كاتب الموضوع :
فيتامين سي
المنتدى :
المنتدى العام للقصص والروايات
رد: ومالي بدجئ العاشقين ملاذ! بقلم/غسق آلليلh
بسم الله الرحمن الرحيم
.
.
البارت (12)
.
.
كل ما لوّحت لك ترجف يديني
من يسلفني لهالفرقى يدينه ؟
.
.
دخل والغضب عاميه وبصراخ: منئ وين امتس
منئ ارتجف صوتها بخوف: عند جدتي اليوم دورها بالفطور
عبدالعزيز : الحين تتصلين عليها تجي
هزت راسها وهي تاخذ الجوال وتطلع لغرفتها
لف لمشعل اللي كان هادي : ولدي بكري يخطب وقدامي من غير شوري انت تدري وش بيني وبين رجل عمتك اكره ماعندي هالانسان
وتروح تاخذ بنته
مشعل بكل هدو: يبه نتفاهم بالمكتب
عبدالعزيز وهو يطالع مسك اللي متغيبه بخوف ورا الباب : امش انقلع قدامي
تنهد بضيق وهو يمشي للمكتب
جلس وهو يطالع ابوه رايح جاي ماهي دقايق الا دخلت سعاد بعباتها وبخوف: وش صاير شفيكم
عبدالعزيز بصرخه: ولدتس خاطب بنت نوره من غير لايشاورنا ولا ويتشرط يبي الملكه قبل لايسافر ولاتقل عنده ام وابو يشاورهم ياخذ رايهم وياريت انك مناسب رجالٍ سنع الا كتم كلماته وهو يستغفر بقهر بنت اللي متذابح معه ياخذها ولدي عفيه عليك
سعاد اللي مستانسه انه خطب ساره: وانت وش غاثك والله البنت بنت نوره ومافي ازين منها وسنعه واصلا هي ببالي من زمان ومابلقئ احسن منها لمشعل
عبدالعزيز: هذا اللي طلع معتس
مشعل : يبه اهدا الموضوع مو مستاهل عصبيتك انا عارف اني غلطت وما شاورتك بس تبقئ هذي بنت عمتي نوره اعز انسانه بقلبك واقربهم لك بغض النظر عن ابوها وخلافاتكم انا بتزوج البنت مو ابوها وعمامها وسمعتها من سمعتنا ولا جابو طاريها قالو خوالها الفلان وش تبي احسن من هالسمعه والنسب يكفي انها بنت عمتي نوره صح ولا
مارد عليه وهو يجلس علئ كرسيه: خلصت مبروك والله يهنيكم وتفضلو برا انت وامك
طالعته بقهر : وانت ماتعرف تتكلم عدل
عبدالعزيز مارد وهو يشغل نفسه ب الاوراق
: اظن سمعتي وش قلت تفضلي بر ورا ولدتس
قامت...خاطرهاومكسور من اسلوبه وتطنيشه لها
...
طلعت وهي تشوف مشعل مدنق ويرعف تقدمت بخوف: بسم الله عليك يمه
مشعل :عادي يمه متعوده علئ ارعافي
امه بخوف: بس من زمان ما ارعفت لايكون معصب
مشعل بتهرب: لا ماني معصب وابتسامه حاول يطلعها:ولدتس قدها لاتخافين علي مابي خلاف وجهزي نفستس لملكة ولدتس ابيتس تطلعين ازين وحده
دمعةسعاد وهي تلف وجهها:امين يروح امك ويسعدكم ويهنيكم يارب وانتبه لنفسك لاتضايق خاطرك علشان ابوك كلها كم يوم ويطخ ويوقف معك
هز راسه وبهدو:انا بنام لاتصحيني ماشوف القاع امس مانمت زين
صعد لغرفته وهو متجاهل نظرات خواته ماله خلق يلعب ولايسولف معهن توجه لغرفته وقفل الباب مشئ لسريره وانسدح من غير لاينزع ثوبه وبهمس:ياليت الاقدار توقف معي ولا تضايقتس بخبر زواجي
غمض عيونه ب الم وحسره وهو يتذكر مكالمة نوف اللي كانت ست الصبح ...
