تنبيه بخصوص موعد البارت وطقوس بروق

اولا موعد نزول البارت راح احدد له ساعه معينه حتى تكونون عارفين من البدايه متى راح ينزل

البارت راح ينزل ان شاء الله كل يوم اثنين الساعه عشر ونصف بتوقيت الرياض

نجي لطقوس بروق

كثير من البنات علقو على طقوس بروق في ناس اعجبتهم وناس ماحبوها وناس اعتبروها ضعف

وانا اقول القوه الحقيقيه هي قوة الراي والموقف والفكر والمنطق الصراخ والنباح والشتم ماهي قوه هذي انفلات اعصاب وفقدان لسيطره على التصرفات
ماهو ضعف ابدا ان الانسان ينفس عن غضبه بطريقه سلميه تعيدله توازنه النفسي من غير مايئذي احد ماهو بظروره تثور وتصارخ وتضرب وتكسر بزعم انها قويه
كل انسان له طريقته في استعادة توازنه النفسي وماهو بالضروره الي يريح افلان يريح فلنتان
كل شخص له مزاجه ونزعته الخاصه فيه
وعلى فكره بروق شخصيه مرحه واجتماعيه ولطيفه حيل وراح يبين هذا الشي في البارتات القادمه
فلا احد يفكر عشان قويه في قرارتها وشخصيتها بتكون نفسيه ومتعجرفه

وفي النهايه ان اكون قويا يعني ان اتخذ القرار الصحيح واثبت عليه واجاهد من اجل تحقيق اهدافي

ومساكم سعاده

مساء الخير 💖😻

بروق والله عرفت ليوسف أجل يحسب أنها تبي تسكت عن بلاويه لا والله وخاصه من أكتشفت انه مخرب سمعتها عند أهله إلا راح تخطط عليه وتعلمه الحق صح وع يدها هدايته إن شاء الله*وعلى قولها تعلمه أصول اللعب صح واتوقع شهر وراح تتركه م اتوقع انه راح يسمع كلامها أو يصدقه بعد يمكن يحسب انها مجرد كلام وياليت يتعدل حاله مو يجاهر بالمعصية وأهله م قدروا عليه من كلامهم لا والله أنكم م عرفتوا له ولا حاولوا معه مجرد محاولات بسيطة والا هذه حال يصل له ولدكم أعوذ بالله اللهم الثبات والهداية يعني م خاف هو ع خواته ولا أهله خافوا من ترجع لهم في بناتهم والله شي كبير سواته وفوقها بنت عمه م سلمت منه لا حول ولا قوة الا بالله

بروق حبيت فيك طريقه تفرغين غضبك بعيد عن أي أحد

وسن واضح أن يوسف اغتصبها والأهل عرفوا وتزوجها مده وطلقها والدليل الجناح الجاهز وانا والله رحمت أخو وسن فراس والله إنها اوجع قلبي ع م سواء يوسف فيها إلا أنه تحبه كسرت اخوها فوق كسره .. انا م الومها وسن ع حبها له مثل م يقولون المحبه من الله وهو توفر فيه أشياء تنحب أولها شكله*وهي ع فعلته فيها إلا أنه تحبه ليت يصحى قلبك يا وسن لأن كذا تعذبين نفسك بنفسك ولا اتوقع انه بروق راح تمر عليها السالفة أبد أولها الجناح وآخرها اتوقع العزيمة لها دور مع وسن راح تكشف الموضوع ببساطه

سياف م زال غامض ومدري احسسسساسي يقول انه شخصيته حلوة متحمسه له بشوف وش سبب كره بروق له وكان من الصغر ع ما فهمت انه هو سبب رئيسي في طقوسها منها اختيار لون الكوب والملابس والشكولاته بعد تدرين نبض حمستيني اجرب شعورها بس بدون شيله قسم شكولاته وكوب كوفي يا سلااام .. ايش قال جاسر لسياف يعني قال هي م تبيك وكذا صار نار وشرار .. وكيف جت بروق للبر كيف ضاعت يعني له دور سياف في اللي حصل أو لا*نفسي اعرف وش جابها للبر مستحيل مع أهلها جت والا كان م ضاعت .. أما كيف بروق نجت من يوسف في البر اتوقع انه دافعت عن نفسها واتوقع بعد جت سيارة وانقذتها من بين يديه بس كيف وصلت لأهلها بأمان هو وصلها وكيف صار يوسف البطل المنقذ عند أبوها وليش هي وافقت يعني اتوقع أنها بيدها ترفض ولو أنه بنظر أبوها أنها يوسف له الجميل والفضل بعد الله في إنقاذ بنته .. واتوقع يوسف أخذ الموضوع عناد شاف كيف بنت ترفضه ويمكن شاف شكلها لأن من شافها في يوم زواجها م انصدم من جمالها أبد كأنه حافظ شكلها .. فيه أسئلة احتاج اجابتها عشان استوعب كيف صارت وانتظر الأحدث تبينها

سحر مثل م قال هزاع جعل زوجها في السند والهند أكره م علي احذف نفسي ع أحد واتوقع انها عارفه انه م يفكر فيها خزام وآخر حركه له معهم دليل مو مرحب فيه لكن عسى تفهم وتستوعب

عذبه أخت خزام هذا اللي فهمته أو يمكن عمته اللهم أنها قريبه لخزام ومن محارمه
*وفهمت ان عروب أخت هزاع وسحر بنت عمهم لكن خزام وش يقرب لهم يعني خالهم والا اسكت احسن لي ههههه .. واللي اشوف أن حزام لحد الآن يتبع سراب لكن الأكيد انه الصور هي اللي راح تدله عليهم وافهم منك نبض أن خزام له قرابة في بروق بس كيف وهو م عرف الصور اللي بيده انا اتوقع يقرب لهم من بعيد .. وبعدين مين اللي واقفه عند باب غرفته وش شافت عشان تعطيه هالنظره مثلا شافت شعر بروق معه والا ايش .. وسالفه جده متحمسه اعرف وش بينهم* وش سبب الكره واتوقع جده أبو أبوه مو أمه

.
.

