االتشابتر الثاني والستين
وتبقين سرا
وعشا صغيرا ..
إذا ماتعبت اعود إليه
فألقاك امنا اذا عاد خوفي يعانق خوفي ويحنو عليه ..

فــراس كان خرق قوانين السرعه في سبيل وصوله للمكـان المطلوب بالوقت المناسب , ضرب على طارته بكل قوته وهو متوتر ومتنرفز تماما ... فور وصوله لبيت عمـه انتبه لحرمتين بعباياتهن ومعهن فهـد , هذي اكيد زوجة عمه وميهاف .. نزل من سيارته مباشره وام نايف اللي ركزت بعيونها ثم نطقت تحزر قبل تركب السياره : فراس ؟
فراس وهو منزل عيونه : ايوه فراس ...بالخير أم نايف
ام نايف : هلا فيك والله , شخبارك وشخبار غادة وأهلك ؟
فراس : بخير يسلمون عليك .. همم .. لؤي داخل .؟
ام نايف : ايه جالس مع ابوه تفضل حياك .. محد قدامك البيت فاضي
فراس قبضه قلبه اكيد كلمه .. : يله اجل يعطيك العافية
ام نايف : يعافيك
ركبت ام نايف وميهاف .. بينما فراس دخل مباشرة وهو يسابق خطواته الراكده , فور دخوله الصاله كانت ملامح أبو نايف الغاضبه وانحنائة رأس لؤي بجلوسه تحكي اللي صار .. شد ع شفته بقهر وهو يطالع لؤي اللي كلف عيونه بالتفاته بسيطة يطالع فراس ثم رجع يطالع الارض ....تنهد بحسوفه وهو ينطق بهدوء : السلام عليكم
كان الرد نبرة ابو نايف المتمهلة .. : عيـد ايش قلت ؟!!!
لؤي وهو على نفس وضعه : اللي سمعـته .. عيالي بالرياض ومالهم رجعه
ابو نايف وهو مازال حابس عاصفه : يعني رجعت تتزوجها من وراي ؟
لؤي اللي كانت عيونه تهرب من لقاء عيون ابوه وبقوة .. نطق فراس مباشره وكانه يحاول يخفف من حدة الموقف : لا ! مارجع يتزوجها للحين !
ابو نايف طالع فراس اللي تقدم حتى جلس جمب لؤي ونطق بنبرته الواثقة : انا اقول بالهداوه نحل كل شي .. دام مافيه زواج ولا ..
قاطعه لؤي بقهر : فراس لو سمحت لاتحط في راس ابوي افكار ماراح تصير ! مو معناة اني ماتزوجتها للحين اني ماراح اتزوجها !
فراس وهو شاد ع اسنانه : لؤي لاتنجن !
ابو نايف وهو يطلع جواله من جيبه : معك حق بالهداوه كلش بينحل ( ضغط بارقام وهو ينطق ) اللحين ارجعها من وين ماجبتها
وقف لؤي مباشرة وهو يسحب الجوال من يد ابوه : ماراح تبعدها من قدامي هالمره !!!
ابو نايف بحدة : رجع الجوال
لؤي وهو شاد ع نفسه : راح ارجعه .. بس ابيك تفهم اني مو جاي احاول اقنعك , قناعتك هي حاجه راح تكسبها من نفسك وما اقدر اكسبك اياها .. جاي اقولك ياتقبلني ببنتي يا انا وياها تاركينك ورايحين
ابو نايف : قد كلمتك هذي !
لؤي : ايه قدها ..
نزل فراس راسه وهو ينتبه للكف اللي انطبع ع خد لؤي من حرقة ابو نايف .. وعيونه حمراء وهو ينطق بعصبيه : كرهتنا لهالدرجة عشان تبيعنا وتروح .؟
لؤي وحرارة الكف مشعله خده نطق بقهر: ماعمري جربت اكره احد في حياتي يبه عشان اكرهك انت .. بس تقدر تقول اني ماعاد اهتم .. تجيني لحظات اتمنى ارفس حياتي هذي كلها دون اندم .. اشوف حياتي كلها تتقلب قدامي وبالاخير اختارت تستقر في الفتور .. ( كمل بغصه ) ماعاد اقدر اشتت نفسي اكثر من كذا .. دام حصلت راحتي راح الحقها للاخير
ابو نايف : اللي مايكره مايفارق !
لؤي : الشهر اللي راح كله جاريت نفسي فوق ماتتصور عشان اكمل حياتي ... بس ماحصلتك بحياتي اساسا عشان اجاهد نفسي اكثر , لا انت تبيني ولا حتى هي تبيني .. بس على الاقل راح اجاهد للي محتاجني اكثر !
ابو نايف صرخ فيه : انت اللي عازل نفسك عن العائلة !! اخذت اغراضك وطلعت لحالك وسكتنا نعطيك مساحتك وانحسبنا غلطانين بعد ؟؟ صدق شين وقوي عين
لؤي بقهر : أي عائلة تتكلم عنها واي مساحة !! تبغاني انضم معك لهاللعبه الغبيه اللي مو عارف ايش الهدف منها ولا أيش الفايدة اللي ترجون من وراها ؟ لعبة غبية المهم فيها انك تسعى للكمال وتكون دقيق ونظامي بكلش ومنافق ومجامل وتحاول تغيظ بنفاق اللي حولك ... سواء كان من اهلك او لا ..!! طول عمركم كذا وانا مستحيل اكون زيكم مستحيل اسكر مخي عن اللي حولي واصير سطحي دون امل ولا طموحات
ابو نايف : ياكرهي لبعض فلسفتك !!
لؤي وهو يتكلم بهدوء يحاول يخفف حدة النقاش : بغض النظر عن كل شي .. انا بسألك سؤال واحد بس , اذا هالبنت بالذات اللي بنيت حياتي معها مو لي , آجل من لي ؟
ابو نايف بعصبية : لك ابليس اللي وسوس براسك وخلاك تسوي كل هالفعايل فيني عقب كل هالعمر ! ( ضرب صدره بقوه ) انشهد اني ماربيت ( رجع يضرب مره ثانيه بقهر ) انششهد اني ماربيت ولا تعبت ولا ..
فراس الهادي بنص الموقف انتبه لدمعة لؤي تنزل وهو يشوف ابوه يضرب بصدره ويتحسر .. تنهد وهو يلتفت للؤي وبنبره اقرب للهمس : رح غرفتك
لؤي وكأنه كان محتاج هالتسريح .. انسحب بهدوء لكن قاطعه بنص مشيه ابوه يصرخ فيه : وين رايح ؟! مو على اساس رايح لها ولا عاد تبينا ؟؟ مو ع اساس عفتنا !!
فراس : ياعم هد اعصابك وتتكلمون بعدين .. اتركه اللحين يروح ..
ارخى ابو نايف جسمه وهو يمسك راسه ويتمتم بقهر : حسبي الله عليك من ولد .. حسبي الله عليك
فراس بمواساة : طول بالك ماحيصير الا كل خير باذن الله
ابو نايف ظل ع وضعه وهو يندب نفسه ومصيبته ..,
***
هيثـم /
كان بسيارته عند باب بيت ابو فراس ينتظر اسماء تطلع .. وتفكيره شارد مع مكالمة سارا , كان حاس من لهجتها انها في مشكلة اكيد .. تفكيره مستقر ع انها متورطة بحاجة مع لؤي , والله يستر من عواقبها .. تنهد بضيق ( الله يهديك يا سارا ايش عامله بنفسك هالمرة ؟ )
: حيــــــــــــــاتو
انتبه لاسماء جمبه .. صحى من شروده وهو يتدارك وضعه : هـ .. هلا , خلصتي ؟
اسماء برومانسية : ايه من زمان خالصه من أول مانزلتني هنا .. وكل تفكيري عندك ابي ارجع لك بس
ابتسم هيثم بمجاملة رغم ضيقته : كان نسيتيني شوي وخليتي بالك مع اهلك بكرة مسافرين وبتفقدينهم
اسماء باصرار صادق : لاتخاف دامني معاك ما احتاج احد , حتى لما كنت عند اهلي وربي كنت معي ببالي طول الوقت ( شعرت برومانسية ) وإن فقدتك عين مافقدتك روح
هيثم وباله مشغول : آقول اسماء بسالك عن شي يخص ولد عمك لؤي
اسماء استغربت طاري لؤي فجاة وتجاهله لغزلها من ركبت ( لا يكون احد قايل له ان لؤي خطبني قبل وضايق !! ) : هاه ؟ و وش جاب طاريه ؟
هيثم : ولا شي والله ... بس اشوف الولد ما شاء الله ومستغرب انه ماتزوج يعني .. كل عيالكم تزوجوا الا هو
اسماء ( يمه قلبي جالس يلمح ! اكيد زعلان !! ) نطقت بربكة : لا هو يعني .. ( بلعت ريقها ) كيف اقولك ؟ مدري والله لؤي صعب شوي
هيثم : ليش هو بينه وبين عمك مشاكل ؟
اسماء : ايه نوعا ما .. ع انهم كانو عسل والله بس فجاه مدري شجاهم
هيثم ( الله يستر ماتكونين السبب ي سارا ) : ..............
اسماء التفتت له : شفيك سكت ؟
هيثم وعيونه بالطريق : وش اقول بعد يعني ...
اسماء انهارت داخليا ( زععععل !!! لا لا لازم اراضيه خل اغير السالفه ) :ايه ياعمري وين شهر عسلنأ ؟
هيثم : لا وصلنا عرفتي لاتفقدين صبرك بدري
اسماء باستسلام : اوكيـــه راح انتظر ( صفقت بحماس ) الحماس بياكلني
هيثم ابتسم دون يعلق : ....
اسماء تنهدت وهي تنتبه لجواله ع جمب .. خطفته وهي تنطق بحماس : افتح القفل بشوف ايش مسميني بجوالك !
هيثم : احلمي بس .. ما ضروري تعرفين اسم كويس وبس
اسماء بسخرية وهي تطلع جوالها بيدها الثانية من شنطتها : راح اعرف حتى لو ماتقول لي
هيثم هز راسه ع اصرارها وهو ينتبه لها تدق ع رقمه عشان يطلع اسمها .. اسماء فتحت عيونها بوسعها وهي تنتبه لاسمها ( البيت ) !!!
هيثم سحب جواله اللي يدق من يدها وهو يسكره بوجهها : ارتحتي اللحين ؟!
اسماء التفتت له بصدمه وهي تنطق : اسمي البيت ؟!!!
هيثم رفع حواجبه : ما اعجبك ؟
اسماء باعتراض : لا ما اعجبني !! وش البيت طوبه انا !! غيره
هيثم : انتي بيتي ماكذبت .. وش اسميك يعني ؟
اسماء باستعراض لاحلامها الورديه : قلبي .. عمري .. زوجتي .. اسوم ! بس البيت مابي
هيثم دخل جواله جيبه : اسم جوال ترا ماراح ولا جا ... وبعدين جوالي دايم بمكتبي فشله يدق وانا حاط قلبي ومدري ايش
اسماء شهقت : فشله !
هيثم : ايه وش هالسخافات يعني .. انتي قلبي دون اكتبه بكل مكان
اسماء فتحت جوالها بقهر : هين هين .. انا اسمي البيت اجل ؟! بوريك كيف اسميك
هيثم : قواك الله ان شاء الله تحطيني رقم دون اسم
اسماء : لا محشوم رقم ! بس دامني البيت انت السياره وكيفك عاد
هيثم : بتسميني السياره ؟!
اسماء وهي ترفع جوالها بوجهه وتوريه اسمه ( السياره ) : ايه خلاص .. انا بيت وانت سياره
هيثم : عن الهبال مافيه مقارنه البيت متعارف عليه اكثر من السياره .. سواقك انا تسميني سياره ؟!
اسماء وهي تدخل جوالها شنطتها وتتكتف بزعل : خلاص ماحغيره ..
هيثم : غير عنادك انتي مافيه شي يخربك
اسماء : عنادي ! عنادنا قصدك .. ماعليك قصور انت البادي
هيثم : ابد كبري قلبك حطيني هايلكس بعد مو بس سياره
اسماء بزعل : ماتشوف بدر اخوي وش يسمي زوجته ! شوي ويحط اسمها شعر .. وانا كش بس ما كأني عروسه اسمي بيت !
