يا قلبي خزام كسر خاطري موقفه صعب جدا وأكثر من تضرر من اللي صار هو يا جبروت الحد اللي خلاه يسوي في حفيده كذا مريض بالحقد والكره لدرجة يتخبط في مشاعره السوداوية على اللي حوله !

ليتهم يلقون اللي كان سبب هالضجة في السوشل ميديا ويجلدونه جلد ويبردون خواطرنا

بس بعد اقول ان اللي صار خيره وفي مصلحة خزام في كل جوانبها
زاد شهره من ناحية وشغلته تعتمد على كذا
والجد بيعرف نتايج فعايله ايش ! وانه موب بس ضر حفيده هو فضح العائلة وطلع كلام على الحميع !
وغير ان اللي واضح ان بروق بيصير لها يد في إصلاح الحال بينهم


حبيت تفاعلها مع خزام في اول ليلة لهم
وحبيت مشاعره الصادقة ناحيتها وصدقه في التعبير عنها 💛


ننتظر القادم بشوق يا ليت ما تأخري علينا

تقبلي مروري 💋

رووعه نننتظررك

البارت الخامس والاربعين




( انا ماقهرني غير الكلب الي يقول في الهاشتاق السالفه واضحه دام الجد ذابحن العم اكيد انه لاقيه عند بنته واذبحه يغسل عاره )

هجدو على صرخة الجد الي سمع الجمله الاخيره وفهمها :تعقب انت وياه تعقب يالخسيس
الحفيد تورط ركض لجده يحب على راسه
: والله مهوب انا الي قلته الناس ياجدي اكلتن اوجيهنا في الجوالات بناخيك خزام معرس وكاتبن في عرسه افراح ال معدي والعالم اكلتنا بالهرج يقولون وين اهله يوم ال معدي يسوون عرسه
وقامو الناس يحذفون من الهرج الي مايعرف اوله من تاليه
فز مشعان واقف من غير شعور والغضب يتفجر في صدره وكل خوفه انه اخذن من بنات خواله صرخ
: منهو اخذ ورا ماعلمتوني قدم يصير العرس
اعياله تحلقو عليه ومنوخ واقفن جنبه وعاضده خوف ان ضغطه يرتفع ويطيح عليهم
بدو بالرد على سؤاله الثاني :كلنا مادرينا الااليوم من الجوالات اخباره في السعوديه كلها فضحنا
صرخ مشعان واهو يدف منوخ عنه وكأنه يعلن للجميع انه مازال للجبروت بقيه :منهو اخذ منهو اخذ
: اخذن من ال ماجد
:بنت رجالن معروف يدرس في الجامعه
:بنت جاسر الماجد
: يقال ان البنت مطلقه
: اهلا ناقصين فضايح حنا ماحتى اخذ بنت بنوت
مزيد عرف انها طليقة يوسف وتذكر يوم ينشده خزام عن سبب طلاقها كان ناوي يخطبها ولاقاله

مشعان ارتاح يوم عرف انه اخذ من ال ماجد
وفي نفس الوقت تضايق يوم عرف انها مطلقه
تكلم بحقد على ال معدي :مجوزينه مطلقه لونه واحدن من عيالهم مارضوها اله
مزيد بحميا لخزام مع انه مازال ماخذ في خاطره عليه : هذي كانت عند ولد خالي بنت ناسن اجواد
وكل خوالي يذكرونها بالخير وجدي يمدحها بالحيل وعزيزتن عنده
ابو مزيد : والنعم بال ماجد وبنتهم حرمته ماعليها كلام ان بغت بنت والامطلقه الشرهه عليه هوه يومنه منطون تحت اسم خواله اقل شي كان قال حفل خزام مهوب يدس اسمه واسم اهله كنه بنيه

:هذي سوات رخوم مهيب سوات بنات البنت الصاحيه تفتخر باسم اهلها وترفعه فوق
جاهم الصوت الانثوي الجهوري القوي يسخر من استنقاصهم البنات ابتداء من انتقاص المطلقه وصولا لنسبة الافعال الناقصه للبنات وبصيغة شماته واضحه : ابشركم ان البنت اطلعت اطيب من ولدكم واظهرت اسمكم في عرسه وارقصت علي مدحكم واهي عروس ماهابت المشاريه
(ماخافت من نقد الناس لتصرفها كونها عروس وترقص على مدح اهل زوجها من اول ليله )

التفتو لام عايد وتكلم مشعان واهو ينفخ بغيض محد تحداه ووقف في وجهه الاهالولد العاق
: وانتي وش دراتس عن العرس ورقص حرمته فيه

دخلت ام عايد بشموخها المعهود اختارت لها مكان في صدر المجلس وجلست متربعه جنب المركى من غير ماترتكي عليه
مشعان رغم غيضه اتجه لام عايد وجلس جنبها يفصل بينهم المركى
المجلس بدى يهدى مع السالفه الجديده والكل يبي يسمع وش صار في عرس خزام بدو الجميع يجلسون واهم يعرفون ام عايد ماتكلم والمجلس حولها فوضى وقال وقيل
لمى جلس الجميع وعم الصمت عرف مشعان ان شيخته الحين مهيأة انها تتكلم
( ام عايد بنت رجال معروف بالطيب وسط جماعته وله مكانته بين الناس الي صنعها بافعاله الطيبه ولكنه ماهو من الي يعرفون في المجتمع كشيوخ سواء شيوخ بمكانه اجتماعيه او شيوخ دين بس هذا هو اسلوب ام عايد فارضه برتكولها الخاص على الجميع )

مشعان التفت على ام عايد : عطينا العلم الي عندتس
ام عايد تكلمت بصوتها الجهوري : كلمتني وحده من الي حضرن العرس اعرفها زين ماتزيد الهرج ولاتنقصه وتعرف اهل البنت تقول منيوم دخلنا العرس ماسمعنا ل ال شعوان طاري مانسمع الا ال معدي وال ماجد لين زفو العروسه يوم زفو العروسه
وام المعرس ترقص على مدح اهلها ال معدي يوم طلعت من الملعبه لهذي المغنيه تمدح في ال شعوان تقول شوف عيني حريم ال معدي عن يميني وعن يساري يسبن ويشتمن من قالها تمدح ال شعوان ووش جاب ذكرهم في عرسنا
تقول مادرينا الا العروسه يوم قامت ترقص على مدح ال شعوان وقام خزام لاعبها
تقول يوم انتهى العرس وادق على حرمة خال العروسه قلت العلم ويش قالت البنت ماتدري ان خزام مقاطعن اهله ومن يوم جت للقاعه واهي تنشد عن وحده يقال الها ام مزيد
تقول قلت خليها ام مزيد من حريم ال شعوان
قالت البنت استغربت انها ماجاها احد من ال شعوان وهي الي اطلبت الاغنيه تقول بشوف فيه منهم احد والا يوم ماشافت احد دخل الملعبه
قامت هيه وقالت انا امثل اهل رجلي في عرس ولدهم وهذا الي خلاها ترقص على مدح ال شعوان
تقول ابد دخلنا العرس مال ال شعوان طاري فيه
وطلعنا وكلن ينشد عنهم
مشعان جازله تصرف بروق التفت على اعياله
: روحو لبناخيكم استرضوه والاسبوع الجاي سووله عرس عندنا هنيا اكبر من العرس الي سووه خواله
وجيبو لحرمته من طقوم الذهب مايكسيها واقفه

الاحفاد ماعجبهم الكلام ضجو في المجلس

: يخسي نسويله عرس واهو فاضحنا
: بدال ماتدقون خشمه على الفضيحه الي سواها بتراضونه وتطنخونه على قل السنع
: الرمه مهوب كفو نعترف فيه اصلا
:خلوه ينطق عند خواله الله لايرده
:خلوه يشبع بخواله هامانه منكرنا ومنكر اسم عايلتنا
:انا ان شفته ذبحته وصلكم العلم وانتم كيفكم

اعيال مشعان ثارو على اعيالهم واختلطت الاصوات
وكلن يتكلم من عنده صرخ عليهم مشعان
:صه صه يامال الماحي

منوخ صرخ عليهم بعد صرخة ابوه يسكتهم سكتو واهم مقهورين مازال غضبهم من سوات خزام معمي عيونهم
الجد رجع يتكلم :من بيروح لخزام يهرجه
منوخ : انا وابومزيد زيد رحنا له ولاعطانا وجه
ام عايد اشرت ل ظامي
ظامي تذكر كلام زوجة ابوه معه في مره من المرات الي جته فيها مع مزيد ساعتها تركهم مزيد وراح يجيب اغراض من البقاله وماكان فيه الاهي وياه
( انتم تسوقون ابوكم لنار سوق لاتطاوعونه في ظلمه وقفو في وجهه ...وانت لمتى وانت داس وجهك ترا مافي وجهك ارصاصه تنطلق على ابوك وتذبحه ان طاوعته في اجوارته هذي بتموت وانت تدسس وجهك كنك مجرم خايفن من الحكومه لاتمسكه )مايدري ليه استجاب الها قام واقف فك
لطمته نسف شماغه على راسه وقف قدام ابوه مباشره تحفه نظرات الترقب والخوف على صحة مشعان والمتوقع انه يثور ويرتفع ضغطه
نطق ظامي بثقه : انا الي بروح لخزام واتفاهم معه
مشعان توسعت عيونه واهو يبحلق في ظامي هالوجه العزيز على قلبه مبطي ماشافه بلع ريقه
ورفع يده يتحسس مكان قلبه بريبه ليه موب حاس بوجع الفقد ليه موب حاس بنار الثار تسعر في صدره وتحثه على الانتقام ياكبر خيبتك يامشعان خنت اخوك خنت اخوك وماعاد تنضح عيونك بالدمع عليه شهق باستنكار يومنه مالقى في نفسه الالهفه وشوق لهالوجه وجه ظامي .....ظامي الولد ماهو ظامي الاخ صد يخفي مشاعره تحت غطاء قسوته المعتاد نفخ بغلظه : رحله ووش ماطلب منك قل تم دامه ماخذ من خواله مسموح
ظامي ابتسم لمح اللهفه في عيونه وعرف انها له ماهي لاحد ثاني او على الاقل هذا الي حس فيه
كان غبي لمى اخضع نفسه لتشرطات ابوه الامعقوله طول هالسنين كلها نطق بثقه :ازهله





