السلام عليكم ورحمة الله وبركاته


انااااااااا جيييييييييت وجبببت المعدات معي وأبي اشنها على الشياب أجل متعب خزام* حسبي الله عليك تبرأت من الولد ومن وراء تتبع أخباره ترى ولدك قبل يصير ولد العاتي مو معقولة يا ناس يأخذه بذنب غيره وش سوى هو وش ذنبه .. وش بين العاتي والعشوان بينهم ارقاب لكن مين اللي بدأ ومن تعدى وليه الجد سكت كل هالسنين والحين قال ثاري بأخذه .. ومين الحرمه اللي تذكرها؟ أم عدي!! وليش ولده عدي ما تربى عنده لهدرجة كرهه من كرهه للعاتي فيه حلقة مفقودة بسالفة

بروق تبون الصراحه شخصيتها ما ابلعها ولو ما خاطر خزام فيها كان علوم بس يمكن مع الوقت أتقبلها ليش لا لأن اللي مرت فيه يخليها في حاله ترقب وهجوم يمكن اذا استقرت حياتها نشوف شخصيتها الطبيعة .. أما سالفة زيارتها لأهل يوسف ؟! ليتها مع البنات جلست مو كل العائلة خير ولو أنه بحسبه أهلها خلاص تطلقت

أبو بروق اتضح لنا أنه عارف وين يوسف واتوقع قال له كل شي يوسف ويمكن أبو بروق وراء توظيفه إلا اكيد

يوسف هذه بداية التغيير واصلاح نفسك والا راح ترجع لقديمك ليت يتعدل عشان نفسه

حلا انا يالله متحمله عروب وسحر وعلومهن جيتي انتي أثقل طينه منهم رباااااه وفوقها تبي تشتغل عشان يوسف يعني تبي تحط دوبها دوبه هزلت والله ما أقول إلا عسى تسنعين وربي يعين عليك وحده فارغه والله

سياف الحين على قولهم انه جلف وكذا بروق ماتبيه ومع طبعا حصاره لها وان كلمته فوق كل شي حتى رغباتها وكذا سوت اللي سوته عشان يبعد عنها لأن تعرف أن نفسه عزيزة كل هالتخطيط والتنفيذ تهقون يرجع على رأسها وكما تدين تدان لأن فعلا كسرته ويا شين كسر الرجال واللي مثل شخصية سياف فعلا كسره كبير ويبقى السؤال هل يكسر القاعدة ويتقدم لها ويمكن ويمكن أن أبو بروق عرف دافع بنته من تزوجت من يوسف وأنه عشان تبعد سياف عنها اتوقع ذكرت زي كذا ليوسف ويمكن يوسف قال لابوها .. ومع ذلك بروق من وافقت على يوسف وهي تعرف وش طينته وفوقها مبيته النية على الطلاق ولو أنها في آخر شي عرفت وش كبر غلطتها لكن أغبى قرار اتخذته كيف تامن نفسها عند واحد ما يخاف من حدود ربه

خزام قره عينك أخيرا انفك الحصار وتقدر تخطبها ولا اتوقع أبو بروق يرفضه خصوصا صله الجيره اللي بينهم أو السر اللي يخفيه عن بنته وراء بلاوي ويمكن بذمه يوسف والله ما ادري لو مرجعها كل شي جايز* .. أما مسألة أن خزام يرفض استقبال ولد عمه هذه مستحيلة لكن من المقتطف يتضح أن عروب ما قدرت تمسك لسانها كما العادة ومدخله نفسها في متاهة مالها داعي وقدام رجال غريب فعلا شخصية مزيد يصلح لعروب يادبها كويس أما المسألة الأخرى من أخذ مزيد خواته لعند خزام وأمه مالها داعي يا كثر الشقق والفنادق يعني هم جايين عشان السوق وكله يوم وماشين وفوقها امهن ما أتوقع معهم واللي أكبر من كذا مو من قوه العلاقة بين أم خزام والبنات ولا حتى قوه علاقة خزام بأهله والاعظم كره ال عدي لهم الحين دخل نفسه في متاهة ويلا اطلع منها

*
انتظر البارت الجاي على خير واللي فيه أكشن ومشاكسات نسائية رهيبة

وفي النهاية يعطيك العافية نبض وربي يبارك لك في وقتك ويسعدك

البارت الخامس والعشرون


اهدي البارت ل الشموس

واهديه ل امال العيد

واهديه ل فيتامين سي

واهديه لمتابعاتي في الانستقرام
وخاصه المتفاعلات منهم





مزيد وقف : انا لحد هنا وخلاص زهقت بنبات الليله في الرياض وبكره اجيبتسن مرتن ثانيه
البنات ناظرو في بعض بفرحه وهتفت اميره : ياسلام عليك نبات عند خوالي
مزيد عقد حواجبه وبصرامه : والاحتى تحلمين
البنات ارجعو يناظرون في بعض بزعل ثم ناظرن فيه
وتكلمت لطيفه : اجل وين
مزيد بثقه :عند خزاااام ...
لطيفه اشهقت بفجعه : ياويلي هذا الي دخل جدي المستشفى وبغى يذبحه !!
اميره بكره وعصبيه :بتودينا عدوانا
مزيد عصب : يامال الوجع خزام ولد عمنا وش دخله في العدوان الي تحتسين عنهم وانتي الثانيه
جدتس الي انتي خايفتن عليه لويطق خزام شوكه مات حسره عليه
لطيفه بعصبيه : انا هونت ماعاد ابي ثوب طابت نفسي يالله بس عودنا لبيتنا
اميره بتأييد : اي نعم لاعاده الله من عرس تسان بيدخلنا لبيوت ال معدي
مزيد انقهر من تفكير خواته : صه انتي وياها خزام ولدنا يال شعوان مهوب من ال معدي وبيته بيتنا وبنبات عنده رضيتن والاانرضيتن
اميره بعصبيه وزعل : هاخل احد يقرب مني والله لاطلع عينه لاتقول رخي راستس وخلي المشاكل تعدي
مزيد عقد حواجبه اخته ذي تغث : مصخنه !فيتس شي ؟ ولد عمنا ذا وماعنده الاامه مرة عمك والله يالي تعرضها بشي مايحصلها خير
لطيفه تبي تطمن اكثر : يعني مانا بشايفين غير امه
مزيد طلع جواله من مخباه واهو يستعيد معلوماته
عن بيت خزام ومتاكد ان معه وحده من خالاته بس
مايدري ليه ماكانت موجوده يوم امه زارت ام خزام
يمكن مابغت تشوف امه وصرفت عمرها تنحنح
واهو يفتح جواله : اهم شي ماتخطون على امه !!وابتسم واهو يصد عن خواته مايدري ليه تخيل
ان خواته يتهاوشون مع خالت خزام والغريب انه مالقى في نفسه اي ميول لرفض الفكره في النهايه هو يكره ال معدي مثله مثل اي شعواني غيره وثارهم عند ال معدي ماهوب هوين
دق على جوال خزام اكثر من مره والارد عليه
عقد حواجبه بعصبيه : الايالمخنز ياخزام مسوي فيها يعننكم متبرين مني
لطيفه تنهدت براحه : اهه شفه مايبلع لنا شوفه خلنا نعود
مزيد ابتسم لخواته يدري انه عيفهن الرياض كلها يوم قرر يبات في بيت خزام : امشن قدامي للدرج
اميره استبشرت خير خاصه مع ابتسامته العريضه
: عين العقل نعدي فوق نخم لنا فستان ل لطيفه
حتى لويمشي الحال ثم نمشي للمزاحميه
لطيفه ماعلقت لانها ماهي مرتاحه لمزيد تعرفه لاحط شي في راسه نشبه مشت وراه واهي تشوف
كيف طنش اميره والارد عليها ازفرة بضيق ماهي
متخيله كيف يبيهم يباتون في بيت ناس مايعرفونهم حتى لوكان ولد عمهم مايعرفونه والايعرفون امه والمصيبه ان جدها متبري منه
وخواله اعداء اهلها .......صحيح ان امها امدحت
امه يوم جتها في بيتها بس في نفس الوقت قالت لهم انها طول ماهي عندهم كانت ميته من الخوف
لو تلاقط مزيد وخوال خزام كان سال الدم لالركب
واهم ماخلصو من الدم القديم علشان ينتثر بينهم
دمن جديد ......صحت من هواجسها على صوت
مزيد : ام خزام داخل في الكوفي هذا
اميره ارفعت راسها تتأمل المدخل الفخم وتعلقت عيونها على الوحه الكبيره (كوفي شوب العاتي )
: الله يادلع العجيز كوفي شوب مره وحده ورا ماكتبت قهوة العاتي والاشوفوني كشخه
لطيفه تلبسها الهم : مزيد تكفى خلنا نروح الله لايعيده من عرس والايعيده من سوق والله اني ماطب هالعرس والااقف عليه
مزيد باصرار :ادخلن داخل اسئلن عن ام خزام وقلون لها مزيد برا بيسلم عليتس
اميره بعصبيه : انا بقعد معك هنا
مزيد نفز عليهم بعصبيه : اقول ادخلي انتي وياها سلمن على مرت عمكم وخلنها تطلع لي بسرعه اخلصن علي
اميره ولطيفه ناظرن في بعض بقهر وتحركن جهة المدخل وقبل يدخلن نزلن الاكياس الي معهن على
جنب جدار المدخل من داخل علشان مايدخلن شايلات شي اميره اسحبت عباتها من فوق راسها نزلتها على اكتافها وسحبت النقاب على تحت توسع
في فتحته اما لطيفه ادخلت زي ماهي بعبايتها الراس المسكره بالكامل ونقابها بفتحته الضيقه
لطيفه انسانه مسالمه رزينه اجتماعيه ماتحب المشاكل والاتحب التفاخر بالانساب والاتدخل نفسها في مجادلات المجالس لكن شعورها انها
داخله على العدو التقليدي لعائلتهم خلاها تتحفز
وتشد طولها وتستجمع قوتها ....يمكن ماكون قويه
بس دامني دخلت محل عدوانا ومكانهم لازم ادخله شامخه لأني امثل عائله ماتكسر عينهالأحد ....اميره ماكانت اقل من لطيفه تحفز واعتداد بالنفس رزت
طولها ومشت بثبات ....يعتبروني مطفوقه ورجه
بس ماعلي منهم هماهم يقولون الجاهل يفلق والعاقل يعصب وماعلى الجهال حرج ....والله من فلقتن بيحصلونها بس خل احد ينطق بحرف والله ماسكت لهم ....تجاوزن الممر داخلات لصالة الكوفي شوب الواسعه لاحظن ان مافيه غير طاوله
وحده مشغوله في الجهه البعيده عنهم ...حرمه سعوديه بمظهر مريح وناعم لابسه بنطلون جنز وبلوزه حرير مشجره ورابطه شعرها ذيل احصان
كانت طالعه من باب غرفه ماميزن ايش هي بالضبط وجايه تمشي لهم ...احساس بالشفقه
غزى صدورهن هالحرمه الحبوبه تشتغل عند ال معدي !!
اميره تقدمت لها تبي تخلص من الوضع المزعج الي هم فيه رغم ان امها امدحت ام خزام لهم
بس احساس العداوه الي بين العائلتين مخليها
تتوقع ام خزام حرمه شرسه وبملامح قاسيه امها في النهايه من ال عامر والوضع عندها عادي مهما تحيزت لزوجها واعيالها ماراح يكون احساسها بال معدي نفس احساسهم هم ال شعوان قربت للحرمه
وفي نفسها ياعزتي لتس انتي تشتغلين عند الشيفه ام خزام اكيد انها مطلعه عويناتس يالبى عويناتس اي والله ...وصلت لها الحرمه : حياكم تفضلو
اميره ابتسمت من تحت النقاب : زاد فضلتس نبي
ام خزام
قالته واهي تلفت تدور بعيونها واهي متوقعه تشوف حرمه مبين فيها الشر !
ام خزام ابتسمت لهم ببشاشه : انا ام خزام
لطيفه واميره ناظرو في بعض اخر شي توقعوه ان كمية الطافه الي شايفينها قدامهم تكون من ال معدي
اميره ياربي وش ذا شوية شر يرحم امتس شعر منكوش اظافر اطوال اقلها عيون حمر !!
لطيفه كانت اسرع من اميره في تجاوز الصدمه
تقدمت لام خزام تسلم عليها بعد ماعرفت عن نفسها : حنا بنات عم ولدتس ....خوات مزيد
ام خزام سلمت على لطيفه بحفاوه وترحاب
: ياهلا والله وغلا وشلونتس وشلون ام مزيد عساها بخير
لطيفه بهدوء : كلنا بخير الله يسلمتس
اميره تقدمت تسلم على ام خزام وداخلها صراع قوي لطافة الحرمه وبشاشتها تحثها على انها تتقبلها بصدر رحب وتسلم عليها بنفس الحفاوه
وحقيقة كونها من العائله المعاديه لهم تجبرها على النفور منها وفي النهايه سلمت عليها برسميه وبرود
عذبه التفت على ورى ونادت :عروب تعالي سلمي عندنا ضيوف
عروب جت لابسه برمودا ابيض وتيشرت اسود عليه صورة شفايف حمرا كبيره محدده بالكرستال
وشعرها منثور على اكتافها ووجهها مزين بمكياج
ناعم وانيق سلمت عليهم برسميه واهي ماتعرف منهم لاكنها متعوده على معارف عذبه الي مالهم حصر وماهي اول مره يزورونها الحريم في الكوفي
لطيفه سلمت على عروب بنفس الرسميه
اميره نفس الشي لاكن بجفاف اكثر واهي تحس كمية العداوه تجاه هالبنت اوضح واقوى منها تجاه
ام خزام
ام خزام اشرت على عروب الي اوقفت جنبها بعد مانتهى السلام : هذي عروب اختي خالت خزام
ثم اشرت على البنات ووجهة كلامها لعروب : وذولي
خوات مزيد بنات عم خزام
البنات مافاتهم كمية الكره والاشمئزاز الي ظهرت
على وجه عروب لمى عرفتهم وماكفاها مجرد التعبير الصامت انطقت بحقد : بنات ال شعوان ولكم عين تجون لحد عندنا بعد الي سويتوه في خزام
عذبه اقطعت كلامها بحده : عروب عيب عليتس
اميره ردت بسرعه : ماجينا عندتس جايين عند ولد عمنا
عذبه تدف عروب تبيها تروح وفي نفس الوقت ترد على اميره : حياكم الله عند ولد عمكم
عروب بقهر : طاردين خزام وترحبين فيهم الله لايحييهم
لطيفه بتعقل : اطرده جده في ساعة غضب والدم مايصير ماء
عذبه باحراج من تصرفات عروب : شي اكيد
قاطعتها عروب : وزي ماجده اطرده حنا نطردكم
لطيفه اسود وجهها من القهر واميره ردت عليها بانفعال : لادخلنا بيتس اطردينا حنا جايين لخزام
وحنا وخزام شعاوين ونخلص بينا يطردنا نطرده بكيفنا مالكم دخل بينا يال معدي
عذبه دفت عروب وراها :بس عاد ادخلي والاتكلمين باسم خزام خزام مايطرد اهله
والتفتت على البنات : حقكم علي امسحوها في وجهي
لطيفه جرت اميره بيدها عشان يطلعون : وجهتس ابيض مزيد يحتريتس برا يام خزام بيسلم عليتس
ام خزام : بالبس عباتي واجي
اطلعن البنات من عند ام خزام واهن حدهن مقهورات من عروب ومقهورات اكثر من مزيد الي اجبرهن يقابلن حريم ال معدي
عروب اول ماطلعن البنات انفجرة على عذبه : ليه تستقبلينهم لحقتي تنسين حال خزام يوم جاء من عندهم
عذبه انفضتها بعضدها بقوه : مانسيت ولاني بناسيه بس لاتنسين ان هذولا اهل خزام وخزام ماهو بمسامحتس ان طردتيهم من مكانه ومحله
عروب انفخت بقهر : لأنه غبي
عذبه دفتها عن طريقها وراحت تلبس عباتها .....

