كاتب الموضوع :
كلارينت
المنتدى :
القصص المكتمله من وحي قلم الاعضاء
رد: روايتي الثانية :واللي جابك لغُربة أيـامي بلد ،أحبك فوق مايتخيلون /بقلمي .
*
طلع بعد ما تأكد انها نامت ، سحب نفسه منه بهدوء
وقفل الباب بهدوء ، ونزل لتحت شاف العمّال يبدون إصلاحات
للي اتلفه الحريق : ياربي متى يخلصون ..
ومشى* لسيارته ركب فيها وطاحت عينه على شنطة
سوداء شلون دخلت بسيارته ، استغرب وتلفت يمين يسار
يدور احد وللاسف مافيه ، تفحص الشنطة ماهي غريبه عليها
عرفها من الختم توسعت عيونه بصدمه : هذي شنطة نايف شلون
وصلت هنا !
راح فتحها ولقى فيها اوراق من هالأوراق مكتوب "صك طلاق"
من محكمة الرياض من المحكمة ! توسعت عيونه
سلطان وحط يده على فمه وبكى وضرب يده برقة على الديركسون
وصرخ : لييه طلّقتها يا نايف لييه الإهانه هذي ماتوقعتها منك!
غمّض عيونه بيديه ، وجلس يبكي بحرقة ماتوقع نايف يسوي
كذا شلون يتزوجها بليلة ويطلّقها ، انقهر ومارضاها على دانه
يكفي حالتها الحين تزييد الطين بلّه يوم طلّقتها !وهو يتذكر
الكلام اللي دار بينهم ...
* نرجع للوراء قليلاً ، تحديدًا قبل خطبة نايف ودانه *
نايف كان بمكتبة وينتظر اتصال على احر من الجمر
وباللحظه هذي رن جواله ورد على طول : الوو وينها رييم وين
لقيتها ؟
..: ريم* عند سلطان يا طويل العمر
نايف عصّب : شلووون عند سلطان وش جايبها عنده* وش ناويه
عليه هذي ماتفهم اني قايل لا تروح من وراي !!!
..: ممدري يا طويل العمر ،لحظه فيه بنت نزلت من السياره*
اسمها دانه
نايف توسعت عيونه : دانه هذي مو كانت صديقة ريم !
... : الا بس واضح انه قاسي عليها
نايف سمع هواشهم : اسمع قررب عندهم بس انتبه احد يشوفك
وحطه سبيكر ..
ونفّذ مثل ما سواه بالضبط واتخبى خلف سيارة ريم ، بعد اللي صار
انصدم نايف من كلام ريم ماتوقعها تتبلى على دانه* رغم انها
يعرف مالها بهالسوالف انقهر نايف وشد على يده بقوة : راقب
سلطان وش بيسوي معها ..
قفل الخط وجلس بتفكيير ويتوعد بريم على أعصابه
رايح راد ، مرّت نصف ساعة وسمع صوت كعبها ، عرفها انها
وصلت وفتحت الباب بمياعه : هاااي حبيييبي
نايف ماسك نفسه : شرفتي وين كنتي فيه بهالوقت ؟!
ريم ماشيه لناحيته وتلم شعرها على جنب بطريقه مُغريه: كنت عند
صديقتي واخذتنا السوالف وماحسيت بالوقت ..
عض على شفته السفليه بقهر وقال بنفسه "تكذبين علي
اوريك يا ريم صبري علي بس " اشر لها بعيونه : خلاص روحي
لغرفتك..
ريم بتساؤل وهي تخلل اصابعها بيد نايف: ليش مانت نايم ..؟
نايف : لا عندي شغل
قربت عنده وملاصقه لصدره ريم تتغزل فيه بعيونها : وش
هالشغل اللي بيشغلني عنك حبيبي !
نايف تقزز منها عقب اللي سوته بريم : اعذريني حبيبي بس
الشغل لو ماسويته راح اندم طول عمري
ريم تحاوط خصره وتضمّها لصدرها وبدلع : بسم الله عليك
حبيبي بعيد الندم عنك، دام كذا اجل بسامحك بس لا تتأخر
تراني ولههانه حييل عليك ..
نايف ابتسم مُجامله وبعدها عنه : ان شاء الله حبيبتي روحي
ارتاحي ونامي ..
اعطته قبله ومشت : تصبح على خير حبيبي
نايف: وانتِ من اهله ..
طلعت ، على طلعتها رن جواله ،وكان الجواب اللي ينتظره
جاء بوقته : الووو هاه وش سوى سلطان بدانه ..؟
...: طويل العمر معرف وش اقول لك لكن سلطان سوا اللي براسه
بسبب زوجتك ريم ..
انصدم وانقهر اكثر : شلووون يعني اغتصبها الكلب !
.. : استغفر الله ،ايه طال عمرك..
قفل جواله ورماه ، انقهر ماهو عارف وش يسوي لكن
جت بباله ريم : انتِ السبب ياريم لكن هيّن حسابك عندي
ان ما وريتك الويل ما اكون انا نايف ..