________________________




واقفين قدام السياره ينتظرون الحريم ينزلون
ناظر هزاع لساعته والتفت على مدخل الفندق
:وين راحت عمتي
خزام تفكيره مشغول بالي صار : انا ابي اعرف بس الي سوا البلبله ذي كلها وش غرضه ومنهو
هزاع رجع يلتفت لخزام : الناس يسعون لاهدافهم باقذر الاساليب ماتدري يمكن عدو مهنه مذيع منافس او اعلامي حاقد قال خلني اشهر فيه واهز صورته في عيون الجمهور
خزام بثقه : جمهوري يعرفوني زين ومايتخلون عني علشان مشكله شخصيه بيني وبين اهلي بالعكس وقفتهم معي مشرفه وبعد ماكان تويتر مليان بهشتاقات تسبني انقلب في ساعه لهشتاقات تدافع عني الحين دوبني داخل تويتر الترند كله دفاع عني ونشر لمقاطع من برامجي السابقه وبرنامجي الحالي وكل حساباتي الشخصيه تضاعف عدد المتابعين فيها
قطع كلامهم صرخه غاضبه :شوفوه هنا ياعيال
التفت خزام بسرعه ل الصوت وشاف زياد ولد عمه
ومعه خمسه شباب واضح انهم كلهم اعيال عمه حتى لو ماتعرف عليهم بشكل شخصي الا ان السباب والشتايم الي انهالت عليه مع التطاول بالايدي يثبت انهم ال شعوان
التحم معهم خزام وهزاع في مضاربه عنيفه
: يالمخنز تنسب نفسك لعدوانا الي ذبحو عمك
: انت وش انت لقيط مالك نسب مالك اهل يومنك تدس اسمك وترزز باسم خوالك الرخم
شتايم مالها عد والاحصر تبادلها الطرفين والمضاربه مستمره
اطلعت عذبه وعروب وشافو مجموعة شباب يتضاربون مع هزاع وخزام
عذبه جتهم تركض واهي تحاول تبعدهم عن ولدها بنفسها وهذا خلا خزام يفقد عقله مستحيل ينتظر لحد ماحد من هالجحلط يمد يده على امه الي امسكت واحد منهم تسحبه بعيد والشاب ينفض يده من يدها من غير مايضربها واهي تصارخ عليهم :وخرو عن اعيالي
الشباب عرفو انها ام خزام
تحرك خزام متجاهل الضرب الي يجيه ودف الشاب الي امه مسكته ومسكها بعضودها يبعدها واهو مازال يتلقى الضربات على ظهره هزاع في وسط المضاربه ولان التركيز على خزام خف بسبب وجود امه وبقايا شيمه في انفسهم تبعدهم عنها تجمعو على هزاع واطرحوه في الارض وبدو يرفسونه بقوه في كل مكان ياصلونه
عروب اركضت لأمن الفندق واستنجدت فيهم
وطلع معها ثلاثه ....خزام ابعد امه وشاف احد العقل طايح خمه من الارض وافرده وبدى يجلد فيه الشباب على وصول رجال الامن الثلاثه الي بدو يفرقون بينهم وانضم لهم رجال من الي طلعو من الفندق وشافو المضاربه
اكثر واحد تضرر هزاع لانه طاح تحت الارجل واستلموه رفس عنيف بسب الحقد المشتعل في صدورهم على ال معدي خاصه ان هالشباب من الي حجبت عنهم حقيقة الثار واكتشفوها من الهشتاقات الي طلعت عن خزام
وصلت الشرطه في نفس الوقت الي بدى فيه التفريق بين المتضاربين ولموهم كلهم
عذبه تبكي واهي ماتدري وش صار على هزاع كل الي شافته منه قبل يسحبونه الشرطه دم على وجهه ولانهم سلمو جنحاهم صعدن لجناح بروق
وعروب ماخلت احد من اخوانها ماكلمته تعلمه
انهت اخر اتصال على فتحت بروق للباب
عقدت حواجبها باستنكار واهي تشوف الدموع في عيون عذبه وعروب تجاوزتها بوقاحه من غير سلام
واهي تنزع نقابها وتسب وتشتم في ال شعوان
بروق مسكت عذبه بيدها : خالتي وش صاير وش فيه
جاها الرد من عروب تصارخ بكره وغضب : ال شعوان جعلهم للماحي مرسلين كلابهم يضربون خزام وهزاع
بروق انقهرة من اسلوب عروب الوقح في الكلام
: من غير سب ودعاوي لو سمحتي
عروب انطلقت عليها : اسبهم واسبك معهم ياوجه النكبه كنا مرتاحين منهم العفون لين جيتي وجبتيهم معك الله ياخذك وياخذهم
عذبه صرخت على عروب : بس ياعروب انكتمي
بروق طقت من القهر صرخت عليها : ياحيهم دامي الي جبتهم والله يزيدك دامك مقهوره منهم طاريهم فقع قلبك مالتس فيهم حيله
عذبه انقهرت من دفاع بروق عن ال شعوان واعيالهم دوبهم ظاربين رجلها : بس اقطعن الصوت
عروب بتطق من القهر وماهمها تحذيرات عذبه
: نعم نعم وش قلتي فرحانه بعدوانا ومبسوطه انهم ظربو خزام وهزاع
بروق اسفهتها وجلست جنب عذبه : انا بسكت علشانك خالتي بس ابي افهم وش صار تحت
عروب مازالت مصره على الهواش : قلتلك ياحيوانه الرمم ال شعوان اضربو خزام وهزاع
بروق ماقدرت تستحمل الاهانه تحس اي اهانه موجهه لال شعوان تشملها معهم غير انها سبتها بشكل مباشر التفتت على عروب بغضب : الحيوان اهوا الي يمشي وينابح من غير عقل ولافهم زي مانتي مسويه الحين وال شعوان اكبر من ان وحده مثلك تمس مكانتهم وكلامك مردود عليك
عذبه ماعاد فيها تستحمل قامت واقفه واصفقت
عروب كف من حر ماتونس وصرخت عليها :انتي ماتحطين لاحد اعتبار تسبين في البنت وتنافخين عليها واهي ماقالت لك شي وين راحت تربيتي فيك وين
عروب انصدمت من الكف الي اكلته من عذبه اوقفت مكانها مذهوله للحظه ماقدرت تتحرك
وأول ماستوعبت الي صار اتجهت لشنطة يدها الي رمتها على الكنب لمى دخلت اخذت الجوال واهي تحاول تحبس دموعها وحقدها على بروق يتعاظم في صدرها دقت على محمد وطلبت منه يجي ياخذها فورا ...سكرة جوالها ورمته في شنطتها والبست نقابها واطلعت تنتظر محمد تحت والي وصل عندها مباشره بمجرد مانزلت لانه كان جايهم من قبل لاتكلمه عروب دق على عذبه يشوف اذا بتروح معهم لكن عذبه قالتله انها بتجلس مع بروق
بروق سكرت الباب بعد عروب وارجعت لعذبه لقتها جالسه على الكنب وحالتها ماتسر راحت لها باستها على انفها وراسها : السموحه ياخاله انتي شفتي كيف سبتني وسبت ال شعوان
قاطعتها عذبه بحرقه : وانتي وش دخلك في ال شعوان تعرفينهم من قبل
بروق اجلست جنب عذبه ملقيتها وجهها : ال شعوان صيتهم كلن يسمعبه حتى لو ماعرفهم معرفه شخصيه ماهو حق انتقصهم
قاطعتها عذبه للمره الثانيه وبعصبيه هي مستثاره من ضرب اعيالهم لخزام وهزاع والا ماهي من عوايدها تقلل من قدر احد : ماقلنا انتقصيهم بس لاتدافعين عنهم
لمعت عيون بروق باستنكار لكلام عذبه وشدت ظهرها تستقيم في جلستها وتكلمت بهدوء واثق
: اسفه ال شعوان اهل زوجي عائلتي الثانيه وفي يوم من الايام اذا اراد ربي بيكونون اهل اعيالي وحتى اكون واضحه معك من البدايه الي يسب ال شعوان كأنه سب ال ماجد وبيلقاني في وجهه لاني ماسمح لاحد يقلل من قيمة اهلي
عذبه استغربت من انتماء بروق السريع لال شعوان توقعت انها بتفضل ال معدي عليهم بما انهم الي ربو خزام وبعد هم الي لهم معرفه بال ماجد
:اهل زوجك ال معدي
بروق : ال معدي خواله اهله ال شعوان وولد الاصول ماينكر اصله
عذبه في لحظتها ذي كرهها لال شعوان واصل ذروته ومعميها : مانكر اصله ولانا منكرينه مير الله يقطعه من اصل
بروق انقهرت من كلام عذبه بس مجبوره تخفف من حدتها على قد ماتقدر : انا اشهد انه اصلٍ ممتد على عز وطيب ماضره من تنكر له
عذبه عصبت :انتي وش تبين هالحين
بروق بغيض : ابي اعرف الخافي كله ماني من الي يمشون على عماهم ياتعلموني وش وراكم ووش فرق بين خزام واهله والا مايردني غير بيت اهلي ومالي رجعه الابجاهة ال شعوان
عذبه بسخريه استنكرتها من نفسها : اجل بتبطين ماشفتي ال شعوان والادوروك
بروق شافت انها ماراح توصل لشي بهالاسلوب
امسكت يد عذبه وبرجاء : خالتي انا مبي اخسر خزام حتى لو ماخذت معه غير ليله هاليله كافيه علشان اعرف انه الرجل الي يملأ عيني وابيه وابي اكمل معه حياتي بس في نفس الوقت مقدر اتجاهل وضعه مع اهله انا انسانه معرف اعيش غير في وسط اهل وعزوه انا كذا اتنفس عز العائله وفخرها ال شعوان صارو اهلي دامهم اهل خزام ومن حقي اعرف وش بين ال معدي وبين اهلي
كلام بروق الهادي الممزوج بشئ من الرجاء الخفيف
خلا عذبه ترجع لعقلها وتطلع من تأثير هوشة الشباب اخذت نفس عميق وازفرته تهدي اعصابها
القصه انا سمعتها من عمتي العاتي
عوده لزمن سابق من ذاكرة العاتي ( تكنس الحوش بمكنسة اليد ام عصا طويله دخل عليها واحد من اعيال زوجها يركض واهو مرتاع : ياعمه جراح ذبح عمي ظامي دم دم دمه ياعمه يصب يصب وش كثره
طاحت المكنسه من يدها بروعه خاصه يوم شافت مشعان يدخل البيت يدينه وثوبه فيها دم ووجهه ينطق شر دخل البيت يركض ..الولد ارتاع من منظره وطلع من البيت ....واهي اركضت وراه بخوف
شافته يدخل غرفة النوم وينفظ مجموعة بطاطين مسفطه على درج عريض ...نفض البطاطين وطرحها كلها في الارض ظهر من تحتها خيشه ملفوفه فكها بسرعه وسحب الرشاش من داخلها وعود يعدي واهي واقفه على الباب تراقبه بفزع
صحت يوم حست فيه مر من جنبها يعدي تجودت
في يده : تكفى يامشعان تعوذ من ابليس طالبتك
دفها عنه بغضب :انتزلعي عني وراتس
ارجعت تعدي وراه واقدرت تلحقه تجودت في يده تترجاه دفها بالرشاش المتمسك فيه بيدينه الثنتين طاحت على الارض وتمسكت في رجله واهي تبكي وتنوح وتترجى سحب رجله منها بعنف وقامت بتلحقه تعثرت في طرف طرحتها وانشدت على ارقبتها
انزعتها عن راسها بعنف وانزع معها برقعها ارجعت
تركض وراه .....انهلت جديلتها على ارقبتها الطويله
واعبرت صدرها الرماني في سقوط سريع اوصلت معه نهايتها لنصف فخذها التفت عليها بنظره غريبه مافهمتها صرخ بغبنه صرخه مجلجله ارعبتها وطلع يعدي طاحت على اعتبت الباب تبكي ...تذكرة عمها وبيته جنب بيتها اركضت بليا عقل مفرع مصلع وصورة الدم والرشاش تتسع بين عيونها ومن وراها صورة اخوها جراح .....
اطلعت من باب بيتها تعدي يملاها الرعب ...ماهي قادره تستوعب ان ظامي مات والي ذبحه اخوها
وهالحين رجلها بيذبح اخوها ...كانت تعدي واهي في حالت ذهول ماهي مستوعبه الي يصير حولها فجأه لقت نفسها في احضان رجال ....ماهي قادره تشوفه مع ان وجهه شبه ملتصق في وجهها بس ماتدري منهو اكيد انه واحد من اخوانها بدت تصيح وتنتحب بهستيريا : جراح لايذبحونه جراح وينه ...نادو جراح ...ابي جراح ...الحق جراح ..

