كاتب الموضوع :
فيتامين سي
المنتدى :
المنتدى العام للقصص والروايات
رد: ومالي بدجئ العاشقين ملاذ! بقلم/غسق آلليلh
بسم الله الرحمن الرحيم
.
.
البارت(28)
.
.
لو تعدّيتك .. يرجّعنيَ لْـ دربك : حنين
ولو تناسيتك ترى ذكرياتك : ما سهت
*منقول
.
.
الرياض
بعد مرور يوم
واقف قدام الشباك يتأمل المنظر قدامه الاشاره اللي تتحكم بالكم من السيارتت وعمال النظافه باصات المدرسه رفع راسه يشاهد ارتفاع الابراج من حوله والمباني صمت لوهله بعدها اردف وهو يبعد عن الشباك: ليت فيك من ريحة امي ليت فيك ذكريتنا الحلوه
توجهه ياخد له شور ويصحصح ثم يبدا يوصل الطلبات
عند معاذ ب اول يوم عمل له لبس اللبس الخاص بالامن وهو حاس بفرحه عظيمه ان يكون لك شغل بعد ماكنت تبيع شاهي بالطريق شي جدا حلو عبس وجهه من تذكر رفض عساف انه يروح معه ويداوم : الله يهداك ليتك بس تقتنع
رجع يبتسم وهو يتمشى بساحات المول
.
.
عساف طلع بعد ما اخذ شور سريع لبس ثوبه وربط عصابته اخذ مفاتيح السياره وهو ينزل
جاه اول طلب انه يوصل اكل ابتسم بسخريه وهو يقرا الرساله اللي جته وبصوت سخريه: انت مندوب صح اذ ماعليك امر تمرني على هالعنوان ابيك توصل طلبية فطور لزبونه وصلني رقمك من الانستا
عض شفته بغيض وهو يتجهه للعنوان
وصل وهو يرسل لها تطلع له احد وياخذ الطلب دقايق وجته الشغاله معها الاغراض
اخذهم وهو يركب ويتوجهه للمكان الثاني
وصل وهو يدق على الرقم دقايق وجه الرد
: الو
عساف: الو معك مندوب انتي طالبه فطور
ردت بهدوء: ايه صحيح طالبه فطور بس معليش تاخر وطلعت للدوام
عساف: يعني وش اسوي انا بالفطور
ردت : انا وش دخلني مشكلتك ماحد قالك تتاخر
عساف بقهر: الله يضيقها بوجهك
وسكر الجوال بقهر وهو يركب سيارته بغضب رجع لشقه نزل من السياره وهو شايل الفطور دخل على البقاله اللي بجنب العماره وبنفس شينه عطاهم الفطور وطلع من غير لايتكلم
ركب الدرج وهو يحاول يهدي نفسه دخل الشقه وخو يرمي مفتاحه وشماغه رمى بنفسه على الكنب : الله يقطعكم اي والله اوف ياربببي
رجع راسه لورء بهم : بكره ادور لي شغل الحين اغمض وارتاح ثواني بس ولاغمضت عيونه بسلام
....
بنفس العاصمه :
ياسر بهدوء:يلا يابنت تاخرتي
اغصان بعصبيه :يالله بس مابي اداوم
ياسر:والسبب
اغصان دنقت راسها:ياسر ممكن طلب
ياسر ابتسم :امري
اغصان:مابي اشوفك
طالعها ببعثره:متاكده
هزت راسها بعناد
ياسر تحرك صوبها :وعناد لك انا ماني مداوم اليوم وبجلس هنا فهمتي
تقدم وهو يجلس على كرسي التسريحه ويناظر لها بضيق
تكملت بنبره مرتجفه؛ مابي اعيش عند امك مابي ارجع اعيش عند ناس مايبوني ياسر والله ماعاد فيني حمل اتقبلهم ادري صعب عليك بس اذ بتسكني عند امك اهون علي ارجع اعيش عند سامي واتحمل كل شي يجيني منه الاقل هو اخوي
ياسر: يعني كل اللي سويته لك مو بين بعينك يكفي زعلت امي وطلعته بالغصب من شقتي علشانك وعدتها واقنعتها اننا بنسكن عندهم لاتعدلت اوضاعك وبالاخير بتعشين عند سامي رفع حاجبه : الاقل ضحي شوي علشاني تحملي تجاملين ليش انتي كذا انانيه اهم ماعليك راحتك وانا بطقاق ليش ماتشوفين ياسر وش سوا لك انا لين هالحظه وانا اعتبرك شي كبير بالنسبه لي بس الظاهر اني غلطان
وقف وهو يتجه للباب: ماراح اقولك تجهزي اوديك لسامي بس تجهزي بعد شوي اوديك لامي ولمي كل اغراضنا
وطلع
اغصان طاحت دموعها بحزن: ياربي ساعدني يارببي ماحد فاهمني مسحت دموعها وهي تقوم تحط الاغراض رمت ثيابه بالشنطه وفتحت شنطاتها الصغيره وهي تحط ملابسها اخذت شنطة المدرسه وحطتها داخل قفلت الشناط وهي تجلس على الكنبه اخذت جوالها
وهي تشيك على الانستا والواتس مالقت احد مرسل فتحت محادثة سامي وهي تتأملها فاضيه انرسمت على ملامحها بسمة خذلان
غمضت عيونها لثوانيي وفتحت من حست بحركه لفت ولا ياسر جالس ينزل البالطو
وبهمس: ليش رجعت ولا خفت اني سويت شي بنفسي
ياسر وهو يلف عليها : مارجعت لعيونك رجعت ابي اريح وانام ولاصحينا نمشي
ماردت وهي تلعب بجوالها بفضاوه والدمع ممتلي بجفونها وبهمس: بيراضيني ماهو مخليني كذا ارتجفت ايديها من لمسة ايدينه
همس وهو يتكلم بجديه: اغصان انا ماعمري جبت طاري عمي او اخوك وماطلبت منك شي ابيك تسكنين معي وعند امي وقبل كل شي هذا بيت ابوي يعني بيتي لو سكنت هنا شهر شهرين اخرتها بالاخير برجع لبيتي واهلي حاولي تتنازلين شوي علشاني