طلعت من القصر وركب سيارته ،وصدق احساسه لما اتصل فيه
سلطان : كنت عارف ماراح تلقى غيري يا سلطان
رد عليه : الو هلا سلطان عسى ما شر ؟
سلطان مسح دمعته : نايف تكفى ابيك تساعدني ضروري
انا سويت مصيبه كبيره ..
نايف بإهتمام مصطنع : بسم الله وش مسوي لايكون ذابح لك
احد !
سلطان يسمح شعره بقوة ويحس بضياع : ياليت ذابح لي احد
كان ارحم لي ، بس اللي سويته شي مايغتفر
نايف فهم عليه : قول وش اللي تبي انا ماراح ارفض لك طلب
سلطان : نايف لازم نتقابل تعال للمكان اللي انا فيه
نايف : اوكي ارسل لي اللوكيشن انا جايك ..
ورسل له على طول ، سلطان حاس بالندم عرف ان دانه عفيفة
وانقهر لما ريم كذبت عليه ، وريم زوجة نايف ، ماهو عارف
وش يسوي سلطان بين نارين ، صديقه نايف وزوجته ريم
جلس بثقل على الأرض حاس بالضياع ، مو قادر يلاقي حل
لكن استسلم انه يقول كل شي لنايف ، وصل له نايف
ودخل مع الباب : سلطان وش فيك يا اخوي وش مسوي ؟!
سلطان : نايف انا ظلمت البنت والسبب صديقتها تظّمت عليها
قلي وش اسوي ..
نايف : طيب قول لي وش اللي صار ..؟
سرد كل اللي صار معه ، نايف غمّض عيونه : ماهقيتها منك
يا ريم لكن دواك عندي
سلطان التفت له : وش بتسوي معها !
نايف بتفكير عجز يلاقي حل : والله مدري انا مقهور منها يا
سلطان عزيتها ودللتها لكن ماتستاهل هالبنت ، تستاهل اعاقبها
او اطلقها ..
سلطان خطر بباله فكره : لييش تطلقها تزوج عليها ..
نايف بإستغراب : تقصد اخذ دانه عليها !!
سلطان : اييه خذ دانه عليها بالسر مثل ريم بعدها بكم يوم طلّقها
نايف رفع حاجبه بإستغراب : على كيفك تشوفها لعبة قدامك !
سلطان بترجي : نايف لو برجع اخذها صدقني ماراح توافق علي
عقب اللي سويته فيها ..
نايف بتفكير : اخذها بس بشرط ..
سلطان : وش شرطك ؟
نايف : تعطيني نسبة كبيرة من شركتك واخذ دانه ..
سلطان بدون تردد : لك اللي تبي تامر امر متى بس تتزوجها؟
نايف : بكرا املّك عليها
سلطان فتح فمه : شلووون بكرا اصبر شهر شهرين!
نايف بإقناع لسلطان : البنت بحالة مزريه واكيد اهلها بيذبحونها
ولا انت راضي تنذبح ! ولا يرمونها بحلق واحد مايرحمها
فكر زين يا سلطان هذا من مصلحتها هي
سلطان بعد تفكير طوييل ،مايبيها تتعذب اكثر عقب اللي سواه
وظلمها واهانها وكسر كبريائها دانه من سنين تحبه ورفضت
ناس عشانه اخرتها تتلقى الغدر والظلم منه، غمّض عيونه
حس بدوامه براسه ماهو قادر يتخذ اي قرار ولا يفكر غير بهالحل
يعرف اهلها مايرحمونها وكافي امها عذّبتها واهانتها عقب
ما انفضحت بسببه ! ، وانقذها من عذاب عبد الله بنشر
فضيحته* مع مرام واضطر عبد الله يهجر امه ويروح لزوجته
سلطان بإستسلام : امرنا لله ..
ابتسم نايف وسبب مساعدته هو انه يأدب ريم على إتهامها لدانه
من غير اي وجه حق ..
* نرجع الى الآن *
شاف ورقة تحت مكتوبه بخط يد نايف ذبحه الفضول
وفتحها جاء بيقراها ،وقاطعه اتصال من عبد العزيز استغرب من
الرقم : الو هلا عبد العزيز انتَ متى وصلت للرياض ؟
عبد العزيز : هلا والله فيك ما تسأل ولا تطمن علي انا حي ولا ميت
ولا عاجبك اللي سويته تحسبني ناسي !
سلطان غمّض عيونه وسؤال عبد العزيز جاء بوقت غلط
سلطان بتنهيده : لا والله ماني ناسي يا خوي بس انا مشغول
راح اخذ اجازة كم يوم ورجع ..
عبد العزيز بإستغراب : لييش خير ان شاء الله وش فيك ؟
سلطان : بعدين اقولك الحين مشغوول ..
