومافي شي ينسولف اكثر من الي سمعتيه
سناء / الا فيه وكلامتس الصباح لزميلتس تقولين بتأجلين السنة هذي
تضرب كفها بباطن يدها وبا اصرار / هذا يبي له شرح وافي
مضاوي / قرار واتخذته وما ابي اسمع شي
سعاد بأسف/ الندم ما يجي غير من القرارات الي تنوخذ بساعات الزعل
شروق تأشر بيدها / لحظة لحظة فهموني طيب تراني مثل الأطرش بالزفة مدري وش تقولون
سعاد / الموضوع با اختصار مضاوي حطت مستقبلها بجهه وزواجها من ثامر بجهه
ومجبره نفسها على واحد منهن
مضاوي بتذمر/ تكفون انهو ها النقاش خلونا ننبسط بجية شروق ماراح نوصل لحل
سناء / الا بنوصل للحل ليش مانوصل لحل مافي مشكلة مالها حل
شروق زفرت بضيق/ يا الله كئبتوني بها السالفة وانا جايه فرحانه
مضاوي ابتسمت/ ليش تكتئبين الموضوع كله مايسوى بتخرب الدنيا يعني إذا ماكملت
سعاد تهز رأسه / أي تخرب كيف ماتخرب هذا مستقبلتس يا عنيده والله محد نافعتس
وبا اسف /انتي ما انتي مضاوي ابد لا والله الي تخطط لكل خطوة تخطيها
اردفت/ مستوعبات يابنات انها حتى بالعقد ماتبي تكتب أي شرط
شروق بلوم / يا الله الا هذي ماهو على كيفتس
أردفت/مضاوي با اقترح اقتراح اسمعيه وانتي حرة
اكتبي دراستس وظيفتس أي شرط يجي في بالتس الزميه فيها شرعا
وانتي سوي الي تبين عقب
سعاد / شروق صادقة مع الوقت بتراجعين نفستس وتشوفين انتس غلطانة
اذا ندمتي عقب وبغيتي شي من شروطتس ماله فرصة يرفض
مضاوي بتذمر / يصير خير جايات تنبسطون عندي والا تنكدون علي
شروق / حرام عليتس جيتس هاربه من اهلي وامي ياحياتي تشفق علي تبي اجلس معها
سعاد / متى وصلتو
شروق / قبل العصر لكن مريت بيتي نزلت الشنط وسلمت على امه
وكلمت محمد اخوي جا اخذني
سناء / سلامات ليش هو ماجابتس
شروق / لاتكفين بينشب لي اجلس معه وانا جايه اشوفكم ماهو اقابل وجهه
سعاد تضحك / مايمدي تملين منه توكم
شروق بتافف تحرك يدها / لا والله بس وجهتس بوجهه طول الوقت شي يملل صراحة
شروق تنظر لهاتفها / جبنا سيرة القط هذا هو دق
ردت على جوالها / هلا طلال
..لا طلعت مع أبوي اسلم على جدي
شروق بغضب /خلاص برجع شوي مع السلامة
سناء / وش فيتس حمر وجهتس
شروق بتذمر / ياشيخة يقهريقول ليش تطلعين لبيت جدك وماعطتيني خبر
سعاد / وهو صادق ليش ما أرسلتي له قبل تجين انتس بتطلعين
شروق / وين رحت يعني بيت ابوي وجدي الجدار بالجدار يبي يزعل عساه لارضى
خلونا منه ومن علومه الي بدت تغث ونرجع لموضوع مضاوي
سناء بتهكم / موضوع مضاوي حسمته خلاص العنيدة فكرو بترتيبات عرسها
سعاد تضحك / والله صادقة سنو
مضاوي دخلتنا بمعمعه ما عاد فكرنا بشي
شروق / ابوي يقول احتمال الخميس او الجمعة الملكة والعرس بنفس اليوم
سعاد / وحنا وش نقول من اليوم مانقول هذا طلب مضاوي
انا امس استغليت الوقت وطلعت السوق واليوم طلعت من صحيت الصباح دوجه با الأسواق باقي الفستان
سناء تنظر لسعاد بنص عين / وقفت على الفستان محد يعرف مقاس مضاوي مثلتس
شروق تناظر مضاوي / تدرون وش معجبني ان مضاوي مثل خيال المآته زول بس لارأي ولا اعتراض
سعاد تبتسم لها بحب/ والله خوفتس من خيا ل المآته ينكبنا
سناء وهي تمد فنجالها لمضاوي/ يعني وش بتسوي مثل محبوبة بخالتي قماشة تلبس سليم مثل مفتاح ويزفونه لثامر
شروق تضحك / حرام عليتس سناء راسي طق من الضحك خلاص
مضاوي تبتسم / والله جبتي لنا فكرة مش بطالة
سناء / طيب وش رايتس با الأغراض الي اخذناه لتس انا وعمتي
مضاوي / وش اغراضه
سعاد / من جدتس ماقلت لتس شوفيها بغرفة امي تحت
مضاوي بلا مبالاة / ما شفت شي ولا ابي اشوف
وقفت سناء / انا بروح اجيبهم
سعاد / في أكياس قلت لشغالات يدخلونها غرفة امي جبتها معي قبل شوي جيبيها بطريقتس
شروق / أقول خلونا نروح عيب أحد يمر يشوفنا نتمقل بجهاز عروس
مضاوي / انا بروح المطبخ اليوم تتعشون معنا على شرف حضور شروق
شروق / لا تكفين ما نبي عشا ابي اخباركم ما ابي اكل
تخرج مضاوي برغم اعتراضات شروق
سعاد بهمس / خلوها على راحتها الي فيها مكفيها
سناء بأسف/ والله قاطعة قلبي من شفتها يوم الجمعة منهارة لكن احاااول أتفه الموضوع
سعاد تضحك / ماقصرتي ياسناء ذاك اليوم ازعلتيني العصر ورضيت عنتس بالليل غيرتي جوها بخبالتس
سناء تبتسم وترمش بعيناها / أدرى مالكم غناة عني
شروق / بنات تسولفون الغاز انتم
سعاد / لا الغاز ولاشي أمور عادية قومو بس نشوف اغراضها ونرتبها بغرفة امي كلها
سناء / ازين ماسويتي عميمه لاتخلين شي ناقص
سعاد / وش اسوي من لها غيرنا وهي أساسا من العايلة ماترتاح الا لنا يعني أي شي نسويه
بتتقبله إذا ماهو اليوم بكرا
.
