صبآح الحب ..يالميناء
صبآح أجمل ..أغانينـآ
صبآح فيروز ..لـ غنت
هنآ مشينــآ .. هنآربينآ..!
(مدينة الـــورد)
نــدى//
اليوم العصصر طلبت مني مريم اروح للحوش اجيب همس ,تقول ريم
مشغوله بالمطبخ لبست عبايتي ورحت لنوره اسالهاا من فيه بالحوش ,
قالت لي عمي مطلق وجدتي..
طلعت من عندهاا ووقفت على باب الاستراحه اشوف السيارة /
سيارة تركي موجوده ,!!
فكرت ارجع لمريم واقولهاا مقدر اطلع الشباب فيه ,بس استحيت منهاا ..
دخلت يديني بالعبايه وانا التفت يمين يسار بخطوات سريعه رحت الدكه ,
لقيت عمي مطلق وجدتي,
سآلتهم عن همس وقالو لي انهاا ببيت الشعر عند ناصر وراكان ,
ندى: طيب امهاا تبغاها ومرسلتني لهاا كيف اجيبهاا>> افرك يديني ببعضهاا
عمي مطلق: يابوك دقي الباب على العيال يطلعونهاا لك..
ندى: لا ياعمي مقدر مستحيه منهم>> كنت ناويه ارجع
جدتي: مستحيه من عيال عمك يازين ذيك الايام يوم نضحك ونسولف ونجلس مع عيال عمنا
ولا قلناا مستحيات >> ماسكه فنجال القهوه وتسولف ..
عمي مطلق: اجل انا بطلع هالحين وامر اجيبهاا لك بس اصبري علي يابوك الين اشرب
قهوتي>> يشيل الفنجال ..
مارتحت ظليت واقفه دقايق الين قام عمي راح لبيت الشعر وانا واقفه مكاني انتظره يطلعهاا
لي باخذهاا ورجع ,جدتي جننتني وهي تقول اجلسي وكل مره اقول لهاا برجع لمريم تاخرت ..
شفتها طالعه مع الباب تحركت من مكاني >آخيرآ..!!
خطوتين ووقفت تركي طالع معهاا وماسك يدهاا ويدرجهاا بشويش ,
لفيت ورجعت لمكاني قريب من جدتي
رغم ان يديني وعيوني ومغطاه تمامآ الا اني صرت اسحب كم العبايه بقوه وانا ارجف ..
يمشي مع هموس ماسكها بيده اليمنى وجواله بيده اليسرى ,لابس ثوب ابيض بدون شماغ شعره مبعثر
ونازل على لياقة الثوب ,يتكلم ويبتسم ويناظر في ,عارف اني اناظر فيه وانا دلخت حتى مالفيت وجهي
عشان مايحس اني اطالعه...!!!!
وقف جنبي بيني وبينه همس وهو يقول:
تركي: من يبغى هموووس>يكلم جدتي
جدتي: امهاا مرسله ندى لهااا..
جلس قدام هموس وشبك يدينه من خلف ظهرهاا وهو يقول:
تركي: تروحين لماما مع ندى ...؟
ليه يقول اسمي بدون تكلف/بصدري
هموووس معهاا حلاوة مصاص وتناظر فيهاا وتقلبهاا فـ يدينهاا ..؟
تركي: هموسس احبك والله العظيم احبك / هي تناظر بالحلاوه وهو يتكلم..
رفع عيونه في وهو يقول عسى عجبتك الهديه/ ويبتسم نص ابتسامه..
قطع الخمول اللي احس فيه صوت جدتي
جدتي: انتي معطيهاا هديه>>تقصد همس
تركي: هااه ايه آيييه ياجده /يناظر فيهاا
وكمل// ياويلك لو تضيعينهااا بعاقبك /يمسكها من اكتافهاا ويهزهاا بشويش..
جدتي: تستاهل همس وش عطيتهاا هديه / ؟؟!!