مزيد شاف البنات جاياته ومبين عليهن العصبيه عقد حواجبه ونطق بحده : وش فيتسن
اميره بغضب : اطردتنا الكلبه
مزيد شد على قبضة يده بعصبيه : ام خزام
لطيفه بقهر :خالته
اميره كملت :عساها تتخلخل اعظامها
مزيد كشر بكره :يافرقا الوجه الودر ماعليكن منها
مالها علينا كلمه ....امه وش قالت
لطيفه : امه اجوديه وكل ماقالت اختها شي قامت تعذر منا
مزيد بتنبيه : اسمعن الهرج وافهمنه خزام ولد عمنا منا وفينا والي يمسه يمسنا وامه ارملت عمي الله يرحمه ومهما كان محسوبتن علينا والي غيرهم الي ياطا لتسن على طرف توطنه كله !
اميره بحميا : ازهلها...اه وجع...
قطعت كلامها وخمت جنبها تضغط عليه بيدها تتوجع من وكزة لطيفه لها بكوعها تنبها لجية ام خزام
ام خزام تقدمت لمزيد اوقفت قدامه على مسافه
كافيه وبدو يترادون السلام
مزيد بعد مانتهت السلامات بينهم : دقي على خزام من جوالتس وعطيني اياه الشيخ ادق عليه وسافهني يقاله مقاطع العائله
ام خزام بأحراج : الله لايجيب قطاعه مير مثلك يلتمس لخزام العذر وانت اخبر ان الي شافه مهوب اهوين
مزيد تحرك في مكانه ورفع ايدينه يفل تنسيفت اشماغه ويرجع يرتبها : ماجيت اتشره عليه ياعمه
ومهما صار بينا خزام منا وحنا منه ومرده لنا

عذبه فتحت جوالها الي كانت شايلته في يدها ودقت على خزام ثم مدته لمزيد
خزام كان موجود في محله وشاف اتصالات مزيد فيه وطنشها متعمد خلاص هالعائله ماعاد تعني له شي ومايبي يربطه صله باي احد منهم دق جواله
من جديد ونفخ بطفش :اففففف
مد يده للجوال وارفعه يتاكد من الرقم شاف رقم امه زفر براحه ورد :هلا يمه
وجاه الرد : يمه في عينك يالمرم ورا ماترد على رقمي
خزام سكر عيونه بانزعاج مزيد نشبه فكر يهاوشه يسكر الخط في وجهه يسبه يشتمه يقوله ببساطه
انه مايبي يشوفه بعد ماشافه
جاه صوت مزيد مره ثانيه يوم تباطى رده يتكلم بسخريه : بنيه واخطبوها ضيعت حسها
رد بعصبيه :انت وش جابك عند امي
مزيد مافاته عصبيه خزام : ابد طال عمرك جايين لسوق انا وخواتي ووالله اني مدفع فلس في الاجارات وبيت ولد عمي مفتوح
خزام ابتسم غصب مهما كره ال شعوان يبقى مزيد استثناء ويقدر يتعامل معه باي صفه بعيده عن
سالفة الدم والقرابه الي مزيد متمسك فيها
: ذكرني اعطيك نسخه من المفتاح طال عمرك
مزيد بضحكه :مايعتاز المفتاح وراعيته قدامي هالحين
خزام تذكر انه قال جاي ومعه خواته : اجل اخذ راعيت المفتاح معك انت وخواتك وروحو للبيت
بأمر المطعم اخذ لنا عشاء واجيكم
مزيد : صار
خزام :عطني امي
مزيد مد الجوال لام خزام :يبيتس
عذبه ردت :هلا
خزام : يمه روحي مع مزيد وخواته للبيت وانا باخذ
لنا عشاء من المطعم واجي وعروب خليها تكلم
هزاع يجيبها
عذبه :ابشر
سكرة من خزام وارفعت راسها لمزيد : اصبرو دقيقه بدخل اجيب مفاتيح البيت واروح معكم اله
مزيد ابتسم لها : اخذي راحتس ننتظرتس
راحت عذبه تاخذ شنطتها وتبلغ عروب ترجع مع هزاع ......
واميره جابت اكياسهم الي اتركوها داخل الممر وارجعت تاقف مع مزيد ولطيفه شافو ام خزام
جايه لهم انتظروها لحد ماوصلتهم ومشو هم وياها

عروب اتصلت على هزاع يجي ياخذها ولمى اوصلت البيت رفض يدخل معها مايبي يحتك مع اي احد من ال شعوان من بعد ماتبرو من خزام ومستغرب اساسا كيف جاء مزيد بعد كل الي صار
عروب انزلت من السياره وشافت الباب فاتح والبيت ماقدامه الاسياره وحده ماهي سيارة خزام
وهذا يعني انها سيارة الشعاوين ..جعلهم الماحي
ادخلت مع الباب المفتوح وارزعته وراها بقوه
ونطقت بكره وسخط واهي ملاحظه المشب مفتوح
وريح النار مشبوبه : همجيه وتخلف مخلين الباب مفتوح
مزيد استغرب من رزعت الباب قام بسرعه وتهايق مع باب المشب شاف بنت لابسه عبايه كتف ونقاب وعيونها باين الكحل والزينه فيها
تكى بكتفه على الباب متوقع ان هذي هي خالة
خزام : كسر يد
عروب طيرت عيونها فيه بحقد ونطقت بعصبيه
: كسر يكسرك كلك
مزيد ابتسم بسخريه على عصبيتها شكلها مشتاقه للهواش تجاوزها لباب الشارع وافتحه وخلاه مفتوح
ورجع وقف على باب المشب وعروب باقي واقفه
في نص المسافه بين باب الشارع وباب المشب
ناظرت في الباب الي افتحه وارجعت تناظر في مزيد :صدق مريض
مزيد يتسمخر :عندنا لاشبو النار خلو الباب مفتوح
كرم وسخاوه
عروب ماعندها مشكله تلاسنه لصبح دامه من الشعاوين الي تسببو في اذيت خزام :يتكرم البخيل من مال غيره
مزيد في داخله ناقد على نفسه انه حاط راسه براسها وقاعد يلاسنها ومع ذالك كمل : دامنا كلنا شعاوين مالنا واحد وانتي ....والابلاش
عروب افهمت انه قاصد يعايرها انها عايشه عند خزام كانت بتقول وحنا ربينا ولدكم يالشعاوين من خيرنا بس تذكرت انها اغلطت غلطت عمرها مره وحده لمى عايرت خزام بتربيت اهلها له وماراح تعيد الكره وتعايره قدام اهله اعطته نظرة احتقار
وتجاوزته داخله داخل البيت

عذبه قابلتها في الصاله امسكتها بعضدها تحذرها
:عروب ماتبينهم اصعدي لغرفتك وخليهم في حالهم اما انك تقابلينهم وتقومين تحذفين عليهم حكي مااسمحلك
عروب بقهر : خايفه على مشاعرهم اشوف
عذبه تحاول تمتص غضبها : ماعلي من مشاعرهم علي من مكانة اولدي عند اهله مهما كان ذولا اهله
ومايرضى عليهم لاتجرحين خزام بتصرفاتك المتهوره
عروب بقهر اكبر لانها تعرف خزام غبي وعاطفي بزياده واكيد بيزعل علشانهم : عساهم بسكاكين تقطع لحمهم وتفرمه فرم موب بس تجرحهم

عذبه تعيد عليها التحذير :عروب ترا الي بينا دم ماهو شين هوين لاتنبشين شين يخلي العايلتين يتناحرون من جديد وحنا ماصدقنا ان هالثار يخمد

عروب بقهر :ماني نابشه شي عسى الغربان تنبش قبورهم بس بروح اقعد على قلوبهن تسذا لعانه
ادري ان شوفتي تحرق كبودهن