رجع مع دربه اخوانه يجرونه بينهم والرشاش زيد اخذه واحد من اخوانه وراح يدسه عنه في مكان مايقدر يوصله يكفيهم مصيبتهم الي هم فيها
كان يتفلت من بين اخوانه يبي يذبح جراح مثل ماذبح اخوه مثل ماذبح روحه الي بين ضلوعه كانو يسحبونه معهم سحب واهو يتخبط وينفض عمره من ايدينهم وعجز يتخلص منهم عويله المخيف واصل لاخر الحاره فجأه شهق شهقه مرعبه ودفهم عنه بقوه خلتهم يتباعدون عنه واهم مذهولين من المنضر الي شافوه العاتي في الشارع مصلع مفرع
وجارهم سيئ الاخلاق والسمعه ماسكها بعضودها مايفصله عنها شي ويوم شافهم سحب اشماغه يرميه عليها يازعم انه يسترها .....استلمه مشعان ضرب ورفس بكل مافي صدره من جنون الغضب وحرقة المصيبه واهو يصرخ : طالق يالعاتي طالق ياخت جراح طالق
انتفضت على صراخ مشعان مرتاعه والحقيقه تكتسح عقلها دفعه وحده في انفجار قوي للحقيقه تشوف الشارع مثل اشراقة الشمس ...وين تغبيشة غطوتها الي تلبسها من فوق البرقع لاطلعت الهوا يلفح وجهها وثوبها دخل من بين رجولها ملتصق في جسمها ....الجسم الي بعمرها مافرطت في ستره تفجرة انوثته الطاغيه قدام الرايح والجاي في الشارع وبابشع صوره عقلها عاملها بحقاره وكشف لها الستار عن ماحصل قبل لحظه وذهنها غايب في وجع القاتل والمقتول ....قبله شيطانيه طبعت على خدها ويدين قذره متمسكه في عضودها ...صرخت برعب ياويلي ويلاه ياشق جيبي شقاه من الي مسكني دفها احد حموانها لجهة بيت ابوه واهي تلتفت وراها تبي تعرف من المجرم الي لوث طهرها اتسعت عيونها باستنكار وقهر واهي تشوف جار السؤ يتلوى بين ارجل مشعان وكان هذا اخر ماشافته لان حماها دفها داخل بيت ابوه وسكر الباب وراها ......وصوت الجار مازال ياصلها : ماسويت شي والله ماسويت شي شفت الحرمه طلعت تعدي متلقيتن الخلا ماهيب في صحوها ومسكتها استرها واردها لبيتها والله مافي نيتي ردا



العاتي دخلت بيت عمها طايل واهي تبكي وتنوح
اسمعتها ام منوخ زوجة مشعان الاولى واهي تسكن مع اهل مشعان والعاتي لها بيت الحالها في جنب بيت اهله ...جتها تعدي واهي مرتاعه خوف انه صار مصيبتن ثانيه : ابك انتي وش فيتس ياحرمه
وين برقعتس وين اجلاك وش جايبتس مفرع مصلع
تجودت فيها العاتي واهي تنوح : المقتول من والقاتل من ....هو صحيح جراح ذبح ظامي
ضمتها ام منوخ تهديها : تعوذي من ابليس ياحرمه
الي صار اقدار وجرت ومانقول غير انا لله وانا اليه راجعون اللهم اجرنا في مصيبتنا واخلف لنا خيرا منها
العاتي طاحت جالسه واهي تنوح وماعلى السانها
الا : ياويلي ياويلي من شين جراء وشين بيجري )

انتبهت بروق لخالتها تبكي وتصدد تمسح دموعها
عورها قلبها عليها اخذت مناديل من العلبه الموجوده على الطاوله ومدتها لعذبه :خذي ....خاله انا اسفه ماقصدت اضيق صدرك
عذبه اخذت المنديل ومسحت دموعها : ماعليه خليني افضفض واطلع شي من الحرقه الي في قلبي
بروق تأثرة مره بقصة العاتي وحزنت عليها قامت واقفه : بجيبلك ماء
راحت لثلاجة المشروبات الصغيره فتحتها واخذت
منها علبة ماء فتحتها وعطتها عذبه
عذبه شربت شوي من الماء ونزلته
بروق مازالت ماهي فاهمه سالفة الثار : طيب ابو سالم ..
اقطعت كلامها تتأكد من كنية جراح : اكبر اعياله سالم صح
عذبه هزت راسها : ايه
كملت بروق : طيب ابو سالم ليه ذبح ظامي
ردت عذبه بصدق : محد يدري ماكان في مكان الهوشه احد غيرهم ومشعان جاهم على ضربة ابوي ل ظامي بالماصوره على راسه وكل الي قاله انها هوشه عاديه ومن كلمه لكلمه تضاربو ووصلت لما وصلتله من قتل
بروق : ليه هم بينهم مشاكل من قبل
عذبه زفرة بضيق : بالعكس ابوي وظامي ومشعان اعظم اصدقاء اسكنو المزاحميه كلها كانو ظامي ومشعان تؤام متشابه وطول وقتهم مع بعض وابوي صديقهم الوحيد ولولا ان شكله غير عنهم والاكان قالو الناس هذا تؤامهم الثالث من كثر ماهم متفاهمين ويحبون بعض واصلا اهلي جيران ال شعوان من اسنين وبينهم محبه وجيره مامثلها حتى جدي شامان وجد خزام طايل مثل الاخوان لدرجة ان جدي لاصادفه احد من معارفه واهو في شغل قال الله يحييك في بيت طايل لازم تمر عليه تقهوا عنده ونفس الشي يسوي طايل مع جدي
لين صارت هالمطمه وفرقتهم
بروق : طيب مع كل الي صار مافيه سبب يبعد عدي وخزام عن اهلهم فاهمه ان الي انكسر بين ال معدي وال مشعان ماينتصلح بس ذولا اعيالهم
عذبه سرحت فتره وارجعت تناظر بروق : هذي خليها بعدين اعلمتس ابها ماعاد معي عقل خايفه على هزاع يوم شالوه في وجهه دم مدري من وين
بروق تذكرت ان خزام معهم في الهوشه اشهقت بروعه واهي ماكانت تصور ان الهوشه كبيره لدرجة الدم : وخزام وشلونه
عذبه :ماعليه خزام مابه الا العافيه تضارب معهم مير ماعوروه هزاع هو الي استعدوله يومنه منا
بروق بقلق : الله يستر ان شاء الله انه طيب