هيثم : اقول اسوم ترا المقارنات وقت تبدا تضعف القناعه .. وانا ما اعيش مع وحده مب قنوعه
اسماء : الله اكبر قناعه ! طالبه طقم الماس انا ترا كله اسم .. بتنكسر يدك لو تحطني اسم كويس !؟
هيثم : وبعدين تعالي ! عاجبك اخوك بدر اللي حاط اسمها شعر وراميها في بيت اهلها !؟ لاتحسدين العالم ع رزقهم ماتدرين وش ربي ماخذ منهم
اسماء : مالي دخل في بدر ابي اسم كويس بجوالك وبس
هيثم تنهد بضيق : اقول انزلي بس وصلنا .. وكبري عقلك ويا هالاسم
اسماء برطمت وهي تنـزل وراه وتتحلطم : بيت اجل ..
***
غـادة اتبسمت وهي تسلم ع ابتسام قبل تطلع : كويس اللي جيتي اليوم تغيرين جو
ابتسام : ماعليك مني انا بخير لاعاد تشيلين همي .. ارجعي ادخلي انتي
غادة : وخفي شوي ع نايف ترا والله المسكين يحبك ولا له ذنب يعني .. اعرفك اعقل من كذا
ابتسام حست ع دمها وغادة تنصحها : ... يله سلام
غادة هزت راسها وهي تدخل والجو هادي بعد الزياره وام فراس جالسه بالصاله .. ابتسمت لغادة : راحت اختك ؟
غادة وهي تجلس جمبها : ايه بسلامتها راحت .. ( طالعت غادة الساعة اللي كانت 1 ونص ) خالتي ماحتنامين الوقت متاخر ؟
ام فراس : فراس للحين مارجع .. لايكون جالس برا عشان الحريم ( رفعت جوالها ) دقيقة اشوفه
ام فراس انتظرت لوهله يرد لكن مافيه رد .. قالت بتعجب : غريب مايرد !
غادة : اكيد مشغول او شي .. انا اقول نامي انا بنتظره
ام فراس : لا لا ماحنام لحد مايرد علي اقل شي .. ( مسكت جوالها في محاولة ثانية تتصل وكان نفس النتيجه ) ..غريب !
غادة شالت هم بجد .. مو بعادته يسهر , النوم بدري حاجه روتينيه عنده ...
***
غرفة لؤي /
كان ع السماعة مع سارا وهو ينطق بخيبة : مو انتي تقولي سو حاجه ؟! هذا انا سويت .. يله بتنتظريني ؟
سارا بصدمة : ماني مستوعبه انت من جدك قلت لابوك ؟ ( كملت بهلع ) عارف ايش راح يسوي فيني اللحين ؟! انا مواعدته ماعاد اشوفك وبسببك اضطريت اجي عشان بنتي واللحين كمان ابوك !!!! لؤي وبعدين معك اذا ماتقدر تخفف هم قلبي لاتزيده !!
لؤي : صدق من قال خاف شر اللي تركك لانه يعرف كيف يوجعك .. مو هذا طلبك ؟! تعبت الاحق رغبتك وبعدين يعني ؟
سارا برعب : افهم انا ما اقدر اسامح غيبتك واعديها ! تدرين شلون ؟ انسى خلاص انا لازم اروح اطلع من هنا قبل يطيح الفاس بالراس
تو بيتكلم انقطع الخط عقد حواجبه بقهر ...
: مابين بعيونها صح ؟!
انتبه لفراس براس غرفته .. سكر الباب وراه وهو يدخل : عارف وش بيصير عقب اللحين ؟
حضن لؤي راسه بين يديه : لا مو عارف .. بس عارف اني ماني طايق فرقى بنتي
فراس تنهد وهو يجلس : الغلطة كانت من الضربه الاولى وهي انك تزوجتها ..
لؤي : لانرجع لورى كثير .. الموضوع كله في اليوم
فراس : الموضوع كله انه من طرف واحد .. انت لحالك جالس تحاول لو انت ملاحظ بس
لؤي بوجع : الله يهديها
فراس : يا بن الحلال كرامتك قبل خرابيط قلبك .. لاتنزل نفسك بعيون ابوك اكثر وصلح الأمور قبل تكبر لاتخسر نفسك واللي حولك وانت تحاول تحافظ على وحده ماهمها انها بتفقدك
لؤي بقهر : مو بيدي .. وقت اصحى ومايكون وجهها اول حاجة افكر فيها , راح اسمع نصيحتك
فراس هز راسه بيأس من عقليته : ...........
لؤي : والله الظاهر يافراس انه حتى من غير هالموضوع .. هالدنيا مو راضيه تضبط معاي في أي شي
فراس : الدنيا مازانت للأنبياء والرسل بتزين لك أنت ووجهك !!
ابتسم لؤي دون نفس : ..........
فراس انتبه لجواله يدق .. كانت امه اللي لها ساعه تدق , صمت جواله وهو يلتفت للؤي : انا ماشي اللحين .. بقولك اللي بخاطري وطالع .. لؤي صدقني مافيه شي يتكرر بحذافيره هذي قاعده انا حاطها بحياتي , اجمع نفس الاشخاص فنفس المكان والزمان ثم شوف .. ! راح تلقى نفس الاحساس بقلبك ؟ صدقني لا وانت لك فترة ماجلست معها صح صدقني الاغلب انك ماعدت تحس اللي كنت تحس به قبل والفرحة اللي عشتها هناك ماراح تتكرر .. الموضوع مو مقصده تعاسه وحزن لا بس لازم تصدق ان كل فرحة غير فلا تربط فرحتك بناس معينين
لؤي : مين قالك مو جالس معها ؟ مين اللي بشقتي هالفترة اجل ..؟
فراس : يابن الحلال مافيه شي اخف واسرع تقلب من القلب .. واللي تحبه اليوم تكرهه بكره , فخل عقلك يصحى ! واي حاجه راح تخسرها مقابل راحة بالك تعتبر مكسب صدقني
لؤي : وانا مالي مكسب غيرها ..وجاي ع بالي ادق على جدي بعد واعطيه الزبده وخل كلش يخرب !
فراس بعصبيه خفيفه : وش هالاسلوب ! لا انت رسمي انجنيت
لؤي : أيه انجنيت ماراح اقولك لا
فراس : اجل بالعافيه عليك جنانك .. انجن لحالك
طلع فراس وهو يحس بقهر .. ماعاد لؤي زي قبل خلاص كيانه مقلوب تماما .. طلع من بيت عمه وهو يركب سيارته ويسحب له سيجاره يخفف فيها حرقة اعصابه .. رن جواله زفر بضيق وهو يرد : ايه نعم
ام فراس بتعجب : فراس ؟!
فراس : هلا يمه .. معليش جوالي كان بعيد ماشفته
ام فراس : معليه حصل خير بس وينك غريبة لهالحزه مو بالبيت ؟ الفجر مقبل
فراس : دخلت الشركة وانشغلت وللحين مشغول ماحرجع الليله
ام فراس : معقوله بتواصل .!
فراس : معليش هالفترة الشغل متراكم شوي .. لا تنتظريني ونامي
ام فراس : الله يسهل لك يارب .. يله سلام
فراس : سلام
سكرت ام فراس وهي تلتفت لغادة اللي كانت تراقب المكالمة من اول : راح يضل بالشركة للصبح ... خل ننام
غادة : ماحيرجع يعني ؟
ام فراس : لا والله شكل الشغل زايد عليه
غادة باحباط : اوكيه .. يله تصبحين على خير
ام فراس : تلاقين الخير
***
الســـاعة 8 ونص صباحا /
عقد بدر حواجبه عند مكتب الاستقبال وهو ينطق بتأكيد : بجد ماداوم اليوم ؟
الاستقبال : لا ماداوم وتواصل معنا وقال ماحيداوم
بدر ما استوعب الخبر .. فراس مايداوم ؟! مب صدق ... دق ع رقمه وهو ينتظر الرد جاه الرد : ايوه
بدر : معقول اللي جالس يصير ؟ انت مو مداوم ؟!
فراس : وخير ياطير ؟ مو بشر انا ما ارتاح يعني ؟
بدر : من قال يابن الحلال ؟ بس يعني غريبة مو بعوايدك تسحب ع الدوام .. تعبان اجل ؟
فراس : لا تعبـــان ولا شي ... وبعدين ما اخذت اجازه عشان ارتاح قد ما انا ابي اشوفك شلون تشتغل لحالك
بدر : امتحان هو ؟!
فراس : وياتصيب ياتخيب
بدر : يله اجل .. توصي حاجه ؟
فراس : سلامتك .. نبه مسعود لاجتماع اليوم ينوب عني بس
بدر : تمام
سكر فراس السماعة وهو يمسح على وجهه ويطالع صالة الفيلا حوله .. سحب غترته وعقاله وهو يطلع من هنـا وفكر يدق ع لؤي وتراجع مباشرة ..
***
بيت نايف /
صحى من النوم بدري ع غير عادته .. طاحت عيونه عليها وهي معطيته ظهرها ونايمه بشكل مرتب , يدها تحت اذنها وتتنفس بانتظام .. وشعرها الأسود الحريري متناثر على الوسادة , تنهد وهو يقرب منها بهدوء ويطبع بوسه ع جبينها ويبعد خصله تمردت ع وجهها .. ونهض وهو يطلع ..
فتحت ابتسام عيونها وهي كانت حاسه بحركته .. ( معقوله يا ابتسام تصغرين عقلك لهالدرجة ؟! يعني هو ايش ذنبه بجد ؟ )
تعوذت من ابليس وسحبت نفسها وهي توقف قدام المرايه تلم شعرها وتنزل بسرعه تسبقه قبل يطلع من غرفة الملابس .. طلع نايف من الغرفة استغرب ماحصلها بالسرير : صحت اكيد ..
جهز نفسه ولبس وهو يسحب جواله يشيك ع رسايله وهو ينـزل .. عقد حواجبه وهو يشم ريحة اكل , انتبه لها وهي بالصالة وتصفف الصحون بالطاوله .. حس بربكتها لما طالعها .. صرفت عيونها وهي تنطق : لا تطلع قبل تفطر ..
نايف رفع حواجبه بدهشه : ليش كلفتي على حالك ارتاحي كان
ابتسام :مرتاحه ماعلي .. انت افطر اهم شي
هز نايف راسه وهو يجلس بهدوء ... رفع عيونه يطالعها وهي جالسه قدامه ببجامتها الحريريه الحمراء .. وشعرها الأسود مسدول مع بياض بشرتها .. وبعيونها الكحيله تطالع الطاوله ارتفعت عيونها له والتقت عيونهم .. نزل نايف عيونه مباشره يكمل فطوره ..
تنهدت ابتسام وهي تنتبه لنبرة الرجاء بعيونه ترجيها أنها تكون بخير , ماعادت قادرة تخيب هالنظرة .. لازم تكون بخير : ... اعجبك الفطور ؟
نايف ابتسم لها : السم من تحت يديك يعجبني
ابتسام : سم الله عدوك
نايف بنبره هاديه : وعدوك
استمر الصمت لفتره ... كسر الصمت صوت باب غرفة رنيم ينفتح وتطلع وهي تسحب دميتها وراها وتفرك عيونها وشعرها طاير : ابتســام ..
ابتسمت ابتسام : رنومــتي صحيتي
التفت نايف وهو ينتبه لها شهق وهو يناقرها : رنيـــــــــــم ! وش هالقشه !!
رنيم وهي تدرعم لحضن ابتسام دون ترد عليه وتستلقي ع حضنها : ....
نايف : شف المصدوعه خليك نايمه بسريرك اجل جايه تغثينا ؟
مسحت ابتسام ع شعرها بهدوء ...
نايف شرب كاسه بمره وحده وهو يوقف : يله انا تاخرت .. ( وقف بتردد لوهله وطالعها ) ابتسام
ابتسام اللي كانت مشغوله تلعب بشعر رنيم : هممم
نايف : خل نطلع اليوم لحالنا نتعشى برا
ابتسام : اممممـ ... ما ادري ما اتوقع ..
نايف تغيرت نبرته للجديه : ابتسام .. مو عشاني احبك تكلميني بمزاجك وتضايقيني وتتعمدين تنرفزيني لانك واثقه بمكانك عندي .. ترا الشي لا طال الرجا فيه ينعاف
ابتسام حست انها فعلا جالسه تعاقبه ع حاجه ماهي ذنبه .. هزت راسها باقتناع : ع خير اجل
ابتسم برضا وهو ينطق : اشوفك الليلة اجل
طـلع وابتسام تنهدت براحه .. وهي تحس كربتها انفكت شوي , انحنت لرنيم اللي جت ونامت بحضنها وهي تبوس خدها : فديت مزيوني انا
دق جوالها .. طالعت المسج الغزلي المرسل من نايف /
كانت الذكرى بغيابك تحتريني
كل ليلة أشتكي من شوقي لك
عانقيني , اجمعيني ولملميني
خلي لو هالليلة بس أستاهلك !