.
.
بغرفة الجدة
سعاد وشروق وسناء
شروق با انبهار / مااشاء الله عليك عميمه كل هذا سويتيه بيومين
سعاد / ماهو لحالي زميلاتي بالمدرسة الله يوفقهم اسكتي بس صرنا ورشة عمل لها
باقي فستان العرس ابيها هي تختاره
سناء / ما يمدي الا جاهز
شروق / اتركم من فستان العرس انتو شفتو كيف نحفانه مابغيت أقول قدامها ما ابيها توسوس
سناء با استغراب/ ما لاحظت شي احس عادي
شروق / لا وين انا عشاني طولت ماشفتها اميز شكلها
سعاد / الفستان وش رايكم بكرا نروح في محل وحده من البنات تمدحه تقول جناان وعندهم ميزه التعديل سريعة مره
باخذ لها واحد مرتب عارفه عنادها ماراح تلبس فستان عرس
أردفت بتفكير / من جدتس انتي والله خوفتيني يوم تقولين نحفانه نحف ملاحظ
شروق / عادي عمه العالم تدور الرشاقة وش فيتس انقلب مودتس جيبي اصغر برقمين من مقاسها الي قبل تلبسة وبيضبط
سناء /الحين خلونا نرتب الأغراض بالشنط وبعدين نفكر بسالفة النحف هذي
شروق تنظر لهاتفها بتذمر/ انا هذا اشغلني رسايل ماني مطوله معكم بمر مضاوي وانتو رتبو شغلها
سناء / الحين القلق هذا مايدري انتس عند اهلتس
قولي مااني هاربه وردي جمايلنا عليتس يوم رتبنا عفوشتس بعرستس
شروق تغادر وهي تضحك / ماعليه بردها بس مو اليوم
سعاد تضحك / وش فيتس علقتي عليها انا وانتي نكفي نرتبها كل شنطة نقسم فيها شي ونسكرها
وهي بعدين ترتبها براحتها في بيتها
.
.
.
في مجلس بيت الجد يدخل فهد ويسلم على والده
الجد با اهتمام / وش بغيت اشغلتني
فهد يبتسم بود / لو ادري جيت على طول بدون ما اعلمك ولا اشغل بالك
الجد بقلق/ اخلص وش وراك
فهد / يبه الله يحييك انا اتفقت مع سلطان ومساعد عرس ثامرمانبيه يدفع شي
اليوم سلطان خلص شقته وفرشها كلها
ومساعد لقى حجز بقاعة وخلص امورها
الجد / انتو ماقلتو تبونه با البيت
فهد/والله يبه فكرت فيها قلت الواحد ما هو معرس كل يوم ولا ابي اكسر بخاطر ثامر ما ابيه بعدين يقول انا اقل من غيري
وحنا ربعنا ومعارفنا واجد ويتشرهون لو مانعزمهم وتراه على كلامنا عرس لرجال بس
والحريم عندك بالبيت بكيفهم مثل طريقة عرس شروق
الجد / شورك وهداية الله
فهد با استفهام / المهر ما قلنا ولا اتفقنا كم
اردف / انت سألتها
الجد / لا والله المهر المعتاد مثل كل بنات الجماعة
وعطيت خواتك صرافتي قلت يجهزون لها الي تبيه
فهد / ولو يبه ما تفوتك لازم تسألها وش تبي
أردف / والي خواتي شروه لها ماله دخل بمهرها شف وش تبي
وقل للي تعرف حسابها من خواتي ترسل لي رقم حسابها
الجد بمحبة / عسى عمرك طويل يافهد عسى مدتك توافيق لذريتك
يقف فهد ويقبل انف والده / يستاهل ولد جلال يا الله تبي شي عندي اشغال بروح انجزها
أردف / قبل انسى بكرا عازم طلال زوج شروق واهله على العشا
الجد / على خير وانا بطلع للمسجد وعقبها بشوف مضاوي واعلمك
.
.
.
في مطبخ بيت الجد
مضاوي تجلس على كرسي وبيدها كوب ماء
تدخل شروق بممازحة / جالسة هنا بزعم اني راعية بيت تمثلين علينا
مضاوي تبتسم / وش نسوي الحياة صارت كلها تمثيل
شروق تتنهد / لازم يمثل الواحد يساير ها الدنيا
مضاوي با استغراب / كلامتس ملغم وراه شي
با استفهام / صاير فيتس شي
شروق / بعدين نسولف بلي وراي وقدامي خلتس مني الحين انتي ما كأنتس عروس
مضاوي ترفع كتفيها بقلة حيله / وش تبيني اسوي
أردفت بتهكم /ماقالت سناء خيال مآته وهو أفضل وصف لوضعي
ضحكت شروق / انا الي قلته ماهو سناء عقلتس وينه
وضعت يدها على كتف مضاوي / إذا انتي مو قادره تتجاوبين مع الي حولتس
اقلها لا تعارضين لين يعدي ها العرس بخير وسلامة
تتنهد شروق بحزن / انا اكتشفت كثير عالم تراقبنا تبي بس زلة تمسكها علينا
مضاوي / يبلطون البحر يتعبون مايلقون ورانا شي
شروق تتأهب للخروج
مضاوي / وين اشوفتس ماشية تعشي معانا
شروق / وقت ثاني
أردفت وهي تشير لهاتفها الذي تمسكه بيدها / ما تشوفين هلي اشغلني اشغال يدق ويرسل وينك وينك
بمر امي شوي ما جلست معها وعقب اروح لبيتي
مضاوي تخرج مع شروق تودعها
شروق / روحي لعمتي وسناء شوفي اغراضتس يمكن في شي ناسينه وانتي تبينه
مضاوي / خليتس مني والله ضيقتي صدري يابنت وش فيتس
شروق / لا تضيقين صدرتس ولاشي مافي شي يستاهل سوالف تافه علوم حريم
واكيد بقول لتس كل الي في خاطري لكن ماهووقته افضفض لتس
ارجعي مثل ماقلت لتس داخل سناء وعمتي شوفيهم يرتبون جهازتس
تودع مضاوي شروق وترجع لداخل الي غرفة الجدة
.