اغصان هزت راسها بهدوء
ياسر :بسمع رايك مو تهزين راسك بس
اغصان :بروح معك واتحملهم علشانك بس رجاءً لايقربون لي ولا اقرب لهم
ياسر وهو يوقف:على خير ان شاءالله
ثواني ورجع يجلس وانسدح وهو يحط راسه بحضنها وبهمسه الهادي:ممكن تتدلكين راسي تعبان والله من الدوام وكل شي
اغصان ناظرته ببرود وهي تهمس:بقوم ممكن
ياسر طالعها وهو يرفع نفسه:تراك تخسريني بحركاتك هذي
ماردت وهي تدخل المطبخ وتخليه حط يده على راسه تذكر كلام خويه يوم راح يشكي له
هاوشه وسفل فيه قال له يهتم فيها ويحسسها انه امان له بس هي مو طايقتني ابدا ماهي راضيه نتتمم الزواج ولا هي راضيه ب اهلي ولا هي راضيه فيني كلما اعصب وازعل ارجع بالثانيه واتسامح منها وافهمها وجهة نظري كله علشان ماتنزل دمعتها مره تكون حبيبه ومره تكون ماهي طايقه تسمع صوتي
اعذرها واقول صغيره واللي بعمرها تصرفاتهم اذكى منها وادهى اه ي اغصان بس
رجعت راسي على ورا وثواني وانا اسمع صرختها فزيت بخوف وانا اتوجه لها وبصراخ:
خبله انتي فيه احد يحرق نفسه
اغصان وهي تتوجع : كنت بصب المويه بالكوب تراني ماني خبله اذي نفسي
دفتني وهي كاتمه صحيتها
توجهت للثلاجه وانا اطلع عسل علشان يبرد مكان الحرق رحت لها وهي جالسه ع اريكه وعيونها مليانه دموع وججها احمر وهي ساكته تقدمت لها : معليش هالمره بعالجك بالامور الشعبيه
ماردت علي وهي صاده مديت ايدي وانا اجبرها تعطيني ايدها طالعت للجرح : ماعليه بسيطه ان شاءالله بس هدي نفسك
اخذت العسل وانا ادهنه على ايدها على خفيف شهقت بوجع وتلف : يوجع
ياسر: ياعمري هذا حرق مو لعبه اكيد بيوجعك بس مع الوقت بيهدى
رجعت لصمتها وهي مدنقه راسها
رفعت راسها بحنيه: ابكي
اغصان بسخريه: علشان اصير مجنونه وبكايه
ياسر: حشاك وانا ماقلت عنك مجنونه
اغصان: حرصك الزايد قال تصرفاتك قالت
ياسر: وتكسرك للمرايا ماهو جنون
اغصان يابابا تراني ماني حمل هالسوالف ابيك مره عاقله فاهمه انا ارجع من الدوام من هد حيلي من اللي اشوفه واعالجه مسك ايدينها
تراني مكسور من داخلي كثير موت ابوي كسرني صدك كسرني دوامي اللي الكل مستانس فيه ترا ولا شي بالنسبه لي يوم يجيني مريض متحمس للعمليه ونسبة نجاحها ضئيله جدا وقتها تعرفين معنا وش اللي اكون ميت وانا حي مافي اشين من لحظة اني اطلع واقول لاهل المريض عظم الله اجركم
ترا بين فتره وفتره تجيني هالحالات تخيلي يموت بين ايدينك انسان ويكون اخر شي كلامه لك وانا واثق فيك وبيطلع لعياله واهله
وبنهايه اطلع انا لحالي من العمليه لحالي وهو توفى غمض عيونه لثواني يتدارك دمعته من تذكر اشكالهم وهالمواقف كبير همي ي اغصان ولاانتي بحملٍ له قام وهو يحب راسها
:صحيني على الصلاه العصر نروح لبيت ابوي
اغصان بحدرجه بصوتها: طيب
طالعته لين انسدح وبعدها طلعت للصاله وهي تبكي من وجع الحرق وكلامه حست فعلاً انها ظالمته وما اعطته فرصه مسحت دموعها
: حسبي الله عليك ياسامي كرهتني بالرجال كلهم
___________________________
الدمام :
بعد ماصلى الفجر اتجه لساحة التدريب وهو يضبط قناعه الاسود وبدا يتسلق الابراج بقوه
نقز على البرج وهو يحسب الثواني لذيب ويتوعد فيه ماكمل الدقيقه ولا ذيب من وراه وبصوت عالي: سبرايززز صقور
فز برعب وهو يسقط من عالي البرج لولا الحبل كان راح فيها شهق ذيب بخوف واللي كانو جايين
سعود وهو يتمسك ب وسط البرج: الله ياخذ عدوك ياذيب
ذيب ب ابتسامه: امين
نزل على الارض وهو يفك الحبل ويدلك كتفه غمض عيونه من حس بنغزات بصدره وكتفه
ذيب : عسى ماتعورت
سعود وهو يوقف : قدامي مية مره تمشي
وشفت هالابراج تصعدهم خمسين مره
وبعدها بدربك على السلاح وكيف تصاوب
ذيب: ماتقصر والله
سعود : لك عين توقف قبالي اقول تقلع تدرب يلا قدامي
ذيب: ابشر بس ترا عامل حسابك بالفطور حطيته بمكتبك
سعود: اخلص علي ياكثر حكيك
ابتسم وهو يحس بسعاده مايدري ليش بس يرتاح مع هالصقر كثير مع انه ماصار له اسبوع بس يتطمن بوجوده يحسه شخص طيب رغم قسوته
سعود وهو يشوفه سرحان: ياهو التدريب
ذيب: ياحظ اهلك واخوانك فيك
سعود طالعه بصمت واردف بهدوء: على تدريبك وترا مراقبك بالكاميرات بروح اخلص بعض الاوراق وجايك
ذيب : ابشر