فكرت تتجاهل الرسالة لكن حست ماعاد فيه داعي لانها بجد صارت راضيه .. ردت عليه برساله /
كنا افترقنا البارحه ,
والبارحه صارت عمر
وهالليله عيت .. تمر
ابتسم نايف والفرحة مو سايعته وهو يحمد ربه اللي رجعت طبيعيه مثل قبل ... دق جواله رد ع المتصل : هلا يبه
ابو نايف : وينك !
نايف استغرب نبرته : بطريقي للدوام . . تامر شي ؟
ابو نايف : حاول تكنسل دوامك اليوم وتعال البيت ابيك ضروري
نايف : عسى ماشر ؟
ابو نايف : تعال وبس !!
تسكر الخط .. طالع نايف جواله وهو مستغرب , ماطال استغرابه وهو يتنهد : ايش مسوي هالمره بعد يالؤي ؟
***
بدر اللي كانت عيونه مركزه على جهازه اللوحي وقهوته بيده الثانيه ويمشي لوجهة اجتماعه قاطعه صوت مسعود : استاذ بدر !
بدر وقف وهو يلتفت : هلا مسعود شبغيت ؟
مسعود اللي كان بيده ملف : هذا الملف بريد فراس حاولت اتواصل معاه مايرد والبريد اتوقع ضروري .. تقدر توصله له ؟
بدر وهو ياخذ الملف : مافيه مشكله خلاص انا بحطه له بالبيت
مسعود : مشكور اهم شي لاتنساه هنا واللي يعافيك لايسوي لي مشكله يعني خبرك ماني ناقص مشاكل
بدر وهو يضرب بخفه ع كتفه : ههههههههههه لا تحاكي خلاص اعتبره وصل بوديه اللحين سيارتي عشان تتطمن اني ماحنساه
مسعود ابتسم : ماتقصر
نزل بدر لسيارته المركونه يحط فيها الملف .. قبل يرمي داخل السياره وقف برهه وهو يفتح الملف وطلع منه مجموعة رسايل .. جلس يقلب فيها وهو يشوف الاسماء المعروفه بالصناعه والتجاره .. هز راسه : ما شاء الله عليك يا فراس ماخليت احد ماوصلته ( عقد حواجبه وهو يتعرض لاسم اجنبي من مستشفى بالخارج ) غريبة وش مستشفاه ؟!
تو بيفكه بدافع الفضول لكن قاطعه صوت جواله ينبهه لموعد الإجتماع .. تراجع وهو يحط الملف بسيارته ويمشي مباشره لاشغاله ..
***
وصـــل نايف للبيت دخل وهو ينتبه لهدوء البيت ... حصل ابو وامه وميهاف بالصاله جالسين بهدوء يخطف الأنفاس .. هدوء يكتم وعلى وجوههم الطير .. ما حرك الجو الا نظرة ابو نايف لنايف وهو يسأل بصيغة صارمه : جيت ؟!
انتبه للهم بوجه امه .. وميهاف الحساسه الدمعه حابسه نفسها بمحاجرها .. عقد حواجبه : ايه جيت , شالسالفه عزا بالبيت ؟
ابو نايف بنفس النبره : آجلــس
نايف ساير الجو وهو يختار يجلس بكنبه مفرده .. : وجلست .. انطقوا والله اشكالكم جابت لي خنقه
ابو نايف بهم : لؤي اخوك رجع بنت ابليس وبنتها للسعودية
نايف كان متوقع .. عفوا كان متأكد .. رفع حواجبه وهو يجاوب باقتضاب : اهـــا ..
ابو نايف : وما اكتشفت هالشي جا وصارحني بنفسه .. وزيادة الخير خيرين جالس يتحداني انه يا نقبلها يابيروح وياها
نايف : اخيرا سواها
ابو نايف بعصبيه : نعــــــــــــم ! وش قلت ؟!
نايف ببرود : كان واضح انه بيسوي كذا من أول .. استغربت انه تاخر بس
ابو نايف نقل بصره بين ام نايف ونايف : بتجلطني انت ؟!
نايف : يا يبه حط اصبعك بعينك مثل ماتوجعك توجع غيرك .. تخيل نفسك محروم من ميهاف وممنوع تربيها وتقابلها , ايش كنت سويت؟
ابو نايف وقف وانفعل بقوه : تقارن وضعي بوضعه !! تقارن اختك بالسلقة وبنتها ... متأكد حضرتك انها بنته !! وحتى لو كانت كان صارت بالحلال والكل يدري و ..
قاطعه نايف : وكنت حتوافق ؟ لو جاك وقالك بالحلال احب وحده اجنبيه وبتزوجها ؟
ابو نايف شد قبضته وهو يطالعه نايف بنظرات ناريه : .....
نايف بنظرات قوية واثقة وهدوء : شفت .. ماكنت حتوافق واللحين تعاتب ؟ طبيعي اذا قلت لا دايم راح تلقى ناس يسوو كلش من وراك
ابو نايف : الله يرحم ايام صغركم بس قبل يطول لسان كل واحد ويصير له راي وشور !
نايف : كان ياما كان وماعاد احد مثل ماكان .. خلاص يبه الولد كبر ولو يبي يتخذ هالقرار ترا يقدر
ابو نايف بشدة : ع جثتي والله مايسويها !!
نايف تنهد : وينه هو اللحين .؟
ابو نايف هدى نفسه شوي وهو يرجع يجلس : فوق مقبور بغرفته
نايف طالع امه : وانتي ايش رايك يمه ؟
ام نايف وبصوتها عبره ع حال ولدها : والله مدري وش اقول بعد .. صعبه نراعي رغبة اخوك اللي يطلبه مستحيل , من وين نجيب البنت وبنتها بياكلون الناس وجهنا من متى والبنت عندهم ؟؟
نايف بضيق : ياليت هالناس بالداهيه وحنا بسلامه
ابو نايف : إلا ياليت اشكال هالحريم بداهيه ضيعوا عيالنا !
نايف : وايش ناوي تسوي اللحين ؟ يعني اذا اصر لؤي مره إلا ياخذها يعني
ابو نايف بكتمه : وقتها لا هو ولدي ولا اعرفه ولا يعرفني
نايف : والبنت وين اللحين ؟
ابو نايف : وصيت عليها من يجيبها لي .. أبوريها شلون تاخذ ذاك المبلغ وتنقض وعدها وترجع تعطيه وجه
نايف : سو هذي الخطه العظيمة اللحين ؟ تفريق شملهم وبس ؟
ابو نايف بعصبيه وهو منزعج من نبرة نايف بكلامه : ايه !! عندك اعتراض ؟
نايف وهو يرتخي على الكنبه ويشبك يدينه سوا وينطق بهدوء : سلامتك انت ادرى
ميهاف تنهدت بكتمه وهو توقف ... ابو نايف بعصبيه : وين !!
ميهاف بهدوء : بصعد شوي اشوف لؤي .. من امس مو ماكل شي ولحاله
ابو نايف بعصبيه : اتركيه بالطين لحد مايلين ولحد يوصل له شي
ام نايف : شفيك يابن الحلال اتركها تفطره وتشوفه اخوها !
ابو نايف واعصابه ضاربه : انتي صــــااااه
ام نايف تنهدت بضيق : ان شاء الله
ميهاف بخنقه : آجل صاعده غرفتي ..
وماتركت مجال للرد وهي تمشي بخطوات متسارعه لحد ما اختفت فوق ... تنهدت بضيق وهي توقف بطريقها لغرفتها وتطالع غرفة لؤي , ماهان عليها توصل غرفتها دون تشوفه ... خذت نفس وهي تطق الباب .. جاها رده : من ؟
ميهاف : انا ميهاف لؤي ممكن اكلمك دقيقة ؟
لؤي اللي كان معتكف من امس .. وسمع ضجة اخر الليل وابو نايف يعطي ام نايف وميهاف الخبر وشاف سيارة نايف برا , يعني اكيد الكل يدري اللحين ..: تفضلي حياك
دخلت وهي تبتسم ك بداية : صباح الخير
لؤي : صباح النور هلا عيوني
ميهاف : وانا اقول شفيه البيت منور من امس .. اثر لؤي بعد عمري عندنا
لؤي باستهزاء : لا مره واضح
ميهاف تنهدت وهي تجلس جمبه ع كنبته : انا اقول مصير هالسحابه السوداء تمر .. لا تتخاذل على طول
لؤي : طولت ياميهاف .. طولت هالسحابه وهي تلاحقني مو عارف لمتى ؟
ميهاف : الله يهديك يا أخوي .. ليش ما اخترت لك طريق اسهل ؟! ليش سويت كذا فنفسك
لؤي : طلبتك ميهاف براسك عتاب قوليه لغيري والله مو طايق كلمه زياده
تنهدت بخيبة : الله يريحك بس ..
لؤي بانفعال : حاس نفسي مخنوق مره .. اشياء كثيره قررت تجي مره وحده وانا اخترت اضل مكاني لاني بساطه ماعندي خيار ثاني .. عارفه ايش قلة الحيلة اللي جالس احس فيها ؟
ميهاف بنعومتها المعتاده : انا تعودت عليك دايم بوجهك المبتسم وقلبك الحالم .. دايم تجامل وتتجمل هذا طبعك عشان كذا ابوي ماتعود عليك كذا
لؤي : عارف هذا طبعي وللحين انا كذا .. اذا فرحت افرح اللي حولي واذا تضايقت ما اتمنى اضايق اللي حولي بس ابوي جالس يعاملني كاني لسى بالمتوسط .. لمتى يعني !!
ميهاف : ... اعذره لؤي ابوي تفكيره غير عنك .. يعني فكرة زواج وبنت فجاة يعترف بهم الكل راح تكسر ظهره , الحكي ماراح يرحمه
لؤي : هذا اذا اعترف بها اساسا .. ناوي يكسر خشمي بس مو هالمره
ميهاف بقلة حيلة : الله يصلح الأمور
لؤي ابتسم دون نفس : غثيتك بمشاكلي وانتي مو ناقصة بعد
ميهاف بمرح : خل اشوف مصيبتك كود تهون علي مصيبتي
لؤي : هههههههههههه سلامتك وانا اخوك من المصايب , خسارته بدر
ميهاف ابتسمت ابتسامه صفراء : الله يسهل الأمور بس ..
لؤي : وانتي وش مصبرك عليه ترا مليون غيره يتمناك اذا هو رافس النعمه بهالشكل ؟
ميهاف فتحت عيونها بصدمه وهي تفسر كلامه : قصدك اتطلق ؟
لؤي : ليش مصدومة . ؟ لمتى بتحترينه
ميهاف بزعل : لا لؤي لاعاد تجيب هالطاري تكفي انخنق .. انا مستحيل اتطلق من بدر , انا ماني قد اني اصير مطلقه
لؤي ابتسم : تحبينه ياتافهه ؟
ميهاف : مو رجلي اكيد احبه .. وبعدين ايه تافهه اساسا لازم نحافظ على الجزء التافه بشخصيتنا عشان نضحك دون سبب ونبكي دون سب ونحب دون سبب .. ما ضروري نسأل لازم نتعايش مع اللي حولنا بس .. ( ابتسمت ) حتى لو كان بدر راح اتعايش معه
لؤي : يابخت عينه بدر ياليت اللي عندي تتعلق فيني نص تعلاقك ولا راح اطلب شي
ميهاف : من جد لؤي هي ماتبيك يعني ؟
لؤي : مو سالفة ماتبيني .. بس مخوفتها ظروفي وباعتني وشرت راحة راسها وهذا عتبي عليها , ما ادري كيف ترتاح وانا اللي ماذقت طعم النوم بغيابها
لؤي : نايف تحت ؟
ميهاف : ايه ابوي ناداه .. وخبرك بنايف تفكيره نفسك بس ماراح يقدر ع ابوي
لؤي هز راسه : ......
انفتح باب الغرفة وابو نايف نطق بقهر : ماخلصت اعتكاف بغرفتك ؟
ضاق الهواء بلؤي وهو ينزل راسه : هلا يبه ..
ابو نايف : اعترف اللحين احسن لك وبلا لعب .. البنت وينها ؟!
وقف لؤي وهو يفتح عيونه بصدمه : يعني دورتها ؟!!