.
.
في غرفة الجدة
سناء تنتبه لوجودها / وين العروس المستحية مدري الهاربة
سناء با اعجاب / ليتك شفتي اغراضتس قبل نرتبها عمتي متقضية لتس من قلب
سعاد تنظر لمضاوي بحب / اكيد من قلب وهو فيه اغلى من مضاوي عندي
سناء تقف / بروح للبيت امي تقول لا يأذن العشا الا وانتي قدامي
سعاد تضحك / والله جزاها الله خير فزه يوم سمحت لتس تجين وانتي بتملكين
سناء / ليه تبين مثل على وقتكم من يوم تنخطب يقبرونها لين يوم العرس
سعاد ومضاوي يضحكون على تعليق سناء
تخرج سناء و تقف سعاد مقابله لمضاوي وتبتسم / هاه كيف النفسية اليوم
مضاوي ابتسمت ورفعت كتفيها با استسلام / عادي نتعود
أردفت/ لكن انتي اتعبتي نفستس مره
وبود/ انتبهي لحملتس لايصير فيه شي والله ما اسامح نفسي
سعاد تمسك بيد مضاوي/تعالي طيب تفرجي على الي اشتريت لتس ماشفتي شي من جهازتس ابد
مضاوي تجلس على طرف السرير / والله مالي خاطر ولا ابي اشوف شي سوو الي تبونها ماراح اخالفكم
سعاد/ يا قلبي يامضاوي الانسان ما يدري وين الخيره وأكبر دليل
انا لو ما اخذت عبد اللطيف كان يمكن منتحرة
زفرت بحزن / يا الله كنت اكره الي بس يلمح انه يمكن مافي نصيب بيني وبينه ولو كان من اخواني
وبسخرية من نفسها / وشفتي كيف صارت حياتي يوم عندنا وعشره مسافر طاير اما لدوامه والالخرابيطة ماهجد الا بعد المصيبة الي انتي عارفتها
وبلاني معه
وتنهدت بااستسلام / وعسى ان تكرهو شيئا وهو خير لكم
مضاوي تتنهد بالم ويأس/ والله احس حالي غايبه عن الوعي لدرجة ما ادري وش انا فيه
اغمض عيوني أتمنى ما اصحى واذا صحيت احس بجوفي فراغ فضيع ماني قادرة اتوازن
جسمي احسه هلامي امشي بدون عظام عقب كلام جدي
سعاد تجلس جانب مضاوي / لا تقولين كذا والله عذابتس عذابنا
تدرين ابوي يوم قال كذا عقبها تحسف حسايف ما يعلم فيها الا الله وقال ماتبي ها العرس خلاص مهو لازم وعلمتس بكلامه
مضاوي ابتسمت بوجع وقلة حيله / الحين خلاص طاح الفاس بالراس وش عاد ينفع التراجع تبينا ننفضح بين الناس
سعاد / خلاص اجل دام كذا تعالي نشوف اغراضتس مع بعض يمكن ناقص شي نروح انا وانتي نجييه
مضاوي / اول شي العفش هذا كلها ماله داعي وبعد تبين عليه زود وانتي عارفه ان اللبس من قبل مهو اهتمامي
ثاني شي احس بفتور ابي انسدح وبس وما اسمع أصوات مالي خلق سوق وازعاج الناس
سعاد / الحين مو مثل قبل انتي بتتزوجين ملزومة با أشياء غير قبل
اول طالبة ودراسة مش حالك أي لبس لكن الحين غير
مضاوي تبتسم بتهكم / وعساتس منتظره مني معه حياة زوجية طبيعية والله لو شفتي نظراته لي نظرات الي يبي يدفني وانا حيه
ضحكت سعاد / ماعليتس يتصنع الثقل وربي لو بس يلمحتس يابنت انه يمشي وراتس مثل الاعمى ويمكن يطلب العرس قبل حتى يطلع الفحص
وبا اعجاب رفعت حاجبها وابتسمت / لا تستهينين بنفستس تراتس قمر
مضاوي تبتسم / هذي مشكلة عين المحب
سعاد / وش عين ماعين خلي عنتس التواضع الله يرحم امي الي مانقدر نقول قدامها يازين مضاوي
تبلشنا اقرو انفثو لاتاكلون بنتي
مضاوي بحزن / الله يرحم روحها
تنهدت بوجع / ياازين ايامها من راحت فقدت الراحة
سعاد / هذا الدنيا ما خلدت لأحد وعزانا انها ماتت وهي راضية عنا
اردفت/ طيب فستان العرس كيف تبين موديله
مضاوي / الي تجيبنه لو اسود بعد يكون أحسن
سعاد تضحك / الأسود بعد مو شين ملك الألوان واساسا يضوي عليتس إذا لبستيه
ها المره نبي لتس ابيض والا اوف واايت وش الي بخاطرتس
أردفت/ طيب اجيب شي على ذوقي وماتحرجيني تلبسينة
مضاوي / يابنت الحلال لاتغثين عمرتس جيبي خيشة والبسها عادي
سعاد بقلة حيلة / خلاص اجل بكرا بطلع بدري لسوق واشوف الفستان وفي أشياء
شفتها وما اخذتها يوم رجعت البيت تحسفت برجع اخذها لتس
مضاوي با استنكار / من جدتس انتي خلاص انتي شايفة كم شنطة معبيه والله هذي تكفي عشرين سنة قدام
سعاد تضحك / عشانتس تشوفينها موزعة بشنط إذا رتبتيها عقب بغرفتتس
بتشوفينها شوي والله يستر ماتدعين علي تقولين عمتي فشلتني قدام ثامر
.
.
.