مشى وهو حاط ايده على صدره دخل المكتب وهو متجاهل تسأولات العسكر قفل الباب وهو ينزع قناعه ويفتح زرار بدلته وينزل القميص بقى بالتشيرت الداخلي وهو يشوف الدم مملي التشيرت غمض بوجع : انا مدري متى بيسكر هالجرح اخذ المنديل وهو يمسح الدم رجع بالكرسي على ورا وهو متجاهل جرحه وبتسأول: وش ممكن صاير لفهد الحين
وقف وهو ينزع التشيرت ويقطعه بنص ويربطه على الجرح ولبس قميصه وهو يسكر الازره بتعب اخذ الكمام وهو يلبسه بدال القناع فتح الباب ولا بوجهه حامد
سعود ب استغراب: انت مو بالرياض
حامد ب ارتبك: تبادلنا انا وعيسى
سعود بصوت بارد: وب امر منو
حامد : الرقيب يوسف ونايف مدد اجازته
سعود: اها الرقيب يوسف اجل بلغه سلامي والحين تدق على خويك الثاني ويرجع وانت تروح مكانه ولا ورب البيت لا ارفع فيكم شكوى الخطه كلها على مكتبي وعند اللي اكبر مني وهذا يسمى تلاعب يا حلو انت وياه تلاعب فاهم... انقذ نفسك قبل لايجيون ويتحققون من الاسماء تراهم على وصول وانت كيفك قفل باب غرفته وهو يمشي بكل ثقه متجاهل حامد اللي بدا يدق على عيسى ويقوله يرجع بسرعه
_
-
دخل ساحة التدريب وجلس على الكرسي وهو يشوف ذيب يتدرب دقايق ورن جواله برقم غريب عقد حواجبه ب استغراب ورد: الو
غموض: هلا
سعود: من
غموض: با مامداها تكمل ولارد بصوت هادي: غموض لاتسكرين
غموض : نعم
سعود وهو يطالع الساحه : انتي داقه
غموض: سعود سؤال واحد بس نفسي اعرفه
سعود: قوليه
غموض: وش مخبي عني
سعود صمت لثواني بعدها اردف: شوفي ياغموض فيه بعض الامور ماهي من صالحتس تعرفينها وتكون خاصه بناس كبار مرات غلط تتلقفين على سوالف غيرتس تسأليني وش مخبي عنتس وجايه كلتس ثقه اني بعلمتس فيه اشياء تنقال لتس وفيه اشياء لا احترمي هالشي مو شرط كل شي تعرفينه
غموض: ان ماجبته منك صدقني بجيبه من غيرك وصدقني ماحد خسران غيرك ياسعود تدري ليش لاني فتره بس وبعدها برجع لمكاني بس انت بتظل زي مانت
سعود ب ابتسامه : ومن قال ب اظل زي ما انا يمكن يكون عندي ولد او بنت منك يمكن نرجع مع بعض ليش دايم انتي انانيه
غموض :سعود
سعود اردف بهمس وهو يشوف ذيب جاي به:
غزوة عيونك ...... مالنا بد منها
حربك علي غيلة وانا مالي جنود
وش هدنتك واسلم؟ وانا ادفع ثمنها
وش هدنتك ترفع مظاليلك السود!
وحّشتني من طول ما غبت عنها
ما بين رفّة وْثانية ... آروح واعود
منقول لـ اشواق
سكر الجوال من غير لايسمع ردها
تقدم ذيب وجلس بجنبه وهو ياخذ نفس: تعبت
اردف سعود وهو يطالع ابعد نقطه بالساحه:
ياعزتي لصدرٍ على الضيق رابي
اليا بغى يفسح ضلوعه كسرها
ياللي عليم بمشتكاي ومصابي
لك قدرةٍ مافيه غيرك قدرها .!
ياوقت انا اشقاني كثير التغابي
مافيه فرحة ماعطتني ظهرها
مليون مرة قلت : ياقلب ماابي!
خير الظروف اللي يجي من ضررها
مليت اواعد موطني في اغترابي
واضحك مع من حد عيني وعصرها
منقول لـ*أشواق*
ذيب ب انبهار : صح لسانك تعرف تقصد
سعود وهو مبتسم : اقول قم بس عطيتك وجه
وقف سعود وهو يمد يدينه ويعقدهم لصدره: وش فيك مصنم
ذيب: امانه لك
سعود هز راسه بصمت وهو يمشي
ذيب وهو يحاول يمشي وراه ويلحقه : الصراحه خلتني ارجع واقول ياحظ اهلك
وبضحكه ممكن تصير اخوي
سعود لف عليه: ممكن تكرمني بسكوتك
ذيب: لعلمك ترا باقي لي تدريبات ماخلصت
سعود : سماح هالمره امش ادربك على السلاح
ذيب: طيب
تعدو الساحه وهم يدخلون ساحة الرمي وقدامهم دوائر بعيده وقف سعود ولف واخذ الحامي مسك ذيب من كتفه وهو يعطيه : البسه
ذيب: طيب
لبسه ورجع لسعود: سكره لي
وقف قباله وهو يسكره بقوه نزع الحامي اللي لابسه على راسه ولبسه ذيب وبجديه: امسك السلاح وركز بمركز النقطه
ذيب وهو حاس بتوتر فضيع: طيب
سعود : اطلق
ذيب بترقعيه : ماشوف زين
سعود وهو يعقد ايدينه: المحاوله الثانيه ركز ياذيب
بلع ريقه وهو يطالع ويحاول يركز اطلق قريب من النقطه
سعود بهدوء وهو ياخذ السلاح ويطلق على النقطه:لما يكون مخك صافي وذهنك مركز بتجيبها اما انك خايف ومتوتر ومو مركز ماراح تجيبها صح
ذيب : لاتلومني اول مره امسك سلاح
سعود بصوت مرتفع وحاد: كلنا اول مره مسكناه كنا بهالضعف بس لمن حطينا قدامنا هدف اننا نسهر لراحة هالبلاد والناس صرنا
من امهر الناس بالرمي المهم انك تجي وانت مستعد للمواجهه مستعد تفدي بروحك علشان ارضك وحدودها ذيب تراك مرفهه لدرجه اني مدخلك معي من غير تسجيل ومن غير ماتمر على كم عسكري قيادي ولواء وهالشي مافي احد يحلم فيه لانه صعب بس انت تحقق معك وصار خلك قد ثقتنا فيك
ذيب وملامحه يأسه : طييب
سعود: يلا حاول