تأفف عبد العزيز : هذي تصريفتك دايم مشغول وليتك تسنع شغلك
اسمع يا سلطان اوعدني انك تصلح اللي سويته ولا والله راح
اسوي شي مايسرك وانت تعرفني زين
سلطان بضيق وتغير صوته : والله وعد مني يا عبد العزيز* بس اتركني
بحالي اللي فيني مكفيني
عبد العزيز مستغرب: وش فيك ياخوي ،قولي صوتك ماهو زين
سلطان ببكاء : صاحبي توفى الله يرحمه
عبد العزيز اشفق عليه : لاحول ولاقوة الا بالله الله يرحمه
ويغفر له عظم الله اجرك
سلطان : جزاك الله خير ..
وقفل الجوال ، حاس بضيق وفتح شباك السياره ياخذ له نفس
روحه مكتومه ، وحرك سيارته ومشىٰ..
*
*
جالسه تبكي على اللي صار لولدها راكان نايم
حاطه راسها على طرف السرير وماسكه يده: اااه يا راكان
لييه* ماسمعت كلامي وانا انبهك انك ماتطلع برا الشارع
ليييه ماتطيعني وانا امك يا وليدي ..
الجدة تهدي فيها : خلاص يا ام راكان ولدتس ان شاء الله انه طيب
لا تتسخطين شوفيه الحمد لله حي وكلها كم شهر ويتعافى
مثل الحصان ..استهدي بالله
ام راكان بيأس : كلّه مني انا اللي مهلمته ورايحه الشغل
ليتني ماراحت وقعدت عند ولدي ولا كان صار له الحادث
حمد : لاحول ولا قوة الا بالله يا ام راكان هذا قضاء الله
وقدره مانقدر نغير شي الحمد لله ولدك سليم ان شاء الله
ام راكان: انا لله وان اليه راجعون ، وش اسوي مقهورة على
حالي وحال وليدي هالحين لازم اقعد عنده من يشتغل عني
والاميره ساره وين تروح خوفي تضيع
حمد : لا حول ولا قوة الا بالله اذا على ساره فهي بالحفظ
والصون ماعليها قصور ، انتِ الحين فكري بولدك
وخليك عنده واذا على راتبك فهو بيمشي تطمني يا ام راكان
الجدة :اذكري الله يا ام راكان الدنيا بخير وراتس شايله هم
اكبر منتس استغفر الله العلي العظيم ، واذا الاميره ساره ماعليك
بنيّتي نورة تشتغل عنتس لا تشيلين هم وانا خالتس
ام راكان تمسح دموعها : الله يجزاك خير ويكثر من امثالك
الاميره ساره تبكي : خلاص خاله فاطمة انتِ ارتاحي انا الحين
كبيره لاتشيلين همي
فاطمة ضحكت من بين دموعها وضمّتها : بعد عمري انتِ راح
اشتاق لك مير بزورك واشوفك بين فترة وفترة
الاميره ساره تمسح دموع فاطمة ام راكان: ان شاء الله يا خالة
بس متى راح ترجعين ..؟
حمد قرب عند الاميره ساره وجلس قبالها ومسح على شعرها
وبإبتسامة : اكيد راح ترجع بعد مايطيب راكان ان شاء الله
ونسوي له حفلة كييره على سلامته
ام راكان : ان شاء الله اكيد ياعمري انتِ
الاميره ساره ابتسمت وببراءة: اكييد نسوي حفلة كبييره ونجيب
الالعاب والبالونات وكل شي لراكان صح عمي حمد
حمد ضحك على برائتها : عيون عمك انتِ ايه اكيد تامرين امر
حبيبتي سارونه..
الاميره ساره وقربت عند راكان : يسس يسسس ....يلا راكان
اشفى بسرعه عشان نسوي الحفلة ..خلااص
حمد : ان شاء الله يلا سارونه امشي تأخرنا
ام راكان ضمّتها وباستها : روحي انتِ الله يحفظك من كل مكروه
يلا حبيبتي استودعتك الله
الاميره ساره نزلت دموعها : رااح اشتاق لك يا خالة اااهئ اااهئ
ام راكان مسحت دمعة الاميره ساره : وانا بعد اكيد راح ازورك
قريب بس انتبهي على نفسك حبيبتي ودعتك الله...
مسك يدها حمد : يلا عن اذنك وطهور ان شاء الله يا راكان
الجدة : اذنك معك يا وليدي وجزاك الله خير ..
طلع حمد والاميره ساره بعد ماوصلوا فاطمة ام راكان
اللي كانت صدمه بالنسبة لها .. ام راكان ارمله توفىٰ
زوجها واضطرت تشتغل مربيه لسمو الاميره ساره وهي صغيره ،
وتصرف على ام زوجها وولدها وكانت تجي بيت خالتها ام زوجها
بين فتره وفتره تزورها ...لكن اضطرت تاخذ اجازة طويله لحد
ما يشفىٰ ولدها راكان ..
*
يُتبع
|
27-07-19, 12:34 AM
جديد مواضيع قسم القصص المكتمله من وحي قلم الاعضاء
العرض العادي