_____________________






دخلت غرفة غرور وشافتها نايمه انقزة على سريرها بنكاده واجلست على السرير بطريقه خلته يهتز من تحت غرور الي لقت وراها معطيه غزل ظهرها واسحبت اللحاف على راسها غزل دفتها بيدينها مع ظهرها : نوم ذا والاموت قومي اشوف
غرور بطفش : مايخصك انقلعي من غرفتي
غزل قالت الكلام الي ياكل في قلبها حتى لو طنشتها غرور وماردت عليها اهم شي تقول الي عندها وتريح قلبها ضمت اركبها لصدرها ولفت ايدينها عليها وتكلمت بزعل : اليوم صباحية زواج بروق انتي مستوعبه انها تزوجت واحد ثاني غير يوسف ...انا متأكده انه يحبها واكيد زعل وتضايق يوم تزوجت خساره والله مدري وشلون بروق ماحبت يوسف واهو مايصعب عليه قلب بنت اصلا البنات ينتظرن منه لفته والله انها غبنه
غرور زفرة بزهق وسحبت نفسها لحد ماعتدلت جالسه وظهرها متكيته على خشب السرير : وليه ماتكون هذي عقوبته ...عقوبه مخففه خلينا نقول بسبب توبته اذا كانت توبته صادق فجايز تكون هالتوبه سبب في ان عقابه جاء بالسهوله هذي ومن جنس العمل زي ماحضرت اخوك يمشي ويعلق قلوب بنات الناس فيه ثم لاخذ حاجته منهن رماهن ورى ظهره جت الي تعلق قلبه فيها وراحت وارمته ورى ظهرها ...يكون في علمك هالي صار معه والاشي جنب الي صار في حيات ضحاياه اذا هو فقد بنت يحبها هن افقدن شاب يحبنه وافقدن شرف يعتزن فيه ويعزهن فقدن احترامهن لانفسهن
ويمكن فقدن اهلهن وثقتهم ويمكن يكونن دفعن ارواحهن ثمن لتعلقهن في اخوك
غزل عقدت حواجبها باستنكار : اخوك واخوك لايكون انتي بنت عمنا وانا مدري والايمكن الشغاله
خير خير انتي هيه تراه اخوك انتي بعد وبعدين وش الحقد الي عندك يوسف تاب ومن تاب من ذنب كمن لاذنب له والله يثبته ويديم عليه الصلاح
قالته وانزلت من سرير غرور بزعل وطلعت من عندها بالمره .....وماتدري كيف اخذتها رجولها لجناح يوسف فتحت الباب بشويش ودخلت اول
ماقابلها صورته على كامل الجدار المقابل للباب
واهو يعتبر جدار حاجز بين مدخل غرفة النوم والصاله وعرض هالجدار تقريبا مترين امتلت عيونها دموع ودخلت لداخل الجناح لحد ماوقفت
قدام صورته مباشره وهنا انطلق اسر دموعها وانسابت على خدها حاره ....حست بحلقها يجف ودموعها كل مالها تزيد لحد مارتفع صوت بكأها بمراره اجذبت لها الموجوده في غرفة نومه تمارس
نفس الوجع اطلعت ام نادر من خلف الجدار الحاجز
عيونها وانفها حمر مما يثبت انها كانت تمارس حصة بكاء نشطه ...تقدمت لغزل بسرعه وبعدت يدينها عن وجهها وتكلمت بخوف : وش فيك ليه تبكين كذا
غزل ارفعت عيونها لأمها وشافت اثر الدموع في وجهها تكلمت بصوت باكي : يمه اخاف يوسف يرجع لخرابيطه حنا ماصدقنا انه انعدل
ام نادر احتضنت غزل وشاركتها الدموع : لا مهوب راجع ان شاء الله توبته نصوحه انا دايم ادعيله انه يثبت على طريق الحق واسئل الله انه مايخيب لي رجاء
غزل حست براحه بعد كلام امها في قلبها ايمان عميق بأن دعوات الأم اسرع جوالب السعاده





_____________________



سمع اذان الجمعه الاول وناظر في ساعته باستغراب
مسرع اذن الظهر ...تذكر ان اليوم جمعه وصفر واهو يحك جبهته باصابعه ويلوم نفسه كيف نسى
فز واقف وطلع من غرفة المراقبه لمكتبه وتوجه مباشره للكنب الي ينام عليه يوسف بدى يهزه مع كتفه بحركه سريعه :يوسف قم يوسف الجمعه بتروح علينا قم يوسف

تحرك يوسف على الكنب بملل :ياخي فارق برقد
باسل شاف على الطاوله قارورة ماء اخذها فتحها وصب في يده شوية ماء ورشه في وجه يوسف الي شهق وفز جالس بفزع ....شاف باسل يضحك على الطريقه الي فز فيها عصب وخم علبة المويه من يد باسل بحركه سريعه وصبها عليه
باسل ماتوقع الحركه ناظر لملابسه متفاجئ بالي صار شاف تيشرته غرقان مويه عصب : ياحمار انا رشيت عليك بشويش علشان تقوم تصلي
يوسف يحك راسه واهو مبتسم برضى عن الي سواه
: وانا رشيت عليك بقوه اغسل وصخك.. ههههههه

باسل هجم على يوسف وبدى يسحب تيشرته يبي يفصخه ويوسف متمسك فيه اخذوكم دقيقه يتعافرون لحد ماقدر باسل انه يفصخ تيشرت يوسف اخذه وركض للحمام دخله وسكر الباب وقفله عشان يوسف مايلحقه ....اما يوسف رجع ينسدح بعدم مبالاه كلها دقيقتين وطلع باسل لابس تيشرت يوسف ورمى قميصه عليه :خذ استتر وامش نلحق على الصلاة
يوسف ناظر ساعته اذا يبون يلحقون على الصلاة لازم يمشون فورا يمرون الشقه يبدلون ويطلعون للجامع اخذ قميص باسل البسه
وباسل فتح جواله يكلم
: هلا ممدوح وينك
: اما عاد رايح تصلي الجمعه في الحرم يانذل ليه ماخذتنا معك
:لا خلك هناك بنصلي الجمعه ونجيك نصلي العصر والمغرب والعشاء في الحرم لي مده مازرته
انهى المكالمه مع ممدوح واهو ويوسف يطلعون من باب الشركه سكروها وقفلو الباب
وراحو لسيارتهم ركبو وحركو
يوسف : وش عنده ممدوح
باسل : يقول رايح يصلي الجمعه في الحرم ويرجع وقلتله يقعد وحنا نجيه
يوسف : بس اليوم عطلة الموظفين فرصه نفتش الشركه
باسل باهتمام : وش بتفتش بالضبط
يوسف : راجعت سجلات المخازن وكل شي سليم من وين يجيبون قماش
باسل : انا شاك في شي خل بكره نقابل هاجر وأتاكد منها
يوسف : طيب ليه مانفتش معمل الخياطه
باسل : انت وصلت لنفس الي انا وصلتله اليوم
يوسف : قصدك ان المديره هي قائد عمليات السرقه
باسل : ايه ودامها الراس المدبر شي طبيعي يكون كل شي مصروف بطريقه نظاميه
يوسف باستغراب :يعني
باسل :يعني القانون لايحمي المغفلين اذا كان استنتاجي صحيح الاقمشه تطلع من المخازن بأذونات صرف صحيحه
يوسف عقد حواجبه : كيف
وقف باسل السياره قدام البرج الي فيه شقتهم
: خلنا نلحق الصلاه الحين وبعدين نتكلم





____________________




اجتمعن في غرفة تماضر وعليا بعد مامشت قوافل العائله المتشعبه من عندهم هيفاء جلست ممدده رجولها قدامها بتعب :ياويل حالي ماسواء فينا خير جدي هوومزرعة الدجاج الي فاتحها
تماضر وسعت عيونها فيها وكشت عليها :بسم الله على ابوي تراك من انتاج مزرعته لاتحلطمين
هيفاء بعياره :انا من انتاج مزرعة الخيول
سلمى : من جد الحكومه المفروض يعطون جدي جائزة الدعم السكاني لدوله ماشاء الله نص التعداد السكاني من انتاجه
عليا واهي تهمز ارجولها بتعب : على طاري انتاج ابوي ابن اخي المذيع الرزه تزوج وعرسه البارح اه يالقهر ياليت منهو رقص فيه
التفتت عليها تماضر بأهتمام :قولي والله
عليا : والله حتى تويتر مالهم سالفه الاهو
هيفا : اه يالقهر عاد البارح كلنا مفلسات انتي من جابلك بطاقة شحن ومتى
عليا : ماغير بنات عبدالله علمني هالحين ارسلت العيال يجيبون لي بطاقه شحن وبفعل النت نشوف وش السالفه
تماضر : ليه ماعلمتينا نوصيهم حنا بعد