تركي: يضحك حلاوه عطيتهاا حلاوه صح ياهمسس / ويوقف
المفروض اتحرك واخذ البنت وارجع ,,
بس وقفت مدري وش انتظر سمعته يقول :
تركي: يالله روحي لندى >> ويدرجهاا باتجاهي
صحيت ومسكتهاا بيدهاا وانا ابلع ريقي, بنص الطريق وانا راجعه لفيت خلفي اناظر فيه
هو شافني اطالع ابتسمم/ غبيه الرجال وش بيقول عني ,
احيانا يستفحل الغباء عندي لدرجة اني اسوي
اشياء بعد وقت احط يديني على وجهي منهاا ,كيف تجراءت وسويتهاا اخذت الهديه منه
وطالعت فيه وانا المفروض ماالتفت على وراا وهو موجود ..
مع باب الصاله تركت يد هموووس وانا اقول لساره وديهاا لمريم..
دخلت الغرفه ورميت العبايه .ناقده على نفسي رغم رجفة قلبي اللي احسهاا غير غيييرر غيررر...!!
احس اني اخون ناصر لو يعرف ان اخته عايشه حب مع صديقه وولد عمه وش بيقول بيتقبل
ولا بتجن جنونه ,عارفه تربية تركي وواثقه من نفسي بس عندي احساس ماهو مريحني ضميري يوجعني..!
مشاعري نوعين/ فرحانه بتركي وتلميحاته , وناقده على نفسسي كثييرر ..؟
""""""
(الرياض.....)
امر مرهق
ان تتقمص دور الامبالي
وانت تتابع تفاصيل التفاصيل...!!!
ضيعت وقتي رحت جيت, وقفت عند التسريحه,
لفيت على الدرج فتحته رجعت سكرته , نزلت اناظر تحت سريري,
وقفت عند الشباك , جلست على السرير وحطيت رجل على رجل, تربعت ,*_*
سحبت الوساده وحطيتهاا اخر السرير
رفعت رجولي على مراية سريري, اخذت جوالي وسجلت صوتي اغني , بعدين وانا اقول قصيدة
بصوت واطي وحزين , جلست وانا اعيد التسجيل ,
اخر شي رميت الجوال ورحت الدرج طولت وانا اناظر بملابسي
اخذت بنطلون رصاصي وبلوزه ابيض رسميه واسعه وطويله عشان اخواني فيه وجاليه رصاصي ,,
لبست ووقفت قدام المرايه وانا اشمر الاكمام ,,شلت شعري بربطه , وحددت حواجبي وتعطرت وكريم وطلعت,,
وانا واقفه بالصاله حسيت اني متكشخه رغم انها عادتي كل عصر مااطلع من الغرفه الا لابسه لبس حلوو..!
>>ليه شاكه فـ نفسي مدري...!!
رحت لمي وانا داخله مع الباب:
يمه نايمه/ اشغل الانوار..
امي: لا صاحيه اخوك وين>>فصوول
وانا اوقف عند راسهاا:
كان هنا بس الظاهر راح لريجيل ..
آمي: صليتي >ترفع راسهاا لي ..
ايه وبروح اسوي قهوه اجيبهاا هنا>> بغرفتهاا
آمي: لالا حطيها بالصاله بس اول شي سوي قهوه لخوانك وولد عمك
اكيد بيطلبون قهوه>> وهي تجلسس
طيب>> وانا رايحه للباب
رحت المطبخ وجهزت قهوه لهم وقهوه لي انا وامي, وبعد ماخلصت جاني سعود,,,
سعوود: بخخ >> وهو داخل مع البابxxxx
آحلام: ياشيخ يعني خوفتني/ ابتسسم
سعود: وين ميمتي >>يفتح الثلاجه..
آحلام: امي تصلي وش تبغى..؟؟
سعود: ابي اجلس معهاا مشتاق لهاا>>راسه داخل الثلاجه*+*
آحلام: طيب اخذ قهوة الريجيل وبعدين تعال اجلس معناا انا وامي بصاله..