ابو نايف: لا بجلس اتفرج عليها تلعب براسك اكثر مثلا ؟
لؤي : من قــال ..
قاطعه ابو نايف بصوت عالي هز البيت : اقـــــــــــــــــــولــــــــــــك ويـــــــــــــــــــــــــنها انطـــــــــق !!!!
نايف وام نايف تحت فزوا من صوته وركضوا لفوق وهو يشوفون ابو نايف عند غرفة لؤي .. نايف : يبه هذا اللي صاعد بينام ؟!
ابو نايف : بطريقي لفوق جتني مكالمه ماحصلوا ملعونة الخير .. وقلت اسأل خروفها وين مخبيها ؟!
لؤي وكرامته اهتزت من تحقيره : الله يهنيك بعقلك بس
ابو نايف استفزته الكلمه تهجم عليه لولا رد نايف له : يبــــــــــــه اركد شوي !!
ابو نايف وهو يمد يده ويهاوش : ناقد ع عقل ابوك اللي رباك وتعب فيك !
لؤي بقهر : بحترم عقلك وقت تختار تحترم قراراتي بدل انك تقتنع فيها ! مو ضروري تقتنع ايه بس تحترم قراراتي هذا اللي ابيه ماعدت بزر اخذ اذن منك في كلش
ابو نايف : آخخخ يالجبــــان بس تقولي هالحكي وانتي اللي متزوجها بالسر من الخوف اللي فيك !
لؤي : أيه انا ضحية الجيل الخايف اللي كان قبلي .. ومو راضين للحين تفهمون حرية الراي
ابو نايف خلع عقاله وهو يرميه عليه من ورا نايف .. ميهاف وامها صرخوا برعب من العقال اللي طاح ع كتف لؤي : حســـبي على من سمم راسك بهالافكار ! من قالك جيلنا كان خايف ! جيلنا هو اللي عاش على الاصول دون هبال هالجيل وصداعه
لؤي بقهر : بعض وجهات نظرك تخليني اتاكد ان عندك ضعف بصيرة ..
ابو نايف : انا اللي فيني خير اللي مارميتك للحين وتبريت منك وافكار النجوس اللي براسك
لؤي وهو ضاق بها نفسه : لا تغتر بنفسك يبه كلنا نحسب انا طيبين ونستاهل كل خير حتى الجبابره اللي شنقوا وعذبوا شعوبهم كانو يحسبون انهم طيبين ويسوون خير
ابو نايف رجع يتهجم ونايف يمنعه وهو يصرخ بلؤي : لــــــــــــــــؤي خلاص انشعم !!
ابو نايف صرخ بكل قوتـــه : برا بيتي انقلع لاني ابوك ولا اعرفك ! والله لا ادعي عليك ليل نهار ولا ارحمك ووش مايصير فيك ماني مسؤول
لؤي عض شفته ودموعه حبيسه محاجرها : .... ليتك تقدر تقبلني دون شروط
ابو نايف : اقول اذلف خل الشارع يلمك انا ما اربي عيال عندي يتطاولون على اهلهم
ام نايف اللي كانت تضرب فخوذها بحرقة صدر : عبدالرحمن عشان خاطري لا تنفعل لهالدرجة خلاص اسفهه سفيه .. لاتطرد ولدي والله لا اموت عقبه
ابو نايف : ودك تنقلعين وراه انقلعي بعد انتي ! وكل من بغى يذلف يذلفف !
افلت ابو نايف نفسه من نايف وهو يرمي كلمته قبل يتوجه لغرفته : والله وعزته وجلاله لو اطلع لصلاة العصر واحصلك هنا لا اذبحك .. سامع ؟!!
ام نايف طاحت على الارض وهي تبكي : ليش صار كذا ليش ( طالعت لؤي ونطقت بقهر ) وانت يالقليل التربيه تكلم ابوك كذا ؟!! كذا ربيتك ؟!!
لؤي وكأن رجله بالقوه كانت شايلته قدام ابو جلس ع كنبته بتعب وهو يحضن راسه : . . . . . .
نايف : لا حول ولا قوة الا بالله ... قومي يمه الحقي ابوي كود انه يسمع منك ! وش هالحالة اللي وصلنا لها ؟
ميهاف ساعدت امها تقوم وهي تطلع ... تنهد نايف وهو يطالع لؤي ويمسح ع وجهه بارهاق : لؤي ..
لؤي مارد وهو حاضن وجهه : ................
نايف بعتب : ليش ما احترمت نفسك قبل شوي ؟ كان حطيت درع قدامك من ابوي .. طولة لسانك تركته ماعاد يطيق يصبر عليك حتى .. مو كذا الامور تنحل ترا
لؤي نزل يده من وجهه وهو يضم ذنه وعيونه حمراء : شي يضحك اني جالس اسمع هالحكي منك ؟
نايف رفع حواجبه : طايح من عينك يعني ؟
لؤي : لا بالعكس انا احسدك .. ليته ابوي يشوف غلطاتي مثلك كنت بخير ! محد جاب العيد بهالعائلة كثرك مع ذلك ابوي كان يعرف يصبر .. وعلى حظي انا بطل يصبر .... مو لأنك عقلت هالسنه بس تعطيني محاضرات
نايف عقد حواجبه : متأكد انك لؤي ؟ شفيك صاير بالك ماياسع احد
لؤي وقف وهو يتوجه بانفعال يسحب شنطته وينطق بقهر : فاااض كاسي نايف فاضض وبزياده بعد ... لمتى ببلع انا ومحد حاس فيني!
نايف : اوكيه تمام هد شوي .. ماله داعي تهاجمني يعني
لؤي : قلت لك الحق .. ما تشوف ان كلامي صح ؟
نايف : صح وغلط .. يعني صح انا غلطت كثير بس ترا مافي قاموس غلطاتي بنت زنا
نايف مايعرف كيف بلحظه صار لؤي قدامه وشاد ياقته وينطق بين اسنانه : اسحبها !
نايف رفع يديه : سحبتها اوكيه انا اسف . . انت هد اعصابك اللحين ونتفاهم
لؤي وهو للحين شاد ع ياقته : بنتي ماجت من الشارع .. الموضوع كله حلال بحلال .. احترم مناطقك لو سمحت
نايف تنهد : العالم راح يقولون كذا لو يدرون .. وابوي ماراح يتحمل فلا تحاول بهالموضوع ..
لؤي : مثل ما تحمل طردك من ديره كامله .. خل يتحمل زواجي
افلت نايف وهو يطلع ... تنهد نايف بضيق وهو يعدل ياقته ويجلس بتعب ع اقرب كرسي جمبه ويمسج جبينه بيديه : ...
اول ماطلع لؤي اخذ له تاكسي وهو يرسل لها رساله يشكي لها حاله .. صاير يحس بضياع مو طبيعي :
في ذمتك , لو يلزم الشعر السكوت , واحتاج لك دمعه وصوت
تقدر تجي ؟
ولو تصبح ايامي شتات , واصد عن كل الجهات , واحتاج لحظة " ضمتك " في ذمتك :
تقدر تجي ؟
***
غـادة كانت بالمطبخ مع ام فراس وتحرك على الغداء وام فراس بجوالها تكلم مع فراس وبصوتها احباط : خلاص يمه اللي يريحك
اول ماسكرت سالتها غادة بفضول : بيجي ؟
ام فراس تنهدت : لا يقول مغدى .. معقول من امس ماجا للبيت , شصاير ؟
غادة حست بضيق صدق وش ممكن يكون صاير : .....
ام فراس : خل مره وحده اكلم اسوم اشوف وش سوو مشوا ولا توهم
غادة : كلمتها انا خالتي طيارتهم بدري خلاص اللحين طاروا
ام فراس : يوصلون بالسلامه ان شاء الله يارب
انتبهت غادة لصوت رجولي يتنحنح يدخل البيت : خالتي هذا اكيد بدر
ام فراس : يله اجل بروح اشوفه
طلعت انتبهت له واقف عند انس اللي متكي ع الكنبه بجواله: هلا يمه جيت .. نكب الغداء يعني خلاص ؟
بدر وهو ياشر لها بالملف : ايه وهذا الملف عطوه فراس فيه بريده وما أدري ايش
استلمته ام فراس وهي تعقد حواجبها : ليش ماعطيته اياه بالدوام ؟
بدر وهو يصعد : ماداوم اليوم
ام فراس استغربت ماجا امس ع اساس عنده شغل .. معقوله يكذب عليها , الله يهديك يافراس اشغلتني : ....
جلست الملف على الرف بالصاله وهي تدخل تجهـز الغداء
***
لــؤي حس بلخمه وهو يشوف الشقه فاضيه من اغراضها واغراض مايا !! معقولة سافرت صدق ... طلع جواله وهو يدق عليها ماترد جوالها مغلق ... هز راسه بانكار : لا لا لا لا لا لا تكفين لاتقولين سويتيها مره ثانيه وسافرتي ! والله ما اتحمل
دق مباشرة على فراس رد عليه : هلا
لؤي وبنبرته هلع : فراس !
فراس : عسى ماشر شفيه صوتك ؟
لؤي : سارا شكلها سافرت
فراس ببرود : قلعتها باللي مايردها
لؤي : خاف ربك فيني يافراس لاتقول كذا ! انا عشان منو اجل طرحت نفسي من عيون ابوي ؟
فراس : اسأل نفسك يافالح
لؤي : تقدر تشيك لي اذا هي سافرت او لا ؟
فراس : اقدر بس ماعندي نيه اسويها .. لؤي طلبتك ارجع لعقلك واستسمح من ابوك وسكر هالمشكله
لؤي بانفعال : أي ابوي !!! اكلمك اللحين عن بنتي رجعت تاخذها ... ابوي ما عليه شر
فراس : قايلك من اول لا تبالغ في رفع قدرها عشان ما تنصدم
لؤي : وانا اقولك لا تبالغ في ذمها عشان ماتظلمها !
فراس : اظلمها طل .. والله ان نيتها ..
قاطعه لؤي : يا فراس شفيك انت عامل الناس على اللي يظهرون لك خل السراير للي عنده علمها
فراس تنهد بضيق : تطمن البنت ماسافرت .. ولا تسألني اكثر من كذا
لؤي بصدمه : عندك ؟
فراس : قلت لا تسأل .. قلت عشان اريحك بس , بس و حياة اعز ماعندي ماتطولها لين تراضي ابوك .. ما لك قيمه دون رضاه
لؤي : ما أقدر فراس هو اللي اجبرني اكون كذا .. ولا ع بالك انا راضي عن الكلام اللي قلته له ؟
فراس : اجل بحجز طيارتها الليلة باذن الله
لؤي : فراس !
فراس بجديه : لؤي انا ضاقت فيني دنيتي .. لي فوق السنه ماذقت الراحه بسببك انت وهالسالفه , خلاص عطيناها اكبر من حجمها والله وماكان بخاطري اتدخل وابعدها من عمي بس انا قلت يصير كلش بالتفاهم احسن
لؤي بكئابه : ماهقيت فيه تفاهم مع ابوي
فراس : اجل اعذرني في اللي راح اسويه
لؤي : الله لا يحللك
فراس : لا تحللني منت أول واحد .... ابوك تو دق علي وطالب مني اجيه , ياليت القاك هناك باخلاقك اللي متعودين عليها ولا سارا تراب ديرتها اشتاق لها
سكر فراس السماعه وهو يتنهد بضيق .. تو بيلتقط نفسه دق جواله امه .. رد : سمي
ام فراس : فراس ! وينك انت ؟
فراس : مو قلت لك مغدى
ام فراس : وصبح ؟! مو ع اساس ماجيت عندك شغل وبدر يقول انك ماداومت
فراس تنهد : شغل مو بالشركة .. خلاص ؟
ام فراس : تكفى فراس لا تشغل خاطري قول الصدق وين كنت ؟
فراس : والله كنت بشغل .. وهو شغلي كله بالشركة ؟!
ام فراس : اكيد
تنهد فراس : اكيد
ام فراس : طيب متى بتجي البيت .؟!
فراس : ما ادري والله الليلة ان شاء الله
ام فراس : خلاص نستناك على العشاء ان شاء الل
فراس : ان شاء الله
سكر السماعة تافف لان جواله رجع يدق .. كان الشركة سكر جواله دون يرد لانه وصل عند عمه , نزل وهو يضرب الجرس فتح له ابو نايف مباشرة ودخل المجلس دون أي كلمة .. استغرب فراس هالمعاملة لكن تبعه بهدوء جلسـوا وكان نايف داخل موجود .. : السلام عليكم
نايف اللي كان متربع وضام يدينه رد بهدوء : وعليكم السلام والرحمة
جلس فراس وهو يكسر هدوء ابو نايف : عازمني عشان نسرح ببعض كذا بس ؟!