بعد مرور اربع أيام يوم الخميس
في مجلس الجد
الجد بقلق / فهد يابوك وش سويتو
فهد / ازهلها يبه كل شي على ماتحب
الجد / عسى اعماركم طويلة
فهد/ يبه مضاوي محد ارسل رقم حسابها عشان احول المهر لها
الجد / والله مدري شقول
فهد بتوجس / عسى ماشر
الجد / الشر مايجيك أرسلت سعاد لمضاوي قلت ابيها تسألها كم تبي مهر
قالت ابي مقدم ومؤخر
فهد / حقها وين المشكلة
الجد / المشكلة انها تبي مقدم مية الف والمؤخر دبلها تبي ميتين الف
فهدبا استغراب /المؤخر ما قلنا شي تبي تضمن مستقبلها لو انه ضربة جامدة
بتعجب / لكن المقدم قوية والله
حرك رأسه بموافقة / ما عليك لا يهمك بندفعها لها تستاهل بنت عمي
لكن بطلبك طلب لا تقول لثامر ولخواني انها طلبت مهرها مية الف قل انها منك انت الي عطيتها
الجد / ابشر والله انه الي في بالي وانت سبقتني
أردف / اليوم العيال ما شفت منهم احد
فهد يضحك / محد فاضي العالم منتشرة الي يكوي ملابس والي عند الحلاق
يا الله يبه تامر شي بروح اشوف وش ناقص
كلمت الشيخ بيجي عقب العصر يملك لبدر وثامر وعقبها بنطلع للقاعة انا ماشي الحين وراي شغل
الجد / على خير
.
.
.
فهد يخرج من مجلس الجد ويتصل بسعاد
سعاد بترحيب/ هلا بالغالي وراس المال
ضحك فهد/ الغالي أبو أنور خلتس من التملق
سعاد / ياعساه فدوة لمواطي رجولك ما دقيت الوقت هذا الا فيه شي
فهد/ما في الا كل خير
لكن بغيت اسألتس ناقصكم شي تبون شي
نورة تقول انكم حاجزين ضيافة هم معازيمكم واجد
سعاد / أي حجزتها لا تشل هم عازمه زميلاتي كم وحده وصديقات مضاوي وبناتنا
فهد / ترى لو تدفعين شي بزعل عليتس لا تخليني احلف
أردف / ارسلي حساب مضاوي انتظره من كم يوم ماجاني بحول لها المهر
المفروض مبطي مودعينه بحسابها تجهز نفسها من وين بتجيب البنت
سعاد بتردد / علمك ابوي وش طلبت
فهد / أي قال لي وقال انتس جهزتي لها من حساب ابوي الله يجزاتس خير
سعاد با استفهام / وش رايك بطلبتها
تبين الصدق والله انه مبلغ وماتوقعت تطلب كذا لكن حقها هذا
الي ربي شرعه لها ومذكور في كتاب الله
سعاد / والله يافهد يوم قالت ماعاد عرفت ارد عليها سكت بغيت اطلبها تخفض المبلغ واستحيت
فهد با استنكار / زين ماطلبتيها هي بضاعة تبين تخفيض عليها والله ماتسوى غلاة أمي لها وجلستها مع امي كنها بنتها تراعيها لين وافتها المنية
أردف / المهم ما ابي احد يدري انها هي الي طلبت انا معلم ابوي انه يقول منه بودع المهر بحساب ابوي وبعدين احوله على حسابها
تحسبن لبعض الأمور
تعرفين ثامر حساس وما ابيه يستنقص نفسه اوهي تدري انه مني وتسويها سالفه واخواني يشيلون عليها
سعاد / الله يطول بعمرك يا اخوي
.
.
.
في ملحق بدر يدخل محمد وفيصل
محمد / يادافع البلا انا عمري ماشفت معرس بارد مثلك ياثامر
ثامر يبتسم / وش تبي اسوي يعني انتم ماشاء الله ماخليتو شي
فيصل / لامحمد يبيك تنرج رجة بدر وهو بس ملكة
يقاطع فيصل دخول بدر / ماشاء الله وش فيه بدر شايل ثلاث ارباع الشغل الي انتم مجبورين تسوونه
فيصل يضحك / مانستغني عنك يابوفهد
محمد / ابوي قبل شوي يسأل عنك جوالك مقفل
بدر ينظر لهاتفه / طافي شحن عطني جوالك بكلمة اكيد يبي شي ضروري
محمد يناول بدر هاتفه
بدر / هلا يبه كل شي تمام لكن الفندق رفض ثامر وكنسل الحجز
..
خذ كلمه
ثامر يتناول الجوال من بدر / هلا عمي
..
الحمدلله الحال يسرك
..
ماقصرت عمي لكن خلني على راحتي
..
ابشر طال عمرك
..
مع السلامة
فيصل با استغراب / ليش تلغي حجز الفندق سلامات
ثامر / هو فرض والا سنة ها الفنادق
أردف / عندي بيت بطلع بعد العرس لبيتي وش المشكلة
محمد / مومشكلة لكن هذا صار روتين للعرسان تغيير يعني
بدر ينظر لثامر / اول مره محمد يقول شي مفيد أي والله تغيير وتحس من جد أنك معرس
ثامر / خلو عنكم السوالف الي مافيها فايدة ماراح اغير رأيي
بدر بحنق / أبو العناد الي براسك خلونا نطلع للحلاق ونرجع ونروح نشيك على القاعة وبعدها نرجع نلبس
ونروح لبيت جدي الملكة هناك وبعدها نطلع للقاعة
فيصل / اجل انا بسبقكم انا ومحمد للقاعة
خرج فيصل ومحمد
بدر / الله يتمم ها الليلة على خير والله حاس اني بحلم
ثامر يبتسم / من أي ناحيه
بدر / من كل شي تجهيزات العرس بسرعة سويناها
بيتك والعروس قضو شغلها البنات والله زواجك ان شاء الله انه مبروك
ثامر / تبي المعجزة الي أكبر بعد
أردف ثامر بتهكم / اراكض ورى جدي وعماني بعطي المهر مثل العالم والناس الكل يتهرب بعدين بعدين
يعني زواجي زواج بلوشي ماغير ادربي راسي وراكم
بدر / وش تدربي راسك ماشاء الله عليك والله أنك ذيب لكن ما اعجبتني يوم الغيت حجز الفندق
ثامر / ما عليه خله لعرسي الثاني هذي مالها الا شقة الخرج وتخب عليها
بدر يضحك / نشوف عقب ها العلوم والله ودي اوصيك عليها وأقول لك تراها بنت عمنا ومن ها الكلام
لكن اعرفها عن عشر رياجيل هي الي تنوصى عليك
ثامر / ما يخسى الا وجها بنت هيام
بدر عقد حاجبيه با انتقاد / ثامر وش الكلام هذا امزح معك وقلبتها جد بنت هيام بنت عمنا ويتيمة مالها غيرنا
وبتحذير /والله ان انضامت عندك والا اجحفت بحقها ان كل العاصف بيوقفون بوجهك واولهم جدي
ثامر / ماعليه يصير خير
.