سعود: لا انا بروح ل امي ياخذهاا فيصل>>سكر الثلاجه وطلع
اخذت قهوتنا ونزلتهاا بالصاله عند امي وسعود ..
آمي: سويتي قهوه ل اخوك وولد عمك..
آحلام: ايه بس عيا الاخ ياخذها لهم>>ااشر على سعود
امي: قم اخذ القهوه لرجال لاتفضحناا فيه >> تهاوشه
سعود: يجي ياخذهاا فيصل ولا سطام جالسين هناك فاضين/ لزق فـ امي ..
آمي: طيب دق على سطام يرسل فيصل ترى بقوم اوديهاا لهم ..؟؟
قام سعود وهو يهاوش وراح للمطبخ /وانا اضحك ..
(مجلس الريجيل..)
سعود داخل مع الباب..
سعود: عمي فيصل ليش ماجيت تاخذ القهوه>>نزلهاا عند سطام
سطام: وانت ليه معصب على راسك ريشه / يتربع ويصب القهوه
عناد: آجلس بنسولف ليه واقف>>يكلم سعود
سعود: لا انا بروح اتقهوا مع امي مشتاق ل ام راكان /
قبل لايوصل الباب وقف وهو يسمع عناد يقول:
عناد: سعود سلملي على عمتي/ ياخذ الفنجال..
سطام: مالوم راكان فيك عسساك بالعمى ..
سعود: عناد اسلم لك على امي بس/ يضحك
سطام يلف عليه بسرعه ويرفع حاجبه: انقلع وحسابك عندي / عصب
عناد: خير يمزح الرجال وبعدين تراني ولد عمهاا ماني غريب>>مستغرب من سطام..
سعود: انا قصدي فيصل ,عناد اسلم لك على امي وفيصل / يصرف ويضحك
سطام: خلاص انقلع / مايناظر فيه ..
طلع سعود يضحك وعناد يقول:
ترى اللي انت خايف علاهاا بنت عمي وسعود يضحك لاتاخذ الموضوع بحساسيه..
سطام: عناد انا مابغى سعود يمزح فالاشياء هاذي ويستسهل الكلام فيهاا بسس
انت ولد عمي وعلى عيني وعلى راسي وعارف انك احرص مني على عرضي..>>بجديه
عناد: ولد عمك ونسيبك لاتنسى..
سطام: يشرفني والله آسعد الحظات انك تكون نسيبي /يبتسسم
"""""""""
سوالفي انا وامي وسعود كانت بعيده كل البعد عن عناد ,
عرفت ان سطام بيسوي ل عناد عشاء الليله,
على الساعه 6 المغرب بديت اجهز بعض الاغراض ..
قال لي فيصل ان عناد وسعود وسطام طلعو ..
وعلى طوول على قسسم الريجيل رتبته ونظفت ولقيت مفتاح سيارته
فالمجلس بس والله ماتجراءة اقرب حتى وامسكه , طلعت للحوش وتاكدت من نظافته ورجعت لغرفتي ,
لانهم على وشك الوصول,
فكري مشغول ابي اعرف متى راجع لطايف...
جلست قدام التسريحه وانا اقلب فجوالي ريم داقه اكثر من مره..؟؟!!
ونوره مرسله" اللي لقى احبابه نسى اصحابه"
ضحكت من نوره وصمت جوالي مافيه امل ارد خصوصآ على ريم لاني عارفه نوايهاا..
انتظرت بغرفتي الين صلاة العشاءء صليت ورحت المطبخ..