يعطيك العافية نبض*وانتظر بارت الليله وأقول عسى برمجه مخك تغير في طول البارت يا كريم 😆😆😘 واعتذر ع التأخير في الرد من كثر المشاغل أنسى والله والبارح تذكرت اني م علقت ع البارت قلت لازم اكتب قبل البارت 🙊💗

البارت الخامس


استدار بيطلع واصتدم بالي مكتفه
ايدينها على صدرها تشمله بنظرة استنكار واضحه !!
ابتسم بمرح ومغزى وقفتها وصله بكل وضوح وبمحاولت تملص تقدم لها وباس خشمها : الله اكبر
من قدي اليوم عذبه على سن ورمح تنتظرني على باب غرفتي
رغم محاولتها الحثيثه في التمسك بملامح التجهم
الا ان عذوبتها تغلبها دائما وفي لحظه تحلحلت تقطيبة الغظب واشرق وجهها بابتسامه وبحنيه كانت تنوي ان تخرجها غضبً اسود : انت وش عندك مع هالغرفه
ابتسم خزام بانتصار واهويشوف كيف اختفى الغضب والحده من ملامحها في ثواني : ياميمتي
ياعذبتي ياحياتي هذي اسمها غرفتي وانتهى نقطه
يعني وش بيكون بيني وبين الغرفه لاسمح الله تتوقعين عندها سر بتقوله لي
عذبه تتغاضى عن سماجته وتسحبه بيده لباب الغرفه : لا وانت الصادق السر بتقوله لي انا افتح الباب اشوف
خزام توهق : يمه الله يهداك وش سره بعد ترا عادي
لاقفلت غرفتي وين المشكله
عذبه بجديه : المشكله انك ماتهتم بالغرفه والاعمرك قفلتها حتى في العزايم والبيت مليان خلق تطلع منها وتترك الباب مفجوج على وسعه
خزام بتبرير : اها هذا انتي قلتيها مااهتم والحين انا قررت اكون مهتم واحافظ على غرفتي واوراق شغلي
عذبه واهي تتكي على الجدار جنب الباب مباشره
: ام خزام بتتركني واقفه على الباب كذا
خزام استسلم لرغبتها : لا عاد كله والا ام خزام عيوني انا ام خزام
هه وهذا الباب فتحناه تفضلي طال عمرك
قاله واهو يفتح الباب وياشر لها بدخول مع انحنائة
مسرحيه ترك الباب مفتوح ودخل متجاوز امه واهو يشوفها متجهه لسرير اتجه لدرج اسراره وجلس عليه واشر لامه تجلس على السرير قريب منه واهو يتصنع البراءه : حياالله ام خزام قهوه شاهي طال عمرك
ارفعت نظرها له واهي تجلس على سريره مهما مارس المرح امامها يمكنها اقتناص الألم المتواري
في عيونه : خزام اترك عنك التهريج وش صاير بينك
وبين جدك من يوم جيت من عنده وانت بشر
اختفت ابتسامته واهو يكشر بقهر من جده وتفكيره المتحجر : يمه انتي تعرفين جدي وسوالفه السم مافيه شي جديد علشان اعلمك ابه
عذبه تربت بيدها على ركبته القريبه منها : دام ماعنده جديد وش الجديد عندك انت ليه متغير صارلك اسبوع تدوج وماني بخابرتك راعي دوجه
والغرفه ماعاد تطلع منها غير مقفلها ووجهك ملفع
ودايم وانت تهوجس وش صاير لذا كله
خزام قام يتصدد عنها اشوي يفكر وشلون يطمنها من غير ماتعرف شي عن سالفته ثم رفع راسه لها وماقدر يخفي نبرة الحزن في صوته : يمه هو فيه موضوع شاغلني شوي يخص الشغل عادي يعني ضغوط عمل كم يوم وتنتهي
عذبه مالت بظهرها على ورى واهي تتكي على ايدينها الثنتين الي مثبتتها على فرش السرير
وتميل براسها مركزه نظرها على خزام وبرفعة حاجب : خزيم من الاخير منهي ذي الي مطيره عقلك من محله حاولت انشب السالفه في جدك الضعيف بس ماش مازبطت يامك
خزام ضحك من قلب :ههههههههههههههه ودامك عارفه ان جدي الضعيف ماله بالسالفه وراك تلحقينه يام خزام
عذبه تسحب ايدينها من السرير وتقدم تقرب راسها من خزام وبمكر : قلت اقدملك حجتك الوالمه بنفسي ولانفيتها نقدر نتفاهم على موضوعك من غير لف والادوران
خزام توهق : اها واذا قلت ومن غير لف والادوران حاب احتفظ بالموضوع لنفسي
عذبه : طيب دام حاب تحتفظ بالموضوع لنفسك بكيفك بس ...هي من بنات اخواني
خزام خاف تورطه مع خواله وتخطبله احد من راسها رد بسرعه : لا
عذبه : من بنات عمانك
خزام : لا
عذبه : انا اعرفها
خزام : لا
عذبه : كيف عرفتها
خزام : صدفه
عذبه : الي تقابلك من ورى اهلها مره تقابل غيرك من وراك مرات خلك فطين
خزام بأنفعال لانه حس في كلامها اهانه لبروق : ماقابلتها
عذبه : وشلون شفتها صدفه والاقابلتها افهمها بس
خزام : يعني هي ماتدري عني
عذبه : وين شفتها
خزام نسى نفسه وباستنكار : ماشفتها
عذبه بصبر : اجل كيف حبيتها
خزام باندفاع : يو.....اااا !! قطع كلامه فجأه واهوينتبه لاستدراج امه له في الكلام
: يمه خلاص تكفين كفايه كلام في هالموضوع
عذبه قامت واقفه : على راحتك يالله تأخرت على شغلك
خزام حب يستفيد من امه دامها اعرفت السالفه
فز واقف وسحب يد امه يبوسها : تكفين يام خزام
ادعيلي ان الله يجمعني فيها ويجعلها من نصيبي
عذبه ارفعت كفوفها بتدعي ثم نزلتها فجأه : كيف ادعي وانا ماعرف اسمها
خزام بسرعه : بروق بروق اسمها بروق
عذبه : السالفه ماتبي دعاوي تبي من يشغل سيارته ويحط اميمته على يمناه ويروح يخطب
خزام اكتسىح وجهه غمامة هم واضحه زفر بهم
: وانا وين القاها علشان اروح اخطبها
عذبه باستغراب :لاانت وراك سالفه يبيلها جلسه
هنا ارتفع رنين جوال خزام فتح الخط ورد بسرعه يهرب من ذكرايات الغار الي داهمته بلارحمه : هلا
: ابشر دقايق بس
: غصب عني الوالده كانت تبيني في موضوع واهو الي اخرني
:طيب طيب جاي
عذبه شافته سكر الجوال : القناه
خزام : ايه
عذبه تحركت طالعه من الغرفه وخزام يمشي معها
: مادريت ان عندك دوام في القناه اليوم احسبنك
بتروح للمتجر
خزام استدار للباب يقفله بعد ماطلعو : حصل خير يمه اصلا انا ماتأخرت عن وقت دوامي المعد هو الي جاي بدري حنا متواعدين بدري عندنا شغل متأخر
عذبه : الله يوفقك ويستر عليك
انحنى عليها خزام باس جبينها : امين والله يخليك لي والا يحرمني منك
راح خزام لدوامه وعذبه صعدت لدور الثاني انهت صعود الدرج والتفتت بلكامل لجهة الجناح المغلق
لحين حضور صاحبته اخذت نفس عميق واهي تتسائل داخلها ياترى من انتي يابروق وكيف قدرتي تأسرين قلب خزام كذا متى شافك ووين تنهدة بقل حيله وبدت تردد في قلبها باخلاص : ياالله كان هالبروق بنتن صالحه وتستاهل خزام يالله انك تجمعه ابها وتجعلها من نصيبه يالله انك تفرح قلبه
يكفيه ماجاه من شقى في حياته
دارت ملقيه جناح خزام المتروك لعروسته ظهرها
رايحه للجناح المقابل ادخلت متجاوزه صالة الجلوس الصغيره متجهه لغرفة النوم افتحت الباب
ووقفت عليه واهي تناظر عروب الي متلملمه في البطانيه في وسط السرير الواسع : عروب قومي عروب
عروب ماتحركت من مكانها ادخلت عذبه للغرفه فتحت الستاير والشبابيك وارجعت لعروب اسحبت
البطانيه عنها :عروب قومي خلصيني عرابه
انفخت عروب بضيق واهي تحس ببروده خفيفه بدت تسلل لجسمها : اف عذبه ترا اليوم سبت سبت ياناس ياعالم سبت والله انه سبت
عذبه ابتسمت على حلطمتها : واذا سبت تخمدين النهار كله
عروب فزت جالسه : يرحم والدينك اي نهار الي تكلمين عنه عين الشمس توها مافتحت توها نعسانه تبي تهجد وانتي مناشبتني
عذبه عصبت : لا والله عين الشمس ادخلت عليك هنا وانتي تقولين مافتحت ترا الساعه تسع الحين
يام شمس انتي
عروب طار عنها النوم انزلت من سريرها واهي مقهوره من عذبه تموت في تنكيد النوم اعوذ بالله
راحت للحمام تغسل وقبل لاتسكر الباب تذكرت شي وطلت براسها مع الباب تصرخ على عذبه الي كانت متجهه لباب الغرفه بتطلع : اذا ولدك المخيس هنا ماني بنازله
التفتت عليها عذبه واهي مستغربه متى تهاوشو
: اولدي راح لدوامه ودامه مخيس خليك عند كلمتك ولاتجين بعد اشوي تناشبيني عليه
عروب كشرت بقرف وبدت تحرك يدها بمسخره
: تكفين عاد من زينه اناشبك عليه هالاشهب الاغبر
اطلعت عذبه من جناح عروب واهي عارفه انها ماتستغني عنه ابد بس وش هالهوشه الي بينهم علشان تشن حربها عليه من صباح الله خير


