بارت جميل كجمال كاتبته ❣ متى راح نسمع خبر حمل غادة 😍😍 في انتظار بارت اليوم بكل شوق ..

" الفصل التاسع والستين "
" يمكنك التقوّس على نفسك كجنين , ولكنّ العالم لن يتحول إلى رحم أم " !

السـاعة 6:00
6:15
6:49
7:00
7:01
تنهـــد بضيق ... حفــظ رسمة السقف عن ظهر قلب .. مـال براسه بكسل للجهـة الثانية إنتبه لها نايمة بعمق .. عـدل جلسته وهـو يشيل راسها بخفه عن ذراعه ويتركها تكمل نومتها على وسادتها ... بينما دعك راسه بتعب .. وانسحب من سريره ... دخل المطبخ وهو يتسند على الطاوله ويشرب علبة المويه في نفــس واحد ... وختم العلبة بمسح على وجهه وهو يتنهـد ... كشر بوجهـه لما إنتبه لصورة أبوه ترجع تقتحمه .. ذبحه الصداع مـو فاهم كيف ينسى الفكره .. فكرة التـــناسي ماعاد تنفع ... رفع راسه بخمـول لساعة الحائط المطبخ .. الوقت ما أسعفه إلا بمرور ربع ساعه من آخر مرة تحقق من الوقت ..
: مانمت .؟!
التفت لها .. كانت تدعك عينها بكسل وهي تدخل المطبخ : شفيك ؟ صاير ماتنام نهائي .. كل ما أفتح عيني احصله شارد بالسقف أو مو بالسرير ؟
ابتسم بخمـول : انتي شمصحيك هالحزه ؟
ميهاف بهـم : فتحت عيوني حصلتك مو جمبي فزيت .. ( قربت منه وهي تحضن ذراعه ) شفيك بدر ؟
بدر عدل وقفته : مافيني شي صحيت استعد اطلع دوامي ..
ميهاف عقدت حواجبها : دوامك مو 9 ؟
بدر : لا اليـوم ضروري اروح بدري .. ( ابتسم ) إلبسي بعد انتي عشان تطلعين معي
ميهاف باستنكار : انا ؟ ليه ..؟ ( ابتسمت ) خاطرك تحطني مزهريه بمكتبك ؟
بدر تنهد : ياليته والله ... ( صلب طوله وهو يتكلم بجد )بس بجد بنروح لأبوك دام مداوم هالوقت اكيد ولا بخاطرك وظيفتك تروح عليك ؟
ميهاف عقدت حواجبها : بس انا قدمت على المنزلي
بدر : كنسلته ! كلمت ابوك وقلت يلغي تقديمك .. راح تاخذين الوظيفه اللي كانت بخاطرك من البداية , ومعرض أبوك للحين ينتظرك تمسكين ادارته
ميهاف ابتسمت : متأكد انك مو تضغط نفسك عشاني ؟
بدر مسكها من كتفها وهو يدفها قدامه : خلي منك هالخرابيط وألبسي ولا تعيدي غلطاتك ياهبله وتتركين شي عشاني وبعدها تندمين !
ميهاف وهي تركته يدفها : ههههههههههههه طيب بمشي
بدر وهو يوقفها عند دولابها : يله تحركي
ميهاف ابتسمت وهي تلتفت له : طيب أحبك ؟!
بدر رفع حـواجبه : طبعـا .. وليش ماتحبيني اصلن ؟
ميهاف كشرت : يييييه منك هالغرور مـــاتبطله
ابتسم لهــا : امـوت فيك ... انتي اللي اجتمع فيك حبي ونصيبي
تنهـدت وهي تشـوفه يطلع ... هالفترة كانت مضغوطة نفسيا .. بخاطرها تحنط هالراحة اللي تحس بها حاليا .. فعلا مافيه اكوس من الإستقرار .. غيـرت بجامتها لجيــــنز وبلـوزه سترايبز , اضافت لمسة كاجول مع الجاكيت القماش باللون الزيتي .. لبست بوت قصير بيجي وشنطة جلد بنيـة شعرها البني تركته مفتـوح على راحته .. طلعت وعبايتها بين يديها إنتبهت له جالس بثوبه بالصالة ويشتغل بجواله .. رفع عيونه لها لما انتبه لها : خلصتي ؟!
ميهاف : إيـوه بس دقيقة خل اجهز لنا فطـور خفيف
بدر وقف : لا مافيه داعي حياتي .. بناخذ من ستاربوكس في طريقنا ! بس خل اجهـز
ميهاف رفعـت حواجبها وهي تطالعه : تجهـز ؟ ماله داعي بثوبك وجاهز .. واساسا انت بكل حالاتك مستعد وكأنك بعزيمه حتى بالبيت خل نمشي وبس
بدر عقد حواجبه : بس غترتي طيب وخاتمي فكيته امس وبتعطر ومشينا
ميهاف زفرت : لا تـــطول
مسك يدها ومشى معها : شنو لا تطول تعالي معي وبس !
ميهاف ابتسمت وهي تطالع يديه الحاضنه يدها : قلت لك قبل كذا اني اموت على عروق يدك البارزه !؟
بدر التفت لها وهو يتنهـد : فداك اليد وراعيها !
ميهاف : إلا غترتك تلبس رسمي عشان الدوام ولا للحين عصبه ؟!
بدر : هههههههه اصير رسمي بكلش الا غترتي لازم اعصبها مقدر !
ميهاف بحمـاس وهي تسبقه للغرفة : هالمرة انا اعصبها لك !
بدر وهو ياشر لها : خــــذي الزيتيه
***
تنهـدت بتعب بعد ماجلست صنـدوق وصلـها ... دفعت الحساب لمندوب التوصيل وهي تشيله وتدخل البيت , عقدت حواجبها وهي تشوفه جالس على لابتـــوبه : نايف ! انت صاحي وماطلعت للجرس ؟!
رفع نايف عيـونه لها : هلا قلبي .. إلا سمعته بس شفتك طلعتي قلت خلاص
ابتسام وهي تجلس الصندوق : زهقني المندوب مدري شفيه ملخبط
رنيم وهي تركض وقفت فوق الصندوق وهي تتعلق بذراع ابتسام : ثقيــــــله ابتسام ؟!
نايف بتقليد لنبرة رنيم الطفـولية : ثقيلة إبتسام ؟!
رنيم عضت شفاتها وهي تـــطالعه بحقـــد .... قاطع نظراتها تعليق ابتسام : رنيم انزلي من الصندوق تكسرين الأغراض اللحين !
نـزلت من الصندوق وهي تتوجه لنايف دون مقدمات وبنظرة جامدة .. عضت ذراعه بكل قـــوتها ... فتحت ابتسام عيـونها بينما صرخ نايف من قلبه : ااااااااااااااااااااا يـــــــدي يـدي !!!!
ابتسام اشرت لفمه : اشششششش العيال تو ناموا ! ( سحبت رنيم اللي فكته انيابها اخيرا ... ضربت فمها بخفه ) قـــــــــطوة انتي تعضين ؟!!!
نايف كانت عيـونه طايره في يده والوشم اللي تركته هديه ... التفت لها وعيـونه طايره : خيـــــــر انتي ؟!!
رنيم مدت لسانها له بشقاوه : احسن !!
تو بيقوم نايف اشرت له ابتسام يجلس وهي تنطق : وانت من قالك تتهزى فيها ؟
نايف : مستحيل اشوف بنت تتدلع وما أقلدها ! تجيني حكة بلساني
ابتسام بلوم : آجل اصبر على أنياب الذيابه !
نايف وهو يفرك يده ويطالع ابتسام حاضنه رنيم : وانتي وشـــوله تضمينها ؟ تعالي شوفي زوجك المسكين شوي وتطير لحمي
ابتسام ابتسمت وهي تهمس لرنيم : روحي غرفتك العبي بعدين نقرر عقابك انتي واسنانك !
راحت رنيم وهي ترمي نايف بنظرات انتصار مبطنه ... جلست ابتسام جمبه وهي تمسك ذراعه :هـات اشوف ( ابتسمت وهي تنتبه لاسنان رنيم المغروسه ) ههههههههههههه والله عاضه من قلبها
نايف : اقولك ما تمزح والله توجع ! يبي لها تقشع اسنانها عشان تعرف
ابتسام اختفت ابتسامها وهي تنتبه للصفحة المفتـوحة بجهـازه ... عضت ع شفاتها وهي تنطق بهدوء : حجزت رحلتك . ؟
نايف تـنهد : ايه .....
ابتسام بقهر : متى ؟!
نايف : الرحـله تبدا بعد اسبوعين .. بس راح اسافر من الرياض اخر هالأسبوع .. عشان اجهز ولأني ابغى كم مكان في طريقي
ابتسام : وكم راح تستمر هالسفاري ..؟
نايف وهو يشبك يدينه ببعض : قلت لك من قلب ... ثلاث شهور راح نقسمها بين قارتين
ابتسام بقهر : يعني مـاراح تكون موجود وقت ولادتي ...
نايف بضيق : تكلمنا عن هالموضوع من قبل حياتي ...
ابتسام بقهر : عارفه ... ومالك إلا اللي في راسك وسو اللي تبي .. بس صدقني راح تندم على هالقرار
نايف ابتسم بهم : وإذا ندمـت ؟ راح تحصلين فرصة تضحكين علي
ابتسام هزت راسها وهي تسنده على كتفه : ما حأضحك .. وقت تندم راح احاول اخفف ندمك ( تنهدت ) مستحيل اتركك تعاني وأنت عارف
نايف حاوط كتفها وهو يضمها لصدرها ويتسند بظهره على الكنبه : من جـد ابتسام ... مهما صار حبيني .. حتى لو اضطريتي تغصبين نفسك .. حتى مهما سويت ومهما قلت .. وخلي ببالك اني دون حبك ما أسوى والله
ابتسام استرخت على صدره وهي تحاوط خصره : من جد ما تسوى ..لا تخاف ماراح اشردك من حبي
نايف ابتسم وهو يغمض عيونه : حمدالله
ابتسام : انا مسترخية بجد حاليا .. ضروري اكب الغداء اللحين ؟
نايف وهو يشدها له : لا ... خليك هنا وبس .. نتغدا بعدين
ابتسمت ابتسام وهي تسترخي بجد .. نطقت بكسل : على اتفاقنا اليوم طبعا ؟ راح تجلس مع البزورة ؟
نايف : ايه بس رنيم من غير مطرود خذيها معك
ابتسام : ههههههه ماراح اتركها عندك احس برجع بحصلها دون ضروس لو اتركها
نايف : والله اسويها .. يخرب بيتها يدي تنبض
ابتسام : وأنت متى ناوي تروح تشوف بنت وداد .؟
نايف حاس بفمه : مشـــغول مقدر
ابتسام ضربت صدره بخفه : مشغول بإيش ..؟!
نايف : جدولي مــــزحوم بالفضاوه وهالشي يخليني مشغول جدا عن الكل
ابتسام بلوم : حبي والله مايصلح .. بنت عمتك والده وماتقصر زايرتني لما ولدت ! لازم تروح
تنهد نايف باستسلام : راح امـــرهم مع بدر بكرة ولا متى مافضيت
ابتسام ابتسمت : أيـــوه كذا
نايف : متى بتروحين اليـــوم ؟
ابتسام : عصيـــر كذا ( قامت ) يله خل نتغدى عشان الحق اروح وارجع
نايف هز راسه وهو يرجع يـــكمل اجراءات رحلته
***
دخـــل عبدالمجيد غرفة المستشفى وهو ينتبه لسجى تركض تاخذ الكيسه من يده : اخيـــــــــــــــرا مابغى هالغداء يجي !!
عبدالمجيد طالعها بنص عين وهي جالسه على جهازها المحمول بجلسة جانبية جمب سرير وداد : وأنتي احد قالك المستشفى غرفتك ؟!!
ام عبدالمجيد اشرت له يسكت : هشششششششش اختكم تعبانه نايمه ! اهجدوا
عبدالمجيد جلس : راح زوجـها اجل ؟
ام عبدالمجيد : ايه تو قبل شوي طــلع
عبدالمجيد عقد حواجبه وهو يطالع سجى المندمجه في جهازها : وش تسوين انتي ؟ وقتك بالله ؟!
سجى زفرت : افففففف !! ( سكرت جهازها وهي تنطق بقهر ) البنات امس يحكون بالقروب وكلهم بدوا مشروعهم عشان يرتاحون ايام الدوام ! حسيت اني زلابه فقررت افتح اشوف وش ممكن اسوي
ام عبدالمجيد : لأنك شاطرة ..... وتو تكتشفين ان وراك دراسه !
سجى بقهر : شاسوي عاد ....... ( تنهدت ) كلمت ميهاف قالت لي انها سوت اشياء كثيرة بس مانجح شي قد مانجحت مقابلتها مع ابوها !
عبدالمجيد صفر : آيــــــــــــه مافيها حكي هذي ... خالي عبدالرحمن ناجح وكثير بيتحمسون لمقابلته
سجى : فكرت اسوي مقابله بس اذا خالي عبدالرحمن ماينفع .... بنته تو مسويه !
عبدالمجيد وهو يتكي : شوفي غيــــره طيب
سجى بإحباط : مافيه غيـره ( كبست عيونها وهي تعدل جلستها ) لحــــــــــــظة حصلت !!!
ام عبدالمجيد : حمدالله اللي الهمك اجل
سجى نقزت لأمها : يمه هو انا عرفت من بس ابي واسطتك ! مستحيه اقوله انا
ام عبدالمجيد عقدت حواجبها : ميـــن ؟
عبدالمجيد دون يرفع عينه من جواله : واضحه مايبي لها ... المطـــنوخ مخاوي الفلوس
ام عبدالمجيد : فراس ؟
سجى بحماس : آيــــــــــــــــه ! فراس ناجح ومتفوق وكثيرين احترموا قدراته ... وبعدين فراس بطبيعته اصلاحي اكيد انه مايمانع يساعدني بهالمعضلة !
ام عبدالمجيد تنهدت : والله مدري .... بشوف امه اليوم ويصير خير
سجى شدت قبضتها لصدرها بحماس : ياااااااااس
تنهدت وهي تسترخي على الكنبه بعد ما حست انها انقذت مستقبلها على الصعيد المهني والعاطفي ... طلعت مراية صغيره من شنطتها وهي تضبط وجهها وتتفكر في بشرته الناطعه وشعره الأسود وعيونه العسليه .. كلها بالنسبه لها كارثة , كشرت بضيق وهي تنتبه لنفره خفيفه بخدها شهقت : يمــــــــه متى طلعت هالنفرة ؟!!!
ام عبدالمجيد بضيق : سجـــــــــى ؟؟ كم مره قلت لك اهجدي اختك نايمه
سجى وحبه وتبكي : بس هالنفره من فين جت ؟!!!
عبدالمجيد : خلي روحك حـلوه وبس صدقيني محد مستفيد من وجهك ونفرتك شي !
سجى بقهر : لااا اليوم يمكن يجون ضيوف لوداد مو وقتها قسم بالله ! ( التفتت لعبدالمجيد بعصبية ) ومو وقتك بعد انت اسكت !!
عبدالمجيد وقف : اساسا انا ماشي ... يمه تبين شي كلميني
ام عبدالمجيد : سلامتك حبيبي الله يحفظك ( التفتت لسجى ) وانتي كفي حوستك تقولين مشروع تخييم هنا !! بيجون الحريم عصر اكيد واهل زوج وداد بيجون وانتي قالبه الغرفة فوق تحت
سجى بحلطمه : زيــن بكفها اللحين بس قبل بروح الحضانه اشوف بنتنا المزيونه .. يمكن لاشفتها يتعدل مزاجي شوي
ام عبدالمجيد : روحي وتعالي بسرعه لا تطولين
سجى هزت راسها : إن شاء الله
***
أثنـــاء الغداء .... عقدت ابتسام حواجبها وهي تشوف المتصل , نايف : مين ؟
ابتسام : هذا هيثم دقيقة اشوفه ( ردت ) هلا هيثم شخبارك ؟ ............بخير حمدالله .... هو بعد بخير .... يسلمون عليك شياطين بس ماعلينا .... ههههههههههه ........... اها ! .... حياك الله البيت بيتك ... منور .. يامرحبتين
سكرت جوالها وهي ترد على نظرات نايف : هذا هيثم ناوي يزورنا
نايف : حياه الله
وقفت ابتسام : معليش حبيبي تساعدني تشيل الصحـون ؟! بروح اجهز القهـوه بسرعه واصعد ابدل
نايف : أكيد بس اخلص صحني بقوم ..... إلا اقولك هو لحاله ولا أسوم معه ؟
ابتسام : نادر يجيب معه اسوم ... اتوقع لحاله لو هي معه قال لي
نايف هز راسه : اهـــا
خلص نـايف غـداه ورتب الصحـون وتو بيجلس طق الجرس ... نادى عند الدرج : ابــــــــــتسام ! ترا جا
نـزلت ابتسام بخطوات متسارعه بينما فتح نايف عيونه : هيه هيه هيه ! تركضين ؟؟؟ امشي زين ناسيه انك حامل ؟
ابتسام عقدت حواجبها : خايف علي من ركض وماخفت من شهري الأخير لحالي في البيت
نايف تنهد : لو سمحتي مره ثانية انزلي بشويش
وطـلع مباشرة يفـتح ... ابتسام توجهت للمطبخ ورتبت القهـوه , دخلت المجلس عليهم وهي مبتسمة ببشاشه : يامرحبا ومسهلا .... هلا وغلا
وقف هيثم يسلم عليهم وهو يستلم صينية القهـوة من يدها ويجلسها : هلا بأم عبدالرحمن .... والله وحشتيني
ابتسام بحب : مايوحشك غالي يارب .... ليش ماجبت اسوم حرام عليك
هيثم : شوفة عينك بلبس الدوام حتى ... طلعت قلت امرك زمان عنك اسلم عليك وعقب بروح لها
ابتسام : ولو ! كان مريتها وجبتها وجيتوا تقهويتوا سوا
هيثم : يابنت الحلال بتشوفينها عند بنت عمتكم مدري مين ... اللي تو والده
ابتسام : اييييه وداد
هيثم : ايه من كلمتها ظهر وهي تلبس بتروح عاد... ( طالع ساعته ) عساني ما أتاخر عليها
نايف صفر : عاد أتق شر البنت اذا لبست وانلطعت ! تشب فيك حريقه
ابتسام : وانت تتكلم على أي اساس ؟ لا يكون انا
نايف : هههههههههههههه لا انتي غير ياقلبي قصدي ميهاف وشلة عائلتنا اعرفهن واعرف طبعهن
ابتسم هيثم : المهم .... ( جلس فنجاله وشبك يدينه ببعض ) أنا اليوم جاني انتداب لمدة شهرين لجدة
ابتسام فتحت عيونها : نعــــــــــــم ؟
هيثم : ايه وانا بصراحه ما أشوفه عرض سيء بالعكس عاجبني وبخاطري الدورات اللي هناك والخدمات غير وراح يكون شي جديد ... ( التفت لابتسام ) بس خبرك مو عارف كيف بارتب اموري عقب ما استقريت هنا
ابتسام : وما تقدر ترفضــــــه ؟!
هيثم هز راسه : ممكن ارفضه بس بيترتب عليه اجراءات انا في غنى عنها
ابتسام : واسوم تدري ؟
هيثم : لا .... للحين ماقلت لها , لأني مابي اخذها معي
ابتسام بدهشـــه : ليه ؟!
هيثم : انا هنا بدوام طبيعي مشغـول مره ويادوبني اجي البيت .. ولولا اهلها هنا تروح لهم كل شوي كان كرهت عمرها ! كيف اوديها هناك وانا مشغول دبل وماعندها اهلها ! راح تموت من الملل
ابتسام : ولو هيثم هذا قرارها اتركها هي تقرره ... سواء تروح ولا لا
هيثم باصرار : لا ! حتى لو تقرر وتقول بروح معك انا عارف انها ماراح تتحمل
نايف : معه حق ابتسام ... ليش تروح ! الرجال رايح شغل
ابتسام بقهر : وانتو شعندكم مع الإنتدابات والسفريات الماصخة هذي !! فاتحين بيوت عشان تتركونها فاضيه ؟!!
عقد هيثم حواجبه ..... فسر له نايف : قصدها انا وانت ... لان انا سفرتي قريبه بعد لسفاري خارجيه
هيثم عقد حواجبه : بس ابتسام حامل ...
ابتسام : واذا كان موجود ايش بيسوي يعني ؟ ماتفرق كلها سوا ... بيتبرع لي مثلا ؟
نايف بمحاوله انه يروق مزاجها : اتبرع لك بقلبي لو تبين .. بس لاتخافين هيثم قريب بيجيك ركض يتبرع بدالي
ابتسام : شكرا قلب البعير اللي داخلك انت وياه ما أبيه !
هيثم : اوف اوف ام عبدالرحمن زعلت علينا ...
ابتسام باحباط : لأنكم تقهرون ...
هيثم : يا إبتسام روقي ترا الموضوع بسيط .. ( ابتسم ) إلا اقول التوأم وينهم ؟ وحشوني
ابتسام : نايمين الله يصلحهم
هيثم شرب فنجاله : يله عموما انا خل الحق اروح اودي اسوم ... وماحقولها اليوم فانتبهي تفتحين قدامها الموضوع اذا شفتيها
ابتسام باحباط : لا تخاف ماحخرب وناستها بهالخبر
هز هيثم راسه وهو يـطلع .. وقفت ابتسام تلحقه لكن التفت لها : ارتاحي ادل دربي
تنهدت ابتسام وهي تجلس ..... بعد فترة صمت نطق نايف : ابتسام فيك شي ؟ مو بعادتك هالمزاج
ابتسام دعكت راسها : مافيني شي .. بس توترت شوي من هالإنتداب
نايف : انفجرتي في الولد والموضوع ترا بسيط .... خصوصا واهلها هنا ! ( مسك يدها ) إلا اذا كنتي تفرغين قهرك مني فيه ؟
ابتسام وقفت : لا قهـر ولاشي .. واذا تحس اني بالغت فيمكن بالغت لانهم عرسان ولسى جداد ...
ظل يطالعها وهي تبتعد ... تنهد بربكة : اكنسل ؟
***
الســـــاعة 4 دخل فــراس البيت .... حصل امه بالصالة بعبايتها وياسمين بكابها , : السلام عليكم
ام فراس وياسمين : وعليكم السلام ورحمة الله وبركاته
فراس عقد حواجبه : على وين يا مهون ؟!
ام فراس : بنروح نزور وداد ... بس احتري اسماء بروح معها , ( تنهدت ) غادة طبعا رفضت تروح ياليت تقنعها
فراس : تغـدت معكم ؟
ام فراس : ايه نزلت قبل العصر كلت لقمتين وصعدت ... كهرب مزاجها وقت كلمت اسوم وقالت بوديكم انا
دق جوال ام فراس .. رفعت عيونها له : هذي اسماء يله حنا ماشين
فراس : في امان الله
صعـد لفوق ... دخل الشقـه اللي تحولت لظلام وكئابه هاليـومين , ماحصل احد .. عقد حواجبه وهو يشغل انوار الصاله ... كانت غرفة النوم مسكره نصفيا .. دخل كانت نايمة بالسرير ... ابتسم لشكلها يد شرق ويد غرب .. رجل شرق رجل غرب .. وكأنها تمنع أي شخص يشاركها .. تقدم وهو يجلس الكيسه بيده جمب السرير ويجلس بالطرف ويطـالعها .. بفســــتان ناعم صعد لنص فخذها من فوضى نومها .. وشعرها الكثيف مرفوع فوق ... مسح بيده على خصله متمرده بنص وجههـا ازاحها على جنب ... انحنى للكيسة واستخرج اصيص ورد لافندر .. جلسه على الطاوله الجانبيه وهو يتنهد ويطـالعها ... سند ذقنه على يـده وهو يراقبهـا بهدوء ..... رغم مرور نص سـاعه إلا انه ما مـل ولا كـل ... كان في الحقيقة يتمنى يضل كذا اليوم كله ...إنتهت فترة التــأمل بإنعقاد حواجبها وهي تتمغط وتفتح عيونها ... كبست عيونها لما انتبهت له وهي تجلس مباشرة !! رجعت خصل فوضوية ورا اذنها وهي تلتفت له : ...........................
فراس ابتسم : صـــح النوم
غادة عقدت حواجبها وكشرت : تبتسم لي ؟ وش فاتني وانا نايمة اجل .؟
فراس : مافـــاتك شي .. بس شايف الشقة قلبت مقبــرة ! وعزايم جايه رايحه وانتي قاطعه الكل ... ( رفع حواجبه ) كل مره اقولك شي بتقلبين كذا ؟
غادة باحباط : ايه .... قلت لك من قبل ان الهمسة منك ما أتحملها .. ( مسكت يده وهي تثبتها على جبينها ) احس ببداية حمى ... مبسوط ؟!
فراس اشر بعيـونه لاصيص الورد : دام معـك حمى جبت لك لافندر .. تعتبر نبته مهدئه وتمتص السلبية حولك
غادة طالعته بلوم : السلبيه مني ؟! انت اللي جلست يومين ماتكلمني !
فراس : وزين ماخليتها اربع أيـام .. لو ماحسيت انك بلشتي تقلبين زومبي كان شهر شوي فيك
غادة فتحت عيـونها بوسعها : لااا !! خلاص عمري دامك قدرت تقطعني يومين اتركها اربعه لاتجلس بخاطرك .. ماعليك فيني انا بخير
فراس بجـديه حضن يدها بين يدينه : عـــموما .. انا حسكر الموضوع ابشرك وبكيفك انتي وأخوك .. ( عيونه بعيونها ) بس ماحقول غير ان الأيام راح تثبت لك ان اللي تسوينه غلط .. وبتدفعينها من نفسيتك
غاده بثقة : ماراح ادفع ولا حتى نص دمعـه !