ذيب وعيونه حمرت اخذ السلاح منه وهو يرمي على النقطه نطق وبعدها: بس هذا اخوي اخوي اللي شاركني حزني وفرحتي
سعود وهو يتقدم له ويجلسه: اخوك خاين لدولته اخوك ضيع عيال هالبلد اخوك دخل الممنوعات وخطف وقتل واخر شي عطاهم ولده وتبرا عنه لجل كم سلاح ومخدرات وعلشان وشو يهدد امننا لاتحسبني مستانس انك رايح تتجسس على اخوك بس بنفس الوقت اخوك لازم ينقبض عليه وهو متلبس بهالتهم
ذيب وصوته يرتجف: مانت فاهم شعوري
ممكن تقولون اخوه سكير مروج قاتل بس يبقى اخوي حتى ولو بس مرات لاشاق دمعتي قلب الدنيا وقعدها ابتسم برجفه مره طعن واحد بالمدرسه علشانه ضربني وبكاني مع انه هو ضربني بعد يوم رجعنا البيت ومره
وانا بالثانوي تهاوشت مع عيال الحاره لانهم يعايروني ب ابوي وجاء ضربهم كلهم علشاني
هذا اخوي مسح دمعته اللي سقطت من حر مافي جوفه مسك صدره وهو يهمس : الوجع كله هنا كله
سعود وهو يطالعه وقف : خلاص اذ ماتبي تكمل هالخطوه الله معك... ومشى
فز ذيب وهو يركض وراه وبصراخ: انا ما انهي شي بديته انا معك باللي تبيه
سعود وهو كاتم ابتسامته لف عليه: لا خلاص
ذيب: تكفى يالصقر خلاص انسى اللي قلته كنت محتاج بس اتكلم
سعود: بحاول انسى بس لعلمك نهاية الاسبوع يوم الاربعاء بتروح معي الرياض ومناك بنعرف كيف بنجيب محسن
ذيب: ليش مو على اساس اني اروح ابها
سعود: صعب علي اروح معك انا مطلوب لشغل بالرياض واصلا اساس العمليه الرياض لازم نتواجد هناك علشان الراس الكبير هناك وهو اللي مفرقهم علشان يلعبون فينا
ذيب: الله يعين
سعود وهو يطلع من ساحة التدريب ويدخل التفت ولا ذيب يمشي معه وقف وهو رافع حاجبه: رح كمل تدريباتك
ذيب وهو يتمسكن: والله تكسرت شوف ايديني كيف متجرحات شوف رجولي ياخي وجهي قلب من الشمس
سعود: يعني تبيني ارحمك
ذيب: ياليت
سعود المعروف بشدته هالمره لان معه كثير: بريك نص ساعه
ذيب وهو ينقز بفرحه: ياشيخ روح الله يسعدك
سعود : بتطلع
ذيب: ايه بروح اتقهوا بكوفي وبعدها برجع
سعود: محتاج فلوس شي انا حاضر
ذيب : لا مشكور ماتقصر مو محتاج شي ولا احتجت بجي اقولك
سعود : يلا روح بس انتبه لنفسك
هز راسه وهو يطلع بفرحه
سعود اتجه للمكتب يكمل بعض حوسته
.
.
.
بيت ام ماجد
دخلت همس غرفة عمتها بهدوء وبدت تصحيها: عمه يلا قومي افطري علشان اعطيك علاجك
صحت من النوم وهي تستند على همس وقامت تغسل وجهها وتصحصح
طلعت همس للمطبخ وهي تجهز القهوه والشاي بعد ماسوت الفطور
دق جوالها رفعتها وهي ترد: هلا والله
امها: هلابك مشغوله
همس: لا والله اصلح القهوه لعمتي ليش فيه شي
امها: لابس قلت اذ فاضيه بمرك ونتقهوا شوي وبعدها بنطلع نتغدا مع عمتك برا
همس: حلو بس عمتي ماتحب تطلع تعرفينها بتتعذر برجلينها يعورونها
امها: ماعليك خليها علي انا اقنعها
همس بفرحه :تمام انتظرك
امها: ترا ابوك بعد جاي
همس : تمام
سكرت وهي متحمسه حطت الفحم على النار واخذت الفطور ونزلته بالصاله
ورجعت للمطبخ جهزت القهوه والشاي وحطتهم ف الصحن اخذت الفحم وحطت البخور وحطته بالصحن شالته وهي تحطهم على الطاوله بصاله واخذت البخور بتدت تبخر الصاله
ولا عمتها تمشي على العصا وبصوتها البشوش: صباح الخير لاحلى عمه فالدنيا
ابتسمت ام ماجد: صباح النور
همس: شرايك بريحة البخور حلوه صح
ام ماجد : اي والله ريحته حلوه من وين
همس: طلبته من حرمه مدحته لي عمه ترا ابوي وامي جاين
ام ماجد ابتسمت: الله محيهم البيت بيتهم
دخلو على كلمتها ابوهمس : الله يرفع قدرك ويعز شانك تقدم لها وهو يحب راسها وايدينها : قلت ماراح افطر الا مع اخيتي
ام ماجد: ياهلابك
حبتها ام همس وجلست قامت همس وقهوت امها اما ام ماجد وابوها جلسو يفطورون جلست وهي تطالع لهم : الله يديم هالجمعه يارب
__________________
حايل*
بالمخيم وقت الصباح :
جاالسين وملتمين حول الفطور والشيبان يتقهون تكلم مشعل : انا اليوم ماشي للرياض
اليوم موعد دخولي لكلية الضابط
ردوا عمامه: الله يوفقك :، شد حيلك، اصبر ، ومن هالحكي
دخل عبدالعزيز وهو متلثم بشماغه وهو يسلم على ربع ابوه اللي جايين له جلس نادوه على الفطور بس عيا
مشعل وهو يطالع وجه ابوه المرهق وثوبه ازرته مفتوحه وقف وهو يجلس بجنبه : يبه شفيك
عبدالعزيز : مافيني شي بس تعبان ابي انام
مشعل : قوم معي نروح البيت انا بجهز اغراضي وانت نام وارتاح وتعال بليل لهم