ابو نايف بهدوء غاضب : وين سارا آلتبن ؟!
فراس عقد حواجبه باستنكار : وليش تسألني انا ؟!
ابو نايف : اسألك لانك تعرف .. انت الوحيد اللي بيقدر يخبيها بحيث ما القى لها أي خيط
فراس : يقولك المثل أحسن ظنك بالناس كانهم كلهم خير .. وشوله تشك انها عندي ؟!
ابو نايف : يمكن لأنك الوحيد اللي تعرفها وخشيت خبرها عني مع لؤي
فراس : انا ما خبيت شي .. سكت عن الموضوع لانه مايعنيني ولا حبيت اتدخل , ولو كنت بختار شي كنت بختار ان لؤي مايمون علي ويقولي من البدايه اساسا
ابو نايف : فـــراس ! لا تخبي عني ترا لو اعرف بعدين ان لك يد بالموضوع لاني عمك ولا اعرفك
تنهد فراس بضيق : ياعمي استهد بالله اللحين .. ابسألك ؟ لوين ناوي توصل مع لؤي ؟
ابو نايف : هو اللي يطرح اللي براسه ! انا ابوه يطيعني وهو مايشوف الدرب
فراس : وهذا اللي سواه طول عمره .. بس اللحين متعلق حيل وصدقني انا حاولت بكل الطرق قبلك ! يعني اذا ناوي تسفرها ترا انا سفرتها قبلك ولحقها
ابو نايف : وانت وش تنصحني يعني ؟ اقوله هات بنت ابليس وبنتها وحياكم الله والبيت بيتكم ؟
فراس : انصحك تاخذ وتعطي معه .. وتتنازل عن شي مقابل شي
نايف : معه حق فراس يبه صدقني الامور ماتستاهل توصل اكثر من كذا
ابو نايف : حمار انت وياه !؟ وانا وش سويت هالسنه كلها ؟ مو عطيته اللي يبي ؟! بغى يطلع من البيت تركته ! بغيت اهديه باع هداياي .. بغيت اكلمه صدني واخرتها يجي اليوم لسانه وش طوله ؟!!
نايف : واضح انه مو بوعيه هالفتره .. فراق بنته موتر اعصابه عشان كذا
ابو نايف قاطعه : وانا فراق ولدي موترني !! يعذرني بعد انا ! إلا انا بقولك انت وياه بدال ماتتشاطرون علي ورى ماتكلمونه هو ؟!
نايف : كلمناه يبه اجل ماكلمناه ؟
ابو نايف : انا كلمتي وحده ! ( التفت لفراس ) البنت وينهــــــــا !!؟؟
فراس تنهد باستسلام : راح اسفرها لاتخاف
ابو نايف : ولاني واثق فيك ! هات اسفرها انا
نايف : يبه ماودك طيب اقل شي نشوف بنته ؟
ابو نايف بعصبيه : خل مني المسلسلات التركيه اللي اشوف بنته واتأثر واوافق ! والله ماتصير
نايف : حسافه اجل مناب تركيين
ابو نايف بصرامة : نايف !
نايف سكت بينما نطق فراس باتزانه المعتاد : عموما انا البنت بسفرها .. وانت غلطان اذا كنت تحسبني واقف مع لؤي في هالموضوع , انا ضد وجهة نظره تماما بس برضو انا ماودي نخسر الولد عشان هالموضوع .. وعندي امل ان الموضوع ينتهي بقناعته ..
ابو نايف بقهر : وعلى بالك انا بخاطري اخسر ولدي يعني ؟ بس ماعاد ترك لي وسيلة
دق جوال ابو نايف تنهد بضيق وهو يوقف ويطلع يستلم المكالمة بينما التفت نايف لفراس : احساسي قارصني .. ما اتوقع نهاية هالسالفة خير
فراس وقلبه قابضه بنفس الإحساس لكن نطق بانكار : تفائل .. ان شاء الله خير ..
***
غــادة /
على أذان المغرب نـزلت بضجر وهي منقهره انه من أمس ماجا للبيت .. وش ممكن يكون صاير عشان للحين ماله حس ؟! , حصلت ام فراس بالصالة ونطقت بضيق : خالتي شفيك جالسه لحالك ؟
ام فراس : مو لحالي والله .. تو انس طلع للصلاة وياسمين صعدت تصحي بدر للصلاة
غادة قبل تجلس انتبهت للملف باسم فراس : خالتي ايش هذا ؟!
ام فراس : اييه .. هذا بدر جابه اليوم معه بريد فراس
غادة هزت راسها : اهاا ( نطقت بمرح تحاول تلطف الجو ) هههههه مريت غرفة اسوم قبل انزل يابعد عمري نظيفه مره اول مره اشوفها مرتبه
ام فراس : ما انصحك تفتحين الدواليب نظام تدعيس الله يهديها
غادة : يؤ ! ليش ماخذت كل اغراضها ؟
ام فراس : لا على كلامها بعدين تشوفها لان فيه كثير منها راح تصرفه
غادة : تصدقين بخاطري ادق عليها بس اقول مسكينه خل تنبسط هالفتره مو ناقصتني
ام فراس : دقي ياقلبي ياسعد يومها اللي بتكلمك فيه
غادة وهي ماتتخيل ردة فعل هيثم لو يكون جالس معها بجو خاص وهي تدق : لا لا مافيه داعي .. اكلمها بعدين اكيد اللحين واصلة من السفر وتعبانه
سمعت صوت حنحنه بدر فوق : فيـه احد !
ام فراس : دقيقة اصبر
راحت غادة للغرفة الجانبيه بينما نزل بدر وهو يطالع الملف بضيق : ما جا فراس اجل ؟
ام فراس : لا
بدر : اجلا لا تتركونه بالطاوله هنا لا يصير لها شي فضحني
ام فراس : خلاص بنشيلها لغرفته
بدر : تدرين شلون ( انحنى ياخذها ) بخليها معي لحد ما اقابله واعطيه اياها ( كمل بمزح ) خل بالمره ناخذ نظره على رسايل فراس الخاصه وش ممكن يكون فيها
ام فراس : تسوي خير اجل
غادة ماتدري ليش قبضها قلبها لما قال رسايل خاصه .. قادها حدسها انها تنطق بصوت مسموع : بدر اخوي ...
بدر استغرب اول مره يسمع حسها .. عقد حواجبه وهو يهمس لامه : هذي غادة ؟
ام فراس اشرت له بايه .. رد : هلا سمي
غادة : لا تشيل هم الملف اتركه عندك وانا اللحين بصعده معاي فوق هو اساسا تو دق علي ووصاني عليه
بدر انحرج : خلاص اجل هذا هو تركته خذيه معك
غادة : ان شاء الله
جلس بدر الملف وطلع .. طلعت غادة مباشرة لتقابل نظرات ام فراس المستنكره : فراس داق عليك متى ؟
غادة بربكة : آيـ...آيه داق علي عشان الملف ( كملت بمرح ) هههههه بغى ياكلني عنده شكله مهم ( خذت الملف ) راح اصعده معاي اللحين فوق
***
جنــاح العرسان بفندق راقي بماليزيا كانت جالسة بالغرفة تمشي بالكريم ع وجهها وترش عطرها على مايخلص شاور .. سحبت محفظته بملل لحد مايخلص وهي تنتبه لتفصيلها العملي واضح قديمه شوي .. ابتسمت بحماس : ذكرى اسبوع لزواجنا قربت بشتري له محفظه !
فتحتها وهي تنتبه لاوراق كثيرة تخص الشغل ... وبطايق وخبصه كثيره انتبهت لنبرته المازحه وراها : حتى الحراميه يعطونك مجال تختار بين حياتك وبوكك بس الحريم مايخيرونك ياخذونها كلها !
شهقت بخبه والمحفظه تطيح من يدها ... انتبهت لابتسامته الجذابه وهو يدعك شعره بالفوطه ينشفه : بلشنا من اللحين حركات فتح البوك ؟!
اسماء برطمت وهي تنحني تلتقط بوكه وترجعه مكانه : والله ماخذيت شي بس حبيت اشيك ع شكلي قد ايش يجنن وانا متكيه بكرت العائلة معك
هيثم وهو يرمي بجسمه على الكنبه : حسستيني كرت العائلة ديوانية تتكين فيها ؟!
اسماء وهي تمشي ناحيته وتجلس جمبه : هش بس .. يكفي اني البيت ترا للحين منقهره
هيثم : خذيتي حقك وزياده اذا انتي بيت ترا انا سياره
اسماء : وحده بوحده والبادي اظلم .. والله لو اني وحده من الشارع عشان يصير هذا اسمي
هيثم : هجل هذا مقياس المعزه يعني !؟ اسم جوال !!
اسماء : يعتبر احد مقاييس الحب .. ايه !
هيثم : لا مو صح ! تعرفين اللي يحبك وقت يشيل همك معك ويسآل عنك .. ومايمل منك ويسامح غلطاتك ويذكرك بربك .. اما اسم الجوال راح ولا جا يضل اسم جوال !
اسماء : انا ماني احبك احترم نفسك ! انا اعشقك
هيثم ابتسم لها وهو يسحبها من يدها لحضنه : آدري
اسماء : حتى وقت كنت تحقرني زمان وماتعطيني وجه .. واحيان تهاوشني مازلت احبك
هيثم : ولو جرحتك ؟ بتضلين تحبيني ؟
اسماء تنهدت بحب : قد صارت .. وحبيتك اكثر بعد , يقولك محبة الجرح من محبة الجارح
هيثم : طلعتنا مو جراح عظام بس يعني ؟ جراح مشاعر بعد ؟
اسماء رفعت حواجبها : شايف كيف ؟ ( كملت سوالف بحماس ) تصدق حبي كيف صرت جراح ؟ مو صعب ؟
هيثم : بس كان حلمي وهذا اهم شي , الشي الوحيد اللي ممكن يمنعك تحققي حلمك هو الخوف من الفشل وانا ماخفت بيوم اني افشل
اسماء : تصدق ماعمرك سولفت لي عن حياتك قبل .. بجده يعني , حتى ابوك الله يرحمه ماكلمتني عنه
هيثم بضيق : ما أحب اتكلم عن هالامور بصراحه
اسماء بقهر : ترا شعور اني احب واحد بخيل حكي شعور يتعب !!
هيثم : مو سالفة بخيل .. بس بجد مرحله وراحت بخيرها وشرها ماعاد ودي اتكلم فيها ( بعثر شعرها بيده ) قومي نامي بكرة ودي نصحى بدري نطلع
اسماء : اوكيشاه بقوم .. بس يله محاوله اخيره ماراح تغير اسمي ؟
هيثم : بغيره بكتب القلق ! زين ؟
اسماء بقهر : لاااااااااااا
ابعدها من حضنه وهو يمشي لسريره يستعد ينام : هجل اسكتي رسميا راح تتمين 24 ساعه وانتي مامليتي من نفس الموضوع
اسماء : لانه يغبن ويقهر ! مابي اصير بلكه !
تاففت بقهر وهي تنتبه له يستعد ينام ومايرد عليها .. صحت تلبس بجامتها وهي تتهيئ لمحاولة اقناع ثانية دول كلل ..
***
إبتسـام كانت جالسة مع المربية بعبايتها وكل دقيقة ترفع عيونها للساعة .. تاففت من تأخيره هذا وهو اللي مصر على الطلعه ! استسلمت وحاولت تدق لكن مافيه رد ..
انقهرت من نفسها واضح انها مصابه بمرض عضـال أسمه " بصيص أمل بنايف " وبكل مره يخيب هالأمل .. انقهرت انها رخت دفاعها ووافقت وبالاخير متأخر عن الموعد ساعتين والأغلب انه ماراح يحضر ..تمنت من كل قلبها ذاكره ضعيفه تنسى فيها نسيآنه الدايم لها .. مستحيل تكون من اولوياته مهما حاولت .. كل ماحاولت تكسبه تحس انها تخسر نفسها وشخصيتها .. بنص تفكيرها وقهرها من نظرآت المربيه اللي تطالعها بعبايتها لها ساعتين وتحس انها موجوده على الفاضي جاتها رسالة منه /
( معليش ابتسام انا اسف ماراح اقدر اطلعك اليوم راح اعوضك صدقيني , اكلمك وقت ارجع )
حست الجوال راح يتهشم بين يدينها من القهـر ردت على رسالته واعصابها حبه وتنفجر /
لم يعد يجدي الأسف .