فراس رفع كتوفه : للأسف انك بتدفعين اكثر حتى .. !
غادة عضت شفاتها وهي تطالعه بهدوء : ..........................................
فراس رفع حواجبه : أول هبـــالك .. ليش مارحتي اليوم مع أمي تزورين وداد ؟
غادة بإحباط : ...........................
فراس : لأن هيثم بيوديهم ؟
غادة وهي تشد بوزها هزت راسها ب " ايه " : .................
فراس تنهد : كنت دقي علي وأوديك .. مو تنحرمين من الطلعه بكبرها !
غادة بإحباط : ماهمني ... ماكان لي خلق اطلع اساسا ..
فراس وهو يشد ع يدينها : اوديك اللحين ؟
غادة هزت راسها وهي تبتسم : لا ... بعدين اشوفها
فراس : امي حاز بخاطرها تبيك تجين .. اضغطي نفسك شوي عشانها مايخالف
غادة تنهدت : ابشـــر ..( ابتسمت ) من عيوني
فراس رفع يده لخدها وابتسامته زادت وسع وهو يقرب وجهها حتى ضرب جبينها جبينه ويده الثانيه رفعها لشعرها وسحب المشبك حتى تناثر حولها : قد ايش بخاطرك توجعيني وانتي رافعه شعرك هاليومين كلها ؟ تعاقبيني يعني ؟
غادة شدت ع شفاتها وهي تلعب بخصلها بين اصابعها : ضايقني شاسوي ..
فراس ابتسم : وانتي يارافعته زعلانه ياتلعبين به مستحيه ؟!
غادة : هذي معاناة الشعر الطويل
فراس مباشرة : هذي فتنة الشعر الطــويل .. ( شد خصرها ) هدنه ؟
غادة رفعت عيونها بتفكير ونطقت بدلال : بس بشروطي
فراس ابتسم ابتسامة جانبية : اشرطي ... ما يغلى على زوجتي شي
غادة : تقـــولي بصدق ليش رافض رنيم تجي هنا .. ( نزلت عيونها بهم ) انا فاهمه انه صعب عليك تعتبرها بنتك . . وتخرب خصوصيتك و ..
فراس تنهد بضيق وهو يبتعـد بهدوء عنها .. : مو سالفة اعتبرها بنتي او غيره ... انا وانتي تو بدينا اتركينا نبدى براحتنا .. وبعدين مايخالف تجي
غادة بقهر : وكلمتك اخر مره ؟ ع فكرة توجع ..
فراس طالعها بنص عين : ع فكرة ترا تحمستي مع دور المظلومة ! لك ساعة تحاسبين .. ( وقف ) اخلصي قومي اجهـزي نروح
غادة وقفت وهي تلحقه وتتعلق من وراه برقبته : وحشــــــــــــتني موت . . ياويحه قلبي اذا يشتاق لك هالقد !
فراس عض ذراعـها المتعلقه برقبته ... غادة فتحت عيونها من الألم وصرخت من قلبها : اااااااااا يـــــــــــــــدي !
انتزعت يدها من فمه وهي تمسكها وتطالعه بصدمه : وش هالعضــه ؟!
فراس بغروره : دواك يالنفسيــــه عشان مرة ثانية تقلبين لي البيت كئابه وسدة نفس ! ( رفع حواجبه ) حتى الشروط الخمس نسيناها !
غادة تخصرت : يعني باهاوشك وباسوي كل شي تكرهينه وبستلعن فيك وممنوع تزعلين !
فراس : مايهــــمني الشروط تضل شروط ... صدقيني انك ناسيتها اصلن
غادة بضجر : إلا اذكرها ..
فراس رفع حواجبه : جـــد ؟
غادة باستسلام : حواسك الخمس تكون مرتاحه .. ( رفع اصابعها تعدد ) ريحه كويسه وآكل لذيذ ومناظر تفتح النفس وصوت رايق وملمـــس حـلو !
فراس : ليتك ناسيه اقلها نقول معذوره .. اما عارفه وجاحده كذا هذي عاد معليش قلة ادب
غادة ارسلت لها بوسه بالهواء : أبشر بالعوض
فراس طالع الساعة : لسى باقي كثير على المغرب .. يمديك تعوضين
غادة رفع يدينها فوق : انا استسلم من يقدر عليك انت ياولد نورة ؟!
فراس : الظاهر ما أعجبك ولد نورة ؟
غادة : جعلني فدا نورة وذريتها ... وانا أقدر مايعجبني ؟!
فراس رفع كتوفه : مدري عـــنك ... نفسيتك هاليومين ماتطمن اتوقع منها كلش
غادة بقهر : فراااااااس ! خلاص رضينا بتذلني يعني بنفسيتي ؟
فراس : أيــوه صارخي صارخي .. هذي اول حاسه تكنسلت ! فجري اذني عشان انبسط اكثر
غادة عضت شفاتها ونطقت بصوت مكبـوت : شــــاسوي فيك تطفر الواحد !
فراس بازدراء : امانه يقالك صلحتي الوضع ؟ الصراخ وصوت الدجاجه المخنوقه هذي مايفرق .. كلها تسبب تلوث ضوضائي
غادة فتحت عيونها : اسكت يعني ؟!
فراس وهو مبسوط ع طفرتها : هذا اللي قدرك ربي عليه ؟!! اخرتها بنرجع نحاكي الجدران ؟! اصلن انتي كذا ياتسدحين عشر سوالف بدقيقة وحده ياتسكتين ولاعاد ينسمع لك صوت !
غادة وهي حبه تقطع شعرها .. ضغطت صوتها وهي تنطق بدلع : تبي قهـوة حبي ؟
فراس : ما أعيـــــف .. وترا ماتغديت جويع
غادة شهقت : ماتغديت وساكت للحين ؟! اللحين اضبط لك احسن غداء
فراس : تضبطينه وامي مسويته جاهز بس بتسخنينه ؟!
غادة بحلقت بعيـونها : فراس خلاص تدقيق املائي على حكيي ؟
فراس : ما شغلت خاصية التدقيق لسى .. هذا اللي جالس القطه على الماشي ( جلس وهو يفتح ايباده ) بس يله خل نلحق بعد المغرب ع طول بنروح
***
في غــــرفة وداد كـــان المكان ازدحم ... أم بندر زوجها وثنتين من خواته الكبيرات ... وأم عبدالمجيد وسجى ... أم نايف وإبتسام .. ام فراس وأسماء .. كانت سجـــى تمشي عليهم بصينية المعجـــنات بينما ام بندر مشغوله بالرضيعه بين يديها وتلاعبها ..
أم نايف بحيرة : إبتسام وش سويتي بعيالك ؟
ابتسام ابتسمت : لا تخافين خالتي نايف عندهم .. وماحطـول شوي ويجي السواق وبرجع
ام نايف : ايه الله يخليك لا تطولين نايف ميت قلب .. ماراح ينتبه لهم زين
: هـــــــــــــــــــــــاي !!
التفتوا كلهم لميهاف اللي دخـلت وفكت نقابها ... انهلـوا عليها البنات يسلمون عليها .. بعد ماسلمت على الكل جلست جمب امها : الف مبروك وداد والله تجنن البنــــوته جعلني فدا بوزها
وداد : هههههههههههههههههه ياعمري تسلمين
ميهاف : ويبارك لك فيها أم بندر
ام بندر بحب : آميــــــــــن وعقبال سجـى
اسماء بتعليقاتها الحادة : والله سجى ماعندها نيه ! جاها النصيب ورفسته لآخر دنيا
قبصت ام فراس فخذها مباشرة وهي تهمس : اســــــــــــــــماء !
سجى بقهر : شايفتني عانس عشان غصب آخذ مين ما كان ؟ ما اعجبني النصيب وبرفسه وبرفس كل من يجي من طرفه
اسماء شهقت : تكفيـــــــن يا كيلوبترا ! ترا نصيب ماكنتي تحلمين فيه اصلن ... يعتبر شيخ قدامك يالورعه ! بس ياويلك من ربي بيعاقبك عشان تعرفين وش النصيب اللي مايعجبك صدق
ام عبدالمجيد بضيق : اسمـــاء سكري الله يرضى عليك .. ( ابتسمت وهي تلتفت لميهاف وتغير الموضوع ) ليش تاخرتي ياعمري ؟
ميهاف زفرت : والله اليــــــــــوم مدري كيف ... من الساعة 8 صاحيه وطلعنا على طول لشركة ابوي تركني بدر هناك وراح شغله وجلست للعصر مع ابوي الله وكيلكم عشان نغير التقديم واوراق وحوسة
ابتسام عقدت حواجبها : غريبة وش له هالحوسة ؟
ميهاف بفرحة : كنسلت طلب الشغل المنزلي .. رجعت للتقديم الأول !
ارتاحت ام فراس : الله يوفقك ياعمري
ميهاف : آمـــــــــين خالتي .. وبس ! يعني راح يومي كله هناك وأول ماخلصت جيتكم
ابتسام : ما شاء الله , الله يوفقك ياعمري والله ان الوظيفة توسيع صدر ... انا كان ناوية ارجع بعد ماولدت بس الظاهر مافيه نصيب خلاص راحت علينا
ميهاف : ابد ياقلبي .. قومي بالسلامة اللحين وارجعي قدمي
ابتسام بضيق : لا وين صعبه .. خلاص بيكون 3 بزارين بالبيت من وين اتركهم !
ميهاف : الله يعـــينك والله ( عقدت حواجبها) إلا اقولكم غادة وينها مو شايفتها ؟
اسماء : صايره زوله هالبنت لاعاد تسألين عنها ! حتى شقتها ماتطلع منها ... مدري وش مشغلها !
ميهاف : صايره ثقل البنت الظاهر
ام فراس : لا إن شاء الله تجي
سجى : وش ؟ غصيبة هو تجي !! اللي مايبي يجي يوفر احسن يجلس مكانه !
اسماء : هذا حلــــمك عاد انتي
سجى رفع كتوفها ببرود : لا شدعوة ؟ بالعكس كنت ابيها تجي عندي موضوع معها
اسماء : وش موضوعه ؟ ماعرفت بينكم غير سبني واسبك
سجى : شدخلك انتي ! بكلم اللي يخصهم الموضوع انتي بعيده عنه
اسماء فتحت عيونها بوسعها : شوفي بتقولين لي اللحين ولا بعرف غصب عنك .. مير ريحي فضولي وتكلمي قبل انشب لك
سجى مدت لسانها بعناد : موتي بحرتك ماراح اقول لك
اسماء اشرت لها اشارة تهديد : معليه معليه ياسجيه بس بعدين مب اللحين
ام بندر : يله ياجماعة نستأذنكم .. ( انحنت لوداد وهي تسلم عليها ) انتبهي لنفسك حبيبتي وارتاحي
وداد : بدري خالتي ؟
ام بندر : لا خلاص عمك عنده عشاء اليوم بنرجع نجهـز
وداد هزت راسها : كثر خيرك خالتي نشوفكم ع خير
: ع خير
بعـــــد ماطلعوا التفتت ام فراس لاسماء : اسماء ! والله ثم والله لو تسوين هالحركة مره ثانية قدام ضيوف لاكسر مجاديفك
سجى : ايه والله انك تفشلين ! قلة حيا
مالحقت سجى تقول جملتها الا بحست بامها تضربها من ورا بالخفيف : وانتي وش المناقر والهبال هذا !! صدق بزارين
سجى بلكاعه : انا بزر توني عزابيه كيفي .. العتب على المتزوجه هنا ! نحسبها بتتزوج وتعقل إلا بلشنا انهبلت زود
اسماء : ايه حبيبتي ماعندي شغل تصنع زيك ! انا نفسي متزوجه ولا غيره .. وبعدين لاتصرفين تعالي وش موضوعك السري
سجى : هو سري لأنك لو تموتين وتبطين عظم ماقلته لك !
ميهاف : بــــــــــــس انتي وياها صدعتوا براسنا !! سخيفات صدق ( التفتت لوداد ) كيف الولادة وداد ؟ ( لانت لمحتها ) سمعت ان صار شوي تعقيدات
وداد تنهدت : أيه يختي خليني ساكته بس شفت الموت . . انا جايه على اساس طالبه الدكتور حق ابتسام ( التفتت لابتسام ) عقب ما مدحتيه لي يعني قلت ابغاه اكيد شاطر
ابتسام : ايه والله انه شاطر ومهـــــتم مره .. ليش مو متوفر ؟!
وداد بقهر : ليته كذا ! متوفر وموجود .... بس انا جالسه احجزه من راسي ! ع آخر لحظة لما عرف بندر ركب راسه !
ميهاف فتحت عيونها : كيف يعني ؟
وداد : يقول مايولدك رجـال ! تخيلي عاد انا اصارخ وشفت الموت وحالتي حاله وهو جالس فوق راسي يهاوش يقول كيف فكرتي اصلن !
ابتسام بصدمه : ياويل حالي .... بهالحاله ومارحمك !!
وداد بأسى : لا يختي .. وحوسه وتبديل بالحجز لين جابوا لي دكتوره مو يمي اساسا ! وشكل حضرتها معصبه لانه قالوا لها متأخر وفجاه .. وشغلها ماش والله تعبتني
ابتسام : يـــــــــــــاعمري كل هذا صارلك ... حمدالله على سلامتك !
ميهاف : ياساتر منه زوجك شذاه ! فهمنا يغار بس حالتك حرجة .... شيحس به ؟
ابتسام : سبحـان الله يختي ! مايعطي نايف شوي
وداد بقهر : لا يختي اعوذ بالله صدقيني ماتتحملين تعقيد !! حتى نبرة صوتي قدامهم يحاسبني عليها
ابتسام : قلت يعطيه شوي مو واجد .... نايف بزيادة عاد اتذكر بداية زواجي كانت صدمة حياتي ... هو واقف جمب مرشد سفرتنا ومتكتف ويوصيه يساعدني اصعد !
اسماء : عاااااااد نايف حدث ولا حرج ! ماتشوفينه شلون يكلمنا ؟؟ تقولين يمون ! اذكر اول ماصرت اتغطى كان يسحب الغطى من وجهي يطقطق علي يقول اكبري قبل !
سجى : ايه حيوان سواها معي بعد .. عاد من القهر مره سحب الغطى عضيت يده مابغيت افكه من القهر
ابتسام : ههههههههههههههه ايوه عارفه هذا طبعه ! اليوم مندوب التوصيل عند الباب وهو موجود ومتربع داخل .. تاركني اتفاهم واستلم الطلب منه
ميهاف : عاد مدري ع من طالع ! ابوي مو كذا نهائي .. ولا حتى لؤ ..........( سكتت لما حست بامها .. تداركت موقفها وهي تنطق ) إلا ع طاري نايف سمعت انه بيسافر مدري كم شهر سفاري ؟!
ابتسام : آيه صدق
اسماء بحمـــــــاس : الله سفـــــــــــــاري وناسه
ميهاف : ايه حبيبتي وناسه بس مو وزوجته حامل ... وقت ولادتها هو مسافر !!
سجى : مدري كيف رضيتي ابتسام ! معقوله ؟!
ابتسام : وهو بيدي ؟ كل ماكلمته بالموضوع يتركني اقول رايي وافضفض بس ماعليه مني يسوي اللي براسه !
وداد : الله يعــــينك والله مو حالة
ابتسام : الله يعين الجميع ... ( ابتسمت لاسوم ) اسوم شنطــــتك تجنن .. مره انيقة !
ميهاف : ايه اشوفها ... بخاطري فيها من أول بس شفتها عليك
اسماء بحماس : هذي من غنايم شهر العسل
دق جـــوال ميهاف .. ابتسمت لاسم الشاشة وهي ترد : هلا عمري
بدر : هلا وغلا .... شفـــتي النونو ؟
ميهاف : هههههه ايه بس ماعرفت اشيلها مره صغيره
بدر : افا ! وانا ناوي اقولك طلعيها لي عند الممر أشوفها
ميهاف : انت هنا ؟
بدر : آيــــه برا قلت اشوفها وابارك لوداد مرة وحده
ميهاف : دقيقة بجــــيك
سكرت ميهاف السماعة : وداد معليش آخذ جميلتك شوي .. بدر يبغى يشوفها
وداد : أيــــــوه بس انتبهي لها تكفين
ميهاف شالتهــا بحذر وهي تسمي عليها .. طـلعت لبرا وهي تمشي بالمرر تحاول تحصله .. ابتسمت لما انتبهت له جالس بمقعد انتظار بالممر وأشر لها وهو يوقف , تقدمت لعنــــده وهو يبتسم ويشوف الرضيعه بين يديها : ما شاء الله تبارك الرحمــن ... ( استلمها من يدهـا وهو يرفعها ) وش سموها ؟
ميهاف : للحين لسى ما اختاروا .. الظاهر وداد تبغى تسميها اسيل وزوجها يبي يسميها على امه فاطمة
بدر : الله يبارك فيها يارب .. سواء فاطمة ولا أسيل
ميهاف : آمـــــين يارب ... ( انتبهت لنظرات الناس حـولهم لبدر .. زفرت ) الظاهر الشهره فينا فينا ماراح نخلص منها
بدر كبس عيـونه وهو ينتبه لنظراتها اللي تقز البنات حولهم : ههههههههههههههههههههه .. اها تو استوعب
ميهاف بتكشيره : اقول حبي .. ترا وسامتك تضرب وقت تضحك بهالشكل لذلك لو سمحت أعقد حواجبك وكشر !
بدر ابتسم : وعشان كذا انتي مكشره ؟ غرتي .؟!
ميهاف بكـــبر : لا .. وش غيرته بس يعني اقول ..
بدر بابتسامه رايقه : كويس .. لا تغارين لأن عيوني اساسا ماتشوف غيرك
ميهـاف تنهدت : رجعـنا للحكي اللي يارب أنه صدق
بدر رفع حواجبه : تشكين يعـــني ؟
ميهاف : نـــوب .. ( ارتفعت باطراف اصابعها شوي حتى وصلت للرضيعه وهي تبوس خدها ) الله يحــرسها قمر مصور
: عقبــــــــــــالكم
ابتسم بدر وهو يرفع عيـونه لأم ميهاف : هــلا خالتي ( انحنى يبوس راسها ) شخبــارك شمسويه ؟!
ام نايف : بخيــر ( نطقت بنبره مقصوده ) وأنت اخذت البنت دون مقدمات ولا فكرت تجي عاد حسب الأصول وتسلم ونشوفك !
ميهاف بهـمس : مــــــــــــاما !
بدر : العذر والسموحه خالتي بس ما صار لنا يوم حتى ... ماحصلت فرصة ولا من عيوني ومايسعدني شي كثر قهوه معك
ام نايف : أيـــــه عاد انت ما شاء الله عليك ممثل درجة أولى .. كان جيت وتجملت فينا
ميهاف فتحت عيونها بقهر : ماما وش هالحكي !!
بدر مسك يد ميهاف وهو ياشر لها بعيـونه .. رفع عينه لخالته : حقك عـلي وأبشري اجيك من رضى نفسي .. ماهو تمثيل مثل ماتفكرين ! التمثيل اعتـزلته وخلصت
ام نايف بقهر : عســـاه دوم ! ( اشرت بيدها ) هات البنيه امها موصيتني تبيها
بدر بانصياع سلمها الطفله .. راحت ام نايف ميهاف بنظرات غاضبه لحقتها .. لكن استوقفها بدر اللي مسك يدها , التفتت له حصلت نظراته بارده : خير ياطير على وين ؟
ميهاف بقهر : بروح اكــلمها ! مايجوز تتكلم معك بهالطريقة .. يعني هي ذبحتني تعليقات عشان ارجع لك ويوم رجعت تسوي كذا
بدر تنهد : جعلني فـــدا عيونك قلبي .... انتي حليـوة عشان كذا صدقتي اني ماسويت شي ! بس لا انا سويت واستاهل الكلام اللي جاني ( ابتسم ) يكفيني انها امك وتمـون على رقبتي .... ( شد على يدها ) لا يضايقك الموضوع لأنه ماضايقني نهائي .. صدقيني
ميهاف بنظرات مهمومه : حتـى لو ... انا ماعاد ابي اعيش أي تفاصيل تخص اللي راح ! فتحت صفحة جديده وماعاد ابي ارجع لورا .. ابي هالموضوع يتسكر
بدر بتأكيد : راح يتسكر .. عطيه وقت بس
ميهاف ابتسمت بخمول : ع فكرة صرت اخاف من كمية الإيجابيه فيك هالفترة
بدر بحب : وتــو ماشفتي شي والله لارفعك فوق السمــاء .. هذا اقل شي اسويه عشان اشكر ربي على هالنعمة
ميهاف ابتسمت : آي نعـــمة ؟
بدر شد ع يدها : نعـمة اني للحين اقدر امسك يدك واراضيك بهالشكل
ميهاف : على طـاري شكر النعم .. اذن المغرب , شرايك تصلي وتشكر ربي على النعمة وبعدها نرجع البيت .؟
بدر : أبــــــشري .. بس ترا انا متواعد مع نايف اتعشى معه , بترجعين البيت ولا كيف ؟
ميهاف : برجع .. ابوي اليوم عطاني مليون ورقة وحوسه برجع ارتبها
بدر : خلاص تمام بصلي وبدق عليك دقه .. انزلي على طول
ميهاف : إن شاء الله
رجــــعت ميهاف تدخـل انتبهت لإبتسام تربط نقابها : بتروحين ؟
ابتسام : آيه السواق تحت بروح .. جلست للمغرب على اساس تجي غادة بس الظاهر زلابه مافيها حيل
اسماء رفعت جوالها : دقيقه اشوفها ! انا حتى برجع البيت بس ابي اشوفها قبل
جاها صوت غــادة المرفق بضحكة : هههههههههه هلا اسوم !
اسماء عقدت حواجبها : وش يضحكك ؟!!
غادة وهي مازالت تضحك : ههههههههههههه ولا شي .. ( عدلت صوتها ) آمري
اسماء شهقت : انهبلت الحيوانة ! شقاعدة تسوين ؟!!!
غادة : جالسه البس ... انتو للحين مجتمعين ؟
اسماء شهقت : تــــو تلبسين ! ابتسام راحت وميهاف بتروح بعد الصلاة وانتي متكيه بالعسل
غادة بدلال : شفيه العسل .. اتركيه رايق لي ! اهم شي قولي لخالتي لاترجع قبل ترجع معنا
اسماء : المهم يابصل .. عن هذرتك الزايده ! متى بتجين ؟
غادة : بنصلي وبنجي .. آف !
اسماء فتحت عيونها بوسعها : وآآآفففففف بعععد ؟!! ( التفتت لامها ) يمه زوجة ولدك تمردت !!! تمردت وبقـوه ! تتافف علي انا الشيخة اسوم ؟
اسماء طارت عيونها زود لما انتبهت للصوت الرجولي على السماعة : ترا ازعجتينا .. تقَلعي متى ماجينا جينا .. يله مع السلامة
اسماء : فـــــــــراس ؟!!! ( تو بتتكلم سمعت ) طوط ... طوط
ابعدت السماعة وهي تشهق : سكرهــــــــــا بوجهي الكلب ( رفعت يدها تشوف الساعه والتفتت لامها بهجوم ) يمــــــــــه ولدك ماراح يصلي بالمسجد!
ام فراس ابتســـمت لما تطمنت ان التأخير كان لخيرة : ياجعله هنـا وسعيد اتركيه .. شدخلك فيه ؟
سجـى كانت بتموت غيظ وهي تسمع بأجوائهم ... نطقت بقهر : بتجي عاد ؟!!
اسماء : ايه تقول تلبس وبتجي
ميهاف دق جوالها : يله ياجماعة هذا بدر ... اشوفكم على خير
وداد : على خير عيوني ماقصرتي
مجرد مـــاطلعت نطقت سجى : خالتي ام فراس
ام فراس : سمـي حبيبتي
سجى بأدب : انا عندي مشروع يخص الجـامعة ومره صعب .. ويعتمد عليه في التخرج واشياء كثيرة ..
ام فراس : أيــوه ؟ الله يوفقك يارب ويسهله عليك
سجى ابتسمت : آميـــن ... بس انا طالبتك طلبه , ابي مقابله مع فراس
اسماء عقدت حواجبها : نفس طريقة ميهاف يعني ؟
سجى : آيه .. ميهاف سوتها مع خالي عبدالرحمن وما شاء الله نجحت مره ! انا عاد قلت باخذ نفس الفكرة بس شخص غير ودامه ولد خالي وبيحصل لي فرصة
ام فراس : ابشري ياعيـــــوني بحاكيه لك وان شاء الله بيوافق
ام عبدالمجيد : سجى حبيبتي قبل تجي غادة كفي حوسة القهـوة
سجى : ان شاء الله
قامت سجى ترتب الفوضى وساعدتها اسماء ..... بعد نص ساعة دق جوال ام فراس : هلا فراس ............ همممم الغرفة 104 , ايه خلاص .... زين زين
سكرت السماعة وهي توقف : اسماء ترجعـين معنا ؟
اسماء بحيرة : مدري بكلم هيثم بشوفه .. دقيقه ( وقفت وراحت ع جمب تكلمه )
وداد : خالتي وين رايحة ؟
ام فراس : بطلع مع فراس وغادة للحضانه نشوف البنيـه .. وبتسلم عليك غادة على الماشي وبنروح
ام عبدالمجيد : وليش مستعجلين كذا ؟
ام فراس : ماقصرنا الوقت متأخر خل البنت ترتاح بعد
ام عبدالمجيد : ايه والله الوقت تأخر .. معليش توصلونا البيت معكم ؟
ام فراس : حيــــاكم الله
طلعت ام فراس وهي تتوجه قسم الحضانه .. انتبهت لهم واقفين جمب بعض على جنب ويسولفون, ابتسمت وهي توقف عندهم : يا هلا وغلا .. مابغيتوا تجون ؟
فراس : شأسوي بهـا ساعة عشان تلبس
غادة شهقت : والله مو من لبسي خالتي ! هو اللي ماتركني اقوم البس كل شوي طالع بسالفة راح وقتي
: اكــــــــــــــــرهك !