________


قامت من النوم على الساعه سبع وترددت كثير واهي تفكر هل تنزل تفطر تحت والاتفطر في جناحها ماتعرف شي عن نضام اهل البيت ماتدري متى يقومون متى يفطرون ...........اخيرا قررت تفطر
في جناحها خاصه ان طاقم الخدمه جهزو مطبخها
بكل شي تحتاجه وفي وقت قياسي كونهم يعملون كفريق متكامل ادخلت المطبخ وبدت تسوي فطورها ثلاث قطع بان كيك مع المربى وقطع الفواكه المجففه وكوب حليب مع ملعقة عسل
جهزة فطورها على الطاوله الصغيره الموجوده في
المطبخ وبدت تاكل .........خلصت اكل ونظفت
مكانها واطلعت لغرفة الجلوس واتصلت بامها
وبعدها كلمت ابوها خلصت مكالمات وبدت تتصفح مواقع التواصل الاجتماعي كانت تتمنى لو ملابسها موجوده كان تتحمم وتبدل .....الحين ماقدامها الاانها تلبس نفس الفستان الي كان عليها
البارح فجأه اسمعت طق خفيف على باب الجناح
راحت تفتح وكانت امنه : اسفه اذا صحيتك من النوم
بروق بابتسامه : لاعادي صاحيه من زمان
اشرت امنه بيدها جنب الباب من برا : يوسف جاب شنط وصناديق وطلب منا نرتبها في جناحك
طلت بروق براسها برا الجناح وشافت اغراضها كلها موجوده : يوسف متى جاء
امنه : الساعه ثمانيه
بروق ارفعت ساعتها قدام وجهها : غريبه اجل الساعه الحين كم
شافت الساعه وكانت تشير لثمان ونص : اف مر الوقت بسرعه ويوسف وينه
امنه : راح ينام في جناحه
ابتعدت بروق عن الباب وافتحته بالكامل : اوكي دخلو الاغراض
العاملات دخلن الشناط كلها لغرفة النوم وبدن يرتبن الملابس مع بروق داخل الدولاب وخلال نصف ساعه خلصن من كل شي اشكرتهن بروق
واطلعن من عندها ماعدا امنه تأخرة في الطلعه
بروق استغربت تصرفها : خير امنه باقي شي
امنه ابتسمت بحماس وتدفقت تحكي : اقولك قصة
الجناح الي انتي فيه الحين هذ......
قاطعتها بروق : مايهمنى اعرف اي قصص واتمنى ماتنسين انك مؤتمنه على اسرار هالبيت ومايجوز تخبرين احد عنها
امنه انبهتت ماتوقعت انها بتفشلها وبأرتباك : انا اسفه مدام بروق انا كنت بقولك بس لأنك من اهل البيت وزوجة يوسف
بروق تكره نوع الخدم الي نفس نشرةالاخبار مايشوفون وجه جديد الاويصبون فضايح البيت كلها في اذنه تكلمت بجديه وحزم : انتهى تفضلي شوفي شغلك
هزة راسها بموافقه واطلعت وبروق اقفلت الباب وراها وادخلت تاخذ شور وتغير ملابسها على الساعه
تسع ونص انزلت تحت ومالقت الا ابوجابر جالس
في الصاله يقراء جريده تقدمت له بروق وباست جبينه باحترام : صباح الخير جدي
ابوجابر : صباح النور هلا الله حيها
بروق اجلست مقابله له : الله يبقيك وين الناس
ابوجابر : عمك ونادر راحو يشوفون اشغالهم وام نادر توها ادخلت غرفتها والبنات وثائر ارقود
بروق : يوسف كان طول الليل برا صح
هز راسه بضيق : عوايده مايجي الا الصبح ..............خلي امنه تحطلك فطور
بروق : قيدني افطرت في جناحي ............جدي اقدر اطلع للحديقه متعوده اتريض الصبح بالمشي اوهروله
ابوجابر فصخ نظارة القراءه ونزلها على الطاوله الصغيره الي جنب الكنب وابعد الجريده منزلها جنبه وابتسم لبروق : دامك راعية رياضه يالله قومي حتى انا بمشي معك وزين ان ابو نادر مسون ممشى
في الحديقه صحيح انه ماهو طويل مره بس نقدر ناخذ اكثر من دوره
بروق استانست ان فيه مظمار مشي مخصص : هذا الكلام الصح كذا الواحد يتريض بنفس مفتوحه
بس من بكره حصة الرياضه تكون بعد صلاة الفجر مباشره انا هذا وقتي الي متعوده عليه
ابوجابر بضحكه : قدام وانا بعتبرك مدربتي
بروق بادلته الضحكه : جدي لاتتواضع واضح من صحتك ماشاء الله لاقوة الابالله انك شخص رياضي
ابوجابر بابتسامه : الحمد لله الصحه من ربي وانا متعود امشي يوميا بس مالي وقت محدد متى ماشتهيت المشي مشيت