عروب تجاوزت عذبه داخله للمجلس الي جلسو فيه
البنات وعذبه راحت تكلم خزام ....
ادخلت وشافتهن جالسات جنب بعض مانزلن والاشي حتى انقبتهن عليهن اوقفت عند بداية المجلس فصخت عباتها وطرحتها ونقابها ولفتهن في بعض ونزلتهن على الكنب وراحت اجلست على الكنب الي قدام البنات وحطت رجل على رجل ودخلت اصابعها في شعرها وانثرته بدلع على متنها
وتكلمت بوقاحه متعمده : ترحمون صراحه لذي الدرجه ماعندكم ثقه في اشكالكم ماتقدرون تفصخون النقاب
لطيفه واميره ناظرو بعض بصدمه هم مانزلو لأنهم
ماقدرو يرتاحون للجلسه في هالبيت الي يعتبر واحد من بيوت ال معدي العدو الدود لعائلتهم
مهما حاول مزيد يجمل الحقايق ويقنعهم انهم في واحد من بيوت ال شعوان هم مايحسون بهذا الشي
وماعندهم ثقه لافي خزام والافي امه ومتوقعات الشر كله من هالضبعه الي قدامهم ....بعمرهم مازارو احد من غير ماتكون امهم معهم كيف بيرتاحون ويحسون بالامان واهن يحسن بكراهيه
لكل شي يحيط فيهم .....اميره تجاوزت صدمتها بسرعه تحسد عليها وارجعت تحد نظرها لعروب
:واثقين في اشكالنا بس مانامن الغدر من اهل الغدر
عروب فاهمتها قصة الدم الي بينهم معروفه للكل
وماكان فيها غدر زي ماتبجح هذي : والله حنا ظربتنا بين العيون مانا من اهل الغدر زي ماقلتي
ثم ماكنكم اولا تقولون انكم جايين لولد عمكم والاانتم تخافون من بعض يالشعاوين
لطيفه فاض فيها العداوه بينهم صريحه ومافيه مجال للمجاملات : عسى عيونتس للفقع مانا خايفين من احد الخواف هو الي ترك ديرته النا وهج برقبته
عروب جنت جنونها كله كوم وانها تعاير ابوها وتنعته بالخواف كوم ثاني فزت واقفه واهجمت
على لطيفه : انا الي بمصع ارقبتس بيدي
اميره اعترضت عروب من دون اختها واشتبكت
معها عذبه ادخلت على اشتباكهن مع بعض وادخلت تفرع بينهن اميره كانت ماسكه عروب بشوشتها وتجرها بقوه وعروب كل ماجت تخم اميره من جهه ماتمسك الا العباه لطيفه سوت فيها تفرع مع عذبه صارت تبعد ايدين عروب عن اميره وتدفها وراها وماتسوي شي لاميره الي استحت اخيرا من عذبه الي شافت انها تبعد اختها عنها وتحاول تردها هي بهداوه وبلكلام الزين امزعت شعر عروب بقوه كمره اخيره وتراجعت ورى لطيفه
عروب تحس شعرها تمزع من جذوره من قو مصعت اميره له وتحس بقهر ماله حد من تدخل عذبه قامت تسب وتشتم وتحاول تنطلق على البنات مره ثانيه لاكن عذبه ردتها بقوه وكل ماحاولت تتقدم دفتها وراها لحد ماقدرت تسيطر
على الوضع وتسحبها معها برا المجلس
عروب تمشي مع عذبه وتحك شعرها من الوجع الي تحسه في فروة راسها : الحقيرات يسبن ابوي ويقولن انه هج من الديره لانه خواف
عذبه تميز بين شخصيات الناس وتقدر تتوقع تصرفاتهم والي شافته ان البنات كاشات منها ومستحيات واذا السالفه اوصلت لدم والثار فمافيه
شك ان عروب هي الي نبشت السالفه ومافيه شك ان البنات بيدافعن عن اهلهن بالي يقدرن عليه
امسكت عروب بعضدها وانفضتها بقسوه : اعقبي واخسي انتي تحسبين الثار هين يومنتس رايحتن تنبشينه ياقليلة العقل وكان قامو اهلهن فازعين واذبحو من اخوانتس واحد والاثنين يتقاضون فيهم لدمهم وش بتسرتس فيه نقنقة الدجاج الي انتي
شابتها عندي هنيا
عروب ازفرت بحقد : مهوب على كيفهم والله ان جونا لنذبحهم ذبحة عمهم الاول
عذبه ارجعت تنفضها والخوف من عواقب هالليله متلبسها : انتي مجنونه راستس فيه عقل والامضيعته والله ان سمع خزام هالكلمه منتس ليذبحتس بيده خلي عاد الي وراه اعقبي
وخس اعقبي لاتثورين الرياجيل على بعض اعقبي لاتوغرين صدر خزام على خواله ترا والله ان طلع من بينهم ماعاد يرجع خزام لاقفى اقفى .....
عروب بقهر:انا الي بذبح الي داخل واشرب من دمهن عساهن بالذابح الي يمشي عليهم كلهم هن واهلهن قبلهن
عذبه خافت ان عروب تجيب المطمه في ذا اليل
وتشعل الحرب بين ال معدي وال شعوان واهي
بليا رمادٍ على جمر يحتري من ينفخ فيه
اسحبت عروب معها للمطبخ واخذت جوالها من فوق طاولت المطبخ دقت على هزاع وقالتله يجيها
مع باب الشارع الجانبي من غير محد يحس فيه علشان ياخذ عروب معه .....عروب في قلبها قهر
وحرقه اكلتها تبي تنفك من عذبه وترجع على الرمم الي داخل تمسح فيهن البلاط لاكن عذبه مجودتها بقوه وعجزت تنفك منها ....عذبه اخذت عباتها الي
كانت منزلتها على كرسي المطبخ واسحبت عروب
معها طلعتها مع باب الصاله الي يفتح على سيب
جانبي يودي لباب الشارع الثاني مشت في السيب
واهي تجرها معها وتحلف فيها ان طلع صوتها مايحصلها خير اوصلت لباب الشارع وافتحته واندفع منه هزاع داخل : خير وش فيه
عذبه بقهر : اخذ المصيبه هذي معك قايمتن على بنات ال شعوان تعايرهن بالدم الي في ارقابنا بتشب النار في المسلمين
هزاع شهق بخرعه : ابو جراح لابارك الله فيتس من بنت
عذبه باقي متمسكه في عروب الي تبكي من القهر
طلعوها قبل تشفي غليلها في عدواتها
عذبه مدت العبايه على هزاع الي لبسها لعروب بالقوه واخذها معه لبيتهم ....
البنات داخل المجلس عدلن اعبيهن واطرحهن وقررن ينزلن نقاباتهن رغم ان خوفهن تضاعف
اميره التفتت على لطيفه وبهمس : حنا مهبل يوم دخلنا بيتهم من غير اسلاح
لطيفه بتائييد : مهبل وبس الامصرع منتهين والاكان اقلها نشتري من السوق موس نحطه في ملابسنا وندافع به عن انفسنا
اميره بقهر : الصرعه والله جيتنا هنيا احد يروح لعدوانه برجوله اقول دقي على مزيد خلينا نسري
لطيفه اخذتها الحميا : هالبيت بيت شعاوين والله ماظهر منه الليله واتركه لبنات معدي ذابحه والامذبوحه والادون منها والااكثر
عذبه كانت داخله مع باب المجلس واسمعت كلام لطيفه الي ارتفع صوتها فيه من العصبيه تعوذت من ابليس وحاولت تتجاوز اي شي تسمعه الليله مهما كان يبقون من اهل خزام وماتبي الفجوه الي بينه وبينهم تتسع اكثر ارسمت على وجهها ابتسامة مجامله وتقدمت لطاولت الخدمه نزلت الطوفريه الي في يدها عليها واخذت زمزمية القهوه تصب لهم ...مدة الفنجال للطيفه : السموحه يابنات مدري عروب وشهي قايله والاوش صار بينتسن وبينها لاكن انتن عارفات المشاكل الي بين العايلتين
من قبل واتمنى انتسن تجاوزن الي صار الليله هنيا علشان خاطر خزام الي راح ضحية شين ماله فيه دخل
البنات ناظرن في بعض بتوتر فعلا خزام هو ضحية خلاف ماله دخل فيه وهن من زمان راحماته ويشوفن جدهن غلطان يوم حسب واحد من اعياله
على عدوانه بس علشانهم خواله ..لطيفه ارجعت
تناظر ام خزام بحيا واهي شاكه انها اسمعت كلامها
: حنا ماخطينا على احد والي يخطي علينا مانا بساكتات له وولد عمنا له الحشيمه مانا بضاراته بشي
عذبه متاكده ان عروب هي الي بدت بالغلط وهذا اكثر شي مصبرها على الوضع الي هي فيه والاحتى هي بشر وتحس مثلها مثل غيرها وماتنسى ابوها وش كثر تعذب على درب هالثار والاتنسى انها هي وعمتها العاتي وعدي وخزام هم الوحيدين الي ادفعو فاتورة هالعداوه بين العايلتين تسلحت بالصبر وادفنت احقادها تحت ابتسامة مجامله
وصوت هادي : الي اخطت عليكم اخذت حقكم منها وطلعتها من البيت وبيت ولد عمكم مفتوح لكم بمعزه وكرامه
لطيفه ابتسمت ماهي متعوده تتصدر المجالس والاانها تناقش هالامور الكبيره لاكن الوضع الي انفرض عليهم اجبرها تاخذ دور الحرمه الكبيره الفاهمه العاقل وفي النهايه هي بنت ناس اهل طيب ونخوه وكرم وامها تخليها هي واختها يقدمون القهوه والضيافه للحريم ويسمعن سوالفهن ويتعلمن بصمت وهذا الشي خدمهن في ليلتهن السيئه هذي : جزاتس الله خير ماتقصرين




خزام وصل للبيت ودخل واهو شايل اكياس العشاء
اول مأستقبله واهو داخل ريحة شبة النار ابتسم
تلقائي وداهمه شوق ل الشخص الموجود داخل تقدم متجاوز باب المشب نزل الاكياس في المدخل ورجع ل المشب مزيد شافه وفز يسلم عليه : ارحب الله حيه
رد عليه خزام بضحكه لانه هو الي مفروض يرحب
: ههه الله يبقيك وحياك الله في محلك
مزيد يلمح انه ماكان يبي يرد على اتصالاته : شي مفروغ منه محلي غصبٍ عليك
خزام أشر باصبعه السبابه على راس خشمه :على هالخشم غصب ورضا والي تبي
مزيد بابتسامه :عليه الشحم ياولد عمي
خزام كشر يلف يلف ويرجع على سالفت ولد العم
: خل عمي وعمك على جنب انا اتعامل معك بصفتك الشخصيه
مزيد رجع يجلس مكانه وبرواقه : ياكذبك ياولد عمي لوني اجنبي بتخلي امك تركب سيارتي ؟!
الرد صدم خزام ياالله لوما هالاسم الي يقيده لهم لوما هالدم الي اختلط بدمهم ماكان سمح له ياخذ امه في سيارته.... ماكان سمح له يدخل بيته في غيابه وكان اقل شي اتصل بهزاع يستقبله ويقعد معه لحدمايرجع .....وقبل كل ذا كان تذابح هو وياه يوم لقاه مقتحم بيته في يوم من الايام !

تجاهل الرد على كلام مزيد وكأن ماله اهميه عنده
:بدخل العشا للوالده واجي
مزيد اتسعت ابتسامته واخذ فنجانه صبله قهوه ....
وبينه وبين نفسه الله يعين عليك انت وجدك الله العالم انك النسخه الثانيه منه .............


تتقلب على السرير الواسع بقلق ماعندها غرفه لضيوف وماهم متعودين احد ينام عندهم غير
سحر الي تنام مع عروب على سريرها ولاتقدر
تعطي البنات فرش ينامون في غرفة الجلوس
وغرفة خزام تحت علشان كذا اعطتهم غرفتها
وجت هي في غرفة عروب ....استقرت على ظهرها
وافتحت عيونها تبحر بنظرها في الظلام وتبحر
بعقلها في تحليل الوضع الي هم فيه لمى جتها
ام مزيد قبل فتره ماحست باي مشاعر سلبيه
اتجاها مالقت اي صعوبه في تقبلها .....هل لان
اسمها مرتبط بال عامر ....منطقيا البنات الي عندها
ضعيفات مامنهن اذا لاحد ....بس الاسم ....ايه المشكله كلها في الاسم والانتماء والعائله
ظالم الي يصب احقاده على قالب عائله كامله
ليه ماينحصر الخلاف والحقد بين اطراف الخلاف بس ..لوفكرة من هالمنطلق معناته مال ال معدي
عدو الا مشعان الحاله ومال ال شعوان عدو الا ابوها راجح الحاله .....انقبض قلبها يعترض افكارها
المحلقه خارج سرب الواقع ...عدو ابوي عدوي .....
بالله عليتس يعني انتي ماكسرتي قيد هالعداوه وتزوجتي شعواني ....لا لا عدي ماكان منهم عدي
منا حنا ال معدي حتى لوشال اسمهم ......حتى
هالبنات مالهم دخل في الدم والثار الي بين ال معدي وال شعوان .....بس ماني قادره اتقبلهم
قلبي نافر منهم صح عاملتهم بما يرضي الله بس
من داخلي احساس بالحذر والتحفز ينبهني في كل
كلمه وكل لفته هذولا عدوان انتبهي لاتزلين قدامهم ...وهذا يردني لنقطة البدايه ل ان العداوه
مصطلح تعصبي يجبر العائله الوحده على تبني
شعور الكراهيه تجاه شخص اوعائله ثانيه .....طيب
ليه الكراهيه هي بس الي تعمم ...ليه يوم نجي نحب نقول بنحب الي نبي وحبو الي تبون ....
لان الكره يجي بسب مؤذي والي ياذي احد من اهلك لازم تاقفين في وجهه وتردين اذاه !!!!!
ارد اذاه !!!!
يعني هم من حقهم يأذونا ؟!
لا لا الي اذاهم مات الله يرحمه ......حاقدين عليه ماسامحوه .....اشهقت بعنف وادفنت وجهها في مخدت عروب تبكي الي يصير لها كثير ..كثير عليها بالحيل ....

في الغرفه المجاوره ماكان الحال افضل ...تقلبت
كثير وماهي قادره تهدا او ترتاح تكلمت واهي متاكده ان اختها تسمعها ...مزيد نايم في المجلس
وولد عمنا الشعواني نايم عنده وحنا هنا ماعندنا الاالعدوات وش يضمن ان الضبعه اطلعت من البيت وان تسانها فيه ماهي بعيده تغدر فينا ...
لطيفه اشهقت وفزت جالسه برعب من استنتاج اختها انزلت من السرير واركضت للباب ضربت
ازرت الاضائه باصابعها باستعجال ونورت الغرفه
مدت يدها لمقبض الباب وامسكته تهزه تأكدت
انه مقفول والمفتاح فيه التفتت على اختها ووجهها
خالي من الالوان كلمت اميره خلت الخوف يستوطنها كانت متضايقه وماهي مرتاحه في مكان
تشاركها فيه عدوه بس الحين هي خايفه لحد الرعب
اميره استوت جالسه والتفتت لدولاب الضخم بشك .. لطيفه التقطت نظرتها والتفتت لنفس
المكان وهنا تكادت من حماقتهم لمى وافقو يجون
مع مزيد لهالبيت الدولاب كبير ..كبير ...كافي لانه يشيل قبيلة رياجيل داخله !!!
اتسعت احداقها واجمدت مكانها تخاف تتقدم لدولاب وينفتح عليهم باب من الشر مالهن قدره
في مواجهته التفتت لاختها بأستسلام وكأنها تقولها
جاء دورك !
اميره انزلت من السرير بحذر وتقدمت لاختها بهدوء ابعدتها عن الباب وافتحت قفله بشويش
واهمست لها :خليك هنا لوصار شي لاتوقفين الافي المجلس !لايردك عن المجلس شي والونه انا !!!!
وبعكس الخوف الي داخلها توجهت لدولاب بقوه
وافتحت بابه بشراسه وماقابلها الاالبخور وهدوء الالوان في الملابس المعلقه بترتيب انتقلت للي بعده والي بعده ونفس النتيجه في كل باب تفتحه
ماتشوف الاالجمال والترتيب والروايح الي تفتح النفس استدارت لاختها والتقت نظراتهن ببعض
وماشافن الاالخوف تحركن في نفس الوقت والتقن في نص المسافه احضنن بعض وبدن يبكن ليه يجيبهن مزيد لبيت نصه لهم ونصه لعدوهم ويمكن هالعدو اخذ النص الي يخصهم في صفه !
ليه يكون هو آمن مع ولد عمه الي من دمه والحمه
واهن هنا يسكنهن الخوف مع العدوات ؟!
وليه ماخذن بثار العائله واذبحن ذيك الضبعه الي تهجمت عليهن يمكن تبرد كبد جدهن ويرتاح من هم هالثار قبل لايموت؟!