التفتت غادة للصوت الحاد .. ابتسمت : هلا اسوم
اسماء : وخري عني ! خير تسكرها بوجهي ؟!!
فراس التفت لغادة وبهمس مسموع : ياليل .. انا مو قايل لك تأكدي اسماء موجوده ولا لا قبل نجي ؟!!
غادة شدت ع شفاتها تكبح ابتسامتها وهي تكمل مسرحيه معه : تدري اسوم نشبه ماراح تطلع الا الساعة وحده .. يكفي العصر راح وحنا نحتريها تذلف بيتها
ام فراس : هههههههههههههه ياحرام عليكم ! هذا وهي شايله همكم كل شوي تسأل متى تجين ؟
اسماء وهي ترمي نظرات حادة لهم : تدرون شلون اكرهكم الثنين ! صدق اللي قال من لقى احبابه نسى اصحابه ! معليه ياغدو
غادة : يمــه منك انتي على طول " اكرهك " ؟! تفاهمي طيب
اسماء : ماعندي وقت اعاتب ! خلاص بكرهكم وبس
فراس : الله يبشرك بالشهـادة اجل
اسمـاء ضربت برجلها الارض وانسحبت من المكان ... لحقتها غادة : هههههههههه اسوم تعالي بروح معك ما أدل
اسماء بانفعال : اقــــــــــــــــول !! اجحديني زي ماتبين بس لاتجيني لا خلصتي جحده ياخرا !
غادة : اوف اوف وش هالألفاظ النائية ياوصخه !
اسماء : قـــليل فيك ياناكرة يا جاحدة !
غادة بحلقت بعيـونها : يمه منها اسوم صايره زعــــوله ..( تعلقت بذراعها ) تعالي بس سرينا نشوف وداد
ابتسمت ام فراس وهي تنتبه لتأمله لهن وهن يبتعدن : اندحر الشيطـان ؟
فراس ابتسم لامه وهو يتنهد : والله ما أندحر بس هالمرة بكتفي اني اقول الله يصلحها ومصيرها تفهم من نفسها
ام فراس حضنت ذراعه : تعال اوريك حفيدة عمتك
مشى فراس معهـا وهم يوقفون برا الحضانه وتأشر لسرير معين : هذيك هي
فراس : شعرها أسود ! معناها ماطلعت لأبوها ماخذت شقارته
ام فراس : وش فيه الشعر الأسود ؟ زين يهبل والدليل انت
فراس : وانا قلت مب زين ؟
ام فراس تنهدت : عقبـــال ما أشوف عيالك قل آمين ( رمته بنظره ) ولا للحين ممنوع ندعي هالدعـوه ؟
فراس ابتسم وعيـونه متعلقة بسرير بنت وداد : الله يكتب اللي فيه الخير
عـــند وداد /
وداد بقهر : والله انك خايبه ! وش هالجية ماتسوى !
غادة : المهم شفتك وتطمنت عليك وبطريقي بشوف بنتك ...... والباقي بعدين ابشري لاخلصتي من المستشفى
وداد : ههههههههه يله معذورة هالمرة بس !
غادة جلست باقة ورد جمبها : يله هذي باقة بسيطة للعسـوله ... إلا اخلصوا سموها احترنا فيها !
وداد : خل حرب داحس والغبراء بيني وبين ابوها تخلص واللي يفوز يعلمكم وش اسمها !
غادة واسماء رفعن يديهن وبصوت واحد : الله ينـــــــــــــــــــصرك !!!
ام عبدالمجيد اللي جلست ادويه وداد جمبها : وداد خذي بالك وسوي كلش زي ماقلت لك .. طيب ؟!
وداد : ان شاء الله يمه ..... اشوفك بكره
ام عبدالمجيد : ع خير .. بروح اللحين اجهز غرفتك ونستعد لجيتك
سجى : بس لو سمحتي قوانين البيت نبي هدوء ! صياح وبزارين رجااااء مانبي
اسماء بدفاع : اسمع من يحكي ام الصياح والجغير !
سجى : ترا اسمي سجى مب اسماء !
اسماء ضحكت دون نفس : ه ه ه ه .. تهبين تصيرين اسماء اصلن هذي محد يوصلها
ام عبدالمجيد دفت سجى قدامها : يله مشينا مانخلص حنا هالمناقر !
طـلعوا مع ام عبدالمجيد للحضـانه وين ماكان فراس وامه ... سلم فراس على ام عبدالمجيد : شلونك عمــــه ؟ وعلى البركة الحفيده الله يصلحها ويسعدها
ام عبدالمجيد بسعـادة : آمين يارب وعقبال احفاد نورة عاد !
ام فراس : آمـــــــــين يارب
اسمـاء بطفاقة : ابشـــــــــــــري ماطلبتي شي ( سحبت جوالها من شنطتها ) ذحين ادق على الحب نحقق امنـ ..
وقفت بنص كلامها من ضربت امها : الله يخلفني في مصيبتي خير بس !
غادة : ههههههههههههههههه البنت فزعه مايمديكم
ام فراس بعصبية : المهم ماقلتي ! بترجعين معنـــا ؟
اسماء بكئابه : آيه برجع معكم الله يعيني بس لين يرد هيثم واكتشف وين مكانه السري ... لعبة المطارد معه كل يوم لازم !
فراس مشى طالع : يله مشينا
في سيــــارة فراس .. ركبت ام فراس جمبه قدام والباقين تزاحموا ورا ,
ام عبدالمجيد : فــــراس امي
فراس : سمــي
ام عبدالمجيد : سجى الله يحفظها عندها مشروع يخص الجامعة طالبينك الفزعه فيه
فراس عقد حواجبه : باللي اقدر عليه ابشري
غادة انقهرت وهي ماتطمنت من طاري سجى بالموضوع ... استرسلت ام عبدالمجيد : تبغى تسوي معك مقابله عن تجربتك في العمـل والتجاره وهالعلوم ..
سجى بحيـــــــاء : ميهاف جربت المشروع مع خالي عبدالرحمن ومره نجح ... وانا اتوقع نجاحه بيكون اكبر اذا جربت معك
غادة شدت ع قبضتهــــا واعصابها بتنفجر ... تتمنى تلتفت تنتف شعرها ! لكن املها كان في فراس ......... طالعته وهو سكت لفترة ثم نطق : ما أسوي مقابلات للاسف .. بس اذا حابه اقدر اترك الشركة حسب تصرفك واعين واحد يساعدك تاخذين جوله عامه فيها
سجى احبطت : ليــش ؟ انا اذكر مقابلتك السنة اللي فاتت للحين
فراس وهو تضايق من نظـام " المحاسب " نطق بنفور : مقابلة عالمية تفرق عن مقابلة محلية !
سجى عضت شفاتها .. لكن نطقت باستسلام : خلاص اجل مايخالف يكفي جوله عامة .. متى ممكن اجي ؟
فراس باقتضاب : حياك الله متى مابغيتي
اسماء بحماس : انا بجــــــــــــي معها اشوف كيف تشتغلون واتطمن على الوضع المادي
فراس هز راسه : في سيارتي .. في بيتي .. وذحين بتجي شركتي بعد .. متأكدة انك تزوجتي انتي ؟
سجى همست لاسماء بغيظ : شفتي انك نشبه
اسمـاء قزتها بنص عين وبكل قوتها دعست رجلها .. صرخت سجى من ألم الدعسه : اااااااااااااااااااااااااااا
وقف فراس السيارة برعب من الصوت وهو ينطق : خيــــــــــر !!
سجى حبه وتبكي : اسماء الكلبه دعست رجلي
ام فراس : عمى يعمي بليس بعد ! ليش تدعسين رجلها ؟؟
اسماء بقهر : تستاهل هي تعرف وش مســــــــــــوية !
فراس بين اسنانه : اسماء ! واللي جمبها .... صوت واحد والله ثم والله ماتلومون الا نفسكم !! ( نطق دون نفس وهو يرجع يحرك السياره ) ورعنه
غادة اللي كانت ورا مقعــده قربت من اذنه وهي تهمس له : روق أعصابك حبي
سجى شدت ع قبضها بقهر وهي تنتبه لغادة تتقدم عشان تهمس له .. واللي يغيظ اكثر طيف الإبتسامة ع فمه وهو يرد عليها ... واللي قتلها تماما كان ضحكة غادة الخجـوله :...............................
سجى كانت تقزها بقهر ( اضحكي اضحكي ان شاء الله تنخنقين بنص ضحكتك يارب )
وقف عند بيت اسماء .. كبست اسماء بعيونها : انا قايله برجع معكم البيت ! ماسمعتني ؟
فراس : إلا سمعت بس ما أعجبني وحسيت وش الله حادني اصبر ع غثاك وبيتك موجود ؟!
اسماء شهقت : فراس حرام عليك هيثم يمكن عند مناوبه !
فراس : لا يكون يناوب سنه وأنا مدري ؟! حد المناوبه 6 ساعات بالكثير وبيرجع .. استقبليه
ام فراس : ايه والله عيب كل شوي ناطه عندنا .. اجلسي بالبيت عطريه جهزيه اطبخي له شي
فراس بسخرية : تطبخ ؟ ماتقدر هذي تعرف تاكل بس
اسماء باستعطاف : الله يسامحكم بتتركوني في البيت اطالع الجدار والجدار يطالعني ؟!!
فراس : اول علامات تناحتك انك ماتدرين عن زوجك صدق ! شوفي سيارته موجودة !! يعني بالبيت
اسماء كبست عيونها وهي تطير عيونها : ويـــن ؟
فراس وهو حبه ويموت من تناحتها : واللي قدامنا وش ؟!!!!!
اسماء فتحت عيونها : ايه والله ( شهقت ) في البيت وماقالي !! ( طمرت تنـزل ) يله يله مع السلامة
هزت ام فراس راسها وهي تشوفها تمشي مسرعه تدخل : الله يخلف على عقل هالبنت .. مفصول مفصول مافيها عقل اصلن
فراس : الظاهر يبيلي ادفع لهيثم راتب وبدلات صبر على بلوتنا
ام عبدالمجيد : ههههههههههههههههه ياحليلها والله انها تهبل .. صدق شوي ملسونه بس وش حـلوها !
المــــلسونه الحلوة كانت تسابق خطـــــواتها على الدرج حتى وصلت لفوق ... فتحت شنطتها تدور مفتاحها ماحصلته !! الظاهر ناسيته ... شهقت وهي تطق الجرس ومتكتفه بقهر ..... انفتح الباب وهي تنتبه لنظراته المستغربه .. كان لابس بنطـال اسود قماش مبرز طوله وستره رماديه مريحه وشعره مبعثر ... كبست عيونها وهي تشم ريحة من داخل ... قربت من الباب وهي تشمشم ... انتبهت لانعقاد حواجبها وهو يبعد راسها منه وهي تشمه : شتسوين انتي ؟ كلب بوليسي طاق الباب ؟!!
اسماء انفجرت : انا اللي وش اسوي !!! انت اللي وش تسوي ؟!!! فوق انك كاذب علي تقول مناوبه وبالأخير جالس هنا ... وفوق انك جالس هنا ماترد على مكالماتي وتسأل عني !!! وفوق انك بعد جالس مرتاح ولابس ومروق !! من كثر مانجلس مع بعض يعني ما تسأل عني ؟!! ترا دوامك يقابلك اكثر مني وانا مطنشه ع جمب .. ( تو بيتكلم كملت بانفجارها وهي تدخل معصبه ) بس ساكته وصابره ومحتسبه الأجر عند رب العالمين وأقول معليش خليك زوجه متفهمه وهذي وظيفه ومستقبل لكن بالأخير اشوف منك هالإهمال !!!! لو اني ماجيت ورجعت بيت اهلي كنت حتنام هنا لحالك وانا هناك ؟!!! و ...
سكتت لما نطق بصوت عالي : بــــــــــــــــــس بس بس !!! ( سكر الباب وراه ) وش هالدرعمة والهجوم ! شرايك تعطيني كف بعد !!
اسماء اشرت بيدها : لولا الإحترام ولولا ان وجهــــك مره حلو حرام ينضرب كان عطيتك كف من القهر
فتح عيونه بصدمة ... زفر وهو ياشر لها : فكي عبايتك اللحين وتعوذي من الشيطان
تو فكت اسماء نقابها انتبهت لريحة الأكل الشهي تلفح انفها .... رجعت اعصابها تفور : وبـــــــــــــــــعد تطبخ ؟!!! وتاكل ؟!!!!! دونـــــــــــــي ؟!!! لهالدرجة اشتقت لحياة العزوبية !! لهالدرجة ماتبيني !! حط نفسك في مكاني وشف المعاناها اللي احس بها !! وإذا قدرت تصبر وقتها انا اعتذر لك برسم الخدمة !!
هيثم تنهد بصبر وهو يتقدم منها وشالها بين يدينه الثنتين وباسهـا بنص كلامها .... اسماء فتحت عيـونها وهي تبلع ريقها .... بعد ما باسها ابتسم لها : ممكن تسكتين شوي ؟
اسماء ارمشت رمشات متتاليه وهو تنتبه له يصعـد بها فوق ... : وين ؟
هيثم وهو شايلها ويصعد ومبتسم : بتشوفين ! يخرب بيت شكلك انتي ماتعطين احد فرصة يتسنع
اسماء شهقت لما دخـلو السطح بحجمه المتوسط .... كان مزين بالأنوار وبالنص طاولة وكرسيين متقابله ! وشموع بكل مكـــــان ... واناقة ترتيب الأكل تخطف الأنفاس .. ماصحت من تأملها إلا لما انتبهت له ينحني وينـزلها على الارض جمب كرسيها .. طالعته بدهشه : هيثــــم ايش هذا ؟
هيثم وهو يبعد الكرسي ويأشر لها تجلس : كنت ناوي اكلمك تجين مع السواق بس الظاهر مالحقت .. ( ابتسم وهو يسحب يدها عشان تقرب تجلس ) هذا عشاء من تحت يدي ..
اسماء كبست بعيونها : بجد !؟
هيثم : بجد
اسماء وهي تجلس وبأسف : ياوجه استح وانا للحين ماطبخت لك وانت طبخت لي
هيثم وهو يجلس مكانه قبالها ويرفع كاسه ويشرب : عطيني رايك
اسماء وهي للحين مذهـوله ... شربت من الحساء الفرنسي المزين وفعلا ذهلت : نصـاب مو انت اللي مسوي !!
هيثم : والله انا .. شدعوه يعني ؟!
اسماء : مرررررره لذيذ !!
هيثم : عوافي حبيبي
اسماء : بس وش المنــــــــــــاسبة ؟!
هيثم وهو يحك ذقنه : المناسبه اتركيها بعدين ... اللحين اتركينا مبسوطين ! ( طالع السماء وهو يتنهد ) الليلة قمراء
اسماء رفعت عيونها وهو تنتبه لاضاءة القمر : من أحلى انا ولا القمر ..؟
هيثم ضحك بخفه على بزارتها : هههههههه ماتهلكين انتي حتى القمر ناقرتيه !
اسماء : ماحتجاوب ..؟
هيثم ابتسم : القمر بيستحي لو يدري انك تشبهينه .. مبسوطة !؟
اسماء ساحت على الكرسي برومانسية : ياويلي
هيثم اشر لصحنها : كلي طيب
اسماء وهي تاكل : والله ماني مصدقة كل هذا ..... احس قلبي بيطير
هيثم بعد ماكلى لقمتين رفع المنديل ومسح فمه باناقة .. وسند ذراع ع الطاولة والذراع الثانية سحب يدها وضل ماسكها : باقولــك اشياء كثيرة بخاطري فركزي معي شوي
اسماء وهي مبتسمة وتدحرج رجليها بحماس : كلي معك !
هيثم ابتسم بحنية وعيونه بعيونها : عمرك حسيتي بشعور ان ماعندك مكان تروحين له ..؟ شعور العجز هذا كان مسيطر علي قبل اتزوجك ... فأول شي ابي اقولك شكرا لأنك صرتي انتماء لي ..... ويمكن ماعشقتك من النظرة الأولى .. بس بالنظرة الأخيره بعد ماتعرفت عليك حبيتك دون قيود
اسماء لمعت عيـونها وهي تسمعه .. وتو بتتكلم اشر لها : هششش .. اليوم انا اللي اتكلم بس , تمام ؟
اسماء عضت شفاتها وهي ترد بنعومة : تمام
هيثم : عارف إنك تعبتي معي .. وراح تتعبين اكثر .. فسامحيني .. واعذريني بعد لأني مقدر أجاري كلامك ودايم اسكت واتركك تتكلمين لحالك .. وآسف انك ممكن تمرين بلحظات تحسين فيها ان شعوري تبدل ولو أن هالشي مستحيل ... وآسف اني عاقل بزيادة وماني متكافئ مع جنانك .. وآسف اني دايم اعاتبك عند شغلات احيان مايكون لك علاقة فيها ... والأهم من كلمة آسف .. كلمة شكرا لأنك جاريتي كل هذا .. شكرا لأنك عاندتي رغبتي واقتحمتيني غصب ..... واللحين ما أعتقد لي داعي دونك .. اذا فارقتك تأكدي اني جالس افارق نفسي
اسماء دمعت عينها وهي تبتسم وتشد ع يــــده ....... ابتسم هيثم وهو يمسح دمعتها : بالنسبة لي ماعندي رابطة غيرك .. أنتي زوجتي وفيك أشوف اختي وصديقتي وبنتي .. ( زادت ابتسامته وسع ) ودي أقول امي بس والله تهبين قلبك يبي له رقع قبل تصيرين ام !
اسماء ضحكت بخفه وسط دموعها : هههههههههه
تنهد : اضحكي اسمـاء .. انتي الوحيدة اللي مايليق فيها الحزن ولا الهم ! عالمك صغير والوانه الوان طيف ! وادري اني غراب اسود وسط هالعالم بس انا مالي إنتماء غيرك .... ( بنبرة ختام حديث ) أحبــــك
اسماء رفعت يدها تمسح دمعتها وهي تمشق : ماتوقعـــت كل هذا عطني فرصة الحق نفسي ( ابعدت خصله من شعرها ورا اذنها وهي تتنفس بعمق ) واو ... بصراحة اول مره احس اني مو عارفه اتكلم ..
هيثم اكتفى بإبتسامة : ............................
اسماء هزت راسها بقلة حيلة : انلجمت ... ( رفعت كتوفها بحيرة ) امــوت فيك .. وش اقدر اقول بعد ؟
هيثم برضى وهو يرفع يدها ويبوسها : هذي لحالها تكفي .. بس كله ولا الموت ! لا تموتين فيني .. عيشي فيني ..
اسماء بحب : راح اعيش .. راح اعيش بكل جهدي
هيثــــم رفع يده لوجههـا وهو ينساب ناحيتها ويطبع قبله على جبينها : الله لايحرمني منك يارب ... قولي آمين
اسماء من قلب : آمـــــــــــــــــــين !!!
هيثم عدل جلسته : واللحين كملي عشـــاك
اسماء : ماقلت لي وش المناسبة للحين .؟
هيثم : بصراحة مافيه مناسبة .. مع ذلك فيه خبر لازم اقوله لك ! بس مو الليلة
اسماء باحباط : ليــــــــــــــــــــه ؟
هيثم ابتسم : لأنه مو خبر كويس .. وانا اليوم مبسوط ومابي احس بغير كذا
اسماء خافت : مو كويس ؟! شنو هيثم خوفتني !!
هيثم يطمنها : مايخوف ... لا تشيلين همه انسيه ! ( اشر لها ) كملي صحنك يله
اسماء ظلت تطالعه بنظرات متوجسه .. هز راسه وهو يوقف وينحني عندها ويثبت الملعقه بين اناملها : اكـــلي اقولك ! شوفي نحفك بس وطولك كأنك تو متخرجه من الإعدادي
اسماء بتصميم : راح الحس الصحـــــــون لحس !! وهو كل يوم يحصل لي الشيف هيثم وطبخه ؟!
هيثم ابتسم برضا : عوافي
***
بمـــــــــــــــطعم .. فتح عيونه ونطق بدهشه : نعــــــــم ؟!
نايف عقد حواجبه : خير شفيك طيرت عيونك ؟! قلت شي شاذ لا سمح الله ؟
بدر باستنكار : لا العفو ( استدرك نفسه ) ولا انطم وشوله العفو بعـــــــــد !!! صاحي انت ..؟ لو يدري ابوك والله ان يجلدك
نايف ببرود : شايفني بشهادة ثانوي ولا متوسط يوم تقول يجلدني ! انا رجال بعيالي دوري أجلد مو انجلد
بدر : بس الموضوع مايستاهل ترا ...... يعني لؤي للأسف ماظني يهمه
نايف بذات البرود : والله انتو تضحكون .. انا ما أنضميت لحداد اهلي ولا زعلت وقت انتشر الخبر لأن علمي براسي ! وأخوي راح ازوره وراح اشوفه وقت ابي ... واللي يحس انه يقدر يمنعني خل يجرب ويوريني كيف
بدر : يعـــــــني ماهمك فراقه ..؟!
نايف : طبعا مايهمني .. خصوصا ان وجود لؤي بيننا الفترة اللي راحت كان وجود مككذوب ! عقله بعيد مو يمنا
بدر : والله انت الوحيد المتفهم للؤي ترا .... الكل يلومه بشكل عجيب
نايف تنهد : انا ما ألومه نهائي ... بدر زرع نفسه في أرض مو له عشان كذا ذبل ! خل يزرع نفسه بمكان يقدر يشم الهواء فيه
بدر : والله كيفك أنت واخوك
نايف : إلا انت ماقلت لي ..؟! شخبارك بعد رجعـــــتك لعشك انت وزوجتك ؟
بدر ابتسم بوسع : الف من شكره على فضله .. والله اني عايش بنعمة يانايف الله يخليها لي يارب
نايف ابتسم : آميـــــــــن .. يعني المشكله انتهت خلاص ؟
بدر : امك وابوك للحين لسى عتبانين علي ولا راح الومهم .. ماعدى ذلك كل شي تمام
نايف تنهـد : حمد الله .. آقول بدر شرايك نمر العيال بالإستراحة , زمان عنهم !
بدر بضيق : والله كنت مفكر اخلص عشاي وارجع للبيت ....
نايف : ياشيـنك وش هالنكد !! ماعاد نعجبك حنا والإستراحة يعني
بدر تنهد : تصدق قبل كان كل همي ان اللي حولي يكونوا كثيرين وينقال عني اجتماعي ... بس اللحين ماعاد يهمني كم شخص حولي .. المهم من هالشخص ..
نايف بتسليك : زين فهمنا .. بتروح عاد ولا لا ؟
بدر : لا الله يستر عليك ..... برجع انام وراي بكرة دوام
نايف : ههههههه بدق على أبوي ابشره ان الإختبار نجح ونسيبه قرر يكون الزوج الصالح ومايطلع يدشر معنا
بدر : هههههههههههه يخس إبليسك طول عمرك حيوان
***
مســـــحت ذراعها بأكملها بالكريم العطري بنكهة التفاح والفانيلا ... وتشابكت يدينها ببعض وهي تكمل مسح , وتطالع نفسها بالمراية بالكومادينه قدامها وهي لابســـه بجامة ساتان باللون الروز .. شورت مع سيــور وصدر البجامه مــزين بالدانتيل السكري , وفوق بجامتها النــاعمة روب مفـتوح طقم بنفس اللون لنص فخذهـا , شعرها الغـــزالي تركته مفـــتوح على وجههـا بطبيعه مموجه مغريه , مسحت وجهها بالكريم وهي توقف وتــطلع من غرفة النوم وتتــوجه لمكتبـه المفتوح .. طرقت الباب بخفه عشان تنتبهه لوجـودها رفع راسه من الملف : هــلا
غادة وهي تدخل : مــطول حياتي ؟
فراس وهو مقطب حواجبه ومركز بالملف : أقول غادة !
غادة باستنكار : قــول
فراس : انا وأنتي متى تزوجنا ؟!
غادة حاست بفمهـا : همممممم .. 14 – 10 اظن
فراس رفع حواجبه : إلا صــــح
غادة ابتسمت : ليش .؟!
فراس : فيه صفقة كنت مسويها قبل زواجنا بيوم وجالس احاول اتذكر متى بالضبط !
غادة كشرت باحباط : وانا اقول يجهـز ذكرى زواج ولا شي
فراس رفع عيـونه لها : ذكرى زواجنا 3 -12 ...... مو 14 – 10
غادة ابتسمت وهي تتذكر : ذكرى دحـــر ابليس !؟
فراس ابتسم للمصطلح : دحر ابليس على قـــولتك ( سكر الملف وهو يوقف )
غادة : خلصت ..؟!