...اتصلت علي وياليتني مارديت كنت
جالس بفراشي واشوف السنابات ولا مكالمه من عمتي نوف رديت عليها وكنت متوقع
تبي فطور كالعاده ولا بتعزمني علئ غدا ولا نطلع نتمشئ بس قالت لي تعال لبيت عمتك نوره ابيك ضروري فزيت بسرعه وانا البس ثوبي واخذ مفتاح السياره وتوجهت لبيت عمتي اللي اساساً مايبعد حيل عن بيت جدي وصلت واتصلت عليها وقالت ادخل مشب الرجال دخلته وشوي وجتني ومعها فطور افطرنا وعقبها قالت ابيك بموضوع قلت امري قالت بطلبك طلب
واعودني تنفذه استغربت وقلت ابشري وعد انفذه ان قدرت عليه ..قالت وعد رجال
عصبت و طالعتها اكيد وعد رجال ولا وش قصدتس ماردت وهي مدنقه راسها:ابيك تفزع لبنت عمتك ساره
مشعل:وشفيها
بلعت ريقها وهي تبعد عن انظاره:ابوها بيزوجها بالدس من ولدعمها وتهاوش مع فيصل بسبب هالموضوع وطرده
مشعل:طيب وانا وش دخلني
نوف:ماقدامنا الا انك تتزوجها وتملك ب اقرب وقت قبل لايرجع ابوها وابوي معارفه كثير بيسهلون موضوع زواجها ويشهدون بدال ابوها اخوانها
مشعل:انتي عارفه وش اللي جالسه تتطلبينه مني
هزت راسها بصمت
مشعل :شمعنئ انا
نوف:لاني عارفه ان قلبك طيب وماراح تضايقها بكلمه ولاتصرف وعيال عمامك غير عنك انا اعرفك اكثر منهم وعارفه شخصيتك وشخصيتها وفيه تقارب بينكم كثير
مشعل:وظنك اقدر اهدم حياتي علشان افزع لها!!
نوف:ايه لان قلبك مايطاوعك عرضك تتزوج من واحد رايح فيها
مشعل بحسره:ومالقيتي الا انا ي نوف انا اللي تعرفين مواضيعي واسراري وقف وهو ما عطاه جاوبه وبهم:يكون بعلمتس لاصارت ساره حلالي وقتها بتكونين خسرتي مشعل وطلع بقهر منها ومن افكارها ليش هو بذات وهي اللي تعرف سره وتجيب اخبارها له والحين لو تراجع عن قراره بيكون ماهو برجال مسح عيونه بحسره من افكاره تمنئ يرجع الوقت ولا سمع كلام نوف ونفذه بهالسرعه
...
..
بالدمام
جالس ويطالع عيال خاله اللي جو
مجلسهم وينتظرون عمتهم وماجد
وقف وهو يقهويهم : حيا الله ذعار ومنااف
ذعار : الله يحيك ويبقيك
مناف بهدوء: عمتي وينها
دخلت ام ماجد وهي ماسكه عصاها
وقفو وهم يسلمون عليها جلست وجلسو قبالها :اخباركم واخبار ابوكم
مناف : بخير وانتي بشرينا عنك
ام ماجد بهدو: بخير
ذعار : عمه حنا جاينك اليوم نعتذر عن اللي صار حنا اهل ومابينا خلافات وهمس وماجد موضوعهم منتهي واختي طالبه الطلاق
ام ماجد : خلهم يتفاهمون وبعدين الطلاق حنا اهل وماودنا بالطلاق
ذعار: يعمه مابينهم نصيب والله يوفق كل واحد بطريقه ماني غاصب اختي عقب ماشفت دموعها
دخل ماجد بهدو وهو يسلم ومطنش نظرات مناف : طلاق وشوي بروح المحكمه واطلق وبتعب انا رايح اريح عن اذنك يمه عطاها ظهره بيطلع
مناف رفع حاجبه من طريقته وبصوت عالي :
لو انك رجال منحشت مثل الحريم
ماجد لف وهو يطالع: رجال وغصبن عنك يالبزر
مناف طالع لذعار اللي مبتسم : الاقل البزر ارجل منك ماطلع حقده بحرمه وعلم علئ جسمها
فزت لمن شافتهم تضرابو و ماجد هجم علئ مناف وذعار فزع مع مناف
ام ماجد: سيف ي سيف
دخل سيف ...انهبل وهو يشوفهم مناف وذعار يضربون ماجد اللي طايح بالارض ولادافع عن نفسه دخل معهم وفرقهم ...وقف ماجد اللي كان ساكت ويمسح ذقنه اللي كان دم بسبب خشمه
ام ماجد وهي تبكي: هذي اخر مراجلكم بدال لاتصلحون بين بعض تتضاربون
ذعار وهو يتنفس بغضب: لاصار ولدك رجال ذيك الساعه نعتبره مننا خذ مناف وطلع
ام ماجد اللي جلست تبكي مشئ لها ماجد حب راسها وبهدو: انا ساس الغلط يايمه
ولو شفت دنيا زوجها سو مثل اللي انا سويته بذبحه سكت وهو يتالم من خشمه وقف وهو يبوس راسها ومشئ طالع لغرفته
طالعته ولفت لسيف وبهم: عيال اخوي وولدي كل واحد اغلئ من الثاني
سيف بهدو : ماعليه يمه كلها فتره ويتصالحون بس هم منغثين بسبب اختهم
ام ماجد بدموع: الله يهدي نفوسهم
...