.
.
بعد العصر في بيت الجد
في مجلس النساء نواظر وسعاد
سعاد / شكل المأذون جا تو كلمني بدر يقول دقايق واطلعي للمقلط انتي ومضاوي بيسمع موافقتها الشيخ
نواظر / وبدر متى ملكته
سعاد / اكيد بعدهم أتوقع بيملكون هنا وسناء توقع في بيتها رفضت ام سعد تخليها تجي
نواظر / يااحب حريم اخوانتس للمعارضات وش يضرها تجي هنا في بيت جدها
الا مساعد يشيل دفتر الشيخ لحضرة جنابها توقع في بيتها
سعاد / يابنت الحلال عادي ماهو من بعد بيت مساعد خطوتين
وفزه بنتها وهي حره
يقاطع سعاد رنين الهاتف / هلا ابوبدر
فهد بهمس / نادي مضاوي للمقلط وتعالي معها
سعاد تهم بالوقوف / ابشرعطني فرصة دقايق بس
تطلع سعاد لغرفة مضاوي وتطرق الباب وتدخل /مضاوي البسي عباتس الشيخ بيسمع موافقتس
مضاوي تقف با استغراب / ليش طيب شروق جابو الدفتر ووقعت بدون محد يناديها
سعاد / استعجلي البسي الحين وشروق وضعها غير وانتي غير
مضاوي بتهكم / فهمت بزعم ابوها وليها وانا الله يعفو بس
تلبس مضاوي عبأتها ونقابها وتنزل مع سعاد وتدخل للمقلط
الجد يدخل للمقلط
وخلف الباب فهد / مضاوي هذا الشيخ معي يبي يسمع موافقتس
الشيخ / انتي مضاوي بنت حزام بن عاصف
مضاوي / نعم ياشيخ انا
الشيخ من خلف باب المقلط / هل تقبلين الزواج بثامر بن جلال على سنة الله ورسولة وعلى الصداق المسمى بينكم
مضاوي بتردد / ااااقبل
الشيخ / والشروط الي بينكم
مضاوي / مافي أي شرط الا المهر الي طلبت مقدم ومؤخر
الشيخ / هذا حقك والشروط بعد من حقك تشترطين علي الزوج بالعقد ويجبره العقد ينفذها
الجد / اكتب دراستها ووظيفتها ياشيخ
مضاوي بهمس / جدي وش قلت انا
الجد بحزم / اكتب ياشيخ
الشيخ / الوالد صادق اكتبي الشرط وبعدين انتي تقررين الي تبينه
اخذت سعاد الدفتر من فهد لتوقيع مضاوي
وقعت مضاوي وغادرت بسرعة
يدخل الجد خلفها وسعاد
الجد يدخل مجلس النساء / وين مضاوي
نواظر / مدري ماشفتها
اردفت / ملكتو خلاص
سعاد تبتسم بفرحة / أي ابشرتس اخيرآ ملكو خلاص
التفت سعاد للجد / شكلها استحت وراحت لغرفتها اناديها لك
الجد يخرج من المجلس / لا انا بروح
وصل الجد لغرفة مضاوي طرق الباب ودخل /
مضاوي تجلس على سريرها بشرود
تقف لدخول الجد / هلا جدي
أردفت/ تعب عليك ليش طلعت انا انزل لك
الجد ينحني ويقبل راس مضاوي / طلعت باللفت مافي تعب
ابتسم بفرحة / الف مبروك يا الغالية الله يسخره لتس ويسخرتس له ويجمع بينكم بخير
مضاوي بمجاملة / الله يبارك فيك
الجد / لا اوصيتس وانا ابوتس بالسنع وطاعة الزوج ترى رضاه من رضى الله
ولا تحسبين اخلي شي يضيمتس وانا حي انا معتس عليه
لاتقبلين المهانه على نفستس وسعد بن جلال حي يرزق
مضاوي تحضن الجد وتبكي / انا اسفة ياجدي كان ضايقتك بكلام والا بتصرف وانت رايتك بيضا معي اول وتالي
وها الزواج كله والله العظيم على شانك ماني كاذبة عليك
الجد / الله يكبر شانتس وان شاء الله ماتندمين
لكن الي ابيه منتس تسايسين حياتس معه إذا شد ارخي ولا تدققين بكل شي
الرجال مرات وهو غلطان ويدري انه غلطان مايعترف يكابرمايبي يكسر مهابته قدام حرمته
انتي عاد الي ينمشى مشيه والأمور الكبيرة متوني تشيلها عنتس و ابشري بلي يوقف معتس فيها
تدخل سعاد / خلصتو الاجتماع
مضاوي تمسح دموعها والجد يبتسم / والله ودي اطول مع الضوه لكن ادري وراكن شغل وانا شوي اطلع للحفل
خرج الجد
سعاد / يا الله البسي عباتس نطلع للمشغل علشان نخلص بدري
مضاوي بملل وتذمرتجلس على السرير / امس من صبح الله وحنا بالمشغل واليوم بعد
سعاد تسحب يد مضاوي / هذا عرس مو لعب امس خلصنا كل شي
الا حضرتس رفضتي الحنا
مضاوي با اشمئزاز / هذا الي ناقص حنة بعد
سعاد تضحك / الله يسعد سناء الي اجبرتس على التاتو لو انه بسيط لكن ماااشاء الله يضوي على عضودتس
مضاوي / الحمدلله فستاني كم طويل وساتر محد بشايفه
سعاد تغمز بعينها / المهم واحد من ها المحد بيشوفه
مضاوي / يشوفه جني هو وجهه
مضاوي تخرج من الغرفة وسعاد خلفها تضحك / نشوف عقب ها الدعاوي تقلب دعاء له
.