فراس تو بيرد دق جـواله .. زفر بضيق وهو يرد : نعــــــــم ! ....................... لا يامسعود شغل عقلك المقرقع ذاه شوي لو سمحت ! ..... ( زادت نبرته حده ) ايش ..؟! ........................ لا ! ................................... اسمع وصلهم كلامي كلهـم وغصب عنهم يسمعونه ! ولا في حالة ثانية وقت يبغوني اسمعهم ماراح يحصلوني ! .......... ( غادة خافت لما نطق بعصبية ) خل يدعــون من اليوم لبكرة من قالك ان دعوات الكلاب مستجابه ! .................( هجدت نبرته وهو ينطق بهدوء ) الكويت ؟ ............ متى راح ؟ ..... اها ... ايه ارسلها لي ..... يله مع السلامه
سكر السماعة وغادة نطقت : ماتريح اعصابك شوي ؟
فراس زفر : مريح ... الوعد بكرة لاداومت
غادة : شكـل فيه فوضى صايره عندك بالدوام ؟ ( نطقت باسلوب ملتوي ) يعني الظاهر مايمدي بنت عمتك تجي وتسوي جوله وما أدري ايش
فراس هز راسه وهو يسكر انوار المكتب ويطلع : وانا اقول متى تجين تفضفضين .. ما تأخرتي
غادة بضيق وقهر : الصراحة مالها داعي ! وبعدين هي وقحه ... يكفي قبل ما تنزل حاقرتني وحاقره امك و ( نطقت تتهزا بها ) مشـــكور فراس راح اتواصل معاك ! ... شنو عيني عينك كذا ؟!!!
فراس تنهد وهو يدخل غرفة النوم ويفك الكبــك من يده بطريقه : الله لايشحنك على بعض السخافات ..
غادة رفعت حواجبها : سخافات ؟!
فراس وهو يفك ساعته ويحطها بالدرج : ايه يعني انا رفضت المقابله خلاص مفروض ماتسوين كل هذا ! بتجي الشركة وتشوف دراستها وتطلع ..
غادة بقهر : لا عيوني مايصير لازم تعزمها فنجال قهـوه قبل تطلع
فراس ببرود : ولا يهـمك .. ( طلع جواله ) بس خل اسألها هي تحب العربيه ولا ايش ؟! ( عقد حواجبه ) ولا أقولك بنتظرها تتواصل معي على قولتها
غادة طارت عيـونها : فـــراس شوي شوي علي ... ترا والله اذبحها وأنت تكره اني اتعرض لها !
فراس التفت لها اخيرا : اللحين انتي وش قصدك ؟!
غادة كبست بعيونها : وش يعني وش قصدي ؟
فراس : وش قصدك من الغيرة هذي ؟!! منتي واثقة فيني يعني ! ولا شايفتني قليل ذمه وشرف
غادة : شــدخل ! بس بنات ابليس ما ماتن جعل موتهن قريب
فراس زفر : اقول اللحين حنا الثلث الأخير من الليل وانتي مشغلتني عند موضوع زي وجهك ! روحي لسجادتك وصلي ابرك لك واتركيني اريح شوي
غادة تنهـدت وهي تستقبل القبله وترفع يدها وبصوت جهوري : يارب ياكريم ! اسألك بكل اسم سميت به نفسك أنك تبعـــد عن مزيوني بنات الحرام ( كان يطالعها وهي منسجمه بدعائها ) وبنات الحلال بعد ! وبنات الدوام وبنـات الشارع وبنات العائلة الكريمه وبنت عمـته سجى ! وكل وحده تقرب منه جعلها من حفره لدحديره وجعلها تموت بمية رصاصه !! اللهـــــــــــم آمين
التفتت له وهي تنطق : وخلصنا دعوات الثلث الاخير من الليل ! قل آمين
فراس اللي كان مسند وركه على الكومدينه ومتكتف ويطالعها بحواجب مقطبه : عارفه وش الشي اللي أطول من ليالي الشتاء ؟
غادة وهي تتقدم ناحيـــته وتلعب باصبعها بياقة ثوبه : كبـــــــريائك .. وغرورك ... وطقطقتك , صح ؟
فراس ابتسم ابتسامة جانبيه : الجواب كان لسانك بس يله مايخالف دامك ماتشوفين نفسك
غادة تنهـدت : جـــد حياتي .. ماله داعي تشتغل عندك والله شي يقهر
فراس : غــادة ارحميني من هالحكي تعرفين اني مستحيل اقولها لا وبس راح توجعين نفسك على الفاضي
غادة بقهر : وليش مستحيل ؟
فراس : لأنها بنت عمتي ! وعيب ! والسالفة كلها تقرير جامعة بس !!
غادة عضت ع شفايفها وهي مكشره بقهر : .................ماتطمنت
فراس مسك يدها ونـزلها من ياقته : سرى الليل وانتي ماتطمنتي ! ( دخل غرفة الملابس ) اجلسي احرقي نفسك زيادة بهالأفكار اللي براسك
غادة تكتفت وهي تجلس بضيق على الكرسي وتمتمت بقهر : جعلك ياسجى موت عجل ! سحليه من تحت تبن ... ابفهم خلصت شركات العالم الا تجي هنا ! لو الحقيره اصلن عندها عقل راحت شركة خالها محرم لها مو ولد خالها ! قليلة ادب ...
ماصحت من حلطمتها الا على صوته اللي اضطر يرفعه عشان تسمعه : ماحتنامين ؟!!
كبست عيونها وهي تنتبه له بدل ثوبه وخلص واستلقى .. قالت بحرقه : ماهقيت النوم يجيني ذالليل
فراس دون نفس وهو يسكر الاضاءه جمب سريره : هجل اطلعي برا كملي حلطمة ولا تشغلين نومي
غادة ظلت تطالعه بقهر دون ترد : ...................
فراس اشر لها بيده : شنـــــــــــو ؟ نظراتك هذي ماتسوي شي ترا ! بحلقي من اليوم لبكره
غادة قامت وهي تمشي بخطوات منقهره وتسكر النور ... فراس وهو يراقب خطواتها الغاضبه : اعوذ بالله شياطين معششه في راسك ذالليل ؟ روحي توضي قبل تنامين
غادة بقهر : بروح اساسا الظاهر يبغالي اجتهد بالدعوات اكثر !
فراس تجاهلها وهو يستلقي وينـام ومجرد نطق وعيونه مسكرة : زيدي التكييف
***
أشرقت الشمس .. وصارت الساعة 9 , هيثم كان مسند ظهره على راس السرير بنصف استلقائه وهو يلتفت ويطالعها نايمه بعمق ووجههـا في حالة سكـون .. سكون يشك انها ماتعرفه إلا بنومها .... تنـــهد وهو يتذكر كلام الدكتور له ( أنت وعيك مختلف عن كل الطلاب اللي قابلتهم .. إنسان مثلك الواحد يتذكره غصب عنه .. تفكيرك فعلا مميز ومختلف وانصحك بهالإنتداب راح يفيدك كثير ) ........ صحى من تفكيره على رسايل متتابعه .. مو جواله , عقد حواجبه وهو ينتبه لجوالها انحنى ناحية طاولتها وهو يسحب الجوال ... كانت رسايل متتـــاليه من " غدو " كشر وهو يقرا :
اسماء طلبتك الفزعه روحي اليوم قطي في شركة فراس ! احس الحيوانه سجى بتجيب العيد
ولا أقولك شرايك نروح انا وانتي ؟!
المشكلة يقول لاتروحين !!
لا وخالتي معـــزمه على فراس تقول لاخلصت شغل خل تجي تتغدا عندنا ... ناقصه انا ؟
طيب تعالي البيت اليوم تغدي معنا .. مابي اجلس وياها بس
ردي لي خبر تكفين
ارتفع ضغــــطه .. دخل جوالها وهو يسوي حظر للرقم ! ورمى الجوال مكــــانه ............. ورجع يفكر بقراره , تنهد بضيق الساعة قربت تصير 10 وهي ماصحت .... انحنى ناحيتها وهو يهز كتفها بخفه ..: اسمــاء ...... اسوم .... عيوني
اسماء كبست عيونها وهي تصحى .. نطقت بضيق : كم الساعة ؟!
هيثم : معد إلا خير .. الساعة 10 !
اسماء وهي تتمغط : حبــي انا عندي قواعد بالحياة .. ما أحب اصحى بدري ولا أعرف انام الليل
هيثم : ماشيه بدستور مصاصين الدماء انتي ؟
اسماء : ههههههههههههه أيـوه ( كشرت انايبها وهي تهاجمه وتعض رقبته ) وراح اشفطك اللحين
هيثم اللي انصدم من هجومها : هههههههههههههههههههه يخس إبليسك !! ( قـاوم حجمها الصغير وهو يبعدها عنه ) اعوذ بالله وش هالشطانه !
اسماء وهي تمسح فمها بحركة فلمية : طعــــــامة طعامة !
هيثم رفع حواجبه : لا جــــد ؟!
اسماء تربعت وهي تنطق بروقان : المهـــــم انا صحيت ! يله ايش الخبـــر ؟!
هيثم تنهد وهو يجلس : نقـوم نفطر طيب .؟!
اسماء كبست عيونها : لحــــــــــظة ( طالعت الساعة ) الساعة 10 وانت للحين هنا ؟ وأمس موجود هنا ! شصاير ( ِشهقت ) الخبر هو انهم طردوك !!
هيثم : فـــالك ماقبلناه ! لو مطرود بتحصليني مروق واسوي لك عشاء ؟
اسماء : ههههههههههههه أدري .. بس جد غريبة جالس كل هالوقت هنا
هيثم تنهد وهو يرمي الخبر : اسوم انا عندي انتداب لجـدة مدة ثلاث شهور
اسماء ارمشت بعيـونها : ايوه ايش يعني ؟
هيثم : يعـــني راح ارجع لجدة مدة الإنتداب ... مضطر وهذا الشغل وأتمنى انك تتفهمين , وطبعا مقدر آخذك معي .. مشغول على طول وراح تملين هناك
اسماء تنحــــــت لوهله وبعدين نطقت بهلع : بتــــــــــــــــــــــــــــــــــــــــنقل !!!!!!!
هيثم : مؤقتا بس !
اسماء نقزت من السرير وهي توقف وتنطق بقهر : لا ! ارفضـــــــــــه مقدر مستحيل ..... على أي اساس طلع هالإنتداب ؟
هيثم : حدث العاقل بما يعقل اسوم .. وش ارفضه ؟! لعبه هو ؟ انتداب وصار خلاص
اسماء هزت راسها بإنكار : من وين طلع هالإنتداب مابي مابي ...
هيثم وقف وهـو يمسك كتوفها : هـــونيها اسوم ... جدة ماهي بعيدة وبجي هنا قد ما أقدر وراح اكلمك على طول مو كأني بروح لآخر الدنيا زي نايف
اسماء بانفعال : إلا بعيدة !!! وبعدين انت بالرياض وماتكلمني كيف بتكلمني هناك ؟!! والله لاموت وانت بعيد عني ..... وبعدين مو انت امس قلت اذا فارقتك فانا افارق نفسي !! وين راح هالحكي ؟!!!
هيثم تنهد : ماراح بعيد ... بس انا ماني جالس افارقك اساسا
اسماء وعيونها لمعت بحرقه : انت بس قلت لي احس كان خنجر يطعن قلبي !! كيف اذا صدق رحت وش بيصير فيني ؟ ( كملت بقهر وهي تاشر ) يعني امس العشاء والجلسه والروقان مو لله ... جالس تخفف حدة تأنيب ضميرك
هيثم : يابنت الحلال والله مب كذا بس السالفة أسلوب ! ماتعرفين تتكلمين يعني دون صراخ ؟!!
اسماء بقهر : مع وين اجيب لك اسلوب طيرت عقلي بهالخبر ! مابي اسلوب ولا ابي بطيخ ...... ابيك عندي وبس
هيثم عقد حواجبه : اسماء صدمتيني فيك ما كأني اكلم وحده عاقلة ... شنو ابيك عندي وبس ! تفاهمي واخذي واعطي بعقل .... ( رفع صوته حبه ) اقولك بــــــــــــروح ضروري عندي انتداب ! وهذا بيصير ومالك يد فيه ...... سفرتي عقب يومين .. ياحلوك لو تخليني هاليومين اروق معك بدل هالصراخ !
اسماء فتحت عيونها بوسعها : يــــــومين ؟
هيثم خلل اصابعه بشعره وهو يستبشر بصدمة جديدة من تعابيرها : إنا لله
اسماء بقهر : ليش يوميـــــــــن ! واجد مره !! روح اللحين لايفوتك .... اركض سافر ..اركض افتك مني
هيثم بنظرة حادة : الغي اجازتي هاليومين يعـني ؟
اسماء : واو ماخذ اجازه عشاني !!
هيثم لما استقبل نبرتها الساخرة .... فتح جواله مباشرة وهو يدق على رقم ... نطق وهو يطالع نظراتها المتوجسه بحده : سجل حضوري انا جايكم اليوم ... ( شدد ع نبرته ) وعب جــــدولي تعبيه !! خله مزحوم قد ماتقدر
اسماء عضت ع شفايفها وهي تسمعه ....... هيثم نطق : جايكم ! ( سكر السماعة وهو يطالعها ) مبسوطة اللحين ؟
اسماء ماردت ومجرد وجهها الطفولي تشوب بدموع مقهـورة .... هيثم بقهر : اللي بيشوفك بيقول رايح للحدود احارب مو انتداب شغل
تجاوزها وهو ينطق بنبره حادة : دون نقاش البسي اوديك اهلك بطريقي
اسماء : مابي ...........
هيثم التفت لها : ماراح تجلسين بهالحاله بالبيت لحالك ... روحي خل امك تعقلك شوي !
اسماء سكتت وهي فعلا ماتبي تجلس بس ودها تكابر :.................................................
جلست على السرير لما دخل يلبس وهي تمسح دموعها وتحس بقهر مب طبيعي : ................
***
تنهــــدت بتعب : اخيـرا مابغينا نخلص .!
بدر وهو يسوق : هناك الخلاص .. شديتي نفسك يومين بس حمدالله افتكيتي
ميهاف : هههههههههه ابوي هو اللي شدني والله , الله يخليه لي يارب
بدر : انا بروح الدوام اللحين .... انتي وش ناويه ؟
ميهاف بحماس : خل اروح معك اشوف مكتبـــــك
بدر : ماعطيتيني خبر قبل أفرشه لك ورد قبل تجين !؟
ميهاف بحب : مايحتاج
بدر : هممممممممممممـ ... بس ترا بطول , اخاف تملين
ميهاف : مايخالف اذا مليت راح ارجع مع سواق أو شي ... وبعدين من يمـــل منك انت ؟!
بدر ابتسم وهو يطلع جواله : معناها خل ابلغ الولد يسوي القهـوه
وقت وقف بدر سيارته .. عقدت ميهاف حواجبها : هذي سجى ؟!
بدر : وين ؟
ميهاف وهي تاشر لسجى اللي واقفه مع موظف عند الباب ... : هذي هي ... الظاهر صدق راح تسوي مقابله مع فراس
بدر وهو ينزل : مستحيل فراس مايسوي مقابلات إلا ناااااادر
ميهاف وهي تنزل : طيب سجى تعتبر بنت عمتــــه يعني شي ناااااااااااادر
بدر : تراهنيني على عقل اخوي الأعوج ؟!
ميهاف : ههههههههههه لا شكلي بستسلم !
مسك بدر يدها : يله تعالي اوريك المكــــتب
: ميهـــــــــــاف !
التفتت ميهاف للصوت ... ابتسمت وهي ترد : على سجـــــو مرحبا
سجى بحماس : ماتوقعت احصلك هنا ... ( نطقت بادب ) السلام عليكم بدر , كيف حالك ؟
بدر بـــلباقة : حمدالله بخير ... انت وش علومك ؟
سجى : تســـــــــــــرك
ميهاف : ايش تسوين هنا ؟
سجى باحباط : طلبت المقابله من فراس بس رفض .... وكتعويض راح اسوي جوله هنا واكتب عليها تقرير !
بدر : معناها قدامك شغل كثير ... الله يعينك بلشي من اللحين ( التفت لميهاف ) شفتي ان مافيه مقابله !
سجى : والله جيت أدخل حصلت نايف متربع بالصالة وخفت امر قدامه ... بيجلس يفشلني ويتمصخر وماراح يتركني الا دموعي نازله
ميهاف : نايف هنا ؟! وش السالفة اليوم متواعدين اجل ؟
بدر ضرب راسه : أيـــــــــــــــــــــــه صح ! نسيت اني مواعده ... ( ابتسم ) اجل انا داخل اوخره من طريقك
سجى : مشكور
ميهاف : انا بجلس اشرب فنجال قهـوه مع سجى لحد ماتخلص شغلك مع نايف
سجى : لا تكفين مو قهـوه .. مع هالحر عصير ويادوب !
دخل بـــــدر الشركة وهو يأشر : نيـــــــــــــوف
نايف قزه بنص عين : نيوف بيذبحك اللحين ! وين اللي مواعدني من صبح الله ! هذا التزامك يامدير ؟!
بدر : والله ناسيـــــــــــك اصلن ... ورحت مع ميهاف لعمي نرتب باقي اوراقها وتو خلصت
نايف : تراك صاير بزيادة عاد ! يعني ميهاف ماتقدر تروح مع السواق لأبوي وانت تجي !! حشى لازق فيها لزق
بدر : ههههههههه تصدق عاد سجى من شوي واقفه برا ماقدرت تدخل لأنك موجود
نايف رفع حواجبه : باكلها يعني ؟
بدر : على كلامها انك بتاكلها هههههههههههههه
: مــادريت إن مشروعنا الجديد كافيه ودق حنك ؟!
نايف دون يلتفت ابتسم : جت الرقابه !
بدر : هـــلا فراس .. شوفة عيونك نايف فاضي ماوراه الا يجي هنا يلعب
فراس رفع حواجبه وهو يطالع نايف : شالأخبار ..؟! سمعنا انك ناوي اخيرا تنتمي لفصيلتك وتروح تعيش مع الغوريلات
نايف : هههههههههههههههه ايوه الخبر صحيح وجاي اعزمك .. يمكن تحصل مكانك بينهم
فراس : المشكـلة ان مكاني انت ضيف فيه حاليا !
نايف : على خبري ماتكرمون ضيوفكم صح
فراس : أبد مرحبا ومسهلا .. قهـوة ولا فطور ؟!
نايف وهو يجـلس : لا فراس متحــــسن والله .. قبل شهرين أتوقع كان ممنوع تضيفنا حتى بالأكسجين
فراس وهو يلتفت لعامل : جهـــز قهوه .. ( جلس ) تقدر تقول أن لكل فعل ردة فعل .... دامك تحسنت انا تحسنت !
نايف ابتسم : لزوم نحشمــــك معد صرت ولد عمي وبس .. عديلي بعد
بدر : اقول فراس .. ( نطق بجديه ) دريت ؟ نايف ناوي يزور لؤي قبل يطلع السفاري
فراس تو بيحتسي قهـوته وقف ... لوهـله .. وبعدها كمل يشرب : ......
نايف : استراليا مشوار صح ... بس حتى لو تأخرت شوي مايخالف ..
فراس بهدوء وعيونه بفنجاله : الكويت .... ( نايف عقد حواجبه ) .... ماعاد ببيرث نقل للكويت ...
نايف رفع حواجبه وهو يتبادل نظرات مستنكرة مع بدر ...... بدر باستغراب : وانت شدراك ؟
نايف وهو يطالع فراس بنظرات لها معنى : هو اللي قالي انه باستراليا من أول اصلن ....
بدر عقد حواجبه : وليش للحين تراقبه ؟! وش يهمك فيه ؟!
نايف رفع حواجبه : انــــــــدري عنه .. على اساس معد يهمك
فراس : المواضيع هذي اعتبرهـا زي الالعاب ... لازم أكون على راس اللعبه واعرف شصاير حولي لأنه اذا ما أنت رسمت لعبتك بنفسك راح تحصل نفسك في لعبه شخص ثاني
نايف باصطناع : أيـــــــــــــه اكيد عشان كذا ! ( نطق باستنكار مصطنع ) مستحيل يكون عشان انك مهتم فيه ! صاحي انت ؟!
فراس طالعه : وش تبي توصل له انت .!
نايف : ما أدري ... ماني فاهمك ... تراقبه بس ماتهتم فيه .... مقاطعه بس ماتكرهه ! ماتتكلم عنه حتى !!
فراس : وقت تنتهي علاقتك مع إنسان .. مفروض تجمع كل سوالفه وتدفنها وتنسى حتى فين دفنتها
نايف : فاهم إن النهايات لها اخلاقها ... بس دام انهيت علاقتك معه وش داعي تتابعه ؟!
فراس واعصابها طفرت : عشان واحد غبي مثلك مايروح مشوار كامل لبيرث ومايحصل احد هناك !
نايف شهق بسخرية : طــــلع عشاني ؟!!
فراس بحدة : الموضوع ان كل واحد يتعامل مع اللي يقهره بطريقته .... اذا انا طريقتي ملتويه بنظرك اجل انت شنو ؟!
نايف رفع حواجبه : شفيني انا .؟!
فراس : تمصـــخرك على كل شي حولك وش معناه ؟ انا اشوفها ردة فعل جبانه .. وكأنك لو تتعامل مع الأمور بجديه راح يوضح قد ايش انت مالك هويه
نايف : لا ! انا اتمصخر لأن اللي ياخذون الأمور بجديه ينتهون كئيبين مثلك .. ويفقدون عقلهم بدري ع خبري
فراس ابتسم بسخرية : مادريت انك تسوي كذا عشان تحفظ عقلك ! يعني مفروض أتوقع ان عقلك ياسع بلد ؟!
بدر وهو ينقل عيونه بينهم : مو كأنكم زودتـــوها بهالنقاش !
فراس : انا انسدت نفسي من جلستكم .. ( طالع نايف ) وعموما وقت يلحقني زهايمر عقب كم سنه وتظل انت بعقلك يا أبو الحـــكمة تأكد انك تنشر توعيـــات لحصانة الزهايمر
ووقف وهو يبتعد عـــنهم ... بينما بدر التفت لنايف : شعندك انت جالس تستفزه !
نايف رفع كتوفه : ابد جالس احاول احل عقدته بخصوص لؤي ذي ... مو صاحي ملاحق اخباره يعرف حتى وش فطوره اليوم ! ويقول مايهمني
بدر : ولــــو خلاص مالك علاقه فيه يصطفل هو وياه ..
نايف : يصطفل ماهمني ترا .. بس جالس قلت اقول اللي بخاطري
بدر وقف : خلص قهوتك قوم .. ميهاف هنا خل اروح اشوف شسوت
نايف : ايه صح تقولي سجى هنا ..؟ وينها بروح اطفرها قبل ارجع البيت
بدر : منتب صاحي انت خلصت فراس بتروح لسجى
نايف وهو يشرب قهـوته بنفس واحد : يا ابن الحلال بنقلع 3 شهور مع فصيلتي على قولة أخوك وماراح تحصلون احط يطفركم خلاص ! اعتاق
بدر : ههههههههههههه الله يبشرك بالخير
***
غـــادة كانت مع أم فراس بالمطبخ ينجـــــزون في الغداء ...... قالت غادة وهي تقرب الطمـاطم المقطع لأم فراس عند الفرن : خالتي مو كأنك مكثرة شوي اليوم ؟
ام فراس وهي تستلمه منها : ايه ... ناسيه ان سجى مداومة اليوم عند فراس ؟! قلت له يعزمها مايصير وبدر كلمني وميهاف جمبه وقلت له يجي يتغدى معنا هو وياها......... واسوم بعد مدري عنها بأي لحظة تطب هي ورجلها
غادة رفعت حواجبها : اهـــــا ... لا دام كذا معـك حق فعلا
رن الجرس ... غادة عقدت حواجبها : أفتح ؟!
ام فراس : لا لا ( عطتها الملعقه ) حركي على الشوربه , انا بروح افتح
طـــلعت ام فراس وهي تسأل : ميـــــــــن ؟
اسماء : انا يمــه افتحي
ام فراس افتحت واستقبلتهم بإبتسامة لكنها اختفت لما شافت اسماء تدخل مباشرة دون أي كلمة ......... وهيثم اللي دخل وراها وهو يطالعها ويتنهد , التفت لام فراس وهو يجلس شنطة متوسطة الحجم على الأرض : شلونك خالتي ؟ عساك بخير ؟
ام فراس وعيونها على الشنطة ... ردت ع اسئلته بنبرة متوجسة : خير هيثم ؟ شصاير ؟ شفيها اسماء داخله كذا وهالشنطة !؟
هيثم بضيق : ماشر .. بس اسوم متضايقة ويمكن تجلس عندكم اليوم
ام فراس : ليش طيب ؟!!! لا يكون مضايقتك ... ترا اسماء صغيره ولسانها مفلوت احيان بس والله تحبك وتـ...
قاطعها هيثم : لا خالتي وش هالحكي ؟! الغلط مو منهـا .... الغلط مني هي المظلومة هنا
ام فراس : هيثم ريحني يامك وقول شصاير !
هيثم تنهد وهو ينـزل راسه : انا جاني انتداب لجدة شهرين او اكثر ... واسماء لما عرفت زعلت وعصبت , فانا قلت تجي عندكم تريح اعصابها شوي وترتاح لأنها مو راضيه تتقبل مني شي حاليا
ام فراس تنهدت براحة : والله خوفتني على بالي شي كـــايد !
هيثم : معك حق والله الموضوع بسيط بس اسماء تعرفينها ... لازم مبالغة وميلودراما
ام فراس ابتسمت : خلاص حبيبي ازهلها انا بكلمها وإن شاء الله خير .. ريح بالك
هيثم : تسلمين أم فراس
رمى نظـرة على المدخل وطـلع بينما ام فراس ضربت يدينها ببعض وهي تدخل : هالبنت بتجلطني بهبالها !
مجرد مادخلت انتبهت لصوتها عند غادة بالمطبخ تفضفض لها بقهر : تخيلي ياغادة غبني حسيت بوجعة يعني أمس دخلت جو أني اكثر وحد مميزه بالنسبة له واليوم حسسني إني رسميا ولا شي ! مايهمه بيروح وانا بلعنه تلعني
ام فراس : صدق انك هبله !