عبدالعزيز: ماني رايح البيت بجلس لحالي شوي يمكن اطلع اجر فندق
مشعل : براحتك بس الحين تقوم معي وجهك حيل تعبان
وقف معه وهم يطلعون
مشعل : يبه كلمت سعود
عبدالعزيز: على ايش
مشعل: بشوف اختي قبل لا امشي انت عارف اني مطول يمكن شهرين مااجي بس بشوفها
عبدالعزيز وهو يركب مع مشعل
طلع جواله: بدق عليه قدامك ونشوف وش يقول دق عليه دقايق وجاه صوت سعود حطه سبيكر
: هلا بعمي
عبدالعزيز: ياهلا بك وينك مبطين عنك
سعود: عندي كم شغله ايه اخباركم وش مسوين
عبدالعزيز: ابد بخير منتظرين شوفتك
تكلم مشعل: شلونك سعود
سعود: بخير وانت للحين مارحت
مشعل : اليوم بمشي دقو علي
سعود: هالله شد حيلك وبيض وجيهنا وارفع راس ابوك
مشعل: ابشر بس عندي طلب
سعود: امر اذ بقدر عليه تبشربه
مشعل: بشوف اختي قبل لاروح
سعود صمت لثواني وبعدها اردف: ماقدر
مشعل: ليش طيب هذي اختي ياسعود مايحق لك تمنعني عنها منعت ابوي وعمامي بس انا لا ماجاها مني شي او ضرر ولا كنت موجود بالماضي علشان تصفون حساباتكم معي
انا ابي اختي بس بشوفها
سعود بصوت بارد: وانا اسف اختك هذي زوجتي وانا اللي اقرر متى تشوفكم ومتى تشوفونها مالك اي حق عندي لا انت ولا ابوك ولا عمامك وجدك ولا واحد فيكم له حق عندي ياخي انسو اني ماخذ بنتكم اعتبروني ماخذ من برا انا مو مجبوور اخليها تشوف ناس تضايقها
مشعل: الحين انا اخوها اضايقها سعود تكلم بعقل
سعود: العقل والمنطق وكل شي يقول ابعدها عنهم انتم اللي خسرتوها وهي بالمهاد الحين جاين تبونها وصل هالكلام لاجدك وقوله سعود يقولك والله ان قربت من بنت عبدالعزيز خله ينسى ان عنده ولد اسمه سعود سامع وصله يامشعل والحين انا مشغول مع السلامه
مشعل حذف الجوال بقهر: يبه شفت كلامه
عبدالعزيز حط ايدينه على عيونه وبكى
مشعل بغضب : يخسي هذا ينزل دموعك يالغالي والله لا اجيبها وانا ولدك
مسح دموعه بشماغه : انا فرحان بعمايل سعود الاقل قدر يمنع ابوي عنها قدر يوقف بوجه الكل وياخذها عكس ماسويت انا الزمن دار مثل ما ابوي هددني سعود الحين يهدده
ماراح تفهم وش اقول بس صدقني ياوليدي مافي اوجع من حرقة صدري عليها
سكت مشعل وهو يحرك وهو حاس بوجع من منظر ابوه ودموعه
__________
بالمزرعه جالس بطفش وهو يلعب بالنار: اوف وينك ياسعود بس الحين شلون ارجع اداوم واخليهم
جاه صوت من وراه : سعد
فز وهو يلف: هدى وش جايبك هنا
هدى بوجع: سعد بطني ذبحني تكفى ودني اقرب مستشفى مو قادره اتحمل اكثر
سعد ب ارتباك : طيب نادي احد يروح معنا
هدى: قلت لغموض تجي
سعد : يلا انا رايح اقرب اشغل السياره واقربها
دقايق وجت غموض وهي تلبس هدى عباتها استندت عليها وهي تمشيها على خفيف فتح سعد الباب وركبت ورا وهي تبكي بصمت
سعد وهو متوتر: هدى ياعمري انتي لاتبتسين
غموض وهي كاتمه ضحكتها على شكله : عمي لاتخاف كله وجع بطن
سعد : ان شاءالله ياعمي
غموض ابتسمت براحه وهي تشد على ايدين هدى اللي سانده راسها على كتفها وصلو الطبيب ونزل سعد وهو ينادي الممرضات جابو كرسي وجلسوها عليه وعلى طول على الطوارى ساعه وساعتين قضوها وهم ينتظرون جسمه يرجف مو قادر يوقف جلس على الارض وهو حاط ايدينه على خده ومتلثم وعيونه ذبلانه وبصوت مرتجف: يارب تقومها لي بالسلامه يارب ما افقدها
طالعته غموض وهي مبتسمه وجلست بجنبه وهي تمسك ايده: ماعليها ياسعود بتقوم بالسلامه
سعد وهو يمازحها: اشتقتي اشوف تراني سعد مو سعود
غموض بنبره هاديه: عارف اني جالس ادلعك بس هين هذا وجهي ان دلعتك
وقفو من طلعت الدكتوره وبصوت هادي: معليش ي اخ سعد خسرنا الجنين
طارت عيونه بصدمه مع فرحه وشعور متلخبط : طيب هدى كيفها
الدكتوره: الحمدالله طيبه وصحتها زي الفل بس بعد ماتصحى حاولو تهدونها لانها عرفت وهي بالعمليه يلا ماتشوف شر والله يعوضكم
سعد اللي من رحت سجد سجود شكر
التفت لغموض الهاديه قرب منها وهو يحضنها من غير لايتدارك نفسه نزلت دموعه على كتفها همست وهي تربت على ظهره : اهدا ياعمي الحمدالله انها بخير والله بيعوضكم
همس : مانتي عارفه ياغموض فرحتي ولا انتي عارفه وش صاير بس الحمدالله يارب ابعد عنها وهو يمسح دموعه بشماغه طلع جواله وهو يجلس : دقي على سعود بالله
غموض اغتاضت ملامحها ؛ بس انا
قاطعها: غموض دقي بسرعه
اخذت جواله وهي تتصل عليه
ثواني ورد مدت الجوال لعمها
سعد بصوت مرتجف: سعود
سعود بخوف: لبيه وش فيه صوتك صاير لكم شي