_________________________________

سكر جواله واهو يزفر بضيق من البارح واهم مزعجينه بأسئلتهم عن سياف مابقى احد من العائله مادق عليه رمى الجوال على الكنب بعصبيه
: يقتلون القتيل ويمشون في جنازته
قام واقف متجه لغرفة نومه هو وسياف دخل الغرفه
ووقف جنب سرير سياف واهو يشوفه يشد البطانيه
عليه جلس ورى اظهره واهويبعد البطانيه عن وجهه :سياف ياسياف قم سياف
ههمهم سياف يهذي بكلام ماهو مفهوم صقر عقد
حواجبه بضيق واهو يتحسس جبينه فز من مكانه بفزع واهو يسند سياف مدخل يده من تحت ارقبته
يحاول يجلسه : سياف قم سياف
فتح سياف عيونه واهو يحس ان كل خليه في جسمه تحترق ....الرؤيه ضبابيه قدامه لاكنه يعرف ان هالي ناشب في راسه صقر حتى لو ماقدر يميز وجهه من قو الصداع والضباب الي يسكن عيونه
:قمت ياعله قمت ادخوتني بحسك وراسي موب ناقص
صقر اسحبه يوقفه برا السرير : اقول قم واقف امش تروش اذبحتك الحراره قم
سياف يسحب عمره من صقر ويجلس على السرير بتعب : ياخي وخر عن وجهي برقد
صقر نفخ : انت بتقوم تروش والااسحبك بقشتك للحمام
سياف يضغط على راسه بيدينه الثنتين بوجع :عطني بندول
صقر بقهر شده بعضده يوقفه : هلكت عمرك بالبندول من البارح تعلف مسكنات قم تروش خل النار الي تشتعل في جسمك تطفي
سياف وقف على حيله ونفض يد صقر عنه بغضب
: هذا الي هامك ان النار الي في جسمي تطفي ونار قلبي من يطفيها من ؟!
صقر بقهر مايقل عن قهر سياف : انت الي بتطفيها
بنت وراحت وغيرها الف تزوج وبتلقى الي تنسيك طوايفها
سياف يغمض عيونه بألم وبهمس :ياليتها بهالسهوله ياصقر ياليت
تحرك بتعب ورياح الذكرايات تعصف به اخذ منشفته وملابسه ودخل الحمام يتسبح فتح الماء البارد فقط رغم انهم في بدايت الشتاء والناس بدت تشغل سخاناة الماء لاكنه في هالحظه بذات محتاج لانهيار جليدي ينصب فوق راسه ويدفنه لعله يطفي شي من الحرايق الي تشتعل في صدره ..........
شعلة فقد وشعلة قهر وشعلة ذكرايات ......رفع راسه يستقبل تدفق المياه بوجهه ومشهد قديم يتسع امامه ....بنت في عمر السبع سنوات تركض مع العيال والبنات الي يلعبون سواء في حوش البيت الواسع البنت جميله وشعرها الطويل يتطاير وراها يلاعب الهواء في مشهد ساحر مرت من جنب الولد الي كان يتأملها بغيض وأول مامرت من جنبه مسكها بيدها يوقفها : كم مره اقولك لاتطلعين من البيت وشعرك مفتوح البنت تحاول تفك نفسها منه بغضب : مالك دخل انا احب شعري مفتوح وخر عني الولد سحبها جهة وحده من البنات الجالسات سحب ربطت البنت من شعرها وربط فيها شعر البنت الي يسحبها معه : ياويلك ان فكيتيه ....... البنت صاحبة الربطه تبكي : ابي ربطتي رجعها حقتي التفت عليها بغضب : اقول انقلعي من زينه شعرك
البنت الي انربط شعرها غصب ارجعت تركض ومسكها ولد ثاني سحب الربطه من شعرها واهو يناظر الولد الاول بتحدي وبظحكه مجلجله وصوت عالي : شعرك مفكوك احلا .......... زفر بحرقه وبدى يفرك راسه تحت الماء وذهنه ينقله لمشهد
ثاني نفس الولد في عمر اكبر
جالس على درجة المدخل الي يطل على الحوش سمع باب البيت ينفتح وانصدم بنفس البنت تدخل وشعرها مقصوص ركض لها واهو يتفجر غضب : من قص شعرك من وليه تقصينه خربتيه ياحيوانه
البنت خافت وصارت تتحسس شعرها بيدينها الثنتين : ليه موب حلو
وقبل لايرد جاها الجواب من الولد الي طلع من وراه
والي كان هو يسميه الاشهب: الله يجنن شعرك كذا احسن انك قصيتيه
البنت انبسطت من مديح الولد ذاك وتجاوزت الولد الاول بغرور : سمعت شعري حلو بس انت ماتعرف اصلا
.............ارتخى لمحبس الماء يزيد في تدفقه على راسه واكتشف انه مفتوح للاخر بقس الجدار بيده واهو يحس النار كل مالها تزيد اشتعال في صدره وذهنه مازال يصر على احراقه اكثر انقله لمشهد ثالث ورابع .....