...
العصر بالقريه
ووقف السياره عند المدخل غمض ب الم وهو يشوف سيارة ابوه تدخل طالعه بضيق وحرك وهو يدخلها بحوش جده نزل وهو يطالع تجمع اهل القريه عند جده تعوذ من الشيطان
وهو يمشي للمجلس الكبير دخل وهو يسلم علئ الرجال وصل لجده وهو يسلم عليه
جده بعتاب: تغيب ولاتدق تطمنا عليك
سعود بجمود: حصل لي ظرف وماحبيت اشغلكم معي
رفع حاجبه بضيق من نظرات عمه عبدالعزيز المستفزه
وبهدو: جدي غريبه فاتح المجلس الكبير حق الاعياد والعزايم
جده بهمس: بنعلن خطوبة فارس وعمتك ومشعل وبنت عمتك نوره وخطبتك
برد وجهه وهو يطالع عبدالعزيز وبهمس حاد: مافيه لاخطبه ولاغيره
عبدالعزيز اللي كان ع الطرف الايمن لابوه وبهمس : بتفشلنا مع الرجال
سعود بصوت حاد : وش علي من الرجال انا ماخطبة من احد ولا راح اخطب والموضوع ان انفتح بتنفتح معه مواضيع كثيره وغمز لعبدالعزيز
جمدت ملامحه : وهو يسمع جده يعلن خطبة فارس ونوف وصل لين اسمه تنحنح
وهو يقاطع جده ويتكلم بصوت عالي وكانه يسكت جده : ملكتي كانت امس علئ بنت عمي عبدالعزيز اعتذر منكم لظروف حصلت واضطرينا انا وعمي عبدالعزيز مانعلن الملكه الا اليوم
اسودت وجيهم بصدمه طالع عبدالعزيز بخببث وهو مبتسم وب التفاته لجده اللي صامت بشكل يخوف وملامحه ساكنه وبصوته الجوهري :
صحيح ملكة سعود امس كانت بالدمام علئ بنت عمه عبدالعزيز
واحد من الرجال ب استغراب: بس بنات عبدالعزيز كلهم هنا مابهن اللي بدمام
الثاني: اي والله من هذي
فتح ازراه بتعب وهو يسمع تساؤلاتهم
سعود بصوته الواثق: عمي عبدالعزيز كان متزوج قبل لايتزوج ام مشعل وطلقها وله منها بنت وهي الحين علئ ذمتي
واحد من اخوان سعاد بعصبيه: وماشاءالله يتزوج ويطلق وحنا ماندري عنه
سعود بصوت عالي: ومن انتم علشان يعلمكم سالفه صارت وانتهت وخلصنا والبنت وصارت عندنا وسكروا علئ هالسيره
جده بهدوء: ماكنا نبي نعلمكم بموضوع صار وانتهئ والبنت تربت مع امها لفتره وبعدين حيرنها لسعود وامس ملكوا والبنت بنتنا
عبدالعزيز: ماني لاقي احسن من ولد اخوي لبنتي
الجد بكل برود: الخميس ملكة فارس ومشعل والجمعه حفلة ملكة سعود
سكت وهو يشوف نظرات عمامه له جلس يلعب ب السبحه وهو يسمع سوالف الشياب
وبهمس ليتها جت علئ ماتمنيت ياسعود طالع لعمه اللي ملامحه رايحه فيها اجل بتقلب السالفه علي انا من شفت هالتجمع وانا عارف ان وراه بلا
صحاه من سرحانه صرخ عمه عبدالعزيز:انت شلون تتغافلنا وتتزوج من راسك ولا تعلن الزواج بكل فخر بعد
وقف وهو يشوف مابقئ بالمجلس الا عمامه وعيالهم
وببرود: طلعو بزارينكم ونتفاهم نفس الناس
مشعل بغضب: انت اللي سواتك سواة بزر
طالعه ب ابتسامه: احترم الاكبر منك وب استهزاء يالنسيب