في المجلس
مزيد وخزام نامو ملء جفونهم ولادرو بشي من الحرب النفسيه المشتعله داخل البيت
قاموالفجر وصلو وارجعو ينامون
وهاذا هم قامو للمره الثانيه الساعه تسع الصباح
غسلو والبسو ثيابهم ....مزيد راح يشب النار ويسوي القهوه وخزام رجع للمجلس يطوي الفرش
خلص وحط الفراشين فوق بعض وشالهن داخل فيهن لصاله نادا قبل يدخل وقالت له امه ان البنات في المجلس حط الفرش في الصاله ودخل
عند امه في المطبخ لاحظ ان وجه امه متنفخ من النوم واستغرب امه متعوده تقوم من بدري : ورا
وجهتس مهوب ازوين كانك مارقدتي
عذبه تعذرت ببساطه واهي ترتب صحون الفطور
في الطوفريه : عطيت البنات غرفتي ونمت في غرفة
عروب وماجاني النوم عشان غيرت افراشي
خزام :كان خليتيهن ينامن في غرفة عروب
عذبه بسرعه : لا عروب ماتحب احد غريب يدخل غرفتها
رفع حاجبه باستنكار ومايدري ليه ماعجبته الكلمه
لاكن في داخله صوت خفي يقوله ماهن غريبات وياخذن المكان الي يبنه من البيت ..اشياء تافهه وبسيطه مستحيل تلفت انتباهه في وضع ثاني
بس في حالة العداوه بين اهله وخواله كل المعاني تتظخم وكل الهمسات مسموعه !!
طلعه من هواجسه صوت جواله يدق ارفعه لاذنه ورد :هلا هزاع
هزاع :تخيل ..تخيل من الي عندنا في المكتب
خزام عقد حواجبه : من
هزاع : بررروق
خزام طلع من المطبخ لصاله يكلم براحته
:وش جابها عندكم ووش دراك انها هي ووينها فيه هالحين
هزاع بضحكة :ههههه اشوي اشوي
خزام قاطعه : اخلص
هزاع : عند خالها في مكتبه
خزام شد قبضة يده بغيض : وريان الزفت وينه
هزاع ضحك بقوه على غيرة خزام :ههههههههه
ابشرك ريان هو الي استقبلها بنفسه قدام المبنى
ووصلها بنفسه لمكتب ابوه
خزام بعصبيه : وانت وش دراك انها بروق
هزاع بتسليه : ريان كان عندي يوم مره ابوه وقاله ينتظر بروق عند مدخل المبنى ويوصلها لمكتبه
خزام بغيض : واهي وش تبي عندكم
هزاع : ريان يقول بتشوف اجواء المحاماه واذا اعجبتها ادرست قانون وصارت محاميه
خزام بغضب : بعيد عن عينها هذا الي ناقصني تجلس مع المجرمين وتدافع عنهم
هزاع بجزع :خير خير من قال انا اندافع عن المجرمين حنا ندافع عن المظلومين ياسيد
خزام بغضب : ايه هين اقول تقلع اعدمت يومي
سكر الخط وحط الجوال في مخباه وراح لامه
الي شافت تغير مزاجه : خير هزاع فيه شي
خزام ابتسم لامه يطمنها : لا مابه الاسماجته المعتاده
قاله واهو يقرب من دولاب المطبخ وياخذ طوفرية الفطور الكبيره من على رخامته ........
دخل المشب واهو يشوف مزيد ماسك جواله يكلم
ويسمعه يقول : خلاص ان شاء الله نص ساعه ..ساعه بالكثير واكون عندكم ....حياك الله ...مع السلامه

حط الطوفريه قدامه وناظره بتسأل :خير وين بتروح
مزيد مد يده ياخذ كاسة الشاهي الي مدها له خزام
: بنروح لجدي نسلم عليه ونتغدا عندهم
قاطعه خزام : يارجال غداك عندنا وا..
قاطعه مزيد : لاتحلف مابينا رسميات مقدر اجي لرياض واروح وانا ماسلمت على جدي وخوالي
خزام لقاها فرصه يسئله عن يوسف وقيده عرف انه ولد خاله : على طاري خوالك فيه واحد منهم مناسبن ال ماجد
مزيد واهو يقطع الخبزه الي في يده :ايه ليه تعرفهم
خزام : واحدن منهم يقاله جاسر كان جار ابوي الله يرحمه
مزيد : الله يرحمه
خزام يكمل : وجار خالي ابو هزاع عاد خالي شافه من قريب وارجعت العلاقه بينا من جديد وسمعت
ان يوسف ال عامر طلق بنته يقولون انه مايصلي وطلبو طلاق بنتهم منه
مزيد واعتقاده ان السالفه هرجه عاديه وماجاء في باله ان خزام له هدف من وراها : ايه خابرن طلاقه
يوسف الله يهديه مسرفن على نفسه وصلاته والله ماني بشاهد عليها لاني مقيمن معه ولاادري عنها لاكنا نسمع انه مايصلي
خزام : يعني ذا بلاهم
مزيد : جايز البنت امي تمدحها بلحيل وجدي وخالي راشد بعد يمدحونها ويقدرونها ومانهم من الي يمدحون على ماش
خزام ابتسم بارتياح وكمل فطوره ........
بعد الفطور اجلسو يتقهوون
مزيداعتدل في جلسته بجديه : وينك عن جدك مازرته يوم تنوم في المستشفى بسبتك بغى يموت الله يطول في عمره
خزام حد نظراته لمزيد وبحقد : ولو مات ماني بحاظرن عزاه والاهو جدي والااعرفه
مزيد بقهر :عسى عمره طويل وجدك غصبن عنك
لاتصير بزر علشان كم كلمه نطلها عليك جدك في ساعة غظب ومايقصد منها والاحرف تقوم تقطعه
خزام بغضب : لا يقصد ويقصد ويقصد وتبرا مني بالفعل قدام يتبرا مني بالهرج والاعمره عدني والاعد ابوي من اعياله ولاله عندي الامثل ماقدم
مزيد بعصبيه : انت خابر ان الحرقه الي في قلبه اقوى منه وتغلبه
قاطعه خزام بصرخه : بس مابي اسمع والاحرف ازياده في هالموضوع

مزيد فضل انه يكتفي هالحين بالي قاله والجايات اكثر ..







___________________________




ادخلو الشركه هو واخته جايين مع بعض اتجهو ل المصعد ادخلوه وضغط زر الدور الثاني التفت
على اخته : اكيد متحمسه تشوفين مكتبك
حلا حدها متشوقه تشوف مكتبها بس مشتاقه اكثر ل المزيون الي في مكتب باسل انقهرت انها ماتعرف عنه والاشي حتى اسمه... ياه اسبوع كامل ماشافته اطول اسبوع في حياتها ابتسمت لاخوها بفرح اعتقد انه بسبب المكتب : اكيد متحمسه اشوفه بس اول شي بروح اصبح على بابا اليوم ماشفته
انفتح باب المصعد واطلعومنه ناظرت فيه حلا
:بتجي معي
باسل هز راسه برفض واهو يخلل شعره باصابعه بغرور :لا اناعندي شغله صغيره بخلصها قبل
قاله واهو يبتسم لنفسه وفي داخله لازم امر قسم الكب كيك قبل
حلا ماهتمت كل الي تفكر فيه انها تشوف المزيون
اتجهت لقسم الاداره مباشره ادخلت مكتب السكرتير وتجاوزته من غير ماتلتفت له واهو
نفس الشي كمل شغل من غير مايهتم بدخولها للمكتب تعود عليها وعلى اسلوبها المتعالي لاتطق باب لاترد سلام لاتسئل بس اتدرعم وتدخل حتى لو عند ابوها عملا ماتهتم ........حلا ادخلت من باب مكتب باسل وعينها على مكتب يوسف وخابت امالها لمى شافت المكتب فاضي تجاوزته على امل تشوفه في مكتب ابوها افتحت الباب كالعاده من غير طق والااستئذان وادخلت وياكبر فرحتها واهي
تشوف يوسف واقف جنب كرسي ابوها ومنحني
على ملف بين ايدينهم وواضح انهم يتناقشون في محتواه ارفعو روسهم سواء على فتحت الباب وقابلتهم ابتسامتها العريضه تقدمت لابوها بسعاده
وانحنت عليه باسته على خده :صباح الخير باباتي
ابوباسل لف بكرسيه الدوار جهة حلا مخلي يوسف ورى ظهره والي بدوره وقف يتفرج على العرض المسرحي برايه !
ابوباسل بفرح وجه بنته كمية سعاده بالنسبه له
: شفتي مكتبك
حلا بدلع : لا لسى بس اكيد يهوس
يوسف كشر على المصاله الي تحوم الكبد
ابو باسل مد يده لخدها قرصها فيه واهي في نظره طفله يحقلها الدلال وواجب عليه يرضيها : روحي شوفيه اكيد بيعجبك
حلا بنفس الدلع الي كان في الواقع لابق لها وجزء من شخصيتها من غير تكلف لاكن يوسف كان يشوفه على انه مصاله وثقالت طينه
: رايحه اشوفه طيرااان بس يابابا لوماعجبني تغيره على طول
ابوباسل ساحب على يوسف وناسيه من اساسه دام دلوعته قدامه مايشوف والايسمع غيرها اشر على عيونه الثنتين باصبعه السبابه : من عيوني
حلا ناظرت في يوسف وابتسمت بسعاده مبسوطه ان ابوها اظهر دلاله لها قدام يوسف انحنت على ابوها باسته على خده : تسلم عيونك
قالته وتحركت طالعه من مكتب ابوها تخاف تقعد اكثر ويكتشف الحفله المجنونه الي تظرب داخل صدرها ياه ياجمالو ...التفتت على مكتبه وشافت عليه لوحة التعريف بالاسم تذكرة انها باقي ماتعرف اسمه تقدمت لمكتبه واخذت الوحه بيدها ارفعتها قدام وجهها تقراها (يوسف ) اف يالمغرور بس يوسف طيب يوسف مين رجعتها مكانها وجاء في بالها تشوف الوحة التعريفيه لاخوها راحت لمكتب باسل وشافته نفس الشي كاتب اسمه الحاله تذكرت ان ابوها كاتب اسمه واسم ابوه واسم العائله وتحتها
المسمى الوظيفي فكرة انها راح تسوي نفس يوسف وباسل وتكتب اسمها لحاله ابتسمت لنفسها بفرح واطلعت من المكتب ......

باسل راح للقسم النسائي الي كان عباره عن صاله واسعه فيها اربعه مكاتب مكتبين جنب بعض يفصل بينهم مسافه قصيره كافيه للحركه بين المكتبين بحريه وهالمكتبين على يمين المدخل
وخلفهم الجدار مباشره ثم مكتبين متقابلات
واحد عن يمين المكتب الاول والثاني على يسار المكتب الثاني ترتيب المكاتب جاي على شكل مربع اذا تخيلنا ان الضلع الرابع مفقود في الجهه
الثانيه من صالة المكاتب الواسعه توجد استراحت
الموضفات عباره عن جلسه من ثلاث كنبات جلد اسود كنبه ثلاث انفار وكنبتين مفرده وقدامهم طاولت خدمه وفي الزاويه الي من جهة باب الحمام برادة مويه صغيره بينها وبين باب الحمام يجي مسافة متر ونصف
هالمساحه الي صارت استراحه كانت مكان المكتبين المتقابلين قبل تقرر حلا انها تحتل غرفة
استراحة الموضفات وتحولها لمكتب لها لانها ارفضت تجي مع مديرة القسم في مكتبها
في منتصف الصاله مدخل عباره عن مساحة مترين في مترين يوجد في هالصاله الصغيره مكتب السكرتيره وعلى يمينها مكتب المديره وعلى يسارها مكتب حلا (استراحة الموضفات سابقا )
وباب مكتب حلا كان مبين للموضفات من مكانهم
اما باب المديره يكون مبين لهم لمى يكونو جالسين في قسم الاستراحه ......
دخل للقسم من غير احم والادستور ووقف مميل
بكتفه على الباب غاده دارت الكرسي بحركه سريعه واعطته ظهرها تعدل حجابها
واهي تسبه بصوت واطي وحده ثانيه مقابله له مباشره راميه طرحتها على اكتافها والافكرت ترفعها
على راسها شافت على الباب شاب وسامته متوسطه لاكنه في كل الاحوال ملفت باناقته وفخامة مظهره وشعره الغريب بلون رمادي ملفلف
يوصل لحد اذنه وباقي شعره محلوق تناقض قوي بين لون الشعر الرمادي ولون العوارض السوداء الخفيفه المحدده بعنايه ....باسل لاحظ البنت كيف تتأمل شكله تقدم لمكتبها بأبتسامه عريضه : واو ايش الجمال ذا عندنا كيكه جديده
لمار ابتسمت لباسل برضى وانطلقت معه في السوالف وكأنها تعرفه من اسنين : اي كيكه شكلك ماشفت السوفليه الي توها مشرفه واشرت على مكتب حلا
هنا العيون كلها توقفت عليها بترقب ومع ان جميع
الموجودات يعرفن شخصية الواقف بتسليه قدام مكتب الموضفه الجديده بس والاوحده فكرة تقولها لو بأشاره من بعيد
باسل تأكد انها ماتعرفه ابتسم بأستعباط : بالله حتى السوفليه جاء عندكم ايش الحلويات الفاخره الي تطلع عندنا في الشركه ذي
لمار تذكرت حلا ودلعها امسكت شعرها بدلع تقلد حلا : بابي ابي الغرفه هادي تصير مكتبي وع مصاله تحوم الكبد

باسل اعتدل في وقفته وابعد طرف الجاكيت ودخل يده في جيب بنطلونه وتكلم بجديه :مصاله في عينتس الشركه كلها تحت امرها ماهو بس نتفة مكتب !
لمار ثبتت نظراتها عليه تحاول تستوعب الي قاله
وبدت تربط الامور ببعض الشكل الانيق ...دخول المكتب بكل بساطه ومن غير محد يعترض ...وقفته الحين بكل ثقه ودفاعه عن بنت المدير واخيراً
وصلت المعلومه متأخره (ولد المدير الي زميلاتها يشتكون منه )

ارتبكت وتلخبطت وماعرفت وش تسوي باسل استمر يناظر فيها بحده واهو شايف كيف انرعبت
بعد ماعرفت هويته وفي نفسه مستمتع بردت فعلها ومنتظر وش بتسوي بعد الحوسه ذي كلها
لمار احتقن وجهها من الاحراج وقامت واقفه
وبأعتذار مكسور : انا اسفه
النتيجه كانت اكثر من مرضيه لباسل الي تجاهل
اعتذارها بالكليه وتجاوزها متجه لمكتب حلا
ميس الي على المكتب المقابل للمار انفجرت تضحك وفي نفس الوقت تسكر فمها بيدها علشان
صوتها مايوصل لباسل
لمار ناظرتها بحقد : صدق انكم متخلفات ليش ماعلمتوني
هاجر الي تجلس على المكتب الي يمينها اشملتها بنظرة احتقار : شفناك مندلقه عليه خفنا نعلمك انه ولد المدير تنتثرين كلك
لمار تقدمت لحد ماوقفت قدامها : وش قصدك
هاجر ناظرتها بعدم اهتمام : قصدي واضح مايحتاج تفسير
لمار اضربت المكتب بيدها : لافسري
غاده الي تجلس في المكتب الي جنب هاجر : القصد واضح حنا هنا في مكان عمل ولكل شي حدود وانتي فالتها سوالف
لمار بتبرير :عادي زميل عمل وش فيها لاسولفت معه
ميس بمداخله : بالنسبه لي ماعندي مشكله في السوالف بس ماني عميا لدرجة ماقدر اميز بين موضف عادي ونائب المدير على سن ورمح ومن زود الدلاخه تحشين اخته قدامه
هاجر : لابالله فيه مشكله في السوالف مع رجال غريب باي صفه تطقين حنك معه
ميس افتحت الملف الي قدامها تنشغل فيه : تحدثت الكيسه الفطنه خل اشوف شغلي اصرف
هاجر ناظرتها باستنكار مع رفعة حاجب ....
لفت انتباههم طقطقة كعب تقرب منهم اتجهة
انظارهم للمدخل ادخلت حلا بعبايتها الكتف من غير زينه بحجابها المحكم اعطتهم نظره خاطفه وماعجبها ان لمار طالعه من مكانها التفتت عليهم
واهي على مشيتها : اشتغلو اشوف موتقزرونها سوالف
الموظفات ناظرو في بعض بغيض واهي كملت طريقها لمكتبها واهي تفك احجابها ادخلت
المكتب وشافت باسل يتفقده صاحت بانبهار
: واو ايش هادا يجنن يجنن
باسل ابتسم لاخته الي نزلت عباتها وطرحتها وعلقتها على المشجب خلف الباب : هاه عجبك
حلا بدلع : ايييوه يهوس
المكتب كان من الخشب الفاخر بسطح مغطى بطبقة زجاج اسود مصقول ومبطن بقشره لماعه
خلفية المكتب ورق جدران ثلاثي الابعاد لزهور يابانيه روعه ....الوان الغرفه ككل كانت مزيج من الون الابيض والزهر والاسود الديكورات وقطع الاثاث تدل على انتقائيه وفخامه ببذخ وفي نفس الوقت يعكس شخصية صاحبته نعومة القطع والوانها وادق تفاصيلها تحكي عن دلال مترف باسل كان يشوف المكتب غرفة بنت دلوعه ابعد ماتكون عن الشغل وهذا هو واقع اخته وحقيقتها اما حلا فكانت تشوفه المكتب الي يليق ببنت مالك الشركه ومديرة القسم النسائي !