سعد : هدى حملت واجهضت
سعود بنبره فرحانه: الحمدالله يارب وشلونها الحين
سعد: الحمدالله طيبه
سعود: الف الحمدالله على سلامتها وب ابتسامه: قر قلبك وعقبال ماتقر عينك وهو بين ايدينك شد حيلك لاتبتسي
سعد وهو يمسح دموعه وبفرحه: الدنيا مو سايعتنيي من الفرحه الحمدالله عقب هالصبر اسعدني ربي بهالخبر
سعود بمزحه : اذ هي بنت تراها محجوزتن لي
سعد وعيونه اتجهت لها وهي واقفه بتملل: لا والله ماتجي على بنت عبدالعزيز قل يمكن زوجه لولك مستقبلا
سعود: محلها بالقلب بنت عبدالعزيزية لاقبلها ولابعدها احد
سعد: هالله هالله كل هذا لها وش بقى لنا
سعود: هههههههههه يلا عقبال ما اتمم له من الحين اقولك تماميمه علي وهذاني علمتك
ابتسم سعد: وعقبال مانفرح لك بزواجك وعيالك
سعود : امين يالله انا بسكر واذ بترجع تداوم علمني
سعد: صح كنت بكلمك اصلا بهالموضوع
سعود: ماعليك مدبر اموري انا عندي كم شغله ماخلصتها ويمكن اطول تعرف حلال خالي فهد يبي له وقفه ومحلاته وجالس اراجع يمكن ارسل واحد من خوالي يجيبهم لي
سعد: وليش هالكلافه انا وراجع للدمام اخذهم معي عادي
سعود: والله مدري احتمال اخليه يروح لهم بالمزرعه ماودي يطلعون منها احسن واشرح لهم
سعد: بهذي صدقتك بس بنفس الوقت الوضع مايطمن حولك مزارع ومزرعتك ملفته اخاف حراميه ولا شي يطيحون عليها صعبه
سعود: اجل لاجيت جيبهم لي معك وانا بحجز لهم شقه
سعد:طيب
سعود: يلا مع السلامه
سكر وهو مبتسم وقف لغموض:مليتي
غموض:لا عادي
سعد :لاطلعوها للجناح نرجع لها الحين بنرجع المزرعه نريح
غموض:طيب
مشو وهم مع بعض ركبو السياره وهو حاس بشعور غريب وده يروح لمكان ويفرغ كل اللي بداخله فيه يبي يصرخ يبي يبتسي شعوره عظييم بعد صبر خمس سنوات هدى تحمل
حرك السياره والرجفه مسيطره على جسمه وصل المزرعه ونزلو همس لغموض: اللي صار يبقى بينا لاسألو عنها قولي انها تعبانه بس
غموض: من غير ماتقول .. سلام
سعد: بالله جيبي لي معتس ماء بارد
غموض: مويه بارده بهالجو
سعد : ياليل انتي وش عليتس
غموض عضت شفتها بغضب: وانا وشدخلني فيك براحتك والله ومشت وهي معصبه
دخل وهو مو طايق نفسه دخل الغرفه وجلس وهو محتار يعلم امه ولا وش ردة فعلهم لو درو طلع جواله الكشاف حق الدوام وبدا يكتب رقم امه دق على دخلت غموض اللي مازالت بعباتها ونقابها حطت المويه وجت بتروح بس مسك ايدينها ثواني وهو يرد بصوت هادي: يمه .. اخبارتس وشلونتس وشلون اخواني وابوي
ام عبدالعزيز بفرحه: ياهلا بهالصوت وينك يايمه الحمدالله كلنا بخير وطالعين للمخيم ناقصنا وجودك
جلست غموض وهي تسمع صوتها
رد بصوت مرتجف: يمه هدى حملت واجهضت
ام عبدالعزيز : هو انت صادز
سعد: والله يايمه اني ماتسذبت بحرف
ام عبدالعزيز بتست بفرحه: الله يفرحك ياوليدي بالذريه الصالحه الله يتم عليها الصحه والعافيه ويرزقكم بالذريه
سعد وهو يحاول يمسك نفسه: امين يارب وبلغي هالكلام لابوي واخواني
اخذت منها الجوال وهي تتكلم بنبره مرحه: مبروك ياعمو وعقبال ما اكفخه واطلع حرتي فيه وعمايل ابوه
ضحك سعد: سليطينه اشتقت لتس سلمي على البنات كلهم
سلطانه والضحكه شاقه حلقها : ابشر يوصل وسلم على هداوي وقلها يويل ذا البزر
سعد : اقول عاد تثبري اتحداتس تلمسينه بس
سلطانه : ايه يالدنيا سعد يدافع عن ولده قبل لايجي
سعد وهو حاس بفرحه: اقول سكري بس وسلمي لي على اللي عندك كلهم
سلطانه : ليش اسكر
سعد: صوتس يغث سكر الجوال وهو يضحك التفت لغموض: الحين تعصب وتحرق جوالي حراق وتشتكي لابوها مني وتشيش البنات علي
غموض بوجه خالي من التعبير: وش تبي فيني
سعد ب استغراب: بس حبيت تسمعين صوت جدتس
غموض وقفت وببرود: سعد حط بيني وبينك حد مو يعني تعاطفت معك ورحت مع زوجتك يعني خلاص طاح اللي بينا انتم اصلا منو انا ما اعرفكم ولا اتشرف بيوم اعرفكم بس يرجع خالي ماعاد تشوف وجهي
سعد وهو يوقف ويطالع له: انتي مو صاحيه مريضه هالتفكير مخليتس توقفين قبال عمتس وانتي متغطيه وكأني مو بمحرم لتس
غموض وهي تكتف : محرم مو محرم انا ماهمني من هالحكي شي كلمه ور غطاها ماني بنتكم
سعد بغضب وهو يلوي ايديها: بنتنا وغصبن عن خشمتس لاتخليني اغدر بسعود واحذفتس على ابوتس