جاب سطام (الذبيحه) وبديت اجهز مع امي العشاءء , الساعه 9تفرغت للجريش وسويت سلطات
حاره وبارده, سويت اكثر من طبق مع الوجبه الرئيسية ,,,
وحرصت على فصوولي يوزعهاا بطريقة معينه على السفره,,
انا متعوده على الاشياء
هاذي يعني مو عشان عيون عناد آهم شي عندي يشوف آي ضيف يجينا شغلي مرتب //
سوا الضيف مهم بالنسبه لي او عادي..؟
12 تمام دخلت غرفتي هلاكانه صاحيه بدري وتعبانه موووت, دخلت اخذت دش ولبست بجامتي
وووهوووووباااااا على سريري, هنآ طار النوم تعبانه بس نومي متعومس خادره مابين صاحيه ونايمه,
قلبت جوالي وهو يدق شفت رقم ريم, جد جد ماهو وقته تدق طنشتهاا,دقت مره ثانيه طنشتهآ..
صوووت رساله:
فتحتهاا ...
" العاشق الولهان مشغلك عن بنت عمك, هونك على آخوي تراهـ بدوي اذا حب جاء على وجهه"
ريم/ وحاطه ضحكه لهاا اول مالهاا اخر..؟؟
غفت عيني الساعه وحده وصحيت بعد ساعه ونص , حاولت ارجع انام ماقدرت ,,
طلعت اجس النبض وش صار بعدي,,؟؟
امي نايمه وقفت على الباب الفاصل بين قسم الرجال وقسم الحريم,
باب المجلس مسكر واصواتهم يضحكون ويسولفون...,,!!
ناقصني بالبيت راكان وخالد واملك الكون كله ,,,
ياليتهم موجودين /امي واخواني وعناد ياحلو الدنياا فيهم..!
رجعت لغرفتي , نزلت علبت الببسي واخذت روايه ودخلت فراشي,,
الصفحه الاولى لي ربع ساعه بالصفحه الاولى/ قفلتهآ آبي خواطر ..
فتحت جوالي على خواطر حافظتهاا ..
آبتسمت وانا اقراء:
آتعرف الى أي حدٍ آحببتك..؟
لـ حد آني زهدت بالعالم لـ أجلك
وجعلتك عالمي..
بعيدآعن آي آحد..
وقريب اليك..
ينجلي حزني,وتفتح مدينةالفرح
ب قربك فقط..!
لاشي آكثر من آني (أحبك)
كبير حظي بك..؟
......
آحس براحه غريبه يمكن لانه هنا ,
يمكن لاني احسه جاي عشان , اليوم ماتذكرت الطايف
فعلآ فعلآ ماتذكرتهاا طيب اخواني هناك ليه نسيتهاا , معقوله احبه اكثر من اخواني,
آهـ ضعاف القلوب ماودك يحبون لانهم يتعذبون اكثر مما يفرحون...
آخذني التفكير ل هنآك / آم عناد / ليه اشوفها قدامي كل مادعيت ان عناد حلم ويتحقق.."
ياودي امنع نفسي من التفكير فيه , ليته يصير شخص عادي ,ليت قلبي يعقل ويركد,ليتني
ارجع كم شهر ورا,وياااليت ليت ليت آعرف مصيري...!!
آتضايق حيل اذا تذكرت كلمة العنود (رافضتك)
فالوقت اللي كانت بنتهاا تعلقني بـ اعناد /آسمع آنهآ رافضتني لا وتقوله لـ ام العنود,
ضايق صدري اخذت السجاده وغسلت وصليت ,آبدآ مادعيت ب اعناد, كل دعائي
"ربي استرني فوق الارض وتحت الارض ويوم العرض وارزقني بالسعاده بـ دارين"
بعد صلاة الفجر جهزت فطور لهم ودخلت انام....!!
xxxxxxxxxxxxxxxxxxxxxxxxxxxx
(الطايف....)
آم عناد ومريم وريم// بالغرفه ..
آم عناد: عناد تغير حتى ماقالي انه بيسافر/ زعلانه..
مريم: يمه ترا هو ماقال لاحد تفاجاءنا كلنا مثلك/ تلعب مع هموسه
آم عناد: ليتنا ماجينا من حايل كان عاقل وراكد ورجال علاه العلم..