صقر يكلم بجواله واهو يتحرك بعشوائيه في الصاله صرخ بغيض على الي يكلمه :انت وشلون تخلي جاسر يزوج البنت وانت خابر سياف يبيها
جاه الرد بصرخه مماثله : انا عنده يوم خطبها وانا اول من عطاه لاتكلم عن شي ماتعرفه ياصقر انت ماشفت الي شفناه والاحسيت بالي حسينا فيه
ولونه خاطبن معها ثلاث من بنات عمها جوزناه ولالنا منه
صقر رد بقهر اكبر : وانقذها خير ياطير نعطيها اياه
كذا بس علشانه انقذها كان كافئتوه باي شي والاان شالله تزوجونه اي بنت من بناتكم غيرها انت مستوعب انكم ذبحتو ولدك بهالزيجه
رد عليه ابو سياف بجمود : اها عاد مافيه احد يموت من جواز بنت خل الي عندك يصطلب ويغدي رجال وان كان في خاطره زواج البنات واجد

____________________

رمت الجوال من يدها على الطاوله قدامها واهي تنفخ بملل : اففف غزل ذي متى ناويه تصحى ........وانا ليش انتظرها اقوم اقومها بنفسي احسن
استدعت امنه وطلبت منها توديها غرفة غزل اول
ماطلعت من جناحها شافت قدامها مباشره صالة جلوس بين جناحها وجناح ثاني : الجناح ذا لمن
امنه : هذا جناح يوسف
بروق : نادر وثائر وين غرفهم انا طالعه بدون حجاب
امنه : لاتخافين هنا بس يوسف نادر في الملحق الي برا وثائر تحت جنب غرفة ابوجابر
كان جناح البنات وجناح ابو وام نادر في الجهه المقابله لجناحها هي ويوسف الدور الثاني مكشوف
من الوسط ويطل على صالات الدور الارضي هالجزء المكشوف محدد بجدار قصير وفوقه درابزين مشغول بزخارف فخمه ديكور هالبيت بشكل عام فخم وراقي ...... اوصلت لغرفة غزل وطقت الباب كم مره والاسمعت رد اخيرا قررت تقتحم الغرفه وتقومها غصب افتحت الباب وادخلت شافت غزل
نايمه ولحافها طايح واهي لامه نفسها وباين انها بردانه راحت لها وجلست جنبها على السرير وبدت
تصحيها لحد ماقامت استوت غزل جالسه على السرير واهي تمغط : اف هذا انتي يعني يوسف الخبل يعرس وانا الي ابتلش
بروق سمعت صوت اذآن الظهر : يامفتريه اسمعي الاذان لمتى ناويه تنامين واذا على رجلي العزيز ماراح يطلع منها انا الحين اروح اصحيه
غزل مسكت يد بروق بخوف تمنعها لاتروح ليوسف
:لايمجنونه الايسوف لاتقربيله وهونايم بيجلدك
بروق بتهور : وخليه يجلدني خير ياطير انا مقومته لصلاه مقومته فكي بس
انفضت يدها من غزل بتقوم وغزل وقفت على اركبها تخمها ببلوزتها قبل لاتنزل من السرير بالكامل : لحظه لحظه دامك مصره تصحينه انتظري اغسل وجهي واجي اتشمت فيك
بروق تشهق بصوت : الا يالخاينه بدل ماتفزعين لي
بتتشمتين
غزل واهي تعطيها ظهرها رايحه للحمام :لاحبيبتي شغل الفزعات بطلوه الحين الهبه تشمت وتصوير ثم تفضيح على كيف كيفك
بروق تقلد صوت غزل بتمسخر : تصوير وتفضاح
انتي بس قربي من التصوير وشوفي يوسفاني كيف يكوفنك
غزل ضحكت غصب واهي داخل الحمام
وبعد ماطلعت جت لبروق اوقفت قدامها :كأني سمعتك تدلعين احد وانا في الحمام
بروق تستعبط : انا دلعت احد.. هذي تهمه باطله
غزل راحت لدولاب تطلع لها ملابس : طيب اذا قلت ليوسفاني ساعتها قوليله انها تهمه باطله
بروق بثقه : لاوعلى ايش اقوله تهمه باطله ذنا اقوله يوسفاني ويوسفي وسفاسف
غزل : ههههههههه خليه يسمع الاخيره ذي علشان يذبحك
بروق قامت تمشي للباب : اقول ترا عطيتك وجه بروح اصحي الذيب
غزل بدت تستعجل في لبسها : لاتكفين انتظري
بروق اسحبت عليها وراحت تطق على يوسف طقت
طقت محد يمها بدت تقوي الطق اكثر وتنادي :يوسف يوسف ييييييييوسف قم هيه يوسف
غزل اطلعت من غرفتها وتكت على الدرابزين الي يطل على الطابق الارضي ونفس الشي تقدر تشوف
الجهه الثانيه من الطابق واهي مكانها وبدت تراقب
بروق واهي متأكده ان عاقبتها وخيمه
بروق تعبت من المنادى والطق بدت بتردس الباب برجولها لحظه وانفتح الباب بعنف واهي اطلقت ساقيها لريح خافت تنزل تحت يكون فيه احد من العيال واهي كاشفه اركضت تاخذ لفه على الدرابزين الي كان على شكل بيضاوي مرت من عند غزل واهي تركض بقوتها كلها ويوسف يركض وراها غزل بعدت عن طريقها واهي تضحك عليها من قلب بروق اخذت الفه القريبه من جناحها وهنا مسكها يوسف بظهر بلوزتها ثم زرع يده في شعرها بعنف : ياكلبه ياحيوانه انا طقت كبدي على بال مانمت تجين تنكدين علي نومي ليه
بروق عورها شده لشعرها امسكت يده بيدينها الثنتين تحاول تفكها : المذن اذن وجيت اقومك لصلاه
يوسف زاد قوت قبضته على شعرها ونفضها ابه
: وانا لمتى اقولك ماصلي تفهمين انتي ولاماتفهمين