مازال موجود في مكتب ابوباسل جالس في واحد من الكراسي الي قدام مكتبه وفاتح لاب توب صغير
على طرف المكتب ويشتغل عليه وهذا حاله من يجي اسبوع ونصف ملازم دائم لابو باسل لأنه الي يدربه على الشغل بنفسه وفي داخله مستغرب من حجم الصداقه الي تخلي شخص يوظف شخص عنده لمجرد انه من طرف صديقه صحيح انه خريج ادارةاعمال بس بعمره ماتوظف والامارس العمل لافي مجال تخصصه والافي غيره والغريب ان ابوباسل
وظفه من غير مايسئل عن شهاداته العلميه ولمى سلمه ملفه كان مجرد تحصيل حاصل اما السبب الحقيقي لتوظيفه فهي كلمة جاسر الي مازالت ترن في اذنه (لوجبتلك اولدي مشاري وقلت وظفه وين تحطه يابو باسل ابوباسل من غير تفكير خبط عضده الايمن بيسراه :على يمناي يابو مشاري يبشر بعزه
جاسر اشر على يوسف الي يجلس في الكرسي المقابل له اجل هذا يوسف هو ومشاري عندي في كفة وحده ابوباسل التفت على يوسف وابتسم له ومن هالساعه هو وباسل عندي في كفة وحده )
قطع هواجسه صوت باسل الضاحك :صباح الخير يبه ...صباح الخير ولد ابوي الجديد
يوسف ابتسم لباسل ووقف يصافحه :هلا صباح النور دامني الجديد اكيد انك الولد القديم
باسل تقدم لابوه وباس خشمه رغم التكشيره الي اظهرت على وجه ابوه كرد على مايعتبره سماجه
:يوه قديم وبس مغبر
طارق بهجوم على اولده : هذا الي انت فالح فيه
لو تشتغل كثر ماتطقطق اوصلت شركتنا للعالميه في شهر
باسل رفع يده اليمين يمسح فيها على قفاه وجلس في الكرسي الي قدام يوسف واهو متضايق من سيل
الشرشحه الي متعود ياكله من ابوه
طارق اغتاظ من باسل اكثر لأنه اعتبر سكوته عدم مبالاه : ماتقولي انت متى بتسنع وتنتبه لشغلك اسبوع تداوم وشهر ساحب على الشغل الله يخليلي يوسف الي شال احمولي من يوم جاء واهو شايل
الشغل على راسه
يوسف قام طلع من المكتب واهو متاكد ان اخر شي يتمناه باسل انه يكون شاهد على تهزيئ ابوه له
وباسل التفت على ابوه بزعل : اناديلك بواب الشركه تسبني قدامه تراه الوحيد من موظفين الشركه الي باقي ماسمعك تسبني
قاله وقام طلع من مكتب ابوه لمكتبه التفت على يوسف شافه سرحان وموب يمه طنشه وجلس على
مكتبه
اما طارق كلمة باسل حزة في نفسه هو مايتقصد
يهزئه بس الحال الي هو عليها يجبره انه يفقد اعصابه ويفرغ حرته فيه والمؤسف انه حتى بواب الشركه قيده هزئه قدامه

يوسف طلع من عند ابوباسل واهو يتذكر وضعه مع ابوه باسل حيا ابوه واهو داخل وحب على خشمه
ويشتغل معه في الشركه ومع ذا كله ابوه ماهو راضي عنه ويشوفه شاب مستهتر اجل هو كيف كان يشوفه ابوه ياليت ابو باسل يعرف ان اولده نعمه
جنب الشخص الي هو قاعد يعايره بانضباطه !....
ياترى دوروني .....فقدوني.........حسو بغيابي .......مبسوطين انهم افتكو من مشاكلي ......تذكر انهيار امه لمى اعرفت ببرائته من تهمة الدياثه .....اكيد انها بتفقدني .....هي الوحيده الي متاكد انها بتفقدني ......بس لازم ابعد لحد ماتخلص من بقايا يوسف الي مااخذتْ منه الاالوجع وحرقة القلب ......لازم ارجع لها يوسف جديد تسرها شوفته .......انتظريني يمه .....انتظري يوسف يرفع راسك وتفتخرين فيه !


__________________________



تم البارت الخامس والعشرون
المره هذي النهايه بارده وجوها عليل ومافيش ترقب والاشد اعصاب


__________________________

بارت جميل يعطيك العافية نبض

مزيد مثل ما قالت فتفت فيه مواال برأسه يحاول يقترب من خزام ويعدل الوضع بينه وبينهم واللي أكلها خواته رحمتهم والله وأهم شيء أخذن حقهن مو هينات والله أجل تاكلهن بنت عدي وهن ساكتات لااا والف لااااا وفوقها المشكلة مع راجح والجد واللي السبب كان فيه راجح هذا اللي فهمته وما خفي أعظم ومثل ما قالت عذبه طالهم كلهم هالقطيعة والكره وما أكلها إلا حزام*

ما ضحكت إلا على خزام من رد على جوال أمه وطلع له مزيد أكلها هههههههههه عاد كلام مزيد معه حكاية ثانية ما يعرف له إلا هو*

والا عروب جد ما تستحي رجال غريب وكذا تسوي لو أنها حاقدة عليه ما يحق لها تأخذ راحتها وكويس أنها سدت حلقها ولا قللت من قيمة حزام وبعدين على قوله أميرة* وحنا وخزام شعاوين ونخلص بينا يطردنا نطرده بكيفنا مالكم دخل بينا يال معدي ليت تحط الكلام برأسها ولا تدخل مثل ما بغت تزيد الثأر ثأر كويس لحقت عليها عذبه

أميرة ولطيفة جد مالومهن لو يكونن حذرات لا هن ارتاحن ولا عذبة بس حزام ومزيد مرتاحين

أما سالفة خزام مع بروق من ناحية شغلها ياليلاه ههههه الحين بروق ما صدقت تخلص من تحكم سياف لها ويجي خزام ويقول ناقصني تجلس مع المجرمين وتدافع عنهم ضحكت ضحكت أجل تدافع عن مجرمين من متى المحامي يدافع عنهم

باسل أجل كذا علومك يا كرهي بس والا لمارا جلست تطقطق على أخته هههههههه طبخن طبختيه يرفله اكليه

حلا هذا أول يوم دوام وكله عشان يوسف نشوف وش راح يصير بينهم ولعلى وعسى تتغير شخصيتها للأفضل

يوسف اتضح ان جاسر هو اللي توسط له بتوظيف نشوف اصرارك لوين يوصلك انت تبي تتغير وهذا هو الطريق ممهد قدامك .. من حز بقلبه كلام أبو باسل عن ولده أي والله احمد ربك عليه*انت بنعمه

وانتظر البارت الجاي على خير

البارت السادس والعشرون






من العايدين الفايزين وكل عام وانتم بخير





________________




طلع باسل ويوسف في جوله على اقسام الشركه
باسل واهو يأشر ليوسف على مدخل احد الاقسام ويدخلون له :هذا قسم التصميم
يوسف :توقعت كل الفساتين الي في معارضنا جاهزه
باسل : الاغلبيه العظمى جاهزه اشي محلي واشي مستورد لاكن مهمه قسم التصميم انهم يجهزون لنا القطع الي تعطي معارضنا طابع مميز بحيث هالقطع ماتنوجد الاعندنا واحيانا نستقبل طلبات عميلاتنا المميزات اذا حبو يتميزون بقطعه خاصه فيهم كتصميم وحيد
ادخلو القسم وكان فيه خمس مصممات ازياء
كل وحده لها جهه خاصه فيها مجهزه بكل ماتحتاج من ادوات الرسم والتصميم
ثنتين من المصممات كانو يتشاورن على تصميم غير مكتمل موجود على لوح الرسم قدامهم انتبهو
على يوسف وباسل واهم يدخلون وياقفون قدام
لوحه على كامل الجدار مثبت عليها تصميمات جاهزه
المصممه الاولى : من ذا
الثانيه : نواب المدير
الاولى : خل باسل اعرفه اقصد الثاني
الثانيه : وانا اقصد الثاني اسمه يوسف النائب الثاني للمدير
الاولى : اويلي وش هالزين الي عليه
الثانيه : ياشيخه مديرنا بكبره رزه مستكثره الزين في نوابه
الاولى : صحيح ان باسل رزه بس موب مزيون عادي
الثانيه : اقول التفتي على شغلك قبل ينتبهون لنا
ماهو حاصل لنا لاالمزيون والاالعادي
الاولى : على قولك
باسل التفت جهة المصممات واهو ياشر على واحد من التصاميم :وش ذا التصميم ماني فاهم منه شي
المصممه لاولى :طال عمرك تفضهل هنا اوريك
التصميم على الاب توب وبتوضح لك فكرته
باسل ويوسف تقدمو لمكتب المصممه الي كان لاب توبها شغال اجلست على الكرسي وافتحت على التصميم المطلوب وقربت لهم الاب على طرف المكتب واهي تشرح لهم خامات التصميم وكان
واضح بالفعل كأنه فستان مصور ماهو مصمم على برنامج تصميم ....باسل انسان اذا اشتغل يشتغل بضمير ويكون تركيزه كله على الشغل وهذا الشي معطيه هيبه قويه عند الموضفين .....يوسف ماكان مهتم بالتصميم بقدر ماكان عطر الموظفه وجمالها
والميكب الموزع على وجهها باتقان مشغله ويجاهد حتى يحتفظ بتركيزه بعيد عنها في الحظه
الي حس ان حواسه بدت تتسلل خارج نطاق السيطره وتحلق حوالين المصممه اندفع طالع من القسم بكبره ...باسل استغرب ليه طلع
والمصممات اكثر استغراب ....المصممه تبي تضمن موافقة باسل على تصميمها : واضح ان التصميم اعجبك ياطويل العمر اتطمن انه خلاص اعتمد
باسل باسلوب عملي بحت : التصميم حلو لاكن لازم
يمر على لجنة تقييم الموديلات وكلمتهم هي الفيصل اذا وصل عندي اكيد راح اعتمده
قاله وطلع بيشوف وين راح يوسف
اما المصممه انقهرت والتفتت على زميلتها الي كانت واقفه معها في البدايه :وش فيها لو اعتمده على طول ومن غير مايمر على لجنة المريضات
الثانيه بضحكه :هههه والله انك جبتيها مريضات وذوقهم يلوع قال ايش خبيرات موضه وفاشن واهن من جنبها ...
يوسف طلع من قسم التصميم لمكتبه سيده واهو يحس كل حواسه مثاره ...طول الفتره الي راحت
كان يبعد نفسه عن اي تواجد نسائي لحد ماطلعتله
بنت المدير بملامحها الناعمه ودلعها يمكن وجهها البيبي فيس الخالي من المساحيق خلا مقاومتها سهله لاكن هذي انثى مكتملة الانوثه قدام عيونه
صحيح انها كانت مركزه في شغلها وماحاولت تلفت
انتباهه بس من غير ماتحاول هي ملفته لدرجه تعذب ....صعب عليه انه بعد كل هالسنين الطويله يتحول من شخص مندفع بكل قوته نحو شهواته وملذاته الى شخص ثاني يقاوم ويتجاهل ويصد ...رفع يمناه مسح فيها على وجهه .....استغفر الله العظيم
ابتسم لنفسه صار الذكر والاستغفار يطلع معه تلقائي ....نطق بأمتنان :الحمد لله
بدى يحس انه مسلم طبيعي يصلي يذكر الله يقراء قرآن .....صحيح انه كان عايش حياته بالطول والعرض ....بس ماكانت بنفس لذة حياته الحين
اقلها صار يحس ان بينه وبين الله صله ..........دق جواله منتزعه من افكاره
ابتسم لمى شاف اسم المتصل ورد بحفاوه :هلاوالله
: وشلونك عساك طيب
:بخير الله يسلمك
:ههههه
:مانك جاي
:متى
:لا تقوله صادق في المطار الحين
:يالله جايك
:وين بتجي
دخل باسل للمكتب وشاف يوسف وجلس قدامه ينتظره يخلص مكالمه
:يالله ننتظرك
سكر الخط وابتسامه عريضه مرتسمه على وجهه
باسل :جايك احد
يوسف بسعاده :ايه عمي جاسر
باسل باستغراب :خير وش عنده خالي ماعاد يطلع من جده
يوسف رفع حاجبه باستنكار :خالك
باسل استغرب ان يوسف مايعرف : ايه خالي
يوسف :بس هو قالي ان ابوك صديقه
باسل ابتسم : ايه واهو صادق ابوي صديقه من قبل لايتزوج امي واصلا ابوي ماتزوج امي الاعلشانها
اخت صديقه وطول عمرهم يتعاملون كأصدقاء
وساحبين على النسب الي بينهم
يوسف تذكر : اها صحيح كان يطلع من عندي ويقول بروح لاختي
باسل ابتسم : اها اخته ذي ام باسل الله يطول في عمرها
دخل عليهم ابوباسل طالع من مكتبه مستعجل
:يالله ياعيال امشو جهزو للعشاء جاسر جاء
يوسف : بس عمي قال انه بيجي هنا في الشركه
ابو باسل :ايه بيجي هنا وباخذه معي هو وحلا للبيت انتم اسبقوني وجهزو امور العشاء
ابو باسل يعامل يوسف نفس باسل ومايحط بينهم اي حواجز اورسميات
باسل التفت على يوسف :يالله امش ان وصل صديقه وحنا ماجهزنا الضيافه طردنا من الشركه
يوسف ضحك : ههههههه تراه الي محتاجنا في الشركه خلنا نسحب عليه هو وصديقه
ابوباسل الي كان في طريقه لباب مكتبه سمعهم
ورد بعصبيه :اذا فيكم خير خلوني اجي والقى شي ناقص
باسل ويوسف :ههههههههههه
طلع يوسف مع باسل واهو يحس بألفه كبيره داخل هالعائله يعاملونه وكأنه واحد منهم .....مرو مخابز الحلويات واخذو الضيافه منها ومرو على مطعم فخم اتفقو معه على العشاء ووقته وراحو للبيت
ادخلو مع بوابة البيت اركنو السياره وانزلو يشيلون
الاكياس قابلهم قصي وقرب ليوسف يسلم عليه
:هلا يوسف وشلونك
يوسف بابتسامه واسعه : هلا والله قصي اخبارك
قصي : الحمد لله هات الاكياس عنك
مدله يوسف الاكياس واتجه للمجلس : وين غنى
قصي :لاتسئل الحين تقفز في وجهك مثل الجنيه
يوسف بضحكه :ههههه احلى جنيه