جده بصوت عالي : وش تبي يا سعود
سعود: طلع المبزره ونتفاهم
جده وهو يطالع العيال اغلبهم موجودين ماعد فيصل ونواف وسلطان : اطلعو بر
مشعل وليث: جدددي
جدهم بصوت غاضب: اطلعوا
طلعو وهم ودهم يذبحون سعود من القهر
جلس وبهدو: ياجدي قبل لاعلمك السالفه
ابي منك طلب
جده وهو يطالع له بقهر: سم يا سعود
سعود ابتسم وهو يمسك يد جده بحنيه: ابي بيتي اللي بنيته من حر مالي يرجع لي
بهت وجه ناصر وهو يطالع ولده اللي يلعب فيهم
ناصر: مو علئ كيفك تطلعني من هالبيت صار لي
سعود وهو مايطالعه وعينه علئ جده: ها وش قلت ياجدي
جده بهدو: يومين وهو عندك
ابتسم بخبث وهو يطالع وجهه ابوه شلون قلب وعمامه اللي كل واحد منهم وجهه يتقارص من القهر
جده بنبره عاليه : علمني السالفه ياسعود
سعود بهدو وهو يطالع عمامه: شف ياجدي انت من علمتني بالسالفه وانا ماهدت ارضي ولا ارتحت بنتنا جالسه عند الغرب تقل ماعندها اهل ووالي ورحت ودورتها لفتره ومالقيت لهم اثر تناسيت الموضوع الا لما دق خالي فهد وعلمني بالسالفه تحاميت وقلت ماتطلع للغريب انا ولد عمها واولئ بها وخذت اول طياره ورحت لبريطانيا وملكت عليها ورجعت معي للدمام وبكذب بتكمل دراستها بجامعة الدمام وتركتها عند خوالي
سكت عقب ماشاف الرضئ يسكن نفوسهم
جده بهدوء: ومن خاطبها وشلون فهد خالك
سعود وهو متجاهل نظرات عبدالعزيز: خطبها واحد من قرايب خالي فهد مبتعث بالخارج
وفهد خالي سالفته سالفه جدي قبل تزوج وطلق ولمن طلق ...زوجته طلعت حامل بفهد بس ماعلمت جدي وتزوجت المره ولد عمها اللي كان عنده بنت اسمها ساره ورضعتها مع ولدها فهد وهذي السالفه كلها وبسؤال ها يجدي اذا انا غلطان بشي ولا خالفت عاداتكم اصدقني القول؟
جده بملامحه السمحه وصوته الراضي: لاوالله يوليدي انك كفو وقدها ولو غيرك كان مااعطئ الموضوع اهميه وطلعها للغريب
بس انت تربية ناصر ماترضئ بنتنا تطلع الغريب
وبحنيه استغربوها : جيبها لي بشوفها
سعود وجهه تقلب: ان شاءالله الشهر الجاي اجيبها
جده : وليه ماتجيبها بكره وحفلتك الجمعه
سعود: ياجدي حفلتي مو لازم وان صارت بتكون عشا للرجال والبنت للحين متغربه...عطني وقت امهد لها و
اعرفها عليكم واجيبها
ناصر بهدو: بيض الله وجهك ياسعود والبيت اسبوع بالكثير وبسلمك اياه
مارد وهو مركز نظراته بعبدالعزيز
وافي: والله وطلعت حركات تتزوج من ورانا
ابتسم: اعجبك
خالد : الله يهنيكم وجيبها ب اسرع وقت بنشوفها
محمد وعبدالله: اي والله جيبها
وافي: بنشوف بنتنا الاجنبيه
سعود : ههههههههههه ان شاءالله وبهدوء جدي ترا ان جبتها بجيب عمتي معها لان خالي فهد بالخارج مارجع صار له ظرف
....