مامضى لن يستعاد والقليل الذي تبقى لايستحق عناء الخطوات .
عـند نايف اللي كان جالس بين فراس وابو نايف اللي نقاشهم ماخلص .. استلم رسالتها وهو يحس بقهر بس وش بيده مايقدر يطلع واهله بهالحالة .. تو بيتكلم في محاولة لأن الموضوع يتسكر اليوم لعله يقدر يوفي بوعده لكن قاطعه نبرة ابوه : انا افكر اترك جده يعرف عن الموضوع ويتفاهم معه
فراس مباشرة : لا ! مو من صالحنا كلنا يعرف جدي
ابو نايف : والله اذا الشيخ لؤي مصمم انه يا ارضى يا يذلف فآخرته عارف !
فراس تنهد : والله مو عارف شاقول لك بس انا مواعد لؤي هنا الساعة 8 .. واللحين الساعة 10
نايف بهمس : ليش واعدته ! مو من صالح احد انه نقابله اليوم .. اتركه يهجد شوي يمكن نطلع بحل
فراس : ما اتوقع من مصلحة الكل ان الموضوع يطول .. مفروض يحل باقصر وقت
دق جوال فراس رفعه بلهفه في أمل انه يكون لؤي لكن كان الشركة اللي تدق للمره السابعه وهو مايرد تنهد بضيق وهو يرد : نعم
مسعود : هلا طال عمرك معليش على الإزعاج والله
فراس : اختصر شعندك ؟
مسعود : حبيت ابلغك ان بريدك الخاص وصل اليوم فجر .. وبما انك طلبت مني اسلمه لك يد بيد واليوم ماقدرت اتواصل معك تركته بيد اخوك بدر , حبيت اتاكد اذا استلمته ؟
فراس تشنج دمه لانه متأكد ان رد الدكتور بيكون فيه : نعـم ؟!
مسعود : ماوصل لك اجل !!
فراس : عطيته بـــــــدر ؟!!!
مسعود بخوف: ايه .. ليش ؟
فراس سكر مباشرة دون يتكلم وتحنحن : اتوقع مافيه فايدة من جلستنا , خل نرتاح لبكره
ابو نايف تنهد بضيق : انا بعد جسمي انهلك ما ارتحت من امس
وقف فراس وهو يطلع ودق مباشرة على بدر لكن جواله مغلق .. ركب سيارته وهو يتوجه مسرع للبيت ويحس اعصابه مضغوطه .. بدر فضولي ومايستبعد انه يفتحه بصفته النائب اللحين !! !
***
نـايف بالجهه الأخرى وصل لبيته وصول متأخر .. كان الأنوار طافيه والجو هادي تماما وهذي أول علامات اكتئابها .. تنهد بضيق وهو يسحب رجله يصعد لفوق .. فـتح باب الغرفة بهدوء , ابتسام اللي كانت مستلقيه وعيونها على الساعة مجرد ماحست بحركته غمضت عيونها .. مالها خلق أي كلمه ممكن يقولها ..
تنهد نايف بضيق وهو ينتبه انها نايمه .. مشى بهدوء لحد ماجلس على طرف السرير من ناحيتها , مد يده بحيره لكتفها يحاول يصحيها وهو ينطق بهـدوء مبحوح : إبتسـام ..
ابتسام : .............
تراجع عن انه يصحيها خل تنام , هو نفسه ماله خلق يتكلم ... نزع بدلته واستعد للنوم وهو يسلتقي وتفكيره يوديه ويجيبه .. وكأن عين صايبته وصايبه أهله مافيه شي مثل اول كلش غير .. حياته الخاصه في توتر وصراع لها شهر .. واهله من اسوأ لا اسوأ .. لؤي ضايع وميهاف مرميه .. ومحد مبسوط ..
صار يحس كل حاجه تعتبر مسألة وقت لحد ماتفسد .. ولا فيه حاجة ممكن تضل نظيفه وسعيده للأبد , ماكان صعب لمريض أرق ان كل هالأحداث تمنعه من انه يتهنى بنومه شدة نشاطه الذهني تحيل بينه وبين الإسترخاء .. كان التفكير ماخذ جزء كبير من عقله ومستحوذه .. سحب كتاب من درجه وهو يشغل النور ناحيته الخافت .. وسحب نظارته وهو يقرا كتاب وهذي علامة الفشل الأكيد في انه ممكن ينام .
ابتسام كانت منتبهه لأرقه لكن ما اشغلت نفسها , كانت حالتها نفس حالته الفرق انها ظلت صاحيه بعيون مسكره
***
وصـل فراس البيت أخيرا .. كانت الساعة 11 ونص لما وصل ... حصل أمه بالصالة واستقبلته بنظرة عتب : بدري !
فراس تنهد وهو يمسح على المكان بعيونه ماحصل شي , هدى اعصابه وهو يدخل ويسلم : السلام عليكم ورحمة الله
ام فراس : وعليكم السلام ... كل هذا تغلي ؟! ماتقول امي بينقطع قلبها تحتريني ؟
فراس وهو ينحني يبوس راسها : يا يمه والله انشغلت من امس للحين تو فضيت احك راسي
ام فراس : وش شغله اللي بيمسكك 24 ساعه ! يايمه اذا فيك شي قولي ترا أي شي يوجعك يهمني
فراس ابتسم وهو يحاول يهدي اعصابها : لو بتفهمين والله شرحت وصدقيني مافيني الا العافيه .. إلا اقول وين اخواني ناموا ؟
ام فراس : لا وين ينامون ينتظرونك عشان نتعشى
فراس : وبدر ؟!!
ام فراس : معشى ماهو موجود
فراس : طيب تمام .. انا بصعد ابدل وبنزل
ام فراس : يله اجل بكب العشاء
صعد فراس وهو يطلع جواله ويدق مباشرة على رقم بدر واعصابه تلعب فيه .. يتخيله فتح الرساله وانفضح كلش .. انشل تفكيره وهو ينتظر الرد .. لكن مافيه رد زفر بقلة صبر وهو يحاول مره ثانية .. اثناء محاولته الثانية كان دخل غرفته ووطى ملف دون يحس عقد حواجبه وهو ينتبه لبريده تحت رجله واضح احد مدخله من تحت الباب ... تنهد براحه اكيد بدر جابه ودخله وماتلقف ... لقط الملف وهو يجلسه على مكتبه ويجلس ... وينتبه للختم موجود ما أنفك .. يعني على قلبه الأمان , دام تطمن على هالسالفة رفع جواله وهو منقهر من لؤي وارسل له رسالة /
شكرا لانك دايم ماتجي عند حسن ظني .
وترك جواله وهو ينـزل , انتبه لامه وياسمين وانس على الطاولة ينتظرونه , جلس وهو مستغرب غادة مب موجوده بالعاده مزروعه بوجهه خصوصا ان بدر مب فيه ... رد على تسائله امه اللي كان السماعه باذنها سكرتها وهي تنطق : غريبة غادة ماترد .. وينها تنزل تعشى ؟
فراس مارد وهو يمد يده ياكل , ام فراس : ياسمين اصعدي شوفيها قولي لها تنزل تتعشى
فراس ببرود : ياسمين خلك مكانك اكيد تحصلينها كلت ونامت
ام فراس : ماظنيتها بتاكل لحالها
فراس : إلا بتاكل لاتشيلي همها ... وبعدين انس جالس نطرده يعني عشان حضرتها تعبي بطنها ؟
انس : ترا انا يمكن اطلع من ربعي بكرة لمزرعة حسام
فراس : وشوله هالطلعة ؟ وبعدين حسام واهله مزرعتهم كلها دشير مالك روحه لها
انس : فاضين ماعندنا شي قلنا بنروح نغير جو
فراس : دام فاضي بنطلع انا وانت بكرة نشتري ملابس العيد
انس : تو باقي على العيد فترة يمدي اشتري بعدين
فراس : لا ! اشتره من بكره وتدرب على لبس الشماغ من اللحين كشخات السبايك مانبيها !
انس بقهر : فراس تكفى خلاص وعدتهم اني بجي
فراس : محد قالك توعدهم من كيسك
انتبهوا لبدر اللي دخل وهو يصفر : فراس شرف اخيرا اشوف ام فراس ريحة طبخها ناطحتني وانا بأول الحاره
ام فراس : هجل العشاء لفراس وبس ؟ بتشمه حتى لو كان انت
بدر وهو يجلس : علي ؟! والله ماتشتهين تطبخين الا عشانه
فراس : وانت وش حارق رزك ( نطق بهدوء ) إلا اقول الملف ماينرمى من تحت البيبان كذا ؟
بدر عقد حواجبه : وش ملفه وش بابه !
فراس : قصدي بريدي اللي محذوف على الارض لو دسته وخرب وش بتسوي ؟
بدر : تستهبل انت ؟! ما حذفته تحت بابك ولا شي ... ليش مو انت قايل لمرتك تاخذه معها !
فراس عقد حواجبه وهو يحاول يستوعب : ...
بدر بمزح : هههههههه عاد تصدق كنت ناوي اخطف نظره لبريدك بس نطت بحلقي وخذته !
فراس ( معقولة تدري ان البريد فيه شي ؟ ) سكت وهو يحاول يستوعب انها فعلا انقذته .. لو ماخذته وشافه بدر كان راح فيها : ....
بدر عقد حواجبه : وين سرحت !
فراس انتبه لنفسه وهو يتحنحن : ولا شي ... شخبار الدوام اليوم مضبوط ؟
بدر بملل : مافيه شي جديد كلش على حطة يدك .. بس على فكرة موظفينك خرا كل واحد يقزني ماني عاجبه لاني ماخذ هالمنصب !
فراس : طبيعي طيب منصبك تنافسي مره يحق لهم يكرهونك بعد
بدر بثقة : عادي اساسا كل مازاد عدد اللي يكرهوني عرفت اني ناجح بحد
فراس وهو ياكل : كل مازاد عدد اللي يكرهونك اعرف انك فعلا زفت النجاح ماله دخل بالموضوع
بدر : ولو ! اساسا قمة المتعه اني اجلس مع ناس يكرهوني ويغتابوني مع ذلك مايبينون قدامي هذا لحاله كاف اني احس ان حضوري له هيبه تخليهم منافقين كذا
فراس بتسليك : صح يا عضو مجلس الأمة
بدر : وبعدين احمد ربك صارت مشكلة اليوم وعرفت احلها .. ولا كان خسرت كثير
فراس : انت تحل مشكلة ؟! لا تضحكني صدقني لو اداوم بكره بحصلك حليت المشكلة بمشكلة ثانية .. زي البلدية تدفن الحفره تصير مطب
بدر : اقول ! بدال ما احل مشاكلك ليتني حليت نفسيتي ورجعت للبيت وطفيت نور غرفتي وشغلت المكيف ونمت !
ام فراس هزت راسها : مطول انت وياه بهالحكي والتشذيب ؟
بدر : والله التشذيب منه كل ما أقوله سالفه يقلبها نكد .. يكفي اني مو نايم زي الناس اليوم فوقها ما أقابل على الأكل ناس زي الناس بعد ؟!
انس : هههههههههه هطف انت وش ناس زي الناس ؟
بدر : إلا ماقلت لي بجد وينك اليوم ؟! ليشم اداومت
فراس وهو يتذكر نقاشه مع ابو نايف اللي مابغى يخلص : نقاشات خارجيه وكم شي ..
بدر : تصدق عاد اليوم جالس افكر ع طاري الخارجيه يعني , بخاطري نسافر
فراس طالعه بنص عين : صادق انت ؟
بدر : ايه ليش لا ودي اسافر احس اني مواطن أكثر من اللازم هالفترة نفسيتي تحتاج على الأقل اركب الطياره وأرجع انزل
فراس : والله لا تترك ديره لاتسافر لها بس قبل صلح أمورك مع مرافقة السفر
بدر عقد حواجبه : ..........
فراس : قصدي زوجتك ولا ناسي انك متزوج ؟
بدر عض شفته وهو ينطق بهدوء انكب عليه بطاريها : ع بالك اني مابي اصلح الأمور معها يعني ؟ ميت اصلح كلش لكني مليان بـ ولا شي وماعندي شي اعطيه اياها بهالفترة . . ماله داعي تنظلم معاي اكثر
فراس : ولمتى نفسيتك هذي بتستقر ! هذا انت موظف وش يمنعك ترجعها ؟ ولا تبغاها تكبر بهالإهمال ؟
بدر : فترة وتعدي ان شاء الله ..