ريم تضحك: عناد للحين عاقل وراكد ماتغير واحمدي ربك اننا جينا انفكت عقدة ولدك
كان رافض الزواج ..؟
مريم: هموووس هاتي العروسه >>تاشر لـ همس..^^
ريم:ياآآآه متى يتزوج عناد نذر علي لااسوي له احلى زفه / تناظر فـ امهاا
آم عناد:قريب ان شاءالله قبل لاتجننه
احلام ..
مريم: تناظر بريم وشاكه بكلام امهااا..؟؟
ريم: الله يعين عناد الكل واقف بوجه سعادته ياعزي عنك ياخوي/ وهي طالعه من الغرفه,,
""
ريم:سلاااااام/ داخله على البنات بالغرفه الثانيه..
ساره: وعليكم السلام خير عمتي ريم ليه معصبه/
حاطه صحن المكسرات بحظنهاا ومتمدده على الكنبه..؟
نوره: هلااابش وش فيش / تعلج لبان *+*
ريم: نعم/ تضحك..
نوره: وش فيش/ يعني علامتسس يابعد حيي / توضح لها
ريم: ايه علامي /طفشانه وطافح عندي الكيل عسى ماعندك مانع>>زعلانه
نوره: لاطال عمرك خذي راحتك/ تلف على ساره..
ندى: ريمووووو وش فيتسسس وراتسس قالبه خشتسس/
جالسه تحت الكنب وتاكل مع ساره مكسرات..
ريم: ياربي داخله قسم شرطه //بزعل//تحقيق..
العنود: انا الضابط/ترفع يدهآآ
ساره: انا اشوفهاا ساكته اثاريهاا تختار الرتبه/ تسكرعين وتفتح عين..!
نوره: انا الحرامي اسجنوني مابي اشوف احمدوووه /تضحك
ندى: ضعيف هالاحمد لو يعرف انك 24 ساعه تهاوشينه بطل زواج..
نوره: فيه ناس تعرف بس ماعنده احساس>>تناظر باساره
ساره:نياهآآ نييياهآآ هآآهآآآهآآآ تقصدني
ريم: لا آنتم مافيكم رجاا الحوش ابرك لي // طلعت من جنانهم*+*
""""""""
(جلسة الريجيل ببيت الشعر)
ناصر: ومتى جااييين ان شاءالله/ بنص الجلسه
عناد: مطوول ويمكن اعرس واستقر هناااا >>يضحك
ناصر: تتزوج وعمك هناا / ياشر لراكان
عناد: سسطام موجود يكفي ..
راكان: سطاام هاااه خل سطااام ينفعك /يسمع عناد صوته
عناد: عمي زعل علي لابلاه مااتزوجنااا xxxx
ناصر: هاللحين عمك قبل شوي سطام يكفي/يضحك
عناد: لا الا عمي مااستغني عنه ..
تركي: ناصر خلهم يرجعون اشتقناا لسطام>>بطفشش
عناد: اللي يتكلم عندك من//يسمع صوت تركي..
ناصر: ترووك ابن مطلق ههههههههههه
عناد: تريكي قل له اني بجيب سطططاام معي ..
ناصر: ايه تكفى الصيفيه بتنتهي خلناا نفلهاا// وكمل//ارجعوو بدري,,
عناد: يالله تامرني خدمه..
ناصر:لاسلامتك بس لاتطولون.
عناد: ان شاءالله /وكمل/سلم لي على عماني والعيال ..
ناصر:يبلغ ان شاءالله..
عناد: ممع السلامه..
ناصر:بحفظ الله ..
"""""
ريم واقفه على باب الاستراحه عند قسم الحريم...
ريم:الووووو
عناد: هلااااوغلاااا/يبتسم
ريم:حمدلله على السلامه ليشش جوالك مشغووول/ بتافف
عناد:كنت اكلم ناصر وش فيه/ بخوف
ريم: طفشاانه وانت عايشش جوك عند آحلامك...؟
عناد:بدت حركات الحريم والغيره ولااا شلوون ..*
ريم:لمعلوميتك انا مااغار ,ثانيآ انا احب احلام ومستحيل اغار منهاا ..