سلمى سحبت مخده من فوق المفارش المرتبه داخل الدولاب رمتها على الموكيت وانسدحت عليها وتكلمت ببرود : السالفه كلها عندي ومن غير نت
البنات جروها بيدينها يجلسونها غصب
تماضر :قومي اجلسي وماغص تعرفين كل شي والاعلمتينا
سلمى ذابحها التعب تبي تطب الارض تبي تمدد ترتاح ماصدقت ان اجتماع العائله انفض علشان تطيح في الرقه تكلمت بطفش : حسبي الله على العدو خلوني اتمدد اشوي احس اني تكسرت من التعب
هيفاء بقهر : اقول اهرجي اخلصي علينا ترا كلنا مكروفين واكلين تبن مهوب بس انتي عاد لونك خلود الي للحين واقفه على ساق
سلمى ارجعت تنسدح :طيب بعلمكم وانا منسدحه اف لازم ارتز يعني اتكلم بظهري انا
ازفرت تماضر واهي تبقس عضدها :اهرجي خلصينا
سلمى انسدحت على جنبها ملقيتهم وجهها : يقولون خزام تزوج وحده مطلقه والبارح عرسه وحاطن لوحات الاستقبال في العرس باسم خواله وماجاب لنا ياهله طاري عاد الناس الي يعرفون العلوم الي بين العايلتين شبو في تويتر علوم الها اول مالها تالي وهاشتاق رايح وهاشتاق جاي يقولون الترند كله فضايح ال شعوان وال معدي من خلقت ربي الهم لليوم
هيفاء بقهر : والله اني كنت اقول هالخزام رجال وشيخ الرجال طلع رمه
عليا بتعاطف : مسكين من حر مايونس وش يسوي وابوي متبري منه وطارده
هيفاء : ياسلام ومن قال ياحلوه ابوي وعمي عبدالله رايحين له في محله بيراضونه وسفل فيهم وطردهم الا رمه ماصدق يجيه من يم اهله قارص علشان ينصلخ عنهم
سلمى فزة جالسه بحماس فجأه : خلو عنكم المخنز خزام جدتي عيده تقول اخذ حرمه لاقالو حرمه
تماضر تحمست : صدق عمتي تعرفها
سلمى : ماتعرفها بس كلمتها حرمه حاضرتن العرس تقول يوم دخلنا العرس مانسمع الا ال معدي وال ماجد
تماضر وهيفاء بكره : قطعاء الطاري
عليا : ارسل اهلها ال ماجد
سلمى : تعرفينهم
عليا : من وين بعرفهم بس من الناس الي اسمهم له رنه الحريم اليوم يقولون اخواني كلهم يمدحونهم ويقولون ان نسبهم يشرف
هيفاء تستحث سلمى : المهم كملي
سلمى : الحرمه تقول يوم انزفت العروسه ارقصت ام خزام على مدح اهلها يوم اطلعت من الملعبه مادرينا الا مدح ال شعوان يلعل تقول حريم ال معدي جاهن الطاعون من القهر بغن يموتن
البنات تحمسن مع السالفه الي تصفق والي تصفر
عليا بفرحه : ياطيب تسبدي طيباه
هيفاء بضحكه : ههههه الا...جاهم الاعصار ماشيٍ يعيقه ..يالبيه يالاسم الي يحرق قلوب عدوانه
عليا : هههههه انا يوم قالته بغيت اقوم ارقص من الوناسه الرخوم ماخلو مخلا يبون يدفنون اسمنا بالي هوبه مادرو ان اسم ال شعوان شمس من فوق روسهم انا ماعمري فرحت كثر يوم قالو العروسه هي الي اطلبت مدح ال شعوان
البنات ارتفع ضحكهن وتصفيقهن بسعاده
هيفاء : سلميلي على خشمها هالعروسه
تماضر : اطلق عروسه وربي




__________________________________




في مركز الشرطه التفت الضابط على هزاع بعدم رضى خاصه انه يعرف ابوه معرفه شخصيه : انت متأكد انك تبي تتنازل عن حقك
رد ابو هزاع باصرار : ايه متأكد هات اورقت التنازل خلنا نوقع ونمشي
الضابط ناظر في هزاع يده ملفوفه بشاش ومعلقه في رقبته وصدر ثوبه غرقان دم من الضربه الي جته في خشمه وخلته ينزف والتقرير الطبي يقول ان يده تعرضت لتشعر في عظم الساعد غير الرضوض الي في جسمه وجرح في وجهه ..كان واضح ان هزاع مايبي التنازل تكلم بجديه : خل ابوك علي انت بس قل ماني متنازل ..
قاطعه ابو هزاع بحده : قلنا متنازلين يابو فهد
هزاع وخزام بينفقعون من القهر ابو هزاع فرض عليهم التنازل واهم مايبونه
هزاع خضع لقرار ابوه : متنازل مابي منهم شي
انهوء الاجراءات القانونيه وطلعو من المكتب
وانصدمو من الشخص الي جاء يكفل عيال ال شعوان ويطلعهم ...



___________________________



تم البارت الخامس والاربعين

اذكروني بدعوه في ظهر الغيب



____________________________

السلام عليكم ورحمة الله وبركاته،



ربي يسعدك على هالجمال اللي متعتينا فيه


والسموحة على القصور

تقبلي خالص ودي

البارت السادس والاربعين





هزاع خضع لقرار ابوه : متنازل مابي منهم شي
انهوء الاجراءات القانونيه وطلعو من المكتب
وانصدمو من الشخص الي جاء يكفل عيال ال شعوان ويطلعهم ...
هزاع التفت على خزام باستنكار : هذا ولد ال عامر التجار الي يجون عند جاسر
خزام تذكر اسمه : جواد خال زياد... ال عامر خوال مزيد وزياد
ابتسم ابوهزاع ابتسامة سخريه جانبيه : هه انسابهم دايم في السماء
قالها انتقاص لال شعوان معتبرن ال معدي من الانساب المتصلين بالسماء
صابت خزام كنصل سكين قطع في قلبه جرح
رد بانتصار سريع : مجبورين يطلعون ل السماء دامهم يبون نسب ال شعوان
التفاته سريعه من هزاع وابوه اثبتت صدمتهم واستنكارهم لكلام خزام وكأنهم سجلوه كحق محفوظ ل ال معدي
تكلم هزاع بغضب واهو يتذكر الحاله المزريه الي جاهم فيها خزام بعد ماطردوه اهله مستنكر كيف يتحيز لهم بعد كل الي صار : هاه العرق الوصخ قام ينبض داخلك
ابوهزاع على نفس وتيرة الكراهيه الي اظهرها اولده
بكل اريحيه : والله ماتتوب من هالهمج لين يذكونك ضحية عيد
السخريه الي تلقاها من خاله وولده ملى قلبه حقد
على جده بشكل خاص وعلى كل اهله بشكل عام لوكان قدام الغرب يقدر يستند على سمعة اهله واصلهم العريق مستغل جهل الغرب بطبيعة علاقته بأهله .....عند خواله تتحطم كل انصاب الفخر والعز دامهم يعرفون ادق تفاصيل خيباته مع اهله واحتقارهم له ....استنكر معنى الاحتقار في نفسه بس هذا هو النعت الصحيح لمعاملت اهله له
حس بالإهانه تثقل روحه ...لازم ينفصل عن هالاهل انفصال كامل حتى اسمهم مايلزمه في شي .....وش بعده ياخزام ....بعد ماغيرت اسمك في منصات التواصل الاجتماعي من خزام بن عدي ال عدي
ل خزام بن عدي ال شعوان .....وليه لا اسمهم الرنان اقل حقوقي الشرعيه وماراح اتنازل عنه
التفت على خاله وولده بحده بعد ماضنو انه ماهوبراد عليهم وتكلم بغضب يحاول كبته بجزه على اسنانه : هالمره بأمشيها بمزاجي وماانصحكم انها تتكرر
قاله وتجاوزهم بسرعه لكنه ماقدر يمشيها ورجع بحركه سريعه بعد ماتجاوزهم بكم خطوه وخم هزاع بنحر ثوبه : مافي عروقن وصخه الاكانك شايفن عرقك وصخ
قاله بقهر واضح واستدار تاركهم باسرع من استيعابهم للي قاله التفتو على بعض بذهول ثم التفتو يمه شافوه يركب سيارة اجره دوبها منزله احد الاشخاص واهم طالعين
هزاع باستنكار :يوم اطردوه سفل فيهم لين نزلهم سابع ارض والحين جاي يدافع عنهم
ابوهزاع ندم على الي صار يبقون اهله مهما سوو : حنا اخطينا عليه لاعاد تعودها
هزاع افرج عن الغضب الي داخله اخيرا وانفجر بغبنه : انا ابي اعرف هالمشعوذين وشهم مسوين لكم خزيم طاردينه ومتبرين منه وجاينا من عندهم شبه ميت وقاعد يدافع عنهم وانت مجبرني
اتنازل عن الحوش اعيالهم واهم ضاربيني وبغويكسرون يدي
ابوهزاع سحب هزاع بذراعه لسيارته : امش اخلص
لاتنسى انهم تنازلو عن دم ولدهم وجدك موصينا ماناقف معهم في محكمه ومتى ماصار لنا عندهم حق نتنازل عنه
هزاع ركب سيارة ابوه واهو ماهو مقتنع ابد اذا كل ماعتدو على واحد فيهم تنازلو بتجوز لهم السالفه


بعد فتره طلع جواد واعيال ال شعوان معه بعد ماكفلهم وخلص الإجرآت الازمه لخروجهم من التوقيف التفت على الشباب بكل جسمه بحيث صار مقابل لهم : الاياكلاب اليوم ماهوجمعه والافيه دراسه وش جايبكم
الشباب تفشلو من جواد وسكتو ورد زياد : خالي حنا اخذين شقه فترة الاختبارات
جواد بغضب : ماشاء الله ماخذين شقه علشان تاذون خلق الله وتضاربون مع الرايح والجاي
واحد من الشباب عصب : تقدر ترجعنا لتوقيف اذا ندمان انك كفلتنا
جواد التفت عليه بحده : انتم والله الي بتندمون لاوصلتو لابومنوخ ....ثم المزاحميه ماهو من بعدها والي اعرفه انكم تداومون من بيوت اهلكم وترجعون في نفس اليوم
زياد بغيض : قلنالك اخذين شقه فترة الاختبارات
جواد بغضب : اخذين شقه اخذين قصر هالحين تلمون عفشكم وتنقلعون للمزاحميه
زياد اشر للشباب براسه واهو يتكلم مع جواد : اوك حنا بنمشي الحين لشقتنا
جواد بعصبيه : انت تمشي معي هالحين لجدك ...وانتم على شقتكم كلها نص ساعه ويجيكم زياد وماانصحكم تضيعون وقت لان مزيد متحلف فيكم اذا ماوصلتو عنده قبل صلاة العشاء يجيكم بنفسه ويحوسكم وابشركم العائله كلها تضرس عليكم
الشباب انقهرو من عنطزة هالمغرور عليهم وكأنه ولي امرهم ومع ذالك ماقدرو يردون عليه يكفي انه كافلهم