بروق تحاول تفك يده وتغرس اظافرها فيها : وانا وش علي منك صليت والابحريقه المهم اني بريت ذمتي وصحيتك وبعدين شد الشعر والاسلوب الرخيص ذا ماتستخدمه معي
يوسف طنش حلطمتها وجرها معه لجناحه : انا اعلمك وش الاسلوب الرخيص الحين
ركل الباب وراه مسكره برجله وترك شعرها وصار يجرها معه بيدها لحد مادخل لغرفة النوم استمر
يسحبها معه واهي تمشي معه تشوف اخرتها
وصل لنهاية السرير وجلسها عليه ثم انسدح على السرير متوسد فخذها سحب يدها وزرعها في شعره
: الحين زي ماقومتيني تلعبين في شعري لحد ماانام
اسئلته باستنكار : ليش
جاوب ببساطه : مدري بس الحركه ذي تجيبلي النوم
شدت شعره بيدها واهي تميل عليه براسها وتناظره بحده : اقصد الصلاه ياعبيط
سكر عيونه وبأمر : زي ماقومتيني من النوم بتنرزعين هنا لحد ماانام
بروق نفخت بطفش وحست انها توهقت فيه : افففف اجل انسدح على المخده اشوف
تحرك ناقل راسه من فخذها للمخده
واهي قامت اسحبت الحاف ولحفته ثم اجلست
ملتصقه بصدره ومدت يدها تحركها في شعره بهدوء ثم سمت بالله وبدت تقراء القران وترتله
بصوت عذب ساحر يوسف تظاهر بالنوم يبيها تقوم
عنه مايبيها تحس بتأثره بروق حست بانفاسه تهدئ
توقعت انه نام ويوسف تحرك بطريقه وكأنه بردان
وسحب الحاف على وجهه
بروق انقلت يدها من راسه لظهره في المكان الي اعتقدت انه خلف قلبه وبدت تدعيله بأخلاص وبصوت هامس كان يسمع كثير من دعائها له لانها
مع خشوعها بالدعاء ماعادت مركزه في مستوى الصوت : اللهم أني أسألك بأن لك الحمد لا إله إلا أنت يا حنان يا منان يا بديع السماوات و الأرض يا ذا الجلال و الإكرام اللهم ان هذا زوجي وانا اسئلك له الجنه والنجاة من النار اللهمّ اغفر ذنبه وطهّر قلبه وحصّن فرجه
اللهمّ ارزق زوجي مع كلّ خفقة قلب وطرفة عين فرجاً، ومخرجاً، وعفواً، وأمناً، وإيماناً.
اللهمّ اقسم له من خشيتك ما تحول به بينه وبين معصيتك ومن طاعتك ما تبلّغه به جنّتك
استرسلت في الدعاء واطالت وتذللت للخالق والحت وبكت هنا يوسف ماقدر يمسك نفسه اكثر
بعد الحاف عنه وضمها لصدره يشاركها الدموع بصمت من زمان ماسمع احد يدعيله اوحتى يمكن تكون المره الاولى الي يسمع فيها احد يدعيله تعود يسمع الناس تدعي عليه ولشدة بؤسه كان يأمن على دعائهم يدري انه على ظلاله لاكنه عجز يطلع من هالظلال نفسه وشهوته تقوده للجانب المظلم
من الحياه تعود ان يجد لذته ومتعته في ذالك الجانب وهذا هو الجانب الي يناسبه ويستلذ العيش فيه انتبه من هواجيسه على حركة بروق واهي تقوم عن صدره تمسح دموعها بحركه سريعه
وواضح انها من النوع الي يكره الدموع تقوم واقفه
وتطلع من عنده من غير والا كلمه سكرة الباب وراها واهي تفكر .......كيف اساعده من غير ماعلق فيه !!
اول ماطلعت من جناح يوسف شافت غزل تحرك قدام الجناح بقلق رايحه جايه وبمجرد ماشافتها اركضت لها وامسكتها بيدها تدورها قدامها وكأنها متوقعه تلقى فيها اصابه وقاعده تدور عنها
بروق اخذة لفه كامله على نفسها مستجيبه لحركة يد غزل ثم اوقفت قدامها غارسه يدها في خصرها
ومميله راسها على جنب : خلصتي تأمل جمالي الفتان
غزل كشت عليها : امحق جمال انا قاعده ادور كسر
جرح طعنه شي محرز على قد الجنحه الي ارتكبتيها
بروق ضحكت بروقان : هههههههههه هذا يصيرلك
انتي وامثالك انا ياخذوني بالاحظان ويقولون فدوه قوانين الكون كله
غزل غمزة لها واهي تبتسم لها بحركه ذات مغزى
: ايه قلتيلي احضان انا داريه انك خبله وماتقدرين تقاومين فتنت اخوي الوسيم
بروق كشرت في وجهها : يرحم والديك لاتذكريني
انا كل ساعتين اقف قدام المرايه واحلف اني موب
شاذه لان مخي لحد الحين مصر يدخل صورته لقاعدة البيانات عندي كأنثى
غزل توسعت عيونها وانقزت عليها تسكر فمها بيدها واهي تلفت خوف ان يوسف يسمع الي قالته
: خبله انتي تبين يوسف يذبحك
بروق وخرت يد غزل عن فمها : اقول وخري امزح
معك ولاتخافين مراح اقول هالعبط قدام احد
وفي داخلها بلفعل تحس بقرف لايوصف من جمال
يوسف تدري ان باقي تفاصيله رجاليه بس هالوجه
الانثوي نسف تأثير اي مظهر رجوله يمتلكه في نظرها ...........
غزل اسحبت بروق بيدها : تعالي اعرفك على نحلة العالم الرقمي
بروق وقفتها : لحظه لايكون بتعرفيني عليها وذيك القصه السخيفه باقي في راسها
غزل بأحراج : لا انا علمتها بالي صار والاتخافين هالكلام محد يدري عنه الاحنا واندفن خلاص
بروق طاري السالفه عصبها غصب : والله من مصلحتكم انها تندفن لان هالكلام لووصل اهلي بيقلبون عاليها واطيها