توتر بزياده وانعفست ملامحه مسح جبينه بضيق وقف وهو يستاذن بسرعه
جده : براحتك سو اللي يعجبك
سعود وهو يوقف حب راسه: مشكور يالغالي
وقف مع وافي وبنبره هاديه: شف لي الطريق بسلم علئ عماتي وجدتي
وافي : يلا امش معي
طلع وهو يلمح مشعل اللي يخزه بنظرات حاقده طنشه وقف عند المدخل وهو يسمع وافي يعلم البنات مايطلعون
وافي : ادخل سعود
دخل وهو يتجه للمجلس اللي بنهاية الممر
ابتسم وهو يشوف جدته وعمته يهلون فيه
حب راس جدته وايدينها وسلم علئ نوره ونوف وجلس بجنب جدته : ها بشرينا عنتس وشلونتس
جدته بدموع: انت اللي بشرنا عنك وين تغيب وين تنام من متئ يوليدي ماشفتك لاتقطع بنا ياسعود
سعود بمحبه: وانا عندتس يالغاليه ماني قاطع وبرجع بسكن بالقريه علشانتس وبابتسامه والحمدالله بخير ومابي خلاف وابشرتس بتزوج بعد
ضحكت نوف وهي تقهويه: يوه سعود الشايب بيعرس
جدته بهاوش وفرحه: ماشايب غيرتس وبفرحه الله يوفقك يوليدي ويسعدك
ويرزقك الذريه الصالحه
سعود من جاه طيف غموض ابتسم وهو يردد: امين ي جده
نوره: مبروكين ياسعود وعقبال مانشوف عيالك
سعود : امين يارب
نوف بلعت ريقها من شافت مشعل وملامحه المخطوفه وشماغه ع كتفه
نوره وهي تطالع مشعل بفرحه: عسئ الله يهنيك ي مشيعل ويوفقك كلمني جدك العصر وعلمني بخطبتك وابشرك البنت موافقه
مشعل مارد وهو يهز راسه وعينه علئ نوف
نوف اللي ارتبكت وطاح منها الفنجال: مبروك يامشعل وب استعجال : انا بروح للبنات عن اذنكم
وطلعت وهي خايفه من نظراته وجهه
وبسؤال لسعود: اختي وينها
سعود اللي وقف وهو مطنشه سلم علئ جدته وبنبره هاديه: جده انا عندي شغل بطلع اقضيه داخل الديره بطول لاتحسبون حسابي ع العشا بس جهزو لي الفراش بالمجلس الداخلي
جدته : ابشر يوليدي وانتبه لنفسك ولاتسرع
سعود: ان شاءالله
وقف له مشعل وهو يقرب له : اقولك وين اختي ماتسمع
همس له : مالك دخل فيها فاهم وابعد عن طريقي لاادفنك دفه وهو يتعداه بعصبيه
مشعل سكت وهو مقهور من ابوه اللي طلع ع طول وسعود اللي مو راضي يعلمه وش سالفة اخته وزواجه
....
...
طلع وهو يتجه لسيارته لمح عمه عبدالعزيز ينزل من السياره ومعه عمه خالد
ركب السياره وحركها وهو مطنش عمه اللي ياشر له
عبدالعزيز بتعب شفت حركاته
خالد : يرجاال طنشه تلقاه مضغوط ولايمكن صاير لاهله شي
عبدالعزيز بسخريه: هه اهله اللي هي بنتي وطليقتي الله يدنيا
خالد سكت وهو يشوفه معصب : امش خلنا ندخل علئ امي
...
مشئ وقلبه يعوره كان الموقف لصالحه مو لصالح سعود وشلون قلب الطاوله عليه وش يسكت الناس وبتصير سيرته علئ كل لسان وسعاد وش يسكتها الحين زفر بغضب وهو يغير طريقه ويرجع لسيارته
خالد الحمدالله والشكر مدري وشوله منفس والموضوع انحل وخلص
وافي اللي سمعه: ي خوي يباخذ له كم لفه ويرجع وبهدو ترا السالفه قويه شوي عشرين سنه مخبين السر عن اهلنا وفجاءه يطلع وبسخريه وخذ لك الحين هالسيره وش يسكرها وموقف مرته وعياله شوي صعبه بعذره يضيق وينفس
خالد: الله يسر الحال ويفرجها
وافي بهدوء وهم يدخلون البيت: امين يارب
وافي بمرح: اقول امش عند البنات خلنا نستهبل علئ نوف وساره
خالد بضحكه: وانت ماتتوب
وافي بملامحه البشوشه:ابداً ولا راح اكبر بعد
دخل وهو يشوف البنات مجتمعات
وكاشخات وقهوه والحلا
وقفن يسلمن علئ عمهن وافي وخالد سلم وطلع لامه
وقف قبال ساره اللي كانت ريانه بجنبها ويسولفون وافي ب استهبال وهو يوخر ريانه: اقول امشي وخري عن حرم مشيعل
حمر وجه ساره بخجل: خالي وش قلنا حنا
وافي بضحكه: هههههههههههههههههههههههه ي بنات من الحين طلعو ساره ونوف من قروبكم
ريم بضحكه: عمي حيلك بنوف
منئ : اي بالله تراها دابلتن تسبدونا
نوف اللي وجهها باهت وهي تشوف ريانه كيف الصدمه واضحه عليها : اقول وافي لاتجيب هالطاري لااعلم امي عليك
وافي : اقول اسكتي لاادق علئ فارستس واعلمه بهبالتس
تتافتت بقهر منه : وبعدين
وقفت ريانه وبالحيل ماسكه عبرتها: عن اذنكم
سلطانه بهمس لنوف: عمه وش فيها
نوف بترقيع: تعبانه قبل لاتجي للجمعه قالت انها مصدعه بس انا اصريت تجي
ابتسمت من تصريفة نوف الواضحه كيف تعبانه وهي سهرانه امس معنا وضحك وسوالف
خلود اللي دخلت وهي مكشره
وافي: عوذه عوذه وش بتس بتذبحينا
خلود طالعته بقهر وصدت
ضحكت ريما وهي تدخل وراها: فقرة كل جمعه جدتي مهاوشتها علشان لابسها تقول لبس الكفار لاعاد تلبسنه عندي
وافي : ايه وهي صادزه تستاهلين
خلود: وش معنئ بنتك ماقالت لها شي
سلطانه : وانتي وش دخلتس فيني
وافي وهو يوقف: اقول قدامي غيري ياله وش انا قايلن لتس مابي اشوف هالبس عليتس
سلطانه: يييبه حبيبي ماعليك منها
وافي بلعانه بخلود: خلاص ي حبيبة ابوتس حرك حواجبه علشان يقهر خلود
مالت شفتها علئ جنب: وعع حومتو تسبدي مو لايق عليكم الدلع
ضحكوا البنات عليها وطلع وافي وهو ميت ضحك علشان يقهر خلود
.