باسل دخل للمطبخ واهو شايل الاكياس شاف امه واقف عند الفرن تسوي القهوه واهي ماسكه ظهرها
بوجع ..تألم على حال امه قرب لطاوله ونزل الاكياس عليها وقرب منها باس راسها :وشلونها جوهرتي اليوم
ابتسمت ام باسل بحب :الحمد لله بخير
باسل سحبها بيدها :يمه ارجعي لسريرك ارتاحي انا اكمل القهوه
ام باسل تحركت في مكانها بثقل وتعب قوي :لاماعلي الاالعافيه اصلا اجهزت خلاص بزلها
وازل الشاهي واروح مره وحده
قصي دخل للمطبخ ونزل الاكياس الي معه على الطاوله ناظر امه كيف واقفه بصعوبه وباسل يقنعها تترك الشغل له وتروح ترتاح والشغاله قاعده تجهز
الطوافير وقف مكانه مايدري وش يسوي مايبي امه تتعب واهم عارفين ان الدكتور محذرها من كثرت الوقوف وانها لازم تبقى مرتاحه في السرير وفي نفس الوقت هو مايعرف يشتغل زي باسل ...
ام باسل اصرت انها هي الي تزل القهوه والشاهي واول ماخلصتهن اخذها باسل بيدها وداها سريرها
العامله اخذت الزمازم حطتهم في الطوفريه والتفتت على قصي تسئله عن الحلويات والموالح تخليها في صحون المخبز والاتحطها في صحون قصي هز راسه :مدري خلي باسل يجي ويقولك

حلا لابسه عباتها وحجابها وجالسه خلف مكتبها الفخم تنتظر ابوها يتصل فيها ويبلغها بوصول خالها جاسر الي زياراته الفتره الاخيره كاثره بزياده وماتدري ايش السبب ...يمكن علشان ماما تعبانه
اي اصلا خالي مره حنون واكيد هذا هو السبب ......افتحت جوالها تتسلا فيه وبشكل تلقائي افتحت على السناب وبدت تفر بين السنابات فجأه جت في بالها فكره ليه ماتصور مكتبها اكيد فانزاتها راح ينبهرون فيه افتحت كام السناب وبدت تصور نفسها واهي جالسه على الكرسي : هاي صبايا كيفكم اكيد مبسوطين مع اجواء الجامعات والدراسه ....فرة الكرسي الدوار وصار المكتب خلفها وظاهر في الصوره ارسمت الجديه على وجهها واهي تحاول تستعير اسلوب باسل في الكلام : كان ودي اكمل جامعه نفسكم بس زي مانتم شايفين مكرووووفه ...ابتسمت بدلال باباتي يعتمد علي في شغله كثير ...ارسمت على وجهها تعبير حزين وكانت نظرتها جدا مؤثره ...ماعلينا ان شاء الله اعوض طموحي الكبير في الدراسه بالشغل مع بابا في النهايه الشركه محتاجه ان اصحابها يديروها بانفسهم !وكان الكلام الاخير مقتطع من محاظرة ابوها الطويله الي متعود يعيدها عليها هي وباسل لعل وعسى يثمر فيهم ...وقامت من كرسيها وبدت تتمشى في المكتب وتصور كل شي فيه واهي مواصله فلمها التراجيدي ....باباتي سوالي المكتب الجميل دا علشان يخفف عني ضغوط العمل ....ياحبيبي يابابا وكأني راح الاقي وقت عشان اشوف الحاجات الجميله دي .....كان ودي اطول معاكم بس للاسف الشغل ماخذ كل وقتي تشاو ....
اطلعت من تطبيق السناب شات وفي نفس الوقت اتصل عليها ابوها يبلغها ان خالها وصل
اطلعت من المكتب والتفتن لها الموضفات
واهي شدت طولها في تجاهل تام لهن الموظفات تبادلن النظرات بقهر من عنطزتها ميس تذب عليها
اضحكت واهي تناظر لمار :اقول لمور شفتي مسرحية شاهد ماشفش حاجه
البنات كلهم اضحكو لان المعنى ينطبق على حلا بالملي :ههههههه
حلا انقهرت واهي فاهمه انهم يضحكون عليها لفت
على ميس بغضب : اذا حابه تشوفين مسرحيات مع لمار روحي شوفيها في بيتها وبالمره خليها تعطيك
الراتب
ميس ماكانت سهله واذا باسل له هيبه تجبر الكل انه يحسب لكلمته الف احساب حلا معروف عند الكل وخاصه موظفات القسم انها مجرد هامش في الشركه مالها اي اهميه : انا اشتغل في الشركه ذي وشغلي معروف وانتاجي فيه من ايقيمه وراتبي باخذه من ميزانية الشركه ....يعني من ابوك
حلا اشملتها بنظرة احتقار واطلعت واهي مقهوره ماتعرف للهواشات وحتى لو ردت مره وثنتين ماتقدر تستمر اكثر من كذا هي انسانه مخلوقه في جو كله دلال ومالها في المشاكل ادخلت على ابوها
وخالها في المكتب وبمجرد ماشافت تباشير الدلال الي هي متعوده عليه نست كل شي عن موظفات القسم ...
جاسر ابتسم بترحيب واهو يقوم واقف :ياهلا بالحلا كله
حلا تقدمت لخالها تسلم عليه :اهلين خالو كيفك
جاسر واهو يمسح على راسها : الحمد لله بخير انتي كيفك والله واشتغلت دلوعتنا
ابوباسل بتذمر : اي بالحيل مقطعها الشغل
حلا تلوي بوزها بدلع :يوه يابابا
جاسر يلف يده على كتفها وبتشجيع : ولاتفكرين في كلامه كلها كم شهر لحد ماتدربين على الشغل وتمسكينه صح وبتلقينه يحطلك راتب دبل فور علشان بس ترضين تشتغلين معه
حلا انبسطت على كلام خالها وفي داخلها مستغربه
وشلون ابوها وخالها اصدقاء واهم مختلفين عن بعض ......




في مجلس ابوباسل اوصلت القهوه والشاهي والضيافه كامله صارت جاهزه على طاولت الخدمه
وباسل ويوسف جالسين على الكنب يلعبون مع غنى
غنى تحاول تهمس ليوسف بشي وماتبي باسل يسمعها ويوسف عجز يفهم وش تبي لانه ماسمع منها الا وشوشه وباسل يقرب راسه منهم كل ماتكلمو يبي يسمع وش يقولون طفش يوسف وقام واقف وسحب غنى بيديها معه واهو يكلم باسل : اذا فيك خير الحقنا
باسل يستهبل : هي انت وين ماخذ اختي لاتخطفها
يوسف ركض مع غنى لمى شاف باسل لحقهم : هاه بسرعه قولي
غنى تركض معه وتلفت خايفه باسل يسمعها ويهاوشها تكلمت بعصبيه : وين الشوكلاته حقتي انت ماتسمع
يوسف وقف واهو يضحك بقوه : هههههههه العن ابو السر الي عندك ياشيخه وانا مصدق عمري هربان فيتس
باسل وصل عندهم في الحوش وانحنى على غنى وعقد حواجبه يخوفها : ليه تطلعين مع الرجال برا
غنى توسعت عيونها باستنكار وارفعت راسها تناظر يوسف :هذا يوسف ...بس يوسف وش فيك انت ماتعرف انه يوسف
باسل جلس قدامها : وتبن انتي وياه اعرفه ومحوم كبدي بعد بس مانه اخوتس
غنى ازعلت وتمسكت في ساق يوسف : الااخوي انقلع انت مابيك
باسل فز واقف يمثل عليها الزعل : افا انا ماتبيني
يوسف مبسوط على كلامها ارخى نفسه لها وشالها
: ياعيون اخوك يوسف انتي مشينا للبقاله نشتري
غنى انبسطت انها بتروح للبقاله
باسل يعرف دام يوسف حط في راسه يوديها البقاله بيوديها التفت ينادي : قصي يا قصي
قصي طلع من المجلس : نعم
باسل لحق يوسف واهو يكلم قصي : بتروح معنا للبقاله امش
لحقهم قصي واهو مبسوط بالروحه للبقاله



طارق وصل لبيته والعيال في البقاله نزلو وادخلو
للمجلس مالقو فيه احد فاتركوه وادخلو داخل البيت علشان جاسر يسلم على جواهر
حلا ادخلت مع ابوها وخالها للمجلس واهي تتمنا تشوف يوسف مع انها شايفته في الشركه اكثر من مره بس تبقى شوفته سعاده ماتنمل كشرت بحسافه لمى شافت المجلس فاضي وادخلت داخل البيت ولدرج سيده من غير ماتمر على امها
متشوقه تشوف اصداء السنابات الي بثتها
ادخلت غرفتها بسرعه نزلت عباتها وحجابها
ورمتهم على الكنب الموجود في الصاله الصغيره
وطلعت جوالها من الشنطه وانطلقت لغرفة نومها
اجلست على السرير وبدت تتفرج على ردود الفعل
الي اذهلتها وماكانت متوقعه والاواحد بالميه من التفاعل الي شافته فانزاتها صدقو انها فعلا بنت عامله ولها مكانه في الشركه خاصه انها اول مره تصور نفسها سناب واول مره تكلم عن حياتها كانت متعوده تصور اشياها الي تشريها الاماكن الي تروح لها ......عدد كبير من الرسايل كانت تثني عليها وتمدحها وعدد منها متعاطفين معها وراحمينها لانها ظحت بدراستها في سبيل خدمة ابوها والشغل معه عدد ثاني يستشيرها اذا كانت تأيد الانظمام لعمل العائله بدل مايبحثون عن اعمال تخصهم البعض يسئل لمى اشتغل مع ابوي اطلب راتب او اشتغل من غير مقابل .......ردات فعل ماتوقعتها طيرتها فوق السحاب وخلتها تشوف نفسها شي عظيم !......قررت انها ماترد عليهم الحين بزعم انها مشغوله وتجمع الاسئله الي جتها وتخلي باسل يعطيها اجوبه عليها واهي ترسل الردود للفانز على انها هي الي قاعده تجاوبهم
وبعد يومين ثلاثه تصور لهم من الشركه مره ثانيه ......احلام ورديه وشعور بنشوة المديح وسعاده تنعش الروح من اعمق اعماقها اول مره تجرب هالشعور متعوده على الدلع ايه متعوده ان طلباتها اوامر ايه متعوده على مدح شكلها الطفولي الذيذ ايه بس ان احد يمدح شخصيتها هذا هو الشي الي كانت متعطشه له وتتمناه وهالسنابات البسيطه حققت لها هالامنيه باسهل الطرق.....