خزام دخل لبهو الفندق ثوبه بعد الهوشه مبهذل شعره ملخبط بدون اشماغ ....زفر بضيق وعينه على المصعد الي شافه ينغلق ...ماله نفس ينتضره ....
:خزام
استغرب الصوت الي ناداه التفت على الطاولات المنتشره في البهو وشاف وجه يعتبره كابوس حياته
انقهر من البارح كل من شافه استلمه تصوير من دون اي استأذان ونشر صوره لحد ماعرفو الناس كلها وين ساكن عشان كذا لازم يغير الفندق باسرع وقت واذا طلع لاي مكان يتلثم
مشى بخطوات ثابته ووجه مكشر ونار تحرق في صدره مد يده بجمود يسلم ونيته يكتفي بالمصافحه لكن ظامي كان له راي ثاني وسلم عليه سلام خد : مبروك الزواج ولونا عتبانين عليك يومك تزوج من غير ماتعلمنا بعرسك
خزام عارف انه واحد من عمامه من وجه جده الي يشيله بس هذي اول مره يقابل هالشخص رد ببرود
: الله يبارك فيك ...الي يهمني انهم يحضرون عرسي عزمتهم والي !
وترك نهاية الجمله معلقه واهو يرفع اكتافه بحركة عدم مبالاه
ظامي سبق وسمع من اخوانه الي صار بينهم وبين خزام يوم جو يتفاهمون معه المره الاولى فقرر انه يبعد عن اي نقاش يثير خزام ويحاول على قد مايقدر يكسبه اشر لخزام يجلس
خزام رد على اشارته بنبرة كراهيه : ماعندي وقت اضيعه
ظامي دخل في الموضوع مباشره لعله يجذب انتباهه ويقعد يتفاهم معه
: جدك يبارك لك العرس ومرسلني استرضيك ويقولك تعال لاهلك وكل الي تبيه يصير والاسبوع الجاي بيسوي لك عرس في المزاحمه ....
قاطعه خزام بضحكه تهكميه :ههههه ياشيخ احلف يسترضيني مره وحده ليش قالولك حرمه منحاشه عن رجالها تسترضونها
ظامي قاطعه : عن الغلط ياخزام جدك متحسف على كل ...
قاطعه خزام :ماتهمني حسايفه عرس واعرست وزوجتي عندي ولاني محتاج لكم والالعروسكم ولالقربكم ..فارقوني فارقو حياتي
ظامي : لو مانهمك ماغيرت اسمك في السوشل ميديا ورديته لاسم العائله يوم...
قاطعه خزام : اسم العائله حق شرعي لي وماني متنازل عنه علشانكم تقدر تقول مصيبه وانبليت فيها والله يصبرني عليها الود ودي امسح هالاسم من الوجود كله

ظامي تنهد بضيق :خزام انا مقدر ...
قاطعه خزام : اسمعني يامدري وش اسمك قل لابوك مدري جدك هالي تشيل وجهه خزام مايطلع من نفس الباب مرتين والي يخسر خزام مره يخسره بالمره ....حلو عن حياتي اقرفتوني في عيشتي والي بينشدني عنكم بقوله تشابه اسماء والا اقولك من الاخر بقول للكل انكم متبرين مني وانا متبري منكم ونخلص من المسخره هذي وللابد

ظامي حاس بشعور خزام حياته هو ماهي بعيده عن حياة خزام حتى لو كانو اهله حوله بس ماهو حاس بأنتمائه لهم : اسمي ظامي عمك ظامي واذا ماتبي ترجع لاهلك على الاقل خل بيني وبينك تواصل وترا مثلي مثلك لاتظن انهم اخاذيني في الاحضان
خزام كان جاد في كلامه ومايبي اي شي يربطه بأهله
:بعد ! على اسم النكبه اسمع عاد جنس مخلوق ينتهي اسمه بال شعوان لايقربني والايمشي في طريقي الي امشي معه يكفي اشوف اسمكم في بطاقتي واكره عمري ...فارقني عسى يفرق بيني وبينكم مثل فرق السماء عن الارض

قاله ومشى للمصعد يشتعل غضب كل ماقال افتكيت منهم ارجعو ينشبون في حياته

ظامي وقف يتابعه بنظراته بصمت لحد ماختفى عن عيونه ابتسم بسخريه وتحرك طالع من الفندق
ركب سيارته ودق جواله .....شغل السياره وحركها قبل يرد :نعم
مزيد : وش سويت
ظامي : الرجال بايعكم بتراب ومايبي يشوف احد من العائله الكريمه
مزيد : بالناقص عن نفسي غسلت يدي منه والعائله الكريمه على قولتك كثر التراب وش عاد لانقص منها واحد
ظامي ابتسم بسخريه يعرف ان مزيد زعلان علشان ابوه والطريقه الي تعامل فيها خزام معه هذا علشان موقف واحد مستعد يتخلى عن فرد من العائله اجل الي عاش عمره منفي من حقه يسوي الي سواه واكثر : لوكنت انت مكانه بتقول نفس الكلام
مزيد مايبي يدخل نفسه في متاهة الفرضيات تكلم بسرعه : خل عنك المنشق عن العائله السلق الي
عندك عبالهم بيدرسون تجمعهم وتجيبهم معك خالي كفلهم وقالهم يسلمون الشقه ويجون بس انت مر عليهم لايماطلون في الجيه
ظامي بصدق : وليه يكفلهم كان خلاهم يخيسون في التوقيف لين يعرفون قدرهم
مزيد : لاجو حنا الي نعلمهم قدرهم انت بس جبهم معك
وبتذكر : خزام وشلونه عسى ماعوروه ووش قال فيهم
ظامي ابتسم ذا الي قبل اشوي يقول بالناقص منه
: مابه الاالعافيه وماجاب طاريهم وانا سويت نفسي مدري عن شي ماكنت ابي افتح اي موضوع يستفزه بس الرجال مستفز خالص
مزيد : خالي يقول الضابط قاله ان الي تضرر ولد ال معدي جايه شعر في يده بغو يكسرونها
ظامي بعدم اهتمام : عساها للكسر الي مايجبر
مزيد بنفس قدر الامبالاه : آمين ؟!



بروق افتحت الباب لخزام ودخل واهو يرد السلام
عقدة حواجبها بقلق واهي تشوف كمية الهم والتعب على وجهه مدت يدها تربت على كتفه بمواساه : وعليكم السلام الحمد لله على السلامتك
عسى ماتعورت
خزام تنهد بتعب ورد وعينه على امه الي فزة له يوم شافته وجته مستعجله : الله يسلمك الحمد لله مابي الا العافيه
تقدم لأمه وخم يدها يبوسها ومن بعدها باس راسها واهي تدفدفه عنها تبي تشوفه وتفقده لايكون متعور والافيه شي تفقده بيدينها وعيونها وتفقد هزاع بلسانها :ياوليدي هزاع وشلونه عساه ماتعور ياقلب عمته ياهو الدم الي في وجهه وشهو منه جعل من سيل دمه مايسلم
استسلم لها خزام مقدر خوفها عليه واهي تلفه يمين ...يسار وتحسس راسه بيدينها الثنتين تتاكد ان مافيه فلقات والاشي ترفع ايدينه تقلبها بين ايدينها ....
: ماعليه طيب ماغير انطلق خشمه دم ويده انشعرة شعر بسيط مابه الا العافيه لاتشيلين همه
بروق واقفه تراقب عملية عذبه التفتيشيه بذهول ....واضح ان في اعماق عذبه خوف عميق من انها تفقد ولدها والاماكانت فتشته بالهلع ذا كله مع انه مبين من النظره الاولى ان مابه الاالعافيه
انتهت عذبه مفتشه خزام وتنهدت بارتياح واهي تتركه وترجع تجلس على الكنب وكأن شي ماصار واول ماستوت جالسه ارفعت راسها له واهي عاقده حواجبها بقهر : بسم الله عليه عسى ايديهم الكسر
خزام ابتسم واهو يلتفت على بروق ويمد لها يده
بروق حطت يدها في يده ومشت معه وين مايبي
جلس جنب امه وجلسها جنبه من الجهه الثانيه
واهو يناظر في امه يرد عليها ويجاكرها :بسم الله على اعيال عمي يحمد ربه انه طاح في يدين وراعين والالونه طايحن في يد شعواني من الي عليهم العلم كان كسره كله
بروق ابتسمت على المناوشات الي بين الام وولدها وماحبت تتدخل بينهم خاصه وانها ملاحظه حجم التعب والضيقه على خزام حتى لو ادعى ان الامور طيبه عشان يطمن امه
عذبه عصبت من كلام خزام : وراعين ال شعوان وينهم عنك ماكسروك يومنهم حاطين حيلهم في هزاع ...
خزام خلل شعره بيده اليمين وميل راسه على كتف امه : افا يام خزام تبينهم يكسروني فدا لولد اخوتس المخنز
عذبه شهقت برعب : بسم الله عليك وعليه في عدوينكم ان شاء الله
خزام اخذ يدها يبوسها واهو مازال يشاكسها : انا طالبتس انتس تستغفرين تخبريني شعواني وتخبرين منهم عدوان ال شعوان (يقصد انك قاعده تدعين على اهلتس لانهم اعداء ال شعوان )
عذبه دفته عن كتفها وصدت عنه بزعل خزام استوى جالس وزحف يمها حاوطها بيدينه واهو يبوس جبينها : حلفت ماتزعلين مني يام خزام جعلني انا وال شعوان كلهم فداتس
ورجع باس خشمها : وهذي حبة خشم يابنت جراح
وش تبين بعد لو يسمعوني الشعاوين الحين سرو علي غازين
عذبه ابتسمت على عيارة ولدها والاحبت انها تزود الهرج عن ال شعوان خاصه يوم شافت ان بروق تاخذها الحميا لهم تاكدت ان ولدها موب اقل منها حميا مير انه يكتم في نفسه