عناد: طيب وش فيك زعلانه/ باستفهاام
ريم: مشتااقه لك بس/ تصرف
عناد: علينااا قولي غيرهآآ ..؟
ريم: بالله كيف اجواء الرياض>>تغير الموضوع
عناد:يالبآ الرياض وسكان الرياض,,
ريم: آحم آحم وش تسوي خلاص جربت السياره ارجع/تضحك
عناد:يضحك /كاااشفتني ...
ريم: مستانسس عند سططام/تـموه*+*
عناد: ايوالله بالحيل وماودي ارجع لطايف ..
ريم: ادق على حبيبة قلبك ماترد >> من لقى احبابه
عناد: خلاص انا اقول لهاا تكلمك ويضحك
ريم:ههههههههههههههههه
عناد: آمي كيفهآآآ..؟؟
ريم: بخيير حمدلله /تغيرت نبرة صوتهاا
عناد: انا راجع بكره ان شاءالله
ريم: توصل بالسلامه
عناد: الله يسلمك ياخيه
ريم: طيب اتركك مع اهل الرياض ماودي اشغلك..
عناد: ههههههههههههه
ريم:مع السلامه..
عناد: مع الف الف سلامه..؟
""""""
(العاصمه...)
صحيت الساعه 1 الظهر وآخلاقي زفت,
تخيلوو نمت واول ماصحيت تذكرت (كلمه آمه)
عمري عشرين سنه والله مااكذب اذا قلت اول مره احس بجرح ف كرامتي ..!
واللي يقهرني موقفي قدام البنات وانهم كلهم سمعو الكلمه,
صحيت وانا ماابغاه يجي حتى على بالي, عارفه ان ماله ذنب بس
مجروحه من امه وكاره نفسي اني مااتخذت موقف وخليت الموضوع يعدي, طلعت للمطبخ وسويت الغداء
بصمت مطبق , جهزت شغلي واخذت كوب مويه بارد ورحت الصاله انتظر سطام يرجع وامي تصحى,
فتحت التلفزيون حطيت على قناة شعر شعبي/ آول ماقلبت على القناة سمعت شيلة يامعنيني ,,,
مادمت تسوى عيوني يامعنيني
جمع محطات عمري لاتبعثرهاا
حبك يضخه فوادي مع شراييني
يعني لو اعطيك روحي لاتكاثرها..!!
غرقت عيوني دمع وسحبت الريموت وطفيت التلفزيون ,ربع ساعه ووصل سطام,
بكل خمول الدنيا رحت المطبخ وحطيت لهم الغداء وصحيت امي
وتغديت معهاا مجامله ,نظفت البيت
ورحت غرفتي سكرت الباب برجلي وانا داخله ورميت نفسي على السيرير على وجهي
غطيت وجهي بالوساده وانا احط يدي فوقهاا ,نمت....
صحيت 5 العصر مفجوعه صليت ولبست تنوره اسود وبلوزه نيلي ورحت ل امي بالغرفه,
يمه العيال فيه/ اول مادخلت مع الباب..؟؟
آمي: ايه فالمجلس .../ على السريرهاا
ليش ماصحيتيني طلبوو قهوه/ بسرعه
آمي: شفتك تعبانه وخليتك ترتاحين ,سويت لهم قهوه واخذهاا فيصل,,
جلست على السرير وانا اقول: يمه هم مطولين/بتضجرر
آمي: لا راجعين الليله ..؟؟
حتى سعود بيرجع ,,
آمي: ايه بيرجع مع خويه>>تقصد عناد
تبغين قهوه>> اغير االموضوع
اممي: لا خليهاا بعد المغرب..