غزل بزعل : بروق لايكون بتعلمين اهلك ترا مالنا ذنب حرام تفشلين ابوي وجدي بسبب اهبال يوسف
بروق ازفرت بضيق وغمضت عيونها لحظه تستعيد هدوئها : ماراح اقول لسببين اول شي علشان جدي حطها في وجهه وثاني شي لان يوسف على سؤه له جميل في رقبتي مستحيل انساه
غزل متشوقه تعرف السالفه : ليه وش صار
بروق تعكر مزاجها : ممكن ماتسئلين عن هالموضوع
غزل استغربت : طيب على راحتك ...... هاه نروح لغرور والاننزل تحت
بروق رجعلها الحماس : لانروح لحبيسة الفضاء الالكتروني
غزل ضحكت : هههههههههه وشلون عرفتي
بروق واهي تمشي مع غزل متجهين لغرفة غرور
: مايبيلها ذكاء من البارح ماشفتها
غزل افتحت الباب وادخلت وبروق اوقفت برا تنتظر الاذن غرور كانت منسدحه على كنبت استرخاء هزازه والجوال في يدها ترد على متابعاتها انتبهت
لدخول غزل : خير
غزل تظن بروق جنبها التفتت ماشافتها ارفعت صوتها : بروق ادخلي
غرور تفاجأت وانقزت تعتدل في جلستها وتتلمس شعرها اذا مرتب او لا واهي تناظر غزل بحقد : غبيه ماتعرفين تعلميني قبل علشان استعد
غزل اسحبت عليها واهي ترحب ببروق الي ادخلت
واهي تبتسم بود : السلام عليكم
غرور مازالت مختبصه وتخمخم شعرها وبجامتها
بروق لاحظت ارتباكها وبضحكه خفيفه : عادي ترا
توني تشرشحت قدام غزل وتنتفت قشتي
غرور ارتاحت لها لمى سمعت كلامها وقامت لها تسلم عليها وبعد السلام : ودي اقول مبروك لاكن
حتى اكون واقعيه بقول هاردلك
بروق ضحكت بقوه : هههههههههههههههههههههههههه هاردلك لاخوك النسونجي ان ماطلعت حق بنات حواء من عيونه ماكون بروق
غرور ابتسمت بشفقه على بروق وفي قلبها تدعي ان الله يكفيها شر الداشر الي مايخاف الله : الله يقويك بس انتبهي لنفسك لايضيعك
بروق لاحظت ان نظرة غرور ليوسف سوداويه جدا
ويصاحبها شي من الاحتقار وربما الخوف !!
: لاتخافين علي اعرف وش اسوي .......بنات يالله ننزل تحت ماحب اجواء غرف النوم
غرور استحت ترفض طلب بروق : انزلو انتم وانا ببدل واصلي والحقكم
بروق : اجل انا بضبط القهوه في جناحي وانزلها تحت
غزل : ماله داعي الطباخه تسويها
بروق : انا مايعدل مزاجي الاقهوتي
غرور ابتسمت : نفس امي
غزل : اجل حتى انا بدخل غرفتي اصلي بنات نص ساعه ونجتمع كلنا وننزل .............
خلصو البنات صلاه ولبس واطلعو من اغرفهن تقابلن في ممر جناحهن غرور : بروق انزلت
غزل : لا ماتوقع كان مرت علينا تعالي نروح لها
بروق مخلصه وواقفه قدام مراية تسريحتها تلبس
وشاح من فوق لبسها يغطي جسمها كله اسمعت
الباب يطق توقعت انه البنات اخذت طرحتها ونقابها في يدها واطلعت من غرفة النوم لصاله
ونادت ادخلو ادخلت غزل وغرور وقفت على الباب
غزل مشت لحد ماوقفت قدام بروق واسحبت الطوق عن شعرها وانتثر على وجهها بنعومه وكثافه ساحره غرور توسعت عيونها بانبهار وغزل دخلت يدها فيه تخبصه وبضحكه : اخيرا لمسته انا من شفتك وانا اقول يازين ذا الشعر بس لواقعد العب فيه
بروق تضحك على حركات غزل وكلامها :هههههه قولي ماشاء الله لااصلع ويضيع نص جمالي
غزل بمزح ميلت عليها : تف تف تف ماشاء الله ماشاء الله ....... تدرين ان قصتك نفس قصة شعري
بس على اطول شوي لان ارقبتك اطول مني
بروق تاخذ طوقها من غزل وتلبسه : اي ملاحظه
غرور من عند الباب : يالله ننزل
بروق لفت طرحتها على راسها والبست نقابها
: يالله بس باخذ القهوه من المطبخ
انزلو البنات تحت ولقو العيله مجتمعه في الجلسه
المعتاده اجلسو معهم وبدو يتقهوون وغزل هي الي تصب القهوه اوصلت عند ثائر ومدة عليه الفنجال
ثائر : بس مابي قهوه
بروق انتبهت انه ذا الي البارح سبها حبت تكسر الحاجز بينهم : لاشنو ماتبي هذي اقهوتي انا بروق ماترد
ثائر ابتسم لأنه فهم انها موب شايله عليه ومد يده للفنجال ياخذه : دام الي مسوي القهوه بروق اجل قربيلي الدله
ابو نادر بمزح : لا والله لاتقربينها له حتى حنا لنا نصيب من هالقهوه الزينه
غزل داخله عرض : ها يبه وش تلمحله عشاني ماعرف اسوي اقهوه صار اي احد يسوي قهوه قهوته زينه
ابو نادر توسعت عيونه وصار يتلفت على الي حوله واهو يسئلهم : هالحين هذي من جاب طاريها والاجاب طاري قهوتها
نادر يخز غزل واهو يحسها ملقوفه بزياده : لازم تقط
في السالفه والاتختنق ............
طول الجلسه وبروق تسولف وتضحك مع الجميع وكأنها تعرفهم من زمان والعائله انسجمو معها بسهوله كانو متوقعين تعاملهم بجمود بعد الي صار
لمى اوصلت بيتهم لاكنها فاجأتهم باندماجها السريع معهم ....................