يوسف نزل كيس الاغراض على طاولة المحاسبه
وهنا غنى اسحبت عليه وتمسكت في يد باسل
كان بيسحب الكيس ويمثل عليها انه بيرجعه
لولا ان قصي وقف جنبه وسحب يده :خل باسل يحاسب تعال ابيك
التفت يوسف على باسل شافه مشغول مع المحاسب وطلع مع قصي رايحين للبيت
يوسف التفت على قصي : وهذا احنا طلعنا وش عندك
قصي بحماس : قلهم بنطلع للبحر
يوسف : بس امك تعبانه
قصي على نفس الحماس : خالي بيجي خل نطلع طلعة ارجال موب لازم الحريم يروحون معنا
يوسف : بس الليله مايمدي وبكره مدرسه
قصي بتذمر من الدراسه : تكفى يالجامعه تراني ادرس سادس لاراحت والاجت
يوسف ضحك على كلامه : ههههههه طيب بس ترا سادس توصل للجامه
قصي طفش : انت بتدبر الروحه والا
يوسف وباقي يضحك :ههههه ابشر طال عمرك ادبر الروحه ليه لا خاصه ان بكره خميس
جاهم صوت باسل يقطع كلامهم :انت هي ياجد المبزره تراك خربت الوراعين بالدلع
يوسف التفت على باسل : والله انا لاقيكم مدلعين خالصين ياشايبنا
قصي بضحكه :ههه اعلمك وش يعايرونه
يوسف بحماس :ايه تكفى
باسل حذف قصي بعلبه مويه كانت طايحه في الشارع وباقي فيها شوي : ياويلك ياقصي
قصي هج عن حذفة باسل واهو يرفع صوته : يعايرونه الاشهب
هنا يوسف فرط ضحك : هههههههههه لابقه العيره شي خطير مع ذا الشوشه
باسل يضحك واهو يهز شعره : ههههه اصلا انا ماصبغت ذا الون الا علشان اللقب يضبط



جاسر سلم على جواهر وجلس يسولف معها اشوي
طارق سمع اصوات الشباب اوصلت عندهم قام واقف : الشباب في المجلس قم خلنا نروح نتقهوى معهم
جواهر اشرت لجاسر بمعنى ابيك
جاسر التفت لطارق : رح انت وانا اجيك
راح طارق للعيال وجاسر التفت على جواهر : امريني
جواهر : ابطلبك طلب



__________



حلا اجلست في غرفتها لحد مانادتها العامله للعشاء وانزلت تتعشاء مع امها
جواهر ناظرتها بغيض :انتي وينك من اليوم تاركه باسل هو الي يشرف على ترتيب العشاء ويسوي كل شي وانتي بس جالسه لاشغل والامشغله
حلا بطفش :يوه ياماما باسل هو الي جايب الهم لنفسه ليه مايجيب خدامه زياده والاحتى ثنتين ان شاء الله حتى اربعه ايش لازمتها الفلوس اذا ماتريحنا
جواهر انقهرت :هذا الي طلع معك بدل ماتهزين طولك وتقومين تشتغلين وبعدين من قال انه ماقدم على زيادة خادمه هذا هو له شهرين رايح جاي مراجعات لمكتب الخدم والاحصل شي
حلا اتركت الاكل من يدها وقامت معصبه :انا مايخصني في شغل البيت مو كفايه طول النهار اكرف في الشركه
جواهر انسدت نفسها عن الاكل واهي تشوف بنتها كيف اصعدت واتركتها ورغم الألم الي تحس فيه
ورغم ثقل حملها الاانها تحاملت على نفسها وقامت
تلم السفره خلت على الطاوله الي جنب سريرها صحن مسكر بقصدير علشان تحاول تغصب نفسها
عليه بعد ماتهدى شالت الباقي ودته المطبخ واهي تمشي ببطء شديد وتحس بألم فضيع اسفل بطنها وظهرها يتقطع من الوجع .....العامله فزت من على
الكرسي تاركه عشاها :هاتي مدام ليش ماناديتيني اشيله
جواهر واهي راحمتها وراحمه باسل معها :ماعليه اجلسي تعشي انا بعد لازم اتحرك اشوي
العامله بشفقه : لامدام انتي لازم يرتاح بعدين بيبي يطيح
جواهر استدارت راجعه لغرفتها واهي تدعي لباسل
الي تستغرب من تصرفاته يهيت ويسهر واحيان يطنش الشغل بس لاجد الجد ماتلقى جنبها الاهو ......



عند الرجال خلصو عشاء واجلسو يشربون الشاهي
طارق طل في المقلط وشاف السفره مازالت مكانها
......دخل المجلس معصب واهو يشوف باسل يشرب شاهي ويمزح مع يوسف : انت جالسن تطق حنك هنا مثل البنيات وتارك السفره محلها تبي امك تجي تشيلها والاوش
باسل غمض عيونه بالم من طريقة ابوه معه مايعرف يطلب الي يبي بدون تهزئي نزل الكاسه الي في يده وقام طالع للمقلط :ابشر الحين اشيلها
طارق بنفخه : وشهو بعده بعد ماحرقت دمي
يوسف صد :الله يرزق راشد الجنه
جاسر فهم يوسف وابتسم له ثم رجع يلتفت على طارق : بشويش على الولد اكلته لونك ابوي هجيت عنك
طارق مد يده ليوسف ياخذ كاسة الشاهي الي صبها له : هذا انت ناشب في حلقي وماهجيت
جاسر يستوي في جلسته : انا بانشب في حلقك لين تموت مافكيتك والاعلي منك بس الولد تراك بتخسره انت واسلوبك الخايس ذا
طارق بشي من الندم : والله انه مايقصر ولاقصدي اعصب عليه بس انت تعرف طبعي الشي الي ماهو في مكانه يعصبني غصب
جاسر عقد حواجبه : وباسل وش ذنبه تفرغ عصبيتك فيه على الاقل امسك السانك عنه قدامنا وقدام غيرنا
طارق ورغم انه هاوش باسل قدامهم ماحب ان جاسر يعاتبه قدام يوسف : وانت ماتخلي احد ماتدافع عنه ترا كلن والسانه معه
جاسر : السانه معه بس انت ابوه وش حيلته معك
طارق يبي يفك عمره من الملامه التفت على يوسف وبمزح : اخذ عمك مدري وشهو منك وفارقوني صدعتو راسي
وهالكلمه الي حذفها مزح الفتت انتباهه لانه مايعرف اصل علاقة يوسف بجاسر
يوسف بضحكه : مانا بمفارقين لين يجي باسل وناخذه معنا
باسل دخل على كلام يوسف جاء جلس في مكانه الاول : على وين بتاخذوني
جاسر : نبيك تسري معنا لشقه
طارق يقاطعه : مافيه مساري باتو هنيا كلكم
يوسف :طاردنا انت مانا بقاعدين عندك
طارق يوزع نظراته بين يوسف وجاسر : اطردكم والامرسهل وكانكم تنتضرون رظوه بتبطون
جاسريلتفت على يوسف : انت زعلان
يوسف يضحك :هههه لا وانت
جاسر :ابدن بس رفع ضغطي ومالي نفس اقابله ل الصبح قم خلنا نسري
والتفت على باسل : امش معنا ياخالي
باسل ابتسم لخاله : مقدر اروح واخلي امي
جاسر التفت على طارق : وانت وينك عن مرتك
طارق رفع راسه لجاسر الي قام واقف : والله انا رجال عندي اشغال لفوق راسي ومرتي ام ويقولون الجنه تحت اقدام الامهات خل ولد اختك يلزم جنته كانه يبي الجنه
جاسر التفت على باسل يشوف ردت فعله ..وباسل قام واقف واخذ خاله بيده : ماعليك انا عندها تعال سلم عليها قبل تمشي لاتقعد تحاتيك
راح جاسر مع باسل لجواهر
وطارق التفت على يوسف : الا صحيح انت وش علاقتك بجاسر
يوسف شرب الباقي في كاسته من شاهي دفعه وحده ونزل الكاسه واهو من البدايه حاس انهم مايعرفون عنه شي طول الفتره الي راحت كانت علاقته فيهم ماتتعدا الشركه رغم ان ابوباسل يعامله بدون اي رسميات حتى انه مرن معه اكثر من مرونته مع باسل ومن اسبوع بس توسعت علاقته فيهم وصارو يعزمونه عندهم في البيت
: عمي ابو طليقتي
طارق يعرف ان جاسر مازوج الابروق واهم ماراحو لعرسها لانه جاء فجأه وام باسل تعبانه والي اخذها
هو نفس الشخص الي انقذها يوم اتركوها اهلها في البر واهم مايدرون عنها وواصلته الاخبار عن زوجها واخلاقه واخر شي توقعه ان يوسف يكون نفس الشخص ....يوسف صار له عنده شهر ونصف ماشاف منه الا الطيب والاخلاق الزينه عقد حواجبه باستنكار : انت الي طلقت بروق
يوسف بضيق : ايه انا
طارق : ليه يابوك وين بتلقى مثل بروق
يوسف صد : نصيب
طارق حس انه مايبي يتكلم في الموضوع سكت .....
جاسر طلع من عند جواهر ونادا يوسف من عند باب المجلس : يالله سرينا ياولد
يوسف قام واهو يناظر باسل الي واقف جنب جاسر :باسل وصلنا سيارتي عند الشركه
باسل دخل يده في مخباه وطلع مفتاح سياره اعطاه يوسف : هذا مفتاح سيارتي الي برا لارحت لشركه بكره اتركها في المواقف ............



في السياره دق جوال جاسر ورد عليه
: هلا والله
: وشلونك
:وش اخبارك
:كلمتي عمتك
:هاه ووش قلتي لها
: امك موافقه
: انا ماعندي مانع
:خلاص صار
:مع السلامه

يوسف شد على الدركسون بيده واهو يفكر ياترى هذي بروق والااختها ووش الي يسئل عن موافقت امها عليه ......سكر جاسر الخط وبقاء ساكت
وسكوته وتر يوسف اكثر
اوصلو لشقه وقفو السياره وانزلو .........داخل الشقه بعد ماجلسو في الصاله يوسف وده يعرف
وش الموضوع الي كان عليه مشاور في السياره وهل الي كلمته بروق والا بس صعب يسئل
: اهلي وشلونهم
جاسر : الحمد لله كلهم بخير من بعد ماعرفو مكانك واهم مرتاحين وامورهم زينه
يوسف عصب لاكنه حافظ على نبرة صوته طبيعيه :ليش قلت لهم عن مكاني
جاسر :ماقلت لهم شي بس بروق حللت تحركاتي واربطت الامور ببعض وقالت لهم يدورونك هنا
يوسف تذكر قبل شهر لمح شخص يشبه عمه جواد في مواقف الشركه واهو طالع اثاريه كان هو
يوسف عصب زياده وبانت عصبيته وارتفع صوته: يعني موب اكفايه انها بلغت عني وسوتلي فضيحه
جاسر قاطعه : الي بلغ عنك انا وبلاغ بروق كان تحصيل حاصل لان عناصر الشرطه المتنكرين كانو معكم من بداية السهره
يوسف توسعت عيونه بصدمه ......: انت الي بلغت ...وش دراك .....وباي حق تراقبني
جاسر بحده : انا يوم قلت انك صرت انت ومشاري عندي في كفه وحده كنت جاد في كلامي وانا مستحيل اشوف مشاري يمشي في الطريق الي انت كنت تمشي فيه واسكت ويكون في علمك انه ماكان البلاغ الاخير شلتك وقفت في طريقهم بالشكاوي والبلاغات لحد ماانهيتهم
يوسف صرخ برعب : وممدوح وش صار له
جاسر : ممدوح كان مشغول فيك يدور عنك غير اني سلطت عليه مشاري يسحبه معه لجوه واخوياه
في البدايه ماكان متقبله علشانه اخو بروق الي يحط عليها ذنب اختفائك وبعدين يوم ابوك طمنه انك بخير وان بروق هي الي دلتهم على مكانك
بدى يتجاوب معه وفي اليومين الاخيره شفته كم مره جاي لمشاري في البيت وعمك جواد بعد ماقصر فيه كاتمن على انفاسه بالشغل
يوسف بلع ريقه الي يحسه نشف : واخوياي
جاسر بحزم : اخويا سوء لاتلتفت لهم
يوسف باصرار : وش صار عليهم
جاسر بعدم رضى عن سؤاله عنهم : ثلاثه في السجن والباقين تفرقو بعد ماكثرت البلاغات عليهم
يوسف عرف من الي انسجنو ومن الي تفرقو يعرف اخوياه زين ويعرف كل واحد منهم وش وراه
التفت للكنب الي كان وراه وتقدم له كم خطوه لحد ماوصله ورمى نفسه عليه جالس مقهور ان ابو زوجته تدخل في حياته وماله اي حق في هالتدخل وفي نفس الوقت ممنون له لانه يشوف نفسه بوضعه الحالي افضل بمراحل عن وضعه السابق وفي النهايه اعترف لنفسه ان سبب ضيقته الحقيقي كون الشخص الي جالس قدامه يعرف ماضيه الاسود بالملي مسح على وجهه بيمناه ورجع يناظر لجاسر الي جالس على الكنب الي يمينه : وممدوح ليه ماجاء بعد ماعرف مكاني
جاسر ابتسم : زعلان عليك وعلي معك
يوسف زفر بضيق : اجل لازم اكلمه
جاسر باعتراض : لا لاتكلمه اذا انت اخترت انك تغير حياتك بأرادتك ممدوح اضطر انه يتغير ولو رجع لك بيرجع لحاله قبل ويمكن يسحبك معه خله كذا وضعه تمام لاثبت انت وياه في المسار الصح ساعتها معك الوقت كله علشان تراضيه
يوسف ابتسم بسخريه : انا متى اخترت ذكرني ...ثم التفت على جاسر بسرعه واهو يستدرك باستغراب من تعامله معه : انت ماصدقت اني تهجمت على بروق ذاك اليوم وكنت راح اذبحها صح ........وبعصبيه اصلا هي وش قالت لكم
جاسر ابتسم : لامصدق واكذب عليك لوقلت اني مااستانست بالي قلته لي هاك اليوم لانها مكلمتني ومتاكد انها بخير ولاوصلتك لحد انك تحاول تذبحها فهذا يعني انها اخذت حقها منك الطاق مطبوق بس عاد اسمحلي اقولك انت غبي يوم طلقتها لأنك لوتلف الارض شبر شبر مانك بلاقي مثل بنتي
يوسف رفع حاجبه بغيض : من جدك مستانس ببنتك
جاسر بثقه : وليه ماستانس ببنتي تبي تقهرها وتنكد حياتها وتسكت لك ؟!.....بروق ماتشكي والاتقول وش يصير معها على الاقل اثبتت لي انها تقدر تاخذ حقها بيدها انا ماقهرني الاانها على كل ماجاها منك ماشكتلي لونها بس ملمحه عن سالفة تهجمك عليها كان دفنتك حي
يوسف انقهر من دفاعه عنها وماهو مصدق انها ماشكت لهم فز واقف وبعصبيه : من وين عرفت بحياتنا اذا هي ماقالت لك
جاسر وقف هو الثاني : بروق ماعلمتني بشي هوشتكم انت الي علمتني ابها حالك قبل جاء من طرفكم الي تبرع وعلمني بكل شي عنه وضع بروق في بيتكم وشرطها على ابوك... ابوك الي علمني عنه والباقي انا عرفته بطريقتي والاتتوقع اني بعرف عنك كل ذا وبخلي بنتي عندك من غير ماعرف وش يصير معها بروق بعمرها ماتكلمت عن حياتها معك والاجابت سيرتكم انت واهلك الابالزين
حتى اصابت اختك قالت انها كانت تقطع واجرحت نفسها بالغلط ........
يوسف انقهر انها ماهيب هي الي علمته كان وده يمسك عليها زله تنهيها من قلبه بس كل مافتش وراها يتمسك فيها ازياده وتكبر في قلبه اكثر من قبل صحيح انها كانت تتكبر عليه صحيح انها ماكانت تحبه او حتى تبيه بس كل مافكر في مواقفهم السابقه يلقى لها عذر في الي كانت تسويه معه ....مازال مقهور من الي صار في هوشتهم الاخيره ومازال يحس بوجع كلامها بس حتى هالموقف عجز انه ينتزعها من قلبه......شهر ونص مرة على هالهوشه ومازال يحس بكل كلمه انطقتها وكأنها رصاصه تخترق قلبه السانها مسموم لدرجه فضيعه ...وطريقتها في التخلص من الاشخاص الي ماتبيهم متوحشه سياف اقطعت عليه الطريق بانها فظلت عليه غيره سهم ناري في صميم كبريائه ...
واهو طعناتها المسمومه له بالجمله واشدها انه طايح من عينها ولاهي معتبرته شي .....يظنون انه طلقها طلاق باين لاكن الحقيقه الي مايعرفها الاهو وهي انه يقدر يرجعها بعقد جديد اذا هي وافقت لانه مادخل عليها ....لاكن مستحيل يرجعها بعد كل الي صار بينهم مستحيل .....