سحبت بطانيتهاا ودخلت معهاا وهي تقول:
آمي: لايشوفك فيصل يستحي منك عشرين سنه
ونايمه بحظني/ تمسخرني الله يسلمهااxxxx
دخلت معهاا بالقوه الجبريه وسحبت يدهاا وحطيتها وساده لي ,
تركتهاا تسب في براحتهاا وظميت يديني لصدري ونمت,
لا لا الصدق اني ماكنت نايمه بس مثلت على امي عشان تخليني بحظنهاا ,,
وربي محتاجه احد يظمني يساعدني اقفي وتركـه
انساه وارجع, لحياتي ,وجامعتي ,وامي واخواني ,خرابيطي ,مذكرراتي, قصايدي, رومنسيتي العفويه ,طيبتي ,
آآهـ ياكرهي لطيبتي , اموووت اذا جرحت احد ولو من غير قصد , وامووت الف الف الف مره اذا انجرحت..!!
اليوم مودي لاهو قصايد ولا خواطر ولا
روايات , اليوم حزن صافي وصمت , اليوم ابي كذا احد يحط يده على كتفي
ويقول نامي انا موجود عطيني همك ونامي...!!
سكوني الغريب شكك امي اني ماني نايمه وقالت بصوت واطي
آمي:آآآحلآآآم
هآآهـ/ جاوبتهاااا لاني خايفه اذا طولت على هالحال ابكي وانا مابي آبكي واحسس امي بالهم..
رفعت البطانيه ونزلت ,,,
بسوي قهوه/ وانا طالعه مع الباب , ترسبات نفسيه تخليني ابكي من اتفه سبب..؟!
سويت قهوه ونزلتهاا بالصاله ورحت غرفتي عدلت شعري وتعطرت وطلعت ل امي مره ثانية,
بعد صلاة العشاءء جلست على انت اخذ كم صنيه بسويهاا على العشاءء وتفجاءة بسطام :
يكلم امي فالصاله رحت لهم:
سطام: خلاص ترى عناد بيجيب العشاءء من براا >يكلمني
آمي: لاتخليه يجيبه فشيله الرجال ضيف >>جالسه على التلفزيون
سطام: والله حاولة فيه بس رافض يقول انا ماني غريب/ واقف عند امي
مشيت خطوتين وانا اقوول:
سطام انا مجهزه اغراض العشاءء لاتجيبونه من براا // مسستحيه منه
سطام: ياناس الرجال معزم ويحلف مااقدر اكسر كلمته,,
آمي: خلاص يااحلام راحه لك دامه معزم / تتابع برنامج
سطام: انا بطلع عندي مشوار قريب وراجع سعود
وفيصل موجودي اذا بغيتو شي/ وهو طالع...!!
تركت امي مع برنامجهاا ودخلت غرفتي , مابي افكر بشي , اخذت سماعاتي .
من الدرج وحطيت قرآن ,استلقيت وغمضت عيوني وانا اسمعه بهدؤ...!
جاب عناد العششاء الساعه عشرة وكان يكفي قبيله ,,,
البدوي اللي تقول العنود مايعرف شي
الا القنص جايب عشاءء فخم جدآ وواضح انه متكلف,,,
امي تهاوش لانه كثير واحنا بس 6 انفار,,
وزعت لهم الاكل انا وفيصل وبعد ماخلصوو نظفت المكان ونظفت البيت بالكامل ..؟
وحده الا ربع كان البيت فاضي من عناد وسعود..!
"ضاق صدر الرياض ,ووقف نسيمهآ , آختفى قمرهآ وطال ليلهآ,
آشجارهآ تتمايل حزن , وسماهآ كسف لونهآ,الشوارع الليله كئيبه وهي تودعه وتزفـه لطايف ,,,!!