.
-حسيت بخاطري يضيق وتوجهت للمكان الوحيد اللي يخفف عني هموم هالدنيا تامل المكان بيت شعر وخيمة الطبخ وخيمه ثالثه للعامل وحلاله بعيد شوي عن الخيام رفع عيونه وهو يتامل الغروب وجالس فوق السياره .. هه عباله بيقهرني وبيلعب علي انا من دخلت القريه وانا حاس بشي يضيق فيني وعمر احساسي ماخاب توجهت للمدخل الرئيسي وانا مستغرب من كثر السيارات ب انواعها والشي هذا مايصير الا بالاعياد والعزايم الكبيره اللي اغلب القريه تجتمع بيت جدي وعقبه يصير بدور علئ كل واحد عشا وغدا نزلت وانا اطالع ابوي اللي سبقني زفرت بضيق وانا اطالع بيت الشعر طافي والمجلس اللي دايم نجلس فيه بعد طافي والكبير مفتوح والجزم كثيره تنهدت وانا عارف الموضوع فيه انا وشي مو طبيعي ماذكر ان عمامي واحد فيهم مرته حامل دخلت ومن شفت نظرات عمي عرفت انه عرف بالموضوع وناوي يقلبها علي بس قلبت الموضوع عليه
عارف اني كسبت حقد من غير حقد ابوي واخواني صار عمي الحين بصفهم بس هذا المفروض كان يصير لو ماتكلمت كان جت الثانيه علئ راس بنته وانا ماارضاها لها هي غير عن هالناس كلهم مع انها رافضتني وحاس بهالشي بس تبقئ هي اللي ياما دورتها وحلمت بلقاها من سابع المستحيلات اتخلئ عنها لو الخلق وقفوا مابيني وبينها وب ابتسامه ماني قليل شر وهذا اللي بادي يبان علي هالفتره
وبهمس وهو يشوف ضو سيارة عمه عبدالعزيز:
خلوني اسج في دنياي لو ساعة
يكفي لنفسي من الضيقات ما جاها *
ابتسم بضيق وهو يشوف عمه اللي يمشي له وواضحه عليه العصبيه... وياه ي عمه اغلئ عمامه واللي ماتوقع منه يقلب عليه وهو اللي مربيه وبير اسراره تعدل ونزل من سطح السياره وب ابتسامه اغتصبها وبصوت شبه عالي:
السيف مايزهى سوى كف سياف
والخيل دون حصانها مستخيره
عبدالعزيز طالعه بنظرات وبصوته
: وكف السياف ماطعنت الا خيلها
سعود : الوجه من الوجهه ابيض لاطعنت
ولاهو من طبعي وانت اخبر بسعود
عبدالعزيز وهو متثلم وعيونه حمرا: وشلونها ياسعود
سعود صد بضيق: بخير ببعدك
عبد العزيز ببحه: بنتي ياسعود وصفها لي وش طبايعها وش حياتها علمني ي رفيق اسراري
سعود بتنهيده وهو يمشي ومعه عمه للخيمه اللي اشتغلت انوارها والعامل يشغل الحطب والقهوه جلس وعمه واقف
سعود: اجلس يعمي
عبدالعزيز بتعب جلس : مافيني صبر عطني اخبارهم
سعود: شقول لك يعمي انت بنفسك اللي تخليت عنهم والحين جاي ترجي وصالهم ومسامحتهم شقول لك عن ملامح الحزن اللي ساكنه بعمتي ساره كلما لمحتني ولا عن غصة بنتك ب اسمك ولا علئ سرحان عمتي بملامحي وكانه تشوف عبدالعزيز ماخفت عني لمعة الحزن بعيونها وضيقها مهما اخفته وبنتك اللي كارها قربكم ونسبكم ولو بكيفها تبرت منكم بنتك عشرين سنه ماشفتها ولا سميتها عارف انها قبل يومين تسمت ب اسمك وبتنضاف بكرة العايله حقك ...