التفتت لامها وهي تمسح دمعتها : ماما بليز لاتزيدين علي والله اللي فيني كافيني
ام فراس قربت منها وهي جالسة على الجزيرة بنص المطبخ : والله يوم شفت وجهك قلت متهاوشين ولا طاردك لاسمح الله ... الموضوع بسيط انتداب وبيروح ! تقريبا كل الحريم رجاجيلهن جاهم انتداب .. وماسووا هالمناحة اللي انتي مسويه
اسماء : ايه ينتدبون عقب الزواج بخمس سنين أو اقلها سنتين ! مو بسم الله من اول سنه راح يطير ينتدب !
غادة حاوطت كتوفها : عمـوما حبيبتي انتي روقي اللحين .. اساسا غلط تفكرين وتتكلمين وانتي مو هادية ! وسعي صدرك واستريحي وعقب بتفكرين بطريقه غير صدقيني
اسماء بقهر : مابي افكر بطريقة غير ! مابي اقتنع !
ام فراس بقلة صبر : اســــــــــــــــماء ! البزارة اتركيها لياسمين ... انتي تزوجتي كبري عقلك !! مو على طول الرجال بيصبر على الدلع هذا وان صبر اللحين ماصبر بعدين
اسماء انغبنت : يعــــــني انا الغلطانة بنظركم اللحين ؟
ام فراس بثقة : ايه غلطانة وستين غلطانة !
اسماء وقفت وهي تطلع من المطبخ وتتحلطم بقهر : خلاص انا الغلـــطانة طول عمري غلطانة ! وكل غلطات الدنيا فوق راسي .. اذا جاكم فيضان بتتهـموني فيه على طول
ام فراس صرخت فيها : وجـــــع بعد لاتصارخين ! قليلة حلا صحيح هذا وحنا ننصحك ونبي مصلحتك
اسماء وهي تطلع برا البيت للحديقة : خلاص ماما فهمـــت انا اصلن فاشله طول عمري واللحين صرت فاشله بحياتي الزوجيه !! عادي اصلن
وسكـــــــرت باب البيت الرئيسي بأقوى ماعندها ... ام فراس هزت راسها وهي تضرب فخوذها وتجلس : شاسوي انا مع هالبنت ! راح تجلطني ..راح تموتني !!
غادة تنهدت : معليش خالتي اتركيها اللحين لحالها ... بس تروق راح نقدر نتكلم معها
ام فراس بقهر : مدري على ميـــن طالعه كذا مربوشه ومطفوقه ! غلطاتها ماعادت تخصنا وبس .. حنا اهلها ونصبر .. اللحين تزوجت وانا خايفة بهالعقل ماتقدر تتحكم بحياتها مضبوط وبالأخير ماحيندم غيرها
غادة وهي تجلس قدام ام فراس : حتى زوجـها يعتبر اهلها وإن شاء الله انه بيفهمها وبيقدر يوصل معها لحل ... وبعدين اسماء مازالت صغيره
ام فراس بحسرة : انتي ياغادة اصغر منها واشوف فيك عقل ما أشوفه فيها ! ياسمين وهي ياسمين اعقل منها
غادة ضحكت : هههههههههههه يابعد عمري ياخالتي ليش ماتدرين ان نص حلاوة اسوم بجنانها ؟! والله ماحبيتها إلا بسبب حركاتها الهبله هذي
ام فراس بجديه مقهوره : هبالها وقت الهبال .... بس بالامور الجادة لازم تتسنع وتتعلم كيف تتخذ قرار صحيح
غادة بتأكيد : راح تتعلم صدقيني ... هي للحين تو متزوجة ومو فاهمه كيف وكل همها انها تبغى تكون مع هيثم على طول , مصير الدنيا تعقلها
ام فراس رفعت يدها : اللهم آمين
غادة وهي توقف : وبعـدين اسوم ماينفع معها هالأسلوب .. يعني وقت يناقشها الواحد ويحطها غلطانه تنفعل وتعصب .. عشان كذا لازم مبدئيا نخليها تكسب وتفضفض وبعدين بتهدى وبنقدر نناقشها بهداوه
ام فراس هزت راسها : على آخر عمري لازم ادرس علم نفس عشان اتفاهم مع نفسية هالمهبوله
غادة : لا تدرسي ولا شي حبيبتي ... واضح زوجها فاهم هالشي ولا كان ماجابها هنا تهدى ! كان راح يتركها عنده ويتفاقم الوضع
ام فراس ابتسمت لغادة اللي كلامها ريحها بجد : يابعد عمـري ياغادة والله انك بلسم للقلب ( وقفت جمبها وهي تلعب بخصله من شعرها الطويل ) الله لا يبين غلاك حبيبتي
غادة باست راس ام فراس ويدها : اخ ياخالتي ماتدرين اني مستعده ادفع ماوراي ودوني عشان رضاك ... والله اني احبك حب ماحبيته احد قبلك
ام فراس نغزتها : ولا فــــراس ؟!
غادة ضحكت بحياء : ههههههههههههه لا خالتي كذا غش .. انتي غير وهو غير !
ام فراس تنهدت بحب : فاهمـتك ياقلبي ( شهقت لما انتبهت للساعة ) جعل اسماء ماتربح !! راح الوقت بيجون اللحين يتغدون وانا التهيت من وراها
غادة : بنلحق إن شاء الله , امريني وش اسوي
ام فراس : لا غادة اتركي الغداء علي طلبتك اطلعي لاسماء حاكيها لايجون اخوانها وميهاف وسجى وهي طايشه كذا !!!
غادة : إن شاء الله ابشري
ام فراس : ولاتقولين لفراس انها جايه هنا زعلانه .... انا بقوله بطريقتي
غادة بموافقة : من عيوني
طـــلعت غادة لبرا وهي تمشي حتى حصلت اسماء بالسور الخلفي جالسة على مقعد خوص وضامة ركبتها لصدرها وعيونها اللامعة سرحانه بالجدار .... غادة تقدمت منها وهي تجلس جمبها لكن اسماء ما أبدت أي ردة فعل ..... غادة : ممكن اسأل ليش انتي مجنونة كذا؟
اسماء بغبنة : في هالدنيا شي يستاهل اعقل عشانه ..؟
غادة ابتسمت : لا
اسماء : معنـاها اتركيني بجناني وتعالي اعلمك آخر خطط جنوني
غادة : تفضلي اسمعك
اسماء بنظرات محدقة : برسل قاتل مأجور يهدد رئيس هيثم انه يلغي الإنتداب ولا راح يموت
غادة : هههههههههههههههههه والله فكرة مو شينه وقولي له بالطريق يمر على سجى ويحذرها انها ما تدخل شركة فراس مرة ثانية !
اسماء وهي هدت شوي : راحت اجل ؟
غادة بغبنة : اكيد دامها بتجي معاهم تتغدى !! جعلها المرض ( التفتت لاسماء ) ليش ماوصلتك رسايلي ؟ استفزعت بك بس مارديتي
اسماء بكئابه : ما انتبهت
غادة نغزتها بذراعه : شنو اسوم وش هالمود يعني لازم اجيب معجزة كونية عشان تضحكين ؟
اسماء : معك حق .. ان هيثم يحبني من قلبه هالشي يبي له معجزه كونية
غادة بصبر : إنا لله .. حطيتيه مايحبك مرة وحده ! ترا على كلام خالتي انه شايل همك
اسماء بقهر : ياكل تبن ......
غادة : وبعدين ما تأخرتي بالفزعه .. هذي سجى بتجي تتغدى هنا قومي روقي وافزعي لي
اسماء بكئابه : مالي مزاج غادة
غادة : وبعــــدين اسماء ؟ ترا بجد الموضوع مو مستاهل .... بدل دموعك هذي قومي فكري بحل !!
اسماء : وش الحل الممكن لهالمعضله بالله ؟
غادة : يعني مثلا تقدرين تناقشينه انه يجي كل ويكند .. او انك تزورينه كل اسبوعين مره ؟! او تتفاهمين معه يطالب بتخفيف لمدة الإنتداب ... يعني أي حل ممكن بس انك جالسة بهالكساحة كذا ماراح يمشي وضعك صدقيني
اسماء بتفكير .... غادة لما حست انها بدت تتجاوب معها : وبعدين حنا مو بزمن الجاهليه ؟! فيه جوالات وفيه برامج تواصل فديو وفيه فديكس والطيارات حمدالله تودي وتجيب في شوي !! ماني فاهمه ليش مصعبتها يعني ؟
اسماء عضت شفاتها وهي تنفتح من انغلاقة جلستها : .....................
غادة : اجل لو انتي مكان ابتسام اختي وش بتسوين ؟ نايف ناوي يتركها وهي حامل وراح يجلس هناك لحد ماتولد ! ومو بالسعودية بيروح لأقصى الدنيا ! ومو عشان شغل اجباري ... شغل تطوعي من راسه الفاغر
اسماء تنهـدت وهي بدت تحس براحة من كلام غادة : والله اني مقهـورة ......
غادة ابتسمت : معليش بتنقهرين لانك تحبينه وغصب بتشتاقين له .... بس تخيلي راح تجلسين عندنا هنا !! وانا اشتقت لحسك بالبيت ماتتخيلين قد ايش مبسوطة
اسماء بكئابه : اصلن من اكبر اسباب قهري اني برجع اعيش مع فراس وبيرجع يشتغل فيني
غادة بفزعه : لا ماعليك انا موجودة ... مايقولك كلمه بوجودي !!
اسماء طالعتها بنص عين : تكفين عاد ! زين مايحشك معي
غادة بروقان : وخل ننحش سوا .... هههههههههههههههه تذكرين لما خربنا الكهرب وغسل شراعنا ؟!!
اسماء : ياحليلك تضحكين لأنه مارضى تدفعين ... انا قاهرتني دفعت دم قلبي عشان تتصلح
غادة : يـــــــــــــوه اسوم وش هالكئابه ! بس تضل مغامره وذكرى حلوه
اسماء ابتسمت بكئابه : خلاص زين ذكرى نص حلوه .....
غادة : إن شاء الله ربع .... المهم انها حلوة وبس !
اسماء استنشقت هواء وزفرته : ................................
غادة وقفت : ايوه كذا .... يله تعالي اسمع صوت الباب ينفتح أكيد رجعــوا من الدوامات
مسكت اسماء يدها ومشت معــــها .... أول مادخـلوا حصلوا ميهاف وجمبها سجى .. ميهاف : اســــــــــــــــــــــــــوم هنا ؟! يابخت عيني
غادة : ايه الحب اسوم هنا جعلني فداها .. وجعل هالبيت عامر بحسها
ميهاف سلمت عليهن : شخباركن يادبات ؟
غادة واسماء : حمدالله بخير
سجى سلمــــت عليهن وهي تنطق : واااااااااااااو تعبت اليوم حشى شركة فراس مره كبيرة !! والله لو مافزع لي بسكرتيره كنت ضعت
غادة كشرت وهي ترد دون نفس : وعسى خلصتي بس ؟
سجى : اقولك شركته كبيرة ! ماخلصت الا النص يمكن اروح بكرة بعد
غادة تجاهلتها وهي تلتفت لميهاف : والله لك وحشة ميهاف ... شالعلوم شمسوية ؟
ميهاف وهي تجلس : أبد والله اليوم خلصت حوستي مع ابوي وهذا لحاله نعمة ( عقدت حواجبها وهي تنتبه لاسماء تمشي وتتركهن وراها ) اسوم وين مدرعمة ؟
اسماء : لجهـنم .. تجين معي ؟
ميهاف بققت عيونها : اعوذ بالله من الشيطان الرجيم !! ( التفتت لغادة وهي تهمس ) يمه شفيها ذي على راسها الطير ؟
غادة : ماعليك منها ( عقدت حواجبها ) المهم انتو جايين مع مين ؟
ميهاف : بدر جابنا وحطنا وطلع يصلي
غادة طالعت الساعة ... تو بدري ان فراس يجي اللحين , ابتسمت : تفضلوا حياكم
سجى بنبره قاصده تحرجها : أقول غادة اشوفك تمونين بزيادة ! فيك سنع قولي لنا تفضلوا بيتي ... على فكرة من تزوجتي للحين كم لك مافكرتي يوم تعزمينا فيه !
غادة عقدت حواجبها : وانتي ليش شاقه نفسك كذا .. ماودي اصدق انك ميته تشوفين بيتي وتجلسين معي بعد
سجى : اولا ماهو بيتك ... بيت راعيه ! ثانيا ليش حبيبتي ما أجلس معك ؟! على اساس هنا ماني جالسه معك ؟ بوجهي غصب عني
ميهاف : سجى ادب شوي !
غادة بإحتقار : اتركيها ميهاف هذي الأدب متبري منها .... ( رفعت حواجبها ) عموما حياك الله اساسا فراس وبدر بيتغدون هنا على الطاولة خل حنا نروح فوق
ميهاف انحرجت : لا حبيبتي مافيه داعي بنجلس بغرفة الضيوف نتغدى
غادة بصدق : لا ميهــــــــــاف تكفين تعالي اساسا تو شاريه فستان وأبي رايك فيه ... يعني هو عاجبني بس ما أدري ليش محتاره في تنسيقه
ميهاف : لا دام السالفة كشخه وتكشخ ودولايب تنفتح أجل انا اول وحدة !
غادة : هههههههههههههههههه ايه وفداك تسرقين بعد
ميهاف شهقت : لا تفتنيني في نفسي غادة ! خافي ربك قلبي بيوقف
غادة : بس دقيقة خل اعطي خالتي خبر
اول ماراحت غادة نطقت ميهاف : سجى خفي شوي من هالحكي ! ترا والله عيب وبعدين غادة شمسويه لك عشان تطيرين فيها كذا
سجى كشرت : كلها ع بعض تنرفزني !
ميهاف : وبعدين هذا هي عزمتنا بيتها تكفين خل نصعد ننبسط مو نقلبها هدات وحكي ماله طعم
كشرت سجى دون ترد ..... جت غادة وهي تنطق لياسمين قبل يصعدون : ياسمين حبيبتي عطي اسوم خبر ان حنا فوق خل تجينا , وانتي بعد عيوني حياك
ياسمين بنعومتها المعتادة : ان شاء الله
صعدت غادة وميهاف تسولف : عاد تصدقين آخر مرة صعدت لها كنت صغيره اذكر زمـــــــــــــــــــان مره اول ماصممها عمي الله يرحمه جينا نشوفها
غادة : حـــــلو يعني عندك فكرة عنها
ميهاف : لا وين ناسيتها مرة
سجى وهي تحاول تروق : ههههههههههههه تذكرين اسوم الهبله لما نامت فيها مره ؟! مسكينة صحت على فراس ساحبها من رجلها وماحطها على الدرج كله
ميهاف : هههههههههههههههه مجنونة من يومها !!
غادة وهي ارتاحت ان سجى تسولف طبيعي : ههههههههههههههه عاد ليش نايمه فيها الهبله
ميهاف : يوووووه ماتدرين اسماء كان عمي الله يرحمه لاعب عليها ويقولها هذا قصرك لما كان يبنيه والمسكينه بنت احلامها هناك ... ولما خلصوا شغل اكتشفت ان هذا عرين الأسد مو قصرها
فتحت غادة الباب بمفتاحها وهي تدخل وتحط مفتاحها على الطاوله الصغيره جمب الباب وتشغل الأنوار : حيـــــاكم الله تفضلوا البيت بيتكم
ميهاف : فراس ماراح يجي ؟
غادة كانت تشغل الفــــواحه العطريه بريحة القهـوة .. طالعت الساعة : ماظنيت يجي اللحين بس عموما بيكلمني قبل يجي اكيد
ميهاف هزت راسها وهي تدخل مع سجى ....... مسحت سجى بعيـونها على غرفة المعيشه .. الأرضية باركيه والصوفيه نيـــلي داكن بقماش مخملي ووسادات صغيره باللون الوردي الحالم ريش ... الطـاوله بالنص خشـــب طويله نوعا ما , مزينة بباقة ورد أقحـــــوان أبيض .. ومجلات غادة مصفوفه فوق بعض .. وجنب هضبة مجلاتها كتـاب بعـنوان التنمية لغازي عبدالرحمن القصيبي ... وصينية صغيره فيها مجموعة شموع واعواد عطريه ... ابتسمت ميهاف وهي ترفع من الطاولة ورقة مشخبط فيها مليون ألف توقيع ..... وواضح انها برشمة : الظاهر فراس حتى بالبيت جالس يوقع تقارير ؟!
غادة : ههههههههههههههههههههههه لا تخيلي ذاك اليوم مسكني يذكرني بتوقيعي بعقد الزواج كان اسمي لأن اساسا ماعندي توقيع .. وحلف إلا يصمم لي توقيع ! وهذي تصميماتها بس ازعجته كلها صعبه علي
سجى وهي تتابع تصاميمه لها .. كانت تصاميم مميزه بحرفها واسمها : ......................
ميهاف : فراس عاد ما شاء الله توقيعه مميز من يومه
غادة : ايه ما شاء الله ( غادة اشرت لبين الخربشه سطر مكـتوب بخطه " زوجتي غبية جدا . . انا اعاني " ) شوفي بس شكتب لما استسلمت ورحت اسوي قهوه وسحبت على توقيعه
ميهاف : ههههههههههههههههههههههههههههههههههههههههه !! شكلك بطيتي كبده
غادة : هههههههههه الحق ينقال اني ماقصرت
سجى اللي انغلقت من سوالفهم الزوجيه .. : وباقي الغرف ايش ؟!
غادة ثنت الورقة وجلستها وهي تاشر لهم : المطبخ هنا طبعا ... ومطبخ حشمه مانستعمله كثير لأن فراس يرفض ياكل دون امه
: من قوة البر عز الله
ابتسموا البنات لما شافوا اسماء وراهم .... غادة : هلا اســـــــــــوم نورتي
غادة اشرت لباب : هذا مكتب فراس اللي تسعين بالمية انه مقفله كالعادة !
جربت تفتحه طلع مقفله فعلا ... رفعت حواجبها : شفــــتوا ؟!
اسماء : ما أذكر فيه مكتب كان
غادة : تو ضبطه هالشهر ... تقولين مكتب شركة !!
سجى : مايكفي يعني مكــتب الشركة ؟
غادة : لا وين خصوصا انه دايم يشتغل عن بعد من البيت .. تقدرين تقولين مقر عمله الثاني
ميهاف : يمه ياخوفي بدر يسرق غرفة من شقتنا ويقلبها لي مكتب عقب ما صار مدير بعد هو !
اسماء : بقترح له الفكرة اليوم يارب تعجبه
ميهاف نعزتها : يـــــــــــانذله انطمي !!
اسماء : المهم وين غرفة النوم ؟ هذي اهم شي ترا !! ولا لاتكون مقفله بعد ؟؟
غادة : اعوذ بالله منك وصخة ... تعالي بس
دخلتهم غرفة خاصه للضيوف بجانب الباب الخارجي المستقل بالشقــه : هذي طبعا للضيوف بس استعمالها نادر
سجى : لأنك كريمة بسم الله عليك
غادة زفرت : لأن ماعندي ضيوف خاصين .. كل ضيوفي ضيوف ام فراس قبلي
اسماء فتحت بـــاب غرفة .. نطت غادة لعندها : ياحمـــــــــــاره ليش فتحتي ؟!
اسماء كبست عيونها : ليش وش هنا ؟
غادة وهي تعطيهم مجال يدخلون : هنا الفوضى كلها مستحية من حوستها !
كانت غرفة الكــــــوي وجنبها حمام مستقل للغساله والنشاف وأجهـزة النظافة بشكل عام ! , ميهاف : ههههههه ماعليك هالغرفة بكل بيت
غادة تفشلت لان توها مغسله وناشره الملابس .. سكرت الباب مباشرة : خل منكم بس ...
اسماء طمرت : ايه خل منا مشينا للعرين بسسس
غادة هزت راسها وهي تلحقها .. فتحت غرفة النوم بتصميــــــمها الأنيق الفكتوري , سجى انقهرت وهي تشوف التفاصيل الصغيره .. مثل روبها وروبه معلقه على الشماعة ... وعـطوره جمب عطــورها ...وتحفه بحرفها وحرفه على رف ... والرائحة الرجوليه الكاسية المكــــان ... قطع سرحانها سوالف غادة وهي تتمشى بالغرفة : طبعا غرفة النوم هي اكثر مكـان معقدني بحياتي
ميهاف : ليـــــــــــه ؟
غادة : لأن طال عمـره مايتحمل ولا ذرة حوسة هنا .. يعني لو بس يحصل انه فيه عزيمة وأطلع الستريت اصلح شعري وانساه فوق الطاوله ما أرجعه داخل الدرج راح يكتبلي دستـور عن الترتيب والتنظيم !
اسمـاء : اعوذ بالله اعرفه موسوس ... مره دخل غرفتي بالغلط تقولين شوي ويرجع عيشته من القرف !
ميهاف كبست عيونها : وانا احسب بدر مرتب بزيادة ... ياحليله طلع اجودي
غادة : اجودي ونص ... تخيلي مره منسدحة خلاص بنام تعبانه ! قومني اكنس وامسح الأثاث لأنه حس بنسمة غبار
ميهاف : هههههههههههههههههه جعل مانيب مكانك ! والله ما أقوم لأكبر الوسادة
سجى ندمت انها طلبت ان غادة تعزمهم .. توقعت تكتشف قد ايش حياتهم مشتته لكن اللي جالس يصير العكس .... تفاصيل كثيرة تدل على الحب بينهم ... طاحت عيونها على اصيص اللافندر ...مع كرت مكتوب عليه ti amo .. نطقت باستنكار : تي أمو ؟
غادة انتبهت لها وسرحنها بالاصيص .. طالعت بعيونها وهي تنطق بتحدي : ايه ... كلمة اسبانية ابحثي عن معناها
ميهاف بروقـــان : معناها أحبك
سجى انكتمت من هالطاري :...............................
ميهاف : يـــــــــــــاعيني ياحركات ... فيه كمان بالإيطاليه يقولوا يالوبلوتوبيا
غادة : صعـــــــبه ! بس بكتبها خل اهايط عليه حبه
غادة ابتسمت : المهم تعالي اوريك الفستان والله بجد حايره فيه راح تنقذيني
فتحت غادة الباب داخل غرفة النوم اللي ينفتح لخزانه بحجم متوسط .. جدار خزانتها والجدار قدامه خزانته .... تو بتفتح الدولاب انتبهت لجوالها يدق , ابتسمت : بالإذن دقيقة خذوا راحتكم
ميهاف رفعت حواجبها : روحي روحي لايفوتك صوته
طلعت غادة للصالة وهي تجلس على يد الصوفيه وترد بروقان : هلا بدنيتي
فراس : هـــلا ... انا طلعت من الدوام متوجه للبيت , فيه شي ناقص اجيبه معي ؟
غادة بحب : ماناقصني غيرك
فراس : آجل ادعي ان الزحمة الملـعونة تنفك عشان أوصلك قبل اكفر في غشامة هالديره
غادة : هههههههههههه اسطــوانة كل ظهريه ..
فراس : جـــوا ضيوف الغداء ؟
غادة : ايوه حتى اسوم جت
فراس : يله انا مسافة الطريق
غادة : حبـــــــي .. اذا جيت انتبه تصعد ترا البنات عندي فوق
فراس باستنكار : بنات مين ؟ عندك وين ؟
غادة : ميهاف وسجى واسماء ... وعندي في بيتي
فراس بضيق : ضاق عليكم البيت بكبره عشان تصعدون ؟!!
غادة كبست عيونها : مافيها شي بخاطرهم يشوفون المكان فقلت اعزمهم
فراس : وش بيشوفون ؟ المكان الوحيد اللي ممكن يشوفونه الصالة والمجلس والباقي خصوصيات !
غادة حست انها تورطت .. : كيف خصوصيات ؟
فراس : يعـــني ممنوع يدخلونه يازوجة يافاهمة !
غادة عضت لسانها وهي تنطق بقمطة : مـــادريت
فراس باستنكار : كيف يعني مادريتي ..؟ ( نطق باستدراك ! ) لايكون دخلتيهم ؟!!
غادة وعيونها بحلقت فوق وبلعت ريقها : .... آآآآآ ... يمكــــن
فراس : غــــــــــــــــــادة !
غادة بتبرير : شاسوي والله هم احرجوني وبعدين ماحسيت فيها شي فقلت عادي و بغيت اطلب مـ......
قاطعها : بـــــــس بس مليون عذر وكلها بليها واشربي مويتها !!!
غادة وهي تحاول تمتص غضبه : حــــــــاضر
سكرت عيـــونها بقمطة والسماعه تتسكر ... زفرت وهي توقف وتدخل الغرفة عـندهم وين ماكانوا منسجمين يتفرجون على الفستان ويقترحون بين بعض تنسيقات .. نطقت : بنات يله الغداء تقريبا جاهز تعالوا ننتظره بالصالة
ميهاف : لا حبيبتي خل ننزل نتغدا تحت اريح .. شفنا بيتك وخلاص ! وبعدين فراس اكيد يبي يصعد عقب ماله داعي يحصلنا بوجهه
سجى اللي ضاقت من وجـودها هنا : ايه انا عموما بنزل بكل الحالتين
غادة ارتاحت انها جت منهـم : خلاص اجل على راحتكم خل ننـــزل
نـــــزلوا لتحت ..... وسجى من فرط ضيقتها دقت على السواق يجيها مباشرة عقب الغداء ....اسماء وميهاف جلســـوا بالصالة مع بدر وأم فراس ... ميهاف كانت عاقدة حواجبها وهي تتابع اسماء وبدر المتحمـــسين مع مباراه .......
بـــــــــدر زفر لما انتهت المباراه : مباراه خايسه .. ضاع وقتي بس
ميهاف : من فاز اجل ؟
بدر ابتسم لها : أنتي حياتي
ميهاف رفعت حواجبها : لا بجــــــــــد
بدر وهو يطالعها وينطق بحالميه : جد الجد ..