غموض بصوت عالي وهي تدفه: تخسي انت وسعود لاتحسب نفسك رجال علي هالابو انا ما اعرفه ولا قد بحياتي شفته من طلعت على الدنيا وانا اشوف فهد ابوي ابوي اللي كان ينتظرني كل يوم عند باب المدرسه ابوي اللي يحضر اجتماعات اولياء الامور ابوي اللي اول مانطقت نطقت ب اسمه ابوي اللي يفرح فيني يفرح بكل شي اسويه ابوي اللي شجعني وطلعني الاولى على صفوف الجامعه اللي عطاني كل شي بهالحياه شركاته اللي وسعها وكبرها حطها ب اسمي تبيني اكمل بعد واقولك كيف كانت حالتنا وانا صغيره عن اي ابو تتكلم ابوي اللي عايش مع عياله واهله وناسي ان له بنت ولا ابوي اللي كان يشتغل دبل شغله علشان يوفر لي كل شي لا احتجته ابوي اللي كان مايرضى دمعتي تنزل هذا ابوي مو اخوك اللي للحين ماحاول حتى يدق ويسأل عني وانا اصلا مو محتاجته بحياتي
فهمت حتى انت وجودك هنا فرض علي ماهو بكيفي طالعته بقوه وطلعت وهي مقهوره نزلت دموعها وهي تمشي دخلت غرفتها وهي تسكر الباب وتقفله بقوه نزعت عباتها ونقابها
وانهارت وهي تبكي بعد مده وقفت وهي تدخل وتاخذ لها شور بارد بعز البرد ارتجف جسمها من دخلت تحت المرش بثيابها طلعت بعد ماحست انها ارتاحت بدلت ملابسها وهي تلبس جنز اسود ثقيل وبلوفر عنابي ثقيل وجاكيت جلد اسود مربوط على الخصر بدت تنشف شعرها بالاستشوار وبعدها سوته ويفي خفيف طالعت وجهها احمرار جفونها وخدودها اخذت الكونسيلر وهي تغطي ملامحها فيه اخذت الكحل البيج وبدت تكحل عيونها طالعت لنفسها ونفخت شفايفها بطفش اخذت روج مات مايل للوردي الباهت وحطته اخذت عطرها وهي تتعطر وبعدها جلست على الاريكه بملل رجعت راسها لورا ماودها تطلع لهم تذكرت مكالمتها مع سعود كانت داقه تسأل بس اخذها لشي ثاني
ابتسمت ماتدري وش حل هالانسان
تحبه وتكرهه تحس بوجوده وماتبي تحس
تبي الامان اللي معه بس ماتبيه وبسؤال : انا انانيه وبتنهيده: مدري من الاناني اللي من جاء اخذ كل شي جيت وراحت الفرحه من حياتي والاستقرار بس وجودك يحسسني اني با امان ابي اكمل حياتي معك بس مابي اكملها معك مابي اكون زوجة شخص ماعنده شهاده حده يرعى غنم وفوق ذا مايعرف يكتب ابتسمت بسخريه: شوف الحظ بس
راح كل اللي كنت احلم فيه اكون زوجة شخص له قيمه بحياته منجز اعماله تتكلم عنه اقل شي يكون خريج جامعه وبنهايه ترميني الاقدار لشخص غريب بكل شي كلامه نطقه حركاته هدوءه بروده ابتسمت ماتدري كيف تحدد شعورها ناحيته
تنهدت وهي توقف وتطلع للصاله وجلست بصمت من غير لاتطالع دنيا اللي جالسه
سألتها : كيف هدى
غموض ماردت وهي مدنقه تلعب ب اسوارتها
دنيا طالعتها وهي توقف وتدخل : اوف انسانه غثيثه تخرب جو الواحد
ساره وهي تتكلم بغضب: عيب عليك تسفهين البنت وش سويت لك فوق مانتي غلطانه تسفهينها
غموض طالعتها ببرود ورجعت تلعب ب اسوارتها
ساره من غير لاتتملك نفسها ضربتها من عند كتفها بقوه: انا يوم اكلمك تردين علي ماني فهد انا فاهمه يمشي ويسامحك
غموض طالعتها بصدمه حاولت تخفيها ببرودها: ليت فهد موجود ولا وثق فيك وباللي معك ماكان هذا حالي ... ابعدت ايد امها وهي ترجع لغرفتها
ساره وهي تزفر بتعب: حسبي الله ونعم الوكيل
___________
سعد اللي اخذ ملابس لهدى وطلع ماهو قادر يجلس بعده كلامه نفسه يتعاطف معها بس مو قادر قوتها حكيها ولا كانها بنت عمره ماتجاوز20 ليش كل هالحقد علينا وبالاخص علي انا مو عارفه من وش مخلوقه هالانسانه توها تبتسم وتتكلم عادي فجاءه تحولت شخص ثاني ما اقول الا الله يعين قلبك ياسعود لا انت مرتاح صغير ولا كبير
____________
بالمخيم
بالمطبخ البنات يساعدون امهاتهم بالغدا بعد ماذبح جدهم ذبيحه للرجال اللي عنده
ساره اللي جالسه تقطع سلطه : الله يهديه جدي مدري متى يترك هالعاده وربي تعبنا طالعين نستانس طيب شفيها لو حطها بمطعم ولا حالتنا هذي
نوره : اقول قطعي وانتي ساكته وش عرفتس بعادات الشيبان
سلطانه: يابنات ياعمات ابشركم هدى حملت واجهضت يعني سليمه مافيها شي
نوره: الله يفرح قلبتس بهالخبر
سلطانه: امين بس ترا علشان هالخبر انا بطلع لاتحاولون تكرفوني
امها: اقول ي ام لسانين تعالي بس وين رايحه قطعي معي اللحم
سلطانه: يمهه
امها وهي تمد السكين: اخلصي اقول
ضحكت ساره: ايه احسن
ريم وهي توقف: اوف عمه تعبت من التقطيع
دخلت نوف وهي تعفس ملامحها: اوف الله يعينكم من جد
سلطانه بقهر: اقول ضفي وجهتس بس لا اقطعتس بدل هاللحم
ضحكت نوف: هههههههههههههههه اتحداتس
عفيه على بنياتي السنعات
ام سلطانه:نوفوه شرايتس تطلعين
نوف ب ابتسامه: اصلا انا طالعه