رجعوو عناد وسعود وزادت ضيقتي ضيقه , رغم اني اتحجج بان صدري
ضايق من الظهر قبل لااعرف عناد متى مااشي....؟؟
بديت اشغل نفسي, صار كل همي آني اسلاا عن عناد, رجعت اكلم البنات وماسلمت من تعليقاتهم ,
عرفت من مكالماتي مع نوره واللي بشكل يومي ان عماني حددو موعد الشبكه
وحسيت ان نوره شايله هم من التجهيزات وكان ودهاا تكون بتبوك عشان تاخذ راحتهاا
قررت اجيب لنوره معي فستان ويكوني هديتي لهاا ,كنت بسويهاا مفاجاءة بس خفت تنزل لسوق..
وخصوصآ انها قالت لتركي آكثر
من مره بس هو مشغووول , في مكالمه طويله عريضه اقنعتهاا وانا اقول هديه تردين الهديه,,؟
بالغصب وافقت نوره وحلفت لهاا اكثر من مره ان قيمة الفستان من فلوس المكافأة لانهاا متراكمه عندي
من سنه واكثر مااصرف منهاا كثيييير,,,
الفستان واكسسواراته كامله عندي , ومن هناا من الرياض ,ارتاحت نوره كثير من هم الفستان..؟
حددت مع سطام وقت انزل فيه لسوق اقضي للعيد واشري لي فستان لشبكة نوره واجيب فستان لهاا ..
ضغطت على نفسي بعد ماعرفت ان رجوعنا لطايف 10 من رمضان ,,,
اخذت اكثر من طقم للعيد , واشتريت فستان لي وفستان نوره
بكامل اكسسواراتهاا ....؟؟
نوره والبنات كانو معاي خطوه بخطوه >رفضت اصور الفستان
ولا حتى اقول لهم اللون , كان كل همي المقاس وتاكدت انه تمام,,,,
حتى فستاني ماعطيتهم عنه ولاخبر..!!
على هواشهم وسبهم انام كل ليله ,صرت مثلهم اول مايفتحون الخط
اهاوش الين تنتهي المكالمه,,,!!
قبل رمضان بيوم كنت مخلصه كل شي ,,,
الايام العشره الاولى من رمضان كانت هاديه جدآ انا وامي وسطام وفصولي,,
انام بعد الفجر اصحى لظهر وارجع انام الساعه 3 تبداء رحلتي مع المطبخ واحيانا
اذا كنت فايقه اجهز بعض شغل بكره بالليل ,..
ولا اصحى اليوم الثاني الا متاخر, من الساعه 11 اجلس على التلفزيون اتابع مسلسلات
وبرامج الى الساعه 2 اتفرغ لنفسي,آقراء قران واصلي واعيش اجوائي الرومنسيه ...!!
مكالمات ريم متاخره جدآ احيانآ 3 واحيانا 4 الفجر وكلهاا تختمهاا بعناد يسلم علاك..؟
بعد رمضان بثلاثه ايام دقت علي وكان صوتها مريب جدآ حسيت ان عناد عندهاا
ماعطيتهاا فرصه طلبت منها تدق وقت ثاني لاني مشغووله/ وقفلت,,..!!
هناك بالطايف ماعندهم جديد ,اللي اعرفه انهم ينامون بعد الفجر كالعاده , وان البنات من الساعه 2 بالمطبخ ,
ندى والعنود اكثر ثنتين يتشكوون من المطبخ ,,,,!!
على كلامهم ان الجمعه برمضان رهيبه وتحمست كثير لرجوع..
*آخبار الاستراحه تجيني لحدي برساله او مكالمه من نوره ,,,,
اكثر مكالماتهاا تطلب مني ارسل لهاا صورت الفستان,
وبعد مااعرف وش صاير هناك واسمع اخبارهم ارفض وباصرار ,
واحلف واتهاوش معهاا ونقفل الخط, وكل مره على هالحال ,
بديت اجهز شنطتي وانا متحمسسه لرجعه , وانتظر بعد بكره على احر من الجمرر.....؟؟
21-02-17, 03:25 AM
رد: عناد حايل يعشق أحلام نجد،للكاتبة/ ديرتي نجد وأنا قمرها،سعودية(مكتملة)
جديد مواضيع قسم القصص المكتمله
العرض العادي