دق جوال عذبه وابتهجت واهي تشوف رقم هزاع ردت عليه بسرعه :هلا وغلا الله لايحرمني هالصوت وشلونك ياعين عمتك عسى ماتعورت وشلونها يدك جعل من تسبب لها مايسلم
بروق تضايقت من دعاوي عذبه وصدت تستغفر
هزاع رد على عمته بضحكه :ههههههه اشوي اشوي انا الحين نسيت بداية سالفتك قبل تخلص
عذبه ابتسمت : لادامك تكركر مابك الاالعافيه
هزاع : الحمد لله متعافي من فضل ربي انا انتضرك تحت انا والشايب لاتبطين علينا
انهت عذبه المكالمه وقامت البست عباتها ونقابها وانزلت مع خزام
وصلها خزام لسيارة خاله وشاف هزاع مبدل ملابسه واضح انهم مارين البيت قبل لايجون ياخذون امه
فتح لامه باب السياره وكان يتكلم مع خاله وولده عادي والاكن صار بينهم شي ...ودعهم ورجع لجناحه دخل يسحب ارجوله من قو التعب البدني والنفسي شاف بروق تسكر تلفون الجناح ناظرها بتسائل
بروق فزة واقفه وجت امسكته بكفه : طلبت اكل متاكده انك مااكلت بعد الساندوتش الي صبح ادخل خذ شور على مايوصل الاكل
خزام اخذ يدها الي ماسكه فيها يده وباسها ثم ناظر في عيونها بحب : تعبان حيل ممكن تحضنيني
بروق مازالت تستحي منه ترددت لحظه وخزام واقف يتفرج على انفعالات وجهها الي بين فيه الحياء ...اخيرا تشجعت وقربت منه واخذته في حضنها ....خزام لف ادينه على خصرها وظهرها وشدها لحضنه بقوه الي صارله اليوم كثير عليه كثير ...غمض عيونه بقوه يحاول يبعد ال شعوان عن راسه بعد الفضايح الي صارت مستحيل يرجع لهم مره ثانيه اصلا من اللحظه الي طردوه فيها انتهو من حياته للابد وزين ان امه وخواله ماعرفو عن محاولات اهله المتاخره ل الصلح عشان محد منهم يحاول يقنعه بمسامحتهم ولهالسبب بذات
لازم يخفي تواصل اي احد من اهله عنهم
بروق حست بتوتر خزام من الطريقه الي يشد فيها عليها ....وضيقته واضحه من الزفرات الحاره الي ينفثها من صدره بين لحظه والثانيه واضح انه يعاني وفي ثاني ايام زواجه الي يفترض انه مناسبه للفرح تكلمت بهدوء واهي تمسح على ظهره : خزام حاب تتكلم عن الي صار معك اليوم
قاطعها بسرعه واهو يدفن وجهه في زاوية التقاء كتفها برقبتها : لا...تعبت من الهم تعبت ...ابي افرح ......بروق انتي حلم انتظرته يتحقق كثير .....وابي افرح ان حلمي اخيراً تحقق
بروق اتخذت قرار سريع دامه يشوفها حلم بتكون اجمل احلامه ....هي اليوم عروس وبتعيش سعادتها بهالعرس كامله من غير منغصات ...وكل المشاكل المعلقه بأمكانها تنتظر لحد مايجي وقتها المناسب
.... ابتسمت برضاء عن قرارها الي اتخذته ....بعدت خزام عن حضنها تناظر في عمق عيونه انطقت بابتسامه واسعه وحماس مفضوح : تجي نتسرب .....
اتسعت ابتسامت خزام وبدى يحك راسه واهو يرسم على وجهه تعابير غباوه كوميديه : مافهمت كيف يتسربون الناس
تحركت بروق بحماس واهي تسحب خزام معاها جلست على الكنب وجلسته قدامها : هذا سلمك الله ان قعدنا في الرياض موب خالصين عشان كذا لازم نطق من هنا قبل لاتطير علينا الكم يوم الجايه زي ماطار منا اليوم
خزام ضحك بسعاده واهو يشوف انها حريصه تقضي الوقت معه : احلا طقه دامك معي بس وين حابه نروح
بروق بتفكير سريع : الشرقيه قريبه وحلوه ماراح تاخذ وقت في المشوار
خزام بتفكير سريع وكأنهم اتفقو يخططون لسفرتهم بسرعه ومن غير تردد : حلو اجل الحين ناكل ونجهز شنطنا وبعد صلاة المغرب على طول نمشي بس بشرط الحين نكلم اهلنا ونقولهم انا بنسكر جوالاتنا ومانفتحها الا في اليوم مره وحده او بالكثير مرتين نكلمهم ونرجع نقفلها
بروق ناظرة ساعتها : مايمدي بعد صلاة المغرب باقي بس عشر دقايق
خزام سمع الباب يطق : هذا هو الاكل وصل المهم انا نجهز ونمشي على طول
دخل خزام صينية الاكل وبدو ياكلون بحماس خزام ميت جوع ومنشغل بالاكل رفع راسه ولاحظ ان بروق بعد تاكل برواقه ابتسم واهو يخطف اللقمه الي جهزتها في يدها عشان تاكلها وتكلم بمزح : انا ميت جوع بعذري اتحمس انتي وش عندك لاتكونين مفجوعه
بروق ضحكت واهي تمسك في يده الي اخذبها لقمتها تمنعه لاياكلها : انا زوجه متضامنه مع زوجي والااكل من دونه يامجرم جوعتني
قالته ونزلت راسها تاكل لقمتها من يده
خزام ضحك بوناسه : هههههههه مضلومه بطونا معنا لازم ناخذ معنا اكل في السياره علشان ماننسى ناكل في الطريق
بروق بعد مابلعت الاكل الي في فمها : اهم شي القهوه ماحسيت بنكهة القهوه اليوم وحنا ننتظرك
خزام ميل عليها وطبع بوسه قويه على خدها : الله الله من قدي يوم اصير نكهة حياتك
بروق وسعت عيونها فيه وبضحكه : يامغرور من قال صرت نكهة حياتي لسى بدري عليك
خزام مسك يدها الي صار لها فتره مجهزه فيها لقمه وانشغلت بالسوالف معه ولاكلتها ..رفعها قدام عيونها : هه هه شوفي ياحياتي هذا اكبر دليل تنسين الاكل في حضوري مافيه مجال للانكار
قاله وميل راسه على يدها الي ماسكه فيها اللقمه زي ماسوت معه واكلها
ابتسمت بروق وكأنها اكتشفت ان تأثيره عليها اكبر بكثير مماكانت تتصور




___________________________



جالسات على درج السطح الي ينزل على الحوش الرملي الداخلي ...حوش يفصل قسم المطبخ والمخزن عن داخل البيت وهالحوش بدون سقف
بيتهم دور واحد لاكن مساحته كبيره وغرفه كثير بما انهم كثيرين ....اميره ولطيفه خوات مزيد دخلو عليهم مستعجلات اميره تمشي وتكلم :سمعتو اخر الاخبار
هيفاء : قبل الاخبار وجع موب توكم قبل ساعتين ماشين من عندنا ناقصين حنا كرف ناقصين نضيف يابخيلات يامروحات ليش مانديتونا
تماضر شهقت بروعه : وش ضيافته بعد يخسون الي تبي قهوه تدل المطبخ والله العظيم حاله
لطيفه نزلت نقابها على وجهها وارفعت عباتها على راسها : اميروه امشي للبيت مانهم كفو نعلمهم باخبار المعرس

عليا خمت لطيفه بيدها : يالله انك اتحييها اعز من جاء واعز من قلط سلمنا قومي زبطي القهوه بسرعه
سلمى تخصرت : احلفي بس تبيني اروح اسوي القهوه وانتن تاخذن الاخبار
اميره بقرف : يعوه يالوعة الكبد ان عاد شربنا قهوتسن بعد تمننتسن ذا كله ترانا معزا
هيفاء بوانسه : بعدي معناته ماتبون لاقهوه والاشي تعالن انثبرن معنا على الدرج
لطيفه ارفعت راسها تطالع اخر الدرج : بنات خلونا نروح نجلس في السطح الجو يجنن والنا اسنين ماعتبنا السطوح
عليا : اقول انثبري وش تبين في السطح واغبرته
خلود الي كانت جالسه في اخر الدرج ارتكت على يدينها : من يقول مغبر جدتي ام عايد خلت ناصر يجيب ثلاثه عمال واغسلوه لين صار يلق
سلمى التفتت على خلود : الله عمال والي جايبهم ناصر وش صاير في الدنيا ومتى صار ذا كله
خلود تشد ظهرها الي مازال يعورها من الشغل المتواصل في المطبخ والي توها خالصه منه
: جابهم الصبح اظن يوم الاثنين ناصر يوم قالتله جدتي قال خلي البنات يغسلونه بس جدتي الحطته بالخيزرانه وقالت جب العمال وانت ساكت ثم انا الي بدفع لهم مانك دافع من مخباك الشي
تماضر بضحكه : مامناسب عناد ابوي الاعناد عمتي ام عايد تحسينهم سيفين متعاقبات على نخله
اميره : هههههه اهم شي من النخله
لطيفه : من بعد العائله المغلوبه على امرها
هيفاء : ههه قصدك كيس الرز مسمى العائله مايصلح لنا ..ماهو مقاسنا
لجن البنات بالضحك
ام عايد طالعه من داخل البيت واسمعت ضحك البنات اخبطت جنب الجدار بيخزرانتها :عساتسن تضحكن مامحتسه
(جعلكم تضحكون بدون ضروس )
لطيفه خمت راس ام عايد تبوسه : يالله ان تحيي جدتي
ام عايد اسحبت على لطيفه والتفتت على الجالسات على الدرج : انتن وش عندتسن متجمعاتن هنيا
اميره : ابد طال عمرك نخطط نعدي ل السطح
ام عايد تلفتت حولها ماشافت احد : اجل امشن قدم يجنا العجايز يدوخنا بونينهن اه ياعظامي واه ياراسي
البنات لجن بالضحك واصعدن يتسابقن مع الدرج ل السطح افتحن الباب واخذن قطع الزل الصغيره المبرومه وموقفه بجانب باب السطح بسطو زوليتين جنب بعض وجلسو عليها ام عايد تلفتت :وين بنات عبدالله وتماضر
ردت خلود الي توها اجلست معهم : بغيت اجيب جيكات العصير وزود المعجنات والكيك الي اليوم
وعين علي وراحن يجيبنها
لحظات وجو البنات بالعصير والكيك وصحن الفطاير واكتملت جلستهم
تماضر واهي تقطع قالب الكيك : هالكيكه فكها ربي من الجيش الشعواني سويتها قبل الظهر ودخلتها في الثلاجه يازعم انها تبرد ونسيتها
ام عايد بمزح : كل من سلم من الشعاوين فهو في نعمه
اميره تذكرت السالفه الي جت علشانها : على طاري السلامه مذيعنا الشهير وولد خاله سلمهم ربي من يدين اعيال الجامعه
ام عايد اشهقت : ابك انتي وش تقولين
لطيفه : العيال حقون الجامعه رايحين لخزام وضاربينه هو وولد خاله قدام الفندق الي هو نازلن فيه مع عروسته

