صباااح الأنوار 💛

كيفك لولوه وكيف محبين سهيل ❤❤

مع توالي البارتات عرفت اني ناسيه اشياء كثير من الروايه، بس الحمدلله على الاقل مانسيت الاساس.

عجبني جداً لقاء حرابه بخالها ، وكلامه عنها مع زوجته عقب وكيف انه معجب بشخصيتها من قبل لا يشوفها وزاد هالاعجاب عقب ماشافها ، احب دائماً مشاعر الفخر بشخص قريب مني .. ودي بس لو تعرف حرابه بمشاعر خالها ناحيتها واكيد بتعرف ان كل قرايبها يفخرون فيها وبشخصها.

حرابه شخصيتها قويه ، وقويه واجد بعد مو شوي يمكن هذا من تأثرها بطفولتها بالوقت اللي تقضيه مع سهيل ومنصور، ويمكن يكون هالشيء جاها عقب الصدمه اللي تعرضت لها وكيف مات سهيل قدامها، يعني فعلاً لما تكون بنت صغيره شافت غالي على قلبها ينحرق قدامها فابسط مانتوقعه الصدمه النفسيه والاكتئاب اللي ممكن تتعرض له، بس حرابه عاشت وكملت حياتها ، صبرت كثير ونالت شهاده ومنصب كبير واسم يعرفه القاصي والداني ، اكيد شخصية حرابه استثنائيه في قوتها واستثنائيه في صبرها ، مثل ماراح يكون زعلها ، وانكسارها ... متى ياترى بتنكسر هالقوه اللي متلبستها مع الجميع ؟ من بيقدر يلين شخصية حرابه ؟؟ ممكن رجوع سهيل ☺

مشهد القبر وكيف سؤالها لجدها عن سبب حرقهم لسهيل ، والادهى والامر معرفة صياح بوجودها وقت الحادثه وكيف تركها هناك وما ابعدها عن هالكارثه اللي تشوفها ، كله على بعضه قهرني .. قهرني حبه لسهيل وهو ماغفر له، قهرني بكاه عليه واشتياقه له ولامه ولأي أحد من ريحته، هالشايب يقتل القتيل ويمشي بجنازته ، هذا يحمد ربه ان فيه احد يخاف يقطع صلة الارحام ويبر فيه والا هو جزاه يعيش لحاله ومنبوذ من الجميع..

منصور وسالفته ؟؟ وساره المجهوله ؟؟ باقي ماتوضح شيء من قصتهم وحنا بنتظارهم في كل بارت ، منصور يمكن بعد وفاة سهيل كان يشرب الخمر يعني يمكن مر بحالة نفسيه ووعى على نفسه ! واتهام ربيع له بانه هو اللي علمه ماهو شرط يكون المقصود انه دعاه لشرب الخمر، يمكن يقصد انه بعد معرفته بشرب منصور للخمر شربه هو ، ويمكن محد يدري عن فعلت منصور وعشان كذا ربيع ماسكه من يده اللي توجعه.. وهذا التوقع الاقرب لي..
اما بالنسبه لربيع واذا له دخل بمقتل سهيل او لاء ؟؟ فما اتوقع شخصية ربيع بتقدر تودي سهيل لهذي النهايه ؟ بس يمكن هو اليد اللي ساعدت في الحكم على سهيل!!
مثل ماكان يفتن على منصور وسهيل عند جده ، اكيد سوى شيء من هذا القبيل بعد وبسببه حكموا على سهيل، يمكن ماتوقع العقاب كذا، وكان يظنه اخف على الاقل تطيح مكانة سهيل عند جده ، واللي واضح انه يغليه اكثر من ولده منصور .. بس تجري الرياح بما لاتشتهي السفن...
ويمكن يكون هو شاهد على السالفه لكن سكن عن الحق، ويمكن ويمكن ويمكن ... بس الاكيد كره حرابه له بالذات ماجاء من عبث ووراه سبب يوصل لسهيل...

روزه وزواجها من ربيع، الاسباب مجهوله لحد اللحين ومن كلامها في المطعم يوم قابلت حرابه ، واضح انها تحملت هالزيجه لسبب وسبب قوي بعد ، خلاها تسامح ربيع كم مره .. ولكن بالاخير انفجرت وش يكون سببها ياترى ؟؟ وليه ماتقدر تقوله لحرابه ...

ام المسك وهزاع وزوجته اللي مدري وش اسميها، ياربي استرها بسترك، هالمخلوقه ماتستحي .. كيف تقدر تقول كذا لزوجها كيف تقدر تبين لزوجها معرفتها بنقطة ضعفه واللي هي نفسها نقطة ضعف لها ، اذا هي تعاير هزاع بام المسك وكيف مو قادر يوصلها ، اجل وش نقول عنك ؟؟؟ وانتي زوجك قدامك ومو ملقيك بال وخاطره في زوجته الثانيه اللي ماجرب يوم حلو معها...
اتمنى بس اشوف وجهها باليوم اللي تفتح فيه ام المسك عيونها وتدري وش كثر يغليها هزاع وش كثر هو قادر يصلح اغلاط غيره اللي هو وحنا نجهلها ؟؟

واخيراً جواهر وشخصيتها اللي لحد اللحين ماعرفت لها ، مين كانت تكلم يآخر اتصال؟ هل هو ديدريك والا مين ؟؟ وليش راده الديره وش عندها ؟؟

غابش ماطل علينا هالمره وواضح اننا اشتقنا له 🤭🤭

بانتظار البارت الجديد..
واعتذر عن قلة ردودي ، اتمنى هالرد يكون يبرد الخاطر شوي ❤