بكرك ياعمي ماشفتها اول فرحتك
عبدالعزيز وعيونه بدت تعلن اول انهزامته: قسم بالله ياسعود الظروف كانت ضدي مابين امي وبين زوجتي وبين عاداتي
سعود بعتب: مايشفع لك فيه مية حل وحل ولا تغرب بنتك وهي من صلبك وتنكرها وتنفيها وتبي منها تشفع لك وبسخريه اذ هي الحين كارهتني والسبب اني قريب ابوها
عبدالعزيز : بعوضها بس خلها تجي
سعود صمت لثواني: ماراح اجيبها ولو جبتها ماراح تعوضها
عبدالعزيز: وليه م اعوضها ماهي بنتي
سعود: وتوك تتذكرها عمي عقب عشرين سنه جاي تعوضها وبسخريه : وينك عنها قبل مو انت اللي نفيتها مع ماضيك مالك حق ابد تشوفها ولا تكلمها وطلعت من ذمة خالي وصارت بذمتي والله يقدرني واغنيها عنكم
عبدالعزيز وهو يشوف انفعال سعود وبهمس هادي مع بحته:
تعبت أرحل مع وجيه البشر بنساك بالترحال
ولا ادري وش يجيبك في وجيه الناس وآهلّي !
سعود اللي ضاق من هالبيت: انساها يعمي
عبدالعزيز زفر بتعب: وانا نسيتها علشان اذكرها
سعود بهدوء: ياعمي تعوذ من ابليس وارجع لاهلك الحين تلقئ مشعل قلقان عليك وعمامي
عبدالعزيز: مقصر كثير بحقها وين كنت عنها كل هالسنين وشلون غفلت عنها شلون
سعود: مابيدنا حيله نرجع الماضي ونصلحه راح بخيره وشره ماعليك الا تنسئ انسئ وتجاهل كل هواجيسك
هز راسه وبنبره حنيه: انتبه لها ياسعود لاتضايقها وتزود كسرها
سعود: لاتوصي ياعمي بكون سندها وب ابتسامه : قوم ارجع لبيتك واجمع عيالك وزوجتك وعلمهم بالسالفه قبل لاتنتشر السالفه ويزعلون
وقف وهو متضايق: شورك وهداية الله ..عسئ ربي يفرجها ...وبتهديد والله ي اني كنت جاي وناوي اطلع الحره فيك باللي سويته بس من شفتك تبخر اللي كنت بسويه
سعود بسخريه؛من اولها بتقسئ علئ نسيبك
عبدالعزيز ب ابتسامه :يعزي لعديلك بس
سعود بغرور:مايوصل لمكانتي
عبدالعزيز بتنهيده ؛ ولا يفكر ياصل اصلا يلا انا رايح وانت لاتطول وانتبه من الدواب
سعود:ابشر
قفئ وهو يمشي وعين سعود وبهمس:شفتها بعيونك يعمي من يومي بزر وانا اسمع سوالفك عنها شاب شعرك وتقدم فيك العمر ولانسيتها ياتسيف من طاريها تتحسر وعينك تدمع وانت القوي الشديد شلون بس خذت قلبك ولا نسيتها اعوذبالله من عشق يوصلني للمرحله وبدندنه:
راحت وقلت مع الأيام بنساها
والعمر راح ، وأنا للحين بذاكرها !
...
...