البنات انقهرو من تصرف الشباب المتهور وام عايد عصبت : الله يسود اوجيه العدو ابك كيف يضربون ولد عمهم قدام العدوان والاجناب
تماضر امسكت راسها : يع يع من التفكير الغبي صدق مبزره
هيفاء بمزح : عطوني كشف باساميهم علشان ماتزوج منهم
لطيفه : سجلي زياد اول واحد
هيفاء بسخريه : زياد من يومه مطيور
اميره بفزعه : ماهو باطير من ناصر
ام عايد بجديه : الي جايكم بالعلم من
لطيفه نزلت كوب العصير من يدها وتربعت واهي تزحف يم جدتها : خالي جواد مكلمن مزيد العصر ومعلمه ومزيد كلم عمي ظامي وقاله مرهم في الشقه وجبهم معك لايقعد ابن امه
ام عايد : وجواد وش دراه عنهم
اميره : زياد معطن الشرطه رقمه علشان يكلمونه يجيهم يكفلهم
ام عايد امسكت راسها بيدينها الثنتين : ابك ابك افضحونا عند الخلق كلهم
لطيفه : ابوي ومزيد يتحلفون فيهم يبون ذبحتهم




_____________________________





ادخلت الغرفة وصفقت الباب وراها بقوه خلت
سحر تنقز من الروعه : بسم الله
عروب ناظرة في شكل سحر المبهذل بتقزز مع انها ماكانت مبهذله زي ماعروب شايفتها ...كانت لابسه بجامه قطن بسروال طويل وتيشرت اكمامه نص
وشعرها لامته بربطه وجهها خالي من الزينه ملابس مرتبه وناعمه لكن وجهها مرهق بشده
تكلمت عروب بعصبيه واهي تراقب سحر الي انحنت تاخذ الجوال الي طاح من يدها مع الخرعه
اسحبت الجوال من الارض وارجعت تتابع اخبار خزام ! متجاهله صراخ عروب : انتي وش قاعده تسوين هنا كأنك منحاشه من ملجأ انتي وشكلك الحوسه ذا
سحر انفخت بطفش : اف اف يرحم والديك عروب اذا هالي اسمها بروق مدري عروق المهم اذا هالقرده ناشبه في مخك لاتجين تنشبين في مخي ترا موب رايقه لك انتي وياها
عروب تكلمت بسخريه واهي تتحرك بميوعه وتجي تجلس جنبها وبحركه سريعه خطفت الجوال من يدها : اوف نسيت انك عايشه جوك الرايق وساحبه على العالم ....عند هالكلمه صار الجوال في يدها
ناظرته بسخريه وارجعت تهزه قدام عيون سحر
: قبل لاتنشب في مخي سرقت حب حياتك وخلتلك متابعة الاحداث من منزلكم ياعين ابوك
سحر صدت بحزن : وش تبيني اسوي مجبوره اتابع الاحداث ترا موب سهله اعيش عمري كله احب شخص واحلم فيه وفجأه القاه راح لغيري بكل بساطه وانتي جايه شمتانه في
قالته وسالت دمعه موجعه على خدها ارفعت يدها ومسحتها بسرعه
عروب اندمت على الكلام الي قالته نزلت الجوال على الطاوله ولفت سحر يمها : انا اسفه سحر موب قصدي اضايقك بس هالكلبه قاهرتني تخيلي خزام اخذها وسافر من غير مايمر يسلم علينا بس كلم عذبه علمها وقالها انه بيسكر جواله وانا ماجابلي طاري بالمره شفتي الحقيره كيف فرة مخه في ساعه ونص
سحر بدت تستسلم للأمر الواقع : البنت قويه ماشفتي كيف ارقصت بقواة عين قدام الناس والابعد على مدح اهل زوجها الي هم اعداء اهل العرس الاصليين
عروب بقهر : انتي شفتي قواة الوجه من متى العرايس يرقصون عندنا بس بعذرها مطلقه متعوده على كل شي ..انا تفشلت عند صديقاتي يقولون عروستكم ذي بدويه فيه وحده ترقص على مدح اهل رجلها
سحر تعزي نفسها : من جد شكلها عفشه ولاهي فاهمه شي
عروب بغيض : انا ماقهرني الايوم اجلست تدافع عن الكلاب الشعاوين جعلهم الماحي تخيلي اقولها الشعاوين اضربو خزام وتدافع عنهم وتهاوشني علشان دعيت عليهم
سحر انقهرت : الله ياخذها هي وياهم الحقيره



_______________________________




جالس في الصاله وغنى جالسه في حظنه تترجاه
: بابا ابي اروح معك عند يوسف
طارق مبتلش فيها : مايصير يابابا من يقعد عند ماما ويوسف الصغير علشان مايخاف لازم تقعدين عنده ..
قاطعته غنى بعصبيه : بابا يوسف الصغير عنده قصي انا ابي اروح يوسفي حقي انا يوسف الكبير
قالتها واهي تمد ذرعانها وتفتحها في حركه دائريه تعبر عن الحجم الكبير الي تشوف انه يمثل يوسف
قصي حمق يوم قالت يوسفي : انتي هي ترا يوسف رجال مانه اخونا علشان تقولين حقي انا
قالها واهو يتمسخر بنبرة صوته
طارق ابتسم على غيرة قصي ومسح على شعر غنى بيده : تبيني اعلم باسل عليك واقوله انك ماتبينه تبين يوسف
غنى توسعت عيونها بصدمه من نيت ابوها في التحريض عليها : بابا باسل حبيبي احبه اكثر شي اكثر من يوسف وقصي وبابا وماما وحلا مره احبه
طارق نزلها من حظنه : اجل روحي عني دامك تحبين باسل اكثر مني
غنى ازعلت وراحت اجلست عند امها : ماما ابي اكلم باسل
جواهر نزلت يوسف في سريره والتفتت على غنى
: وش تبغين تقولين له
تكلمت بزعل : ابيه يجي ياخذني عشان بابا مايبغى ياخذني معاه
قصي نفخ بطفش : اف ياذي البزر الي ماتفهم
غنى التفتت عليه بحده : انت مالك دخل
جواهر اشرة لقصي يسكت : باسل في الحرم الحين والناس الي في الحرم يصلون ويدعون مايصير نقعد نتصل عليهم ونزعجهم
هنا دخلت عليهم حلا واهي مبسوطه وفي يدها اكياس :مساء الخير
ردو :مساء النور
حلا ارفعت كيس من الي في يدها تأشر لغنى
: غنوشه جبتلك العاب تجنن
غنى انبسطت جتها اخذت الكيس منها واجلست على جنب تشوف ايش داخل الكيس
قصي التفت عليها ومدت عليه كيس واهي تبتسم
: خذ ياعم مانسيتك لاتخاف
قصي استغرب ان حلا متذكرتهم بهدايا اول مره تهتم فيهم وتجيب لهم شي والاغرب انها صايره تكلمهم بلطف اخذ الكيس منها وابتسم : شكرا
ردت له الابتسامه : العفو
جواهر تناظرها : تعشيتي
حلا اجلست على الكنب : ايوا ياماما تعشيت الحمد لله
طارق التفت على غنى شافها تلعب وماهي يمهم
ميل على حلا وقصر صوته : تروحين معي لجده
حلا ابتسمت : لا ياباب انا خلاص بجلس هنا في الرياض بنات عمي الاربعه الي انا احبهم السنه ذي اخر سنه لهم في الثانوي يعني كلهم راح يدخلون الجامعه السنه الجايه وابي احول ملفي هنا وادرس معهم
طارق ابتسم بسعاده اخيرا اقتنعت بالدراسه : الله يوفقك يارب كويس انك تعوذتي من ابليس وقررتي ترجعين لدراستك
جواهر ماهي مصدقه التغير الجذري الي بدى يظهر على حلا من اندمجت مع بنات عمها : على طاري البنات ليه مانزلو معك
حلا التفتت على امها بابتسامه : عمي مستعجل دوخناه في السوق وزعل على بابا يقول ليش طارق
مايجيب لكم الي تبغونه من محله بدل حوسة الاسواق
طارق رفع حاجبه باستنكار : محد قاله يفرفر معكم بين المحلات ليه ماخذ معكم وحده من البنات الكبار وخلاكم في السوق لين تخلصون وتكلمونه
حلا بضحكه : هههه لا ولايهمك راضيناه عزمناه على العشاء وانا حلفت ادفع الحساب وقلتله هذا العشاء من عند طارق
طارق ابتسم بوناسه : كفو وش قال عمك
حلا : هههه قال عارف انه من عند طارق انتي ماعندك الاالفلس علشان كذا بأكل براحتي وبفلوس اخوي


________________________


السماء صافيه والجو منعش مطفين كل انوار السطح علشان يحسون بجمال الليل وسكون الليل
خاصه وان الليله قمرا مازالت المجموعه هي هي مازاد عليهم احد رغم ان اهل البيت عرفو بطلعتهم لسطح لكن الجميع مكتفين من الجمعات والسوالف بعد يوم مرهق واجتماع عائلي اخذ النهار بطوله ....البنات بعدن صواني الاكل وجيكات العصير على طرف الزوليه وضيقن حلقة اجتماعهن حوالين ام عايد بحماس تكلمت هيفاء بلهفه : يالله علمينا وش قصة الثار
ام عايد التفتت على باب السطح ثم التفتت تتأمل وجيه البنات وحده وحده تتأكد ان الحاضرات من الي يحفظن السر واهي اكثر من يعرف معادن افراد العائله فرد.. فرد اطمئنت لمجموعة جليساتها وارجعت تناظر باب السطح ثم التفتت على هيفاء
قومي طلعي المفتاح من الباب ثم سكريه وقفليه من يمنا !!



______________________


تم البارت السادس والاربعين


___________________