جاسر دخل غرفته ينام بعد الجدال الطويل الي صار بينه وبين يوسف بدل ملابسه وانسدح على السرير واخذته الذكرايات لايام زواج بروق ويوسف الي كان منسدح على سريره في الغرفه الثانيه ويفكر في نفس الاحداث (وباتحاد ذاكرة جاسر ويوسف نرجع لوقت سابق (جاسرتذكر جلستها معهم صباح يوم حفلتها هي ويوسف ام مشاري : دامك ماتبينه ليه قعدتي عنده كل هالوقت ليه تخلين الناس يتخسرون ويسون حفله على الفاضي
بروق : يمه الحفله هم قرروها من اول يوم جيتهم فيه ثم انا وعدته اني اعطيه فرصه
جاسر بعد كل الي عرفه عن يوسف متاكد ان بروق ماراح تستمر معه : وانتي عندك امل انه ينصلح ويترك كل الفساد الي هو فيه
بروق نزلت راسها بخجل كون امها وابوها يعرفون فضايح زوجها شي مخزي تنهدت بضيق وارجعت ترفع راسها لابوها : يوسف تعود انه ياخذ الي يبي ويسوي الي يبي ويعيش زي مايبي والي تعود ان الدنيا كلها اخذ نقطت التحول عنده اذا حس بالفقد وخسر شي كبير في حياته وانا مقدر اعيش معه مع كل الي عرفتوه عنه لاكن اقدر اكون الخساره الي تهز اعماقه اقدر اجرده من كل اوهام السعاده الي هو عايش في زيفها اقدر اعريه قدام ذاته حتى يشوف كيف انه مسخ بشع بدون هويه والاملامح اقدر اكون الصاعقه الي تحرق الارض المزروعه باعشاب سامه لحد ماتتحول هالارض لرماد بس المشكله في الي راح يصير بعدها لانه
اكيد راح يكون في مفترق طرق اما يمشي في الطريق الصح ويستقيم او يمشي في طريق اسواء من طريقه الاول بكثير .....
جاسر يقلب كلامها في راسه وعنده ثقه انها فاهمه شخصية يوسف وتعرف عن وش تتكلم ناظر في عمق عيونها وبتصميم :اذا حرقتي الارض اعطيني خبر !!

في يوم هوشة بروق ويوسف كلمته بروق :يبه تعال اخذني انا طلبت الطلاق من يوسف
جاسر : وش الي صار
بروق : ماصار شي انت عارف اني على كل حال راح اتطلق منه
جاسر : متاكده ماصار بينكم شي
بروق تذكرة كلامها مع ابوها عن يوسف : ارضك الي تبيها انحرقت
جاسر بقلق : بروق انتم متهاوشين فيك شي
بروق : يبه انا بخير ومافي شي وصيتني اعلمك لاوصل يوسف للحد الي تكون قيمة الحياه عنده صفر وهذا هو الحين صفحه فاضيه طايره في الهوا تنتظر من يلتقطها !
كلام بروق خوفه على يوسف والاهي كان واضح انها بخير : طيب انا جايك
سكر الخط و طلع ركب سيارته وتوجه لها فورا واهو يفكر كيف يوصل ليوسف كيف يقدر يساعده اكيد انه تهاوش مع بروق بس وش صار علشان تقول عنه الكلام الي قالته ....وصل بيت راشد العامر وتفاجأ بيوسف يطلع من بوابة الفلا يسحب شنطته ام عجلات وراه متجه لشارع العام جاسر مباشره دق على مشاري وقاله يجي ياخذ بروق واهو لحق يوسف مشى بسيارته بمحاذات يوسف واهو يفتح الشباك الي يم يوسف وناداه : يوسف يوسف تعال
يوسف شافه وانقهر اكثر ماهو مقهور جاي يهاوشه علشان بنته رفع شنطته باليد الي يسحبها ابها وظرب فيها السياره بغظب : وخر عن وجهي وخر موب ناقصك
جاسر : تعال اركب اوديك وين ماتبي تعال
يوسف رفع رجله وشات فيها باب السياره الي يمه بغضب وراح وخلاه
جاسر وقف السياره ونزل منها والحقه امسكه بيده
ويوسف نفض يده بقوه يبعده عنه : قلت وخر من طريقي وش تبي انت
جاسر بطول بال : ماابي شي تعال معي والمكان الي تبيه اوديك له بس تعال
يوسف بقهر التفت عليه : يكون في علمك كنت باذبح بنتك لولا ان غرور تلقفت وتعرضت السكين بيدها ولهالحين ندمان اني ماذبحتها فلا تخليني ارجع لها واخنقها لين تموت بين ايديني
جاسر امسكه بعضوده الاثنين وصار يهزه بين ايدينه ويكلمه بصراخ يحاكي صراخه : هالبنت انت الي انقذتها في يوم من الايام وهذا معروف لك في ارقبتي وعلشان هالمعروف اقول امش معي يايوسف هالحين انا مايهمني انت ولد من والاخو من والاوش عايلتك ومركزها والاحتى يهمني بروق على ذمتك والاطلقتها كل الي يهمني انك انت يوسف .....يوسف الي انقذ بنتي وردها لي سالمه تعال معي يارجال وانت الي متفضلن علي بس امش
يوسف ماهو قادر يصدق الي يصير قدامه كان ناوي
يطلع لشقته ومناك يحجز على اقرب رحله لاي دوله كانت اهم شي يطلع من البلد كله والى اجل غير مسمى بس شكله افتك من البنت وابتلش بابوها
جاسر تغانم سجته واسحبه بيده لسياره فتح الباب
ودفه داخلها وسكر الباب اخذ شنطته وحطها في المرتبه الي ورى واتجه لاقرب فندق حجز لهم جناح وصعد هو ويوسف له .....يوسف مبتلش في ذا الجاسر ومايدري كيف يفك عمره منه جاء في باله
يمشي معه لحد مايذلف لاي مكان ويهج .....كان يمشي جنبه واهو يشوف كيف متمسك بيده وكانهم اب وولده الي في الروضه استغرب من نفسه كيف تاركه يسحبه وراه وين مايبي ......يحس بتبلد فضيع يزحف لروحه ....يحس كيانه كله فارغ فاضي مافيه والاشي يشغله ماهو قادر يفكر بشي
والاقادر يستوعب شي من الي يصير حوله في ذهنه فكره وحده وفي قلبه حسره وحده ....حسره تخنقه
على انه فوت الفرصه يوم استفرد فيها الحالها كان يمديه يخنقها لحد ماتموت بين ايدينه باسكات
كان يقدر يرميها من فوق درابزين الصاله ويشفي
غليله بدمها الي لابد انه بيتطشر على السراميك في كل اتجاه .........وفكره تكبر في ذهنه وتتسع هذا ابوها الي هي منغره فيه هذا ابوها الي تشوفه سماء واهي نجمه متعلقه على صدره ..اخنقه بدالها وخل حسرته جمره تحرق في قلبها طول ماهي حيه ....تفاجأ بباب ينفتح قدامه وجاسر يسحبه معه داخل ....دخل واهو كارهه وكاره وجوده جنبه زفر نفس حار بغى يختنق داخله وغمض عيونه بقوه متوجع من الصداع الي فتك براسه والقهر الي يشتعل في صدره وفراغ مخه من اي شي الا انه يقتل بروق ويشرب من دمها او حتى يقتل ابوها بدالها ماغير هالفكره تدور في مخه وماعداها شتات شتات .....حس بحارسه الكريه يفك يده فتح عيونه شاف قدامه سرير واسع رمى نفسه عليه ....ونام !
جاسر عارف انه ماهو في حال انه ياخذ ويعطي مع احد طلع اول ماشاف يوسف يرتمي على السرير
وسكر باب الغرفه وراه
اذن المغرب وراح توضا.....مر على يوسف صحاه لصلاه والاحياة لمن تنادي مستغرق في النوم لحد عجيب حتى انه ماتحرك من مكانه ارتخى عليه يجس نبضه ويتاكد انه بخير ....طلع من عنده راح صلى ورجع له لقاه زي ماهو اتركه وجلس في صالة الجناح ........اذن لصلاة العشاء وتكرر نفس الشي
الي صار وقت المغرب .......بعد فتره من جلوسه سمع اهواش وصوت يروح ويجي فز واقف وراحله الغرفه لقاه يتمرغ على السرير ويسب ويشتم تحرك له بسرعه جلس جنبه على السرير
ورفعه حط راسه على صدره واهو يسمي عليه
يوسف فز جالس : من انت وش تبي وش صار
جاسر اسحبه لصدره مره ثانيه : اهدى يابوي مافيك شي اذكر الله وبدى يقراء عليه قران
يوسف ماسمع الاقولة يابوي وحس انه في حظن ابوه استرخى باطمئنان ورجع ينام ......على الساعه احدعش في الليل قام يوسف شبعان نوم سحب نفسه من على السرير واستوى جالس تلفت حوله
ظلام مد يده للابجورة الي جنبه وفتح النور مسح
الغرفه بنظره وتذكر انه مع جاسر في فندق قام دخل الحمام الملحق بالغرفه غسل وطلع واهو ينشف وجهه بمناديل رمى المناديل في السله الي جنب الباب وطلع لصالة الجناح واهو يسمع صوت تلاوة قران بصوت السديس دخل في الصاله شاف جاسر جالس يشرب شاهي ومبين عليه سرحان اول ماحس بوجوده رفع راسه اله : اطلبلك عشاء
يوسف تجاهل كلامه وتحرك بخطوات بطيئه لحد ماوقف قدامه : ليش جايبني هنا
جاسر رفع راسه له : قلتلك قبل لك علي جميل وانا انسان احط الجميل في ارقبتي
يوسف زفر بضيق نفس اسلوب بنته ياحبهم لسالفة الجميل ذا الي كرهه وتمنى انه ماسواه من اساسه
صوت من داخله انبه على هالافكار واوحاله بانه ممكن يخسر اجر هالجميل عند الله بسبب تفكيره ذا واهو معترف داخله ان هالي يسمونه جميل حسنته الوحيده او على الاقل العمل التطوعي الوحيد الي هو يذكره والمشكله نيته الي كانت في البدايه صافيه دخل عليها نويا سوء قبل لايكتمل هالعمل اليتيم استغفر بينه وبين نفسه ورجع يناظر جاسر : بنتك الي جبتها لك قبل كنت باذبحها اليوم لولا ان اختي انقذتها عساك مبسوط بالخبر ذا
جاسر مكلم مشاري وسائله عن بروق ومتاكد انها بخير ومافيها الاالعافيه وحتى بروق نفسها كلمها ومكلم امها علشان كذا كلام يوسف ماأثر فيه

: انا متأكد انك مااخذت شنطتك وطلعت من البيت
الا وانت ناوي تبعد عن الناس الي تعرفهم كلهم لحد ماتشوف وش ترسي عليه وانا عندي المكان المناسب لك وعندي المكان المناسب لانك تتوظف فيه ومحد بيعرف وينك فيه
يوسف تفاجأ بالموضوع الي افتحه وهذا الي كان ناوي يسويه بس الوظيفه باقي مافكر فيها هو فكر في انه يبعد عن البلد كله وباقي ماخطط لاي شي ثاني جلس على الكنب على يسار جاسر والتفت عليه : ومن قال اني ابي منك شي
جاسر بهدوء : انت ماقلت بس انا حاب اخدمك ولالي منه عليك انت راعي الاوله وراعي الاوله ماينلحق ومهما سويت لايمكن اوفي جميلك علي
يوسف مايدري ليه ارتاحله سكت واهو يقلب الموضوع في راسه
جاسر شافه سكت كمل : بكره الصباح على خير نروح للمحكمه نطلع صك طلاق بروق وبعدها نشوف متى نطلع لجده ....
خلا يوسف يفكر في كلامه واخذ سماعة التلفون يطلب لهم عشاء
اما يوسف بعد مانام وهدت اعصابه نسى كل الافكار المجنونه الي كانت تعصفبه وشاف ان كلام جاسر معقول ويقدر يعتبره تبادل مصالح هو جابله بنته من البر وجاسر يأمن له المكان الي يحتاجه عشان يبعد عن الكل ...بس هو يقدر يروح لجده اولاي مكان في العالم من غير مايحتاج جاسر ...بس ليه لا خل نشوف وش ورى هالجاسر وليه مصر يكون معاه !
وفي اول يوم لهم في جده جاسر اخذ يوسف لشقة
صقر واهي شقه يجتمعون فيها شباب العائله اذا راحو لجده وجاسر نفسه له بيت ملك ملاصق لبيت
طارق ونفس الشي طارق يملك بيت ملاصق لبيت جاسر في الرياض ....في البدايه كان يوسف معطي جاسر على جوه بدافع الفضول يبي يعرف لحد وين يبي يوصل لاكن يوم بعد يوم توثقت علاقتهم ببعض
وصارو اقرب مايكونون للاصدقاء وفي اوقات اب واولده





________________________


تم البارت السادس والعشرون


اللهم اشف امي لاشفاء الاشفائك شفاءً لايغادر سقما



____________________

آمين
اللهم اشفها شفاءا لا يغادر سقما

مشكورة كاتبتنا العزيزة بارت و لا اروع جميل بجد وو ضحت منه امور كانت خافية عن يوسف

كل عام و انت بخير و ينعاد عليك وعلى الاسرة الكريمة بكل خير