ميهاف عضت ع شفاتها وهي تنتبه لام فراس تطالعهم اشرت له بهمس : بس لاتطالعني كذا ..
بدر تنهــد : مو ذنبي .. قمر جالس قبالي
نقزت ميهاف وقمط بدر من الصرخة المفاجئة : اســــــــــــــــــــــــــكتوا !!!
التفتوا كلهم لأسماء اللي صرخت .. بدر : قل اعوذ برب الفلق
ميهاف باستكمال : من شر ماخلق ! خير ياطير ..؟!
اسماء : الرومـــــــــــــــــــنسيات ممنوعة !! دامني معصبه لحد يجلس يتغازل قدامي
بدر : نشبتي لي قبل تتزوجين ما أغازل وقلت زين عزابيه وتعبانه مشاعرها ! ذحين وش بعد ؟
اسماء : كيــــــــــــفي .. عزابية متزوجة مطلقه ارملة في كل الحالات لحد يغازل قدامي !!! رح لغرفتك والحسها لو تبي
ميهاف بانحراج : اسمـــــــــــــــــــــــاء !!
بدر وهو يطالع اسماء : يسلملي اقتراحك الرايق بس خلنا فيك اللحين ... شعندك منفسه ومبرطمة ؟
اسماء بكئابه : مافيني شي ابي انام بس
بدر : أقـــول ترا مو ع كيفك تنامين كل ما خزتك شوكه ! النوم مايمسح المشكلة هذي خرافات كنسليها
اسماء : وفيني بعد اني اكرهكم يالرجاجيل
بدر بمداراه : شفيك علينا ..؟ وش مب عاجبك فينا ونعدله
اسماء بقهر : انك رجال هذا لحاله عيب خلقي
ام فراس قبصت فخذها : استغفري ربك ياقليلة الحلا
بدر طالع امه : الظاهر ان خبلة بيتنا لحقت تتشاد بالشعر مع نسيبنا الكريم
ام فراس : وصلت خير ..
اسماء بقهر : لا تجيبون طاريه قدامي رجاء ترا بقوم وبخلي الجلسة لكم
بدر وهو يحاوط كتوفها : وليش حبيبتي شفيك ؟ شمزعلك فيه ؟!
اسماء : اقولك عشان تنصحني يعني ؟!! اكره النصايح ..فخلك بحالك بس
بدر : والله ما أنصحك بحرف .. بس فضفضي ارتاحي
اسماء بمــــزاج مكهرب : يخي انا مابي افضفض ولا أبي اشكي .. كل الموضوع اني مابي اشوفك تغازلها وبس !! صعب لهالدرجة ؟!
بدر تنهد : والله هو صعب بس لعيونك ابشري . . (طالع ميهاف ) ميهاف وش هاللبس كأنه بجامه !
ميهاف التفتت لاسماء : مبسوطة حبيبتي ؟ سببتي مشاكل زوجية !
اسماء : ايه ارتحت شوي باقي دموعكم عشان اموت بسلام
ام فراس : الله يشفيك بس
بدر : لا عاد جد ميهاف كأن هذي بجامتك امس صدق ..؟
ميهاف : شعرفني انا راح نتغدى هنا على بالي انه مشوار عبايه لشركة ابوي وبنرجع
ام فراس : اقول بديران ! اكشخ بسيارتك بساعتك باللي تبي .. بس بنيتي لو تجيني بقميصها ولو ماتبي شعرها كيفها مالك دخل ! ( التفتت لاسماء ) وانتي ياخرابة البيوت اجلسي زي العالم ولا انقلعي
اسماء بقهر : اجلسي زي العالم ؟ وانا جالسة زي الفضائيين لاسمح الله ؟
ام فراس ارمقت اسماء بنظرة تركتها تنسحب ... وقفت وهي تتحلطم : خلاص قـــمت انبسطوا .. ( ارمقت جوالها بنظرات حادة ) ماعنده نيه يدق يعني ...
في غرفة الضيوف كانت سجى وغادة لحالهم ... غادة كانت جالسة رجل على رجل وتطالع سجى اللي جالسه وعيونها مركزتها على نقطة بالارض ونظراتها ماتطمن .. وكل فترة تسرق نظره لغادة ... : ..............
غادة زفرت : عنـدك حاجه تبين تقولينها قوليها دامك تقدرين
سجى طالعتها بنص عين : من قــال ؟
غادة : انا اقول ... خذي فرصتك وقولي ترا يمكن تفقدين فرصتك للأبد في انك تقولينه
سجى بقهر : ايش قصدك من كلامك اخر مره بالعيد ؟!! تكذبين علي ..؟ تقولي ضاربك ويكرهك ومدري ايش .. ولا الظاهر الكذب هو اللي قلتيه لما كنا فوق !
غادة : انتي ماتستحين على وجهك ؟ تدخلاتك في حياتي الخاصه صارت وقحه وبزيادة بعد
سجى : مو قلتي اقول اللي بخاطري ؟ يله قلت لك .. ابي اعرف وش القرار اللي اتخذتيه عشان يتغير كلامك هذا كله
غادة طالعتها بنص عين : ما اتخذت أي قرار ... القرار بنفسه هو اللي اختارني !
سجى اكتفت انها تبحلق فيها بقهر : ......................
غادة كملت : يعني حركات انك تروحين له الشركة وكل هالخرابيط ياليت تبطلينها ... لأن مالك امل ! فهمتي ؟
سجى سكتت وتحس اعصابها تعبت من هالزياره .... حقدها تزايد وهي تنتبه لنظرات الثقة بعيون غادة : .....................
غادة ابتسمت وهي تنتبه لميهاف دخلت : يله بنات فراس جـا بنتغدا اخيرا
غادة : وين اســـوم طيب ؟
ميهاف : مدري عنها جلست معنا بالصالة جابت العيد ثم صعدت .... شصاير فيها ؟
غادة تنهدت : زوجهـا عنده انتداب لجده وماراح ياخذها طبعا .. عشان كذا مزاجها مكهرب
ميهاف : اهــــــــــــــــــــــــــاا قولي كذا ( نطقت باسف ) ياقلبي يا اسوم بتنهار نفسيا
غادة : وهذا اللي صاير
ميهاف : بس ولـو تجي تتغدا معنا مايصير تجلس لحالها
غادة : انا اقول نتركها على راحتها احسن
ميهــاف تنهدت : قولـــتك
جلسوا البنات يتغــــدون ومعظم الحديث كان بيـن سجى وميهاف بخصوص المشروع وخطوات التقرير .. بينما غادة انشغلت بجوالها وسط كل هالحديث , ارسلت لأسماء : ماراح تنزلين تاكلين ؟ الغداء يفوتك لذيذ شوي عليه
جاها الرد : حسبي الله على بليسك ! رن جوالي تحمست على بالي هيثم يراضيني !! افففف
غادة ضحـــكت لا إرادي .... التفتوا لها البنات : شفيك ؟
غادة : ههههههههه ماعليكم مني كملوا كلامكم ( كملت مراسلتها )
غادة : دام كذا انا اراضيك عـــنه ... حبيبتي طفشانه ؟ اخذها معاي نزهه العصر ؟
جاها الرد بكلمه : خذيها
غادة : من عيوني بس انزلي اللحين تغدي معنا
سجى رن جوالها .. وقفت : يله هذا السواق , انا ماشيه تامرون شي ؟
ميهاف : سلامتك حبيبتي الله معك
سجى : يله سلام .. وميهاف طلبتك لاتنسين ترسلين لي النموذج راح آخذ فكرة بس لاني بجد مو فاهمة كيف
ميهاف : من عيوني حبيبتي ولو تبين برضو تقتبسين شغلات ما أمانع فداك
لبست سجى عبايتها وطلعت ... بينما نطقت غادة بحماس : وأنتي لاتقولين بترجعين بيتك ؟ اجلسي خل نتابع فلم سوا
ميهاف : لا والله غدو تسلمين بس راسي مره مصدع وشيفتي شيفه كرفت اليوم كرف الحمير .. ابي ارجع اتروش وانااااااااااااام
غادة : خســــاره والله
ميهاف : وبعدين فيلم ايش ؟ انتي شايفه الثور الثاير فوق بتعطينا وجه نسوي شي ؟
غادة : هههههههههههه ماعليك دواها عندي بس خل افضى لها
عــند اسماء فوق ... كانت جالسة على سريرها وجوالها قدامها ومحدقة فيه بقهر : ابفهم ليش رماني ومعد فكر يكلمني !! شنو يعني ماخذ موقف حضرته ؟! ( تنهدت بحسره ) يارب يكلمني .. يارب يكلمني .. افف شذاه على بالي تزوجت وانتهت ايام التذلل للجوال !!
كبست عيونها بدهشة لما تحققت امنيتها لأول مرة ودق ....... ردت مباشرة : الو !
هيثم : الو ........
اسماء عضت شفاتها دون تتكلم وهي منقهره بجد : .........................
هيثم تنهد : كيفك اللحين ؟ احسن ؟!
اسماء باندفاع : على اساس يهمك اللحين عشان تسأل !!!!
هيثم : خلاص اوكي مايهمني .....دام كذا مع السلامة
كبست عيونها وهي تنتبه للسماعة تسكرت .... انا شسويت ؟!!!!! لاااااا ..... ( ضربت راسها بالجدار ) اففف يارب يكلمني مرة ثانية ...
بعد يأس قامت وهـــي تنزل مع الدرج . . ماحصلت غير فراس جالس على الكنب والخدامه ترتب الغداء نطقت بكئابه : تغديتوا ؟
فراس التفت لها : انتي هنا ؟
اسماء وهي تجلس دون نفس : لا هناك
فراس : معناها اذلفي هناك
طــلعت غادة من غرفة الضيوف وهي شايله الصينية .. استوقفتها ام فراس : غادة من هذا صحنه اللي ما لمس فيه شي ؟!!
غادة بانحراج : صحني
ام فراس : ماكليتي شي !! ليش ما أعجبك الأكل ؟
غادة : لا والله خالتي بس افطرت متأخر فما أشتهيت اكل
جاهم الصوت : اتركيها يمه .. مالها نفس تاكل ولو السالفة مطعـم كان حصلتيها اول وحده بالسياره هي والبهيمة الثانية اللي تو تفزع تسأل عن الغداء
غادة طالعت فراس : باكله عصـــر طيب !
اسماء : لا أكون انا البهيمة الثانية ؟
فراس دون نفس : لا بقرة الجيران قصدي ( طفى التلفزيون وهو يوقف ) بروح انام واللي بأسمع حسه طالع لأقلب نهاره ليل
اسماء حركت فمها دون صوت تتهزا به وهي تستلقي على الكنبه دون نفس ..... غادة جلست جمب اسوم : هاه اسوم عصر نطلع اكيد عشان اعطي فراس خبر ؟
اسماء ومودها قلب عقب المكالمه اللي ضيعتها : لا مابي مالي خلق
غادة بإحباط : ليـــــــــــــــــــــه ياشينك !
اسماء : غادة والله مافيني اطلع ولا أسوي شي ... اتركيني بحالي واللي يعافيك
غادة زفرت بضيق : براحتك اجل
صعـدت وتركتها ... دخلت بيتها وهي تحافظ على هدوئها احتياط لو كـان نام , لكن سمعت صوت الشاور بالحمام تنهدت براحه وهي تجلس بالصالة وتدق على ابتسام جاها الرد : بدري تدقين ياشيخه ؟! من صبح وانا معطيتك كول مي !
غادة : شاسوي صحيت يادوبي نزلت مع خالتي صلحنا الغداء والغداء اليوم كله ضيوف .... ولخبطة , عاد لسى اللحين فضيت
ابتسام : ياكثر شغلك تكفين ...المهم اسمعيني ! تجين اليوم ؟
غادة وهي تشغل بالريموت التلفزيون على قناة عرض الازيار وتنحني تسحب مجلة وتمد رجولها : لاا والله مقدر جالسه ارتب والبيت محيوس ..
فراس هز راسه وهو يطالعها تتصفح بالمجله .. وتستكمل اعذارها : وبعدين الغسيل متراكم ابي اغسله لاخلصت الشغل بيدي يعني مره مشغوله اليوم
ابتسام : كاثره اعذارك انتي ملاحظة ؟
غادة تنهدت : المسؤولية شاسوي بعد ؟!
ابتسام باستسلام : خلاص مايخالف . . بكرة يمدي ؟ ولا أقولك بكرة صح نايف بيسافر مستحيل !
غادة : نايف بيسافر بكرة وتبغين اجيك اليوم ؟ ماعندك مخططات سهره شي ؟
ابتسام : لا ماعندي إلا وحام مقرفني في عيشتي ! وبعدين اسوي له سهره ليه ؟ عشان الغوريلا والفيل أهم مني ؟
غادة : والله يا ابتسام مدري كيف رضيتي !! من جدك انتي ؟
ابتسام : شنو كيف رضيتي ؟! ع كيفي هو ! يابنت الحلال بكيفه .... إلا انتي وينك يوم زيارة وداد ! منتي صاحيه معد تطلعين كلش
غادة : مين قال ؟ جيت والله بس متأخر
ابتسام : يمكن .. انا طلعت بدري فعلا
غادة : يب جيت وشفت بنوتتها ما شاء الله تبارك الرحمن
ابتسام : اقول غادة انا بسكر اللحين ... روحي كملي شغلك وانا بكلمك بعدين
غادة : تمام روحي انتبهي على نفسك .. وبوسي لي رنيم وترا احتمال اوصي السايق يجيبها لي اليوم
ابتسام : سايق بالنخل ! اذا تبينها عطيني خبر بدري اوصيها مع نايف
غادة ابتسمت برضى : اوكيه حبيبتي يله
سكرت غادة السماعة وهي تسمع تعليق : مادريت إن المجلات مكنسه والتلفزيون غساله ؟
غادة وقفت اللقمة بنص مشوارها وهي تنتبه له .. كبست عيونها : نعيما حبيبي... مانمت ؟
فراس وهو يتقدم ناحيتها وشعره مبلول وبوتوم أسود قماش وستره بيضاء دون تفاصيل مميزه ... : كنت حنام بس استوقفتني صواريخ بكميــات هائله !
غادة بانحراج : ههههههههههههه شاسوي مالي مزاج اطلع اليوم واعرفها ماراح تعذرني اذا قلت اني مالي مزاج
فراس سحب المجله من يدها والبسكوت وطفى التلفزيون : معليش حصل خير .. بس أقل شي خليك قد كلمتك وقومي شمري كمك وغسلي ونظفي
غادة طاحت كتوفها ونطقت بتذمر : فراااااااااااس ....
فراس : خير ؟! وبعدين اكيد البيت يبي له ترتيب ماقصرتي انتي ومجلس البزع اليوم انا متأكد * البزع يعني الشقيات
غادة ابتسمت : ايه بالنسبــــه لهن ترا والله احرجتني سجى ولا ماكان بنيتي اعزمهم
فراس : حصــل خير ... انا بنام وأنتي خلصي شغلك وخلي منك الملط * الملط يعني الكذب
غادة وهي تلعب باصبعها في شعرها : إلا ماقلت لي ؟ شخبار زيارة ســـــــــجى اليوم ؟ خلصت شغلها ؟
فراس رفع كتوفه : شعرفني ماشفتها .. وصيت السكرتير وتفاهم معها على كلش ! ( التفت لها ) اطربيني وين وصل خيـالك ؟
غادة ارمشت عيـونها : نفس اللي قلت
فراس رفع حواجبه : أيـــه واضح من سؤالك
غادة : جد .. عندي ثقة ان عيونك لي وماحتشوف غيري
فراس ابتسم : وهذا اللي صاير .. هالعيون عمياء مع غيرك
غادة ارسلت له بوسه بالهواء : جعلني فـــدوه لهالإبتسامة اللي تجيب شلل لعقلي
فراس : بتنكسر رجلك يعني لو قربتي ؟ وش شغل ال long distance هذا ؟!
غادة ضحـكت بنعومه : ههههههههه مستعد تبيع قيلولتك يعني ؟ مو تجيني مغرب تقول راسي ومانمت وتعبان وصداع ومدري ايش
فراس باستدراك : اجل تصبحين على خير
ابتسمت غادة وهي تشوفه يدخل ويوقف قبل ويلتفت لها وياشر للبيت وبنظرات تأكيد : لا تنسين شغلك .. تعرفين اني مخاوي فاهم وش بيصير حتى لو نمت
غادة رفعت عيونها بصبر : بسم الله علي .. خلاص ابشر
***
صبــــــاح اليوم التالي ... كانت اسماء وغادة بالمطبخ بعد اصرار من غادة على اسماء انها تنزل تفطر معها , طالعتها اسماء بقهر : صدق انه رايقه!
غادة وهي تحرك البيض : صدق انك جحوده ترا انا تاركه خطة كامله لأني اطلع افطر مع رجلي وجالسه مقابله وجهك يالقردة !
اسماء بكئابه : لا يفوتك دقي عليه يرجع !!
غادة وهي تتمشى بالمطبخ بروقان : ولا يهمك بعوض هالرومانسية فيك .. تعالي اطبخي معي وراح امسكك من ورا .. صدقيني اطلق من هيثم بمليون مره
اسماء بنص عين : جربي تسوينها والله لأطعنك بالسكين اللي بيدي
غادة تنهدت بحب : ياعيني على الرومانسية
ام فراس دخلت عليهن المطبخ وهي مستغربه : صاحيات ؟ مانمتن ؟
اسماء بمزاجها الكئيب : لا يمه حنا نايمين بس نكلمك من احلامنا
اسماء صرخت على اثر الملعقة اللي ضربت راسها بقوة .. التفتت لغادة : ياحيـــــــــــــــــــــوانة !!
غادة وهي تسكب البيض بالصحون : جب ولا كلمة !! كلش ولا خالتي ( باست راس ام فراس ) صباح النور والسرور .. زين لحقتي افطر معك ازين من وجه اسوم جابلي خنقة
ام فراس جلست : الله يهديها اسماء هذي راح تكسر حياتها بيدينها
غادة وهي تحط الخبز وتجلس : إلا اقول خالتي عزمتي خلاص على بكرة ؟
اسماء دون نفس : وش بكرة بعد ؟
غادة : عزيمة ميهاف .. خالتي ناوية تعزمها بما انها رجعت اخيرا بيتها
ام فراس تنهدت : ودي والله بس خايفة هند ماتقدر تجي عشان بنتها توها والده
غادة : اصري عليها ووداد تجلس بالبيت مالها شر .. ولا تجلس عندها سجى عشان ننبسط اكثر !
اسماء : لا لا خلها تجي بخاطري احط حرتي باحد
ام فراس : بنـــــــــــــات !
غادة : ههههههههههه شفيك خالتي والله نمزح
ام فراس وهي تطالع اسمها : انتي تمزحين بس بعض الناس هنا متأكدة مايمزحون
اسماء كانت مشغوله بجــــوالها .... قررت تسوي بادرة حسنه وهي ترسل له " اذا مو مشغـول ممكن تعطيني خبر "
بعد خمس دقايق جاها الرد .." مستحيل اكون مشغول عنك انتي بالذات .. انا بطريقي لكم ربع ساعه واكون عندك "
اسماء كبست عيـونها بحماس وهي توقف مباشرة وتغسل يدها ... غادة وام فراس : خير ياطير ؟!
اسماء وهي تمضمض وتنطق على عجل : هيثم جاي !! بيجي بيجي بصعد اتجهز !!
ماعطتهم فرصة وهي تطلع وتركض لفوق ... طالعت غادة وام فراس بعض : انهبلت ؟ ؟
غادة : هههههههههه ياحليلها اسوم راح تموت ناقصة عمر اذا رابطة مزاجها بكل همسه يقولها
ام فراس هزت راسها : افطري افطري بس الله يعظم اجرنا اذا ناويه كل ماتهاوشت وياه تجي تسوي لنا زي امس
اسماء ركضت تطلع وتنـــزل وتطالع ساعتها .. 9 صباح , فتحت مباشرة وهي تنتظره على الموعد تماما دخل , نطقت مباشرة : وينــــك امس ؟!! مايحق لك تتركني انام عند اهلي وانت بتسافر بعد بكرة !! تمنيت اكتب على حجر اشتقت لك واضرب فيه عشان ماتفوت الوقت بهالطريقة !!
هيثم ابتسم : والوقت فاتنا بسبب مين ؟
اسماء مباشرة : بسببــــــــــي ! بس برضو ماسمعت كلامي اللي قلته امس .. كان يكفيك تاخذ الجواب من قلبي
هيثم تنهد : فاهم انك ماقلتي كلامك امس إلا من كسر في قلبك .. بس انا برضو انقهرت لما شفتك تتكلمين بهالطريقة !
اسماء بقهر : لما قلت لي انك بتنتدب حسيت انك تغيرت .. حسيت اني ماعدت اسماء اللي تتمنى تكون معها .. ولا ليش تروح ؟ شسويت لك عشان تروح ؟ انا بس حبيتك .. دون مقابل حبيتك .. بأي حق تطلعني من طوري بهالشكل ؟ من انت .. من سمح لك ؟
هيثم باحباط : للحين اسماء ... امس كله جلستي هنا ماكفاك تفكرين ؟
اسماء عضت شفاتها بغبنة : إمبلا ..
هيثم رفع حواجبه : آجل ؟
اسماء تنهدت بضيق : آجل الله يستر عليك .... بس الله يعينك راح اطلع العوض من عيونك ..
هيثم ابتسم : عيـــوني لك ..
اسماء طالعته بلوم : واضح .. ولا كيف قوى قلبك تنام امس وانا هنا ؟
هيثم وهو يمسك كتفها ويمسح على راسها :تخيلتك معي .. مسحت على شعرك وبست يدك وعيونك , وكنتي بسابع نومه
اسماء ابتسمت بزعل : نصاب ..
هيثم رفع كتوفه : ماني نصاب ... الليلة إن شاء الله
اسماء سندت راسها على صدره : احبـــك يادب
هيثم : ايوه حوسي الدنيا وقوميها ولا تقعدينها وقولي أحبك !
اسماء ضربت صدره بقهــــر : هشششششششش مايحق لك تعاتب ! تو رضيت ترا
هيثم مسك كتوفها وابعدها واشر لها : ممكن نروح بيتنا اللحين ؟
اسماء ابتسمت : ممكن
هيثم : يله اجل الإجازه للحين مفتوحة
اسماء : يله بروح البس عبايتي وجايتك مباشرة !
هيثم : انتظرك برا اجل
دخــلت اسماء لداخل وهي تركض بحماس ... انتبهت لام فراس وغادة بالصالة : برجـــــــــــع لبيتي يمه !!
: اخيرا
التفتت لصوت ياسمين .. زمجرت فيها : انطقــــــــــــي ياورعة !
ام فراس اشرت لياسمين تسكت ونطقت : على البركة روحي واعقلي واثقلي وخلي منك الهبال
اسماء اللي لبست عبايتها بوقت قياسي : ابشـــــــــــــري
مجرد ماطلعت تنهدت ام فراس : زين اللي جت وراحت وفراس مادرا انها حردانه !
غادة : ربك ستر
***
في مـــــكتب فراس .. كان حاس بلخبطة هاليومين , افتتاح شركة بدر اخذ جهده ووقته ... لكن اللحين مع انتهاء الافتتاح لازم يرجع يرتب اموره , ضغط ع رقم معين وهو ينطق مباشرة فور الرد : مسعود تعـال مكتبي اللحين !
دخل مسعـود بعد فترة : سم طـال عمرك
فراس ونظراته مركزة مع مجموعة أوراق .. نطق دون يرفع عيونه : اجلس
مسعود جلس : تفضـــل
فراس وهو يجلس ورقه معينه وهو يزفر : الدنيا فوضى ! !
مسعود : ايه طال عمرك ... الفترة اللي راحت استغرقنا تركيزنا مع بدر وبعض الأمور هنا تلخبطت
فراس بعدم رضا : معليش اليوم انا وياك هنا لحد ماتترتب هالفوضى .. اولا نـزل عقوبات لكل اللي فوتوا دوامهم الاربعاء الماضي
مسعود : نـــزلتها من وقتها
فراس : كويس ... والسفرات اللي قلت لك كنسلها ارجع شفها ورتب لي جدولي
مسعود : متى ؟
فراس : من عقب يومين معليش
مسعود : فيه الكـــويت محتاجيـ...
قاطعه فراس : لا ! الكويت لا ! شف شي ثاني ... ( رما لعنده ملف ) وهذا رجعه مكانه خلصت منه
مسعود : حاضر
فراس : وهات لي كل سجـلات التبرعات من نوفمبر الماضي
مسعود : حــاضر
فراس اثناء حديثه فتح درج .. عقد حواجبه وهو يطلع الظرف , رفعه وهو يسال : وش هذا ؟
مسعود : ايه هذا الظرف اللي وصلك من المستشفى وقت غيابك وقلت ادخله
فراس عض شفاته : الله يلعن النســـوه !! ( كشر بضيق وهو يفـكه ويطلعه ..... دارت عيونه على السطور وهو تنهد لما استوعب ان الموضوع بيمر بسلام )
مسعود ابتسم : تصدق بدر تغير كثير ما شاء الله
فراس : الله يتم له
مسعود : حتى صار يهتم بامورك اكثر .. آخر مره كان يسألني عن اذا كنت معاك لما توفى الوالد الله يرحمه وكيف مسكت الشركة !
فراس فتح عيونه بوسعها ... نطق بصدمة : كيف ؟! !! متى سالك هالسؤال ؟
مسعود وهو انصدم من ردة فعله : قبل يومين يمكن
فراس عقد حواجبه ... قبل يومين يوم غاب .. ولما مسكته الحمى الغريبه .. : ............ ( التفت لمسعود بحذر ) مسعود !