.
.
في بيت مساعد
في الصالة سهى وام سعد
مساعد يحضر دفتر عقد القران / فزه نادي سناء توقع بسرعة
تخرج فزه لتنادي سناء وترجع معها
مساعد يفتح الدفتر / وقعي هنا
سهى تفتح جوالها
يلتفت مساعد / انتي وش تسوين
سهى با ابتسامة / بصور سناء وهي توقع سناب
مساعد بحنق عقد حاجبيه/ وش الهبال هذا انتو ماتتعضون من المصايب الي تجي من ورى سناب والعيون الي اكلت العالم
سهى / كل صديقاتي يصورون مناسباتهم وماجاهم شي
مساعد / أقول بس قفلي الجوال وماهو كل مره تسلم الجره
والتفت لسناء / انتي وقعتي خلاص
بعد توقيع سناء فزه تقلب صفحة الدفتر وبذهول / الحين هذي مهرها أكثر من مهر بنتي والمؤخر مدبول وشلون لو ماهو ولد عمها
مساعد با انفعال / انتي وش دخلتس جعلها تطلب مليون دافعه من جيبتس شي والا من حلال اهلتس
فزه / من بيدفع اجل انت واخوانك والا ثامر ضعيف من وين له كل ها المبلغ
مساعد / الي طلب المهر ابوي والي دفعه ابوي هي ماطلبت شي
وانتي اذا ما سكرتي فمتس بيجي ذا الليل ليلآ اسود على راستس
وبتهديد/ والشيخ هذا دفتره للحين بيدي وانتي عارفه قصدي
سناء بترجي / يبه يمه تكفون خلاص
مساعد / والله على شان خاطرتس يابنتي والا امتس الله يكفيها شر نفسها وشر العقرب الي وراها توزها
التفت لسهى / هي مصبحتكم اليوم ام ماجد
سهى ترفع كتفيها بمعنى لا اعلم
يخرج مساعد
سناء / يمه هذا وقت مشاكل يعني
فزه / ليه انتي مادريتي كم طالبه مهر خويتس
سناء / الا داريه وتستاهل أكثر بعد
فزه بقهر/ ماشاء الله عليتس قلب ميت لاغيرة ولا إحساس
سناء بتعجب/ اغار من مضاوي
ابتلعت غصة بحلقها / مايكفي زوجتوها غصب عنها ولو فشل زواجها ذنبها برقبة كل واحد شجع على ها الزواج
بعد تبون نحسدها على مهر طلبته
الي محد عبرها لا بشبكة ولا حفلة مثل البنات ولا حتى فكرتو تهدونها لا انتي ولا ام ماجد
مافيه الا خالتي نورة راعية الواجب الوحيدة بينكم
فزه تجلس / اعوذبالله من الشيطان والله يابنتي انتس صادقة حنا انلخمنا
ماعاد نفكر بشي نبي بس يوم العرس يعدي علينا بخير وانتي خابره رفضها
سهى / يا الله انتي وابوي هو حرمني اصور سناء وهي توقع وانتي ماسمعنا منتس كلمة مبروك لبنتس الكبرى سنو
فزه بمحبة / الف الف مبروك الله يهنيتس يابنتي ويوفقتس
سناء تمسح دموعها / الله يبارك فيتس لاتخلوني اقلبها مناحه لكم
تعالي وصليني للمشغل تو أرسلت لي مضاوي راحت هي وعمتي سعاد
فزه تبتسم / يا الله البسي عباتس ما نبي نزعلتس ادري مهما قلت مضاوي
يالصف الأول عندتس
سهى / وانا بعد بروح معها ليش هي بالحالها
فزه / انتي اجلسي انا حاجزه عند وحده بتجي بعد شوي بتزينا
.
.
.
في مجلس الجد بعد الملكة
الجد يبارك لبدر وثامر / الف مبروك ياعيالي ومايحتاج اوصيكم على بناتي الي يزعلهن يزعلني
سعد بممازحة / جدي خل وصاياك لثامر بدر مطول
بدر يضحك / ماعلي منك الحين صارت حرمتي لو بغيت اليوم تممت عرسي
فهد بجديه / خل عنك المزوح ومابقى وقت خلونا نطلع للقاعة الضيوف على وصول
سلطان / العيال سبقونا وكل شي تمام
الجد / اجل با اصلي المغرب والحقكم
خالد/ انا الي باخذك للقاعة
الجد / على خير نصلي ونمشي
يدخل الجد لداخل المنزل
خالد/ بدر كيف رتبت وضع الزفة والتصوير
بدر / ماعليك كل شي تمام خل ثامرعلي وانت اهتم بجدي خذه بدري للقاعة
ترى الضيوف من بعد المغرب بيجون صيف والليل قصير العالم تجي بدري وتطلع بدري
خرج خالد واتجه بدر وثامر لملحق بدر
بدر / وش ذا المهر الي طلبه جدي ماتو الي يطلبون كذا
ثامر / ماقلت لك انها تدبر شي انت مصدق انها من جدي
بدربا استغراب / وانت وش دراك
ثامر / كذا إحساس على بالها بتحرجني أساسا انا حالف لعمي فهد وجدي بالطلاق كل الي ادفعوه لزواجي دين برقبتي برده لهم
بدر / يوم طلعت انت وابوي وجدي هذي سالفتكم اجل
وانا خفت انك تكنسل الملكة يوم سمعت المهر والمؤخر
ثامر / انا ماقهرني المهر ولا حتى المؤخر كثر ما انقهرت على شرط الدراسة والوظيفة وهي قايلة ماتبي تكتبها
لكن ماعليه طبها عندي حضرت الدكتورة
بدر يضحك / انا عمري ماشفت معرس يتوعد حرمته بليلة عرسه مثلك
ثامر / لأن الي مثلها يبي لها عسف اما انها تسنع والا انكسر ظهرها
بدر / والله تعبت من كثر ما احذرك من ها السوالف وما ابي انكد على عمري
ورفع حاجبة بتهكم / انت وهي بنشوف من يعسف الثاني
.