العصر برياض طلع من دوامه علئ بيت اهله ونسئ يمر الفندق ولا يطلب لها
وصل البيت وهو يشوف سيارات خواله تنهد بضيق وعلئ صوت امه اللي طالعه ومعها الاغراض: الله جابك بنطلع للشاليه وابيك تودي بنات خالك
ياسر بتافف:يمه ترا قرفان من نفسي خليني ادخل واتسبح والسايق موجود وبسخريه : وسيارات اخوانك مغطيات الحي من كثرهم
ام ياسر:لاحول الله وانا كلما طلبتك فشلتني
ياسر وهو يتجه للباب الثاني :بدخل من ذا ولا اشوف زول وحده من بنات خوالي لا والله اقلب البيت عليكم
طنشته وهي تنادي الخدم يستعجلون وب امر :من تخلص تجينا بالشاليه ماعندنا غيرك
وعمك ذا لاتروح له وبعدين ماتستحي علئ وجهك تروح له وهو مطلق خالتك
ياسر بتفهم:طلقها بعد الملكه وكيفه شي راجع له مابينهم نصيب غصب يتزوجون مقدر ومكتوب واصلا اريح لها
ام ياسر : لا والله الا الله لايوفقه ويشوفها بنته اليوم قبل بكره
انصفق وجهه بصدمه من دعوة امه : يمه استغفري عندك بنات موضوع صار وانتهئ ليه كل هالكره والدعاوي علئ البنت مالها ذنب مو كافي الضرب اللي كلته منك يومين وهي مرقده والسبب انتم
ام ياسر: اشوفك تدافع عنها لو تحب السما ماتاخذها فاهم ولا بنات خوالك ترس القاع اهون علي ازوجك اياهن ولا ازوجك بنت عمك اللي خلئ سيرة اختي علئ كل لسان
مشئ من غير لايرد وهو وده ياخذها ويهاجر ويفتك من هالمصايب والهواش
بعد مرور ساعه طلع من قسم الرجال وهو يدخل البيت عقب ماحركوا طلع لغرفته وطلع جوازه ورجع يركض وقف عند المريه وهو يعدل لبسه اللي كان عباره عن تيشرت ابيض ب اسود وشورت اسود وكاب اسود دق علئ خويه وهو مستعجل :الو السلام يزن فزعتك
ابي تحجز لي رحله لدبي لشخصين اليوم بالكثير اذ تقدر حبيبي مشكور يعطيك الف عافيه
سكر بفرحه وهو يتوجه للفندق
مشئ وهو يفتح الغرفه عبس وجهه من الجو الكئيب انصدم وهو يشوف الفلوس بمكانها وهي نايمه مشئ وهو يرفع الستاره وبصوت عالي: اغصان قومي يلا اذن المغرب وانتي نايمه وشذا النوم
فزت من صرخته وهي ماسكه اللحاف ورجعت علئ ورا بخوف : وش فيك وش تبي ليه تصرخ ماسويت شي والله
ارتبك وهو يشوفها خايفه ضرب جبينه وهو يتذكر نصايح الدكتور النفسي له وكيف يتعامل معها وانها بهالمرحله لازم تبعد عن الناس واي شي يضايقه ويطلعها من هالجو قرب وهو يرسم علئ وجه ابتسامه هاديه :يقلبي ماسويتي شي بس طفشت لحالي قلت اقعدك واجلس اسولفك عليك وبهدوء: تسمحين لي اجلس
اغصان وهي ترجع لوضعها الطبيعي : اصلا بقوم اغسل عن اذنك وقامت وملامحها جامده اللي يشوفها يقول وش هالبرود ماتحس وهي من داخلها تتنافض من الخوف ماهي متعوده علئ وجوده بجنبه لهدرجه
توجهت لدورة المياه سمعت صوته وهو يطلب لها غدا طالعت وجهها بمريه وفجاءه تذكرت ضرب سامي لها ومن غير لاتحس بنفسها بدت تضرب نفسها بعنف مسكت يدها وهي تحاول تهدي نفسها والالم يزود عليها صرخت بوجع لما انضربت ايدها بالمغسله بقوه
..
كنت جالس بالصاله وفجاءه سمعت صرختها ركضت لها بخوف ابيها تفتح الباب بس ماكنت اسمع الا صوت تكسير كسرت الباب وبهتت الدنيا بعيوني وانا اشوف منظرها غارقه بدمها بركض ب انقذها بحاول اسعدها بس رجولي من هول الصدمه عجزت احركها
التفت لي وايدينها دم ورقبتها مخمشه ونص بجامتها مقطعه وشعرها وجهها المجروح
اغصان بدموع: انت اخذت بقايا انثئ اخذت انسانه معقده نفسيا شفت شفت بعينك اني مااقدر اصلح اكون زوجه ولا اي شي بالحياه
شفت شلون اذيت نفسي شلون تقدر تتطمن علئ نفسك وانت عايش مع انسانه تعنف نفسها ماتخاف اذبحك ولا ماتخاف اخنقك ترا ماعندي مشكله ماعندي شي اخسره ابد
...
...
...
الئ هنا ولنا لقاء قريب
وشكرا حبايبي علئ ردودكم الحلوه
وتوقعاتكم الجميله شكرا وكونوا دايم
بالقرب اتمنئ يعجبكم البارت واعتذر اني طولت ومانزلته بس شوية اشغال لاهتني
واعتذر علئ عدم ردي علئ الردود ان شاءالله بحاول ارد عليكم وقراءه ممتعه وشكرا علئ ردك الجميل فيتامين سي واميرة الوفاء❤❤
|
10-08-18, 01:05 AM
جديد مواضيع قسم المنتدى العام للقصص والروايات
العرض العادي