طلعت وهي مبتسمه وتوجهت للخيمه دخلت وب ابتسامه: صباح الخير
ردت امها : وهلا صباح النور صح النوم
نوف وهي مبتسمه : صح بدنتس يالغاليه
ام حميد: نوف علامتس توتس تصحين
نوف: ابد ياخاله تعبانه شوي
ام حميد: ماتشوفين شر يابنيتي
ابتسمت نوف لها شويات ودخلت ريانه وهي تمشي على هدوء وبهمس : صباح الخير
ردوا عليها واتجهت لجدتها وجلست بجنبها
جدتها : ياهلا بريانه ياهلا
ريانه بهدوء: هلابتس يالغاليه
مسكت ايدها المجبسه وهي تتلمسها بخفيف وغمضت عيونها من تذكرت كلام مشعل امس
وقفت : جده انا بروح لليث يبيني
جدتها: طيب لاتطولين
هزت راسها وهي تطلع متجاهله نوف تماما
دقت على ليث ومارد اتجهت لخيمة الرجال وهي تمشي ببطئ شافت عمها خالد وبهمس : ياربي كيف اناديه وبصوت هادي: عمي
التفت خالد لها : سمي
ريانه : ابي سيارتك شوي
خالد بعدم استيعاب: هاه وش
ريانه: سيارتك
خالد: ابشري بس ليش
ريانه : حاسه بتعب بتمدد فيها براحتي شوي داخل زحمه وايدي توجعني
خالد: طييب ارجعي لقسم الحريم وانا اقرب السياره لك واحطها عند المدخل هزت راسها وهي ترجع دقايق ووقفها قدامها وعطها المفتاح
ريانه: مشكور عمي
خالد ب ابتسامه: العفو ولعلمك ترا خطيبتس جاي لنا اليوم وجدتس مسوي الغدا علشانه
ريانه سكتت ودنقت راسها
خالد : هههههههه يازين اللي يستحون
الله يوفقتس يابنيتي ويتمم لكم على خير
ريانه ماردت وهي تلعب بخاتمها اتجهت للسياره بعد ماراح وركبتها وارخت الكرسي وهي تنسد راسها عليه زفرت بحراره والدمع يحرق جفونها رفعت ايدينها وهي تتلمس رقبتها سلسالها فاقدته تذكرت امس بكل تفاصيله طلعت الفجر من الخيمه بعد ماحست الكل نام بدت تتمشى حوالين حدود المخيم بطفش وهي لابسه فروة جدتها ومتلثمه خوف ان احد يطلع بوجهها من العيال جلست على الكرسي المركون بجانب المدخل نزلت لثمتها وهي تتلمس وجهها نزلت دموعها وبدت تبتسي من تذكرت امها
واهمالها سعود وشوقها له وعدها مايقطع بس للحين مادق عليها وسأل ابوها وعلاقته مع سعود واخوانها وزعلهم منه وبالاخير مشعل اللي قلب عواصيفها ووقف معهم ضدها مسحت دموعها وهي تعبس بملامحها : اهدي ريانه اهدي
حست بكف احد عليها فزت وهي تحط لثمتها ولا بمشعل قبالها صدت بسرعه وهي تبعد
عنه همس وسمعته : الله يوفقتس بحياتس مع نايف ويسعدكم تاكدي يابنت العم اني اعدتس مثل اختي انا اسف اذ اذيتس وانا ما احس
تكلمت بصوت عادي وهي تحاول تكتم بكيتها : انت شلون تتجراء تمسكني
صدز ناس قليلة حيا
لفت وهي تمشي بقهر ودموعها تنزل
طالعها وهي تمشي وضامه ايدها المكسوره لصدرها همس : عسى هالكسر فيني ولا فيتس
اقفت واخذت كل شي حلو معها حتى هالقلب مايبيني يبيها زفر وهو يمسح عيونه بعد ماغشاها الدمع شد جاكيته وهو يرجع لقسم الرجال وعيونه محمره
غمضت عيونها بعد ماحست دموعها نزلت:
يارب شيله من قلبي وارزقني حب نايف يارب
.
.
ابها :
ماد رجوله بطفش ومتمسك بالعكاز: ياخوي طفشت متى تطلعوني
يوسف: وش يطفشك كل شي جبناه لك حتى الممرضين يسون لك جلساتك هنا
ماجد: احس نفس الكتمه بصدري ياخي كافي جالس بمركز امن
يوسف ب ابتسامه: احمد ربك مضيفينك عندنا ماكمل كلامه ولا بصوت انفجار ودخان قوي اغمى على ماجد من الدخان ويوسف ماعاد يشوف شي
تقدم وهو يسحب ماجد من رجوله ويطلعه على طول من باب الطوارئ قرب له السياره وهم يدخلونه بسرعه
ويحركون وبتنهيده: اوف دقايق تخطف الانفس
رد خويه: والله انك كفو اهم شي محسن يستانس
بالمركز بعد دقايق صحوا صرخ يوسف: ماجد
اخطفوه
دخلو فرق الدعم وهم يتفحصون المكان ومعهم يوسف : غريبه مافي اي اثر والغريب صوت الانفجارات ولا فيكم اي شي كيف هالشي
جاهم واحد من العسكر: سيدي الماده اللي بالمتفجرات مخدره ومسيله للدموع
يوسف: ماتوقعتهم يتجرؤن على المركز
الضابط: اكيد بيتجرؤن دامهم عارفيين من داخل ومن برا ومليون بالميه فيه احد ينقل لهم تحركاتكم ولا وش الحكمه انهم هجموا فهالوقت اللي اغلب العكسر مناوبين برا المركز واللي داخل مشغولين هذولا دارسين الوضع دراسه تحرص يايوسف مره الثانيه وانتبه
يوسف هز راسه وهو وده يصرخ :الحين لاعرف صقر وش ممكن يسوي ويتخذ اجراء بحقي
.
.
الى هنا
وشكرا لك من سأل وايام مبروكه عليكم ❤
لقائنا بعد العيد ان شاءالله
|
14-07-19, 06:26 AM
جديد مواضيع قسم المنتدى العام للقصص والروايات
العرض العادي