فراس وهو متنرفز بجد : حياتك بتخلص وانت تقول فترة وتعدي !
بدر تنهد بضيق وهو يوقف : انا صاعد انام
فراس : تملص زي كل مره هذا انت اساسا .. ( مسح يديه وهو يوقف ) اكرمكم الله حمد الله
ام فراس تنهدت بضيق : صحه وعافيه
صعـد فراس وهو يتنهد بضيق فعلا كل حاجه مخبوصه هالفترة محد حاله مستقر .. هالتشتت صار يزعزعه , قبل يدخل غرفته وقف وهو يلتفت للدرج الجانبي المؤدي لشقته .. وتفكيره بالملف اللي كان راح يروح فيها لو هي ماخذته من بدر .. وقف لفترة ماهي قصيره ثم قادته رجله لفوق وهو يمشي بهدوء .. كأنه كان يتسلت لفوق .. دخل الشقه وهو ينتبه لكلش مسكر مافيه أي اضاءة .. وهي نايمة بالكنبه بالصالة .. عقد حواجبه ليش مازالت تنام بالصالة وهو خلاص من راح جده صار ينام تحت ؟! غرفة النوم تاركتها فاضيه ليه ؟ مشى بهدوء وهو يجلس القرفصاء عند الكنبه لحد ماصار ع مستواها وهي حاضنه الوساده لصدرها ونايمه بهدوء .. وشعرها الغزآلي الطويل لخصرها منسدل بشكل يخطف الأنفاس .. خاصه مع قميصها الطويل العفيف الأبيض بأكمام طويله وكأنها ملاك ... كانت نظرته ناعسه بتأثير المحيط حوله وهو يتأملها ويهمس بهدوء وهو يمد يده بتردد حتى وقعت على راسها ومسح بيده : معقولة صرتي تحسين بالخطر لا قرب ناحيتي وتبعدينه ... ؟
وجهها الصغير بحجم كف يده كان ضايع وسط شعرها الكثيف وكأن نومتها بعمقها وسلامها نومة طفل وعلى النقيض عطرها الأنثوي Gemini perfume تكتسح صدره الضيق .. تنهد بضيق وهو يوقف وينحني بهدوء وبرغبه ملحه له قرر يستجيب لها طبع بوسه على جبينها الناعم وبطرف انامله ابعد شعرها من وجهها وهو ينسحب بهدوء من المكــان . . وداخله تأنيب ضمير , و أقوى من تأنيب الضمير رغبة مو عارف يفسرها حتى لنفسه .. مشاعره تعبت ناحية هالمخلوقة ماعاد فاهم نفسه حولها .. تأثيرها صاير يزعجه .. يزعجه بقوه
عن بقايا الأشياء
العالقة على حافة الروح ,
تفاصيل صغيره جدا لكنها
لاتقال ,
ولا تكتب
ولا تنسى
تتأرجح .. ولا تسقط .
***
إبتــــسام .. /
الساعة 8 صحت مباشرة وهي مانامت غير ساعة , انسحبت من الغرفة وهي تلم روبها على جسمها وللحين مقهورة من أمس .. سحبت كاس قهوتها وهي تطلع تستنشق هواء ترد فيه روحها , جلست وهي تحسب فرق التوقيت بينها وبين هيثم ... قررت بكل الأحوال تدق تتطمن عنه .. دقت وهي تنتظر رده .. جاها رده بصوت منتعش : هلا والله بالصوت
ابتسام وهي تحس نفسيتها احسن لما سمعت صوته مبسوط : هلا والله بالمعرس .. حمدالله على السلامه يادب ! ليش ماعطيتني خبر انك وصلت ؟
هيثم : والله راح عن بالي بس عموما وصلنا متأخر يادوب نمنا مباشره .. خبرك أخوك ماتعود على السفر احس كبدي قالبه
ابتسام : ههههههههه والعصفوره معك متعودة على السفر
هيثم ابتسم وهو يطالعها وهي تفطر قدامه ومنسجمه معه تحاول تحزر المكالمه : لا وش حليلها للحين ما هايطت انها راعية سفريات
اسماء شهقت : انا اهايط على زوجي وحبيبي !
ابتسام : الله يسعدكم وان شاء الله مبسوط ومرتاح ؟
هيثم : ابشرك كلش تمام .. انتي كيفك وكيف عيالك ونايف ؟
ابتسام : كلهم نايمين الله يصلحهم عشان كذا قلت اكلمك اشوفك
هيثم عقد حواجبه وهو يحسب فرق الوقت : اساسا وش مصحيك بدري كذا ؟
ابتسام : نايمه بدري قلت اقوم وش يجلسني .. وصرت افقد الهدوء شوي من يصحون الشيوخ وانا ما اخلص من شغله لشغله
هيثم : الله يعينك
ابتسام : يله انا بسكر قلت اكلم اتطمن عنك , وصل سلامي لاسوم
هيثم : يوصل ابشري
سكرت ابتسام لانها انتبهت لنافذة غرفة النوم يشتغل نورها يعني أكيد صحى .. احتست قهوتها بهدوء وهي تتمنى يمر مرور السلام ومايحاول يكلمها .. لكن للأسف ماصحى إلا لما انتبه لانها مو موجودة .. 5 دقايق تقريبا وكان طـلع وسحب المقعد جمبها وهو يبتسم ابتسامه كسولة يلطف الجو : يا بخت هالصبح .. صح النوم ياعمري
ابتسام ارمقته بنظره ونطقت بهدوء : قبل تبدا تصفصف اعذارك .. انا مسامحتك وخلاص لاتصدع راسي على هالصبح
نايف تنهد : صدقيني والله ماكان بيدي طرى شغل مع ابوي ماتركني
ابتسام : ودي اقنعك والله اني ماراح اسلك لك بس بجد انا معد صرت اعرف اتفاعل معك بهالأعذار خلاص انا فهمت الوضع , انت شخص انسحابي تماما فماراح ارفع قدري بعينك خلاص وماراح اتصرف كأني الوحيدة بحياتك .. والله يهنيك بس خلاص لاعاد تعلقني بكلامك اللي مايودي ولا يجيب
نايف : مو كأن كلامك ظلم ؟ قلت لك كنت مشغول بجد
ابتسام : عمر اللي يحبك يانايف مايتخير بينك وبين أي شخص ! مهما كان لأن طبيعي أي احد يعزم ماراح يحتار فيك .. واذا احترت فيني ؟ فانا اقولك درب السلام لك من اللحين
نايف : مو موضوع اتخير ! ابوي هذا غصب عني حتى لو عايف شغلته امسكها
ابتسام : حتى اذا ! انا خلاص كرهت الوضع وعقب امس الشي الوحيد اللي ممكن تسويه بيسعدني هو ولا شي للاسف
نايف بقهر : تصدقين مهما قسى وقتك انتي ماعمري جفيتك .. وانتي صايره شغلتك هالايام !
ابتسام بقهر : لأني ما اثق في كل من هب ودب ! فوقت اعطيك ثقتي كامله وتخذلها طبيعي انقهر ولا بالوضع العام صدقني انا مكتفيه بنفسي
نايف باكتئاب : آجل براحتك ..
انسحب من المحادثة وهو يصـعد ..دق على بدر جاه صوت المخمور بالنوم : هلاا
نايف : نايم اجل .؟
بدر : ايه شـايف قد ايش اغليك رااد عليك وانا بنص نومتي فيه ناس حتى وانا صاحي ما أرد عليهم
نايف : لا خلاص ارجع نام بغيت كان نطلع شوي
بدر : للاسف مايمدي .. بقوم اللحين بعد وبداوم متأخر
نايف : الله يوفقك اجل
سكر السماعه وتو قرر بينام دق عليه أبوه .. تنهد بضيق الظاهر خلاص بيربط عند بيت اهله هالفترة ..
***
عقد حواجبه بضيق من صوت موبايله ... استقعد من نومته وهو يسحب الجوال .. المتصل ( لـؤي ), كشر وجهه وهو يقفلها دون يرد ويرمي الجوال على جمب ويمسح على وجهه .... الساعة 10 ماقصر بالنوم , غسل وجهه وبدل لبسه لثوب يستعد يطلع وقف عند المرايه وهو يثني غترته ويوازن عقاله ويسحب نظارته الشمسيه ويــنزل في مقدمة الدرج رنين ضحكتها كان اول حاجه سمعها شد بقبضته على سلم الدرج لاشعوري .. وهو يحس نفسه يضيق , تنهـد وهو ينزل بهدوء .. كانت معطيته ظهرها وهي متربعه على الكنبه وقدامها ام فراس وياسمين وتسولف بحماس : ههههههههههههه المشكلة ماحذفتها بالغلط والله بس بثره شاسوي !
ام فراس ابتسمت وهي تنتبه لفراس : صحيـــت ؟!
غادة كبست عيونها وهي تلتفت ابتسمت بانتعاش : صبـاح الخير
فراس جلس على الكنبه جمب ياسمين وهو يرد على امه : ايه صحيت .. صباح النور
ام فراس وهي تصب له قهـوه وتمدها له : الله يصبحك بأنوار النبي .. بدر طلع بدري للشركة ترا
فراس وهو يشرب قهوته هز راسه دون ينطق : ....
غادة استغربت هدوئه قالت بمحاولة يائسة : خاطرك بفطور ؟
فراس وهو يتهرب انه يطالعها .. رفع عيونه بنظرة قشعرت بها وكأنه معصب عليها !! بلعت ريقها وهي تندم انها سألت :...
ام فراس عقدت حواجبها : شفيك تطالع البنت كذا ؟ ماقالت شي تسألك عن فطورك
فراس جلس فنجاله وهو يوقف : بفطر برا ماعندي وقت
وطلع دون يزيد بالكلام .. ام فراس : هاو شفيه مزاجه معكر كذا ؟
غادة عقد حواجبها وهي تتسائل وش قصده بهالنظرة .. وقفت بعجله : دقيقة بشوفه قبل يطلع
حاولت ام فراس تمنعها لايغثها اكثر لكن غادة كانت تهرول بمشيتها وهي تطلع حتى طلعت وهي تنتبه له بسيارته : فراااس
فراس شد يده على الطاره وهو ينتبه لها تمشي ناحية نافذة سيارته بقامتها النحيله الملفته كأنها عارضه بالطول الممشوق وشعرها الملفت يتطاير مع الهواء .. نطق باقتضاب دون يلتفت لها : وش مطلعك وش تبين ؟!
غادة وهي ترجع شعرها ورا اذنها : وش سالفة النظرة قبل شوي ؟
فراس ارخى يده من الطاره وهو يسترخي على الكرسي .. تنهد بضيق ثم نطق بحده : وش سالفة الظرف ؟ ايش اللي خلاك تاخذينه من بدر ؟ ( ألتفت لها اخيرا من وراء نظارته الشمسيه ) وش في راسك هالمره عشان تتوقعين اني مابي بدر يقراه !
غادة ببساطة جاوبت : حدس .. كثر ماعشت حياتي في خطر صرت احس به اذا قرب مني
فراس عقد حواجبه بعدم اقتناع : حدس ولا لقافتك هالمره وين وصلتك ؟
غادة : حدس صدقني ... ( كملت بقهر ) بس عموما ليتني ما اخذته لأن اللي تسويه غلط ليش ماتترك اللي حولك يعرفون وجعك ؟
فراس بحده : قبل تحسين ان اللي اسويه غلط حسي ان مالك دخل !!!