مسعود بريبة : هلا
فراس : بدر لا سمح الله الفترة اللي راحت دخـــــــــل مكتبي ؟!!!!
مسعود وهو يحاول يتذكر ..... نطق بخوف : ايه مره بس ..
فراس فتح عيونه : وكان لحاله فيه ؟!!!
مسعود : أيـ..ـه
فراس انشدت اعصابه وهو ينتبه للظرف هنا ... فتحه ؟!! شافه ؟!!! نطق بعصبية وهو يوقف ويضرب على الطاوله : وانا من متى اسمح لأحد يدخل مكتبي ؟!!! باي حق تسمح له يدخل !! مكتبك وانا ماني عارف !! شرايك حضرتك تجي تجلس هالكرسي بدالي وتطلق اوامر بعد !
مسعود ارتبك : فاهم انه مكتبك وحشى اكون بدالك .. بس قلت بدر ومن الأهل وخفت تعصب لو ماسمحت له يدخل
فراس : الله لا يـــــــــــــوفقك انت وتفكيرك !! انقلع برا لا أكفر فيك
غادر مسعـــود مباشرة بينما جلس فراس وهو يحس بصداع يمسكــــه .... شافه ؟! , كشر بضيق مافيه امل يكون ماشافه !! ولا كيف صار له كل هذا .. مافيه صبر على تفكيره مسك جواله وهو يدق مباشرة على بدر : هلا والله فراس .. سم
فراس وهو كابت اعصابه : انت وين ؟
بدر : بمكتبي ... ليه ؟
فراس : تقدر تجي لعندي .. ولا أقولك ؟! خلك مكانك انا جايك !
بدر : لا لا .. انا جايك
فراس : اعجل طيب .
سكر بدر السماعة وهو يلتفت لربعه المجتمعين عنده بمكتبه : قومو ياجحيش انقلعوا بيوتكم ! فراس كان بيجي لو هو شايف جلسة الديوانية هذي كان زرطني وياكم
: يعننــــــــــــي ! لايق لك موظف وخايف من المدير بعد ... مابغيت اعرفك !
: ههههههههههههه يخي شنسوي بك ماعاد تنشاف بالاستراحة قلنا نقط وجهنا !
بدر وهو يمسك واحد منهم من ظهره ويوقفه معه : يله يله خلصنا استضافة .. تقلعوا ذحين لاتسوون لي سالفة
: مالت عليك مالك خاتمة
طـــردهم بدر وبعدها طــلع , دخل لعند مكتب فراس : السلام عليكم !
فراس : بدري ؟ جاي من بيتك اجل !
بدر وهو يجلس : كان عندي شغل بيدي خلصته وجيت
فراس : ايه الشغل هو الخمس سيارات اللي تو ذلفت ؟!
بدر ابتسم : شاسوي لهم فترة ماشافوني قالوا يجون هنا ويباركون الوظيفة مره وحده
فراس وهو يشبك يدينه ببعض : معليش ... اجلس
بدر جلس : وش هالإستدعاء .... عندك شي ملاحظة على شغلي ؟
فراس سأل مباشرة : انت داخل مكتبي هالفترة ؟!
بدر شد على قبضته وهو فهـم مرمى فراس ... حط عيـنه بعينه وهو ينطق بهدوء : ايه شفت الملف ....
فراس فــتح عيونه بوسعـها وهو يشد على قبضته .. ومهما استجدى حروفه يتكلم .. كان انلجم .. خصوصا مع نظرات بدر الهاديه : .........
بدر تنهد وهو يسرح بعيونه بالارض : شفت الملف .. وماعرفت اسألك عن شي و ...
قاطعه فراس اللي نطق بانفعال : مـــــــــو صدق !! ( باصرار اكبر ) اللي قريته بالملف مب صدق !!
بدر تنهد : للحين مصر تعيش لحالك مع هالخبر ....
فراس شد على شفاته وهو ينطق بقهر : ليش ماقلت لي اول ماشفته ؟!!!
بدر بهدوء : مايهم فراس ... قريته .. وعارف انه صدق ... وهجرني النوم وانا افكر .. بس هذا مو المهم , تفكيري دايم يقولي انك ماتستاهل تعيش وحيد بهالخبر ... حنا اهلك موجودين ليش ماتركتنا نشيل معك ؟
فراس شد على قبضته وهو يلعن نفسه داخله : ...........................
بينما بدر كان الهدوء مسيطر عليه .. : عرفت اللحين ليش رجعت لنا بهالشكل .. كنت دايم احسك تخاف من انك تترك لحالك عشان كذا ماكنت تطول معنا .. وكل ربعـك تركتهم .. وكأنك تبي تتركهم قبل يتركونك .. بس لو قلت لنا يمكن قدرت تواجه هالخوف .. وقدرت تودعه
فراس .. كان الضغط آخذ منه طاقته , كانت نظراته متعلقه ببدر .............
التفت بدر وهو يسأل بهدوء : اقدر اسألك كيف صار كذا ؟
فراس سند ظهره على الكرسي وهو ينطق بخمـول تعيس : شسالفتكم ... وكأنكم اجتمعتوا واتفقتوا على نكـــــــدي ..
بدر : من صيغة الجمع هنا ؟
فراس سكت : ................................
بدر : عارف انك غريب ؟ تو هالفترة ماتركت اسلوب ماكسرتني فيه عشان اصير رجال على قولتك ! واللحين يوم اني جايك وبشيل معك .. تعاملني كأني بزر وتقول مب صدق وبالأخير تحقر ...
فراس بين اسنانه : هذا شي وهذا شي .....
بدر : بالنسبة لي شايف انها سوا ...وبالعكس هذا أهم !
فراس طالعه بإستنكار : وانت كيف ردة فعلك كذا ؟ اشوف ماعندك مشكله مع الخبر !
بدر تنهد : وش تبي مني اجل ... انهار وابكي واموت ! مو عشان كذا انت ماقلت لي ؟ ع بالك اني ضعيف وما أتحمل ... ( طالعه ) بس انت غلطان .. انا اقدر اسندك .. وأقدر اسمعك .. وبالعكس انا ما أتعلق بالماضي كثرك
فراس ابتسم بسخرية : سهل عليك تقول .....
بدر : انا صادق ....
فراس بضيق : وش الفايدة تعرف اللحين ..؟ الموضوع تسكر وخلاص
بدر بإنفعال : وكيــــــــــف تسكر ؟
فراس صرخ فيه بقهر : مــــــــــــالك علاقة تسكر وبس !!
بدر وقف بقهر : مايحق لك .. مثل ماهو ابوك ابوي ! ومن حقي اعرف والله من حقي
فراس وقف وهو ينطق بإنفعال : اسمع يإ اما انك تسمع وش صار وتختار تعيش ضحية لهالوجع لآخر عمرك !! او انك ترمي السالفة اللحين وتنساها وخلصــــــــــنا !!
بدر بقهر : طبيعي بالنسبة لي أختار اني انسى السالفة ؟! هذا لو ماكان هالوجع على قولتك هو اللي بنى شخصيتك العجيبة !
فراس بقهر : حتى لو كان صدق ..... أنا ما انلطست تحت هالضغوط !
بدر : واضــــــــــح ! على سبيل المثال الرصاصة اللي تو اكلتها قبل كم شهر .. مو من ورى هالسالفة ؟!
فراس شد على قبضته : لا تبدا تنبش !! انا قفلت السالفة واللي يعافيك اتركها مقفله .... يكفيني ماوصل لحد اللحين
بدر تنهــد وهو ينطق بضيق : يعني ماحتقولي ؟
فراس انتبه للهم والهالات السوداء بعيون بدر .... حس بضيقة موقفه مايحسد عليه , رجع يجلس وهو ينطق بكتمة : اجلس ....
جلس بدر وهو ينطق بهم : حسستني كفائتي معدومة .. لانك ماتقدر تقولي شي ...
فراس بتعب نفسي : مايتعلق الموضوع بكفائتك .... عموما اللي قريته بالتقرير الطبي هو اللي صار , والسبب كان عيال حرام هناك تسلطوا عليه ..
بدر بقهر عض ع شفاته : ليـــــــــــه طيب ؟!!! يتمونا وانا لسى صغار عشان وش ؟
فراس وعيونه سارحه بسطح المكتب : للأسف ماعرفت ... ابوي ماكان يتكلم , وانا ماكنت اسأل ....
بدر بغبنة : اكيد خلافات مادية ! راح وتركنا عشان هالفلوس جعلها بحريقه
فراس : هـد .... قلت لك لاتنفعل ,
بدر : وانت شســــــويت ؟!!!!!
فراس ابتسم ابتسامة سخرية وهو ينطق بمرارة : وقت قابلت هالصدمة .. تذكرت كلام ابوي لي زمان .. كان يقولي الطريقة الوحيدة لأنك تتصالح مع الظلم هو أنك تنسى اللي صار وتسامح .. كان دايم لاشكيت له يقولي سامحهم ..
بدر : يعني سامحتهم ؟!
هز فراس راسه : فهمت بعدين .. ان ابوي كان غلطان .. وماسامحت احد .. وكل اللي كان له اصبع طرف بهالموضوع مارحمته ..وحتى عقب هذا توقعت أنسى .. تمنيت اني احفظ ذكرياتي الحلوه مع أبوي والباقي ارميه ... بس كان مستحيل .. ماقدرت انسى شي ..وماقدرت اجلس حولكم .. كان عندي هموم تحرقني وانا حي وماقدرت اعطيكم غير هالهموم ..
بدر بكئابه : عارف اني كنت اتمنى طول عمري اني اكبر واصير زي ابوي ؟
ابتسم فراس وسط همه : انت على الطريق الصح اجل ...
بدر : وليش ماقلت لي من زمان ؟ بدل ماتتركني عايش حسرة على قلبك بس !
فراس : لا حسرة ولا شي ... حسرتي الوحيدة راحت مع أبوي ...
بدر بقهر : وكيف تعايشت مع الخبر أول ماعرفتــه ؟
فراس : مع الوقت معد حسيت به .. موع شاني نسيته .. لا , ولا عشاني رضيت فيه .. عشاني تعودت ..
بدر عقد حواجبه : تعودت على ان ابوي ميت ؟
فراس شد على قبضته : تعودت على الوجع .. ماعاد يفرق معي
بدر : وعشت طول هالفترة محد يدري ؟
فراس تنهـد : ليته صدق .... لؤي كان يدري ..
بدر بقهر : لؤي يدري !!!!
فراس هز راسه : كنت محتاج اتكلم ولو شوي ... وكان هو يحب يسمعني .. ( كمل بضيق ) كان ..
بدر بغبنة : الوحيد اللي قلت له واعتبرته اخوك اكثر مني .. هو اللي خانك بالأخير ..
فراس باقتضاب : الله يستر عليه ..
بدر طاحت عيونه على صورة ابوه على المكتب وهو مبتسم بصورة عائليه لهم : عارف فراس ؟ ودي لساني انقص وطار من مكانه ولا قلت الكلام اللي قلته قبل فترة ..
فراس : ماحقولك لا .. ( ابتسم ) كنت خسيس والله
بدر : ههههههههههه ماقصرت على فكرة .. لاتعيش دور المظلوم
فراس : إلا والله قصرت .. لو امي مافزعت لك كانت عرفت شلون ما أقصر !!
بدر ابتسم وألحق الإبتسامة بزفرة : عارف احس اني راح انام الليلة ؟
فراس عقد حواجبه : عارف انكم غريبين !! يعني وش نوع الراحة اللي تكسبونها اذا عرفتوا عن اشياء اقل مايقال عنها سيئة !
بدر : لأن وقت نفهـــم وش صار للناس القريبه منها وقتها نرتاح لأنا شلنا نص همهـم .. ولأن نقدر نعذر تصرفاتهم ..
فراس : .........................
بدر : وبعدين احس كأني انتهيت من شي وأقدر ابدا بحياتي براحة .. بعض النهايات تكون بداية
وقف بدر وهو ينطق : يله انا استاذن عندي اجتماع بعد نص ساعه بروح اتجهز له ...
طلع بدر وسط نظرات فراس المحتاره .. زفر وهو ينطق : النهايه هي النهايه .. وين البداية بالموضوع ؟
زفر وهو ينطق بتذمر : بالأخير ماقدرت اخبي عنه للأبد كل ماحاولت اخبي الموضع اكثر .. انكشف اكثر ........... ( ابتسم بخمول ) والله وكبرت يابدر .. وش هالعقل فجأة ؟
***
مســــــاء هادي ومشوب برذاذ كئابة بالهواء ... كان واقف قدام سريرين صغيره .. انحنى لهـم وهو يبوس يدهم الصغيره : انتبهــوا لأمكم .. سامعين؟
وقف وهو يتنهـد بضيق ... إلحق التنهيدة بإبتسامة خفيفة : تقدرين تجين مرة دون تسبقك ريحتك ؟
ابتسام اللي كانت لسى بالممر : مغيـره عطري على فكرة
نايف التفت لها لما دخلت وهي مسنده يدها على بطنها : يضل .. اعرف مباشرة انك هنا
ابتسـام تنهدت وهي تنطق : مو كانك بتروح بدري شوي ؟
نايف وهو يتنحنح يعدل صوته : ايه فيه مشوار بروح له قبل اسافر السفرة الرسمية
ابتسام بضيق : عسى فلوس هالشغل تستاهل بس ؟
نايف وهو يمشي لعندها ويرخي يده على يدها اللي ببطنها : تعرفين اني ماعمري سألت عن راتب شي .. بالنسبه لي الفلوس ماتفرق إلا مع اللي يعبدها
ابتسام ابتسمت بكئابه : معناها أنت ملحد بزيادة شوي
نايف : صدقيني مو هذا اللي راح يوترني من هالسفرة .. انا ضايق اني تركك بس , امس كنت عند اهلي وكلامهم من جد خوفني
ابتسام شدت على يده : نصيحة نايف لا تشوف نفسك من عيون احد .. اللي انت تشوفه بعيونك صح سوه .. دام انت مقتنع لايهمك من قال وايش فكر .. والأهم لا تتشائم .. القلوب اللي تتشائم ماتحصل مجال تفكر بحلول
نايف ابتسم : طيب لاتطالعيني كذا .. محتاج عقلي عشان يوصلني للمطار
ابتسام غمضت عيونها : كويس كذا ؟
نايف : ايه كويس ( ضمــــها وهو يبوس راسها ) تعرفي ايش شايل همه برضو ؟
ابتسام : عيالك ؟
نايف : لا وين اشيل همهم وانتي معهم ! .. شايل هم من وين آخذ قوتي , وقت تكونين بين يدي اقوى بك احس محد يقدر علي .. وجودك معي يخليني اعايش اشياء ما كنت اتخيل اني ممكن اقدر اعايشها
رفعت عيــونها اللي لمعت بهم ... وهي تسمع كلامه : كل شي جنبك ذابل .. وماله قيمة .. وناقص .. ما أكتملت الا معك
نايف انتبه لدمـعه تنزل من وجهها .. ابتسم وهو يمسح دمعتها : هذي اللي طول الأسبوع تقولي روح مايهمني ؟!
ابتسام تلاحقت دموعها وهي تنطق بضيق : هرموناتي مأثرة فيني .. مو عشانك
نايف رفع حواجبه : يعني ماراح تشتاقين لي ؟
ابتسام وعيونها تنطق شي ثاني هزت راسها : حيل حيل ما راح اشتاق لك
نايف تنهد بحب : بعد انـا .. ( نطق بتأكيد ) كلمتي غادة ؟ تجي تجلس عندك بالشهور الأخيرة ؟
ابتسام : لسى بدري ... بكلمها بعدين ..
نايف : مو تنسين !! ولا راح اكلمها بنفسي !!
ابتسام بتأكيد : لا حكلمهـا ( طالعت الساعة ) تأخر الوقت ...
نايف بضيق : ايوه عارف ... ( انحنى يشيل شنطته ) انتبهي لنفسك وللعيـال .. وراح اتواصل معك على طول
ابتسام وهي تعقد ذراعها تحت صدرها : اوكيه انت بعد دير بالك على حالك ... ( ابتسمت ) أحبـــك
نايف : ماظلمك إلا هالحب .. اللي كتب واحد مثلي لك
ابتسام ضربت ذراعه بخفه : يا حيوان لاتقول كذا
نايف : صدقيني انك من أهم لبنات المجتمع الصالحه مدري كيف طحتي هالطيحة
ابتسام : هههههههههههه طحت وخلصت تو اللحين تفكر ؟!
نايف : معليش بعض الطيحات مو سيئة مره .... ( اشر لها ) يله ودعتك الله
ابتسام اشرت له لحد مانزل واختفى من عيونها ... عضت ع شفاتها وهي تتنهد بضيق ... وتحاول تقوي نفسها ...
***
الســــاعة 1 ونص ..... سكرت غادة أنوار المطبخ وهي تطالع الساعة , تنهدت وهي تنحني للطاولة وتمسك جوالها ... فتحت محادثتهم اليوم ظهر
غـادة : حبيبي وينك ماجيت على الغداء ؟
فراس : حتأخر اليوم لاتنتظروني
توقعت يتأخر بس حده مغرب .. اللحين الساعة 1 ونص , جلست تتمشى بالبيت تشغل نفسها وهي مو عارفه تجلس وهو لهالوقت ماجا .. بالأخير مسكت جوالها وهي تتصــل ... قطع الخط دون رد ! تنهدت بضيقة وهي تنــزل من لباب الشقة عند العتبه ... جلسة وهي تنتظر ... بالأخير غفت دون تحس ..... كبست عيونها لما سمعت صوت سيارة !! انتبهت لصوت مفتاح وقفت وهي تنتبه له يدخل ... فتح عيونه لما شافها : شتسوين هنا ؟
غادة بزعل : تاركني على جمر لهالحزة ؟!! ليش تأخرت !!!
فراس وغترته على كتفه وشكله مرهق ... رد بخمول : ماقلت لك اني راح اتاخر ؟
غادة باحباط : قلت .... بس ماتوقعت قصدك لهالحزه ..
فراس وهو يصعد عتبات الدرج : صارت شغلات واجد مدري مع وين .. ومالحقت اطلع إلا اللحين
غادة : شغلات ايش ؟
فراس وقف وهو يلتفت لها .. نطق بوجه جامد : راجعت ملف خالد الموسى وتناقشت مع عملاء المجلس بخصوص ميزانية هالشهر واحتماليات التنمية فيها !! ( رفع حواجبها ) يله وش فهمتي بالله ؟
غادة رفعت حاجبها : فهمت مالي دخل !
فراس جلس بخمول على الكنبه ... غادة تكتفت قدامه : مزاجك مره على طرف .. اجهـز لك البانيو ترتاح شوي ؟
فراس رفع حواجبه : لا .... اتركيني كذا بس
سدحح راسه على راس الكنبه وهو يغمض عيــونه ..... غادة ظلت ع وضعها متكتفه وتطالعه , نطق دون يفتح عيونه : ليش تطالعيني كذا ؟
غادة : جالسه احاول افهم وش صاير معك ..
فراس : ماتغير طبع الخـــز حقك هذا من يومك وانتي تفاتنين بعيونك ..
غادة : مالي غير دام وضحت لي انك ماتبي تتكلم !
فراس ابتسم بكسل وهو على نفس وضعه : حمدالله اجل على طبع الخز حقك
غادة تنهدت : بكــرة عزيمة ميهاف
فراس هز راسه وهو ينطق بهدوء : مشغـول اساسا ماني يمكم خذوا راحتكم
غادة حاست فمها وهي تحاول تسأل .. بالاخير نطقت : خلصت سجى زياراتها الغثيثة عندكم ؟
فراس ابتسم وهو يقول : مافيك حيلة انتي
غادة بقهر : خلصت ولا لا ؟!! ( شهقت لما انتبهت فجاه له يمسك يدها ويسحبها حتى جلست جمبه .. ارمشت عيونها وهي تطالعه ) شنو ..
فراس بنظراته المميزه : اقولك سـر ؟
غادة كبست عيونها : سر شنو ؟
فراس : زينك كله كوم .. وزينك وقت تغارين كوم ثاني ( رفع حواجبه ) شي كارثي مب طبيعي
غادة ابتسمت وهي تطوق رقبته بيدينها : لأن غيرتي عليك ممكن تجيب كارثة فوق راسك انت وياها .. مو بس زيارتها تجيب لي جنون .. حتى مجرد انها تطالعك تجنني
فـراس بخمـول : وإيش بعد ؟!
غادة : ولا تتأخر مرة ثانية على البيت .. حتى اللافندر اللي اهديتني ذبل وانت ماجيت
فراس ابتسم : شاسوي طيب ؟ لو مشتاق لك رجعت بدري .. بس ما اشتقت لك مره
غادة : عـــوافي لا تشتاق لي ... اهم شي مايكون صاير شي اليوم ضايقك !
فراس اختفت ابتسامه .. : ليش تقولين كذا ؟
غادة رفعت كتوفها : بس اقول .. عيونك ماطمنتني , وانا يهون علي الوجع يجي منك ولا يعيش داخلك
فراس تنهــد وهو يتقدم بجلسته حتى تلاشت يدها . : عارفه شي ..؟ هالدنيا غريبة
غادة عقدت حواجبها : ليه ؟
فراس بحيرة : كل ماكبرنا يتغير كلش حولنا ... الإنسان اللي كان اعز مخلوق بالنسبه لي قبل شهرين اللحين ما أكلمه .. والمخلوقة اللي كنت قبل شهرين افكر كيف اكسرها أو اذبحها اللحين اخاف عليها من هبوب الهواء .. صرت اخاف بعد شهرين وش ممكن يصير ؟
غادة ابتسمت بوسع : بعـد شهرين راح تحبني أكثر .. ويمكن تبلش تنحاش من شغلك للبيت لأنك اشتقت لزوجتك مره وتتخبى من الشغل عندها
التفت لها فراس وهو ينتبه للمعة عيـونها وهي تسترسل : وراح تجيب معك ورود التوليب للبيت بدل اللافندر لاني احبه اكثر !
فراس : ايوه لأنه شمحوط زيك ؟
غادة : ههههههههههههه يب ... وهممم.. بعد شهرين راح نفكر نغير اثاث البيت !
فراس وهو مستمع .. : وبعد سنة ؟
غادة ضحكت بحماس : ههههههههههههههههههه وش تتوقع ؟!
فراس : الله العالم .. انا اسألك لاني صرت اشيل هم كيف نتغير
غادة بإحباط : سنة بعيــدة اخاف افكر فيهـا
فراس تنهد : اتركي منك المستقبل خلاص .. اليوم ايش سويتي ؟
غادة بضيق : اليوم نايف سافر للسفاري حقه جعله المرض هو وياها !
فراس : وانتي ليش زعلانه ؟
غادة بقهر : لأن ابتسام حامل ! غير عندها توأم لسى بين يديها ! يعـــــــــني شهرها بيجي وهو هناك ! وماعندها احد مايخاف الله هذا ! وش قلة المسؤولية هذي !!!!!!
فراس : اوف اوف شفيك طرتي .؟ ( عقد حواجبه ) هدي شوي مايستاهل كل هذا
غادة : والله مغبونه ياعمري .. يعني من جد لو يصير لها شي وش بتسوي ؟
فراس : بيستـــر ربي .. وبعدين اختك أي شهر ؟
غادة باحباط : الرابع
فراس : بيسهـل ربي لسى للحين بدري على هالكلام ( مشى باصبعه على عنقــها الطويل ) يازين ريح الدخـون بنحرك
غادة بنبرة غزليه : مــا على تفاحة آدم قصور .. تذبح
فراس شد على يدها قبل تلمس رقبته وهو ينطق بين اسنانه : انتبهي لنفسك غـادة .. بآخذ فوقك الفوائد .. تعرفيني ؟ لعبتي مالها قواعد
غادة بتمطيط لحروفها : ف د و ة
***
لــؤي ,
اثناء اجتماعة مع موظفين يفطرون ... دخل موظف : لؤي عبدالرحمن ؟!
لؤي رفع يده : هــلا , سم
الموظف : فيـه رجال يدورك برا .. الظاهر يعرفك
لؤي عقد حواجبه .. استغرب من ممكن ! , وقف وهـو يطلع من المكتب .. سال موظف الإستقبال : فيه احد جا هنـا يطلب يشوفني ؟
موظف الإستقبال : ايه ( اشر لمكان برا المؤسسة ) هنـاك عند المجمع
هز لؤي راسه وهو يطلع وكله استنكار .... مجرد ماوقف قدام المجمع وهو يتلفت وين .. انتبه لصوت وراه : احــــــــم احم .. صباح النور
لؤي تشنج حسه .. هو يتهيأ له ولا هذا صوت ..... التفت واساريره كلها انفرجت وهو ينطق : نــــــــــــــــــــــــايفف ؟!!!
نايف ابتسم : بشحمه ولحمــــه ... ( جلس شنطته المتوسطة الحجم ) عندك مكان لإقامة يومين ؟
لــؤي تسارعت خطواته ناحية نايف وهو يضمـــــــــه من قلبه : إذا ماوسعك المكان تاسعك عيــوني .. ( شد على ظهره ) والله ماتدري وش فرحتي بشوفتك !! ( ابعد عنه وهو يتفحص وجهه بنظراته ) شخبـــــــارك ؟! شمسوي ؟
نايف : بخيـــر ياوجه الخير , والله لك وحشـه ياحيوان .... شمسوي ؟
لؤي طالع ساعته لسى نص الدوام نطق بلهفه : انتظر هنا !! بروح آخذ اذن اطلع واجيك .... واسولف لك عن كلش كلش ... دقيقة بس !
انطلق مســرع بينما تنهــد نايف وهو يحس براحة .. وجهه احسن , صحته تحسنت حتى من آخر مرة شافه ..