في العصر انزلت بروق للحديقه واجلست على وحده من الطاولات المنتشره اهناك بتنسيق جمالي مبهر ماتدري تتأمل جمال قطع اثاث الحديقه الفاخر او تسرح في سحر تنسيق النباتات
والزهور المكان كان مثالي جدا للاسترخاء والاستمتاع بالشاي والمكسرات وهذا ماطلبته بالفعل من المطبخ والان وصلته لها العامله الي رتبت الاواني على الطاوله قدام بروق وانصرفت
بروق كانت ملتفه بالشال الطويل ولافه طرحتها
على شعرها تحسبا لدخول اي احد من حموانها
ونقابها حاطته على الطاوله قدامها بدت ترتشف
الشاي باستمتاع وتاكل من المكسرات وفجأه شافت واحد يتجه لها من جه جناح نادر زي ماقال لها جدها لمى اطلعت معه الصبح يمشون في الحديقه اخذت نقابها والبسته بسرعه قبل لايشوفها .............الشاب وصل عندها وسئل باستغراب من انتي ؟!



______________________


تم البارت الخامس دعمكم لروايه بالردود ومناقشة الاحداث يزيدها جمال ويعطيني طاقه حتى ابدع اكثر



*



*



*

مساء الخير والنور

صراحة انصدمت أن عذبه أم خزام ما شاء الله عليها فاتحه لها كوفي وفوقها أم حنونه وبشوشه حبيت علاقتها مع ولدك م بينهم حواجز أبد 😊 ويبقى هالسؤال وش وراء جده وش سوالفه السم الموضوع كبير 🤔 ومثل م قلت طلع جده أبو أبوه ويمكن سالفة الكره عشان أم خزام واتوقع أن أبو خزام متوفي والا م قالت امه يكفيه الشقى في حياته*😎 والا عروب وش تقرب لخزام والا هزاع وش يقرب لعذبه دامه من المحارم يعني هزاع وش يقرب لعروب كلها اسئلة انتظر اجابتها ونترك تحليل هالقرابه اللي* يدوخ الرأس لأهله 😂 والحين عذبه تحايلت لحد م عرفت سالفة ولدها لكن يبقى السؤال اذا عرفت عنها أكثر راح توافق يتزوجها ولدها🤔 وشغل خزام شغلين قناة ومتجر لا تقولين شاعر بس 😍 الحين عروب زعلانه ع خزام لا يكون عشان سحيير مالها داعي والله وبعدين خير خير خير تقولين عن حزام اشهب اغبر م غيرك والله 😑 لا تقولين نبض عمر خزام كبير وكذا تقول عنه اشهب كناية عن الشيب ههههه بس الكبر حلو عقل ورزه* وخزام بسم الله عليه ثقل وعقل 😇 حسيت أن أم تمدح ولدها 😂 ونذكرك يا عروب مردك لخزام 🙄

بروق والله عرفتي تردين ع أمنه تبين الصدق مالك ومال وجع الرأس ع هالصبح الأكيد م فيه شي يبقى سر راح ينكشف سالفة هالجناح ولا أدري كيف ردت فعلك 🙆*الحين بروق وأبو جابر عقدوا صداقه مع بعض 😁

سياف وما أدراك ما سياف يمكن انت في اسلوبك كرهتها فيك وتحصل كثير وانت ما شاء الله من صغرها وانت مكرها فيك أو يمكن سبب كره بروق لسياف شي ثاني ومين الشخص اللي ذكره سياف من كانوا صغار وذكر سياف انه ينادي الولد في الأشهب عاد انا ربطتها مع كلام عروب لخزام يمكن مثل ك قلتي خزام يقرب لبروق ولد خالتها مثلا ويعني كذا خزام يعرف أهلها وسياف وهو م يدري بس كان عرف الصور لكن نقول م شافهم من سنين وكذا تتغير الملامح عليه ولو أنه بسيط المهم انه له علاقه فيهم يمكن صديق أحد إخوان بروق أو اعمامها كل شي جايز

سياف انا مالومها المحبه من الله يبي له وقت عشان يستوعب ويتناسى .. واتضح لنا أنه زواج بروق من يوسف كرد جميل ومثل م قالت هي ترد جميله أنها وصلها لاهلها .. خطت اول خطوة بروق ليوسف تصحيه للصلاة وفعلا في الإنسان بذرة خير يحتاج أحد يسقيها عشان تنبت من جديد وهذا حال يوسف احزني من قال الناس تدعي علي ويأمن شي محزن انه م لقى أحد يوجهه لو أنه كبير لكن الكلمة الطيبة صدقة والمعاملة الطيبة لها أثر اتوقع أهله م ساعدوه حتى في الكلام الطيب وهذا اول خطوة تخطيها بروق له أثرت فيه بروق ترد جميله له وعسى الله يهديه .. أشوف بروق تتعامل باريحيه معه م كأنها تزوجته من كم يوم اتوقع تأثير شكله وأنه أنثى بنظرها له دور في تعاملها هذا

غرور ونظرتها لاخوها هل ممكن سبب سواته بوسن صارت تشوفه كذا وانا مالومها لو تخاف كذا لأن اللي ينتهك حدود الله مالها أمان ... جمعه بروق بأهل يوسف طبعا شفت جانب ثاني من شخصيه بروق تحب الوناسه وإجتماعية .. نهاية البارت والشخص اللي جاء مين يا ترى هل هو من أهل أم نادر وكذا يقدر يدخل البيت ع راحته يمكن أخو أم نادر أو عيال عم يوسف يعني مو أحد غريب من أهل البيت ننتظر ونشوف
.
.
تسلمين نبضي على البارت ربي يبارك لك في وقتك ويسعدك .. طبعا قررت أنزل التعليق بدري عشان م أنسى 😂