غادة شدت ع شفتها بقهر : حسيت .. شكرا لانك ذكرتني ان مالي دخل
فراس : مو كل مرة بذكرك .. علقيه حلق باذنك لاهنتي
سكر نافذة سيارته وهو يفتح القراج يطلع ... مايدري ليش يحس انه احسن اذا جرحها , وكأنه يحاول بيأس يثبت لنفسه ان مافيه حاجه مميزه فيها تمنعه يجرحها .. عض شفته بقهر وهو يتذكر امسية أمس .. وقبل أمس .. ( فراس ارجع عقلك ! متى انهبلت لهالدرجة ؟ )
اما عند غادة تنهدت بضيق وهي تحس بقهر .. تحتاج تشرب صبر الأرض عشان تساير وضعه , رن جوالها بجيبها .. تنهدت بضيق وهي تسحب جوالها وترد : هلا ابتسام
ابتسام : غريبة صاحيه هالحزة ؟ داقه وانا اقول ماحترد علي الا ظهر
غادة : لا عكست النظام اللحين صار الظهر غير قابل للعيش عندي انام ع طول
ابتسـام : كويس احسن لك كذا
غادة : ايوه أحسن حمد الله .. شخبارك طمنيني عنك ؟
ابتسام : حمدالله .. قلت اكلمك اشوفك اذا تقدرين تجين اليوم اشوفك ؟
غادة بقهر : لا مستحيل .. الشيخ مزاجه معكر ماراح اقوله شي
ابتسام : وهالشيخ طول حياته مزاجه معكر .؟ نموت يعني
غادة : مدري والله انا صار اقصى طموحي ان يومي يمر بس دون احد يعكر مزاجي
ابتسام : طيب حاولي يمكن يوافق تراه احيان يصدمك زي اخر مره قالك نامي عندي عادي
غادة : لا والله شكل هالمره الموضوع كايد صدق .. ( غاده بانتباه ) إلاا صصح انتي ماتدرين عن شي ؟ شكل فيه سالفة صايره في بيت اهل رجلك
ابتسام عقدت حواجبها : اهل نايف ؟
غادة : الظاهر لؤي صاير معه شي فراس حتى يومين مارجع للبيت من ورا هالسالفة
ابتسام انصدمت .. معقوله يكون صادق صاير شي وماقدر ! : والله مدري ماسمعت شي .. بس نايف كان ضايق فعلا اليوم ( عضت ع شفتها وهي تنطق بعجل ) انا حسكر اكلمك بعدين
سكرت السماعة مباشرة وهي تتصل على هيثم .. سمعت منه كم مره انه مع لؤي , اكيد بيعرف اذا صاير معه شي أجل .. اول ما لقط الخط نطقت بسرعة : معليش هيثم استحملني شوي جالسة ازعجك بشهر عسلك
هيثم عقد حواجبه وهو مستغرب كلامها : شفيك ؟ صاير شي
ابتسام : ابي اسألك حاجه على السريع
هيثم : تفضلي
ابتسام بلعت ريقها : لـؤي اخو نايف تعرفه انت صح ؟
هيثم : آيه اعرفه والنعم فيه .. وش فيه ؟
ابتسام : تعرف اذا صاير معه مشكله هالفتره او فيه شي ؟!
هيثم مباشرة نغزه احساسه لسارا .. كان متأكد ان بينهم شي , بس عزاه راح يكون قد ايش حجم هالشي :...........
ابتسام : هيثم !
هيثم استوعب : آيه هلا ... لا والله على حد علمي مافيه شي ..
ابتسام باحباط : خلاص اجل سوري ع الازعاج
هيثم : سلام
سكر السماعة وباله مشغول .. لايكون صدق صاير مع البنت شي خطير ومو عارفه تتصرف , رفع جواله بتردد يدور رقمها لكن قاطعه اسماء ترجع لجلستهم وبيديها ايسكريمين وتمد له حصته : تفضـــل
هيثم شد ع جواله وهو يستلم الآيسكريم ويرد باقتضاب : شكرا
اسماء عقدت حواجبها وهي تحس مزاجه تعكر : شفيك مكشر ؟
هيثم : مافيني شي ( تنهد بضيق ) وش مجلسنا هنا زحمه مره
اسماء استغربت بجد هو اللي جايبها واللحين موع اجبه قالت : اذا مو عاجبك الجو هنا نقدر نقوم نشوف مكان ثاني ؟
هيثم هز راسه بموافقه وهو صفوه تعكر وباله مشغـول ماهو مرتاح يحس انها بمصيبه مايقدر يطلعها منها .. بينما اسماء كانت تطالعه بتعجب , باله رايح بعيد تماما ماتدري وش صار عليه فجأه !
***
فراس استسلم بالمحـاولة السابعه لاتصالات لؤي رد دون يتكلم : ........
لؤي : فراس ! وينك لي من امس ادق عليك ؟
فراس بهدوء : شبغيت ؟
لؤي : حلوه شبغيت !! بغيت بنتي وامها وين حاطهم انت ؟!
فراس : اتوقع كان بينا اتفاق .. ما اشوفك سويت اللي مفروض تسويه عشان اقولك
لؤي : مالك داعي فراس انا وضحت خلاص اني ماهمني ابوي ولا غيره .... ابي اعيش حياتي على اللي اخترته وبس ! تعبت من الكل يحاول يحكمني
فراس : والله انا اعجز افهم كيف تزعل مني اذا سويت لك نفس الشي اللي سويته لي !
لؤي : وانا متى سويت معك حركة كذا !
فراس : اتكلم عن وعدنا .. مو انت اخلفتني وماجيت , انا ماراح اوصلك لبنتك وكلن حر
لؤي : مو وقت عتبك فراس ..
فراس : اني اعاملك بنفس طريقتك تغنيني عن مليون عتاب بضيع وقتي اقوله ... يله سلام
سكر السماعة وهو يستلم مكالمة ثانية وينطق بهدوء : احجز طيارته باقرب وقت وذلفها هي وبنتها لوين مايبون .. بس مايكون الخليج!
: حـــاضر
سكر السماعة وهو يرسل لعمه ( عشان معاد تسأل .. البنت طيارتها اليوم بتسافر , انت حر بولدك )
تنهد بضيق وهو يحس بقهر خسارته للؤي .. خلاص معاد تمشي كلمة صديق بينهم بعمره لؤي ماراح يسامحه على انه سفرها للمره الثانية وهو صار راضي بهالواقع .. جاته رساله من ( سارا ) /
شكـرا لانك دبرت طيارتي ماراح انسى لك هالمعروف ..
وبليز لاتقول للؤي انا فين رايحه
ارتسم ع ثغره ابتسامه جانبيه : والله حتى مافكرت في المهبول اللي ضاع عمره وضيع اهله عشانها
جاته رساله ثانية منها وكأنها ترد على تفكيره /
لا تحسب اني بروحتي بهالشكل ارخص لؤي أو ما يهمني .. انا بحياتي ماتمنيت شي كثر ماتمنيته
بس انا بنفس الوقت عقلانية واعرف الواقع .. ومصير بنتي ما ابيه يوقف على نزاعات لؤي واهله
بلغه اني شاكره لكل حاجه قدمها لي .. وخاصه مايا راح اعتبرها اعز تذكار عندي منه
زفر دون نفس وهو ماكمل قراية الرساله حتى وقفها بالنص ورمى جواله وهو يتكي .. كل حاجه هالفترة مزعزعته يحتاااج استرخاء راسه صار ثقل الجبال .. امنيته تقلع طيارتها من ذكريات لؤي ويرجع كل شي مثل ماكان مايدري كيف خبصت كيانه بهالشكل
***
: هيــثم
هيثم اللي كان بالقارب معها وسرحان : ايوه
اسماء وشعرها الاشقر يتطاير بالهواء : شفيك لك ساعتين مو عاجبني وضعك ؟
هيثم : مافيني شي ثالث مرة اقولك !!!
اسماء كبست عيونها : ايوه عارف قلت لي بس ماصدقتك ... يعني بجد بجد مافيك شي ؟
هيثم تنهد بضيق : بجد بجد مافيني شي ولعد تسألين وحتى لو فيني شي ماحقولك فخلاص
اسماء بقهر : ليش ماتقولي !
هيثم : لان مالي خلق اتكلم خلاص ؟
اسماء بقهر : ما اعجبك الجو هنا ؟
هيثم بقلة صبر : انتي اللي ودك تزعلين نفسك , ايوه ما اعجبني , مبسوطه اللحين ؟
اسماء وهي ماتعودت ع اعصابه ضيقه .. ردت بانفعال مقهور : وليش تصارخ طيب ؟ صح اني مستحيل ازعل منك بس لا تفلها زيادة عشان لا تزعل انت !
هيثم كبس عيونه : تهددين يعني ؟
اسماء بصراخ واعصابها طفرت : ايه اهدد !
هيثم : طبيعي ترا تتقلب نفسية الشخص من فترة لفترة فاذا انتي تدورين شخص يكون على نفس المود طول الوقت انتي تدورين شخص مستحيل
اسماء زفرت : ماهوب عذر هذا شهر عسل بحياتي ماشفت عريس متنكد بشهر عسله ... اقل شي شاركني النكد مو تتركني مثل الطرشاء في الزفه
هيثم : وانا خرقت العادة وقانون الكون وتنكدت بشهر عسلي ! جريمة ؟!
اسماء طبقت شفتيها بعلامة قلة صبر .. ثم زفرت الهواء بصدرها وبنظرة مجنونه عطته ظهرها وهي تمسك سياج القارب وتتسلقه .. فتح عيونه بصدمه وهو يشوفها واقفه ع طرف القارب بعلامة قفز : شتسوين ؟
اسماء : زوجي متنكد معي ومايحبني خلاص قررت اكب نفسي وترا ما اعرف اسبح .. ولا تنقذني لو سمحت
هيثم : اقص يدي يا كذابه لو ماتعرفي تسبحي .. بس بكل الأحوال بلاش فضايح شوفي القوارب حولنا كيف هاجدين وحنا ماتهنينا
اسماء بصراخ مقهور : كله منـــــك ! تحطني بيت تحطني جدار تحطني مداس مايهمك ! شنو قيمتي اجل روح اشتر لك بيت وجدار يمشي جمبك يكفي عني
هيثم زفر : ياليل ما اطولك .. ( نطق بتسليك ) طبي اجل لايفوتك الماء البارد
فتح عيونه بصدمه مجرد مانطقها ارخت جسمها ولو ما مسك ذراعها بسرعه كان طاحت .. والصادم اكثر ؟! لما مسكها وجسمها مازال مرتخي ومتعلق بيده كانت مبتسمه ابتسامتها الطفولية : ماتفرط فيني ؟
هيثم كبس عيونه وهو يسحبها بكل قوته حتى استوت ع سطح القارب وضرب راسها : بــــــــــزر انتي !
اسماء ماتت ضحك وهي مبسوطه بجد : ههههههههههههههههههههههههههه والله وجهك كان خايف بجد .. ع بالي انتي مجنونه وبطب صدق ؟
هيثم فتح عيونه : لااا ع اساس ماطبيتي ؟! لو ما مسكتك كان طحتي
اسماء : ايه بس انا كنت واثقة انك حتمسكني عشان كذا
هيثم جلس ع ارض القارب وهو يهز راسه ويبتسم : والله انا رسميا متزوج هبله .. ( رفع راسه لها ) كذا تطلعين الواحد من جو النكد ؟ من جو نكد لخوف ؟
اسماء : شاسوي وترا تهمني مصلحتك بعد مو بس ضحكتك .. يعني لو بخاطرك تقولي وش منكدك انا اسمعك
هيثم ابتسم وهو يقبص خدها بنعومة : من عرف النكد وانتي جمبه ؟
اسماء برطمت وهي تنطق بلوم : أنت !
هيثم بنبرته الهاديه : الله يهديني اجل
***
تنهد ابو نايف براحة وهو ينطق : هذا فراس مراسلني كويس رايح يسفرها اليوم
ام نايف بتأييد : اشوى حمد الله
نايف اللي كان موجود له ساعتين محتفظ بهدوئه , نطق بقهر : كويس ؟ ليش كويس ؟ ع اساس لؤي وقت يدري راح ينبسط ويرتاح ويرجع ولدك وكل شي بيرجع طبيعي
ابو نايف : المهم انها تذلف من وجهنا ولؤي مشكلته محلوله مع الوقت
نايف : مدري كيف تفكر كذا .؟ ماظنيت مشكلته محلوله ... الولد بينمرض وبنخسره مره وحده
ابو نايف : اكرمني بسكوتك ! الموضوع كله زله وبينتهي
نايف : لو هو زله كان زمان انتهى له سنتين ما انتهى .. رغم كل الوسائل اللي جربتها , بس انتو هذا شغلكم جيل فاسد معقد نفسيا ماعنده هدف
ابو نايف : نـــــــــــــايف !! اخلص من لؤي اجي فيك ؟
نايف ابتسم ابتسامه صفراء وهو ينطق بقهر : انا بس اقولك اللي حيصير ... وبتشوف ( وقف بثقل ) بالإذن انا لي ساعتين جالس اسمع حكي فاضي بس ..
طلع من بيت أهلــــه وهو الدنيا ضايقه فيه .. هالمشكلة مره قلبضه قابه انها ماراح تنتهي على خير , ومع عناد لؤي وابوه واحد فيهم بيخسر خساره كبيره .. والله يستر من عاقبتها ..