***
بيت أم فراس _ عصر /
ميهـــــاف كانت بقمة فرحتها وسط جمعة أم فراس ... كانت جالسة جمب أم فراس اللي مابخلت تعبر لها عن مدى فرحتها برجعتها حتى انها ماتركت احد مــاعزمته من اهلها وجيرانها ومعارفها .. غادة واسمـــاء كانو يتمشون بين الضيوف بصواني الحلا والمشروبات ..
ام فراس وهي تسولف مع ام عبدالمجيد : وش سويتوا مع وداد ؟
ام عبدالمجيد : لا تشيلين هم جت ام زوجها وجلست معها .. وزوجها عندها من صبح !
ام فراس : وكيف صحتها ويا بنيتها ..؟!
ام عبدالمجيد : حمدالله ينشدون العافيه ... ههههههه تصدقين يا أم صالح انتي كنتي قلتي لي لما شفتي بطنها انها حامل ببنت وطلع صدق
ام فراس بدهشه : صـــدق ؟
ام نايف : ايه ام صالح ما شاء الله عليها شاطرة ... حتى انا بفهـود قالت لي اني ولد !
ام فراس : ما شاء الله عليك ام صالح , كيف تعرفين ؟!
ام صالح : اعرف من شكل البطن ووجه الحامل يوضح
ام نايف وهي تاشر لابتسام اللي جالسه تسولف مع البنات : هجل شوفي لي ابتسام هناك زوجة ولدي .. بطنها وش يقول لك
ابتسام : هههههه خالتي ماظنيت يبين اللحين
ام صالح : ايه هي توهـا .. بس والله من شكل وجهها ظني ولد
غادة شهــقت : لاااااااااا ولـــــــــــــد بعد !!!
ام فراس : هاو واذا ولد ؟ وش زينهم العيال
غادة : وش زينهم بس ياحسرتي على اختي فوق نايف ثلاث عيرة !
سجى : عشان كذا انتي تاركه بنتك عندها ؟ تعوضينها عن فقد البنات ؟!
غادة عضت شفاتها .. كالعادة تعليقاتها سم : ........................
ميهاف اللي انتبهت لضيقة غادة : اقول سجى تعالي سولفي لي عن تقريرك وش صار عليه ؟
سجى : حمدالله سلمته اليوم ونزلوه على موقع الجامعة .... شوفيه ,( ابتسمت ) ولا اقول شرايك اقراه عليكم ؟
ام فراس بحماس : تقرير عن شركة وليدي ؟ ايه والله اقريه خل اسمع
اريج : عاد انتي يانورة لو مجلدات عن فراس بتسمعينها عادي !
مرام : شوفي حظه يا اسماء مب حظك انتي مالت
اسماء : اقول سجى ترا ما اجتمعنا عشان نسمع تقريرك السخيـــــف
غادة وهي تطالعها بقوه : لا أسوم .. ( ابتسمت بثقة ) خل نسمع وش راي سجى بشركة زوجي ( جلست وهي تحط رجل على رجل وتتناول فنجالها ) تفضلي نسمعك
سجى ابتسـمت وهي ترسل لها نظرة تحـدي .. ونطقت بهدوء : التقرير بالموقع الرسمي تبع الجامعة .. اللي يبغى يقراه يتفضل
غادة : وليش بطلتي تقرينه ؟
سجى : اسوم ماتبي تسمع .. قلت اللي يبي يقراه يقراه براحته
اسماء : وش هالمرة اللي بتسمعين كلام اسوم !! اقريه اخلصي علينا
سجى فتحت شنطتها وهي تطلع الورق .. توترت غادة من حركتها وكأنها كانت مستعده وجايبته معها ... فتحت سجى الورق وهي تقرا .. : احــم ... طبعا التقرير بعنوان " نموذج للجودة والإتقان في العمل " ... من الصعب صياغة مفهوم العمل الناجح بكلمات محدودة .. فالعمل الناجح لديه عدد من المبادئ والصفات التي تخوله لهذا المصطلح .. ولا يعني ذلك أن العمل الناجح غير معرض للفشل .. فلدينا نموذج هنـا لمؤسسة الشاب الناجح فـراس بن فهاد بن نايف الشمري .. فقد استطاع ترك بصمة ناجحة في عالم رجال الأعمال ليحقق نجاح باهر في سن يافع في شتى المجالات .. لديه قدرة فائقة على التخطيط .. واستيعاب الهدف وجرأة المجازفة .. كما انه يستطيع اكتشاف الموهبه وتوظيفها .. والإصرار عمــاد لشخصه الكريم ( ابتسمت غادة ابتسامة جانبيه وهي نفسها تذبحها ) .. كمــا يتميز بالطموح رغم العـــديد من العائقات التي حاولت عرقلة هذا النجاح .. في عمـر صغير تولى مسؤولية كاملة رغم عدم توفر دعم كافي ... ليصـــل لآفاق النجاح اليوم حتى بوجود مسؤولية عائلته المعتمدة عليه ورغم عدم وجود زوجة متعلمة لدعـمه في هذه الظروف ....
غـــادة فتحت عيونها بصدمة .... انتبهت لسجى ترفع عيونها لها بعد جملتها الأخيرة وترميها بنظرة لها معنى ! ارتجفت شفاتها وهي تنزل فنجالها وتشد قبضتها ....... والهمس يتكاثر بالمجلس استجابه لكلمة سجى الجريئة بتصريحها .... نطقت بين اسنانها : الجملة الأخيرة مكتوبة بالتقرير ؟؟!
سجى رفعت حواجبها : وليش امزح معك ؟ مكتوبه بالخط العريض ! ( ابتسمت ) لا تاخذينها شخصي حنا قسم ادارة اعمال .. لازم ننبه البنات عندنا لأهمية الدعم .. انتي مو من هالفئة فمفروض مايهمك ... وبعدين انا ماقلت إلا الصدق !
ام عبدالمجيد انفجعت من بنتها .. ماتوقعت توصل بهالجرأة !! اما غادة كانت تحس انها تحولت لكتلة جليد فجأة رغم انها تحترق من داخلها .. نطقت بقهر : عارفه انتي كذا ليش ؟ لأن محد وقفك عند حـدك ! ( وقفت وهي تلتفت لام عبدالمجيد ) بنتك تتعدل ولا بلاش تطلع بوجهي وتسد نفسي !!
غادة توترت من نظرات اللي حولها الكل يطالعها وكأنه يلتمس صحه ... اما سجى نطقت ببرود : اذا عندك اعتراض على الكلام اللي مكتوب قولي اعتراضك ! اما غير كذا ماله داعي تهاجمين امي مالها علاقة !!
غادة صرخت فيها بقهر : عندي اعتراض ونـــص !! اللحين انتي تسمين نفسك انسانه متعلمة عشان تتفلسفين ؟؟ وش هالتعليم اللي يتركك تسوين هالسلوك اللي اقل ما يقال عنه وقح
ام فراس وقفت عند غادة وهي تهمس لها : غادة حبيبتي اتركي الموضوع اللحين الضيوف جالسين مو حلوة .. بعدين !
غادة عضت ع شفاتها وهي تسحب جوالها وتطـلع من المجلس بكبره ... فور خروجها لحقتها اسماء وابتسام وميهاف .. بينما سجى طلعت باجبار من امها اللي ظلت تهاوشها !!
اسماء : غـــــــــــــادة !
غادة كانت تمشي بخطوات متسارعة حتى طلعت برا ...
ميهاف اللي لحقت اسماء : وين رايحة ؟!
غادة ماردت عليهم لما وصلت الحديقة الخلفيه وقفت وهي تسند يدها على خصرها وبيدها الثانية تدق واعصابها حبه وتنفجر .... ميهاف : غادة روقي شفيك شتسوين ؟!
اسماء عقدت حواجبها : من تكلمين هاللحين !
غادة ماردت عليهم .. كان ردها الغاضب لصوته اللي جاها : الـــــــــو !!!
فراس اللي استغرب نبرتها .. نطق باستنكار : غادة ؟
اسماء وميهاف سكـتوا لما شافوها بلشت المكالمة ..... بينما غادة نطقت بغضب وهي تحاول تحبس دموعها : ايه غادة من بيكلمك غيري من جوالي !!
فراس ابعد جواله وهو يطالعه ورجع يستلم السماعة : سامعة نفسك شلون تتكلمين ؟!!!
غادة : ايه سامعة ! واللحين اسمع انت ... وقت كنت تقولي سخيفة ومالي داعي وحكي تفاهات !! كان معي حـــــــــق !! واللحين باسمها انا بتأسف لك لانك ماعندك زوجة متعلمة تدعمك !! ترا سجى معدلها كويس على فكرة اذا ...
قاطعها صوته العالي : غـــــــــــــادة !! الظاهر ناسيه انتي تحاكين مـن وكيف ؟ احفظي نبرة صوتـــك قبل ..
قاطعته وصوتها يهتز من عبرتها : ماراح احفظه ! انتي اللي قلت لي وقت يضرك احد اسكتي .. عشان كذا صرت انضر من الكل !!
سكرت السماعة وهي ترميها على جمب وتجلس وتحضن وجهها وتترك دموعها تسيح .. ميهاف قربت منها وهي تمسح على ظهرها : غـدو تكفين روقي .. هذي سجى سفيهه ماعليك منها ولا احد بياخذ بكلامها !
غادة نطقت بين دموعها : ميهاف طلبتك اتركيني بحالي !
انسحــبت مباشرة وهي تدخل من الباب الخلفي وتصعد لشقـتها ... تنهدت ميهاف بضيق : سجى زودتها !!
اسماء بانفعال : مو بس زودتها !!! وزيااااادة وزيادة .. بس والله ما اخليها !!
ميهاف : اسماء مو انتي بعد !! خلاص فيه حريم داخل و .....
قاطعتها اسماء : ماراح اقولها شي ... بوريك كيف أبرد حرتي فيهــا ..
ميهاف عقدت حواجبها : وش بتسوين ؟
اسماء ابتسمت لما دق جوالها : بوقــــــــته ( ردت ) هلا فراس !
فراس مباشرة : عند اهلي انتي ؟
اسماء : آيـه
فراس : ادق على امي ماترد ! صاير عندكم شــــــــــي ؟
اسماء بصدق : ايه ... سجى كتبت تقرير شركتك وقــرته قدام العزيمة كلها
فراس باستنكار : طيب ؟
اسماء تنهدت : تبي تفهـم روح اقراه بتحصله بصفحة الجامعة
فراس سكرها مباشرة ... وهو يوقف سيارته بنص مشواره على جمب , فتح درج السياره وهو يطلع ايباده ويفـــتح واعصابه ضاربه من اسلوبها ! عقب ماسكرته وحاول يدق ماترد ....... فتح التقرير وهو يقراه .... استرسل بالقرايه ..... استرسل ... حتى وصل للجملة ! احتــــــــدت نظرته الشاشه وهو يشد بيده على الايباد !!! سحب جواله وهو يدق ... جاه الرد : سم طال عمرك
فراس بهدوء : مسموح لك ترد ب أيه و لا بس !
مسعود توتر .. رد بربكة : حاضر
فراس : انت كلفتك تشيل مسؤولية طالبة الجامعة وتقريرها ..؟ صح ؟
مسعود : ايه ...
فراس : اها .... طيب وش معنــــى تشيل المسؤولية بقاموسك ! معناه تراقبها بس ؟
مسـعود ماعرف يرد .. مو عارف وش الجواب اللي بيطفي غضبه : .......................
فراس وصوته ارتد بالسماعة بغضب : رد !!!!!!
مسعود بلع ريقة : ايه
فراس : ياحيـوان يابهيمة ! تشيل المسؤولية معنـــــاه من الف للياء ...... ( رفع صوته بغضب ) معنــــــــــاه التقرير قبل يعتمد تقراه انت اول وتشوف اذا فيه شي غلط !!!! قريته ولا لا ؟
مسعود : لا !
فراس : لأنك حمـــار ! لا مو انت الحمار انا الحمار لأني موظف بهيمة زيك !!!! واللحين اسبوع لا أشوفك ! هالاسبوع افتتاحه بمكتبي يدخله من يبغى وختمناها بالتقرير !!! برافو عليك مسعود !
تو مسعود بيتكلم تسكــــــــــرت السماعة ! فــراس رمى اجهـزته ع جمب وهو يسوق سيـــــارته وياخذ اقرب تحويله يغير طريقه .........
***
غـــادة كانت بسريرها ضامة ركبتها لصدرهـا ومسنده راسها على ركبتها ومنقهره من نفسها .. كل مره تجتمع مع الناس لازم تتفشل ..مالها وجه كثر ماتفشلت قدامهــــم ...... عضت ع شفاتها وهي تنتبه لصوت باب البيت ينفتح , انتبهت له يدخل الغرفة ....... شاحت بوجههـا وهي تمسح دموعها ..ضيق عيـونه فيها .. شعرها الحرير منسدل حولها وراسم خنادق على السرير .. وعيـونها حمراء .. بخطوات هادية قرب منهـا .. جلس على طرف السرير وهو يمسح بيده على خدهـا .... نطق بهدوء : زعـلانه مني حياتي ؟
غادة طالعته وهي تنطق بغصه : حيــــل .. حيل ..
فراس وعيونه بعيونها : حقـــك .. امريني بس وش يرضيك ؟
غادة طالعته بقهر دون ترد ..فراس : صدقيني مو بس حكي .. جربي انتي واللي تبينه بيصير ! ( اشر لتحت ) انـزل اللحين امسح هالتقرير بوجهها ؟ ( رفع وجهها بذقنها ) لا تطالعين هناك .. طالعيني ! هاتي رضاوتك
غادة كانت شفاتها ترجف .... فراس كان يحدق فيها بعزيمة بعيونه .. : تبيني احرم رجولها تطب هالبيت ؟! ابشري والله احرم انفاسها حولك مو بس بهالبيت .. بكل مكان !
غادة بقهر نطقت بكتمة : مابي شــــــــــي ...
فراس هز راسه بموافقة : مادام ماتبين شي معناها طاحت بيدي .. ( صوته الثقيــــل نطق بتشديد ) وعــــــزة الله وجلاله لأخليها تندم على اللحظة اللي قابلتك فيهـــا .... ومعــزتك عندي لأكسر خاطرها مثل ماكسرت في نفسك .. ( قرب وجهها وهو يبوس جبينها ) حقـك عندي مايوصل الأرض ! ( مسح دموعها باصبعه )اهـــد هالبيت فوق راسها بدمعه منك
غادة بين غصتها : وش بتســـوي ؟
فراس ابتسم : بروح اصلي اللحين وراجع .. ( وقف وهو يمسك يدها ويوقفها معه وبنظره لها مليون معنى ) اللحين ابيك تقومين تغسلين وجهـك وتنزلين ولا توضحين قدامها انك زعلانه ولا انك بكيتي ( نطق بتشديد ) فاهمة ؟ بتنزلين وبتوقفين بقوه قدامها .. وبتضحكين وكأنه ماصار شي !
غادة عضت ع شفايفها : فراس لاتضغط علي !
فراس بتشديد : مثل ماقلت لك يصـــــــــير .. والله ماينوخذ حقك الا قدام عيونك ! والتقرير انحذف ارتاحي
غادة نزلت عيونها بكئابه : عقب ايش ؟
فراس بنفاذ صبر : غـــــــــــــادة ّ
غادة شدت ع شفايفها وهي تنطق بكئابه : زيــــن... بس قولي ايش حتسوي ؟
فراس وهو يطلع جواله اللي دق .... : تعرفين بوقتها .. يله مثل ماقلت لك سوي , ( رد ع الجوال وهو يطلع )
بعد المغرب الضيوف ماطولوا بحكم الظروف .. خصوصا ان ام فراس ضاقت بشكل واضح , بعد ماراحوا الأغراب وماضل غيـر ام عبدالمجيد وسجى وابتسام واريج ومرام واسماء وميهاف وام نايف.......
كانت ام فراس جالسه وتعاتب بقهر : اعتبر هذا استغلال وخيانة لأمانة وصدق ولدي اللي فتح باب شركته لك وقال حياك سوي اللي تبين
ام عبدالمجيد بانحراج : والله يانورة ضاعت حيلتي في هالبنت معد ادري وش اسوي ... امسحيها بوجهي ياخيتي
انتبه الكل لغـــــادة اللي نزلت فجأة .. وهيأتها المكركبة ترتبت .. لما انتبهت لنظراتهم ابتسمت وهي تقول : لسى مجتمعين ؟!
استغربـــوا هدوئها المفاجئ .... غادة مشت بهدوء وهي تجلس جمب ابتسام : فين عيالك ؟!
اسماء وميهاف طالعوا بعض باستغراب .. لكن غادة ما اعارت احد انتباه ..همست لها ابتسام : شلونك ؟
ابتسمت غادة ابتسامة صفراء : زينه ماعلي
ام عبدالمجيد بانحراج : غادة بنيتي .. معليش والله التقرير..
قاطعتها غادة : افا عليك ام عبدالمجيد ! انا بعاتبك ولا بشره عليك ..؟ الموضوع مايستاهل .. التقرير انحذف وخلاص ماعاد مهم !
سجى فتحت عيونها : نعـــــــــــم ؟! انحذف !!
غادة طالعتها ببرود : ايه انحذف ..
سجى : مستحيل ! ( فتحت جوالها وهي تفتح .. شهقت وووجههـا طار )
ام عبدالمجيد : شفيك ؟؟ ماتوقعتي ينحذف يعني !!
سجى اهتزت شفاتها .. ردت ع امها : لا ماقصدي التقرير .. جايني انذار وفصـــل مؤقت دون مدة محددة .. ( رفعت عيـــــونها لغادة وهي تنطق بقهر ) وش مســــــــــــــــــــــــــــويه انتي ؟!!!!!
صوت اقتحم الجلسة فجأة من الباب الرئيسي : احـــــــــــــــــشمي لسانك !!!!!
ام فراس عقدت حواجبها : فراس ؟!!!
فــراس نطق بهدوء : شخبــــارك عمـــــــــتي ؟!
ام عبدالمجيد طلعـت لعنده وهي تسلم : هلا يـامك .. ( تلككت قبل تتكلم ) سجـى ..
قاطعها فراس : عمـه انا استأذنتك اخر مره .. وقلت لك اني مررتها مرتين , هالمرة ودك تعذريني في اللي بسوي
تنهدت ام عبدالمجيد بضيق .... فراس : لا تتضايقين ام عبدالمجيد .. خاطرك انتي غير ! بس الظاهر بنتك مالها من الطيب نصيب
ام عبدالمجيد بقلة حيلة : وش اســــوي بعد ؟
فراس : ابيك ماتـزعلين وبس هذا يكفي .. الموضوع صار يخصني ( التفت للباب وهو يطقـــه وينطق بهدوء مهيب ) سجــــــى !
سجى قلبها وصــــل حلقها .. ردت بربكة : نـ نعم ؟
فراس : فصـلك المؤقت انتي عارفه ليش ماحددوا المدة ؟
سجى : ..............................
فراس : لأنه صار بيدي .. متى ماقلت لهم يلغونه بيلغونه ! وانتي مالك دراسة ولا تستاهلين حتى مقعد تعليمي .. كلمة " زوجه غير متعلمة " راح افهمـك معناها بالتجربه !! وعيشي دون تعليم ! وطول ما أنتي جالسة بالبيت .. تذكري بس ان هذا ثمن من يدخل حياتي ويخدش فيها !
سجـى اللي انصدمت .. نطقت بخوف : بس انا ماقصدت اللي ...
قاطعهـا بصوت عالي : قــــــــصدتي ماقصدتي مايهمني !!!! تبريراتك احفظيها للوحيدة اللي راح تتوسط لك عندي !!
سجى : ام فراس تكفين ....
فراس بهدوء : امي على العين بس هالمرة مو بيدها ... بيد اللي غلطتي بحقها وعلى بالك ماوراها ظهر ياخذ حقهـا !! وترا ساكت لك وحركاتك الخسيسة من زمـان وانتي خابرتني وتدرين ان بيدي كل شي !
سجى هطلت دموعــها بقهر : ....................................
فراس بحـــدة : وبيدي أكثر وتستاهلين أكثر ! بس الحشمة لأمك وابوك ! واللحين وريني كيف تتطــــــــاولين عليهـا لو حتـــى بنظرة !
غـادة لما حست الوضع بدا يتوتر ... طلعت لبرا وهي تنتبه لأم عبدالمجيد واقفة ومنزله راسها وواضح مخنوقه , همست لفراس : حبيبي خلاص .. ( اشرت بعيونها لام عبدالمجيد )
فراس طالع عمــته وكانت فعلا تنرحم .. رد على همسها : تعالي ابيك شوي ( تقدم لام عبدالمجيد وباس راسها ) يمسيك بالخير عمة
هزت ام عبدالمجيد راسها دون تعلق .. بينما فراس مسك يد غادة وطـلع من مقدمة البيت للحديقة ورا , قالت غادة باسف : ياحياتي يا ام عبدالمجيد مسكينه ....
فراس طالعها بنص عين : لو مسكينه آجل تربي بنتها صح ! ( نطق دون نفس ) واللحين انسدت نفسي ! هذا اللي يصير وقت نعطي البزران وجه !
غادة : وانت ليش متضايق ؟ لاتسوي كذا اذا بيضايقك !
فراس : عشان اتضايقك اكثر !!!! الضيقة اللحين من الواسطات اللي بتجي .. ماحيجلس احد من العائلة ماكلمني
غادة ابتسمت وهي تنطق : شكــــــرا .. من جد مشكور ماحنساها لك
فراس : وش توقعتي ياغادة ؟ بسكت يعني ؟
غـادة باصرار : يـــــــــضل شكرا ..
فراس مسح على راسها : والله خوفــــتيني لما كلمتيني .. عقلي طار ! حيوانة انتي .. ( ابتسم نصف ابتسامه ) عارفه غلاك وجالسه تلعبين السبله فيني
غـادة وهي فعلا متأثرة .. ماعمرها جربت احساس الفزعه .. ترفعت ع اطراف اصباعها وهي تبوس خده , مسحت بيدها على خده وهي تبتسم : احبــــك ... والله العظيم احبك ( استنشقت هواء ) شايف حتى انفاسي ضاقت .. ماعدت اقدر الاحق نبضي حولك ..
فراس وهو يحس بدفا يدها على خـده .. : عارفه وقت تقولين أحبك .. احس اني اعيش الف سنه قدام
غـادة : يمـه كم عمــــرك ؟!
فراس رفع حـواجبه : عدي واغلطي
غادة بحب : دام عمرك فوق ال 1000 سنه مفروض معد يخوفك الوضع بعد شهرين
فراس : مايخوفني بكل الأحوال ... عقب اليوم , اشوفك واضحه مثل وضوح الشمس جمبي عقب سنه بإذن الله
غادة ابتسمت : بجـــــــــد ؟ دام تشوفني آجل تغيرتنا ولا لا
فراس ضوق عيـونه بانسجام وكأنه يركز : همممممـ ... ( فتح عيونه بصدمه ) كأنك دبه ! ( رجع يركز ) ولا هذا بطـــن اللي ماسكته ؟ ( ابتسم ) مبـــروك آجل ؟
غـادة فتحت عيـونها بصدمة ووجهها دخـن : نعـــــــــم !!
فراس رفع حاجبه وهو ينطق بتهكم : ينعم بحالك ياهانم ... وش طير عيونك ؟ ولا ناويه عقب سنة بعد تجلسين كذا ! عطيتك وجه ترا !
غادة قلبها ضرب : خلاص ابشر لاتخوفني كذا !
فراس بلين : بسم الله عليك .. ( دق جواله .. رفعه وهو يشوف المتصل زفر ) عارفه بسبب مكالمتك سحبت على موعد مهم جدا جدا ! واللحين تو استوعب اني سحبت عليه !
غادة كبست عيونها : اوبــــــــــس !
فراس ضرب راسها بخفه : اوبس ها ؟ .. عموما انا بروح يارب الحق , صرتي احسن خلاص ؟
غادة ابتسمت تطمنه : احسن جـــــــــــدا .. رافقتك السلامه
فراس رد ع جـــواله وهو يطـلع بينما غادة جلست بمقعد الحديقة وهي تراقب النجـــوم ... وتحس الليلة سعادتها فوق الوصف ..همست بحب : الله يخليك لي يارب
*
*
*

احبـــائي , بارت اليوم كان طويل وهو البارت القبل الأخير

القــــاء الجاي راح يكون آخر لقاء لروايتنا هنا
وماراح احدده بموعـد جايز يقدم وجايز يأخر

ألقاكم على خير , وقراءة ممتعة
اراءكم تهمني ؛3

ماشاءالله تبارك الله…
بارت طوويل ورائع
اول شي انا فرحاانه عشان سجيووه الزفته جا لها العقاب من فراس وبعدها عن طريقهم…
غاده وفراس حلووو الانسجام والحب اللي بينهم وباقي النونو يجي وتكتمل الفرحه…
اسماء وهيثم ماتوقعت هيثم متفهم كذا توقعته يعند من جهته لما اسماء تركته بس زين يحاول يغير من طبعه الثقيل على النفس…
لؤي الى اﻻن مو متوقعه وش النهايه اللي بيرسي عليها هل راح يكون لاهله وجود في حياته المستقبليه ولا لا…
بدر وميهاف الله يسعدكم ..
ووو زعلانه اني راح افارق روايتك الجميله…
وخذي راحتك يامبدعه وان شاءالله تختمين الروايه على خير…
وربي يوفقك ويزيد تألقك ونشوف اسمك لامع بين الكاتبات المتميزات…
ودمتِ في آمان الله وحفظه…

بارت اكثر من رائع لفت انتباهي ابداعك في الحوار وتنوعه وطوله

لغتك سخيه جدا واسلوبك سلس وراقي

واتمنى اشوفك في روايات قادمه وكلي حماس للبارت الختامي