.
.
سعاد ومضاوي داخل صالون التجميل
سعاد بممازحة / لاتقعدين زي امس تجننيهم خليهم يشوفون شغلهم
مضاوي / هو انتي اصلن تعطين فرصة الواحد يعترض والا يقول شي
قلت لتس خلي ريما تزيني زعلتي
سعاد / من جدتس انتي ريما عساها تزين عمرها
مضاوي تضحك / ودورات التجميل الي من عرفتها وهي من دورة لدورة
سعاد / سد فراغ اريح راسي من ازعاجها
سعاد تمسك بطنها باالم وتجلس
مضاوي برعب / بسم الله عليتس وش فيتس
سعاد بطمئنه / مغص عادي وش في وجهتس انقلب
مضاوي تزفر بقهر / كله مني محملتس فوق طاقتس
سعاد / ماعليتس مضاوي متمسكة بالحياة حتى اخر زيارة الدكتورة تقول سبحان الله كيف ها الجنين متعلق برحم كذا وضعه
مضاوي / الله روؤف بعبادة
يرن هاتف مضاوي / هلا سناء
سناء / انا بالمشغل حقكم واقفه عند الاستقبال وينكم
مضاوي / بطلع لك لحظة
تدخل سناء ومضاوي لغرفة التجميل
سناء با استغراب / للحين ماسويتي شي يبي لتس اقل شي ثلاث ساعات تعدل بخشتس وشعرتس
سعاد / بقوم اشوفهم ليش اخرونا
أردفت / بشري ملكتو
سناء بحياء مصطنع تهز راسها وترمش بعيناها
سعاد بممازحة تضرب راس سناء / ماهو لايق عليتس الحيا الف الف مبروك الله يهنيكم
مضاوي / مبروك سنو الله يتمم لتس على خير
سناء / امين يارب
خرجت سعاد
سناء / يابنت وجهك منور والله مايحتاج مكياج روج ومسكرة وبلشر تطلعين قمر
مضاوي / اقنعي عمتي بها السوالف
سناء / مالقيتي الا عمتي تقتنع مني
أردفت/ وش المهر الي طلبتيه والمؤخر سويتي رجه بالعايلة بغينا نروح نشحذ عند المساجد نجمعه لتس
مضاوي با استهزاء / وش دخلكم هو الي يشحذ ويدبر عمره
سناء / هذا بيقعد سنين يسدد بس المهر وتضمنين عيونه ماتزيغ منا والا منا ومتمسك بتس بيديه ورجولة متروع من المؤخر
تدخل سعاد وتجلس / من هو الي تزيغ عيونه ومضاوي عنده انا خايفة على عقل ولد اخوي يزيغ اذا شافها
أردفت/ جايات العاملات وراي الحين
.
.
.
بعد ثلاث ساعات
سعاد / يا الله مابغينا نخلص هبلتي فينا ياا حبي لي ولسناء بسرعة خلصنا وجلسنا عاقلات
سناء با اعجاب / ماشاء الله والله ماني قادرة اغمض عيوني خيااال طالع شكلتس
سعاد ابتسمت / لا انتظري تلبس الفستان وتشوفين الزين صدق
مضاوي / الله يعين انا ناقلة هم وش بيزيل طن المكياج الي رسمو وجهي فيه
سناء بسخرية تبتسم / بزعم يعني ما اعجبتس شكلتس تتهربين
أردفت/ المهم وش رايتس بشكلي اهبل صح
سعاد / يا الله البسو عبايتكم السواق عند الباب بعدين نقيم شكلتس
.
.
.
في منزل الجد بعد صلاة المغرب
تدخل سعاد ومضاوي
مضاوي تصعد لغرفتها
سعاد / الله يجزاكم خير مره الترتيبات روعة
نواظر / والله ماقصرو بنات اخوانتس اول مره ادري انهم ينفعون بشي
ريما / خالتي نعجبك لكن انتي ماش الثقة ميح
سعاد / ريما جبتي الأغراض من البيت الي وصيتس عليها
ريما / ايوا كلها بغرفة جدتي نزلتها
نواظر / ماشفت مضاوي طلعت لغرفتها متغطية
سعاد / اكيد مستحية تعرفين رهبة العرس
نواظر / الله يوفقهم يا الله استعجلي البسي
البنات الحين يجون طلعو يلبسون ويرجعون
سعاد التفت لريما / بسرعة طلعي الي قلت لتس من غرفة امي لغرفة مضاوي
.
.
.
غرفة مضاوي
مضاوي امام المرآه / يعني اليوم اخر يوم لي في ها الغرفة الي قضيت فيها اجمل أيام حياتي
وانتقل لمكان الله اعلم فيه مع شخص عيونه تنطق شر كيف قلبه ولسانه
يطرق باب غرفة مضاوي
تلتفت مضاوي للباب / ادخل
تدخل نواظر
نواظر با اعجاب / ماشاء الله وش ها الجمال تبارك الله الف الف مبروك الله يوفقتس ويجمع بينكم بخير
مضاوي / الله يبارك فيتس عقبال عبودي وخواته
نواظر / امين بحضورتس
أردفت / اخذت لتس ساعة بغيتس تلبسينها اليوم وسعاد رفضت تقول
بعدين تلبسها الحين مهمة تلبيس مضاوي علي
مضاوي تحضن نواظر / ماتقصرين عميمه وسامحيني إذا احتديت معتس بالكلام
نواظر / انتي الي سامحيني تعرفين عصبيتي واخلاقي مرات تقفل
تدخل سعاد / ما شاء الله انتي للحين ما لبستي
نواظر تمسح دمعه فرت من عينها / انا اخرتها
سعاد / الله يستر لاتقوم القيامة نواظر تسولف بنبرة هادية ودموع بعد
مضاوي ترفع راسها فوق خوف من سقوط دموعها
سعاد /تكفون الا الدموع تحوسون شغلنا اليوم كله بالمشغل
سعاد تمسك يد نواظر وتخرج وتلتفت لمضاوي / البسي الفستان وبرجع اجيب لتس الطقم
اردفت / استعجلي المصورة على وصول
مضاوي تتنهد / طيب ابشري
بعد عشر دقايق تدخل سعاد غرفة مضاوي
با انبهار / بسم الله عليتس حصنتك با اسم الله الأعظم
مضاوي ابتسمت/ لا تكفين ندري الناس تجامل العروس لكن ماهو الي ها الدرجة
سعاد / اهم شي اذكارك قريتيها
مضاوي / ماعليتس اذكاري في حلي وترحالي ما اخليها
سعاد تفتح بوكسات معها / هذا الطقم البسيه الحين
والساعة من نواظر جابتها لتس هديه نسقت عليها الطقم شفت نواظر متحمسة انتس تلبسينها قلت بسويها مفاجئة لها
وجتك هدايا فلوس من عمانتس وحتى صديقاتي بالمدرسة مصلحين لتس هدية جبتها امس معاي نزلتها بغرفة امي مع الشنط حقتس
الهدايا أصرت سناء تصورها سناب
بعدين بحطها لك بشنطة أرسلها مع اغراضتس لبيتس
مضاوي / زميلاتي بالكلية ارسلو لي بعد التحليل متى زواجك وخبرتهم وعزمتهم
طلبوني موقع البيت وارسلته اكيد بيجون
سعاد / ازين ماسويتي
سعاد تلبس مضاوي طقم
سعاد بممازحة / عنق الريم هذا احترت فيها مدري وش يناسبها كم مره اشتري وارجع لحد ما استقريت على ها الطوق
سعاد تلبس مضاوي الساعة
مضاوي / تهبل ماشاء الله ليش تكلف على نفسها
سعاد تضحك / خليها تكلف والله ماهي مهديه الي اغلى منتس عندنا
فتحت علبة وبتردد / الدبلة هذي من ثامر
قبل يومين
سعاد تتصل بثامر / هلا عمه
سعاد / هلا بك وينك
ثامر / آمري قريب وش بغيتي
سعاد / مايامر عليك عدو ابيك تمرني في بيتي الحين
بعد ربع ساعة تركب سعاد سيارة ثامر
ثامر / آمري يابنت سعد وش عندتس مستعجلة
سعاد / السلام قبل الكلام انتو عندكم مشكلة بالسلام انت وحرمتك
ثامر بممازحة / هو لازم كل زوجين يشتركون بشي
سعاد / والله انت وهي بكل شي
أردفت/ ابي محل مجوهرات مواعدتهم امس وما قدرت اجيهم
ثامر يحرك سيارتة /ابشري اهم شي تعرفين مكانه
داخل محل المجوهرات
سعاد / لو سمحت وين الدبل الي جيتك قبل ها المره وقلت في تشكيلة جديدة بتوصل
يخرج البايع مجموعة من الدبل
سعاد / ثامر تعال اختار ابي دبلة
ثامر / وش تبين بالدبل تبين خوذي خاتم
سعاد / انت شوف لي وحده من قلب ابيها وماعليك
ثامر يختار دبلة وتلبسها سعاد
سعاد للبائع / ابغى مثل هذي وأصغر منها برقم
البائع / ابشري موجود
أردف / الدفع كاش والاشبكة
قاطعها ثامر / لاشبكة
سعاد بصوت منخفض / ثامر انا الي بدفع وش فيك
ثامر بحزم / انا الي بدفع وخوذي المفتاح اطلعي لسيارة
داخل سيارة ثامر
سعاد بملامة / مالك داعي من جد احرجتني بالمحل
ثامر يبتسم / والله انتو الي احرجتوني اقلها دبلة زوجتي خلوني ادفع ثمنها
سعاد تضحك / يا جن كيف عرفت انها لزوجتك
ثامر / ما يبي لها فهم اصغر من يدك وانتي الي مشتريتها
سعاد / طيب يمكن لبنتي
ثامر يضحك / دبلة ولبنتك قوية بعد
مضاوي / وين وصلتي من اليوم اناديك
سعاد / هاه لا معتس معتس
مضاوي بتهكم / وهو كيف عرف مقاس يدي
سعاد بممازحة / اكيد لمح ها المرمر وعرف مقاسها
تدخل سناء وشروق
سناء تمسك قلبها / يمه وش الجمال هذا الي يجلط
وتحضن مضاوي
شروق تسحب سناء / بعدي بسم الله نشبتي
سعاد / وش رايكم بعروستنا
سناء تضحك / ما سويتي خير بثامر عساه يوصل للخرج سالم بعد ما يشوفها
شروق بممازحة / انا اول قلت رحمة له ما شافها قبل الملكة كان ترك ملحق بدر وسكن بيت جدي
أردفت/يابنت لايشوفتس لحد ماتوصلين بيتكم
سعاد / أقول انتي وهي بدال ها التعليقات الماسخة روحو شوفو الضيوف
تعرفين حريم اخواني مرات ياخذون دور الضيفات
سناء / ماعليتس فيهم البركة
وبعدين انا بعد عروسة بجلس مع مضاوي امي من اليوم تعليمات ماخلصت عيب واعقلي لاتنقدين الحريم عليتس
شروق / ارحم خالتي ام سعد الي تنفخ في قربة مقطوعة
سناء تجلس جنب مضاوي / يا الله اطلعو باشرو ضيوفكم وخلو العرايس
لا اشوفكم الا وقت زفة مضاوي
سعاد تضحك / الله يعينك يابدر المهم اكيد الكل بيدخل يسلم على مضاوي وما ابيهم يدخلون غرفتها
بعد صلاة العشا بتجي المصورة بتصورها جزء من الصور هنا
وبعد على الكوشة بتاخذ صور
يطرق باب غرفة مضاوي
سعاد بهمس / هذا الي انا خايفة منه اكيد بيسلمون على مضاوي
اردفت سعاد / شروق افتحي الباب .

لا تلهكم الرواية عن الصلاة
موعدنا القادم بأذن الله قريبآ
تذكروني واحبابي بدعوه طيبه